੧੪. ਅਧਿਟ੍ਠਾਨਹਾਰਵਿਭਙ੍ਗਵਣ੍ਣਨਾ
੪੬. ਤਤ੍ਥ ਕਤਮੋ ਅਧਿਟ੍ਠਾਨੋ ਹਾਰੋਤਿ ਅਧਿਟ੍ਠਾਨਹਾਰਵਿਭਙ੍ਗੋ. ਤਤ੍ਥ ਤਥਾ ਧਾਰਯਿਤਬ੍ਬਾਤਿ ਏਕਤ੍ਤਵੇਮਤ੍ਤਤਾਸਙ੍ਖਾਤਸਾਮਞ੍ਞਵਿਸੇਸਮਤ੍ਤਤੋ ਧਾਰਯਿਤਬ੍ਬਾ, ਨ ਪਨ ਤਤ੍ਥ ਕਿਞ੍ਚਿ ਵਿਕਪ੍ਪੇਤਬ੍ਬਾਤਿ ਅਧਿਪ੍ਪਾਯੋ. ਅਵਿਕਪ੍ਪੇਤਬ੍ਬਤਾਯ ਕਾਰਣਂ ਨਿਦ੍ਦੇਸਵਾਰਵਣ੍ਣਨਾਯਂ ਵੁਤ੍ਤਮੇਵ. ਤਂ ਤਂ ਫਲਂ ਮਗ੍ਗਤਿ ਗਵੇਸਤੀਤਿ ਮਗ੍ਗੋ, ਤਦਤ੍ਥਿਕੇਹਿ ਮਗ੍ਗੀਯਤਿ ਗਵੇਸੀਯਤੀਤਿ ਵਾ ਮਗ੍ਗੋ. ਨਿਰਤਿਯਟ੍ਠੇਨ ਨਿਰਸ੍ਸਾਦਟ੍ਠੇਨ ਚ ਨਿਰਯੋ. ਉਦ੍ਧਂ ਅਨੁਗਨ੍ਤ੍ਵਾ ਤਿਰਿਯਂ ਅਞ੍ਚਿਤਾਤਿ ਤਿਰਚ੍ਛਾਨਾ. ਤਿਰਚ੍ਛਾਨਾਵ ਤਿਰਚ੍ਛਾਨਯੋਨਿ. ਪੇਤਤਾਯ ਪੇਤ੍ਤਿ, ਇਤੋ ਪੇਚ੍ਚ ਗਤਭਾਵੋਤਿ ਅਤ੍ਥੋ. ਪੇਤ੍ਤਿ ਏਵ ਪੇਤ੍ਤਿਵਿਸਯੋ. ਨ ਸੁਰਨ੍ਤਿ ਨ ਭਾਸਨ੍ਤਿ ਨ ਦਿਬ੍ਬਨ੍ਤੀਤਿ ਅਸੁਰਾ. ਅਸੁਰਾ ਏਵ ਅਸੁਰਯੋਨਿ. ਦਿਬ੍ਬੇਹਿ ਰੂਪਾਦੀਹਿ ਸੁਟ੍ਠੁ ਅਗ੍ਗਾਤਿ ਸਗ੍ਗਾ. ਮਨਸ੍ਸ ਉਸ੍ਸਨ੍ਨਤਾਯ ਮਨੁਸ੍ਸਾ. ਵਾਨਂ ਵੁਚ੍ਚਤਿ ਤਣ੍ਹਾ, ਤਂ ਤਤ੍ਥ ਨਤ੍ਥੀਤਿ ਨਿਬ੍ਬਾਨਂ. ਨਿਰਯਂ ਗਚ੍ਛਤੀਤਿ ਨਿਰਯਗਾਮੀ. ਸੇਸਪਦੇਸੁਪਿ ਏਸੇਵ ਨਯੋ. ਅਸੁਰਯੋਨਿਯੋਤਿ ਅਸੁਰਯੋਨਿਯਾ ਹਿਤੋ, ਅਸੁਰਜਾਤਿਨਿਬ੍ਬਤ੍ਤਨਕੋਤਿ ਅਤ੍ਥੋ. ਸਗ੍ਗਂ ਗਮੇਤੀਤਿ ਸਗ੍ਗਗਾਮਿਯੋ. ਮਨੁਸ੍ਸਗਾਮੀਤਿ ਮਨੁਸ੍ਸਲੋਕਗਾਮੀ. ਪਟਿਸਙ੍ਖਾਨਿਰੋਧੋਤਿ ਪਟਿਸਙ੍ਖਾਯ ਪਟਿਪਕ੍ਖਭਾਵਨਾਯ ਨਿਰੋਧੋ, ਪਟਿਪਕ੍ਖੇ ਵਾ ਤਥਾ ਅਪ੍ਪਵਤ੍ਤੇ ਉਪ੍ਪਜ੍ਜਨਾਰਹਸ੍ਸ ਪਟਿਪਕ੍ਖਵੁਤ੍ਤਿਯਾ ਅਨੁਪ੍ਪਾਦੋ. ਅਪ੍ਪਟਿਸਙ੍ਖਾਨਿਰੋਧੋਤਿ ਸਙ੍ਖਤਧਮ੍ਮਾਨਂ ਸਰਸਨਿਰੋਧੋ, ਖਣਿਕਨਿਰੋਧੋਤਿ ਅਤ੍ਥੋ.
੪੭. ਰੂਪਨ੍ਤਿ ਏਕਤ੍ਤਤਾ. ਭੂਤਾਨਂ ਉਪਾਦਾਯਾਤਿ ਵੇਮਤ੍ਤਤਾ. ਉਪਾਦਾਰੂਪਨ੍ਤਿ ਏਕਤ੍ਤਤਾ. ਚਕ੍ਖਾਯਤਨਂ…ਪੇ… ਕਬਲ਼ੀਕਾਰੋ ਆਹਾਰੋਤਿ ਵੇਮਤ੍ਤਤਾ. ਤਥਾ ਭੂਤਰੂਪਨ੍ਤਿ ਏਕਤ੍ਤਤਾ. ਪਥਵੀਧਾਤੁ …ਪੇ… ਵਾਯੋਧਾਤੂਤਿ ਵੇਮਤ੍ਤਤਾ. ਪਥਵੀਧਾਤੂਤਿ ਏਕਤ੍ਤਤਾ. ਵੀਸਤਿ ਆਕਾਰਾ ਵੇਮਤ੍ਤਤਾ. ਆਪੋਧਾਤੂਤਿ ਏਕਤ੍ਤਤਾ. ਦ੍ਵਾਦਸ ਆਕਾਰਾ ਵੇਮਤ੍ਤਤਾ. ਤੇਜੋਧਾਤੂਤਿ ਏਕਤ੍ਤਤਾ. ਚਤ੍ਤਾਰੋ ਆਕਾਰਾ ਵੇਮਤ੍ਤਤਾ. ਵਾਯੋਧਾਤੂਤਿ ਏਕਤ੍ਤਤਾ. ਛ ਆਕਾਰਾ ਵੇਮਤ੍ਤਤਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਦ੍ਵੀਹਿ ਆਕਾਰੇਹਿ ਧਾਤੁਯੋ ਪਰਿਗ੍ਗਣ੍ਹਾਤੀ’’ਤਿਆਦਿਮਾਹ.
