੮. ਵਿਭਤ੍ਤਿਹਾਰਸਮ੍ਪਾਤਵਣ੍ਣਨਾ

੭੦. ਕੁਸਲਪਕ੍ਖੋ ਕੁਸਲਪਕ੍ਖੇਨ ਨਿਦ੍ਦਿਸਿਤਬ੍ਬੋਤਿ ਰਕ੍ਖਿਤਚਿਤ੍ਤਸ੍ਸਾਤਿ ਸਤਿਸਂਵਰੋ, ਸੋ ਛਬ੍ਬਿਧੋ ਦ੍ਵਾਰਵਸੇਨ ਚਕ੍ਖੁਦ੍ਵਾਰਸਂਵਰੋ ਯਾਵ ਮਨੋਦ੍ਵਾਰਸਂਵਰੋਤਿ. ਸਮ੍ਮਾਸਙ੍ਕਪ੍ਪੋ ਤਿਵਿਧੋ – ਨੇਕ੍ਖਮ੍ਮਸਙ੍ਕਪ੍ਪੋ, ਅਬ੍ਯਾਪਾਦਸਙ੍ਕਪ੍ਪੋ, ਅਵਿਹਿਂਸਾਸਙ੍ਕਪ੍ਪੋਤਿ. ਸਮ੍ਮਾਦਿਟ੍ਠਿ ਅਟ੍ਠਵਿਧਾ ਦੁਕ੍ਖੇ ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਞਾਣਨ੍ਤਿ. ਉਦਯਬ੍ਬਯਞਾਣਂ ਪਞ੍ਞਾਸਵਿਧਂ ਅਵਿਜ੍ਜਾਸਮੁਦਯਾ ਰੂਪਸਮੁਦਯੋ…ਪੇ… ਵਿਪਰਿਣਾਮਲਕ੍ਖਣਂ ਪਸ੍ਸਨ੍ਤੋਪਿ ਵਿਞ੍ਞਾਣਕ੍ਖਨ੍ਧਸ੍ਸ ਵਯਂ ਪਸ੍ਸਤਿ. ਥਿਨਮਿਦ੍ਧਾਭਿਭਵਨਂ ਚਤੁਬ੍ਬਿਧਂ ਚਤੁਮਗ੍ਗਵਸੇਨ. ਤਤ੍ਥ ਸਤਿਸਂਵਰੋ ਲੋਕਿਯਲੋਕੁਤ੍ਤਰਵਸੇਨ ਦੁਵਿਧੋ. ਤੇਸੁ ਲੋਕਿਯੋ ਕਾਮਾਵਚਰੋਵ, ਲੋਕੁਤ੍ਤਰੋ ਦਸ੍ਸਨਭਾਵਨਾਭੇਦਤੋ ਦੁਵਿਧੋ. ਏਕਮੇਕੋ ਚੇਤ੍ਥ ਚਤੁਸਤਿਪਟ੍ਠਾਨਭੇਦਤੋ ਚਤੁਬ੍ਬਿਧੋ. ਏਸ ਨਯੋ ਸਮ੍ਮਾਸਙ੍ਕਪ੍ਪਾਦੀਸੁਪਿ.

ਅਯਂ ਪਨ ਵਿਸੇਸੋ – ਸਮ੍ਮਾਸਙ੍ਕਪ੍ਪੋ ਪਠਮਜ੍ਝਾਨਵਸੇਨ ਰੂਪਾਵਚਰੋਤਿਪਿ ਨੀਹਰਿਤਬ੍ਬੋ. ਪਦਟ੍ਠਾਨਵਿਭਾਗੋ ਪਦਟ੍ਠਾਨਹਾਰਸਮ੍ਪਾਤੇ ਵੁਤ੍ਤਨਯੇਨ ਵਤ੍ਤਬ੍ਬੋ. ਅਕੁਸਲਪਕ੍ਖੇ ਅਸਂਵਰੋ ਚਕ੍ਖੁਅਸਂਵਰੋ…ਪੇ… ਕਾਯਅਸਂਵਰੋ, ਚੋਪਨਕਾਯਅਸਂਵਰੋ, ਵਾਚਾਅਸਂਵਰੋ, ਮਨੋਅਸਂਵਰੋਤਿ ਅਟ੍ਠਵਿਧੋ. ਮਿਚ੍ਛਾਸਙ੍ਕਪ੍ਪੋ ਕਾਮਵਿਤਕ੍ਕਾਦਿਵਸੇਨ ਤਿਵਿਧੋ. ਅਞ੍ਞਾਣਂ ‘‘ਦੁਕ੍ਖੇ ਅਞ੍ਞਾਣ’’ਨ੍ਤਿਆਦਿਨਾ ਅਟ੍ਠਵਿਧਾ ਵਿਭਤ੍ਤਂ. ਸਮ੍ਮਾਦਿਟ੍ਠਿਪਟਿਪਕ੍ਖਤੋ ਮਿਚ੍ਛਾਦਿਟ੍ਠਿ ਦ੍ਵਾਸਟ੍ਠਿਵਿਧੇਨ ਵੇਦਿਤਬ੍ਬਾ. ਥਿਨਮਿਦ੍ਧਂ ਉਪ੍ਪਤ੍ਤਿਭੂਮਿਤੋ ਪਞ੍ਚਵਿਧਨ੍ਤਿ ਏਵਂ ਅਕੁਸਲਪਕ੍ਖੇ ਵਿਭਤ੍ਤਿ ਵੇਦਿਤਬ੍ਬਾ.

ਵਿਭਤ੍ਤਿਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.