੧੦. ਦੁਤਿਯਰਾਗਸੁਤ੍ਤਵਣ੍ਣਨਾ

੬੯. ਦਸਮੇ ਅਤਰੀਤਿ ਤਿਣ੍ਣੋ, ਨ ਤਿਣ੍ਣੋ ਅਤਿਣ੍ਣੋ. ਸਮੁਦ੍ਦਨ੍ਤਿ ਸਂਸਾਰਸਮੁਦ੍ਦਂ, ਚਕ੍ਖਾਯਤਨਾਦਿਸਮੁਦ੍ਦਂ ਵਾ. ਤਦੁਭਯਮ੍ਪਿ ਦੁਪ੍ਪੂਰਣਟ੍ਠੇਨ ਸਮੁਦ੍ਦੋ ਵਿਯਾਤਿ ਸਮੁਦ੍ਦਂ. ਅਥ ਵਾ ਸਮੁਦ੍ਦਨਟ੍ਠੇਨ ਸਮੁਦ੍ਦਂ, ਕਿਲੇਸਵਸ੍ਸਨੇਨ ਸਤ੍ਤਸਨ੍ਤਾਨਸ੍ਸ ਕਿਲੇਸਸਦਨਤੋਤਿ ਅਤ੍ਥੋ. ਸਵੀਚਿਨ੍ਤਿ ਕੋਧੂਪਾਯਾਸਵੀਚੀਹਿ ਸਵੀਚਿਂ. ਵੁਤ੍ਤਞ੍ਹੇਤਂ ‘‘ਵੀਚਿਭਯਨ੍ਤਿ ਖੋ, ਭਿਕ੍ਖੁ, ਕੋਧੂਪਾਯਾਸਸ੍ਸੇਤਂ ਅਧਿਵਚਨ’’ਨ੍ਤਿ (ਇਤਿਵੁ. ੧੦੯; ਮ. ਨਿ. ੨.੧੬੨). ਸਾਵਟ੍ਟਨ੍ਤਿ ਪਞ੍ਚਕਾਮਗੁਣਾਵਟ੍ਟੇਹਿ ਸਹ ਆਵਟ੍ਟਂ. ਵੁਤ੍ਤਮ੍ਪਿ ਚੇਤਂ ‘‘ਆਵਟ੍ਟਭਯਨ੍ਤਿ ਖੋ, ਭਿਕ੍ਖੁ, ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨ’’ਨ੍ਤਿ (ਇਤਿਵੁ. ੧੦੯; ਮ. ਨਿ. ੨.੧੬੪; ਅ. ਨਿ. ੪.੧੨੨). ਸਗਹਂ ਸਰਕ੍ਖਸਨ੍ਤਿ ਅਤ੍ਤਨੋ ਗੋਚਰਗਤਾਨਂ ਅਨਤ੍ਥਜਨਨਤੋ ਚਣ੍ਡਮਕਰਮਚ੍ਛਕਚ੍ਛਪਰਕ੍ਖਸਸਦਿਸੇਹਿ ਵਿਸਭਾਗਪੁਗ੍ਗਲੇਹਿ ਸਹਿਤਂ. ਤਥਾ ਚਾਹ ‘‘ਸਗਹਂ ਸਰਕ੍ਖਸਨ੍ਤਿ ਖੋ, ਭਿਕ੍ਖੁ, ਮਾਤੁਗਾਮਸ੍ਸੇਤਂ ਅਧਿਵਚਨ’’ਨ੍ਤਿ (ਇਤਿਵੁ. ੧੦੯). ਅਤਰੀਤਿ ਮਗ੍ਗਪਞ੍ਞਾਨਾਵਾਯ ਯਥਾਵੁਤ੍ਤਂ ਸਮੁਦ੍ਦਂ ਉਤ੍ਤਰਿ. ਤਿਣ੍ਣੋਤਿ ਨਿਤ੍ਤਿਣ੍ਣੋ. ਪਾਰਙ੍ਗਤੋਤਿ ਤਸ੍ਸ ਸਮੁਦ੍ਦਸ੍ਸ ਪਾਰਂ ਪਰਤੀਰਂ ਨਿਰੋਧਂ ਉਪਗਤੋ. ਥਲੇ ਤਿਟ੍ਠਤੀਤਿ ਤਤੋ ਏਵ ਸਂਸਾਰਮਹੋਘਂ ਕਾਮਾਦਿਮਹੋਘਞ੍ਚ ਅਤਿਕ੍ਕਮਿਤ੍ਵਾ ਥਲੇ ਪਰਤੀਰੇ ਨਿਬ੍ਬਾਨੇ ਬਾਹਿਤਪਾਪਬ੍ਰਾਹ੍ਮਣੋ ਤਿਟ੍ਠਤੀਤਿ ਵੁਚ੍ਚਤਿ.

