੫. ਉਪਪਰਿਕ੍ਖਸੁਤ੍ਤਵਣ੍ਣਨਾ

੯੪. ਪਞ੍ਚਮੇ ਤਥਾ ਤਥਾਤਿ ਤੇਨ ਤੇਨ ਪਕਾਰੇਨ. ਉਪਪਰਿਕ੍ਖੇਯ੍ਯਾਤਿ ਵੀਮਂਸੇਯ੍ਯ ਪਰਿਤੁਲੇਯ੍ਯ ਸਮ੍ਮਸੇਯ੍ਯ ਵਾ. ਯਥਾ ਯਥਾਸ੍ਸ ਉਪਪਰਿਕ੍ਖਤੋਤਿ ਯਥਾ ਯਥਾ ਅਸ੍ਸ ਭਿਕ੍ਖੁਨੋ ਉਪਪਰਿਕ੍ਖਨ੍ਤਸ੍ਸ. ਬਹਿਦ੍ਧਾ ਚਸ੍ਸ ਵਿਞ੍ਞਾਣਂ ਅਵਿਕ੍ਖਿਤ੍ਤਂ ਅਵਿਸਟਨ੍ਤਿ ਬਹਿਦ੍ਧਾ ਰੂਪਾਦਿਆਰਮ੍ਮਣੇ ਉਪ੍ਪਜ੍ਜਨਕਵਿਕ੍ਖੇਪਾਭਾਵਤੋ ਅਵਿਕ੍ਖਿਤ੍ਤਂ ਸਮਾਹਿਤਂ, ਤਤੋ ਏਵ ਅਵਿਸਟਂ ਸਿਯਾ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖਵੇ, ਯੇਨ ਯੇਨ ਪਕਾਰੇਨ ਇਮਸ੍ਸ ਆਰਦ੍ਧਵਿਪਸ੍ਸਕਸ੍ਸ ਭਿਕ੍ਖੁਨੋ ਉਪਪਰਿਕ੍ਖਤੋ ਸਙ੍ਖਾਰੇ ਸਮ੍ਮਸਨ੍ਤਸ੍ਸ ਪੁਬ੍ਬੇ ਸਮਾਹਿਤਾਕਾਰਸਲ੍ਲਕ੍ਖਣਵਸੇਨ ਸਮਥਨਿਮਿਤ੍ਤਂ ਗਹੇਤ੍ਵਾ ਸਕ੍ਕਚ੍ਚਂ ਨਿਰਨ੍ਤਰਂ ਸਮ੍ਮਸਨਞਾਣਂ ਪਵਤ੍ਤੇਨ੍ਤਸ੍ਸ ਅਤ੍ਤਨੋ ਵਿਪਸ੍ਸਨਾਚਿਤ੍ਤਂ ਕਮ੍ਮਟ੍ਠਾਨਤੋ ਬਹਿਦ੍ਧਾ ਰੂਪਾਦਿਆਰਮ੍ਮਣੇ ਉਪ੍ਪਜ੍ਜਨਕਂ ਨ ਸਿਯਾ, ਅਚ੍ਚਾਰਦ੍ਧਵੀਰਿਯਤਾਯ ਉਦ੍ਧਚ੍ਚਪਕ੍ਖਿਯਂ ਨ ਸਿਯਾ, ਤੇਨ ਤੇਨ ਪਕਾਰੇਨ ਭਿਕ੍ਖੁ ਉਪਪਰਿਕ੍ਖੇਯ੍ਯ ਪਰਿਤੁਲੇਯ੍ਯਾਤਿ. ਅਜ੍ਝਤ੍ਤਂ ਅਸਣ੍ਠਿਤਨ੍ਤਿ ਯਸ੍ਮਾ ਵੀਰਿਯੇ ਮਨ੍ਦਂ ਵਹਨ੍ਤੇ ਸਮਾਧਿਸ੍ਸ ਬਲਵਭਾਵਤੋ ਕੋਸਜ੍ਜਾਭਿਭਵੇਨ ਅਜ੍ਝਤ੍ਤਂ ਗੋਚਰਜ੍ਝਤ੍ਤਸਙ੍ਖਾਤੇ ਕਮ੍ਮਟ੍ਠਾਨਾਰਮ੍ਮਣੇ ਸਙ੍ਕੋਚਵਸੇਨ ਠਿਤਤ੍ਤਾ ਸਣ੍ਠਿਤਂ ਨਾਮ ਹੋਤਿ, ਵੀਰਿਯਸਮਤਾਯ ਪਨ ਯੋਜਿਤਾਯ ਅਸਣ੍ਠਿਤਂ ਹੋਤਿ ਵੀਥਿਂ ਪਟਿਪਨ੍ਨਂ. ਤਸ੍ਮਾ ਯਥਾ ਯਥਾਸ੍ਸ ਉਪਪਰਿਕ੍ਖਤੋ ਵਿਞ੍ਞਾਣਂ ਅਜ੍ਝਤ੍ਤਂ ਅਸਣ੍ਠਿਤਂ ਅਸ੍ਸ, ਵੀਥਿਪਟਿਪਨ੍ਨਂ ਸਿਯਾ, ਤਥਾ ਤਥਾ ਉਪਪਰਿਕ੍ਖੇਯ੍ਯ. ਅਨੁਪਾਦਾਯ ਨ ਪਰਿਤਸ੍ਸੇਯ੍ਯਾਤਿ ਯਥਾ ਯਥਾਸ੍ਸ ਉਪਪਰਿਕ੍ਖਤੋ ‘‘ਏਤਂ ਮਮ, ਏਸੋ ਮੇ ਅਤ੍ਤਾ’’ਤਿ ਤਣ੍ਹਾਦਿਟ੍ਠਿਗ੍ਗਾਹਵਸੇਨ ਰੂਪਾਦੀਸੁ ਕਞ੍ਚਿ ਸਙ੍ਖਾਰਂ ਅਗ੍ਗਹੇਤ੍ਵਾ ਤਤੋ ਏਵ ਤਣ੍ਹਾਦਿਟ੍ਠਿਗ੍ਗਾਹਵਸੇਨ ਨ ਪਰਿਤਸ੍ਸੇਯ੍ਯ, ਤਥਾ ਤਥਾ ਉਪਪਰਿਕ੍ਖੇਯ੍ਯਾਤਿ ਸਮ੍ਬਨ੍ਧੋ. ਕਥਂ ਪਨ ਉਪਪਰਿਕ੍ਖਤੋ ਤਿਵਿਧਮ੍ਪੇਤਂ ਸਿਯਾਤਿ? ਉਦ੍ਧਚ੍ਚਪਕ੍ਖਿਯੇ ਕੋਸਜ੍ਜਪਕ੍ਖਿਯੇ ਚ ਧਮ੍ਮੇ ਵਜ੍ਜੇਨ੍ਤੋ ਵੀਰਿਯਸਮਤਂ ਯੋਜੇਤ੍ਵਾ ਪੁਬ੍ਬੇਵ ਵਿਪਸ੍ਸਨੁਪਕ੍ਕਿਲੇਸੇਹਿ ਚਿਤ੍ਤਂ ਵਿਸੋਧੇਤ੍ਵਾ ਯਥਾ ਸਮ੍ਮਦੇਵ ਵਿਪਸ੍ਸਨਾਞਾਣਂ ਵਿਪਸ੍ਸਨਾਵੀਥਿਂ ਪਟਿਪਜ੍ਜਤਿ, ਤਥਾ ਸਮ੍ਮਸਤੋ.

