੩. ਤਤਿਯਵਗ੍ਗੋ

੧. ਮਿਚ੍ਛਾਦਿਟ੍ਠਿਕਸੁਤ੍ਤਵਣ੍ਣਨਾ

੭੦. ਤਤਿਯਵਗ੍ਗਸ੍ਸ ਪਠਮੇ ਦਿਟ੍ਠਾ ਮਯਾਤਿ ਮਯਾ ਦਿਟ੍ਠਾ, ਮਮ ਸਮਨ੍ਤਚਕ੍ਖੁਨਾ ਦਿਬ੍ਬਚਕ੍ਖੁਨਾ ਚਾਤਿ ਦ੍ਵੀਹਿਪਿ ਚਕ੍ਖੂਹਿ ਦਿਟ੍ਠਾ ਪਚ੍ਚਕ੍ਖਤੋ ਵਿਦਿਤਾ. ਤੇਨ ਅਨੁਸ੍ਸਵਾਦਿਂ ਪਟਿਕ੍ਖਿਪਤਿ, ਅਯਞ੍ਚ ਅਤ੍ਥੋ ਇਦਾਨੇਵ ਪਾਲ਼ਿਯਂ ਆਗਮਿਸ੍ਸਤਿ. ਕਾਯਦੁਚ੍ਚਰਿਤੇਨ ਸਮਨ੍ਨਾਗਤਾਤਿ ਕਾਯਦੁਚ੍ਚਰਿਤੇਨ ਸਮਙ੍ਗੀਭੂਤਾ. ਅਰਿਯਾਨਂ ਉਪਵਾਦਕਾਤਿ ਬੁਦ੍ਧਾਦੀਨਂ ਅਰਿਯਾਨਂ ਅਨ੍ਤਮਸੋ ਗਿਹਿਸੋਤਾਪਨ੍ਨਾਨਮ੍ਪਿ ਗੁਣਪਰਿਧਂਸਨੇਨ ਅਭੂਤਬ੍ਭਕ੍ਖਾਨੇਨ ਉਪਵਾਦਕਾ ਅਕ੍ਕੋਸਕਾ ਗਰਹਕਾ. ਮਿਚ੍ਛਾਦਿਟ੍ਠਿਕਾਤਿ ਵਿਪਰੀਤਦਸ੍ਸਨਾ. ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾਤਿ ਮਿਚ੍ਛਾਦਸ੍ਸਨਹੇਤੁ ਸਮਾਦਿਨ੍ਨਨਾਨਾਵਿਧਕਮ੍ਮਾ ਯੇ ਚ, ਮਿਚ੍ਛਾਦਿਟ੍ਠਿਮੂਲਕੇਸੁ ਕਾਯਕਮ੍ਮਾਦੀਸੁ ਅਞ੍ਞੇਪਿ ਸਮਾਦਪੇਨ੍ਤਿ. ਏਤ੍ਥ ਚ ਵਚੀਮਨੋਦੁਚ੍ਚਰਿਤਗ੍ਗਹਣੇਨੇਵ ਅਰਿਯੂਪਵਾਦਮਿਚ੍ਛਾਦਿਟ੍ਠੀਸੁ ਗਹਿਤਾਸੁ ਪੁਨਵਚਨਂ ਮਹਾਸਾਵਜ੍ਜਭਾਵਦਸ੍ਸਨਤ੍ਥਂ ਨੇਸਂ. ਮਹਾਸਾਵਜ੍ਜੋ ਹਿ ਅਰਿਯੂਪਵਾਦੋ ਆਨਨ੍ਤਰਿਯਸਦਿਸੋ. ਯਥਾਹ –

‘‘ਸੇਯ੍ਯਥਾਪਿ, ਸਾਰਿਪੁਤ੍ਤ, ਭਿਕ੍ਖੁ ਸੀਲਸਮ੍ਪਨ੍ਨੋ, ਸਮਾਧਿਸਮ੍ਪਨ੍ਨੋ, ਪਞ੍ਞਾਸਮ੍ਪਨ੍ਨੋ, ਦਿਟ੍ਠੇਵ ਧਮ੍ਮੇ ਅਞ੍ਞਂ ਆਰਾਧੇਯ੍ਯ; ਏਵਂਸਮ੍ਪਦਮਿਦਂ, ਸਾਰਿਪੁਤ੍ਤ, ਵਦਾਮਿ ਤਂ ਵਾਚਂ ਅਪ੍ਪਹਾਯ, ਤਂ ਚਿਤ੍ਤਂ ਅਪ੍ਪਹਾਯ, ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਿਤ੍ਵਾ ਯਥਾਭਤਂ ਨਿਕ੍ਖਿਤ੍ਤੋ ਏਵਂ ਨਿਰਯੇ’’ਤਿ (ਮ. ਨਿ. ੧.੧੪੯).

ਮਿਚ੍ਛਾਦਿਟ੍ਠਿਤੋ ਚ ਮਹਾਸਾਵਜ੍ਜਤਰਂ ਨਾਮ ਅਞ੍ਞਂ ਨਤ੍ਥਿ. ਯਥਾਹ –

‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਮਹਾਸਾਵਜ੍ਜਤਰਂ ਯਥਯਿਦਂ, ਭਿਕ੍ਖਵੇ, ਮਿਚ੍ਛਾਦਿਟ੍ਠਿ. ਮਿਚ੍ਛਾਦਿਟ੍ਠਿਪਰਮਾਨਿ, ਭਿਕ੍ਖਵੇ, ਵਜ੍ਜਾਨੀ’’ਤਿ (ਅ. ਨਿ. ੧.੩੧੦).

ਤਂ ਖੋ ਪਨਾਤਿਆਦਿ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਅਤ੍ਤਪਚ੍ਚਕ੍ਖਭਾਵਂ ਦਲ਼੍ਹਤਰਂ ਕਤ੍ਵਾ ਦਸ੍ਸੇਤੁਂ ਆਰਦ੍ਧਂ. ਤਮ੍ਪਿ ਸੁਵਿਞ੍ਞੇਯ੍ਯਮੇਵ.

ਗਾਥਾਸੁ ਮਿਚ੍ਛਾ ਮਨਂ ਪਣਿਧਾਯਾਤਿ ਅਭਿਜ੍ਝਾਦੀਨਂ ਵਸੇਨ ਚਿਤ੍ਤਂ ਅਯੋਨਿਸੋ ਠਪੇਤ੍ਵਾ. ਮਿਚ੍ਛਾ ਵਾਚਞ੍ਚ ਭਾਸਿਯਾਤਿ ਮਿਚ੍ਛਾ ਮੁਸਾਵਾਦਾਦਿਵਸੇਨ ਵਾਚਂ ਭਾਸਿਤ੍ਵਾ. ਮਿਚ੍ਛਾ ਕਮ੍ਮਾਨਿ ਕਤ੍ਵਾਨਾਤਿ ਪਾਣਾਤਿਪਾਤਾਦਿਵਸੇਨ ਕਾਯਕਮ੍ਮਾਨਿ ਕਤ੍ਵਾ. ਅਥ ਵਾ ਮਿਚ੍ਛਾ ਮਨਂ ਪਣਿਧਾਯਾਤਿ ਮਿਚ੍ਛਾਦਿਟ੍ਠਿਵਸੇਨ ਚਿਤ੍ਤਂ ਵਿਪਰੀਤਂ ਠਪੇਤ੍ਵਾ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਇਦਾਨਿਸ੍ਸ ਤਥਾ ਦੁਚ੍ਚਰਿਤਚਰਣੇ ਕਾਰਣਂ ਦਸ੍ਸੇਤਿ ਅਪ੍ਪਸ੍ਸੁਤੋਤਿ, ਅਤ੍ਤਨੋ ਪਰੇਸਞ੍ਚ ਹਿਤਾਵਹੇਨ ਸੁਤੇਨ ਵਿਰਹਿਤੋਤਿ ਅਤ੍ਥੋ. ਅਪੁਞ੍ਞਕਰੋਤਿ ਤਤੋ ਏਵ ਅਰਿਯਧਮ੍ਮਸ੍ਸ ਅਕੋਵਿਦਤਾਯ ਕਿਬ੍ਬਿਸਕਾਰੀ ਪਾਪਧਮ੍ਮੋ. ਅਪ੍ਪਸ੍ਮਿਂ ਇਧ ਜੀਵਿਤੇਤਿ ਇਧ ਮਨੁਸ੍ਸਲੋਕੇ ਜੀਵਿਤੇ ਅਤਿਪਰਿਤ੍ਤੇ. ਤਥਾ ਚਾਹ ‘‘ਯੋ ਚਿਰਂ ਜੀਵਤਿ, ਸੋ ਵਸ੍ਸਸਤਂ ਅਪ੍ਪਂ ਵਾ ਭਿਯ੍ਯੋ’’ਤਿ (ਦੀ. ਨਿ. ੨.੯੩; ਸਂ. ਨਿ. ੧.੧੪੫), ‘‘ਅਪ੍ਪਮਾਯੁ ਮਨੁਸ੍ਸਾਨ’’ਨ੍ਤਿ (ਸਂ. ਨਿ. ੧.੧੪੫; ਮਹਾਨਿ. ੧੦) ਚ. ਤਸ੍ਮਾ ਬਹੁਸ੍ਸੁਤੋ ਸਪ੍ਪਞ੍ਞੋ ਸੀਘਂ ਪੁਞ੍ਞਾਨਿ ਕਤ੍ਵਾ ਸਗ੍ਗੂਪਗੋ ਨਿਬ੍ਬਾਨਪਤਿਟ੍ਠੋ ਵਾ ਹੋਤਿ. ਯੋ ਪਨ ਅਪ੍ਪਸ੍ਸੁਤੋ ਅਪੁਞ੍ਞਕਰੋ, ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ ਨਿਰਯਂ ਸੋ ਉਪਪਜ੍ਜਤੀਤਿ.

ਪਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਸਮ੍ਮਾਦਿਟ੍ਠਿਕਸੁਤ੍ਤਵਣ੍ਣਨਾ

੭੧. ਦੁਤਿਯੇ ਪਠਮਸੁਤ੍ਤੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਨਿਸ੍ਸਰਣਿਯਸੁਤ੍ਤਵਣ੍ਣਨਾ

੭੨. ਤਤਿਯੇ ਨਿਸ੍ਸਰਣਿਯਾਤਿ ਨਿਸ੍ਸਰਣਪਟਿਸਂਯੁਤ੍ਤਾ. ਧਾਤੁਯੋਤਿ ਸਤ੍ਤਸੁਞ੍ਞਸਭਾਵਾ. ਕਾਮਾਨਨ੍ਤਿ ਕਿਲੇਸਕਾਮਾਨਞ੍ਚੇਵ ਵਤ੍ਥੁਕਾਮਾਨਞ੍ਚ. ਅਥ ਵਾ ਕਾਮਾਨਨ੍ਤਿ ਕਿਲੇਸਕਾਮਾਨਂ. ਕਿਲੇਸਕਾਮਤੋ ਹਿ ਨਿਸ੍ਸਰਣਾ ਵਤ੍ਥੁਕਾਮੇਹਿਪਿ ਨਿਸ੍ਸਰਣਂਯੇਵ ਹੋਤਿ, ਨ ਅਞ੍ਞਥਾ. ਵੁਤ੍ਤਞ੍ਹੇਤਂ –

‘‘ਨ ਤੇ ਕਾਮਾ ਯਾਨਿ ਚਿਤ੍ਰਾਨਿ ਲੋਕੇ,

ਸਙ੍ਕਪ੍ਪਰਾਗੋ ਪੁਰਿਸਸ੍ਸ ਕਾਮੋ;

ਤਿਟ੍ਠਨ੍ਤਿ ਚਿਤ੍ਰਾਨਿ ਤਥੇਵ ਲੋਕੇ,

ਅਥੇਤ੍ਥ ਧੀਰਾ ਵਿਨਯਨ੍ਤਿ ਛਨ੍ਦ’’ਨ੍ਤਿ. (ਅ. ਨਿ. ੬.੬੩);

ਨਿਸ੍ਸਰਣਨ੍ਤਿ ਅਪਗਮੋ. ਨੇਕ੍ਖਮ੍ਮਨ੍ਤਿ ਪਠਮਜ੍ਝਾਨਂ, ਵਿਸੇਸਤੋ ਤਂ ਅਸੁਭਾਰਮ੍ਮਣਂ ਦਟ੍ਠਬ੍ਬਂ. ਯੋ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਿਤ੍ਵਾ ਤਤਿਯਮਗ੍ਗਂ ਪਤ੍ਵਾ ਅਨਾਗਾਮਿਮਗ੍ਗੇਨ ਨਿਬ੍ਬਾਨਂ ਸਚ੍ਛਿਕਰੋਤਿ, ਤਸ੍ਸ ਚਿਤ੍ਤਂ ਅਚ੍ਚਨ੍ਤਮੇਵ ਕਾਮੇਹਿ ਨਿਸ੍ਸਟਨ੍ਤਿ ਇਦਂ ਉਕ੍ਕਟ੍ਠਤੋ ਕਾਮਾਨਂ ਨਿਸ੍ਸਰਣਂ ਵੇਦਿਤਬ੍ਬਂ. ਰੂਪਾਨਨ੍ਤਿ ਰੂਪਧਮ੍ਮਾਨਂ, ਵਿਸੇਸੇਨ ਸਦ੍ਧਿਂ ਆਰਮ੍ਮਣੇਹਿ ਕੁਸਲਵਿਪਾਕਕਿਰਿਯਾਭੇਦਤੋ ਸਬ੍ਬੇਸਂ ਰੂਪਾਵਚਰਧਮ੍ਮਾਨਂ. ਆਰੁਪ੍ਪਨ੍ਤਿ ਅਰੂਪਾਵਚਰਜ੍ਝਾਨਂ. ਕੇਚਿ ਪਨ ‘‘ਕਾਮਾਨ’’ਨ੍ਤਿ ਪਦਸ੍ਸ ‘‘ਸਬ੍ਬੇਸਂ ਕਾਮਾਵਚਰਧਮ੍ਮਾਨ’’ਨ੍ਤਿ ਅਤ੍ਥਂ ਵਦਨ੍ਤਿ. ‘‘ਨੇਕ੍ਖਮ੍ਮ’’ਨ੍ਤਿ ਚ ‘‘ਪਞ੍ਚ ਰੂਪਾਵਚਰਜ੍ਝਾਨਾਨੀ’’ਤਿ. ਤਂ ਅਟ੍ਠਕਥਾਸੁ ਨਤ੍ਥਿ, ਨ ਯੁਜ੍ਜਤਿ ਚ. ਭੂਤਨ੍ਤਿ ਜਾਤਂ. ਸਙ੍ਖਤਨ੍ਤਿ ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤਂ. ਪਟਿਚ੍ਚਸਮੁਪ੍ਪਨ੍ਨਨ੍ਤਿ ਕਾਰਣਤੋ ਨਿਬ੍ਬਤ੍ਤਂ. ਤੀਹਿਪਿ ਪਦੇਹਿ ਤੇਭੂਮਕੇ ਧਮ੍ਮੇ ਅਨਵਸੇਸਤੋ ਪਰਿਯਾਦਿਯਤਿ. ਨਿਰੋਧੋਤਿ ਨਿਬ੍ਬਾਨਂ. ਏਤ੍ਥ ਚ ਪਠਮਾਯ ਧਾਤੁਯਾ ਕਾਮਪਰਿਞ੍ਞਾ ਵੁਤ੍ਤਾ, ਦੁਤਿਯਾਯ ਰੂਪਪਰਿਞ੍ਞਾ, ਤਤਿਯਾਯ ਸਬ੍ਬਸਙ੍ਖਤਪਰਿਞ੍ਞਾ ਸਬ੍ਬਭਵਸਮਤਿਕ੍ਕਮੋ ਵੁਤ੍ਤੋ.

ਗਾਥਾਸੁ ਕਾਮਨਿਸ੍ਸਰਣਂ ਞਤ੍ਵਾਤਿ ‘‘ਇਦਂ ਕਾਮਨਿਸ੍ਸਰਣਂ – ਏਵਞ੍ਚ ਕਾਮਤੋ ਨਿਸ੍ਸਰਣ’’ਨ੍ਤਿ ਜਾਨਿਤ੍ਵਾ. ਅਤਿਕ੍ਕਮਤਿ ਏਤੇਨਾਤਿ ਅਤਿਕ੍ਕਮੋ, ਅਤਿਕ੍ਕਮਨੂਪਾਯੋ, ਤਂ ਅਤਿਕ੍ਕਮਂ ਆਰੁਪ੍ਪਂ ਞਤ੍ਵਾ. ਸਬ੍ਬੇ ਸਙ੍ਖਾਰਾ ਸਮਨ੍ਤਿ ਵੂਪਸਮਨ੍ਤਿ ਏਤ੍ਥਾਤਿ ਸਬ੍ਬਸਙ੍ਖਾਰਸਮਥੋ, ਨਿਬ੍ਬਾਨਂ, ਤਂ ਫੁਸਂ ਫੁਸਨ੍ਤੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਸਨ੍ਤਤਰਸੁਤ੍ਤਵਣ੍ਣਨਾ

੭੩. ਚਤੁਤ੍ਥੇ ਰੂਪੇਹੀਤਿ ਰੂਪਾਵਚਰਧਮ੍ਮੇਹਿ. ਸਨ੍ਤਤਰਾਤਿ ਅਤਿਸਯੇਨ ਸਨ੍ਤਾ. ਰੂਪਾਵਚਰਧਮ੍ਮਾ ਹਿ ਕਿਲੇਸਵਿਕ੍ਖਮ੍ਭਨਤੋ ਵਿਤਕ੍ਕਾਦਿਓਲ਼ਾਰਿਕਙ੍ਗਪ੍ਪਹਾਨਤੋ ਸਮਾਧਿਭੂਮਿਭਾਵਤੋ ਚ ਸਨ੍ਤਾ ਨਾਮ, ਆਰੁਪ੍ਪਾ ਪਨ ਤੇਹਿਪਿ ਅਙ੍ਗਸਨ੍ਤਤਾਯ ਚੇਵ ਆਰਮ੍ਮਣਸਨ੍ਤਤਾਯ ਚ ਅਤਿਸਯੇਨ ਸਨ੍ਤਵੁਤ੍ਤਿਕਾ, ਤੇਨ ਸਨ੍ਤਤਰਾਤਿ ਵੁਤ੍ਤਾ. ਨਿਰੋਧੋਤਿ ਨਿਬ੍ਬਾਨਂ. ਸਙ੍ਖਾਰਾਵਸੇਸਸੁਖੁਮਭਾਵਪ੍ਪਤ੍ਤਿਤੋਪਿ ਹਿ ਚਤੁਤ੍ਥਾਰੁਪ੍ਪਤੋ ਫਲਸਮਾਪਤ੍ਤਿਯੋਵ ਸਨ੍ਤਤਰਾ ਕਿਲੇਸਦਰਥਪਟਿਪਸ੍ਸਦ੍ਧਿਤੋ ਨਿਬ੍ਬਾਨਾਰਮ੍ਮਣਤੋ ਚ, ਕਿਮਙ੍ਗਂ ਪਨ ਸਬ੍ਬਸਙ੍ਖਾਰਸਮਥੋ ਨਿਬ੍ਬਾਨਂ. ਤੇਨ ਵੁਤ੍ਤਂ ‘‘ਆਰੁਪ੍ਪੇਹਿ ਨਿਰੋਧੋ ਸਨ੍ਤਤਰੋ’’ਤਿ.

ਗਾਥਾਸੁ ਰੂਪੂਪਗਾਤਿ ਰੂਪਭਵੂਪਗਾ. ਰੂਪਭਵੋ ਹਿ ਇਧ ਰੂਪਨ੍ਤਿ ਵੁਤ੍ਤੋ, ‘‘ਰੂਪੂਪਪਤ੍ਤਿਯਾ ਮਗ੍ਗਂ ਭਾਵੇਤੀ’’ਤਿਆਦੀਸੁ ਵਿਯ. ਅਰੂਪਟ੍ਠਾਯਿਨੋਤਿ ਅਰੂਪਾਵਚਰਾ. ਨਿਰੋਧਂ ਅਪ੍ਪਜਾਨਨ੍ਤਾ, ਆਗਨ੍ਤਾਰੋ ਪੁਨਬ੍ਭਵਨ੍ਤਿ ਏਤੇਨ ਰੂਪਾਰੂਪਾਵਚਰਧਮ੍ਮੇਹਿ ਨਿਰੋਧਸ੍ਸ ਸਨ੍ਤਭਾਵਮੇਵ ਦਸ੍ਸੇਤਿ. ਅਰੂਪੇਸੁ ਅਸਣ੍ਠਿਤਾਤਿ ਅਰੂਪਰਾਗੇਨ ਅਰੂਪਭਵੇਸੁ ਅਪ੍ਪਤਿਟ੍ਠਹਨ੍ਤਾ, ਤੇਪਿ ਪਰਿਜਾਨਨ੍ਤਾਤਿ ਅਤ੍ਥੋ. ਨਿਰੋਧੇ ਯੇ ਵਿਮੁਚ੍ਚਨ੍ਤੀਤਿ ਏਤ੍ਥ ਯੇਤਿ ਨਿਪਾਤਮਤ੍ਤਂ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਪੁਤ੍ਤਸੁਤ੍ਤਵਣ੍ਣਨਾ

੭੪. ਪਞ੍ਚਮੇ ਪੁਤ੍ਤਾਤਿ ਅਤ੍ਰਜਾ ਓਰਸਪੁਤ੍ਤਾ, ਦਿਨ੍ਨਕਾਦਯੋਪਿ ਵਾ. ਸਨ੍ਤੋਤਿ ਭਵਨ੍ਤਾ ਸਂਵਿਜ੍ਜਮਾਨਾ ਲੋਕਸ੍ਮਿਨ੍ਤਿ ਇਮਸ੍ਮਿਂ ਲੋਕੇ ਉਪਲਬ੍ਭਮਾਨਾ. ਅਤ੍ਥਿਭਾਵੇਨ ਸਨ੍ਤੋ, ਪਾਕਟਭਾਵੇਨ ਵਿਜ੍ਜਮਾਨਾ. ਅਤਿਜਾਤੋਤਿ ਅਤ੍ਤਨੋ ਗੁਣੇਹਿ ਮਾਤਾਪਿਤਰੋ ਅਤਿਕ੍ਕਮਿਤ੍ਵਾ ਜਾਤੋ, ਤੇਹਿ ਅਧਿਕਗੁਣੋਤਿ ਅਤ੍ਥੋ. ਅਨੁਜਾਤੋਤਿ ਗੁਣੇਹਿ ਮਾਤਾਪਿਤੂਨਂ ਅਨੁਰੂਪੋ ਹੁਤ੍ਵਾ ਜਾਤੋ, ਤੇਹਿ ਸਮਾਨਗੁਣੋਤਿ ਅਤ੍ਥੋ. ਅਵਜਾਤੋਤਿ ਗੁਣੇਹਿ ਮਾਤਾਪਿਤੂਨਂ ਅਧਮੋ ਹੁਤ੍ਵਾ ਜਾਤੋ, ਤੇਹਿ ਹੀਨਗੁਣੋਤਿ ਅਤ੍ਥੋ. ਯੇਹਿ ਪਨ ਗੁਣੇਹਿ ਯੁਤ੍ਤੋ ਮਾਤਾਪਿਤੂਨਂ ਅਧਿਕੋ ਸਮੋ ਹੀਨੋਤਿ ਚ ਅਧਿਪ੍ਪੇਤੋ, ਤੇ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਕਥਞ੍ਚ, ਭਿਕ੍ਖਵੇ, ਪੁਤ੍ਤੋ ਅਤਿਜਾਤੋ ਹੋਤੀ’’ਤਿ ਕਥੇਤੁਕਮ੍ਯਤਾਯ ਪੁਚ੍ਛਂ ਕਤ੍ਵਾ ‘‘ਇਧ, ਭਿਕ੍ਖਵੇ, ਪੁਤ੍ਤਸ੍ਸਾ’’ਤਿਆਦਿਨਾ ਨਿਦ੍ਦੇਸੋ ਆਰਦ੍ਧੋ.

ਤਤ੍ਥ ਨ ਬੁਦ੍ਧਂ ਸਰਣਂ ਗਤਾਤਿਆਦੀਸੁ ਬੁਦ੍ਧੋਤਿ ਸਬ੍ਬਧਮ੍ਮੇਸੁ ਅਪ੍ਪਟਿਹਤਞਾਣਨਿਮਿਤ੍ਤਾਨੁਤ੍ਤਰਵਿਮੋਕ੍ਖਾਧਿਗਮਪਰਿਭਾਵਿਤਂ ਖਨ੍ਧਸਨ੍ਤਾਨਂ, ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਂ ਵਾ ਸਚ੍ਚਾਭਿਸਮ੍ਬੋਧਿਂ ਉਪਾਦਾਯ ਪਞ੍ਞਤ੍ਤਿਕੋ ਸਤ੍ਤਾਤਿਸਯੋ ਬੁਦ੍ਧੋ. ਯਥਾਹ –

‘‘ਬੁਦ੍ਧੋਤਿ ਯੋ ਸੋ ਭਗਵਾ ਸਯਮ੍ਭੂ ਅਨਾਚਰਿਯਕੋ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਸਾਮਂ ਸਚ੍ਚਾਨਿ ਅਭਿਸਮ੍ਬੁਜ੍ਝਿ, ਤਤ੍ਥ ਚ ਸਬ੍ਬਞ੍ਞੁਤਂ ਪਤ੍ਤੋ, ਬਲੇਸੁ ਚ ਵਸੀਭਾਵ’’ਨ੍ਤਿ (ਚੂਲ਼ਨਿ. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸ ੯੭; ਪਟਿ. ਮ. ੧.੧੬੧) –

ਅਯਂ ਤਾਵ ਅਤ੍ਥਤੋ ਬੁਦ੍ਧਵਿਭਾਵਨਾ.

