੯. ਵਟ੍ਟਪੋਤਕਚਰਿਯਾਵਣ੍ਣਨਾ

੭੨. ਨਵਮੇ ਮਗਧੇ ਵਟ੍ਟਪੋਤਕੋਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਮਗਧਰਟ੍ਠੇ ਅਞ੍ਞਤਰਸ੍ਮਿਂ ਅਰਞ੍ਞਪ੍ਪਦੇਸੇ ਵਟ੍ਟਕਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਅਚਿਰਨਿਕ੍ਖਨ੍ਤਤਾਯ ਤਰੁਣੋ ਮਂਸਪੇਸਿਭੂਤੋ, ਤਤੋ ਏਵ ਅਜਾਤਪਕ੍ਖੋ ਵਟ੍ਟਕਚ੍ਛਾਪਕੋ ਯਦਾ ਅਹਂ ਕੁਲਾਵਕੇਯੇਵ ਹੋਮਿ.

੭੩. ਮੁਖਤੁਣ੍ਡਕੇਨਾਹਰਿਤ੍ਵਾਤਿ ਮਯ੍ਹਂ ਮਾਤਾ ਅਤ੍ਤਨੋ ਮੁਖਤੁਣ੍ਡਕੇਨ ਕਾਲੇਨ ਕਾਲਂ ਗੋਚਰਂ ਆਹਰਿਤ੍ਵਾ ਮਂ ਪੋਸੇਤਿ. ਤਸ੍ਸਾ ਫਸ੍ਸੇਨ ਜੀਵਾਮੀਤਿ ਪਰਿਸੇਦਨਤ੍ਥਞ੍ਚੇਵ ਪਰਿਭਾਵਨਤ੍ਥਞ੍ਚ ਸਮ੍ਮਦੇਵ ਕਾਲੇਨ ਕਾਲਂ ਮਮਂ ਅਧਿਸਯਨਵਸੇਨ ਫੁਸਨ੍ਤਿਯਾ ਤਸ੍ਸਾ ਮਮ ਮਾਤੁਯਾ ਸਰੀਰਸਮ੍ਫਸ੍ਸੇਨ ਜੀਵਾਮਿ ਵਿਹਰਾਮਿ ਅਤ੍ਤਭਾਵਂ ਪਵਤ੍ਤੇਮਿ. ਨਤ੍ਥਿ ਮੇ ਕਾਯਿਕਂ ਬਲਨ੍ਤਿ ਮਯ੍ਹਂ ਪਨ ਅਤਿਤਰੁਣਤਾਯ ਕਾਯਸਨ੍ਨਿਸ੍ਸਿਤਂ ਬਲਂ ਨਤ੍ਥਿ.

੭੪. ਸਂਵਚ੍ਛਰੇਤਿ ਸਂਵਚ੍ਛਰੇ ਸਂਵਚ੍ਛਰੇ. ਗਿਮ੍ਹਸਮਯੇਤਿ ਗਿਮ੍ਹਕਾਲੇ. ਸੁਕ੍ਖਰੁਕ੍ਖਸਾਖਾਨਂ ਅਞ੍ਞਮਞ੍ਞਂ ਸਙ੍ਘਟ੍ਟਨਸਮੁਪ੍ਪਨ੍ਨੇਨ ਅਗ੍ਗਿਨਾ ਤਸ੍ਮਿਂ ਪਦੇਸੇ ਦਵਡਾਹੋ ਪਦਿਪ੍ਪਤਿ ਪਜ੍ਜਲਤਿ, ਸੋ ਤਥਾ ਪਦੀਪਿਤੋ. ਉਪਗਚ੍ਛਤਿ ਅਮ੍ਹਾਕਨ੍ਤਿ ਮਯ੍ਹਂ ਮਾਤਾਪਿਤੂਨਞ੍ਚਾਤਿ ਅਮ੍ਹਾਕਂ ਵਸਨਟ੍ਠਾਨਪ੍ਪਦੇਸਂ ਅਤ੍ਤਨੋ ਪਤਿਟ੍ਠਾਨਸ੍ਸ ਅਸੁਦ੍ਧਸ੍ਸਾਪਿ ਸੁਦ੍ਧਭਾਵਕਰਣੇਨ ਪਾਵਨਤੋ ਪਾਵਕੋਤਿ ਚ ਗਤਮਗ੍ਗੇ ਇਨ੍ਧਨਸ੍ਸ ਭਸ੍ਮਭਾਵਾਵਹਨਤੋ ਕਣ੍ਹਵਤ੍ਤਨੀਤਿ ਚ ਲਦ੍ਧਨਾਮੋ ਅਗ੍ਗਿ ਵਨਰੁਕ੍ਖਗਚ੍ਛੇ ਦਹਨ੍ਤੋ ਕਾਲੇਨ ਕਾਲਂ ਉਪਗਚ੍ਛਤਿ.

