੭. ਕਾਮਯੋਗਸੁਤ੍ਤਵਣ੍ਣਨਾ

੯੬. ਸਤ੍ਤਮੇ ਕਾਮਯੋਗਯੁਤ੍ਤੋਤਿ ਪਞ੍ਚਕਾਮਗੁਣਿਕੋ ਰਾਗੋ ਕਾਮਯੋਗੋ, ਤੇਨ ਯੁਤ੍ਤੋ ਕਾਮਯੋਗਯੁਤ੍ਤੋ, ਅਸਮੁਚ੍ਛਿਨ੍ਨਕਾਮਰਾਗਸ੍ਸੇਤਂ ਅਧਿਵਚਨਂ. ਰੂਪਾਰੂਪਭਵੇਸੁ ਛਨ੍ਦਰਾਗੋ ਭਵਯੋਗੋ, ਤਥਾ ਝਾਨਨਿਕਨ੍ਤਿ ਸਸ੍ਸਤਦਿਟ੍ਠਿਸਹਗਤੋ ਚ ਰਾਗੋ, ਤੇਨ ਯੁਤ੍ਤੋ ਭਵਯੋਗਯੁਤ੍ਤੋ, ਅਪ੍ਪਹੀਨਭਵਰਾਗੋਤਿ ਅਤ੍ਥੋ. ਆਗਾਮੀਤਿ ਬ੍ਰਹ੍ਮਲੋਕੇ ਠਿਤੋਪਿ ਪਟਿਸਨ੍ਧਿਗ੍ਗਹਣਵਸੇਨ ਇਮਂ ਮਨੁਸ੍ਸਲੋਕਂ ਆਗਮਨਸੀਲੋ. ਤੇਨੇਵਾਹ ‘‘ਆਗਨ੍ਤਾ ਇਤ੍ਥਤ੍ਤ’’ਨ੍ਤਿ. ਮਨੁਸ੍ਸਤ੍ਤਭਾਵਸਙ੍ਖਾਤਂ ਇਤ੍ਥਭਾਵਂ ਆਗਮਨਧਮ੍ਮੋ, ਮਨੁਸ੍ਸੇਸੁ ਉਪਪਜ੍ਜਨਸੀਲੋਤਿ ਅਤ੍ਥੋ. ਕਾਮਞ੍ਚੇਤ੍ਥ ਕਾਮਯੋਗੋ ਇਤ੍ਥਤ੍ਤਂ ਆਗਮਨਸ੍ਸ ਕਾਰਣਂ. ਯੋ ਪਨ ਕਾਮਯੋਗਯੁਤ੍ਤੋ, ਸੋ ਏਕਨ੍ਤੇਨ ਭਵਯੋਗਯੁਤ੍ਤੋਪਿ ਹੋਤੀਤਿ ਦਸ੍ਸਨਤ੍ਥਂ ‘‘ਕਾਮਯੋਗਯੁਤ੍ਤੋ, ਭਿਕ੍ਖਵੇ, ਭਵਯੋਗਯੁਤ੍ਤੋ’’ਤਿ ਉਭਯਮ੍ਪਿ ਏਕਜ੍ਝਂ ਕਤ੍ਵਾ ਵੁਤ੍ਤਂ.

