੧੦. ਮਚ੍ਛਰਾਜਚਰਿਯਾਵਣ੍ਣਨਾ

੮੩. ਦਸਮੇ ਯਦਾ ਹੋਮਿ, ਮਚ੍ਛਰਾਜਾ ਮਹਾਸਰੇਤਿ ਅਤੀਤੇ ਮਚ੍ਛਯੋਨਿਯਂ ਨਿਬ੍ਬਤ੍ਤਿਤ੍ਵਾ ਕੋਸਲਰਟ੍ਠੇ ਸਾਵਤ੍ਥਿਯਂ ਜੇਤਵਨੇ ਪੋਕ੍ਖਰਣਿਟ੍ਠਾਨੇ ਵਲ੍ਲਿਗਹਨਪਰਿਕ੍ਖਿਤ੍ਤੇ ਏਕਸ੍ਮਿਂ ਮਹਾਸਰੇ ਮਚ੍ਛਾਨਂ ਚਤੂਹਿ ਸਙ੍ਗਹਵਤ੍ਥੂਹਿ ਰਞ੍ਜਨਤੋ ਯਦਾ ਅਹਂ ਰਾਜਾ ਹੋਮਿ, ਮਚ੍ਛਗਣਪਰਿਵੁਤੋ ਤਤ੍ਥ ਪਟਿਵਸਾਮਿ ਤਦਾ. ਉਣ੍ਹੇਤਿ ਉਣ੍ਹਕਾਲੇ ਗਿਮ੍ਹਸਮਯੇ. ਸੂਰਿਯਸਨ੍ਤਾਪੇਤਿ ਆਦਿਚ੍ਚਸਨ੍ਤਾਪੇਨ. ਸਰੇ ਉਦਕ ਖੀਯਥਾਤਿ ਤਸ੍ਮਿਂ ਸਰੇ ਉਦਕਂ ਖੀਯਿਤ੍ਥ ਛਿਜ੍ਜਿਤ੍ਥ. ਤਸ੍ਮਿਞ੍ਹਿ ਰਟ੍ਠੇ ਤਦਾ ਦੇਵੋ ਨ ਵਸ੍ਸਿ, ਸਸ੍ਸਾਨਿ ਮਿਲਾਯਿਂਸੁ, ਵਾਪਿਆਦੀਸੁ ਉਦਕਂ ਪਰਿਕ੍ਖਯਂ ਪਰਿਯਾਦਾਨਂ ਅਗਮਾਸਿ, ਮਚ੍ਛਕਚ੍ਛਪਾ ਕਲਲਗਹਨਂ ਪਵਿਸਿਂਸੁ. ਤਸ੍ਮਿਮ੍ਪਿ ਸਰੇ ਮਚ੍ਛਾ ਕਦ੍ਦਮਗਹਨਂ ਪਵਿਸਿਤ੍ਵਾ ਤਸ੍ਮਿਂ ਤਸ੍ਮਿਂ ਠਾਨੇ ਨਿਲੀਯਿਂਸੁ.

੮੪. ਤਤੋਤਿ ਤਤੋ ਉਦਕਪਰਿਕ੍ਖਯਤੋ ਅਪਰਭਾਗੇ. ਕੁਲਲਸੇਨਕਾਤਿ ਕੁਲਲਾਚੇਵ ਸੇਨਾ ਚ. ਭਕ੍ਖਯਨ੍ਤਿ ਦਿਵਾਰਤ੍ਤਿਂ, ਮਚ੍ਛੇ ਉਪਨਿਸੀਦਿਯਾਤਿ ਤਤ੍ਥ ਤਤ੍ਥ ਕਲਲਪਿਟ੍ਠੇ ਉਪਨਿਸੀਦਿਤ੍ਵਾ ਕਲਲਗਹਨਂ ਪਵਿਸਿਤ੍ਵਾ ਨਿਪਨ੍ਨੇ ਮਚ੍ਛੇ ਕਾਕਾ ਵਾ ਇਤਰੇ ਵਾ ਦਿਵਾ ਚੇਵ ਰਤ੍ਤਿਞ੍ਚ ਕਣਯਗ੍ਗਸਦਿਸੇਹਿ ਤੁਣ੍ਡੇਹਿ ਕੋਟ੍ਟੇਤ੍ਵਾ ਕੋਟ੍ਟੇਤ੍ਵਾ ਨੀਹਰਿਤ੍ਵਾ ਵਿਪ੍ਫਨ੍ਦਮਾਨੇ ਭਕ੍ਖਯਨ੍ਤਿ.