ਤਤ੍ਥ ਕੇਸਾਤਿ ਕੇਸਾ ਨਾਮ ਉਪਾਦਿਨ੍ਨਕਸਰੀਰਟ੍ਠਕਾ ਕਕ੍ਖਲ਼ਲਕ੍ਖਣਾ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਪਥਵੀਧਾਤੁਕੋਟ੍ਠਾਸੋ. ਲੋਮਾ ਨਾਮ…ਪੇ… ਮਤ੍ਥਲੁਙ੍ਗਂ ਨਾਮ ਸਰੀਰਟ੍ਠਕਂ ਕਕ੍ਖਲ਼ਲਕ੍ਖਣਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋਤਿ ਅਯਂ ਵੇਮਤ੍ਤਤਾ. ਆਪੋਧਾਤੂਤਿਆਦਿਕੋਟ੍ਠਾਸੇਸੁ ਪਿਤ੍ਤਾਦੀਸੁ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਯੇਨ ਚਾਤਿ ਯੇਨ ਤੇਜੋਧਾਤੁਨਾ ਕੁਪਿਤੇਨ. ਸਨ੍ਤਪ੍ਪਤੀਤਿ ਅਯਂ ਕਾਯੋ ਸਨ੍ਤਪ੍ਪਤਿ ਏਕਾਹਿਕਜਰਾਦਿਭਾਵੇਨ ਉਸੁਮਜਾਤੋ ਹੋਤਿ. ਯੇਨ ਚ ਜੀਰੀਯਤੀਤਿ ਯੇਨ ਅਯਂ ਕਾਯੋ ਜਰੀਯਤਿ. ਇਨ੍ਦ੍ਰਿਯਵੇਕਲ੍ਲਤਂ ਬਲਕ੍ਖਯਂ ਵਲਿਤ੍ਤਚਪਲਿਤਾਦਿਞ੍ਚ ਪਾਪੁਣਾਤਿ. ਯੇਨ ਚ ਪਰਿਡਯ੍ਹਤੀਤਿ ਯੇਨ ਕੁਪਿਤੇਨ ਅਯਂ ਕਾਯੋ ਡਯ੍ਹਤਿ, ਸੋ ਚ ਪੁਗ੍ਗਲੋ ‘‘ਡਯ੍ਹਾਮਿ ਡਯ੍ਹਾਮੀ’’ਤਿ ਕਨ੍ਦਨ੍ਤੋ ਸਤਧੋਤਸਪ੍ਪਿਗੋਸੀਤਚਨ੍ਦਨਾਦਿਲੇਪਨਂ ਤਾਲਵਣ੍ਟਵਾਤਞ੍ਚ ਪਚ੍ਚਾਸੀਸਤਿ. ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤੀਤਿ ਅਸਿਤਂ ਵਾ ਓਦਨਾਦਿ, ਪੀਤਂ ਵਾ ਪਾਨਕਾਦਿ, ਖਾਯਿਤਂ ਵਾ ਪਿਟ੍ਠਖਜ੍ਜਕਾਦਿ, ਸਾਯਿਤਂ ਵਾ ਅਮ੍ਬਪਕ੍ਕਮਧੁਫਾਣਿਤਾਦਿ ਸਮ੍ਮਾ ਪਰਿਪਾਕਂ ਗਚ੍ਛਤਿ, ਰਸਾਦਿਭਾਵੇਨ ਵਿਵੇਕਂ ਗਚ੍ਛਤੀਤਿ ਅਤ੍ਥੋ. ਏਤ੍ਥ ਚ ਪੁਰਿਮਾ ਤਯੋ ਤੇਜੋਧਾਤੂ ਚਤੁਸਮੁਟ੍ਠਾਨਾ. ਪਚ੍ਛਿਮੋ ਕਮ੍ਮਸਮੁਟ੍ਠਾਨੋਵ.
ਉਦ੍ਧਙ੍ਗਮਾ ਵਾਤਾਤਿ ਉਗ੍ਗਾਰਹਿਕ੍ਕਾਰਾਦਿਪਵਤ੍ਤਕਾ ਉਦ੍ਧਂ ਆਰੋਹਨਵਾਤਾ. ਅਧੋਗਮਾ ਵਾਤਾਤਿ ਉਚ੍ਚਾਰਪਸ੍ਸਾਵਾਦਿਨੀਹਰਣਕਾ ਅਧੋ ਓਰੋਹਨਵਾਤਾ. ਕੁਚ੍ਛਿਸਯਾ ਵਾਤਾਤਿ ਅਨ੍ਤਾਨਂ ਬਹਿਵਾਤਾ. ਕੋਟ੍ਠਾਸਯਾ ਵਾਤਾਤਿ ਅਨ੍ਤਾਨਂ ਅਨ੍ਤੋਵਾਤਾ. ਅਙ੍ਗਮਙ੍ਗਾਨੁਸਾਰਿਨੋ ਵਾਤਾਤਿ ਧਮਨਿਜਾਲਾਨੁਸਾਰੇਨ ਸਕਲਸਰੀਰੇ ਅਙ੍ਗਮਙ੍ਗਾਨਿ ਅਨੁਸਟਾ ਸਮਿਞ੍ਜਨਪਸਾਰਣਾਦਿਨਿਬ੍ਬਤ੍ਤਕਾ ਵਾਤਾ. ਅਸ੍ਸਾਸੋਤਿ ਅਨ੍ਤੋਪਵਿਸਨਨਾਸਿਕਵਾਤੋ. ਪਸ੍ਸਾਸੋਤਿ ਬਹਿਨਿਕ੍ਖਮਨਨਾਸਿਕਵਾਤੋ. ਏਤ੍ਥ ਚ ਪੁਰਿਮਾ ਸਬ੍ਬੇ ਚਤੁਸਮੁਟ੍ਠਾਨਾ. ਅਸ੍ਸਾਸਪਸ੍ਸਾਸਾ ਚਿਤ੍ਤਸਮੁਟ੍ਠਾਨਾ ਏਵ. ਏਵਂ ਵੇਮਤ੍ਤਤਾਦਸ੍ਸਨਵਸੇਨ ਵਿਭਾਗੇਨ ਉਦਾਹਟਾ ਚਤਸ੍ਸੋ ਧਾਤੁਯੋ ਪਟਿਕ੍ਕੂਲਮਨਸਿਕਾਰਵਸੇਨ ਉਪਸਂਹਰਨ੍ਤੋ ‘‘ਇਮੇਹਿ ਦ੍ਵਾਚਤ੍ਤਾਲੀਸਾਯ ਆਕਾਰੇਹੀ’’ਤਿਆਦਿਮਾਹ. ਤਤ੍ਥ ਨ ਗਯ੍ਹੂਪਗਨ੍ਤਿ ਨ ਗਹਣਯੋਗ੍ਗਂ. ਸਭਾਵਭਾਵਤੋਤਿ ਸਭਾਵਲਕ੍ਖਣਤੋ.