ਕਾਮਯੋਗਵਿਸਂਯੁਤ੍ਤੋਤਿ ਏਤ੍ਥ ਅਸੁਭਜ੍ਝਾਨਮ੍ਪਿ ਕਾਮਯੋਗਵਿਸਂਯੋਗੋ, ਤਂ ਪਾਦਕਂ ਕਤ੍ਵਾ ਅਧਿਗਤੋ ਅਨਾਗਾਮਿਮਗ੍ਗੋ ਏਕਨ੍ਤੇਨੇਵ ਕਾਮਯੋਗਵਿਸਂਯੋਗੋ ਨਾਮ, ਤਸ੍ਮਾ ਤਤਿਯਮਗ੍ਗਫਲੇ ਠਿਤੋ ਅਰਿਯਪੁਗ੍ਗਲੋ ‘‘ਕਾਮਯੋਗਵਿਸਂਯੁਤ੍ਤੋ’’ਤਿ ਵੁਤ੍ਤੋ. ਯਸ੍ਮਾ ਪਨ ਰੂਪਾਰੂਪਭਵੇਸੁ ਛਨ੍ਦਰਾਗੋ ਅਨਾਗਾਮਿਮਗ੍ਗੇਨ ਨ ਪਹੀਯਤਿ, ਤਸ੍ਮਾ ਸੋ ਅਪ੍ਪਹੀਨਭਵਯੋਗਤ੍ਤਾ ‘‘ਭਵਯੋਗਯੁਤ੍ਤੋ’’ਤਿ ਵੁਤ੍ਤੋ. ਅਨਾਗਾਮੀਤਿ ਕਾਮਲੋਕਂ ਪਟਿਸਨ੍ਧਿਗ੍ਗਹਣਵਸੇਨ ਅਨਾਗਮਨਤੋ ਅਨਾਗਾਮੀ. ਕਾਮਯੋਗਵਿਸਂਯੋਗਵਸੇਨੇਵ ਹਿ ਸਦ੍ਧਿਂ ਅਨਵਸੇਸਓਰਮ੍ਭਾਗਿਯਸਂਯੋਜਨਸਮੁਗ੍ਘਾਤੇਨ ਅਜ੍ਝਤ੍ਤਸਂਯੋਜਨਾਭਾਵਸਿਦ੍ਧਿਤੋ ਇਤ੍ਥਤ੍ਤਂ ਅਨਾਗਨ੍ਤ੍ਵਾ ਹੋਤਿ, ਤਤ੍ਥ ਪਰਿਨਿਬ੍ਬਾਯੀ ਅਨਾਵਤ੍ਤਿਧਮ੍ਮੋ. ਯਸ੍ਸ ਪਨ ਅਨਵਸੇਸਂ ਭਵਯੋਗੋ ਪਹੀਨੋ, ਤਸ੍ਸ ਅਵਿਜ੍ਜਾਯੋਗਾਦਿਅਵਸਿਟ੍ਠਕਿਲੇਸਾਪਿ ਤਦੇਕਟ੍ਠਭਾਵਤੋ ਪਹੀਨਾ ਏਵ ਹੋਨ੍ਤੀਤਿ, ਸੋ ਪਰਿਕ੍ਖੀਣਭਵਸਂਯੋਜਨੋ ‘‘ਅਰਹਂ ਖੀਣਾਸਵੋ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਕਾਮਯੋਗਵਿਸਂਯੁਤ੍ਤੋ, ਭਿਕ੍ਖਵੇ, ਭਵਯੋਗਵਿਸਂਯੁਤ੍ਤੋ ਅਰਹਂ ਹੋਤਿ ਖੀਣਾਸਵੋ’’ਤਿ. ਏਤ੍ਥ ਚ ਕਾਮਯੋਗਵਿਸਂਯੋਗੋ ਅਨਾਗਾਮੀ ਚਤੁਤ੍ਥਜ੍ਝਾਨਸ੍ਸ ਸੁਖਦੁਕ੍ਖਸੋਮਨਸ੍ਸਦੋਮਨਸ੍ਸਪ੍ਪਹਾਨਂ ਵਿਯ, ਤਤਿਯਮਗ੍ਗਸ੍ਸ ਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਂਯੋਜਨਪਰਿਕ੍ਖਯੋ ਵਿਯ ਚ ਚਤੁਤ੍ਥਮਗ੍ਗਸ੍ਸ ਵਣ੍ਣਭਣਨਤ੍ਥਂ ਵੁਤ੍ਤੋਤਿ ਦਟ੍ਠਬ੍ਬਂ. ਪਠਮਪਦੇਨ ਸੋਤਾਪਨ੍ਨਸਕਦਾਗਾਮੀਹਿ ਸਦ੍ਧਿਂ ਸਬ੍ਬੋ ਪੁਥੁਜ੍ਜਨੋ ਗਹਿਤੋ, ਦੁਤਿਯਪਦੇਨ ਪਨ ਸਬ੍ਬੋ ਅਨਾਗਾਮੀ, ਤਤਿਯਪਦੇਨ ਅਰਹਾਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਗਾਥਾਸੁ ਉਭਯਨ੍ਤਿ ਉਭਯੇਨ, ਕਾਮਯੋਗੇਨ, ਭਵਯੋਗੇਨ ਚ ਸਂਯੁਤ੍ਤਾਤਿ ਅਤ੍ਥੋ. ਸਤ੍ਤਾ ਗਚ੍ਛਨ੍ਤਿ ਸਂਸਾਰਨ੍ਤਿ ਪੁਥੁਜ੍ਜਨਾ ਸੋਤਾਪਨ੍ਨਾ ਸਕਦਾਗਾਮਿਨੋਤਿ ਇਮੇ ਤਿਵਿਧਾ ਸਤ੍ਤਾ ਕਾਮਯੋਗਭਵਯੋਗਾਨਂ ਅਪ੍ਪਹੀਨਤ੍ਤਾ ਗਚ੍ਛਨ੍ਤਿ ਸਂਸਾਰਨ੍ਤਿ. ਤਤੋ ਏਵ ਜਾਤਿਮਰਣਗਾਮਿਨੋ ਹੋਨ੍ਤਿ. ਏਤ੍ਥ ਏਕਬੀਜੀ, ਕੋਲਂਕੋਲੋ, ਸਤ੍ਤਕ੍ਖਤ੍ਤੁਪਰਮੋਤਿ ਤੀਸੁ ਸੋਤਾਪਨ੍ਨੇਸੁ ਸਬ੍ਬਮੁਦੁ ਸਤ੍ਤਕ੍ਖਤ੍ਤੁਪਰਮੋ, ਸੋ ਅਟ੍ਠਮਂ ਭਵਂ ਨ ਨਿਬ੍ਬਤ੍ਤੇਤਿ, ਅਤ੍ਤਨੋ ਪਰਿਚ੍ਛਿਨ੍ਨਜਾਤਿਵਸੇਨ ਪਨ ਸਂਸਰਤਿ, ਤਥਾ ਇਤਰੇਪਿ. ਸਕਦਾਗਾਮੀਸੁਪਿ ਯੋ ਇਧ ਸਕਦਾਗਾਮਿਮਗ੍ਗਂ ਪਤ੍ਵਾ ਦੇਵਲੋਕੇ ਉਪ੍ਪਜ੍ਜਿਤ੍ਵਾ ਪੁਨ ਇਧ ਨਿਬ੍ਬਤ੍ਤਤਿ, ਸੋ ਅਤ੍ਤਨੋ ਪਰਿਚ੍ਛਿਨ੍ਨਜਾਤਿਵਸੇਨੇਵ ਸਂਸਰਤਿ. ਯੇ ਪਨ ਸਕਦਾਗਾਮਿਨੋ ਵੋਮਿਸ੍ਸਕਨਯੇਨ ਵਿਨਾ ਤਤ੍ਥ ਤਤ੍ਥ ਦੇਵੇਸੁਯੇਵ ਮਨੁਸ੍ਸੇਸੁਯੇਵ ਵਾ ਨਿਬ੍ਬਤ੍ਤਨ੍ਤਿ, ਤੇ ਉਪਰਿਮਗ੍ਗਾਧਿਗਮਾਯ ਯਾਵ ਇਨ੍ਦ੍ਰਿਯਪਰਿਪਾਕਾ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਂਸਰਨ੍ਤਿਯੇਵ. ਪੁਥੁਜ੍ਜਨੇ ਪਨ ਵਤ੍ਤਬ੍ਬਮੇਵ ਨਤ੍ਥਿ ਸਬ੍ਬਭਵਸਂਯੋਜਨਾਨਂ ਅਪਰਿਕ੍ਖੀਣਤ੍ਤਾ. ਤੇਨ ਵੁਤ੍ਤਂ –

