੧੨. ਓਤਰਣਹਾਰਵਿਭਙ੍ਗਵਣ੍ਣਨਾ

੪੨. ਤਤ੍ਥ ਕਤਮੋ ਓਤਰਣੋ ਹਾਰੋਤਿ ਓਤਰਣਹਾਰਵਿਭਙ੍ਗੋ. ਤਤ੍ਥ ਅਸੇਕ੍ਖਾ ਵਿਮੁਤ੍ਤੀਤਿ ਅਯਂ ਤੇਧਾਤੁਕੇ ਵੀਤਰਾਗਤਾ ਅਸੇਕ੍ਖਾ ਫਲਵਿਮੁਤ੍ਤਿ. ਤਾਨਿਯੇਵਾਤਿ ਤਾਨਿ ਅਸੇਕ੍ਖਾਯਂ ਵਿਮੁਤ੍ਤਿਯਂ ਸਦ੍ਧਾਦੀਨਿ. ਅਯਂ ਇਨ੍ਦ੍ਰਿਯੇਹਿ ਓਤਰਣਾਤਿ ਅਸੇਕ੍ਖਾਯ ਵਿਮੁਤ੍ਤਿਯਾ ਨਿਦ੍ਧਾਰਿਤੇਹਿ ਸਦ੍ਧਾਦੀਹਿ ਇਨ੍ਦ੍ਰਿਯੇਹਿ ਸਂਵਣ੍ਣਨਾਯ ਓਤਰਣਾ.

ਪਞ੍ਚਿਨ੍ਦ੍ਰਿਯਾਨਿ ਵਿਜ੍ਜਾਤਿ ਸਮ੍ਮਾਸਙ੍ਕਪ੍ਪੋ ਵਿਯ ਸਮ੍ਮਾਦਿਟ੍ਠਿਯਾ ਉਪਕਾਰਕਤ੍ਤਾ ਪਞ੍ਞਾਕ੍ਖਨ੍ਧੇ ਸਦ੍ਧਾਦੀਨਿ ਚਤ੍ਤਾਰਿ ਇਨ੍ਦ੍ਰਿਯਾਨਿ ਵਿਜ੍ਜਾਯ ਉਪਕਾਰਕਤ੍ਤਾ ਸਙ੍ਗਣ੍ਹਨਵਸੇਨ ਵੁਤ੍ਤਾਨਿ. ਸਙ੍ਖਾਰਪਰਿਯਾਪਨ੍ਨਾਨੀਤਿ ਪਞ੍ਚਸੁ ਖਨ੍ਧੇਸੁ ਸਙ੍ਖਾਰਕ੍ਖਨ੍ਧੇ ਅਨ੍ਤੋਗਧਾਨਿ. ਯੇ ਸਙ੍ਖਾਰਾ ਅਨਾਸਵਾਤਿ ਤਂ ਸਙ੍ਖਾਰਕ੍ਖਨ੍ਧਂ ਵਿਸੇਸੇਤਿ, ਅਗ੍ਗਫਲਸ੍ਸ ਅਧਿਪ੍ਪੇਤਤ੍ਤਾ. ਤਤੋ ਏਵ ਚ ਨੋ ਭਵਙ੍ਗਾ. ਧਮ੍ਮਧਾਤੁਸਙ੍ਗਹਿਤਾਤਿ ਅਟ੍ਠਾਰਸਧਾਤੂਸੁ ਧਮ੍ਮਧਾਤੁਸਙ੍ਗਹਿਤਾ. ਯਦਿਪਿ ਪੁਬ੍ਬੇ ਵੀਤਰਾਗਤਾ ਅਸੇਕ੍ਖਾ ਵਿਮੁਤ੍ਤਿ ਦਸ੍ਸਿਤਾ, ਤਸ੍ਸਾ ਪਨ ਪਟਿਪਤ੍ਤਿਦਸ੍ਸਨਤ੍ਥਂ ‘‘ਅਯਂ ਅਹਮਸ੍ਮੀਤਿ ਅਨਾਨੁਪਸ੍ਸੀ’’ਤਿ ਦਸ੍ਸਨਮਗ੍ਗੋ ਇਧ ਵੁਤ੍ਤੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਯਂ ਅਹਮਸ੍ਮੀਤਿ ਅਨਾਨੁਪਸ੍ਸੀ’’ਤਿਆਦਿ ਵੁਤ੍ਤਂ. ਸਬ੍ਬਂ ਵੁਤ੍ਤਨਯਮੇਵ.

