੯. ਪਰਿਵਤ੍ਤਨਹਾਰਵਿਭਙ੍ਗਵਣ੍ਣਨਾ

੩੫. ਤਤ੍ਥ ਕਤਮੋ ਪਰਿਵਤ੍ਤਨੋ ਹਾਰੋਤਿ ਪਰਿਵਤ੍ਤਨਹਾਰਵਿਭਙ੍ਗੋ. ਤਤ੍ਥ ਯਸ੍ਮਾ ਸਂਵਣ੍ਣਿਯਮਾਨੇ ਸੁਤ੍ਤੇ ਯਥਾਨਿਦ੍ਦਿਟ੍ਠਾਨਂ ਕੁਸਲਾਕੁਸਲਧਮ੍ਮਾਨਂ ਪਟਿਪਕ੍ਖਭੂਤੇ ਅਕੁਸਲਕੁਸਲਧਮ੍ਮੇ ਪਹਾਤਬ੍ਬਭਾਵਾਦਿਵਸੇਨ ਨਿਦ੍ਧਾਰਣਂ ਪਟਿਪਕ੍ਖਤੋ ਪਰਿਵਤ੍ਤਨਂ, ਤਸ੍ਮਾ ‘‘ਸਮ੍ਮਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਭਵਤੀ’’ਤਿਆਦਿ ਆਰਦ੍ਧਂ. ਤਤ੍ਥ ਸਮ੍ਮਾ ਪਸਤ੍ਥਾ, ਸੁਨ੍ਦਰਾ ਦਿਟ੍ਠਿ ਏਤਸ੍ਸਾਤਿ ਸਮ੍ਮਾਦਿਟ੍ਠਿ, ਤਸ੍ਸ. ਸਾ ਪਨਸ੍ਸ ਸਮ੍ਮਾਦਿਟ੍ਠਿਤਾ ਪੁਬ੍ਬਭਾਗਸਮ੍ਮਾਦਿਟ੍ਠਿਯਾ ਵਾ ਲੋਕੁਤ੍ਤਰਸਮ੍ਮਾਦਿਟ੍ਠਿਯਾ ਵਾ ਵੇਦਿਤਬ੍ਬਾ. ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਭਵਤੀਤਿ ਪੁਰਿਮਨਯੇ ਵਿਪਸ੍ਸਨਾਸਮ੍ਮਾਦਿਟ੍ਠਿਯਾ ਪਹੀਨਾ ਹੋਤਿ, ਵਿਕ੍ਖਮ੍ਭਿਤਾਤਿ ਅਤ੍ਥੋ. ਪਚ੍ਛਿਮਨਯੇ ਪਠਮਮਗ੍ਗਸਮ੍ਮਾਦਿਟ੍ਠਿਯਾ ਪਹੀਨਾ ਸਮੁਚ੍ਛਿਨ੍ਨਾਤਿ ਅਤ੍ਥੋ.

