੬. ਕਾਮੂਪਪਤ੍ਤਿਸੁਤ੍ਤਵਣ੍ਣਨਾ

੯੫. ਛਟ੍ਠੇ ਕਾਮੂਪਪਤ੍ਤਿਯੋਤਿ ਕਾਮਪਟਿਲਾਭਾ ਕਾਮਪਟਿਸੇਵਨਾ ਵਾ. ਪਚ੍ਚੁਪਟ੍ਠਿਤਕਾਮਾਤਿ ਨਿਬਦ੍ਧਕਾਮਾ ਨਿਬਦ੍ਧਾਰਮ੍ਮਣਾ ਯਥਾ ਤਂ ਮਨੁਸ੍ਸਾ. ਮਨੁਸ੍ਸਾ ਹਿ ਨਿਬਦ੍ਧਵਤ੍ਥੁਸ੍ਮਿਂ ਵਸਂ ਵਤ੍ਤੇਨ੍ਤਿ. ਯਤ੍ਥ ਪਟਿਬਦ੍ਧਚਿਤ੍ਤਾ ਹੋਨ੍ਤਿ, ਸਤਮ੍ਪਿ ਸਹਸ੍ਸਮ੍ਪਿ ਦਤ੍ਵਾ ਤਮੇਵ ਮਾਤੁਗਾਮਂ ਆਨੇਤ੍ਵਾ ਨਿਬਦ੍ਧਭੋਗਂ ਭੁਞ੍ਜਨ੍ਤਿ. ਏਕਚ੍ਚੇ ਚ ਦੇਵਾ. ਚਾਤੁਮਹਾਰਾਜਿਕਤੋ ਪਟ੍ਠਾਯ ਹਿ ਚਤੁਦੇਵਲੋਕਵਾਸਿਨੋ ਨਿਬਦ੍ਧਵਤ੍ਥੁਸ੍ਮਿਂਯੇਵ ਵਸਂ ਵਤ੍ਤੇਨ੍ਤਿ. ਪਞ੍ਚਸਿਖਵਤ੍ਥੁ ਚੇਤ੍ਥ ਨਿਦਸ੍ਸਨਂ. ਤਥਾ ਏਕਚ੍ਚੇ ਆਪਾਯਿਕੇ ਨੇਰਯਿਕੇ ਠਪੇਤ੍ਵਾ ਸੇਸਅਪਾਯਸਤ੍ਤਾਪਿ ਨਿਬਦ੍ਧਵਤ੍ਥੁਸ੍ਮਿਂਯੇਵ ਵਸਂ ਵਤ੍ਤੇਨ੍ਤਿ. ਮਚ੍ਛਾ ਹਿ ਅਤ੍ਤਨੋ ਮਚ੍ਛਿਯਾ, ਕਚ੍ਛਪੋ ਕਚ੍ਛਪਿਯਾਤਿ ਏਵਂ ਸਬ੍ਬੇਪਿ ਤਿਰਚ੍ਛਾਨਾ ਪੇਤਾ ਵਿਨਿਪਾਤਿਕਾ ਚ. ਤਸ੍ਮਾ ਨੇਰਯਿਕੇ ਠਪੇਤ੍ਵਾ ਸੇਸਅਪਾਯਸਤ੍ਤੇ ਉਪਾਦਾਯ ਯਾਵ ਤੁਸਿਤਕਾਯਾ ਇਮੇ ਸਤ੍ਤਾ ਪਚ੍ਚੁਪਟ੍ਠਿਤਕਾਮਾ ਨਾਮ, ਨਿਮ੍ਮਾਨਰਤਿਨੋਤਿ ਸਯਂ ਨਿਮ੍ਮਿਤੇ ਨਿਮ੍ਮਾਨੇ ਰਤਿ ਏਤੇਸਨ੍ਤਿ ਨਿਮ੍ਮਾਨਰਤਿਨੋ. ਤੇ ਹਿ ਨੀਲਪੀਤਾਦਿਵਸੇਨ ਯਾਦਿਸਂ ਯਾਦਿਸਂ ਰੂਪਂ ਇਚ੍ਛਨ੍ਤਿ, ਤਾਦਿਸਂ ਤਾਦਿਸਂ ਨਿਮ੍ਮਿਨਿਤ੍ਵਾ ਰਮਨ੍ਤਿ ਆਯਸ੍ਮਤੋ ਅਨੁਰੁਦ੍ਧਸ੍ਸ ਪੁਰਤੋ ਮਨਾਪਕਾਯਿਕਾ ਦੇਵਤਾ ਵਿਯ. ਪਰਨਿਮ੍ਮਿਤਵਸਵਤ੍ਤਿਨੋਤਿ ਪਰੇਹਿ ਨਿਮ੍ਮਿਤੇ ਕਾਮੇ ਵਸਂ ਵਤ੍ਤੇਨ੍ਤੀਤਿ ਪਰਨਿਮ੍ਮਿਤਵਸਵਤ੍ਤਿਨੋ. ਤੇਸਞ੍ਹਿ ਮਨਂ ਞਤ੍ਵਾ ਪਰੇ ਯਥਾਰੁਚਿਤਂ ਕਾਮਭੋਗਂ ਨਿਮ੍ਮਿਨਨ੍ਤਿ, ਤੇ ਤਤ੍ਥ ਵਸਂ ਵਤ੍ਤੇਨ੍ਤਿ. ਕਥਂ ਤੇ ਪਰਸ੍ਸ ਮਨਂ ਜਾਨਨ੍ਤੀਤਿ? ਪਕਤਿਸੇਵਨਾਵਸੇਨ. ਯਥਾ ਹਿ ਕੁਸਲੋ ਸੂਦੋ ਰਞ੍ਞੋ ਭੁਞ੍ਜਨ੍ਤਸ੍ਸ ਯਂ ਯਂ ਰੁਚ੍ਚਤਿ, ਤਂ ਤਂ ਜਾਨਾਤਿ, ਏਵਂ ਪਕਤਿਯਾ ਅਭਿਰੁਚਿਤਾਰਮ੍ਮਣਂ ਞਤ੍ਵਾ ਤਾਦਿਸੇਯੇਵ ਨਿਮ੍ਮਿਨਨ੍ਤਿ, ਤੇ ਤਤ੍ਥ ਵਸਂ ਵਤ੍ਤੇਨ੍ਤਿ, ਮੇਥੁਨਸੇਵਨਾਦਿਵਸੇਨ ਕਾਮੇ ਪਰਿਭੁਞ੍ਜਨ੍ਤਿ. ਕੇਚਿ ਪਨ ‘‘ਹਸਿਤਮਤ੍ਤੇਨ ਓਲੋਕਿਤਮਤ੍ਤੇਨ ਆਲਿਙ੍ਗਿਤਮਤ੍ਤੇਨ ਹਤ੍ਥਗ੍ਗਹਣਮਤ੍ਤੇਨ ਚ ਤੇਸਂ ਕਾਮਕਿਚ੍ਚਂ ਇਜ੍ਝਤੀ’’ਤਿ ਵਦਨ੍ਤਿ, ਤਂ ਅਟ੍ਠਕਥਾਯਂ ‘‘ਏਤਂ ਪਨ ਨਤ੍ਥੀ’’ਤਿ ਪਟਿਕ੍ਖਿਤ੍ਤਂ. ਨ ਹਿ ਕਾਯੇਨ ਅਫੁਸਨ੍ਤਸ੍ਸ ਫੋਟ੍ਠਬ੍ਬਂ ਕਾਮਕਿਚ੍ਚਂ ਸਾਧੇਤਿ. ਛਨ੍ਨਮ੍ਪਿ ਕਾਮਾਵਚਰਦੇਵਾਨਂ ਕਾਮਾ ਪਾਕਤਿਕਾ ਏਵ. ਵੁਤ੍ਤਞ੍ਹੇਤਂ –

