੧੦. ਨਙ੍ਗਲਕੁਲਤ੍ਥੇਰਵਤ੍ਥੁ

ਅਤ੍ਤਨਾ ਚੋਦਯਤ੍ਤਾਨਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨਙ੍ਗਲਕੁਲਤ੍ਥੇਰਂ ਆਰਬ੍ਭ ਕਥੇਸਿ.

ਏਕੋ ਕਿਰ ਦੁਗ੍ਗਤਮਨੁਸ੍ਸੋ ਪਰੇਸਂ ਭਤਿਂ ਕਤ੍ਵਾ ਜੀਵਤਿ, ਤਂ ਏਕੋ ਭਿਕ੍ਖੁ ਪਿਲੋਤਿਕਖਣ੍ਡਨਿਵਤ੍ਥਂ ਨਙ੍ਗਲਂ ਉਕ੍ਖਿਪਿਤ੍ਵਾ ਗਚ੍ਛਨ੍ਤਂ ਦਿਸ੍ਵਾ ਏਵਮਾਹ – ‘‘ਕਿਂ ਪਨ ਤੇ ਏਵਂ ਜੀਵਨਤੋ ਪਬ੍ਬਜਿਤੁਂ ਨ ਵਰ’’ਨ੍ਤਿ. ਕੋ ਮਂ, ਭਨ੍ਤੇ, ਏਵਂ ਜੀਵਨ੍ਤਂ ਪਬ੍ਬਾਜੇਸ੍ਸਤੀਤਿ? ਸਚੇ ਪਬ੍ਬਜਿਸ੍ਸਸਿ, ਅਹਂ ਤਂ ਪਬ੍ਬਾਜੇਸ੍ਸਾਮੀਤਿ. ਸਾਧੁ ਭਨ੍ਤੇ, ਸਚੇ ਮਂ ਪਬ੍ਬਾਜੇਸ੍ਸਥ, ਪਬ੍ਬਜਿਸ੍ਸਾਮੀਤਿ. ਅਥ ਨਂ ਸੋ ਥੇਰੋ ਜੇਤਵਨਂ ਨੇਤ੍ਵਾ ਸਹਤ੍ਥੇਨ, ਨ੍ਹਾਪੇਤ੍ਵਾ ਮਾਲ਼ਕੇ ਠਪੇਤ੍ਵਾ ਪਬ੍ਬਾਜੇਤ੍ਵਾ ਨਿਵਤ੍ਥਪਿਲੋਤਿਕਖਣ੍ਡੇਨ ਸਦ੍ਧਿਂ ਨਙ੍ਗਲਂ ਮਾਲ਼ਕਸੀਮਾਯਮੇਵ ਰੁਕ੍ਖਸਾਖਾਯਂ ਠਪਾਪੇਸਿ. ਸੋ ਉਪਸਮ੍ਪਨ੍ਨਕਾਲੇਪਿ ਨਙ੍ਗਲਕੁਲਤ੍ਥੇਰੋਤ੍ਵੇਵ ਪਞ੍ਞਾਯਿ. ਸੋ ਬੁਦ੍ਧਾਨਂ ਉਪ੍ਪਨ੍ਨਲਾਭਸਕ੍ਕਾਰਂ ਨਿਸ੍ਸਾਯ ਜੀਵਨ੍ਤੋ ਉਕ੍ਕਣ੍ਠਿਤ੍ਵਾ ਉਕ੍ਕਣ੍ਠਿਤਂ ਵਿਨੋਦੇਤੁਂ ਅਸਕ੍ਕੋਨ੍ਤੋ ‘‘ਨ ਦਾਨਿ ਸਦ੍ਧਾਦੇਯ੍ਯਾਨਿ ਕਾਸਾਯਾਨਿ ਪਰਿਦਹਿਤ੍ਵਾ ਗਮਿਸ੍ਸਾਮੀ’’ਤਿ ਤਂ ਰੁਕ੍ਖਮੂਲਂ ਗਨ੍ਤ੍ਵਾ ਅਤ੍ਤਨਾਵ ਅਤ੍ਤਾਨਂ ਓਵਦਿ – ‘‘ਅਹਿਰਿਕ, ਨਿਲ੍ਲਜ੍ਜ, ਇਦਂ ਨਿਵਾਸੇਤ੍ਵਾ ਵਿਬ੍ਭਮਿਤ੍ਵਾ ਭਤਿਂ ਕਤ੍ਵਾ ਜੀਵਿਤੁਕਾਮੋ ਜਾਤੋ’’ਤਿ. ਤਸ੍ਸੇਵਂ ਅਤ੍ਤਾਨਂ ਓਵਦਨ੍ਤਸ੍ਸੇਵ ਚਿਤ੍ਤਂ ਤਨੁਕਭਾਵਂ ਗਤਂ. ਸੋ ਨਿਵਤ੍ਤਿਤ੍ਵਾ ਪੁਨ ਕਤਿਪਾਹਚ੍ਚਯੇਨ ਉਕ੍ਕਣ੍ਠਿਤ੍ਵਾ ਤਥੇਵ ਅਤ੍ਤਾਨਂ ਓਵਦਿ, ਪੁਨਸ੍ਸ ਚਿਤ੍ਤਂ ਨਿਵਤ੍ਤਿ. ਸੋ ਇਮਿਨਾਵ ਨੀਹਾਰੇਨ ਉਕ੍ਕਣ੍ਠਿਤਉਕ੍ਕਣ੍ਠਿਤਕਾਲੇ ਤਤ੍ਥ ਗਨ੍ਤ੍ਵਾ ਅਤ੍ਤਾਨਂ ਓਵਦਿ. ਅਥ ਨਂ ਭਿਕ੍ਖੂ ਤਤ੍ਥ ਅਭਿਣ੍ਹਂ ਗਚ੍ਛਨ੍ਤਂ ਦਿਸ੍ਵਾ, ‘‘ਆਵੁਸੋ, ਨਙ੍ਗਲਤ੍ਥੇਰ ਕਸ੍ਮਾ ਏਤ੍ਥ ਗਚ੍ਛਸੀ’’ਤਿ ਪੁਚ੍ਛਿਂਸੁ. ਸੋ ‘‘ਆਚਰਿਯਸ੍ਸ ਸਨ੍ਤਿਕਂ ਗਚ੍ਛਾਮਿ, ਭਨ੍ਤੇ’’ਤਿ ਵਤ੍ਵਾ ਕਤਿਪਾਹੇਨੇਵ ਅਰਹਤ੍ਤਂ ਪਾਪੁਣਿ.

