੫. ਲਕ੍ਖਣਹਾਰਸਮ੍ਪਾਤਵਣ੍ਣਨਾ

੬੭. ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ ਸਤਿਸਂਵਰੋ, ਸਤਿਬਲੇਨ ਚ ਨੇਕ੍ਖਮ੍ਮਵਿਤਕ੍ਕਾਦਿਬਹੁਲੋ ਹੋਤੀਤਿ ਵੁਤ੍ਤਂ – ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ ਸਮ੍ਮਾਸਙ੍ਕਪ੍ਪਗੋਚਰੋਤਿ ਇਦਂ ਸਤਿਨ੍ਦ੍ਰਿਯ’’ਨ੍ਤਿ. ਤਸ੍ਸਤ੍ਥੋ – ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ ਸਮ੍ਮਾਸਙ੍ਕਪ੍ਪਗੋਚਰੋ’’ਤਿ ਏਤ੍ਥ ਰਕ੍ਖਿਤਚਿਤ੍ਤਤਾਯ ਚ ਸਮ੍ਮਾਸਙ੍ਕਪ੍ਪਗੋਚਰਤਾ ਕਾਰਣੂਪਚਾਰੇਨ ਇਦਂ ਸਤਿਨ੍ਦ੍ਰਿਯਂ, ਗਹਿਤਾਨਿ ਭਵਨ੍ਤਿ ਪਞ੍ਚਿਨ੍ਦ੍ਰਿਯਾਨਿ ਇਨ੍ਦ੍ਰਿਯਲਕ੍ਖਣੇਨ ਵਿਮੁਤ੍ਤਿਪਰਿਪਾਚਨਭਾਵੇਨ ਵਾ ਏਕਲਕ੍ਖਣਤ੍ਤਾਤਿ ਅਧਿਪ੍ਪਾਯੋ. ਗਹਿਤੋ ਭਵਤੀਤਿ ਏਤ੍ਥ ਮਗ੍ਗਲਕ੍ਖਣੇਨ ਗਹਣਂ ਸੁਵਿਞ੍ਞੇਯ੍ਯਨ੍ਤਿ ਤਂ ਠਪੇਤ੍ਵਾ ਕਾਰਣਤੋ ਗਹਣਂ ਦਸ੍ਸੇਤੁਂ ‘‘ਸਮ੍ਮਾਦਿਟ੍ਠਿਤੋ ਹਿ ਸਮ੍ਮਾਸਙ੍ਕਪ੍ਪੋ ਪਭਵਤੀ’’ਤਿਆਦਿ ਵੁਤ੍ਤਂ. ਤਤੋ ਏਵ ਗਹਿਤੋ ਭਵਤਿ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋਤਿ ਵਤ੍ਵਾ ਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਾਨਿਪਿ ਵੁਤ੍ਤਾਨਿ.

ਲਕ੍ਖਣਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.