੩. ਯੁਧਞ੍ਜਯਵਗ੍ਗੋ

੧. ਯੁਧਞ੍ਜਯਚਰਿਯਾਵਣ੍ਣਨਾ

੧. ਤਤਿਯਵਗ੍ਗਸ੍ਸ ਪਠਮੇ ਅਮਿਤਯਸੋਤਿ ਅਪਰਿਮਿਤਪਰਿਵਾਰਵਿਭਵੋ. ਰਾਜਪੁਤ੍ਤੋ ਯੁਧਞ੍ਜਯੋਤਿ ਰਮ੍ਮਨਗਰੇ ਸਬ੍ਬਦਤ੍ਤਸ੍ਸ ਨਾਮ ਰਞ੍ਞੋ ਪੁਤ੍ਤੋ ਨਾਮੇਨ ਯੁਧਞ੍ਜਯੋ ਨਾਮ.

ਅਯਞ੍ਹਿ ਬਾਰਾਣਸੀ ਉਦਯਜਾਤਕੇ (ਜਾ. ੧.੧੧.੩੭ ਆਦਯੋ) ਸੁਰੁਨ੍ਧਨਨਗਰਂ ਨਾਮ ਜਾਤਾ. ਚੂਲ਼ਸੁਤਸੋਮਜਾਤਕੇ (ਜਾ. ੨.੧੭.੧੯੫ ਆਦਯੋ) ਸੁਦਸ੍ਸਨਂ ਨਾਮ, ਸੋਣਨਨ੍ਦਜਾਤਕੇ (ਜਾ. ੨.੨੦.੯੨ ਆਦਯੋ) ਬ੍ਰਹ੍ਮਵਡ੍ਢਨਂ ਨਾਮ, ਖਣ੍ਡਹਾਲਜਾਤਕੇ(ਜਾ. ੨.੨੨.੯੮੨ ਆਦਯੋ) ਪੁਪ੍ਫਵਤੀ ਨਾਮ, ਇਮਸ੍ਮਿਂ ਪਨ ਯੁਧਞ੍ਜਯਜਾਤਕੇ (ਜਾ. ੧.੧੧.੭੩ ਆਦਯੋ) ਰਮ੍ਮਨਗਰਂ ਨਾਮ ਅਹੋਸਿ, ਏਵਮਸ੍ਸ ਕਦਾਚਿ ਨਾਮਂ ਪਰਿਵਤ੍ਤਤਿ. ਤੇਨ ਵੁਤ੍ਤਂ – ‘‘ਰਾਜਪੁਤ੍ਤੋਤਿ ਰਮ੍ਮਨਗਰੇ ਸਬ੍ਬਦਤ੍ਤਸ੍ਸ ਨਾਮ ਰਞ੍ਞੋ ਪੁਤ੍ਤੋ’’ਤਿ. ਤਸ੍ਸ ਪਨ ਰਞ੍ਞੋ ਪੁਤ੍ਤਸਹਸ੍ਸਂ ਅਹੋਸਿ. ਬੋਧਿਸਤ੍ਤੋ ਜੇਟ੍ਠਪੁਤ੍ਤੋ, ਤਸ੍ਸ ਰਾਜਾ ਉਪਰਜ੍ਜਂ ਅਦਾਸਿ. ਸੋ ਹੇਟ੍ਠਾ ਵੁਤ੍ਤਨਯੇਨੇਵ ਦਿਵਸੇ ਦਿਵਸੇ ਮਹਾਦਾਨਂ ਪਵਤ੍ਤੇਸਿ. ਏਵਂ ਗਚ੍ਛਨ੍ਤੇ ਕਾਲੇ ਬੋਧਿਸਤ੍ਤੋ ਏਕਦਿਵਸਂ ਪਾਤੋਵ ਰਥਵਰਂ ਅਭਿਰੁਹਿਤ੍ਵਾ ਮਹਨ੍ਤੇਨ ਸਿਰਿਵਿਭਵੇਨ ਉਯ੍ਯਾਨਕੀਲ਼ਂ ਗਚ੍ਛਨ੍ਤੋ ਰੁਕ੍ਖਗ੍ਗਤਿਣਗ੍ਗਸਾਖਗ੍ਗਮਕ੍ਕਟਕਸੁਤ੍ਤਜਾਲਾਦੀਸੁ ਮੁਤ੍ਤਾਜਾਲਾਕਾਰੇਨ ਲਗ੍ਗੇ ਉਸ੍ਸਾਵਬਿਨ੍ਦੂ ਦਿਸ੍ਵਾ ‘‘ਸਮ੍ਮ ਸਾਰਥਿ, ਕਿਂ ਨਾਮੇਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਏਤੇ, ਦੇਵ, ਹਿਮਸਮਯੇ ਪਤਨਕਉਸ੍ਸਾਵਬਿਨ੍ਦੂ ਨਾਮਾ’’ਤਿ ਸੁਤ੍ਵਾ ਦਿਵਸਭਾਗਂ ਉਯ੍ਯਾਨੇ ਕੀਲ਼ਿਤ੍ਵਾ ਸਾਯਨ੍ਹਕਾਲੇ ਪਚ੍ਚਾਗਚ੍ਛਨ੍ਤੋ ਤੇ ਅਦਿਸ੍ਵਾ ‘‘ਸਮ੍ਮ ਸਾਰਥਿ, ਕਹਂ ਤੇ ਉਸ੍ਸਾਵਬਿਨ੍ਦੂ, ਨ ਤੇ ਇਦਾਨਿ ਪਸ੍ਸਾਮੀ’’ਤਿ ਪੁਚ੍ਛਿਤ੍ਵਾ ‘‘ਦੇਵ, ਸੂਰਿਯੇ ਉਗ੍ਗਚ੍ਛਨ੍ਤੇ ਸਬ੍ਬੇ ਭਿਜ੍ਜਿਤ੍ਵਾ ਵਿਲਯਂ ਗਚ੍ਛਨ੍ਤੀ’’ਤਿ ਸੁਤ੍ਵਾ ‘‘ਯਥਾ ਇਮੇ ਉਪ੍ਪਜ੍ਜਿਤ੍ਵਾ ਭਿਜ੍ਜਨ੍ਤਿ, ਏਵਂ ਇਮੇਸਂ ਸਤ੍ਤਾਨਂ ਜੀਵਿਤਸਙ੍ਖਾਰਾਪਿ ਤਿਣਗ੍ਗੇ ਉਸ੍ਸਾਵਬਿਨ੍ਦੁਸਦਿਸਾਵ, ਤਸ੍ਮਾ ਮਯਾ ਬ੍ਯਾਧਿਜਰਾਮਰਣੇਹਿ ਅਪੀਲ਼ਿਤੇਨੇਵ ਮਾਤਾਪਿਤਰੋ ਆਪੁਚ੍ਛਿਤ੍ਵਾ ਪਬ੍ਬਜਿਤੁਂ ਵਟ੍ਟਤੀ’’ਤਿ ਉਸ੍ਸਾਵਬਿਨ੍ਦੁਮੇਵ ਆਰਮ੍ਮਣਂ ਕਤ੍ਵਾ ਆਦਿਤ੍ਤੇ ਵਿਯ ਤਯੋ ਭਵੇ ਪਸ੍ਸਨ੍ਤੋ ਅਤ੍ਤਨੋ ਗੇਹਂ ਆਗਨ੍ਤ੍ਵਾ ਅਲਙ੍ਕਤਪਟਿਯਤ੍ਤਾਯ ਵਿਨਿਚ੍ਛਯਸਾਲਾਯ ਨਿਸਿਨ੍ਨਸ੍ਸ ਪਿਤੁ ਸਨ੍ਤਿਕਮੇਵ ਗਨ੍ਤ੍ਵਾ ਪਿਤਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਪਬ੍ਬਜ੍ਜਂ ਯਾਚਿ. ਤੇਨ ਵੁਤ੍ਤਂ –

‘‘ਉਸ੍ਸਾਵਬਿਨ੍ਦੁਂ ਸੂਰਿਯਾਤਪੇ, ਪਤਿਤਂ ਦਿਸ੍ਵਾਨ ਸਂਵਿਜਿਂ.

੨. ‘‘ਤਞ੍ਞੇਵਾਧਿਪਤਿਂ ਕਤ੍ਵਾ, ਸਂਵੇਗਮਨੁਬ੍ਰੂਹਯਿਂ;

ਮਾਤਾਪਿਤੂ ਚ ਵਨ੍ਦਿਤ੍ਵਾ, ਪਬ੍ਬਜ੍ਜਮਨੁਯਾਚਹ’’ਨ੍ਤਿ.

ਤਤ੍ਥ ਸੂਰਿਯਾਤਪੇਤਿ ਸੂਰਿਯਾਤਪਹੇਤੁ, ਸੂਰਿਯਰਸ੍ਮਿਸਮ੍ਫਸ੍ਸਨਿਮਿਤ੍ਤਂ. ‘‘ਸੂਰਿਯਾਤਪੇਨਾ’’ਤਿਪਿ ਪਾਠੋ. ਪਤਿਤਂ ਦਿਸ੍ਵਾਨਾਤਿ ਵਿਨਟ੍ਠਂ ਪਸ੍ਸਿਤ੍ਵਾ, ਪੁਬ੍ਬੇ ਰੁਕ੍ਖਗ੍ਗਾਦੀਸੁ ਮੁਤ੍ਤਾਜਾਲਾਦਿਆਕਾਰੇਨ ਲਗ੍ਗਂ ਹੁਤ੍ਵਾ ਦਿਸ੍ਸਮਾਨਂ ਸੂਰਿਯਰਸ੍ਮਿਸਮ੍ਫਸ੍ਸੇਨ ਵਿਨਟ੍ਠਂ ਪਞ੍ਞਾਚਕ੍ਖੁਨਾ ਓਲੋਕੇਤ੍ਵਾ. ਸਂਵਿਜਿਨ੍ਤਿ ਯਥਾ ਏਤਾਨਿ, ਏਵਂ ਸਤ੍ਤਾਨਂ ਜੀਵਿਤਾਨਿਪਿ ਲਹੁਂ ਲਹੁਂ ਭਿਜ੍ਜਮਾਨਸਭਾਵਾਨੀਤਿ ਅਨਿਚ੍ਚਤਾਮਨਸਿਕਾਰਵਸੇਨ ਸਂਵੇਗਮਾਪਜ੍ਜਿਂ.

ਤਞ੍ਞੇਵਾਧਿਪਤਿਂ ਕਤ੍ਵਾ, ਸਂਵੇਗਮਨੁਬ੍ਰੂਹਯਿਨ੍ਤਿ ਤਞ੍ਞੇਵ ਉਸ੍ਸਾਵਬਿਨ੍ਦੂਨਂ ਅਨਿਚ੍ਚਤਂ ਅਧਿਪਤਿਂ ਮੁਖਂ ਪੁਬ੍ਬਙ੍ਗਮਂ ਪੁਰੇਚਾਰਿਕਂ ਕਤ੍ਵਾ ਤਥੇਵ ਸਬ੍ਬਸਙ੍ਖਾਰਾਨਂ ਇਤ੍ਤਰਟ੍ਠਿਤਿਕਤਂ ਪਰਿਤ੍ਤਕਾਲਤਂ ਮਨਸਿਕਰੋਨ੍ਤੋ ਏਕਵਾਰਂ ਉਪ੍ਪਨ੍ਨਂ ਸਂਵੇਗਂ ਪੁਨਪ੍ਪੁਨਂ ਉਪ੍ਪਾਦਨੇਨ ਅਨੁਵਡ੍ਢੇਸਿਂ. ਪਬ੍ਬਜ੍ਜਮਨੁਯਾਚਹਨ੍ਤਿ ‘‘ਤਿਣਗ੍ਗੇ ਉਸ੍ਸਾਵਬਿਨ੍ਦੂ ਵਿਯ ਨ ਚਿਰਟ੍ਠਿਤਿਕੇ ਸਤ੍ਤਾਨਂ ਜੀਵਿਤੇ ਮਯਾ ਬ੍ਯਾਧਿਜਰਾਮਰਣੇਹਿ ਅਨਭਿਭੂਤੇਨੇਵ ਪਬ੍ਬਜਿਤ੍ਵਾ ਯਤ੍ਥ ਏਤਾਨਿ ਨ ਸਨ੍ਤਿ, ਤਂ ਅਮਤਂ ਮਹਾਨਿਬ੍ਬਾਨਂ ਗਵੇਸਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਪਬ੍ਬਜ੍ਜਂ ਮੇ ਅਨੁਜਾਨਾਥਾ’’ਤਿ ਤੇ ਅਹਂ ਪਬ੍ਬਜ੍ਜਂ ਯਾਚਿਂ. ਏਵਂ ਮਹਾਸਤ੍ਤੇਨ ਪਬ੍ਬਜ੍ਜਾਯ ਯਾਚਿਤਾਯ ਸਕਲਨਗਰੇ ਮਹਨ੍ਤਂ ਕੋਲਾਹਲਮਹੋਸਿ – ‘‘ਉਪਰਾਜਾ ਕਿਰ ਯੁਧਞ੍ਜਯੋ ਪਬ੍ਬਜਿਤੁਕਾਮੋ’’ਤਿ.

ਤੇਨ ਚ ਸਮਯੇਨ ਕਾਸਿਰਟ੍ਠਵਾਸਿਨੋ ਰਾਜਾਨਂ ਦਟ੍ਠੁਂ ਆਗਨ੍ਤ੍ਵਾ ਰਮ੍ਮਕੇ ਪਟਿਵਸਨ੍ਤਿ. ਤੇ ਸਬ੍ਬੇਪਿ ਸਨ੍ਨਿਪਤਿਂਸੁ. ਇਤਿ ਸਪਰਿਸੋ ਰਾਜਾ ਨੇਗਮਾ ਚੇਵ ਜਾਨਪਦਾ ਚ ਬੋਧਿਸਤ੍ਤਸ੍ਸ ਮਾਤਾ ਦੇਵੀ ਚ ਸਬ੍ਬੇ ਚ ਓਰੋਧਾ ਮਹਾਸਤ੍ਤਂ ‘‘ਮਾ ਖੋ ਤ੍ਵਂ, ਤਾਤ ਕੁਮਾਰ, ਪਬ੍ਬਜੀ’’ਤਿ ਨਿਵਾਰੇਸੁਂ. ਤਤ੍ਥ ਰਾਜਾ ‘‘ਸਚੇ ਤੇ ਕਾਮੇਹਿ ਊਨਂ, ਅਹਂ ਤੇ ਪਰਿਪੂਰਯਾਮਿ, ਅਜ੍ਜੇਵ ਰਜ੍ਜਂ ਪਟਿਪਜ੍ਜਾਹੀ’’ਤਿ ਆਹ. ਤਸ੍ਸ ਮਹਾਸਤ੍ਤੋ –

‘‘ਮਾ ਮਂ ਦੇਵ ਨਿਵਾਰੇਹਿ, ਪਬ੍ਬਜਨ੍ਤਂ ਰਥੇਸਭ;

ਮਾਹਂ ਕਾਮੇਹਿ ਸਮ੍ਮਤ੍ਤੋ, ਜਰਾਯ ਵਸਮਨ੍ਵਗੂ’’ਤਿ. (ਜਾ. ੧.੧੧.੭੭) –

ਅਤ੍ਤਨੋ ਪਬ੍ਬਜ੍ਜਾਛਨ੍ਦਮੇਵ ਵਤ੍ਵਾ ਤਂ ਸੁਤ੍ਵਾ ਸਦ੍ਧਿਂ ਓਰੋਧੇਹਿ ਮਾਤੁਯਾ ਕਰੁਣਂ ਪਰਿਦੇਵਨ੍ਤਿਯਾ –

‘‘ਉਸ੍ਸਾਵੋਵ ਤਿਣਗ੍ਗਮ੍ਹਿ, ਸੂਰਿਯੁਗ੍ਗਮਨਂ ਪਤਿ;

ਏਵਮਾਯੁ ਮਨੁਸ੍ਸਾਨਂ, ਮਾ ਮਂ ਅਮ੍ਮ ਨਿਵਾਰਯਾ’’ਤਿ. (ਜਾ. ੧.੧੧.੭੯) –

ਅਤ੍ਤਨੋ ਪਬ੍ਬਜ੍ਜਾਕਾਰਣਂ ਕਥੇਤ੍ਵਾ ਨਾਨਪ੍ਪਕਾਰਂ ਤੇਹਿ ਯਾਚਿਯਮਾਨੋਪਿ ਅਭਿਸਂਵਡ੍ਢਮਾਨਸਂਵੇਗਤ੍ਤਾ ਅਨੋਸਕ੍ਕਿਤਮਾਨਸੋ ਪਿਯਤਰੇ ਮਹਤਿ ਞਾਤਿਪਰਿਵਟ੍ਟੇ ਉਲ਼ਾਰੇ ਰਾਜਿਸ੍ਸਰਿਯੇ ਚ ਨਿਰਪੇਕ੍ਖਚਿਤ੍ਤੋ ਪਬ੍ਬਜਿ. ਤੇਨ ਵੁਤ੍ਤਂ –

੩. ‘‘ਯਾਚਨ੍ਤਿ ਮਂ ਪਞ੍ਜਲਿਕਾ, ਸਨੇਗਮਾ ਸਰਟ੍ਠਕਾ;

ਅਜ੍ਜੇਵ ਪੁਤ੍ਤ ਪਟਿਪਜ੍ਜ, ਇਦ੍ਧਂ ਫੀਤਂ ਮਹਾਮਹਿਂ.

੪. ‘‘ਸਰਾਜਕੇ ਸਹੋਰੋਧੇ, ਸਨੇਗਮੇ ਸਰਟ੍ਠਕੇ;

ਕਰੁਣਂ ਪਰਿਦੇਵਨ੍ਤੇ, ਅਨਪੇਕ੍ਖੋ ਪਰਿਚ੍ਚਜਿ’’ਨ੍ਤਿ.

ਤਤ੍ਥ ਪਞ੍ਜਲਿਕਾਤਿ ਪਗ੍ਗਹਿਤਅਞ੍ਜਲਿਕਾ. ਸਨੇਗਮਾ ਸਰਟ੍ਠਕਾਤਿ ਨੇਗਮੇਹਿ ਚੇਵ ਰਟ੍ਠਵਾਸੀਹਿ ਚ ਸਦ੍ਧਿਂ ਸਬ੍ਬੇ ਰਾਜਪੁਰਿਸਾ ‘‘ਮਾ ਖੋ, ਤ੍ਵਂ ਦੇਵ, ਪਬ੍ਬਜੀ’’ਤਿ ਮਂ ਯਾਚਨ੍ਤਿ. ਮਾਤਾਪਿਤਰੋ ਪਨ ਅਜ੍ਜੇਵ ਪੁਤ੍ਤ ਪਟਿਪਜ੍ਜ, ਗਾਮਨਿਗਮਰਾਜਧਾਨਿਅਭਿਵੁਦ੍ਧਿਯਾ ਵੇਪੁਲ੍ਲਪ੍ਪਤ੍ਤਿਯਾ ਚ, ਇਦ੍ਧਂ ਵਿਭਵਸਾਰਸਮ੍ਪਤ੍ਤਿਯਾ ਸਸ੍ਸਾਦਿਨਿਪ੍ਫਤ੍ਤਿਯਾ ਚ, ਫੀਤਂ ਇਮਂ ਮਹਾਮਹਿਂ ਅਨੁਸਾਸ, ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਂ ਕਾਰੇਹੀਤਿ ਯਾਚਨ੍ਤਿ. ਏਵਂ ਪਨ ਸਹ ਰਞ੍ਞਾਤਿ ਸਰਾਜਕੇ, ਤਥਾ ਸਹੋਰੋਧੇ ਸਨੇਗਮੇ ਸਰਟ੍ਠਕੇ ਮਹਾਜਨੇ ਯਥਾ ਸੁਣਨ੍ਤਾਨਮ੍ਪਿ ਪਗੇਵ ਪਸ੍ਸਨ੍ਤਾਨਂ ਮਹਨ੍ਤਂ ਕਾਰੁਞ੍ਞਂ ਹੋਤਿ, ਏਵਂ ਕਰੁਣਂ ਪਰਿਦੇਵਨ੍ਤੇ ਤਤ੍ਥ ਤਤ੍ਥ ਅਨਪੇਕ੍ਖੋ ਅਲਗ੍ਗਚਿਤ੍ਤੋ ‘‘ਅਹਂ ਤਦਾ ਪਬ੍ਬਜਿ’’ਨ੍ਤਿ ਦਸ੍ਸੇਤਿ.