੭੫. ਏਵਂ ਉਪਗਮਨਤੋ ਤਦਾਪਿ ਸਦ੍ਦਾਯਨ੍ਤੋਤਿ ‘‘ਧਮਧਮ’’ਇਤਿ ਏਵਂ ਸਦ੍ਦਂ ਕਰੋਨ੍ਤੋ, ਅਨੁਰਵਦਸ੍ਸਨਞ੍ਹੇਤਂ ਦਾਵਗ੍ਗਿਨੋ. ਮਹਾਸਿਖੀਤਿ ਪਬ੍ਬਤਕੂਟਸਦਿਸਾਨਂ ਇਨ੍ਧਨਾਨਂ ਵਸੇਨ ਮਹਤਿਯੋ ਸਿਖਾ ਏਤਸ੍ਸਾਤਿ ਮਹਾਸਿਖੀ. ਅਨੁਪੁਬ੍ਬੇਨ ਅਨੁਕ੍ਕਮੇਨ ਤਂ ਅਰਞ੍ਞਪ੍ਪਦੇਸਂ ਝਾਪੇਨ੍ਤੋ ਦਹਨ੍ਤੋ ਅਗ੍ਗਿ ਮਮ ਸਮੀਪਟ੍ਠਾਨਂ ਉਪਾਗਮਿ.

੭੬. ਅਗ੍ਗਿਵੇਗਭਯਾਤਿ ਵੇਗੇਨ ਆਗਚ੍ਛਤੋ ਅਗ੍ਗਿਨੋ ਭਯੇਨ ਭੀਤਾ. ਤਸਿਤਾਤਿ ਚਿਤ੍ਤੁਤ੍ਰਾਸਸਮੁਟ੍ਠਿਤੇਨ ਕਾਯਸ੍ਸ ਛਮ੍ਭਿਤਤ੍ਤੇਨ ਚ ਉਤ੍ਰਾਸਾ. ਮਾਤਾਪਿਤਾਤਿ ਮਾਤਾਪਿਤਰੋ. ਅਤ੍ਤਾਨਂ ਪਰਿਮੋਚਯੁਨ੍ਤਿ ਅਗ੍ਗਿਨਾ ਅਨੁਪਦ੍ਦੁਤਟ੍ਠਾਨਗਮਨੇਨ ਅਤ੍ਤਨੋ ਸੋਤ੍ਥਿਭਾਵਮਕਂਸੁ. ਮਹਾਸਤ੍ਤੋ ਹਿ ਤਦਾ ਮਹਾਗੇਣ੍ਡੁਕਪ੍ਪਮਾਣੋ ਮਹਾਸਰੀਰੋ ਅਹੋਸਿ. ਤਂ ਮਾਤਾਪਿਤਰੋ ਕੇਨਚਿ ਉਪਾਯੇਨ ਗਹੇਤ੍ਵਾ ਗਨ੍ਤੁਂ ਅਸਕ੍ਕੁਣਨ੍ਤਾ ਅਤ੍ਤਸਿਨੇਹੇਨ ਚ ਅਭਿਭੁਯ੍ਯਮਾਨਾ ਪੁਤ੍ਤਸਿਨੇਹਂ ਛਡ੍ਡੇਤ੍ਵਾ ਪਲਾਯਿਂਸੁ.

