੭. ਸਮ੍ਬਹੁਲਭਿਕ੍ਖੁਵਤ੍ਥੁ

ਮੇਤ੍ਤਾਵਿਹਾਰੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਆਯਸ੍ਮਨ੍ਤੇ ਮਹਾਕਚ੍ਚਾਨੇ ਅਵਨ੍ਤਿਜਨਪਦੇ ਕੁਰਰਘਰਂ ਨਿਸ੍ਸਾਯ ਪਵਤ੍ਤਪਬ੍ਬਤੇ ਵਿਹਰਨ੍ਤੇ ਸੋਣੋ ਨਾਮ ਕੋਟਿਕਣ੍ਣੋ ਉਪਾਸਕੋ ਥੇਰਸ੍ਸ ਧਮ੍ਮਕਥਾਯ ਪਸੀਦਿਤ੍ਵਾ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤੁਕਾਮੋ ਥੇਰੇਨ ‘‘ਦੁਕ੍ਕਰਂ ਖੋ, ਸੋਣ, ਯਾਵਜੀਵਂ ਏਕਭਤ੍ਤਂ ਏਕਸੇਯ੍ਯਂ ਬ੍ਰਹ੍ਮਚਰਿਯ’’ਨ੍ਤਿ ਵਤ੍ਵਾ ਦ੍ਵੇ ਵਾਰੇ ਪਟਿਕ੍ਖਿਤ੍ਤੋਪਿ ਪਬ੍ਬਜ੍ਜਾਯ ਅਤਿਵਿਯ ਉਸ੍ਸਾਹਜਾਤੋ ਤਤਿਯਵਾਰੇ ਥੇਰਂ ਯਾਚਿਤ੍ਵਾ ਪਬ੍ਬਜਿਤ੍ਵਾ ਅਪ੍ਪਭਿਕ੍ਖੁਕਤ੍ਤਾ ਦਕ੍ਖਿਣਾਪਥੇ ਤਿਣ੍ਣਂ ਵਸ੍ਸਾਨਂ ਅਚ੍ਚਯੇਨ ਲਦ੍ਧੂਪਸਮ੍ਪਦੋ ਸਤ੍ਥਾਰਂ ਸਮ੍ਮੁਖਾ ਦਟ੍ਠੁਕਾਮੋ ਹੁਤ੍ਵਾ ਉਪਜ੍ਝਾਯਂ ਆਪੁਚ੍ਛਿਤ੍ਵਾ ਤੇਨ ਦਿਨ੍ਨਂ ਸਾਸਨਂ ਗਹੇਤ੍ਵਾ ਅਨੁਪੁਬ੍ਬੇਨ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ਸਤ੍ਥਾਰਾ ਏਕਗਨ੍ਧਕੁਟਿਯਂਯੇਵ ਅਨੁਞ੍ਞਾਤਸੇਨਾਸਨੋ ਬਹੁਦੇਵ ਰਤ੍ਤਿਂ ਅਜ੍ਝੋਕਾਸੇ ਵੀਥਿਨਾਮੇਤ੍ਵਾ ਰਤ੍ਤਿਭਾਗੇ ਗਨ੍ਧਕੁਟਿਂ ਪਵਿਸਿਤ੍ਵਾ ਅਤ੍ਤਨੋ ਪਤ੍ਤਸੇਨਾਸਨੇ ਤਂ ਰਤ੍ਤਿਭਾਗਂ ਵੀਤਿਨਾਮੇਤ੍ਵਾ ਪਚ੍ਚੂਸਸਮਯੇ ਸਤ੍ਥਾਰਾ ਅਜ੍ਝਿਟ੍ਠੋ ਸੋਲ਼ਸ ਅਟ੍ਠਕਵਗ੍ਗਿਕਾਨਿ (ਸੁ. ਨਿ. ੭੭੨ ਆਦਯੋ) ਸਬ੍ਬਾਨੇਵ ਸਰਭਞ੍ਞੇਨ ਅਭਣਿ. ਅਥਸ੍ਸ ਭਗਵਾ ਸਰਭਞ੍ਞਪਰਿਯੋਸਾਨੇ ਅਬ੍ਭਾਨੁਮੋਦੇਨ੍ਤੋ – ‘‘ਸਾਧੁ ਸਾਧੁ, ਭਿਕ੍ਖੂ’’ਤਿ ਸਾਧੁਕਾਰਂ ਅਦਾਸਿ. ਸਤ੍ਥਾਰਾ ਦਿਨ੍ਨਸਾਧੁਕਾਰਂ ਸੁਤ੍ਵਾ ਭੂਮਟ੍ਠਕਦੇਵਾ ਨਾਗਾ ਸੁਪਣ੍ਣਾਤਿ ਏਵਂ ਯਾਵ ਬ੍ਰਹ੍ਮਲੋਕਾ ਏਕਸਾਧੁਕਾਰਮੇਵ ਅਹੋਸਿ.