ਭਿਕ੍ਖੂ ਤੇਨ ਸਦ੍ਧਿਂ ਕੇਲ਼ਿਂ ਕਰੋਨ੍ਤਾ ਆਹਂਸੁ – ‘‘ਆਵੁਸੋ ਨਙ੍ਗਲਤ੍ਥੇਰ, ਤਵ ਵਿਚਰਣਮਗ੍ਗੋ ਅਵਲ਼ਞ੍ਜੋ ਵਿਯ ਜਾਤੋ, ਆਚਰਿਯਸ੍ਸ ਸਨ੍ਤਿਕਂ ਨ ਗਚ੍ਛਸਿ ਮਞ੍ਞੇ’’ਤਿ. ਆਮ, ਭਨ੍ਤੇ, ਮਯਂ ਸਂਸਗ੍ਗੇ ਸਤਿ ਅਗਮਿਮ੍ਹਾ, ਇਦਾਨਿ ਪਨ ਸੋ ਸਂਸਗ੍ਗੋ ਛਿਨ੍ਨੋ, ਤੇਨ ਨ ਗਚ੍ਛਾਮਾਤਿ. ਤਂ ਸੁਤ੍ਵਾ ਭਿਕ੍ਖੂ ‘‘ਏਸ ਅਭੂਤਂ ਵਤ੍ਵਾ ਅਞ੍ਞਂ ਬ੍ਯਾਕਰੋਤੀ’’ਤਿ ਸਤ੍ਥੁ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ ‘‘ਆਮ, ਭਿਕ੍ਖਵੇ, ਮਮ ਪੁਤ੍ਤੋ ਅਤ੍ਤਨਾਵ ਅਤ੍ਤਾਨਂ ਚੋਦੇਤ੍ਵਾ ਪਬ੍ਬਜਿਤਕਿਚ੍ਚਸ੍ਸ ਮਤ੍ਥਕਂ ਪਤ੍ਤੋ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੭੯. ‘‘ਅਤ੍ਤਨਾ ਚੋਦਯਤ੍ਤਾਨਂ, ਪਟਿਮਂਸੇਥ ਅਤ੍ਤਨਾ;

ਸੋ ਅਤ੍ਤਗੁਤ੍ਤੋ ਸਤਿਮਾ, ਸੁਖਂ ਭਿਕ੍ਖੁ ਵਿਹਾਹਿਸਿ.