੫-੬. ਇਦਾਨਿ ਯਦਤ੍ਥਂ ਚਕ੍ਕਵਤ੍ਤਿਸਿਰਿਸਦਿਸਂ ਰਜ੍ਜਸਿਰਿਂ ਪਿਯਤਰੇ ਞਾਤਿਬਨ੍ਧਵੇ ਪਹਾਯ ਸਿਨਿਦ੍ਧਂ ਪਰਿਗ੍ਗਹਪਰਿਜਨਂ ਲੋਕਾਭਿਮਤਂ ਮਹਨ੍ਤਂ ਯਸਞ੍ਚ ਨਿਰਪੇਕ੍ਖੋ ਪਰਿਚ੍ਚਜਿਨ੍ਤਿ ਦਸ੍ਸੇਤੁਂ ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਕੇਵਲਨ੍ਤਿ ਅਨਵਸੇਸਂ ਇਤ੍ਥਾਗਾਰਂ ਸਮੁਦ੍ਦਪਰਿਯਨ੍ਤਞ੍ਚ ਪਥਵਿਂ ਪਬ੍ਬਜ੍ਜਾਧਿਪ੍ਪਾਯੇਨ ਚਜਮਾਨੋ ਏਵਂ ਮੇ ਸਮ੍ਮਾਸਮ੍ਬੋਧਿ ਸਕ੍ਕਾ ਅਧਿਗਨ੍ਤੁਨ੍ਤਿ ਬੋਧਿਯਾਯੇਵ ਕਾਰਣਾ ਨ ਕਿਞ੍ਚਿ ਚਿਨ੍ਤੇਸਿਂ, ਨ ਤਤ੍ਥ ਈਸਕਂ ਲਗ੍ਗਂ ਜਨੇਸਿਨ੍ਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਮਾਤਾਪਿਤਰੋ ਤਞ੍ਚ ਮਹਾਯਸਂ ਰਜ੍ਜਞ੍ਚ ਮੇ ਨ ਦੇਸ੍ਸਂ, ਪਿਯਮੇਵ, ਤਤੋ ਪਨ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਸਬ੍ਬਞ੍ਞੁਤਞ੍ਞਾਣਮੇਵ ਮਯ੍ਹਂ ਪਿਯਤਰਂ, ਤਸ੍ਮਾ ਮਾਤਾਦੀਹਿ ਸਦ੍ਧਿਂ ਰਜ੍ਜਂ ਅਹਂ ਤਦਾ ਪਰਿਚ੍ਚਜਿਨ੍ਤਿ.

ਤਦੇਤਂ ਸਬ੍ਬਂ ਪਰਿਚ੍ਚਜਿਤ੍ਵਾ ਪਬ੍ਬਜ੍ਜਾਯ ਮਹਾਸਤ੍ਤੇ ਨਿਕ੍ਖਮਨ੍ਤੇ ਤਸ੍ਸ ਕਨਿਟ੍ਠਭਾਤਾ ਯੁਧਿਟ੍ਠਿਲਕੁਮਾਰੋ ਨਾਮ ਪਿਤਰਂ ਵਨ੍ਦਿਤ੍ਵਾ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਬੋਧਿਸਤ੍ਤਂ ਅਨੁਬਨ੍ਧਿ. ਤੇ ਉਭੋਪਿ ਨਗਰਾ ਨਿਕ੍ਖਮ੍ਮ ਮਹਾਜਨਂ ਨਿਵਤ੍ਤੇਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਮਨੋਰਮੇ ਠਾਨੇ ਅਸ੍ਸਮਪਦਂ ਕਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਵਨਮੂਲਫਲਾਦੀਹਿ ਯਾਵਜੀਵਂ ਯਾਪੇਤ੍ਵਾ ਬ੍ਰਹ੍ਮਲੋਕਪਰਾਯਨਾ ਅਹੇਸੁਂ. ਤੇਨਾਹ ਭਗਵਾ –

‘‘ਉਭੋ ਕੁਮਾਰਾ ਪਬ੍ਬਜਿਤਾ, ਯੁਧਞ੍ਜਯੋ ਯੁਧਿਟ੍ਠਿਲੋ;

ਪਹਾਯ ਮਾਤਾਪਿਤਰੋ, ਸਙ੍ਗਂ ਛੇਤ੍ਵਾਨ ਮਚ੍ਚੁਨੋ’’ਤਿ. (ਜਾ. ੧.੧੧.੮੩);

ਤਤ੍ਥ ਸਙ੍ਗਂ ਛੇਤ੍ਵਾਨ ਮਚ੍ਚੁਨੋਤਿ ਮਚ੍ਚੁਮਾਰਸ੍ਸ ਸਹਕਾਰਿਕਾਰਣਭੂਤਤ੍ਤਾ ਸਨ੍ਤਕਂ ਰਾਗਦੋਸਮੋਹਸਙ੍ਗਂ ਵਿਕ੍ਖਮ੍ਭਨਵਸੇਨ ਛਿਨ੍ਦਿਤ੍ਵਾ ਉਭੋਪਿ ਪਬ੍ਬਜਿਤਾਤਿ.

ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਯੁਧਿਟ੍ਠਿਲਕੁਮਾਰੋ ਆਨਨ੍ਦਤ੍ਥੇਰੋ, ਯੁਧਞ੍ਜਯੋ ਲੋਕਨਾਥੋ.

ਤਸ੍ਸ ਪਬ੍ਬਜ੍ਜਤੋ ਪੁਬ੍ਬੇ ਪਵਤ੍ਤਿਤਮਹਾਦਾਨਾਨਿ ਚੇਵ ਰਜ੍ਜਾਦਿਪਰਿਚ੍ਚਾਗੋ ਚ ਦਾਨਪਾਰਮੀ, ਕਾਯਵਚੀਸਂਵਰੋ ਸੀਲਪਾਰਮੀ, ਪਬ੍ਬਜ੍ਜਾ ਚ ਝਾਨਾਧਿਗਮੋ ਚ ਨੇਕ੍ਖਮ੍ਮਪਾਰਮੀ, ਅਨਿਚ੍ਚਤੋ ਮਨਸਿਕਾਰਂ ਆਦਿਂ ਕਤ੍ਵਾ ਅਭਿਞ੍ਞਾਧਿਗਮਪਰਿਯੋਸਾਨਾ ਪਞ੍ਞਾ ਦਾਨਾਦੀਨਂ ਉਪਕਾਰਾਨੁਪਕਾਰਧਮ੍ਮਪਰਿਗ੍ਗਣ੍ਹਨਪਞ੍ਞਾ ਚ ਪਞ੍ਞਾਪਾਰਮੀ, ਸਬ੍ਬਤ੍ਥ ਤਦਤ੍ਥਸਾਧਨਂ ਵੀਰਿਯਂ ਵੀਰਿਯਪਾਰਮੀ, ਞਾਣਖਨ੍ਤਿ ਅਧਿਵਾਸਨਖਨ੍ਤਿ ਚ ਖਨ੍ਤਿਪਾਰਮੀ, ਪਟਿਞ੍ਞਾਯ ਅਵਿਸਂਵਾਦਨਂ ਸਚ੍ਚਪਾਰਮੀ, ਸਬ੍ਬਤ੍ਥ ਅਚਲਸਮਾਦਾਨਾਧਿਟ੍ਠਾਨਂ ਅਧਿਟ੍ਠਾਨਪਾਰਮੀ, ਸਬ੍ਬਸਤ੍ਤੇਸੁ ਹਿਤਚਿਤ੍ਤਤਾਯ ਮੇਤ੍ਤਾਬ੍ਰਹ੍ਮਵਿਹਾਰਵਸੇਨ ਚ ਮੇਤ੍ਤਾਪਾਰਮੀ, ਸਤ੍ਤਸਙ੍ਖਾਰਕਤਵਿਪ੍ਪਕਾਰਉਪੇਕ੍ਖਨਵਸੇਨ ਉਪੇਕ੍ਖਾਬ੍ਰਹ੍ਮਵਿਹਾਰਵਸੇਨ ਚ ਉਪੇਕ੍ਖਾਪਾਰਮੀਤਿ ਦਸ ਪਾਰਮਿਯੋ ਲਬ੍ਭਨ੍ਤਿ. ਵਿਸੇਸਤੋ ਪਨ ਨੇਕ੍ਖਮ੍ਮਪਾਰਮੀਤਿ ਵੇਦਿਤਬ੍ਬਾ. ਤਥਾ ਅਕਿਤ੍ਤਿਚਰਿਯਾਯਂ ਵਿਯ ਇਧਾਪਿ ਮਹਾਪੁਰਿਸਸ੍ਸ ਅਚ੍ਛਰਿਯਗੁਣਾ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਤੇਨ ਵੁਚ੍ਚਤਿ ‘‘ਏਵਂ ਅਚ੍ਛਰਿਯਾ ਹੇਤੇ, ਅਬ੍ਭੁਤਾ ਚ ਮਹੇਸਿਨੋ…ਪੇ… ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਯੁਧਞ੍ਜਯਚਰਿਯਾਵਣ੍ਣਨਾ ਨਿਟ੍ਠਿਤਾ.

੨. ਸੋਮਨਸ੍ਸਚਰਿਯਾਵਣ੍ਣਨਾ

੭. ਦੁਤਿਯੇ ਇਨ੍ਦਪਤ੍ਥੇ ਪੁਰੁਤ੍ਤਮੇਤਿ ਏਵਂਨਾਮਕੇ ਨਗਰਵਰੇ. ਕਾਮਿਤੋਤਿ ਮਾਤਾਪਿਤੁਆਦੀਹਿ ‘‘ਅਹੋ ਵਤ ਏਕੋ ਪੁਤ੍ਤੋ ਉਪ੍ਪਜ੍ਜੇਯ੍ਯਾ’’ਤਿ ਏਵਂ ਚਿਰਕਾਲੇ ਪਤ੍ਥਿਤੋ. ਦਯਿਤੋਤਿ ਪਿਯਾਯਿਤੋ. ਸੋਮਨਸ੍ਸੋਤਿ ਵਿਸ੍ਸੁਤੋਤਿ ‘‘ਸੋਮਨਸ੍ਸੋ’’ਤਿ ਏਵਂ ਪਕਾਸਨਾਮੋ.

੮. ਸੀਲਵਾਤਿ ਦਸਕੁਸਲਕਮ੍ਮਪਥਸੀਲੇਨ ਚੇਵ ਆਚਾਰਸੀਲੇਨ ਚ ਸਮਨ੍ਨਾਗਤੋ. ਗੁਣਸਮ੍ਪਨ੍ਨੋਤਿ ਸਦ੍ਧਾਬਾਹੁਸਚ੍ਚਾਦਿਗੁਣੇਹਿ ਉਪੇਤੋ, ਪਰਿਪੁਣ੍ਣੋ ਵਾ. ਕਲ੍ਯਾਣਪਟਿਭਾਨਵਾਤਿ ਤਂਤਂਇਤਿਕਤ੍ਤਬ੍ਬਸਾਧਨੇਨ ਉਪਾਯਕੋਸਲ੍ਲਸਙ੍ਖਾਤੇਨ ਚ ਸੁਨ੍ਦਰੇਨ ਪਟਿਭਾਨੇਨ ਸਮਨ੍ਨਾਗਤੋ. ਵੁਡ੍ਢਾਪਚਾਯੀਤਿ ਮਾਤਾਪਿਤਰੋ ਕੁਲੇ ਜੇਟ੍ਠਾਤਿ ਏਵਂ ਯੇ ਜਾਤਿਵੁਡ੍ਢਾ, ਯੇ ਚ ਸੀਲਾਦਿਗੁਣੇਹਿ ਵੁਡ੍ਢਾ, ਤੇਸਂ ਅਪਚਾਯਨਸੀਲੋ. ਹਿਰੀਮਾਤਿ ਪਾਪਜਿਗੁਚ੍ਛਨਲਕ੍ਖਣਾਯ ਹਿਰਿਯਾ ਸਮਨ੍ਨਾਗਤੋ. ਸਙ੍ਗਹੇਸੁ ਚ ਕੋਵਿਦੋਤਿ ਦਾਨਪਿਯਵਚਨਅਤ੍ਥਚਰਿਯਾਸਮਾਨਤ੍ਤਤਾਸਙ੍ਖਾਤੇਹਿ ਚਤੂਹਿ ਸਙ੍ਗਹਵਤ੍ਥੂਹਿ ਯਥਾਰਹਂ ਸਤ੍ਤਾਨਂ ਸਙ੍ਗਣ੍ਹਨੇਸੁ ਕੁਸਲੋ. ਏਵਰੂਪੋ ਰੇਣੁਸ੍ਸ ਨਾਮ ਕੁਰੁਰਾਜਸ੍ਸ ਪੁਤ੍ਤੋ ਸੋਮਨਸ੍ਸੋਤਿ ਵਿਸ੍ਸੁਤੋ ਯਦਾ ਹੋਮੀਤਿ ਸਮ੍ਬਨ੍ਧੋ.

੯. ਤਸ੍ਸ ਰਞ੍ਞੋ ਪਤਿਕਰੋਤਿ ਤੇਨ ਕੁਰੁਰਾਜੇਨ ਪਤਿ ਅਭਿਕ੍ਖਣਂ ਉਪਕਤ੍ਤਬ੍ਬਭਾਵੇਨ ਪਤਿਕਰੋ ਵਲ੍ਲਭੋ. ਕੁਹਕਤਾਪਸੋਤਿ ਅਸਨ੍ਤਗੁਣਸਮ੍ਭਾਵਨਲਕ੍ਖਣੇਨ ਕੋਹਞ੍ਞੇਨ ਜੀਵਿਤਕਪ੍ਪਨਕੋ ਏਕੋ ਤਾਪਸੋ, ਤਸ੍ਸ ਰਞ੍ਞੋ ਸਕ੍ਕਾਤਬ੍ਬੋ ਅਹੋਸਿ. ਆਰਾਮਨ੍ਤਿ ਫਲਾਰਾਮਂ, ਯਤ੍ਥ ਏਲ਼ਾਲੁਕਲਾਬੁਕੁਮ੍ਭਣ੍ਡਤਿਪੁਸਾਦਿਵਲ੍ਲਿਫਲਾਨਿ ਚੇਵ ਤਣ੍ਡੁਲੇਯ੍ਯਕਾਦਿਸਾਕਞ੍ਚ ਰੋਪੀਯਤਿ. ਮਾਲਾਵਚ੍ਛਨ੍ਤਿ ਜਾਤਿਅਤਿਮੁਤ੍ਤਕਾਦਿਪੁਪ੍ਫਗਚ੍ਛਂ, ਤੇਨ ਪੁਪ੍ਫਾਰਾਮਂ ਦਸ੍ਸੇਤਿ. ਏਤ੍ਥ ਚ ਆਰਾਮਂ ਕਤ੍ਵਾ ਤਤ੍ਥ ਮਾਲਾਵਚ੍ਛਞ੍ਚ ਯਥਾਵੁਤ੍ਤਫਲਵਚ੍ਛਞ੍ਚ ਰੋਪੇਤ੍ਵਾ ਤਤੋ ਲਦ੍ਧਧਨਂ ਸਂਹਰਿਤ੍ਵਾ ਠਪੇਨ੍ਤੋ ਜੀਵਤੀਤਿ ਅਤ੍ਥੋ ਵੇਦਿਤਬ੍ਬੋ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਤਦਾ ਮਹਾਰਕ੍ਖਿਤੋ ਨਾਮ ਤਾਪਸੋ ਪਞ੍ਚਸਤਤਾਪਸਪਰਿਵਾਰੋ ਹਿਮਵਨ੍ਤੇ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਚਰਨ੍ਤੋ ਇਨ੍ਦਪਤ੍ਥਨਗਰਂ ਪਤ੍ਵਾ ਰਾਜੁਯ੍ਯਾਨੇ ਵਸਿਤ੍ਵਾ ਸਪਰਿਸੋ ਪਿਣ੍ਡਾਯ ਚਰਨ੍ਤੋ ਰਾਜਦ੍ਵਾਰਂ ਪਾਪੁਣਿ. ਰਾਜਾ ਇਸਿਗਣਂ ਦਿਸ੍ਵਾ ਇਰਿਯਾਪਥੇ ਪਸਨ੍ਨੋ ਅਲਙ੍ਕਤਮਹਾਤਲੇ ਨਿਸੀਦਾਪੇਤ੍ਵਾ ਪਣੀਤੇਨਾਹਾਰੇਨ ਪਰਿਵਿਸਿਤ੍ਵਾ ‘‘ਭਨ੍ਤੇ, ਇਮਂ ਵਸ੍ਸਾਰਤ੍ਤਂ ਮਮ ਉਯ੍ਯਾਨੇਯੇਵ ਵਸਥਾ’’ਤਿ ਵਤ੍ਵਾ ਤੇਹਿ ਸਦ੍ਧਿਂ ਉਯ੍ਯਾਨਂ ਗਨ੍ਤ੍ਵਾ ਵਸਨਟ੍ਠਾਨਾਨਿ ਕਾਰੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਦਤ੍ਵਾ ਨਿਕ੍ਖਮਿ. ਤਤੋ ਪਟ੍ਠਾਯ ਸਬ੍ਬੇਪਿ ਤੇ ਰਾਜਨਿਵੇਸਨੇ ਭੁਞ੍ਜਨ੍ਤਿ.

ਰਾਜਾ ਪਨ ਅਪੁਤ੍ਤਕੋ ਪੁਤ੍ਤੇ ਪਤ੍ਥੇਤਿ, ਪੁਤ੍ਤਾ ਨੁਪ੍ਪਜ੍ਜਨ੍ਤਿ. ਵਸ੍ਸਾਰਤ੍ਤਚ੍ਚਯੇਨ ਮਹਾਰਕ੍ਖਿਤੋ ‘‘ਹਿਮਵਨ੍ਤਂ ਗਮਿਸ੍ਸਾਮਾ’’ਤਿ ਰਾਜਾਨਂ ਆਪੁਚ੍ਛਿਤ੍ਵਾ ਰਞ੍ਞਾ ਕਤਸਕ੍ਕਾਰਸਮ੍ਮਾਨੋ ਨਿਕ੍ਖਮਿਤ੍ਵਾ ਅਨ੍ਤਰਾਮਗ੍ਗੇ ਮਜ੍ਝਨ੍ਹਿਕਸਮਯੇ ਮਗ੍ਗਾ ਓਕ੍ਕਮ੍ਮ ਏਕਸ੍ਸ ਸਨ੍ਦਚ੍ਛਾਯਸ੍ਸ ਰੁਕ੍ਖਸ੍ਸ ਹੇਟ੍ਠਾ ਸਪਰਿਸੋ ਨਿਸੀਦਿ. ਤਾਪਸਾ ਕਥਂ ਸਮੁਟ੍ਠਾਪੇਸੁਂ – ‘‘ਰਾਜਾ ਅਪੁਤ੍ਤਕੋ, ਸਾਧੁ ਵਤਸ੍ਸ ਸਚੇ ਰਾਜਪੁਤ੍ਤਂ ਲਭੇਯ੍ਯਾ’’ਤਿ. ਮਹਾਰਕ੍ਖਿਤੋ ਤਂ ਕਥਂ ਸੁਤ੍ਵਾ ‘‘ਭਵਿਸ੍ਸਤਿ ਨੁ ਖੋ ਰਞ੍ਞੋ ਪੁਤ੍ਤੋ, ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ ‘‘ਭਵਿਸ੍ਸਤੀ’’ਤਿ ਞਤ੍ਵਾ ‘‘ਮਾ ਤੁਮ੍ਹੇ ਚਿਨ੍ਤਯਿਤ੍ਥ, ਅਜ੍ਜ ਪਚ੍ਚੂਸਕਾਲੇ ਏਕੋ ਦੇਵਪੁਤ੍ਤੋ ਚਵਿਤ੍ਵਾ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਸ੍ਸਤੀ’’ਤਿ ਆਹ.

ਤਂ ਸੁਤ੍ਵਾ ਏਕੋ ਕੂਟਜਟਿਲੋ ‘‘ਇਦਾਨਿ ਰਾਜਕੁਲੂਪਕੋ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਾਪਸਾਨਂ ਗਮਨਕਾਲੇ ਗਿਲਾਨਾਲਯਂ ਕਤ੍ਵਾ ਨਿਪਜ੍ਜਿਤ੍ਵਾ ‘‘ਏਹਿ ਗਚ੍ਛਾਮਾ’’ਤਿ ਵੁਤ੍ਤੇ ‘‘ਨ ਸਕ੍ਕੋਮੀ’’ਤਿ ਆਹ. ਮਹਾਰਕ੍ਖਿਤੋ ਤਸ੍ਸ ਨਿਪਨ੍ਨਕਾਰਣਂ ਞਤ੍ਵਾ ‘‘ਯਦਾ ਸਕ੍ਕੋਸਿ, ਤਦਾ ਆਗਚ੍ਛੇਯ੍ਯਾਸੀ’’ਤਿ ਇਸਿਗਣਂ ਆਦਾਯ ਹਿਮਵਨ੍ਤਮੇਵ ਗਤੋ. ਕੁਹਕੋ ਨਿਵਤ੍ਤਿਤ੍ਵਾ ਵੇਗੇਨ ਗਨ੍ਤ੍ਵਾ ਰਾਜਦ੍ਵਾਰੇ ਠਤ੍ਵਾ ‘‘ਮਹਾਰਕ੍ਖਿਤਸ੍ਸ ਉਪਟ੍ਠਾਕਤਾਪਸੋ ਆਗਤੋ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਰਞ੍ਞਾ ਵੇਗੇਨ ਪਕ੍ਕੋਸਾਪਿਤੋ ਪਾਸਾਦਂ ਅਭਿਰੁਯ੍ਹ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਰਾਜਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਇਸੀਨਂ ਆਰੋਗ੍ਯਂ ਪੁਚ੍ਛਿਤ੍ਵਾ ‘‘ਭਨ੍ਤੇ, ਅਤਿਖਿਪ੍ਪਂ ਨਿਵਤ੍ਤਿਤ੍ਥ, ਕੇਨਤ੍ਥੇਨ ਆਗਤਤ੍ਥਾ’’ਤਿ ਆਹ.