੮੫. ਅਥ ਮਹਾਸਤ੍ਤੋ ਮਚ੍ਛਾਨਂ ਤਂ ਬ੍ਯਸਨਂ ਦਿਸ੍ਵਾ ਮਹਾਕਰੁਣਾਯ ਸਮੁਸ੍ਸਾਹਿਤਹਦਯੋ ‘‘ਠਪੇਤ੍ਵਾ ਮਂ ਇਮੇ ਮਮ ਞਾਤਕੇ ਇਮਸ੍ਮਾ ਦੁਕ੍ਖਾ ਮੋਚੇਤੁਂ ਸਮਤ੍ਥੋ ਨਾਮ ਅਞ੍ਞੋ ਨਤ੍ਥਿ, ਕੇਨ ਨੁ ਖੋ ਅਹਂ ਉਪਾਯੇਨ ਤੇ ਇਤੋ ਦੁਕ੍ਖਤੋ ਮੋਚੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ‘‘ਯਂਨੂਨਾਹਂ ਪੁਬ੍ਬਕੇਹਿ ਮਹੇਸੀਹਿ ਆਚਿਣ੍ਣਸਮਾਚਿਣ੍ਣਂ ਮਯਿ ਚ ਸਂਵਿਜ੍ਜਮਾਨਂ ਸਚ੍ਚਧਮ੍ਮਂ ਨਿਸ੍ਸਾਯ ਸਚ੍ਚਕਿਰਿਯਂ ਕਤ੍ਵਾ ਦੇਵਂ ਵਸ੍ਸਾਪੇਤ੍ਵਾ ਮਮ ਞਾਤਿਸਙ੍ਘਸ੍ਸ ਜੀਵਿਤਦਾਨਂ ਦਦੇਯ੍ਯਂ, ਤੇਨ ਚ ਸਕਲਸ੍ਸਾਪਿ ਆਹਾਰੂਪਜੀਵਿਨੋ ਸਤ੍ਤਲੋਕਸ੍ਸ ਮਹਾਉਪਕਾਰੋ ਸਮ੍ਪਾਦਿਤੋ ਮਯਾ’’ਤਿ ਨਿਚ੍ਛਯਂ ਕਤ੍ਵਾ ਦੇਵਂ ਵਸ੍ਸਾਪੇਤੁਂ ਸਚ੍ਚਕਿਰਿਯਂ ਅਕਾਸਿ. ਤੇਨ ਵੁਤ੍ਤਂ ‘‘ਏਵਂ ਚਿਨ੍ਤੇਸਹ’’ਨ੍ਤਿਆਦਿ.

ਤਤ੍ਥ ਸਹ ਞਾਤੀਹਿ ਪੀਲ਼ਿਤੋਤਿ ਮਯ੍ਹਂ ਞਾਤੀਹਿ ਸਦ੍ਧਿਂ ਤੇਨ ਉਦਕਪਰਿਕ੍ਖਯੇਨ ਪੀਲ਼ਿਤੋ. ਸਹਾਤਿ ਵਾ ਨਿਪਾਤਮਤ੍ਤਂ. ਮਹਾਕਾਰੁਣਿਕਤਾਯ ਤੇਨ ਬ੍ਯਸਨੇਨ ਦੁਕ੍ਖਿਤੇਹਿ ਞਾਤੀਹਿ ਕਾਰਣਭੂਤੇਹਿ ਪੀਲ਼ਿਤੋ, ਞਾਤਿਸਙ੍ਘਦੁਕ੍ਖਦੁਕ੍ਖਿਤੋਤਿ ਅਤ੍ਥੋ.

੮੬. ਧਮ੍ਮਤ੍ਥਨ੍ਤਿ ਧਮ੍ਮਭੂਤਂ ਅਤ੍ਥਂ, ਧਮ੍ਮਤੋ ਵਾ ਅਨਪੇਤਂ ਅਤ੍ਥਂ. ਕਿਂ ਤਂ? ਸਚ੍ਚਂ. ਅਦ੍ਦਸਪਸ੍ਸਯਨ੍ਤਿ ਮਯ੍ਹਂ ਞਾਤੀਨਞ੍ਚ ਅਪਸ੍ਸਯਂ ਅਦ੍ਦਸਂ. ਅਤਿਕ੍ਖਯਨ੍ਤਿ ਮਹਾਵਿਨਾਸਂ.

