ਨਯਸਮੁਟ੍ਠਾਨਵਾਰਵਣ੍ਣਨਾ
੭੯. ਏਵਂ ਨਾਨਾਸੁਤ੍ਤਵਸੇਨ ਏਕਸੁਤ੍ਤਵਸੇਨ ਚ ਹਾਰਵਿਚਾਰਂ ਦਸ੍ਸੇਤ੍ਵਾ ਇਦਾਨਿ ਨਯਵਿਚਾਰਂ ਦਸ੍ਸੇਤੁਂ ‘‘ਤਤ੍ਥ ਕਤਮਂ ਨਯਸਮੁਟ੍ਠਾਨ’’ਨ੍ਤਿਆਦਿ ਆਰਦ੍ਧਂ. ਕਸ੍ਮਾ ਪਨੇਤ੍ਥ ਯਥਾ ‘‘ਤਤ੍ਥ ਕਤਮੋ ਦੇਸਨਾਹਾਰੋ, ਅਸ੍ਸਾਦਾਦੀਨਵਤਾਤਿ ਗਾਥਾ. ਅਯਂ ਦੇਸਨਾਹਾਰੋ ਕਿਂ ਦੇਸਯਤੀ’’ਤਿਆਦਿਨਾ ਹਾਰਨਿਦ੍ਦੇਸੋ ਆਰਦ੍ਧੋ, ਏਵਂ ‘‘ਤਤ੍ਥ ਕਤਮੋ ਨਨ੍ਦਿਯਾਵਟ੍ਟੋ, ਤਣ੍ਹਞ੍ਚ ਅਵਿਜ੍ਜਮ੍ਪਿ ਚਾਤਿ ਗਾਥਾ, ਅਯਂ ਨਨ੍ਦਿਯਾਵਟ੍ਟੋ ਕਿਂ ਨਯਤੀ’’ਤਿਆਦਿਨਾ ਅਨਾਰਭਿਤ੍ਵਾ ਸਮੁਟ੍ਠਾਨਮੁਖੇਨ ਆਰਦ੍ਧਨ੍ਤਿ? ਵੁਚ੍ਚਤੇ – ਹਾਰਨਯਾਨਂ ਵਿਸਯਭੇਦਤੋ. ਯਥਾ ਹਿ ਹਾਰਾ ਬ੍ਯਞ੍ਜਨਮੁਖੇਨ ਸੁਤ੍ਤਸ੍ਸ ਅਤ੍ਥਸਂਵਣ੍ਣਨਾ, ਨ ਏਵਂ ਨਯਾ. ਨਯਾ ਪਨ ਨਾਨਾਸੁਤ੍ਤਤੋ ਨਿਦ੍ਧਾਰਿਤੇਹਿ ਤਣ੍ਹਾਵਿਜ੍ਜਾਦੀਹਿ ਮੂਲਪਦੇਹਿ ਚਤੁਸਚ੍ਚਯੋਜਨਾਯ ਨਯਤੋ ਅਨੁਬੁਜ੍ਝਿਯਮਾਨੋ ਦੁਕ੍ਖਾਦਿਅਤ੍ਥੋ. ਸੋ ਹਿ ਮਗ੍ਗਞਾਣਂ ਨਯਤਿ ਸਮ੍ਪਾਪੇਤੀਤਿ ਨਯੋ. ਪਟਿਵਿਜ੍ਝਨ੍ਤਾਨਂ ਪਨ ਉਗ੍ਘਟਿਤਞ੍ਞੁਆਦੀਨਂ ਤਿਣ੍ਣਂ ਵੇਨੇਯ੍ਯਾਨਂ ਵਸੇਨ ਮੂਲਪਦਵਿਭਾਗਤੋ ਤਿਧਾ ਵਿਭਤ੍ਤਾ. ਏਕਮੇਕੋ ਚੇਤ੍ਥ ਯਤੋ ਨੇਤਿ, ਯਞ੍ਚ ਨੇਤਿ, ਤੇਸਂ ਸਂਕਿਲੇਸਵੋਦਾਨਾਨਂ ਵਿਭਾਗਤੋ ਦ੍ਵਿਸਙ੍ਗਹੋ ਚਤੁਛਅਟ੍ਠਦਿਸੋ ਚਾਤਿ ਭਿਨ੍ਨੋ ਹਾਰਨਯਾਨਂ ਵਿਸਯੋ. ਤਥਾ ਹਿ ਵੁਤ੍ਤਂ – ‘‘ਹਾਰਾ ਬ੍ਯਞ੍ਜਨਵਿਚਯੋ, ਸੁਤ੍ਤਸ੍ਸ ਨਯਾ ਤਯੋ ਚ ਸੁਤ੍ਤਤ੍ਥੋ’’ਤਿ (ਨੇਤ੍ਤਿ. ਸਙ੍ਗਹਵਾਰ). ਏਵਂ ਵਿਸਿਟ੍ਠਵਿਸਯਤ੍ਤਾ ਹਾਰਨਯਾਨਂ ਹਾਰੇਹਿ ਅਞ੍ਞਥਾ ਨਯੇ ਨਿਦ੍ਦਿਸਨ੍ਤੋ ‘‘ਤਤ੍ਥ ਕਤਮਂ ਨਯਸਮੁਟ੍ਠਾਨ’’ਨ੍ਤਿਆਦਿਮਾਹ.
ਤਤ੍ਥਾਯਂ ਵਚਨਤ੍ਥੋ – ਸਮੁਟ੍ਠਹਨ੍ਤਿ ਏਤੇਨਾਤਿ ਸਮੁਟ੍ਠਾਨਂ. ਕੇ ਸਮੁਟ੍ਠਹਨ੍ਤਿ? ਨਯਾ. ਨਯਾਨਂ ਸਮੁਟ੍ਠਾਨਂ ਨਯਸਮੁਟ੍ਠਾਨਂ. ਕਿਂ ਪਨ ਤਂ? ਤਂਤਂਮੂਲਪਦੇਹਿ ਚਤੁਸਚ੍ਚਯੋਜਨਾ. ਸਾ ਹਿ ਨਨ੍ਦਿਯਾਵਟ੍ਟਾਦੀਨਂ ਨਯਾਨਂ ਉਪ੍ਪਤ੍ਤਿਟ੍ਠਾਨਤਾਯ ਸਮੁਟ੍ਠਾਨਂ ਭੂਮੀਤਿ ਚ ਵੁਚ੍ਚਤਿ. ਤਥਾ ਚ ਵਕ੍ਖਤਿ – ‘‘ਅਯਂ ਵੁਚ੍ਚਤਿ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਭੂਮੀ’’ਤਿ (ਨੇਤ੍ਤਿ. ੮੧). ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯ ਚ ਭਵਤਣ੍ਹਾਯ ਚਾਤਿਆਦਿ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਭੂਮਿਦਸ੍ਸਨਂ. ਤਤ੍ਥ ਪੁਬ੍ਬਾ ਕੋਟਿ ਨ ਪਞ੍ਞਾਯਤੀਤਿ ਅਸੁਕਸ੍ਸ ਨਾਮ ਬੁਦ੍ਧਸ੍ਸ ਭਗਵਤੋ, ਅਸੁਕਸ੍ਸ ਵਾ ਚਕ੍ਕਵਤ੍ਤਿਨੋ ਕਾਲੇ ਅਵਿਜ੍ਜਾ ਭਵਤਣ੍ਹਾ ਚ ਉਪ੍ਪਨ੍ਨਾ. ਤਤੋ ਪੁਬ੍ਬੇ ਨਾਹੋਸੀਤਿ ਏਵਂ ਅਵਿਜ੍ਜਾਭਵਤਣ੍ਹਾਨਂ ਨ ਕਾਚਿ ਪੁਰਿਮਾ ਮਰਿਯਾਦਾ ਉਪਲਬ੍ਭਤਿ. ਕਸ੍ਮਾ? ਅਨਮਤਗ੍ਗਤ੍ਤਾ ਸਂਸਾਰਸ੍ਸ. ਵੁਤ੍ਤਞ੍ਹੇਤਂ – ‘‘ਅਨਮਤਗ੍ਗੋਯਂ, ਭਿਕ੍ਖਵੇ, ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤੀ’’ਤਿ (ਸਂ. ਨਿ. ੨.੧੨੪; ਕਥਾ. ੭੫) ਵਿਤ੍ਥਾਰੋ. ਤਤ੍ਥਾਤਿ ਅਵਿਜ੍ਜਾਭਵਤਣ੍ਹਾਸੁ. ਯਦਿਪਿ ਅਵਿਜ੍ਜਾਯ ਸਂਯੋਜਨਭਾਵੋ, ਤਣ੍ਹਾਯ ਚ ਨੀਵਰਣਭਾਵੋ ਪਾਲ਼ਿਯਂ ਵੁਤ੍ਤੋ, ਤਥਾਪਿ ਅਵਿਜ੍ਜਾਯ ਪਟਿਚ੍ਛਾਦਿਤਾਦੀਨਵੇਹਿ ਭਵੇਹਿ ਤਣ੍ਹਾ ਸਂਯੋਜੇਤੀਤਿ ਇਮਸ੍ਸ ਅਤ੍ਥਸ੍ਸ ਦਸ੍ਸਨਤ੍ਥਂ ‘‘ਅਵਿਜ੍ਜਾਨੀਵਰਣਂ ਤਣ੍ਹਾਸਂਯੋਜਨ’’ਨ੍ਤਿ ਵੁਤ੍ਤਂ.
ਅਵਿਜ੍ਜਾਸਂਯੁਤ੍ਤਾਤਿ ਅਵਿਜ੍ਜਾਯ ਮਿਸ੍ਸਿਤਾ, ਅਵਿਜ੍ਜਾਯ ਵਾ ਅਭਿਨਿਵੇਸਵਤ੍ਥੂਸੁ ਬਦ੍ਧਾ. ਅਵਿਜ੍ਜਾਪਕ੍ਖੇਨ ਵਿਚਰਨ੍ਤੀਤਿ ਅਵਿਜ੍ਜਾਪਕ੍ਖੇਨ ਅਵਿਜ੍ਜਾਸਹਾਯੇਨ ਦ੍ਵਾਦਸਵਿਧੇਨ ਵਿਪਲ੍ਲਾਸੇਨ ਅਭਿਨਿਵੇਸਵਤ੍ਥੁਭੂਤੇ ਆਰਮ੍ਮਣੇ ਪਵਤ੍ਤਨ੍ਤਿ. ਤੇ ਵੁਚ੍ਚਨ੍ਤਿ ਦਿਟ੍ਠਿਚਰਿਤਾਤਿ ਤੇ ਅਵਿਜ੍ਜਾਭਿਭੂਤਾ ਰੂਪਾਦੀਨਿ ਨਿਚ੍ਚਾਦਿਤੋ ਅਭਿਨਿਵਿਸਨ੍ਤਾ ਦਿਟ੍ਠਿਚਰਿਤਾਤਿ ਵੁਚ੍ਚਨ੍ਤਿ, ਦਿਟ੍ਠਿਚਰਿਤਾ ਨਾਮਾਤਿ ਅਤ੍ਥੋ. ਤਣ੍ਹਾਪਕ੍ਖੇਨਾਤਿ ਅਟ੍ਠਸਤਤਣ੍ਹਾਵਿਚਰਿਤੇਨ. ਦਿਟ੍ਠਿਵਿਚਰਿਤੇ ਤਣ੍ਹਾਵਿਚਰਿਤੇ ਚ ਪਟਿਪਤ੍ਤਿਯਾ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਦਿਟ੍ਠਿਚਰਿਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਤ੍ਤਕਿਲਮਥਾਨੁਯੋਗਨ੍ਤਿ ਅਤ੍ਤਨੋ ਕਾਯਸ੍ਸ ਕਿਲਿਸ੍ਸਨਪਯੋਗਂ ਅਤ੍ਤਪਰਿਤਾਪਨਪਟਿਪਤ੍ਤਿਂ. ਕਾਮਸੁਖਲ੍ਲਿਕਾਨੁਯੋਗਨ੍ਤਿ ਕਾਮਸੁਖਸ੍ਸ ਅਲ੍ਲੀਯਨਪਯੋਗਂ ਕਾਮੇਸੁ ਪਾਤਬ੍ਯਤਂ.
ਯਦਿਪਿ ਬਾਹਿਰਕਾ ‘‘ਦੁਕ੍ਖਂ ਤਣ੍ਹਾ’’ਤਿ ਚ ਜਾਨਨ੍ਤਿ ‘‘ਇਦਂ ਦੁਕ੍ਖਂ, ਏਤ੍ਤਕਂ ਦੁਕ੍ਖ’’ਨ੍ਤਿ, ‘‘ਅਯਂ ਤਣ੍ਹਾ, ਅਯਂ ਤਸ੍ਸਾ ਵਿਰਾਗੋ’’ਤਿ ਪਰਿਞ੍ਞੇਯ੍ਯਪਹਾਤਬ੍ਬਭਾਵੇਨ ਪਨ ਨ ਜਾਨਨ੍ਤਿ, ਇਤਿ ਪਵਤ੍ਤਿਪਵਤ੍ਤਿਹੇਤੁਮਤ੍ਤਮ੍ਪਿ ਨ ਜਾਨਨ੍ਤਿ. ਕਾ ਪਨ ਕਥਾ ਨਿਵਤ੍ਤਿਨਿਵਤ੍ਤਿਹੇਤੂਸੂਤਿ ਆਹ – ‘‘ਇਤੋ ਬਹਿਦ੍ਧਾ ਨਤ੍ਥਿ ਸਚ੍ਚਵਵਤ੍ਥਾਨ’’ਨ੍ਤਿਆਦਿ. ਤਤ੍ਥ ਸਚ੍ਚਪ੍ਪਕਾਸਨਾਤਿ ਸਚ੍ਚਦੇਸਨਾ. ਸਮਥਵਿਪਸ੍ਸਨਾਕੋਸਲ੍ਲਨ੍ਤਿ ਸਮਥਵਿਪਸ੍ਸਨਾਸੁ ਭਾਵਨਾਕੋਸਲ੍ਲਂ, ਤਾਸੁ ਉਗ੍ਗਹਪਰਿਪੁਚ੍ਛਾਸਵਨਮਨਸਿਕਾਰਕੋਸਲ੍ਲਂ ਵਾ. ਵਿਪਸ੍ਸਨਾਧਿਟ੍ਠਾਨਞ੍ਚੇਤ੍ਥ ਸਮਥਂ ਅਧਿਪ੍ਪੇਤਂ. ਉਪਸਮਸੁਖਪ੍ਪਤ੍ਤੀਤਿ ਕਿਲੇਸਾਨਂ ਵੂਪਸਮਸੁਖਾਧਿਗਮੋ. ਵਿਪਰੀਤਚੇਤਾਤਿ ਮਿਚ੍ਛਾਭਿਨਿਵਿਟ੍ਠਚੇਤਾ. ਨਤ੍ਥਿ ਸੁਖੇਨ ਸੁਖਨ੍ਤਿ ਯਂ ਅਨਵਜ੍ਜਪਚ੍ਚਯਪਰਿਭੋਗਸੁਖੇਨ ਕਾਯਂ ਚਿਤ੍ਤਞ੍ਚ ਪਟਿਪ੍ਪਸ੍ਸਦ੍ਧਦਰਥਂ ਕਤ੍ਵਾ ਅਰਿਯੇਹਿ ਪਤ੍ਤਬ੍ਬਂ ਉਪਸਮਸੁਖਂ, ਤਂ ਪਟਿਕ੍ਖਿਪਤਿ. ਦੁਕ੍ਖੇਨਾਤਿ ਕਾਯਖੇਦਨਦੁਕ੍ਖੇਨ.
ਸੋ ਲੋਕਂ ਵਡ੍ਢਯਤੀਤਿ ਸੋ ਕਾਮੇ ਪਟਿਸੇਵੇਨ੍ਤੋ ਅਤ੍ਤਭਾਵਸਙ੍ਖਾਤਂ ਲੋਕਂ ਵਡ੍ਢੇਤਿ ਪੀਨੇਤਿ. ਪੁਤ੍ਤਨਤ੍ਤੁਪਰਮ੍ਪਰਾਯ ਵਾ ਸਂਸਾਰਸ੍ਸ ਅਨੁਪਚ੍ਛੇਦਨਤੋ ਸਤ੍ਤਲੋਕਂ ਵਡ੍ਢੇਤਿ. ਬਹੁਂ ਪੁਞ੍ਞਂ ਪਸਵਤੀਤਿ ਅਤ੍ਤਨੋ ਪਞ੍ਚਹਿ ਕਾਮਗੁਣੇਹਿ ਸਨ੍ਤਪ੍ਪਨੇਨ ਪੁਤ੍ਤਮੁਖਦਸ੍ਸਨੇਨ ਚ ਬਹੁਂ ਪੁਞ੍ਞਂ ਉਪ੍ਪਾਦੇਤਿ. ਅਭਿਨਿਵੇਸਸ੍ਸ ਨਾਤਿਦਲ਼੍ਹਤਾਯ ਏਵਂਸਞ੍ਞੀ. ਦਲ਼੍ਹਤਾਯ ਏਵਂਦਿਟ੍ਠੀ ਦੁਕ੍ਖੇਨ ਸੁਖਂ ਪਤ੍ਥਯਮਾਨਾ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ ਕਾਮੇਸੁ ਪੁਞ੍ਞਸਞ੍ਞੀ ਕਾਮਸੁਖਲ੍ਲਿਕਾਨੁਯੋਗਮਨੁਯੁਤ੍ਤਾ ਚ ਵਿਹਰਨ੍ਤੀਤਿ ਯੋਜੇਤਬ੍ਬਂ.
ਤਦਭਿਞ੍ਞਾ ਸਨ੍ਤਾਤਿ ਤਥਾਸਞ੍ਞਿਨੋ ਸਮਾਨਾ. ਰੋਗਮੇਵ ਵਡ੍ਢਯਨ੍ਤੀਤਿ ਅਤ੍ਤਭਾਵਰੋਗਮੇਵ ਕਿਲੇਸਰੋਗਮੇਵ ਵਾ ਅਪਰਾਪਰਂ ਵਡ੍ਢੇਨ੍ਤਿ. ਗਣ੍ਡਸਲ੍ਲੇਸੁਪਿ ਏਸੇਵ ਨਯੋ. ਰੋਗਾਭਿਤੁਨ੍ਨਾਤਿ ਯਥਾਵੁਤ੍ਤਰੋਗਬ੍ਯਾਧਿਤਾ. ਗਣ੍ਡਪਟਿਪੀਲ਼ਿਤਾਤਿ ਯਥਾਵੁਤ੍ਤਗਣ੍ਡਬਾਧਿਤਾ. ਸਲ੍ਲਾਨੁਵਿਦ੍ਧਾਤਿ ਯਥਾਵੁਤ੍ਤਸਲ੍ਲੇਨ ਅਨੁਪਵਿਟ੍ਠਾ. ਉਮ੍ਮੁਜ੍ਜਨਿਮੁਜ੍ਜਾਨੀਤਿ ਉਪਪਜ੍ਜਨਚਵਨਾਨਿ. ਉਗ੍ਘਾਤਨਿਗ੍ਘਾਤਨ੍ਤਿ ਉਚ੍ਚਾਵਚਭਾਵਂ. ਰੋਗਗਣ੍ਡਸਲ੍ਲਭੇਸਜ੍ਜਨ੍ਤਿ ਯਥਾਵੁਤ੍ਤਰੋਗਾਦਿਤਿਕਿਚ੍ਛਨਂ, ਸਮਥਵਿਪਸ੍ਸਨਂ ਸਨ੍ਧਾਯ ਵਦਤਿ. ਤੇਨੇਵਾਹ – ‘‘ਸਮਥਵਿਪਸ੍ਸਨਾ ਰੋਗਨਿਗ੍ਘਾਤਕਭੇਸਜ੍ਜ’’ਨ੍ਤਿ. ਤਤ੍ਥ ਰੋਗਨਿਗ੍ਘਾਤਕਨ੍ਤਿ ਰੋਗਵੂਪਸਮਨਂ. ‘‘ਸਂਕਿਲੇਸੋ ਦੁਕ੍ਖ’’ਨ੍ਤਿਆਦਿਨਾ ਸਚ੍ਚਾਨਿ ਤੇਸਂ ਪਰਿਞ੍ਞੇਯ੍ਯਾਦਿਭਾਵੇਨ ਕਥੇਤਿ.
ਤਤ੍ਥ ਸਂਕਿਲੇਸੋ ਦੁਕ੍ਖਨ੍ਤਿ ਅਤ੍ਤਕਿਲਮਥਾਨੁਯੋਗਕਾਮਸੁਖਲ੍ਲਿਕਾਨੁਯੋਗਸਂਕਿਲੇਸਵਨ੍ਤੋ, ਤੇਹਿ ਵਾ ਸਂਕਿਲਿਸ੍ਸਮਾਨੋ ਰੂਪਾਰੂਪਕਾਯੋ ਦੁਕ੍ਖਂ ਅਰਿਯਸਚ੍ਚਂ. ਤਦਭਿਸਙ੍ਗੋ ਤਣ੍ਹਾਤਿ ਤਤ੍ਥ ਅਭਿਸਙ੍ਗੋ ਆਸਙ੍ਗੋਤਿ ਲਦ੍ਧਨਾਮਾ ਤਣ੍ਹਾ.
੮੦. ਇਦਾਨਿ ਦਿਟ੍ਠਿਚਰਿਤਤਣ੍ਹਾਚਰਿਤਾਨਂ ਸਕ੍ਕਾਯਦਿਟ੍ਠਿਦਸ੍ਸਨੇ ਪਵਤ੍ਤਿਭੇਦਂ ਦਸ੍ਸੇਤੁਂ ‘‘ਦਿਟ੍ਠਿਚਰਿਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਦਿਟ੍ਠਿਚਰਿਤਾ ਰੂਪਂ ਅਤ੍ਤਤੋ ਉਪਗਚ੍ਛਨ੍ਤੀਤਿ ਦਿਟ੍ਠਿਚਰਿਤਾ ਦਿਟ੍ਠਾਭਿਨਿਵੇਸਸ੍ਸ ਬਲਵਭਾਵਤੋ ਰੂਪਂ ‘‘ਅਤ੍ਤਾ’’ਤਿ ਗਣ੍ਹਨ੍ਤਿ. ਤੇਸਞ੍ਹਿ ਅਤ੍ਤਾਭਿਨਿਵੇਸੋ ਬਲਵਾ, ਨ ਤਥਾ ਅਤ੍ਤਨਿਯਾਭਿਨਿਵੇਸੋ. ਏਸ ਨਯੋ ਵੇਦਨਨ੍ਤਿਆਦੀਸੁਪਿ. ਤਣ੍ਹਾਚਰਿਤਾ ਰੂਪਵਨ੍ਤਂ ਅਤ੍ਤਾਨਨ੍ਤਿ ਤਣ੍ਹਾਚਰਿਤਾ ਤਣ੍ਹਾਭਿਨਿਵੇਸਸ੍ਸ ਬਲਵਭਾਵਤੋ ਰੂਪਂ ਅਤ੍ਤਨੋ ਕਿਞ੍ਚਨਪਲਿਬੋਧਭਾਵੇ ਠਪੇਤ੍ਵਾ ਅਵਸੇਸਂ ਵੇਦਨਾਦਿਂ ‘‘ਅਤ੍ਤਾ’’ਤਿ ਗਣ੍ਹਨ੍ਤਿ. ਅਤ੍ਤਨਿ ਵਾ ਰੂਪਨ੍ਤਿ ਅਤ੍ਤਾਧਾਰਂ ਵਾ ਰੂਪਂ. ਰੂਪਸ੍ਮਿਂ ਵਾ ਅਤ੍ਤਾਨਨ੍ਤਿ ਰੂਪਾਧਾਰਂ ਵਾ ਅਤ੍ਤਾਨਂ. ਵੇਦਨਾਵਨ੍ਤਨ੍ਤਿਆਦੀਸੁਪਿ ਏਸੇਵ ਨਯੋ. ਏਤੇਸਞ੍ਹਿ ਅਤ੍ਤਨਿਯਾਭਿਨਿਵੇਸੋ ਬਲਵਾ, ਨ ਤਥਾ ਅਤ੍ਤਾਭਿਨਿਵੇਸੋ. ਤਸ੍ਮਾ ਯਥਾਲਦ੍ਧਂ ਅਤ੍ਤਨਿਯਨ੍ਤਿ ਕਪ੍ਪੇਤ੍ਵਾ ਤਦਞ੍ਞਂ ‘‘ਅਤ੍ਤਾ’’ਤਿ ਗਣ੍ਹਨ੍ਤਿ. ਅਯਂ ਵੁਚ੍ਚਤਿ ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠੀਤਿ ਅਯਂ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਏਕੇਕਸ੍ਮਿਂ ਚਤੁਨ੍ਨਂ ਚਤੁਨ੍ਨਂ ਗਾਹਾਨਂ ਵਸੇਨ ਵੀਸਤਿਵਤ੍ਥੁਕਾ ਸਤਿ ਵਿਜ੍ਜਮਾਨੇ ਖਨ੍ਧਪਞ੍ਚਕਸਙ੍ਖਾਤੇ ਕਾਯੇ, ਸਤੀ ਵਾ ਵਿਜ੍ਜਮਾਨਾ ਤਤ੍ਥ ਦਿਟ੍ਠੀਤਿ ਸਕ੍ਕਾਯਦਿਟ੍ਠਿ.
ਲੋਕੁਤ੍ਤਰਾ ਸਮ੍ਮਾਦਿਟ੍ਠੀਤਿ ਪਠਮਮਗ੍ਗਸਮ੍ਮਾਦਿਟ੍ਠਿ. ਅਨ੍ਵਾਯਿਕਾਤਿ ਸਮ੍ਮਾਦਿਟ੍ਠਿਯਾ ਅਨੁਗਾਮਿਨੋ. ਯਦਾ ਸਮ੍ਮਾਦਿਟ੍ਠਿ ਸਕ੍ਕਾਯਦਿਟ੍ਠਿਯਾ ਪਜਹਨਵਸੇਨ ਪਵਤ੍ਤਾ, ਤਦਾ ਤਸ੍ਸਾ ਅਨੁਗੁਣਭਾਵੇਨ ਪਵਤ੍ਤਮਾਨਕਾਤਿ ਅਤ੍ਥੋ. ਕੇ ਪਨ ਤੇਤਿ? ਆਹ ‘‘ਸਮ੍ਮਾਸਙ੍ਕਪ੍ਪੋ’’ਤਿਆਦਿ. ‘‘ਤੇ ਤਯੋ ਖਨ੍ਧਾ’’ਤਿਆਦਿਨਾ ਅਰਿਯਮਗ੍ਗਤੋ ਖਨ੍ਧਮੁਖੇਨ ਸਮਥਵਿਪਸ੍ਸਨਾ ਨਿਦ੍ਧਾਰੇਤਿ. ‘‘ਤਤ੍ਥ ਸਕ੍ਕਾਯੋ’’ਤਿਆਦਿ ਚਤੁਸਚ੍ਚਨਿਦ੍ਧਾਰਣਂ. ਤਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.
