੭. ਆਵਟ੍ਟਹਾਰਸਮ੍ਪਾਤਵਣ੍ਣਨਾ

੬੯. ਨੇਕ੍ਖਮ੍ਮਸਙ੍ਕਪ੍ਪਬਹੁਲੋ ਕਸਿਣਵਸੇਨ ਮੇਤ੍ਤਾਦਿਵਸੇਨ ਵਾ ਲਦ੍ਧਾਯ ਚਿਤ੍ਤੇਕਗ੍ਗਤਾਸਙ੍ਖਾਤਾਯ ਚਿਤ੍ਤਮਞ੍ਜੂਸਾਯ ਚਿਤ੍ਤਂ ਠਪੇਤ੍ਵਾ ਸਮਾਧਿਂਯੇਵ ਵਾ ਯਥਾਲਦ੍ਧਂ ਸਂਕਿਲੇਸਤੋ ਰਕ੍ਖਿਤਚਿਤ੍ਤੋ ਨਾਮ ਹੋਤੀਤਿ ਵੁਤ੍ਤਂ – ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ ਸਮ੍ਮਾਸਙ੍ਕਪ੍ਪਗੋਚਰੋਤਿ ਅਯਂ ਸਮਥੋ’’ਤਿ. ਪਞ੍ਞਾਪਧਾਨਾ ਵਿਪਸ੍ਸਨਾਤਿ ਆਹ – ‘‘ਸਮ੍ਮਾਦਿਟ੍ਠਿਪੁਰੇਕ੍ਖਾਰੋਤਿ ਅਯਂ ਵਿਪਸ੍ਸਨਾ’’ਤਿ. ਅਰਿਯਮਗ੍ਗੇਨ ਦੁਕ੍ਖਸਚ੍ਚੇ ਪਰਿਞ੍ਞਾਤੇ ਉਦਯਬ੍ਬਯਦਸ੍ਸਨਂ ਮਤ੍ਥਕਪ੍ਪਤ੍ਤਂ ਨਾਮ ਹੋਤੀਤਿ ਵੁਤ੍ਤਂ – ‘‘ਞਤ੍ਵਾਨ ਉਦਯਬ੍ਬਯਨ੍ਤਿ ਦੁਕ੍ਖਪਰਿਞ੍ਞਾ’’ਤਿ. ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ ਹਿ ਮਗ੍ਗਞਾਣਸ੍ਸ ਪਵਤ੍ਤਿਦਸ੍ਸਨਾਤਿ. ਇਮਾਨਿ ਚਤ੍ਤਾਰਿ ਸਚ੍ਚਾਨੀਤਿ ਚਤੁਸਚ੍ਚਧਮ੍ਮਵਸੇਨ ਆਵਟ੍ਟਨਂ ਨਿਟ੍ਠਪੇਤਿ. ਤਤ੍ਥ ਪੁਰਿਮੇਨ ਸਚ੍ਚਦ੍ਵਯਟ੍ਠਪਨੇਨ ਵਿਸਭਾਗਧਮ੍ਮਵਸੇਨ, ਪਚ੍ਛਿਮੇਨ ਸਭਾਗਧਮ੍ਮਵਸੇਨ ਆਵਟ੍ਟਨਨ੍ਤਿ ਦਟ੍ਠਬ੍ਬਂ.

ਆਵਟ੍ਟਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.