ਤਸ੍ਮਿਂ ਖਣੇ ਜੇਤਵਨਤੋ ਵੀਸਯੋਜਨਸਤਮਤ੍ਥਕੇ ਕੁਰਰਘਰਨਗਰੇ ਥੇਰਸ੍ਸ ਮਾਤੁ ਮਹਾਉਪਾਸਿਕਾਯ ਗੇਹੇ ਅਧਿਵਤ੍ਥਾ ਦੇਵਤਾਪਿ ਮਹਨ੍ਤੇਨ ਸਦ੍ਦੇਨ ਸਾਧੁਕਾਰਮਦਾਸਿ. ਅਥ ਨਂ ਉਪਾਸਿਕਾ ਆਹ – ‘‘ਕੋ ਏਸ ਸਾਧੁਕਾਰਂ ਦੇਤੀ’’ਤਿ? ਅਹਂ, ਭਗਿਨੀਤਿ. ਕੋਸਿ ਤ੍ਵਨ੍ਤਿ? ਤਵ ਗੇਹੇ ਅਧਿਵਤ੍ਥਾ, ਦੇਵਤਾਤਿ. ਤ੍ਵਂ ਇਤੋ ਪੁਬ੍ਬੇ ਮਯ੍ਹਂ ਸਾਧੁਕਾਰਂ ਅਦਤ੍ਵਾ ਅਜ੍ਜ ਕਸ੍ਮਾ ਦੇਸੀਤਿ? ਨਾਹਂ ਤੁਯ੍ਹਂ ਸਾਧੁਕਾਰਂ ਦਮ੍ਮੀਤਿ. ਅਥ ਕਸ੍ਸ ਤੇ ਸਾਧੁਕਾਰੋ ਦਿਨ੍ਨੋਤਿ? ਤਵ ਪੁਤ੍ਤਸ੍ਸ ਕੋਟਿਕਣ੍ਣਸ੍ਸ ਸੋਣਤ੍ਥੇਰਸ੍ਸਾਤਿ. ਕਿਂ ਮੇ ਪੁਤ੍ਤੇਨ ਕਤਨ੍ਤਿ? ਪੁਤ੍ਤੋ ਤੇ ਅਜ੍ਜ ਸਤ੍ਥਾਰਾ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਿਤ੍ਵਾ ਧਮ੍ਮਂ ਦੇਸੇਸਿ, ਸਤ੍ਥਾ ਤਵ ਪੁਤ੍ਤਸ੍ਸ ਧਮ੍ਮਂ ਸੁਤ੍ਵਾ ਪਸਨ੍ਨੋ ਸਾਧੁਕਾਰਮਦਾਸਿ. ਤੇਨਸ੍ਸ ਮਯਾਪਿ ਸਾਧੁਕਾਰੋ ਦਿਨ੍ਨੋ. ਸਮ੍ਮਾਸਮ੍ਬੁਦ੍ਧਸ੍ਸ ਹਿ ਸਾਧੁਕਾਰਂ ਸਮ੍ਪਟਿਚ੍ਛਿਤ੍ਵਾ ਭੂਮਟ੍ਠਕਦੇਵੇ ਆਦਿਂ ਕਤ੍ਵਾ ਯਾਵ ਬ੍ਰਹ੍ਮਲੋਕਾ ਏਕਸਾਧੁਕਾਰਮੇਵ ਜਾਤਨ੍ਤਿ. ਕਿਂ ਪਨ, ਸਾਮਿ, ਮਮ ਪੁਤ੍ਤੇਨ ਸਤ੍ਥੁ ਧਮ੍ਮੋ ਕਥਿਤੋ, ਸਤ੍ਥਾਰਾ ਮਮ ਪੁਤ੍ਤਸ੍ਸ ਕਥਿਤੋਤਿ? ਤਵ ਪੁਤ੍ਤੇਨ ਸਤ੍ਥੁ ਕਥਿਤੋਤਿ. ਏਵਂ ਦੇਵਤਾਯ ਕਥੇਨ੍ਤਿਯਾਵ ਉਪਾਸਿਕਾਯ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿਤ੍ਵਾ ਸਕਲਸਰੀਰਂ ਫਰਿ.

ਅਥਸ੍ਸਾ ਏਤਦਹੋਸਿ – ‘‘ਸਚੇ ਮੇ ਪੁਤ੍ਤੋ ਸਤ੍ਥਾਰਾ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਿਤ੍ਵਾ ਸਤ੍ਥੁ ਧਮ੍ਮਂ ਕਥੇਤੁਂ ਸਕ੍ਖਿ, ਮਯ੍ਹਮ੍ਪਿ ਕਥੇਤੁਂ ਸਕ੍ਖਿਸ੍ਸਤਿਯੇਵ. ਪੁਤ੍ਤਸ੍ਸ ਆਗਤਕਾਲੇ ਧਮ੍ਮਸ੍ਸਵਨਂ ਕਾਰੇਤ੍ਵਾ ਧਮ੍ਮਕਥਂ ਸੁਣਿਸ੍ਸਾਮੀ’’ਤਿ. ਸੋਣਤ੍ਥੇਰੋਪਿ ਖੋ ਸਤ੍ਥਾਰਾ ਸਾਧੁਕਾਰੇ ਦਿਨ੍ਨੇ ‘‘ਅਯਂ ਮੇ ਉਪਜ੍ਝਾਯੇਨ ਦਿਨ੍ਨਸਾਸਨਂ ਆਰੋਚੇਤੁਂ ਕਾਲੋ’’ਤਿ ਭਗਵਨ੍ਤਂ ਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦਂ ਆਦਿਂ ਕਤ੍ਵਾ (ਮਹਾਵ. ੨੫੯) ਪਞ੍ਚ ਵਰੇ ਯਾਚਿਤ੍ਵਾ ਕਤਿਪਾਹਂ ਸਤ੍ਥੁ ਸਨ੍ਤਿਕੇਯੇਵ ਵਸਿਤ੍ਵਾ ‘‘ਉਪਜ੍ਝਾਯਂ ਪਸ੍ਸਿਸ੍ਸਾਮੀ’’ਤਿ ਸਤ੍ਥਾਰਂ ਆਪੁਚ੍ਛਿਤ੍ਵਾ ਜੇਤਵਨਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਉਪਜ੍ਝਾਯਸ੍ਸ ਸਨ੍ਤਿਕਂ ਅਗਮਾਸਿ.

ਥੇਰੋ ਪੁਨਦਿਵਸੇ ਤਂ ਆਦਾਯ ਪਿਣ੍ਡਾਯ ਚਰਨ੍ਤੋ ਮਾਤੁ ਉਪਾਸਿਕਾਯ ਗੇਹਦ੍ਵਾਰਂ ਅਗਮਾਸਿ. ਸਾਪਿ ਪੁਤ੍ਤਂ ਦਿਸ੍ਵਾ ਤੁਟ੍ਠਮਾਨਸਾ ਵਨ੍ਦਿਤ੍ਵਾ ਸਕ੍ਕਚ੍ਚਂ ਪਰਿਵਿਸਿਤ੍ਵਾ ਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਤਾਤ, ਸਤ੍ਥਾਰਾ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਿਤ੍ਵਾ ਸਤ੍ਥੁ ਧਮ੍ਮਕਥਂ ਕਥੇਸੀ’’ਤਿ. ‘‘ਉਪਾਸਿਕੇ, ਤੁਯ੍ਹਂ ਕੇਨ ਇਦਂ ਕਥਿਤ’’ਨ੍ਤਿ? ‘‘ਤਾਤ, ਇਮਸ੍ਮਿਂ ਗੇਹੇ ਅਧਿਵਤ੍ਥਾ ਦੇਵਤਾ ਮਹਨ੍ਤੇਨ ਸਦ੍ਦੇਨ ਸਾਧੁਕਾਰਂ ਦਤ੍ਵਾ ਮਯਾ ‘ਕੋ ਏਸੋ’ਤਿ ਵੁਤ੍ਤੇ ‘ਅਹ’ਨ੍ਤਿ ਵਤ੍ਵਾ ਏਵਞ੍ਚ ਏਵਞ੍ਚ ਕਥੇਸਿ. ਤਂ ਸੁਤ੍ਵਾ ਮਯ੍ਹਂ ਏਤਦਹੋਸਿ – ‘ਸਚੇ ਮੇ ਪੁਤ੍ਤੋ ਸਤ੍ਥੁ ਧਮ੍ਮਕਥਂ ਕਥੇਸਿ, ਮਯ੍ਹਮ੍ਪਿ ਕਥੇਤੁਂ ਸਕ੍ਖਿਸ੍ਸਤੀ’ਤਿ. ਅਥ ਨਂ ਆਹ – ‘ਤਾਤ, ਯਤੋ ਤਯਾ ਸਤ੍ਥੁ ਸਮ੍ਮੁਖਾ ਧਮ੍ਮੋ ਕਥਿਤੋ, ਮਯ੍ਹਮ੍ਪਿ ਕਥੇਤੁਂ ਸਕ੍ਖਿਸ੍ਸਸਿ ਏਵ. ਅਸੁਕਦਿਵਸੇ ਨਾਮ ਧਮ੍ਮਸ੍ਸਵਨਂ ਕਾਰੇਤ੍ਵਾ ਤਵ ਧਮ੍ਮਂ ਸੁਣਿਸ੍ਸਾਮਿ, ਤਾਤਾ’’’ਤਿ. ਸੋ ਅਧਿਵਾਸੇਸਿ. ਉਪਾਸਿਕਾ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਪੂਜਂ ਕਤ੍ਵਾ ‘‘ਪੁਤ੍ਤਸ੍ਸ ਮੇ ਧਮ੍ਮਕਥਂ ਸੁਣਿਸ੍ਸਾਮੀ’’ਤਿ ਏਕਮੇਵ ਦਾਸਿਂ ਗੇਹਰਕ੍ਖਿਕਂ ਠਪੇਤ੍ਵਾ ਸਬ੍ਬਂ ਪਰਿਜਨਂ ਆਦਾਯ ਅਨ੍ਤੋਨਗਰੇ ਧਮ੍ਮਸ੍ਸਵਨਤ੍ਥਾਯ ਕਾਰਿਤੇ ਮਣ੍ਡਪੇ ਅਲਙ੍ਕਤਧਮ੍ਮਾਸਨਂ ਅਭਿਰੁਯ੍ਹ ਧਮ੍ਮਂ ਦੇਸੇਨ੍ਤਸ੍ਸ ਪੁਤ੍ਤਸ੍ਸ ਧਮ੍ਮਕਥਂ ਸੋਤੁਂ ਅਗਮਾਸਿ.

