੨. ਜੀਵਿਕਸੁਤ੍ਤਵਣ੍ਣਨਾ

੯੧. ਦੁਤਿਯਂ ਅਟ੍ਠੁਪ੍ਪਤ੍ਤਿਵਸੇਨ ਦੇਸਿਤਂ. ਏਕਸ੍ਮਿਞ੍ਹਿ ਸਮਯੇ ਭਗਵਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਵਿਹਰਨ੍ਤੇ ਭਿਕ੍ਖੂ ਆਗਨ੍ਤੁਕਭਿਕ੍ਖੂਨਂ ਸੇਨਾਸਨਾਨਿ ਪਞ੍ਞਾਪੇਨ੍ਤਾ ਪਤ੍ਤਚੀਵਰਾਨਿ ਪਟਿਸਾਮੇਨ੍ਤਾ ਸਾਮਣੇਰਾ ਚ ਲਾਭਭਾਜਨੀਯਟ੍ਠਾਨੇ ਸਮ੍ਪਤ੍ਤਸਮ੍ਪਤ੍ਤਾਨਂ ਲਾਭਂ ਗਣ੍ਹਨ੍ਤਾ ਉਚ੍ਚਾਸਦ੍ਦਾ ਮਹਾਸਦ੍ਦਾ ਅਹੇਸੁਂ. ਤਂ ਸੁਤ੍ਵਾ ਭਗਵਾ ਭਿਕ੍ਖੂ ਪਣਾਮੇਸਿ. ਤੇ ਕਿਰ ਸਬ੍ਬੇਵ ਨਵਾ ਅਧੁਨਾਗਤਾ ਇਮਂ ਧਮ੍ਮਵਿਨਯਂ. ਤਂ ਞਤ੍ਵਾ ਮਹਾਬ੍ਰਹ੍ਮਾ ਆਗਨ੍ਤ੍ਵਾ ‘‘ਅਭਿਨਨ੍ਦਤੁ, ਭਨ੍ਤੇ, ਭਗਵਾ ਭਿਕ੍ਖੁਸਙ੍ਘ’’ਨ੍ਤਿ (ਮ. ਨਿ. ੨.੧੫੮) ਤੇਸਂ ਪਣਾਮਿਤਭਿਕ੍ਖੂਨਂ ਅਨੁਗ੍ਗਣ੍ਹਨਂ ਯਾਚਿ. ਭਗਵਾ ਤਸ੍ਸ ਓਕਾਸਂ ਅਕਾਸਿ. ਅਥ ਮਹਾਬ੍ਰਹ੍ਮਾ ‘‘ਕਤਾਵਕਾਸੋ ਖੋਮ੍ਹਿ ਭਗਵਤਾ’’ਤਿ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਭਗਵਾ ‘‘ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ ਆਨਨ੍ਦਤ੍ਥੇਰਸ੍ਸ ਆਕਾਰਂ ਦਸ੍ਸੇਸਿ. ਅਥ ਤੇ ਭਿਕ੍ਖੂ ਆਨਨ੍ਦਤ੍ਥੇਰੇਨ ਪਕ੍ਕੋਸਿਤਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਸਾਰਜ੍ਜਮਾਨਰੂਪਾ ਏਕਮਨ੍ਤਂ ਨਿਸੀਦਿਂਸੁ. ਭਗਵਾ ਤੇਸਂ ਸਪ੍ਪਾਯਦੇਸਨਂ ਵੀਮਂਸਨ੍ਤੋ ‘‘ਇਮੇ ਆਮਿਸਹੇਤੁ ਪਣਾਮਿਤਾ, ਪਿਣ੍ਡਿਯਾਲੋਪਧਮ੍ਮਦੇਸਨਾ ਨੇਸਂ ਸਪ੍ਪਾਯਾ’’ਤਿ ਚਿਨ੍ਤੇਤ੍ਵਾ ‘‘ਅਨ੍ਤਮਿਦਂ, ਭਿਕ੍ਖਵੇ’’ਤਿ ਇਮਂ ਦੇਸਨਂ ਦੇਸੇਸਿ.