ਇਤਿ ਭਗਵਾ ਚਤੁਸਚ੍ਚਕਮ੍ਮਟ੍ਠਾਨਿਕਸ੍ਸ ਭਿਕ੍ਖੁਨੋ ਅਨੁਕ੍ਕਮੇਨ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਯਾ ਆਰਦ੍ਧਾਯ ਅਚ੍ਚਾਰਦ੍ਧਵੀਰਿਯਅਤਿਸਿਥਿਲਵੀਰਿਯਵਿਪਸ੍ਸਨੁਪਕ੍ਕਿਲੇਸੇਹਿ ਚਿਤ੍ਤਸ੍ਸ ਵਿਸੋਧਨੂਪਾਯਂ ਦਸ੍ਸੇਤ੍ਵਾ ਇਦਾਨਿ ਤਥਾ ਵਿਸੋਧਿਤੇ ਵਿਪਸ੍ਸਨਾਞਾਣੇ ਨ ਚਿਰਸ੍ਸੇਵ ਵਿਪਸ੍ਸਨਂ ਮਗ੍ਗੇਨ ਘਟੇਤ੍ਵਾ ਸਕਲਵਟ੍ਟਦੁਕ੍ਖਸਮਤਿਕ੍ਕਮਾਯ ਸਂਵਤ੍ਤਨ੍ਤੀਤਿ ਦਸ੍ਸੇਨ੍ਤੋ ‘‘ਬਹਿਦ੍ਧਾ, ਭਿਕ੍ਖਵੇ, ਵਿਞ੍ਞਾਣੇ’’ਤਿਆਦਿਮਾਹ, ਤਂ ਵੁਤ੍ਤਨਯਮੇਵ. ਯਂ ਪਨ ਵੁਤ੍ਤਂ – ‘‘ਆਯਤਿਂ ਜਾਤਿਜਰਾਮਰਣਦੁਕ੍ਖਸਮੁਦਯਸਮ੍ਭਵੋ ਨ ਹੋਤੀ’’ਤਿ, ਤਸ੍ਸਤ੍ਥੋ – ਏਵਂ ਵਿਪਸ੍ਸਨਂ ਮਗ੍ਗੇਨ ਘਟੇਤ੍ਵਾ ਮਗ੍ਗਪਟਿਪਾਟਿਯਾ ਅਗ੍ਗਮਗ੍ਗੇਨ ਅਨਵਸੇਸਤੋ ਕਿਲੇਸੇਸੁ ਖੀਣੇਸੁ ਆਯਤਿਂ ਅਨਾਗਤੇ ਜਾਤਿਜਰਾਮਰਣਸਕਲਵਟ੍ਟਦੁਕ੍ਖਸਮੁਦਯਸਙ੍ਖਾਤੋ ਸਮ੍ਭਵੋ ਉਪ੍ਪਾਦੋ ਚ ਨ ਹੋਤਿ, ਜਾਤਿਸਙ੍ਖਾਤੋ ਵਾ ਦੁਕ੍ਖਸਮੁਦਯੋ ਜਰਾਮਰਣਸਙ੍ਖਾਤੋ ਦੁਕ੍ਖਸਮ੍ਭਵੋ ਚ ਨ ਹੋਤਿ.

ਗਾਥਾਯਂ ਸਤ੍ਤਸਙ੍ਗਪ੍ਪਹੀਨਸ੍ਸਾਤਿ ਤਣ੍ਹਾਸਙ੍ਗੋ, ਦਿਟ੍ਠਿਸਙ੍ਗੋ, ਮਾਨਸਙ੍ਗੋ, ਕੋਧਸਙ੍ਗੋ, ਅਵਿਜ੍ਜਾਸਙ੍ਗੋ, ਕਿਲੇਸਸਙ੍ਗੋ, ਦੁਚ੍ਚਰਿਤਸਙ੍ਗੋਤਿ ਇਮੇਸਂ ਸਤ੍ਤਨ੍ਨਂ ਸਙ੍ਗਾਨਂ ਪਹੀਨਤ੍ਤਾ ਸਤ੍ਤਸਙ੍ਗਪ੍ਪਹੀਨਸ੍ਸ. ਕੇਚਿ ਪਨ ‘‘ਸਤ੍ਤਾਨੁਸਯਾ ਏਵ ਸਤ੍ਤ ਸਙ੍ਗਾ’’ਤਿ ਵਦਨ੍ਤਿ. ਨੇਤ੍ਤਿਚ੍ਛਿਨ੍ਨਸ੍ਸਾਤਿ ਛਿਨ੍ਨਭਵਨੇਤ੍ਤਿਕਸ੍ਸ. ਵਿਕ੍ਖੀਣੋ ਜਾਤਿਸਂਸਾਰੋਤਿ ਪੁਨਪ੍ਪੁਨਂ ਜਾਯਨਵਸੇਨ ਪਵਤ੍ਤਿਯਾ ਜਾਤਿਹੇਤੁਕਤ੍ਤਾ ਚ ਜਾਤਿਭੂਤੋ ਸਂਸਾਰੋਤਿ ਜਾਤਿਸਂਸਾਰੋ, ਸੋ ਭਵਨੇਤ੍ਤਿਯਾ ਛਿਨ੍ਨਤ੍ਤਾ ਵਿਕ੍ਖੀਣੋ ਪਰਿਕ੍ਖੀਣੋ, ਤਤੋ ਏਵ ਨਤ੍ਥਿ ਤਸ੍ਸ ਪੁਨਬ੍ਭਵੋਤਿ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.