ਪੁਨ ‘‘ਤਤ੍ਥ ਯੇ ਰੂਪਂ ਅਤ੍ਤਤੋ ਉਪਗਚ੍ਛਨ੍ਤੀ’’ਤਿਆਦਿਨਾ ਸਕ੍ਕਾਯਦਸ੍ਸਨਮੁਖੇਨ ਉਚ੍ਛੇਦਾਦਿਅਨ੍ਤਦ੍ਵਯਂ, ਮਜ੍ਝਿਮਞ੍ਚ ਪਟਿਪਦਂ ਨਿਦ੍ਧਾਰੇਤਿ. ਤਤ੍ਥ ਇਮੇ ਵੁਚ੍ਚਨ੍ਤਿ ਉਚ੍ਛੇਦਵਾਦਿਨੋਤਿ ਇਮੇ ਰੂਪਾਦਿਕੇ ਪਞ੍ਚਕ੍ਖਨ੍ਧੇ ਅਤ੍ਤਤੋ ਉਪਗਚ੍ਛਨ੍ਤਾ ਰੂਪਾਦੀਨਂ ਅਨਿਚ੍ਚਭਾਵਤੋ ਉਚ੍ਛਿਜ੍ਜਤਿ ਅਤ੍ਤਾ ਵਿਨਸ੍ਸਤਿ ਨ ਹੋਤਿ ਪਰਂ ਮਰਣਾਤਿ ਏਵਂ ਅਭਿਨਿਵਿਸਨਤੋ ‘‘ਉਚ੍ਛੇਦਵਾਦਿਨੋ’’ਤਿ ਵੁਚ੍ਚਨ੍ਤਿ. ਇਮੇ ਵੁਚ੍ਚਨ੍ਤਿ ਸਸ੍ਸਤਵਾਦਿਨੋਤਿ ਇਮੇ ‘‘ਰੂਪਵਨ੍ਤਂ ਵਾ ਅਤ੍ਤਾਨ’’ਨ੍ਤਿਆਦਿਨਾ ਰੂਪਾਦਿਵਿਨਿਮੁਤ੍ਤੋ ਅਞ੍ਞੋ ਕੋਚਿ ਅਤ੍ਤਾਤਿ ਉਪਗਚ੍ਛਨ੍ਤਾ ‘‘ਸੋ ਨਿਚ੍ਚੋ ਧੁਵੋ ਸਸ੍ਸਤੋ’’ਤਿ ਅਭਿਨਿਵਿਸਨਤੋ ‘‘ਸਸ੍ਸਤਵਾਦਿਨੋ’’ਤਿ ਵੁਚ੍ਚਨ੍ਤਿ. ‘‘ਉਚ੍ਛੇਦਸਸ੍ਸਤਵਾਦਾ ਉਭੋ ਅਨ੍ਤਾ, ਅਯਂ ਸਂਸਾਰਪਵਤ੍ਤੀ’’ਤਿਆਦਿ ਸਚ੍ਚਨਿਦ੍ਧਾਰਣਂ, ਤਂ ਸੁਵਿਞ੍ਞੇਯ੍ਯਂ.
ਉਚ੍ਛੇਦਸਸ੍ਸਤਂ ਸਮਾਸਤੋ ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠੀਤਿ ਅਤ੍ਤਾ ਉਚ੍ਛਿਜ੍ਜਤਿ ਅਤ੍ਤਾ ਨਿਚ੍ਚੋਤਿ ਚ ਆਦਿਪ੍ਪਵਤ੍ਤਨਤੋ ਉਚ੍ਛੇਦਸਸ੍ਸਤਦਸ੍ਸਨਂ ਸਙ੍ਖੇਪਤੋ ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠਿ ਏਵ ਹੋਤਿ. ਸਬ੍ਬੋਪਿ ਹਿ ਅਤ੍ਤਵਾਦੋ ਸਕ੍ਕਾਯਦਿਟ੍ਠਿਅਨ੍ਤੋਗਧੋ ਏਵਾਤਿ. ਵਿਤ੍ਥਾਰਤੋ ਦ੍ਵਾਸਟ੍ਠਿ ਦਿਟ੍ਠਿਗਤਾਨੀਤਿ ਉਚ੍ਛੇਦਸਸ੍ਸਤਦਸ੍ਸਨਂ ਵਿਤ੍ਥਾਰੇਨ ਬ੍ਰਹ੍ਮਜਾਲੇ (ਦੀ. ਨਿ. ੧.੨੮ ਆਦਯੋ) ਆਗਤਾਨਿ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ. ਤੇਸਨ੍ਤਿ ਏਵਂ ਸਙ੍ਖੇਪਵਿਤ੍ਥਾਰਵਨ੍ਤਾਨਂ ਉਚ੍ਛੇਦਸਸ੍ਸਤਦਸ੍ਸਨਾਨਂ. ਪਟਿਪਕ੍ਖੋਤਿ ਪਹਾਯਕਪਟਿਪਕ੍ਖੋ. ਤੇਚਤ੍ਤਾਲੀਸਂ ਬੋਧਿਪਕ੍ਖਿਯਾ ਧਮ੍ਮਾਤਿ ਅਨਿਚ੍ਚਸਞ੍ਞਾ ਦੁਕ੍ਖਸਞ੍ਞਾ ਅਨਤ੍ਤਸਞ੍ਞਾ ਪਹਾਨਸਞ੍ਞਾ ਵਿਰਾਗਸਞ੍ਞਾ ਨਿਰੋਧਸਞ੍ਞਾ ਚਤ੍ਤਾਰੋ ਸਤਿਪਟ੍ਠਾਨਾ…ਪੇ… ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋਤਿ ਏਤੇ ਤੇਚਤ੍ਤਾਲੀਸਂ ਬੋਧਿਪਕ੍ਖਿਯਾ ਧਮ੍ਮਾ.
ਏਵਂ ਵਿਪਸ੍ਸਨਾਵਸੇਨ ਪਟਿਪਕ੍ਖਂ ਦਸ੍ਸੇਤ੍ਵਾ ਪੁਨ ਸਮਥਵਸੇਨ ਦਸ੍ਸੇਤੁਂ ‘‘ਅਟ੍ਠ ਵਿਮੋਕ੍ਖਾ ਦਸ ਚ ਕਸਿਣਾਯਤਨਾਨੀ’’ਤਿ ਵੁਤ੍ਤਂ. ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ ਮੋਹਜਾਲਨ੍ਤਿ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ ਮੋਹਜਾਲਹੇਤੁਕਤ੍ਤਾ ਮੋਹਜਾਲਞ੍ਚ. ਅਨਾਦਿਅਨਿਧਨਪ੍ਪਵਤ੍ਤਨ੍ਤਿ ਪੁਰਿਮਾਯ ਕੋਟਿਯਾ ਅਭਾਵਤੋ ਅਨਾਦਿ. ਅਸਤਿ ਪਟਿਪਕ੍ਖਾਧਿਗਮੇ ਸਨ੍ਤਾਨਵਸੇਨ ਅਨੁਪਚ੍ਛੇਦੇਨ ਪਵਤ੍ਤਨਤੋ ਅਨਿਧਨਪ੍ਪਵਤ੍ਤਂ. ਯਸ੍ਮਾ ਪਨ ਮੋਹਜਾਲਹੇਤੁਕਾਨਿ ਦਿਟ੍ਠਿਗਤਾਨਿ ਮੋਹਜਾਲੇ ਪਦਾਲਿਤੇ ਪਦਾਲਿਤਾਨਿ ਹੋਨ੍ਤਿ, ਤਸ੍ਮਾ ਵੁਤ੍ਤਂ – ‘‘ਤੇਚਤ੍ਤਾਲੀਸਂ ਬੋਧਿਪਕ੍ਖਿਯਾ ਧਮ੍ਮਾ ਞਾਣਵਜਿਰਂ ਮੋਹਜਾਲਪ੍ਪਦਾਲਨ’’ਨ੍ਤਿ.
ਤਤ੍ਥ ਞਾਣਵਜਿਰਨ੍ਤਿ ਵਜਿਰੂਪਮਞਾਣਂ. ਅਟ੍ਠ ਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਤੇਜੇਤ੍ਵਾ ਤਿਕ੍ਖਸਭਾਵਂ ਆਪਾਦਿਤਂ ਵਿਪਸ੍ਸਨਾਞਾਣਂ ਮਗ੍ਗਞਾਣਞ੍ਚ ਞਾਣਵਜਿਰਂ. ਇਦਮੇਵ ਹਿ ਞਾਣਂ ਭਗਵਤੋ ਪਵਤ੍ਤਂ ‘‘ਮਹਾਵਜਿਰਞਾਣ’’ਨ੍ਤਿ ਵੁਚ੍ਚਤਿ. ਤਂ ਪਨ ਸਸਮ੍ਭਾਰਂ ਕਤ੍ਵਾ ਦਸ੍ਸੇਨ੍ਤੋ ‘‘ਤੇਚਤ੍ਤਾਲੀਸਂ ਬੋਧਿਪਕ੍ਖਿਯਾ ਧਮ੍ਮਾ’’ਤਿ ਆਹ. ਮੋਹਜਾਲਪ੍ਪਦਾਲਨਨ੍ਤਿ ਪੁਬ੍ਬਭਾਗੇ ਵਿਕ੍ਖਮ੍ਭਨਵਸੇਨ ਮਗ੍ਗਕ੍ਖਣੇ ਸਮੁਚ੍ਛੇਦਵਸੇਨ ਅਵਿਜ੍ਜਾਭਵਤਣ੍ਹਾਨਂ ਪਦਾਲਨਂ. ਅਤੀਤਾਦਿਭੇਦਭਿਨ੍ਨੇਸੁ ਰੂਪਾਦੀਸੁ ਸਕਅਤ੍ਤਭਾਵਾਦੀਸੁ ਚ ਸਂਸਿਬ੍ਬਨਵਸੇਨ ਪਵਤ੍ਤਨਤੋ ਜਾਲਂ ਭਵਤਣ੍ਹਾ. ਤਸ੍ਸਾ ਹਿ ਤਣ੍ਹਾ ਜਾਲਿਨੀ ਸਿਬ੍ਬਿਨੀ ਜਾਲਨ੍ਤਿ ਚ ਅਧਿਵਚਨਨ੍ਤਿ. ਏਵਂ ਅਤ੍ਤਕਿਲਮਥਾਨੁਯੋਗਕਾਮਸੁਖਲ੍ਲਿਕਾਨੁਯੋਗਦਿਟ੍ਠਿਤਣ੍ਹਾਭਿਨਿਵੇਸਸਸ੍ਸਤੁਚ੍ਛੇਦਾਨਂ ਨਿਦ੍ਧਾਰਣਵਸੇਨ ਮੋਹਜਾਲਪਰਿਯਾਯਵਿਸੇਸਤੋ ਅਵਿਜ੍ਜਾਤਣ੍ਹਾ ਵਿਭਜਿਤ੍ਵਾ ਯਥਾਨੁਸਨ੍ਧਿਨਾ ਸਂਕਿਲੇਸਪਕ੍ਖਂ ਨਿਗਮੇਨ੍ਤੋ ‘‘ਤੇਨ ਵੁਚ੍ਚਤਿ ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯ ਚ ਭਵਤਣ੍ਹਾਯ ਚਾ’’ਤਿ ਆਹ.
੮੧. ‘‘ਤਤ੍ਥ ਦਿਟ੍ਠਿਚਰਿਤੋ’’ਤਿਆਦਿਨਾ ਵੋਦਾਨਪਕ੍ਖਂ ਦਸ੍ਸੇਤਿ. ਤਤ੍ਥ ਸਲ੍ਲੇਖਾਨੁਸਨ੍ਤਤਵੁਤ੍ਤੀਤਿ ਅਨੁਪਦ੍ਦੁਤਸਲ੍ਲੇਖਵੁਤ੍ਤਿ. ਕਸ੍ਮਾ? ਯਸ੍ਮਾ ਸਲ੍ਲੇਖੇ ਤਿਬ੍ਬਗਾਰਵੋ. ਦਿਟ੍ਠਿਚਰਿਤੋ ਹਿ ਤਪੋਜਿਗੁਚ੍ਛਾਦਿਨਾ ਅਨੁਪਾਯੇਨਪਿ ਯੇਭੁਯ੍ਯੇਨ ਕਿਲੇਸਾਨਂ ਸਲ੍ਲੇਖਨਾਧਿਪ੍ਪਾਯੇਨ ਚਰਤਿ, ਤਸ੍ਮਾ ਸੋ ਸਾਸਨੇ ਪਬ੍ਬਜਿਤੋ ਧੁਤਧਮ੍ਮਵਸੇਨ ਸਲ੍ਲੇਖਪਟਿਪਦਂ ਪੂਰੇਤਿ. ਸਿਕ੍ਖਾਨੁਸਨ੍ਤਤਵੁਤ੍ਤੀਤਿ ਅਚ੍ਛਿਦ੍ਦਚਤੁਪਾਰਿਸੁਦ੍ਧਿਸੀਲਵੁਤ੍ਤਿ. ਦਿਟ੍ਠਿਯਾ ਸਵਿਸਯੇ ਪਞ੍ਞਾਸਦਿਸੀ ਪਵਤ੍ਤੀਤਿ ਸੋ ਵਿਸੁਜ੍ਝਮਾਨੋ ਪਞ੍ਞਾਧਿਕੋ ਹੋਤੀਤਿ ਆਹ – ‘‘ਦਿਟ੍ਠਿਚਰਿਤੋ ਸਮ੍ਮਤ੍ਤਨਿਯਾਮਂ ਓਕ੍ਕਮਨ੍ਤੋ ਧਮ੍ਮਾਨੁਸਾਰੀ ਭਵਤੀ’’ਤਿ. ਤਣ੍ਹਾਵਸੇਨ ਮਿਚ੍ਛਾਵਿਮੋਕ੍ਖੋ ਹੋਤੀਤਿ ਤਣ੍ਹਾਚਰਿਤੋ ਵਿਸੁਜ੍ਝਮਾਨੋ ਸਦ੍ਧਾਧਿਕੋਵ ਹੋਤਿ, ਤਸ੍ਮਾ ਵੁਤ੍ਤਂ – ‘‘ਤਣ੍ਹਾਚਰਿਤੋ ਸਮ੍ਮਤ੍ਤਨਿਯਾਮਂ ਓਕ੍ਕਮਨ੍ਤੋ ਸਦ੍ਧਾਨੁਸਾਰੀ ਭਵਤੀ’’ਤਿ. ਦਿਟ੍ਠਿਚਰਿਤੋ ਸੁਖਾਯ ਪਟਿਪਦਾਯਾਤਿਆਦਿ ਪਟਿਪਦਾਨਿਦ੍ਦੇਸੋ ਹੇਟ੍ਠਾ ਦੇਸਨਾਹਾਰਵਿਭਙ੍ਗੇ (ਨੇਤ੍ਤਿ. ੫ ਆਦਯੋ) ਆਗਤੋ ਏਵ, ਅਤ੍ਥੋਪਿ ਤਤ੍ਥ ਸਬ੍ਬਪ੍ਪਕਾਰਤੋ ਵੁਤ੍ਤੋ ਏਵ.
ਅਪੁਬ੍ਬਪਦੇਸੁ ਪਨ ਵਿਵੇਚਿਯਮਾਨੋਤਿ ਵਿਮੋਚਿਯਮਾਨੋ. ਪਟਿਨਿਸ੍ਸਰਤੀਤਿ ਨਿਯ੍ਯਾਤਿ ਵਿਮੁਚ੍ਚਤੀਤਿ ਅਤ੍ਥੋ. ਦਨ੍ਧਞ੍ਚ ਧਮ੍ਮਂ ਆਜਾਨਾਤੀਤਿ ਤਣ੍ਹਾਚਰਿਤਸ੍ਸ ਮਨ੍ਦਪਞ੍ਞਸ੍ਸ ਵਸੇਨ ਵੁਤ੍ਤਂ. ਤਿਕ੍ਖਪਞ੍ਞੋ ਪਨ ਖਿਪ੍ਪਂ ਧਮ੍ਮਂ ਆਜਾਨਾਤੀਤਿ. ‘‘ਸਤ੍ਤਾਪਿ ਦੁਵਿਧਾ’’ਤਿਆਦਿਨਾ ਇਨ੍ਦ੍ਰਿਯਵਿਭਾਗੇਨ ਪੁਨ ਪਟਿਪਦਾਵਿਭਾਗਂ ਦਸ੍ਸੇਤਿ, ਤਂ ਸੁਵਿਞ੍ਞੇਯ੍ਯਂ.
‘‘ਯੇ ਹਿ ਕੇਚੀ’’ਤਿਆਦਿਨਾ ਤਾਸਂ ਪਟਿਪਦਾਨਂ ਨਿਯ੍ਯਾਨੇ ਤੀਸੁਪਿ ਕਾਲੇਸੁ ਏਕਨ੍ਤਿਕਭਾਵਂ ਦਸ੍ਸੇਤਿ. ਤਤ੍ਥ ਇਮਾਹਿ ਏਵ ਚਤੂਹਿ ਪਟਿਪਦਾਹੀਤਿ ਇਮਾਹਿ ਏਵ ਚਤੂਹਿ ਪਟਿਪਦਾਹਿ, ਤਬ੍ਬਿਨਿਮੁਤ੍ਤਾਯ ਅਞ੍ਞਾਯ ਪਟਿਪਦਾਯ ਅਭਾਵਤੋ. ਚਤੁਕ੍ਕਮਗ੍ਗਨ੍ਤਿ ਪਟਿਪਦਾਚਤੁਕ੍ਕਂ, ਪਟਿਪਦਾ ਹਿ ਮਗ੍ਗੋਤਿ. ਅਥ ਵਾ ਚਤੁਕ੍ਕਮਗ੍ਗਨ੍ਤਿ ਨਨ੍ਦਿਯਾਵਟ੍ਟਸ੍ਸ ਚਤੁਦ੍ਦਿਸਾਸਙ੍ਖਾਤਂ ਮਗ੍ਗਂ. ਤਾ ਪਨ ਚਤਸ੍ਸੋ ਦਿਸਾ ਦਿਸਾਲੋਚਨਨਯੇ ਆਗਮਿਸ੍ਸਨ੍ਤਿ. ਕਿਮਤ੍ਥਂ ਪਨ ਚਤੁਕ੍ਕਮਗ੍ਗਂ ਪਞ੍ਞਪੇਨ੍ਤੀਤਿ ਆਹ ‘‘ਅਬੁਧਜਨਸੇਵਿਤਾਯਾ’’ਤਿਆਦਿ. ਤਤ੍ਥ ਅਬੁਧਜਨਸੇਵਿਤਾਯਾਤਿ ਅਪਣ੍ਡਿਤਜਨਸੇਵਿਤਾਯ. ਬਾਲਕਨ੍ਤਾਯਾਤਿ ਬਾਲਜਨਕਾਮਿਤਾਯ. ਰਤ੍ਤਵਾਸਿਨਿਯਾਤਿ ਰਤ੍ਤੇਸੁ ਰਾਗਾਭਿਭੂਤੇਸੁ ਵਸਤੀਤਿ ਰਤ੍ਤਵਾਸਿਨੀ, ਤਸ੍ਸਾ. ਨਨ੍ਦਿਯਾਤਿ ਤਤ੍ਰ ਤਤ੍ਰਾਭਿਨਨ੍ਦਨਟ੍ਠੇਨ ਨਨ੍ਦੀਸਙ੍ਖਾਤਾਯ. ਅਵਟ੍ਟਨਤ੍ਥਨ੍ਤਿ ਸਮੁਚ੍ਛਿਨ੍ਦਨਤ੍ਥਂ. ਅਯਂ ਵੁਚ੍ਚਤਿ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਭੂਮੀਤਿ ਅਯਂ ਤਣ੍ਹਾਵਿਜ੍ਜਾਨਂ ਵਸੇਨ ਸਂਕਿਲੇਸਪਕ੍ਖੇ ਦ੍ਵੇ ਦਿਸਾ ਸਮਥਵਿਪਸ੍ਸਨਾਨਂ ਵਸੇਨ ਵੋਦਾਨਪਕ੍ਖੇਪਿ ਦ੍ਵੇ ਦਿਸਾ ਚਤੁਸਚ੍ਚਯੋਜਨਾ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਸਮੁਟ੍ਠਾਨਤਾਯ ਭੂਮੀਤਿ.
੮੨. ਏਵਂ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਭੂਮਿਂ ਨਿਦ੍ਦਿਸਿਤ੍ਵਾ ਇਦਾਨਿ ਤਸ੍ਸ ਦਿਸਾਭੂਤਧਮ੍ਮੇ ਨਿਦ੍ਦਿਸਨ੍ਤੇਨ ਯਸ੍ਮਾ ਚਸ੍ਸ ਦਿਸਾਭੂਤਧਮ੍ਮੇਸੁ ਵੁਤ੍ਤੇਸੁ ਦਿਸਾਲੋਚਨਨਯੋ ਵੁਤ੍ਤੋਯੇਵ ਹੋਤਿ, ਤਸ੍ਮਾ ‘‘ਵੇਯ੍ਯਾਕਰਣੇਸੁ ਹਿ ਯੇ ਕੁਸਲਾਕੁਸਲਾ’’ਤਿ ਦਿਸਾਲੋਚਨਲਕ੍ਖਣਂ ਏਕਦੇਸੇਨ ਪਚ੍ਚਾਮਸਿਤ੍ਵਾ ‘‘ਤੇ ਦੁਵਿਧਾ ਉਪਪਰਿਕ੍ਖਿਤਬ੍ਬਾ’’ਤਿਆਦਿ ਆਰਦ੍ਧਂ. ਤਤ੍ਥ ਤੇਤਿ ਦਿਸਾਭੂਤਧਮ੍ਮਾ. ਦੁਵਿਧਾਤਿ ‘‘ਇਮੇ ਸਂਕਿਲੇਸਧਮ੍ਮਾ, ਇਮੇ ਵੋਦਾਨਧਮ੍ਮਾ’’ਤਿ ਏਵਂ ਦੁਵਿਧੇਨ. ਉਪਪਰਿਕ੍ਖਿਤਬ੍ਬਾਤਿ ਉਪਪਤ੍ਤਿਤੋ ਪਰਿਤੋ ਇਕ੍ਖਿਤਬ੍ਬਾ, ਧਮ੍ਮਯੁਤ੍ਤਿਤੋ ਤਂਤਂਦਿਸਾਭਾਵੇਨ ਪੇਕ੍ਖਿਤਬ੍ਬਾ ਆਲੋਚਿਤਬ੍ਬਾਤਿ ਅਤ੍ਥੋ.
ਯਂ ਪਕਾਰਂ ਸਨ੍ਧਾਯ ‘‘ਦੁਵਿਧਾ ਉਪਪਰਿਕ੍ਖਿਤਬ੍ਬਾ’’ਤਿ ਵੁਤ੍ਤਂ, ਤਂ ਦਸ੍ਸੇਤਿ ‘‘ਲੋਕਵਟ੍ਟਾਨੁਸਾਰੀ ਚ ਲੋਕਵਿਵਟ੍ਟਾਨੁਸਾਰੀ ਚਾ’’ਤਿ. ਤਸ੍ਸਤ੍ਥੋ – ਲੋਕੋ ਏਵ ਵਟ੍ਟਂ ਲੋਕਵਟ੍ਟਂ. ਲੋਕਵਟ੍ਟਭਾਵੇਨ ਅਨੁਸਰਤਿ ਪਵਤ੍ਤਤੀਤਿ ਲੋਕਵਟ੍ਟਾਨੁਸਾਰੀ, ਸਂਕਿਲੇਸਧਮ੍ਮੋਤਿ ਅਤ੍ਥੋ. ਲੋਕਸ੍ਸ, ਲੋਕਤੋ ਵਾ ਵਿਵਟ੍ਟਂ ਲੋਕਵਿਵਟ੍ਟਂ, ਨਿਬ੍ਬਾਨਂ. ਤਂ ਅਨੁਸਰਤਿ ਅਨੁਲੋਮਨਵਸੇਨ ਗਚ੍ਛਤੀਤਿ ਲੋਕਵਿਵਟ੍ਟਾਨੁਸਾਰੀ, ਵੋਦਾਨਧਮ੍ਮੋਤਿ ਅਤ੍ਥੋ. ਤੇਨੇਵਾਹ – ‘‘ਵਟ੍ਟਂ ਨਾਮ ਸਂਸਾਰੋ, ਵਿਵਟ੍ਟਂ ਨਿਬ੍ਬਾਨ’’ਨ੍ਤਿ.
ਤਂ ਕਥਂ ਦਟ੍ਠਬ੍ਬਨ੍ਤਿ ਤਂ ਕਥਂ ਕੇਨ ਪਕਾਰੇਨ ਦਟ੍ਠਬ੍ਬਨ੍ਤਿ ਚੇ? ਉਪਚਯੇਨ. ਯਥਾ ਕਤਂ ਕਮ੍ਮਂ ਫਲਦਾਨਸਮਤ੍ਥਂ ਹੋਤਿ, ਤਥਾ ਕਤਂ ਉਪਚਿਤਨ੍ਤਿ ਵੁਚ੍ਚਤਿ. ਏਵਂ ਉਪਚਿਤਭਾਵੇ ਕਮ੍ਮਂ ਨਾਮ ਹੋਤਿ, ਵਿਪਾਕਵਟ੍ਟਸ੍ਸ ਕਾਰਣਂ ਹੋਤੀਤਿ ਅਤ੍ਥੋ. ਸਬ੍ਬੇਪਿ ਕਿਲੇਸਾ ਚਤੂਹਿ ਵਿਪਲ੍ਲਾਸੇਹਿ ਨਿਦ੍ਦਿਸਿਤਬ੍ਬਾ, ਦਸਨ੍ਨਮ੍ਪਿ ਕਿਲੇਸਾਨਂ ਵਿਪਲ੍ਲਾਸਹੇਤੁਭਾਵਤੋ. ਤੇ ਕਤ੍ਥ ਦਟ੍ਠਬ੍ਬਾਤਿ ਤੇ ਪਨ ਵਿਪਲ੍ਲਾਸਾ ਕਤ੍ਥ ਪਸ੍ਸਿਤਬ੍ਬਾਤਿ ਆਹ – ‘‘ਦਸ ਵਤ੍ਥੁਕੇ ਕਿਲੇਸਪੁਞ੍ਜੇ’’ਤਿ. ਦਸਵਿਧਕਾਰਣੇ ਕਿਲੇਸਸਮੂਹੇਤਿ ਅਤ੍ਥੋ. ਤਤ੍ਥ ਕਿਲੇਸਾਪਿ ਕਿਲੇਸਵਤ੍ਥੁ, ਕਿਲੇਸਾਨਂ ਪਚ੍ਚਯਧਮ੍ਮਾਪਿ ਕਿਲੇਸਵਤ੍ਥੁ. ਤੇਸੁ ਕਾਰਣਭਾਵੇਨ ਪੁਰਿਮਸਿਦ੍ਧਾ ਕਿਲੇਸਾ ਪਰਤੋ ਪਰੇਸਂ ਕਿਲੇਸਾਨਂ ਪਚ੍ਚਯਭਾਵਤੋ ਕਿਲੇਸਾਪਿ ਕਿਲੇਸਵਤ੍ਥੁ. ਅਯੋਨਿਸੋਮਨਸਿਕਾਰੋ, ਅਯੋਨਿਸੋਮਨਸਿਕਾਰਪਰਿਕ੍ਖਤਾ ਚ ਧਮ੍ਮਾ ਕਿਲੇਸੁਪ੍ਪਤ੍ਤਿਹੇਤੁਭਾਵਤੋ ਕਿਲੇਸਪ੍ਪਚ੍ਚਯਾਪਿ ਕਿਲੇਸਵਤ੍ਥੂਤਿ ਦਟ੍ਠਬ੍ਬਂ.