੪੩. ਨਿਸ੍ਸਿਤਸ੍ਸ ਚਲਿਤਨ੍ਤਿ ਤਣ੍ਹਾਦਿਟ੍ਠਿਵਸੇਨ ਕਮ੍ਮਂ ਅਨਵਟ੍ਠਾਨਂ. ਚੁਤੂਪਪਾਤੋਤਿ ਅਪਰਾਪਰਂ ਚਵਨਂ ਉਪਪਤਨਞ੍ਚ. ਨਿਸ੍ਸਿਤਪਦੇ ਲਬ੍ਭਮਾਨਂ ਨਿਸ੍ਸਯਨਂ ਉਦ੍ਧਰਨ੍ਤੋ ਆਹ – ‘‘ਨਿਸ੍ਸਯੋ ਨਾਮਾ’’ਤਿ. ਤਣ੍ਹਾਨਿਸ੍ਸਯੋਤਿ ਤਣ੍ਹਾਭਿਨਿਵੇਸੋ. ਸੋ ਹਿ ਤਣ੍ਹਾਚਰਿਤਸ੍ਸ ਪਤਿਟ੍ਠਾਭਾਵੇਨ ਤਥਾ ਵੁਤ੍ਤੋ. ਏਵਂ ਦਿਟ੍ਠਿਨਿਸ੍ਸਯੋਪਿ ਦਟ੍ਠਬ੍ਬੋ. ਰਤ੍ਤਸ੍ਸ ਚੇਤਨਾਤਿ ਚੇਤਨਾਪਧਾਨਤ੍ਤਾ ਸਙ੍ਖਾਰਕ੍ਖਨ੍ਧਧਮ੍ਮਾਨਂ ਚੇਤਨਾਸੀਸੇਨ ਤਣ੍ਹਂ ਏਵ ਵਦਤਿ. ਤੇਨੇਵਾਹ – ‘‘ਅਯਂ ਤਣ੍ਹਾਨਿਸ੍ਸਯੋ’’ਤਿ. ਯਸ੍ਮਾ ਪਨ ਵਿਪਰੀਤਾਭਿਨਿਵੇਸੋ ਮੋਹਸ੍ਸ ਬਲਵਭਾਵੇ ਏਵ ਹੋਤਿ, ਤਸ੍ਮਾ ‘‘ਯਾ ਮੂਲ਼੍ਹਸ੍ਸ ਚੇਤਨਾ, ਅਯਂ ਦਿਟ੍ਠਿਨਿਸ੍ਸਯੋ’’ਤਿ ਵੁਤ੍ਤਂ.

ਏਵਂ ਚੇਤਨਾਸੀਸੇਨ ਤਣ੍ਹਾਦਿਟ੍ਠਿਯੋ ਵਤ੍ਵਾ ਇਦਾਨਿ ਤਤ੍ਥ ਨਿਪ੍ਪਰਿਯਾਯੇਨ ਚੇਤਨਂਯੇਵ ਗਣ੍ਹਨ੍ਤੋ ‘‘ਚੇਤਨਾ ਪਨ ਸਙ੍ਖਾਰਾ’’ਤਿ ਆਹ. ਯਾ ਰਤ੍ਤਸ੍ਸ ਵੇਦਨਾ, ਅਯਂ ਸੁਖਾ ਵੇਦਨਾਤਿ ਸੁਖਾਯ ਵੇਦਨਾਯ ਰਾਗੋ ਅਨੁਸੇਤੀਤਿ ਕਤ੍ਵਾ ਵੁਤ੍ਤਂ. ਤਥਾ ਅਦੁਕ੍ਖਮਸੁਖਾਯ ਵੇਦਨਾਯ ਅਵਿਜ੍ਜਾ ਅਨੁਸੇਤੀਤਿ ਆਹ – ‘‘ਯਾ ਸਮ੍ਮੂਲ਼੍ਹਸ੍ਸ ਵੇਦਨਾ, ਅਯਂ ਅਦੁਕ੍ਖਮਸੁਖਾ ਵੇਦਨਾ’’ਤਿ. ਇਧ ਵੇਦਨਾਸੀਸੇਨ ਚੇਤਨਾ ਵੁਤ੍ਤਾ. ਤਣ੍ਹਾਯਾਤਿ ਤਣ੍ਹਂ. ਦਿਟ੍ਠਿਯਾਤਿ ਦਿਟ੍ਠਿਂ. ਯਥਾ ਵਾ ਸੇਸਧਮ੍ਮਾਨਂ ਤਣ੍ਹਾਯ ਨਿਸ੍ਸਯਭਾਵੇ ਪੁਗ੍ਗਲੋ ਤਣ੍ਹਾਯ ਨਿਸ੍ਸਿਤੋਤਿ ਵੁਚ੍ਚਤਿ. ਏਵਂ ਤਣ੍ਹਾਯ ਸੇਸਧਮ੍ਮਾਨਂ ਪਚ੍ਚਯਭਾਵੇ ਪੁਗ੍ਗਲੋ ਤਣ੍ਹਾਯ ਨਿਸ੍ਸਿਤੋਤਿ ਵੁਚ੍ਚਤੀਤਿ ਆਹ – ‘‘ਤਣ੍ਹਾਯ ਅਨਿਸ੍ਸਿਤੋ’’ਤਿ.