ਤਸ੍ਮਿਂ ਪਨ ਕਾਲੇ ਨਵਸਤਾ ਚੋਰਾ ਤਸ੍ਸਾ ਉਪਾਸਿਕਾਯ ਗੇਹੇ ਓਤਾਰਂ ਓਲੋਕੇਨ੍ਤਾ ਵਿਚਰਨ੍ਤਿ. ਤਸ੍ਸਾ ਪਨ ਗੇਹਂ ਸਤ੍ਤਹਿ ਪਾਕਾਰੇਹਿ ਪਰਿਕ੍ਖਿਤ੍ਤਂ ਸਤ੍ਤਦ੍ਵਾਰਕੋਟ੍ਠਕਯੁਤ੍ਤਂ, ਤਤ੍ਥ ਤੇਸੁ ਤੇਸੁ ਠਾਨੇਸੁ ਚਣ੍ਡਸੁਨਖੇ ਬਨ੍ਧਿਤ੍ਵਾ ਠਪਯਿਂਸੁ. ਅਨ੍ਤੋਗੇਹੇ ਛਦਨਸ੍ਸ ਉਦਕਪਾਤਟ੍ਠਾਨੇ ਪਨ ਪਰਿਖਂ ਖਣਿਤ੍ਵਾ ਤਿਪੁਨਾ ਪੂਰਯਿਂਸੁ. ਤਂ ਦਿਵਾ ਆਤਪੇਨ ਵਿਲੀਨਂ ਪਕ੍ਕੁਥਿਤਂ ਵਿਯ ਤਿਟ੍ਠਤਿ, ਰਤ੍ਤਿਂ ਕਠਿਨਂ ਕਕ੍ਖਲ਼ਂ ਹੁਤ੍ਵਾ ਤਿਟ੍ਠਤਿ. ਤਸ੍ਸਾਨਨ੍ਤਰਾ ਮਹਨ੍ਤਾਨਿ ਅਯਸਙ੍ਘਾਟਕਾਨਿ ਨਿਰਨ੍ਤਰਂ ਭੂਮਿਯਂ ਓਦਹਿਂਸੁ. ਇਤਿ ਇਮਞ੍ਚਾਰਕ੍ਖਂ ਉਪਾਸਿਕਾਯ ਚ ਅਨ੍ਤੋਗੇਹੇ ਠਿਤਭਾਵਂ ਪਟਿਚ੍ਚ ਤੇ ਚੋਰਾ ਓਕਾਸਂ ਅਲਭਨ੍ਤਾ ਤਂ ਦਿਵਸਂ ਤਸ੍ਸਾ ਗਤਭਾਵਂ ਞਤ੍ਵਾ ਉਮਙ੍ਗਂ ਭਿਨ੍ਦਿਤ੍ਵਾ ਤਿਪੁਪਰਿਖਾਯ ਚ ਅਯਸਙ੍ਘਾਟਕਾਨਞ੍ਚ ਹੇਟ੍ਠਾਭਾਗੇਨੇਵ ਗੇਹਂ ਪਵਿਸਿਤ੍ਵਾ ਚੋਰਜੇਟ੍ਠਕਂ ਤਸ੍ਸਾ ਸਨ੍ਤਿਕਂ ਪਹਿਣਿਂਸੁ ‘‘ਸਚੇ ਸਾ ਅਮ੍ਹਾਕਂ ਇਧ ਪਵਿਟ੍ਠਭਾਵਂ ਸੁਤ੍ਵਾ ਨਿਵਤ੍ਤਿਤ੍ਵਾ ਗੇਹਾਭਿਮੁਖੀ ਆਗਚ੍ਛਤਿ, ਅਸਿਨਾ ਨਂ ਪਹਰਿਤ੍ਵਾ ਮਾਰੇਥਾ’’ਤਿ. ਸੋ ਗਨ੍ਤ੍ਵਾ ਤਸ੍ਸਾ ਸਨ੍ਤਿਕੇ ਅਟ੍ਠਾਸਿ.