ਚਤ੍ਤਾਰੋ ਆਹਾਰਾਤਿ ਏਤ੍ਥ ਆਹਾਰਸੀਸੇਨ ਤਬ੍ਬਿਸਯਾ ਕਿਲੇਸਾਪਿ ਅਧਿਪ੍ਪੇਤਾ. ਚਤਸ੍ਸੋ ਵਿਞ੍ਞਾਣਟ੍ਠਿਤਿਯੋਤਿ ਏਤ੍ਥਾਪਿ ਏਸੇਵ ਨਯੋ. ‘‘ਪਠਮੇ ਆਹਾਰੇ’’ਤਿਆਦਿਨਾ ਦਸਵਤ੍ਥੁਕੇ ਕਿਲੇਸਪੁਞ੍ਜੇ ਪੁਰਿਮਂ ਪੁਰਿਮਂ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਕਾਰਣਨ੍ਤਿ ਦਸ੍ਸੇਤਿ. ਤਤ੍ਥ ਪਠਮੇ ਆਹਾਰੇਤਿ ਵਿਸਯਭੂਤੇ ਪਠਮੇ ਆਹਾਰੇ ਪਠਮੋ ਵਿਪਲ੍ਲਾਸੋ ਪਵਤ੍ਤਤੀਤਿ ਅਤ੍ਥੋ. ਸੇਸਾਹਾਰੇਸੁਪਿ ਏਸੇਵ ਨਯੋ. ਪਠਮੇ ਵਿਪਲ੍ਲਾਸੇਤਿ ਪਠਮੇ ਵਿਪਲ੍ਲਾਸੇ ਅਪ੍ਪਹੀਨੇ ਸਤਿ ਪਠਮਂ ਉਪਾਦਾਨਂ ਪਵਤ੍ਤਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਨਿਦ੍ਦੇਸੇਯੇਵ ਕਥਯਿਸ੍ਸਾਮ.
੮੩. ਇਦਾਨਿ ਦਸਵਤ੍ਥੁਕਂ ਕਿਲੇਸਪੁਞ੍ਜਂ ਤਣ੍ਹਾਵਿਜ੍ਜਾਵਸੇਨ ਦ੍ਵੇ ਕੋਟ੍ਠਾਸੇ ਕਰੋਨ੍ਤੋ ‘‘ਯੋ ਚ ਕਬਲ਼ੀਕਾਰੋ ਆਹਾਰੋ’’ਤਿਆਦਿਮਾਹ. ਤਤ੍ਥ ਕਬਲ਼ੀਕਾਰਾਹਾਰਂ ਫਸ੍ਸਾਹਾਰਞ੍ਚ ਅਪਰਿਜਾਨਨ੍ਤਸ੍ਸ ਤਣ੍ਹਾਚਰਿਤਸ੍ਸ ਯਥਾਕ੍ਕਮਂ ਕਾਯਵੇਦਨਾਸੁ ਤਿਬ੍ਬੋ ਛਨ੍ਦਰਾਗੋ ਹੋਤਿ, ਇਤਿ ਉਪਕ੍ਕਿਲੇਸਸ੍ਸ ਛਨ੍ਦਰਾਗਸ੍ਸ ਹੇਤੁਭਾਵਤੋ ਯੋ ਚ ਕਬਲ਼ੀਕਾਰੋ ਆਹਾਰੋ, ਯੋ ਚ ਫਸ੍ਸੋ ਆਹਾਰੋ, ਇਮੇ ਤਣ੍ਹਾਚਰਿਤਸ੍ਸ ਪੁਗ੍ਗਲਸ੍ਸ ਉਪਕ੍ਕਿਲੇਸਾਤਿ ਵੁਤ੍ਤਾ. ਤਥਾ ਮਨੋਸਞ੍ਚੇਤਨਾਹਾਰਂ ਵਿਞ੍ਞਾਣਾਹਾਰਞ੍ਚ ਅਪਰਿਜਾਨਨ੍ਤੋ ਦਿਟ੍ਠਿਚਰਿਤੋ ਤੇਸੁ ਅਤ੍ਤਸਞ੍ਞੀ ਨਿਚ੍ਚਸਞ੍ਞੀ ਚ ਹੋਤੀਤਿ ਵੁਤ੍ਤਨਯੇਨੇਵ ਤੇ ਦਿਟ੍ਠਿਚਰਿਤਸ੍ਸ ਪੁਗ੍ਗਲਸ੍ਸ ਉਪਕ੍ਕਿਲੇਸਾਤਿ ਵੁਤ੍ਤਾ. ਤਥਾ ਪੁਰਿਮਕਾ ਦ੍ਵੇ ਵਿਪਲ੍ਲਾਸਾ ਪੁਰਿਮਕਾਨਿ ਏਵ ਚ ਦ੍ਵੇ ਦ੍ਵੇਉਪਾਦਾਨਯੋਗਗਨ੍ਥਾਸਵਓਘਸਲ੍ਲਵਿਞ੍ਞਾਣਟ੍ਠਿਤਿਅਗਤਿਗਮਨਾਨਿ ਤਣ੍ਹਾਪਧਾਨਤ੍ਤਾ ਤਣ੍ਹਾਸਭਾਵਤ੍ਤਾ ਤਣ੍ਹਾਵਿਸਯਤ੍ਤਾ ਚ ਤਣ੍ਹਾਚਰਿਤਸ੍ਸ ਉਪਕ੍ਕਿਲੇਸਾਤਿ ਵੁਤ੍ਤਾ. ਪਚ੍ਛਿਮਕਾਨਿ ਪਨ ਤਾਨਿ ਦਿਟ੍ਠਿਪਧਾਨਤ੍ਤਾ ਦਿਟ੍ਠਿਸਭਾਵਤ੍ਤਾ ਦਿਟ੍ਠਿਵਿਸਯਤ੍ਤਾ ਚ ਦਿਟ੍ਠਿਚਰਿਤਸ੍ਸ ਉਪਕ੍ਕਿਲੇਸਾਤਿ ਵੁਤ੍ਤਾਤਿ ਦਟ੍ਠਬ੍ਬਾ.
੮੪. ਕਬਲ਼ੀਕਾਰੇ ਆਹਾਰੇ ‘‘ਅਸੁਭੇ ਸੁਭ’’ਨ੍ਤਿ ਵਿਪਲ੍ਲਾਸੋਤਿ ਚਤੂਸੁ ਆਹਾਰੇਸੁ ਕਬਲ਼ੀਕਾਰੇ ਆਹਾਰੇ ਚਤੂਸੁ ਚ ਵਿਪਲ੍ਲਾਸੇਸੁ ‘‘ਅਸੁਭੇ ਸੁਭ’’ਨ੍ਤਿ ਵਿਪਲ੍ਲਾਸੋ ਦਟ੍ਠਬ੍ਬੋ ਕਬਲ਼ੀਕਾਰਾਹਾਰਸ੍ਸ ਅਸੁਭਸਭਾਵਤ੍ਤਾ ਅਸੁਭਸਮੁਟ੍ਠਾਨਤ੍ਤਾ ਚ. ਤਥਾ ਫਸ੍ਸਾਹਾਰਸ੍ਸ ਦੁਕ੍ਖਸਭਾਵਤ੍ਤਾ ਦੁਕ੍ਖਪਚ੍ਚਯਤ੍ਤਾ ਚ ਵਿਸੇਸਤੋ ਤਤ੍ਥ ‘‘ਦੁਕ੍ਖੇ ਸੁਖ’’ਨ੍ਤਿ ਵਿਪਲ੍ਲਾਸੋ. ਤਥਾ ਯੇਭੁਯ੍ਯੇਨ ਸਤ੍ਤਾ ਵਿਞ੍ਞਾਣੇ ਨਿਚ੍ਚਸਞ੍ਞਿਨੋ, ਸਙ੍ਖਾਰੇਸੁ ਚ ਅਤ੍ਤਸਞ੍ਞਿਨੋ, ਚੇਤਨਾਪਧਾਨਾ ਚ ਸਙ੍ਖਾਰਾਤਿ ਵੁਤ੍ਤਂ – ‘‘ਵਿਞ੍ਞਾਣੇ ਆਹਾਰੇ…ਪੇ… ਅਤ੍ਤਾਤਿ ਵਿਪਲ੍ਲਾਸੋ’’ਤਿ. ਪਠਮੇ ਵਿਪਲ੍ਲਾਸੇ ਠਿਤੋ ਕਾਮੇ ਉਪਾਦਿਯਤੀਤਿ ‘‘ਅਸੁਭੇ ਸੁਭ’’ਨ੍ਤਿ ਵਿਪਰਿਯੇਸਗ੍ਗਾਹੀ ਕਿਲੇਸਕਾਮੇਨ ਵਤ੍ਥੁਕਾਮੇ ਦਲ਼੍ਹਂ ਗਣ੍ਹਾਤਿ. ਇਦਂ ਵੁਚ੍ਚਤਿ ਕਾਮੁਪਾਦਾਨਨ੍ਤਿ ਯਂ ਤਥਾ ਕਾਮਾਨਂ ਗਹਣਂ, ਇਦਂ ਵੁਚ੍ਚਤਿ ਕਾਮੁਪਾਦਾਨਂ. ‘‘ਦੁਕ੍ਖੇ ਸੁਖ’’ਨ੍ਤਿ ਵਿਪਰਿਯੇਸਗ੍ਗਾਹੀ ‘‘ਸੀਲਬ੍ਬਤੇਹਿ ਅਨਾਗਤੇ ਭਵਵਿਸੁਦ੍ਧੀਤਿ ਤਂ ਨਿਬ੍ਬੁਤਿਸੁਖ’’ਨ੍ਤਿ ਦਲ਼੍ਹਂ ਗਣ੍ਹਾਤਿ. ‘‘ਅਨਿਚ੍ਚੇ ਨਿਚ੍ਚ’’ਨ੍ਤਿ ਵਿਪਰਿਯੇਸਗ੍ਗਾਹੀ ‘‘ਸਬ੍ਬੇ ਭਵਾ ਨਿਚ੍ਚਾ ਧੁਵਾ ਸਸ੍ਸਤਾ ਅਵਿਪਰਿਣਾਮਧਮ੍ਮਾ’’ਤਿ ਸਂਸਾਰਾਭਿਨਨ੍ਦਿਨਿਂ ਭਵਦਿਟ੍ਠਿਂ ਦਲ਼੍ਹਂ ਗਣ੍ਹਾਤਿ. ‘‘ਅਨਤ੍ਤਨਿ ਅਤ੍ਤਾ’’ਤਿ ਵਿਪਰਿਯੇਸਗ੍ਗਾਹੀ ‘‘ਅਸਤਿ ਅਤ੍ਤਨਿ ਕਸ੍ਸਿਦਂ ਕਮ੍ਮਫਲਂ, ਤਸ੍ਮਾ ਸੋ ਕਰੋਤਿ, ਸੋ ਪਟਿਸਂਵੇਦੇਤੀ’’ਤਿ ਅਤ੍ਤਦਿਟ੍ਠਿਂ ਦਲ਼੍ਹਂ ਗਣ੍ਹਾਤੀਤਿ ਇਮਮਤ੍ਥਂ ਦਸ੍ਸੇਤਿ ‘‘ਦੁਤਿਯੇ ਵਿਪਲ੍ਲਾਸੇ ਠਿਤੋ’’ਤਿਆਦਿਨਾ.
ਅਯਂ ਵੁਚ੍ਚਤਿ ਕਾਮਯੋਗੋਤਿ ਯੇਨ ਕਾਮਰਾਗਸਙ੍ਖਾਤੇਨ ਕਾਮੁਪਾਦਾਨੇਨ ਵਤ੍ਥੁਕਾਮੇਹਿ ਸਹ ਸਤ੍ਤੋ ਸਂਯੋਜੀਯਤਿ, ਅਯਂ ਕਾਮਰਾਗੋ ‘‘ਕਾਮਯੋਗੋ’’ਤਿ ਵੁਚ੍ਚਤਿ. ਅਯਂ ਵੁਚ੍ਚਤਿ ਭਵਯੋਗੋਤਿ ਯਤੋ ਸੀਲਬ੍ਬਤੁਪਾਦਾਨਸਙ੍ਖਾਤੇਨ ਭਵੁਪਾਦਾਨੇਨ ਭਵੇਨ ਸਹ ਸਤ੍ਤੋ ਸਂਯੋਜੀਯਤਿ, ਅਯਂ ਭਵਰਾਗੋ ‘‘ਭਵਯੋਗੋ’’ਤਿ ਵੁਚ੍ਚਤਿ. ਅਯਂ ਵੁਚ੍ਚਤਿ ਦਿਟ੍ਠਿਯੋਗੋਤਿ ਯਾਯ ਅਹੇਤੁਕਦਿਟ੍ਠਿਆਦਿਸਙ੍ਖਾਤਾਯ ਪਾਪਿਕਾਯ ਦਿਟ੍ਠਿਯਾ, ਸਕ੍ਕਾਯਦਿਟ੍ਠਿਆਦਿਅਵਸਿਟ੍ਠਦਿਟ੍ਠਿਯਾ ਚ ਸਤ੍ਤੋ ਦੁਕ੍ਖੇਨ ਸਹ ਸਂਯੋਜੀਯਤਿ, ਅਯਂ ਪਾਪਿਕਾ ਦਿਟ੍ਠਿ ‘‘ਦਿਟ੍ਠਿਯੋਗੋ’’ਤਿ ਵੁਚ੍ਚਤਿ. ਅਯਂ ਵੁਚ੍ਚਤਿ ਅਵਿਜ੍ਜਾਯੋਗੋਤਿ ਯਾਯ ਅਤ੍ਤਵਾਦੁਪਾਦਾਨੇਨ ਸਕਲਵਟ੍ਟਦੁਕ੍ਖੇਨ ਚ ਸਹ ਸਤ੍ਤੋ ਸਂਯੋਜੀਯਤਿ, ਅਯਂ ਅਵਿਜ੍ਜਾ ‘‘ਅਵਿਜ੍ਜਾਯੋਗੋ’’ਤਿ ਵੁਚ੍ਚਤਿ.
ਯਸ੍ਮਾ ਪਨ ਕਾਮਯੋਗਾਦਯੋ ਅਭਿਜ੍ਝਾਕਾਯਗਨ੍ਥਾਦੀਨਂ ਪਚ੍ਚਯਾ ਹੋਨ੍ਤਿ, ਤਸ੍ਮਾ ‘‘ਪਠਮੇ ਯੋਗੇ ਠਿਤੋ ਅਭਿਜ੍ਝਾਯ ਕਾਯਂ ਗਨ੍ਥਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਭਿਜ੍ਝਾਯ ਕਾਯਂ ਗਨ੍ਥਤੀਤਿ ਪਰਾਭਿਜ੍ਝਾਯਨਲਕ੍ਖਣਾਯ ਅਭਿਜ੍ਝਾਯ ਨਾਮਕਾਯਂ ਗਨ੍ਥਤਿ ਘਟ੍ਟੇਤੀਤਿ ਅਤ੍ਥੋ. ਤਥਾ ਭਵਪਤ੍ਥਨਾਯ ਅਪ੍ਪਹੀਨਤ੍ਤਾ ਭਵਦਿਟ੍ਠਿਭਵਰਾਗਵਸੇਨ ਆਘਾਤਵਤ੍ਥੂਸੁ ਸਤ੍ਤਾ ਚਿਤ੍ਤਾਨਿ ਪਦੂਸੇਨ੍ਤੀਤਿ ਆਹ – ‘‘ਦੁਤਿਯੇ ਯੋਗੇ ਠਿਤੋ ਬ੍ਯਾਪਾਦੇਨ ਕਾਯਂ ਗਨ੍ਥਤੀ’’ਤਿ. ਤਥਾ ਦਿਟ੍ਠਿਵਸੇਨ ਅਵਿਜ੍ਜਾਵਸੇਨ ਚ ਸੀਲਬ੍ਬਤੇਹਿ ਸੁਜ੍ਝਤਿ, ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਚ ਅਭਿਨਿਵਿਸਤੀਤਿ ਆਹ – ‘‘ਤਤਿਯੇ…ਪੇ… ਇਦਂਸਚ੍ਚਾਭਿਨਿਵੇਸੇਨ ਕਾਯਂ ਗਨ੍ਥਤੀ’’ਤਿ.
ਤਸ੍ਸਾਤਿ ਤਸ੍ਸ ਅਭਿਜ੍ਝਾਦੀਹਿ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ. ਏਵਂ ਗਨ੍ਥਿਤਾਤਿ ਏਵਂ ਅਭਿਜ੍ਝਾਯਨਾਦਿਵਸੇਨ ਨਾਮਕਾਯਂ ਗਨ੍ਥਿਤ੍ਵਾ ਠਿਤਾ. ਆਸਵਨ੍ਤੀਤਿ ਆਸਵਭਾਵੇਨ ਪਵਤ੍ਤਨ੍ਤਿ. ਕੁਤੋ ਚ ਵੁਚ੍ਚਤਿ ਆਸਵਨ੍ਤੀਤਿ ਕੁਤੋ ਪਨ ਹੇਤੁਤੋ ਤੇ ਕਿਲੇਸਾ ਆਸਵਨ੍ਤੀਤਿ ਆਸਵਹੇਤੁਂ ਪੁਚ੍ਛਤਿ. ਯਸ੍ਮਾ ਪਨ ਕਿਲੇਸਾ ਕੁਸਲਪ੍ਪਵਤ੍ਤਿਂ ਨਿਵਾਰੇਤ੍ਵਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਾ, ਮਗ੍ਗੇਨ ਅਸਮੁਚ੍ਛਿਨ੍ਨਾ ਏਵ ਵਾ ਆਸਵਾਨਂ ਉਪ੍ਪਤ੍ਤਿਹੇਤੁ ਹੋਨ੍ਤਿ, ਤਸ੍ਮਾ ‘‘ਅਨੁਸਯਤੋ ਵਾ ਪਰਿਯੁਟ੍ਠਾਨਤੋ ਵਾ’’ਤਿ ਵੁਤ੍ਤਂ. ਅਭਿਜ੍ਝਾਕਾਯਗਨ੍ਥੇਨ ਕਾਮਾਸਵੋਤਿ ਅਭਿਜ੍ਝਾਕਾਯਗਨ੍ਥੇਨ ਸਿਦ੍ਧੇਨ ਕਾਮਰਾਗਸਭਾਵਤ੍ਤਾ ਕਾਮਾਸਵੋ ਸਿਦ੍ਧੋ ਹੋਤਿ. ਕਤ੍ਥਚਿਦੇਵ ਵਿਸਯੇ ਦੋਮਨਸ੍ਸਿਤੋ ਤਪ੍ਪਟਿਪਕ੍ਖੇ ਵਿਸਯੇ ਤਬ੍ਬਿਸਯਬਹੁਲੇ ਚ ਭਵੇ ਪਤ੍ਥੇਤੀਤਿ ਆਹ – ‘‘ਬ੍ਯਾਪਾਦਕਾਯਗਨ੍ਥੇਨ ਭਵਾਸਵੋ’’ਤਿ. ਪਰਾਮਾਸਕਾਯਗਨ੍ਥੇਨ ਦਿਟ੍ਠਾਸਵੋਤਿ ਸੀਲਬ੍ਬਤਪਰਾਮਾਸਕਾਯਗਨ੍ਥੇਨ ਸਿਦ੍ਧੇਨ ਤਂਸਭਾਵਤ੍ਤਾ ਅਪਰਾਪਰਂ ਵਾ ਦਿਟ੍ਠਿਯੋ ਗਨ੍ਥੇਨ੍ਤਸ੍ਸ ਦਿਟ੍ਠਾਸਵੋ ਸਿਦ੍ਧੋ ਹੋਤਿ. ਇਦਂਸਚ੍ਚਾਭਿਨਿਵੇਸਕਾਯਗਨ੍ਥੇਨ ਅਵਿਜ੍ਜਾਸਵੋਤਿ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਅਭਿਨਿਵਿਸਨ੍ਤਸ੍ਸ ਅਯੋਨਿਸੋਮਨਸਿਕਾਰਤੋ ਅਨੇਕੇਹਿ ਅਕੁਸਲੇਹਿ ਧਮ੍ਮੇਹਿ ਸਦ੍ਧਿਂ ਅਵਿਜ੍ਜਾਸਵੋ ਉਪ੍ਪਜ੍ਜਤਿ, ਸਬ੍ਬੇਸਂ ਵਾ ਅਕੁਸਲਧਮ੍ਮਾਨਂ ਅਵਿਜ੍ਜਾਪੁਬ੍ਬਙ੍ਗਮਤ੍ਤਾ ਇਦਂਸਚ੍ਚਾਭਿਨਿਵੇਸਕਾਯਗਨ੍ਥੇਨ ਸਿਦ੍ਧੇਨ ਤਸ੍ਸ ਹੇਤੁਭੂਤੋ ਅਵਿਜ੍ਜਾਸਵੋ ਸਿਦ੍ਧੋ ਹੋਤਿ.
ਯਸ੍ਮਾ ਪਨ ਆਸਵਾ ਏਵ ਪਰਿਬੁਦ੍ਧਾ ਵਟ੍ਟਸ੍ਮਿਂ ਓਹਨਨ੍ਤਿ ਓਸਾਦੇਨ੍ਤੀਤਿ ‘‘ਓਘਾ’’ਤਿ ਵੁਚ੍ਚਨ੍ਤਿ, ਤਸ੍ਮਾ ਵੁਤ੍ਤਂ – ‘‘ਤਸ੍ਸ ਇਮੇ ਚਤ੍ਤਾਰੋ ਆਸਵਾ’’ਤਿਆਦਿ.
ਅਨੁਸਯਸਹਗਤਾਤਿ ਅਨੁਸਯਭਾਵਂ ਅਪ੍ਪਟਿਕ੍ਖਿਪਿਤ੍ਵਾ ਗਤਾ ਪਵਤ੍ਤਾ, ਅਨੁਸਯਭੂਤਾ ਵਾ. ਅਜ੍ਝਾਸਯਨ੍ਤਿ ਚਿਤ੍ਤਂ. ਅਨੁਪਵਿਟ੍ਠਾਤਿ ਓਗਾਲ਼੍ਹਾ. ਹਦਯਂ ਆਹਚ੍ਚ ਤਿਟ੍ਠਨ੍ਤੀਤਿ ਚਿਤ੍ਤਸ੍ਸ ਅਬ੍ਭਨ੍ਤਰਸਙ੍ਖਾਤਂ ਹਦਯਂ ਆਹਨ੍ਤ੍ਵਾ ਤਿਟ੍ਠਨ੍ਤਿ. ਤਥਾ ਹਿ ਵੁਤ੍ਤਂ ਅਟ੍ਠਸਾਲਿਨਿਯਂ (ਧ. ਸ. ਅਟ੍ਠ. ੫) ‘‘ਅਬ੍ਭਨ੍ਤਰਟ੍ਠੇਨ ਹਦਯ’’ਨ੍ਤਿ. ਤੇਨ ਵੁਚ੍ਚਨ੍ਤਿ ਸਲ੍ਲਾਤਿ ਯਸ੍ਮਾ ਅਜ੍ਝਾਸਯਂ ਅਨੁਪਵਿਟ੍ਠਾ ਹਦਯਂ ਆਹਚ੍ਚ ਤਿਟ੍ਠਨ੍ਤਿ, ਤੇਨ ਵੁਚ੍ਚਨ੍ਤਿ ‘‘ਸਲ੍ਲਾ’’ਤਿ. ਪੀਲ਼ਾਜਨਨਂ ਦੁਰੁਦ੍ਧਰਣਤਾ ਚ ਸਲ੍ਲਟ੍ਠੋ. ‘‘ਏਸੋ ਮੇ ਅਤ੍ਤਾ’’ਤਿ ਗਹਣਮੁਖੇਨ ‘‘ਏਸੋਹਮਸ੍ਮੀ’’ਤਿ ਗਹਣਂ ਹੋਤੀਤਿ ਦਿਟ੍ਠਿਂ ਨਿਸ੍ਸਾਯਪਿ ਮਾਨਂ ਜਪ੍ਪੇਨ੍ਤੀਤਿ ਆਹ ‘‘ਦਿਟ੍ਠੋਘੇਨ ਮਾਨਸਲ੍ਲੋ’’ਤਿ.
ਪਰਿਯਾਦਿਨ੍ਨਨ੍ਤਿ ਅਞ੍ਞਸ੍ਸ ਓਕਾਸਂ ਅਦਤ੍ਵਾ ਸਮਨ੍ਤਤੋ ਗਹਿਤਂ. ਚਤੂਸੁ ਧਮ੍ਮੇਸੁ ਸਣ੍ਠਹਤੀਤਿ ਆਰਮ੍ਮਣਪਚ੍ਚਯਤਾਯ ਆਰਮ੍ਮਣਭੂਤੇਸੁ ਚਤੂਸੁ ਧਮ੍ਮੇਸੁ ਪਤਿਟ੍ਠਹਤਿ. ਤਾਨਿ ਸਰੂਪਤੋ ਦਸ੍ਸੇਤਿ ‘‘ਰੂਪੇ ਵੇਦਨਾਯ ਸਞ੍ਞਾਯ ਸਙ੍ਖਾਰੇਸੂ’’ਤਿ. ਨਨ੍ਦੂਪਸੇਚਨੇਨਾਤਿ ਲੋਭਸਹਗਤਸ੍ਸ ਸਮ੍ਪਯੁਤ੍ਤਾ ਨਨ੍ਦੀ ਸਹਜਾਤਕੋਟਿਯਾ, ਇਤਰਸ੍ਸ ਉਪਨਿਸ੍ਸਯਕੋਟਿਯਾ ਉਪਸੇਚਨਨ੍ਤਿ ਨਨ੍ਦੂਪਸੇਚਨਂ, ਤੇਨ ਨਨ੍ਦੂਪਸੇਚਨੇਨ. ਕੇਨ ਪਨ ਤਂ ਨਨ੍ਦੂਪਸੇਚਨਨ੍ਤਿ ਆਹ – ‘‘ਰਾਗਸਲ੍ਲੇਨ ਨਨ੍ਦੂਪਸੇਚਨੇਨ ਵਿਞ੍ਞਾਣੇਨਾ’’ਤਿ.
