੯. ਸਨ੍ਤਕਾਯਤ੍ਥੇਰਵਤ੍ਥੁ

ਸਨ੍ਤਕਾਯੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਨ੍ਤਕਾਯਤ੍ਥੇਰਂ ਨਾਮ ਆਰਬ੍ਭ ਕਥੇਸਿ.

ਤਸ੍ਸ ਕਿਰ ਹਤ੍ਥਪਾਦਕੁਕ੍ਕੁਚ੍ਚਂ ਨਾਮ ਨਾਹੋਸਿ, ਕਾਯਵਿਜਮ੍ਭਨਰਹਿਤੋ ਸਨ੍ਤਅਤ੍ਤਭਾਵੋਵ ਅਹੋਸਿ. ਸੋ ਕਿਰ ਸੀਹਯੋਨਿਤੋ ਆਗਤੋ ਥੇਰੋ. ਸੀਹਾ ਕਿਰ ਏਕਦਿਵਸਂ ਗੋਚਰਂ ਗਹੇਤ੍ਵਾ ਰਜਤਸੁਵਣ੍ਣਮਣਿਪਵਾਲ਼ਗੁਹਾਨਂ ਅਞ੍ਞਤਰਂ ਪਵਿਸਿਤ੍ਵਾ ਮਨੋਸਿਲਾਤਲੇ ਹਰਿਤਾਲਚੁਣ੍ਣੇਸੁ ਸਤ੍ਤਾਹਂ ਨਿਪਜ੍ਜਿਤ੍ਵਾ ਸਤ੍ਤਮੇ ਦਿਵਸੇ ਉਟ੍ਠਾਯ ਨਿਪਨ੍ਨਟ੍ਠਾਨਂ ਓਲੋਕੇਤ੍ਵਾ ਸਚੇ ਨਙ੍ਗੁਟ੍ਠਸ੍ਸ ਵਾ ਕਣ੍ਣਾਨਂ ਵਾ ਹਤ੍ਥਪਾਦਾਨਂ ਵਾ ਚਲਿਤਤ੍ਤਾ ਮਨੋਸਿਲਾਹਰਿਤਾਲਚੁਣ੍ਣਾਨਂ ਵਿਪ੍ਪਕਿਣ੍ਣਤਂ ਪਸ੍ਸਨ੍ਤਿ, ‘‘ਨ ਤੇ ਇਦਂ ਜਾਤਿਯਾ ਵਾ ਗੋਤ੍ਤਸ੍ਸ ਵਾ ਪਤਿਰੂਪ’’ਨ੍ਤਿ ਪੁਨ ਸਤ੍ਤਾਹਂ ਨਿਰਾਹਾਰਾ ਨਿਪਜ੍ਜਨ੍ਤਿ, ਚੁਣ੍ਣਾਨਂ ਪਨ ਵਿਪ੍ਪਕਿਣ੍ਣਭਾਵੇ ਅਸਤਿ ‘‘ਇਦਂ ਤੇ ਜਾਤਿਗੋਤ੍ਤਾਨਂ ਅਨੁਚ੍ਛਵਿਕ’’ਨ੍ਤਿ ਆਸਯਾ ਨਿਕ੍ਖਮਿਤ੍ਵਾ ਵਿਜਮ੍ਭਿਤ੍ਵਾ ਦਿਸਾ ਅਨੁਵਿਲੋਕੇਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਗੋਚਰਾਯ ਪਕ੍ਕਮਨ੍ਤਿ. ਏਵਰੂਪਾਯ ਸੀਹਯੋਨਿਯਾ ਆਗਤੋ ਅਯਂ ਭਿਕ੍ਖੁ. ਤਸ੍ਸ ਕਾਯਸਮਾਚਾਰਂ ਦਿਸ੍ਵਾ ਭਿਕ੍ਖੂ ਸਤ੍ਥੁ ਆਰੋਚੇਸੁਂ – ‘‘ਨ ਨੋ, ਭਨ੍ਤੇ, ਸਨ੍ਤਕਾਯਤ੍ਥੇਰਸਦਿਸੋ ਭਿਕ੍ਖੁ ਦਿਟ੍ਠਪੁਬ੍ਬੋ. ਇਮਸ੍ਸ ਹਿ ਨਿਸਿਨ੍ਨਟ੍ਠਾਨੇ ਹਤ੍ਥਚਲਨਂ ਵਾ ਪਾਦਚਲਨਂ ਵਾ ਕਾਯਵਿਜਮ੍ਭਿਤਾ ਵਾ ਨਤ੍ਥੀ’’ਤਿ. ਤਂ ਸੁਤ੍ਵਾ ਸਤ੍ਥਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਸਨ੍ਤਕਾਯਤ੍ਥੇਰੇਨ ਵਿਯ ਕਾਯਾਦੀਹਿ ਉਪਸਨ੍ਤੇਨੇਵ ਭਵਿਤਬ੍ਬ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

੩੭੮. ‘‘ਸਨ੍ਤਕਾਯੋ ਸਨ੍ਤਵਾਚੋ, ਸਨ੍ਤਵਾ ਸੁਸਮਾਹਿਤੋ;

ਵਨ੍ਤਲੋਕਾਮਿਸੋ ਭਿਕ੍ਖੁ, ਉਪਸਨ੍ਤੋਤਿ ਵੁਚ੍ਚਤੀ’’ਤਿ.

ਤਤ੍ਥ ਸਨ੍ਤਕਾਯੋਤਿ ਪਾਣਾਤਿਪਾਤਾਦੀਨਂ ਅਭਾਵੇਨ ਸਨ੍ਤਕਾਯੋ, ਮੁਸਾਵਾਦਾਦੀਨਂ ਅਭਾਵੇਨ ਸਨ੍ਤਵਾਚੋ, ਅਭਿਜ੍ਝਾਦੀਨਂ ਅਭਾਵੇਨ ਸਨ੍ਤਵਾ, ਕਾਯਾਦੀਨਂ ਤਿਣ੍ਣਮ੍ਪਿ ਸੁਟ੍ਠੁ ਸਮਾਹਿਤਤ੍ਤਾ ਸੁਸਮਾਹਿਤੋ, ਚਤੂਹਿ ਮਗ੍ਗੇਹਿ ਲੋਕਾਮਿਸਸ੍ਸ ਵਨ੍ਤਤਾਯ ਵਨ੍ਤਲੋਕਾਮਿਸੋ ਭਿਕ੍ਖੁ ਅਬ੍ਭਨ੍ਤਰੇ ਰਾਗਾਦੀਨਂ ਉਪਸਨ੍ਤਤਾਯ ਉਪਸਨ੍ਤੋਤਿ ਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਸੋ ਥੇਰੋ ਅਰਹਤ੍ਤੇ ਪਤਿਟ੍ਠਹਿ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਸਨ੍ਤਕਾਯਤ੍ਥੇਰਵਤ੍ਥੁ ਨਵਮਂ.