ਚੋਰਾਪਿ ਅਨ੍ਤੋਗੇਹੇ ਦੀਪਂ ਜਾਲੇਤ੍ਵਾ ਕਹਾਪਣਗਬ੍ਭਦ੍ਵਾਰਂ ਵਿਵਰਿਂਸੁ. ਸਾ ਦਾਸੀ ਚੋਰੇ ਦਿਸ੍ਵਾ ਉਪਾਸਿਕਾਯ ਸਨ੍ਤਿਕਂ ਗਨ੍ਤ੍ਵਾ, ‘‘ਅਯ੍ਯੇ, ਬਹੂ ਚੋਰਾ ਗੇਹਂ ਪਵਿਸਿਤ੍ਵਾ ਕਹਾਪਣਗਬ੍ਭਦ੍ਵਾਰਂ ਵਿਵਰਿਂਸੂ’’ਤਿ ਆਰੋਚੇਸਿ. ‘‘ਚੋਰਾ ਅਤ੍ਤਨਾ ਦਿਟ੍ਠਕਹਾਪਣੇ ਹਰਨ੍ਤੁ, ਅਹਂ ਮਮ ਪੁਤ੍ਤਸ੍ਸ ਧਮ੍ਮਕਥਂ ਸੁਣਾਮਿ, ਮਾ ਮੇ ਧਮ੍ਮਸ੍ਸ ਅਨ੍ਤਰਾਯਂ ਕਰਿ, ਗੇਹਂ ਗਚ੍ਛਾ’’ਤਿ ਤਂ ਪਹਿਣਿ. ਚੋਰਾਪਿ ਕਹਾਪਣਗਬ੍ਭਂ ਤੁਚ੍ਛਂ ਕਤ੍ਵਾ ਰਜਤਗਬ੍ਭਂ ਵਿਵਰਿਂਸੁ. ਸਾ ਪੁਨਪਿ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ. ਉਪਾਸਿਕਾਪਿ ‘‘ਚੋਰਾ ਅਤ੍ਤਨਾ ਇਚ੍ਛਿਤਂ ਹਰਨ੍ਤੁ, ਮਾ ਮੇ ਅਨ੍ਤਰਾਯਂ ਕਰੀ’’ਤਿ ਪੁਨ ਤਂ ਪਹਿਣਿ. ਚੋਰਾ ਰਜਤਗਬ੍ਭਮ੍ਪਿ ਤੁਚ੍ਛਂ ਕਤ੍ਵਾ ਸੁਵਣ੍ਣਗਬ੍ਭਂ ਵਿਵਰਿਂਸੁ. ਸਾ ਪੁਨਪਿ ਗਨ੍ਤ੍ਵਾ ਉਪਾਸਿਕਾਯ ਤਮਤ੍ਥਂ ਆਰੋਚੇਸਿ. ਅਥ ਨਂ ਉਪਾਸਿਕਾ ਆਮਨ੍ਤੇਤ੍ਵਾ, ‘‘ਭੋਤਿ ਜੇ ਤ੍ਵਂ ਅਨੇਕਵਾਰਂ ਮਮ ਸਨ੍ਤਿਕਂ ਆਗਤਾ, ‘ਚੋਰਾ ਯਥਾਰੁਚਿਤਂ ਹਰਨ੍ਤੁ, ਅਹਂ ਮਮ ਪੁਤ੍ਤਸ੍ਸ ਧਮ੍ਮਕਥਂ ਸੁਣਾਮਿ, ਮਾ ਮੇ ਅਨ੍ਤਰਾਯਂ ਕਰੀ’ਤਿ ਮਯਾ ਵੁਤ੍ਤਾਪਿ ਮਮ ਕਥਂ ਅਨਾਦਿਯਿਤ੍ਵਾ ਪੁਨਪ੍ਪੁਨਂ ਆਗਚ੍ਛਸਿਯੇਵ. ਸਚੇ ਇਦਾਨਿ ਤ੍ਵਂ ਆਗਚ੍ਛਿਸ੍ਸਸਿ, ਜਾਨਿਸ੍ਸਾਮਿ ਤੇ ਕਤ੍ਤਬ੍ਬਂ, ਗੇਹਮੇਵ ਗਚ੍ਛਾ’’ਤਿ ਪਹਿਣਿ.

ਚੋਰਜੇਟ੍ਠਕੋ ਤਸ੍ਸਾ ਕਥਂ ਸੁਤ੍ਵਾ ‘‘ਏਵਰੂਪਾਯ ਇਤ੍ਥਿਯਾ ਸਨ੍ਤਕਂ ਹਰਨ੍ਤਾਨਂ ਅਸਨਿ ਪਤਿਤ੍ਵਾ ਮਤ੍ਥਕਂ ਭਿਨ੍ਦੇਯ੍ਯਾ’’ਤਿ ਚੋਰਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਸੀਘਂ ਉਪਾਸਿਕਾਯ ਸਨ੍ਤਕਂ ਪਟਿਪਾਕਤਿਕਂ ਕਰੋਥਾ’’ਤਿ ਆਹ. ਤੇ ਕਹਾਪਣੇਹਿ ਕਹਾਪਣਗਬ੍ਭਂ, ਰਜਤਸੁਵਣ੍ਣੇਹਿ ਰਜਤਸੁਵਣ੍ਣਗਬ੍ਭੇ ਪੁਨ ਪੂਰਯਿਂਸੁ. ਧਮ੍ਮਤਾ ਕਿਰੇਸਾ, ਯਂ ਧਮ੍ਮੋ ਧਮ੍ਮਚਾਰਿਨਂ ਰਕ੍ਖਤਿ. ਤੇਨੇਵਾਹ –

‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ,

ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ,

ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ’’ਤਿ. (ਥੇਰਗਾ. ੩੦੩; ਜਾ. ੧.੧੦.੧੦੨);

ਚੋਰਾਪਿ ਗਨ੍ਤ੍ਵਾ ਧਮ੍ਮਸ੍ਸਵਨਟ੍ਠਾਨੇ ਅਟ੍ਠਂਸੁ. ਥੇਰੋਪਿ ਧਮ੍ਮਂ ਕਥੇਤ੍ਵਾ ਵਿਭਾਤਾਯ ਰਤ੍ਤਿਯਾ ਆਸਨਾ ਓਤਰਿ. ਤਸ੍ਮਿਂ ਖਣੇ ਚੋਰਜੇਟ੍ਠਕੋ ਉਪਾਸਿਕਾਯ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਖਮਾਹਿ ਮੇ, ਅਯ੍ਯੇ’’ਤਿ ਆਹ. ‘‘ਕਿਂ ਇਦਂ, ਤਾਤਾ’’ਤਿ? ‘‘ਅਹਞ੍ਹਿ ਤੁਮ੍ਹੇਸੁ ਆਘਾਤਂ ਕਤ੍ਵਾ ਤੁਮ੍ਹੇ ਮਾਰੇਤੁਕਾਮੋ ਅਟ੍ਠਾਸਿ’’ਨ੍ਤਿ. ‘‘ਤੇਨ ਹਿ ਤੇ, ਤਾਤ, ਖਮਾਮੀ’’ਤਿ. ਸੇਸਚੋਰਾਪਿ ਤਥੇਵ ਵਤ੍ਵਾ, ‘‘ਤਾਤਾ, ਖਮਾਮੀ’’ਤਿ ਵੁਤ੍ਤੇ ਆਹਂਸੁ – ‘‘ਅਯ੍ਯੇ, ਸਚੇ ਨੋ ਖਮਥ, ਪੁਤ੍ਤਸ੍ਸ ਵੋ ਸਨ੍ਤਿਕੇ ਅਮ੍ਹਾਕਂ ਪਬ੍ਬਜ੍ਜਂ ਦਾਪੇਥਾ’’ਤਿ. ਸਾ ਪੁਤ੍ਤਂ ਵਨ੍ਦਿਤ੍ਵਾ ਆਹ – ‘‘ਤਾਤ, ਇਮੇ ਚੋਰਾ ਮਮ ਗੁਣੇਸੁ ਤੁਮ੍ਹਾਕਞ੍ਚ ਧਮ੍ਮਕਥਾਯ ਪਸਨ੍ਨਾ ਪਬ੍ਬਜ੍ਜਂ ਯਾਚਨ੍ਤਿ, ਪਬ੍ਬਾਜੇਥ ਨੇ’’ਤਿ. ਥੇਰੋ ‘‘ਸਾਧੂ’’ਤਿ ਵਤ੍ਵਾ ਤੇਹਿ ਨਿਵਤ੍ਥਵਤ੍ਥਾਨਂ ਦਸਾਨਿ ਛਿਨ੍ਦਾਪੇਤ੍ਵਾ ਤਮ੍ਬਮਤ੍ਤਿਕਾਯ ਰਜਾਪੇਤ੍ਵਾ ਤੇ ਪਬ੍ਬਾਜੇਤ੍ਵਾ ਸੀਲੇਸੁ ਪਤਿਟ੍ਠਾਪੇਸਿ. ਉਪਸਮ੍ਪਨ੍ਨਕਾਲੇ ਚ ਨੇਸਂ ਏਕੇਕਸ੍ਸ ਵਿਸੁਂ ਵਿਸੁਂ ਕਮ੍ਮਟ੍ਠਾਨਮਦਾਸਿ. ਤੇ ਨਵਸਤਾ ਭਿਕ੍ਖੂ ਵਿਸੁਂ ਵਿਸੁਂ ਨਵਸਤਕਮ੍ਮਟ੍ਠਾਨਾਨਿ ਗਹੇਤ੍ਵਾ ਏਕਂ ਪਬ੍ਬਤਂ ਅਭਿਰੁਯ੍ਹ ਤਸ੍ਸ ਤਸ੍ਸ ਰੁਕ੍ਖਸ੍ਸ ਛਾਯਾਯ ਨਿਸੀਦਿਤ੍ਵਾ ਸਮਣਧਮ੍ਮਂ ਕਰਿਂਸੁ.

