੬. ਚਤੁਬ੍ਯੂਹਹਾਰਸਮ੍ਪਾਤਵਣ੍ਣਨਾ

੬੮. ਰਕ੍ਖੀਯਤੀਤਿ ਰਕ੍ਖਿਤਂ. ਇਦਂ ਪਦਵਸੇਨ ਨਿਬ੍ਬਚਨਂ. ਯਸ੍ਮਾ ਪਨ ਅਤ੍ਥਵਸੇਨ ਨਿਬ੍ਬਚਨੇ ਵੁਤ੍ਤੇ ਪਦਵਸੇਨ ਨਿਬ੍ਬਚਨਂ ਵੁਤ੍ਤਮੇਵ ਹੋਤਿ, ਤਸ੍ਮਾ ‘‘ਰਕ੍ਖਿਤਂ ਪਰਿਪਾਲੀਯਤੀਤਿ ਏਸਾ ਨਿਰੁਤ੍ਤੀ’’ਤਿ ਵੁਤ੍ਤਂ. ਤਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ, ਪਕਾਰੇ ਵਾ. ਤੇਨ ਏਵਮਾਦਿਕਾ ਏਵਂਪਕਾਰਾ ਵਾ ਏਸਾ ਨਿਰੁਤ੍ਤੀਤਿ ਵੁਤ੍ਤਂ ਹੋਤਿ. ਤਸ੍ਮਾ ਚਿਨ੍ਤੇਤੀਤਿ ਚਿਤ੍ਤਂ. ਅਤ੍ਤਨੋ ਸਨ੍ਤਾਨਂ ਚਿਨੋਤੀਤਿ ਚਿਤ੍ਤਂ, ਪਚ੍ਚਯੇਹਿ ਚਿਤਨ੍ਤਿ ਚਿਤ੍ਤਂ, ਚਿਤ੍ਤਵਿਚਿਤ੍ਤਟ੍ਠੇਨ ਚਿਤ੍ਤਂ, ਚਿਤ੍ਤਕਰਣਟ੍ਠੇਨ ਚਿਤ੍ਤਂ. ਸਮ੍ਮਾ ਸਙ੍ਕਪ੍ਪੇਤੀਤਿ ਸਮ੍ਮਾਸਙ੍ਕਪ੍ਪੋਤਿਆਦਿਨਾ ਨਿਰੁਤ੍ਤਿ ਵੇਦਿਤਬ੍ਬਾ.

ਅਯਂ ਏਤ੍ਥ ਭਗਵਤੋ ਅਧਿਪ੍ਪਾਯੋਤਿ ‘‘ਰਕ੍ਖਿਤਚਿਤ੍ਤੋ ਅਸ੍ਸਾ’’ਤਿਆਦਿਨਾ ਇਨ੍ਦ੍ਰਿਯਸਂਵਰਾਦਯੋ ਦੁਗ੍ਗਤਿਪਹਾਨਞ੍ਚ ਵਦਤੋ ਭਗਵਤੋ ਏਤ੍ਥ ਗਾਥਾਯਂ ਅਧਿਪ੍ਪਾਯੋ. ਕੋਕਾਲਿਕੋ ਹੀਤਿਆਦਿ ਨਿਦਾਨਨਿਦ੍ਦੇਸੋ. ਤਤ੍ਥ ਹਿ-ਸਦ੍ਦੋ ਕਾਰਣੇ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ਕੋਕਾਲਿਕੋ (ਸਂ. ਨਿ. ੧.੧੮੧; ਅ. ਨਿ. ੧੦.੮੯; ਸੁ. ਨਿ. ਕੋਕਾਲਿਕਸੁਤ੍ਤ) ਅਰਕ੍ਖਿਤਚਿਤ੍ਤਤਾਯ ਅਗ੍ਗਸਾਵਕੇਸੁ ਚਿਤ੍ਤਂ ਪਦੋਸੇਤ੍ਵਾ ਪਦੁਮਨਿਰਯਂ ਉਪਪਨ੍ਨੋ, ਤਸ੍ਮਾ ਦੁਗ੍ਗਤਿਯੋ ਜਹਿਤੁਕਾਮੋ ਰਕ੍ਖਿਤਚਿਤ੍ਤੋ ਅਸ੍ਸਾਤਿ ਭਗਵਾ ਸਤਿਆਰਕ੍ਖੇਨ ਚੇਤਸਾ ਸਮਨ੍ਨਾਗਤੋ ਸਬ੍ਬਾ ਦੁਗ੍ਗਤਿਯੋ ਜਹਤੀਤਿ ਅਤ੍ਥੋ. ਸੁਤ੍ਤਮ੍ਹਿ ਵੁਤ੍ਤਂ ‘‘ਸਤਿਯਾ ਚਿਤ੍ਤਂ ਰਕ੍ਖਿਤਬ੍ਬ’’ਨ੍ਤਿ ਦੇਸਨਾਨੁਸਨ੍ਧਿਦਸ੍ਸਨਂ.

ਚਤੁਬ੍ਯੂਹਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.