ਏਵਂ ਪਟਿਕ੍ਕੂਲਮਨਸਿਕਾਰਂ ਦਸ੍ਸੇਤ੍ਵਾ ਪੁਨ ਤਤ੍ਥ ਸਮ੍ਮਸਨਚਾਰਂ ਪਾਲ਼ਿਵਸੇਨੇਵ ਦਸ੍ਸੇਤੁਂ ‘‘ਤੇਨਾਹ ਭਗਵਾ ਯਾ ਚੇਵ ਖੋ ਪਨਾ’’ਤਿਆਦਿਮਾਹ. ਤਂ ਸਬ੍ਬਂ ਸੁਵਿਞ੍ਞੇਯ੍ਯਂ.
੪੮. ਏਵਂ ਸਚ੍ਚਮਗ੍ਗਰੂਪਧਮ੍ਮਵਸੇਨ ਅਧਿਟ੍ਠਾਨਹਾਰਂ ਦਸ੍ਸੇਤ੍ਵਾ ਇਦਾਨਿ ਅਵਿਜ੍ਜਾਵਿਜ੍ਜਾਦੀਨਮ੍ਪਿ ਵਸੇਨ ਤਂ ਦਸ੍ਸੇਤੁਂ ‘‘ਅਵਿਜ੍ਜਾਤਿ ਏਕਤ੍ਤਤਾ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਦੁਕ੍ਖੇ ਅਞ੍ਞਾਣ’’ਨ੍ਤਿਆਦੀਸੁ ਯਸ੍ਮਾ ਅਵਿਜ੍ਜਾ ਦੁਕ੍ਖਸਚ੍ਚਸ੍ਸ ਯਾਥਾਵਸਰਸਲਕ੍ਖਣਂ ਜਾਨਿਤੁਂ ਪਟਿਵਿਜ੍ਝਿਤੁਂ ਨ ਦੇਤਿ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਦੁਕ੍ਖੇ ਅਞ੍ਞਾਣ’’ਨ੍ਤਿ ਵੁਚ੍ਚਤਿ. ਤਥਾ ਯਸ੍ਮਾ ਦੁਕ੍ਖਸਮੁਦਯਸ੍ਸ ਦੁਕ੍ਖਨਿਰੋਧਸ੍ਸ ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਯਾਥਾਵਸਰਸਲਕ੍ਖਣਂ ਜਾਨਿਤੁਂ ਪਟਿਵਿਜ੍ਝਿਤੁਂ ਨ ਦੇਤਿ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਅਞ੍ਞਾਣ’’ਨ੍ਤਿ ਵੁਚ੍ਚਤਿ. ਪੁਬ੍ਬਨ੍ਤੋ ਅਤੀਤਦ੍ਧਭੂਤਾ ਖਨ੍ਧਾਯਤਨਧਾਤੁਯੋ. ਅਪਰਨ੍ਤੋ ਅਨਾਗਤਦ੍ਧਭੂਤਾ. ਪੁਬ੍ਬਨ੍ਤਾਪਰਨ੍ਤੋ ਤਦੁਭਯਂ. ਇਦਪ੍ਪਚ੍ਚਯਤਾ ਸਙ੍ਖਾਰਾਦੀਨਂ ਕਾਰਣਾਨਿ ਅਵਿਜ੍ਜਾਦੀਨਿ. ਪਟਿਚ੍ਚਸਮੁਪ੍ਪਨ੍ਨਾ ਧਮ੍ਮਾ ਅਵਿਜ੍ਜਾਦੀਹਿ ਨਿਬ੍ਬਤ੍ਤਾ ਸਙ੍ਖਾਰਾਦਿਧਮ੍ਮਾ.
ਤਤ੍ਥਾਯਂ ਅਵਿਜ੍ਜਾ ਯਸ੍ਮਾ ਅਤੀਤਾਨਂ ਖਨ੍ਧਾਦੀਨਂ ਯਾਵ ਪਟਿਚ੍ਚਸਮੁਪ੍ਪਨ੍ਨਾਨਂ ਧਮ੍ਮਾਨਂ ਯਾਥਾਵਸਰਸਲਕ੍ਖਣਂ ਜਾਨਿਤੁਂ ਪਟਿਵਿਜ੍ਝਿਤੁਂ ਨ ਦੇਤਿ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਤਿ, ਤਸ੍ਮਾ ‘‘ਪੁਬ੍ਬਨ੍ਤੇ ਅਞ੍ਞਾਣਂ ਯਾਵ ਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣ’’ਨ੍ਤਿ ਵੁਚ੍ਚਤਿ, ਏਵਾਯਂ ਅਵਿਜ੍ਜਾ ਕਿਚ੍ਚਤੋ ਜਾਤਿਤੋਪਿ ਕਥਿਤਾ. ਅਯਞ੍ਹਿ ਇਮਾਨਿ ਅਟ੍ਠ ਠਾਨਾਨਿ ਜਾਨਿਤੁਂ ਪਟਿਵਿਜ੍ਝਿਤੁਂ ਨ ਦੇਤੀਤਿ ਕਿਚ੍ਚਤੋ ਕਥਿਤਾ. ਉਪ੍ਪਜ੍ਜਮਾਨਾਪਿ ਇਮੇਸੁ ਅਟ੍ਠਸੁ ਠਾਨੇਸੁ ਉਪ੍ਪਜ੍ਜਤੀਤਿ ਜਾਤਿਤੋ ਕਥਿਤਾ. ਏਵਂ ਕਿਚ੍ਚਤੋ ਜਾਤਿਤੋ ਚ ਕਥਿਤਾਪਿ ਲਕ੍ਖਣਤੋ ਕਥਿਤੇ ਏਵ ਸੁਕਥਿਤਾ ਹੋਤੀਤਿ ਲਕ੍ਖਣਤੋ ਦਸ੍ਸੇਤੁਂ ‘‘ਅਞ੍ਞਾਣ’’ਨ੍ਤਿਆਦਿ ਵੁਤ੍ਤਂ.