ਇਧਾਪਿ ਗਾਥਾ ਸੁਕ੍ਕਪਕ੍ਖਵਸੇਨੇਵ ਆਗਤਾ. ਤਤ੍ਥ ਊਮਿਭਯਨ੍ਤਿ ਯਥਾਵੁਤ੍ਤਊਮਿਭਯਂ, ਭਾਯਿਤਬ੍ਬਂ ਏਤਸ੍ਮਾਤਿ ਤਂ ਊਮਿ ਭਯਂ. ਦੁਤ੍ਤਰਨ੍ਤਿ ਦੁਰਤਿਕ੍ਕਮਂ. ਅਚ੍ਚਤਾਰੀਤਿ ਅਤਿਕ੍ਕਮਿ.

ਸਙ੍ਗਾਤਿਗੋਤਿ ਰਾਗਾਦੀਨਂ ਪਞ੍ਚਨ੍ਨਂ ਸਙ੍ਗਾਨਂ ਅਤਿਕ੍ਕਨ੍ਤਤ੍ਤਾ ਪਹੀਨਤ੍ਤਾ ਸਙ੍ਗਾਤਿਗੋ. ਅਤ੍ਥਙ੍ਗਤੋ ਸੋ ਨ ਪਮਾਣਮੇਤੀਤਿ ਸੋ ਏਵਂਭੂਤੋ ਅਰਹਾ ਰਾਗਾਦੀਨਂ ਪਮਾਣਕਰਧਮ੍ਮਾਨਂ ਅਚ੍ਚਨ੍ਤਮੇਵ ਅਤ੍ਥਂ ਗਤਤ੍ਤਾ ਅਤ੍ਥਙ੍ਗਤੋ, ਤਤੋ ਏਵ ਸੀਲਾਦਿਧਮ੍ਮਕ੍ਖਨ੍ਧਪਾਰਿਪੂਰਿਯਾ ਚ ‘‘ਏਦਿਸੋ ਸੀਲੇਨ ਸਮਾਧਿਨਾ ਪਞ੍ਞਾਯਾ’’ਤਿ ਕੇਨਚਿ ਪਮਿਣਿਤੁਂ ਅਸਕ੍ਕੁਣੇਯ੍ਯੋ ਪਮਾਣਂ ਨ ਏਤਿ, ਅਥ ਵਾ ਅਨੁਪਾਦਿਸੇਸਨਿਬ੍ਬਾਨਸਙ੍ਖਾਤਂ ਅਤ੍ਥਂ ਗਤੋ ਸੋ ਅਰਹਾ ‘‘ਇਮਾਯ ਨਾਮ ਗਤਿਯਾ ਠਿਤੋ, ਏਦਿਸੋ ਚ ਨਾਮਗੋਤ੍ਤੇਨਾ’’ਤਿ ਪਮਿਣਿਤੁਂ ਅਸਕ੍ਕੁਣੇਯ੍ਯਤਾਯ ਪਮਾਣਂ ਨ ਏਤਿ ਨ ਉਪਗਚ੍ਛਤਿ. ਤਤੋ ਏਵ ਅਮੋਹਯਿ ਮਚ੍ਚੁਰਾਜਂ, ਤੇਨ ਅਨੁਬਨ੍ਧਿਤੁਂ ਅਸਕ੍ਕੁਣੇਯ੍ਯੋਤਿ ਵਦਾਮੀਤਿ ਅਨੁਪਾਦਿਸੇਸਨਿਬ੍ਬਾਨਧਾਤੁਯਾਵ ਦੇਸਨਂ ਨਿਟ੍ਠਾਪੇਸਿ. ਇਤਿ ਇਮਸ੍ਮਿਂ ਵਗ੍ਗੇ ਪਠਮਪਞ੍ਚਮਛਟ੍ਠੇਸੁ ਵਟ੍ਟਂ ਕਥਿਤਂ, ਦੁਤਿਯਸਤ੍ਤਮਅਟ੍ਠਮੇਸੁ ਵਿਵਟ੍ਟਂ, ਸੇਸੇਸੁ ਵਟ੍ਟਵਿਵਟ੍ਟਂ ਕਥਿਤਨ੍ਤਿ ਵੇਦਿਤਬ੍ਬਂ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.