੧੩. ਸੋਧਨਹਾਰਵਿਭਙ੍ਗਵਣ੍ਣਨਾ

੪੫. ਤਤ੍ਥ ਕਤਮੋ ਸੋਧਨੋ ਹਾਰੋਤਿ ਸੋਧਨਹਾਰਵਿਭਙ੍ਗੋ. ਤਤ੍ਥ ਭਗਵਾ ਪਦਂ ਸੋਧੇਤੀਤਿ ‘‘ਅਵਿਜ੍ਜਾਯ ਨਿਵੁਤੋ ਲੋਕੋ’’ਤਿ (ਸੁ. ਨਿ. ੧੦੩੯; ਚੂਲ਼ਨਿ. ਅਜਿਤਮਾਣਵਪੁਚ੍ਛਾ ੫੮, ਅਜਿਤਮਾਣਵਪੁਚ੍ਛਾਨਿਦ੍ਦੇਸ ੨) ਵਦਨ੍ਤੋ ਭਗਵਾ – ‘‘ਕੇਨਸ੍ਸੁ ਨਿਵੁਤੋ ਲੋਕੋ’’ਤਿ (ਸੁ. ਨਿ. ੧੦੩੮; ਚੂਲ਼ਨਿ. ਅਜਿਤਮਾਣਵਪੁਚ੍ਛਾ ੫੭, ਅਜਿਤਮਾਣਵਪੁਚ੍ਛਾਨਿਦ੍ਦੇਸ ੧) ਆਯਸ੍ਮਤਾ ਅਜਿਤੇਨ ਪੁਚ੍ਛਾਵਸੇਨ ਵੁਤ੍ਤਂ ਪਦਂ ਸੋਧੇਤਿ ਨਾਮ, ਤਦਤ੍ਥਸ੍ਸ ਵਿਸ੍ਸਜ੍ਜਨਤੋ. ਨੋ ਚ ਆਰਮ੍ਭਨ੍ਤਿ ਨ ਤਾਵ ਆਰਮ੍ਭਂ ਸੋਧੇਤਿ, ਞਾਤੁਂ ਇਚ੍ਛਿਤਸ੍ਸ ਅਤ੍ਥਸ੍ਸ ਅਪਰਿਯੋਸਿਤਤ੍ਤਾ. ਸੁਦ੍ਧੋ ਆਰਮ੍ਭੋਤਿ ਞਾਤੁਂ ਇਚ੍ਛਿਤਸ੍ਸ ਅਤ੍ਥਸ੍ਸ ਪਬੋਧਿਤਤ੍ਤਾ ਸੋਧਿਤੋ ਆਰਮ੍ਭੋਤਿ ਅਤ੍ਥੋ. ਅਞ੍ਞਾਣਪਕ੍ਖਨ੍ਦਾਨਂ ਦ੍ਵੇਲ਼੍ਹਕਜਾਤਾਨਂ ਵਾ ਪੁਚ੍ਛਨਕਾਲੇ ਪੁਚ੍ਛਿਤਾਨਂ ਪੁਚ੍ਛਾਵਿਸਯੋ ਅਵਿਜਟਂ ਮਹਾਗਹਨਂ ਵਿਯ ਮਹਾਦੁਗ੍ਗਂ ਵਿਯ ਚ ਅਨ੍ਧਕਾਰਂ ਅਵਿਭੂਤਂ ਹੋਤਿ. ਯਦਾ ਚ ਭਗਵਤਾ ਪਣ੍ਡਿਤੇਹਿ ਵਾ ਭਗਵਤੋ ਸਾਵਕੇਹਿ ਅਪਦੇ ਪਦਂ ਦਸ੍ਸੇਨ੍ਤੇਹਿ ਨਿਜ੍ਜਟਂ ਨਿਗੁਮ੍ਬਂ ਕਤ੍ਵਾ ਪਞ੍ਹੇ ਵਿਸ੍ਸਜ੍ਜਿਤੇ ਮਹਤਾ ਗਨ੍ਧਹਤ੍ਥਿਨਾ ਅਭਿਭਵਿਤ੍ਵਾ ਓਭਗ੍ਗਪਦਾਲਿਤੋ ਗਹਨਪ੍ਪਦੇਸੋ ਵਿਯ ਵਿਗਤਨ੍ਧਕਾਰੋ ਵਿਭੂਤੋ ਉਪਟ੍ਠਹਮਾਨੋ ਵਿਸੋਧਿਤੋ ਨਾਮ ਹੋਤਿ.

ਸੋਧਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.