ਤਤ੍ਥ ਰਾਗਸਲ੍ਲੇਨਾਤਿ ਰਾਗਸਲ੍ਲੇਨ ਹੇਤੁਭੂਤੇਨ ਨਨ੍ਦੂਪਸੇਚਨੇਨ ਵਿਞ੍ਞਾਣੇਨਾਤਿ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਰੂਪੂਪਗਾ ਵਿਞ੍ਞਾਣਟ੍ਠਿਤੀਤਿ ਰੂਪਮੇਵ ਆਰਮ੍ਮਣਕਰਣਵਸੇਨ ਉਪਗਨ੍ਤਬ੍ਬਤੋ, ਵਿਞ੍ਞਾਣਸ੍ਸ ਪਤਿਟ੍ਠਾਭਾਵਤੋ ਚ ਰੂਪੂਪਗਾ ਵਿਞ੍ਞਾਣਟ੍ਠਿਤਿ. ਤਿਟ੍ਠਤਿ ਏਤ੍ਥਾਤਿ ਠਿਤਿ. ਪਞ੍ਚਵੋਕਾਰਭਵਸ੍ਮਿਞ੍ਹਿ ਅਭਿਸਙ੍ਖਾਰਵਿਞ੍ਞਾਣਂ ਰੂਪਕ੍ਖਨ੍ਧਂ ਨਿਸ੍ਸਾਯ ਤਿਟ੍ਠਤਿ. ਦੋਸਸਲ੍ਲੇਨਾਤਿ ਸਹਜਾਤੇਨ ਦੋਸਸਲ੍ਲੇਨ. ਯਦਾ ਵੇਦਨੂਪਗਾ ਵਿਞ੍ਞਾਣਟ੍ਠਿਤਿ ਵੁਚ੍ਚਤਿ, ਤਦਾ ਉਪਨਿਸ੍ਸਯਕੋਟਿਯਾਵ ਨਨ੍ਦਿਯਾ ਉਪਸਿਤ੍ਤਂ ਵਿਞ੍ਞਾਣਂ ਦਟ੍ਠਬ੍ਬਂ. ਵੇਦਨਾਪਿ ਦੋਮਨਸ੍ਸਵੇਦਨਾਵ. ਯਦਾ ਚ ਉਪਨਿਸ੍ਸਯਪਚ੍ਚਯਭੂਤੇਨ ਦੋਸਸਲ੍ਲੇਨ ਵੇਦਨੂਪਗਾ ਵਿਞ੍ਞਾਣਟ੍ਠਿਤਿ ਵੁਚ੍ਚਤਿ, ਤਦਾ ਸਹਜਾਤਕੋਟਿਯਾ, ਉਪਨਿਸ੍ਸਯਕੋਟਿਯਾ ਵਾ ਨਨ੍ਦਿਯਾ ਉਪਸਿਤ੍ਤਂ ਵਿਞ੍ਞਾਣਂ ਦਟ੍ਠਬ੍ਬਂ. ਵੇਦਨਾ ਪਨ ਤਿਸ੍ਸੋਪਿ ਤਿਸ੍ਸਨ੍ਨਂ ਵੇਦਨਾਨਂ ਆਰਮ੍ਮਣੂਪਨਿਸ੍ਸਯਭਾਵਤੋ. ਤਤ੍ਥ ਪਠਮਨਯੋ ਦੋਮਨਸ੍ਸਾਰਮ੍ਮਣਸ੍ਸ ਅਭਿਸਙ੍ਖਾਰਵਿਞ੍ਞਾਣਸ੍ਸ ਵਸੇਨ ਵੁਤ੍ਤੋ. ਦੁਤਿਯੋ ਸਬ੍ਬਵੇਦਨਾਰਮ੍ਮਣਸ੍ਸ ਵਸੇਨਾਪਿ ਦਟ੍ਠਬ੍ਬਂ.
ਮਾਨਸਲ੍ਲੇਨਾਤਿ ਮਾਨਸਲ੍ਲੇਨ ਸਹਜਾਤੇਨ, ਉਪਨਿਸ੍ਸਯਭੂਤੇਨ ਵਾ. ਮੋਹਸਲ੍ਲੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਏਤ੍ਥ ਚ ਅਨਾਦਿਮਤਿਸਂਸਾਰੇ ਇਤ੍ਥਿਪੁਰਿਸਾ ਰੂਪਾਭਿਰਾਮਾਤਿ ਰਾਗਸਲ੍ਲਵਸੇਨ ਪਠਮਾ ਵਿਞ੍ਞਾਣਟ੍ਠਿਤਿ ਯੋਜਿਤਾ. ਸਬ੍ਬਾਯਪਿ ਵੇਦਨਾਯ ਦੁਕ੍ਖਪਰਿਯਾਯਸਬ੍ਭਾਵਤੋ ਦੁਕ੍ਖਾਯ ਚ ਦੋਸੋ ਅਨੁਸੇਤੀਤਿ ਦੋਸਸਲ੍ਲਵਸੇਨ ਦੁਤਿਯਾ, ਸਞ੍ਞਾਵਸੇਨ ‘‘ਸੇਯ੍ਯੋਹਮਸ੍ਮੀ’’ਤਿ ਮਞ੍ਞਨਾ ਹੋਤੀਤਿ ਮਾਨਸਲ੍ਲਵਸੇਨ ਤਤਿਯਾ, ਸਙ੍ਖਾਰੇਸੁ ਸਮੂਹਘਨਂ ਦੁਬ੍ਬਿਨਿਬ੍ਭੋਗਨ੍ਤਿ ਮੋਹਸਲ੍ਲਵਸੇਨ ਚਤੁਤ੍ਥੀ ਵਿਞ੍ਞਾਣਟ੍ਠਿਤਿ ਯੋਜਿਤਾਤਿ ਦਟ੍ਠਬ੍ਬਾ.
ਉਪਤ੍ਥਦ੍ਧਨ੍ਤਿ ਓਲੁਬ੍ਭਾਰਮ੍ਮਣਭੂਤਾਹਿ ਵਿਞ੍ਞਾਣਟ੍ਠਿਤੀਹਿ ਉਪਤ੍ਥਮ੍ਭਿਤਂ. ਤਞ੍ਚ ਕਮ੍ਮਨ੍ਤਿ ਯਂ ‘‘ਚੇਤਨਾ ਚੇਤਸਿਕ’’ਨ੍ਤਿ ਪੁਬ੍ਬੇ (ਨੇਤ੍ਤਿ. ੮੨) ਵੁਤ੍ਤਂ. ਇਮੇ ਚ ਕਿਲੇਸਾਤਿ ਇਮੇ ਚ ਦਸਵਤ੍ਥੁਕਾ ਕਿਲੇਸਾ. ਸੇਸਂ ਸੁਵਿਞ੍ਞੇਯ੍ਯਮੇਵ.
੮੫. ਇਦਾਨਿ ਆਹਾਰਾਦਯੋ ਨਯਾਨਂ ਸਂਕਿਲੇਸਪਕ੍ਖੇ ਦਿਸਾਭਾਵੇਨ ਵਵਤ੍ਥਪੇਤੁਂ ‘‘ਇਮਾ ਚਤਸ੍ਸੋ ਦਿਸਾ’’ਤਿਆਦਿ ਆਰਦ੍ਧਂ, ਤਂ ਉਤ੍ਤਾਨਮੇਵ. ਪੁਨ ਕਬਲ਼ੀਕਾਰੋ ਆਹਾਰੋਤਿਆਦਿ ਆਹਾਰਾਦੀਸੁਯੇਵ ਯਸ੍ਸ ਪੁਗ੍ਗਲਸ੍ਸ ਉਪਕ੍ਕਿਲੇਸਾ, ਤਂ ਵਿਭਜਿਤ੍ਵਾ ਦਸ੍ਸੇਤੁਂ ਆਰਦ੍ਧਂ. ਤਤ੍ਥ ਦਸਨ੍ਨਂ ਸੁਤ੍ਤਾਨਨ੍ਤਿ ਏਕਦੇਸੇਸੁ ਸਮੁਦਾਯਵੋਹਾਰੇਨ ਵੁਤ੍ਤਂ. ਸਮੁਦਾਯੇਸੁ ਹਿ ਪਵਤ੍ਤਾ ਸਮਞ੍ਞਾ ਅਵਯਵੇਸੁਪਿ ਦਿਸ੍ਸਤਿ, ‘‘ਯਥਾ ਪਟੋ ਦਡ੍ਢੋ, ਸਮੁਦ੍ਦੋ ਦਿਟ੍ਠੋ’’ਤਿ ਚ. ਏਕੋ ਅਤ੍ਥੋਤਿ ਏਕਸ੍ਸ ਅਤ੍ਥਸ੍ਸ ਨਿਪ੍ਫਾਦਨਤੋ ਵੁਤ੍ਤਂ. ਬ੍ਯਞ੍ਜਨਮੇਵ ਨਾਨਨ੍ਤਿ ਏਤ੍ਥ ਬ੍ਯਞ੍ਜਨਗ੍ਗਹਣੇਨ ਬ੍ਯਞ੍ਜਨਤ੍ਥੋਪਿ ਗਹਿਤੋਤਿ ਦਟ੍ਠਬ੍ਬਂ. ਦਸਹਿਪਿ ਸੁਤ੍ਤਪਦੇਹਿ ਸਵਤ੍ਥੁਕਾ ਤਣ੍ਹਾ ਵੁਤ੍ਤਾ. ਤਣ੍ਹਾ ਚ ਰਾਗਚਰਿਤਂ ਪੁਗ੍ਗਲਂ ਖਿਪ੍ਪਂ ਦੂਸੇਤੀਤਿ ਆਹ – ‘‘ਇਮੇ ਰਾਗਚਰਿਤਸ੍ਸ ਪੁਗ੍ਗਲਸ੍ਸ ਉਪਕ੍ਕਿਲੇਸਾ’’ਤਿ. ਯਥਾ ਚ ਪਠਮਦਿਸਾਭਾਵੇਨ ਵੁਤ੍ਤਧਮ੍ਮਾ ਰਾਗਚਰਿਤਸ੍ਸ ਉਪਕ੍ਕਿਲੇਸਾ, ਏਵਂ ਦੁਤਿਯਦਿਸਾਭਾਵੇਨ ਵੁਤ੍ਤਧਮ੍ਮਾ ਦੋਸਚਰਿਤਸ੍ਸ. ਤਤਿਯਚਤੁਤ੍ਥਦਿਸਾਭਾਵੇਨ ਵੁਤ੍ਤਧਮ੍ਮਾ ਯਥਾਕ੍ਕਮਂ ਦਿਟ੍ਠਿਚਰਿਤਸ੍ਸ ਮਨ੍ਦਸ੍ਸ ਤਿਕ੍ਖਸ੍ਸ ਚ ਉਪਕ੍ਕਿਲੇਸਾ ਵੁਤ੍ਤਾ. ਤੇਸਂ ਉਪਕ੍ਕਿਲੇਸਭਾਵੋ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬੋ.
ਆਹਾਰਵਿਪਲ੍ਲਾਸਾਦਯੋ ਯਦਿਪਿ ਸਬ੍ਬੇਹਿ ਤੀਹਿ ਵਿਮੋਕ੍ਖਮੁਖੇਹਿ ਪੁਬ੍ਬਭਾਗੇ ਯਥਾਰਹਂ ਪਰਿਞ੍ਞੇਯ੍ਯਾ ਪਹਾਤਬ੍ਬਾ ਚ. ਯਸ੍ਸ ਪਨ ਦੁਕ੍ਖਾਨੁਪਸ੍ਸਨਾ ਪੁਰਿਮੇ ਆਹਾਰਦ੍ਵਯੇ ਦੁਕ੍ਖਾਕਾਰੇਨ ਬਹੁਲਂ ਪਵਤ੍ਤਤਿ, ਤਸ੍ਸ ਵਸੇਨ ਯੋ ਚ ਕਬਲ਼ੀਕਾਰੋ ਆਹਾਰੋ, ਯੋ ਚ ਫਸ੍ਸੋ ਆਹਾਰੋ, ਇਮੇ ਅਪ੍ਪਣਿਹਿਤੇਨ ਵਿਮੋਕ੍ਖਮੁਖੇਨ ਪਰਿਞ੍ਞਂ ਗਚ੍ਛਨ੍ਤੀਤਿ ਵੁਤ੍ਤਂ. ਏਸ ਨਯੋ ਸੇਸੇਸੁ. ਏਵਞ੍ਚੇਤਂ, ਨ ਅਞ੍ਞਥਾ. ਨ ਹਿ ਅਰਿਯਮਗ੍ਗਾਨਂ ਵਿਯ ਪਹਾਤਬ੍ਬੇਸੁ ਵਿਮੋਕ੍ਖਮੁਖਾਨਂ ਪਰਿਞ੍ਞੇਯ੍ਯਪਹਾਤਬ੍ਬੇਸੁ ਕੋਚਿ ਨਿਯਮੋ ਸਮ੍ਭਵਤਿ. ਇਤਿ ਸਬ੍ਬੇ ਲੋਕਵਟ੍ਟਾਨੁਸਾਰਿਨੋ ਧਮ੍ਮਾ ਨਿਯ੍ਯਨ੍ਤਿ, ਤੇ ਲੋਕਾ ਤੀਹਿ ਵਿਮੋਕ੍ਖਮੁਖੇਹੀਤਿ ਨਿਗਮਨਂ. ਤਸ੍ਸਤ੍ਥੋ – ਇਤਿ ਏਵਂ ਵੁਤ੍ਤਪ੍ਪਕਾਰਾ ਸਬ੍ਬੇ ਆਹਾਰਾਦਯੋ ਲੋਕਸਙ੍ਖਾਤਵਟ੍ਟਾਨੁਸਾਰਿਨੋ ਧਮ੍ਮਾ ਤੇ ਲੋਕਭੂਤਾ ਵਟ੍ਟਤੋ ਨਿਯ੍ਯਨ੍ਤਿ ਅਨਿਚ੍ਚਾਨੁਪਸ੍ਸਨਾਦੀਹਿ ਤੀਹਿ ਵਿਮੋਕ੍ਖਮੁਖੇਹੀਤਿ.
੮੬. ਏਵਂ ਸਂਕਿਲੇਸਪਕ੍ਖੇ ਦਿਸਾਭੂਤਧਮ੍ਮੇ ਨਿਦ੍ਦਿਸਿਤ੍ਵਾ ਇਦਾਨਿ ਵੋਦਾਨਪਕ੍ਖੇ ਦਿਸਾਭੂਤਧਮ੍ਮੇ ਦਸ੍ਸੇਤੁਂ ‘‘ਚਤਸ੍ਸੋ ਪਟਿਪਦਾ’’ਤਿਆਦਿ ਵੁਤ੍ਤਂ. ਤਤ੍ਥ ਦਿਬ੍ਬਬ੍ਰਹ੍ਮਅਰਿਯਆਨੇਞ੍ਜਵਿਹਾਰੋਤਿ ਚਤ੍ਤਾਰੋ ਵਿਹਾਰਾ. ਮਾਨਪ੍ਪਹਾਨਆਲਯਸਮੁਗ੍ਘਾਤਅਵਿਜ੍ਜਾਪਹਾਨਭਵੂਪਸਮਾ ਚਤ੍ਤਾਰੋ ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ. ਸਚ੍ਚਾਧਿਟ੍ਠਾਨਾਦੀਨਿ ਚਤ੍ਤਾਰਿ ਅਧਿਟ੍ਠਾਨਾਨਿ. ਛਨ੍ਦਸਮਾਧਿਭਾਵਨਾਦਯੋ ਚਤਸ੍ਸੋ ਸਮਾਧਿਭਾਵਨਾ. ਇਨ੍ਦ੍ਰਿਯਸਂਵਰੋ ਤਪਸਙ੍ਖਾਤੋ ਪੁਞ੍ਞਧਮ੍ਮੋ ਬੋਜ੍ਝਙ੍ਗਭਾਵਨਾ ਸਬ੍ਬੂਪਧਿਪਟਿਨਿਸ੍ਸਗ੍ਗਸਙ੍ਖਾਤਂ ਨਿਬ੍ਬਾਨਞ੍ਚਾਤਿ ਚਤ੍ਤਾਰੋ ਸੁਖਭਾਗਿਯਾ ਧਮ੍ਮਾ ਵੇਦਿਤਬ੍ਬਾਤਿ.
ਪਠਮਾ ਪਟਿਪਦਾਤਿਆਦਿ ਪਟਿਪਦਾਸਤਿਪਟ੍ਠਾਨਾਦੀਨਂ ਅਭੇਦਸਨ੍ਦਸ੍ਸਨਂ. ਯਦਿ ਏਵਂ ਕਸ੍ਮਾ ਵਿਸੁਂ ਗਹਣਂ ਕਤਨ੍ਤਿ? ਦਸਵਤ੍ਥੁਕਸ੍ਸ ਕਿਲੇਸਪੁਞ੍ਜਸ੍ਸ ਪਟਿਪਕ੍ਖਭਾਵਦਸ੍ਸਨਤ੍ਥਂ ਪਟਿਪਦਾਦਿਦਸਕਨਿਦ੍ਦੇਸੋ. ਤਥਾ ਹਿ ਵਕ੍ਖਤਿ – ‘‘ਚਤ੍ਤਾਰੋ ਆਹਾਰਾ ਤੇਸਂ ਪਟਿਪਕ੍ਖੋ ਚਤਸ੍ਸੋ ਪਟਿਪਦਾ’’ਤਿਆਦਿ (ਨੇਤ੍ਤਿ. ੮੭). ਕਿਞ੍ਚਾਪਿ ਚਤੂਸੁ ਸਤਿਪਟ੍ਠਾਨੇਸੁ ‘‘ਇਦਂ ਨਾਮ ਸਤਿਪਟ੍ਠਾਨਂ ਇਮਾਯ ਏਵ ਪਟਿਪਦਾਯ ਇਜ੍ਝਤੀ’’ਤਿ ਨਿਯਮੋ ਨਤ੍ਥਿ, ਤਥਾਪਿ ਪਠਮਾਯ ਪਟਿਪਦਾਯ ਪਠਮਂ ਸਤਿਪਟ੍ਠਾਨਂ ਸਮ੍ਭਵਤੀਤਿ ਸਮ੍ਭਵਵਸੇਨ ਏਵਂ ਵੁਤ੍ਤਂ – ‘‘ਪਠਮਾ ਪਟਿਪਦਾ, ਪਠਮਂ ਸਤਿਪਟ੍ਠਾਨ’’ਨ੍ਤਿ. ਯਸ੍ਮਾ ਪਨ ਆਹਾਰਵਿਪਲ੍ਲਾਸਾਦੀਨਂ ਵਿਯ ਪਟਿਪਦਾਸਤਿਪਟ੍ਠਾਨਾਦੀਨਂ ਅਤ੍ਥਤੋ ਨਾਨਤ੍ਤਂ ਨਤ੍ਥਿ. ਸਤਿਪਟ੍ਠਾਨਾਨਿਯੇਵ ਹਿ ਤਥਾ ਤਥਾ ਪਟਿਪਜ੍ਜਮਾਨਾਨਿ ਦੁਕ੍ਖਾਪਟਿਪਦਾਦਨ੍ਧਾਭਿਞ੍ਞਾਦਿਨਾਮਕਾਨਿ ਹੋਨ੍ਤਿ, ਤਸ੍ਮਾ ਯਥਾ ਸਂਕਿਲੇਸਪਕ੍ਖੇ ‘‘ਪਠਮੇ ਆਹਾਰੇ ਪਠਮੋ ਵਿਪਲ੍ਲਾਸੋ’’ਤਿਆਦਿਨਾ ਅਧਿਕਰਣਭੇਦੇਨ ਵੁਤ੍ਤਂ, ਏਵਂ ਅਧਿਕਰਣਭੇਦਂ ਅਕਤ੍ਵਾ ‘‘ਪਠਮਾ ਪਟਿਪਦਾ, ਪਠਮਂ ਸਤਿਪਟ੍ਠਾਨ’’ਨ੍ਤਿਆਦਿ ਵੁਤ੍ਤਂ. ਸੇਸੇਸੁਪਿ ਏਸੇਵ ਨਯੋ.
ਅਨ੍ਧਸ੍ਸ ਪਬ੍ਬਤਾਰੋਹਨਂ ਵਿਯ ਕਦਾਚਿਦੇਵ ਉਪ੍ਪਜ੍ਜਨਕਂ ਅਚ੍ਛਰਿਯਂ, ਅਚ੍ਛਰਾਯੋਗ੍ਗਂ ਅਚ੍ਛਰਿਯਨ੍ਤਿ ਪੋਰਾਣਾ. ਅਭੂਤਪੁਬ੍ਬਂ ਭੂਤਨ੍ਤਿ ਅਬ੍ਭੁਤਂ. ਉਭਯਮ੍ਪੇਤਂ ਵਿਮ੍ਹਯਾਵਹਸ੍ਸ ਅਧਿਵਚਨਂ. ਨ ਹਿ ਮਾਨਪ੍ਪਹਾਨਾਦਿਤੋ ਅਞ੍ਞਂ ਦੁਰਭਿਸਮ੍ਭਵਤਰਂ ਵਿਮ੍ਹਨੀਯਞ੍ਚ ਉਪਲਬ੍ਭਤੀਤਿ ਅਧਿਤਿਟ੍ਠਤਿ ਏਤੇਨ, ਏਤ੍ਥ ਵਾ ਅਧਿਟ੍ਠਾਨਮਤ੍ਤਮੇਵ ਵਾ ਤਨ੍ਤਿ ਅਧਿਟ੍ਠਾਨਂ. ਸਚ੍ਚਞ੍ਚ ਤਂ ਅਧਿਟ੍ਠਾਨਞ੍ਚ, ਸਚ੍ਚਸ੍ਸ ਵਾ ਅਧਿਟ੍ਠਾਨਂ, ਸਚ੍ਚਂ ਅਧਿਟ੍ਠਾਨਂ ਏਤਸ੍ਸਾਤਿ ਵਾ ਸਚ੍ਚਾਧਿਟ੍ਠਾਨਂ. ਸੇਸੇਸੁਪਿ ਏਸੇਵ ਨਯੋ. ਸਮਾਧਿ ਏਵ ਭਾਵੇਤਬ੍ਬਤਾਯ ਸਮਾਧਿਭਾਵਨਾ. ਸੁਖਂ ਭਜਤੀਤਿ ਸੁਖਭਾਗਿਯੋ, ਸੁਖਭਾਗਸ੍ਸ ਵਾ ਸੁਖਕੋਟ੍ਠਾਸਸ੍ਸ ਹਿਤੋਤਿ ਸੁਖਭਾਗਿਯੋ. ਏਕਸ੍ਸਪਿ ਸਤ੍ਤਸ੍ਸ ਅਸੁਭਭਾਵਨਾਦਯੋ ਵਿਯ ਏਕਦੇਸੇ ਅਵਤ੍ਤਿਤ੍ਵਾ ਅਨਵਸੇਸਪਰਿਯਾਦਾਨਤੋ ਨਤ੍ਥਿ ਏਤਿਸ੍ਸਾ ਪਮਾਣਨ੍ਤਿ ਅਪ੍ਪਮਞ੍ਞਾ.
ਪਠਮਾ ਪਟਿਪਦਾ ਭਾਵਿਤਾ ਬਹੁਲੀਕਤਾ ਪਠਮਂ ਸਤਿਪਟ੍ਠਾਨਂ ਪਰਿਪੂਰੇਤੀਤਿ ਪਠਮਾਯ ਪਟਿਪਦਾਯ ਭਾਵਨਾਬਹੁਲੀਕਾਰੋ ਪਠਮਸ੍ਸ ਸਤਿਪਟ੍ਠਾਨਸ੍ਸ ਭਾਵਨਾਪਾਰਿਪੂਰੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਯਥਾ ਹਿ ਅਰਿਯਮਗ੍ਗੇ ਭਾਵਿਤੇ ਸਤਿਪਟ੍ਠਾਨਾਦਯੋ ਬੋਧਿਪਕ੍ਖਿਯਧਮ੍ਮਾ ਸਬ੍ਬੇਪਿ ਭਾਵਿਤਾ ਏਵ ਹੋਨ੍ਤਿ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.
ਕਾਯਾਨੁਪਸ੍ਸਨਾਯ ਕਾਮਰਾਗਸ੍ਸ ਉਜੁਵਿਪਚ੍ਚਨੀਕਭਾਵਤੋ ‘‘ਪਠਮੋ ਸਤਿਪਟ੍ਠਾਨੋ ਭਾਵਿਤੋ ਬਹੁਲੀਕਤੋ ਕਾਮਪਟਿਪਕ੍ਖਂ ਪਠਮਂ ਝਾਨਂ ਪਰਿਪੂਰੇਤੀ’’ਤਿ ਵੁਤ੍ਤਂ. ਤਥਾ ਪੀਤਿਪਟਿਸਂਵੇਦਨਾਦਿਵਸੇਨ ਪਵਤ੍ਤਮਾਨਂ ਦੁਤਿਯਂ ਸਤਿਪਟ੍ਠਾਨਂ, ਸਪ੍ਪੀਤਿਕਸ੍ਸ ਦੁਤਿਯਜ੍ਝਾਨਸ੍ਸ ਚਿਤ੍ਤਸ੍ਸ ਅਭਿਪ੍ਪਮੋਦਨਵਸੇਨ ਪਵਤ੍ਤਮਾਨਂ ਤਤਿਯਂ ਸਤਿਪਟ੍ਠਾਨਂ ਉਕ੍ਕਂਸਗਤਸੁਖਸ੍ਸ ਤਤਿਯਜ੍ਝਾਨਸ੍ਸ ਅਨਿਚ੍ਚਵਿਰਾਗਾਦਿਵਸੇਨ ਪਵਤ੍ਤਿਯਾ ਸਙ੍ਖਾਰੇਸੁ ਉਪੇਕ੍ਖਕਂ ਚਤੁਤ੍ਥਂ ਸਤਿਪਟ੍ਠਾਨਂ ਉਪੇਕ੍ਖਾਸਤਿਪਾਰਿਸੁਦ੍ਧਿਭਾਵਤੋ ਚਤੁਤ੍ਥਜ੍ਝਾਨਸ੍ਸ ਪਾਰਿਪੂਰਿਯਾ ਸਂਵਤ੍ਤਤਿ.