ਪਸ੍ਸਦ੍ਧੀਤਿ ਦਰਥਪਟਿਪ੍ਪਸ੍ਸਮ੍ਭਨਾ. ਕਾਯਿਕਾਤਿ ਕਰਜਕਾਯਸਨ੍ਨਿਸ੍ਸਿਤਾ. ਚੇਤਸਿਕਾਤਿ ਚਿਤ੍ਤਸਨ੍ਨਿਸ੍ਸਿਤਾ. ਯਸ੍ਮਾ ਪਨ ਸਾ ਦਰਥਪਟਿਪ੍ਪਸ੍ਸਦ੍ਧਿ ਕਾਯਚਿਤ੍ਤਾਨਂ ਸੁਖੇ ਸਤਿ ਪਾਕਟਾ ਹੋਤਿ, ਤਸ੍ਮਾ ‘‘ਯਂ ਕਾਯਿਕਂ ਸੁਖ’’ਨ੍ਤਿਆਦਿਨਾ ਫਲੂਪਚਾਰੇਨ ਵੁਤ੍ਤਾਯ ਪਸ੍ਸਦ੍ਧਿਯਾ ਨਤਿਅਭਾਵਸ੍ਸ ਕਾਰਣਭਾਵਂ ਦਸ੍ਸੇਤੁਂ ‘‘ਪਸ੍ਸਦ੍ਧਕਾਯੋ’’ਤਿਆਦਿ ਵੁਤ੍ਤਂ. ਸੋਤਿ ਏਵਂ ਵਿਮੁਤ੍ਤਚਿਤ੍ਤੋ ਖੀਣਾਸਵੋ. ਰੂਪਸਙ੍ਖਯੇ ਵਿਮੁਤ੍ਤੋਤਿ ਰੂਪਾਨਂ ਸਙ੍ਖਯਸਙ੍ਖਾਤੇ ਨਿਬ੍ਬਾਨੇ ਵਿਮੁਤ੍ਤੋ. ਅਤ੍ਥੀਤਿਪਿ ਨ ਉਪੇਤੀਤਿ ਸਸ੍ਸਤੋ ਅਤ੍ਤਾ ਚ ਲੋਕੋ ਚਾਤਿਪਿ ਤਣ੍ਹਾਦਿਟ੍ਠਿਉਪਯੇਨ ਨ ਉਪੇਤਿ ਨ ਗਣ੍ਹਾਤਿ. ਨਤ੍ਥੀਤਿ ਅਸਸ੍ਸਤੋਤਿ. ਅਤ੍ਥਿ ਨਤ੍ਥੀਤਿ ਏਕਚ੍ਚਂ ਸਸ੍ਸਤਂ ਏਕਚ੍ਚਂ ਅਸਸ੍ਸਤਨ੍ਤਿ. ਨੇਵਤ੍ਥਿ ਨੋ ਨਤ੍ਥੀਤਿ ਅਮਰਾਵਿਕ੍ਖੇਪਵਸੇਨ. ਗਮ੍ਭੀਰੋਤਿ ਉਤ੍ਤਾਨਭਾਵਹੇਤੂਨਂ ਕਿਲੇਸਾਨਂ ਅਭਾਵੇਨ ਗਮ੍ਭੀਰੋ. ਨਿਬ੍ਬੁਤੋਤਿ ਅਤ੍ਥੀਤਿਆਦਿਨਾ ਉਪਗਮਨਕਿਲੇਸਾਨਂ ਵੂਪਸਮੇਨ ਪਰਿਨਿਬ੍ਬੁਤੋ ਸੀਤਿਭੂਤੋ.