੮੭. ਸਦ੍ਧਮ੍ਮਨ੍ਤਿ ਸਤਂ ਸਾਧੂਨਂ ਬੁਦ੍ਧਾਦੀਨਂ ਏਕਸ੍ਸਾਪਿ ਪਾਣਿਨੋ ਅਹਿਂਸਨਸਙ੍ਖਾਤਂ ਧਮ੍ਮਂ. ਅਨੁਸ੍ਸਰਿਤ੍ਵਾ. ਪਰਮਤ੍ਥਂ ਵਿਚਿਨ੍ਤਯਨ੍ਤਿ ਤਂ ਖੋ ਪਨ ਪਰਮਤ੍ਥਂ ਸਚ੍ਚਂ ਅਵਿਪਰੀਤਸਭਾਵਂ ਕਤ੍ਵਾ ਚਿਨ੍ਤਯਨ੍ਤੋ. ਯਂ ਲੋਕੇ ਧੁਵਸਸ੍ਸਤਨ੍ਤਿ ਯਦੇਤਂ ਬੁਦ੍ਧਪਚ੍ਚੇਕਬੁਦ੍ਧਸਾਵਕਾਨਂ ਏਕਸ੍ਸਾਪਿ ਪਾਣਿਨੋ ਅਹਿਂਸਨਂ, ਤਂ ਸਬ੍ਬਕਾਲਂ ਤਥਭਾਵੇਨ ਧੁਵਂ ਸਸ੍ਸਤਂ ਵਿਚਿਨ੍ਤਯਂ ਸਚ੍ਚਕਿਰਿਯਂ ਅਕਾਸਿਨ੍ਤਿ ਸਮ੍ਬਨ੍ਧੋ.

੮੮. ਇਦਾਨਿ ਤਂ ਧਮ੍ਮਂ ਮਹਾਸਤ੍ਤੋ ਅਤ੍ਤਨਿ ਵਿਜ੍ਜਮਾਨਂ ਗਹੇਤ੍ਵਾ ਸਚ੍ਚਵਚਨਂ ਪਯੋਜੇਤੁਕਾਮੋ ਕਾਲਵਣ੍ਣਂ ਕਦ੍ਦਮਂ ਦ੍ਵਿਧਾ ਵਿਯੂਹਿਤ੍ਵਾ ਅਞ੍ਜਨਰੁਕ੍ਖਸਾਰਘਟਿਕਵਣ੍ਣਮਹਾਸਰੀਰੋ ਸੁਧੋਤਲੋਹਿਤਕਮਣਿਸਦਿਸਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਆਕਾਸਂ ਉਲ੍ਲੋਕੇਨ੍ਤੋ ‘‘ਯਤੋ ਸਰਾਮਿ ਅਤ੍ਤਾਨ’’ਨ੍ਤਿ ਗਾਥਮਾਹ.

ਤਤ੍ਥ ਯਤੋ ਸਰਾਮਿ ਅਤ੍ਤਾਨਨ੍ਤਿ ਯਤੋ ਪਟ੍ਠਾਯ ਅਹਂ ਅਤ੍ਤਭਾਵਸਙ੍ਖਾਤਂ ਅਤ੍ਤਾਨਂ ਸਰਾਮਿ ਅਨੁਸ੍ਸਰਾਮਿ. ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਨ੍ਤਿ ਯਤੋ ਪਟ੍ਠਾਯ ਤਾਸੁ ਤਾਸੁ ਇਤਿਕਤ੍ਤਬ੍ਬਤਾਸੁ ਵਿਞ੍ਞੁਤਂ ਵਿਜਾਨਨਭਾਵਂ ਪਤ੍ਤੋਸ੍ਮਿ, ਉਦ੍ਧਂ ਆਰੋਹਨਵਸੇਨ ਇਤੋ ਯਾਵ ਮਯ੍ਹਂ ਕਾਯਵਚੀਕਮ੍ਮਾਨਂ ਅਨੁਸ੍ਸਰਣਸਮਤ੍ਥਤਾ ਵਿਞ੍ਞੁਤਪ੍ਪਤ੍ਤਿ ਏਵ, ਏਤ੍ਥਨ੍ਤਰੇ ਸਮਾਨਜਾਤਿਕਾਨਂ ਖਾਦਨਟ੍ਠਾਨੇ ਨਿਬ੍ਬਤ੍ਤੋਪਿ ਤਣ੍ਡੁਲਕਣਪ੍ਪਮਾਣਮ੍ਪਿ ਮਚ੍ਛਂ ਮਯਾ ਨ ਖਾਦਿਤਪੁਬ੍ਬਂ, ਅਞ੍ਞਮ੍ਪਿ ਕਞ੍ਚਿ ਪਾਣਂ ਸਞ੍ਚਿਚ੍ਚ ਹਿਂਸਿਤਂ ਬਾਧਿਤਂ ਨਾਭਿਜਾਨਾਮਿ, ਪਗੇਵ ਜੀਵਿਤਾ ਵੋਰੋਪਿਤਂ.