ਬ੍ਯਞ੍ਜਨਤੋ ਪਨ ਸਵਾਸਨਾਯ ਕਿਲੇਸਨਿਦ੍ਦਾਯ ਅਚ੍ਚਨ੍ਤਵਿਗਮੇਨ ਬੁਦ੍ਧਵਾ ਪਟਿਬੁਦ੍ਧਵਾਤਿ ਬੁਦ੍ਧੋ, ਬੁਦ੍ਧਿਯਾ ਵਾ ਵਿਕਸਿਤਭਾਵੇਨ ਬੁਦ੍ਧਵਾ ਵਿਬੁਦ੍ਧਵਾਤਿ ਬੁਦ੍ਧੋ, ਬੁਜ੍ਝਿਤਾਤਿ ਬੁਦ੍ਧੋ, ਬੋਧੇਤਾਤਿ ਬੁਦ੍ਧੋਤਿ ਏਵਮਾਦਿਨਾ ਨਯੇਨ ਵੇਦਿਤਬ੍ਬੋ. ਯਥਾਹ –

‘‘ਬੁਜ੍ਝਿਤਾ ਸਚ੍ਚਾਨੀਤਿ ਬੁਦ੍ਧੋ, ਬੋਧੇਤਾ ਪਜਾਯਾਤਿ ਬੁਦ੍ਧੋ, ਸਬ੍ਬਞ੍ਞੁਤਾਯ ਬੁਦ੍ਧੋ, ਸਬ੍ਬਦਸ੍ਸਾਵਿਤਾਯ ਬੁਦ੍ਧੋ, ਅਨਞ੍ਞਨੇਯ੍ਯਤਾਯ ਬੁਦ੍ਧੋ, ਵਿਸਵਿਤਾਯ ਬੁਦ੍ਧੋ, ਖੀਣਾਸਵਸਙ੍ਖਾਤੇਨ ਬੁਦ੍ਧੋ, ਨਿਰੁਪਕ੍ਕਿਲੇਸਸਙ੍ਖਾਤੇਨ ਬੁਦ੍ਧੋ, ਏਕਨ੍ਤਵੀਤਰਾਗੋਤਿ ਬੁਦ੍ਧੋ, ਏਕਨ੍ਤਵੀਤਦੋਸੋਤਿ ਬੁਦ੍ਧੋ, ਏਕਨ੍ਤਵੀਤਮੋਹੋਤਿ ਬੁਦ੍ਧੋ, ਏਕਨ੍ਤਨਿਕ੍ਕਿਲੇਸੋਤਿ ਬੁਦ੍ਧੋ, ਏਕਾਯਨਮਗ੍ਗਂ ਗਤੋਤਿ ਬੁਦ੍ਧੋ, ਏਕੋ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋਤਿ ਬੁਦ੍ਧੋ, ਅਬੁਦ੍ਧਿਵਿਹਤਤ੍ਤਾ ਬੁਦ੍ਧਿਪਟਿਲਾਭਾਤਿ ਬੁਦ੍ਧੋ, ਬੁਦ੍ਧੋਤਿ ਚੇਤਂ ਨਾਮਂ ਨ ਮਾਤਰਾ ਕਤਂ, ਨ ਪਿਤਰਾ ਕਤਂ, ਨ ਭਾਤਰਾ ਕਤਂ, ਨ ਭਗਿਨਿਯਾ ਕਤਂ, ਨ ਮਿਤ੍ਤਾਮਚ੍ਚੇਹਿ ਕਤਂ, ਨ ਞਾਤਿਸਾਲੋਹਿਤੇਹਿ ਕਤਂ, ਨ ਸਮਣਬ੍ਰਾਹ੍ਮਣੇਹਿ ਕਤਂ, ਨ ਦੇਵਤਾਹਿ ਕਤਂ, ਅਥ ਖੋ ਵਿਮੋਕ੍ਖਨ੍ਤਿਕਮੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਬੋਧਿਯਾ ਮੂਲੇ ਸਹ ਸਬ੍ਬਞ੍ਞੁਤਞ੍ਞਾਣਸ੍ਸ ਪਟਿਲਾਭਾ ਸਚ੍ਛਿਕਾ ਪਞ੍ਞਤ੍ਤਿ, ਯਦਿਦਂ ਬੁਦ੍ਧੋ’’ਤਿ (ਚੂਲ਼ਨਿ. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸ ੯੭; ਪਟਿ. ਮ. ੧.੧੬੨).

ਹਿਂਸਤੀਤਿ ਸਰਣਂ, ਸਬ੍ਬਂ ਅਨਤ੍ਥਂ ਅਪਾਯਦੁਕ੍ਖਂ ਸਬ੍ਬਂ ਸਂਸਾਰਦੁਕ੍ਖਂ ਹਿਂਸਤਿ ਵਿਨਾਸੇਤਿ ਵਿਦ੍ਧਂਸੇਤੀਤਿ ਅਤ੍ਥੋ. ਸਰਣਂ ਗਤਾਤਿ ‘‘ਬੁਦ੍ਧੋ ਭਗਵਾ ਅਮ੍ਹਾਕਂ ਸਰਣਂ ਗਤਿ ਪਰਾਯਣਂ ਪਟਿਸਰਣਂ ਅਘਸ੍ਸ ਹਨ੍ਤਾ ਹਿਤਸ੍ਸ ਵਿਧਾਤਾ’’ਤਿ ਇਮਿਨਾ ਅਧਿਪ੍ਪਾਯੇਨ ਬੁਦ੍ਧਂ ਭਗਵਨ੍ਤਂ ਗਚ੍ਛਾਮ ਭਜਾਮ ਸੇਵਾਮ ਪਯਿਰੁਪਾਸਾਮ. ਏਵਂ ਵਾ ਜਾਨਾਮ ਬੁਜ੍ਝਾਮਾਤਿ ਏਵਂ ਗਤਾ ਉਪਗਤਾ ਬੁਦ੍ਧਂ ਸਰਣਂ ਗਤਾ. ਤਪ੍ਪਟਿਕ੍ਖੇਪੇਨ ਨ ਬੁਦ੍ਧਂ ਸਰਣਂ ਗਤਾ.

ਧਮ੍ਮਂ ਸਰਣਂ ਗਤਾਤਿ ਅਧਿਗਤਮਗ੍ਗੇ ਸਚ੍ਛਿਕਤਨਿਰੋਧੇ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਚਤੂਸੁ ਅਪਾਯੇਸੁ ਅਪਤਮਾਨੇ ਕਤ੍ਵਾ ਧਾਰੇਤੀਤਿ ਧਮ੍ਮੋ. ਸੋ ਅਤ੍ਥਤੋ ਅਰਿਯਮਗ੍ਗੋ ਚੇਵ ਨਿਬ੍ਬਾਨਞ੍ਚ. ਵੁਤ੍ਤਞ੍ਹੇਤਂ –

‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ ਵਿਤ੍ਥਾਰੋ (ਅ. ਨਿ. ੪.੩੪).

ਨ ਕੇਵਲਞ੍ਚ ਅਰਿਯਮਗ੍ਗਨਿਬ੍ਬਾਨਾਨਿ ਏਵ, ਅਪਿਚ ਖੋ ਅਰਿਯਫਲੇਹਿ ਸਦ੍ਧਿਂ ਪਰਿਯਤ੍ਤਿਧਮ੍ਮੋ ਚ. ਵੁਤ੍ਤਞ੍ਹੇਤਂ ਛਤ੍ਤਮਾਣਵਕਵਿਮਾਨੇ –

‘‘ਰਾਗਵਿਰਾਗਮਨੇਜਮਸੋਕਂ,

ਧਮ੍ਮਮਸਙ੍ਖਤਮਪ੍ਪਟਿਕੂਲਂ;

ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਂ,

ਧਮ੍ਮਮਿਮਂ ਸਰਣਤ੍ਥਮੁਪੇਹੀ’’ਤਿ. (ਵਿ. ਵ. ੮੮੭);

ਤਤ੍ਥ ਹਿ ਰਾਗਵਿਰਾਗੋਤਿ ਮਗ੍ਗੋ ਕਥਿਤੋ, ਅਨੇਜਮਸੋਕਨ੍ਤਿ ਫਲਂ, ਧਮ੍ਮਸਙ੍ਖਤਨ੍ਤਿ ਨਿਬ੍ਬਾਨਂ, ਅਪ੍ਪਟਿਕੂਲਂ ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਨ੍ਤਿ ਪਿਟਕਤ੍ਤਯੇਨ ਵਿਭਤ੍ਤਾ ਸਬ੍ਬਧਮ੍ਮਕ੍ਖਨ੍ਧਾ ਕਥਿਤਾ. ਤਂ ਧਮ੍ਮਂ ਵੁਤ੍ਤਨਯੇਨ ਸਰਣਨ੍ਤਿ ਗਤਾ ਧਮ੍ਮਂ ਸਰਣਂ ਗਤਾ. ਤਪ੍ਪਟਿਕ੍ਖੇਪੇਨ ਨ ਧਮ੍ਮਂ ਸਰਣਂ ਗਤਾ.

ਦਿਟ੍ਠਿਸੀਲਸਙ੍ਘਾਤੇਨ ਸਂਹਤੋਤਿ ਸਙ੍ਘੋ. ਸੋ ਅਤ੍ਥਤੋ ਅਟ੍ਠਅਰਿਯਪੁਗ੍ਗਲਸਮੂਹੋ. ਵੁਤ੍ਤਞ੍ਹੇਤਂ ਤਸ੍ਮਿਂ ਏਵ ਵਿਮਾਨੇ –

‘‘ਯਤ੍ਥ ਚ ਦਿਨ੍ਨ ਮਹਪ੍ਫਲਮਾਹੁ,

ਚਤੂਸੁ ਸੁਚੀਸੁ ਪੁਰਿਸਯੁਗੇਸੁ;

ਅਟ੍ਠ ਚ ਪੁਗ੍ਗਲ ਧਮ੍ਮਦਸਾ ਤੇ,

ਸਙ੍ਘਮਿਮਂ ਸਰਣਤ੍ਥਮੁਪੇਹੀ’’ਤਿ. (ਵਿ. ਵ. ੮੮੮);

ਤਂ ਸਙ੍ਘਂ ਵੁਤ੍ਤਨਯੇਨ ਸਰਣਨ੍ਤਿ ਗਤਾ ਸਙ੍ਘਂ ਸਰਣਂ ਗਤਾ. ਤਪ੍ਪਟਿਕ੍ਖੇਪੇਨ ਨ ਸਙ੍ਘਂ ਸਰਣਂ ਗਤਾਤਿ.

ਏਤ੍ਥ ਚ ਸਰਣਗਮਨਕੋਸਲ੍ਲਤ੍ਥਂ ਸਰਣਂ ਸਰਣਗਮਨਂ, ਯੋ ਚ ਸਰਣਂ ਗਚ੍ਛਤਿ ਸਰਣਗਮਨਪ੍ਪਭੇਦੋ, ਫਲਂ, ਸਂਕਿਲੇਸੋ, ਭੇਦੋ, ਵੋਦਾਨਨ੍ਤਿ ਅਯਂ ਵਿਧਿ ਵੇਦਿਤਬ੍ਬੋ.

ਤਤ੍ਥ ਪਦਤ੍ਥਤੋ ਤਾਵ ਹਿਂਸਤੀਤਿ ਸਰਣਂ, ਸਰਣਗਤਾਨਂ ਤੇਨੇਵ ਸਰਣਗਮਨੇਨ ਭਯਂ ਸਨ੍ਤਾਸਂ ਦੁਕ੍ਖਂ ਦੁਗ੍ਗਤਿਂ ਪਰਿਕਿਲੇਸਂ ਹਨਤਿ ਵਿਨਾਸੇਤੀਤਿ ਅਤ੍ਥੋ, ਰਤਨਤ੍ਤਯਸ੍ਸੇਤਂ ਅਧਿਵਚਨਂ. ਅਥ ਵਾ ਹਿਤੇ ਪਵਤ੍ਤਨੇਨ ਅਹਿਤਾ ਨਿਵਤ੍ਤਨੇਨ ਚ ਸਤ੍ਤਾਨਂ ਭਯਂ ਹਿਂਸਤੀਤਿ ਬੁਦ੍ਧੋ ਸਰਣਂ, ਭਵਕਨ੍ਤਾਰਤੋ ਉਤ੍ਤਾਰਣੇਨ ਅਸ੍ਸਾਸਦਾਨੇਨ ਚ ਧਮ੍ਮੋ, ਅਪ੍ਪਕਾਨਮ੍ਪਿ ਕਾਰਾਨਂ ਵਿਪੁਲਫਲਪਟਿਲਾਭਕਰਣੇਨ ਸਙ੍ਘੋ. ਤਸ੍ਮਾ ਇਮਿਨਾਪਿ ਪਰਿਯਾਯੇਨ ਰਤਨਤ੍ਤਯਂ ਸਰਣਂ. ਤਪ੍ਪਸਾਦਤਗ੍ਗਰੁਤਾਹਿ ਵਿਹਤਕਿਲੇਸੋ ਤਪ੍ਪਰਾਯਣਤਾਕਾਰਪ੍ਪਵਤ੍ਤੋ ਚਿਤ੍ਤੁਪ੍ਪਾਦੋ ਸਰਣਗਮਨਂ. ਤਂਸਮਙ੍ਗਿਸਤ੍ਤੋ ਸਰਣਂ ਗਚ੍ਛਤਿ, ਵੁਤ੍ਤਪ੍ਪਕਾਰੇਨ ਚਿਤ੍ਤੁਪ੍ਪਾਦੇਨ ‘‘ਏਤਾਨਿ ਮੇ ਤੀਣਿ ਰਤਨਾਨਿ ਸਰਣਂ, ਏਤਾਨਿ ਪਰਾਯਣ’’ਨ੍ਤਿ ਏਵਂ ਉਪੇਤੀਤਿ ਅਤ੍ਥੋ. ਏਵਂ ਤਾਵ ਸਰਣਂ ਸਰਣਗਮਨਂ, ਯੋ ਚ ਸਰਣਂ ਗਚ੍ਛਤੀਤਿ ਇਦਂ ਤਯਂ ਵੇਦਿਤਬ੍ਬਂ.

ਪਭੇਦਤੋ ਪਨ ਦੁਵਿਧਂ ਸਰਣਗਮਨਂ – ਲੋਕਿਯਂ, ਲੋਕੁਤ੍ਤਰਞ੍ਚ. ਤਤ੍ਥ ਲੋਕੁਤ੍ਤਰਂ ਦਿਟ੍ਠਸਚ੍ਚਾਨਂ ਮਗ੍ਗਕ੍ਖਣੇ ਸਰਣਗਮਨੁਪਕ੍ਕਿਲੇਸਸਮੁਚ੍ਛੇਦੇਨ ਆਰਮ੍ਮਣਤੋ ਨਿਬ੍ਬਾਨਾਰਮ੍ਮਣਂ ਹੁਤ੍ਵਾ ਕਿਚ੍ਚਤੋ ਸਕਲੇਪਿ ਰਤਨਤ੍ਤਯੇ ਇਜ੍ਝਤਿ, ਲੋਕਿਯਂ ਪੁਥੁਜ੍ਜਨਾਨਂ ਸਰਣਗਮਨੁਪਕ੍ਕਿਲੇਸਵਿਕ੍ਖਮ੍ਭਨੇਨ ਆਰਮ੍ਮਣਤੋ ਬੁਦ੍ਧਾਦਿਗੁਣਾਰਮ੍ਮਣਂ ਹੁਤ੍ਵਾ ਇਜ੍ਝਤਿ. ਤਂ ਅਤ੍ਥਤੋ ਬੁਦ੍ਧਾਦੀਸੁ ਵਤ੍ਥੂਸੁ ਸਦ੍ਧਾਪਟਿਲਾਭੋ, ਸਦ੍ਧਾਮੂਲਿਕਾ ਚ ਸਮ੍ਮਾਦਿਟ੍ਠਿ ਦਸਸੁ ਪੁਞ੍ਞਕਿਰਿਯਵਤ੍ਥੂਸੁ ਦਿਟ੍ਠਿਜੁਕਮ੍ਮਨ੍ਤਿ ਵੁਚ੍ਚਤਿ.

ਤਯਿਦਂ ਚਤੁਧਾ ਪਵਤ੍ਤਤਿ – ਅਤ੍ਤਸਨ੍ਨਿਯ੍ਯਾਤਨੇਨ, ਤਪ੍ਪਰਾਯਣਤਾਯ, ਸਿਸ੍ਸਭਾਵੂਪਗਮਨੇਨ, ਪਣਿਪਾਤੇਨਾਤਿ. ਤਤ੍ਥ ਅਤ੍ਤਸਨ੍ਨਿਯ੍ਯਾਤਨਂ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਅਤ੍ਤਾਨਂ ਬੁਦ੍ਧਸ੍ਸ ਨਿਯ੍ਯਾਤੇਮਿ, ਧਮ੍ਮਸ੍ਸ, ਸਙ੍ਘਸ੍ਸਾ’’ਤਿ ਏਵਂ ਬੁਦ੍ਧਾਦੀਨਂ ਅਤ੍ਤਪਰਿਚ੍ਚਜਨਂ. ਤਪ੍ਪਰਾਯਣਂ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਬੁਦ੍ਧਪਰਾਯਣੋ, ਧਮ੍ਮਪਰਾਯਣੋ, ਸਙ੍ਘਪਰਾਯਣੋ ਇਤਿ ਮਂ ਧਾਰੇਹੀ’’ਤਿ ਏਵਂ ਤਪ੍ਪਟਿਸਰਣਭਾਵੋ ਤਪ੍ਪਰਾਯਣਤਾ. ਸਿਸ੍ਸਭਾਵੂਪਗਮਨਂ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਬੁਦ੍ਧਸ੍ਸ ਅਨ੍ਤੇਵਾਸਿਕੋ, ਧਮ੍ਮਸ੍ਸ, ਸਙ੍ਘਸ੍ਸ ਇਤਿ ਮਂ ਧਾਰੇਤੂ’’ਤਿ ਏਵਂ ਸਿਸ੍ਸਭਾਵਸ੍ਸ ਉਪਗਮਨਂ. ਪਣਿਪਾਤੋ ਨਾਮ ‘‘ਅਜ੍ਜ ਆਦਿਂ ਕਤ੍ਵਾ ਅਹਂ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲਿਕਮ੍ਮਸਾਮੀਚਿਕਮ੍ਮਂ ਬੁਦ੍ਧਾਦੀਨਂ ਏਵ ਤਿਣ੍ਣਂ ਵਤ੍ਥੂਨਂ ਕਰੋਮਿ ਇਤਿ ਮਂ ਧਾਰੇਤੂ’’ਤਿ ਏਵਂ ਬੁਦ੍ਧਾਦੀਸੁ ਪਰਮਨਿਪਚ੍ਚਕਾਰੋ. ਇਮੇਸਞ੍ਹਿ ਚਤੁਨ੍ਨਂ ਆਕਾਰਾਨਂ ਅਞ੍ਞਤਰਂ ਕਰੋਨ੍ਤੇਨ ਗਹਿਤਂ ਏਵ ਹੋਤਿ ਸਰਣਗਮਨਂ.

ਅਪਿਚ ‘‘ਭਗਵਤੋ ਅਤ੍ਤਾਨਂ ਪਰਿਚ੍ਚਜਾਮਿ, ਧਮ੍ਮਸ੍ਸ, ਸਙ੍ਘਸ੍ਸ ਅਤ੍ਤਾਨਂ ਪਰਿਚ੍ਚਜਾਮਿ, ਜੀਵਿਤਂ ਪਰਿਚ੍ਚਜਾਮਿ, ਪਰਿਚ੍ਚਤ੍ਤੋ ਏਵ ਮੇ ਅਤ੍ਤਾ ਜੀਵਿਤਞ੍ਚ, ਜੀਵਿਤਪਰਿਯਨ੍ਤਿਕਂ ਬੁਦ੍ਧਂ ਸਰਣਂ ਗਚ੍ਛਾਮਿ, ਬੁਦ੍ਧੋ ਮੇ ਸਰਣਂ ਤਾਣਂ ਲੇਣ’’ਨ੍ਤਿ ਏਵਮ੍ਪਿ ਅਤ੍ਤਸਨ੍ਨਿਯ੍ਯਾਤਨਂ ਵੇਦਿਤਬ੍ਬਂ. ‘‘ਸਤ੍ਥਾਰਞ੍ਚ ਵਤਾਹਂ ਪਸ੍ਸੇਯ੍ਯਂ, ਭਗਵਨ੍ਤਮੇਵ ਪਸ੍ਸੇਯ੍ਯਂ; ਸੁਗਤਞ੍ਚ ਵਤਾਹਂ ਪਸ੍ਸੇਯ੍ਯਂ, ਭਗਵਨ੍ਤਮੇਵ ਪਸ੍ਸੇਯ੍ਯਂ; ਸਮ੍ਮਾਸਮ੍ਬੁਦ੍ਧਞ੍ਚ ਵਤਾਹਂ ਪਸ੍ਸੇਯ੍ਯਂ; ਭਗਵਨ੍ਤਮੇਵ ਪਸ੍ਸੇਯ੍ਯ’’ਨ੍ਤਿ (ਸਂ. ਨਿ. ੨.੧੫੪) ਏਵਂ ਮਹਾਕਸ੍ਸਪਤ੍ਥੇਰਸ੍ਸ ਸਰਣਗਮਨਂ ਵਿਯ ਸਿਸ੍ਸਭਾਵੂਪਗਮਨਂ ਦਟ੍ਠਬ੍ਬਂ.

‘‘ਸੋ ਅਹਂ ਵਿਚਰਿਸ੍ਸਾਮਿ, ਗਾਮਾ ਗਾਮਂ ਪੁਰਾ ਪੁਰਂ;

ਨਮਸ੍ਸਮਾਨੋ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤ’’ਨ੍ਤਿ. (ਸਂ. ਨਿ. ੧.੨੪੬; ਸੁ. ਨਿ. ੧੯੪) –

ਏਵਂ ਆਲ਼ਵਕਾਦੀਨਂ ਸਰਣਗਮਨਂ ਵਿਯ ਤਪ੍ਪਰਾਯਣਤਾ ਵੇਦਿਤਬ੍ਬਾ. ‘‘ਅਥ ਖੋ, ਬ੍ਰਹ੍ਮਾਯੁ, ਬ੍ਰਾਹ੍ਮਣੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਤੋ ਪਾਦਾਨਿ ਮੁਖੇਨ ਚ ਪਰਿਚੁਮ੍ਬਤਿ, ਪਾਣੀਹਿ ਚ ਪਰਿਸਮ੍ਬਾਹਤਿ, ਨਾਮਞ੍ਚ ਸਾਵੇਤਿ ‘ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ, ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ’’’ਤਿ (ਮ. ਨਿ. ੨.੩੯੪) ਏਵਂ ਪਣਿਪਾਤੋ ਦਟ੍ਠਬ੍ਬੋ.

ਸੋ ਪਨੇਸ ਞਾਤਿਭਯਾਚਰਿਯਦਕ੍ਖਿਣੇਯ੍ਯਵਸੇਨ ਚਤੁਬ੍ਬਿਧੋ ਹੋਤਿ. ਤਤ੍ਥ ਦਕ੍ਖਿਣੇਯ੍ਯਪਣਿਪਾਤੇਨ ਸਰਣਗਮਨਂ ਹੋਤਿ, ਨ ਇਤਰੇਹਿ. ਸੇਟ੍ਠਵਸੇਨੇਵ ਹਿ ਸਰਣਂ ਗਯ੍ਹਤਿ, ਸੇਟ੍ਠਵਸੇਨ ਭਿਜ੍ਜਤਿ. ਤਸ੍ਮਾ ਯੋ ‘‘ਅਯਮੇਵ ਲੋਕੇ ਸਬ੍ਬਸਤ੍ਤੁਤ੍ਤਮੋ ਅਗ੍ਗਦਕ੍ਖਿਣੇਯ੍ਯੋ’’ਤਿ ਵਨ੍ਦਤਿ, ਤੇਨੇਵ ਸਰਣਂ ਗਹਿਤਂ ਹੋਤਿ, ਨ ਞਾਤਿਭਯਾਚਰਿਯਸਞ੍ਞਾਯ ਵਨ੍ਦਨ੍ਤੇਨ. ਏਵਂ ਗਹਿਤਸਰਣਸ੍ਸ ਉਪਾਸਕਸ੍ਸ ਵਾ ਉਪਾਸਿਕਾਯ ਵਾ ਅਞ੍ਞਤਿਤ੍ਥਿਯੇਸੁ ਪਬ੍ਬਜਿਤਮ੍ਪਿ ‘‘ਞਾਤਕੋ ਮੇ ਅਯ’’ਨ੍ਤਿ ਵਨ੍ਦਤੋ ਸਰਣਂ ਨ ਭਿਜ੍ਜਤਿ, ਪਗੇਵ ਅਪਬ੍ਬਜਿਤਂ. ਤਥਾ ਰਾਜਾਨਂ ਭਯੇਨ ਵਨ੍ਦਤੋ. ਸੋ ਹਿ ਰਟ੍ਠਪੂਜਿਤਤ੍ਤਾ ਅਵਨ੍ਦਿਯਮਾਨੋ ਅਨਤ੍ਥਮ੍ਪਿ ਕਰੇਯ੍ਯਾਤਿ. ਤਥਾ ਯਂਕਿਞ੍ਚਿ ਸਿਪ੍ਪਂ ਸਿਕ੍ਖਾਪਕਂ ਤਿਤ੍ਥਿਯਮ੍ਪਿ ‘‘ਆਚਰਿਯੋ ਮੇ ਅਯ’’ਨ੍ਤਿ ਵਨ੍ਦਤੋਪਿ ਨ ਭਿਜ੍ਜਤਿ. ਏਵਂ ਸਰਣਗਮਨਸ੍ਸ ਪਭੇਦੋ ਵੇਦਿਤਬ੍ਬੋ.

ਏਤ੍ਥ ਚ ਲੋਕੁਤ੍ਤਰਸ੍ਸ ਸਰਣਗਮਨਸ੍ਸ ਚਤ੍ਤਾਰਿ ਸਾਮਞ੍ਞਫਲਾਨਿ ਵਿਪਾਕਫਲਂ, ਸਬ੍ਬਦੁਕ੍ਖਕ੍ਖਯੋ ਆਨਿਸਂਸਫਲਂ. ਵੁਤ੍ਤਞ੍ਹੇਤਂ –

‘‘ਯੋ ਚ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ;

ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤਿ.