ਸਤ੍ਥਾ ਵੀਸਯੋਜਨਸਤਮਤ੍ਥਕੇ ਜੇਤਵਨਮਹਾਵਿਹਾਰੇ ਨਿਸਿਨ੍ਨੋਵ ਤੇ ਭਿਕ੍ਖੂ ਓਲੋਕੇਤ੍ਵਾ ਤੇਸਂ ਚਰਿਯਵਸੇਨ ਧਮ੍ਮਦੇਸਨਂ ਵਵਤ੍ਥਾਪੇਤ੍ਵਾ ਓਭਾਸਂ ਫਰਿਤ੍ਵਾ ਸਮ੍ਮੁਖੇ ਨਿਸੀਦਿਤ੍ਵਾ ਕਥੇਨ੍ਤੋ ਵਿਯ ਇਮਾ ਗਾਥਾ ਅਭਾਸਿ –

੩੬੮. ‘‘ਮੇਤ੍ਤਾਵਿਹਾਰੀ ਯੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;

ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖਂ.

੩੬੯. ‘‘ਸਿਞ੍ਚ ਭਿਕ੍ਖੁ ਇਮਂ ਨਾਵਂ, ਸਿਤ੍ਤਾ ਤੇ ਲਹੁਮੇਸ੍ਸਤਿ;

ਛੇਤ੍ਵਾ ਰਾਗਞ੍ਚ ਦੋਸਞ੍ਚ, ਤਤੋ ਨਿਬ੍ਬਾਨਮੇਹਿਸਿ.

੩੭੦. ‘‘ਪਞ੍ਚ ਛਿਨ੍ਦੇ ਪਞ੍ਚ ਜਹੇ, ਪਞ੍ਚ ਚੁਤ੍ਤਰਿ ਭਾਵਯੇ;

ਪਞ੍ਚਸਙ੍ਗਾਤਿਗੋ ਭਿਕ੍ਖੁ, ਓਘਤਿਣ੍ਣੋਤਿ ਵੁਚ੍ਚਤਿ.

੩੭੧. ‘‘ਝਾਯ ਭਿਕ੍ਖੁ ਮਾ ਪਮਾਦੋ,

ਮਾ ਤੇ ਕਾਮਗੁਣੇ ਰਮੇਸ੍ਸੁ ਚਿਤ੍ਤਂ;

ਮਾ ਲੋਹਗੁਲ਼ਂ ਗਿਲੀ ਪਮਤ੍ਤੋ,

ਮਾ ਕਨ੍ਦੀ ਦੁਕ੍ਖਮਿਦਨ੍ਤਿ ਦਯ੍ਹਮਾਨੋ.

੩੭੨. ‘‘ਨਤ੍ਥਿ ਝਾਨਂ ਅਪਞ੍ਞਸ੍ਸ, ਪਞ੍ਞਾ ਨਤ੍ਥਿ ਅਝਾਯਤੋ;

ਯਮ੍ਹਿ ਝਾਨਞ੍ਚ ਪਞ੍ਞਾ ਚ, ਸ ਵੇ ਨਿਬ੍ਬਾਨਸਨ੍ਤਿਕੇ.

੩੭੩. ‘‘ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤੀ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

੩੭੪. ‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤਂ.

੩੭੫. ‘‘ਤਤ੍ਰਾਯਮਾਦਿ ਭਵਤਿ, ਇਧ ਪਞ੍ਞਸ੍ਸ ਭਿਕ੍ਖੁਨੋ;

ਇਨ੍ਦ੍ਰਿਯਗੁਤ੍ਤਿ ਸਨ੍ਤੁਟ੍ਠਿ, ਪਾਤਿਮੋਕ੍ਖੇ ਚ ਸਂਵਰੋ.

੩੭੬. ‘‘ਮਿਤ੍ਤੇ ਭਜਸ੍ਸੁ ਕਲ੍ਯਾਣੇ, ਸੁਦ੍ਧਾਜੀਵੇ ਅਤਨ੍ਦਿਤੇ;

ਪਟਿਸਨ੍ਥਾਰਵੁਤ੍ਯਸ੍ਸ, ਆਚਾਰਕੁਸਲੋ ਸਿਯਾ;

ਤਤੋ ਪਾਮੋਜ੍ਜਬਹੁਲੋ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’ਤਿ.