ਮਹਾਰਾਜ, ਇਸਿਗਣੋ ਸੁਖਨਿਸਿਨ੍ਨੋ ‘‘ਸਾਧੁ ਵਤਸ੍ਸ ਸਚੇ ਰਞ੍ਞੋ ਵਂਸਾਨੁਰਕ੍ਖਕੋ ਪੁਤ੍ਤੋ ਉਪ੍ਪਜ੍ਜੇਯ੍ਯਾ’’ਤਿ ਕਥਂ ਸਮੁਟ੍ਠਾਪੇਸਿ. ਅਹਂ ਤਂ ਕਥਂ ਸੁਤ੍ਵਾ ‘‘ਭਵਿਸ੍ਸਤਿ ਨੁ ਖੋ ਰਞ੍ਞੋ ਪੁਤ੍ਤੋ, ਉਦਾਹੁ ਨੋ’’ਤਿ ਦਿਬ੍ਬਚਕ੍ਖੁਨਾ ਓਲੋਕੇਨ੍ਤੋ ‘‘ਮਹਿਦ੍ਧਿਕੋ ਦੇਵਪੁਤ੍ਤੋ ਚਵਿਤ੍ਵਾ ਅਗ੍ਗਮਹੇਸਿਯਾ ਸੁਧਮ੍ਮਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਸ੍ਸਤੀ’’ਤਿ ਦਿਸ੍ਵਾ ‘‘ਅਜਾਨਨ੍ਤਾ ਗਬ੍ਭਂ ਨਾਸੇਯ੍ਯੁਂ, ਆਚਿਕ੍ਖਿਸ੍ਸਾਮਿ ਤਾਵ ਨ’’ਨ੍ਤਿ ਤੁਮ੍ਹਾਕਂ ਕਥਨਤ੍ਥਾਯ ਆਗਤੋ, ਕਥਿਤਂ ਵੋ ਮਯਾ, ਗਚ੍ਛਾਮਹ’’ਨ੍ਤਿ. ਰਾਜਾ ‘‘ਭਨ੍ਤੇ, ਨ ਸਕ੍ਕਾ ਗਨ੍ਤੁ’’ਨ੍ਤਿ ਹਟ੍ਠਤੁਟ੍ਠੋ ਪਸਨ੍ਨਚਿਤ੍ਤੋ ਕੁਹਕਤਾਪਸਂ ਉਯ੍ਯਾਨਂ ਨੇਤ੍ਵਾ ਵਸਨਟ੍ਠਾਨਂ ਸਂਵਿਦਹਿਤ੍ਵਾ ਅਦਾਸਿ. ਸੋ ਤਤੋ ਪਟ੍ਠਾਯ ਰਾਜਕੁਲੇ ਭੁਞ੍ਜਨ੍ਤੋ ਵਸਤਿ, ‘‘ਦਿਬ੍ਬਚਕ੍ਖੁਕੋ’’ਤ੍ਵੇਵਸ੍ਸ ਨਾਮਂ ਅਹੋਸਿ.

ਤਦਾ ਬੋਧਿਸਤ੍ਤੋ ਤਾਵਤਿਂਸਭਵਨਤੋ ਚਵਿਤ੍ਵਾ ਤਤ੍ਥ ਪਟਿਸਨ੍ਧਿਂ ਗਣ੍ਹਿ, ਜਾਤਸ੍ਸ ਚ ਨਾਮਗ੍ਗਹਣਦਿਵਸੇ ‘‘ਸੋਮਨਸ੍ਸੋ’’ਤਿ ਨਾਮਂ ਕਰਿਂਸੁ. ਸੋ ਕੁਮਾਰਪਰਿਹਾਰੇਨ ਵਡ੍ਢਤਿ. ਕੁਹਕਤਾਪਸੋਪਿ ਉਯ੍ਯਾਨਸ੍ਸ ਏਕਪਸ੍ਸੇ ਨਾਨਪ੍ਪਕਾਰਂ ਸੂਪੇਯ੍ਯਸਾਕਞ੍ਚ ਫਲਵਲ੍ਲਿਆਦਯੋ ਚ ਰੋਪੇਤ੍ਵਾ ਪਣ੍ਣਿਕਾਨਂ ਹਤ੍ਥੇ ਵਿਕ੍ਕਿਣਨ੍ਤੋ ਧਨਂ ਸਂਹਰਤਿ. ਅਥ ਬੋਧਿਸਤ੍ਤਸ੍ਸ ਸਤ੍ਤਵਸ੍ਸਿਕਕਾਲੇ ਰਞ੍ਞੋ ਪਚ੍ਚਨ੍ਤੋ ਕੁਪਿਤੋ. ਸੋ ‘‘ਤਾਤ, ਦਿਬ੍ਬਚਕ੍ਖੁਤਾਪਸੇ ਮਾ ਪਮਜ੍ਜਾ’’ਤਿ ਕੁਮਾਰਂ ਪਟਿਚ੍ਛਾਪੇਤ੍ਵਾ ਪਚ੍ਚਨ੍ਤਂ ਵੂਪਸਮੇਤੁਂ ਗਤੋ.

੧੦-੧੩. ਅਥੇਕਦਿਵਸਂ ਕੁਮਾਰੋ ‘‘ਜਟਿਲਂ ਪਸ੍ਸਿਸ੍ਸਾਮੀ’’ਤਿ ਉਯ੍ਯਾਨਂ ਗਨ੍ਤ੍ਵਾ ਕੂਟਜਟਿਲਂ ਏਕਂ ਗਨ੍ਧਿਕਕਾਸਾਵਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਉਭੋਹਿ ਹਤ੍ਥੇਹਿ ਦ੍ਵੇ ਘਟੇ ਗਹੇਤ੍ਵਾ ਸਾਕਵਤ੍ਥੁਸ੍ਮਿਂ ਉਦਕਂ ਸਿਞ੍ਚਨ੍ਤਂ ਦਿਸ੍ਵਾ ‘‘ਅਯਂ ਕੂਟਜਟਿਲੋ ਅਤ੍ਤਨੋ ਸਮਣਧਮ੍ਮਂ ਅਕਤ੍ਵਾ ਪਣ੍ਣਿਕਕਮ੍ਮਂ ਕਰੋਤੀ’’ਤਿ ਞਤ੍ਵਾ ‘‘ਕਿਂ ਕਰੋਸਿ ਪਣ੍ਣਿਕਗਹਪਤਿਕਾ’’ਤਿ ਤਂ ਲਜ੍ਜਾਪੇਤ੍ਵਾ ਅਵਨ੍ਦਿਤ੍ਵਾ ਏਵ ਨਿਕ੍ਖਮਿ.

ਕੂਟਜਟਿਲੋ ‘‘ਅਯਂ ਇਦਾਨੇਵ ਏਵਰੂਪੋ, ਪਚ੍ਛਾ ‘ਕੋ ਜਾਨਾਤਿ ਕਿਂ ਕਰਿਸ੍ਸਤੀ’ਤਿ ਇਦਾਨੇਵ ਨਂ ਨਾਸੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਰਞ੍ਞੋ ਆਗਮਨਕਾਲੇ ਪਾਸਾਣਫਲਕਂ ਏਕਮਨ੍ਤਂ ਖਿਪਿਤ੍ਵਾ ਪਾਨੀਯਘਟਂ ਭਿਨ੍ਦਿਤ੍ਵਾ ਪਣ੍ਣਸਾਲਾਯ ਤਿਣਾਨਿ ਵਿਕਿਰਿਤ੍ਵਾ ਸਰੀਰਂ ਤੇਲੇਨ ਮਕ੍ਖੇਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਸਸੀਸਂ ਪਾਰੁਪਿਤ੍ਵਾ ਮਹਾਦੁਕ੍ਖਪ੍ਪਤ੍ਤੋ ਵਿਯ ਮਞ੍ਚੇ ਨਿਪਜ੍ਜਿ. ਰਾਜਾ ਆਗਨ੍ਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਨਿਵੇਸਨਂ ਅਪਵਿਸਿਤ੍ਵਾਵ ‘‘ਮਮ ਸਾਮਿਕਂ ਦਿਬ੍ਬਚਕ੍ਖੁਕਂ ਪਸ੍ਸਿਸ੍ਸਾਮੀ’’ਤਿ ਪਣ੍ਣਸਾਲਦ੍ਵਾਰਂ ਗਨ੍ਤ੍ਵਾ ਤਂ ਵਿਪ੍ਪਕਾਰਂ ਦਿਸ੍ਵਾ ‘‘ਕਿਂ ਨੁ ਖੋ ਏਤ’’ਨ੍ਤਿ ਅਨ੍ਤੋ ਪਵਿਸਿਤ੍ਵਾ ਤਂ ਨਿਪਨ੍ਨਕਂ ਦਿਸ੍ਵਾ ਪਾਦੇ ਪਰਿਮਜ੍ਜਨ੍ਤੋ ਪੁਚ੍ਛਿ – ‘‘ਕੇਨ, ਤ੍ਵਂ ਭਨ੍ਤੇ, ਏਵਂ ਵਿਹੇਠਿਤੋ, ਕਮਜ੍ਜ ਯਮਲੋਕਂ ਨੇਮਿ, ਤਂ ਮੇ ਸੀਘਂ ਆਚਿਕ੍ਖਾ’’ਤਿ.

ਤਂ ਸੁਤ੍ਵਾ ਕੂਟਜਟਿਲੋ ਨਿਤ੍ਥੁਨਨ੍ਤੋ ਉਟ੍ਠਾਯ ਦਿਟ੍ਠੋ, ਮਹਾਰਾਜ, ਤ੍ਵਂ ਮੇ, ਪਸ੍ਸਿਤ੍ਵਾ ਤਯਿ ਵਿਸ੍ਸਾਸੇਨ ਅਹਂ ਇਮਂ ਵਿਪ੍ਪਕਾਰਂ ਪਤ੍ਤੋ, ਤਵ ਪੁਤ੍ਤੇਨਮ੍ਹਿ ਏਵਂ ਵਿਹੇਠਿਤੋਤਿ. ਤਂ ਸੁਤ੍ਵਾ ਰਾਜਾ ਚੋਰਘਾਤਕੇ ਆਣਾਪੇਸਿ – ‘‘ਗਚ੍ਛਥ ਕੁਮਾਰਸ੍ਸ ਸੀਸਂ ਛਿਨ੍ਦਿਤ੍ਵਾ ਸਰੀਰਞ੍ਚਸ੍ਸ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਰਥਿਯਾ ਰਥਿਯਂ ਵਿਕਿਰਥਾ’’ਤਿ. ਤੇ ਮਾਤਰਾ ਅਲਙ੍ਕਰਿਤ੍ਵਾ ਅਤ੍ਤਨੋ ਅਙ੍ਕੇ ਨਿਸੀਦਾਪਿਤਂ ਕੁਮਾਰਂ ਆਕਡ੍ਢਿਂਸੁ – ‘‘ਰਞ੍ਞਾ ਤੇ ਵਧੋ ਆਣਤ੍ਤੋ’’ਤਿ. ਕੁਮਾਰੋ ਮਰਣਭਯਤਜ੍ਜਿਤੋ ਮਾਤੁ ਅਙ੍ਕਤੋ ਵੁਟ੍ਠਾਯ – ‘‘ਰਞ੍ਞੋ ਮਂ ਦਸ੍ਸੇਥ, ਸਨ੍ਤਿ ਰਾਜਕਿਚ੍ਚਾਨੀ’’ਤਿ ਆਹ. ਤੇ ਕੁਮਾਰਸ੍ਸ ਵਚਨਂ ਸੁਤ੍ਵਾ ਮਾਰੇਤੁਂ ਅਵਿਸਹਨ੍ਤਾ ਗੋਣਂ ਵਿਯ ਰਜ੍ਜੁਯਾ ਪਰਿਕਡ੍ਢਨ੍ਤਾ ਨੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਤੇਨ ਵੁਤ੍ਤਂ ‘‘ਤਮਹਂ ਦਿਸ੍ਵਾਨ ਕੁਹਕ’’ਨ੍ਤਿਆਦਿ.

ਤਤ੍ਥ ਥੁਸਰਾਸਿਂਵ ਅਤਣ੍ਡੁਲਨ੍ਤਿ ਤਣ੍ਡੁਲਕਣੇਹਿ ਵਿਰਹਿਤਂ ਥੁਸਰਾਸਿਂ ਵਿਯ, ਦੁਮਂਵ ਰੁਕ੍ਖਂ ਵਿਯ, ਅਨ੍ਤੋ ਮਹਾਸੁਸਿਰਂ. ਕਦਲਿਂਵ ਅਸਾਰਕਂ ਸੀਲਾਦਿਸਾਰਰਹਿਤਂ ਤਾਪਸਂ ਅਹਂ ਦਿਸ੍ਵਾ ਨਤ੍ਥਿ ਇਮਸ੍ਸ ਸਤਂ ਸਾਧੂਨਂ ਝਾਨਾਦਿਧਮ੍ਮੋ. ਕਸ੍ਮਾ? ਸਾਮਞ੍ਞਾ ਸਮਣਭਾਵਾ ਸੀਲਮਤ੍ਤਤੋਪਿ ਅਪਗਤੋ ਪਰਿਹੀਨੋ ਅਯਂ, ਤਥਾ ਹਿ ਅਯਂ ਹਿਰੀਸੁਕ੍ਕਧਮ੍ਮਜਹਿਤੋ ਪਜਹਿਤਹਿਰਿਸਙ੍ਖਾਤਸੁਕ੍ਕਧਮ੍ਮੋ. ਜੀਵਿਤਵੁਤ੍ਤਿਕਾਰਣਾਤਿ ‘‘ਕੇਵਲਂ ਜੀਵਿਤਸ੍ਸੇਵ ਹੇਤੁ ਅਯਂ ਤਾਪਸਲਿਙ੍ਗੇਨ ਚਰਤੀ’’ਤਿ ਚਿਨ੍ਤੇਸਿਨ੍ਤਿ ਦਸ੍ਸੇਤਿ. ਪਰਨ੍ਤਿਹੀਤਿ ਪਰਨ੍ਤੋ ਪਚ੍ਚਨ੍ਤੋ ਨਿਵਾਸਭੂਤੋ ਏਤੇਸਂ ਅਤ੍ਥੀਤਿ ਪਰਨ੍ਤਿਨੋ, ਸੀਮਨ੍ਤਰਿਕਵਾਸਿਨੋ. ਤੇਹਿ ਪਰਨ੍ਤੀਹਿ ਅਟਵਿਕੇਹਿ ਪਚ੍ਚਨ੍ਤਦੇਸੋ ਖੋਭਿਤੋ ਅਹੋਸਿ. ਤਂ ਪਚ੍ਚਨ੍ਤਕੋਪਂ ਨਿਸੇਧੇਤੁਂ ਵੂਪਸਮੇਤੁਂ ਗਚ੍ਛਨ੍ਤੋ ਮਮ ਪਿਤਾ ਕੁਰੁਰਾਜਾ ‘‘ਤਾਤ ਸੋਮਨਸ੍ਸਕੁਮਾਰ, ਮਯ੍ਹਂ ਸਾਮਿਕਂ ਉਗ੍ਗਤਾਪਨਂ ਘੋਰਤਪਂ ਪਰਮਸਨ੍ਤਿਨ੍ਦ੍ਰਿਯਂ ਜਟਿਲਂ ਮਾ ਪਮਜ੍ਜਿ. ਸੋ ਹਿ ਅਮ੍ਹਾਕਂ ਸਬ੍ਬਕਾਮਦਦੋ, ਤਸ੍ਮਾ ਯਦਿਚ੍ਛਕਂ ਚਿਤ੍ਤਰੁਚਿਯਂ ਤਸ੍ਸ ਚਿਤ੍ਤਾਨੁਕੂਲਂ ਪਵਤ੍ਤੇਹਿ ਅਨੁਵਤ੍ਤੇਹੀ’’ਤਿ ਤਦਾ ਮਂ ਅਨੁਸਾਸੀਤਿ ਦਸ੍ਸੇਤਿ.

੧੪. ਤਮਹਂ ਗਨ੍ਤ੍ਵਾਨੁਪਟ੍ਠਾਨਨ੍ਤਿ ਪਿਤੁ ਵਚਨਂ ਅਨਤਿਕ੍ਕਨ੍ਤੋ ਤਂ ਕੂਟਤਾਪਸਂ ਉਪਟ੍ਠਾਨਤ੍ਥਂ ਗਨ੍ਤ੍ਵਾ ਤਂ ਸਾਕਵਤ੍ਥੁਸ੍ਮਿਂ ਉਦਕਂ ਆਸਿਞ੍ਚਨ੍ਤਂ ਦਿਸ੍ਵਾ ‘‘ਪਣ੍ਣਿਕੋ ਅਯ’’ਨ੍ਤਿ ਚ ਞਤ੍ਵਾ ਕਚ੍ਚਿ ਤੇ, ਗਹਪਤਿ, ਕੁਸਲਨ੍ਤਿ, ਗਹਪਤਿ, ਤੇ ਸਰੀਰਸ੍ਸ ਕਚ੍ਚਿ ਕੁਸਲਂ ਕੁਸਲਮੇਵ, ਤਥਾ ਹਿ ਸਾਕਵਤ੍ਥੁਸ੍ਮਿਂ ਉਦਕਂ ਆਸਿਞ੍ਚਸਿ. ਕਿਂ ਵਾ ਤਵ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਆਹਰੀਯਤੁ, ਤਥਾ ਹਿ ਪਣ੍ਣਿਕਵੁਤ੍ਤਿਂ ਅਨੁਤਿਟ੍ਠਸੀਤਿ ਇਦਂ ਵਚਨਂ ਅਭਾਸਿਂ.

੧੫. ਤੇਨ ਸੋ ਕੁਪਿਤੋ ਆਸੀਤਿ ਤੇਨ ਮਯਾ ਵੁਤ੍ਤਗਹਪਤਿਵਾਦੇਨ ਸੋ ਮਾਨਨਿਸ੍ਸਿਤੋ ਮਾਨਂ ਅਲ੍ਲੀਨੋ ਕੁਹਕੋ ਮਯ੍ਹਂ ਕੁਪਿਤੋ ਕੁਦ੍ਧੋ ਅਹੋਸਿ. ਕੁਦ੍ਧੋ ਚ ਸਮਾਨੋ ‘‘ਘਾਤਾਪੇਮਿ ਤੁਵਂ ਅਜ੍ਜ, ਰਟ੍ਠਾ ਪਬ੍ਬਾਜਯਾਮਿ ਵਾ’’ਤਿ ਆਹ.

ਤਤ੍ਥ ਤੁਵਂ ਅਜ੍ਜਾਤਿ, ਤ੍ਵਂ ਅਜ੍ਜ, ਇਦਾਨਿਯੇਵ ਰਞ੍ਞੋ ਆਗਤਕਾਲੇਤਿ ਅਤ੍ਥੋ.

੧੬. ਨਿਸੇਧਯਿਤ੍ਵਾ ਪਚ੍ਚਨ੍ਤਨ੍ਤਿ ਪਚ੍ਚਨ੍ਤਂ ਵੂਪਸਮੇਤ੍ਵਾ ਨਗਰਂ ਅਪਵਿਟ੍ਠੋ ਤਙ੍ਖਣਞ੍ਞੇਵ ਉਯ੍ਯਾਨਂ ਗਨ੍ਤ੍ਵਾ ਕੁਹਕਂ ਕੁਹਕਤਾਪਸਂ ਕਚ੍ਚਿ ਤੇ, ਭਨ੍ਤੇ, ਖਮਨੀਯਂ, ਸਮ੍ਮਾਨੋ ਤੇ ਪਵਤ੍ਤਿਤੋਤਿ ਕੁਮਾਰੇਨ ਤੇ ਸਮ੍ਮਾਨੋ ਪਵਤ੍ਤਿਤੋ ਅਹੋਸਿ.