ਤਤ੍ਥ ਞਾਣਂ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਚਤੁਸਚ੍ਚਧਮ੍ਮਂ ਵਿਦਿਤਂ ਪਾਕਟਂ ਕਰੋਤਿ. ਅਯਂ ਪਨ ਅਵਿਜ੍ਜਾ ਉਪ੍ਪਜ੍ਜਿਤ੍ਵਾ ਤਂ ਵਿਦਿਤਂ ਪਾਕਟਂ ਕਾਤੁਂ ਨ ਦੇਤੀਤਿ ਞਾਣਪਚ੍ਚਨੀਕਤੋ ਅਞ੍ਞਾਣਂ. ਦਸ੍ਸਨਨ੍ਤਿਪਿ ਪਞ੍ਞਾ, ਸਾ ਹਿ ਤਂ ਆਕਾਰਂ ਪਸ੍ਸਤਿ. ਅਵਿਜ੍ਜਾ ਪਨ ਉਪ੍ਪਜ੍ਜਿਤ੍ਵਾ ਪਸ੍ਸਿਤੁਂ ਨ ਦੇਤੀਤਿ ਅਦਸ੍ਸਨਂ. ਅਭਿਸਮਯੋਤਿਪਿ ਪਞ੍ਞਾ, ਸਾ ਤਂ ਆਕਾਰਂ ਅਭਿਸਮੇਤਿ. ਅਵਿਜ੍ਜਾ ਪਨ ਉਪ੍ਪਜ੍ਜਿਤ੍ਵਾ ਤਂ ਅਭਿਸਮੇਤੁਂ ਨ ਦੇਤੀਤਿ ਅਨਭਿਸਮਯੋ. ਅਨੁਬੋਧੋ ਸਮ੍ਬੋਧੋ ਪਟਿਵੇਧੋਤਿਪਿ ਪਞ੍ਞਾ, ਸਾ ਤਂ ਆਕਾਰਂ ਅਨੁਬੁਜ੍ਝਤਿ ਸਮ੍ਬੁਜ੍ਝਤਿ ਪਟਿਵਿਜ੍ਝਤਿ. ਅਵਿਜ੍ਜਾ ਪਨ ਉਪ੍ਪਜ੍ਜਿਤ੍ਵਾ ਤਂ ਅਨੁਬੁਜ੍ਝਿਤੁਂ ਸਮ੍ਬੁਜ੍ਝਿਤੁਂ ਪਟਿਵਿਜ੍ਝਿਤੁਂ ਨ ਦੇਤੀਤਿ ਅਨਨੁਬੋਧੋ ਅਸਮ੍ਬੋਧੋ ਅਪ੍ਪਟਿਵੇਧੋ. ਤਥਾ ਸਲ੍ਲਕ੍ਖਣਂ ਉਪਲਕ੍ਖਣਂ ਪਚ੍ਚੁਪਲਕ੍ਖਣਂ ਸਮਪੇਕ੍ਖਣਨ੍ਤਿਪਿ ਪਞ੍ਞਾ, ਸਾ ਤਂ ਆਕਾਰਂ ਸਲ੍ਲਕ੍ਖਤਿ ਉਪਲਕ੍ਖਤਿ ਪਚ੍ਚੁਪਲਕ੍ਖਤਿ ਸਮਂ ਸਮ੍ਮਾ ਚ ਅਪੇਕ੍ਖਤਿ. ਅਵਿਜ੍ਜਾ ਪਨ ਉਪ੍ਪਜ੍ਜਿਤ੍ਵਾ ਤਸ੍ਸ ਤਥਾ ਕਾਤੁਂ ਨ ਦੇਤੀਤਿ ਅਸਲ੍ਲਕ੍ਖਣਂ ਅਨੁਪਲਕ੍ਖਣਂ ਅਪਚ੍ਚੁਪਲਕ੍ਖਣਂ ਅਸਮਪੇਕ੍ਖਣਨ੍ਤਿ ਚ ਵੁਚ੍ਚਤਿ.
ਨਾਸ੍ਸ ਕਿਞ੍ਚਿ ਪਚ੍ਚਕ੍ਖਕਮ੍ਮਂ ਅਤ੍ਥਿ, ਸਯਞ੍ਚ ਅਪ੍ਪਚ੍ਚਵੇਕ੍ਖਿਤ੍ਵਾ ਕਤਕਮ੍ਮਨ੍ਤਿ ਅਪ੍ਪਚ੍ਚਕ੍ਖਕਮ੍ਮਂ. ਦੁਮ੍ਮੇਧਾਨਂ ਭਾਵੋ ਦੁਮ੍ਮੇਜ੍ਝਂ. ਬਾਲਾਨਂ ਭਾਵੋ ਬਾਲ੍ਯਂ. ਸਮ੍ਪਜਞ੍ਞਨ੍ਤਿ ਪਞ੍ਞਾ, ਸਾ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਚਤੁਸਚ੍ਚਧਮ੍ਮਂ ਸਮ੍ਪਜਾਨਾਤਿ. ਅਵਿਜ੍ਜਾ ਪਨ ਉਪ੍ਪਜ੍ਜਿਤ੍ਵਾ ਤਂ ਕਾਰਣਂ ਪਜਾਨਿਤੁਂ ਨ ਦੇਤੀਤਿ ਅਸਮ੍ਪਜਞ੍ਞਂ. ਮੋਹਨਵਸੇਨ ਮੋਹੋ. ਪਮੋਹਨਵਸੇਨ ਪਮੋਹੋ. ਸਮ੍ਮੋਹਨਵਸੇਨ ਸਮ੍ਮੋਹੋ. ਅਵਿਨ੍ਦਿਯਂ ਵਿਨ੍ਦਤਿ, ਵਿਨ੍ਦਿਯਂ ਨ ਵਿਨ੍ਦਤੀਤਿ ਅਵਿਜ੍ਜਾ. ਵਟ੍ਟਸ੍ਮਿਂ ਓਹਨਤਿ ਓਤਰਤੀਤਿ ਅਵਿਜ੍ਜੋਘੋ. ਵਟ੍ਟਸ੍ਮਿਂ ਯੋਜੇਤੀਤਿ ਅਵਿਜ੍ਜਾਯੋਗੋ. ਅਪ੍ਪਹੀਨਟ੍ਠੇਨ ਚੇਵ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਚ ਅਵਿਜ੍ਜਾਨੁਸਯੋ. ਮਗ੍ਗੇ ਪਰਿਯੁਟ੍ਠਿਤਚੋਰਾ ਵਿਯ ਅਦ੍ਧਿਕੇ ਕੁਸਲਚਿਤ੍ਤਂ ਪਰਿਯੁਟ੍ਠਾਤਿ ਵਿਲੁਪ੍ਪਤੀਤਿ ਅਵਿਜ੍ਜਾਪਰਿਯੁਟ੍ਠਾਨਂ. ਯਥਾ ਨਗਰਦ੍ਵਾਰੇ ਪਲਿਘਸਙ੍ਖਾਤਾਯ ਲਙ੍ਗਿਯਾ ਪਤਿਤਾਯ ਮਨੁਸ੍ਸਾਨਂ ਨਗਰਪ੍ਪਵੇਸੋ ਪਚ੍ਛਿਜ੍ਜਤਿ, ਏਵਮੇਵ ਯਸ੍ਸ ਸਕ੍ਕਾਯਨਗਰੇ ਅਯਂ ਪਤਿਤਾ, ਤਸ੍ਸ ਨਿਬ੍ਬਾਨਸਮ੍ਪਾਪਕਂ ਞਾਣਗਮਨਂ ਪਚ੍ਛਿਜ੍ਜਤੀਤਿ ਅਵਿਜ੍ਜਾਲਙ੍ਗੀ ਨਾਮ ਹੋਤਿ. ਅਕੁਸਲਞ੍ਚ ਤਂ ਮੂਲਞ੍ਚ, ਅਕੁਸਲਾਨਂ ਵਾ ਮੂਲਨ੍ਤਿ ਅਕੁਸਲਮੂਲਂ. ਤਂ ਪਨ ਨ ਅਞ੍ਞਂ, ਇਧਾਧਿਪ੍ਪੇਤੋ ਮੋਹੋਤਿ ਮੋਹੋ ਅਕੁਸਲਮੂਲਨ੍ਤਿ ਅਯਂ ਏਕਪਦਿਕੋ ਅਵਿਜ੍ਜਾਯ ਅਤ੍ਥੁਦ੍ਧਾਰੋ. ਅਯਂ ਵੇਮਤ੍ਤਤਾਤਿ ਅਯਂ ਅਵਿਜ੍ਜਾਯ ਵੇਮਤ੍ਤਤਾ.
