੪. ਪਦਟ੍ਠਾਨਹਾਰਸਮ੍ਪਾਤਵਣ੍ਣਨਾ

੬੬. ਸਕਸਮ੍ਪਤ੍ਤਿਯਾ ਵਿਯ ਸੁਸਂਵਿਹਿਤਸਙ੍ਕਪ੍ਪੋ ਭਵਤਿ. ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ ਸੁਚਰਿਤਪਾਰਿਪੂਰਿਯਾ ਆਸਨ੍ਨਕਾਰਣਨ੍ਤਿ ਆਹ – ‘‘ਰਕ੍ਖਿਤਚਿਤ੍ਤਸ੍ਸਾਤਿ ਤਿਣ੍ਣਂ ਸੁਚਰਿਤਾਨਂ ਪਦਟ੍ਠਾਨ’’ਨ੍ਤਿ. ਤਸ੍ਸਤ੍ਥੋ – ‘‘ਰਕ੍ਖਿਤਚਿਤ੍ਤਸ੍ਸਾ’’ਤਿ ਇਦਂ ਤਿਣ੍ਣਂ ਸੁਚਰਿਤਾਨਂ ਪਦਟ੍ਠਾਨਵਚਨਨ੍ਤਿ. ਨੇਕ੍ਖਮ੍ਮਸਙ੍ਕਪ੍ਪਾਦਿਬਹੁਲਸ੍ਸ ਕਾਮਚ੍ਛਨ੍ਦਾਦਿਨੀਵਰਣਪ੍ਪਹਾਨਂ ਸੁਕਰਨ੍ਤਿ ਨੇਕ੍ਖਮ੍ਮਸਙ੍ਕਪ੍ਪਾਦਯੋ ਸਮਥਸ੍ਸ ਆਸਨ੍ਨਕਾਰਣਨ੍ਤਿ ਆਹ – ‘‘ਸਮ੍ਮਾਸਙ੍ਕਪ੍ਪਗੋਚਰੋਤਿ ਸਮਥਸ੍ਸ ਪਦਟ੍ਠਾਨ’’ਨ੍ਤਿ. ਕਮ੍ਮਸ੍ਸਕਤਾਸਮ੍ਮਾਦਿਟ੍ਠਿਯਂ ਸਪ੍ਪਚ੍ਚਯਨਾਮਰੂਪਦਸ੍ਸਨਸਮ੍ਮਾਦਿਟ੍ਠਿਯਞ੍ਚ ਠਿਤੋ ਅਤ੍ਤਾਧੀਨਂ ਸਂਸਾਰਦੁਕ੍ਖਂ ਪਸ੍ਸਨ੍ਤੋ ਤਦਤਿਕ੍ਕਮਨੁਪਾਯਂ ਵਿਪਸ੍ਸਨਂ ਆਰਭਤੀਤਿ ਸਮ੍ਮਾਦਿਟ੍ਠਿਵਿਪਸ੍ਸਨਾਯ ਵਿਸੇਸਕਾਰਣਨ੍ਤਿ ਆਹ – ‘‘ਸਮ੍ਮਾਦਿਟ੍ਠਿਪੁਰੇਕ੍ਖਾਰੋਤਿ ਵਿਪਸ੍ਸਨਾਯ ਪਦਟ੍ਠਾਨ’’ਨ੍ਤਿ. ਉਦਯਬ੍ਬਯਦਸ੍ਸਨਂ ਉਸ੍ਸੁਕ੍ਕਾਪੇਨ੍ਤੋ ਸਮ੍ਮਤ੍ਤਨਿਯਾਮਂ ਓਕ੍ਕਮਤੀਤਿ ਤਂ ਪਠਮਮਗ੍ਗਾਧਿਗਮਸ੍ਸ ਕਾਰਣਨ੍ਤਿ ਆਹ – ‘‘ਞਤ੍ਵਾਨ ਉਦਯਬ੍ਬਯਨ੍ਤਿ ਦਸ੍ਸਨਭੂਮਿਯਾ ਪਦਟ੍ਠਾਨ’’ਨ੍ਤਿ. ਆਲੋਕਸਞ੍ਞਾਮਨਸਿਕਾਰਾਦੀਹਿ ਥਿਨਮਿਦ੍ਧਸ੍ਸ ਅਭਿਭਵਨਂ ਵੀਰਿਯਸ੍ਸ ਆਸਨ੍ਨਕਾਰਣਨ੍ਤਿ ਆਹ – ‘‘ਥਿਨਮਿਦ੍ਧਾਭਿਭੂ ਭਿਕ੍ਖੂਤਿ ਵੀਰਿਯਸ੍ਸ ਪਦਟ੍ਠਾਨ’’ਨ੍ਤਿ. ਯਦਿਪਿ ਅਰਿਯਮਗ੍ਗਕ੍ਖਣੇ ਪਹਾਨਭਾਵਨਾ ਸਮਾਨਕਾਲਾ ਏਕਾਭਿਸਮਯਸ੍ਸ ਇਚ੍ਛਿਤਤ੍ਤਾ, ਤਥਾਪਿ ਪਹਾਤਬ੍ਬਸ੍ਸ ਪਹਾਨਾਭਾਵੇ ਭਾਵਨਾਪਾਰਿਪੂਰੀ ਨਤ੍ਥੀਤਿ ਪਹਾਨਨਿਮਿਤ੍ਤਾ ਵਿਯ ਕਤ੍ਵਾ ਭਾਵਨਾ ਵੁਤ੍ਤਾ ‘‘ਸਬ੍ਬਾ ਦੁਗ੍ਗਤਿਯੋ ਜਹੇਤਿ ਭਾਵਨਾਯ ਪਦਟ੍ਠਾਨ’’ਨ੍ਤਿ. ਅਥ ਵਾ ‘‘ਸਬ੍ਬਾ ਦੁਗ੍ਗਤਿਯੋ ਜਹੇ’’ਤਿ ਇਦਂ ਭਗਵਤੋ ਵਚਨਂ ਯੋਗੀਨਂ ਉਸ੍ਸਾਹਜਨਨਤ੍ਥਂ ਆਨਿਸਂਸਕਿਤ੍ਤਨਂ ਹੋਤੀਤਿ ਭਾਵਨਾਯ ਵਿਸੇਸਕਾਰਣਨ੍ਤਿ ਵੁਤ੍ਤਂ ‘‘ਸਬ੍ਬਾ…ਪੇ… ਪਦਟ੍ਠਾਨ’’ਨ੍ਤਿ.

ਪਦਟ੍ਠਾਨਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.