ਤਤ੍ਰਾਯਂ ਅਨ੍ਤਸਦ੍ਦੋ ‘‘ਸਨ੍ਤਿ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਪੁਬ੍ਬਨ੍ਤਕਪ੍ਪਿਕਾ ਪੁਬ੍ਬਨ੍ਤਾਨੁਦਿਟ੍ਠਿਨੋ’’ਤਿਆਦੀਸੁ (ਦੀ. ਨਿ. ੧.੨੯) ਕੋਟ੍ਠਾਸੇ ਆਗਤੋ. ‘‘ਅਨ੍ਤਮਕਾਸਿ ਦੁਕ੍ਖਸ੍ਸ, ਅਨ੍ਤਵਾ ਅਯਂ ਲੋਕੋ ਪਰਿਵਟੁਮੋ’’ਤਿਆਦੀਸੁ (ਦੀ. ਨਿ. ੧.੫੫) ਪਰਿਚ੍ਛੇਦੇ. ‘‘ਹਰਿਤਨ੍ਤਂ ਵਾ ਪਥਨ੍ਤਂ ਵਾ ਸੇਲਨ੍ਤਂ ਵਾ’’ਤਿਆਦੀਸੁ (ਮ. ਨਿ. ੧.੩੦੪) ਮਰਿਯਾਦਾਯਂ. ‘‘ਅਨ੍ਤਂ ਅਨ੍ਤਗੁਣ’’ਨ੍ਤਿਆਦੀਸੁ (ਦੀ. ਨਿ. ੨.੩੭੭; ਖੁ. ਪਾ. ੩.ਦ੍ਵਤ੍ਤਿਂਸਾਕਾਰ) ਸਰੀਰਾਵਯਵੇ ‘‘ਚਰਨ੍ਤਿ ਲੋਕੇ ਪਰਿਵਾਰਛਨ੍ਨਾ, ਅਨ੍ਤੋ ਅਸੁਦ੍ਧਾ ਬਹਿ ਸੋਭਮਾਨਾ’’ਤਿਆਦੀਸੁ (ਸਂ. ਨਿ. ੧.੧੨੨; ਮਹਾਨਿ. ੧੯੧) ਚਿਤ੍ਤੇ. ‘‘ਅਪ੍ਪੇਕਚ੍ਚਾਨਿ ਉਪ੍ਪਲਾਨਿ ਵਾ ਪਦੁਮਾਨਿ ਵਾ ਪੁਣ੍ਡਰੀਕਾਨਿ ਵਾ ਉਦਕੇ ਜਾਤਾਨਿ ਉਦਕੇ ਸਂਵਡ੍ਢਾਨਿ ਉਦਕਾਨੁਗ੍ਗਤਾਨਿ ਅਨ੍ਤੋ ਨਿਮੁਗ੍ਗਪੋਸੀਨੀ’’ਤਿਆਦੀਸੁ (ਦੀ. ਨਿ. ੨.੬੯; ਸਂ. ਨਿ. ੧.੧੭੨; ਮਹਾਵ. ੯) ਅਬ੍ਭਨ੍ਤਰੇ.

‘‘ਮਿਗਾਨਂ ਕੋਟ੍ਠੁਕੋ ਅਨ੍ਤੋ, ਪਕ੍ਖੀਨਂ ਪਨ ਵਾਯਸੋ;

ਏਰਣ੍ਡੋ ਅਨ੍ਤੋ ਰੁਕ੍ਖਾਨਂ, ਤਯੋ ਅਨ੍ਤਾ ਸਮਾਗਤਾ’’ਤਿ. (ਜਾ. ੧.੩.੧੩੫) –

ਆਦੀਸੁ ਲਾਮਕੇ. ਇਧਾਪਿ ਲਾਮਕੇ ਏਵ ਦਟ੍ਠਬ੍ਬੋ. ਤਸ੍ਮਾ ਅਨ੍ਤਮਿਦਂ ਭਿਕ੍ਖਵੇ ਜੀਵਿਕਾਨਨ੍ਤਿ ਭਿਕ੍ਖਵੇ ਇਦਂ ਜੀਵਿਕਾਨਂ ਅਨ੍ਤਂ ਪਚ੍ਛਿਮਂ ਲਾਮਕਂ, ਸਬ੍ਬਨਿਹੀਨਂ ਜੀਵਿਤਨ੍ਤਿ ਅਤ੍ਥੋ. ਯਦਿਦਂ ਪਿਣ੍ਡੋਲ੍ਯਨ੍ਤਿ ਯਂ ਇਦਂ ਪਿਣ੍ਡਪਰਿਯੇਸਨੇਨ ਭਿਕ੍ਖਾਚਰਿਯਾਯ ਜੀਵਿਕਂ ਕਪ੍ਪੇਨ੍ਤਸ੍ਸ ਜੀਵਿਤਂ. ਅਯਂ ਪਨੇਤ੍ਥ ਪਦਤ੍ਥੋ – ਪਿਣ੍ਡਾਯ ਉਲਤੀਤਿ ਪਿਣ੍ਡੋਲੋ, ਤਸ੍ਸ ਕਮ੍ਮਂ ਪਿਣ੍ਡੋਲ੍ਯਂ, ਪਿਣ੍ਡਪਰਿਯੇਸਨੇਨ ਜੀਵਿਕਾਤਿ ਅਤ੍ਥੋ.