ਵਿਜ੍ਜਾਤਿ ਵਿਨ੍ਦਿਯਂ ਵਿਨ੍ਦਤੀਤਿ ਵਿਜ੍ਜਾ, ਵਿਜ੍ਝਨਟ੍ਠੇਨ ਵਿਜ੍ਜਾ, ਵਿਦਿਤਕਰਣਟ੍ਠੇਨ ਵਿਜ੍ਜਾ. ‘‘ਦੁਕ੍ਖੇ ਞਾਣ’’ਨ੍ਤਿਆਦੀਸੁ ਦੁਕ੍ਖਸਚ੍ਚਸ੍ਸ ਯਾਥਾਵਸਰਸਲਕ੍ਖਣਂ ਜਾਨਾਤਿ ਪਸ੍ਸਤਿ ਪਟਿਵਿਜ੍ਝਤੀਤਿ ਦੁਕ੍ਖੇ ਅਰਿਯਸਚ੍ਚੇ ਵਿਸਯਭੂਤੇ ਞਾਣਂ ‘‘ਦੁਕ੍ਖੇ ਞਾਣ’’ਨ੍ਤਿ ਵੁਤ੍ਤਂ. ਏਸ ਨਯੋ ਸੇਸੇਸੁਪਿ. ਪਞ੍ਞਾਤਿ ਤਸ੍ਸ ਤਸ੍ਸ ਅਤ੍ਥਸ੍ਸ ਪਾਕਟਕਰਣਸਙ੍ਖਾਤੇਨ ਪਞ੍ਞਾਪਨਟ੍ਠੇਨ ਪਞ੍ਞਾ, ਤੇਨ ਤੇਨ ਵਾ ਅਨਿਚ੍ਚਾਦਿਨਾ ਪਕਾਰੇਨ ਧਮ੍ਮੇ ਜਾਨਾਤੀਤਿ ਪਞ੍ਞਾ. ਪਜਾਨਨਾਕਾਰੋ ਪਜਾਨਨਾ. ਅਨਿਚ੍ਚਾਦੀਨਿ ਵਿਚਿਨਤੀਤਿ ਵਿਚਯੋ. ਪਕਾਰੇਹਿ ਵਿਚਿਨਤੀਤਿ ਪਵਿਚਯੋ. ਚਤੁਸਚ੍ਚਧਮ੍ਮੇ ਵਿਚਿਨਤੀਤਿ ਧਮ੍ਮਵਿਚਯੋ. ਅਨਿਚ੍ਚਾਦੀਨਂ ਸਲ੍ਲਕ੍ਖਣਵਸੇਨ ਸਲ੍ਲਕ੍ਖਣਾ. ਤੇਸਂਯੇਵ ਪਤਿ ਪਤਿ ਉਪਲਕ੍ਖਣਵਸੇਨ ਪਚ੍ਚੁਪਲਕ੍ਖਣਾ. ਪਣ੍ਡਿਤਭਾਵੋ ਪਣ੍ਡਿਚ੍ਚਂ. ਕੁਸਲਭਾਵੋ ਕੋਸਲ੍ਲਂ. ਨਿਪੁਣਭਾਵੋ ਨੇਪੁਞ੍ਞਂ. ਅਨਿਚ੍ਚਾਦੀਨਂ ਵਿਭਾਵਨਵਸੇਨ ਵੇਭਬ੍ਯਾ. ਤੇਸਂਯੇਵ ਚਿਨ੍ਤਨਵਸੇਨ ਚਿਨ੍ਤਾ. ਅਨਿਚ੍ਚਾਦੀਨਿ ਉਪਪਰਿਕ੍ਖਤੀਤਿ ਉਪਪਰਿਕ੍ਖਾ. ਭੂਰੀਤਿ ਪਥਵਿਯਾ ਨਾਮਂ, ਅਯਮ੍ਪਿ ਸਣ੍ਹਟ੍ਠੇਨ ਵਿਤ੍ਥਤਟ੍ਠੇਨ ਚ ਭੂਰੀ ਵਿਯਾਤਿ ਭੂਰੀ. ਤੇਨ ਵੁਤ੍ਤਂ – ‘‘ਭੂਰੀ ਵੁਚ੍ਚਤਿ ਪਥਵੀ, ਤਾਯ ਪਥਵਿਸਮਾਯ ਵਿਤ੍ਥਤਾਯ ਪਞ੍ਞਾਯ ਸਮਨ੍ਨਾਗਤੋਤਿ ਭੂਰਿਪਞ੍ਞੋ’’ਤਿ (ਮਹਾਨਿ. ੨੭). ਅਪਿ ਚ ਭੂਰੀਤਿ ਪਞ੍ਞਾਯੇਵੇਤਂ ਅਧਿਵਚਨਂ. ਭੂਤੇ ਅਤ੍ਥੇ ਰਮਤੀਤਿ ਭੂਰੀ.
ਕਿਲੇਸੇ ਮੇਧਤਿ ਹਿਂਸਤੀਤਿ ਮੇਧਾ, ਖਿਪ੍ਪਂ ਗਹਣਧਾਰਣਟ੍ਠੇਨ ਵਾ ਮੇਧਾ. ਯਸ੍ਸੁਪ੍ਪਜ੍ਜਤਿ, ਤਂ ਸਤ੍ਤਂ ਹਿਤਪਟਿਪਤ੍ਤਿਯਂ ਸਮ੍ਪਯੁਤ੍ਤਂ ਵਾ ਯਾਥਾਵਲਕ੍ਖਣਪਟਿਵੇਧੇ ਪਰਿਣੇਤੀਤਿ ਪਰਿਣਾਯਿਕਾ. ਅਨਿਚ੍ਚਾਦਿਵਸੇਨ ਧਮ੍ਮੇ ਵਿਪਸ੍ਸਤੀਤਿ ਵਿਪਸ੍ਸਨਾ. ਸਮ੍ਮਾ ਪਕਾਰੇਹਿ ਅਨਿਚ੍ਚਾਦੀਨਿ ਜਾਨਾਤੀਤਿ ਸਮ੍ਪਜਞ੍ਞਂ. ਉਪ੍ਪਥਪਟਿਪਨ੍ਨੇ ਸਿਨ੍ਧਵੇ ਵੀਥਿਆਰੋਪਨਤ੍ਥਂ ਪਤੋਦੋ ਵਿਯ ਉਪ੍ਪਥੇ ਧਾਵਨਕੂਟਚਿਤ੍ਤਂ ਵੀਥਿਆਰੋਪਨਤ੍ਥਂ ਵਿਜ੍ਝਤੀਤਿ ਪਤੋਦੋ ਵਿਯਾਤਿ ਪਤੋਦੋ. ਦਸ੍ਸਨਲਕ੍ਖਣੇ ਇਨ੍ਦਟ੍ਠਂ ਕਾਰੇਤੀਤਿ ਇਨ੍ਦ੍ਰਿਯਂ, ਪਞ੍ਞਾਸਙ੍ਖਾਤਂ ਇਨ੍ਦ੍ਰਿਯਂ ਪਞ੍ਞਿਨ੍ਦ੍ਰਿਯਂ. ਅਵਿਜ੍ਜਾਯ ਨ ਕਮ੍ਪਤੀਤਿ ਪਞ੍ਞਾਬਲਂ. ਕਿਲੇਸਚ੍ਛੇਦਨਟ੍ਠੇਨ ਪਞ੍ਞਾਵ ਸਤ੍ਥਂ ਪਞ੍ਞਾਸਤ੍ਥਂ. ਅਚ੍ਚੁਗ੍ਗਤਟ੍ਠੇਨ ਪਞ੍ਞਾਵ ਪਾਸਾਦੋ ਪਞ੍ਞਾਪਾਸਾਦੋ. ਆਲੋਕਨਟ੍ਠੇਨ ਪਞ੍ਞਾਵ ਆਲੋਕੋ ਪਞ੍ਞਾਆਲੋਕੋ.
