੨੦-੨੪. ਞਾਣਪਞ੍ਚਕਨਿਦ੍ਦੇਸਵਣ੍ਣਨਾ

੭੫. ਞਾਣਪਞ੍ਚਕਨਿਦ੍ਦੇਸੇ ਤੇਸਂ ਪਞ੍ਚਨ੍ਨਂ ਞਾਣਾਨਂ ਅਨੁਪੁਬ੍ਬਸਮ੍ਬਨ੍ਧਸਬ੍ਭਾਵਤੋ ਏਕਤੋਵ ਪੁਚ੍ਛਾਵਿਸ੍ਸਜ੍ਜਨਾਨਿ ਕਤਾਨਿ. ਅਭਿਞ੍ਞਾਤਾ ਹੋਨ੍ਤੀਤਿ ਧਮ੍ਮਸਭਾਵਲਕ੍ਖਣਜਾਨਨਵਸੇਨ ਸੁਟ੍ਠੁ ਞਾਤਾ ਹੋਨ੍ਤਿ. ਞਾਤਾ ਹੋਨ੍ਤੀਤਿ ਞਾਤਪਰਿਞ੍ਞਾਵਸੇਨ ਸਭਾਵਤੋ ਞਾਤਤ੍ਤਾ ਞਾਤਾ ਨਾਮ ਹੋਨ੍ਤਿ. ਯੇਨ ਞਾਣੇਨ ਤੇ ਧਮ੍ਮਾ ਞਾਤਾ ਹੋਨ੍ਤਿ, ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾਤਿ ਸਮ੍ਬਨ੍ਧੋ. ਇਮਿਨਾਵ ਨਯੇਨ ਸੇਸਞਾਣਾਨਿਪਿ ਯੋਜੇਤਬ੍ਬਾਨਿ. ਪਰਿਞ੍ਞਾਤਾ ਹੋਨ੍ਤੀਤਿ ਸਾਮਞ੍ਞਲਕ੍ਖਣਵਸੇਨ ਸਮਨ੍ਤਤੋ ਞਾਤਾ ਹੋਨ੍ਤਿ. ਤੀਰਿਤਾ ਹੋਨ੍ਤੀਤਿ ਤੀਰਣਪਰਿਞ੍ਞਾਵਸੇਨ ਅਨਿਚ੍ਚਾਦਿਤੋ ਉਪਪਰਿਕ੍ਖਿਤਾ ਸਮਾਪਿਤਾ ਨਾਮ ਹੋਨ੍ਤਿ. ਪਹੀਨਾ ਹੋਨ੍ਤੀਤਿ ਅਨਿਚ੍ਚਾਨੁਪਸ੍ਸਨਾਦਿਨਾ ਞਾਣੇਨ ਨਿਚ੍ਚਸਞ੍ਞਾਦਯੋ ਭਙ੍ਗਾਨੁਪਸ੍ਸਨਤੋ ਪਟ੍ਠਾਯ ਪਹੀਨਾ ਹੋਨ੍ਤਿ. ਪਰਿਚ੍ਚਤ੍ਤਾ ਹੋਨ੍ਤੀਤਿ ਪਹਾਨਵਸੇਨੇਵ ਛਡ੍ਡਿਤਾ ਨਾਮ ਹੋਨ੍ਤਿ. ਭਾਵਿਤਾ ਹੋਨ੍ਤੀਤਿ ਵਡ੍ਢਿਤਾ ਪਰਿਭਾਵਿਤਾ ਚ ਹੋਨ੍ਤਿ. ਏਕਰਸਾ ਹੋਨ੍ਤੀਤਿ ਸਕਿਚ੍ਚਸਾਧਨਪਟਿਪਕ੍ਖਪਹਾਨੇਨ ਏਕਕਿਚ੍ਚਾ ਹੋਨ੍ਤਿ, ਪਚ੍ਚਨੀਕਤੋ ਵਾ ਵਿਮੁਤ੍ਤਿਵਸੇਨ ਵਿਮੁਤ੍ਤਿਰਸੇਨ ਏਕਰਸਾ ਹੋਨ੍ਤਿ. ਸਚ੍ਛਿਕਤਾ ਹੋਨ੍ਤੀਤਿ ਪਟਿਲਾਭਵਸੇਨ ਫਲਧਮ੍ਮੋ ਪਟਿਵੇਧਵਸੇਨ ਨਿਬ੍ਬਾਨਧਮ੍ਮੋਤਿ ਪਚ੍ਚਕ੍ਖਕਤਾ ਹੋਨ੍ਤਿ. ਫਸ੍ਸਿਤਾ ਹੋਨ੍ਤੀਤਿ ਪਟਿਲਾਭਫੁਸਨੇਨ ਪਟਿਵੇਧਫੁਸਨੇਨ ਚ ਫਸ੍ਸਿਤਾ ਅਨੁਭੂਤਾ ਹੋਨ੍ਤਿ. ਇਮਾਨਿ ਪਞ੍ਚ ਞਾਣਾਨਿ ਹੇਟ੍ਠਾ ਸੁਤਮਯਞਾਣਵਸੇਨ ਵੁਤ੍ਤਾਨਿ, ਇਧ ਸਕਿਚ੍ਚਸਾਧਨਵਸੇਨ.

ਞਾਣਪਞ੍ਚਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.