ਅਭਿਸਾਪੋਤਿ ਅਕ੍ਕੋਸੋ. ਕੁਪਿਤਾ ਹਿ ਮਨੁਸ੍ਸਾ ਅਤ੍ਤਨੋ ਪਚ੍ਚਤ੍ਥਿਕਂ ‘‘ਪਿਲੋਤਿਕਖਣ੍ਡਂ ਨਿਵਾਸੇਤ੍ਵਾ ਕਪਾਲਹਤ੍ਥੋ ਪਿਣ੍ਡਂ ਪਰਿਯੇਸਮਾਨੋ ਚਰੇਯ੍ਯਾਸੀ’’ਤਿ ਅਕ੍ਕੋਸਨ੍ਤਿ. ਅਥ ਵਾ ‘‘ਕਿਂ ਤੁਯ੍ਹਂ ਅਕਾਤਬ੍ਬਂ ਅਤ੍ਥਿ, ਯੋ ਤ੍ਵਂ ਏਵਂ ਬਲਵੀਰਿਯੂਪਪਨ੍ਨੋਪਿ ਹਿਰੋਤ੍ਤਪ੍ਪਂ ਪਹਾਯ ਕਪਣੋ ਪਿਣ੍ਡੋਲੋ ਵਿਚਰਸਿ ਪਤ੍ਤਪਾਣੀ’’ਤਿ ਏਵਮ੍ਪਿ ਅਕ੍ਕੋਸਨ੍ਤਿਯੇਵ. ਤਞ੍ਚ ਖੋ ਏਤਨ੍ਤਿ ਤਂ ਏਤਂ ਅਭਿਸਪਮ੍ਪਿ ਸਮਾਨਂ ਪਿਣ੍ਡੋਲ੍ਯਂ. ਕੁਲਪੁਤ੍ਤਾ ਉਪੇਨ੍ਤਿ ਅਤ੍ਥਵਸਿਕਾਤਿ ਮਮ ਸਾਸਨੇ ਜਾਤਿਕੁਲਪੁਤ੍ਤਾ ਚ ਆਚਾਰਕੁਲਪੁਤ੍ਤਾ ਚ ਅਤ੍ਥਵਸਿਕਾ ਕਾਰਣਵਸਿਕਾ ਹੁਤ੍ਵਾ ਕਾਰਣਵਸਂ ਪਟਿਚ੍ਚ ਉਪੇਨ੍ਤਿ ਉਪਗਚ੍ਛਨ੍ਤਿ.