੧੭. ਕੁਮਾਰੋ ਯਥਾ ਨਾਸਿਯੋਤਿ ਯਥਾ ਕੁਮਾਰੋ ਨਾਸਿਯੋ ਨਾਸੇਤਬ੍ਬੋ ਘਾਤਾਪੇਤਬ੍ਬੋ, ਤਥਾ ਸੋ ਪਾਪੋ ਤਸ੍ਸ ਰਞ੍ਞੋ ਆਚਿਕ੍ਖਿ. ਆਣਾਪੇਸੀਤਿ ਮਯ੍ਹਂ ਸਾਮਿਕੇ ਇਮਸ੍ਮਿਂ ਦਿਬ੍ਬਚਕ੍ਖੁਤਾਪਸੇ ਸਤਿ ਕਿਂ ਮਮ ਨ ਨਿਪ੍ਫਜ੍ਜਤਿ, ਤਸ੍ਮਾ ਪੁਤ੍ਤੇਨ ਮੇ ਅਤ੍ਥੋ ਨਤ੍ਥਿ, ਤਤੋਪਿ ਅਯਮੇਵ ਸੇਯ੍ਯੋਤਿ ਚਿਨ੍ਤੇਤ੍ਵਾ ਆਣਾਪੇਸਿ.

੧੮. ਕਿਨ੍ਤਿ? ਸੀਸਂ ਤਤ੍ਥੇਵ ਛਿਨ੍ਦਿਤ੍ਵਾਤਿ ਯਸ੍ਮਿਂ ਠਾਨੇ ਤਂ ਕੁਮਾਰਂ ਪਸ੍ਸਥ, ਤਤ੍ਥੇਵ ਤਸ੍ਸ ਸੀਸਂ ਛਿਨ੍ਦਿਤ੍ਵਾ ਸਰੀਰਞ੍ਚਸ੍ਸ ਕਤ੍ਵਾਨ ਚਤੁਖਣ੍ਡਿਕਂ ਚਤੁਰੋ ਖਣ੍ਡੇ ਕਤ੍ਵਾ ਰਥਿਯਾ ਰਥਿਯਂ ਨੀਯਨ੍ਤਾ ਵੀਥਿਤੋ ਵੀਥਿਂ ਵਿਕ੍ਖਿਪਨ੍ਤਾ ਦਸ੍ਸੇਥ. ਕਸ੍ਮਾ? ਸਾ ਗਤਿ ਜਟਿਲਹੀਲ਼ਿਤਾਤਿ ਯੇਹਿ ਅਯਂ ਜਟਿਲੋ ਹੀਲ਼ਿਤੋ, ਤੇਸਂ ਜਟਿਲਹੀਲ਼ਿਤਾਨਂ ਸਾ ਗਤਿ ਸਾ ਨਿਪ੍ਫਤ੍ਤਿ ਸੋ ਵਿਪਾਕੋਤਿ. ਜਟਿਲਹੀਲ਼ਿਤਾਤਿ ਵਾ ਜਟਿਲਹੀਲ਼ਨਹੇਤੁ ਸਾ ਤਸ੍ਸ ਨਿਪ੍ਫਤ੍ਤੀਤਿ ਏਵਞ੍ਚੇਤ੍ਥ ਅਤ੍ਥੋ ਦਟ੍ਠਬ੍ਬੋ.

੧੯. ਤਤ੍ਥਾਤਿ ਤਸ੍ਸ ਰਞ੍ਞੋ ਆਣਾਯਂ, ਤਸ੍ਮਿਂ ਵਾ ਤਾਪਸਸ੍ਸ ਪਰਿਭਵੇ. ਕਾਰਣਿਕਾਤਿ ਘਾਤਕਾ, ਚੋਰਘਾਤਕਾਤਿ ਅਤ੍ਥੋ. ਚਣ੍ਡਾਤਿ ਕੁਰੂਰਾ. ਲੁਦ੍ਦਾਤਿ ਸੁਦਾਰੁਣਾ. ਅਕਾਰੁਣਾਤਿ ਤਸ੍ਸੇਵ ਵੇਵਚਨਂ ਕਤਂ. ‘‘ਅਕਰੁਣਾ’’ਤਿਪਿ ਪਾਲ਼ਿ, ਨਿਕ੍ਕਰੁਣਾਤਿ ਅਤ੍ਥੋ. ਮਾਤੁ ਅਙ੍ਕੇ ਨਿਸਿਨ੍ਨਸ੍ਸਾਤਿ ਮਮ ਮਾਤੁ ਸੁਧਮ੍ਮਾਯ ਦੇਵਿਯਾ ਉਚ੍ਛਙ੍ਗੇ ਨਿਸਿਨ੍ਨਸ੍ਸ. ‘‘ਨਿਸਿਨ੍ਨਸ੍ਸਾ’’ਤਿ ਅਨਾਦਰੇ ਸਾਮਿਵਚਨਂ. ਆਕਡ੍ਢਿਤ੍ਵਾ ਨਯਨ੍ਤਿ ਮਨ੍ਤਿ ਮਾਤਰਾ ਅਲਙ੍ਕਰਿਤ੍ਵਾ ਅਤ੍ਤਨੋ ਅਙ੍ਕੇ ਨਿਸੀਦਾਪਿਤਂ ਮਂ ਰਾਜਾਣਾਯ ਤੇ ਚੋਰਘਾਤਕਾ ਗੋਣਂ ਵਿਯ ਰਜ੍ਜੁਯਾ ਆਕਡ੍ਢਿਤ੍ਵਾ ਆਘਾਤਨਂ ਨਯਨ੍ਤਿ. ਕੁਮਾਰੇ ਪਨ ਨੀਯਮਾਨੇ ਦਾਸਿਗਣਪਰਿਵੁਤਾ ਸਦ੍ਧਿਂ ਓਰੋਧੇਹਿ ਸੁਧਮ੍ਮਾ ਦੇਵੀ ਨਾਗਰਾਪਿ ‘‘ਮਯਂ ਨਿਰਪਰਾਧਂ ਕੁਮਾਰਂ ਮਾਰੇਤੁਂ ਨ ਦਸ੍ਸਾਮਾ’’ਤਿ ਤੇਨ ਸਦ੍ਧਿਂਯੇਵ ਅਗਮਂਸੁ.

੨੦. ਬਨ੍ਧਤਂ ਗਾਲ਼੍ਹਬਨ੍ਧਨਨ੍ਤਿ ਗਾਲ਼੍ਹਬਨ੍ਧਨਂ ਬਨ੍ਧਨ੍ਤਾਨਂ ਤੇਸਂ ਕਾਰਣਿਕਪੁਰਿਸਾਨਂ. ਰਾਜਕਿਰਿਯਾਨਿ ਅਤ੍ਥਿ ਮੇਤਿ ਮਯਾ ਰਞ੍ਞੋ ਵਤ੍ਤਬ੍ਬਾਨਿ ਰਾਜਕਿਚ੍ਚਾਨਿ ਅਤ੍ਥਿ. ਤਸ੍ਮਾ ਰਞ੍ਞੋ ਦਸ੍ਸੇਥ ਮਂ ਖਿਪ੍ਪਨ੍ਤਿ ਤੇਸਂ ਅਹਂ ਏਵਂ ਵਚਨਂ ਅਵਚਂ.

੨੧. ਰਞ੍ਞੋ ਦਸ੍ਸਯਿਂਸੁ, ਪਾਪਸ੍ਸ ਪਾਪਸੇਵਿਨੋਤਿ ਅਤ੍ਤਨਾ ਪਾਪਸੀਲਸ੍ਸ ਲਾਮਕਾਚਾਰਸ੍ਸ ਕੂਟਤਾਪਸਸ੍ਸ ਸੇਵਨਤੋ ਪਾਪਸੇਵਿਨੋ ਰਞ੍ਞੋ ਮਂ ਦਸ੍ਸਯਿਂਸੁ. ਦਿਸ੍ਵਾਨ ਤਂ ਸਞ੍ਞਾਪੇਸਿਨ੍ਤਿ ਤਂ ਮਮ ਪਿਤਰਂ ਕੁਰੁਰਾਜਾਨਂ ਪਸ੍ਸਿਤ੍ਵਾ ‘‘ਕਸ੍ਮਾ ਮਂ, ਦੇਵ, ਮਾਰਾਪੇਸੀ’’ਤਿ ਵਤ੍ਵਾ ਤੇਨ ‘‘ਕਸ੍ਮਾ ਚ ਪਨ ਤ੍ਵਂ ਮਯ੍ਹਂ ਸਾਮਿਕਂ ਦਿਬ੍ਬਚਕ੍ਖੁਤਾਪਸਂ ਗਹਪਤਿਵਾਦੇਨ ਸਮੁਦਾਚਰਿ. ਇਦਞ੍ਚਿਦਞ੍ਚ ਵਿਪ੍ਪਕਾਰਂ ਕਰੀ’’ਤਿ ਵੁਤ੍ਤੇ ‘‘ਦੇਵ, ਗਹਪਤਿਞ੍ਞੇਵ ‘ਗਹਪਤੀ’ਤਿ ਵਦਨ੍ਤਸ੍ਸ ਕੋ ਮਯ੍ਹਂ ਦੋਸੋ’’ਤਿ ਵਤ੍ਵਾ ਤਸ੍ਸ ਨਾਨਾਵਿਧਾਨਿ ਮਾਲਾਵਚ੍ਛਾਨਿ ਰੋਪੇਤ੍ਵਾ ਪੁਪ੍ਫਪਣ੍ਣਫਲਾਫਲਾਦੀਨਂ ਵਿਕ੍ਕਿਣਨਂ ਹਤ੍ਥਤੋ ਚਸ੍ਸ ਤਾਨਿ ਦੇਵਸਿਕਂ ਵਿਕ੍ਕਿਣਨ੍ਤੇਹਿ ਮਾਲਾਕਾਰਪਣ੍ਣਿਕੇਹਿ ਸਦ੍ਦਹਾਪੇਤ੍ਵਾ ‘‘ਮਾਲਾਵਤ੍ਥੁਪਣ੍ਣਵਤ੍ਥੂਨਿ ਉਪਧਾਰੇਥਾ’’ਤਿ ਵਤ੍ਵਾ ਪਣ੍ਣਸਾਲਞ੍ਚਸ੍ਸ ਪਵਿਸਿਤ੍ਵਾ ਪੁਪ੍ਫਾਦਿਵਿਕ੍ਕਿਯਲਦ੍ਧਂ ਕਹਾਪਣਕਭਣ੍ਡਿਕਂ ਅਤ੍ਤਨੋ ਪੁਰਿਸੇਹਿ ਨੀਹਰਾਪੇਤ੍ਵਾ ਰਾਜਾਨਂ ਸਞ੍ਞਾਪੇਸਿਂ ਤਸ੍ਸ ਕੂਟਤਾਪਸਭਾਵਂ ਜਾਨਾਪੇਸਿਂ. ਮਮਞ੍ਚ ਵਸਮਾਨਯਿਨ੍ਤਿ ਤੇਨ ਸਞ੍ਞਾਪਨੇਨ ‘‘ਸਚ੍ਚਂ ਖੋ ਪਨ ਕੁਮਾਰੋ ਵਦਤਿ, ਅਯਂ ਕੂਟਤਾਪਸੋ ਪੁਬ੍ਬੇ ਅਪ੍ਪਿਚ੍ਛੋ ਵਿਯ ਹੁਤ੍ਵਾ ਇਦਾਨਿ ਮਹਾਪਰਿਗ੍ਗਹੋ ਜਾਤੋ’’ਤਿ ਯਥਾ ਤਸ੍ਮਿਂ ਨਿਬ੍ਬਿਨ੍ਨੋ ਮਮ ਵਸੇ ਵਤ੍ਤਤਿ, ਏਵਂ ਰਾਜਾਨਂ ਮਮ ਵਸਮਾਨੇਸਿਂ.

ਤਤੋ ਮਹਾਸਤ੍ਤੋ ‘‘ਏਵਰੂਪਸ੍ਸ ਬਾਲਸ੍ਸ ਰਞ੍ਞੋ ਸਨ੍ਤਿਕੇ ਵਸਨਤੋ ਹਿਮਵਨ੍ਤਂ ਪਵਿਸਿਤ੍ਵਾ ਪਬ੍ਬਜਿਤੁਂ ਯੁਤ੍ਤ’’ਨ੍ਤਿ ਚਿਨ੍ਤੇਤ੍ਵਾ ਰਾਜਾਨਂ ਆਪੁਚ੍ਛਿ – ‘‘ਨ ਮੇ, ਮਹਾਰਾਜ, ਇਧ ਵਾਸੇਨ ਅਤ੍ਥੋ, ਅਨੁਜਾਨਾਥ ਮਂ ਪਬ੍ਬਜਿਸ੍ਸਾਮੀ’’ਤਿ. ਰਾਜਾ ‘‘ਤਾਤ, ਮਯਾ ਅਨੁਪਧਾਰੇਤ੍ਵਾਵ ਤੇ ਵਧੋ ਆਣਤ੍ਤੋ, ਖਮ ਮਯ੍ਹਂ ਅਪਰਾਧ’’ਨ੍ਤਿ ਮਹਾਸਤ੍ਤਂ ਖਮਾਪੇਤ੍ਵਾ ‘‘ਅਜ੍ਜੇਵ ਇਮਂ ਰਜ੍ਜਂ ਪਟਿਪਜ੍ਜਾਹੀ’’ਤਿ ਆਹ. ਕੁਮਾਰੋ ‘‘ਦੇਵ, ਕਿਮਤ੍ਥਿ ਮਾਨੁਸਕੇਸੁ ਭੋਗੇਸੁ, ਅਹਂ ਪੁਬ੍ਬੇ ਦੀਘਰਤ੍ਤਂ ਦਿਬ੍ਬਭੋਗਸਮ੍ਪਤ੍ਤਿਯੋ ਅਨੁਭਵਿਂ, ਨ ਤਤ੍ਥਾਪਿ ਮੇ ਸਙ੍ਗੋ, ਪਬ੍ਬਜਿਸ੍ਸਾਮੇਵਾਹਂ, ਨ ਤਾਦਿਸਸ੍ਸ ਬਾਲਸ੍ਸ ਪਰਨੇਯ੍ਯਬੁਦ੍ਧਿਨੋ ਸਨ੍ਤਿਕੇ ਵਸਾਮੀ’’ਤਿ ਵਤ੍ਵਾ ਤਂ ਓਵਦਨ੍ਤੋ –

‘‘ਅਨਿਸਮ੍ਮ ਕਤਂ ਕਮ੍ਮਂ, ਅਨਵਤ੍ਥਾਯ ਚਿਨ੍ਤਿਤਂ;

ਭੇਸਜ੍ਜਸ੍ਸੇਵ ਵੇਭਙ੍ਗੋ, ਵਿਪਾਕੋ ਹੋਤਿ ਪਾਪਕੋ.

‘‘ਨਿਸਮ੍ਮ ਚ ਕਤਂ ਕਮ੍ਮਂ, ਸਮ੍ਮਾਵਤ੍ਥਾਯ ਚਿਨ੍ਤਿਤਂ;

ਭੇਸਜ੍ਜਸ੍ਸੇਵ ਸਮ੍ਪਤ੍ਤਿ, ਵਿਪਾਕੋ ਹੋਤਿ ਭਦ੍ਰਕੋ.

‘‘ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.

‘‘ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;

ਨਿਸਮ੍ਮਕਾਰਿਨੋ ਰਾਜ, ਯਸੋ ਕਿਤ੍ਤਿ ਚ ਵਡ੍ਢਤਿ.

‘‘ਨਿਸਮ੍ਮ ਦਣ੍ਡਂ ਪਣਯੇਯ੍ਯ ਇਸ੍ਸਰੋ, ਵੇਗਾ ਕਤਂ ਤਪ੍ਪਤਿ ਭੂਮਿਪਾਲ;

ਸਮ੍ਮਾਪਣੀਧੀ ਚ ਨਰਸ੍ਸ ਅਤ੍ਥਾ, ਅਨਾਨੁਤਪ੍ਪਾ ਤੇ ਭਵਨ੍ਤਿ ਪਚ੍ਛਾ.

‘‘ਅਨਾਨੁਤਪ੍ਪਾਨਿ ਹਿ ਯੇ ਕਰੋਨ੍ਤਿ, ਵਿਭਜ੍ਜ ਕਮ੍ਮਾਯਤਨਾਨਿ ਲੋਕੇ;

ਵਿਞ੍ਞੁਪ੍ਪਸਤ੍ਥਾਨਿ ਸੁਖੁਦ੍ਰਯਾਨਿ, ਭਵਨ੍ਤਿ ਬੁਦ੍ਧਾਨੁਮਤਾਨਿ ਤਾਨਿ.

‘‘ਆਗਚ੍ਛੁਂ ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਹਨ੍ਤੁ ਮਮਂ ਜਨਿਨ੍ਦ;

ਮਾਤੁਞ੍ਚ ਅਙ੍ਕਸ੍ਮਿਮਹਂ ਨਿਸਿਨ੍ਨੋ, ਆਕਡ੍ਢਿਤੋ ਸਹਸਾ ਤੇਹਿ ਦੇਵ.

‘‘ਕਟੁਕਞ੍ਹਿ ਸਮ੍ਬਾਧਂ ਸੁਕਿਚ੍ਛਂ ਪਤ੍ਤੋ, ਮਧੁਰਮ੍ਪਿਯਂ ਜੀਵਿਤਂ ਲਦ੍ਧ ਰਾਜ;

ਕਿਚ੍ਛੇਨਹਂ ਅਜ੍ਜ ਵਧਾ ਪਮੁਤ੍ਤੋ, ਪਬ੍ਬਜ੍ਜਮੇਵਾਭਿਮਨੋਹਮਸ੍ਮੀ’’ਤਿ. (ਜਾ. ੧.੧੫.੨੨੭-੨੩੪) –

ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ.

ਤਤ੍ਥ ਅਨਿਸਮ੍ਮਾਤਿ ਅਨੁਪਧਾਰੇਤ੍ਵਾ. ਅਨਵਤ੍ਥਾਯਾਤਿ ਅਵਵਤ੍ਥਪੇਤ੍ਵਾ. ਵੇਭਙ੍ਗੋਤਿ ਵਿਪਤ੍ਤਿ. ਵਿਪਾਕੋਤਿ ਨਿਪ੍ਫਤ੍ਤਿ. ਅਸਞ੍ਞਤੋਤਿ ਅਸਂਵੁਤੋ ਦੁਸ੍ਸੀਲੋ. ਪਣਯੇਯ੍ਯਾਤਿ ਪਟ੍ਠਪੇਯ੍ਯ. ਵੇਗਾਤਿ ਵੇਗੇਨ ਸਹਸਾ. ਸਮ੍ਮਾਪਣੀਧੀ ਚਾਤਿ ਸਮ੍ਮਾਪਣਿਧਿਨਾ, ਯੋਨਿਸੋ ਠਪਿਤੇਨ ਚਿਤ੍ਤੇਨ ਕਤਾ ਨਰਸ੍ਸ ਅਤ੍ਥਾ ਪਚ੍ਛਾ ਅਨਾਨੁਤਪ੍ਪਾ ਭਵਨ੍ਤੀਤਿ ਅਤ੍ਥੋ. ਵਿਭਜ੍ਜਾਤਿ ਇਮਾਨਿ ਕਾਤੁਂ ਯੁਤ੍ਤਾਨਿ, ਇਮਾਨਿ ਅਯੁਤ੍ਤਾਨੀਤਿ ਏਵਂ ਪਞ੍ਞਾਯ ਵਿਭਜਿਤ੍ਵਾ. ਕਮ੍ਮਾਯਤਨਾਨੀਤਿ ਕਮ੍ਮਾਨਿ. ਬੁਦ੍ਧਾਨੁਮਤਾਨੀਤਿ ਪਣ੍ਡਿਤੇਹਿ ਅਨੁਮਤਾਨਿ ਅਨਵਜ੍ਜਾਨਿ ਹੋਨ੍ਤਿ. ਕਟੁਕਨ੍ਤਿ ਦੁਕ੍ਖਂ ਅਸਾਤਂ, ਸਮ੍ਬਾਧਂ ਸੁਕਿਚ੍ਛਂ ਮਰਣਭਯਂ ਪਤ੍ਤੋਮ੍ਹਿ. ਲਦ੍ਧਾਤਿ ਅਤ੍ਤਨੋ ਞਾਣਬਲੇਨ ਜੀਵਿਤਂ ਲਭਿਤ੍ਵਾ. ਪਬ੍ਬਜ੍ਜਮੇਵਾਭਿਮਨੋਤਿ ਪਬ੍ਬਜ੍ਜਾਭਿਮੁਖਚਿਤ੍ਤੋ ਏਵਾਹਮਸ੍ਮਿ.