੭੭. ਪਾਦੇ ਪਕ੍ਖੇ ਪਜਹਾਮੀਤਿ ਅਤ੍ਤਨੋ ਉਭੋ ਪਾਦੇ ਉਭੋ ਪਕ੍ਖੇ ਚ ਭੂਮਿਯਂ ਆਕਾਸੇ ਚ ਗਮਨਸਜ੍ਜੇ ਕਰੋਨ੍ਤੋ ਪਸਾਰੇਮਿ ਇਰਿਯਾਮਿ ਵਾਯਮਾਮਿ. ‘‘ਪਟੀਹਾਮੀ’’ਤਿਪਿ ਪਾਠੋ, ਵੇਹਾਸਗਮਨਯੋਗ੍ਗੇ ਕਾਤੁਂ ਈਹਾਮੀਤਿ ਅਤ੍ਥੋ. ‘‘ਪਤੀਹਾਮੀ’’ਤਿਪਿ ਪਠਨ੍ਤਿ. ਤਸ੍ਸਤ੍ਥੋ – ਪਾਦੇ ਪਕ੍ਖੇ ਚ ਪਤਿ ਵਿਸੁਂ ਈਹਾਮਿ, ਗਮਨਤ੍ਥਂ ਵਾਯਮਾਮਿ, ਤਂ ਪਨ ਵਾਯਾਮਕਰਣਤ੍ਥਮੇਵ. ਕਸ੍ਮਾ? ਯਸ੍ਮਾ ਨਤ੍ਥਿ ਮੇ ਕਾਯਿਕਂ ਬਲਂ. ਸੋਹਂ ਅਗਤਿਕੋ ਤਤ੍ਥਾਤਿ ਸੋ ਅਹਂ ਏਵਂਭੂਤੋ ਪਾਦਪਕ੍ਖਵੇਕਲ੍ਲੇਨ ਗਮਨਵਿਰਹਿਤੋ ਮਾਤਾਪਿਤੂਨਂ ਅਪਗਮਨੇਨ ਵਾ ਅਪ੍ਪਟਿਸਰਣੋ, ਤਤ੍ਥ ਦਾਵਗ੍ਗਿਉਪਦ੍ਦੁਤੇ ਵਨੇ, ਤਸ੍ਮਿਂ ਵਾ ਕੁਲਾਵਕੇ ਠਿਤੋਵ ਏਵਂ ਇਦਾਨਿ ਵਤ੍ਤਬ੍ਬਾਕਾਰੇਨ ਤਦਾ ਚਿਨ੍ਤੇਸਿਂ. ਦੁਤਿਯਞ੍ਚੇਤ੍ਥ ਅਹਨ੍ਤਿ ਨਿਪਾਤਮਤ੍ਤਂ ਦਟ੍ਠਬ੍ਬਂ.

੭੮. ਇਦਾਨਿ ਤਦਾ ਅਤ੍ਤਨੋ ਚਿਨ੍ਤਿਤਾਕਾਰਂ ਦਸ੍ਸੇਤੁਂ ‘‘ਯੇਸਾਹ’’ਨ੍ਤਿਆਦਿਮਾਹ;

ਤਤ੍ਥ ਯੇਸਾਹਂ ਉਪਧਾਵੇਯ੍ਯਂ, ਭੀਤੋ ਤਸਿਤਵੇਧਿਤੋਤਿ ਮਰਣਭਯੇਨ ਭੀਤੋ ਤਤੋ ਏਵ ਚਿਤ੍ਤੁਤ੍ਰਾਸੇਨ ਤਸਿਤੋ ਸਰੀਰਕਮ੍ਪਨੇਨ ਵੇਧਿਤੋ ਯੇਸਮਹਂ ਪਕ੍ਖਨ੍ਤਰਂ ਏਤਰਹਿ ਦਾਵਗ੍ਗਿਉਪਦ੍ਦੁਤੋ ਜਲਦੁਗ੍ਗਂ ਵਿਯ ਮਞ੍ਞਮਾਨੋ ਪਵਿਸਿਤੁਂ ਉਪਧਾਵੇਯ੍ਯਂ ਤੇ ਮਮ ਮਾਤਾਪਿਤਰੋ ਮਂ ਏਕਕਂ ਏਵ ਓਹਾਯ ਜਹਿਤ੍ਵਾ ਪਕ੍ਕਨ੍ਤਾ. ਕਥਂ ਮੇ ਅਜ੍ਜ ਕਾਤਵੇਤਿ ਕਥਂ ਨੁ ਖੋ ਮਯਾ ਅਜ੍ਜ ਕਾਤਬ੍ਬਂ, ਪਟਿਪਜ੍ਜਿਤਬ੍ਬਨ੍ਤਿ ਅਤ੍ਥੋ.