‘‘ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

‘‘ਏਤਂ ਖੋ ਸਰਣਂ ਖੇਮਂ, ਏਤਂ ਸਰਣਮੁਤ੍ਤਮਂ;

ਏਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ. (ਧ. ਪ. ੧੯੦-੧੯੨);

ਅਪਿਚ ਨਿਚ੍ਚਤੋ ਅਨੁਪਗਮਨਾਦੀਨਿਪਿ ਏਤਸ੍ਸ ਆਨਿਸਂਸਫਲਂ ਵੇਦਿਤਬ੍ਬਂ. ਵੁਤ੍ਤਞ੍ਹੇਤਂ –

‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯ, ਸੁਖਤੋ ਉਪਗਚ੍ਛੇਯ੍ਯ, ਕਞ੍ਚਿ ਧਮ੍ਮਂ ਅਤ੍ਤਤੋ ਉਪਗਚ੍ਛੇਯ੍ਯ, ਮਾਤਰਂ ਜੀਵਿਤਾ ਵੋਰੋਪੇਯ੍ਯ, ਪਿਤਰਂ ਜੀਵਿਤਾ ਵੋਰੋਪੇਯ੍ਯ, ਅਰਹਨ੍ਤਂ ਜੀਵਿਤਾ ਵੋਰੋਪੇਯ੍ਯ, ਦੁਟ੍ਠਚਿਤ੍ਤੋ ਤਥਾਗਤਸ੍ਸ ਲੋਹਿਤਂ ਉਪ੍ਪਾਦੇਯ੍ਯ, ਸਙ੍ਘਂ ਭਿਨ੍ਦੇਯ੍ਯ, ਅਞ੍ਞਂ ਸਤ੍ਥਾਰਂ ਉਦ੍ਦਿਸੇਯ੍ਯ ਨੇਤਂ ਠਾਨਂ ਵਿਜ੍ਜਤੀ’’ਤਿ (ਮ. ਨਿ. ੩.੧੨੭-੧੨੮; ਅ. ਨਿ. ੧.੨੬੮-੨੭੬; ਵਿਭ. ੮੦੯).

ਲੋਕਿਯਸ੍ਸ ਪਨ ਸਰਣਗਮਨਸ੍ਸ ਭਵਸਮ੍ਪਦਾਪਿ ਭੋਗਸਮ੍ਪਦਾਪਿ ਫਲਮੇਵ. ਵੁਤ੍ਤਞ੍ਹੇਤਂ –

‘‘ਯੇ ਕੇਚਿ ਬੁਦ੍ਧਂ ਸਰਣਂ ਗਤਾਸੇ,

ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ;

ਪਹਾਯ ਮਾਨੁਸਂ ਦੇਹਂ,

ਦੇਵਕਾਯਂ ਪਰਿਪੂਰੇਸ੍ਸਨ੍ਤੀ’’ਤਿ. (ਸਂ. ਨਿ. ੧.੩੭);

ਅਪਰਮ੍ਪਿ ਵੁਤ੍ਤਂ –

‘‘ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਅਸੀਤਿਯਾ ਦੇਵਤਾਸਹਸ੍ਸੇਹਿ ਸਦ੍ਧਿਂ ਯੇਨਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤੇਨੁਪਸਙ੍ਕਮਿ…ਪੇ… ਏਕਮਨ੍ਤਂ ਠਿਤਂ ਖੋ ਸਕ੍ਕਂ ਦੇਵਾਨਮਿਨ੍ਦਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਤਦਵੋਚ – ‘ਸਾਧੁ ਖੋ, ਦੇਵਾਨਮਿਨ੍ਦ, ਬੁਦ੍ਧਂ ਸਰਣਗਮਨਂ ਹੋਤਿ. ਬੁਦ੍ਧਂ ਸਰਣਗਮਨਹੇਤੁ ਖੋ, ਦੇਵਾਨਮਿਨ੍ਦ, ਏਵਮਿਧੇਕਚ੍ਚੇ ਸਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤਿ. ਤੇ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਧਿਗਣ੍ਹਨ੍ਤਿ – ਦਿਬ੍ਬੇਨ ਆਯੁਨਾ, ਦਿਬ੍ਬੇਨ ਵਣ੍ਣੇਨ, ਦਿਬ੍ਬੇਨ ਸੁਖੇਨ, ਦਿਬ੍ਬੇਨ ਯਸੇਨ, ਦਿਬ੍ਬੇਨ ਆਧਿਪਤੇਯ੍ਯੇਨ, ਦਿਬ੍ਬੇਹਿ ਰੂਪੇਹਿ, ਦਿਬ੍ਬੇਹਿ ਸਦ੍ਦੇਹਿ, ਦਿਬ੍ਬੇਹਿ ਗਨ੍ਧੇਹਿ, ਦਿਬ੍ਬੇਹਿ ਰਸੇਹਿ, ਦਿਬ੍ਬੇਹਿ ਫੋਟ੍ਠਬ੍ਬੇਹਿ…ਪੇ… ਧਮ੍ਮਂ, ਸਙ੍ਘਂ…ਪੇ… ਫੋਟ੍ਠਬ੍ਬੇਹੀ’’’ਤਿ (ਸਂ. ਨਿ. ੪.੩੪੧).

ਵੇਲਾਮਸੁਤ੍ਤਾਦਿਵਸੇਨਪਿ (ਅ. ਨਿ. ੯.੨੦) ਸਰਣਗਮਨਸ੍ਸ ਫਲਵਿਸੇਸੋ ਵੇਦਿਤਬ੍ਬੋ. ਏਵਂ ਸਰਣਗਮਨਸ੍ਸ ਫਲਂ ਵੇਦਿਤਬ੍ਬਂ.

ਲੋਕਿਯਸਰਣਗਮਨਞ੍ਚੇਤ੍ਥ ਤੀਸੁ ਵਤ੍ਥੂਸੁ ਅਞ੍ਞਾਣਸਂਸਯਮਿਚ੍ਛਾਞਾਣਾਦੀਹਿ ਸਂਕਿਲਿਸ੍ਸਤਿ, ਨ ਮਹਾਜੁਤਿਕਂ ਹੋਤਿ ਨ ਮਹਾਵਿਪ੍ਫਾਰਂ. ਲੋਕੁਤ੍ਤਰਸ੍ਸ ਪਨ ਸਂਕਿਲੇਸੋ ਨਤ੍ਥਿ. ਲੋਕਿਯਸ੍ਸ ਚ ਸਰਣਗਮਨਸ੍ਸ ਦੁਵਿਧੋ ਭੇਦੋ – ਸਾਵਜ੍ਜੋ, ਅਨਵਜ੍ਜੋ ਚ. ਤਤ੍ਥ ਸਾਵਜ੍ਜੋ ਅਞ੍ਞਸਤ੍ਥਾਰਾਦੀਸੁ ਅਤ੍ਤਸਨ੍ਨਿਯ੍ਯਾਤਨਾਦੀਹਿ ਹੋਤਿ, ਸੋ ਅਨਿਟ੍ਠਫਲੋ. ਅਨਵਜ੍ਜੋ ਕਾਲਕਿਰਿਯਾਯ, ਸੋ ਅਵਿਪਾਕਤ੍ਤਾ ਅਫਲੋ. ਲੋਕੁਤ੍ਤਰਸ੍ਸ ਪਨ ਨੇਵਤ੍ਥਿ ਭੇਦੋ. ਭਵਨ੍ਤਰੇਪਿ ਹਿ ਅਰਿਯਸਾਵਕੋ ਅਞ੍ਞਂ ਸਤ੍ਥਾਰਂ ਨ ਉਦ੍ਦਿਸਤੀਤਿ ਏਵਂ ਸਰਣਗਮਨਸ੍ਸ ਸਂਕਿਲੇਸੋ ਚ ਭੇਦੋ ਚ ਵੇਦਿਤਬ੍ਬੋ.

ਵੋਦਾਨਮ੍ਪਿ ਚ ਲੋਕਿਯਸ੍ਸੇਵ ਯਸ੍ਸ ਹਿ ਸਂਕਿਲੇਸੋ, ਤਸ੍ਸੇਵ ਤਤੋ ਵੋਦਾਨੇਨ ਭਵਿਤਬ੍ਬਂ. ਲੋਕੁਤ੍ਤਰਂ ਪਨ ਨਿਚ੍ਚਵੋਦਾਨਮੇਵਾਤਿ.

ਪਾਣਾਤਿਪਾਤਾਤਿ ਏਤ੍ਥ ਪਾਣਸ੍ਸ ਸਰਸੇਨੇਵ ਪਤਨਸਭਾਵਸ੍ਸ ਅਨ੍ਤਰਾ ਏਵ ਅਤਿਪਾਤਨਂ ਅਤਿਪਾਤੋ, ਸਣਿਕਂ ਪਤਿਤੁਂ ਅਦਤ੍ਵਾ ਸੀਘਂ ਪਾਤਨਨ੍ਤਿ ਅਤ੍ਥੋ. ਅਤਿਕ੍ਕਮ੍ਮ ਵਾ ਸਤ੍ਥਾਦੀਹਿ ਅਭਿਭਵਿਤ੍ਵਾ ਪਾਤਨਂ ਅਤਿਪਾਤੋ, ਪਾਣਘਾਤੋਤਿ ਵੁਤ੍ਤਂ ਹੋਤਿ. ਪਾਣੋਤਿ ਚੇਤ੍ਥ ਖਨ੍ਧਸਨ੍ਤਾਨੋ, ਯੋ ਸਤ੍ਤੋਤਿ ਵੋਹਰੀਯਤਿ, ਪਰਮਤ੍ਥਤੋ ਰੂਪਾਰੂਪਜੀਵਿਤਿਨ੍ਦ੍ਰਿਯਂ. ਰੂਪਜੀਵਿਤਿਨ੍ਦ੍ਰਿਯੇ ਹਿ ਵਿਕੋਪਿਤੇ ਇਤਰਮ੍ਪਿ ਤਂਸਮ੍ਬਨ੍ਧਤਾਯ ਵਿਨਸ੍ਸਤੀਤਿ. ਤਸ੍ਮਿਂ ਪਨ ਪਾਣੇ ਪਾਣਸਞ੍ਞਿਨੋ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਉਪਕ੍ਕਮਸਮੁਟ੍ਠਾਪਿਕਾ ਕਾਯਵਚੀਦ੍ਵਾਰਾਨਂ ਅਞ੍ਞਤਰਦ੍ਵਾਰਪ੍ਪਵਤ੍ਤਾ ਵਧਕਚੇਤਨਾ ਪਾਣਾਤਿਪਾਤੋ. ਯਾਯ ਹਿ ਚੇਤਨਾਯ ਪਵਤ੍ਤਮਾਨਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਨਿਸ੍ਸਯਭੂਤੇਸੁ ਉਪਕ੍ਕਮਕਰਣਹੇਤੁਕਮਹਾਭੂਤਪਚ੍ਚਯਾ ਉਪ੍ਪਜ੍ਜਨਕਮਹਾਭੂਤਾ ਪੁਰਿਮਸਦਿਸਾ ਨ ਉਪ੍ਪਜ੍ਜਨ੍ਤਿ, ਵਿਸਦਿਸਾ ਏਵ ਉਪ੍ਪਜ੍ਜਨ੍ਤਿ, ਸਾ ਤਾਦਿਸਪ੍ਪਯੋਗਸਮੁਟ੍ਠਾਪਿਕਾ ਚੇਤਨਾ ਪਾਣਾਤਿਪਾਤੋ. ਲਦ੍ਧੂਪਕ੍ਕਮਾਨਿ ਹਿ ਭੂਤਾਨਿ ਪੁਰਿਮਭੂਤਾਨਿ ਵਿਯ ਨ ਵਿਸਦਾਨੀਤਿ ਸਮਾਨਜਾਤਿਯਾਨਂ ਕਾਰਣਾਨਿ ਨ ਹੋਨ੍ਤੀਤਿ. ‘‘ਕਾਯਵਚੀਦ੍ਵਾਰਾਨਂ ਅਞ੍ਞਤਰਦ੍ਵਾਰਪ੍ਪਵਤ੍ਤਾ’’ਤਿ ਇਦਂ ਮਨੋਦ੍ਵਾਰੇ ਪਵਤ੍ਤਾਯ ਵਧਕਚੇਤਨਾਯ ਪਾਣਾਤਿਪਾਤਤਾਸਮ੍ਭਵਦਸ੍ਸਨਂ. ਕੁਲੁਮ੍ਬਸੁਤ੍ਤੇਪਿ ਹਿ ‘‘ਇਧੇਕਚ੍ਚੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਇਦ੍ਧਿਮਾ ਚੇਤੋ ਵਸਿਪ੍ਪਤ੍ਤੋ ਅਞ੍ਞਿਸ੍ਸਾ ਕੁਚ੍ਛਿਗਤਂ ਗਬ੍ਭਂ ਪਾਪਕੇਨ ਮਨਸਾ ਅਨੁਪੇਕ੍ਖਿਤਾ ਹੋਤੀ’’ਤਿ ਵਿਜ੍ਜਾਮਯਿਦ੍ਧਿ ਅਧਿਪ੍ਪੇਤਾ. ਸਾ ਚ ਵਚੀਦ੍ਵਾਰਂ ਮੁਞ੍ਚਿਤ੍ਵਾ ਨ ਸਕ੍ਕਾ ਨਿਬ੍ਬਤ੍ਤੇਤੁਨ੍ਤਿ ਵਚੀਦ੍ਵਾਰਵਸੇਨੇਵ ਨਿਪ੍ਪਜ੍ਜਤਿ. ਯੇ ਪਨ ‘‘ਭਾਵਨਾਮਯਿਦ੍ਧਿ ਤਤ੍ਥ ਅਧਿਪ੍ਪੇਤਾ’’ਤਿ ਵਦਨ੍ਤਿ, ਤੇਸਂ ਵਾਦੋ ਕੁਸਲਤ੍ਤਿਕਵੇਦਨਤ੍ਤਿਕਵਿਤਕ੍ਕਤ੍ਤਿਕਭੂਮਨ੍ਤਰੇਹਿ ਵਿਰੁਜ੍ਝਤਿ.

ਸ੍ਵਾਯਂ ਪਾਣਾਤਿਪਾਤੋ ਗੁਣਰਹਿਤੇਸੁ ਤਿਰਚ੍ਛਾਨਗਤਾਦੀਸੁ ਖੁਦ੍ਦਕੇ ਪਾਣੇ ਅਪ੍ਪਸਾਵਜ੍ਜੋ, ਮਹਾਸਰੀਰੇ ਮਹਾਸਾਵਜ੍ਜੋ. ਕਸ੍ਮਾ? ਪਯੋਗਮਹਨ੍ਤਤਾਯ. ਪਯੋਗਸਮਤ੍ਤੇਪਿ ਵਤ੍ਥੁਮਹਨ੍ਤਤਾਦੀਹਿ ਮਹਾਸਾਵਜ੍ਜੋ, ਗੁਣਵਨ੍ਤੇਸੁ ਮਨੁਸ੍ਸਾਦੀਸੁ ਅਪ੍ਪਗੁਣੇ ਪਾਣੇ ਅਪ੍ਪਸਾਵਜ੍ਜੋ, ਮਹਾਗੁਣੇ ਮਹਾਸਾਵਜ੍ਜੋ. ਸਰੀਰਗੁਣਾਨਂ ਪਨ ਸਮਭਾਵੇ ਸਤਿ ਕਿਲੇਸਾਨਂ ਉਪਕ੍ਕਮਾਨਞ੍ਚ ਮੁਦੁਤਾਯ ਅਪ੍ਪਸਾਵਜ੍ਜੋ, ਤਿਬ੍ਬਤਾਯ ਮਹਾਸਾਵਜ੍ਜੋ.

ਏਤ੍ਥ ਚ ਪਯੋਗਵਤ੍ਥੁਮਹਨ੍ਤਤਾਦੀਹਿ ਮਹਾਸਾਵਜ੍ਜਤਾ ਤੇਹਿ ਪਚ੍ਚਯੇਹਿ ਉਪ੍ਪਜ੍ਜਮਾਨਾਯ ਚੇਤਨਾਯ ਬਲਵਭਾਵਤੋ ਵੇਦਿਤਬ੍ਬਾ. ਯਥਾਧਿਪ੍ਪੇਤਸ੍ਸ ਪਯੋਗਸ੍ਸ ਸਹਸਾ ਨਿਪ੍ਫਾਦਨਵਸੇਨ ਸਕਿਚ੍ਚਸਾਧਿਕਾਯ ਬਹੁਕ੍ਖਤ੍ਤੁਂ ਪਵਤ੍ਤਜਵਨੇਹਿ ਲਦ੍ਧਾਸੇਵਨਾਯ ਚ ਸਨ੍ਨਿਟ੍ਠਾਪਕਚੇਤਨਾਯ ਪਯੋਗਸ੍ਸ ਮਹਨ੍ਤਭਾਵੋ. ਸਤਿਪਿ ਕਦਾਚਿ ਖੁਦ੍ਦਕੇ ਚੇਵ ਮਹਨ੍ਤੇ ਚ ਪਾਣੇ ਪਯੋਗਸ੍ਸ ਸਮਭਾਵੇ ਮਹਨ੍ਤਂ ਹਨਨ੍ਤਸ੍ਸ ਚੇਤਨਾ ਤਿਬ੍ਬਤਰਾ ਉਪ੍ਪਜ੍ਜਤੀਤਿ ਵਤ੍ਥੁਮਹਨ੍ਤਤਾਪਿ ਚੇਤਨਾਯ ਬਲਵਭਾਵਸ੍ਸ ਕਾਰਣਂ. ਇਤਿ ਉਭਯਮ੍ਪੇਤਂ ਚੇਤਨਾਬਲਵਭਾਵੇਨੇਵ ਮਹਾਸਾਵਜ੍ਜਤਾਯ ਹੇਤੁ ਹੋਤਿ. ਤਥਾ ਹਨ੍ਤਬ੍ਬਸ੍ਸ ਮਹਾਗੁਣਭਾਵੇ ਤਤ੍ਥ ਪਵਤ੍ਤਉਪਕਾਰਚੇਤਨਾ ਵਿਯ ਖੇਤ੍ਤਵਿਸੇਸਨਿਪ੍ਫਤ੍ਤਿਯਾ ਅਪਕਾਰਚੇਤਨਾਪਿ ਬਲਵਤੀ ਤਿਬ੍ਬਤਰਾ ਉਪ੍ਪਜ੍ਜਤੀਤਿ ਤਸ੍ਸ ਮਹਾਸਾਵਜ੍ਜਤਾ ਦਟ੍ਠਬ੍ਬਾ. ਤਸ੍ਮਾ ਪਯੋਗਵਤ੍ਥੁਆਦਿਪਚ੍ਚਯਾਨਂ ਅਮਹਤ੍ਤੇਪਿ ਗੁਣਮਹਨ੍ਤਤਾਦਿਪਚ੍ਚਯੇਹਿ ਚੇਤਨਾਯ ਬਲਵਭਾਵਵਸੇਨੇਵ ਮਹਾਸਾਵਜ੍ਜਤਾ ਵੇਦਿਤਬ੍ਬਾ.

ਤਸ੍ਸ ਪਾਣੋ, ਪਾਣਸਞ੍ਞਿਤਾ, ਵਧਕਚਿਤ੍ਤਂ, ਉਪਕ੍ਕਮੋ, ਤੇਨ ਮਰਣਨ੍ਤਿ ਪਞ੍ਚ ਸਮ੍ਭਾਰਾ. ਪਞ੍ਚਸਮ੍ਭਾਰਯੁਤ੍ਤੋ ਪਾਣਾਤਿਪਾਤੋਤਿ ਪਞ੍ਚਸਮ੍ਭਾਰਾਵਿਨਿਮੁਤ੍ਤੋ ਦਟ੍ਠਬ੍ਬੋ. ਤੇਸੁ ਪਾਣਸਞ੍ਞਿਤਾਵਧਕਚਿਤ੍ਤਾਨਿ ਪੁਬ੍ਬਭਾਗਿਯਾਨਿਪਿ ਹੋਨ੍ਤਿ, ਉਪਕ੍ਕਮੋ ਵਧਕਚੇਤਨਾਸਮੁਟ੍ਠਾਪਿਤੋ. ਤਸ੍ਸ ਛ ਪਯੋਗਾ – ਸਾਹਤ੍ਥਿਕੋ, ਆਣਤ੍ਤਿਕੋ, ਨਿਸ੍ਸਗ੍ਗਿਯੋ, ਥਾਵਰੋ, ਵਿਜ੍ਜਾਮਯੋ, ਇਦ੍ਧਿਮਯੋਤਿ. ਤੇਸੁ ਸਹਤ੍ਥੇਨ ਨਿਬ੍ਬਤ੍ਤੋ ਸਾਹਤ੍ਥਿਕੋ. ਪਰੇਸਂ ਆਣਾਪਨਵਸੇਨ ਪਵਤ੍ਤੋ ਆਣਤ੍ਤਿਕੋ. ਉਸੁਸਤ੍ਤਿਆਦੀਨਂ ਨਿਸ੍ਸਜ੍ਜਨਵਸੇਨ ਪਵਤ੍ਤੋ ਨਿਸ੍ਸਗ੍ਗਿਯੋ. ਓਪਾਤਖਣਨਾਦਿਵਸੇਨ ਪਵਤ੍ਤੋ ਥਾਵਰੋ. ਆਥਬ੍ਬਣਿਕਾਦੀਨਂ ਵਿਯ ਮਨ੍ਤਪਰਿਜਪ੍ਪਨਪਯੋਗੋ ਵਿਜ੍ਜਾਮਯੋ. ਦਾਠਾਕੋਟ੍ਟਨਾਦੀਨਂ ਵਿਯ ਕਮ੍ਮਵਿਪਾਕਜਿਦ੍ਧਿਮਯੋ.

ਏਤ੍ਥਾਹ – ਖਣੇ ਖਣੇ ਨਿਰੁਜ੍ਝਨਸਭਾਵੇਸੁ ਸਙ੍ਖਾਰੇਸੁ, ਕੋ ਹਨ੍ਤਾ, ਕੋ ਵਾ ਹਞ੍ਞਤਿ? ਯਦਿ ਚਿਤ੍ਤਚੇਤਸਿਕਸਨ੍ਤਾਨੋ, ਸੋ ਅਰੂਪਿਤਾਯ ਨ ਛੇਦਨਭੇਦਨਾਦਿਵਸੇਨ ਵਿਕੋਪਨਸਮਤ੍ਥੋ, ਨਾਪਿ ਵਿਕੋਪਨੀਯੋ, ਅਥ ਰੂਪਸਨ੍ਤਾਨੋ, ਸੋ ਅਚੇਤਨਤਾਯ ਕਟ੍ਠਕਲਿਙ੍ਗਰੂਪਮੋਤਿ ਨ ਤਤ੍ਥ ਛੇਦਨਾਦਿਨਾ ਪਾਣਾਤਿਪਾਤੋ ਲਬ੍ਭਤਿ, ਯਥਾ ਮਤਸਰੀਰੇ. ਪਯੋਗੋਪਿ ਪਾਣਾਤਿਪਾਤਸ੍ਸ ਯਥਾਵੁਤ੍ਤੋ ਪਹਰਣਪ੍ਪਹਾਰਾਦਿਕੋ ਅਤੀਤੇਸੁ ਸਙ੍ਖਾਰੇਸੁ ਭਵੇਯ੍ਯ ਅਨਾਗਤੇਸੁ ਪਚ੍ਚੁਪ੍ਪਨ੍ਨੇਸੁ ਵਾ. ਤਤ੍ਥ ਨ ਤਾਵ ਅਤੀਤੇਸੁ ਅਨਾਗਤੇਸੁ ਚ ਸਮ੍ਭਵਤਿ ਤੇਸਂ ਅਵਿਜ੍ਜਮਾਨਸਭਾਵਤ੍ਤਾ, ਪਚ੍ਚੁਪ੍ਪਨ੍ਨੇਸੁ ਚ ਸਙ੍ਖਾਰਾਨਂ ਖਣਿਕਤ੍ਤਾ ਸਰਸੇਨੇਵ ਨਿਰੁਜ੍ਝਨਸਭਾਵਤਾਯ ਵਿਨਾਸਾਭਿਮੁਖੇਸੁ ਨਿਪ੍ਪਯੋਜਨੋ ਪਯੋਗੋ ਸਿਯਾ, ਵਿਨਾਸਸ੍ਸ ਚ ਕਾਰਣਰਹਿਤਤ੍ਤਾ ਨ ਪਹਰਣਪ੍ਪਹਾਰਾਦਿਪ੍ਪਯੋਗਹੇਤੁਕਂ ਮਰਣਂ, ਨਿਰੀਹਤ੍ਤਾ ਚ ਸਙ੍ਖਾਰਾਨਂ ਕਸ੍ਸ ਸੋ ਪਯੋਗੋ, ਖਣਿਕਭਾਵੇਨ ਵਧਾਧਿਪ੍ਪਾਯਸਮਕਾਲਮੇਵ ਭਿਜ੍ਜਨਕਸ੍ਸ ਯਾਵ ਕਿਰਿਯਾਪਰਿਯੋਸਾਨਕਾਲਮਨਵਟ੍ਠਾਨਤੋ ਕਸ੍ਸ ਵਾ ਪਾਣਾਤਿਪਾਤੋ ਕਮ੍ਮਬਨ੍ਧੋਤਿ?