ਏਵਂ ਮਹਾਸਤ੍ਤੇਨ ਧਮ੍ਮੇ ਦੇਸਿਤੇ ਰਾਜਾ ਦੇਵਿਂ ਆਮਨ੍ਤੇਸਿ – ‘‘ਦੇਵਿ, ਤ੍ਵਂ ਪੁਤ੍ਤਂ ਨਿਵਤ੍ਤੇਹੀ’’ਤਿ. ਦੇਵੀਪਿ ਕੁਮਾਰਸ੍ਸ ਪਬ੍ਬਜ੍ਜਮੇਵ ਰੋਚੇਸਿ. ਮਹਾਸਤ੍ਤੋ ਮਾਤਾਪਿਤਰੋ ਵਨ੍ਦਿਤ੍ਵਾ ‘‘ਸਚੇ ਮਯ੍ਹਂ ਦੋਸੋ ਅਤ੍ਥਿ, ਤਂ ਖਮਥਾ’’ਤਿ ਖਮਾਪੇਤ੍ਵਾ ਮਹਾਜਨਂ ਆਪੁਚ੍ਛਿਤ੍ਵਾ ਹਿਮਵਨ੍ਤਾਭਿਮੁਖੋ ਅਗਮਾਸਿ. ਗਤੇ ਚ ਪਨ ਮਹਾਸਤ੍ਤੇ ਮਹਾਜਨੋ ਕੂਟਜਟਿਲਂ ਪੋਥੇਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਬੋਧਿਸਤ੍ਤੋਪਿ ਸਨਾਗਰੇਹਿ ਅਮਚ੍ਚਪਾਰਿਸਜ੍ਜਾਦੀਹਿ ਰਾਜਪੁਰਿਸੇਹਿ ਅਸ੍ਸੁਮੁਖੇਹਿ ਅਨੁਬਨ੍ਧਿਯਮਾਨੋ ਤੇ ਨਿਵਤ੍ਤੇਸਿ. ਮਨੁਸ੍ਸੇਸੁ ਨਿਵਤ੍ਤੇਸੁ ਮਨੁਸ੍ਸਵਣ੍ਣੇਨਾਗਨ੍ਤ੍ਵਾ ਦੇਵਤਾਹਿ ਨੀਤੋ ਸਤ੍ਤ ਪਬ੍ਬਤਰਾਜਿਯੋ ਅਤਿਕ੍ਕਮਿਤ੍ਵਾ ਹਿਮਵਨ੍ਤੇ ਵਿਸ੍ਸਕਮ੍ਮੁਨਾ ਨਿਮ੍ਮਿਤਾਯ ਪਣ੍ਣਸਾਲਾਯ ਇਸਿਪਬ੍ਬਜ੍ਜਂ ਪਬ੍ਬਜਿ. ਤੇਨ ਵੁਤ੍ਤਂ –

੨੨. ‘‘ਸੋ ਮਂ ਤਤ੍ਥ ਖਮਾਪੇਸਿ, ਮਹਾਰਜ੍ਜਂ ਅਦਾਸਿ ਮੇ;

ਸੋਹਂ ਤਮਂ ਦਾਲਯਿਤ੍ਵਾ, ਪਬ੍ਬਜਿਂ ਅਨਗਾਰਿਯ’’ਨ੍ਤਿ.

ਤਤ੍ਥ ਤਮਂ ਦਾਲਯਿਤ੍ਵਾਤਿ ਕਾਮਾਦੀਨਵਦਸ੍ਸਨਸ੍ਸ ਪਟਿਪਕ੍ਖਭੂਤਂ ਸਮ੍ਮੋਹਤਮਂ ਵਿਧਮਿਤ੍ਵਾ. ਪਬ੍ਬਜਿਨ੍ਤਿ ਉਪਾਗਚ੍ਛਿਂ. ਅਨਗਾਰਿਯਨ੍ਤਿ ਪਬ੍ਬਜ੍ਜਂ.

੨੩. ਇਦਾਨਿ ਯਦਤ੍ਥਂ ਤਦਾ ਤਂ ਰਾਜਿਸ੍ਸਰਿਯਂ ਪਰਿਚ੍ਚਤ੍ਤਂ, ਤਂ ਦਸ੍ਸੇਤੁਂ ‘‘ਨ ਮੇ ਦੇਸ੍ਸ’’ਨ੍ਤਿ ਓਸਾਨਗਾਥਮਾਹ. ਤਸ੍ਸਤ੍ਥੋ ਵੁਤ੍ਤਨਯੋਵ.

ਏਵਂ ਪਨ ਮਹਾਸਤ੍ਤੇ ਪਬ੍ਬਜਿਤੇ ਯਾਵ ਸੋਲ਼ਸਵਸ੍ਸਕਾਲਾ ਰਾਜਕੁਲੇ ਪਰਿਚਾਰਿਕਵੇਸੇਨ ਦੇਵਤਾਯੇਵ ਨਂ ਉਪਟ੍ਠਹਿਂਸੁ. ਸੋ ਤਤ੍ਥ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਤਦਾ ਕੁਹਕੋ ਦੇਵਦਤ੍ਤੋ ਅਹੋਸਿ, ਮਾਤਾ ਮਹਾਮਾਯਾ, ਮਹਾਰਕ੍ਖਿਤਤਾਪਸੋ ਸਾਰਿਪੁਤ੍ਤਤ੍ਥੇਰੋ, ਸੋਮਨਸ੍ਸਕੁਮਾਰੋ ਲੋਕਨਾਥੋ.

ਤਸ੍ਸ ਯੁਧਞ੍ਜਯਚਰਿਯਾਯਂ (ਚਰਿਯਾ. ੩.੧ ਆਦਯੋ) ਵੁਤ੍ਤਨਯੇਨੇਵ ਦਸ ਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਇਧਾਪਿ ਨੇਕ੍ਖਮ੍ਮਪਾਰਮੀ ਅਤਿਸਯਵਤੀਤਿ ਸਾ ਏਵ ਦੇਸਨਂ ਆਰੁਲ਼੍ਹਾ. ਤਥਾ ਸਤ੍ਤਵਸ੍ਸਿਕਕਾਲੇ ਏਵ ਰਾਜਕਿਚ੍ਚੇਸੁ ਸਮਤ੍ਥਤਾ, ਤਸ੍ਸ ਤਾਪਸਸ੍ਸ ਕੂਟਜਟਿਲਭਾਵਪਰਿਗ੍ਗਣ੍ਹਨਂ, ਤੇਨ ਪਯੁਤ੍ਤੇਨ ਰਞ੍ਞਾ ਵਧੇ ਆਣਤ੍ਤੇ ਸਨ੍ਤਾਸਾਭਾਵੋ, ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਨਾਨਾਨਯੇਹਿ ਤਸ੍ਸ ਸਦੋਸਤਂ ਅਤ੍ਤਨੋ ਚ ਨਿਰਪਰਾਧਤਂ ਮਹਾਜਨਸ੍ਸ ਮਜ੍ਝੇ ਪਕਾਸੇਤ੍ਵਾ ਰਞ੍ਞੋ ਚ ਪਰਨੇਯ੍ਯਬੁਦ੍ਧਿਤਂ ਬਾਲਭਾਵਞ੍ਚ ਪਟ੍ਠਪੇਤ੍ਵਾ ਤੇਨ ਖਮਾਪਿਤੇਪਿ ਤਸ੍ਸ ਸਨ੍ਤਿਕੇ ਵਾਸਤੋ ਰਜ੍ਜਿਸ੍ਸਰਿਯਤੋ ਚ ਸਂਵੇਗਮਾਪਜ੍ਜਿਤ੍ਵਾ ਨਾਨਪ੍ਪਕਾਰਂ ਯਾਚਿਯਮਾਨੇਨਪਿ ਹਤ੍ਥਗਤਂ ਰਜ੍ਜਸਿਰਿਂ ਖੇਲ਼ਪਿਣ੍ਡਂ ਵਿਯ ਛਡ੍ਡੇਤ੍ਵਾ ਕਤ੍ਥਚਿ ਅਲਗ੍ਗਚਿਤ੍ਤੇਨ ਹੁਤ੍ਵਾ ਪਬ੍ਬਜਨਂ, ਪਬ੍ਬਜਿਤ੍ਵਾ ਪਵਿਵੇਕਾਰਾਮੇਨ ਹੁਤ੍ਵਾ ਨਚਿਰਸ੍ਸੇਵ ਅਪ੍ਪਕਸਿਰੇਨ ਝਾਨਾਭਿਞ੍ਞਾਨਿਬ੍ਬਤ੍ਤਨਨ੍ਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਸੋਮਨਸ੍ਸਚਰਿਯਾਵਣ੍ਣਨਾ ਨਿਟ੍ਠਿਤਾ.

੩. ਅਯੋਘਰਚਰਿਯਾਵਣ੍ਣਨਾ

੨੪. ਤਤਿਯੇ ਅਯੋਘਰਮ੍ਹਿ ਸਂਵਡ੍ਢੋਤਿ ਅਮਨੁਸ੍ਸਉਪਦ੍ਦਵਪਰਿਵਜ੍ਜਨਤ੍ਥਂ ਚਤੁਰਸ੍ਸਸਾਲਵਸੇਨ ਕਤੇ ਮਹਤਿ ਸਬ੍ਬਅਯੋਮਯੇ ਗੇਹੇ ਸਂਵਡ੍ਢੋ. ਨਾਮੇਨਾਸਿ ਅਯੋਘਰੋਤਿ ਅਯੋਘਰੇ ਜਾਤਸਂਵਡ੍ਢਭਾਵੇਨੇਵ ‘‘ਅਯੋਘਰਕੁਮਾਰੋ’’ਤਿ ਨਾਮੇਨ ਪਾਕਟੋ ਅਹੋਸਿ.

੨੫-੬. ਤਦਾ ਹਿ ਕਾਸਿਰਞ੍ਞੋ ਅਗ੍ਗਮਹੇਸਿਯਾ ਪੁਰਿਮਤ੍ਤਭਾਵੇ ਸਪਤ੍ਤਿ ‘‘ਤਵ ਜਾਤਂ ਜਾਤਂ ਪਜਂ ਖਾਦੇਯ੍ਯ’’ਨ੍ਤਿ ਪਤ੍ਥਨਂ ਪਟ੍ਠਪੇਤ੍ਵਾ ਯਕ੍ਖਿਨਿਯੋਨਿਯਂ ਨਿਬ੍ਬਤ੍ਤਾ ਓਕਾਸਂ ਲਭਿਤ੍ਵਾ ਤਸ੍ਸਾ ਵਿਜਾਤਕਾਲੇ ਦ੍ਵੇ ਵਾਰੇ ਪੁਤ੍ਤੇ ਖਾਦਿ. ਤਤਿਯਵਾਰੇ ਪਨ ਬੋਧਿਸਤ੍ਤੋ ਤਸ੍ਸਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਰਾਜਾ ‘‘ਦੇਵਿਯਾ ਜਾਤਂ ਜਾਤਂ ਪਜਂ ਏਕਾ ਯਕ੍ਖਿਨੀ ਖਾਦਤਿ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਮਨੁਸ੍ਸੇਹਿ ਸਮ੍ਮਨ੍ਤੇਤ੍ਵਾ ‘‘ਅਮਨੁਸ੍ਸਾ ਨਾਮ ਅਯੋਘਰਸ੍ਸ ਭਾਯਨ੍ਤਿ, ਅਯੋਘਰਂ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤੇ ਕਮ੍ਮਾਰੇ ਆਣਾਪੇਤ੍ਵਾ ਥਮ੍ਭੇ ਆਦਿਂ ਕਤ੍ਵਾ ਅਯੋਮਯੇਹੇਵ ਸਬ੍ਬਗੇਹਸਮ੍ਭਾਰੇਹਿ ਚਤੁਰਸ੍ਸਸਾਲਂ ਮਹਨ੍ਤਂ ਅਯੋਘਰਂ ਨਿਟ੍ਠਾਪੇਤ੍ਵਾ ਪਰਿਪਕ੍ਕਗਬ੍ਭਂ ਦੇਵਿਂ ਤਤ੍ਥ ਵਾਸੇਸਿ. ਸਾ ਤਤ੍ਥ ਧਞ੍ਞਪੁਞ੍ਞਲਕ੍ਖਣਂ ਪੁਤ੍ਤਂ ਵਿਜਾਯਿ. ‘‘ਅਯੋਘਰਕੁਮਾਰੋ’’ਤ੍ਵੇਵਸ੍ਸ ਨਾਮਂ ਕਰਿਂਸੁ. ਤਂ ਧਾਤੀਨਂ ਦਤ੍ਵਾ ਮਹਨ੍ਤਂ ਆਰਕ੍ਖਂ ਸਂਵਿਦਹਿਤ੍ਵਾ ਰਾਜਾ ਦੇਵਿਂ ਅਨ੍ਤੇਪੁਰਂ ਆਨੇਸਿ. ਯਕ੍ਖਿਨੀਪਿ ਉਦਕਵਾਰਂ ਗਨ੍ਤ੍ਵਾ ਵੇਸ੍ਸਵਣਸ੍ਸ ਉਦਕਂ ਵਹਨ੍ਤੀ ਜੀਵਿਤਕ੍ਖਯਂ ਪਤ੍ਤਾ.

ਮਹਾਸਤ੍ਤੋ ਅਯੋਘਰੇਯੇਵ ਵਡ੍ਢਿਤ੍ਵਾ ਵਿਞ੍ਞੁਤਂ ਪਤ੍ਤੋ, ਤਤ੍ਥੇਵ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿ. ਰਾਜਾ ਪੁਤ੍ਤਂ ਸੋਲ਼ਸਵਸ੍ਸੁਦ੍ਦੇਸਿਕਂ ਵਿਦਿਤ੍ਵਾ ‘‘ਰਜ੍ਜਮਸ੍ਸ ਦਸ੍ਸਾਮੀ’’ਤਿ ਅਮਚ੍ਚੇ ਆਣਾਪੇਸਿ – ‘‘ਪੁਤ੍ਤਂ ਮੇ ਆਨੇਥਾ’’ਤਿ. ਤੇ ‘‘ਸਾਧੁ, ਦੇਵਾ’’ਤਿ ਨਗਰਂ ਅਲਙ੍ਕਾਰਾਪੇਤ੍ਵਾ ਸਬ੍ਬਾਲਙ੍ਕਾਰਵਿਭੂਸਿਤਂ ਮਙ੍ਗਲਵਾਰਣਂ ਆਦਾਯ ਤਤ੍ਥ ਗਨ੍ਤ੍ਵਾ ਕੁਮਾਰਂ ਅਲਙ੍ਕਰਿਤ੍ਵਾ ਹਤ੍ਥਿਕ੍ਖਨ੍ਧੇ ਨਿਸੀਦਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਾਰੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਮਹਾਸਤ੍ਤੋ ਰਾਜਾਨਂ ਵਨ੍ਦਿਤ੍ਵਾ ਅਟ੍ਠਾਸਿ. ਰਾਜਾ ਤਸ੍ਸ ਸਰੀਰਸੋਭਂ ਓਲੋਕੇਤ੍ਵਾ ਬਲਵਸਿਨੇਹੇਨ ਤਂ ਆਲਿਙ੍ਗਿਤ੍ਵਾ ‘‘ਅਜ੍ਜੇਵ ਮੇ ਪੁਤ੍ਤਂ ਅਭਿਸਿਞ੍ਚਥਾ’’ਤਿ ਅਮਚ੍ਚੇ ਆਣਾਪੇਸਿ. ਮਹਾਸਤ੍ਤੋ ਪਿਤਰਂ ਵਨ੍ਦਿਤ੍ਵਾ ‘‘ਨ ਮਯ੍ਹਂ ਰਜ੍ਜੇਨ ਅਤ੍ਥੋ, ਅਹਂ ਪਬ੍ਬਜਿਸ੍ਸਾਮਿ, ਪਬ੍ਬਜ੍ਜਂ ਮੇ ਅਨੁਜਾਨਾਥਾ’’ਤਿ ਆਹ. ਤੇਨ ਵੁਤ੍ਤਂ ‘‘ਦੁਕ੍ਖੇਨ ਜੀਵਿਤੋ ਲਦ੍ਧੋ’’ਤਿਆਦਿ.

ਤਤ੍ਥ ਦੁਕ੍ਖੇਨਾਤਿ, ਤਾਤ, ਤਵ ਭਾਤਿਕਾ ਦ੍ਵੇ ਏਕਾਯ ਯਕ੍ਖਿਨਿਯਾ ਖਾਦਿਤਾ, ਤੁਯ੍ਹਂ ਪਨ ਤਤੋ ਅਮਨੁਸ੍ਸਭਯਤੋ ਨਿਵਾਰਣਤ੍ਥਂ ਕਤੇਨ ਦੁਕ੍ਖੇਨ ਮਹਤਾ ਆਯਾਸੇਨ ਜੀਵਿਤੋ ਲਦ੍ਧੋ. ਸਂਪੀਲ਼ੇ ਪਤਿਪੋਸਿਤੋਤਿ ਨਾਨਾਵਿਧਾਯ ਅਮਨੁਸ੍ਸਰਕ੍ਖਾਯ ਸਮ੍ਬਾਧੇ ਅਯੋਘਰੇ ਵਿਜਾਯਨਕਾਲਤੋ ਪਟ੍ਠਾਯ ਯਾਵ ਸੋਲ਼ਸਵਸ੍ਸੁਪ੍ਪਤ੍ਤਿਯਾ ਸਮ੍ਬਾਧੇ ਸਂਵਡ੍ਢਿਤੋਤਿ ਅਤ੍ਥੋ. ਅਜ੍ਜੇਵ, ਪੁਤ੍ਤ, ਪਟਿਪਜ੍ਜ, ਕੇਵਲਂ ਵਸੁਧਂ ਇਮਨ੍ਤਿ ਕਞ੍ਚਨਮਾਲਾਲਙ੍ਕਤਸ੍ਸ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਰਤਨਰਾਸਿਮ੍ਹਿ ਠਪੇਤ੍ਵਾ ਤੀਹਿ ਸਙ੍ਖੇਹਿ ਅਭਿਸਿਞ੍ਚਿਯਮਾਨੋ ਇਮਂ ਕੁਲਸਨ੍ਤਕਂ ਕੇਵਲਂ ਸਕਲਂ ਸਮੁਦ੍ਦਪਰਿਯਨ੍ਤਂ ਤਤੋਯੇਵ ਸਹ ਰਟ੍ਠੇਹੀਤਿ ਸਰਟ੍ਠਕਂ ਸਹ ਨਿਗਮੇਹਿ ਮਹਾਗਾਮੇਹੀਤਿ ਸਨਿਗਮਂ ਅਪਰਿਮਿਤੇਨ ਪਰਿਵਾਰਜਨੇਨ ਸਦ੍ਧਿਂ ਸਜਨਂ ਇਮਂ ਵਸੁਧਂ ਮਹਾਪਥਵਿਂ ਅਜ੍ਜੇਵ, ਪੁਤ੍ਤ, ਪਟਿਪਜ੍ਜ, ਰਜ੍ਜਂ ਕਾਰੇਹੀਤਿ ਅਤ੍ਥੋ. ਵਨ੍ਦਿਤ੍ਵਾ ਖਤ੍ਤਿਯਂ. ਅਞ੍ਜਲਿਂ ਪਗ੍ਗਹੇਤ੍ਵਾਨ, ਇਦਂ ਵਚਨਮਬ੍ਰਵਿਨ੍ਤਿ ਖਤ੍ਤਿਯਂ ਕਾਸਿਰਾਜਾਨਂ ਮਮ ਪਿਤਰਂ ਵਨ੍ਦਿਤ੍ਵਾ ਤਸ੍ਸ ਅਞ੍ਜਲਿਂ ਪਣਾਮੇਤ੍ਵਾ ਇਦਂ ਵਚਨਂ ਅਭਾਸਿਂ.

੨੭. ਯੇ ਕੇਚਿ ਮਹਿਯਾ ਸਤ੍ਤਾਤਿ ਇਮਿਸ੍ਸਾ ਮਹਾਪਥਵਿਯਾ ਯੇ ਕੇਚਿ ਸਤ੍ਤਾ ਨਾਮ. ਹੀਨਮੁਕ੍ਕਟ੍ਠਮਜ੍ਝਿਮਾਤਿ ਲਾਮਕਾ ਚੇਵ ਉਤ੍ਤਮਾ ਚ, ਉਭਿਨ੍ਨਂ ਵੇਮਜ੍ਝੇ ਭਵਤ੍ਤਾ ਮਜ੍ਝਿਮਾ ਚ. ਸਕੇ ਗੇਹੇਤਿ ਸਬ੍ਬੇ ਤੇ ਸਕੇ ਗੇਹੇ. ਸਕਞਾਤਿਭੀਤਿ ਸਕੇਹਿ ਞਾਤੀਹਿ ਸਮ੍ਮੋਦਮਾਨਾ ਵਿਸ੍ਸਟ੍ਠਾ ਅਨੁਕ੍ਕਣ੍ਠਿਤਾ ਯਥਾਵਿਭਵਂ ਵਡ੍ਢਨ੍ਤਿ.