ਰਾਜਾਭਿਨੀਤਾਤਿਆਦੀਸੁ ਯੇ ਰਞ੍ਞੋ ਸਨ੍ਤਕਂ ਖਾਦਿਤ੍ਵਾ ਰਞ੍ਞਾ ਬਨ੍ਧਨਾਗਾਰੇ ਬਨ੍ਧਾਪਿਤਾ ਪਲਾਯਿਤ੍ਵਾ ਪਬ੍ਬਜਨ੍ਤਿ, ਤੇ ਰਞ੍ਞਾ ਬਨ੍ਧਨਂ ਅਭਿਨੀਤਤ੍ਤਾ ਰਾਜਾਭਿਨੀਤਾ ਨਾਮ. ਯੇ ਪਨ ਚੋਰੇਹਿ ਅਟਵਿਯਂ ਗਹੇਤ੍ਵਾ ਏਕਚ੍ਚੇਸੁ ਮਾਰਿਯਮਾਨੇਸੁ ਏਕਚ੍ਚੇ ‘‘ਮਯਂ ਸਾਮਿ ਤੁਮ੍ਹੇਹਿ ਵਿਸ੍ਸਟ੍ਠਾ ਗੇਹਂ ਅਨਜ੍ਝਾਵਸਿਤ੍ਵਾ ਪਬ੍ਬਜਿਸ੍ਸਾਮ, ਤਤ੍ਥ ਤਤ੍ਥ ਯਂ ਯਂ ਬੁਦ੍ਧਪੂਜਾਦਿਪੁਞ੍ਞਂ ਕਰਿਸ੍ਸਾਮ, ਤਤੋ ਤਤੋ ਤੁਮ੍ਹਾਕਂ ਪਤ੍ਤਿਂ ਦਸ੍ਸਾਮਾ’’ਤਿ ਤੇਹਿ ਵਿਸ੍ਸਟ੍ਠਾ ਪਬ੍ਬਜਨ੍ਤਿ, ਤੇ ਚੋਰਾਭਿਨੀਤਾ ਨਾਮ ਚੋਰੇਹਿ ਮਾਰੇਤਬ੍ਬਤਂ ਅਭਿਨੀਤਤ੍ਤਾ. ਯੇ ਪਨ ਇਣਂ ਗਹੇਤ੍ਵਾ ਪਟਿਦਾਤੁਂ ਅਸਕ੍ਕੋਨ੍ਤਾ ਪਲਾਯਿਤ੍ਵਾ ਪਬ੍ਬਜਨ੍ਤਿ, ਤੇ ਇਣਟ੍ਟਾ ਨਾਮ. ਤਞ੍ਚ ਖੋ ਏਤਂ ਪਿਣ੍ਡੋਲ੍ਯਂ ਕੁਲਪੁਤ੍ਤਾ ਮਮ ਸਾਸਨੇ ਨੇਵ ਰਾਜਾਭਿਨੀਤਾ…ਪੇ… ਨ ਆਜੀਵਿਕਾਪਕਤਾ ਉਪੇਨ੍ਤਿ, ਅਪਿਚ ਖੋ ‘‘ਓਤਿਣ੍ਣਮ੍ਹਾ ਜਾਤਿਯਾ…ਪੇ… ਪਞ੍ਞਾਯੇਥਾ’’ਤਿ ਉਪੇਨ੍ਤੀਤਿ ਪਦਸਮ੍ਬਨ੍ਧੋ.

ਤਤ੍ਥ ਓਤਿਣ੍ਣਮ੍ਹਾਤਿ ਓਤਿਣ੍ਣਾ ਅਮ੍ਹਾ. ਜਾਤਿਯਾਤਿਆਦੀਸੁ ਤਮ੍ਹਿ ਤਮ੍ਹਿ ਸਤ੍ਤਨਿਕਾਯੇ ਖਨ੍ਧਾਨਂ ਪਠਮਾਭਿਨਿਬ੍ਬਤ੍ਤਿ ਜਾਤਿ, ਪਰਿਪਾਕੋ ਜਰਾ, ਭੇਦੋ ਮਰਣਂ. ਞਾਤਿਰੋਗਭੋਗਸੀਲਦਿਟ੍ਠਿਬ੍ਯਸਨੇਹਿ ਫੁਟ੍ਠਸ੍ਸ ਸਨ੍ਤਾਪੋ ਅਨ੍ਤੋ ਨਿਜ੍ਝਾਨਂ ਸੋਕੋ, ਤੇਹਿ ਫੁਟ੍ਠਸ੍ਸ ਵਚੀਵਿਪ੍ਪਲਾਪੋ ਪਰਿਦੇਵੋ. ਅਨਿਟ੍ਠਫੋਟ੍ਠਬ੍ਬਪਟਿਹਤਕਾਯਸ੍ਸ ਕਾਯਪੀਲ਼ਨਂ ਦੁਕ੍ਖਂ, ਆਘਾਤਵਤ੍ਥੂਸੁ ਉਪਹਤਚਿਤ੍ਤਸ੍ਸ ਚੇਤੋਪੀਲ਼ਨਂ ਦੋਮਨਸ੍ਸਂ. ਞਾਤਿਬ੍ਯਸਨਾਦੀਹਿ ਏਵ ਫੁਟ੍ਠਸ੍ਸ ਪਰਿਦੇਵੇਨਪਿ ਅਧਿਵਾਸੇਤੁਂ ਅਸਮਤ੍ਥਸ੍ਸ ਚਿਤ੍ਤਸਨ੍ਤਾਪਸਮੁਟ੍ਠਿਤੋ ਭੁਸੋ ਆਯਾਸੋ ਉਪਾਯਾਸੋ. ਏਤੇਹਿ ਜਾਤਿਆਦੀਹਿ ਓਤਿਣ੍ਣਾ ਦੁਕ੍ਖੋਤਿਣ੍ਣਾ, ਤੇਹਿ ਜਾਤਿਆਦਿਦੁਕ੍ਖੇਹਿ ਅਨ੍ਤੋ ਅਨੁਪਵਿਟ੍ਠਾ. ਦੁਕ੍ਖਪਰੇਤਾਤਿ ਤੇਹਿ ਦੁਕ੍ਖਦੁਕ੍ਖਵਤ੍ਥੂਹਿ ਅਭਿਭੂਤਾ. ਜਾਤਿਆਦਯੋ ਹਿ ਦੁਕ੍ਖਸ੍ਸ ਵਤ੍ਥੁਭਾਵਤੋ ਦੁਕ੍ਖਾ, ਦੁਕ੍ਖਭਾਵਤੋ ਚ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਦੁਕ੍ਖਾਤਿ. ਅਪ੍ਪੇਵ ਨਾਮ…ਪੇ… ਪਞ੍ਞਾਯੇਥਾਤਿ ਇਮਸ੍ਸ ਸਕਲਸ੍ਸ ਵਟ੍ਟਦੁਕ੍ਖਰਾਸਿਸ੍ਸ ਪਰਿਚ੍ਛੇਦਕਰਣਂ ਓਸਾਨਕਿਰਿਯਾ ਅਪਿ ਨਾਮ ਪਞ੍ਞਾਯੇਯ੍ਯ.

ਸੋ ਚ ਹੋਤਿ ਅਭਿਜ੍ਝਾਲੂਤਿ ਇਦਂ ਯੋ ਕੁਲਪੁਤ੍ਤੋ ‘‘ਦੁਕ੍ਖਸ੍ਸਨ੍ਤਂ ਕਰਿਸ੍ਸਾਮੀ’’ਤਿ ਪੁਬ੍ਬੇ ਚਿਤ੍ਤਂ ਉਪ੍ਪਾਦੇਤ੍ਵਾ ਪਬ੍ਬਜਿਤੋ ਅਪਰਭਾਗੇ ਤਂ ਪਬ੍ਬਜ੍ਜਂ ਤਥਾਰੂਪਂ ਕਾਤੁਂ ਨ ਸਕ੍ਕੋਤਿ, ਤਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਅਭਿਜ੍ਝਾਲੂਤਿ ਪਰਭਣ੍ਡਾਨਂ ਅਭਿਜ੍ਝਾਯਿਤਾ. ਤਿਬ੍ਬਸਾਰਾਗੋਤਿ ਬਲਵਰਾਗੋ. ਬ੍ਯਾਪਨ੍ਨਚਿਤ੍ਤੋਤਿ ਬ੍ਯਾਪਾਦੇਨ ਪੂਤਿਭੂਤਤ੍ਤਾ ਵਿਪਨ੍ਨਚਿਤ੍ਤੋ. ਪਦੁਟ੍ਠਮਨਸਙ੍ਕਪ੍ਪੋਤਿ ਤਿਖਿਣਸਿਙ੍ਗੋ ਵਿਯ ਚਣ੍ਡਗੋਣੋ ਪਰੇਸਂ ਉਪਘਾਤਵਸੇਨ ਦੁਟ੍ਠਚਿਤ੍ਤੋ. ਮੁਟ੍ਠਸ੍ਸਤੀਤਿ ਭਤ੍ਤਨਿਕ੍ਖਿਤ੍ਤਕਾਕੋ ਵਿਯ, ਮਂਸਨਿਕ੍ਖਿਤ੍ਤਸੁਨਖੋ ਵਿਯ ਚ ਨਟ੍ਠਸ੍ਸਤਿ, ਇਧ ਕਤਂ ਏਤ੍ਥ ਨ ਸਰਤਿ. ਅਸਮ੍ਪਜਾਨੋਤਿ ਨਿਪ੍ਪਞ੍ਞੋ ਖਨ੍ਧਾਦਿਪਰਿਚ੍ਛੇਦਰਹਿਤੋ. ਅਸਮਾਹਿਤੋਤਿ ਚਣ੍ਡਸੋਤੇ ਬਦ੍ਧਨਾਵਾ ਵਿਯ ਅਸਣ੍ਠਿਤੋ. ਵਿਬ੍ਭਨ੍ਤਚਿਤ੍ਤੋਤਿ ਪਨ੍ਥਾਰੁਲ਼੍ਹਮਿਗੋ ਵਿਯ ਭਨ੍ਤਮਨੋ. ਪਾਕਤਿਨ੍ਦ੍ਰਿਯੋਤਿ ਯਥਾ ਗਿਹੀ ਸਂਵਰਾਭਾਵੇਨ ਪਰਿਗ੍ਗਹਪਰਿਜਨੇ ਓਲੋਕੇਨ੍ਤਿ ਅਸਂਵੁਤਿਨ੍ਦ੍ਰਿਯਾ, ਏਵਂ ਅਸਂਵੁਤਿਨ੍ਦ੍ਰਿਯੋ ਹੋਤਿ.

ਛਵਾਲਾਤਨ੍ਤਿ ਛਵਾਨਂ ਦਡ੍ਢਟ੍ਠਾਨੇ ਅਲਾਤਂ. ਉਭਤੋਪਦਿਤ੍ਤਂ ਮਜ੍ਝੇ ਗੂਥਗਤਨ੍ਤਿ ਪਮਾਣੇਨ ਅਟ੍ਠਙ੍ਗੁਲਮਤ੍ਤਂ ਉਭਤੋ ਦ੍ਵੀਸੁ ਕੋਟੀਸੁ ਆਦਿਤ੍ਤਂ ਮਜ੍ਝੇ ਗੂਥਮਕ੍ਖਿਤਂ. ਨੇਵ ਗਾਮੇਤਿ ਸਚੇ ਹਿ ਤਂ ਯੁਗਨਙ੍ਗਲਗੋਪਾਨਸਿਪਕ੍ਖਪਾਸਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ ਅਸ੍ਸ ਗਾਮੇ ਕਟ੍ਠਤ੍ਥਂ ਫਰੇਯ੍ਯ. ਸਚੇ ਖੇਤ੍ਤਕੁਟਿਯਾ ਕਟ੍ਠਤ੍ਥਰਮਞ੍ਚਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ ਅਸ੍ਸ, ਅਰਞ੍ਞੇ ਕਟ੍ਠਤ੍ਥਂ ਫਰੇਯ੍ਯ. ਯਸ੍ਮਾ ਪਨ ਉਭਯਤ੍ਥਾਪਿ ਨ ਸਕ੍ਕਾ, ਤਸ੍ਮਾ ਏਵਂ ਵੁਤ੍ਤਂ. ਤਥੂਪਮਾਹਨ੍ਤਿ ਤਥੂਪਮਂ ਛਵਾਲਾਤਸਦਿਸਂ ਅਹਂ ਇਮਂ ਯਥਾਵੁਤ੍ਤਪੁਗ੍ਗਲਂ ਵਦਾਮਿ. ਗਿਹਿਭੋਗਾ ਚ ਪਰਿਹੀਨੋਤਿ ਯੋ ਅਗਾਰੇ ਵਸਨ੍ਤੇਹਿ ਗਿਹੀਹਿ ਦਾਯਜ੍ਜੇ ਭਾਜਿਯਮਾਨੇ ਅਞ੍ਞਥਾ ਚ ਭੋਗੋ ਲਦ੍ਧਬ੍ਬੋ ਅਸ੍ਸ, ਤਤੋ ਚ ਪਰਿਹੀਨੋ. ਸਾਮਞ੍ਞਤ੍ਥਞ੍ਚਾਤਿ ਆਚਰਿਯੁਪਜ੍ਝਾਯਾਨਂ ਓਵਾਦੇ ਠਤ੍ਵਾ ਪਰਿਯਤ੍ਤਿਪਟਿਵੇਧਵਸੇਨ ਪਤ੍ਤਬ੍ਬਂ ਸਾਮਞ੍ਞਤ੍ਥਞ੍ਚ ਨ ਪਰਿਪੂਰੇਤਿ. ਇਮਂ ਪਨ ਉਪਮਂ ਸਤ੍ਥਾ ਨ ਦੁਸ੍ਸੀਲਸ੍ਸ ਵਸੇਨ ਆਹਰਿ, ਪਰਿਸੁਦ੍ਧਸੀਲਸ੍ਸ ਪਨ ਅਲਸਸ੍ਸ ਅਭਿਜ੍ਝਾਦੀਹਿ ਦੋਸੇਹਿ ਦੂਸਿਤਚਿਤ੍ਤਸ੍ਸ ਪੁਗ੍ਗਲਸ੍ਸ ਵਸੇਨ ਆਹਰੀਤਿ ਵੇਦਿਤਬ੍ਬਂ.