ਏਵਂ ਮਹਾਸਤ੍ਤੋ ਇਤਿਕਤ੍ਤਬ੍ਬਤਾਸਮ੍ਮੂਲ਼੍ਹੋ ਹੁਤ੍ਵਾ ਠਿਤੋ ਪੁਨ ਚਿਨ੍ਤੇਸਿ – ‘‘ਇਮਸ੍ਮਿਂ ਲੋਕੇ ਸੀਲਗੁਣੋ ਨਾਮ ਅਤ੍ਥਿ, ਸਚ੍ਚਗੁਣੋ ਨਾਮ ਅਤ੍ਥਿ, ਅਤੀਤੇ ਪਾਰਮਿਯੋ ਪੂਰੇਤ੍ਵਾ ਬੋਧਿਤਲੇ ਨਿਸੀਦਿਤ੍ਵਾ ਅਭਿਸਮ੍ਬੁਦ੍ਧਾ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ ਸਚ੍ਚਾਨੁਦਯਕਾਰੁਞ੍ਞਖਨ੍ਤਿਸਮਨ੍ਨਾਗਤਾ ਸਬ੍ਬਸਤ੍ਤੇਸੁ ਸਮਪ੍ਪਵਤ੍ਤਮੇਤ੍ਤਾਭਾਵਨਾ ਸਬ੍ਬਞ੍ਞੁਬੁਦ੍ਧਾ ਨਾਮ ਅਤ੍ਥਿ, ਤੇਹਿ ਚ ਪਟਿਵਿਦ੍ਧੋ ਏਕਨ੍ਤਨਿਯ੍ਯਾਨਗੁਣੋ ਧਮ੍ਮੋ ਅਤ੍ਥਿ, ਮਯਿ ਚਾਪਿ ਏਕਂ ਸਚ੍ਚਂ ਅਤ੍ਥਿ. ਸਂਵਿਜ੍ਜਮਾਨੋ ਏਕੋ ਸਭਾਵਧਮ੍ਮੋ ਪਞ੍ਞਾਯਤਿ, ਤਸ੍ਮਾ ਅਤੀਤਬੁਦ੍ਧੇ ਚੇਵ ਤੇਹਿ ਪਟਿਵਿਦ੍ਧਗੁਣੇ ਚ ਆਵਜ੍ਜੇਤ੍ਵਾ ਮਯਿ ਵਿਜ੍ਜਮਾਨਂ ਸਚ੍ਚਂ ਸਭਾਵਧਮ੍ਮਂ ਗਹੇਤ੍ਵਾ ਸਚ੍ਚਕਿਰਿਯਂ ਕਤ੍ਵਾ ਅਗ੍ਗਿਂ ਪਟਿਕ੍ਕਮਾਪੇਤ੍ਵਾ ਅਜ੍ਜ ਮਯਾ ਅਤ੍ਤਨੋ ਚੇਵ ਇਧ ਵਾਸੀਨਂ ਸੇਸਪਾਣੀਨਞ੍ਚ ਸੋਤ੍ਥਿਭਾਵਂ ਕਾਤੁਂ ਵਟ੍ਟਤੀ’’ਤਿ. ਏਵਂ ਪਨ ਚਿਨ੍ਤੇਤ੍ਵਾ ਮਹਾਸਤ੍ਤੋ ਅਤ੍ਤਨੋ ਆਨੁਭਾਵੇ ਠਤ੍ਵਾ ਯਥਾਚਿਨ੍ਤਿਤਂ ਪਟਿਪਜ੍ਜਿ. ਤੇਨ ਵੁਤ੍ਤਂ –

੭੯. ‘‘ਅਤ੍ਥਿ ਲੋਕੇ ਸੀਲਗੁਣੋ, ਸਚ੍ਚਂ ਸੋਚੇਯ੍ਯਨੁਦ੍ਦਯਾ;

ਤੇਨ ਸਚ੍ਚੇਨ ਕਾਹਾਮਿ, ਸਚ੍ਚਕਿਰਿਯਮੁਤ੍ਤਮਂ.

੮੦. ‘‘ਆਵਜ੍ਜੇਤ੍ਵਾ ਧਮ੍ਮਬਲਂ, ਸਰਿਤ੍ਵਾ ਪੁਬ੍ਬਕੇ ਜਿਨੇ;

ਸਚ੍ਚਬਲਮਵਸ੍ਸਾਯ, ਸਚ੍ਚਕਿਰਿਯਮਕਾਸਹ’’ਨ੍ਤਿ.