ਯਸ੍ਮਾ ਪਨ ਰੂਪਾਵਚਰਪਠਮਜ੍ਝਾਨਂ ਰੂਪਾਵਚਰਸਮਾਪਤ੍ਤੀਨਂ, ਦੁਤਿਯਜ੍ਝਾਨਂ ਬ੍ਯਾਪਾਦਵਿਤਕ੍ਕਾਦਿਦੂਰੀਭਾਵੇਨ ਬ੍ਰਹ੍ਮਵਿਹਾਰਾਨਂ, ਤਤਿਯਜ੍ਝਾਨਂ ਪੀਤਿਵਿਰਾਗੇਨ ਸੁਖੇਨ ਵਿਪਸ੍ਸਨਾਯ ਅਧਿਟ੍ਠਾਨਭੂਤਂ ਅਰਿਯਵਿਹਾਰਾਨਂ, ਚਤੁਤ੍ਥਜ੍ਝਾਨਂ ਉਪੇਕ੍ਖਾਸਤਿਪਾਰਿਸੁਦ੍ਧਿਆਨੇਞ੍ਜਪ੍ਪਤ੍ਤਂ ਆਨੇਞ੍ਜਵਿਹਾਰਾਨਂ ਵਿਸੇਸਤੋ ਪਚ੍ਚਯੋ ਹੋਤਿ, ਤਸ੍ਮਾ ‘‘ਪਠਮਂ ਝਾਨਂ ਭਾਵਿਤਂ ਬਹੁਲੀਕਤਂ ਪਠਮਂ ਵਿਹਾਰਂ ਪਰਿਪੂਰੇਤੀ’’ਤਿਆਦਿ ਵੁਤ੍ਤਂ. ਇਤਿ ਯੋ ਯਸ੍ਸ ਵਿਸੇਸਪਚ੍ਚਯੋ, ਸੋ ਤਂ ਪਰਿਪੂਰੇਤੀਤਿ ਵੁਤ੍ਤੋਤਿ ਦਟ੍ਠਬ੍ਬਂ.
੮੭. ਇਦਾਨਿ ਪਟਿਪਦਾਦਯੋ ਵੋਦਾਨਪਕ੍ਖੇ ਦਿਸਾਭਾਵੇਨ ਵਵਤ੍ਥਪੇਤੁਂ ‘‘ਤਤ੍ਥ ਇਮਾ ਚਤਸ੍ਸੋ ਦਿਸਾ’’ਤਿਆਦਿ ਵੁਤ੍ਤਂ. ਤਂ ਸੁਵਿਞ੍ਞੇਯ੍ਯਮੇਵ. ਪੁਨ ‘‘ਪਠਮਾ ਪਟਿਪਦਾ’’ਤਿਆਦਿ ਪਟਿਪਦਾਚਤੁਕ੍ਕਾਦੀਸੁ ਯੇਨ ਯਸ੍ਸ ਪੁਗ੍ਗਲਸ੍ਸ ਵੋਦਾਨਂ, ਤਂ ਵਿਭਜਿਤ੍ਵਾ ਦਸ੍ਸੇਤੁਂ ਆਰਦ੍ਧਂ. ਤਂ ਹੇਟ੍ਠਾ ਵੁਤ੍ਤਨਯਮੇਵ. ਯਦਿਪਿ ਤੀਸੁ ਵਿਮੋਕ੍ਖਮੁਖੇਸੁ ‘‘ਇਦਂ ਨਾਮ ਵਿਮੋਕ੍ਖਮੁਖਂ ਇਮਾਯ ਏਵ ਪਟਿਪਦਾਯ ਇਜ੍ਝਤੀ’’ਤਿ ਨਿਯਮੋ ਨਤ੍ਥਿ. ਯੇਸਂ ਪਨ ਪੁਗ੍ਗਲਾਨਂ ਪੁਰਿਮਾਹਿ ਦ੍ਵੀਹਿ ਪਟਿਪਦਾਹਿ ਅਪ੍ਪਣਿਹਿਤੇਨ ਵਿਮੋਕ੍ਖਮੁਖੇਨ ਅਰਿਯਮਗ੍ਗਾਧਿਗਮੋ. ਤਥਾ ਯਸ੍ਸ ਤਤਿਯਾਯ ਪਟਿਪਦਾਯ ਸੁਞ੍ਞਤਵਿਮੋਕ੍ਖਮੁਖੇਨ, ਯਸ੍ਸ ਚ ਚਤੁਤ੍ਥਾਯ ਪਟਿਪਦਾਯ ਅਨਿਮਿਤ੍ਤਵਿਮੋਕ੍ਖਮੁਖੇਨ ਅਰਿਯਮਗ੍ਗਾਧਿਗਮੋ, ਤੇਸਂ ਪੁਗ੍ਗਲਾਨਂ ਵਸੇਨ ਅਯਂ ਪਟਿਪਦਾਵਿਮੋਕ੍ਖਮੁਖਸਂਸਨ੍ਦਨਾ. ਸਤਿਪਟ੍ਠਾਨਾਦੀਹਿ ਵਿਮੋਕ੍ਖਮੁਖਸਂਸਨ੍ਦਨਾਯਪਿ ਏਸੇਵ ਨਯੋ.
ਤੇਸਂ ਵਿਕ੍ਕੀਲ਼ਿਤਨ੍ਤਿ ਤੇਸਂ ਅਸਨ੍ਤਾਸਨਜਵਪਰਕ੍ਕਮਾਦਿਵਿਸੇਸਯੋਗੇਨ ਸੀਹਾਨਂ ਬੁਦ੍ਧਾਨਂ ਪਚ੍ਚੇਕਬੁਦ੍ਧਾਨਂ ਬੁਦ੍ਧਸਾਵਕਾਨਞ੍ਚ ਵਿਕ੍ਕੀਲ਼ਿਤਂ ਵਿਹਰਣਂ. ਯਦਿਦਂ ਆਹਾਰਾਦਿਕਿਲੇਸਵਤ੍ਥੁਸਮਤਿਕ੍ਕਮਨਮੁਖੇਨ ਸਪਰਸਨ੍ਤਾਨੇ ਪਟਿਪਦਾਦਿਸਮ੍ਪਾਦਨਾ. ਇਦਾਨਿ ਆਹਾਰਾਦੀਨਂ ਪਟਿਪਦਾਦੀਹਿ ਯੇਨ ਸਮਤਿਕ੍ਕਮਨਂ, ਤਂ ਨੇਸਂ ਪਟਿਪਕ੍ਖਭਾਵਂ ਦਸ੍ਸੇਨ੍ਤੋ ‘‘ਚਤ੍ਤਾਰੋ ਆਹਾਰਾ ਤੇਸਂ ਪਟਿਪਕ੍ਖੋ ਚਤਸ੍ਸੋ ਪਟਿਪਦਾ’’ਤਿਆਦਿਮਾਹ. ਤਤ੍ਥ ਤੇਸਂ ਪਟਿਪਕ੍ਖਭਾਵੋ ਪਹਾਤਬ੍ਬਭਾਵੋ ਪਹਾਯਕਭਾਵੋ ਚ ਆਹਾਰਵਿਞ੍ਞਾਣਟ੍ਠਿਤੀਨਞ੍ਚੇਤ੍ਥ ਪਹਾਤਬ੍ਬਭਾਵੋ ਤਪ੍ਪਟਿਬਨ੍ਧਛਨ੍ਦਰਾਗਵਸੇਨ ਦਟ੍ਠਬ੍ਬੋ. ਤਤ੍ਥ ‘‘ਵਿਕ੍ਕੀਲ਼ਿਤਂ ਭਾਵਨਾ ਸਚ੍ਛਿਕਿਰਿਯਾ ਚਾ’’ਤਿਆਦਿ ਤਸ੍ਸਾਯਂ ਸਙ੍ਖੇਪਤ੍ਥੋ – ਤੇਸਂ ਵਿਕ੍ਕੀਲ਼ਿਤਨ੍ਤਿ ਏਤ੍ਥ ਯਦੇਤਂ ਵਿਕ੍ਕੀਲ਼ਿਤਂ ਨਾਮ ਭਾਵੇਤਬ੍ਬਾਨਂ ਬੋਧਿਪਕ੍ਖਿਯਧਮ੍ਮਾਨਂ ਭਾਵਨਾ, ਸਚ੍ਛਿਕਾਤਬ੍ਬਾਨਂ ਫਲਨਿਬ੍ਬਾਨਾਨਂ ਸਚ੍ਛਿਕਿਰਿਯਾ ਚ. ਤਥਾ ਪਹਾਤਬ੍ਬਸ੍ਸ ਦਸਵਤ੍ਥੁਕਸ੍ਸ ਕਿਲੇਸਪੁਞ੍ਜਸ੍ਸ ਤਦਙ੍ਗਾਦਿਵਸੇਨ ਪਹਾਨਂ ਬ੍ਯਨ੍ਤੀਕਿਰਿਯਾ ਅਨਵਸੇਸਨਨ੍ਤਿ. ਇਦਾਨਿ ਤਂ ਸਙ੍ਖੇਪੇਨ ਦਸ੍ਸੇਨ੍ਤੋ ‘‘ਇਨ੍ਦ੍ਰਿਯਾਧਿਟ੍ਠਾਨਂ ਵਿਕ੍ਕੀਲ਼ਿਤਂ ਵਿਪਰਿਯਾਸਾਨਧਿਟ੍ਠਾਨ’’ਨ੍ਤਿ ਆਹ.
ਇਨ੍ਦ੍ਰਿਯਾਧਿਟ੍ਠਾਨਨ੍ਤਿ ਇਨ੍ਦ੍ਰਿਯਾਨਂ ਪਵਤ੍ਤਨਂ ਭਾਵਨਾ ਸਚ੍ਛਿਕਿਰਿਯਾ ਚ. ਵਿਪਰਿਯਾਸਾਨਧਿਟ੍ਠਾਨਨ੍ਤਿ ਵਿਪਲ੍ਲਾਸਾਨਂ ਅਪਵਤ੍ਤਨਂ ਪਹਾਨਂ ਅਨੁਪ੍ਪਾਦਨਂ. ਇਨ੍ਦ੍ਰਿਯਾਨਿ ਸਦ੍ਧਮ੍ਮਗੋਚਰੋਤਿ ਇਨ੍ਦ੍ਰਿਯਾਨਿ ਚੇਤ੍ਥ ਸਦ੍ਧਮ੍ਮਸ੍ਸ ਗੋਚਰਭੂਤਾਨਿ ਪਵਤ੍ਤਿਹੇਤੂਤਿ ਅਧਿਪ੍ਪੇਤਾਨਿ ਸਦ੍ਧਿਨ੍ਦ੍ਰਿਯਾਦੀਨੀਤਿ ਅਤ੍ਥੋ. ਵਿਪਰਿਯਾਸਾ ਕਿਲੇਸਗੋਚਰੋਤਿ ਵਿਪਲ੍ਲਾਸਾ ਸਂਕਿਲੇਸਪਕ੍ਖਸ੍ਸ ਪਵਤ੍ਤਿਟ੍ਠਾਨਂ ਪਵਤ੍ਤਿਹੇਤੂਤਿ. ਅਯਂ ਵੁਚ੍ਚਤਿ ਸੀਹਵਿਕ੍ਕੀਲ਼ਿਤਸ੍ਸ ਨਯਸ੍ਸ ਭੂਮੀਤਿ ਯਾਯਂ ‘‘ਚਤ੍ਤਾਰੋ ਆਹਾਰਾ’’ਤਿਆਦਿਨਾ ਸਂਕਿਲੇਸਪਕ੍ਖੇ ਦਸਨ੍ਨਂ ਚਤੁਕ੍ਕਾਨਂ, ‘‘ਚਤਸ੍ਸੋ ਪਟਿਪਦਾ’’ਤਿਆਦਿਨਾ ਵੋਦਾਨਪਕ੍ਖੇਪਿ ਦਸਨ੍ਨਂ ਚਤੁਕ੍ਕਾਨਂ ਤਣ੍ਹਾਚਰਿਤਾਦੀਨਂ ਉਪਕ੍ਕਿਲੇਸਵੋਦਾਨਵਿਭਾਵਨਾਮੁਖੇਨ ਨਿਦ੍ਧਾਰਣਾ, ਅਯਂ ਸੀਹਵਿਕ੍ਕੀਲ਼ਿਤਸ੍ਸ ਨਯਸ੍ਸ ਭੂਮਿ ਨਾਮ.
੮੮. ਇਦਾਨਿ ਉਗ੍ਘਟਿਤਞ੍ਞੁਆਦਿਪੁਗ੍ਗਲਤ੍ਤਯਵਸੇਨ ਤਿਪੁਕ੍ਖਲਨਯਸ੍ਸ ਭੂਮਿਂ ਵਿਭਾਵੇਤੁਕਾਮੋ ਯਸ੍ਮਾ ਪਨ ਨਯਾਨਂ ਅਞ੍ਞਮਞ੍ਞਾਨੁਪ੍ਪਵੇਸਸ੍ਸ ਇਚ੍ਛਿਤਤ੍ਤਾ ਸੀਹਵਿਕ੍ਕੀਲ਼ਿਤਨਯਤੋ ਤਿਪੁਕ੍ਖਲਨਯੋ ਨਿਗ੍ਗਚ੍ਛਤਿ, ਤਸ੍ਮਾ ਪਟਿਪਦਾਵਿਭਾਗਤੋ ਚਤ੍ਤਾਰੋ ਪੁਗ੍ਗਲੇ ਸੀਹਵਿਕ੍ਕੀਲ਼ਿਤਨਯਸ੍ਸ ਭੂਮਿਂ ਨਿਦ੍ਦਿਸਿਤ੍ਵਾ ਤਤੋ ਏਵ ਉਗ੍ਘਟਿਤਞ੍ਞੁਆਦਿਪੁਗ੍ਗਲਤ੍ਤਯੇ ਨਿਦ੍ਧਾਰੇਤੁਂ ‘‘ਤਤ੍ਥ ਯੇ ਦੁਕ੍ਖਾਯ ਪਟਿਪਦਾਯਾ’’ਤਿਆਦਿ ਆਰਦ੍ਧਂ. ਤਤ੍ਥ ਇਮੇ ਦ੍ਵੇ ਪੁਗ੍ਗਲਾਤਿ ਇਮੇ ਪੁਰਿਮਾਨਂ ਦ੍ਵਿਨ੍ਨਂ ਪਟਿਪਦਾਨਂ ਵਸੇਨ ਦ੍ਵੇ ਪੁਗ੍ਗਲਾ. ਏਸ ਨਯੋ ਇਤਰਤ੍ਥਾਪਿ. ਪੁਨ ‘‘ਤਤ੍ਥ ਯੇ ਦੁਕ੍ਖਾਯ ਪਟਿਪਦਾਯਾ’’ਤਿਆਦਿ ਯਥਾਵੁਤ੍ਤਪੁਗ੍ਗਲਚਤੁਕ੍ਕਤੋ ਉਗ੍ਘਟਿਤਞ੍ਞੁਆਦਿਪੁਗ੍ਗਲਤ੍ਤਯਂ ਨਿਦ੍ਧਾਰੇਤੁਂ ਵੁਤ੍ਤਂ. ਤਤ੍ਥ ਯੋ ਸਾਧਾਰਣਾਯਾਤਿ ਦੁਕ੍ਖਾਪਟਿਪਦਾਯ ਖਿਪ੍ਪਾਭਿਞ੍ਞਾਯ, ਸੁਖਾਪਟਿਪਦਾਯ ਦਨ੍ਧਾਭਿਞ੍ਞਾਯ ਚ ਨਿਯ੍ਯਾਤੀਤਿ ਸਮ੍ਬਨ੍ਧੋ. ਕਥਂ ਪਨ ਪਟਿਪਦਾਦ੍ਵਯਂ ਏਕਸ੍ਸ ਸਮ੍ਭਵਤੀਤਿ? ਨਯਿਦਮੇਵਂ ਦਟ੍ਠਬ੍ਬਂ. ਏਕਸ੍ਸ ਪੁਗ੍ਗਲਸ੍ਸ ਏਕਸ੍ਮਿਂ ਦ੍ਵੇ ਪਟਿਪਦਾ ਸਮ੍ਭਵਨ੍ਤੀਤਿ. ਯਥਾਵੁਤ੍ਤਾਸੁ ਪਨ ਦ੍ਵੀਸੁ ਪਟਿਪਦਾਸੁ ਯੋ ਯਾਯ ਕਾਯਚਿ ਨਿਯ੍ਯਾਤਿ, ਅਯਂ ਵਿਪਞ੍ਚਿਤਞ੍ਞੂਤਿ ਅਯਮੇਤ੍ਥ ਅਧਿਪ੍ਪਾਯੋ. ਯਸ੍ਮਾ ਪਨ ਅਟ੍ਠਸਾਲਿਨਿਯਂ (ਧ. ਸ. ਅਟ੍ਠ. ੩੫੦) ਪਟਿਪਦਾ ਚਲਤਿ ਨ ਚਲਤੀਤਿ ਵਿਚਾਰਣਾਯਂ ‘‘ਚਲਤੀ’’ਤਿ ਵੁਤ੍ਤਂ, ਤਸ੍ਮਾ ਏਕਸ੍ਸਪਿ ਪੁਗ੍ਗਲਸ੍ਸ ਝਾਨਨ੍ਤਰਮਗ੍ਗਨ੍ਤਰੇਸੁ ਪਟਿਪਦਾਭੇਦੋ ਇਚ੍ਛਿਤੋਵਾਤਿ.
‘‘ਤਤ੍ਥ ਭਗਵਾ’’ਤਿਆਦਿਨਾ ਦੇਸਨਾਵਿਭਾਗੇਹਿਪਿ ਤਮੇਵ ਪੁਗ੍ਗਲਵਿਭਾਗਂ ਵਿਭਾਵੇਤਿ. ਤਂ ਹੇਟ੍ਠਾ ਵੁਤ੍ਤਨਯਮੇਵ. ਤਤ੍ਥ ਅਧਿਚਿਤ੍ਤਨ੍ਤਿ ਅਧਿਚਿਤ੍ਤਸਿਕ੍ਖਞ੍ਚਾਤਿ ਚ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਤੇਨ ਅਧਿਚਿਤ੍ਤਸਿਕ੍ਖਞ੍ਚ ਅਧਿਪਞ੍ਞਾਸਿਕ੍ਖਞ੍ਚ ਵਿਪਞ੍ਚਿਤਞ੍ਞੁਸ੍ਸ ਪਞ੍ਞਪੇਤੀਤਿ ਅਤ੍ਥੋ. ਅਧਿਸੀਲਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਅਧਿਸੀਲਸਿਕ੍ਖਂ ਅਧਿਚਿਤ੍ਤਸਿਕ੍ਖਂ ਅਧਿਪਞ੍ਞਾਸਿਕ੍ਖਞ੍ਚਾਤਿ ਯੋਜੇਤਬ੍ਬਂ.
ਚਤ੍ਤਾਰਿ ਹੁਤ੍ਵਾ ਤੀਣਿ ਭਵਨ੍ਤੀਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਚਤ੍ਤਾਰੋ ਪੁਗ੍ਗਲਾ ਹੁਤ੍ਵਾ ਤਯੋ ਪੁਗ੍ਗਲਾ ਹੋਨ੍ਤੀਤਿ ਅਤ੍ਥੋ.
ਅਯਂ ਸਂਕਿਲੇਸੋਤਿ ਅਯਂ ਅਕੁਸਲਮੂਲਾਦਿਦ੍ਵਾਦਸਤ੍ਤਿਕਸਙ੍ਗਹੋ ਸਂਕਿਲਿਸ੍ਸਤਿ ਏਤੇਨਾਤਿ ਸਂਕਿਲੇਸੋਤਿ ਕਤ੍ਵਾ. ਇਦਂ ਵੋਦਾਨਨ੍ਤਿ ਏਤ੍ਥਾਪਿ ਏਸੇਵ ਨਯੋ.
ਤੀਣਿ ਹੁਤ੍ਵਾ ਦ੍ਵੇ ਭਵਨ੍ਤੀਤਿ ਨਨ੍ਦਿਯਾਵਟ੍ਟਨਯਸ੍ਸ ਦਿਸਾਭੂਤਧਮ੍ਮਦਸ੍ਸਨਤ੍ਥਂ ਵੁਤ੍ਤਂ. ਤੇਨੇਵਾਹ – ‘‘ਤਣ੍ਹਾ ਚ ਅਵਿਜ੍ਜਾ ਚਾ’’ਤਿਆਦਿ, ਤਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.
ਕਸ੍ਮਾ ਪਨੇਤ੍ਥ ਨਯਾਨਂ ਉਦ੍ਦੇਸਾਨੁਕ੍ਕਮੇਨ ਨਿਦ੍ਦੇਸੋ ਨ ਕਤੋਤਿ? ਨਯਾਨਂ ਨਯੇਹਿ ਸਮ੍ਭਵਦਸ੍ਸਨਤ੍ਥਂ. ਪਠਮਨਯਤੋ ਹਿ ਪੁਗ੍ਗਲਾਧਿਟ੍ਠਾਨਵਸੇਨ ਤਤਿਯਨਯਸ੍ਸ, ਤਤਿਯਨਯਤੋ ਚ ਦੁਤਿਯਨਯਸ੍ਸ ਸਮ੍ਭਵੋਤਿ ਇਮਸ੍ਸ ਵਿਸੇਸਸ੍ਸ ਦਸ੍ਸਨਤ੍ਥਂ ਪਠਮਨਯਾਨਨ੍ਤਰਂ ਤਤਿਯਨਯੋ, ਤਤਿਯਨਯਾਨਨ੍ਤਰਞ੍ਚ ਦੁਤਿਯਨਯੋ ਨਿਦ੍ਦਿਟ੍ਠੋ. ਧਮ੍ਮਾਧਿਟ੍ਠਾਨਵਸੇਨ ਪਨ ਤਤਿਯਨਯਤੋ ਦੁਤਿਯਨਯੋ, ਦੁਤਿਯਨਯਤੋ ਪਠਮਨਯੋਪਿ ਸਮ੍ਭਵਤੀਤਿ ਇਮਸ੍ਸ ਵਿਸੇਸਸ੍ਸ ਦਸ੍ਸਨਤ੍ਥਂ ਅਨ੍ਤੇ ‘‘ਤਣ੍ਹਾ ਚ ਅਵਿਜ੍ਜਾ ਚਾ’’ਤਿਆਦਿਨਾ ਪਠਮਨਯਸ੍ਸ ਭੂਮਿ ਦਸ੍ਸਿਤਾ. ਤੇਨੇਵ ਹਿ ‘‘ਚਤ੍ਤਾਰਿ ਹੁਤ੍ਵਾ ਤੀਣਿ ਭਵਨ੍ਤਿ, ਤੀਣਿ ਹੁਤ੍ਵਾ ਦ੍ਵੇ ਭਵਨ੍ਤੀ’’ਤਿ ਵੁਤ੍ਤਂ. ਯਦਿ ਏਵਂ ‘‘ਦ੍ਵੇ ਹੁਤ੍ਵਾ ਚਤ੍ਤਾਰਿ ਭਵਨ੍ਤਿ, ਦ੍ਵੇ ਹੁਤ੍ਵਾ ਤੀਣਿ ਭਵਨ੍ਤਿ, ਤੀਣਿ ਹੁਤ੍ਵਾ ਚਤ੍ਤਾਰਿ ਭਵਨ੍ਤੀ’’ਤਿ ਅਯਮ੍ਪਿ ਨਯੋ ਵਤ੍ਤਬ੍ਬੋ ਸਿਯਾਤਿ? ਸਚ੍ਚਮੇਤਂ, ਅਯਂ ਪਨ ਨਯੋ ਅਤ੍ਥਤੋ ਦਸ੍ਸਿਤੋ ਏਵਾਤਿ ਕਤ੍ਵਾ ਨ ਵੁਤ੍ਤੋ. ਯਸ੍ਮਾ ਤਿਣ੍ਣਂ ਅਤ੍ਥਨਯਾਨਂ ਅਞ੍ਞਮਞ੍ਞਂ ਅਨੁਪ੍ਪਵੇਸੋ ਇਚ੍ਛਿਤੋ, ਸਤਿ ਚ ਅਨੁਪ੍ਪਵੇਸੇ ਤਤੋ ਵਿਨਿਗ੍ਗਮੋਪਿ ਸਮ੍ਭਵਤਿ ਏਵਾਤਿ. ਅਯਞ੍ਚ ਅਤ੍ਥੋ ਪੇਟਕੋਪਦੇਸੇਨ ਵਿਭਾਵੇਤਬ੍ਬੋ.
ਤਤ੍ਥਾਯਂ ਆਦਿਤੋ ਪਟ੍ਠਾਯ ਵਿਭਾਵਨਾ – ਚਤ੍ਤਾਰੋ ਪੁਗ੍ਗਲਾ ਤਣ੍ਹਾਚਰਿਤੋ ਦੁਵਿਧੋ ਮੁਦਿਨ੍ਦ੍ਰਿਯੋ ਤਿਕ੍ਖਿਨ੍ਦ੍ਰਿਯੋ ਚ. ਤਥਾ ਦਿਟ੍ਠਿਚਰਿਤੋਤਿ. ਤਤ੍ਥ ਤਣ੍ਹਾਚਰਿਤੋ ਮੁਦਿਨ੍ਦ੍ਰਿਯੋ ਦੁਕ੍ਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਨਿਯ੍ਯਾਤਿ, ਤਿਕ੍ਖਿਨ੍ਦ੍ਰਿਯੋ ਦੁਕ੍ਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ, ਦਿਟ੍ਠਿਚਰਿਤੋ ਪਨ ਮੁਦਿਨ੍ਦ੍ਰਿਯੋ ਸੁਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਨਿਯ੍ਯਾਤਿ, ਤਿਕ੍ਖਿਨ੍ਦ੍ਰਿਯੋ ਸੁਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ. ਇਤਿ ਇਮਾਸੁ ਪਟਿਪਦਾਸੁ ਯਥਾਰਹਂ ਠਿਤੇਹਿ ਤਣ੍ਹਾਚਰਿਤਦਿਟ੍ਠਿਚਰਿਤੇਹਿ ਚਤ੍ਤਾਰੋ ਆਹਾਰਾ ਤਪ੍ਪਟਿਬਨ੍ਧਛਨ੍ਦਰਾਗਪ੍ਪਹਾਨੇਨ ਪਹਾਤਬ੍ਬਾ. ਚਤ੍ਤਾਰੋ ਸਤਿਪਟ੍ਠਾਨੇ ਭਾਵੇਤ੍ਵਾ ਚਤ੍ਤਾਰੋ ਵਿਪਲ੍ਲਾਸਾ ਦਟ੍ਠਬ੍ਬਾਤਿ ਸਬ੍ਬੋ ਯਥਾਵੁਤ੍ਤਨਯੋ ਅਨੁਗਨ੍ਤਬ੍ਬੋ.