ਵੁਚ੍ਚਤੇ – ਯਥਾਵੁਤ੍ਤਵਧਕਚੇਤਨਾਸਮਙ੍ਗੀ ਸਙ੍ਖਾਰਾਨਂ ਪੁਞ੍ਜੋ ਸਤ੍ਤਸਙ੍ਖਾਤੋ ਹਨ੍ਤਾ. ਤੇਨ ਪਵਤ੍ਤਿਤਵਧਪ੍ਪਯੋਗਨਿਮਿਤ੍ਤਂ ਅਪਗਤੁਸ੍ਮਾਵਿਞ੍ਞਾਣਜੀਵਿਤਿਨ੍ਦ੍ਰਿਯੋ ਮਤੋਤਿ ਵੋਹਾਰਸ੍ਸ ਵਤ੍ਥੁਭੂਤੋ ਯਥਾਵੁਤ੍ਤਵਧਪ੍ਪਯੋਗਾਕਰਣੇ ਪੁਬ੍ਬੇ ਵਿਯ ਉਦ੍ਧਂ ਪਵਤ੍ਤਨਾਰਹੋ ਰੂਪਾਰੂਪਧਮ੍ਮਪੁਞ੍ਜੋ ਹਞ੍ਞਤਿ, ਚਿਤ੍ਤਚੇਤਸਿਕਸਨ੍ਤਾਨੋ ਏਵ ਵਾ. ਵਧਪ੍ਪਯੋਗਾਵਿਸਯਭਾਵੇਪਿ ਤਸ੍ਸ ਪਞ੍ਚਵੋਕਾਰਭਵੇ ਰੂਪਸਨ੍ਤਾਨਾਧੀਨਵੁਤ੍ਤਿਤਾਯ ਭੂਤਰੂਪੇਸੁ ਕਤਪ੍ਪਯੋਗਵਸੇਨ ਜੀਵਿਤਿਨ੍ਦ੍ਰਿਯਵਿਚ੍ਛੇਦੇਨ ਸੋਪਿ ਵਿਚ੍ਛਿਜ੍ਜਤੀਤਿ ਨ ਪਾਣਾਤਿਪਾਤਸ੍ਸ ਅਸਮ੍ਭਵੋ, ਨਾਪਿ ਅਹੇਤੁਕੋ, ਨ ਚ ਪਯੋਗੋ ਨਿਪ੍ਪਯੋਜਨੋ. ਪਚ੍ਚੁਪ੍ਪਨ੍ਨੇਸੁ ਸਙ੍ਖਾਰੇਸੁ ਕਤਪ੍ਪਯੋਗਵਸੇਨ ਤਦਨਨ੍ਤਰਂ ਉਪ੍ਪਜ੍ਜਨਾਰਹਸ੍ਸ ਸਙ੍ਖਾਰਕਲਾਪਸ੍ਸ ਤਥਾ ਅਨੁਪ੍ਪਤ੍ਤਿਤੋ ਖਣਿਕਾਨਞ੍ਚ ਸਙ੍ਖਾਰਾਨਂ ਖਣਿਕਮਰਣਸ੍ਸ ਇਧ ਮਰਣਭਾਵੇਨ ਅਨਧਿਪ੍ਪੇਤਤ੍ਤਾ ਸਨ੍ਤਤਿਮਰਣਸ੍ਸ ਚ ਯਥਾਵੁਤ੍ਤਨਯੇਨ ਸਹੇਤੁਕਭਾਵਤੋ ਨ ਅਹੇਤੁਕਂ ਮਰਣਂ, ਨਿਰੀਹਕੇਸੁਪਿ ਸਙ੍ਖਾਰੇਸੁ ਯਥਾਪਚ੍ਚਯਂ ਉਪ੍ਪਜ੍ਜਿਤ੍ਵਾ ਅਤ੍ਥਿਭਾਵਮਤ੍ਤੇਨੇਵ ਅਤ੍ਤਨੋ ਅਤ੍ਤਨੋ ਅਨੁਰੂਪਫਲੁਪ੍ਪਾਦਨਨਿਯਤਾਨਿ ਕਾਰਣਾਨਿਯੇਵ ਕਰੋਨ੍ਤੀਤਿ ਵੁਚ੍ਚਤਿ, ਯਥਾ ਪਦੀਪੋ ਪਕਾਸੇਤੀਤਿ, ਤਥੇਵ ਘਾਤਕਵੋਹਾਰੋ. ਨ ਚ ਕੇਵਲਸ੍ਸ ਵਧਾਧਿਪ੍ਪਾਯਸਹਭੁਨੋ ਚਿਤ੍ਤਚੇਤਸਿਕਕਲਾਪਸ੍ਸ ਪਾਣਾਤਿਪਾਤੋ ਇਚ੍ਛਿਤੋ, ਸਨ੍ਤਾਨਵਸੇਨ ਵਤ੍ਤਮਾਨਸ੍ਸੇਵ ਪਨ ਇਚ੍ਛਿਤੋਤਿ ਅਤ੍ਥੇਵ ਪਾਣਾਤਿਪਾਤੇਨ ਕਮ੍ਮਬਨ੍ਧੋ. ਸਨ੍ਤਾਨਵਸੇਨ ਵਤ੍ਤਮਾਨਾਨਞ੍ਚ ਪਦੀਪਾਦੀਨਂ ਅਤ੍ਥਕਿਰਿਯਾਸਿਦ੍ਧਿ ਦਿਸ੍ਸਤੀਤਿ. ਅਯਞ੍ਚ ਵਿਚਾਰਣਾ ਅਦਿਨ੍ਨਾਦਾਨਾਦੀਸੁਪਿ ਯਥਾਸਮ੍ਭਵਂ ਵਿਭਾਵੇਤਬ੍ਬਾ. ਤਸ੍ਮਾ ਪਾਣਾਤਿਪਾਤਾ. ਨ ਪਟਿਵਿਰਤਾਤਿ ਅਪ੍ਪਟਿਵਿਰਤਾ.

ਅਦਿਨ੍ਨਸ੍ਸ ਆਦਾਨਂ ਅਦਿਨ੍ਨਾਦਾਨਂ, ਪਰਸ੍ਸ ਹਰਣਂ ਥੇਯ੍ਯਂ ਚੋਰਿਕਾਤਿ ਵੁਤ੍ਤਂ ਹੋਤਿ. ਤਤ੍ਥ ਅਦਿਨ੍ਨਨ੍ਤਿ ਪਰਪਰਿਗ੍ਗਹਿਤਂ, ਯਤ੍ਥ ਪਰੋ ਯਥਾਕਾਮਕਾਰਿਤਂ ਆਪਜ੍ਜਨ੍ਤੋ ਅਦਣ੍ਡਾਰਹੋ ਅਨੁਪਵਜ੍ਜੋ ਚ ਹੋਤਿ. ਤਸ੍ਮਿਂ ਪਰਪਰਿਗ੍ਗਹਿਤੇ ਪਰਪਰਿਗ੍ਗਹਿਤਸਞ੍ਞਿਨੋ ਤਦਾਦਾਯਕਉਪਕ੍ਕਮਸਮੁਟ੍ਠਾਪਿਕਾ ਥੇਯ੍ਯਚੇਤਨਾ ਅਦਿਨ੍ਨਾਦਾਨਂ. ਤਂ ਹੀਨੇ ਪਰਸਨ੍ਤਕੇ ਅਪ੍ਪਸਾਵਜ੍ਜਂ, ਪਣੀਤੇ ਮਹਾਸਾਵਜ੍ਜਂ. ਕਸ੍ਮਾ? ਵਤ੍ਥੁਪਣੀਤਤਾਯ. ਤਥਾ ਖੁਦ੍ਦਕੇ ਪਰਸਨ੍ਤਕੇ ਅਪ੍ਪਸਾਵਜ੍ਜਂ, ਮਹਨ੍ਤੇ ਮਹਾਸਾਵਜ੍ਜਂ. ਕਸ੍ਮਾ? ਵਤ੍ਥੁਮਹਨ੍ਤਤਾਯ ਪਯੋਗਮਹਨ੍ਤਤਾਯ ਚ. ਵਤ੍ਥੁਸਮਤ੍ਤੇ ਪਨ ਸਤਿ ਗੁਣਾਧਿਕਾਨਂ ਸਨ੍ਤਕੇ ਵਤ੍ਥੁਸ੍ਮਿਂ ਮਹਾਸਾਵਜ੍ਜਂ, ਤਂਤਂਗੁਣਾਧਿਕਂ ਉਪਾਦਾਯ ਤਤੋ ਤਤੋ ਹੀਨਗੁਣਸ੍ਸ ਸਨ੍ਤਕੇ ਵਤ੍ਥੁਸ੍ਮਿਂ ਅਪ੍ਪਸਾਵਜ੍ਜਂ. ਵਤ੍ਥੁਗੁਣਾਨਂ ਪਨ ਸਮਭਾਵੇ ਸਤਿ ਕਿਲੇਸਾਨਂ ਪਯੋਗਸ੍ਸ ਚ ਮੁਦੁਭਾਵੇ ਅਪ੍ਪਸਾਵਜ੍ਜਂ, ਤਿਬ੍ਬਭਾਵੇ ਮਹਾਸਾਵਜ੍ਜਂ.

ਤਸ੍ਸ ਪਞ੍ਚ ਸਮ੍ਭਾਰਾ – ਪਰਪਰਿਗ੍ਗਹਿਤਂ, ਪਰਪਰਿਗ੍ਗਹਿਤਸਞ੍ਞਿਤਾ, ਥੇਯ੍ਯਚਿਤ੍ਤਂ, ਉਪਕ੍ਕਮੋ, ਤੇਨ ਹਰਣਨ੍ਤਿ. ਛ ਪਯੋਗਾ ਸਾਹਤ੍ਥਿਕਾਦਯੋਵ. ਤੇ ਚ ਖੋ ਯਥਾਨੁਰੂਪਂ ਥੇਯ੍ਯਾਵਹਾਰੋ, ਪਸਯ੍ਹਾਵਹਾਰੋ, ਪਰਿਕਪ੍ਪਾਵਹਾਰੋ, ਪਟਿਚ੍ਛਨ੍ਨਾਵਹਾਰੋ, ਕੁਸਾਵਹਾਰੋਤਿ ਇਮੇਸਂ ਅਵਹਾਰਾਨਂ ਵਸੇਨ ਪਵਤ੍ਤਾ. ਏਤ੍ਥ ਚ ਮਨ੍ਤਪਰਿਜਪ੍ਪਨੇਨ ਪਰਸਨ੍ਤਕਹਰਣਂ ਵਿਜ੍ਜਾਮਯੋ ਪਯੋਗੋ. ਵਿਨਾ ਮਨ੍ਤੇਨ ਤਾਦਿਸੇਨ ਇਦ੍ਧਾਨੁਭਾਵਸਿਦ੍ਧੇਨ ਕਾਯਵਚੀਪਯੋਗੇਨ ਪਰਸਨ੍ਤਕਸ੍ਸ ਆਕਡ੍ਢਨਂ ਇਦ੍ਧਿਮਯੋ ਪਯੋਗੋਤਿ ਵੇਦਿਤਬ੍ਬੋ.

ਕਾਮੇਸੂਤਿ ਮੇਥੁਨਸਮਾਚਾਰੇਸੁ. ਮਿਚ੍ਛਾਚਾਰੋਤਿ ਏਕਨ੍ਤਨਿਨ੍ਦਿਤੋ ਲਾਮਕਾਚਾਰੋ. ਲਕ੍ਖਣਤੋ ਪਨ ਅਸਦ੍ਧਮ੍ਮਾਧਿਪ੍ਪਾਯੇਨ ਕਾਯਦ੍ਵਾਰਪ੍ਪਵਤ੍ਤਾ ਅਗਮਨੀਯਟ੍ਠਾਨਵੀਤਿਕ੍ਕਮਚੇਤਨਾ ਕਾਮੇਸੁ ਮਿਚ੍ਛਾਚਾਰੋ. ਤਤ੍ਥ ਅਗਮਨੀਯਟ੍ਠਾਨਂ ਨਾਮ ਪੁਰਿਸਾਨਂ ਤਾਵ ਮਾਤੁਰਕ੍ਖਿਤਾਦਯੋ ਦਸ, ਧਨਕ੍ਕੀਤਾਦਯੋ ਦਸਾਤਿ ਵੀਸਤਿ ਇਤ੍ਥਿਯੋ, ਇਤ੍ਥੀਸੁ ਪਨ ਦ੍ਵਿਨ੍ਨਂ ਸਾਰਕ੍ਖਸਪਰਿਦਣ੍ਡਾਨਂ, ਦਸਨ੍ਨਞ੍ਚ ਧਨਕ੍ਕੀਤਾਦੀਨਨ੍ਤਿ ਦ੍ਵਾਦਸਨ੍ਨਂ ਇਤ੍ਥੀਨਂ ਅਞ੍ਞਪੁਰਿਸਾ. ਸ੍ਵਾਯਂ ਮਿਚ੍ਛਾਚਾਰੋ ਸੀਲਾਦਿਗੁਣਰਹਿਤੇ ਅਗਮਨੀਯਟ੍ਠਾਨੇ ਅਪ੍ਪਸਾਵਜ੍ਜੋ, ਸੀਲਾਦਿਗੁਣਸਮ੍ਪਨ੍ਨੇ ਮਹਾਸਾਵਜ੍ਜੋ. ਗੁਣਰਹਿਤੇਪਿ ਚ ਅਭਿਭਵਿਤ੍ਵਾ ਮਿਚ੍ਛਾ ਚਰਨ੍ਤਸ੍ਸ ਮਹਾਸਾਵਜ੍ਜੋ, ਉਭਿਨ੍ਨਂ ਸਮਾਨਚ੍ਛਨ੍ਦਤਾਯ ਅਪ੍ਪਸਾਵਜ੍ਜੋ. ਸਮਾਨਚ੍ਛਨ੍ਦਭਾਵੇਪਿ ਕਿਲੇਸਾਨਂ ਉਪਕ੍ਕਮਾਨਞ੍ਚ ਮੁਦੁਤਾਯ ਅਪ੍ਪਸਾਵਜ੍ਜੋ, ਤਿਬ੍ਬਤਾਯ ਮਹਾਸਾਵਜ੍ਜੋ. ਤਸ੍ਸ ਚਤ੍ਤਾਰੋ ਸਮ੍ਭਾਰਾ – ਅਗਮਨੀਯਵਤ੍ਥੁ, ਤਸ੍ਮਿਂ ਸੇਵਨਚਿਤ੍ਤਂ, ਸੇਵਨਪਯੋਗੋ, ਮਗ੍ਗੇਨਮਗ੍ਗਪ੍ਪਟਿਪਤ੍ਤਿਅਧਿਵਾਸਨਨ੍ਤਿ. ਤਤ੍ਥ ਅਤ੍ਤਨੋ ਰੁਚਿਯਾ ਪਵਤ੍ਤਿਤਸ੍ਸ ਤਯੋ, ਬਲਕ੍ਕਾਰੇਨ ਪਵਤ੍ਤਿਤਸ੍ਸ ਤਯੋਤਿ ਅਨਵਸੇਸਗ੍ਗਹਣੇਨ ਚਤ੍ਤਾਰੋ ਦਟ੍ਠਬ੍ਬਾ, ਅਤ੍ਥਸਿਦ੍ਧਿ ਪਨ ਤੀਹੇਵ. ਏਕੋ ਪਯੋਗੋ ਸਾਹਤ੍ਥਿਕੋਵ.

ਮੁਸਾਤਿ ਵਿਸਂਵਾਦਨਪੁਰੇਕ੍ਖਾਰਸ੍ਸ ਅਤ੍ਥਭਞ੍ਜਕੋ ਕਾਯਵਚੀਪਯੋਗੋ, ਵਿਸਂਵਾਦਨਾਧਿਪ੍ਪਾਯੇਨ ਪਨਸ੍ਸ ਪਰਵਿਸਂਵਾਦਕਕਾਯਵਚੀਪਯੋਗਸਮੁਟ੍ਠਾਪਿਕਾ ਚੇਤਨਾ ਮੁਸਾਵਾਦੋ. ਅਪਰੋ ਨਯੋ ਮੁਸਾਤਿ ਅਭੂਤਂ ਵਤ੍ਥੁ, ਵਾਦੋਤਿ ਤਸ੍ਸ ਭੂਤਤੋ ਤਚ੍ਛਤੋ ਵਿਞ੍ਞਾਪਨਂ. ਤਸ੍ਮਾ ਅਤਥਂ ਵਤ੍ਥੁਂ ਤਥਤੋ ਪਰਂ ਵਿਞ੍ਞਾਪੇਤੁਕਾਮਸ੍ਸ ਤਥਾਵਿਞ੍ਞਾਪਨਪਯੋਗਸਮੁਟ੍ਠਾਪਿਕਾ ਚੇਤਨਾ ਮੁਸਾਵਾਦੋ.

ਸੋ ਯਮਤ੍ਥਂ ਭਞ੍ਜਤਿ, ਤਸ੍ਸ ਅਪ੍ਪਤਾਯ ਅਪ੍ਪਸਾਵਜ੍ਜੋ, ਮਹਨ੍ਤਤਾਯ ਮਹਾਸਾਵਜ੍ਜੋ. ਅਪਿਚ ਗਹਟ੍ਠਾਨਂ ਅਤ੍ਤਨੋ ਸਨ੍ਤਕਂ ਅਦਾਤੁਕਾਮਤਾਯ ਨਤ੍ਥੀਤਿ ਆਦਿਨਯਪ੍ਪਵਤ੍ਤੋ ਅਪ੍ਪਸਾਵਜ੍ਜੋ, ਸਕ੍ਖਿਨਾ ਹੁਤ੍ਵਾ ਅਤ੍ਥਭਞ੍ਜਨਵਸੇਨ ਵੁਤ੍ਤੋ ਮਹਾਸਾਵਜ੍ਜੋ. ਪਬ੍ਬਜਿਤਾਨਂ ਅਪ੍ਪਕਮ੍ਪਿ ਤੇਲਂ ਵਾ ਸਪ੍ਪਿਂ ਵਾ ਲਭਿਤ੍ਵਾ ਹਸਾਧਿਪ੍ਪਾਯੇਨ ‘‘ਅਜ੍ਜ ਗਾਮੇ ਤੇਲਂ ਨਦੀ ਮਞ੍ਞੇ ਸਨ੍ਦਤੀ’’ਤਿ ਪੂਰਣਕਥਾਨਯੇਨ ਪਵਤ੍ਤੋ ਅਪ੍ਪਸਾਵਜ੍ਜੋ, ਅਦਿਟ੍ਠਂਯੇਵ ਪਨ ‘‘ਦਿਟ੍ਠ’’ਨ੍ਤਿਆਦਿਨਾ ਨਯੇਨ ਵਦਨ੍ਤਾਨਂ ਮਹਾਸਾਵਜ੍ਜੋ. ਤਥਾ ਯਸ੍ਸ ਅਤ੍ਥਂ ਭਞ੍ਜਤਿ, ਤਸ੍ਸ ਅਪ੍ਪਗੁਣਤਾਯ ਅਪ੍ਪਸਾਵਜ੍ਜੋ, ਮਹਾਗੁਣਤਾਯ ਮਹਾਸਾਵਜ੍ਜੋ. ਕਿਲੇਸਾਨਂ ਮੁਦੁਤਿਬ੍ਬਤਾਵਸੇਨ ਚ ਅਪ੍ਪਸਾਵਜ੍ਜਮਹਾਸਾਵਜ੍ਜਤਾ ਲਬ੍ਭਤੇਵ.

ਤਸ੍ਸ ਚਤ੍ਤਾਰੋ ਸਮ੍ਭਾਰਾ – ਅਤਥਂ ਵਤ੍ਥੁ, ਵਿਸਂਵਾਦਨਚਿਤ੍ਤਂ, ਤਜ੍ਜੋ ਵਾਯਾਮੋ, ਪਰਸ੍ਸ ਤਦਤ੍ਥਵਿਜਾਨਨਨ੍ਤਿ. ਵਿਸਂਵਾਦਨਾਧਿਪ੍ਪਾਯੇਨ ਹਿ ਪਯੋਗੇ ਕਤੇਪਿ ਪਰੇਨ ਤਸ੍ਮਿਂ ਅਤ੍ਥੇ ਅਵਿਞ੍ਞਾਤੇ ਵਿਸਂਵਾਦਨਸ੍ਸ ਅਸਿਜ੍ਝਨਤੋ ਪਰਸ੍ਸ ਤਦਤ੍ਥਵਿਜਾਨਨਮ੍ਪਿ ਏਕੋ ਸਮ੍ਭਾਰੋ ਵੇਦਿਤਬ੍ਬੋ. ਕੇਚਿ ਪਨ ‘‘ਅਭੂਤਵਚਨਂ, ਵਿਸਂਵਾਦਨਚਿਤ੍ਤਂ, ਪਰਸ੍ਸ ਤਦਤ੍ਥਵਿਜਾਨਨਨ੍ਤਿ ਤਯੋ ਸਮ੍ਭਾਰਾ’’ਤਿ ਵਦਨ੍ਤਿ. ਸਚੇ ਪਨ ਪਰੋ ਦਨ੍ਧਤਾਯ ਵਿਚਾਰੇਤ੍ਵਾ ਤਮਤ੍ਥਂ ਜਾਨਾਤਿ, ਸਨ੍ਨਿਟ੍ਠਾਪਕਚੇਤਨਾਯ ਪਵਤ੍ਤਤ੍ਤਾ ਕਿਰਿਯਾਸਮੁਟ੍ਠਾਪਕਚੇਤਨਾਕ੍ਖਣੇਯੇਵ ਮੁਸਾਵਾਦਕਮ੍ਮੁਨਾ ਬਜ੍ਝਤਿ.

ਸੁਰਾਤਿ ਪਿਟ੍ਠਸੁਰਾ, ਪੂਵਸੁਰਾ, ਓਦਨਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ ਪਞ੍ਚ ਸੁਰਾ. ਮੇਰਯਨ੍ਤਿ ਪੁਪ੍ਫਾਸਵੋ, ਫਲਾਸਵੋ, ਮਧ੍ਵਾਸਵੋ, ਗੁਲ਼ਾਸਵੋ ਸਮ੍ਭਾਰਸਂਯੁਤ੍ਤੋਤਿ ਪਞ੍ਚ ਆਸਵਾ. ਤਦੁਭਯਮ੍ਪਿ ਮਦਨੀਯਟ੍ਠੇਨ ਮਜ੍ਜਂ. ਯਾਯ ਚੇਤਨਾਯ ਤਂ ਪਿਵਤਿ, ਸਾ ਪਮਾਦਕਾਰਣਤ੍ਤਾ ਪਮਾਦਟ੍ਠਾਨਂ. ਲਕ੍ਖਣਤੋ ਪਨ ਯਥਾਵੁਤ੍ਤਸ੍ਸ ਸੁਰਾਮੇਰਯਸਙ੍ਖਾਤਸ੍ਸ ਮਜ੍ਜਸ੍ਸ ਬੀਜਤੋ ਪਟ੍ਠਾਯ ਮਦਵਸੇਨ ਕਾਯਦ੍ਵਾਰਪ੍ਪਵਤ੍ਤਾ ਪਮਾਦਚੇਤਨਾ ਸੁਰਾਮੇਰਯਮਜ੍ਜਪਮਾਦਟ੍ਠਾਨਂ. ਤਸ੍ਸ ਮਜ੍ਜਭਾਵੋ, ਪਾਤੁਕਮ੍ਯਤਾਚਿਤ੍ਤਂ, ਤਜ੍ਜੋ ਵਾਯਾਮੋ, ਅਜ੍ਝੋਹਰਣਨ੍ਤਿ ਚਤ੍ਤਾਰੋ ਸਮ੍ਭਾਰਾ. ਅਕੁਸਲਚਿਤ੍ਤੇਨੇਵ ਚਸ੍ਸ ਪਾਤਬ੍ਬਤੋ ਏਕਨ੍ਤੇਨ ਸਾਵਜ੍ਜਭਾਵੋ. ਅਰਿਯਸਾਵਕਾਨਂ ਪਨ ਵਤ੍ਥੁਂ ਅਜਾਨਨ੍ਤਾਨਮ੍ਪਿ ਮੁਖਂ ਨ ਪਵਿਸਤਿ, ਪਗੇਵ ਜਾਨਨ੍ਤਾਨਂ. ਅਡ੍ਢਪਸਤਮਤ੍ਤਸ੍ਸ ਪਾਨਂ ਅਪ੍ਪਸਾਵਜ੍ਜਂ, ਅਦ੍ਧਾਲ਼੍ਹਕਮਤ੍ਤਸ੍ਸ ਪਾਨਂ ਤਤੋ ਮਹਨ੍ਤਂ ਮਹਾਸਾਵਜ੍ਜਂ, ਕਾਯਸਞ੍ਚਾਲਨਸਮਤ੍ਥਂ ਬਹੁਂ ਪਿਵਿਤ੍ਵਾ ਗਾਮਘਾਤਕਾਦਿਕਮ੍ਮਂ ਕਰੋਨ੍ਤਸ੍ਸ ਮਹਾਸਾਵਜ੍ਜਮੇਵ. ਪਾਪਕਮ੍ਮਞ੍ਹਿ ਪਾਣਾਤਿਪਾਤਂ ਪਤ੍ਵਾ ਖੀਣਾਸਵੇ ਮਹਾਸਾਵਜ੍ਜਂ, ਅਦਿਨ੍ਨਾਦਾਨਂ ਪਤ੍ਵਾ ਖੀਣਾਸਵਸ੍ਸ ਸਨ੍ਤਕੇ ਮਹਾਸਾਵਜ੍ਜਂ, ਮਿਚ੍ਛਾਚਾਰਂ ਪਤ੍ਵਾ ਖੀਣਾਸਵਾਯ ਭਿਕ੍ਖੁਨਿਯਾ ਵੀਤਿਕ੍ਕਮੇ, ਮੁਸਾਵਾਦਂ ਪਤ੍ਵਾ ਮੁਸਾਵਾਦੇਨ ਸਙ੍ਘਭੇਦੇ, ਸੁਰਾਪਾਨਂ ਪਤ੍ਵਾ ਕਾਯਸਞ੍ਚਾਲਨਸਮਤ੍ਥਂ ਬਹੁਂ ਪਿਵਿਤ੍ਵਾ ਗਾਮਘਾਤਕਾਦਿਕਮ੍ਮਂ ਮਹਾਸਾਵਜ੍ਜਂ. ਸਬ੍ਬੇਹਿਪਿ ਚੇਤੇਹਿ ਮੁਸਾਵਾਦੇਨ ਸਙ੍ਘਭੇਦੋਵ ਮਹਾਸਾਵਜ੍ਜੋ. ਤਞ੍ਹਿ ਕਤ੍ਵਾ ਕਪ੍ਪਂ ਨਿਰਯੇ ਪਚ੍ਚਤਿ.