੮੧. ਤਤ੍ਥ ਮਹਾਸਤ੍ਤੋ ਅਤੀਤੇ ਪਰਿਨਿਬ੍ਬੁਤਾਨਂ ਬੁਦ੍ਧਾਨਂ ਗੁਣੇ ਆਵਜ੍ਜੇਤ੍ਵਾ ਅਤ੍ਤਨਿ ਵਿਜ੍ਜਮਾਨਂ ਸਚ੍ਚਸਭਾਵਂ ਆਰਬ੍ਭ ਯਂ ਗਾਥਂ ਵਤ੍ਵਾ ਤਦਾ ਸਚ੍ਚਕਿਰਿਯਮਕਾਸਿ, ਤਂ ਦਸ੍ਸੇਤੁਂ ‘‘ਸਨ੍ਤਿ ਪਕ੍ਖਾ’’ਤਿਆਦਿ ਵੁਤ੍ਤਂ.

ਤਤ੍ਥ ਸਨ੍ਤਿ ਪਕ੍ਖਾ ਅਪਤਨਾਤਿ ਮਯ੍ਹਂ ਪਕ੍ਖਾ ਨਾਮ ਅਤ੍ਥਿ ਉਪਲਬ੍ਭਨ੍ਤਿ, ਨੋ ਚ ਖੋ ਸਕ੍ਕਾ ਏਤੇਹਿ ਉਪ੍ਪਤਿਤੁਂ ਆਕਾਸੇਨ ਗਨ੍ਤੁਨ੍ਤਿ ਅਪਤਨਾ. ਸਨ੍ਤਿ ਪਾਦਾ ਅਵਞ੍ਚਨਾਤਿ ਪਾਦਾਪਿ ਮੇ ਅਤ੍ਥਿ, ਤੇਹਿ ਪਨ ਵਞ੍ਚਿਤੁਂ ਪਦਵਾਰਗਮਨੇਨ ਗਨ੍ਤੁਂ ਨ ਸਕ੍ਕਾਤਿ ਅਵਞ੍ਚਨਾ. ਮਾਤਾਪਿਤਾ ਚ ਨਿਕ੍ਖਨ੍ਤਾਤਿ ਯੇ ਮਂ ਅਞ੍ਞਤ੍ਥ ਨੇਯ੍ਯੁਂ, ਤੇਪਿ ਮਰਣਭਯੇਨ ਮਮ ਮਾਤਾਪਿਤਰੋ ਨਿਕ੍ਖਨ੍ਤਾ. ਜਾਤਵੇਦਾਤਿ ਅਗ੍ਗਿਂ ਆਲਪਤਿ. ਸੋ ਹਿ ਜਾਤੋਵ ਵੇਦਿਯਤਿ, ਧੂਮਜਾਲੁਟ੍ਠਾਨੇਨ ਪਞ੍ਞਾਯਤਿ, ਤਸ੍ਮਾ ‘‘ਜਾਤਵੇਦੋ’’ਤਿ ਵੁਚ੍ਚਤਿ. ਪਟਿਕ੍ਕਮਾਤਿ ਪਟਿਗਚ੍ਛ ਨਿਵਤ੍ਤਾਤਿ ਜਾਤਵੇਦਂ ਆਣਾਪੇਤਿ.

ਇਤਿ ਮਹਾਸਤ੍ਤੋ ‘‘ਸਚੇ ਮਯ੍ਹਂ ਪਕ੍ਖਾਨਂ ਅਤ੍ਥਿਭਾਵੋ, ਤੇ ਚ ਪਸਾਰੇਤ੍ਵਾ ਆਕਾਸੇ ਅਪਤਨਭਾਵੋ, ਪਾਦਾਨਂ ਅਤ੍ਥਿਭਾਵੋ, ਤੇ ਚ ਉਕ੍ਖਿਪਿਤ੍ਵਾ ਅਵਞ੍ਚਨਭਾਵੋ, ਮਾਤਾਪਿਤੂਨਂ ਮਂ ਕੁਲਾਵਕੇਯੇਵ ਛਡ੍ਡੇਤ੍ਵਾ ਪਲਾਤਭਾਵੋ ਚ ਸਚ੍ਚਸਭਾਵਭੂਤੋ ਏਵ, ਜਾਤਵੇਦ, ਏਤੇਨ ਸਚ੍ਚੇਨ ਤ੍ਵਂ ਇਤੋ ਪਟਿਕ੍ਕਮਾ’’ਤਿ ਕੁਲਾਵਕੇ ਨਿਪਨ੍ਨੋਵ ਸਚ੍ਚਕਿਰਿਯਂ ਅਕਾਸਿ. ਤਸ੍ਸ ਸਹ ਸਚ੍ਚਕਿਰਿਯਾਯ ਸੋਲ਼ਸਕਰੀਸਮਤ੍ਤੇ ਠਾਨੇ ਜਾਤਵੇਦੋ ਪਟਿਕ੍ਕਮਿ. ਪਟਿਕ੍ਕਮਨ੍ਤੋ ਚ ਨ ਝਾਯਮਾਨੋਵ ਅਰਞ੍ਞਂ ਗਤੋ, ਉਦਕੇ ਪਨ ਓਪਿਲਾਪਿਤਉਕ੍ਕਾ ਵਿਯ ਤਤ੍ਥੇਵ ਨਿਬ੍ਬਾਯਿ. ਤੇਨ ਵੁਤ੍ਤਂ –