ਤਤ੍ਥਾਯਂ ਪਾਲ਼ਿ – ਤਤ੍ਥ ਯੇ ਦਿਟ੍ਠਿਚਰਿਤਾ ਸਤ੍ਤਾ, ਤੇ ਕਾਮੇਸੁ ਦੋਸਦਿਟ੍ਠੀ, ਨ ਚ ਯੇ ਕਾਮੇਸੁ ਅਨੁਸਯਾ ਸਮੂਹਤਾ, ਤੇ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ. ਤੇਸਂ ਸਤ੍ਥਾ ਵਾ ਧਮ੍ਮਂ ਦੇਸੇਤਿ ਅਞ੍ਞਤਰੋ ਵਾ ਗਰੁਟ੍ਠਾਨਿਯੋ ਸਬ੍ਰਹ੍ਮਚਾਰੀ ‘‘ਕਾਮੇਹਿ ਨਤ੍ਥਿ ਅਤ੍ਥੋ’’ਤਿ, ਤੇ ਚ ਪੁਬ੍ਬੇਯੇਵ ਕਾਮੇਹਿ ਅਨਤ੍ਥਿਕਾ, ਇਤਿ ਕਾਮੇ ਅਪ੍ਪਕਸਿਰੇਨ ਪਟਿਨਿਸ੍ਸਜ੍ਜਨ੍ਤਿ, ਤੇ ਚੇਤਸਿਕੇਨ ਦੁਕ੍ਖੇਨ ਅਨਜ੍ਝੋਸਿਤਾ. ਤੇਨ ਵੁਚ੍ਚਤਿ ‘‘ਸੁਖਾ ਪਟਿਪਦਾ’’ਤਿ. ਯੇ ਪਨ ਤਣ੍ਹਾਚਰਿਤਾ ਸਤ੍ਤਾ, ਤੇ ਕਾਮੇਸੁ ਅਜ੍ਝੋਸਿਤਾ, ਤੇਸਂ ਸਤ੍ਥਾ ਵਾ ਧਮ੍ਮਂ ਦੇਸੇਤਿ ਅਞ੍ਞਤਰੋ ਵਾ ਭਿਕ੍ਖੁ ‘‘ਕਾਮੇਹਿ ਨਤ੍ਥਿ ਅਤ੍ਥੋ’’ਤਿ, ਤੇ ਪਿਯਰੂਪਂ ਦੁਕ੍ਖੇਨ ਪਟਿਨਿਸ੍ਸਜ੍ਜਨ੍ਤਿ. ਤੇਨ ਵੁਚ੍ਚਤਿ ‘‘ਦੁਕ੍ਖਾ ਪਟਿਪਦਾ’’ਤਿ. ਇਤਿ ਇਮੇ ਸਬ੍ਬੇ ਸਤ੍ਤਾ ਦ੍ਵੀਸੁ ਪਟਿਪਦਾਸੁ ਸਮੋਸਰਣਂ ਗਚ੍ਛਨ੍ਤਿ ਦੁਕ੍ਖਾਯਞ੍ਚ ਸੁਖਾਯਞ੍ਚ.
ਤਤ੍ਥ ਯੇ ਦਿਟ੍ਠਿਚਰਿਤਾ ਸਤ੍ਤਾ, ਤੇ ਦ੍ਵਿਧਾ ਤਿਕ੍ਖਿਨ੍ਦ੍ਰਿਯਾ ਚ ਮੁਦਿਨ੍ਦ੍ਰਿਯਾ ਚ. ਤਤ੍ਥ ਯੇ ਦਿਟ੍ਠਿਚਰਿਤਾ ਸਤ੍ਤਾ ਤਿਕ੍ਖਿਨ੍ਦ੍ਰਿਯਾ, ਤੇ ਸੁਖੇਨ ਪਟਿਨਿਸ੍ਸਜ੍ਜਨ੍ਤਿ, ਖਿਪ੍ਪਞ੍ਚ ਅਭਿਸਮੇਨ੍ਤਿ. ਤੇਨ ਵੁਚ੍ਚਤਿ – ‘‘ਸੁਖਾ ਪਟਿਪਦਾ ਖਿਪ੍ਪਾਭਿਞ੍ਞਾ’’ਤਿ. ਤਤ੍ਥ ਯੇ ਦਿਟ੍ਠਿਚਰਿਤਾ ਸਤ੍ਤਾ ਮੁਦਿਨ੍ਦ੍ਰਿਯਾ ਪਠਮਂ ਤਿਕ੍ਖਿਨ੍ਦ੍ਰਿਯਂ ਉਪਾਦਾਯ ਦਨ੍ਧਤਰਂ ਅਭਿਸਮੇਨ੍ਤਿ, ਤੇ ਸੁਖੇਨ ਪਟਿਨਿਸ੍ਸਜ੍ਜਨ੍ਤਿ, ਦਨ੍ਧਞ੍ਚ ਅਭਿਸਮੇਨ੍ਤਿ. ਤੇਨ ਵੁਚ੍ਚਤਿ – ‘‘ਸੁਖਾ ਪਟਿਪਦਾ ਦਨ੍ਧਾਭਿਞ੍ਞਾ’’ਤਿ. ਤਤ੍ਥ ਤਣ੍ਹਾਚਰਿਤਾ ਸਤ੍ਤਾ ਦੁਵਿਧਾ ਤਿਕ੍ਖਿਨ੍ਦ੍ਰਿਯਾ ਚ ਮੁਦਿਨ੍ਦ੍ਰਿਯਾ ਚ. ਤਤ੍ਥ ਯੇ ਤਣ੍ਹਾਚਰਿਤਾ ਸਤ੍ਤਾ ਤਿਕ੍ਖਿਨ੍ਦ੍ਰਿਯਾ, ਤੇ ਦੁਕ੍ਖੇਨ ਪਟਿਨਿਸ੍ਸਜ੍ਜਨ੍ਤਿ, ਖਿਪ੍ਪਞ੍ਚ ਅਭਿਸਮੇਨ੍ਤਿ. ਤੇਨ ਵੁਚ੍ਚਤਿ – ‘‘ਦੁਕ੍ਖਾ ਪਟਿਪਦਾ ਖਿਪ੍ਪਾਭਿਞ੍ਞਾ’’ਤਿ. ਤਤ੍ਥ ਯੇ ਤਣ੍ਹਾਚਰਿਤਾ ਸਤ੍ਤਾ ਮੁਦਿਨ੍ਦ੍ਰਿਯਾ ਪਠਮਂ ਤਿਕ੍ਖਿਨ੍ਦ੍ਰਿਯਂ ਉਪਾਦਾਯ ਦਨ੍ਧਤਰਂ ਅਭਿਸਮੇਨ੍ਤਿ, ਤੇ ਦੁਕ੍ਖੇਨ ਪਟਿਨਿਸ੍ਸਜ੍ਜਨ੍ਤਿ, ਦਨ੍ਧਞ੍ਚ ਅਭਿਸਮੇਨ੍ਤਿ. ਤੇਨ ਵੁਚ੍ਚਤਿ – ‘‘ਦੁਕ੍ਖਾ ਪਟਿਪਦਾ ਦਨ੍ਧਾਭਿਞ੍ਞਾ’’ਤਿ. ਇਮਾ ਚਤਸ੍ਸੋ ਪਟਿਪਦਾਯੋ ਅਪਞ੍ਚਮਾ ਅਛਟ੍ਠਾ. ਯੇ ਹਿ ਕੇਚਿ ਨਿਬ੍ਬੁਤਾ ਨਿਬ੍ਬਾਯਨ੍ਤਿ ਨਿਬ੍ਬਾਯਿਸ੍ਸਨ੍ਤਿ ਵਾ ਇਮਾਹਿ ਚਤੂਹਿ ਪਟਿਪਦਾਹਿ ਅਨਞ੍ਞਾਹਿ, ਅਯਂ ਪਟਿਪਦਾ ਚਤੁਕ੍ਕਮਗ੍ਗੇਨ ਕਿਲੇਸੇ ਨਿਦ੍ਦਿਸਤਿ. ਯਾ ਚਤੁਕ੍ਕਮਗ੍ਗੇਨ ਅਰਿਯਧਮ੍ਮੇਸੁ ਨਿਦ੍ਦਿਸਿਤਬ੍ਬਾ, ਅਯਂ ਵੁਚ੍ਚਤਿ ਸੀਹਵਿਕ੍ਕੀਲ਼ਿਤੋ ਨਾਮ ਨਯੋ.
ਤਤ੍ਰਿਮੇ ਚਤ੍ਤਾਰੋ ਆਹਾਰਾ, ਚਤ੍ਤਾਰੋ ਵਿਪਲ੍ਲਾਸਾ ਉਪਾਦਾਨਾ ਯੋਗਾ ਗਨ੍ਥਾ ਆਸਵਾ ਓਘਾ ਸਲ੍ਲਾ ਵਿਞ੍ਞਾਣਟ੍ਠਿਤਿਯੋ ਅਗਤਿਗਮਨਾਨੀਤਿ ਏਵਂ ਇਮਾਨਿ ਸਬ੍ਬਾਨਿ ਦਸ ਪਦਾਨਿ. ਅਯਂ ਸੁਤ੍ਤਸ੍ਸ ਸਂਸਨ੍ਦਨਾ.
ਚਤ੍ਤਾਰੋ ਆਹਾਰਾ, ਤਤ੍ਥ ਯੋ ਚ ਕਬਲ਼ੀਕਾਰੋ ਆਹਾਰੋ, ਯੋ ਚ ਫਸ੍ਸੋ ਆਹਾਰੋ, ਇਮੇ ਤਣ੍ਹਾਚਰਿਤੇਨ ਪਹਾਤਬ੍ਬਾ. ਤਤ੍ਥ ਯੋ ਚ ਮਨੋਸਞ੍ਚੇਤਨਾਹਾਰੋ, ਯੋ ਚ ਵਿਞ੍ਞਾਣਾਹਾਰੋ, ਇਮੇ ਦਿਟ੍ਠਿਚਰਿਤੇਨ ਪਹਾਤਬ੍ਬਾ.
ਤਤ੍ਥ ਪਠਮੋ ਆਹਾਰੋ ਪਠਮੋ ਵਿਪਲ੍ਲਾਸੋ, ਦੁਤਿਯੋ ਆਹਾਰੋ ਦੁਤਿਯੋ ਵਿਪਲ੍ਲਾਸੋ, ਤਤਿਯੋ ਆਹਾਰੋ ਤਤਿਯੋ ਵਿਪਲ੍ਲਾਸੋ, ਚਤੁਤ੍ਥੋ ਆਹਾਰੋ ਚਤੁਤ੍ਥੋ ਵਿਪਲ੍ਲਾਸੋ, ਇਮੇ ਚਤ੍ਤਾਰੋ ਵਿਪਲ੍ਲਾਸਾ ਅਪਞ੍ਚਮਾ ਅਛਟ੍ਠਾ. ਇਦਞ੍ਚ ਪਮਾਣਾ ਚਤ੍ਤਾਰੋ ਆਹਾਰਾ.
ਤਤ੍ਥ ਪਠਮੇ ਵਿਪਲ੍ਲਾਸੇ ਠਿਤੋ ਕਾਮੇ ਉਪਾਦਿਯਤਿ, ਇਦਂ ਕਾਮੁਪਾਦਾਨਂ. ਦੁਤਿਯੇ ਵਿਪਲ੍ਲਾਸੇ ਠਿਤੋ ਅਨਾਗਤਂ ਭਵਂ ਉਪਾਦਿਯਤਿ, ਇਦਂ ਸੀਲਬ੍ਬਤੁਪਾਦਾਨਂ. ਤਤਿਯੇ ਵਿਪਲ੍ਲਾਸੇ ਠਿਤੋ ਵਿਪਰੀਤਦਿਟ੍ਠਿਂ ਉਪਾਦਿਯਤਿ, ਇਦਂ ਦਿਟ੍ਠੁਪਾਦਾਨਂ. ਚਤੁਤ੍ਥੇ ਵਿਪਲ੍ਲਾਸੇ ਠਿਤੋ ਖਨ੍ਧੇ ਅਤ੍ਤਤੋ ਉਪਾਦਿਯਤਿ, ਇਦਂ ਅਤ੍ਤਵਾਦੁਪਾਦਾਨਂ.
ਤਤ੍ਥ ਕਾਮੁਪਾਦਾਨੇ ਠਿਤੋ ਕਾਮੇ ਅਭਿਜ੍ਝਾਯ ਗਨ੍ਥਤਿ, ਅਯਂ ਅਭਿਜ੍ਝਾਕਾਯਗਨ੍ਥੋ. ਸੀਲਬ੍ਬਤੁਪਾਦਾਨੇ ਠਿਤੋ ਬ੍ਯਾਪਾਦਂ ਗਨ੍ਥਤਿ, ਅਯਂ ਬ੍ਯਾਪਾਦਕਾਯਗਨ੍ਥੋ. ਦਿਟ੍ਠੁਪਾਦਾਨੇ ਠਿਤੋ ਪਰਾਮਾਸਂ ਗਨ੍ਥਤਿ, ਅਯਂ ਪਰਾਮਾਸਕਾਯਗਨ੍ਥੋ. ਅਤ੍ਤਵਾਦੁਪਾਦਾਨੇ ਠਿਤੋ ਪਪਞ੍ਚੇਨ੍ਤੋ ਗਨ੍ਥਤਿ, ਅਯਂ ਇਦਂਸਚ੍ਚਾਭਿਨਿਵੇਸਕਾਯਗਨ੍ਥੋ.
ਤਸ੍ਸ ਗਨ੍ਥਗਨ੍ਥਿਤਾ ਕਿਲੇਸਾ ਆਸਵਨ੍ਤਿ. ਕਿਂ ਪਨ ਵੁਚ੍ਚਤਿ ਆਸਵਨ੍ਤੀਤਿ? ਵਿਪ੍ਪਟਿਸਾਰਾ. ਯੇ ਵਿਪ੍ਪਟਿਸਾਰਾ, ਤੇ ਅਨੁਸਯਾ. ਤਤ੍ਥ ਅਭਿਜ੍ਝਾਕਾਯਗਨ੍ਥੇਨ ਕਾਮਾਸਵੋ, ਬ੍ਯਾਪਾਦਕਾਯਗਨ੍ਥੇਨ ਭਵਾਸਵੋ, ਪਰਾਮਾਸਕਾਯਗਨ੍ਥੇਨ ਦਿਟ੍ਠਾਸਵੋ, ਇਦਂਸਚ੍ਚਾਭਿਨਿਵੇਸਕਾਯਗਨ੍ਥੇਨ ਅਵਿਜ੍ਜਾਸਵੋ.
ਤੇ ਚਤ੍ਤਾਰੋ ਆਸਵਾ ਵੇਪੁਲ੍ਲਂ ਗਤਾ ਓਘਾ ਹੋਨ੍ਤਿ, ਤੇਨ ਵੁਚ੍ਚਨ੍ਤਿ ‘‘ਓਘਾ’’ਤਿ. ਤਤ੍ਥ ਕਾਮਾਸਵੋ ਕਾਮੋਘੋ, ਭਵਾਸਵੋ ਭਵੋਘੋ, ਅਵਿਜ੍ਜਾਸਵੋ ਅਵਿਜ੍ਜੋਘੋ, ਦਿਟ੍ਠਾਸਵੋ ਦਿਟ੍ਠੋਘੋ.
ਤੇ ਚਤ੍ਤਾਰੋ ਓਘਾ ਆਸਯਮਨੁਪਵਿਟ੍ਠਾ ਅਨੁਸਯਸਹਗਤਾ ਵੁਚ੍ਚਨ੍ਤਿ ਸਲ੍ਲਾਤਿ ਹਦਯਮਾਹਚ੍ਚ ਤਿਟ੍ਠਨ੍ਤਿ. ਤਤ੍ਥ ਕਾਮੋਘੋ ਰਾਗਸਲ੍ਲਂ, ਭਵੋਘੋ ਦੋਸਸਲ੍ਲਂ, ਅਵਿਜ੍ਜੋਘੋ ਮੋਹਸਲ੍ਲਂ, ਦਿਟ੍ਠੋਘੋ ਦਿਟ੍ਠਿਸਲ੍ਲਂ.
ਇਮੇਹਿ ਚਤੂਹਿ ਸਲ੍ਲੇਹਿ ਪਰਿਯਾਦਿਨ੍ਨਂ ਵਿਞ੍ਞਾਣਂ ਚਤੂਸੁ ਧਮ੍ਮੇਸੁ ਤਿਟ੍ਠਤਿ ਰੂਪੇ ਵੇਦਨਾਯ ਸਞ੍ਞਾਯ ਸਙ੍ਖਾਰੇਸੁ. ਇਮਾ ਚਤਸ੍ਸੋ ਵਿਞ੍ਞਾਣਟ੍ਠਿਤਿਯੋ. ਤਤ੍ਥ ਰਾਗਸਲ੍ਲੇਨ ਨਨ੍ਦੂਪਸੇਚਨਂ ਰੂਪੂਪਗਂ ਵਿਞ੍ਞਾਣਂ ਤਿਟ੍ਠਤਿ. ਦੋਸਸਲ੍ਲੇਨ ਵੇਦਨੂਪਗਂ. ਮੋਹਸਲ੍ਲੇਨ ਸਞ੍ਞੂਪਗਂ. ਦਿਟ੍ਠਿਸਲ੍ਲੇਨ ਨਨ੍ਦੂਪਸੇਚਨਂ ਸਙ੍ਖਾਰੂਪਗਂ ਵਿਞ੍ਞਾਣਂ ਤਿਟ੍ਠਤਿ.
ਚਤੂਹਿ ਵਿਞ੍ਞਾਣਟ੍ਠਿਤੀਹਿ ਚਤੁਬ੍ਬਿਧਂ ਅਗਤਿਂ ਗਚ੍ਛਨ੍ਤਿ ਛਨ੍ਦਾ ਦੋਸਾ ਭਯਾ ਮੋਹਾ. ਰਾਗੇਨ ਛਨ੍ਦਾ ਅਗਤਿਂ ਗਚ੍ਛਤਿ, ਦੋਸੇਨ ਦੋਸਾ ਅਗਤਿਂ ਗਚ੍ਛਤਿ, ਮੋਹੇਨ ਮੋਹਾ ਅਗਤਿਂ ਗਚ੍ਛਤਿ, ਦਿਟ੍ਠਿਯਾ ਭਯਾ ਅਗਤਿਂ ਗਚ੍ਛਤਿ, ਇਤਿ ਇਮਾਨਿ ਚ ਕਮ੍ਮਾਨਿ ਇਮੇ ਚ ਕਿਲੇਸਾ ਅਯਂ ਸਂਸਾਰਹੇਤੁ.
ਤਤ੍ਥਿਮਾ ਚਤਸ੍ਸੋ ਦਿਸਾ ਕਬਲ਼ੀਕਾਰੋ ਆਹਾਰੋ ‘‘ਅਸੁਭੇ ਸੁਭ’’ਨ੍ਤਿ ਵਿਪਲ੍ਲਾਸੋ ਕਾਮੁਪਾਦਾਨਂ ਕਾਮਯੋਗੋ ਅਭਿਜ੍ਝਾਕਾਯਗਨ੍ਥੋ ਕਾਮਾਸਵੋ ਕਾਮੋਘੋ ਰਾਗਸਲ੍ਲਂ ਰੂਪੂਪਗਾ ਵਿਞ੍ਞਾਣਟ੍ਠਿਤਿ ਛਨ੍ਦਾ ਅਗਤਿਗਮਨਂ, ਅਯਂ ਪਠਮਾ ਦਿਸਾ.
ਫਸ੍ਸੋ ਆਹਾਰੋ ‘‘ਦੁਕ੍ਖੇ ਸੁਖ’’ਨ੍ਤਿ ਵਿਪਲ੍ਲਾਸੋ ਸੀਲਬ੍ਬਤੁਪਾਦਾਨਂ ਭਵਯੋਗੋ ਬ੍ਯਾਪਾਦਕਾਯਗਨ੍ਥੋ ਭਵਾਸਵੋ ਭਵੋਘੋ ਦੋਸਸਲ੍ਲਂ ਵੇਦਨੂਪਗਾ ਵਿਞ੍ਞਾਣਟ੍ਠਿਤਿ ਦੋਸਾ ਅਗਤਿਗਮਨਂ, ਅਯਂ ਦੁਤਿਯਾ ਦਿਸਾ.
ਮਨੋਸਞ੍ਚੇਤਨਾਹਾਰੋ ‘‘ਅਨਤ੍ਤਨਿ ਅਤ੍ਤਾ’’ਤਿ ਵਿਪਲ੍ਲਾਸੋ ਦਿਟ੍ਠੁਪਾਦਾਨਂ ਦਿਟ੍ਠਿਯੋਗੋ ਪਰਾਮਾਸਕਾਯਗਨ੍ਥੋ ਦਿਟ੍ਠਾਸਵੋ ਦਿਟ੍ਠੋਘੋ ਦਿਟ੍ਠਿਸਲ੍ਲਂ ਸਞ੍ਞੂਪਗਾ ਵਿਞ੍ਞਾਣਟ੍ਠਿਤਿ ਭਯਾ ਅਗਤਿਗਮਨਂ, ਅਯਂ ਤਤਿਯਾ ਦਿਸਾ.
ਵਿਞ੍ਞਾਣਾਹਾਰੋ ‘‘ਅਨਿਚ੍ਚੇ ਨਿਚ੍ਚ’’ਨ੍ਤਿ ਵਿਪਲ੍ਲਾਸੋ ਅਤ੍ਤਵਾਦੁਪਾਦਾਨਂ ਅਵਿਜ੍ਜਾਯੋਗੋ ਇਦਂਸਚ੍ਚਾਭਿਨਿਵੇਸੋਕਾਯਗਨ੍ਥੋ ਅਵਿਜ੍ਜਾਸਵੋ ਅਵਿਜ੍ਜੋਘੋ ਮੋਹਸਲ੍ਲਂ ਸਙ੍ਖਾਰੂਪਗਾ ਵਿਞ੍ਞਾਣਟ੍ਠਿਤਿ ਮੋਹਾ ਅਗਤਿਗਮਨਂ, ਅਯਂ ਚਤੁਤ੍ਥੀ ਦਿਸਾ. ਇਤਿ ਇਮੇਸਂ ਦਸਨ੍ਨਂ ਸੁਤ੍ਤਾਨਂ ਪਠਮੇਨ ਪਦੇਨ ਪਠਮਾਯ ਦਿਸਾਯ ਆਲੋਕਨਂ, ਦੁਤਿਯੇਨ ਪਦੇਨ ਦੁਤਿਯਾਯ ਦਿਸਾਯ, ਤਤਿਯੇਨ ਪਦੇਨ ਤਤਿਯਾਯ ਦਿਸਾਯ, ਚਤੁਤ੍ਥੇਨ ਪਦੇਨ ਚਤੁਤ੍ਥਿਯਾ ਦਿਸਾਯ ਆਲੋਕਨਂ, ਅਯਂ ਵੁਚ੍ਚਤਿ ਦਿਸਾ ਆਲੋਕਨਾ. ਇਮਿਨਾ ਨਯੇਨ ਸਬ੍ਬੇ ਕਿਲੇਸਾ ਚਤੂਸੁ ਪਦੇਸੁ ਪਕ੍ਖਿਪਿਤਬ੍ਬਾ. ਅਯਂ ਅਕੁਸਲਪਕ੍ਖੋ.
ਚਤਸ੍ਸੋ ਪਟਿਪਦਾ, ਚਤ੍ਤਾਰਿ ਝਾਨਾਨਿ, ਚਤ੍ਤਾਰੋ ਸਤਿਪਟ੍ਠਾਨਾ, ਚਤ੍ਤਾਰੋ ਵਿਹਾਰਾ ਦਿਬ੍ਬੋ ਬ੍ਰਹ੍ਮਾ ਅਰਿਯੋ ਆਨੇਞ੍ਜੋ, ਚਤ੍ਤਾਰੋ ਸਮ੍ਮਪ੍ਪਧਾਨਾ, ਚਤ੍ਤਾਰੋ ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ, ਚਤ੍ਤਾਰੋ ਅਧਿਟ੍ਠਾਨਾ, ਚਤ੍ਤਾਰੋ ਸਮਾਧਯੋ ਛਨ੍ਦਸਮਾਧਿ ਵੀਰਿਯਸਮਾਧਿ ਚਿਤ੍ਤਸਮਾਧਿ ਵੀਮਂਸਾਸਮਾਧਿ, ਚਤ੍ਤਾਰੋ ਧਮ੍ਮਾ ਸੁਖਭਾਗਿਯਾ ਨਾਞ੍ਞਤ੍ਰ ਬੋਜ੍ਝਙ੍ਗਾ ਨਾਞ੍ਞਤ੍ਰ ਤਪਸਾ ਨਾਞ੍ਞਤ੍ਰ ਇਨ੍ਦ੍ਰਿਯਸਂਵਰਾ ਨਾਞ੍ਞਤ੍ਰ ਸਬ੍ਬਨਿਸ੍ਸਗ੍ਗਾ, ਚਤ੍ਤਾਰਿ ਅਪ੍ਪਮਾਣਾਨਿ.
ਤਤ੍ਥ ਦੁਕ੍ਖਾ ਪਟਿਪਦਾ ਦਨ੍ਧਾਭਿਞ੍ਞਾ ਭਾਵਿਯਮਾਨਾ ਬਹੁਲੀਕਰਿਯਮਾਨਾ ਪਠਮਂ ਝਾਨਂ ਪਰਿਪੂਰੇਤਿ, ਪਠਮਂ ਝਾਨਂ ਪਰਿਪੁਣ੍ਣਂ ਪਠਮਂ ਸਤਿਪਟ੍ਠਾਨਂ ਪਰਿਪੂਰੇਤਿ, ਪਠਮਂ ਸਤਿਪਟ੍ਠਾਨਂ ਪਰਿਪੁਣ੍ਣਂ ਪਠਮਂ ਵਿਹਾਰਂ ਪਰਿਪੂਰੇਤਿ, ਪਠਮੋ ਵਿਹਾਰੋ ਪਰਿਪੁਣ੍ਣੋ ਪਠਮਂ ਸਮ੍ਮਪ੍ਪਧਾਨਂ ਪਰਿਪੂਰੇਤਿ, ਪਠਮਂ ਸਮ੍ਮਪ੍ਪਧਾਨਂ ਪਰਿਪੁਣ੍ਣਂ ਪਠਮਂ ਅਚ੍ਛਰਿਯਂ ਅਬ੍ਭੁਤਂ ਧਮ੍ਮਂ ਪਰਿਪੂਰੇਤਿ, ਪਠਮੋ ਅਚ੍ਛਰਿਯੋ ਅਬ੍ਭੁਤੋ ਧਮ੍ਮੋ ਪਰਿਪੁਣ੍ਣੋ ਪਠਮਂ ਅਧਿਟ੍ਠਾਨਂ ਪਰਿਪੂਰੇਤਿ, ਪਠਮਂ ਅਧਿਟ੍ਠਾਨਂ ਪਰਿਪੁਣ੍ਣਂ ਛਨ੍ਦਸਮਾਧਿਂ ਪਰਿਪੂਰੇਤਿ, ਛਨ੍ਦਸਮਾਧਿ ਪਰਿਪੁਣ੍ਣੋ ਇਨ੍ਦ੍ਰਿਯਸਂਵਰਂ ਪਰਿਪੂਰੇਤਿ, ਇਨ੍ਦ੍ਰਿਯਸਂਵਰੋ ਪਰਿਪੁਣ੍ਣੋ ਪਠਮਂ ਅਪ੍ਪਮਾਣਂ ਪਰਿਪੂਰੇਤਿ. ਏਵਂ ਯਾਵ ਸਬ੍ਬਨਿਸ੍ਸਗ੍ਗਾ ਚਤੁਤ੍ਥਂ ਅਪ੍ਪਮਾਣਂ ਪਰਿਪੂਰੇਤਿ.
