੫. ਵਿਪਕ੍ਖਸੇਵਕਭਿਕ੍ਖੁਵਤ੍ਥੁ

ਸਲਾਭਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਅਞ੍ਞਤਰਂ ਵਿਪਕ੍ਖਸੇਵਕਂ ਭਿਕ੍ਖੁਂ ਆਰਬ੍ਭ ਕਥੇਸਿ.

ਤਸ੍ਸ ਕਿਰੇਕੋ ਦੇਵਦਤ੍ਤਪਕ੍ਖਿਕੋ ਭਿਕ੍ਖੁ ਸਹਾਯੋ ਅਹੋਸਿ. ਸੋ ਤਂ ਭਿਕ੍ਖੂਹਿ ਸਦ੍ਧਿਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਕੁਹਿਂ ਗਤੋਸੀ’’ਤਿ ਪੁਚ੍ਛਿ. ‘‘ਅਸੁਕਟ੍ਠਾਨਂ ਨਾਮ ਪਿਣ੍ਡਾਯ ਚਰਿਤੁ’’ਨ੍ਤਿ. ‘‘ਲਦ੍ਧੋ ਤੇ ਪਿਣ੍ਡਪਾਤੋ’’ਤਿ? ‘‘ਆਮ, ਲਦ੍ਧੋ’’ਤਿ. ‘‘ਇਧ ਅਮ੍ਹਾਕਂ ਮਹਾਲਾਭਸਕ੍ਕਾਰੋ, ਕਤਿਪਾਹਂ ਇਧੇਵ ਹੋਹੀ’’ਤਿ. ਸੋ ਤਸ੍ਸ ਵਚਨੇਨ ਕਤਿਪਾਹਂ ਤਤ੍ਥ ਵਸਿਤ੍ਵਾ ਸਕਟ੍ਠਾਨਮੇਵ ਅਗਮਾਸਿ. ਅਥ ਨਂ ਭਿਕ੍ਖੂ ‘‘ਅਯਂ, ਭਨ੍ਤੇ, ਦੇਵਦਤ੍ਤਸ੍ਸ ਉਪ੍ਪਨ੍ਨਲਾਭਸਕ੍ਕਾਰਂ ਪਰਿਭੁਞ੍ਜਤਿ, ਦੇਵਦਤ੍ਤਸ੍ਸ ਪਕ੍ਖਿਕੋ ਏਸੋ’’ਤਿ ਤਥਾਗਤਸ੍ਸ ਆਰੋਚੇਸੁਂ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਏਵਮਕਾਸੀ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ, ਅਹਂ ਤਤ੍ਥ ਏਕਂ ਦਹਰਂ ਨਿਸ੍ਸਾਯ ਕਤਿਪਾਹਂ ਵਸਿਂ, ਨ ਚ ਪਨ ਦੇਵਦਤ੍ਤਸ੍ਸ ਲਦ੍ਧਿਂ ਰੋਚੇਮੀ’’ਤਿ. ਅਥ ਨਂ ਭਗਵਾ ‘‘ਕਿਞ੍ਚਾਪਿ ਤ੍ਵਂ ਲਦ੍ਧਿਂ ਨ ਰੋਚੇਸਿ, ਦਿਟ੍ਠਦਿਟ੍ਠਕਾਨਂਯੇਵ ਪਨ ਲਦ੍ਧਿਂ ਰੋਚੇਨ੍ਤੋ ਵਿਯ ਵਿਚਰਸਿ. ਨ ਤ੍ਵਂ ਇਦਾਨੇਵ ਏਵਂ ਕਰੋਸਿ, ਪੁਬ੍ਬੇਪਿ ਏਵਰੂਪੋਯੇਵਾ’’ਤਿ ਵਤ੍ਵਾ ‘‘ਇਦਾਨਿ ਤਾਵ, ਭਨ੍ਤੇ, ਅਮ੍ਹੇਹਿ ਸਾਮਂ ਦਿਟ੍ਠੋ, ਪੁਬ੍ਬੇ ਪਨੇਸ ਕੇਸਂ ਲਦ੍ਧਿਂ ਰੋਚੇਨ੍ਤੋ ਵਿਯ ਵਿਚਰਿ, ਆਚਿਕ੍ਖਥ ਨੋ’’ਤਿ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿਤ੍ਵਾ –

‘‘ਪੁਰਾਣਚੋਰਾਨ ਵਚੋ ਨਿਸਮ੍ਮ,

ਮਹਿਲ਼ਾਮੁਖੋ ਪੋਥਯਮਨ੍ਵਚਾਰੀ;