੩੮੦. ‘‘ਅਤ੍ਤਾ ਹਿ ਅਤ੍ਤਨੋ ਨਾਥੋ, ਕੋ ਹਿ ਨਾਥੋ ਪਰੋ ਸਿਯਾ;

ਅਤ੍ਤਾ ਹਿ ਅਤ੍ਤਨੋ ਗਤਿ;

ਤਸ੍ਮਾ ਸਂਯਮਮਤ੍ਤਾਨਂ, ਅਸ੍ਸਂ ਭਦ੍ਰਂਵ ਵਾਣਿਜੋ’’ਤਿ.

ਤਤ੍ਥ ਚੋਦਯਤ੍ਤਾਨਨ੍ਤਿ ਅਤ੍ਤਨਾਵ ਅਤ੍ਤਾਨਂ ਚੋਦਯ ਸਾਰਯ. ਪਟਿਮਂਸੇਥਾਤਿ ਅਤ੍ਤਨਾਵ ਅਤ੍ਤਾਨਂ ਪਰਿਵੀਮਂਸਥ. ਸੋਤਿ ਸੋ ਤ੍ਵਂ, ਭਿਕ੍ਖੁ, ਏਵਂ ਸਨ੍ਤੇ ਅਤ੍ਤਨਾਵ ਗੁਤ੍ਤਤਾਯ ਅਤ੍ਤਗੁਤ੍ਤੋ, ਉਪਟ੍ਠਿਤਸਤਿਤਾਯ ਸਤਿਮਾ ਹੁਤ੍ਵਾ ਸਬ੍ਬਿਰਿਯਾਪਥੇਸੁ ਸੁਖਂ ਵਿਹਰਿਸ੍ਸਸੀਤਿ ਅਤ੍ਥੋ.

ਨਾਥੋਤਿ ਅਵਸ੍ਸਯੋ ਪਤਿਟ੍ਠਾ. ਕੋ ਹਿ ਨਾਥੋ ਪਰੋਤਿ ਯਸ੍ਮਾ ਪਰਸ੍ਸ ਅਤ੍ਤਭਾਵੇ ਪਤਿਟ੍ਠਾਯ ਕੁਸਲਂ ਵਾ ਕਤ੍ਵਾ ਸਗ੍ਗਪਰਾਯਣੇਨ ਮਗ੍ਗਂ ਵਾ ਭਾਵੇਤ੍ਵਾ ਸਚ੍ਛਿਕਤਫਲੇਨ ਭਵਿਤੁਂ ਨ ਸਕ੍ਕਾ, ਤਸ੍ਮਾ ਕੋ ਹਿ ਨਾਮ ਪਰੋ ਨਾਥੋ ਭਵੇਯ੍ਯਾਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਅਤ੍ਤਾਵ ਅਤ੍ਤਨੋ ਗਤਿ ਪਤਿਟ੍ਠਾ ਸਰਣਂ, ਤਸ੍ਮਾ ਯਥਾ ਭਦ੍ਰਂ ਅਸ੍ਸਾਜਾਨੀਯਂ ਨਿਸ੍ਸਾਯ ਲਾਭਂ ਪਤ੍ਥਯਨ੍ਤੋ ਵਾਣਿਜੋ ਤਸ੍ਸ ਵਿਸਮਟ੍ਠਾਨਚਾਰਂ ਪਚ੍ਛਿਨ੍ਦਿਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਨਹਾਪੇਨ੍ਤੋ ਭੋਜੇਨ੍ਤੋ ਸਂਯਮੇਤਿ ਪਟਿਜਗ੍ਗਤਿ, ਏਵਂ ਤ੍ਵਮ੍ਪਿ ਅਨੁਪ੍ਪਨ੍ਨਸ੍ਸ ਅਕੁਸਲਸ੍ਸ ਉਪ੍ਪਾਦਂ ਨਿਵਾਰੇਨ੍ਤੋ ਸਤਿਸਮ੍ਮੋਸੇਨ ਉਪ੍ਪਨ੍ਨਂ ਅਕੁਸਲਂ ਪਜਹਨ੍ਤੋ ਅਤ੍ਤਾਨਂ ਸਂਯਮ ਗੋਪਯ, ਏਵਂ ਸਨ੍ਤੇ ਪਠਮਜ੍ਝਾਨਂ ਆਦਿਂ ਕਤ੍ਵਾ ਲੋਕਿਯਲੋਕੁਤ੍ਤਰਵਿਸੇਸਂ ਅਧਿਗਮਿਸ੍ਸਸੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਨਙ੍ਗਲਕੁਲਤ੍ਥੇਰਵਤ੍ਥੁ ਦਸਮਂ.