੮. ਪਞ੍ਚਸਤਭਿਕ੍ਖੁਵਤ੍ਥੁ

ਵਸ੍ਸਿਕਾ ਵਿਯ ਪੁਪ੍ਫਾਨੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਞ੍ਚਸਤੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇ ਕਿਰ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞੇ ਸਮਣਧਮ੍ਮਂ ਕਰੋਨ੍ਤਾ ਪਾਤੋਵ ਪੁਪ੍ਫਿਤਾਨਿ ਵਸ੍ਸਿਕਪੁਪ੍ਫਾਨਿ ਸਾਯਂ ਵਣ੍ਟਤੋ ਮੁਚ੍ਚਨ੍ਤਾਨਿ ਦਿਸ੍ਵਾ ‘‘ਪੁਪ੍ਫਾਨਂ ਵਣ੍ਟੇਹਿ ਮੁਚ੍ਚਨਤੋ ਮਯਂ ਪਠਮਤਰਂ ਰਾਗਾਦੀਹਿ ਮੁਚ੍ਚਿਸ੍ਸਾਮਾ’’ਤਿ ਵਾਯਮਿਂਸੁ. ਸਤ੍ਥਾ ਤੇ ਭਿਕ੍ਖੂ ਓਲੋਕੇਤ੍ਵਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਵਣ੍ਟਤੋ ਮੁਚ੍ਚਨਪੁਪ੍ਫੇਨ ਵਿਯ ਦੁਕ੍ਖਤੋ ਮੁਚ੍ਚਿਤੁਂ ਵਾਯਮਿਤਬ੍ਬਮੇਵਾ’’ਤਿ ਵਤ੍ਵਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਆਲੋਕਂ ਫਰਿਤ੍ਵਾ ਇਮਂ ਗਾਥਮਾਹ –

੩੭੭. ‘‘ਵਸ੍ਸਿਕਾ ਵਿਯ ਪੁਪ੍ਫਾਨਿ, ਮਦ੍ਦਵਾਨਿ ਪਮੁਞ੍ਚਤਿ;

ਏਵਂ ਰਾਗਞ੍ਚ ਦੋਸਞ੍ਚ, ਵਿਪ੍ਪਮੁਞ੍ਚੇਥ ਭਿਕ੍ਖਵੋ’’ਤਿ.

ਤਤ੍ਥ ਵਸ੍ਸਿਕਾਤਿ ਸੁਮਨਾ. ਮਦ੍ਦਵਾਨੀਤਿ ਮਿਲਾਤਾਨਿ. ਇਦਂ ਵੁਤ੍ਤਂ ਹੋਤਿ – ਯਥਾ ਵਸ੍ਸਿਕਾ ਹਿਯ੍ਯੋ ਪੁਪ੍ਫਿਤਪੁਪ੍ਫਾਨਿ ਪੁਨਦਿਵਸੇ ਪੁਰਾਣਭੂਤਾਨਿ ਮੁਞ੍ਚਤਿ, ਵਣ੍ਟਤੋ ਵਿਸ੍ਸਜ੍ਜੇਤਿ, ਏਵਂ ਤੁਮ੍ਹੇਪਿ ਰਾਗਾਦਯੋ ਦੋਸੇ ਵਿਪ੍ਪਮੁਞ੍ਚੇਥਾਤਿ.

ਦੇਸਨਾਵਸਾਨੇ ਸਬ੍ਬੇਪਿ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੂਤਿ.

ਪਞ੍ਚਸਤਭਿਕ੍ਖੁਵਤ੍ਥੁ ਅਟ੍ਠਮਂ.