ਸੁਸਞ੍ਞਤਾਨਞ੍ਹਿ ਵਚੋ ਨਿਸਮ੍ਮ,

ਗਜੁਤ੍ਤਮੋ ਸਬ੍ਬਗੁਣੇਸੁ ਅਟ੍ਠਾ’’ਤਿ. (ਜਾ. ੧.੧.੨੬) –

ਇਮਂ ਮਹਿਲ਼ਾਮੁਖਜਾਤਕਂ ਵਿਤ੍ਥਾਰੇਤ੍ਵਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਸਕਲਾਭੇਨੇਵ ਸਨ੍ਤੁਟ੍ਠੇਨ ਭਵਿਤਬ੍ਬਂ, ਪਰਲਾਭਂ ਪਤ੍ਥੇਤੁਂ ਨ ਵਟ੍ਟਤਿ. ਪਰਲਾਭਂ ਪਤ੍ਥੇਨ੍ਤਸ੍ਸ ਹਿ ਝਾਨਵਿਪਸ੍ਸਨਾਮਗ੍ਗਫਲੇਸੁ ਏਕਧਮ੍ਮੋਪਿ ਨੁਪ੍ਪਜ੍ਜਤਿ, ਸਕਲਾਭਸਨ੍ਤੁਟ੍ਠਸ੍ਸੇਵ ਪਨ ਝਾਨਾਦੀਨਿ ਉਪ੍ਪਜ੍ਜਨ੍ਤੀ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੬੫. ‘‘ਸਲਾਭਂ ਨਾਤਿਮਞ੍ਞੇਯ੍ਯ, ਨਾਞ੍ਞੇਸਂ ਪਿਹਯਂ ਚਰੇ;

ਅਞ੍ਞੇਸਂ ਪਿਹਯਂ ਭਿਕ੍ਖੁ, ਸਮਾਧਿਂ ਨਾਧਿਗਚ੍ਛਤਿ.

੩੬੬. ‘‘ਅਪ੍ਪਲਾਭੋਪਿ ਚੇ ਭਿਕ੍ਖੁ, ਸਲਾਭਂ ਨਾਤਿਮਞ੍ਞਤਿ;

ਤਂ ਵੇ ਦੇਵਾ ਪਸਂਸਨ੍ਤਿ, ਸੁਦ੍ਧਾਜੀਵਿਂ ਅਤਨ੍ਦਿਤ’’ਨ੍ਤਿ.

ਤਤ੍ਥ ਸਲਾਭਨ੍ਤਿ ਅਤ੍ਤਨੋ ਉਪ੍ਪਜ੍ਜਨਕਲਾਭਂ. ਸਪਦਾਨਚਾਰਞ੍ਹਿ ਪਰਿਵਜ੍ਜੇਤ੍ਵਾ ਅਨੇਸਨਾਯ ਜੀਵਿਕਂ ਕਪ੍ਪੇਨ੍ਤੋ ਸਲਾਭਂ ਅਤਿਮਞ੍ਞਤਿ ਹੀਲ਼ੇਤਿ ਜਿਗੁਚ੍ਛਤਿ ਨਾਮ. ਤਸ੍ਮਾ ਏਵਂ ਅਕਰਣੇਨ ਸਲਾਭਂ ਨਾਤਿਮਞ੍ਞੇਯ੍ਯ. ਅਞ੍ਞੇਸਂ ਪਿਹਯਨ੍ਤਿ ਅਞ੍ਞੇਸਂ ਲਾਭਂ ਪਤ੍ਥੇਨ੍ਤੋ ਨ ਚਰੇਯ੍ਯਾਤਿ ਅਤ੍ਥੋ. ਸਮਾਧਿਂ ਨਾਧਿਗਚ੍ਛਤੀਤਿ ਅਞ੍ਞੇਸਞ੍ਹਿ ਲਾਭਂ ਪਿਹਯਨ੍ਤੋ ਤੇਸਂ ਚੀਵਰਾਦਿਕਰਣੇ ਉਸ੍ਸੁਕ੍ਕਂ ਆਪਨ੍ਨੋ ਭਿਕ੍ਖੁ ਅਪ੍ਪਨਾਸਮਾਧਿਂ ਵਾ ਉਪਚਾਰਸਮਾਧਿਂ ਵਾ ਨਾਧਿਗਚ੍ਛਤਿ. ਸਲਾਭਂ ਨਾਤਿਮਞ੍ਞਤੀਤਿ ਅਪ੍ਪਲਾਭੋਪਿ ਸਮਾਨੋ ਉਚ੍ਚਨੀਚਕੁਲੇ ਪਟਿਪਾਟਿਯਾ ਸਪਦਾਨਂ ਚਰਨ੍ਤੋ ਭਿਕ੍ਖੁ ਸਲਾਭਂ ਨਾਤਿਮਞ੍ਞਤਿ ਨਾਮ. ਤਂ ਵੇਤਿ ਤਂ ਏਵਰੂਪਂ ਭਿਕ੍ਖੁਂ ਸਾਰਜੀਵਿਤਤਾਯ ਸੁਦ੍ਧਾਜੀਵਿਂ ਜਙ੍ਘਬਲਂ ਨਿਸ੍ਸਾਯ ਜੀਵਿਤਕਪ੍ਪਨੇਨ ਅਕੁਸੀਤਤਾਯ ਅਤਨ੍ਦਿਤਂ ਦੇਵਾ ਪਸਂਸਨ੍ਤਿ ਥੋਮੇਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਵਿਪਕ੍ਖਸੇਵਕਭਿਕ੍ਖੁਵਤ੍ਥੁ ਪਞ੍ਚਮਂ.