੮੨. ‘‘ਸਹ ਸਚ੍ਚੇ ਕਤੇ ਮਯ੍ਹਂ, ਮਹਾਪਜ੍ਜਲਿਤੋ ਸਿਖੀ;

ਵਜ੍ਜੇਸਿ ਸੋਲ਼ਸਕਰੀਸਾਨਿ, ਉਦਕਂ ਪਤ੍ਵਾ ਯਥਾ ਸਿਖੀ’’ਤਿ.

ਸਾ ਪਨੇਸਾ ਬੋਧਿਸਤ੍ਤਸ੍ਸ ਵਟ੍ਟਕਯੋਨਿਯਂ ਤਸ੍ਮਿਂ ਸਮਯੇ ਬੁਦ੍ਧਗੁਣਾਨਂ ਆਵਜ੍ਜਨਪੁਬ੍ਬਿਕਾ ਸਚ੍ਚਕਿਰਿਯਾ ਅਨਞ੍ਞਸਾਧਾਰਣਾਤਿ ਆਹ ‘‘ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ. ਤੇਨੇਵ ਹਿ ਤਸ੍ਸ ਠਾਨਸ੍ਸ ਸਕਲੇਪਿ ਇਮਸ੍ਮਿਂ ਕਪ੍ਪੇ ਅਗ੍ਗਿਨਾ ਅਨਭਿਭਵਨੀਯਤ੍ਤਾ ਤਂ ਕਪ੍ਪਟ੍ਠਿਯਪਾਟਿਹਾਰਿਯਂ ਨਾਮ ਜਾਤਂ.

ਏਵਂ ਮਹਾਸਤ੍ਤੋ ਸਚ੍ਚਕਿਰਿਯਵਸੇਨ ਅਤ੍ਤਨੋ ਤਤ੍ਥ ਵਾਸੀਨਂ ਸਤ੍ਤਾਨਞ੍ਚ ਸੋਤ੍ਥਿਂ ਕਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਤਦਾ ਮਾਤਾਪਿਤਰੋ ਏਤਰਹਿ ਮਾਤਾਪਿਤਰੋ ਅਹੇਸੁਂ, ਵਟ੍ਟਕਰਾਜਾ ਪਨ ਲੋਕਨਾਥੋ.

ਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋਪਿ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਤਥਾ ਦਾਵਗ੍ਗਿਮ੍ਹਿ ਤਥਾ ਭੇਰਵਾਕਾਰੇਨ ਅਵਤ੍ਥਰਿਤ੍ਵਾ ਆਗਚ੍ਛਨ੍ਤੇ ਤਸ੍ਮਿਂ ਵਯੇ ਏਕਕੋ ਹੁਤ੍ਵਾਪਿ ਸਾਰਦਂ ਅਨਾਪਜ੍ਜਿਤ੍ਵਾ ਸਚ੍ਚਾਦਿਧਮ੍ਮਗੁਣੇ ਬੁਦ੍ਧਗੁਣੇ ਚ ਅਨੁਸ੍ਸਰਿਤ੍ਵਾ ਅਤ੍ਤਨੋ ਏਵ ਆਨੁਭਾਵਂ ਨਿਸ੍ਸਾਯ ਸਚ੍ਚਕਿਰਿਯਾਯ ਤਤ੍ਥ ਵਾਸੀਨਮ੍ਪਿ ਸਤ੍ਤਾਨਂ ਸੋਤ੍ਥਿਭਾਵਾਪਾਦਨਾਦਯੋ ਆਨੁਭਾਵਾ ਵਿਭਾਵੇਤਬ੍ਬਾ.

ਵਟ੍ਟਪੋਤਕਚਰਿਯਾਵਣ੍ਣਨਾ ਨਿਟ੍ਠਿਤਾ.