‘‘ਕਾਮਯੋਗੇਨ ਸਂਯੁਤ੍ਤਾ, ਭਵਯੋਗੇਨ ਚੂਭਯਂ;

ਸਤ੍ਤਾ ਗਚ੍ਛਨ੍ਤਿ ਸਂਸਾਰਂ, ਜਾਤਿਮਰਣਗਾਮਿਨੋ’’ਤਿ.

ਕਾਮੇ ਪਹਨ੍ਤ੍ਵਾਨਾਤਿ ਕਾਮਰਾਗਸਙ੍ਖਾਤੇ ਕਿਲੇਸਕਾਮੇ ਅਨਾਗਾਮਿਮਗ੍ਗੇਨ ਪਜਹਿਤ੍ਵਾ. ਛਿਨ੍ਨਸਂਸਯਾਤਿ ਸਮੁਚ੍ਛਿਨ੍ਨਕਙ੍ਖਾ, ਤਞ੍ਚ ਖੋ ਸੋਤਾਪਤ੍ਤਿਮਗ੍ਗੇਨੇਵ. ਵਣ੍ਣਭਣਨਤ੍ਥਂ ਪਨ ਚਤੁਤ੍ਥਮਗ੍ਗਸ੍ਸ ਏਵਂ ਵੁਤ੍ਤਂ. ਅਰਹਨ੍ਤੋ ਹਿ ਇਧ ‘‘ਛਿਨ੍ਨਸਂਸਯਾ’’ਤਿ ਅਧਿਪ੍ਪੇਤਾ. ਤੇਨੇਵਾਹ ‘‘ਖੀਣਮਾਨਪੁਨਬ੍ਭਵਾ’’ਤਿ. ਸਬ੍ਬਸੋ ਖੀਣੋ ਨਵਵਿਧੋਪਿ ਮਾਨੋ ਆਯਤਿਂ ਪੁਨਬ੍ਭਵੋ ਚ ਏਤੇਸਨ੍ਤਿ ਖੀਣਮਾਨਪੁਨਬ੍ਭਵਾ. ਮਾਨਗ੍ਗਹਣੇਨ ਚੇਤ੍ਥ ਤਦੇਕਟ੍ਠਤਾਯ ਲਕ੍ਖਣਵਸੇਨ ਵਾ ਸਬ੍ਬੋ ਚਤੁਤ੍ਥਮਗ੍ਗਵਜ੍ਝੋ ਕਿਲੇਸੋ ਗਹਿਤੋਤਿ. ਖੀਣਮਾਨਤਾਯ ਚ ਸਉਪਾਦਿਸੇਸਾ ਨਿਬ੍ਬਾਨਧਾਤੁ ਵੁਤ੍ਤਾ ਹੋਤਿ, ਖੀਣਪੁਨਬ੍ਭਵਤਾਯ ਅਨੁਪਾਦਿਸੇਸਾ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.