ਤਤ੍ਥ ਪਠਮਾ ਚ ਪਟਿਪਦਾ ਪਠਮਞ੍ਚ ਝਾਨਂ ਪਠਮਞ੍ਚ ਸਤਿਪਟ੍ਠਾਨਂ ਦਿਬ੍ਬੋ ਚ ਵਿਹਾਰੋ ਪਠਮਞ੍ਚ ਸਮ੍ਮਪ੍ਪਧਾਨਂ ਪਠਮੋ ਚ ਅਚ੍ਛਰਿਯੋ ਅਬ੍ਭੁਤੋ ਧਮ੍ਮੋ ਸਚ੍ਚਾਧਿਟ੍ਠਾਨਞ੍ਚ ਛਨ੍ਦਸਮਾਧਿ ਚ ਇਨ੍ਦ੍ਰਿਯਸਂਵਰੋ ਚ ਮੇਤ੍ਤਾ ਚ ਅਪ੍ਪਮਾਣਂ. ਅਯਂ ਪਠਮਾ ਦਿਸਾ.
ਦੁਤਿਯਾ ਚ ਪਟਿਪਦਾ ਖਿਪ੍ਪਾਭਿਞ੍ਞਾ ਦੁਤਿਯਞ੍ਚ ਝਾਨਂ ਦੁਤਿਯਞ੍ਚ ਸਤਿਪਟ੍ਠਾਨਂ ਬ੍ਰਹ੍ਮਾ ਚ ਵਿਹਾਰੋ ਦੁਤਿਯਞ੍ਚ ਸਮ੍ਮਪ੍ਪਧਾਨਂ ਦੁਤਿਯੋ ਚ ਅਚ੍ਛਰਿਯੋ ਅਬ੍ਭੁਤੋ ਧਮ੍ਮੋ ਚਾਗਾਧਿਟ੍ਠਾਨਞ੍ਚ ਚਿਤ੍ਤਸਮਾਧਿ ਚ ਤਪੋ ਚ ਕਰੁਣਾ ਚ ਅਪ੍ਪਮਾਣਂ. ਅਯਂ ਦੁਤਿਯਾ ਦਿਸਾ.
ਤਤਿਯਾ ਚ ਪਟਿਪਦਾ ਦਨ੍ਧਾਭਿਞ੍ਞਾ ਤਤਿਯਞ੍ਚ ਝਾਨਂ ਤਤਿਯਞ੍ਚ ਸਤਿਪਟ੍ਠਾਨਂ ਅਰਿਯੋ ਚ ਵਿਹਾਰੋ ਤਤਿਯਞ੍ਚ ਸਮ੍ਮਪ੍ਪਧਾਨਂ ਤਤਿਯੋ ਚ ਅਚ੍ਛਰਿਯੋ ਅਬ੍ਭੁਤੋ ਧਮ੍ਮੋ ਸਚ੍ਚਾਧਿਟ੍ਠਾਨਞ੍ਚ ਵੀਰਿਯਸਮਾਧਿ ਚ ਬੋਜ੍ਝਙ੍ਗਾ ਚ ਮੁਦਿਤਾ ਚ ਅਪ੍ਪਮਾਣਂ. ਅਯਂ ਤਤਿਯਾ ਦਿਸਾ.
ਚਤੁਤ੍ਥੀ ਚ ਪਟਿਪਦਾ ਖਿਪ੍ਪਾਭਿਞ੍ਞਾ ਚਤੁਤ੍ਥਞ੍ਚ ਝਾਨਂ ਚਤੁਤ੍ਥਞ੍ਚ ਸਤਿਪਟ੍ਠਾਨਂ ਆਨੇਞ੍ਜੋ ਚ ਵਿਹਾਰੋ ਚਤੁਤ੍ਥਞ੍ਚ ਸਮ੍ਮਪ੍ਪਧਾਨਂ ਚਤੁਤ੍ਥੋ ਚ ਅਚ੍ਛਰਿਯੋ ਅਬ੍ਭੁਤੋ ਧਮ੍ਮੋ ਉਪਸਮਾਧਿਟ੍ਠਾਨਞ੍ਚ ਵੀਮਂਸਾਸਮਾਧਿ ਚ ਸਬ੍ਬਨਿਸ੍ਸਗ੍ਗੋ ਚ ਉਪੇਕ੍ਖਾ ਚ ਅਪ੍ਪਮਾਣਂ. ਅਯਂ ਚਤੁਤ੍ਥੀ ਦਿਸਾ. ਇਮਾਸਂ ਚਤੁਨ੍ਨਂ ਦਿਸਾਨਂ ਯਾ ਆਲੋਕਨਾ, ਅਯਂ ਵੁਚ੍ਚਤਿ ਦਿਸਾਲੋਚਨੋ ਨਾਮ ਨਯੋ.
ਤਤ੍ਥਾਯਂ ਯੋਜਨਾ – ਚਤ੍ਤਾਰੋ ਚ ਆਹਾਰਾ, ਚਤਸ੍ਸੋ ਚ ਪਟਿਪਦਾ, ਚਤ੍ਤਾਰੋ ਚ ਵਿਪਲ੍ਲਾਸਾ, ਚਤ੍ਤਾਰੋ ਚ ਸਤਿਪਟ੍ਠਾਨਾ, ਚਤ੍ਤਾਰਿ ਚ ਉਪਾਦਾਨਾਨਿ, ਚਤ੍ਤਾਰਿ ਚ ਝਾਨਾਨਿ, ਚਤ੍ਤਾਰੋ ਚ ਯੋਗਾ, ਚਤ੍ਤਾਰੋ ਚ ਵਿਹਾਰਾ, ਚਤ੍ਤਾਰੋ ਚ ਗਨ੍ਥਾ, ਚਤ੍ਤਾਰੋ ਚ ਸਮ੍ਮਪ੍ਪਧਾਨਾ, ਚਤ੍ਤਾਰੋ ਚ ਆਸਵਾ, ਚਤ੍ਤਾਰੋ ਚ ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ, ਚਤ੍ਤਾਰੋ ਚ ਓਘਾ, ਚਤ੍ਤਾਰਿ ਚ ਅਧਿਟ੍ਠਾਨਾਨਿ, ਚਤ੍ਤਾਰਿ ਚ ਸਲ੍ਲਾਨਿ, ਚਤ੍ਤਾਰੋ ਚ ਸਮਾਧਯੋ, ਚਤਸ੍ਸੋ ਚ ਵਿਞ੍ਞਾਣਟ੍ਠਿਤਿਯੋ, ਚਤ੍ਤਾਰੋ ਚ ਸੁਖਭਾਗਿਯਾ ਧਮ੍ਮਾ, ਚਤ੍ਤਾਰਿ ਚ ਅਗਤਿਗਮਨਾਨਿ ਚਤ੍ਤਾਰਿ ਚ ਅਪ੍ਪਮਾਣਾਨਿ. ਇਤਿ ਕੁਸਲਾਕੁਸਲਾਨਂ ਪਕ੍ਖਪਟਿਪਕ੍ਖਵਸੇਨ ਯੋਜਨਾ. ਅਯਂ ਸੀਹਵਿਕ੍ਕੀਲ਼ਿਤੇ ਦਿਸਾਲੋਚਨੋ ਨਯੋ.
ਤਸ੍ਸ ਚਤ੍ਤਾਰਿ ਸਾਮਞ੍ਞਫਲਾਨਿ ਪਰਿਯੋਸਾਨਂ, ਤਤ੍ਥ ਪਠਮਾਯ ਦਿਸਾਯ ਸੋਤਾਪਤ੍ਤਿਫਲਂ ਪਰਿਯੋਸਾਨਂ, ਦੁਤਿਯਾਯ ਸਕਦਾਗਾਮਿਫਲਂ, ਤਤਿਯਾਯ ਅਨਾਗਾਮਿਫਲਂ, ਚਤੁਤ੍ਥਿਯਾ ਅਰਹਤ੍ਤਫਲਂ ਪਰਿਯੋਸਾਨਨ੍ਤਿ.
ਤਤ੍ਥ ਕਤਮੋ ਤਿਪੁਕ੍ਖਲਨਯੋ? ਪਟਿਪਦਾਵਿਭਾਗੇਨ ਚਤੂਸੁ ਪੁਗ੍ਗਲੇਸੁ ਯੋ ਸੁਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ, ਅਯਂ ਉਗ੍ਘਟਿਤਞ੍ਞੂ. ਯੋ ਸੁਖਾਯ ਵਾ ਪਟਿਪਦਾਯ, ਦਨ੍ਧਾਭਿਞ੍ਞਾਯ, ਦੁਕ੍ਖਾਯ ਵਾ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ, ਅਯਂ ਵਿਪਞ੍ਚਿਤਞ੍ਞੂ. ਯੋ ਦੁਕ੍ਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਨਿਯ੍ਯਾਤਿ, ਅਯਂ ਨੇਯ੍ਯੋ. ਇਤਿ ਚਤ੍ਤਾਰੋ ਹੁਤ੍ਵਾ ਤਯੋ ਹੋਨ੍ਤਿ. ਤਤ੍ਥ ਉਗ੍ਘਟਿਤਞ੍ਞੁਸ੍ਸ ਸਮਥਪੁਬ੍ਬਙ੍ਗਮਾ ਵਿਪਸ੍ਸਨਾ ਸਪ੍ਪਾਯਾ. ਨੇਯ੍ਯਸ੍ਸ ਵਿਪਸ੍ਸਨਾਪੁਬ੍ਬਙ੍ਗਮੋ ਸਮਥੋ, ਵਿਪਞ੍ਚਿਤਞ੍ਞੁਸ੍ਸ ਸਮਥਵਿਪਸ੍ਸਨਾ ਯੁਗਨਦ੍ਧਾ. ਉਗ੍ਘਟਿਤਞ੍ਞੁਸ੍ਸ ਮੁਦੁਕਾ ਦੇਸਨਾ, ਨੇਯ੍ਯਸ੍ਸ ਤਿਕ੍ਖਾ ਦੇਸਨਾ, ਵਿਪਞ੍ਚਿਤਞ੍ਞੁਸ੍ਸ ਤਿਕ੍ਖਮੁਦੁਕਾ ਦੇਸਨਾ.
ਉਗ੍ਘਟਿਤਞ੍ਞੁਸ੍ਸ ਅਧਿਪਞ੍ਞਾਸਿਕ੍ਖਾ, ਵਿਪਞ੍ਚਿਤਞ੍ਞੁਸ੍ਸ ਅਧਿਚਿਤ੍ਤਸਿਕ੍ਖਾ ਚ ਅਧਿਪਞ੍ਞਾਸਿਕ੍ਖਾ ਚ, ਨੇਯ੍ਯਸ੍ਸ ਅਧਿਸੀਲਸਿਕ੍ਖਾ ਚ ਅਧਿਚਿਤ੍ਤਸਿਕ੍ਖਾ ਚ ਅਧਿਪਞ੍ਞਾਸਿਕ੍ਖਾ ਚ. ਇਤਿ ਇਮੇਸਂ ਪੁਗ੍ਗਲਾਨਂ ਚਤੂਹਿ ਪਟਿਪਦਾਹਿ ਨਿਯ੍ਯਾਨਂ.
ਤਤ੍ਥਾਯਂ ਸਂਕਿਲੇਸਪਕ੍ਖੋ, ਤੀਣਿ ਅਕੁਸਲਮੂਲਾਨਿ, ਤਯੋ ਫਸ੍ਸਾ, ਤਿਸ੍ਸੋ ਵੇਦਨਾ, ਤਯੋ ਉਪਵਿਚਾਰਾ, ਤਯੋ ਕਿਲੇਸਾ, ਤਯੋ ਵਿਤਕ੍ਕਾ, ਤਯੋ ਪਰਿਲ਼ਾਹਾ, ਤੀਣਿ ਸਙ੍ਖਤਲਕ੍ਖਣਾਨਿ, ਤਿਸ੍ਸੋ ਦੁਕ੍ਖਤਾ.
ਤੀਣਿ ਅਕੁਸਲਮੂਲਾਨੀਤਿ ਲੋਭੋ ਅਕੁਸਲਮੂਲਂ, ਦੋਸੋ ਅਕੁਸਲਮੂਲਂ, ਮੋਹੋ ਅਕੁਸਲਮੂਲਂ. ਤਯੋ ਫਸ੍ਸਾਤਿ ਸੁਖਵੇਦਨੀਯੋ ਫਸ੍ਸੋ, ਦੁਕ੍ਖਵੇਦਨੀਯੋ ਫਸ੍ਸੋ, ਅਦੁਕ੍ਖਮਸੁਖਵੇਦਨੀਯੋ ਫਸ੍ਸੋ. ਤਿਸ੍ਸੋ ਵੇਦਨਾਤਿ ਸੁਖਾ ਵੇਦਨਾ, ਦੁਕ੍ਖਾ ਵੇਦਨਾ, ਅਦੁਕ੍ਖਮਸੁਖਾ ਵੇਦਨਾ. ਤਯੋ ਉਪਵਿਚਾਰਾਤਿ ਸੋਮਨਸ੍ਸੂਪਵਿਚਾਰੋ, ਦੋਮਨਸ੍ਸੂਪਵਿਚਾਰੋ, ਉਪੇਕ੍ਖੂਪਵਿਚਾਰੋ. ਤਯੋ ਕਿਲੇਸਾਤਿ ਲੋਭੋ, ਦੋਸੋ, ਮੋਹੋ. ਤਯੋ ਵਿਤਕ੍ਕਾਤਿ ਕਾਮਵਿਤਕ੍ਕੋ, ਬ੍ਯਾਪਾਦਵਿਤਕ੍ਕੋ, ਵਿਹਿਂਸਾਵਿਤਕ੍ਕੋ. ਤਯੋ ਪਰਿਲ਼ਾਹਾਤਿ ਰਾਗਜੋ, ਦੋਸਜੋ, ਮੋਹਜੋ. ਤੀਣਿ ਸਙ੍ਖਤਲਕ੍ਖਣਾਨੀਤਿ ਉਪ੍ਪਾਦੋ, ਠਿਤਿ, ਵਯੋ. ਤਿਸ੍ਸੋ ਦੁਕ੍ਖਤਾਤਿ ਦੁਕ੍ਖਦੁਕ੍ਖਤਾ, ਵਿਪਰਿਣਾਮਦੁਕ੍ਖਤਾ, ਸਙ੍ਖਾਰਦੁਕ੍ਖਤਾ.
ਤਤ੍ਥ ਲੋਭੋ ਅਕੁਸਲਮੂਲਂ ਮਨਾਪਿਕੇਨ ਆਰਮ੍ਮਣੇਨ ਸਮੁਟ੍ਠਹਤਿ. ਤਦੇਵ ਮਨਾਪਿਕਾਰਮ੍ਮਣਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਵੇਦਨੀਯੋ ਫਸ੍ਸੋ, ਸੁਖਵੇਦਨੀਯਂ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਾ ਵੇਦਨਾ, ਸੁਖਂ ਵੇਦਨਂ ਪਟਿਚ੍ਚ ਉਪ੍ਪਜ੍ਜਤਿ ਸੋਮਨਸ੍ਸੂਪਵਿਚਾਰੋ, ਸੋਮਨਸ੍ਸੂਪਵਿਚਾਰਂ ਪਟਿਚ੍ਚ ਉਪ੍ਪਜ੍ਜਤਿ ਰਾਗੋ, ਰਾਗਂ ਪਟਿਚ੍ਚ ਉਪ੍ਪਜ੍ਜਤਿ ਕਾਮਵਿਤਕ੍ਕੋ, ਕਾਮਵਿਤਕ੍ਕਂ ਪਟਿਚ੍ਚ ਉਪ੍ਪਜ੍ਜਤਿ ਰਾਗਜੋ ਪਰਿਲ਼ਾਹੋ, ਰਾਗਜਂ ਪਰਿਲ਼ਾਹਂ ਪਟਿਚ੍ਚ ਉਪ੍ਪਜ੍ਜਤਿ ਉਪ੍ਪਾਦੋ ਸਙ੍ਖਤਲਕ੍ਖਣਂ, ਉਪ੍ਪਾਦਂ ਸਙ੍ਖਤਲਕ੍ਖਣਂ ਪਟਿਚ੍ਚ ਉਪ੍ਪਜ੍ਜਤਿ ਵਿਪਰਿਣਾਮਦੁਕ੍ਖਤਾ.
ਦੋਸੋ ਅਕੁਸਲਮੂਲਂ ਅਮਨਾਪਿਕੇਨ ਆਰਮ੍ਮਣੇਨ ਸਮੁਟ੍ਠਹਤਿ. ਤਦੇਵ ਅਮਨਾਪਿਕਾਰਮ੍ਮਣਂ ਪਟਿਚ੍ਚ ਉਪ੍ਪਜ੍ਜਤਿ ਦੁਕ੍ਖਵੇਦਨੀਯੋ ਫਸ੍ਸੋ, ਦੁਕ੍ਖਵੇਦਨੀਯਂ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਦੁਕ੍ਖਾ ਵੇਦਨਾ, ਦੁਕ੍ਖਂ ਵੇਦਨਂ ਪਟਿਚ੍ਚ ਉਪ੍ਪਜ੍ਜਤਿ ਦੋਮਨਸ੍ਸੂਪਵਿਚਾਰੋ, ਦੋਮਨਸ੍ਸੂਪਵਿਚਾਰਂ ਪਟਿਚ੍ਚ ਉਪ੍ਪਜ੍ਜਤਿ ਦੋਸੋ, ਦੋਸਂ ਪਟਿਚ੍ਚ ਉਪ੍ਪਜ੍ਜਤਿ ਬ੍ਯਾਪਾਦਵਿਤਕ੍ਕੋ, ਬ੍ਯਾਪਾਦਵਿਤਕ੍ਕਂ ਪਟਿਚ੍ਚ ਉਪ੍ਪਜ੍ਜਤਿ ਦੋਸਜੋ ਪਰਿਲ਼ਾਹੋ, ਦੋਸਜਂ ਪਰਿਲ਼ਾਹਂ ਪਟਿਚ੍ਚ ਉਪ੍ਪਜ੍ਜਤਿ ਠਿਤਸ੍ਸ ਅਞ੍ਞਥਤ੍ਤਂ ਸਙ੍ਖਤਲਕ੍ਖਣਂ, ਠਿਤਸ੍ਸ ਅਞ੍ਞਥਤ੍ਤਂ ਸਙ੍ਖਤਲਕ੍ਖਣਂ ਪਟਿਚ੍ਚ ਉਪ੍ਪਜ੍ਜਤਿ ਦੁਕ੍ਖਦੁਕ੍ਖਤਾ.
ਮੋਹੋ ਅਕੁਸਲਮੂਲਂ ਉਪੇਕ੍ਖਾਠਾਨਿਯਂ ਆਰਮ੍ਮਣੇਨ ਸਮੁਟ੍ਠਹਤਿ. ਤਦੇਵ ਉਪੇਕ੍ਖਾਠਾਨਿਯਂ ਆਰਮ੍ਮਣਂ ਪਟਿਚ੍ਚ ਉਪ੍ਪਜ੍ਜਤਿ ਅਦੁਕ੍ਖਮਸੁਖਵੇਦਨੀਯੋ ਫਸ੍ਸੋ, ਅਦੁਕ੍ਖਮਸੁਖਵੇਦਨੀਯਂ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਅਦੁਕ੍ਖਮਸੁਖਾ ਵੇਦਨਾ, ਅਦੁਕ੍ਖਮਸੁਖਂ ਵੇਦਨਂ ਪਟਿਚ੍ਚ ਉਪ੍ਪਜ੍ਜਤਿ ਉਪੇਕ੍ਖੂਪਵਿਚਾਰੋ, ਉਪੇਕ੍ਖੂਪਵਿਚਾਰਂ ਪਟਿਚ੍ਚ ਉਪ੍ਪਜ੍ਜਤਿ ਮੋਹੋ, ਮੋਹਂ ਪਟਿਚ੍ਚ ਉਪ੍ਪਜ੍ਜਤਿ ਵਿਹਿਂਸਾਵਿਤਕ੍ਕੋ, ਵਿਹਿਂਸਾਵਿਤਕ੍ਕਂ ਪਟਿਚ੍ਚ ਉਪ੍ਪਜ੍ਜਤਿ ਮੋਹਜੋ ਪਰਿਲ਼ਾਹੋ, ਮੋਹਜਂ ਪਰਿਲ਼ਾਹਂ ਪਟਿਚ੍ਚ ਉਪ੍ਪਜ੍ਜਤਿ ਵਯੋ ਸਙ੍ਖਤਲਕ੍ਖਣਂ, ਵਯਂ ਸਙ੍ਖਤਲਕ੍ਖਣਂ ਪਟਿਚ੍ਚ ਉਪ੍ਪਜ੍ਜਤਿ ਸਙ੍ਖਾਰਦੁਕ੍ਖਤਾ. ਇਤਿ ਅਯਂ ਤੀਹਿ ਆਕਾਰੇਹਿ ਕਿਲੇਸਾਨਂ ਨਿਦ੍ਦੇਸੋ. ਯੋ ਕੋਚਿ ਅਕੁਸਲਪਕ੍ਖੋ, ਸਬ੍ਬੋ ਸੋ ਤੀਸੁ ਅਕੁਸਲਮੂਲੇਸੁ ਸਮੋਸਰਤੀਤਿ.
ਤਤ੍ਥ ਕਤਮੋ ਕੁਸਲਪਕ੍ਖੋ? ਤੀਣਿ ਕੁਸਲਮੂਲਾਨਿ ਅਲੋਭੋ, ਅਦੋਸੋ, ਅਮੋਹੋ. ਤਿਸ੍ਸੋ ਪਞ੍ਞਾ ਸੁਤਮਯੀ, ਚਿਨ੍ਤਾਮਯੀ, ਭਾਵਨਾਮਯੀ. ਤਯੋ ਸਮਾਧੀ ਸਵਿਤਕ੍ਕਸਵਿਚਾਰੋ, ਅਵਿਤਕ੍ਕਵਿਚਾਰਮਤ੍ਤੋ, ਅਵਿਤਕ੍ਕਅਵਿਚਾਰੋ. ਤਿਸ੍ਸੋ ਸਿਕ੍ਖਾ ਅਧਿਸੀਲਸਿਕ੍ਖਾ, ਅਧਿਚਿਤ੍ਤਸਿਕ੍ਖਾ, ਅਧਿਪਞ੍ਞਾਸਿਕ੍ਖਾ. ਤੀਣਿ ਨਿਮਿਤ੍ਤਾਨਿ ਸਮਥਨਿਮਿਤ੍ਤਂ, ਪਗ੍ਗਹਨਿਮਿਤ੍ਤਂ, ਉਪੇਕ੍ਖਾਨਿਮਿਤ੍ਤਂ. ਤਯੋ ਵਿਤਕ੍ਕਾ ਨੇਕ੍ਖਮ੍ਮਵਿਤਕ੍ਕੋ, ਅਬ੍ਯਾਪਾਦਵਿਤਕ੍ਕੋ, ਅਵਿਹਿਂਸਾਵਿਤਕ੍ਕੋ. ਤੀਣਿ ਇਨ੍ਦ੍ਰਿਯਾਨਿ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ, ਅਞ੍ਞਿਨ੍ਦ੍ਰਿਯਂ, ਅਞ੍ਞਾਤਾਵਿਨ੍ਦ੍ਰਿਯਂ. ਤਯੋ ਉਪਵਿਚਾਰਾ ਨੇਕ੍ਖਮ੍ਮੂਪਵਿਚਾਰੋ, ਅਬ੍ਯਾਪਾਦੂਪਵਿਚਾਰੋ, ਅਵਿਹਿਂਸੂਪਵਿਚਾਰੋ ਤਿਸ੍ਸੋ ਏਸਨਾ ਕਾਮੇਸਨਾ, ਭਵੇਸਨਾ, ਬ੍ਰਹ੍ਮਚਰਿਯੇਸਨਾ. ਤਯੋ ਖਨ੍ਧਾ ਸੀਲਕ੍ਖਨ੍ਧੋ, ਸਮਾਧਿਕ੍ਖਨ੍ਧੋ, ਪਞ੍ਞਾਕ੍ਖਨ੍ਧੋ.
ਤਤ੍ਥ ਅਲੋਭੋ ਕੁਸਲਮੂਲਂ ਸੁਤਮਯਿਪਞ੍ਞਂ ਪਰਿਪੂਰੇਤਿ. ਸੁਤਮਯਿ ਪਞ੍ਞਾ ਪਰਿਪੁਣ੍ਣਾ ਸਵਿਤਕ੍ਕਸਵਿਚਾਰਂ ਸਮਾਧਿਂ ਪਰਿਪੂਰੇਤਿ, ਸਵਿਤਕ੍ਕਸਵਿਚਾਰੋ ਸਮਾਧਿ ਪਰਿਪੁਣ੍ਣੋ ਅਧਿਸੀਲਸਿਕ੍ਖਂ ਪਰਿਪੂਰੇਤਿ, ਅਧਿਸੀਲਸਿਕ੍ਖਾ ਪਰਿਪੁਣ੍ਣਾ ਸਮਥਨਿਮਿਤ੍ਤਂ ਪਰਿਪੂਰੇਤਿ, ਸਮਥਨਿਮਿਤ੍ਤਂ ਪਰਿਪੁਣ੍ਣਂ ਨੇਕ੍ਖਮ੍ਮਵਿਤਕ੍ਕਂ ਪਰਿਪੂਰੇਤਿ, ਨੇਕ੍ਖਮ੍ਮਵਿਤਕ੍ਕੋ ਪਰਿਪੁਣ੍ਣੋ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਪਰਿਪੂਰੇਤਿ, ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਪਰਿਪੁਣ੍ਣਂ ਨੇਕ੍ਖਮ੍ਮਸਿਤੂਪਵਿਚਾਰਂ ਪਰਿਪੂਰੇਤਿ, ਨੇਕ੍ਖਮ੍ਮੂਪਵਿਚਾਰਂ ਪਰਿਪੁਣ੍ਣੋ ਕਾਮੇਸਨਂ ਪਜਹਤਿ. ਕਾਮੇਸਨਪ੍ਪਹਾਨਂ ਸੀਲਕ੍ਖਨ੍ਧਂ ਪਰਿਪੂਰੇਤਿ.