ਯੇ ਚਸ੍ਸ ਮਿਚ੍ਛਾਦਿਟ੍ਠਿਪਚ੍ਚਯਾਤਿ ਮਿਚ੍ਛਾਭਿਨਿਵੇਸਹੇਤੁ ਯੇ ਅਰਿਯਾਨਂ ਅਦਸ੍ਸਨਕਾਮਤਾਦਯੋ ਲੋਭਾਦਯੋ ਪਾਣਾਤਿਪਾਤਾਦਯੋ ਚ ਅਨੇਕੇ ਲਾਮਕਟ੍ਠੇਨ ਪਾਪਕਾ ਅਕੋਸਲ੍ਲਸਮ੍ਭੂਤਟ੍ਠੇਨ ਅਕੁਸਲਾ ਧਮ੍ਮਾ ਉਪ੍ਪਜ੍ਜੇਯ੍ਯੁਂ. ਇਮਸ੍ਸ ਆਰਦ੍ਧਵਿਪਸ੍ਸਕਸ੍ਸ ਅਰਿਯਸ੍ਸ ਚ. ਧਮ੍ਮਾਤਿ ਸਮਥਵਿਪਸ੍ਸਨਾਧਮ੍ਮਾ, ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਾ ਵਾ ਅਨੁਪ੍ਪਨ੍ਨਾ ਵਾ ਸਮ੍ਭਵਨ੍ਤਿ ਉਪ੍ਪਨ੍ਨਾ, ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ. ਸਮ੍ਮਾਸਙ੍ਕਪ੍ਪਸ੍ਸਾਤਿਆਦੀਨਮ੍ਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਸਮ੍ਮਾਵਿਮੁਤ੍ਤਿਆਦੀਨਂ ਮਿਚ੍ਛਾਵਿਮੁਤ੍ਤਿ ਅਵਿਮੁਤ੍ਤਾਵ ਸਮਾਨਾ ‘‘ਵਿਮੁਤ੍ਤਾ ਮਯ’’ਨ੍ਤਿ ਏਵਂਸਞ੍ਞਿਨੋ ਅਵਿਮੁਤ੍ਤਿਯਂ ਵਾ ਵਿਮੁਤ੍ਤਿਸਞ੍ਞਿਨੋ. ਤਤ੍ਰਾਯਂ ਵਚਨਤ੍ਥੋ – ਮਿਚ੍ਛਾ ਪਾਪਿਕਾ ਵਿਮੁਤ੍ਤਿ ਵਿਮੋਕ੍ਖੋ ਏਤਸ੍ਸਾਤਿ ਮਿਚ੍ਛਾਵਿਮੁਤ੍ਤਿ. ਅਟ੍ਠਙ੍ਗਾ ਚ ਮਿਚ੍ਛਾਵਿਮੁਤ੍ਤਿ ਯਥਾਵੁਤ੍ਤੇਨਾਕਾਰੇਨ ਮਿਚ੍ਛਾਭਿਨਿਵੇਸਵਸੇਨ ਚ ਪਵਤ੍ਤਾ ਅਨ੍ਤਦ੍ਵਯਲਕ੍ਖਣਾ. ਸਮ੍ਮਾਵਿਮੁਤ੍ਤਿ ਪਨ ਫਲਧਮ੍ਮਾ, ਮਿਚ੍ਛਾਦਿਟ੍ਠਿਕੇ ਸਮਾਸੇਵਤੋ ਮਿਚ੍ਛਾਵਿਮੋਕ੍ਖੋ ਵਾ ਮਿਚ੍ਛਾਵਿਮੁਤ੍ਤਿ. ਮਿਚ੍ਛਾਵਿਮੁਤ੍ਤਿਞਾਣਦਸ੍ਸਨਂ ਪਨ ਮਿਚ੍ਛਾਵਿਮੋਕ੍ਖੇ ਮਿਚ੍ਛਾਦਿਟ੍ਠਿਯਾ ਚ ਸਾਰਨ੍ਤਿ ਗਹਣਵਸੇਨ ਪਵਤ੍ਤੋ ਅਕੁਸਲਚਿਤ੍ਤੁਪ੍ਪਾਦੋ ਅਨ੍ਤਮਸੋ ਪਾਪਂ ਕਤ੍ਵਾ ‘‘ਸੁਕਤਂ ਮਯਾ’’ਤਿ ਪਚ੍ਚਵੇਕ੍ਖਤੋ ਉਪ੍ਪਨ੍ਨਮੋਹੋ ਚ. ਸਮ੍ਮਾਵਿਮੁਤ੍ਤਿਞਾਣਦਸ੍ਸਨਸ੍ਸਾਤਿ ਏਤ੍ਥ ਸੇਕ੍ਖਾਨਂ ਪਚ੍ਚਵੇਕ੍ਖਣਞਾਣਂ ਸਮ੍ਮਾਵਿਮੁਤ੍ਤਿਞਾਣਦਸ੍ਸਨਨ੍ਤਿ ਅਧਿਪ੍ਪੇਤਂ. ਤਞ੍ਹਿ ਉਤ੍ਤਰਿਭਾਵਨਾਪਾਰਿਪੂਰਿਯਾ ਸਂਵਤ੍ਤਤਿ.