ਇਦਾਨਿ ਏਤੇਸੁ ਸਭਾਵਤੋ, ਆਰਮ੍ਮਣਤੋ, ਵੇਦਨਤੋ, ਮੂਲਤੋ, ਕਮ੍ਮਤੋ, ਫਲਤੋਤਿ ਛਹਿ ਆਕਾਰੇਹਿ ਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਥ ਸਭਾਵਤੋ ਪਾਣਾਤਿਪਾਤਾਦਯੋ ਸਬ੍ਬੇਪਿ ਚੇਤਨਾਸਭਾਵਾਵ. ਆਰਮ੍ਮਣਤੋ ਪਾਣਾਤਿਪਾਤੋ ਜੀਵਿਤਿਨ੍ਦ੍ਰਿਯਾਰਮ੍ਮਣਤੋ ਸਙ੍ਖਾਰਾਰਮ੍ਮਣੋ, ਅਦਿਨ੍ਨਾਦਾਨਂ ਸਤ੍ਤਾਰਮ੍ਮਣਂ ਵਾ ਸਙ੍ਖਾਰਾਰਮ੍ਮਣਂ ਵਾ, ਮਿਚ੍ਛਾਚਾਰੋ ਫੋਟ੍ਠਬ੍ਬਵਸੇਨ ਸਙ੍ਖਾਰਾਰਮ੍ਮਣੋ, ਸਤ੍ਤਾਰਮ੍ਮਣੋਤਿ ਏਕੇ. ਮੁਸਾਵਾਦੋ ਸਤ੍ਤਾਰਮ੍ਮਣੋ ਵਾ ਸਙ੍ਖਾਰਾਰਮ੍ਮਣੋ ਵਾ, ਸੁਰਾਪਾਨਂ ਸਙ੍ਖਾਰਾਰਮ੍ਮਣਂ. ਵੇਦਨਤੋ ਪਾਣਾਤਿਪਾਤੋ ਦੁਕ੍ਖਵੇਦਨੋ, ਅਦਿਨ੍ਨਾਦਾਨਂ ਤਿਵੇਦਨਂ, ਮਿਚ੍ਛਾਚਾਰੋ ਸੁਖਮਜ੍ਝਤ੍ਤਵਸੇਨ ਦ੍ਵਿਵੇਦਨੋ, ਤਥਾ ਸੁਰਾਪਾਨਂ. ਸਨ੍ਨਿਟ੍ਠਾਪਕਚਿਤ੍ਤੇਨ ਪਨ ਉਭਯਮ੍ਪਿ ਮਜ੍ਝਤ੍ਤਵੇਦਨਂ ਨ ਹੋਤਿ. ਮੁਸਾਵਾਦੋ ਤਿਵੇਦਨੋ. ਮੂਲਤੋ ਪਾਣਾਤਿਪਾਤੋ ਦੋਸਮੋਹਵਸੇਨ ਦ੍ਵਿਮੂਲਕੋ, ਅਦਿਨ੍ਨਾਦਾਨਂ ਮੁਸਾਵਾਦੋ ਚ ਦੋਸਮੋਹਵਸੇਨ ਵਾ ਲੋਭਮੋਹਵਸੇਨ ਵਾ, ਮਿਚ੍ਛਾਚਾਰੋ ਸੁਰਾਪਾਨਞ੍ਚ ਲੋਭਮੋਹਵਸੇਨ ਦ੍ਵਿਮੂਲਂ. ਕਮ੍ਮਤੋ ਮੁਸਾਵਾਦੋਯੇਵੇਤ੍ਥ ਵਚੀਕਮ੍ਮਂ, ਸੇਸਂ ਚਤੁਬ੍ਬਿਧਮ੍ਪਿ ਕਾਯਕਮ੍ਮਮੇਵ. ਫਲਤੋ ਸਬ੍ਬੇਪਿ ਅਪਾਯੂਪਪਤ੍ਤਿਫਲਾ ਚੇਵ ਸੁਗਤਿਯਮ੍ਪਿ ਅਪ੍ਪਾਯੁਕਤਾਦਿਨਾਨਾਵਿਧਅਨਿਟ੍ਠਫਲਾ ਚਾਤਿ ਏਵਮੇਤ੍ਥ ਸਭਾਵਾਦਿਤੋ ਵਿਨਿਚ੍ਛਯੋ ਵੇਦਿਤਬ੍ਬੋ.

ਅਪ੍ਪਟਿਵਿਰਤਾਤਿ ਸਮਾਦਾਨਵਿਰਤਿਯਾ ਸਮ੍ਪਤ੍ਤਵਿਰਤਿਯਾ ਚ ਅਭਾਵੇਨ ਨ ਪਟਿਵਿਰਤਾ. ਦੁਸ੍ਸੀਲਾਤਿ ਤਤੋ ਏਵ ਪਞ੍ਚਸੀਲਮਤ੍ਤਸ੍ਸਾਪਿ ਅਭਾਵੇਨ ਨਿਸ੍ਸੀਲਾ. ਪਾਪਧਮ੍ਮਾਤਿ ਲਾਮਕਧਮ੍ਮਾ, ਹੀਨਾਚਾਰਾ. ਪਾਣਾਤਿਪਾਤਾ ਪਟਿਵਿਰਤੋਤਿ ਸਿਕ੍ਖਾਪਦਸਮਾਦਾਨੇਨ ਪਾਣਾਤਿਪਾਤਤੋ ਵਿਰਤੋ, ਆਰਕਾ ਠਿਤੋ. ਏਸ ਨਯੋ ਸੇਸੇਸੁਪਿ.

ਇਧਾਪਿ ਪਾਣਾਤਿਪਾਤਾਵੇਰਮਣਿਆਦੀਨਂ ਸਭਾਵਤੋ ਆਰਮ੍ਮਣਤੋ, ਵੇਦਨਤੋ, ਮੂਲਤੋ, ਕਮ੍ਮਤੋ, ਸਮਾਦਾਨਤੋ, ਭੇਦਤੋ, ਫਲਤੋ ਚ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ. ਤਤ੍ਥ ਸਭਾਵਤੋ ਪਞ੍ਚਪਿ ਚੇਤਨਾਯੋਪਿ ਹੋਨ੍ਤਿ ਵਿਰਤਿਯੋਪਿ, ਵਿਰਤਿਵਸੇਨ ਪਨ ਦੇਸਨਾ ਆਗਤਾ. ਯਾ ਪਾਣਾਤਿਪਾਤਾ ਵਿਰਮਨ੍ਤਸ੍ਸ ‘‘ਯਾ ਤਸ੍ਮਿਂ ਸਮਯੇ ਪਾਣਾਤਿਪਾਤਾ ਆਰਤਿ ਵਿਰਤੀ’’ਤਿ ਏਵਂ ਵੁਤ੍ਤਾ ਕੁਸਲਚਿਤ੍ਤਸਮ੍ਪਯੁਤ੍ਤਾ ਵਿਰਤਿ. ਸਾ ਪਭੇਦਤੋ ਤਿਵਿਧਾ – ਸਮ੍ਪਤ੍ਤਵਿਰਤਿ, ਸਮਾਦਾਨਵਿਰਤਿ, ਸਮੁਚ੍ਛੇਦਵਿਰਤੀਤਿ. ਤਤ੍ਥ ਅਸਮਾਦਿਨ੍ਨਸਿਕ੍ਖਾਪਦਾਨਂ ਅਤ੍ਤਨੋ ਜਾਤਿਵਯਬਾਹੁਸਚ੍ਚਾਦੀਨਿ ਪਚ੍ਚਵੇਕ੍ਖਿਤ੍ਵਾ ‘‘ਅਯੁਤ੍ਤਮੇਤਂ ਅਮ੍ਹਾਕਂ ਕਾਤੁ’’ਨ੍ਤਿ ਸਮ੍ਪਤ੍ਤਵਤ੍ਥੁਂ ਅਵੀਤਿਕ੍ਕਮਨ੍ਤਾਨਂ ਉਪ੍ਪਜ੍ਜਮਾਨਾ ਵਿਰਤਿ ਸਮ੍ਪਤ੍ਤਵਿਰਤਿ ਨਾਮ. ਸਮਾਦਿਨ੍ਨਸਿਕ੍ਖਾਪਦਾਨਂ ਸਿਕ੍ਖਾਪਦਸਮਾਦਾਨੇ ਤਦੁਤ੍ਤਰਿ ਚ ਅਤ੍ਤਨੋ ਜੀਵਿਤਮ੍ਪਿ ਪਰਿਚ੍ਚਜਿਤ੍ਵਾ ਵਤ੍ਥੁਂ ਅਵੀਤਿਕ੍ਕਮਨ੍ਤਾਨਂ ਉਪ੍ਪਜ੍ਜਮਾਨਾ ਵਿਰਤਿ ਸਮਾਦਾਨਵਿਰਤਿ ਨਾਮ. ਅਰਿਯਮਗ੍ਗਸਮ੍ਪਯੁਤ੍ਤਾ ਪਨ ਵਿਰਤਿ ਸਮੁਚ੍ਛੇਦਵਿਰਤਿ ਨਾਮ, ਯਸ੍ਸਾ ਉਪ੍ਪਤ੍ਤਿਤੋ ਪਟ੍ਠਾਯ ਅਰਿਯਪੁਗ੍ਗਲਾਨਂ ‘‘ਪਾਣਂ ਘਾਤੇਸ੍ਸਾਮਾ’’ਤਿ ਚਿਤ੍ਤਮ੍ਪਿ ਨ ਉਪ੍ਪਜ੍ਜਤਿ. ਤਾਸੁ ਸਮਾਦਾਨਵਿਰਤਿ ਇਧਾਧਿਪ੍ਪੇਤਾ.

ਆਰਮ੍ਮਣਤੋ ਪਾਣਾਤਿਪਾਤਾਦੀਨਂ ਆਰਮ੍ਮਣਾਨੇਵ ਏਤੇਸਂ ਆਰਮ੍ਮਣਾਨਿ. ਵੀਤਿਕ੍ਕਮਿਤਬ੍ਬਤੋਯੇਵ ਹਿ ਵਿਰਤਿ ਨਾਮ ਹੋਤਿ. ਯਥਾ ਪਨ ਨਿਬ੍ਬਾਨਾਰਮ੍ਮਣੋ ਅਰਿਯਮਗ੍ਗੋ ਕਿਲੇਸੇ ਪਜਹਤਿ, ਏਵਂ ਜੀਵਿਤਿਨ੍ਦ੍ਰਿਯਾਦਿਆਰਮ੍ਮਣਾਯੇਵ ਏਤੇ ਕੁਸਲਧਮ੍ਮਾ ਪਾਣਾਤਿਪਾਤਾਦੀਨਿ ਦੁਸ੍ਸੀਲ੍ਯਾਨਿ ਪਜਹਨ੍ਤਿ. ਵੇਦਨਤੋ ਸਬ੍ਬਾਪਿ ਸੁਖਵੇਦਨਾਵ.

ਮੂਲਤੋ ਞਾਣਸਮ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਅਲੋਭਅਦੋਸਅਮੋਹਵਸੇਨ ਤਿਮੂਲਾ ਹੋਨ੍ਤਿ, ਞਾਣਵਿਪ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਅਲੋਭਅਦੋਸਵਸੇਨ ਦ੍ਵਿਮੂਲਾ. ਕਮ੍ਮਤੋ ਮੁਸਾਵਾਦਾ ਵੇਰਮਣਿ ਵਚੀਕਮ੍ਮਂ, ਸੇਸਾ ਕਾਯਕਮ੍ਮਂ. ਸਮਾਦਾਨਤੋ ਅਞ੍ਞਸ੍ਸ ਗਰੁਟ੍ਠਾਨਿਯਸ੍ਸ ਸਨ੍ਤਿਕੇ ਤਂ ਅਲਭਨ੍ਤੇਨ ਸਯਮੇਵ ਵਾ ਪਞ੍ਚ ਸੀਲਾਨਿ ਏਕਜ੍ਝਂ ਪਾਟਿਯੇਕ੍ਕਂ ਵਾ ਸਮਾਦਿਯਨ੍ਤੇਨ ਸਮਾਦਿਨ੍ਨਾਨਿ ਹੋਨ੍ਤਿ. ਭੇਦਤੋ ਗਹਟ੍ਠਾਨਂ ਯਂ ਯਂ ਵੀਤਿਕ੍ਕਨ੍ਤਂ, ਤਂ ਤਦੇਵ ਭਿਜ੍ਜਤਿ, ਇਤਰਂ ਨ ਭਿਜ੍ਜਤਿ. ਕਸ੍ਮਾ? ਗਹਟ੍ਠਾ ਹਿ ਅਨਿਬਦ੍ਧਸੀਲਾ ਹੋਨ੍ਤਿ, ਯਂ ਯਂ ਸਕ੍ਕੋਨ੍ਤਿ, ਤਂ ਤਦੇਵ ਰਕ੍ਖਨ੍ਤਿ. ਪਬ੍ਬਜਿਤਾਨਂ ਪਨ ਏਕਸ੍ਮਿਂ ਵੀਤਿਕ੍ਕਨ੍ਤੇ ਸਬ੍ਬਾਨਿ ਭਿਜ੍ਜਨ੍ਤੀਤਿ.

ਫਲਤੋਤਿ ਪਾਣਾਤਿਪਾਤਾ ਵੇਰਮਣਿਯਾ ਚੇਤ੍ਥ ਅਙ੍ਗਪਚ੍ਚਙ੍ਗਸਮ੍ਪਨ੍ਨਤਾ, ਆਰੋਹਪਰਿਣਾਹਸਮ੍ਪਤ੍ਤਿ, ਜਵਨਸਮ੍ਪਤ੍ਤਿ, ਸੁਪ੍ਪਤਿਟ੍ਠਿਤਪਾਦਤਾ, ਚਾਰੁਤਾ, ਮੁਦੁਤਾ, ਸੁਚਿਤਾ, ਸੂਰਤਾ, ਮਹਬ੍ਬਲਤਾ, ਵਿਸ੍ਸਟ੍ਠਵਚਨਤਾ, ਸਤ੍ਤਾਨਂ ਪਿਯਮਨਾਪਤਾ, ਅਭਿਜ੍ਜਪਰਿਸਤਾ, ਅਚ੍ਛਮ੍ਭਿਤਾ, ਦੁਪ੍ਪਧਂਸਿਯਤਾ, ਪਰੂਪਕ੍ਕਮੇਨ ਅਮਰਣਤਾ, ਮਹਾਪਰਿਵਾਰਤਾ, ਸੁਵਣ੍ਣਤਾ, ਸੁਸਣ੍ਠਾਨਤਾ, ਅਪ੍ਪਾਬਾਧਤਾ, ਅਸੋਕਤਾ, ਪਿਯਮਨਾਪੇਹਿ ਅਵਿਪ੍ਪਯੋਗੋ, ਦੀਘਾਯੁਕਤਾਤਿ ਏਵਮਾਦੀਨਿ ਫਲਾਨਿ.

ਅਦਿਨ੍ਨਾਦਾਨਾ ਵੇਰਮਣਿਯਾ ਮਹਾਧਨਧਞ੍ਞਤਾ, ਅਨਨ੍ਤਭੋਗਤਾ, ਥਿਰਭੋਗਤਾ, ਇਚ੍ਛਿਤਾਨਂ ਭੋਗਾਨਂ ਖਿਪ੍ਪਂ ਪਟਿਲਾਭੋ, ਰਾਜਾਦੀਹਿ ਅਸਾਧਾਰਣਭੋਗਤਾ, ਉਲ਼ਾਰਭੋਗਤਾ, ਤਤ੍ਥ ਤਤ੍ਥ ਜੇਟ੍ਠਕਭਾਵੋ, ਨਤ੍ਥਿਭਾਵਸ੍ਸ ਅਜਾਨਨਤਾ, ਸੁਖਵਿਹਾਰਿਤਾਤਿ ਏਵਮਾਦੀਨਿ.

ਅਬ੍ਰਹ੍ਮਚਰਿਯਾ ਵੇਰਮਣਿਯਾ ਵਿਗਤਪਚ੍ਚਤ੍ਥਿਕਤਾ, ਸਬ੍ਬਸਤ੍ਤਾਨਂ ਪਿਯਮਨਾਪਤਾ, ਅਨ੍ਨਪਾਨਵਤ੍ਥਚ੍ਛਾਦਨਾਦੀਨਂ ਲਾਭਿਤਾ, ਸੁਖਸੁਪਨਤਾ, ਸੁਖਪਟਿਬੁਜ੍ਝਨਤਾ, ਅਪਾਯਭਯਵਿਮੋਕ੍ਖੋ, ਇਤ੍ਥਿਭਾਵਨਪੁਂਸਕਭਾਵਾਨਂ ਅਭਬ੍ਬਤਾ, ਅਕ੍ਕੋਧਨਤਾ, ਸਚ੍ਚਕਾਰਿਤਾ, ਅਮਙ੍ਕੁਤਾ, ਆਰਾਧਨਸੁਖਤਾ, ਪਰਿਪੁਣ੍ਣਿਨ੍ਦ੍ਰਿਯਤਾ, ਪਰਿਪੁਣ੍ਣਲਕ੍ਖਣਤਾ, ਨਿਰਾਸਙ੍ਕਤਾ, ਅਪ੍ਪੋਸ੍ਸੁਕ੍ਕਤਾ, ਸੁਖਵਿਹਾਰਿਤਾ, ਅਕੁਤੋਭਯਤਾ, ਪਿਯਵਿਪ੍ਪਯੋਗਾਭਾਵੋਤਿ ਏਵਮਾਦੀਨਿ. ਯਸ੍ਮਾ ਪਨ ਮਿਚ੍ਛਾਚਾਰਾਵੇਰਮਣਿਯਾ ਫਲਾਨਿਪਿ ਏਤ੍ਥੇਵ ਅਨ੍ਤੋਗਧਾਨਿ, ਤਸ੍ਮਾ (ਅਬ੍ਰਹ੍ਮਚਰਿਯਾ ਵੇਰਮਣਿਯਾ).

ਮੁਸਾਵਾਦਾ ਵੇਰਮਣਿਯਾ ਵਿਪ੍ਪਸਨ੍ਨਿਨ੍ਦ੍ਰਿਯਤਾ, ਵਿਸ੍ਸਟ੍ਠਮਧੁਰਭਾਣਿਤਾ, ਸਮਸਿਤਸੁਦ੍ਧਦਨ੍ਤਤਾ, ਨਾਤਿਥੂਲਤਾ, ਨਾਤਿਕਿਸਤਾ, ਨਾਤਿਰਸ੍ਸਤਾ, ਨਾਤਿਦੀਘਤਾ, ਸੁਖਸਮ੍ਫਸ੍ਸਤਾ, ਉਪ੍ਪਲਗਨ੍ਧਮੁਖਤਾ, ਸੁਸ੍ਸੂਸਕਪਰਿਸਤਾ, ਆਦੇਯ੍ਯਵਚਨਤਾ, ਕਮਲਦਲਸਦਿਸਮੁਦੁਲੋਹਿਤਤਨੁਜਿਵ੍ਹਤਾ, ਅਲੀਨਤਾ, ਅਨੁਦ੍ਧਤਤਾਤਿ ਏਵਮਾਦੀਨਿ.

ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣਿਯਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੁ ਅਪ੍ਪਮਾਦਤਾ, ਞਾਣਵਨ੍ਤਤਾ, ਸਦਾ ਉਪਟ੍ਠਿਤਸ੍ਸਤਿਤਾ, ਉਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੁ ਠਾਨੁਪ੍ਪਤ੍ਤਿਕਪਟਿਭਾਨਵਨ੍ਤਤਾ, ਅਨਲਸਤਾ, ਅਜਲ਼ਤਾ, ਅਨੁਮ੍ਮਤ੍ਤਤਾ, ਅਚ੍ਛਮ੍ਭਿਤਾ, ਅਸਾਰਮ੍ਭਿਤਾ, ਅਨਿਸ੍ਸੁਕਿਤਾ, ਅਮਚ੍ਛਰਿਤਾ, ਸਚ੍ਚਵਾਦਿਤਾ, ਅਪਿਸੁਣਅਫਰੁਸਅਸਮ੍ਫਪ੍ਪਲਾਪਵਾਦਿਤਾ, ਕਤਞ੍ਞੁਤਾ, ਕਤਵੇਦਿਤਾ, ਚਾਗਵਨ੍ਤਤਾ, ਸੀਲਵਨ੍ਤਤਾ, ਉਜੁਕਤਾ, ਅਕ੍ਕੋਧਨਤਾ, ਹਿਰੋਤ੍ਤਪ੍ਪਸਮ੍ਪਨ੍ਨਤਾ, ਉਜੁਦਿਟ੍ਠਿਤਾ, ਮਹਨ੍ਤਤਾ, ਪਣ੍ਡਿਤਤਾ, ਅਤ੍ਥਾਨਤ੍ਥਕੁਸਲਤਾਤਿ ਏਵਮਾਦੀਨਿ ਫਲਾਨਿ. ਏਵਮੇਤ੍ਥ ਪਾਣਾਤਿਪਾਤਾਵੇਰਮਣਿਆਦੀਨਮ੍ਪਿ ਸਭਾਵਾਦਿਤੋ ਵਿਨਿਚ੍ਛਯੋ ਵੇਦਿਤਬ੍ਬੋ.

ਸੀਲਵਾਤਿ ਯਥਾਵੁਤ੍ਤਪਞ੍ਚਸੀਲਵਸੇਨ ਸੀਲਵਾ. ਕਲ੍ਯਾਣਧਮ੍ਮੋਤਿ ਸੁਨ੍ਦਰਧਮ੍ਮੋ, ਸਰਣਗਮਨਪਰਿਦੀਪਿਤਾਯ ਦਿਟ੍ਠਿਸਮ੍ਪਤ੍ਤਿਯਾ ਸਮ੍ਪਨ੍ਨਪਞ੍ਞੋਤਿ ਅਤ੍ਥੋ. ਯੋ ਪਨ ਪੁਤ੍ਤੋ ਮਾਤਾਪਿਤੂਸੁ ਅਸ੍ਸਦ੍ਧੇਸੁ ਦੁਸ੍ਸੀਲੇਸੁ ਚ ਸਯਮ੍ਪਿ ਤਾਦਿਸੋ, ਸੋਪਿ ਅਵਜਾਤੋਯੇਵਾਤਿ ਵੇਦਿਤਬ੍ਬੋ. ਅਸ੍ਸਦ੍ਧਿਯਾਦਯੋ ਹਿ ਇਧ ਅਵਜਾਤਭਾਵਸ੍ਸ ਲਕ੍ਖਣਂ ਵੁਤ੍ਤਾ, ਤੇ ਚ ਤਸ੍ਮਿਂ ਸਂਵਿਜ੍ਜਨ੍ਤਿ. ਮਾਤਾਪਿਤਰੋ ਪਨ ਉਪਾਦਾਯ ਪੁਤ੍ਤਸ੍ਸ ਅਤਿਜਾਤਾਦਿਭਾਵੋ ਵੁਚ੍ਚਤੀਤਿ.

ਯੋ ਹੋਤਿ ਕੁਲਗਨ੍ਧਨੋਤਿ ਕੁਲਚ੍ਛੇਦਕੋ ਕੁਲਵਿਨਾਸਕੋ. ਛੇਦਨਤ੍ਥੋ ਹਿ ਇਧ ਗਨ੍ਧਸਦ੍ਦੋ, ‘‘ਉਪ੍ਪਲਗਨ੍ਧਪਚ੍ਚਤ੍ਥਿਕਾ’’ਤਿਆਦੀਸੁ (ਪਾਰਾ. ੬੫) ਵਿਯ. ਕੇਚਿ ਪਨ ‘‘ਕੁਲਧਂਸਨੋ’’ਤਿ ਪਠਨ੍ਤਿ, ਸੋ ਏਵਤ੍ਥੋ.

ਏਤੇ ਖੋ ਪੁਤ੍ਤਾ ਲੋਕਸ੍ਮਿਨ੍ਤਿ ਏਤੇ ਅਤਿਜਾਤਾਦਯੋ ਤਯੋ ਪੁਤ੍ਤਾ ਏਵ ਇਮਸ੍ਮਿਂ ਸਤ੍ਤਲੋਕੇ ਪੁਤ੍ਤਾ ਨਾਮ, ਨ ਇਤੋ ਵਿਨਿਮੁਤ੍ਤਾ ਅਤ੍ਥਿ. ਇਮੇਸੁ ਪਨ ਯੇ ਭਵਨ੍ਤਿ ਉਪਾਸਕਾ ਯੇ ਸਰਣਗਮਨਸਮ੍ਪਤ੍ਤਿਯਾ ਉਪਾਸਕਾ ਭਵਨ੍ਤਿ ਕਮ੍ਮਸ੍ਸਕਤਾਞਾਣੇਨ ਕਮ੍ਮਸ੍ਸ ਕੋਵਿਦਾ, ਤੇ ਚ ਪਣ੍ਡਿਤਾ ਪਞ੍ਞਵਨ੍ਤੋ, ਪਞ੍ਚਸੀਲਦਸਸੀਲੇਨ ਸਮ੍ਪਨ੍ਨਾ ਪਰਿਪੁਣ੍ਣਾ. ਯਾਚਕਾਨਂ ਵਚਨਂ ਜਾਨਨ੍ਤਿ, ਤੇਸਂ ਮੁਖਾਕਾਰਦਸ੍ਸਨੇਨੇਵ ਅਧਿਪ੍ਪਾਯਪੂਰਣਤੋਤਿ ਵਦਞ੍ਞੂ, ਤੇਸਂ ਵਾ ‘‘ਦੇਹੀ’’ਤਿ ਵਚਨਂ ਸੁਤ੍ਵਾ ‘‘ਇਮੇ ਪੁਬ੍ਬੇ ਦਾਨਂ ਅਦਤ੍ਵਾ ਏਵਂਭੂਤਾ, ਮਯਾ ਪਨ ਏਵਂ ਨ ਭਵਿਤਬ੍ਬ’’ਨ੍ਤਿ ਤੇਸਂ ਪਰਿਚ੍ਚਾਗੇਨ ਤਦਤ੍ਥਂ ਜਾਨਨ੍ਤੀਤਿ ਵਦਞ੍ਞੂ, ਪਣ੍ਡਿਤਾਨਂ ਵਾ ਕਮ੍ਮਸ੍ਸਕਤਾਦਿਦੀਪਕਂ ਵਚਨਂ ਜਾਨਨ੍ਤੀਤਿ ਵਦਞ੍ਞੂ. ‘‘ਪਦਞ੍ਞੂ’’ਤਿ ਚ ਪਠਨ੍ਤਿ, ਪਦਾਨਿਯਾ ਪਰਿਚ੍ਚਾਗਸੀਲਾਤਿ ਅਤ੍ਥੋ. ਤਤੋ ਏਵ ਵਿਗਤਮਚ੍ਛੇਰਮਲਤ੍ਤਾ ਵੀਤਮਚ੍ਛਰਾ. ਅਬ੍ਭਘਨਾਤਿ ਅਬ੍ਭਸਙ੍ਖਾਤਾ ਘਨਾ, ਘਨਮੇਘਪਟਲਾ ਵਾ ਮੁਤ੍ਤੋ ਚਨ੍ਦੋਵਿਯ, ਉਪਾਸਕਾਦਿਪਰਿਸਾਸੁ ਖਤ੍ਤਿਯਾਦਿਪਰਿਸਾਸੁ ਚ ਵਿਰੋਚਰੇ ਵਿਰੋਚਨ੍ਤਿ, ਸੋਭਨ੍ਤੀਤਿ ਅਤ੍ਥੋ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਵੁਟ੍ਠਿਕਸੁਤ੍ਤਵਣ੍ਣਨਾ

੭੫. ਛਟ੍ਠੇ ਅਵੁਟ੍ਠਿਕਸਮੋਤਿ ਅਵੁਟ੍ਠਿਕਮੇਘਸਮੋ. ਏਕਚ੍ਚੋ ਹਿ ਮੇਘੋ ਸਤਪਟਲਸਹਸ੍ਸਪਟਲੋ ਹੁਤ੍ਵਾ ਉਟ੍ਠਹਿਤ੍ਵਾ ਥਨਨ੍ਤੋ ਗਜ੍ਜਨ੍ਤੋ ਵਿਜ੍ਜੋਤਨ੍ਤੋ ਏਕਂ ਉਦਕਬਿਨ੍ਦੁਮ੍ਪਿ ਅਪਾਤੇਤ੍ਵਾ ਵਿਗਚ੍ਛਤਿ, ਤਥੂਪਮੋ ਏਕਚ੍ਚੋ ਪੁਗ੍ਗਲੋਤਿ ਦਸ੍ਸੇਨ੍ਤੋ ਆਹ ‘‘ਅਵੁਟ੍ਠਿਕਸਮੋ’’ਤਿ. ਪਦੇਸਵਸ੍ਸੀਤਿ ਏਕਦੇਸਵਸ੍ਸਿਮੇਘਸਮੋ. ਪਦੇਸਵਸ੍ਸੀ ਵਿਯਾਤਿ ਹਿ ਪਦੇਸਵਸ੍ਸੀ. ਏਕਚ੍ਚੋ ਏਕਸ੍ਮਿਂਯੇਵ ਠਾਨੇ ਠਿਤੇਸੁ ਮਨੁਸ੍ਸੇਸੁ ਯਥਾ ਏਕਚ੍ਚੇ ਤੇਮੇਨ੍ਤਿ, ਏਕਚ੍ਚੇ ਨ ਤੇਮੇਨ੍ਤਿ, ਏਵਂ ਮਨ੍ਦਂ ਵਸ੍ਸਤਿ, ਤਥੂਪਮਂ ਏਕਚ੍ਚਂ ਪੁਗ੍ਗਲਂ ਦਸ੍ਸੇਤਿ ‘‘ਪਦੇਸਵਸ੍ਸੀ’’ਤਿ. ਸਬ੍ਬਤ੍ਥਾਭਿਵਸ੍ਸੀਤਿ ਸਬ੍ਬਸ੍ਮਿਂ ਪਥਵੀਪਬ੍ਬਤਸਮੁਦ੍ਦਾਦਿਕੇ ਜਗਤਿਪ੍ਪਦੇਸੇ ਅਭਿਵਸ੍ਸਿਮੇਘਸਮੋ. ਏਕਚ੍ਚੋ ਹਿ ਸਕਲਚਕ੍ਕਵਾਲ਼ਗਬ੍ਭਂ ਪਤ੍ਥਰਿਤ੍ਵਾ ਸਬ੍ਬਤ੍ਥਕਮੇਵ ਅਭਿਵਸ੍ਸਤਿ, ਤਂ ਚਾਤੁਦ੍ਦੀਪਿਕਮਹਾਮੇਘਂ ਏਕਚ੍ਚਸ੍ਸ ਪੁਗ੍ਗਲਸ੍ਸ ਉਪਮਂ ਕਤ੍ਵਾ ਵੁਤ੍ਤਂ ‘‘ਸਬ੍ਬਤ੍ਥਾਭਿਵਸ੍ਸੀ’’ਤਿ.