ਅਦੋਸੋ ਕੁਸਲਮੂਲਂ ਚਿਨ੍ਤਾਮਯਿਪਞ੍ਞਂ ਪਰਿਪੂਰੇਤਿ, ਚਿਨ੍ਤਾਮਯਿਪਞ੍ਞਾ ਪਰਿਪੁਣ੍ਣਾ ਅਵਿਤਕ੍ਕਵਿਚਾਰਮਤ੍ਤਂ ਸਮਾਧਿਂ ਪਰਿਪੂਰੇਤਿ, ਅਵਿਤਕ੍ਕਵਿਚਾਰਮਤ੍ਤੋ ਸਮਾਧਿ ਪਰਿਪੁਣ੍ਣੋ ਅਧਿਚਿਤ੍ਤਸਿਕ੍ਖਂ ਪਰਿਪੂਰੇਤਿ, ਅਧਿਚਿਤ੍ਤਸਿਕ੍ਖਾ ਪਰਿਪੁਣ੍ਣਾ ਉਪੇਕ੍ਖਾਨਿਮਿਤ੍ਤਂ ਪਰਿਪੂਰੇਤਿ, ਉਪੇਕ੍ਖਾਨਿਮਿਤ੍ਤਂ ਪਰਿਪੁਣ੍ਣਂ ਅਬ੍ਯਾਪਾਦਵਿਤਕ੍ਕਂ ਪਰਿਪੂਰੇਤਿ, ਅਬ੍ਯਾਪਾਦਵਿਤਕ੍ਕੋ ਪਰਿਪੁਣ੍ਣੋ ਅਞ੍ਞਿਨ੍ਦ੍ਰਿਯਂ ਪਰਿਪੂਰੇਤਿ, ਅਞ੍ਞਿਨ੍ਦ੍ਰਿਯਂ ਪਰਿਪੁਣ੍ਣਂ ਅਬ੍ਯਾਪਾਦੂਪਵਿਚਾਰਂ ਪਰਿਪੂਰੇਤਿ, ਅਬ੍ਯਾਪਾਦੂਪਵਿਚਾਰੋ ਪਰਿਪੁਣ੍ਣੋ ਭਵੇਸਨਂ ਪਜਹਤਿ, ਭਵੇਸਨਪ੍ਪਹਾਨਂ ਸਮਾਧਿਕ੍ਖਨ੍ਧਂ ਪਰਿਪੂਰੇਤਿ.
ਅਮੋਹੋ ਕੁਸਲਮੂਲਂ ਭਾਵਨਾਮਯਿਪਞ੍ਞਂ ਪਰਿਪੂਰੇਤਿ, ਭਾਵਨਾਮਯਿਪਞ੍ਞਾ ਪਰਿਪੁਣ੍ਣਾ ਅਵਿਤਕ੍ਕਅਵਿਚਾਰਂ ਸਮਾਧਿਂ ਪਰਿਪੂਰੇਤਿ, ਅਵਿਤਕ੍ਕਅਵਿਚਾਰੋ ਸਮਾਧਿ ਪਰਿਪੁਣ੍ਣੋ ਅਧਿਪਞ੍ਞਾਸਿਕ੍ਖਂ ਪਰਿਪੂਰੇਤਿ, ਅਧਿਪਞ੍ਞਾਸਿਕ੍ਖਾ ਪਰਿਪੁਣ੍ਣਾ ਪਗ੍ਗਹਨਿਮਿਤ੍ਤਂ ਪਰਿਪੂਰੇਤਿ, ਪਗ੍ਗਹਨਿਮਿਤ੍ਤਂ ਪਰਿਪੁਣ੍ਣਂ ਅਵਿਹਿਂਸਾਵਿਤਕ੍ਕਂ ਪਰਿਪੂਰੇਤਿ, ਅਵਿਹਿਂਸਾਵਿਤਕ੍ਕੋ ਪਰਿਪੁਣ੍ਣੋ ਅਞ੍ਞਾਤਾਵਿਨ੍ਦ੍ਰਿਯਂ ਪਰਿਪੂਰੇਤਿ, ਅਞ੍ਞਾਤਾਵਿਨ੍ਦ੍ਰਿਯਂ ਪਰਿਪੁਣ੍ਣਂ ਅਵਿਹਿਂਸੂਪਵਿਚਾਰਂ ਪਰਿਪੂਰੇਤਿ, ਅਵਿਹਿਂਸੂਪਵਿਚਾਰੋ ਪਰਿਪੁਣ੍ਣੋ ਬ੍ਰਹ੍ਮਚਰਿਯੇਸਨਂ ਪਰਿਪੂਰੇਤਿ, ਬ੍ਰਹ੍ਮਚਰਿਯੇਸਨਾ ਪਰਿਪੁਣ੍ਣਾ ਪਞ੍ਞਾਕ੍ਖਨ੍ਧਂ ਪਰਿਪੂਰੇਤਿ.
ਇਤਿ ਇਮੇ ਤਯੋ ਧਮ੍ਮਾ ਅਕੁਸਲਪਕ੍ਖਿਕਾ ਕੁਸਲਪਕ੍ਖਿਕਾ ਚ ਤਿਕਨਿਦ੍ਦੇਸੇਹਿ ਨਿਦ੍ਦਿਟ੍ਠਾ ਤਿਪੁਕ੍ਖਲਨਯਸ੍ਸ ਦਿਸਾ ਨਾਮ. ਤਸ੍ਸ ਪਰਿਯੋਸਾਨਂ ਤਯੋ ਵਿਮੋਕ੍ਖਾ ਅਪ੍ਪਣਿਹਿਤੋ ਸੁਞ੍ਞਤੋ ਅਨਿਮਿਤ੍ਤੋ, ਅਯਂ ਤਿਪੁਕ੍ਖਲੋ ਨਾਮ ਦੁਤਿਯੋ ਨਯੋ.
ਤਤ੍ਥ ਯੇ ਇਮੇ ਤਯੋ ਪੁਗ੍ਗਲਾ ਉਗ੍ਘਟਿਤਞ੍ਞੂ ਵਿਪਞ੍ਚਿਤਞ੍ਞੂ ਨੇਯ੍ਯੋਤਿ ਇਮੇਸਂ ਤਿਣ੍ਣਂ ਪੁਗ੍ਗਲਾਨਂ ਦ੍ਵੇ ਪੁਗ੍ਗਲਾ ਸੁਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ, ਸੁਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਚ ਨਿਯ੍ਯਨ੍ਤਿ, ਦ੍ਵੇਯੇਵ ਪੁਗ੍ਗਲਾ ਦੁਕ੍ਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ, ਦੁਕ੍ਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਚ ਨਿਯ੍ਯਨ੍ਤਿ, ਇਮੇ ਚਤ੍ਤਾਰੋ. ਤੇ ਵਿਸੇਸੇਨ ਦ੍ਵੇ ਹੋਨ੍ਤਿ ਦਿਟ੍ਠਿਚਰਿਤੋ ਚ ਤਣ੍ਹਾਚਰਿਤੋ ਚ. ਇਮੇ ਚਤ੍ਤਾਰੋ ਹੁਤ੍ਵਾ ਤਯੋ ਹੋਨ੍ਤਿ, ਤਯੋ ਹੁਤ੍ਵਾ ਦ੍ਵੇ ਹੋਨ੍ਤਿ. ਇਮੇਸਂ ਦ੍ਵਿਨ੍ਨਂ ਪੁਗ੍ਗਲਾਨਂ ਅਯਂ ਸਂਕਿਲੇਸੋ – ਅਵਿਜ੍ਜਾ ਚ ਤਣ੍ਹਾ ਚ ਅਹਿਰੀਕਞ੍ਚ ਅਨੋਤ੍ਤਪ੍ਪਞ੍ਚ ਅਸਤਿ ਚ ਅਸਮ੍ਪਜਞ੍ਞਞ੍ਚ ਨੀਵਰਣਾਨਿ ਚ ਸਂਯੋਜਨਾਨਿ ਚ ਅਜ੍ਝੋਸਾਨਞ੍ਚ ਅਭਿਨਿਵੇਸੋ ਚ ਅਹਂਕਾਰੋ ਚ ਮਮਂਕਾਰੋ ਚ ਅਸ੍ਸਦ੍ਧਿਯਞ੍ਚ ਦੋਵਚਸ੍ਸਤਾ ਚ ਕੋਸਜ੍ਜਞ੍ਚ ਅਯੋਨਿਸੋਮਨਸਿਕਾਰੋ ਚ ਵਿਚਿਕਿਚ੍ਛਾ ਚ ਅਵਿਜ੍ਜਾ ਚ ਅਸਦ੍ਧਮ੍ਮਸ੍ਸਵਨਞ੍ਚ ਅਸਮਾਪਤ੍ਤਿ ਚ.
ਤਤ੍ਥ ਅਵਿਜ੍ਜਾ ਚ ਅਹਿਰੀਕਞ੍ਚ ਅਸਤਿ ਚ ਨੀਵਰਣਾਨਿ ਚ ਅਜ੍ਝੋਸਾਨਞ੍ਚ ਅਹਂਕਾਰੋ ਚ ਅਸ੍ਸਦ੍ਧਿਯਞ੍ਚ ਕੋਸਜ੍ਜਞ੍ਚ ਵਿਚਿਕਿਚ੍ਛਾ ਚ ਅਸਦ੍ਧਮ੍ਮਸ੍ਸਵਨਞ੍ਚ, ਅਯਂ ਏਕਾ ਦਿਸਾ.
ਤਣ੍ਹਾ ਚ ਅਨੋਤ੍ਤਪ੍ਪਞ੍ਚ ਅਸਮ੍ਪਜਞ੍ਞਞ੍ਚ ਸਂਯੋਜਨਾਨਿ ਚ ਅਭਿਨਿਵੇਸੋ ਚ ਮਮਂਕਾਰੋ ਚ ਦੋਵਚਸ੍ਸਤਾ ਚ ਅਯੋਨਿਸੋਮਨਸਿਕਾਰੋ ਚ ਅਵਿਜ੍ਜਾ ਚ ਅਸਮਾਪਤ੍ਤਿ ਚ, ਅਯਂ ਦੁਤਿਯਾ ਦਿਸਾ. ਦਸਨ੍ਨਂ ਦੁਕਾਨਂ ਦਸ ਪਦਾਨਿ ਪਠਮਾ ਦਿਸਾਤਿ ਕਾਤਬ੍ਬਾਨਿ. ਸਂਖਿਤ੍ਤੇਨ ਅਤ੍ਥਂ ਞਾਪੇਨ੍ਤਿ ਪਟਿਪਕ੍ਖੇ ਕਣ੍ਹਪਕ੍ਖਸ੍ਸ ਦਸਨ੍ਨਂ ਦੁਕਾਨਂ ਦਸ ਪਦਾਨਿ ਦੁਤਿਯਕਾਨਿ, ਅਯਂ ਦੁਤਿਯਾ ਦਿਸਾ.
ਤਤ੍ਥ ਕਤਮੋ ਕੁਸਲਪਕ੍ਖੋ? ਸਮਥੋ ਚ ਵਿਪਸ੍ਸਨਾ ਚ ਵਿਜ੍ਜਾ ਚ ਚਰਣਞ੍ਚ ਸਤਿ ਚ ਸਮ੍ਪਜਞ੍ਞਞ੍ਚ ਹਿਰੀ ਚ ਓਤ੍ਤਪ੍ਪਞ੍ਚ ਅਹਂਕਾਰਪ੍ਪਹਾਨਞ੍ਚ ਮਮਂਕਾਰਪ੍ਪਹਾਨਞ੍ਚ ਸਮ੍ਮਾਵਾਯਾਮੋ ਚ ਯੋਨਿਸੋਮਨਸਿਕਾਰੋ ਚ ਸਮ੍ਮਾਸਤਿ ਚ ਸਮ੍ਮਾਸਮਾਧਿ ਚ ਪਞ੍ਞਾ ਚ ਨਿਬ੍ਬਿਦਾ ਚ ਸਮਾਪਤ੍ਤਿ ਚ ਸਦ੍ਧਮ੍ਮਸ੍ਸਵਨਞ੍ਚ ਸੋਮਨਸ੍ਸਞ੍ਚ ਧਮ੍ਮਾਨੁਧਮ੍ਮਪਟਿਪਤ੍ਤਿ ਚ.
ਦਸਨ੍ਨਂ ਦੁਕਾਨਂ ਸਮਥਾਦੀਨਿ ਸੋਮਨਸ੍ਸਪਰਿਯੋਸਾਨਾਨਿ ਪਠਮਾਨਿ ਦਸ ਪਦਾਨਿ ਪਠਮਾ ਦਿਸਾ, ਵਿਪਸ੍ਸਨਾਦੀਨਿ ਧਮ੍ਮਾਨੁਧਮ੍ਮਪਟਿਪਤ੍ਤਿਪਰਿਯੋਸਾਨਾਨਿ ਦੁਤਿਯਾਨਿ ਦਸ ਪਦਾਨਿ ਦੁਤਿਯਾ ਦਿਸਾ. ਇਤਿ ਅਕੁਸਲਪਕ੍ਖੇ ਕੁਸਲਪਕ੍ਖੇ ਚ ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਚਤਸ੍ਸੋ ਦਿਸਾ.
ਤਾਸੁ ਕੁਸਲਪਕ੍ਖੇ ਸਮਥਾਦੀਹਿ ਅਕੁਸਲਪਕ੍ਖੇ ਤਣ੍ਹਾਦਯੋ ਪਹਾਨਂ ਗਚ੍ਛਨ੍ਤਿ, ਤੇਸਂ ਪਹਾਨਾ ਰਾਗਵਿਰਾਗਾ ਚੇਤੋਵਿਮੁਤ੍ਤਿ, ਕੁਸਲਪਕ੍ਖੇ ਵਿਪਸ੍ਸਨਾਦੀਹਿ ਅਕੁਸਲਪਕ੍ਖੇ ਅਵਿਜ੍ਜਾਦਯੋ ਪਹਾਨਂ ਗਚ੍ਛਨ੍ਤਿ, ਤੇਸਂ ਪਹਾਨਾ ਅਵਿਜ੍ਜਾਵਿਰਾਗਾ ਪਞ੍ਞਾਵਿਮੁਤ੍ਤਿ. ਇਤਿ ਇਮਾ ਦ੍ਵੇ ਵਿਮੁਤ੍ਤਿਯੋ ਨਨ੍ਦਿਯਾਵਟ੍ਟਨਯੇ ਪਰਿਯੋਸਾਨਂ.
ਤਤ੍ਥ ਤਣ੍ਹਾ ਅਵਿਜ੍ਜਾ ਸਮਥੋ ਵਿਪਸ੍ਸਨਾਤਿ ਚਤ੍ਤਾਰਿ ਪਦਾਨਿ, ਤੇਸੁ ਅਟ੍ਠਾਰਸ ਮੂਲਪਦਾਨਿ ਸਮੋਸਰਨ੍ਤਿ. ਕਥਂ? ਸਮਥੋ ਚ ਅਲੋਭੋ ਚ ਅਦੋਸੋ ਚ ਅਸੁਭਸਞ੍ਞਾ ਚ ਦੁਕ੍ਖਸਞ੍ਞਾ ਚਾਤਿ ਇਮਾਨਿ ਪਞ੍ਚ ਪਦਾਨਿ ਸਮਥਂ ਭਜਨ੍ਤਿ, ਵਿਪਸ੍ਸਨਾ ਚ ਅਮੋਹੋ ਚ ਅਨਿਚ੍ਚਸਞ੍ਞਾ ਚ ਅਨਤ੍ਤਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਵਿਪਸ੍ਸਨਂ ਭਜਨ੍ਤਿ. ਏਵਂ ਨਵ ਪਦਾਨਿ ਕੁਸਲਾਨਿ ਦ੍ਵੀਸੁ ਪਦੇਸੁ ਸਮੋਸਰਨ੍ਤਿ. ਤਣ੍ਹਾ ਚ ਲੋਭੋ ਚ ਦੋਸੋ ਚ ਸੁਭਸਞ੍ਞਾ ਚ ਸੁਖਸਞ੍ਞਾ ਚਾਤਿ ਇਮਾਨਿ ਪਞ੍ਚ ਪਦਾਨਿ ਤਣ੍ਹਂ ਭਜਨ੍ਤਿ, ਅਵਿਜ੍ਜਾ ਚ ਮੋਹੋ ਚ ਨਿਚ੍ਚਸਞ੍ਞਾ ਚ ਅਤ੍ਤਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਅਵਿਜ੍ਜਂ ਭਜਨ੍ਤਿ. ਏਵਂ ਨਵ ਪਦਾਨਿ ਅਕੁਸਲਾਨਿ ਦ੍ਵੀਸੁ ਪਦੇਸੁ ਸਮੋਸਰਨ੍ਤਿ. ਇਤਿ ਤਿਪੁਕ੍ਖਲੋ ਚ ਸੀਹਵਿਕ੍ਕੀਲ਼ਿਤੋ ਚ ਨਨ੍ਦਿਯਾਵਟ੍ਟਨਯਂ ਅਨੁਪ੍ਪਵਿਸਨ੍ਤਿ.
ਕਥਂ ਤਿਪੁਕ੍ਖਲੇ ਨਯੇ ਇਤਰੇ ਦ੍ਵੇ ਨਯਾ ਅਨੁਪ੍ਪਵਿਸਨ੍ਤਿ? ਵਿਪਸ੍ਸਨਾ ਚ ਅਮੋਹੋ ਚ ਅਨਿਚ੍ਚਸਞ੍ਞਾ ਚ ਅਨਤ੍ਤਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਅਮੋਹੋ, ਸਮਥੋ ਚ ਅਲੋਭੋ ਚ ਅਸੁਭਸਞ੍ਞਾ ਚ ਦੁਕ੍ਖਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਅਲੋਭੋ, ਅਦੋਸੋ ਅਦੋਸੋ ਏਵ. ਏਵਂ ਨਵ ਪਦਾਨਿ ਕੁਸਲਾਨਿ ਤੀਸੁ ਪਦੇਸੁ ਸਮੋਸਰਨ੍ਤਿ. ਤਣ੍ਹਾ ਚ ਲੋਭੋ ਚ ਸੁਭਸਞ੍ਞਾ ਚ ਸੁਖਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਲੋਭੋ, ਅਵਿਜ੍ਜਾ ਚ ਮੋਹੋ ਚ ਨਿਚ੍ਚਸਞ੍ਞਾ ਚ ਅਤ੍ਤਸਞ੍ਞਾ ਚਾਤਿ ਇਮਾਨਿ ਚਤ੍ਤਾਰਿ ਪਦਾਨਿ ਮੋਹੋ, ਦੋਸੋ ਦੋਸੋ ਏਵ. ਏਵਂ ਨਵ ਪਦਾਨਿ ਅਕੁਸਲਾਨਿ ਤੀਸੁ ਪਦੇਸੁ ਸਮੋਸਰਨ੍ਤਿ. ਇਤਿ ਤਿਪੁਕ੍ਖਲੇ ਨਯੇ ਇਤਰੇ ਦ੍ਵੇ ਨਯਾ ਅਨੁਪ੍ਪਵਿਸਨ੍ਤਿ.
ਕਥਂ ਚਤੂਸੁ ਪਦੇਸੁ ਅਟ੍ਠਾਰਸ ਮੂਲਪਦਾਨਿ ਸਮੋਸਰਨ੍ਤਿ? ਤਣ੍ਹਾ ਚ ਸੁਭਸਞ੍ਞਾ ਚ, ਅਯਂ ਪਠਮੋ ਵਿਪਲ੍ਲਾਸੋ. ਲੋਭੋ ਚ ਸੁਖਸਞ੍ਞਾ ਚ, ਅਯਂ ਦੁਤਿਯੋ ਵਿਪਲ੍ਲਾਸੋ. ਅਵਿਜ੍ਜਾ ਚ ਨਿਚ੍ਚਸਞ੍ਞਾ ਚ, ਅਯਂ ਤਤਿਯੋ ਵਿਪਲ੍ਲਾਸੋ. ਮੋਹੋ ਚ ਅਤ੍ਤਸਞ੍ਞਾ ਚ, ਅਯਂ ਚਤੁਤ੍ਥੋ ਵਿਪਲ੍ਲਾਸੋ. ਇਤਿ ਨਵ ਪਦਾਨਿ ਅਕੁਸਲਾਨਿ ਚਤੂਸੁ ਪਦੇਸੁ ਸਮੋਸਰਨ੍ਤਿ. ਸਮਥੋ ਚ ਅਸੁਭਸਞ੍ਞਾ ਚ ਪਠਮਂ ਸਤਿਪਟ੍ਠਾਨਂ, ਅਲੋਭੋ ਚ ਦੁਕ੍ਖਸਞ੍ਞਾ ਚ ਦੁਤਿਯਂ ਸਤਿਪਟ੍ਠਾਨਂ, ਵਿਪਸ੍ਸਨਾ ਚ ਅਨਿਚ੍ਚਸਞ੍ਞਾ ਚ ਤਤਿਯਂ ਸਤਿਪਟ੍ਠਾਨਂ, ਅਮੋਹੋ ਚ ਅਨਤ੍ਤਸਞ੍ਞਾ ਚ ਚਤੁਤ੍ਥਂ ਸਤਿਪਟ੍ਠਾਨਂ. ਇਤਿ ਨਵ ਪਦਾਨਿ ਕੁਸਲਾਨਿ ਚਤੂਸੁ ਪਦੇਸੁ ਸਮੋਸਰਨ੍ਤਿ. ਏਵਂ ਸੀਹਵਿਕ੍ਕੀਲ਼ਿਤਨਯੇ ਇਤਰੇ ਦ੍ਵੇ ਨਯਾ ਅਨੁਪ੍ਪਵਿਸਨ੍ਤਿ. ਤਿਣ੍ਣਞ੍ਹਿ ਨਯਾਨਂ ਯਾ ਭੂਮਿਯੋ ਗੋਚਰੋ, ਸੋ ਏਕੇਕਂ ਨਯਂ ਅਨੁਪ੍ਪਵਿਸਤਿ. ਤਸ੍ਮਾ ਏਕੇਕਸ੍ਸ ਨਯਸ੍ਸ ਅਕੁਸਲੇ ਵਾ ਧਮ੍ਮੇ ਵਿਞ੍ਞਾਤੇ ਕੁਸਲੇ ਵਾ ਪਟਿਪਕ੍ਖੋ ਅਨ੍ਵੇਸਿਤਬ੍ਬੋ. ਪਟਿਪਕ੍ਖਂ ਅਨ੍ਵੇਸਿਤ੍ਵਾ ਸੋ ਨਯੋ ਨਿਦ੍ਦਿਸਿਤਬ੍ਬੋ. ਤਮ੍ਹਿ ਨਯੇ ਨਿਦ੍ਦਿਟ੍ਠੇ ਯਥਾ ਏਕਮ੍ਹਿ ਨਯੇ ਇਤਰੇਸਂ ਨਯਾਨਂ ਮੂਲਪਦਾਨਿ ਅਨੁਪ੍ਪਵਿਟ੍ਠਾਨਿ, ਤਤੋ ਤਤੋ ਨੀਹਰਿਤ੍ਵਾ ਨਿਦ੍ਦਿਸਿਤਬ੍ਬਾਨਿ. ਏਕੇਕਸ੍ਮਿਞ੍ਹਿ ਨਯੇ ਅਟ੍ਠਾਰਸ ਮੂਲਪਦਾਨਿ ਅਨੁਪ੍ਪਵਿਟ੍ਠਾਨਿ.
ਤਤ੍ਥ ਏਕੇਕਸ੍ਮਿਂ ਧਮ੍ਮੇ ਵਿਞ੍ਞਾਤੇ ਸਬ੍ਬੇ ਧਮ੍ਮਾ ਵਿਞ੍ਞਾਤਾ ਹੋਨ੍ਤਿ. ਇਮੇਸਂ ਤਿਣ੍ਣਂ ਨਯਾਨਂ ਸੀਹਵਿਕ੍ਕੀਲ਼ਿਤਸ੍ਸ ਨਯਸ੍ਸ ਚਤ੍ਤਾਰਿ ਫਲਾਨਿ ਪਰਿਯੋਸਾਨਂ ਪਠਮਾਯ ਦਿਸਾਯ ਪਠਮਂ ਫਲਂ, ਦੁਤਿਯਾਯ ਦਿਸਾਯ ਦੁਤਿਯਂ ਫਲਂ, ਤਤਿਯਾਯ ਦਿਸਾਯ ਤਤਿਯਂ ਫਲਂ, ਚਤੁਤ੍ਥਾਯ ਦਿਸਾਯ ਚਤੁਤ੍ਥਂ ਫਲਂ ਪਰਿਯੋਸਾਨਂ.
ਤਿਪੁਕ੍ਖਲਸ੍ਸ ਨਯਸ੍ਸ ਤਯੋ ਵਿਮੋਕ੍ਖਾ ਪਰਿਯੋਸਾਨਂ ਪਠਮਾਯ ਦਿਸਾਯ ਅਪ੍ਪਣਿਹਿਤੋ, ਦੁਤਿਯਾਯ ਸੁਞ੍ਞਤੋ, ਤਤਿਯਾਯ ਅਨਿਮਿਤ੍ਤੋ ਵਿਮੋਕ੍ਖੋ ਪਰਿਯੋਸਾਨਂ.
ਨਨ੍ਦਿਯਾਵਟ੍ਟਸ੍ਸ ਨਯਸ੍ਸ ਦ੍ਵੇ ਵਿਮੁਤ੍ਤਿਯੋ ਪਰਿਯੋਸਾਨਂ ਪਠਮਾਯ ਦਿਸਾਯ ਤਣ੍ਹਾਵਿਰਾਗਾ ਚੇਤੋਵਿਮੁਤ੍ਤਿ, ਦੁਤਿਯਾਯ ਦਿਸਾਯ ਅਵਿਜ੍ਜਾਵਿਰਾਗਾ ਪਞ੍ਞਾਵਿਮੁਤ੍ਤਿ ਪਰਿਯੋਸਾਨਂ. ਇਮੇਸੁ ਤੀਸੁ ਨਯੇਸੁ ਯਾ ਅਟ੍ਠਾਰਸਨ੍ਨਂ ਪਦਾਨਂ ਆਲੋਚਨਾ, ਅਯਂ ਦਿਸਾਲੋਚਨੋ ਨਯੋ. ਯਾ ਆਲੋਕੇਤ੍ਵਾ ਕੁਸਲਪਕ੍ਖੇ ਅਕੁਸਲਪਕ੍ਖੇ ਚ ‘‘ਅਯਂ ਧਮ੍ਮੋ ਇਮਂ ਧਮ੍ਮਂ ਭਜਤੀ’’ਤਿ ਜਾਨਨ੍ਤੇਨ ਸਮ੍ਮਾ ਯੋਜਨਾ, ਅਯਂ ਅਙ੍ਕੁਸੋ ਨਯੋਤਿ ਇਮੇ ਪਞ੍ਚ ਨਯਾ.
ਨਯਸਮੁਟ੍ਠਾਨਵਾਰਵਣ੍ਣਨਾ ਨਿਟ੍ਠਿਤਾ.