੩੬. ਏਵਂ ਸਮ੍ਮਾਦਿਟ੍ਠਿਆਦਿਮੁਖੇਨ ਮਿਚ੍ਛਾਦਿਟ੍ਠਿਆਦਿਂ ਦਸ੍ਸੇਤ੍ਵਾ ਪੁਨ ਪਾਣਾਤਿਪਾਤਅਦਿਨ੍ਨਾਦਾਨਕਾਮੇਸੁਮਿਚ੍ਛਾਚਾਰਾਦਿਤੋ ਵੇਰਮਣਿਯਾਦੀਹਿ ਪਾਣਾਤਿਪਾਤਾਦੀਨਂ ਪਰਿਵਤ੍ਤਨਂ ਦਸ੍ਸੇਤੁਂ ‘‘ਯਸ੍ਸਾ’’ਤਿਆਦਿ ਆਰਦ੍ਧਂ. ਤਤ੍ਥ ਕਾਲਵਾਦਿਸ੍ਸਾਤਿ ਲਕ੍ਖਣਵਚਨਂ. ਕਾਲੇਨ ਸਾਪਦੇਸਂ ਪਰਿਯਨ੍ਤਵਤਿਂ ਅਤ੍ਥਸਞ੍ਹਿਤਨ੍ਤਿ ਸੋ ਸਮ੍ਫਪ੍ਪਲਾਪਸ੍ਸ ਪਹਾਨਾਯ ਪਟਿਪਨ੍ਨੋ ਹੋਤੀਤਿ ਵੁਤ੍ਤਂ.

ਪੁਨ ‘‘ਯੇ ਚ ਖੋ ਕੇਚੀ’’ਤਿਆਦਿਨਾ ਸਮ੍ਮਾਦਿਟ੍ਠਿਆਦਿਮੁਖੇਨੇਵ ਮਿਚ੍ਛਾਦਿਟ੍ਠਿਆਦੀਹਿ ਏਵ ਪਰਿਵਤ੍ਤਨਂ ਪਕਾਰਨ੍ਤਰੇਨ ਦਸ੍ਸੇਤਿ. ਤਤ੍ਥ ਸਨ੍ਦਿਟ੍ਠਿਕਾਤਿ ਪਚ੍ਚਕ੍ਖਾ. ਸਹਧਮ੍ਮਿਕਾਤਿ ਸਕਾਰਣਾ. ਗਾਰਯ੍ਹਾਤਿ ਗਰਹਿਤਬ੍ਬਯੁਤ੍ਤਾ. ਵਾਦਾਨੁਵਾਦਾਤਿ ਵਾਦਾ ਚੇਵ ਅਨੁਵਾਦਾ ਚ. ‘‘ਵਾਦਾਨੁਪਾਤਾ’’ਤਿਪਿ ਪਾਠੋ, ਵਾਦਾਨੁਪਵਤ੍ਤਿਯੋਤਿ ਅਤ੍ਥੋ. ਪੁਜ੍ਜਾਤਿ ਪੂਜਨੀਯਾ. ਪਾਸਂਸਾਤਿ ਪਸਂਸਿਤਬ੍ਬਾ.