ਸਬ੍ਬੇਸਾਨਨ੍ਤਿ ਸਬ੍ਬੇਸਂ, ਅਯਮੇਵ ਵਾ ਪਾਠੋ. ਨ ਦਾਤਾ ਹੋਤੀਤਿ ਅਦਾਨਸੀਲੋ ਹੋਤਿ, ਥਦ੍ਧਮਚ੍ਛਰਿਤਾਯ ਨ ਕਸ੍ਸਚਿ ਕਿਞ੍ਚਿ ਦੇਤੀਤਿ ਅਤ੍ਥੋ. ਇਦਾਨਿ ਦਾਨਸ੍ਸ ਖੇਤ੍ਤਂ ਦੇਯ੍ਯਧਮ੍ਮਞ੍ਚ ਵਿਭਾਗੇਨ ਦਸ੍ਸੇਤੁਂ ‘‘ਸਮਣਬ੍ਰਾਹ੍ਮਣਾ’’ਤਿਆਦਿਮਾਹ. ਤਤ੍ਥ ਸਮਿਤਪਾਪਸਮਣਾ ਚੇਵ ਪਬ੍ਬਜ੍ਜਮਤ੍ਤਸਮਣਾ ਚ ਬਾਹਿਤਪਾਪਬ੍ਰਾਹ੍ਮਣਾ ਚੇਵ ਜਾਤਿਮਤ੍ਤਬ੍ਰਾਹ੍ਮਣਾ ਚ ਇਧ ‘‘ਸਮਣਬ੍ਰਾਹ੍ਮਣਾ’’ਤਿ ਅਧਿਪ੍ਪੇਤਾ. ਕਪਣਾ ਨਾਮ ਦੁਗ੍ਗਤਾ ਦਲਿਦ੍ਦਮਨੁਸ੍ਸਾ. ਅਦ੍ਧਿਕਾ ਨਾਮ ਪਥਾਵਿਨੋ ਪਰਿਬ੍ਬਯਵਿਹੀਨਾ. ਵਨਿਬ੍ਬਕਾ ਨਾਮ ਯੇ ‘‘ਇਟ੍ਠਂ ਦੇਥ ਕਨ੍ਤਂ ਮਨਾਪਂ ਕਾਲੇਨ ਅਨਵਜ੍ਜਂ ਉਦਗ੍ਗਚਿਤ੍ਤਾ ਪਸਨ੍ਨਚਿਤ੍ਤਾ, ਏਵਂ ਦੇਨ੍ਤਾ ਗਚ੍ਛਥ ਸੁਗਤਿਂ, ਗਚ੍ਛਥ ਬ੍ਰਹ੍ਮਲੋਕ’’ਨ੍ਤਿਆਦਿਨਾ ਨਯੇਨ ਦਾਨੇ ਨਿਯੋਜੇਨ੍ਤਾ ਦਾਨਸ੍ਸ ਵਣ੍ਣਂ ਥੋਮੇਨ੍ਤਾ ਵਿਚਰਨ੍ਤਿ. ਯਾਚਕਾ ਨਾਮ ਯੇ ਕੇਵਲਂ ‘‘ਮੁਟ੍ਠਿਮਤ੍ਤਂ ਦੇਥ, ਪਸਤਮਤ੍ਤਂ ਦੇਥ, ਸਰਾਵਮਤ੍ਤਂ ਦੇਥਾ’’ਤਿ ਅਪ੍ਪਕਮ੍ਪਿ ਯਾਚਮਾਨਾ ਵਿਚਰਨ੍ਤਿ. ਤਤ੍ਥ ਸਮਣਬ੍ਰਾਹ੍ਮਣਗ੍ਗਹਣੇਨ ਗੁਣਖੇਤ੍ਤਂ ਉਪਕਾਰਿਖੇਤ੍ਤਞ੍ਚ ਦਸ੍ਸੇਤਿ, ਕਪਣਾਦਿਗ੍ਗਹਣੇਨ ਕਰੁਣਾਖੇਤ੍ਤਂ. ਅਨ੍ਨਨ੍ਤਿ ਯਂਕਿਞ੍ਚਿ ਖਾਦਨੀਯਂ ਭੋਜਨੀਯਂ. ਪਾਨਨ੍ਤਿ ਅਮ੍ਬਪਾਨਾਦਿਪਾਨਕਂ. ਵਤ੍ਥਨ੍ਤਿ ਨਿਵਾਸਨਪਾਰੁਪਨਾਦਿਅਚ੍ਛਾਦਨਂ. ਯਾਨਨ੍ਤਿ ਰਥਵਯ੍ਹਾਦਿ ਅਨ੍ਤਮਸੋ ਉਪਾਹਨਂ ਉਪਾਦਾਯ ਗਮਨਸਾਧਨਂ. ਮਾਲਾਤਿ ਗਨ੍ਥਿਤਾਗਨ੍ਥਿਤਭੇਦਂ ਸਬ੍ਬਂ ਪੁਪ੍ਫਂ. ਗਨ੍ਧਨ੍ਤਿ ਯਂਕਿਞ੍ਚਿ ਗਨ੍ਧਜਾਤਂ ਪਿਸਿਤਂ ਅਪਿਸਿਤਂ ਗਨ੍ਧੂਪਕਰਣਞ੍ਚ. ਵਿਲੇਪਨਨ੍ਤਿ ਛਵਿਰਾਗਕਰਣਂ. ਸੇਯ੍ਯਾਤਿ ਮਞ੍ਚਪੀਠਾਦਿ ਚੇਵ ਪਾਵਾਰਕੋਜਵਾਦਿ ਚ ਸਯਿਤਬ੍ਬਵਤ੍ਥੁ. ਸੇਯ੍ਯਗ੍ਗਹਣੇਨ ਚੇਤ੍ਥ ਆਸਨਮ੍ਪਿ ਗਹਿਤਨ੍ਤਿ ਦਟ੍ਠਬ੍ਬਂ. ਆਵਸਥਨ੍ਤਿ ਵਾਤਾਤਪਾਦਿਪਰਿਸ੍ਸਯਵਿਨੋਦਨਂ ਪਤਿਸ੍ਸਯਂ. ਪਦੀਪੇਯ੍ਯਨ੍ਤਿ ਦੀਪਕਪਲ੍ਲਿਕਾਦਿਪਦੀਪੂਪਕਰਣਂ.

ਏਵਂ ਖੋ, ਭਿਕ੍ਖਵੇਤਿ ਵਿਜ੍ਜਮਾਨੇਪਿ ਦੇਯ੍ਯਧਮ੍ਮੇ ਪਟਿਗ੍ਗਾਹਕਾਨਂ ਏਵਂ ਦਾਤਬ੍ਬਵਤ੍ਥੁਂ ਸਬ੍ਬੇਨ ਸਬ੍ਬਂ ਅਦੇਨ੍ਤੋ ਪੁਗ੍ਗਲੋ ਅਵਸ੍ਸਿਕਮੇਘਸਦਿਸੋ ਹੋਤਿ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖਵੇ, ਯਥਾ ਸੋ ਮੇਘੋ ਸਤਪਟਲਸਹਸ੍ਸਪਟਲੋ ਹੁਤ੍ਵਾ ਉਟ੍ਠਹਿਤ੍ਵਾ ਨ ਕਿਞ੍ਚਿ ਵਸ੍ਸਿ ਵਿਗਚ੍ਛਤਿ, ਏਵਮੇਵ ਯੋ ਉਲ਼ਾਰਂ ਵਿਪੁਲਞ੍ਚ ਭੋਗਂ ਸਂਹਰਿਤ੍ਵਾ ਗੇਹਂ ਆਵਸਨ੍ਤੋ ਕਸ੍ਸਚਿ ਕਟਚ੍ਛੁਮਤ੍ਤਂ ਭਿਕ੍ਖਂ ਵਾ ਉਲ਼ੁਙ੍ਕਮਤ੍ਤਂ ਯਾਗੁਂ ਵਾ ਅਦਤ੍ਵਾ ਵਿਗਚ੍ਛਤਿ, ਵਿਵਸੋ ਮਚ੍ਚੁਵਸਂ ਗਚ੍ਛਤਿ, ਸੋ ਅਵੁਟ੍ਠਿਕਸਮੋ ਨਾਮ ਹੋਤੀਤਿ. ਇਮਿਨਾ ਨਯੇਨ ਸੇਸੇਸੁਪਿ ਨਿਗਮਨਂ ਵੇਦਿਤਬ੍ਬਂ. ਇਮੇਸੁ ਚ ਤੀਸੁ ਪੁਗ੍ਗਲੇਸੁ ਪਠਮੋ ਏਕਂਸੇਨੇਵ ਗਰਹਿਤਬ੍ਬੋ, ਦੁਤਿਯੋ ਪਸਂਸਨੀਯੋ, ਤਤਿਯੋ, ਪਸਂਸਨੀਯਤਰੋ. ਪਠਮੋ ਵਾ ਏਕਨ੍ਤੇਨੇਵ ਸਬ੍ਬਨਿਹੀਨੋ, ਦੁਤਿਯੋ ਮਜ੍ਝਿਮੋ, ਤਤਿਯੋ ਉਤ੍ਤਮੋਤਿ ਵੇਦਿਤਬ੍ਬੋ.

ਗਾਥਾਸੁ ਸਮਣੇਤਿ ਉਪਯੋਗਵਸੇਨ ਬਹੁਵਚਨਂ ਤਥਾ ਸੇਸੇਸੁਪਿ. ਲਦ੍ਧਾਨਾਤਿ ਲਭਿਤ੍ਵਾ, ਸਮਣੇ ਦਕ੍ਖਿਣੇਯ੍ਯੇ ਪਵਾਰੇਤ੍ਵਾ ਪੁਟ੍ਠੋ ਨ ਸਂਵਿਭਜਤਿ. ਅਨ੍ਨਂ ਪਾਨਞ੍ਚ ਭੋਜਨਨ੍ਤਿ ਅਨ੍ਨਂ ਵਾ ਪਾਨਂ ਵਾ ਅਞ੍ਞਂ ਵਾ ਭੁਞ੍ਜਿਤਬ੍ਬਯੁਤ੍ਤਕਂ ਭੋਜਨਂ, ਤਂ ਨ ਸਂਵਿਭਜਤਿ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਯੋ ਅਤ੍ਥਿਕਭਾਵੇਨ ਉਪਗਤੇ ਸਮ੍ਪਟਿਗ੍ਗਾਹਕੇ ਲਭਿਤ੍ਵਾ ਅਨ੍ਨਾਦਿਨਾ ਸਂਵਿਭਾਗਮਤ੍ਤਮ੍ਪਿ ਨ ਕਰੋਤਿ, ਕਿਂ ਸੋ ਅਞ੍ਞਂ ਦਾਨਂ ਦਸ੍ਸਤਿ, ਤਂ ਏਵਰੂਪਂ ਥਦ੍ਧਮਚ੍ਛਰਿਯਂ ਪੁਰਿਸਾਧਮਂ ਨਿਹੀਨਪੁਗ੍ਗਲਂ ਪਣ੍ਡਿਤਾ ਅਵੁਟ੍ਠਿਕਸਮੋਤਿ ਆਹੁ ਕਥਯਨ੍ਤੀਤਿ.

ਏਕਚ੍ਚਾਨਂ ਨ ਦਦਾਤੀਤਿ ਵਿਜ੍ਜਮਾਨੇਪਿ ਮਹਤਿ ਦਾਤਬ੍ਬਧਮ੍ਮੇ ਏਕੇਸਂ ਸਤ੍ਤਾਨਂ ਤੇਸੁ ਕੋਧਵਸੇਨ ਵਾ, ਦੇਯ੍ਯਧਮ੍ਮੇ ਲੋਭਵਸੇਨ ਵਾ ਨ ਦਦਾਤਿ. ਏਕਚ੍ਚਾਨਂ ਪਵੇਚ੍ਛਤੀਤਿ ਏਕੇਸਂਯੇਵ ਪਨ ਦਦਾਤਿ. ਮੇਧਾਵਿਨੋਤਿ ਪਞ੍ਞਵਨ੍ਤੋ ਪਣ੍ਡਿਤਾ ਜਨਾ.

ਸੁਭਿਕ੍ਖਵਾਚੋਤਿ ਯੋ ਉਪਗਤਾਨਂ ਯਾਚਕਾਨਂ ‘‘ਅਨ੍ਨਂ ਦੇਥ, ਪਾਨਂ ਦੇਥਾ’’ਤਿਆਦਿਨਾ ਤਂ ਤਂ ਦਾਪੇਤਿ, ਸੋ ਸੁਲਭਭਿਕ੍ਖਤਾਯ ਸੁਭਿਕ੍ਖਾ ਵਾਚਾ ਏਤਸ੍ਸਾਤਿ ਸੁਭਿਕ੍ਖਵਾਚੋ. ‘‘ਸੁਭਿਕ੍ਖਵਸ੍ਸੀ’’ਤਿਪਿ ਪਠਨ੍ਤਿ. ਯਥਾ ਲੋਕੋ ਸੁਭਿਕ੍ਖੋ ਹੋਤਿ, ਏਵਂ ਸਬ੍ਬਤ੍ਥਾਭਿਵਸ੍ਸਿਤਮਹਾਮੇਘੋ ਸੁਭਿਕ੍ਖਵਸ੍ਸੀ ਨਾਮ ਹੋਤਿ. ਏਵਮਯਮ੍ਪਿ ਮਹਾਦਾਨੇਹਿ ਸਬ੍ਬਤ੍ਥਾਭਿਵਸ੍ਸੀ ਸੁਭਿਕ੍ਖਵਸ੍ਸੀਤਿ. ਆਮੋਦਮਾਨੋ ਪਕਿਰੇਤੀਤਿ ਤੁਟ੍ਠਹਟ੍ਠਮਾਨਸੋ ਸਹਤ੍ਥੇਨ ਦਾਨਂ ਦੇਨ੍ਤੋ ਪਟਿਗ੍ਗਾਹਕਖੇਤ੍ਤੇ ਦੇਯ੍ਯਧਮ੍ਮਂ ਪਕਿਰੇਨ੍ਤੋ ਵਿਯ ਹੋਤਿ, ਵਾਚਾਯਪਿ ‘‘ਦੇਥ ਦੇਥਾ’’ਤਿ ਭਾਸਤਿ.

ਇਦਾਨਿ ਨਂ ਸੁਭਿਕ੍ਖਵਸ੍ਸਿਤਭਾਵਂ ਦਸ੍ਸੇਤੁਂ ‘‘ਯਥਾਪਿ ਮੇਘੋ’’ਤਿਆਦਿ ਵੁਤ੍ਤਂ. ਤਤ੍ਰਾਯਂ ਸਙ੍ਖੇਪਤ੍ਥੋ – ਯਥਾ ਮਹਾਮੇਘੋ ਪਠਮਂ ਮਨ੍ਦਨਿਗ੍ਘੋਸੇਨ ਥਨਯਿਤ੍ਵਾ ਪੁਨ ਸਕਲਨਦੀਕਨ੍ਦਰਾਨਿ ਏਕਨਿਨ੍ਨਾਦਂ ਕਰੋਨ੍ਤੋ ਗਜ੍ਜਯਿਤ੍ਵਾ ਪਵਸ੍ਸਤਿ, ਸਬ੍ਬਤ੍ਥਕਮੇਵ ਵਾਰਿਨਾ ਉਦਕੇਨ ਥਲਂ ਨਿਨ੍ਨਞ੍ਚ ਅਭਿਸਨ੍ਦਨ੍ਤੋ ਪੂਰੇਤਿ ਏਕੋਘਂ ਕਰੋਤਿ, ਏਵਮੇਵ ਇਧ ਇਮਸ੍ਮਿਂ ਸਤ੍ਤਲੋਕੇ ਏਕਚ੍ਚੋ ਉਲ਼ਾਰਪੁਗ੍ਗਲੋ ਸਬ੍ਬਸਮਤਾਯ ਸੋ ਮਹਾਮੇਘੋ ਵਿਯ ਵਸ੍ਸਿਤਬ੍ਬਤ੍ਤਾ ਤਾਦਿਸੋ ਯਥਾ ਧਨਂ ਉਟ੍ਠਾਨਾਧਿਗਤਂ ਅਤ੍ਤਨੋ ਉਟ੍ਠਾਨਵੀਰਿਯਾਭਿਨਿਬ੍ਬਤ੍ਤਂ ਹੋਤਿ, ਏਵਂ ਅਨਲਸੋ ਹੁਤ੍ਵਾ ਤਞ੍ਚ ਧਮ੍ਮੇਨ ਞਾਯੇਨ ਸਂਹਰਿਤ੍ਵਾ ਤਨ੍ਨਿਬ੍ਬਤ੍ਤੇਨ ਅਨ੍ਨੇਨ ਪਾਨੇਨ ਅਞ੍ਞੇਨ ਚ ਦੇਯ੍ਯਧਮ੍ਮੇਨ ਪਤ੍ਤੇ ਸਮ੍ਪਤ੍ਤੇ ਵਨਿਬ੍ਬਕੇ ਸਮ੍ਮਾ ਸਮ੍ਮਦੇਵ ਦੇਸਕਾਲਾਨੁਰੂਪਞ੍ਚੇਵ ਇਚ੍ਛਾਨੁਰੂਪਞ੍ਚ ਤਪ੍ਪੇਤਿ ਸਮ੍ਪਵਾਰੇਤੀਤਿ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸੁਖਪਤ੍ਥਨਾਸੁਤ੍ਤਵਣ੍ਣਨਾ

੭੬. ਸਤ੍ਤਮੇ ਸੁਖਾਨੀਤਿ ਸੁਖਨਿਮਿਤ੍ਤਾਨਿ. ਪਤ੍ਥਯਮਾਨੋਤਿ ਇਚ੍ਛਮਾਨੋ ਆਕਙ੍ਖਮਾਨੋ. ਸੀਲਨ੍ਤਿ ਗਹਟ੍ਠਸੀਲਂ ਪਬ੍ਬਜਿਤਸੀਲਞ੍ਚ. ਗਹਟ੍ਠੋ ਚੇ ਗਹਟ੍ਠਸੀਲਂ, ਪਬ੍ਬਜਿਤੋ ਚੇ ਚਤੁਪਾਰਿਸੁਦ੍ਧਿਸੀਲਨ੍ਤਿ ਅਧਿਪ੍ਪਾਯੋ. ਰਕ੍ਖੇਯ੍ਯਾਤਿ ਸਮਾਦਿਯਿਤ੍ਵਾ ਅਵੀਤਿਕ੍ਕਮਨ੍ਤੋ ਸਮ੍ਮਦੇਵ ਗੋਪੇਯ੍ਯ. ਪਸਂਸਾ ਮੇ ਆਗਚ੍ਛਤੂਤਿ ‘‘ਮਮ ਕਲ੍ਯਾਣੋ ਕਿਤ੍ਤਿਸਦ੍ਦੋ ਆਗਚ੍ਛਤੂ’’ਤਿ ਇਚ੍ਛਨ੍ਤੋ ਪਣ੍ਡਿਤੋ ਸਪ੍ਪਞ੍ਞੋ ਸੀਲਂ ਰਕ੍ਖੇਯ੍ਯ. ਸੀਲਵਤੋ ਹਿ ਗਹਟ੍ਠਸ੍ਸ ਤਾਵ ‘‘ਅਸੁਕੋ ਅਸੁਕਕੁਲਸ੍ਸ ਪੁਤ੍ਤੋ ਸੀਲਵਾ ਕਲ੍ਯਾਣਧਮ੍ਮੋ ਸਦ੍ਧੋ ਪਸਨ੍ਨੋ ਦਾਯਕੋ ਕਾਰਕੋ’’ਤਿਆਦਿਨਾ ਪਰਿਸਮਜ੍ਝੇ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਪਬ੍ਬਜਿਤਸ੍ਸ ‘‘ਅਸੁਕੋ ਨਾਮ ਭਿਕ੍ਖੁ ਸੀਲਵਾ ਵਤ੍ਤਸਮ੍ਪਨ੍ਨੋ ਸੋਰਤੋ ਸੁਖਸਂਵਾਸੋ ਸਗਾਰਵੋ ਸਪ੍ਪਤਿਸ੍ਸੋ’’ਤਿਆਦਿਨਾ…ਪੇ… ਅਬ੍ਭੁਗ੍ਗਚ੍ਛਤੀਤਿ. ਵੁਤ੍ਤਞ੍ਹੇਤਂ –

‘‘ਪੁਨ ਚਪਰਂ, ਗਹਪਤਯੋ, ਸੀਲਵਤੋ ਸੀਲਸਮ੍ਪਨ੍ਨਸ੍ਸ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤੀ’’ਤਿ (ਅ. ਨਿ. ੫.੨੧੩; ਉਦਾ. ੭੬; ਮਹਾਵ. ੨੮੫).

ਤਥਾ –

‘‘ਆਕਙ੍ਖੇਯ੍ਯ ਚੇ, ਭਿਕ੍ਖਵੇ, ਭਿਕ੍ਖੁ – ‘ਸਬ੍ਰਹ੍ਮਚਾਰੀਨਂ ਪਿਯੋ ਚਸ੍ਸਂ ਮਨਾਪੋ, ਗਰੁ ਚ ਭਾਵਨੀਯੋ ਚਾ’ਤਿ, ਸੀਲੇਸ੍ਵੇਵਸ੍ਸ ਪਰਿਪੂਰਕਾਰੀ’’ਤਿਆਦਿ (ਮ. ਨਿ. ੧.੬੫).

ਭੋਗਾ ਮੇ ਉਪ੍ਪਜ੍ਜਨ੍ਤੂਤਿ ਏਤ੍ਥ ਗਹਟ੍ਠਸ੍ਸ ਤਾਵ ਸੀਲਵਤੋ ਕਲ੍ਯਾਣਧਮ੍ਮਸ੍ਸ ਯੇਨ ਯੇਨ ਸਿਪ੍ਪਟ੍ਠਾਨੇਨ ਜੀਵਿਕਂ ਕਪ੍ਪੇਤਿ – ਯਦਿ ਕਸਿਯਾ, ਯਦਿ ਵਣਿਜ੍ਜਾਯ, ਯਦਿ ਰਾਜਪੋਰਿਸੇਨ, ਤਂ ਤਂ ਯਥਾਕਾਲਂ ਯਥਾਵਿਧਿਞ੍ਚ ਅਤਿਵਿਯ ਅਪ੍ਪਮਤ੍ਤਭਾਵਤੋ ਅਥਸ੍ਸ ਅਨੁਪ੍ਪਨ੍ਨਾ ਚੇਵ ਭੋਗਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਭੋਗਾ ਫਾਤਿਂ ਗਮਿਸ੍ਸਨ੍ਤਿ. ਪਬ੍ਬਜਿਤਸ੍ਸ ਪਨ ਸੀਲਾਚਾਰਸਮ੍ਪਨ੍ਨਸ੍ਸ ਅਪ੍ਪਮਾਦਵਿਹਾਰਿਸ੍ਸ ਸਤੋ ਸੀਲਸਮ੍ਪਨ੍ਨਸ੍ਸ ਸੀਲਸਮ੍ਪਦਾਯ ਅਪ੍ਪਿਚ੍ਛਤਾਦਿਗੁਣੇਸੁ ਚ ਪਸਨ੍ਨਾ ਮਨੁਸ੍ਸਾ ਉਲ਼ਾਰੁਲ਼ਾਰੇ ਪਚ੍ਚਯੇ ਅਭਿਹਰਨ੍ਤਿ, ਏਵਮਸ੍ਸ ਅਨੁਪ੍ਪਨ੍ਨਾ ਚੇਵ ਭੋਗਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਥਿਰਾ ਹੋਨ੍ਤਿ. ਤਥਾ ਹਿ ਵੁਤ੍ਤਂ –

‘‘ਪੁਨ ਚਪਰਂ, ਗਹਪਤਯੋ, ਸੀਲਵਾ ਸੀਲਸਮ੍ਪਨ੍ਨੋ ਅਪ੍ਪਮਾਦਾਧਿਕਰਣਂ ਮਹਨ੍ਤਂ ਭੋਗਕ੍ਖਨ੍ਧਂ ਅਧਿਗਚ੍ਛਤੀ’’ਤਿ (ਅ. ਨਿ. ੫.੨੧੩; ਉਦਾ. ੭੬; ਮਹਾਵ. ੨੮੫).

