੯. ਉਪਕਾਜੀਵਕਵਤ੍ਥੁ

ਸਬ੍ਬਾਭਿਭੂਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਅਨ੍ਤਰਾਮਗ੍ਗੇ ਉਪਕਂ ਆਜੀਵਕਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਸਤ੍ਥਾ ਪਤ੍ਤਸਬ੍ਬਞ੍ਞੁਤਞ੍ਞਾਣੋ ਬੋਧਿਮਣ੍ਡੇ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਧਮ੍ਮਚਕ੍ਕਪਵਤ੍ਤਨਤ੍ਥਂ ਬਾਰਾਣਸਿਂ ਸਨ੍ਧਾਯ ਅਟ੍ਠਾਰਸਯੋਜਨਮਗ੍ਗਂ ਪਟਿਪਨ੍ਨੋ ਅਨ੍ਤਰਾਮਗ੍ਗੇ ਉਪਕਂ ਆਜੀਵਕਂ ਅਦ੍ਦਸ. ਸੋਪਿ ਸਤ੍ਥਾਰਂ ਦਿਸ੍ਵਾ ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ, ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ ਪੁਚ੍ਛਿ. ਅਥਸ੍ਸ ਸਤ੍ਥਾ ‘‘ਮਯ੍ਹਂ ਉਪਜ੍ਝਾਯੋ ਵਾ ਆਚਰਿਯੋ ਵਾ ਨਤ੍ਥੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੫੩. ‘‘ਸਬ੍ਬਾਭਿਭੂ ਸਬ੍ਬਵਿਦੂਹਮਸ੍ਮਿ,

ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤੋ;

ਸਬ੍ਬਞ੍ਜਹੋ ਤਣ੍ਹਕ੍ਖਯੇ ਵਿਮੁਤ੍ਤੋ,

ਸਯਂ ਅਭਿਞ੍ਞਾਯ ਕਮੁਦ੍ਦਿਸੇਯ੍ਯ’’ਨ੍ਤਿ.

ਤਤ੍ਥ ਸਬ੍ਬਾਭਿਭੂਤਿ ਸਬ੍ਬੇਸਂ ਤੇਭੂਮਕਧਮ੍ਮਾਨਂ ਅਭਿਭਵਨਤੋ ਸਬ੍ਬਾਭਿਭੂ. ਸਬ੍ਬਵਿਦੂਤਿ ਵਿਦਿਤਸਬ੍ਬਚਤੁਭੂਮਕਧਮ੍ਮੋ. ਸਬ੍ਬੇਸੁ ਧਮ੍ਮੇਸੂਤਿ ਸਬ੍ਬੇਸੁਪਿ ਤੇਭੂਮਕਧਮ੍ਮੇਸੁ ਤਣ੍ਹਾਦਿਟ੍ਠੀਹਿ ਅਨੂਪਲਿਤ੍ਤੋ. ਸਬ੍ਬਞ੍ਜਹੋਤਿ ਸਬ੍ਬੇ ਤੇਭੂਮਕਧਮ੍ਮੇ ਜਹਿਤ੍ਵਾ ਠਿਤੋ. ਤਣ੍ਹਕ੍ਖਯੇ ਵਿਮੁਤ੍ਤੋਤਿ ਤਣ੍ਹਕ੍ਖਯਨ੍ਤੇ ਉਪ੍ਪਾਦਿਤੇ ਤਣ੍ਹਕ੍ਖਯਸਙ੍ਖਾਤੇ ਅਰਹਤ੍ਤੇ ਅਸੇਖਾਯ ਵਿਮੁਤ੍ਤਿਯਾ ਵਿਮੁਤ੍ਤੋ. ਸਯਂ ਅਭਿਞ੍ਞਾਯਾਤਿ ਅਭਿਞ੍ਞੇਯ੍ਯਾਦਿਭੇਦੇ ਧਮ੍ਮੇ ਸਯਮੇਵ ਜਾਨਿਤ੍ਵਾ. ਕਮੁਦ੍ਦਿਸੇਯ੍ਯਨ੍ਤਿ ‘‘ਅਯਂ ਮੇ ਉਪਜ੍ਝਾਯੋ ਵਾ ਆਚਰਿਯੋ ਵਾ’’ਤਿ ਕਂ ਨਾਮ ਉਦ੍ਦਿਸੇਯ੍ਯਨ੍ਤਿ.

ਦੇਸਨਾਵਸਾਨੇ ਉਪਕੋ ਆਜੀਵਕੋ ਤਥਾਗਤਸ੍ਸ ਵਚਨਂ ਨੇਵਾਭਿਨਨ੍ਦਿ, ਨ ਪਟਿਕ੍ਕੋਸਿ. ਸੀਸਂ ਪਨ ਚਾਲੇਤ੍ਵਾ ਜਿਵ੍ਹਂ ਨਿਲ੍ਲਾਲ਼ੇਤ੍ਵਾ ਏਕਪਦਿਕਮਗ੍ਗਂ ਗਹੇਤ੍ਵਾ ਅਞ੍ਞਤਰਂ ਲੁਦ੍ਦਕਨਿਵਾਸਨਟ੍ਠਾਨਂ ਅਗਮਾਸੀਤਿ.

ਉਪਕਾਜੀਵਕਵਤ੍ਥੁ ਨਵਮਂ.