ਇਧਾਗਤੀਤਿ ਪਰਲੋਕਤੋ ਇਧ ਆਗਤਿ. ਗਤੀਤਿ ਇਧਲੋਕਤੋ ਪਰਲੋਕਗਮਨਂ. ਤਂ ਪਨ ਪੁਨਬ੍ਭਵੋਤਿ ਆਹ ‘‘ਪੇਚ੍ਚਭਵੋ’’ਤਿ. ਇਧ ਹੁਰਨ੍ਤਿ ਦ੍ਵਾਰਾਰਮ੍ਮਣਧਮ੍ਮਾ ਦਸ੍ਸਿਤਾਤਿ ‘‘ਉਭਯਮਨ੍ਤਰੇਨਾ’’ਤਿ ਪਦੇਨ ਦ੍ਵਾਰਪ੍ਪਵਤ੍ਤਧਮ੍ਮੇ ਦਸ੍ਸੇਨ੍ਤੋ ‘‘ਫਸ੍ਸਸਮੁਦਿਤੇਸੁ ਧਮ੍ਮੇਸੂ’’ਤਿ ਆਹ. ਤਸ੍ਸਤ੍ਥੋ – ਫਸ੍ਸੇਨ ਸਦ੍ਧਿਂ ਫਸ੍ਸੇਨ ਕਾਰਣਭੂਤੇਨ ਚ ਸਮੁਦਿਤੇਸੁ ਸਮ੍ਭੂਤੇਸੁ ਵਿਞ੍ਞਾਣਵੇਦਨਾਸਞ੍ਞਾਚੇਤਨਾਵਿਤਕ੍ਕਵਿਚਾਰਾਦਿਧਮ੍ਮੇਸੁ. ਅਤ੍ਤਾਨਂ ਨ ਪਸ੍ਸਤੀਤਿ ਤੇਸਂ ਧਮ੍ਮਾਨਂ ਅਨਤ੍ਤਭਾਵੇਨੇਵ ਤਤ੍ਥ ਅਤ੍ਤਾਨਂ ਨ ਪਸ੍ਸਤਿ. ਵਿਰਜ੍ਜਤਿ ਵਿਰਾਗਾ ਵਿਮੁਚ੍ਚਤੀਤਿ ਪਦੇਹਿ ਲੋਕੁਤ੍ਤਰਧਮ੍ਮਾਨਂ ਪਟਿਚ੍ਚਸਮੁਪ੍ਪਾਦਭਾਵਂ ਦਸ੍ਸੇਨ੍ਤੋ ਤਦਤ੍ਥਤਾਯ ਸੀਲਾਦੀਨਮ੍ਪਿ ਪਰਿਯਾਯੇਨ ਤਬ੍ਭਾਵਮਾਹ ‘‘ਲੋਕੁਤ੍ਤਰੋ’’ਤਿਆਦਿਨਾ.

੪੪. ਨਾਮਸਮ੍ਪਯੁਤ੍ਤੋਤਿ ਨਾਮੇਨ ਮਿਸ੍ਸਿਤੋ. ਸਉਪਾਦਿਸੇਸਾ ਨਿਬ੍ਬਾਨਧਾਤੂਤਿ ਅਰਹਤ੍ਤਫਲਂ ਅਧਿਪ੍ਪੇਤਂ. ਤਞ੍ਚ ਪਞ੍ਞਾਪਧਾਨਨ੍ਤਿ ਆਹ – ‘‘ਸਉਪਾਦਿਸੇਸਾ ਨਿਬ੍ਬਾਨਧਾਤੁ ਵਿਜ੍ਜਾਤਿ. ਸੇਸਂ ਸਬ੍ਬਂ ਉਤ੍ਤਾਨਮੇਵ.

ਓਤਰਣਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.