ਤਥਾ –

‘‘ਆਕਙ੍ਖੇਯ੍ਯ ਚੇ, ਭਿਕ੍ਖਵੇ, ਭਿਕ੍ਖੁ – ‘ਲਾਭੀ ਅਸ੍ਸ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’ਨ੍ਤਿ, ਸੀਲੇਸ੍ਵੇਵਸ੍ਸ ਪਰਿਪੂਰਕਾਰੀ’’ਤਿ (ਮ. ਨਿ. ੧.੬੫) ਚ –

ਸੇਸਂ ਵੁਤ੍ਤਨਯਮੇਵ.

ਗਾਥਾਸੁ ਪਤ੍ਥਯਾਨੋਤਿ ਪਤ੍ਥਯਨ੍ਤੋ. ਤਯੋ ਸੁਖੇਤਿ ਤੀਣਿ ਸੁਖਾਨਿ. ਵਿਤ੍ਤਲਾਭਨ੍ਤਿ ਧਨਲਾਭਂ, ਭੋਗੁਪ੍ਪਤ੍ਤਿਨ੍ਤਿ ਅਤ੍ਥੋ. ਵਿਸੇਸਤੋ ਚੇਤ੍ਥ ਪਸਂਸਾਯ ਚੇਤਸਿਕਸੁਖਂ, ਭੋਗੇਹਿ ਕਾਯਿਕਸੁਖਂ, ਇਤਰੇਨ ਉਪਪਤ੍ਤਿਸੁਖਂ; ਤਥਾ ਪਠਮੇਨ ਦਿਟ੍ਠਧਮ੍ਮਸੁਖਂ, ਤਤਿਯੇਨ ਸਮ੍ਪਰਾਯਸੁਖਂ, ਦੁਤਿਯੇਨ ਉਭਯਸੁਖਂ ਗਹਿਤਨ੍ਤਿ ਵੇਦਿਤਬ੍ਬਂ.

ਇਦਾਨਿ ਪਸਂਸਾਦਿਕਾਰਣਸ੍ਸ ਸੀਲਸ੍ਸ ਵਿਯ ਪਸਂਸਾਦੀਨਮ੍ਪਿ ਵਿਸੇਸਕਾਰਣਂ ਪਾਪਮਿਤ੍ਤਪਰਿਵਜ੍ਜਨਂ ਕਲ੍ਯਾਣਮਿਤ੍ਤਸੇਵਨਞ੍ਚ ਆਦੀਨਵਾਨਿਸਂਸੇਹਿ ਸਦ੍ਧਿਂ ਦਸ੍ਸੇਨ੍ਤੋ ‘‘ਅਕਰੋਨ੍ਤੋ’’ਤਿਆਦਿਮਾਹ. ਤਤ੍ਥ ਸਙ੍ਕਿਯੋਤਿ ਪਾਪਸ੍ਮਿਂ ਪਰਿਸਙ੍ਕਿਤਬ੍ਬੋ ‘‘ਅਦ੍ਧਾ ਇਮਿਨਾ ਪਾਪਂ ਕਤਂ ਵਾ ਕਰਿਸ੍ਸਤਿ ਵਾ, ਤਥਾ ਹੇਸ ਪਾਪਪੁਰਿਸੇਹਿ ਸਦ੍ਧਿਂ ਸਞ੍ਚਰਤੀ’’ਤਿ. ਅਸ੍ਸਾਤਿ ਇਮਸ੍ਸ ਪਾਪਜਨਸੇਵਿਨੋ ਪੁਗ੍ਗਲਸ੍ਸ ਉਪਰਿ, ਅਸ੍ਸ ਵਾ ਪੁਗ੍ਗਲਸ੍ਸ ਅਵਣ੍ਣੋ ਅਭੂਤੋਪਿ ਪਾਪਜਨਸੇਵਿਤਾਯ ਰੁਹਤਿ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਤਿ ਪਤ੍ਥਰਤਿ. ਅਸ੍ਸਾਤਿ ਵਾ ਭੁਮ੍ਮਤ੍ਥੇ ਸਾਮਿਵਚਨਂ, ਤਸ੍ਮਿਂ ਪੁਗ੍ਗਲੇਤਿ ਅਤ੍ਥੋ. ਸ ਵੇ ਤਾਦਿਸਕੋ ਹੋਤੀਤਿ ਯੋ ਯਾਦਿਸਂ ਪਾਪਮਿਤ੍ਤਂ ਵਾ ਕਲ੍ਯਾਣਮਿਤ੍ਤਂ ਵਾ ਭਜਤਿ ਉਪਸੇਵਤਿ ਚ, ਸੋ ਪੁਗ੍ਗਲੋ ਭੂਮਿਭਾਗਵਸੇਨ ਉਦਕਂ ਵਿਯ ਤਾਦਿਸੋਵ ਹੋਤਿ, ਪਾਪਧਮ੍ਮੋ ਕਲ੍ਯਾਣਧਮ੍ਮੋ ਵਾ ਹੋਤਿ. ਕਸ੍ਮਾ? ਸਹਵਾਸੋ ਹਿ ਤਾਦਿਸੋ; ਯਸ੍ਮਾ ਸਹਵਾਸੋ ਸਂਸਗ੍ਗੋ ਉਪਰਾਗੋ ਵਿਯ ਫਲਿਕਮਣੀਸੁ ਪੁਰਿਸਉਪਨਿਸ੍ਸਯਭੂਤਂ ਪੁਗ੍ਗਲਾਕਾਰਂ ਗਾਹਾਪੇਤਿ, ਤਸ੍ਮਾ ਪਾਪਪੁਗ੍ਗਲੇਨ ਸਹ ਵਾਸੋ ਨ ਕਾਤਬ੍ਬੋਤਿ ਅਧਿਪ੍ਪਾਯੋ.

ਸੇਵਮਾਨੋ ਸੇਵਮਾਨਨ੍ਤਿ ਪਰਂ ਪਕਤਿਸੁਦ੍ਧਂ ਪੁਗ੍ਗਲਂ ਕਾਲੇਨ ਕਾਲਂ ਅਤ੍ਤਾਨਂ ਸੇਵਮਾਨਂ ਸੇਵਮਾਨੋ ਭਜਮਾਨੋ ਪਾਪਪੁਗ੍ਗਲੋ, ਤੇਨ ਵਾ ਸੇਵਿਯਮਾਨੋ. ਸਮ੍ਫੁਟ੍ਠੋ ਸਮ੍ਫੁਸਨ੍ਤਿ ਤੇਨ ਪਕਤਿਸੁਦ੍ਧੇਨ ਪੁਗ੍ਗਲੇਨ ਸਹਵਾਸੇਨ ਸਂਸਗ੍ਗੇਨ ਸਮ੍ਫੁਟ੍ਠੋ ਪਾਪਪੁਗ੍ਗਲੋ ਸਯਮ੍ਪਿ, ਤਥਾ ਤਂ ਫੁਸਨ੍ਤੋ. ਸਰੋ ਦਿਦ੍ਧੋ ਕਲਾਪਂ ਵਾਤਿ ਯਥਾ ਨਾਮ ਸਰੋ ਵਿਸੇਨ ਦਿਦ੍ਧੋ ਲਿਤ੍ਤੋ ਸਰਕਲਾਪਗਤੋ ਸਰਸਮੂਹਸਙ੍ਖਾਤਂ ਸਰਕਲਾਪਂ ਅਤ੍ਤਨਾ ਫੁਟ੍ਠਂ ਅਲਿਤ੍ਤਮ੍ਪਿ ਉਪਲਿਮ੍ਪਤਿ, ਏਵਂ ਪਾਪੇਨ ਉਪਲੇਪਭਯਾ ਧੀਰੋਤਿ ਧਿਤਿਸਮ੍ਪਨ੍ਨਤ੍ਤਾ ਧੀਰੋ ਪਣ੍ਡਿਤਪੁਰਿਸੋ ਪਾਪਸਹਾਯੋ ਨ ਭਵੇਯ੍ਯ.

ਪੂਤਿਮਚ੍ਛਂ ਕੁਸਗ੍ਗੇਨਾਤਿ ਯਥਾ ਕੁਚ੍ਛਿਤਭਾਵੇਨ ਪੂਤਿਭੂਤਂ ਮਚ੍ਛਂ ਕੁਸਤਿਣਗ੍ਗੇਨ ਯੋ ਪੁਰਿਸੋ ਉਪਨਯ੍ਹਤਿ ਪੁਟਬਨ੍ਧਵਸੇਨ ਬਨ੍ਧਤਿ, ਤਸ੍ਸ ਤੇ ਕੁਸਾ ਅਪੂਤਿਕਾਪਿ ਪੂਤਿਮਚ੍ਛਸਮ੍ਬਨ੍ਧੇਨ ਪੂਤਿ ਦੁਗ੍ਗਨ੍ਧਮੇਵ ਵਾਯਨ੍ਤਿ. ਏਵਂ ਬਾਲੂਪਸੇਵਨਾਤਿ ਏਵਂਸਮ੍ਪਦਾ ਬਾਲਜਨੂਪਸੇਵਨਾ ਦਟ੍ਠਬ੍ਬਾ. ਏਵਂ ਧੀਰੂਪਸੇਵਨਾਤਿ ਯਥਾ ਅਸੁਰਭਿਨੋਪਿ ਪਤ੍ਤਾ ਤਗਰਸਮ੍ਬਨ੍ਧੇਨ ਸੁਰਭਿਂ ਵਾਯਨ੍ਤਿ, ਏਵਂ ਪਣ੍ਡਿਤੂਪਸੇਵਨਾ ਪਕਤਿਯਾ ਅਸੀਲਵਤੋ ਸੀਲਸਮਾਦਾਨਾਦਿਵਸੇਨ ਸੀਲਗਨ੍ਧਵਾਯਨਸ੍ਸ ਕਾਰਣਂ ਹੋਤਿ.

ਤਸ੍ਮਾਤਿ ਯਸ੍ਮਾ ਅਕਲ੍ਯਾਣਮਿਤ੍ਤਸੇਵਨਾਯ ਕਲ੍ਯਾਣਮਿਤ੍ਤਸੇਵਨਾਯ ਚ ਅਯਂ ਏਦਿਸੋ ਆਦੀਨਵੋ ਆਨਿਸਂਸੋ ਚ, ਤਸ੍ਮਾ ਪਤ੍ਤਪੁਟਸ੍ਸੇਵ ਪਲਾਸਪੁਟਸ੍ਸ ਵਿਯ ਦੁਗ੍ਗਨ੍ਧਸੁਗਨ੍ਧਵਤ੍ਥੁਸਂਸਗ੍ਗੇਨ ਅਸਾਧੁਸਾਧੁਜਨਸਨ੍ਨਿਸ੍ਸਯੇਨ ਚ. ਞਤ੍ਵਾ ਸਮ੍ਪਾਕਮਤ੍ਤਨੋਤਿ ਅਤ੍ਤਨੋ ਦੁਕ੍ਖੁਦ੍ਰਯਂ ਸੁਖੁਦ੍ਰਯਞ੍ਚ ਫਲਨਿਪ੍ਫਤ੍ਤਿਂ ਞਤ੍ਵਾ ਜਾਨਿਤ੍ਵਾ ਅਸਨ੍ਤੇ ਪਾਪਮਿਤ੍ਤੇ ਨ ਉਪਸੇਵੇਯ੍ਯ, ਸਨ੍ਤੇ ਉਪਸਨ੍ਤੇ ਵਨ੍ਤਦੋਸੇ ਪਸਤ੍ਥੇ ਵਾ ਪਣ੍ਡਿਤੇ ਸੇਵੇਯ੍ਯ. ਤਥਾ ਹਿ ਅਸਨ੍ਤੋ ਨਿਰਯਂ ਨੇਨ੍ਤਿ, ਸਨ੍ਤੋ ਪਾਪੇਨ੍ਤਿ ਸੁਗ੍ਗਤਿਨ੍ਤਿ. ਇਤਿ ਭਗਵਾ ਪਠਮਗਾਥਾਯ ਯਥਾਵੁਤ੍ਤਾਨਿ ਤੀਣਿ ਸੁਖਨਿਮਿਤ੍ਤਾਨਿ ਦਸ੍ਸੇਤ੍ਵਾ ਤਤੋ ਪਰਾਹਿ ਪਞ੍ਚਹਿ ਗਾਥਾਹਿ ਪਟਿਪਕ੍ਖਪਰਿਵਜ੍ਜਨੇਨ ਸਦ੍ਧਿਂ ਪਸਂਸਾਸੁਖਸ੍ਸ ਆਗਮਨਂ ਦਸ੍ਸੇਤ੍ਵਾ ਓਸਾਨਗਾਥਾਯ ਤਿਣ੍ਣਮ੍ਪਿ ਸੁਖਾਨਂ ਆਗਮਨਕਾਰਣੇਨ ਸਦ੍ਧਿਂ ਓਸਾਨਸੁਖਂ ਦਸ੍ਸੇਤਿ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਭਿਦੁਰਸੁਤ੍ਤਵਣ੍ਣਨਾ

੭੭. ਅਟ੍ਠਮੇ ਭਿਦੁਰਾਯਨ੍ਤਿ ਭਿਦੁਰੋ ਅਯਂ. ਕਾਯੋਤਿ ਰੂਪਕਾਯੋ. ਸੋ ਹਿ ਅਙ੍ਗਪਚ੍ਚਙ੍ਗਾਨਂ ਕੇਸਾਦੀਨਞ੍ਚ ਸਮੂਹਟ੍ਠੇਨ, ਏਵਂ ਕੁਚ੍ਛਿਤਾਨਂ ਜੇਗੁਚ੍ਛਾਨਂ ਆਯੋ ਉਪ੍ਪਤ੍ਤਿਦੇਸੋਤਿਪਿ ਕਾਯੋ. ਤਤ੍ਰਾਯਂ ਵਚਨਤ੍ਥੋ – ਆਯਨ੍ਤਿ ਏਤ੍ਥਾਤਿ ਆਯੋ. ਕੇ ਆਯਨ੍ਤਿ? ਕੁਚ੍ਛਿਤਾ ਕੇਸਾਦਯੋ. ਇਤਿ ਕੁਚ੍ਛਿਤਾਨਂ ਆਯੋਤਿਪਿ ਕਾਯੋ. ਅਤ੍ਥਤੋ ਪਨ ਚਤੁਸਨ੍ਤਤਿਵਸੇਨ ਪਵਤ੍ਤਮਾਨਾਨਂ ਭੂਤੁਪਾਦਾਯਧਮ੍ਮਾਨਂ ਪੁਞ੍ਜੋ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖਵੇ, ਅਯਂ ਚਤੁਮਹਾਭੂਤਮਯੋ ਰੂਪਕਾਯੋ ਭਿਦੁਰੋ ਭੇਦਨਸੀਲੋ ਭੇਦਨਸਭਾਵੋ ਖਣੇ ਖਣੇ ਵਿਦ੍ਧਂਸਨਸਭਾਵੋਤਿ. ‘‘ਭਿਨ੍ਦਰਾਯ’’ਨ੍ਤਿਪਿ ਪਾਠੋ, ਸੋ ਏਵਤ੍ਥੋ. ਵਿਞ੍ਞਾਣਨ੍ਤਿ ਤੇਭੂਮਕਂ ਕੁਸਲਾਦਿਚਿਤ੍ਤਂ. ਵਚਨਤ੍ਥੋ ਪਨ – ਤਂ ਤਂ ਆਰਮ੍ਮਣਂ ਵਿਜਾਨਾਤੀਤਿ ਵਿਞ੍ਞਾਣਂ. ਯਞ੍ਹਿ ਸਞ੍ਜਾਨਨਪਜਾਨਨਵਿਧੁਰਂ ਆਰਮ੍ਮਣਵਿਜਾਨਨਂ ਉਪਲਦ੍ਧਿ, ਤਂ ਵਿਞ੍ਞਾਣਂ. ਵਿਰਾਗਧਮ੍ਮਨ੍ਤਿ ਵਿਰਜ੍ਜਨਧਮ੍ਮਂ, ਪਲੁਜ੍ਜਨਸਭਾਵਨ੍ਤਿ ਅਤ੍ਥੋ. ਸਬ੍ਬੇ ਉਪਧੀਤਿ ਖਨ੍ਧੂਪਧਿ, ਕਿਲੇਸੂਪਧਿ, ਅਭਿਸਙ੍ਖਾਰੂਪਧਿ, ਪਞ੍ਚਕਾਮਗੁਣੂਪਧੀਤਿ ਏਤੇ ‘‘ਉਪਧੀਯਤਿ ਏਤ੍ਥ ਦੁਕ੍ਖ’’ਨ੍ਤਿ ਉਪਧਿਸਞ੍ਞਿਤਾ ਸਬ੍ਬੇਪਿ ਉਪਾਦਾਨਕ੍ਖਨ੍ਧਕਿਲੇਸਾਭਿਸਙ੍ਖਾਰਪਞ੍ਚਕਾਮਗੁਣਧਮ੍ਮਾ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ, ਉਦਯਬ੍ਬਯਪ੍ਪਟਿਪੀਲ਼ਨਟ੍ਠੇਨ ਦੁਕ੍ਖਾ, ਜਰਾਯ ਮਰਣੇਨ ਚਾਤਿ ਦ੍ਵਿਧਾ ਵਿਪਰਿਣਾਮੇਤਬ੍ਬਸਭਾਵਤਾਯ ਪਕਤਿਵਿਜਹਨਟ੍ਠੇਨ ਵਿਪਰਿਣਾਮਧਮ੍ਮਾ. ਏਵਮੇਤ੍ਥ ਅਨਿਚ੍ਚਦਸ੍ਸਨਸੁਖਤਾਯ ਰੂਪਧਮ੍ਮੇ ਵਿਞ੍ਞਾਣਞ੍ਚ ਵਿਸੁਂ ਗਹੇਤ੍ਵਾ ਪੁਨ ਉਪਧਿਵਿਭਾਗੇਨ ਸਬ੍ਬੇਪਿ ਤੇਭੂਮਕਧਮ੍ਮੇ ਏਕਜ੍ਝਂ ਗਹੇਤ੍ਵਾ ਅਨਿਚ੍ਚਦੁਕ੍ਖਾਨੁਪਸ੍ਸਨਾਮੁਖੇਨ ਤਥਾਬੁਜ੍ਝਨਕਾਨਂ ਪੁਗ੍ਗਲਾਨਂ ਅਜ੍ਝਾਸਯੇਨ ਸਮ੍ਮਸਨਚਾਰੋ.ਕਥਿਤੋ. ਕਾਮਞ੍ਚੇਤ੍ਥ ਲਕ੍ਖਣਦ੍ਵਯਮੇਵ ਪਾਲ਼ਿਯਂ ਆਗਤਂ, ‘‘ਯਂ ਦੁਕ੍ਖਂ, ਤਦਨਤ੍ਤਾ’’ਤਿ (ਸਂ. ਨਿ. ੩.੧੫) ਪਨ ਵਚਨਤੋ ਦੁਕ੍ਖਲਕ੍ਖਣੇਨੇਵ ਅਨਤ੍ਤਲਕ੍ਖਣਮ੍ਪਿ ਦਸ੍ਸਿਤਮੇਵਾਤਿ ਵੇਦਿਤਬ੍ਬਂ.

ਗਾਥਾਯਂ ਉਪਧੀਸੁ ਭਯਂ ਦਿਸ੍ਵਾਤਿ ਉਪਧੀਸੁ ਭਯਤੁਪਟ੍ਠਾਨਞਾਣਵਸੇਨ ਭਯਂ ਦਿਸ੍ਵਾ, ਤੇਸਂ ਭਾਯਿਤਬ੍ਬਤਂ ਪਸ੍ਸਿਤ੍ਵਾ. ਇਮਿਨਾ ਬਲਵਵਿਪਸ੍ਸਨਂ ਦਸ੍ਸੇਤਿ. ਭਯਤੁਪਟ੍ਠਾਨਞਾਣਮੇਵ ਹਿ ਵਿਭਜਿਤ੍ਵਾ ਵਿਸੇਸਵਸੇਨ ਆਦੀਨਵਾਨੁਪਸ੍ਸਨਾ ਨਿਬ੍ਬਿਦਾਨੁਪਸ੍ਸਨਾਤਿ ਚ ਵੁਚ੍ਚਤਿ. ਜਾਤਿਮਰਣਮਚ੍ਚਗਾਤਿ ਏਵਂ ਸਮ੍ਮਸਨ੍ਤੋ ਵਿਪਸ੍ਸਨਾਞਾਣਂ ਮਗ੍ਗੇਨ ਘਟੇਤ੍ਵਾ ਮਗ੍ਗਪਰਮ੍ਪਰਾਯ ਅਰਹਤ੍ਤਂ ਪਤ੍ਤੋ ਜਾਤਿਮਰਣਂ ਅਤੀਤੋ ਨਾਮ ਹੋਤਿ. ਕਥਂ? ਸਮ੍ਪਤ੍ਵਾ ਪਰਮਂ ਸਨ੍ਤਿਨ੍ਤਿ ਪਰਮਂ ਉਤ੍ਤਮਂ ਅਨੁਤ੍ਤਰਂ ਸਨ੍ਤਿਂ ਸਬ੍ਬਸਙ੍ਖਾਰੂਪਸਮਂ ਨਿਬ੍ਬਾਨਂ ਅਧਿਗਨ੍ਤ੍ਵਾ. ਏਵਂਭੂਤੋ ਚ ਕਾਲਂ ਕਙ੍ਖਤਿ ਭਾਵਿਤਤ੍ਤੋਤਿ ਚਤੁਨ੍ਨਂ ਅਰਿਯਮਗ੍ਗਾਨਂ ਵਸੇਨ ਭਾਵਨਾਭਿਸਮਯਨਿਪ੍ਫਤ੍ਤਿਯਾ ਭਾਵਿਤਕਾਯਸੀਲਚਿਤ੍ਤਪਞ੍ਞਤ੍ਤਾ ਭਾਵਿਤਤ੍ਤੋ ਮਰਣਂ ਜੀਵਿਤਞ੍ਚ ਅਨਭਿਨਨ੍ਦਨ੍ਤੋ ਕੇਵਲਂ ਅਤ੍ਤਨੋ ਖਨ੍ਧਪਰਿਨਿਬ੍ਬਾਨਕਾਲਂ ਕਙ੍ਖਤਿ ਉਦਿਕ੍ਖਤਿ, ਨ ਤਸ੍ਸ ਕਤ੍ਥਚਿ ਪਤ੍ਥਨਾ ਹੋਤੀਤਿ. ਤੇਨਾਹ –

‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾ’’ਤਿ. (ਥੇਰਗਾ. ੬੦੬);

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਧਾਤੁਸੋਸਂਸਨ੍ਦਨਸੁਤ੍ਤਵਣ੍ਣਨਾ

੭੮. ਨਵਮੇ ਧਾਤੁਸੋਤਿ ਧਾਤੁਤੋ. ਧਾਤੂਤਿ ਚ ਅਜ੍ਝਾਸਯਧਾਤੁ ਅਜ੍ਝਾਸਯਸਭਾਵੋ ਅਧਿਪ੍ਪੇਤੋ, ਯੋ ਅਧਿਮੁਤ੍ਤੀਤਿਪਿ ਵੁਚ੍ਚਤਿ. ਸਂਸਨ੍ਦਨ੍ਤੀਤਿ ਤਾਯ ਧਾਤੁਸਭਾਗਤਾਯ ਯਥਾਧਾਤੁ ਯਥਾਅਜ੍ਝਾਸਯਂ ਅਲ੍ਲੀਯਨ੍ਤਿ ਏਕਤੋ ਹੋਨ੍ਤਿ. ਸਮੇਨ੍ਤੀਤਿ ਤਾਯ ਏਵ ਸਮਾਨਜ੍ਝਾਸਯਤਾਯ ਏਕਚਿਤ੍ਤਾ ਹੁਤ੍ਵਾ ਸਮਾਗਚ੍ਛਨ੍ਤਿ ਅਞ੍ਞਮਞ੍ਞਂ ਭਜਨ੍ਤਿ ਉਪਸਙ੍ਕਮਨ੍ਤਿ, ਅਤ੍ਤਨੋ ਰੁਚਿਭਾਵਖਨ੍ਤਿਦਿਟ੍ਠਿਯੋ ਵਾ ਤਤ੍ਥ ਤਤ੍ਥ ਸਮੇ ਕਰੋਨ੍ਤਾ ਪਵਤ੍ਤਨ੍ਤਿ. ਹੀਨਾਧਿਮੁਤ੍ਤਿਕਾਤਿ ਹੀਨੇ ਕਾਮਗੁਣਾਦਿਕੇ ਅਧਿਮੁਤ੍ਤਿ ਏਤੇਸਨ੍ਤਿ ਹੀਨਾਧਿਮੁਤ੍ਤਿਕਾ, ਹੀਨਜ੍ਝਾਸਯਾ. ਕਲ੍ਯਾਣਾਧਿਮੁਤ੍ਤਿਕਾਤਿ ਕਲ੍ਯਾਣੇ ਨੇਕ੍ਖਮ੍ਮਾਦਿਕੇ ਅਧਿਮੁਤ੍ਤਿ ਏਤੇਸਨ੍ਤਿ ਕਲ੍ਯਾਣਾਧਿਮੁਤ੍ਤਿਕਾ, ਪਣੀਤਜ੍ਝਾਸਯਾ. ਸਚੇ ਹਿ ਆਚਰਿਯੁਪਜ੍ਝਾਯਾ ਨ ਸੀਲਵਨ੍ਤੋ, ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾ ਚ ਸੀਲਵਨ੍ਤੋ, ਤੇ ਆਚਰਿਯੁਪਜ੍ਝਾਯੇਪਿ ਨ ਉਪਸਙ੍ਕਮਨ੍ਤਿ, ਅਤ੍ਤਨੋ ਸਦਿਸੇ ਸਾਰੁਪ੍ਪਭਿਕ੍ਖੂਯੇਵ ਉਪਸਙ੍ਕਮਨ੍ਤਿ. ਸਚੇ ਪਨ ਆਚਰਿਯੁਪਜ੍ਝਾਯਾ ਸੀਲਵਨ੍ਤੋ, ਇਤਰੇ ਨ ਸੀਲਵਨ੍ਤੋ, ਤੇਪਿ ਨ ਆਚਰਿਯੁਪਜ੍ਝਾਯੇ ਉਪਸਙ੍ਕਮਨ੍ਤਿ, ਅਤ੍ਤਨੋ ਸਦਿਸੇ ਹੀਨਾਧਿਮੁਤ੍ਤਿਕੇਯੇਵ ਉਪਸਙ੍ਕਮਨ੍ਤਿ. ਏਵਂ ਉਪਸਙ੍ਕਮਨਂ ਪਨ ਨ ਕੇਵਲਂ ਏਤਰਹਿ ਏਵ, ਅਥ ਖੋ ਅਤੀਤਾਨਾਗਤੇਪੀਤਿ ਦਸ੍ਸੇਨ੍ਤੋ ‘‘ਅਤੀਤਮ੍ਪਿ, ਭਿਕ੍ਖਵੇ’’ਤਿਆਦਿਮਾਹ. ਸਙ੍ਖੇਪਤੋ ਸਂਕਿਲੇਸਧਮ੍ਮੇਸੁ ਅਭਿਨਿਵਿਟ੍ਠਾ ਹੀਨਾਧਿਮੁਤ੍ਤਿਕਾ, ਵੋਦਾਨਧਮ੍ਮੇਸੁ ਅਭਿਨਿਵਿਟ੍ਠਾ ਕਲ੍ਯਾਣਾਧਿਮੁਤ੍ਤਿਕਾ.