‘‘ਛ ਏਤੇ ਕਾਮਾਵਚਰਾ, ਸਬ੍ਬਕਾਮਸਮਿਦ੍ਧਿਨੋ;

ਸਬ੍ਬੇਸਂ ਏਕਸਙ੍ਖਾਤਂ, ਆਯੁ ਭਵਤਿ ਕਿਤ੍ਤਕ’’ਨ੍ਤਿ. (ਵਿਭ. ੧੦੨੩);

ਗਾਥਾਸੁ ਯੇ ਚਞ੍ਞੇਤਿ ਯੇ ਯਥਾਵੁਤ੍ਤਦੇਵੇਹਿ ਅਞ੍ਞੇ ਚ ਕਾਮਭੋਗਿਨੋ ਮਨੁਸ੍ਸਾ ਚੇਵ ਏਕਚ੍ਚੇ ਅਪਾਯੂਪਗਾ ਚ ਸਬ੍ਬੇ ਤੇ. ਇਤ੍ਥਭਾਵਞ੍ਞਥਾਭਾਵਨ੍ਤਿ ਇਮਂ ਯਥਾਪਟਿਲਦ੍ਧਤ੍ਤਭਾਵਞ੍ਚੇਵ, ਉਪਪਤ੍ਤਿਭਵਨ੍ਤਰਸਙ੍ਖਾਤਂ ਇਤੋ ਅਞ੍ਞਥਾਭਾਵਞ੍ਚਾਤਿ ਦ੍ਵਿਪ੍ਪਭੇਦਂ ਸਂਸਾਰਂ ਨਾਤਿਵਤ੍ਤਰੇ ਨ ਅਤਿਕ੍ਕਮਨ੍ਤਿ. ਸਬ੍ਬੇ ਪਰਿਚ੍ਚਜੇ ਕਾਮੇਤਿ ਦਿਬ੍ਬਾਦਿਭੇਦੇ ਸਬ੍ਬੇਪਿ ਕਾਮੇ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਪਰਿਚ੍ਚਜੇਯ੍ਯ. ਕਿਲੇਸਕਾਮੇ ਅਨਾਗਾਮਿਮਗ੍ਗੇਨ ਪਜਹਨ੍ਤੋਯੇਵ ਹਿ ਵਤ੍ਥੁਕਾਮੇ ਪਰਿਚ੍ਚਜਤਿ ਨਾਮ. ਪਿਯਰੂਪਸਾਤਗਧਿਤਨ੍ਤਿ ਪਿਯਰੂਪੇਸੁ ਰੂਪਾਦੀਸੁ ਸੁਖਵੇਦਨਸ੍ਸਾਦੇਨ ਗਧਿਤਂ ਗਿਦ੍ਧਂ. ਛੇਤ੍ਵਾ ਸੋਤਂ ਦੁਰਚ੍ਚਯਨ੍ਤਿ ਅਞ੍ਞੇਹਿ ਦੁਰਚ੍ਚਯਂ ਦੁਰਤਿਕ੍ਕਮਂ ਤਣ੍ਹਾਸੋਤਂ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਦਿਤ੍ਵਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵਾਤਿ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.