੮੯. ਏਤੇਨ ਸਚ੍ਚਵਜ੍ਜੇਨਾਤਿ ‘‘ਯਦੇਤਂ ਮਯਾ ਕਸ੍ਸਚਿ ਪਾਣਸ੍ਸ ਅਹਿਂਸਨਂ ਵੁਤ੍ਤਂ, ਸਚੇ ਏਤਂ ਸਚ੍ਚਂ ਤਥਂ ਅਵਿਪਰੀਤਂ, ਏਤੇਨ ਸਚ੍ਚਵਚਨੇਨ ਪਜ੍ਜੁਨ੍ਨੋ ਮੇਘੋ ਅਭਿਵਸ੍ਸਤੁ, ਞਾਤਿਸਙ੍ਘਂ ਮੇ ਦੁਕ੍ਖਾ ਪਮੋਚੇਤੂ’’ਤਿ ਵਤ੍ਵਾ ਪੁਨ ਅਤ੍ਤਨੋ ਪਰਿਚਾਰਿਕਚੇਟਕਂ ਆਣਾਪੇਨ੍ਤੋ ਵਿਯ ਪਜ੍ਜੁਨ੍ਨਂ ਦੇਵਰਾਜਾਨਂ ਆਲਪਨ੍ਤੋ ‘‘ਅਭਿਤ੍ਥਨਯਾ’’ਤਿ ਗਾਥਮਾਹ.