ਇਦਂ ਪਨ ਦੁਸ੍ਸੀਲਾਨਂ ਦੁਸ੍ਸੀਲਸੇਵਨਮੇਵ, ਸੀਲਵਨ੍ਤਾਨਂ ਸੀਲਵਨ੍ਤਸੇਵਨਮੇਵ, ਦੁਪ੍ਪਞ੍ਞਾਨਂ ਦੁਪ੍ਪਞ੍ਞਸੇਵਨਮੇਵ, ਪਞ੍ਞਵਨ੍ਤਾਨਂ ਪਞ੍ਞਵਨ੍ਤਸੇਵਨਮੇਵ ਕੋ ਨਿਯਾਮੇਤੀਤਿ? ਅਜ੍ਝਾਸਯਧਾਤੁ ਨਿਯਾਮੇਤਿ. ਸਮ੍ਬਹੁਲਾ ਕਿਰ ਭਿਕ੍ਖੂ ਏਕਸ੍ਮਿਂ ਗਾਮੇ ਭਿਕ੍ਖਾਚਾਰਂ ਚਰਨ੍ਤਿ. ਤੇ ਮਨੁਸ੍ਸਾ ਬਹੁਂ ਭਤ੍ਤਂ ਆਹਰਿਤ੍ਵਾ ਪਤ੍ਤਾਨਿ ਪੂਰੇਤ੍ਵਾ ‘‘ਯਥਾਸਭਾਗਂ ਪਰਿਭੁਞ੍ਜਥਾ’’ਤਿ ਵਤ੍ਵਾ ਉਯ੍ਯੋਜੇਸੁਂ. ਭਿਕ੍ਖੂ ਆਹਂਸੁ ‘‘ਆਵੁਸੋ, ਮਨੁਸ੍ਸਾ ਧਾਤੁਸਂਯੁਤ੍ਤਕਮ੍ਮੇ ਪਯੋਜੇਨ੍ਤੀ’’ਤਿ. ਏਵਂ ਅਜ੍ਝਾਸਯਧਾਤੁ ਨਿਯਾਮੇਤੀਤਿ. ਧਾਤੁਸਂਯੁਤ੍ਤੇਨ ਅਯਮਤ੍ਥੋ ਦੀਪੇਤਬ੍ਬੋ – ਗਿਜ੍ਝਕੂਟਪਬ੍ਬਤਸ੍ਮਿਞ੍ਹਿ ਗਿਲਾਨਸੇਯ੍ਯਾਯ ਨਿਪਨ੍ਨੋ ਭਗਵਾ ਆਰਕ੍ਖਤ੍ਥਾਯ ਪਰਿਵਾਰੇਤ੍ਵਾ ਵਸਨ੍ਤੇਸੁ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦੀਸੁ ਏਕਮੇਕਂ ਅਤ੍ਤਨੋ ਪਰਿਸਾਯ ਸਦ੍ਧਿਂ ਚਙ੍ਕਮਨ੍ਤਂ ਓਲੋਕੇਤ੍ਵਾ ਭਿਕ੍ਖੂ ਆਮਨ੍ਤੇਸਿ ‘‘ਪਸ੍ਸਥ ਨੋ ਤੁਮ੍ਹੇ, ਭਿਕ੍ਖਵੇ, ਸਾਰਿਪੁਤ੍ਤਂ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਚਙ੍ਕਮਨ੍ਤਨ੍ਤਿ. ਏਵਂ, ਭਨ੍ਤੇ. ਸਬ੍ਬੇ ਖੋ ਏਤੇ, ਭਿਕ੍ਖਵੇ, ਭਿਕ੍ਖੂ ਮਹਾਪਞ੍ਞਾ’’ਤਿ (ਸਂ. ਨਿ. ੨.੯੯) ਸਬ੍ਬਂ ਵਿਤ੍ਥਾਰੇਤਬ੍ਬਂ.

ਗਾਥਾਸੁ ਸਂਸਗ੍ਗਾਤਿ ਸਂਕਿਲੇਸਤੋ ਸਹਵਾਸਾਦਿਵਸੇਨ ਸਮਾਯੋਗਤੋ, ਅਥ ਵਾ ਦਸ੍ਸਨਸਂਸਗ੍ਗੋ, ਸਵਨਸਂਸਗ੍ਗੋ, ਸਮੁਲ੍ਲਾਪਸਂਸਗ੍ਗੋ, ਸਮ੍ਭੋਗਸਂਸਗ੍ਗੋ, ਕਾਯਸਂਸਗ੍ਗੋਤਿ ਏਵਂ ਪਞ੍ਚਵਿਧੇ ਸਂਸਗ੍ਗੇ ਯਤੋ ਕੁਤੋਚਿ ਸਂਸਗ੍ਗਤੋ. ਵਨਥੋ ਜਾਤੋਤਿ ਕਿਲੇਸੋ ਉਪ੍ਪਨ੍ਨੋ ਮਗ੍ਗੇਨ ਅਸਮੂਹਤੋ. ਅਸਂਸਗ੍ਗੇਨ ਛਿਜ੍ਜਤੀਤਿ ਸਂਸਗ੍ਗਪਟਿਕ੍ਖੇਪੇਨ ਕਾਯਵਿਵੇਕਾਦਿਨਾ ਪੁਬ੍ਬਭਾਗੇ ਛਿਜ੍ਜਿਤ੍ਵਾ ਪੁਨ ਅਚ੍ਚਨ੍ਤਾਸਂਸਗ੍ਗੇਨ ਸਮੁਚ੍ਛੇਦਵਿਵੇਕੇਨ ਛਿਜ੍ਜਤਿ ਪਹੀਯਤਿ. ਏਤ੍ਤਾਵਤਾ ਸਙ੍ਖੇਪਤੋ ਹੀਨਾਧਿਮੁਤ੍ਤਿਯਾ ਸਮੁਦਯੋ ਅਤ੍ਥਙ੍ਗਮੋ ਚ ਦਸ੍ਸਿਤੋ ਹੋਤਿ.

ਯਸ੍ਮਾ ਪਨ ਤੇ ਸਂਸਗ੍ਗਾ ਤੇ ਚ ਕਿਲੇਸਾ ਕੋਸਜ੍ਜਵਸੇਨ ਉਪ੍ਪਜ੍ਜਨ੍ਤਿ ਚੇਵ ਵਡ੍ਢਨ੍ਤਿ ਚ, ਨ ਵੀਰਿਯਾਰਮ੍ਭਵਸੇਨ, ਤਸ੍ਮਾ ਹੀਨਾਧਿਮੁਤ੍ਤਿਕੇ ਕੁਸੀਤਪੁਗ੍ਗਲੇ ਵਜ੍ਜੇਤ੍ਵਾ ਕਲ੍ਯਾਣਾਧਿਮੁਤ੍ਤਿਕੇ ਆਰਦ੍ਧਵੀਰਿਯੇ ਸੇਵਨ੍ਤੇਨ ਅਸਂਸਗ੍ਗੇਨ ਸਂਸਗ੍ਗਜੋ ਵਨਥੋ ਛਿਨ੍ਦਿਤਬ੍ਬੋਤਿ ਯਥਾਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ਕੁਸੀਤਸੇਵਨਾਯ ਤਾਵ ਆਦੀਨਵਂ ਪਕਾਸੇਤੁਂ ‘‘ਪਰਿਤ੍ਤਂ ਦਾਰੁ’’ਨ੍ਤਿਆਦਿਮਾਹ.

ਤਤ੍ਥ ਪਰਿਤ੍ਤਂ ਦਾਰੁਨ੍ਤਿ ਖੁਦ੍ਦਕਂ ਕਟ੍ਠਮਯਂ ਕੁਲ੍ਲਂ. ਯਥਾ ਸੀਦੇ ਮਹਣ੍ਣਵੇਤਿ ਯਥਾ ਖੁਦ੍ਦਕਂ ਕੁਲ੍ਲਂ ਆਰੁਹਿਤ੍ਵਾ ਮਹਾਸਮੁਦ੍ਦਂ ਤਰਿਤੁਕਾਮੋ ਤੀਰਂ ਅਪ੍ਪਤ੍ਵਾ ਸਮੁਦ੍ਦਮਜ੍ਝੇਯੇਵ ਸੀਦੇਯ੍ਯ, ਪਤਿਤ੍ਵਾ ਮਚ੍ਛਕਚ੍ਛਪਭਕ੍ਖੋ ਭਵੇਯ੍ਯ. ਏਵਂ ਕੁਸੀਤਂ ਆਗਮ੍ਮ, ਸਾਧੁਜੀਵੀਪਿ ਸੀਦਤੀਤਿ ਏਵਮੇਵ ਕੁਸੀਤਂ ਵੀਰਿਯਾਰਮ੍ਭਰਹਿਤਂ ਕਿਲੇਸਵਸਿਕਂ ਪੁਗ੍ਗਲਂ ਨਿਸ੍ਸਾਯ ਤੇਨ ਕਤਸਂਸਗ੍ਗੋ ਸਾਧੁਜੀਵੀਪਿ ਪਰਿਸੁਦ੍ਧਾਜੀਵੋ ਪਰਿਸੁਦ੍ਧਸੀਲੋਪਿ ਸਮਾਨੋ ਹੀਨਸਂਸਗ੍ਗਤੋ ਉਪ੍ਪਨ੍ਨੇਹਿ ਕਾਮਵਿਤਕ੍ਕਾਦੀਹਿ ਖਜ੍ਜਮਾਨੋ ਪਾਰਂ ਗਨ੍ਤੁਂ ਅਸਮਤ੍ਥੋ ਸਂਸਾਰਣ੍ਣਵੇਯੇਵ ਸੀਦਤਿ. ਤਸ੍ਮਾਤਿ ਯਸ੍ਮਾ ਏਵਂ ਅਨਤ੍ਥਾਵਹੋ ਕੁਸੀਤਸਂਸਗ੍ਗੋ, ਤਸ੍ਮਾ ਤਂ ਆਗਮ੍ਮ ਆਲਸਿਯਾਨੁਯੋਗੇਨ ਕੁਚ੍ਛਿਤਂ ਸੀਦਤੀਤਿ ਕੁਸੀਤਂ. ਤਤੋ ਏਵ ਹੀਨਵੀਰਿਯਂ ਨਿਬ੍ਬੀਰਿਯਂ ਅਕਲ੍ਯਾਣਮਿਤ੍ਤਂ ਪਰਿਵਜ੍ਜੇਯ੍ਯ. ਏਕਨ੍ਤੇਨੇਵ ਪਨ ਕਾਯਵਿਵੇਕਾਦੀਨਞ੍ਚੇਵ ਤਦਙ੍ਗਵਿਵੇਕਾਦੀਨਞ੍ਚ ਵਸੇਨ ਪਵਿਵਿਤ੍ਤੇਹਿ, ਤਤੋ ਏਵ ਕਿਲੇਸੇਹਿ ਆਰਕਤ੍ਤਾ ਅਰਿਯੇਹਿ ਪਰਿਸੁਦ੍ਧੇਹਿ ਨਿਬ੍ਬਾਨਂ ਪਟਿਪੇਸਿਤਤ੍ਤਭਾਵਤੋ ਪਹਿਤਤ੍ਤੇਹਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨਾਨਂ ਵਸੇਨ ਝਾਯਨਤੋ ਝਾਯੀਹਿ ਸਬ੍ਬਕਾਲਂ ਪਗ੍ਗਹਿਤਵੀਰਿਯਤਾਯ ਆਰਦ੍ਧਵੀਰਿਯੇਹਿ ਪਣ੍ਡਿਤੇਹਿ ਸਪ੍ਪਞ੍ਞੇਹਿਯੇਵ ਸਹ ਆਵਸੇਯ੍ਯ ਸਂਵਸੇਯ੍ਯਾਤਿ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਪਰਿਹਾਨਸੁਤ੍ਤਵਣ੍ਣਨਾ

੭੯. ਦਸਮੇ ਪਰਿਹਾਨਾਯ ਸਂਵਤ੍ਤਨ੍ਤੀਤਿ ਅਵੁਦ੍ਧਿਯਾ ਭਵਨ੍ਤਿ, ਮਗ੍ਗਾਧਿਗਮਸ੍ਸ ਪਰਿਪਨ੍ਥਾਯ ਹੋਨ੍ਤਿ. ਅਧਿਗਤਸ੍ਸ ਪਨ ਮਗ੍ਗਸ੍ਸ ਪਰਿਹਾਨਿ ਨਾਮ ਨਤ੍ਥਿ. ‘‘ਤਯੋ ਧਮ੍ਮਾ’’ਤਿ ਧਮ੍ਮਾਧਿਟ੍ਠਾਨਵਸੇਨ ਉਦ੍ਦਿਟ੍ਠਧਮ੍ਮੇ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਵਿਭਜਨ੍ਤੋ ‘‘ਇਧ, ਭਿਕ੍ਖਵੇ, ਸੇਖੋ ਭਿਕ੍ਖੂ’’ਤਿਆਦਿਮਾਹ.

ਤਤ੍ਥ ਕਮ੍ਮਂ ਆਰਮਿਤਬ੍ਬਤੋ ਆਰਾਮੋ ਏਤਸ੍ਸਾਤਿ ਕਮ੍ਮਾਰਾਮੋ. ਕਮ੍ਮੇ ਰਤੋਤਿ ਕਮ੍ਮਰਤੋ. ਕਮ੍ਮਾਰਾਮਤਂ ਕਮ੍ਮਾਭਿਰਤਿਂ ਅਨੁਯੁਤ੍ਤੋ ਪਯੁਤ੍ਤੋਤਿ ਕਮ੍ਮਾਰਾਮਤਮਨੁਯੁਤ੍ਤੋ. ਤਤ੍ਥ ਕਮ੍ਮਂ ਨਾਮ ਇਤਿਕਤ੍ਤਬ੍ਬਂ ਕਮ੍ਮਂ, ਸੇਯ੍ਯਥਿਦਂ – ਚੀਵਰਵਿਚਾਰਣਂ, ਚੀਵਰਕਰਣਂ, ਉਪਤ੍ਥਮ੍ਭਨਂ, ਪਤ੍ਤਤ੍ਥਵਿਕਂ, ਅਂਸਬਨ੍ਧਨਂ, ਕਾਯਬਨ੍ਧਨਂ, ਧਮਕਰਣਂ, ਆਧਾਰਕਂ, ਪਾਦਕਥਲਿਕਂ, ਸਮ੍ਮਜ੍ਜਨੀਤਿ ਏਵਮਾਦੀਨਂ ਉਪਕਰਣਾਨਂ ਕਰਣਂ, ਯਞ੍ਚ ਵਿਹਾਰੇ ਖਣ੍ਡਫੁਲ੍ਲਾਦਿਪਟਿਸਙ੍ਖਰਣਂ. ਏਕਚ੍ਚੋ ਹਿ ਏਤਾਨਿ ਕਰੋਨ੍ਤੋ ਸਕਲਦਿਵਸਂ ਏਤਾਨੇਵ ਕਰੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਯੋ ਪਨ ਏਤੇਸਂ ਕਰਣਵੇਲਾਯਮੇਵ ਏਤਾਨਿ ਕਰੋਤਿ, ਉਦ੍ਦੇਸਵੇਲਾਯਂ ਉਦ੍ਦੇਸਂ ਗਣ੍ਹਾਤਿ, ਸਜ੍ਝਾਯਵੇਲਾਯਂ ਸਜ੍ਝਾਯਤਿ, ਚੇਤਿਯਙ੍ਗਣਵਤ੍ਤਾਦਿਕਰਣਵੇਲਾਯਂ ਚੇਤਿਯਙ੍ਗਣਵਤ੍ਤਾਦੀਨਿ ਕਰੋਤਿ, ਮਨਸਿਕਾਰਵੇਲਾਯਂ ਮਨਸਿਕਾਰਂ ਕਰੋਤਿ ਸਬ੍ਬਤ੍ਥਕਕਮ੍ਮਟ੍ਠਾਨੇ ਵਾ ਪਾਰਿਹਾਰਿਯਕਮ੍ਮਟ੍ਠਾਨੇ ਵਾ, ਨ ਸੋ ਕਮ੍ਮਾਰਾਮੋ ਨਾਮ. ਤਸ੍ਸ ਤਂ –

‘‘ਯਾਨਿ ਖੋ ਪਨ ਤਾਨਿ ਸਬ੍ਰਹ੍ਮਚਾਰੀਨਂ ਉਚ੍ਚਾਵਚਾਨਿ ਕਿਂਕਰਣੀਯਾਨਿ, ਤਤ੍ਥ ਦਕ੍ਖੋ ਹੋਤਿ ਅਨਲਸੋ, ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤੋ, ਅਲਂ ਕਾਤੁਂ ਅਲਂ ਸਂਵਿਧਾਤੁ’’ਨ੍ਤਿ (ਦੀ. ਨਿ. ੩.੩੪੫; ਅ. ਨਿ. ੧੦.੧੮) –

ਆਦਿਨਾ ਸਤ੍ਥਾਰਾ ਅਨੁਞ੍ਞਾਤਕਰਣਮੇਵ ਹੋਤਿ.

ਭਸ੍ਸਾਰਾਮੋਤਿ ਯੋ ਭਗਵਤਾ ਪਟਿਕ੍ਖਿਤ੍ਤਰਾਜਕਥਾਦਿਵਸੇਨ ਰਤ੍ਤਿਨ੍ਦਿਵਂ ਵੀਤਿਨਾਮੇਤਿ, ਅਯਂ ਭਸ੍ਸੇ ਪਰਿਯਨ੍ਤਕਾਰੀ ਨ ਹੋਤੀਤਿ ਭਸ੍ਸਾਰਾਮੋ ਨਾਮ. ਯੋ ਪਨ ਰਤ੍ਤਿਮ੍ਪਿ ਦਿਵਾਪਿ ਧਮ੍ਮਂ ਕਥੇਤਿ, ਪਞ੍ਹਂ ਵਿਸ੍ਸਜ੍ਜੇਤਿ, ਅਯਂ ਅਪ੍ਪਭਸ੍ਸੋ ਭਸ੍ਸੇ ਪਰਿਯਨ੍ਤਕਾਰੀਯੇਵ. ਕਸ੍ਮਾ? ‘‘ਸਨ੍ਨਿਪਤਿਤਾਨਂ ਵੋ, ਭਿਕ੍ਖਵੇ, ਦ੍ਵਯਂ ਕਰਣੀਯਂ – ਧਮ੍ਮੀ ਵਾ ਕਥਾ, ਅਰਿਯੋ ਵਾ ਤੁਣ੍ਹੀਭਾਵੋ’’ਤਿ (ਮ. ਨਿ. ੧.੨੭੩) ਵੁਤ੍ਤਵਿਧਿਂਯੇਵ ਪਟਿਪਨ੍ਨੋਤਿ.

ਨਿਦ੍ਦਾਰਾਮੋਤਿ ਯੋ ਯਾਵਦਤ੍ਥਂ ਉਦਰਾਵਦੇਹਕਂ ਭੁਞ੍ਜਿਤ੍ਵਾ ਸੇਯ੍ਯਸੁਖਂ, ਪਸ੍ਸਸੁਖਂ, ਮਿਦ੍ਧਸੁਖਂ ਅਨੁਯੁਞ੍ਜਤਿ, ਯੋ ਚ ਗਚ੍ਛਨ੍ਤੋਪਿ ਨਿਸਿਨ੍ਨੋਪਿ ਠਿਤੋਪਿ ਥਿਨਮਿਦ੍ਧਾਭਿਭੂਤੋ ਨਿਦ੍ਦਾਯਤਿ, ਅਯਂ ਨਿਦ੍ਦਾਰਾਮੋ ਨਾਮ. ਯਸ੍ਸ ਪਨ ਕਰਜਕਾਯਗੇਲਞ੍ਞੇਨ ਚਿਤ੍ਤਂ ਭਵਙ੍ਗਂ ਓਤਰਤਿ, ਨਾਯਂ ਨਿਦ੍ਦਾਰਾਮੋ, ਤੇਨੇਵਾਹ –

‘‘ਅਭਿਜਾਨਾਮਿ ਖੋ ਪਨਾਹਂ, ਅਗ੍ਗਿਵੇਸ੍ਸਨ, ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਨਿਦ੍ਦਂ ਓਕ੍ਕਮਿਤਾ’’ਤਿ (ਮ. ਨਿ. ੧.੩੮੭).

ਏਤ੍ਥ ਚ ਪੁਥੁਜ੍ਜਨਕਲ੍ਯਾਣਕੋਪਿ ਸੇਖੋਤ੍ਵੇਵ ਵੇਦਿਤਬ੍ਬੋ. ਤਸ੍ਮਾ ਤਸ੍ਸ ਸਬ੍ਬਸ੍ਸਪਿ ਵਿਸੇਸਾਧਿਗਮਸ੍ਸ ਇਤਰੇਸਂ ਉਪਰਿ ਵਿਸੇਸਾਧਿਗਮਸ੍ਸ ਚ ਪਰਿਹਾਨਾਯ ਵਤ੍ਤਨ੍ਤੀਤਿ ਵੇਦਿਤਬ੍ਬਂ. ਸੁਕ੍ਕਪਕ੍ਖਸ੍ਸ ਵੁਤ੍ਤਵਿਪਰਿਯਾਯੇਨ ਅਤ੍ਥਵਿਭਾਵਨਾ ਵੇਦਿਤਬ੍ਬਾ.

ਗਾਥਾਸੁ ਉਦ੍ਧਤੋਤਿ ਚਿਤ੍ਤਵਿਕ੍ਖੇਪਕਰੇਨ ਉਦ੍ਧਚ੍ਚੇਨ ਉਦ੍ਧਤੋ ਅਵੂਪਸਨ੍ਤੋ. ਅਪ੍ਪਕਿਚ੍ਚਸ੍ਸਾਤਿ ਅਨੁਞ੍ਞਾਤਸ੍ਸਪਿ ਵੁਤ੍ਤਪ੍ਪਕਾਰਸ੍ਸ ਕਿਚ੍ਚਸ੍ਸ ਯੁਤ੍ਤਪ੍ਪਯੁਤ੍ਤਕਾਲੇਯੇਵ ਕਰਣਤੋ ਅਪ੍ਪਕਿਚ੍ਚੋ ਅਸ੍ਸ ਭਵੇਯ੍ਯ. ਅਪ੍ਪਮਿਦ੍ਧੋਤਿ ‘‘ਦਿਵਸਂ ਚਙ੍ਕਮੇਨ ਨਿਸਜ੍ਜਾਯਾ’’ਤਿਆਦਿਨਾ ਵੁਤ੍ਤਜਾਗਰਿਯਾਨੁਯੋਗੇਨ ਨਿਦ੍ਦਾਰਹਿਤੋ ਅਸ੍ਸ. ਅਨੁਦ੍ਧਤੋਤਿ ਭਸ੍ਸਾਰਾਮਤਾਯ ਉਪ੍ਪਜ੍ਜਨਕਚਿਤ੍ਤਵਿਕ੍ਖੇਪਸ੍ਸ ਅਭਸ੍ਸਾਰਾਮੋ ਹੁਤ੍ਵਾ ਪਰਿਵਜ੍ਜਨੇਨ ਨ ਉਦ੍ਧਤੋ ਵੂਪਸਨ੍ਤਚਿਤ੍ਤੋ, ਸਮਾਹਿਤੋਤਿ ਅਤ੍ਥੋ. ਸੇਸਂ ਪੁਬ੍ਬੇ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ. ਇਤਿ ਇਮਸ੍ਮਿਂ ਵਗ੍ਗੇ ਪਠਮਦੁਤਿਯਪਞ੍ਚਮਛਟ੍ਠਸਤ੍ਤਮਅਟ੍ਠਮਨਵਮੇਸੁ ਸੁਤ੍ਤੇਸੁ ਵਟ੍ਟਂ ਕਥਿਤਂ, ਇਤਰੇਸੁ ਵਟ੍ਟਵਿਵਟ੍ਟਂ.