ਪੁਨ ‘‘ਯੇ ਚ ਖੋ ਕੇਚੀ’’ਤਿਆਦਿਨਾ ਮਜ੍ਝਿਮਾਯ ਪਟਿਪਤ੍ਤਿਯਾ ਅਨ੍ਤਦ੍ਵਯਪਰਿਵਤ੍ਤਨਂ ਦਸ੍ਸੇਤਿ. ਤਤ੍ਥ ਭੁਞ੍ਜਿਤਬ੍ਬਾਤਿਆਦੀਨਿ ਚਤ੍ਤਾਰਿ ਪਦਾਨਿ ਵਤ੍ਥੁਕਾਮਵਸੇਨ ਯੋਜੇਤਬ੍ਬਾਨਿ. ਭਾਵਯਿਤਬ੍ਬਾ ਬਹੁਲੀਕਾਤਬ੍ਬਾਤਿ ਪਦਦ੍ਵਯਂ ਕਿਲੇਸਕਾਮਵਸੇਨ. ਤੇਸਂ ਅਧਮ੍ਮੋਤਿ ਭਾਵੇਤਬ੍ਬੋ ਨਾਮ ਧਮ੍ਮੋ ਸਿਯਾ, ਕਾਮਾ ਚ ਤੇਸਂ ਭਾਵੇਤਬ੍ਬਾ ਇਚ੍ਛਿਤਾ, ਕਾਮੇਹਿ ਚ ਵੇਰਮਣੀ ਕਾਮਾਨਂ ਪਟਿਪਕ੍ਖੋ, ਇਤਿ ਸਾ ਤੇਸਂ ਅਧਮ੍ਮੋ ਆਪਜ੍ਜਤੀਤਿ ਅਧਿਪ੍ਪਾਯੋ.

ਨਿਯ੍ਯਾਨਿਕੋ ਧਮ੍ਮੋਤਿ ਸਹ ਵਿਪਸ੍ਸਨਾਯ ਅਰਿਯਮਗ੍ਗੋ. ਦੁਕ੍ਖੋਤਿ ਪਾਪਂ ਨਿਜ੍ਜਰਾਪੇਸ੍ਸਾਮਾਤਿ ਪਵਤ੍ਤਿਤਂ ਸਰੀਰਤਾਪਨਂ ਵਦਤਿ. ਸੁਖੋਤਿ ਅਨਵਜ੍ਜਪਚ੍ਚਯਪਰਿਭੋਗਸੁਖਂ. ਏਤੇਸੁਪਿ ਵਾਰੇਸੁ ਵੁਤ੍ਤਨਯੇਨੇਵ ਅਧਮ੍ਮਭਾਵਾਪਤ੍ਤਿ ਵਤ੍ਤਬ੍ਬਾ. ਇਦਾਨਿ ਅਸੁਭਸਞ੍ਞਾਦਿਮੁਖੇਨ ਸੁਭਸਞ੍ਞਾਦਿਪਰਿਵਤ੍ਤਨਂ ਦਸ੍ਸੇਤੁਂ ‘‘ਯਥਾ ਵਾ ਪਨਾ’’ਤਿਆਦਿ ਵੁਤ੍ਤਂ. ਆਰਦ੍ਧਵਿਪਸ੍ਸਕਸ੍ਸ ਕਿਲੇਸਾਸੁਚਿਪਗ੍ਘਰਣਵਸੇਨ ਤੇਭੂਮਕਸਙ੍ਖਾਰਾ ਅਸੁਭਤੋ ਉਪਟ੍ਠਹਨ੍ਤੀਤਿ ਕਤ੍ਵਾ ਵੁਤ੍ਤਂ ‘‘ਸਬ੍ਬਸਙ੍ਖਾਰੇਸੁ ਅਸੁਭਾਨੁਪਸ੍ਸਿਨੋ ਵਿਹਰਤੋ’’ਤਿ. ‘‘ਯਂ ਯਂ ਵਾ ਪਨਾ’’ਤਿਆਦਿਨਾ ਪਟਿਪਕ੍ਖਸ੍ਸ ਲਕ੍ਖਣਂ ਵਿਭਾਵੇਤਿ. ਤਤ੍ਥ ਅਜ੍ਝਾਪਨ੍ਨੋਤਿ ਅਧਿਆਪਨ੍ਨੋ, ਅਭਿਉਪਗਤੋ ਪਰਿਞ੍ਞਾਤੋਤਿ ਅਤ੍ਥੋ.

ਪਰਿਵਤ੍ਤਨਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.