੨੮. ਇਦਂ ਲੋਕੇ ਉਤ੍ਤਰਿਯਨ੍ਤਿ ਇਦਂ ਪਨ ਇਮਸ੍ਮਿਂ ਲੋਕੇ ਅਸਦਿਸਂ, ਮਯ੍ਹਂ ਏਵ ਆਵੇਣਿਕਂ. ਕਿਂ ਪਨ ਤਂ ਸਂਪੀਲ਼ੇ ਮਮ ਪੋਸਨਨ੍ਤਿ ਸਮ੍ਬਾਧੇ ਮਮ ਸਂਵਡ੍ਢਨਂ. ਤਥਾ ਹਿ ਅਯੋਘਰਮ੍ਹਿ ਸਂਵਡ੍ਢੋ, ਅਪ੍ਪਭੇ ਚਨ੍ਦਸੂਰਿਯੇਤਿ ਚਨ੍ਦਸੂਰਿਯਾਨਂ ਪਭਾਰਹਿਤੇ ਅਯੋਘਰੇ ਸਂਵਡ੍ਢੋਮ੍ਹੀਤਿ ਸਂਵਡ੍ਢੋ ਅਮ੍ਹਿ.

੨੯. ਪੂਤਿਕੁਣਪਸਮ੍ਪੁਣ੍ਣਾਤਿ ਪੂਤਿਗਨ੍ਧਨਾਨਪ੍ਪਕਾਰਕੁਣਪਸਮ੍ਪੁਣ੍ਣਾ ਗੂਥਨਿਰਯਸਦਿਸਾ. ਮਾਤੁ ਕੁਚ੍ਛਿਤੋ ਜੀਵਿਤਸਂਸਯੇ ਵਤ੍ਤਮਾਨੇ ਕਥਂ ਮੁਚ੍ਚਿਤ੍ਵਾ ਨਿਕ੍ਖਮਿਤ੍ਵਾ. ਤਤੋ ਘੋਰਤਰੇਤਿ ਤਤੋਪਿ ਗਬ੍ਭਵਾਸਤੋ ਦਾਰੁਣਤਰੇ, ਅਵਿਸ੍ਸਟ੍ਠਵਾਸੇਨ ਦੁਕ੍ਖੇ. ਪਕ੍ਖਿਤ੍ਤਯੋਘਰੇਤਿ ਪਕ੍ਖਿਤ੍ਤੋ ਅਯੋਘਰੇ, ਬਨ੍ਧਨਾਗਾਰੇ ਠਪਿਤੋ ਵਿਯ ਅਹੋਸਿਨ੍ਤਿ ਦਸ੍ਸੇਤਿ.

੩੦. ਯਦਿਹਨ੍ਤਿ ਏਤ੍ਥ ਯਦੀਤਿ ਨਿਪਾਤਮਤ੍ਤਂ. ਤਾਦਿਸਨ੍ਤਿ ਯਾਦਿਸਂ ਪੁਬ੍ਬੇ ਵੁਤ੍ਤਂ, ਤਾਦਿਸਂ ਪਰਮਦਾਰੁਣਂ ਦੁਕ੍ਖਂ ਪਤ੍ਵਾ ਅਹਂ ਰਜ੍ਜੇਸੁ ਯਦਿ ਰਜ੍ਜਾਮਿ ਯਦਿ ਰਮਿਸ੍ਸਾਮਿ, ਏਵਂ ਸਨ੍ਤੇ ਪਾਪਾਨਂ ਲਾਮਕਾਨਂ ਨਿਹੀਨਪੁਰਿਸਾਨਂ ਉਤ੍ਤਮੋ ਨਿਹੀਨਤਮੋ ਸਿਯਂ.

੩੧. ਉਕ੍ਕਣ੍ਠਿਤੋਮ੍ਹਿ ਕਾਯੇਨਾਤਿ ਅਪਰਿਮੁਤ੍ਤਗਬ੍ਭਵਾਸਾਦਿਨਾ ਪੂਤਿਕਾਯੇਨ ਉਕ੍ਕਣ੍ਠਿਤੋ ਨਿਬ੍ਬਿਨ੍ਨੋ ਅਮ੍ਹਿ. ਰਜ੍ਜੇਨਮ੍ਹਿ ਅਨਤ੍ਥਿਕੋਤਿ ਰਜ੍ਜੇਨਪਿ ਅਨਤ੍ਥਿਕੋ ਅਮ੍ਹਿ. ਯਕ੍ਖਿਨਿਯਾ ਹਤ੍ਥਤੋ ਮੁਤ੍ਤੋਪਿ ਹਿ ਨਾਹਂ ਅਜਰਾਮਰੋ, ਕਿਂ ਮੇ ਰਜ੍ਜੇਨ, ਰਜ੍ਜਞ੍ਹਿ ਨਾਮ ਸਬ੍ਬੇਸਂ ਅਨਤ੍ਥਾਨਂ ਸਨ੍ਨਿਪਾਤਟ੍ਠਾਨਂ, ਤਤ੍ਥ ਠਿਤਕਾਲਤੋ ਪਟ੍ਠਾਯ ਦੁਨ੍ਨਿਕ੍ਖਮਂ ਹੋਤਿ, ਤਸ੍ਮਾ ਤਂ ਅਨੁਪਗਨ੍ਤ੍ਵਾ ਨਿਬ੍ਬੁਤਿਂ ਪਰਿਯੇਸਿਸ੍ਸਂ, ਯਤ੍ਥ ਮਂ ਮਚ੍ਚੁ ਨ ਮਦ੍ਦਿਯੇਤਿ ਯਤ੍ਥ ਠਿਤਂ ਮਂ ਮਹਾਸੇਨੋ ਮਚ੍ਚੁਰਾਜਾ ਨ ਮਦ੍ਦਿਯੇ ਨ ਓਤ੍ਥਰੇਯ੍ਯ ਨ ਅਭਿਭਵੇਯ੍ਯ, ਤਂ ਨਿਬ੍ਬੁਤਿਂ ਅਮਤਮਹਾਨਿਬ੍ਬਾਨਂ ਪਰਿਯੇਸਿਸ੍ਸਾਮੀਤਿ.

੩੨. ਏਵਾਹਂ ਚਿਨ੍ਤਯਿਤ੍ਵਾਨਾਤਿ ਏਵਂ ਇਮਿਨਾ ਵੁਤ੍ਤਪ੍ਪਕਾਰੇਨ ਨਾਨਪ੍ਪਕਾਰਂ ਸਂਸਾਰੇ ਆਦੀਨਵਂ ਪਚ੍ਚਵੇਕ੍ਖਣੇਨ ਨਿਬ੍ਬਾਨੇ ਆਨਿਸਂਸਦਸ੍ਸਨੇਨ ਚ ਯੋਨਿਸੋ ਚਿਨ੍ਤੇਤ੍ਵਾ. ਵਿਰਵਨ੍ਤੇ ਮਹਾਜਨੇਤਿ ਮਯਾ ਵਿਪ੍ਪਯੋਗਦੁਕ੍ਖਾਸਹਨੇਨ ਵਿਰਵਨ੍ਤੇ ਪਰਿਦੇਵਨ੍ਤੇ ਮਾਤਾਪਿਤੁਪ੍ਪਮੁਖੇ ਮਹਨ੍ਤੇ ਜਨੇ. ਨਾਗੋਵ ਬਨ੍ਧਨਂ ਛੇਤ੍ਵਾਤਿ ਯਥਾ ਨਾਮ ਮਹਾਬਲੋ ਹਤ੍ਥਿਨਾਗੋ ਦੁਬ੍ਬਲਤਰਂ ਰਜ੍ਜੁਬਨ੍ਧਨਂ ਸੁਖੇਨੇਵ ਛਿਨ੍ਦਤਿ, ਏਵਮੇਵ ਞਾਤਿਸਙ੍ਗਾਦਿਭੇਦਸ੍ਸ ਤਸ੍ਮਿਂ ਜਨੇ ਤਣ੍ਹਾਬਨ੍ਧਨਸ੍ਸ ਛਿਨ੍ਦਨੇਨ ਬਨ੍ਧਨਂ ਛੇਤ੍ਵਾ ਕਾਨਨਸਙ੍ਖਾਤਂ ਮਹਾਵਨਂ ਪਬ੍ਬਜ੍ਜੂਪਗਮਨਵਸੇਨ ਪਾਵਿਸਿਂ. ਓਸਾਨਗਾਥਾ ਵੁਤ੍ਤਤ੍ਥਾ ਏਵ.

ਤਤ੍ਥ ਚ ਮਹਾਸਤ੍ਤੋ ਅਤ੍ਤਨੋ ਪਬ੍ਬਜ੍ਜਾਧਿਪ੍ਪਾਯਂ ਜਾਨਿਤ੍ਵਾ ‘‘ਤਾਤ, ਕਿਂਕਾਰਣਾ ਪਬ੍ਬਜਸੀ’’ਤਿ ਰਞ੍ਞਾ ਵੁਤ੍ਤੋ ‘‘ਦੇਵ, ਅਹਂ ਮਾਤੁਕੁਚ੍ਛਿਮ੍ਹਿ ਦਸ ਮਾਸੇ ਗੂਥਨਿਰਯੇ ਵਿਯ ਵਸਿਤ੍ਵਾ ਮਾਤੁ ਕੁਚ੍ਛਿਤੋ ਨਿਕ੍ਖਨ੍ਤੋ ਯਕ੍ਖਿਨਿਯਾ ਭਯੇਨ ਸੋਲ਼ਸਵਸ੍ਸਾਨਿ ਬਨ੍ਧਨਾਗਾਰੇ ਵਸਨ੍ਤੋ ਬਹਿ ਓਲੋਕੇਤੁਮ੍ਪਿ ਨ ਲਭਿਂ, ਉਸ੍ਸਦਨਿਰਯੇ ਪਕ੍ਖਿਤ੍ਤੋ ਵਿਯ ਅਹੋਸਿਂ, ਯਕ੍ਖਿਨਿਤੋ ਮੁਤ੍ਤੋਪਿ ਅਜਰਾਮਰੋ ਨ ਹੋਮਿ, ਮਚ੍ਚੁ ਨਾਮੇਸ ਨ ਸਕ੍ਕਾ ਕੇਨਚਿ ਜਿਨਿਤੁਂ, ਭਵੇ ਉਕ੍ਕਣ੍ਠਿਤੋਮ੍ਹਿ, ਯਾਵ ਮੇ ਬ੍ਯਾਧਿਜਰਾਮਰਣਾਨਿ ਨਾਗਚ੍ਛਨ੍ਤਿ, ਤਾਵਦੇਵ ਪਬ੍ਬਜਿਤ੍ਵਾ ਧਮ੍ਮਂ ਚਰਿਸ੍ਸਾਮਿ, ਅਲਂ ਮੇ ਰਜ੍ਜੇਨ, ਅਨੁਜਾਨਾਹਿ ਮਂ, ਦੇਵ, ਪਬ੍ਬਜਿਤੁ’’ਨ੍ਤਿ ਵਤ੍ਵਾ –

‘‘ਯਮੇਕਰਤ੍ਤਿਂ ਪਠਮਂ, ਗਬ੍ਭੇ ਵਸਤਿ ਮਾਣਵੋ;

ਅਬ੍ਭੁਟ੍ਠਿਤੋਵ ਸੋ ਯਾਤਿ, ਸ ਗਚ੍ਛਂ ਨ ਨਿਵਤ੍ਤਤੀ’’ਤਿ. (ਜਾ. ੧.੧੫.੩੬੩) –

ਆਦਿਨਾ ਚਤੁਵੀਸਤਿਯਾ ਗਾਥਾਹਿ ਪਿਤੁ ਧਮ੍ਮਂ ਦੇਸੇਤ੍ਵਾ ‘‘ਮਹਾਰਾਜ, ਤੁਮ੍ਹਾਕਂ ਰਜ੍ਜਂ ਤੁਮ੍ਹਾਕਮੇਵ ਹੋਤੁ, ਨ ਮਯ੍ਹਂ ਇਮਿਨਾ ਅਤ੍ਥੋ, ਤੁਮ੍ਹੇਹਿ ਸਦ੍ਧਿਂ ਕਥੇਨ੍ਤੇਯੇਵ ਬ੍ਯਾਧਿਜਰਾਮਰਣਾਨਿ ਆਗਚ੍ਛੇਯ੍ਯੁਂ, ਤਿਟ੍ਠਥ ਤੁਮ੍ਹੇ’’ਤਿ ਵਤ੍ਵਾ ਅਯਦਾਮਂ ਛਿਨ੍ਦਿਤ੍ਵਾ ਮਤ੍ਤਹਤ੍ਥੀ ਵਿਯ, ਕਞ੍ਚਨਪਞ੍ਜਰਂ ਭਿਨ੍ਦਿਤ੍ਵਾ ਸੀਹਪੋਤਕੋ ਵਿਯ, ਕਾਮੇ ਪਹਾਯ ਮਾਤਾਪਿਤਰੋ ਵਨ੍ਦਿਤ੍ਵਾ ਨਿਕ੍ਖਮਿ. ਅਥਸ੍ਸ ਪਿਤਾ ‘‘ਅਯਂ ਨਾਮ ਕੁਮਾਰੋ ਪਬ੍ਬਜਿਤੁਕਾਮੋ, ਕਿਮਙ੍ਗਂ ਪਨਾਹਂ, ਮਮਾਪਿ ਰਜ੍ਜੇਨ ਅਤ੍ਥੋ ਨਤ੍ਥੀ’’ਤਿ ਰਜ੍ਜਂ ਪਹਾਯ ਤੇਨ ਸਦ੍ਧਿਂ ਏਵ ਨਿਕ੍ਖਮਿ. ਤਸ੍ਮਿਂ ਨਿਕ੍ਖਮਨ੍ਤੇ ਦੇਵੀਪਿ ਅਮਚ੍ਚਾਪਿ ਬ੍ਰਾਹ੍ਮਣਗਹਪਤਿਕਾਦਯੋਪੀਤਿ ਸਕਲਨਗਰਵਾਸਿਨੋ ਭੋਗੇ ਛਡ੍ਡੇਤ੍ਵਾ ਨਿਕ੍ਖਮਿਂਸੁ. ਸਮਾਗਮੋ ਮਹਾ ਅਹੋਸਿ, ਪਰਿਸਾ ਦ੍ਵਾਦਸਯੋਜਨਿਕਾ ਜਾਤਾ, ਤੇ ਆਦਾਯ ਮਹਾਸਤ੍ਤੋ ਹਿਮਵਨ੍ਤਂ ਪਾਵਿਸਿ.

ਸਕ੍ਕੋ ਦੇਵਰਾਜਾ ਤਸ੍ਸ ਨਿਕ੍ਖਨ੍ਤਭਾਵਂ ਞਤ੍ਵਾ ਵਿਸ੍ਸਕਮ੍ਮਂ ਪੇਸੇਤ੍ਵਾ ਦ੍ਵਾਦਸਯੋਜਨਾਯਾਮਂ ਸਤ੍ਤਯੋਜਨਵਿਤ੍ਥਾਰਂ ਅਸ੍ਸਮਪਦਂ ਕਾਰੇਸਿ, ਸਬ੍ਬੇ ਚ ਪਬ੍ਬਜਿਤਪਰਿਕ੍ਖਾਰੇ ਪਟਿਯਾਦਾਪੇਸਿ. ਇਧ ਮਹਾਸਤ੍ਤਸ੍ਸ ਪਬ੍ਬਜ੍ਜਾ ਚ ਓਵਾਦਦਾਨਞ੍ਚ ਬ੍ਰਹ੍ਮਲੋਕਪਰਾਯਨਤਾ ਚ ਪਰਿਸਾਯ ਸਮ੍ਮਾ ਪਟਿਪਤ੍ਤਿ ਚ ਸਬ੍ਬਾ ਮਹਾਗੋਵਿਨ੍ਦਚਰਿਯਾਯਂ (ਚਰਿਯਾ. ੧.੩੭ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਪਰਿਸਾ ਬੁਦ੍ਧਪਰਿਸਾ, ਅਯੋਘਰਪਣ੍ਡਿਤੋ ਲੋਕਨਾਥੋ.

ਤਸ੍ਸ ਸੇਸਪਾਰਮਿਨਿਦ੍ਧਾਰਣਾ ਆਨੁਭਾਵਵਿਭਾਵਨਾ ਚ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ.

ਅਯੋਘਰਚਰਿਯਾਵਣ੍ਣਨਾ ਨਿਟ੍ਠਿਤਾ.

੪. ਭਿਸਚਰਿਯਾਵਣ੍ਣਨਾ

੩੪. ਚਤੁਤ੍ਥੇ ਯਦਾ ਹੋਮਿ, ਕਾਸੀਨਂ ਪੁਰਵਰੁਤ੍ਤਮੇਤਿ ‘‘ਕਾਸੀ’’ਤਿ ਬਹੁਵਚਨਵਸੇਨ ਲਦ੍ਧਵੋਹਾਰਸ੍ਸ ਰਟ੍ਠਸ੍ਸ ਨਗਰਵਰੇ ਬਾਰਾਣਸਿਯਂ ਯਸ੍ਮਿਂ ਕਾਲੇ ਜਾਤਸਂਵਡ੍ਢੋ ਹੁਤ੍ਵਾ ਵਸਾਮੀਤਿ ਅਤ੍ਥੋ. ਭਗਿਨੀ ਚ ਭਾਤਰੋ ਸਤ੍ਤ, ਨਿਬ੍ਬਤ੍ਤਾ ਸੋਤ੍ਤਿਯੇ ਕੁਲੇਤਿ ਉਪਕਞ੍ਚਨਾਦਯੋ ਛ ਅਹਞ੍ਚਾਤਿ ਭਾਤਰੋ ਸਤ੍ਤ ਸਬ੍ਬਕਨਿਟ੍ਠਾ ਕਞ੍ਚਨਦੇਵੀ ਨਾਮ ਭਗਿਨੀ ਚਾਤਿ ਸਬ੍ਬੇ ਮਯਂ ਅਟ੍ਠ ਜਨਾ ਮਨ੍ਤਜ੍ਝੇਨਨਿਰਤਤਾਯ ਸੋਤ੍ਤਿਯੇ ਉਦਿਤੋਦਿਤੇ ਮਹਤਿ ਬ੍ਰਾਹ੍ਮਣਕੁਲੇ ਤਦਾ ਨਿਬ੍ਬਤ੍ਤਾ ਜਾਤਾਤਿ ਅਤ੍ਥੋ.

੩੫. ਬੋਧਿਸਤ੍ਤੋ ਹਿ ਤਦਾ ਬਾਰਾਣਸਿਯਂ ਅਸੀਤਿਕੋਟਿਵਿਭਵਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ‘‘ਕਞ੍ਚਨਕੁਮਾਰੋ’’ਤਿ ਨਾਮਂ ਕਰਿਂਸੁ. ਅਥਸ੍ਸ ਪਦਸਾ ਵਿਚਰਣਕਾਲੇ ਅਪਰੋ ਪੁਤ੍ਤੋ ਵਿਜਾਯਿ. ‘‘ਉਪਕਞ੍ਚਨਕੁਮਾਰੋ’’ਤਿਸ੍ਸ ਨਾਮਂ ਕਰਿਂਸੁ. ਤਤੋ ਪਟ੍ਠਾਯ ਮਹਾਸਤ੍ਤਂ ‘‘ਮਹਾਕਞ੍ਚਨਕੁਮਾਰੋ’’ਤਿ ਸਮੁਦਾਚਰਨ੍ਤਿ. ਏਵਂ ਪਟਿਪਾਟਿਯਾ ਸਤ੍ਤ ਪੁਤ੍ਤਾ ਅਹੇਸੁਂ. ਸਬ੍ਬਕਨਿਟ੍ਠਾ ਪਨ ਏਕਾ ਧੀਤਾ. ਤਸ੍ਸਾ ‘‘ਕਞ੍ਚਨਦੇਵੀ’’ਤਿ ਨਾਮਂ ਕਰਿਂਸੁ. ਮਹਾਸਤ੍ਤੋ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਪਚ੍ਚਾਗਞ੍ਛਿ.