ਤਤ੍ਥ ਮੇਤ੍ਤਾਵਿਹਾਰੀਤਿ ਮੇਤ੍ਤਾਕਮ੍ਮਟ੍ਠਾਨੇ ਕਮ੍ਮਂ ਕਰੋਨ੍ਤੋਪਿ ਮੇਤ੍ਤਾਵਸੇਨ ਤਿਕਚਤੁਕ੍ਕਜ੍ਝਾਨੇ ਨਿਬ੍ਬਤ੍ਤੇਤ੍ਵਾ ਠਿਤੋਪਿ ਮੇਤ੍ਤਾਵਿਹਾਰੀਯੇਵ ਨਾਮ. ਪਸਨ੍ਨੋਤਿ ਯੋ ਪਨ ਬੁਦ੍ਧਸਾਸਨੇ ਪਸਨ੍ਨੋ ਹੋਤਿ, ਪਸਾਦਂ ਰੋਚੇਤਿਯੇਵਾਤਿ ਅਤ੍ਥੋ. ਪਦਂ ਸਨ੍ਤਨ੍ਤਿ ਨਿਬ੍ਬਾਨਸ੍ਸੇਤਂ ਨਾਮਂ. ਏਵਰੂਪੋ ਹਿ ਭਿਕ੍ਖੁ ਸਨ੍ਤਂ ਕੋਟ੍ਠਾਸਂ ਸਬ੍ਬਸਙ੍ਖਾਰਾਨਂ ਉਪਸਨ੍ਤਤਾਯ ਸਙ੍ਖਾਰੂਪਸਮਂ, ਪਰਮਸੁਖਤਾਯ ਸੁਖਨ੍ਤਿ ਲਦ੍ਧਨਾਮਂ ਨਿਬ੍ਬਾਨਂ ਅਧਿਗਚ੍ਛਤਿ, ਵਿਨ੍ਦਤਿਯੇਵਾਤਿ ਅਤ੍ਥੋ.

ਸਿਞ੍ਚ ਭਿਕ੍ਖੁ ਇਮਂ ਨਾਵਨ੍ਤਿ ਭਿਕ੍ਖੁ ਇਮਂ ਅਤ੍ਤਭਾਵਸਙ੍ਖਾਤਂ ਨਾਵਂ ਮਿਚ੍ਛਾਵਿਤਕ੍ਕੋਦਕਂ ਛਡ੍ਡੇਨ੍ਤੋ ਸਿਞ੍ਚ. ਸਿਤ੍ਤਾ ਤੇ ਲਹੁਮੇਸ੍ਸਤੀਤਿ ਯਥਾ ਹਿ ਮਹਾਸਮੁਦ੍ਦੇ ਉਦਕਸ੍ਸੇਵ ਭਰਿਤਾ ਨਾਵਾ ਛਿਦ੍ਦਾਨਿ ਪਿਦਹਿਤ੍ਵਾ ਉਦਕਸ੍ਸ ਸਿਤ੍ਤਤਾਯ ਸਿਤ੍ਤਾ ਸਲ੍ਲਹੁਕਾ ਹੁਤ੍ਵਾ ਮਹਾਸਮੁਦ੍ਦੇ ਅਨੋਸੀਦਿਤ੍ਵਾ ਸੀਘਂ ਸੁਪਟ੍ਟਨਂ ਗਚ੍ਛਤਿ, ਏਵਂ ਤਵਾਪਿ ਅਯਂ ਮਿਚ੍ਛਾਵਿਤਕ੍ਕੋਦਕਭਰਿਤਾ ਅਤ੍ਤਭਾਵਨਾਵਾ ਚਕ੍ਖੁਦ੍ਵਾਰਾਦਿਛਿਦ੍ਦਾਨਿ ਸਂਵਰੇਨ ਪਿਦਹਿਤ੍ਵਾ ਉਪ੍ਪਨ੍ਨਸ੍ਸ ਮਿਚ੍ਛਾਵਿਤਕ੍ਕੋਦਕਸ੍ਸ ਸਿਤ੍ਤਤਾਯ ਸਿਤ੍ਤਾ ਸਲ੍ਲਹੁਕਾ ਸਂਸਾਰਵਟ੍ਟੇ ਅਨੋਸੀਦਿਤ੍ਵਾ ਸੀਘਂ ਨਿਬ੍ਬਾਨਂ ਗਮਿਸ੍ਸਤਿ. ਛੇਤ੍ਵਾਤਿ ਰਾਗਦੋਸਬਨ੍ਧਨਾਨਿ ਛਿਨ੍ਦ. ਏਤਾਨਿ ਹਿ ਛਿਨ੍ਦਿਤ੍ਵਾ ਅਰਹਤ੍ਤਪ੍ਪਤ੍ਤੋ ਤਤੋ ਅਪਰਭਾਗੇ ਅਨੁਪਾਦਿਸੇਸਨਿਬ੍ਬਾਨਮੇਵ ਏਹਿਸਿ, ਗਮਿਸ੍ਸਸੀਤਿ ਅਤ੍ਥੋ.

ਪਞ੍ਚ ਛਿਨ੍ਦੇਤਿ ਹੇਟ੍ਠਾਅਪਾਯਸਮ੍ਪਾਪਕਾਨਿ ਪਞ੍ਚੋਰਮ੍ਭਾਗਿਯਸਂਯੋਜਨਾਨਿ ਪਾਦੇ ਬਦ੍ਧਰਜ੍ਜੁਂ ਪੁਰਿਸੋ ਸਤ੍ਥੇਨ ਵਿਯ ਹੇਟ੍ਠਾਮਗ੍ਗਤ੍ਤਯੇਨ ਛਿਨ੍ਦੇਯ੍ਯ. ਪਞ੍ਚ ਜਹੇਤਿ ਉਪਰਿਦੇਵਲੋਕਸਮ੍ਪਾਪਕਾਨਿ ਪਞ੍ਚੁਦ੍ਧਮ੍ਭਾਗਿਯਸਂਯੋਜਨਾਨਿ ਪੁਰਿਸੋ ਗੀਵਾਯ ਬਦ੍ਧਰਜ੍ਜੁਕਂ ਵਿਯ ਅਰਹਤ੍ਤਮਗ੍ਗੇਨ ਜਹੇਯ੍ਯ ਪਜਹੇਯ੍ਯ, ਛਿਨ੍ਦੇਯ੍ਯਾਤਿ ਅਤ੍ਥੋ. ਪਞ੍ਚ ਚੁਤ੍ਤਰਿ ਭਾਵਯੇਤਿ ਉਦ੍ਧਮ੍ਭਾਗਿਯਸਂਯੋਜਨਾਨਂ ਪਹਾਨਤ੍ਥਾਯ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨਿ ਉਤ੍ਤਰਿ ਭਾਵੇਯ੍ਯ. ਪਞ੍ਚਸਙ੍ਗਾਤਿਗੋਤਿ ਏਵਂ ਸਨ੍ਤੇ ਪਞ੍ਚਨ੍ਨਂ ਰਾਗਦੋਸਮੋਹਮਾਨਦਿਟ੍ਠਿਸਙ੍ਗਾਨਂ ਅਤਿਕ੍ਕਮਨੇਨ ਪਞ੍ਚਸਙ੍ਗਾਤਿਗੋ ਭਿਕ੍ਖੁ ਓਘਤਿਣ੍ਣੋਤਿ ਵੁਚ੍ਚਤਿ, ਚਤ੍ਤਾਰੋ ਓਘੇ ਤਿਣ੍ਣੋਯੇਵਾਤਿ ਵੁਚ੍ਚਤੀਤਿ ਅਤ੍ਥੋ.