ਓਭਾਸਨਟ੍ਠੇਨ ਪਞ੍ਞਾਵ ਓਭਾਸੋ ਪਞ੍ਞਾਓਭਾਸੋ. ਪਜ੍ਜੋਤਨਟ੍ਠੇਨ ਪਞ੍ਞਾਵ ਪਜ੍ਜੋਤੋ ਪਞ੍ਞਾਪਜ੍ਜੋਤੋ. ਰਤਿਕਰਣਟ੍ਠੇਨ ਰਤਿਦਾਯਕਟ੍ਠੇਨ ਰਤਿਜਨਕਟ੍ਠੇਨ ਚਿਤ੍ਤੀਕਤਟ੍ਠੇਨ ਦੁਲ੍ਲਭਪਾਤੁਭਾਵਟ੍ਠੇਨ ਅਤੁਲਟ੍ਠੇਨ ਅਨੋਮਸਤ੍ਤਪਰਿਭੋਗਟ੍ਠੇਨ ਚ ਪਞ੍ਞਾਵ ਰਤਨਂ ਪਞ੍ਞਾਰਤਨਂ. ਨ ਤੇਨ ਸਤ੍ਤਾ ਮੁਯ੍ਹਨ੍ਤਿ, ਸਯਂ ਵਾ ਆਰਮ੍ਮਣੇ ਨ ਮੁਯ੍ਹਤੀਤਿ ਅਮੋਹੋ. ਧਮ੍ਮਵਿਚਯਪਦਂ ਵੁਤ੍ਤਤ੍ਥਮੇਵ. ਕਸ੍ਮਾ ਪਨੇਤਂ ਪੁਨ ਵੁਤ੍ਤਨ੍ਤਿ? ਅਮੋਹਸ੍ਸ ਮੋਹਪਟਿਪਕ੍ਖਭਾਵਦੀਪਨਤ੍ਥਂ. ਤੇਨੇਤਂ ਦੀਪੇਤਿ – ਯ੍ਵਾਯਂ ਅਮੋਹੋ, ਸੋ ਨ ਕੇਵਲਂ ਮੋਹਤੋ ਅਞ੍ਞੋ ਧਮ੍ਮੋ, ਮੋਹਸ੍ਸ ਪਟਿਪਕ੍ਖੋ ਧਮ੍ਮਵਿਚਯਸਙ੍ਖਾਤੋ ਅਮੋਹੋਵ ਇਧਾਧਿਪ੍ਪੇਤੋਤਿ. ਸਮ੍ਮਾਦਿਟ੍ਠੀਤਿ ਯਾਥਾਵਨਿਯ੍ਯਾਨਿਕਕੁਸਲਦਿਟ੍ਠਿ. ਧਮ੍ਮਵਿਚਯਸਙ੍ਖਾਤੋ ਪਸਤ੍ਥੋ ਸੁਨ੍ਦਰੋ ਵਾ ਬੋਜ੍ਝਙ੍ਗੋਤਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ. ਮਗ੍ਗਙ੍ਗਨ੍ਤਿ ਅਰਿਯਮਗ੍ਗਸ੍ਸ ਅਙ੍ਗਂ ਕਾਰਣਨ੍ਤਿ ਮਗ੍ਗਙ੍ਗਂ. ਅਰਿਯਮਗ੍ਗਸ੍ਸ ਅਨ੍ਤੋਗਧਤ੍ਤਾ ਮਗ੍ਗਪਰਿਯਾਪਨ੍ਨਨ੍ਤਿ.
ਅਸਞ੍ਞਾਸਮਾਪਤ੍ਤੀਤਿ ਸਞ੍ਞਾਵਿਰਾਗਭਾਵਨਾਵਸੇਨ ਪਵਤ੍ਤਿਤਾ ਅਸਞ੍ਞਭਵੂਪਪਤ੍ਤਿਨਿਬ੍ਬਤ੍ਤਨਸਮਾਪਤ੍ਤਿ. ਅਨੁਪ੍ਪਨ੍ਨੇ ਹਿ ਬੁਦ੍ਧੇ ਏਕਚ੍ਚੇ ਤਿਤ੍ਥਾਯਤਨੇ ਪਬ੍ਬਜਿਤ੍ਵਾ ਵਾਯੋਕਸਿਣੇ ਪਰਿਕਮ੍ਮਂ ਕਤ੍ਵਾ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਝਾਨਾ ਵੁਟ੍ਠਾਯ ਸਞ੍ਞਾਯ ਦੋਸਂ ਪਸ੍ਸਨ੍ਤਿ, ਸਞ੍ਞਾਯ ਸਤਿ ਹਤ੍ਥਚ੍ਛੇਦਾਦਿਦੁਕ੍ਖਞ੍ਚੇਵ ਸਬ੍ਬਭਯਾਨਿ ਚ ਹੋਨ੍ਤਿ, ‘‘ਅਲਂ ਇਮਾਯ ਸਞ੍ਞਾਯ, ਸਞ੍ਞਾਭਾਵੋ ਸਨ੍ਤੋ’’ਤਿ ਏਵਂ ਸਞ੍ਞਾਯ ਦੋਸਂ ਪਸ੍ਸਿਤ੍ਵਾ ਸਞ੍ਞਾਵਿਰਾਗਵਸੇਨ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨਾ ਕਾਲਂ ਕਤ੍ਵਾ ਅਸਞ੍ਞੀਸੁ ਨਿਬ੍ਬਤ੍ਤਨ੍ਤਿ. ਚਿਤ੍ਤਂ ਨੇਸਂ ਚੁਤਿਚਿਤ੍ਤਨਿਰੋਧੇਨੇਵ ਇਧ ਨਿਵਤ੍ਤਤਿ, ਰੂਪਕ੍ਖਨ੍ਧਮਤ੍ਤਮੇਵ ਤਤ੍ਥ ਨਿਬ੍ਬਤ੍ਤਤਿ.