ਗਾਥਾਸੁ ਗਿਹਿਭੋਗਾਤਿ ਕਾਮਸੁਖਸਮ੍ਭੋਗਤੋ. ਪਰਿਹੀਨੋਤਿ ਜੀਨੋ. ਸਾਮਞ੍ਞਤ੍ਥਨ੍ਤਿ ਪਟਿਵੇਧਬਾਹੁਸਚ੍ਚਞ੍ਚੇਵ ਪਰਿਯਤ੍ਤਿਬਾਹੁਸਚ੍ਚਞ੍ਚ. ਤਾਦਿਸੋ ਹਿ ਅਸੁਤਂ ਸੋਤੁਂ ਸੁਤਂ ਪਰਿਯੋਦਾਪੇਤੁਂ ਨ ਸਕ੍ਕੋਤਿ ਅਲਸਭਾਵਤੋ. ਦੁਟ੍ਠੁ ਭਗੋਤਿ ਦੁਬ੍ਭਗੋ, ਅਲਕ੍ਖਿਕੋ ਕਾਲ਼ਕਣ੍ਣਿਪੁਰਿਸੋ. ਪਰਿਧਂਸਮਾਨੋਤਿ ਵਿਨਸ੍ਸਮਾਨੋ. ਪਕਿਰੇਤੀਤਿ ਵਿਕਿਰੇਤਿ ਵਿਦ੍ਧਂਸੇਤਿ. ਸਬ੍ਬਮੇਤਂ ਭਾਵਿਨੋ ਸਾਮਞ੍ਞਤ੍ਥਸ੍ਸ ਅਨੁਪ੍ਪਾਦਨਮੇਵ ਸਨ੍ਧਾਯ ਵੁਤ੍ਤਂ. ਛਵਾਲਾਤਂਵ ਨਸ੍ਸਤੀਤਿ ਸੋ ਤਾਦਿਸੋ ਪੁਗ੍ਗਲੋ ਯਥਾਵੁਤ੍ਤਂ ਛਵਾਲਾਤਂ ਵਿਯ ਕਸ੍ਸਚਿ ਅਨੁਪਯੁਜ੍ਜਮਾਨੋ ਏਵ ਨਸ੍ਸਤਿ ਉਭਤੋ ਪਰਿਭਟ੍ਠਭਾਵਤੋ. ਏਵਂ ‘‘ਕਾਯਵਾਚਾਹਿ ਅਕਤਵੀਤਿਕ੍ਕਮੋਪਿ ਚਿਤ੍ਤਂ ਅਵਿਸੋਧੇਨ੍ਤੋ ਨਸ੍ਸਤਿ, ਪਗੇਵ ਕਤਵੀਤਿਕ੍ਕਮੋ ਦੁਸ੍ਸੀਲੋ’’ਤਿ ਤਸ੍ਸ ਅਪਾਯਦੁਕ੍ਖਭਾਗਿਭਾਵਦਸ੍ਸਨੇਨ ਦੁਸ੍ਸੀਲੇ ਆਦੀਨਵਂ ਦਸ੍ਸੇਤ੍ਵਾ ਤਤੋ ਸਤ੍ਤੇ ਵਿਵੇਚੇਤੁਕਾਮੋ ‘‘ਕਾਸਾਵਕਣ੍ਠਾ’’ਤਿਆਦਿਨਾ ਗਾਥਾਦ੍ਵਯਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋ ਏਵ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.