ਝਾਯ ਭਿਕ੍ਖੂਤਿ ਭਿਕ੍ਖੁ ਤ੍ਵਂ ਦ੍ਵਿਨ੍ਨਂ ਝਾਨਾਨਂ ਵਸੇਨ ਝਾਯ ਚੇਵ, ਕਾਯਕਮ੍ਮਾਦੀਸੁ ਚ ਅਪ੍ਪਮਤ੍ਤਵਿਹਾਰਿਤਾਯ ਮਾ ਪਮਜ੍ਜਿ. ਰਮੇਸ੍ਸੂਤਿ ਪਞ੍ਚਵਿਧੇ ਚ ਕਾਮਗੁਣੇ ਤੇ ਚਿਤ੍ਤਂ ਮਾ ਰਮੇਸ੍ਸੁ. ਮਾ ਲੋਹਗੁਲ਼ਨ੍ਤਿ ਸਤਿਵੋਸ੍ਸਗ੍ਗਲਕ੍ਖਣੇਨ ਹਿ ਪਮਾਦੇਨ ਪਮਤ੍ਤਾ ਨਿਰਯੇ ਤਤ੍ਤਂ ਲੋਹਗੁਲ਼ਂ ਗਿਲਨ੍ਤਿ, ਤੇਨ ਤਂ ਵਦਾਮਿ ‘‘ਮਾ ਪਮਤ੍ਤੋ ਹੁਤ੍ਵਾ ਲੋਹਗੁਲ਼ਂ ਗਿਲਿ, ਮਾ ਨਿਰਯੇ ਡਯ੍ਹਮਾਨੋ ‘ਦੁਕ੍ਖਮਿਦ’ਨ੍ਤਿ ਕਨ੍ਦੀ’’ਤਿ ਅਤ੍ਥੋ.

ਨਤ੍ਥਿ ਝਾਨਨ੍ਤਿ ਝਾਨੁਪ੍ਪਾਦਿਕਾਯ ਵਾਯਾਮਪਞ੍ਞਾਯ ਅਪਞ੍ਞਸ੍ਸ ਝਾਨਂ ਨਾਮ ਨਤ੍ਥਿ. ਪਞ੍ਞਾ ਨਤ੍ਥੀਤਿ ਅਝਾਯਨ੍ਤਸ੍ਸ ‘‘ਸਮਾਹਿਤੋ ਭਿਕ੍ਖੁ ਯਥਾਭੂਤਂ ਜਾਨਾਤਿ ਪਸ੍ਸਤੀ’’ਤਿ ਵੁਤ੍ਤਲਕ੍ਖਣਾ ਪਞ੍ਞਾ ਨਤ੍ਥਿ. ਯਮ੍ਹਿ ਝਾਨਞ੍ਚ ਪਞ੍ਞਾ ਚਾਤਿ ਯਮ੍ਹਿ ਪੁਗ੍ਗਲੇ ਇਦਂ ਉਭਯਮ੍ਪਿ ਅਤ੍ਥਿ, ਸੋ ਨਿਬ੍ਬਾਨਸ੍ਸ ਸਨ੍ਤਿਕੇ ਠਿਤੋਯੇਵਾਤਿ ਅਤ੍ਥੋ.

ਸੁਞ੍ਞਾਗਾਰਂ ਪਵਿਟ੍ਠਸ੍ਸਾਤਿ ਕਿਸ੍ਮਿਞ੍ਚਿਦੇਵ ਵਿਵਿਤ੍ਤੋਕਾਸੇ ਕਮ੍ਮਟ੍ਠਾਨਂ ਅਵਿਜਹਿਤ੍ਵਾ ਕਮ੍ਮਟ੍ਠਾਨਮਨਸਿਕਾਰੇਨ ਨਿਸਿਨ੍ਨਸ੍ਸ. ਸਨ੍ਤਚਿਤ੍ਤਸ੍ਸਾਤਿ ਨਿਬ੍ਬੁਤਚਿਤ੍ਤਸ੍ਸ. ਸਮ੍ਮਾਤਿ ਹੇਤੁਨਾ ਕਾਰਣੇਨ ਧਮ੍ਮਂ ਵਿਪਸ੍ਸਨ੍ਤਸ੍ਸ ਵਿਪਸ੍ਸਨਾਸਙ੍ਖਾਤਾ ਅਮਾਨੁਸੀ ਰਤਿ ਅਟ੍ਠਸਮਾਪਤ੍ਤਿਸਙ੍ਖਾਤਾ ਦਿਬ੍ਬਾਪਿ ਰਤਿ ਹੋਤਿ ਉਪ੍ਪਜ੍ਜਤੀਤਿ ਅਤ੍ਥੋ.

ਯਤੋ ਯਤੋ ਸਮ੍ਮਸਤੀਤਿ ਅਟ੍ਠਤਿਂਸਾਯ ਆਰਮ੍ਮਣੇਸੁ ਕਮ੍ਮਂ ਕਰੋਨ੍ਤੋ ਯੇਨ ਯੇਨਾਕਾਰੇਨ, ਪੁਰੇਭਤ੍ਤਾਦੀਸੁ ਵਾ ਕਾਲੇਸੁ ਯਸ੍ਮਿਂ ਯਸ੍ਮਿਂ ਅਤ੍ਤਨਾ ਅਭਿਰੁਚਿਤੇ ਕਾਲੇ, ਅਭਿਰੁਚਿਤੇ ਵਾ ਕਮ੍ਮਟ੍ਠਾਨੇ ਕਮ੍ਮਂ ਕਰੋਨ੍ਤੋ ਸਮ੍ਮਸਤਿ. ਉਦਯਬ੍ਬਯਨ੍ਤਿ ਪਞ੍ਚਨ੍ਨਂ ਖਨ੍ਧਾਨਂ ਪਞ੍ਚਵੀਸਤਿਯਾ ਲਕ੍ਖਣੇਹਿ ਉਦਯਂ, ਪਞ੍ਚਵੀਸਤਿਯਾ ਏਵ ਚ ਲਕ੍ਖਣੇਹਿ ਵਯਂ. ਪੀਤਿਪਾਮੋਜ੍ਜਨ੍ਤਿ ਏਵਂ ਖਨ੍ਧਾਨਂ ਉਦਯਬ੍ਬਯਂ ਸਮ੍ਮਸਨ੍ਤੋ ਧਮ੍ਮਪੀਤਿਂ ਧਮ੍ਮਪਾਮੋਜ੍ਜਞ੍ਚ ਲਭਤਿ. ਅਮਤਨ੍ਤਿ ਤਂ ਸਪ੍ਪਚ੍ਚਯੇ ਨਾਮਰੂਪੇ ਪਾਕਟੇ ਹੁਤ੍ਵਾ ਉਪਟ੍ਠਹਨ੍ਤੇ ਉਪ੍ਪਨ੍ਨਂ ਪੀਤਿਪਾਮੋਜ੍ਜਂ ਅਮਤਨਿਬ੍ਬਾਨਸਮ੍ਪਾਪਕਤ੍ਤਾ ਵਿਜਾਨਤਂ ਪਣ੍ਡਿਤਾਨਂ ਅਮਤਮੇਵਾਤਿ ਅਤ੍ਥੋ.