ਤੇ ਯਥਾ ਨਾਮ ਜਿਯਾਵੇਗੁਕ੍ਖਿਤ੍ਤੋ ਸਰੋ ਯਤ੍ਤਕੋ ਜਿਯਾਵੇਗੋ, ਤਤ੍ਤਕਮੇਵ ਆਕਾਸੇ ਗਚ੍ਛਤਿ, ਏਵਮੇਵਂ ਝਾਨਵੇਗੁਕ੍ਖਿਤ੍ਤਾ ਉਪਪਜ੍ਜਿਤ੍ਵਾ ਯਤ੍ਤਕੋ ਝਾਨਵੇਗੋ, ਤਤ੍ਤਕਮੇਵ ਕਾਲਂ ਤਿਟ੍ਠਨ੍ਤਿ. ਝਾਨਵੇਗੇ ਪਨ ਪਰਿਕ੍ਖੀਣੇ ਤਤ੍ਥ ਰੂਪਕ੍ਖਨ੍ਧੋ ਅਨ੍ਤਰਧਾਯਤਿ, ਇਧ ਪਟਿਸਨ੍ਧਿਸਞ੍ਞਾ ਉਪ੍ਪਜ੍ਜਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਅਸਞ੍ਞਭਵੂਪਪਤ੍ਤਿਨਿਬ੍ਬਤ੍ਤਨਸਮਾਪਤ੍ਤੀ’’ਤਿ. ਵਿਭੂਤਸਞ੍ਞਾਸਮਾਪਤ੍ਤੀਤਿ ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿ. ਸਾ ਹਿ ਪਠਮਾਰੁਪ੍ਪਵਿਞ੍ਞਾਣਸ੍ਸ ਪਠਮਾਰੁਪ੍ਪਸਞ੍ਞਾਯਪਿ ਵਿਭਾਵਨਤੋ ‘‘ਵਿਭੂਤਸਞ੍ਞਾ’’ਤਿ ਵੁਚ੍ਚਤਿ. ਕੇਚਿ ‘‘ਵਿਭੂਤਰੂਪਸਞ੍ਞਾ’’ਤਿ ਪਠਨ੍ਤਿ, ਤੇਸਂ ਮਤੇਨ ਵਿਭੂਤਰੂਪਸਮਾਪਤ੍ਤਿ ਨਾਮ ਸੇਸਾਰੁਪ੍ਪਸਮਾਪਤ੍ਤਿਯੋ. ਸੇਸਾ ਸਮਾਪਤ੍ਤਿਯੋ ਸੁਵਿਞ੍ਞੇਯ੍ਯਾਵ.
ਨੇਵਸੇਕ੍ਖਨਾਸੇਕ੍ਖੋ ਝਾਯੀਤਿ ਝਾਨਲਾਭੀ ਪੁਥੁਜ੍ਜਨੋ. ਆਜਾਨਿਯੋ ਝਾਯੀਤਿ ਅਰਹਾ, ਸਬ੍ਬੇਪਿ ਵਾ ਅਰਿਯਪੁਗ੍ਗਲਾ. ਅਸ੍ਸਖਲੁਙ੍ਕੋ ਝਾਯੀਤਿ ਖਲੁਙ੍ਕਸ੍ਸਸਦਿਸੋ ਝਾਯੀ. ਤਥਾ ਹਿ ਖਲੁਙ੍ਕੋ ਅਸ੍ਸੋ ਦਮਥਂ ਨ ਉਪੇਤਿ ਇਤੋ ਚਿਤੋ ਚ ਯਥਾਰੁਚਿ ਧਾਵਤਿ, ਏਵਮੇਵਂ ਯੋ ਪੁਥੁਜ੍ਜਨੋ ਅਭਿਞ੍ਞਾਲਾਭੀ, ਸੋ ਅਭਿਞ੍ਞਾ ਅਸ੍ਸਾਦੇਤ੍ਵਾ ‘‘ਅਲਮੇਤ੍ਤਾਵਤਾ, ਕਤਮੇਤ੍ਤਾਵਤਾ’’ਤਿ ਉਤ੍ਤਰਿਦਮਥਾਯ ਅਪਰਿਸਕ੍ਕਨ੍ਤੋ ਅਭਿਞ੍ਞਾਚਿਤ੍ਤਵਸੇਨ ਇਤੋ ਚਿਤੋ ਚ ਧਾਵਤਿ ਪਵਤ੍ਤਤਿ, ਸੋ ‘‘ਅਸ੍ਸਖਲੁਙ੍ਕੋ ਝਾਯੀ’’ਤਿ ਵੁਤ੍ਤੋ. ਦਿਟ੍ਠੁਤ੍ਤਰੋ ਝਾਯੀਤਿ ਝਾਨਲਾਭੀ ਦਿਟ੍ਠਿਗਤਿਕੋ. ਪਞ੍ਞੁਤ੍ਤਰੋ ਝਾਯੀਤਿ ਲਕ੍ਖਣੂਪਨਿਜ੍ਝਾਨੇਨ ਝਾਯੀ, ਸਬ੍ਬੋ ਏਵ ਵਾ ਪਞ੍ਞਾਧਿਕੋ ਝਾਯੀ.
ਸਰਣੋ ਸਮਾਧੀਤਿ ਅਕੁਸਲਚਿਤ੍ਤੇਕਗ੍ਗਤਾ, ਸਬ੍ਬੋਪਿ ਵਾ ਸਾਸਵੋ ਸਮਾਧਿ. ਅਰਣੋ ਸਮਾਧੀਤਿ ਸਬ੍ਬੋ ਕੁਸਲਾਬ੍ਯਾਕਤੋ ਸਮਾਧਿ, ਲੋਕੁਤ੍ਤਰੋ ਏਵ ਵਾ. ਸਵੇਰੋ ਸਮਾਧੀਤਿ ਪਟਿਘਚਿਤ੍ਤੇਸੁ ਏਕਗ੍ਗਤਾ. ਅਵੇਰੋ ਸਮਾਧੀਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਅਨਨ੍ਤਰਦੁਕੇਪਿ ਏਸੇਵ ਨਯੋ. ਸਾਮਿਸੋ ਸਮਾਧੀਤਿ ਲੋਕਿਯਸਮਾਧਿ. ਸੋ ਹਿ ਅਨਤਿਕ੍ਕਨ੍ਤਵਟ੍ਟਾਮਿਸਲੋਕਾਮਿਸਤਾਯ ਸਾਮਿਸੋ. ਨਿਰਾਮਿਸੋ ਸਮਾਧੀਤਿ ਲੋਕੁਤ੍ਤਰੋ ਸਮਾਧਿ. ਸਸਙ੍ਖਾਰੋ ਸਮਾਧੀਤਿ ਦੁਕ੍ਖਾਪਟਿਪਦੋ ਦਨ੍ਧਾਭਿਞ੍ਞੋ ਸੁਖਾਪਟਿਪਦੋ ਚ ਦਨ੍ਧਾਭਿਞ੍ਞੋ. ਸੋ ਹਿ ਸਸਙ੍ਖਾਰੇਨ ਸਪ੍ਪਯੋਗੇਨ ਚਿਤ੍ਤੇਨ ਪਚ੍ਚਨੀਕਧਮ੍ਮੇ ਕਿਚ੍ਛੇਨ ਕਸਿਰੇਨ ਨਿਗ੍ਗਹੇਤ੍ਵਾ ਅਧਿਗਨ੍ਤਬ੍ਬੋ. ਇਤਰੋ ਅਸਙ੍ਖਾਰੋ ਸਮਾਧਿ. ਏਕਂਸਭਾਵਿਤੋ ਸਮਾਧੀਤਿ ਸੁਕ੍ਖਵਿਪਸ੍ਸਕਸ੍ਸ ਸਮਾਧਿ. ਉਭਯਂਸਭਾਵਿਤੋ ਸਮਾਧੀਤਿ ਸਮਥਯਾਨਿਕਸ੍ਸ ਸਮਾਧਿ. ਉਭਯਤੋ ਭਾਵਿਤਭਾਵਨੋ ਸਮਾਧੀਤਿ ਕਾਯਸਕ੍ਖਿਨੋ ਉਭਤੋਭਾਗਵਿਮੁਤ੍ਤਸ੍ਸ ਚ ਸਮਾਧਿ. ਸੋ ਹਿ ਉਭਯਤੋ ਭਾਗੇਹਿ ਉਭਯਤੋ ਭਾਵਿਤਭਾਵਨੋ.