ਅਥ ਨਂ ਮਾਤਾਪਿਤਰੋ ਘਰਾਵਾਸੇਨ ਬਨ੍ਧਿਤੁਕਾਮਾ ‘‘ਅਤ੍ਤਨੋ ਸਮਾਨਜਾਤਿਕੁਲਤੋ ਤੇ ਦਾਰਿਕਂ ਆਨੇਸ੍ਸਾਮਾ’’ਤਿ ਵਦਿਂਸੁ. ਸੋ ‘‘ਅਮ੍ਮ, ਤਾਤ, ਨ ਮਯ੍ਹਂ ਘਰਾਵਾਸੇਨ ਅਤ੍ਥੋ. ਮਯ੍ਹਞ੍ਹਿ ਸਬ੍ਬੋ ਲੋਕਸਨ੍ਨਿਵਾਸੋ ਆਦਿਤ੍ਤੋ ਵਿਯ ਸਪ੍ਪਟਿਭਯੋ, ਬਨ੍ਧਨਾਗਾਰਂ ਵਿਯ ਪਲਿਬੁਦ੍ਧਨਂ, ਉਕ੍ਕਾਰਭੂਮਿ ਵਿਯ ਜਿਗੁਚ੍ਛੋ ਹੁਤ੍ਵਾ ਉਪਟ੍ਠਾਤਿ, ਨ ਮੇ ਚਿਤ੍ਤਂ ਕਾਮੇਸੁ ਰਜ੍ਜਤਿ, ਅਞ੍ਞੇ ਵੋ ਪੁਤ੍ਤਾ ਅਤ੍ਥਿ, ਤੇ ਘਰਾਵਾਸੇਨ ਨਿਮਨ੍ਤੇਥਾ’’ਤਿ ਵਤ੍ਵਾ ਪੁਨਪ੍ਪੁਨਂ ਯਾਚਿਤੋਪਿ ਸਹਾਯੇਹਿ ਯਾਚਾਪਿਤੋਪਿ ਨ ਇਚ੍ਛਿ, ਅਥ ਨਂ ਸਹਾਯਾ ‘‘ਸਮ੍ਮ, ਕਿਂ ਪਨ ਤ੍ਵਂ ਪਤ੍ਥਯਨ੍ਤੋ ਕਾਮੇ ਪਰਿਭੁਞ੍ਜਿਤੁਂ ਨ ਇਚ੍ਛਸੀ’’ਤਿ ਪੁਚ੍ਛਿਂਸੁ. ਸੋ ਤੇਸਂ ਅਤ੍ਤਨੋ ਨੇਕ੍ਖਮ੍ਮਜ੍ਝਾਸਯਂ ਆਰੋਚੇਸਿ. ਤੇਨ ਵੁਤ੍ਤਂ ‘‘ਏਤੇਸਂ ਪੁਬ੍ਬਜੋ ਆਸਿ’’ਨ੍ਤਿਆਦਿ.

ਤਤ੍ਥ ਏਤੇਸਂ ਪੁਬ੍ਬਜੋ ਆਸਿਨ੍ਤਿ ਏਤੇਸਂ ਉਪਕਞ੍ਚਨਕਾਦੀਨਂ ਸਤ੍ਤਨ੍ਨਂ ਜੇਟ੍ਠਭਾਤਿਕੋ ਅਹਂ ਤਦਾ ਅਹੋਸਿਂ. ਹਿਰੀਸੁਕ੍ਕਮੁਪਾਗਤੋਤਿ ਸੁਕ੍ਕਵਿਪਾਕਤ੍ਤਾ ਸਨ੍ਤਾਨਸ੍ਸ ਵਿਸੋਧਨਤੋ ਚ ਸੁਕ੍ਕਂ ਪਾਪਜਿਗੁਚ੍ਛਨਲਕ੍ਖਣਂ ਹਿਰਿਂ ਭੁਸਂ ਆਗਤੋ, ਅਤਿਵਿਯ ਪਾਪਂ ਜਿਗੁਚ੍ਛਨ੍ਤੋ ਆਸਿਨ੍ਤਿ ਅਤ੍ਥੋ. ਭਵਂ ਦਿਸ੍ਵਾਨ ਭਯਤੋ, ਨੇਕ੍ਖਮ੍ਮਾਭਿਰਤੋ ਅਹਨ੍ਤਿ ਕਾਮਭਵਾਦੀਨਂ ਵਸੇਨ ਸਬ੍ਬਂ ਭਵਂ ਪਕ੍ਖਨ੍ਦਿਤੁਂ ਆਗਚ੍ਛਨ੍ਤਂ ਚਣ੍ਡਹਤ੍ਥਿਂ ਵਿਯ, ਹਿਂਸਿਤੁਂ ਆਗਚ੍ਛਨ੍ਤਂ ਉਕ੍ਖਿਤ੍ਤਾਸਿਕਂ ਵਧਕਂ ਵਿਯ, ਸੀਹਂ ਵਿਯ, ਯਕ੍ਖਂ ਵਿਯ, ਰਕ੍ਖਸਂ ਵਿਯ, ਘੋਰਵਿਸਂ ਵਿਯ, ਆਸਿਵਿਸਂ ਵਿਯ, ਆਦਿਤ੍ਤਂ ਅਙ੍ਗਾਰਂ ਵਿਯ, ਸਪ੍ਪਟਿਭਯਂ ਭਯਾਨਕਭਾਵਤੋ ਪਸ੍ਸਿਤ੍ਵਾ ਤਤੋ ਮੁਚ੍ਚਨਤ੍ਥਞ੍ਚ ਪਬ੍ਬਜ੍ਜਾਭਿਰਤੋ ਪਬ੍ਬਜਿਤ੍ਵਾ ‘‘ਕਥਂ ਨੁ ਖੋ ਧਮ੍ਮਚਰਿਯਂ ਸਮ੍ਮਾਪਟਿਪਤ੍ਤਿਂ ਪੂਰੇਯ੍ਯਂ, ਝਾਨਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਯ੍ਯ’’ਨ੍ਤਿ ਪਬ੍ਬਜ੍ਜਾਕੁਸਲਧਮ੍ਮਪਠਮਜ੍ਝਾਨਾਦਿਅਭਿਰਤੋ ਤਦਾ ਅਹਂ ਆਸਿਨ੍ਤਿ ਅਤ੍ਥੋ.

੩੬. ਪਹਿਤਾਤਿ ਮਾਤਾਪਿਤੂਹਿ ਪੇਸਿਤਾ. ਏਕਮਾਨਸਾਤਿ ਸਮਾਨਜ੍ਝਾਸਯਾ ਪੁਬ੍ਬੇ ਮਯਾ ਏਕਚ੍ਛਨ੍ਦਾ ਮਨਾਪਚਾਰਿਨੋ ਮਾਤਾਪਿਤੂਹਿ ਪਹਿਤਤ੍ਤਾ ਪਨ ਮਮ ਪਟਿਕ੍ਕੂਲਂ ਅਮਨਾਪਂ ਵਦਨ੍ਤਾ. ਕਾਮੇਹਿ ਮਂ ਨਿਮਨ੍ਤੇਨ੍ਤੀਤਿ ਮਹਾਪਿਤੂਹਿ ਵਾ ਏਕਮਾਨਸਾ ਕਾਮੇਹਿ ਮਂ ਨਿਮਨ੍ਤੇਨ੍ਤਿ. ਕੁਲਵਂਸਂ ਧਾਰੇਹੀਤਿ ਘਰਾਵਾਸਂ ਸਣ੍ਠਪੇਨ੍ਤੋ ਅਤ੍ਤਨੋ ਕੁਲਵਂਸਂ ਧਾਰੇਹਿ ਪਤਿਟ੍ਠਪੇਹੀਤਿ ਕਾਮੇਹਿ ਮਂ ਨਿਮਨ੍ਤੇਸੁਨ੍ਤਿ ਅਤ੍ਥੋ.

੩੭. ਯਂ ਤੇਸਂ ਵਚਨਂ ਵੁਤ੍ਤਨ੍ਤਿ ਤੇਸਂ ਮਮ ਪਿਯਸਹਾਯਾਨਂ ਯਂ ਵਚਨਂ ਵੁਤ੍ਤਂ. ਗਿਹਿਧਮ੍ਮੇ ਸੁਖਾਵਹਨ੍ਤਿ ਗਿਹਿਭਾਵੇ ਸਤਿ ਗਹਟ੍ਠਭਾਵੇ ਠਿਤਸ੍ਸ ਪੁਰਿਸਸ੍ਸ ਞਾਯਾਨੁਗਤਤ੍ਤਾ ਦਿਟ੍ਠਧਮ੍ਮਿਕਸ੍ਸ ਸਮ੍ਪਰਾਯਿਕਸ੍ਸ ਚ ਸੁਖਸ੍ਸ ਆਵਹਨਤੋ ਸੁਖਾਵਹਂ. ਤਂ ਮੇ ਅਹੋਸਿ ਕਠਿਨਨ੍ਤਿ ਤਂ ਤੇਸਂ ਮਯ੍ਹਂ ਸਹਾਯਾਨਂ ਮਾਤਾਪਿਤੂਨਞ੍ਚ ਵਚਨਂ ਏਕਨ੍ਤੇਨੇਵ ਨੇਕ੍ਖਮ੍ਮਾਭਿਰਤਤ੍ਤਾ ਅਮਨਾਪਭਾਵੇਨ ਮੇ ਕਠਿਨਂ ਫਰੁਸਂ ਦਿਵਸਂ ਸਨ੍ਤਤ੍ਤਫਾਲਸਦਿਸਂ ਉਭੋਪਿ ਕਣ੍ਣੇ ਝਾਪੇਨ੍ਤਂ ਵਿਯ ਅਹੋਸਿ.

੩੮. ਤੇ ਮਂ ਤਦਾ ਉਕ੍ਖਿਪਨ੍ਤਨ੍ਤਿ ਤੇ ਮਯ੍ਹਂ ਸਹਾਯਾ ਮਾਤਾਪਿਤੂਹਿ ਅਤ੍ਤਨੋ ਚ ਉਪਨਿਮਨ੍ਤਨਵਸੇਨ ਅਨੇਕਵਾਰਂ ਉਪਨੀਯਮਾਨੇ ਕਾਮੇ ਉਦ੍ਧਮੁਦ੍ਧਂ ਖਿਪਨ੍ਤਂ ਛਡ੍ਡੇਨ੍ਤਂ ਪਟਿਕ੍ਖਿਪਨ੍ਤਂ ਮਂ ਪੁਚ੍ਛਿਂਸੁ. ਪਤ੍ਥਿਤਂ ਮਮਾਤਿ ਇਤੋ ਵਿਸੁਦ੍ਧਤਰਂ ਕਿਂ ਨੁ ਖੋ ਇਮਿਨਾ ਪਤ੍ਥਿਤਨ੍ਤਿ ਮਯਾ ਅਭਿਪਤ੍ਥਿਤਂ ਮਮ ਤਂ ਪਤ੍ਥਨਂ ਪੁਚ੍ਛਿਂਸੁ – ‘‘ਕਿਂ ਤ੍ਵਂ ਪਤ੍ਥਯਸੇ, ਸਮ੍ਮ, ਯਦਿ ਕਾਮੇ ਨ ਭੁਞ੍ਜਸੀ’’ਤਿ.

੩੯. ਅਤ੍ਥਕਾਮੋਤਿ ਅਤ੍ਤਨੋ ਅਤ੍ਥਕਾਮੋ, ਪਾਪਭੀਰੂਤਿ ਅਤ੍ਥੋ. ‘‘ਅਤ੍ਤਕਾਮੋ’’ਤਿਪਿ ਪਾਲ਼ਿ. ਹਿਤੇਸਿਨਨ੍ਤਿ ਮਯ੍ਹਂ ਹਿਤੇਸੀਨਂ ਪਿਯਸਹਾਯਾਨਂ. ਕੇਚਿ ‘‘ਅਤ੍ਥਕਾਮਹਿਤੇਸਿਨ’’ਨ੍ਤਿ ਪਠਨ੍ਤਿ, ਤਂ ਨ ਸੁਨ੍ਦਰਂ.

੪੦. ਪਿਤੁ ਮਾਤੁ ਚ ਸਾਵਯੁਨ੍ਤਿ ਤੇ ਮਯ੍ਹਂ ਸਹਾਯਾ ਅਨਿਵਤ੍ਤਨੀਯਂ ਮਮ ਪਬ੍ਬਜ੍ਜਾਛਨ੍ਦਂ ਵਿਦਿਤ੍ਵਾ ਪਬ੍ਬਜਿਤੁਕਾਮਤਾਦੀਪਕਂ ਮਯ੍ਹਂ ਵਚਨਂ ਪਿਤੁ ਮਾਤੁ ਚ ਸਾਵੇਸੁਂ. ‘‘ਯਗ੍ਘੇ, ਅਮ੍ਮਤਾਤਾ, ਜਾਨਾਥ, ਏਕਨ੍ਤੇਨੇਵ ਮਹਾਕਞ੍ਚਨਕੁਮਾਰੋ ਪਬ੍ਬਜਿਸ੍ਸਤਿ, ਨ ਸੋ ਸਕ੍ਕਾ ਕੇਨਚਿ ਉਪਾਯੇਨ ਕਾਮੇਸੁ ਉਪਨੇਤੁ’’ਨ੍ਤਿ ਅਵੋਚੁਂ. ਮਾਤਾਪਿਤਾ ਏਵਮਾਹੂਤਿ ਤਦਾ ਮਯ੍ਹਂ ਮਾਤਾਪਿਤਰੋ ਮਮ ਸਹਾਯੇਹਿ ਵੁਤ੍ਤਂ ਮਮ ਵਚਨਂ ਸੁਤ੍ਵਾ ਏਵਮਾਹਂਸੁ – ‘‘ਸਬ੍ਬੇਵ ਪਬ੍ਬਜਾਮ, ਭੋ’’ਤਿ, ਯਦਿ ਮਹਾਕਞ੍ਚਨਕੁਮਾਰਸ੍ਸ ਨੇਕ੍ਖਮ੍ਮਂ ਅਭਿਰੁਚਿਤਂ, ਯਂ ਤਸ੍ਸ ਅਭਿਰੁਚਿਤਂ, ਤਦਮ੍ਹਾਕਮ੍ਪਿ ਅਭਿਰੁਚਿਤਮੇਵ, ਤਸ੍ਮਾ ਸਬ੍ਬੇਵ ਪਬ੍ਬਜਾਮ, ਭੋਤਿ. ‘‘ਭੋ’’ਤਿ ਤੇਸਂ ਬ੍ਰਾਹ੍ਮਣਾਨਂ ਆਲਪਨਂ. ‘‘ਪਬ੍ਬਜਾਮ ਖੋ’’ਤਿਪਿ ਪਾਠੋ, ਪਬ੍ਬਜਾਮ ਏਵਾਤਿ ਅਤ੍ਥੋ. ਮਹਾਸਤ੍ਤਸ੍ਸ ਹਿ ਪਬ੍ਬਜ੍ਜਾਛਨ੍ਦਂ ਵਿਦਿਤ੍ਵਾ ਉਪਕਞ੍ਚਨਾਦਯੋ ਛ ਭਾਤਰੋ ਭਗਿਨੀ ਚ ਕਞ੍ਚਨਦੇਵੀ ਪਬ੍ਬਜਿਤੁਕਾਮਾਵ ਅਹੇਸੁਂ, ਤੇਨ ਤੇਪਿ ਮਾਤਾਪਿਤੂਹਿ ਘਰਾਵਾਸੇਨ ਨਿਮਨ੍ਤਿਯਮਾਨਾ ਨ ਇਚ੍ਛਿਂਸੁਯੇਵ. ਤਸ੍ਮਾ ਏਵਮਾਹਂਸੁ ‘‘ਸਬ੍ਬੇਵ ਪਬ੍ਬਜਾਮ, ਭੋ’’ਤਿ.

ਏਵਞ੍ਚ ਪਨ ਵਤ੍ਵਾ ਮਹਾਸਤ੍ਤਂ ਮਾਤਾਪਿਤਰੋ ਪਕ੍ਕੋਸਿਤ੍ਵਾ ਅਤ੍ਤਨੋਪਿ ਅਧਿਪ੍ਪਾਯਂ ਤਸ੍ਸ ਆਚਿਕ੍ਖਿਤ੍ਵਾ ‘‘ਤਾਤ, ਯਦਿ ਪਬ੍ਬਜਿਤੁਕਾਮੋਸਿ, ਅਸੀਤਿਕੋਟਿਧਨਂ ਤਵ ਸਨ੍ਤਕਂ ਯਥਾਸੁਖਂ ਵਿਸ੍ਸਜ੍ਜੇਹੀ’’ਤਿ ਆਹਂਸੁ. ਅਥ ਨਂ ਮਹਾਪੁਰਿਸੋ ਕਪਣਦ੍ਧਿਕਾਦੀਨਂ ਵਿਸ੍ਸਜ੍ਜੇਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਹਿਮਵਨ੍ਤਂ ਪਾਵਿਸਿ. ਤੇਨ ਸਦ੍ਧਿਂ ਮਾਤਾਪਿਤਰੋ ਛ ਭਾਤਰੋ ਚ ਭਗਿਨੀ ਚ ਏਕੋ ਦਾਸੋ ਏਕਾ ਦਾਸੀ ਏਕੋ ਚ ਸਹਾਯੋ ਘਰਾਵਾਸਂ ਪਹਾਯ ਅਗਮਂਸੁ. ਤੇਨ ਵੁਤ੍ਤਂ –

੪੧. ‘‘ਉਭੋ ਮਾਤਾ ਪਿਤਾ ਮਯ੍ਹਂ, ਭਗਿਨੀ ਚ ਸਤ੍ਤ ਭਾਤਰੋ;

ਅਮਿਤਧਨਂ ਛਡ੍ਡਯਿਤ੍ਵਾ, ਪਵਿਸਿਮ੍ਹਾ ਮਹਾਵਨ’’ਨ੍ਤਿ.

ਜਾਤਕਟ੍ਠਕਥਾਯਂ (ਜਾ. ਅਟ੍ਠ. ੪.੧੪.੭੭ ਭਿਸਜਾਤਕਵਣ੍ਣਨਾ) ਪਨ ‘‘ਮਾਤਾਪਿਤੂਸੁ ਕਾਲਂਕਤੇਸੁ ਤੇਸਂ ਕਤ੍ਤਬ੍ਬਕਿਚ੍ਚਂ ਕਤ੍ਵਾ ਮਹਾਸਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮੀ’’ਤਿ ਵੁਤ੍ਤਂ.

ਏਵਂ ਹਿਮਵਨ੍ਤਂ ਪਵਿਸਿਤ੍ਵਾ ਚ ਤੇ ਬੋਧਿਸਤ੍ਤਪ੍ਪਮੁਖਾ ਏਕਂ ਪਦੁਮਸਰਂ ਨਿਸ੍ਸਾਯ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਵਨਮੂਲਫਲਾਹਾਰਾ ਯਾਪਯਿਂਸੁ. ਤੇਸੁ ਉਪਕਞ੍ਚਨਾਦਯੋ ਅਟ੍ਠ ਜਨਾ ਵਾਰੇਨ ਫਲਾਫਲਂ ਆਹਰਿਤ੍ਵਾ ਏਕਸ੍ਮਿਂ ਪਾਸਾਣਫਲਕੇ ਅਤ੍ਤਨੋ ਇਤਰੇਸਞ੍ਚ ਕੋਟ੍ਠਾਸੇ ਕਤ੍ਵਾ ਘਣ੍ਟਿਸਞ੍ਞਂ ਦਤ੍ਵਾ ਅਤ੍ਤਨੋ ਕੋਟ੍ਠਾਸਂ ਆਦਾਯ ਵਸਨਟ੍ਠਾਨਂ ਪਵਿਸਨ੍ਤਿ. ਸੇਸਾਪਿ ਘਣ੍ਟਿਸਞ੍ਞਾਯ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਅਤ੍ਤਨੋ ਅਤ੍ਤਨੋ ਪਾਪੁਣਨਕੋਟ੍ਠਾਸਂ ਆਦਾਯ ਵਸਨਟ੍ਠਾਨਂ ਗਨ੍ਤ੍ਵਾ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤਿ.

ਅਪਰਭਾਗੇ ਭਿਸਾਨਿ ਆਹਰਿਤ੍ਵਾ ਤਥੇਵ ਖਾਦਨ੍ਤਿ. ਤਤ੍ਥ ਤੇ ਘੋਰਤਪਾ ਪਰਮਧਿਤਿਨ੍ਦ੍ਰਿਯਾ ਕਸਿਣਪਰਿਕਮ੍ਮਂ ਕਰੋਨ੍ਤਾ ਵਿਹਰਿਂਸੁ. ਅਥ ਨੇਸਂ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਸਕ੍ਕੋ ਤਂ ਕਾਰਣਂ ਞਤ੍ਵਾ ‘‘ਇਮੇ ਇਸਯੋ ਵੀਮਂਸਿਸ੍ਸਾਮੀ’’ਤਿ ਅਤ੍ਤਨੋ ਆਨੁਭਾਵੇਨ ਮਹਾਸਤ੍ਤਸ੍ਸ ਕੋਟ੍ਠਾਸੇ ਤਯੋ ਦਿਵਸੇ ਅਨ੍ਤਰਧਾਪੇਸਿ. ਮਹਾਸਤ੍ਤੋ ਪਠਮਦਿਵਸੇ ਕੋਟ੍ਠਾਸਂ ਅਦਿਸ੍ਵਾ ‘‘ਮਮ ਕੋਟ੍ਠਾਸੋ ਪਮੁਟ੍ਠੋ ਭਵਿਸ੍ਸਤੀ’’ਤਿ ਚਿਨ੍ਤੇਸਿ. ਦੁਤਿਯਦਿਵਸੇ ‘‘ਮਮ ਦੋਸੇਨ ਭਵਿਤਬ੍ਬਂ, ਪਣਾਮਨਵਸੇਨ ਮਮ ਕੋਟ੍ਠਾਸਂ ਨ ਠਪਿਤਂ ਮਞ੍ਞੇ’’ਤਿ ਚਿਨ੍ਤੇਸਿ. ਤਤਿਯਦਿਵਸੇ ‘‘ਤਂ ਕਾਰਣਂ ਸੁਤ੍ਵਾ ਖਮਾਪੇਸ੍ਸਾਮੀ’’ਤਿ ਸਾਯਨ੍ਹਸਮਯੇ ਘਣ੍ਟਿਸਞ੍ਞਂ ਦਤ੍ਵਾ ਤਾਯ ਸਞ੍ਞਾਯ ਸਬ੍ਬੇਸੁ ਸਨ੍ਨਿਪਤਿਤੇਸੁ ਤਮਤ੍ਥਂ ਆਰੋਚੇਤ੍ਵਾ ਤੀਸੁਪਿ ਦਿਵਸੇਸੁ ਤੇਹਿ ਜੇਟ੍ਠਕੋਟ੍ਠਾਸਸ੍ਸ ਠਪਿਤਭਾਵਂ ਸੁਤ੍ਵਾ ‘‘ਤੁਮ੍ਹੇਹਿ ਮਯ੍ਹਂ ਕੋਟ੍ਠਾਸੋ ਠਪਿਤੋ, ਮਯਾ ਪਨ ਨ ਲਦ੍ਧੋ, ਕਿਂ ਨੁ ਖੋ ਕਾਰਣ’’ਨ੍ਤਿ ਆਹ. ਤਂ ਸੁਤ੍ਵਾ ਸਬ੍ਬੇਵ ਸਂਵੇਗਪ੍ਪਤ੍ਤਾ ਅਹੇਸੁਂ.