ਤਤ੍ਰਾਯਮਾਦਿ ਭਵਤੀਤਿ ਤਤ੍ਰ ਅਯਂ ਆਦਿ, ਇਦਂ ਪੁਬ੍ਬਟ੍ਠਾਨਂ ਹੋਤਿ. ਇਧ ਪਞ੍ਞਸ੍ਸਾਤਿ ਇਮਸ੍ਮਿਂ ਸਾਸਨੇ ਪਣ੍ਡਿਤਭਿਕ੍ਖੁਨੋ. ਇਦਾਨਿ ‘‘ਤਂ ਆਦੀ’’ਤਿ ਵੁਤ੍ਤਂ ਪੁਬ੍ਬਟ੍ਠਾਨਂ ਦਸ੍ਸੇਨ੍ਤੋ ਇਨ੍ਦ੍ਰਿਯਗੁਤ੍ਤੀਤਿਆਦਿਮਾਹ. ਚਤੁਪਾਰਿਸੁਦ੍ਧਿਸੀਲਞ੍ਹਿ ਪੁਬ੍ਬਟ੍ਠਾਨਂ ਨਾਮ. ਤਤ੍ਥ ਇਨ੍ਦ੍ਰਿਯਗੁਤ੍ਤੀਤਿ ਇਨ੍ਦ੍ਰਿਯਸਂਵਰੋ. ਸਨ੍ਤੁਟ੍ਠੀਤਿ ਚਤੁਪਚ੍ਚਯਸਨ੍ਤੋਸੋ. ਤੇਨ ਆਜੀਵਪਾਰਿਸੁਦ੍ਧਿ ਚੇਵ ਪਚ੍ਚਯਸਨ੍ਨਿਸ੍ਸਿਤਞ੍ਚ ਸੀਲਂ ਕਥਿਤਂ. ਪਾਤਿਮੋਕ੍ਖੇਤਿ ਪਾਤਿਮੋਕ੍ਖਸਙ੍ਖਾਤੇ ਜੇਟ੍ਠਕਸੀਲੇ ਪਰਿਪੂਰਕਾਰਿਤਾ ਕਥਿਤਾ.

ਮਿਤ੍ਤੇ ਭਜਸ੍ਸੁ ਕਲ੍ਯਾਣੇਤਿ ਵਿਸ੍ਸਟ੍ਠਕਮ੍ਮਨ੍ਤੇ ਅਪਤਿਰੂਪਸਹਾਯੇ ਵਜ੍ਜੇਤ੍ਵਾ ਸਾਧੁਜੀਵਿਤਾਯ ਸੁਦ੍ਧਾਜੀਵੇ ਜਙ੍ਘਬਲਂ ਨਿਸ੍ਸਾਯ ਜੀਵਿਕਕਪ੍ਪਨਾਯ ਅਕੁਸੀਤੇ ਅਤਨ੍ਦਿਤੇ ਕਲ੍ਯਾਣਮਿਤ੍ਤੇ ਭਜਸ੍ਸੁ, ਸੇਵਸ੍ਸੂਤਿ ਅਤ੍ਥੋ. ਪਟਿਸਨ੍ਥਾਰਵੁਤ੍ਯਸ੍ਸਾਤਿ ਆਮਿਸਪਟਿਸਨ੍ਥਾਰੇਨ ਚ ਧਮ੍ਮਪਟਿਸਨ੍ਥਾਰੇਨ ਚ ਸਮ੍ਪਨ੍ਨਵੁਤ੍ਤਿਤਾਯ ਪਟਿਸਨ੍ਥਾਰਵੁਤ੍ਤਿ ਅਸ੍ਸ, ਪਟਿਸਨ੍ਥਾਰਸ੍ਸ ਕਾਰਕਾ ਭਵੇਯ੍ਯਾਤਿ ਅਤ੍ਥੋ. ਆਚਾਰਕੁਸਲੋਤਿ ਸੀਲਮ੍ਪਿ ਆਚਾਰੋ, ਵਤ੍ਤਪਟਿਵਤ੍ਤਮ੍ਪਿ ਆਚਾਰੋ. ਤਤ੍ਥ ਕੁਸਲੋ ਸਿਯਾ, ਛੇਕੋ ਭਵੇਯ੍ਯਾਤਿ ਅਤ੍ਥੋ. ਤਤੋ ਪਾਮੋਜ੍ਜਬਹੁਲੋਤਿ ਤਤੋ ਪਟਿਸਨ੍ਥਾਰਵੁਤ੍ਤਿਤੋ ਚ ਆਚਾਰਕੋਸਲ੍ਲਤੋ ਚ ਉਪ੍ਪਨ੍ਨੇਨ ਧਮ੍ਮਪਾਮੋਜ੍ਜੇਨ ਪਾਮੋਜ੍ਜਬਹੁਲੋ ਹੁਤ੍ਵਾ ਤਂ ਸਕਲਸ੍ਸਾਪਿ ਵਟ੍ਟਦੁਕ੍ਖਸ੍ਸ ਅਨ੍ਤਂ ਕਰਿਸ੍ਸਤੀਤਿ ਅਤ੍ਥੋ.

ਏਵਂ ਸਤ੍ਥਾਰਾ ਦੇਸਿਤਾਸੁ ਇਮਾਸੁ ਗਾਥਾਸੁ ਏਕਮੇਕਿਸ੍ਸਾਯ ਗਾਥਾਯ ਪਰਿਯੋਸਾਨੇ ਏਕਮੇਕਂ ਭਿਕ੍ਖੁਸਤਂ ਨਿਸਿਨ੍ਨਨਿਸਿਨ੍ਨਟ੍ਠਾਨੇਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਸਬ੍ਬੇਪਿ ਤੇ ਭਿਕ੍ਖੂ ਆਕਾਸੇਨੇਵ ਵੀਸਯੋਜਨਸਤਿਕਂ ਕਨ੍ਤਾਰਂ ਅਤਿਕ੍ਕਮਿਤ੍ਵਾ ਤਥਾਗਤਸ੍ਸ ਸੁਵਣ੍ਣਵਣ੍ਣਂ ਸਰੀਰਂ ਵਣ੍ਣੇਨ੍ਤਾ ਥੋਮੇਨ੍ਤਾ ਪਾਦੇ ਵਨ੍ਦਿਂਸੂਤਿ.

ਸਮ੍ਬਹੁਲਭਿਕ੍ਖੁਵਤ੍ਥੁ ਸਤ੍ਤਮਂ.