ਆਗਾਲ਼੍ਹਪਟਿਪਦਾਤਿ ਕਾਮਾਨਂ ਓਰੋਹਨਪਟਿਪਤ੍ਤਿ, ਕਾਮਸੁਖਾਨੁਯੋਗੋਤਿ ਅਤ੍ਥੋ. ਨਿਜ੍ਝਾਮਪਟਿਪਦਾਤਿ ਕਾਮਸ੍ਸ ਨਿਜ੍ਝਾਪਨਵਸੇਨ ਖੇਦਨਵਸੇਨ ਪਵਤ੍ਤਾ ਪਟਿਪਤ੍ਤਿ, ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਥੋ. ਅਕ੍ਖਮਾ ਪਟਿਪਦਾਤਿਆਦੀਸੁ ਪਧਾਨਕਰਣਕਾਲੇ ਸੀਤਾਦੀਨਿ ਅਸਹਨ੍ਤਸ੍ਸ ਪਟਿਪਦਾ, ਤਾਨਿ ਨਕ੍ਖਮਤੀਤਿ ਅਕ੍ਖਮਾ. ਸਹਨ੍ਤਸ੍ਸ ਪਨ ਤਾਨਿ ਖਮਤੀਤਿ ਖਮਾ. ‘‘ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀ’’ਤਿਆਦਿਨਾ (ਮ. ਨਿ. ੧.੨੬; ਅ. ਨਿ. ੪.੧੪; ੬.੫੮) ਨਯੇਨ ਮਿਚ੍ਛਾਵਿਤਕ੍ਕੇ ਸਮੇਤੀਤਿ ਸਮਾ. ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ ਦਮੇਤੀਤਿ ਦਮਾ ਪਟਿਪਦਾ.
ਏਵਨ੍ਤਿ ਇਮਿਨਾ ਵੁਤ੍ਤਨਯੇਨ. ਯੋ ਧਮ੍ਮੋਤਿ ਯੋ ਕੋਚਿ ਜਾਤਿਆਦਿਧਮ੍ਮੋ. ਯਸ੍ਸ ਧਮ੍ਮਸ੍ਸਾਤਿ ਤਤੋ ਅਞ੍ਞਸ੍ਸ ਜਰਾਦਿਧਮ੍ਮਸ੍ਸ. ਸਮਾਨਭਾਵੋਤਿ ਦੁਕ੍ਖਾਦਿਭਾਵੇਨ ਸਮਾਨਭਾਵੋ. ਏਕਤ੍ਤਤਾਯਾਤਿ ਸਮਾਨਤਾਯ ਦੁਕ੍ਖਾਦਿਭਾਵਾਨਂ ਏਕੀਭਾਵੇਨ. ਏਕੀ ਭਵਤੀਤਿ ਅਨੇਕੋਪਿ ‘‘ਦੁਕ੍ਖ’’ਨ੍ਤਿਆਦਿਨਾ ਏਕਸਦ੍ਦਾਭਿਧੇਯ੍ਯਤਾਯ ਏਕੀ ਭਵਤਿ. ਏਤੇਨ ਏਕਤ੍ਤਤਾਯ ਲਕ੍ਖਣਮਾਹ. ਯੇਨ ਯੇਨ ਵਾ ਪਨ ਵਿਲਕ੍ਖਣੋਤਿ ਯੋ ਧਮ੍ਮੋ ਯਸ੍ਸ ਧਮ੍ਮਸ੍ਸ ਯੇਨ ਯੇਨ ਭਾਵੇਨ ਵਿਸਦਿਸੋ. ਤੇਨ ਤੇਨ ਵੇਮਤ੍ਤਂ ਗਚ੍ਛਤੀਤਿ ਤੇਨ ਤੇਨ ਭਾਵੇਨ ਸੋ ਧਮ੍ਮੋ ਤਸ੍ਸ ਧਮ੍ਮਸ੍ਸ ਵੇਮਤ੍ਤਤਂ ਵਿਸਦਿਸਤ੍ਤਂ ਗਚ੍ਛਤਿ, ਦੁਕ੍ਖਭਾਵੇਨ ਸਮਾਨੋਪਿ ਜਾਤਿਆਦਿਕੋ ਅਭਿਨਿਬ੍ਬਤ੍ਤਿਆਦਿਭਾਵੇਨ ਜਰਾਦਿਕਸ੍ਸ ਵਿਸਿਟ੍ਠਤਂ ਗਚ੍ਛਤੀਤਿ ਅਤ੍ਥੋ. ਇਮਿਨਾ ਵੇਮਤ੍ਤਤਾਯ ਲਕ੍ਖਣਮਾਹ.
ਇਦਾਨਿ ਤਾਵ ਏਕਤ੍ਤਵੇਮਤ੍ਤਤਾਵਿਸਯੇ ਨਿਯੋਜੇਤ੍ਵਾ ਦਸ੍ਸੇਤੁਂ ‘‘ਸੁਤ੍ਤੇ ਵਾ ਵੇਯ੍ਯਾਕਰਣੇ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਪੁਚ੍ਛਿਤਨ੍ਤਿ ਪੁਚ੍ਛਾਵਸੇਨ ਦੇਸਿਤਸੁਤ੍ਤਵਸੇਨ ਵੁਤ੍ਤਂ, ਨ ਪਨ ਅਧਿਟ੍ਠਾਨਹਾਰਸ੍ਸ ਪੁਚ੍ਛਾਵਿਸਯਤਾਯ. ਸੇਸਂ ਉਤ੍ਤਾਨਮੇਵ.
ਅਧਿਟ੍ਠਾਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.