ਤਸ੍ਮਿਂ ਅਸ੍ਸਮੇ ਰੁਕ੍ਖਦੇਵਤਾਪਿ ਅਤ੍ਤਨੋ ਭਵਨਤੋ ਓਤਰਿਤ੍ਵਾ ਤੇਸਂ ਸਨ੍ਤਿਕੇ ਨਿਸੀਦਿ. ਮਨੁਸ੍ਸਾਨਂ ਹਤ੍ਥਤੋ ਪਲਾਯਿਤ੍ਵਾ ਅਰਞ੍ਞਂ ਪਵਿਟ੍ਠੋ ਏਕੋ ਵਾਰਣੋ ਅਹਿਤੁਣ੍ਡਿਕਹਤ੍ਥਤੋ ਪਲਾਯਿਤ੍ਵਾ ਮੁਤ੍ਤੋ ਸਪ੍ਪਕੀਲ਼ਾਪਨਕੋ ਏਕੋ ਵਾਨਰੋ ਚ ਤੇਹਿ ਇਸੀਹਿ ਕਤਪਰਿਚਯਾ ਤਦਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਸਕ੍ਕੋਪਿ ‘‘ਇਸਿਗਣਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਅਦਿਸ੍ਸਮਾਨਕਾਯੋ ਤਤ੍ਥੇਵ ਅਟ੍ਠਾਸਿ. ਤਸ੍ਮਿਞ੍ਚ ਖਣੇ ਬੋਧਿਸਤ੍ਤਸ੍ਸ ਕਨਿਟ੍ਠੋ ਉਪਕਞ੍ਚਨਤਾਪਸੋ ਉਟ੍ਠਾਯ ਬੋਧਿਸਤ੍ਤਂ ਵਨ੍ਦਿਤ੍ਵਾ ਸੇਸਾਨਂ ਅਪਚਿਤਿਂ ਦਸ੍ਸੇਤ੍ਵਾ ‘‘ਅਹਂ ਸਞ੍ਞਂ ਪਟ੍ਠਪੇਤ੍ਵਾ ਅਤ੍ਤਾਨਞ੍ਞੇਵ ਸੋਧੇਤੁਂ ਲਭਾਮੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਲਭਸੀ’’ਤਿ ਵੁਤ੍ਤੇ ਇਸਿਗਣਮਜ੍ਝੇ ਠਤ੍ਵਾ ਸਪਥਂ ਕਰੋਨ੍ਤੋ –

‘‘ਅਸ੍ਸਂ ਗਵਂ ਰਜਤਂ ਜਾਤਰੂਪਂ, ਭਰਿਯਞ੍ਚ ਸੋ ਇਧ ਲਭਤਂ ਮਨਾਪਂ;

ਪੁਤ੍ਤੇਹਿ ਦਾਰੇਹਿ ਸਮਙ੍ਗਿ ਹੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸੀ’’ਤਿ. (ਜਾ. ੧.੧੪.੭੮) –

ਇਮਂ ਗਾਥਂ ਅਭਾਸਿ. ਇਮਞ੍ਹਿ ਸੋ ‘‘ਯਤ੍ਤਕਾਨਿ ਪਿਯਵਤ੍ਥੂਨਿ ਹੋਨ੍ਤਿ, ਤੇਹਿ ਵਿਪ੍ਪਯੋਗੇ ਤਤ੍ਤਕਾਨਿ ਦੁਕ੍ਖਾਨਿ ਉਪ੍ਪਜ੍ਜਨ੍ਤੀ’’ਤਿ ਵਤ੍ਥੁਕਾਮੇ ਗਰਹਨ੍ਤੋ ਆਹ.

ਤਂ ਸੁਤ੍ਵਾ ਇਸਿਗਣੋ ‘‘ਮਾਰਿਸ, ਮਾ ਕਥਯ, ਅਤਿਭਾਰਿਯੋ ਤੇ ਸਪਥੋ’’ਤਿ ਕਣ੍ਣੇ ਪਿਦਹਿ. ਬੋਧਿਸਤ੍ਤੋਪਿ ‘‘ਅਤਿਭਾਰਿਯੋ ਤੇ ਸਪਥੋ, ਨ, ਤ੍ਵਂ ਤਾਤ, ਗਣ੍ਹਸਿ, ਤਵ ਪਤ੍ਤਾਸਨੇ ਨਿਸੀਦਾ’’ਤਿ ਆਹ. ਸੇਸਾਪਿ ਸਪਥਂ ਕਰੋਨ੍ਤਾ ਯਥਾਕ੍ਕਮਂ –

‘‘ਮਾਲਞ੍ਚ ਸੋ ਕਾਸਿਕਚਨ੍ਦਨਞ੍ਚ, ਧਾਰੇਤੁ ਪੁਤ੍ਤਸ੍ਸ ਬਹੂ ਭਵਨ੍ਤੁ;

ਕਾਮੇਸੁ ਤਿਬ੍ਬਂ ਕੁਰੁਤਂ ਅਪੇਕ੍ਖਂ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਪਹੂਤਧਞ੍ਞੋ ਕਸਿਮਾ ਯਸਸ੍ਸੀ, ਪੁਤ੍ਤੇ ਗਿਹੀ ਧਨਿਮਾ ਸਬ੍ਬਕਾਮੇ;

ਵਯਂ ਅਪਸ੍ਸਂ ਘਰਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਸੋ ਖਤ੍ਤਿਯੋ ਹੋਤੁ ਪਸਯ੍ਹਕਾਰੀ, ਰਾਜਾਭਿਰਾਜਾ ਬਲਵਾ ਯਸਸ੍ਸੀ;

ਸਚਾਤੁਰਨ੍ਤਂ ਮਹਿਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਸੋ ਬ੍ਰਾਹ੍ਮਣੋ ਹੋਤੁ ਅਵੀਤਰਾਗੋ, ਮੁਹੁਤ੍ਤਨਕ੍ਖਤ੍ਤਪਥੇਸੁ ਯੁਤ੍ਤੋ;

ਪੂਜੇਤੁ ਨਂ ਰਟ੍ਠਪਤੀ ਯਸਸ੍ਸੀ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਅਜ੍ਝਾਯਕਂ ਸਬ੍ਬਸਮਨ੍ਤਵੇਦਂ, ਤਪਸ੍ਸਿਨਂ ਮਞ੍ਞਤੁ ਸਬ੍ਬਲੋਕੋ;

ਪੂਜੇਨ੍ਤੁ ਨਂ ਜਾਨਪਦਾ ਸਮੇਚ੍ਚ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਚਤੁਸ੍ਸਦਂ ਗਾਮਵਰਂ ਸਮਿਦ੍ਧਂ, ਦਿਨ੍ਨਞ੍ਹਿ ਸੋ ਭੁਞ੍ਜਤੁ ਵਾਸਵੇਨ;

ਅਵੀਤਰਾਗੋ ਮਰਣਂ ਉਪੇਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਸੋ ਗਾਮਣੀ ਹੋਤੁ ਸਹਾਯਮਜ੍ਝੇ, ਨਚ੍ਚੇਹਿ ਗੀਤੇਹਿ ਪਮੋਦਮਾਨੋ;

ਸੋ ਰਾਜਤੋ ਬ੍ਯਸਨਮਾਲਤ੍ਥ ਕਿਞ੍ਚਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਤਂ ਏਕਰਾਜਾ ਪਥਵਿਂ ਵਿਜੇਤ੍ਵਾ, ਇਤ੍ਥੀਸਹਸ੍ਸਸ੍ਸ ਠਪੇਤੁ ਅਗ੍ਗੇ;

ਸੀਮਨ੍ਤਿਨੀਨਂ ਪਵਰਾ ਭਵਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯਾ ਅਹਾਸਿ.

‘‘ਇਸੀਨਞ੍ਹਿ ਸਾ ਸਬ੍ਬਸਮਾਗਤਾਨਂ, ਭੁਞ੍ਜੇਯ੍ਯ ਸਾਦੁਂ ਅਵਿਕਮ੍ਪਮਾਨਾ;

ਚਰਾਤੁ ਲਾਭੇਨ ਵਿਕਤ੍ਥਮਾਨਾ, ਭਿਸਾਨਿ ਤੇ ਬ੍ਰਾਹਣ ਯਾ ਅਹਾਸਿ.

‘‘ਆਵਾਸਿਕੋ ਹੋਤੁ ਮਹਾਵਿਹਾਰੇ, ਨਵਕਮ੍ਮਿਕੋ ਹੋਤੁ ਗਜਙ੍ਗਲਾਯਂ;

ਆਲੋਕਸਨ੍ਧਿਂ ਦਿਵਸਂ ਕਰੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਸੋ ਬਜ੍ਝਤਂ ਪਾਸਸਤੇਹਿ ਛਮ੍ਹਿ, ਰਮ੍ਮਾ ਵਨਾ ਨੀਯਤੁ ਰਾਜਧਾਨਿਂ;

ਤੁਤ੍ਤੇਹਿ ਸੋ ਹਞ੍ਞਤੁ ਪਾਚਨੇਹਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.

‘‘ਅਲਕ੍ਕਮਾਲੀ ਤਿਪੁਕਣ੍ਣਪਿਟ੍ਠੋ, ਲਟ੍ਠੀਹਤੋ ਸਪ੍ਪਮੁਖਂ ਉਪੇਤੁ;

ਸਕਚ੍ਛਬਨ੍ਧੋ ਵਿਸਿਖਂ ਚਰਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸੀ’’ਤਿ. (ਜਾ. ੧.੧੪.੭੯-੯੦) –

ਇਮਾ ਗਾਥਾਯੋ ਅਵੋਚੁਂ.

ਤਤ੍ਥ ਤਿਬ੍ਬਨ੍ਤਿ ਵਤ੍ਥੁਕਾਮਕਿਲੇਸਕਾਮੇਸੁ ਬਹਲਂ ਅਪੇਕ੍ਖਂ ਕਰੋਤੁ. ਕਸਿਮਾਤਿ ਸਮ੍ਪਨ੍ਨਕਸਿਕਮ੍ਮੋ. ਪੁਤ੍ਤੇ ਗਿਹੀ ਧਨਿਮਾ ਸਬ੍ਬਕਾਮੇਤਿ ਪੁਤ੍ਤੇ ਲਭਤੁ, ਗਿਹੀ ਹੋਤੁ, ਸਤ੍ਤਵਿਧੇਨ ਧਨੇਨ ਧਨਿਮਾ ਹੋਤੁ, ਰੂਪਾਦਿਭੇਦੇ ਸਬ੍ਬਕਾਮੇ ਲਭਤੁ. ਵਯਂ ਅਪਸ੍ਸਨ੍ਤਿ ਮਹਲ੍ਲਕਕਾਲੇਪਿ ਅਪਬ੍ਬਜਿਤ੍ਵਾ ਅਤ੍ਤਨੋ ਵਯਂ ਅਪਸ੍ਸਨ੍ਤੋ ਪਞ੍ਚਕਾਮਗੁਣਸਮਿਦ੍ਧਂ ਘਰਮੇਵ ਆਵਸਤੁ. ਰਾਜਾਭਿਰਾਜਾਤਿ ਰਾਜੂਨਂ ਅਨ੍ਤਰੇ ਅਤਿਰਾਜਾ. ਅਵੀਤਰਾਗੋਤਿ ਪੁਰੋਹਿਤਟ੍ਠਾਨਤਣ੍ਹਾਯ ਸਤਣ੍ਹੋ. ਤਪਸ੍ਸਿਨਨ੍ਤਿ ਤਪਸੀਲਂ, ਸੀਲਸਮ੍ਪਨ੍ਨੋਤਿ ਨਂ ਮਞ੍ਞਤੁ. ਚਤੁਸ੍ਸਦਨ੍ਤਿ ਆਕਿਣ੍ਣਮਨੁਸ੍ਸਤਾਯ ਮਨੁਸ੍ਸੇਹਿ ਪਹੂਤਧਞ੍ਞਤਾਯ ਧਞ੍ਞੇਨ ਸੁਲਭਦਾਰੁਤਾਯ ਦਾਰੂਹਿ ਸਮ੍ਪਨ੍ਨੋਦਕਤਾਯ ਉਦਕੇਨਾਤਿ ਚਤੂਹਿ ਉਸ੍ਸਨ੍ਨਂ. ਵਾਸਵੇਨਾਤਿ ਵਾਸਵੇਨ ਦਿਨ੍ਨਂ ਵਿਯ ਅਚਲਂ, ਵਾਸਵਤੋ ਲਦ੍ਧਵਰਾਨੁਭਾਵੇਨੇਵ ਰਾਜਾਨਂ ਆਰਾਧੇਤ੍ਵਾ ਤੇਨ ਦਿਨ੍ਨਨ੍ਤਿਪਿ ਅਤ੍ਥੋ. ਅਵੀਤਰਾਗੋਤਿ ਅਵਿਗਤਰਾਗੋ ਕਦ੍ਦਮੇ ਸੂਕਰੋ ਵਿਯ ਕਾਮਪਙ੍ਕੇ ਨਿਮੁਗ੍ਗੋਵ ਹੋਤੁ.

ਗਾਮਣੀਤਿ ਗਾਮਜੇਟ੍ਠਕੋ. ਤਨ੍ਤਿ ਤਂ ਇਤ੍ਥਿਂ. ਏਕਰਾਜਾਤਿ ਅਗ੍ਗਰਾਜਾ. ਇਤ੍ਥੀਸਹਸ੍ਸਸ੍ਸਾਤਿ ਵਚਨਮਟ੍ਠਤਾਯ ਵੁਤ੍ਤਂ. ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਅਗ੍ਗਟ੍ਠਾਨੇ ਠਪੇਤੂਤਿ ਅਤ੍ਥੋ. ਸੀਮਨ੍ਤਿਨੀਨਨ੍ਤਿ ਸੀਮਨ੍ਤਧਰਾਨਂ, ਇਤ੍ਥੀਨਨ੍ਤਿ ਅਤ੍ਥੋ. ਸਬ੍ਬਸਮਾਗਤਾਨਨ੍ਤਿ ਸਬ੍ਬੇਸਂ ਸਨ੍ਨਿਪਤਿਤਾਨਂ ਮਜ੍ਝੇ ਨਿਸੀਦਿਤ੍ਵਾ. ਅਵਿਕਮ੍ਪਮਾਨਾਤਿ ਅਨੋਸਕ੍ਕਮਾਨਾ ਸਾਦੁਰਸਂ ਭੁਞ੍ਜਤੂਤਿ ਅਤ੍ਥੋ. ਚਰਾਤੁ ਲਾਭੇਨ ਵਿਕਤ੍ਥਮਾਨਾਤਿ ਲਾਭਹੇਤੁ ਸਿਙ੍ਗਾਰਵੇਸਂ ਗਹੇਤ੍ਵਾ ਲਾਭਂ ਉਪ੍ਪਾਦੇਤੁਂ ਚਰਤੁ. ਆਵਾਸਿਕੋਤਿ ਆਵਾਸਜਗ੍ਗਨਕੋ. ਗਜਙ੍ਗਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਤ੍ਥ ਕਿਰ ਦਬ੍ਬਸਮ੍ਭਾਰਾ ਸੁਲਭਾ. ਆਲੋਕਸਨ੍ਧਿਂ ਦਿਵਸਨ੍ਤਿ ਏਕਦਿਵਸੇਨ ਏਕਮੇਵ ਵਾਤਪਾਨਂ ਕਰੋਤੁ. ਸੋ ਕਿਰ ਦੇਵਪੁਤ੍ਤੋ ਕਸ੍ਸਪਬੁਦ੍ਧਕਾਲੇ ਗਜਙ੍ਗਲਨਗਰਂ ਨਿਸ੍ਸਾਯ ਯੋਜਨਿਕੇ ਮਹਾਵਿਹਾਰੇ ਆਵਾਸਿਕੋ ਸਙ੍ਘਤ੍ਥੇਰੋ ਹੁਤ੍ਵਾ ਜਿਣ੍ਣੇ ਵਿਹਾਰੇ ਨਵਕਮ੍ਮਾਨਿ ਕਰੋਨ੍ਤੋਵ ਮਹਾਦੁਕ੍ਖਂ ਅਨੁਭਵਿ, ਤਂ ਸਨ੍ਧਾਯਾਹ.

ਪਾਸਸਤੇਹੀਤਿ ਬਹੂਹਿ ਪਾਸੇਹਿ. ਛਮ੍ਹੀਤਿ ਚਤੂਸੁ ਪਾਦੇਸੁ ਗੀਵਾਯ ਕਟਿਭਾਗੇ ਚਾਤਿ ਛਸੁ ਠਾਨੇਸੁ. ਤੁਤ੍ਤੇਹੀਤਿ ਦ੍ਵਿਕਣ੍ਟਕਾਹਿ ਦੀਘਲਟ੍ਠੀਹਿ. ਪਾਚਨੇਹੀਤਿ ਰਸ੍ਸਪਾਚਨੇਹਿ, ਅਙ੍ਕੁਸਕੇਹਿ ਵਾ. ਅਲਕ੍ਕਮਾਲੀਤਿ ਅਹਿਤੁਣ੍ਡਿਕੇਨ ਕਣ੍ਠੇ ਪਰਿਕ੍ਖਿਪਿਤ੍ਵਾ ਠਪਿਤਾਯ ਅਲਕ੍ਕਮਾਲਾਯ ਸਮਨ੍ਨਾਗਤੋ. ਤਿਪੁਕਣ੍ਣਪਿਟ੍ਠੋਤਿ ਤਿਪੁਪਿਲ਼ਨ੍ਧਨੇਨ ਪਿਲ਼ਨ੍ਧਿਤਪਿਟ੍ਠਿਕਣ੍ਣੋ ਕਣ੍ਣਪਿਟ੍ਠੋ. ਲਟ੍ਠਿਹਤੋਤਿ ਸਪ੍ਪਕੀਲ਼ਾਪਨਂ ਸਿਕ੍ਖਾਪਯਮਾਨੋ ਲਟ੍ਠਿਯਾ ਹਤੋ ਹੁਤ੍ਵਾ. ਸਬ੍ਬਂ ਤੇ ਕਾਮਭੋਗਂ ਘਰਾਵਾਸਂ ਅਤ੍ਤਨਾ ਅਤ੍ਤਨਾ ਅਨੁਭੂਤਦੁਕ੍ਖਞ੍ਚ ਜਿਗੁਚ੍ਛਨ੍ਤਾ ਤਥਾ ਤਥਾ ਸਪਥਂ ਕਰੋਨ੍ਤਾ ਏਵਮਾਹਂਸੁ.

ਅਥ ਬੋਧਿਸਤ੍ਤੋ ‘‘ਸਬ੍ਬੇਹਿ ਇਮੇਹਿ ਸਪਥੋ ਕਤੋ, ਮਯਾਪਿ ਕਾਤੁਂ ਵਟ੍ਟਤੀ’’ਤਿ ਸਪਥਂ ਕਰੋਨ੍ਤੋ –

‘‘ਯੋ ਵੇ ਅਨਟ੍ਠਂਵ ਨਟ੍ਠਨ੍ਤਿ ਚਾਹ, ਕਾਮੇਵ ਸੋ ਲਭਤਂ ਭੁਞ੍ਜਤਞ੍ਚ;