ਤਤ੍ਥ ਅਭਿਤ੍ਥਨਯ ਪਜ੍ਜੁਨ੍ਨਾਤਿ ਪਜ੍ਜੁਨ੍ਨੋ ਵੁਚ੍ਚਤਿ ਮੇਘੋ, ਅਯਂ ਪਨ ਮੇਘਵਸੇਨ ਲਦ੍ਧਨਾਮਂ ਵਸ੍ਸਵਲਾਹਕਦੇਵਰਾਜਾਨਂ ਆਲਪਤਿ. ਅਯਂ ਹਿਸ੍ਸ ਅਧਿਪ੍ਪਾਯੋ – ਦੇਵੋ ਨਾਮ ਅਨਭਿਤ੍ਥਨਯਨ੍ਤੋ ਵਿਜ੍ਜੁਲਤਾ ਅਨਿਚ੍ਛਾਰੇਨ੍ਤੋ ਪਵਸ੍ਸਨ੍ਤੋਪਿ ਨ ਸੋਭਤਿ, ਤਸ੍ਮਾ ਤ੍ਵਂ ਅਭਿਤ੍ਥਨਯਨ੍ਤੋ ਵਿਜ੍ਜੁਲਤਾ ਨਿਚ੍ਛਾਰੇਨ੍ਤੋ ਵਸ੍ਸਾਪੇਹੀਤਿ. ਨਿਧਿਂ ਕਾਕਸ੍ਸ ਨਾਸਯਾਤਿ ਕਾਕਾ ਕਲਲਂ ਪਵਿਸਿਤ੍ਵਾ ਠਿਤੇ ਮਚ੍ਛੇ ਤੁਣ੍ਡੇਨ ਕੋਟ੍ਟੇਤ੍ਵਾ ਨੀਹਰਿਤ੍ਵਾ ਖਾਦਨ੍ਤਿ, ਤਸ੍ਮਾ ਤੇਸਂ ਅਨ੍ਤੋਕਲਲੇ ਮਚ੍ਛਾ ‘‘ਨਿਧੀ’’ਤਿ ਵੁਚ੍ਚਨ੍ਤਿ. ਤਂ ਕਾਕਸਙ੍ਘਸ੍ਸ ਨਿਧਿਂ ਦੇਵਂ ਵਸ੍ਸਾਪੇਨ੍ਤੋ ਉਦਕੇਨ ਪਟਿਚ੍ਛਾਦੇਤ੍ਵਾ ਨਾਸੇਹਿ. ਕਾਕਂ ਸੋਕਾਯ ਰਨ੍ਧੇਹੀਤਿ ਕਾਕਸਙ੍ਘੋ ਇਮਸ੍ਮਿਂ ਮਹਾਸਰੇ ਉਦਕੇਨ ਪੁਣ੍ਣੇ ਮਚ੍ਛੇ ਅਲਭਮਾਨੋ ਸੋਚਿਸ੍ਸਤਿ, ਤਂ ਕਾਕਗਣਂ ਤ੍ਵਂ ਇਮਂ ਕਦ੍ਦਮਂ ਪੂਰੇਨ੍ਤੋ ਸੋਕਾਯ ਰਨ੍ਧੇਹਿ, ਸੋਕਸ੍ਸਤ੍ਥਾਯ ਪਨ ਵਸ੍ਸਾਪਯਥ, ਯਥਾ ਅਨ੍ਤੋਨਿਜ੍ਝਾਨਲਕ੍ਖਣਂ ਸੋਕਂ ਪਾਪੁਣਾਤਿ, ਏਵਂ ਕਰੋਹੀਤਿ ਅਤ੍ਥੋ. ਮਚ੍ਛੇ ਸੋਕਾ ਪਮੋਚਯਾਤਿ ਮਮ ਞਾਤਕੇ ਸਬ੍ਬੇਵ ਮਚ੍ਛੇ ਇਮਮ੍ਹਾ ਮਰਣਸੋਕਾ ਪਮੋਚੇਹਿ. ‘‘ਮਞ੍ਚ ਸੋਕਾ ਪਮੋਚਯਾ’’ਤਿ (ਜਾ. ੧.੧.੭੫) ਜਾਤਕੇ ਪਠਨ੍ਤਿ. ਤਤ੍ਥ ਚ-ਕਾਰੋ ਸਮ੍ਪਿਣ੍ਡਨਤ੍ਥੋ, ਮਞ੍ਚ ਮਮ ਞਾਤਕੇ ਚਾਤਿ ਸਬ੍ਬੇਵ ਮਰਣਸੋਕਾ ਪਮੋਚੇਹਿ (ਜਾ. ਅਟ੍ਠ. ੧.੧.੭੫). ਮਚ੍ਛਾਨਞ੍ਹਿ ਅਨੁਦਕਭਾਵੇਨ ਪਚ੍ਚਤ੍ਥਿਕਾਨਂ ਘਾਸਭਾਵਂ ਗਚ੍ਛਾਮਾਤਿ ਮਹਾਮਰਣਸੋਕੋ, ਮਹਾਸਤ੍ਤਸ੍ਸ ਪਨ ਤੇਸਂ ਅਨਯਬ੍ਯਸਨਂ ਪਟਿਚ੍ਚ ਕਰੁਣਾਯਤੋ ਕਰੁਣਾਪਤਿਰੂਪਮੁਖੇਨ ਸੋਕਸਮ੍ਭਵੋ ਵੇਦਿਤਬ੍ਬੋ.

ਏਵਂ ਬੋਧਿਸਤ੍ਤੋ ਅਤ੍ਤਨੋ ਪਰਿਚਾਰਿਕਚੇਟਕਂ ਆਣਾਪੇਨ੍ਤੋ ਵਿਯ ਪਜ੍ਜੁਨ੍ਨਂ ਆਲਪਿਤ੍ਵਾ ਸਕਲੇ ਕੋਸਲਰਟ੍ਠੇ ਮਹਾਵਸ੍ਸਂ ਵਸ੍ਸਾਪੇਸਿ. ਮਹਾਸਤ੍ਤਸ੍ਸ ਹਿ ਸੀਲਤੇਜੇਨ ਸਚ੍ਚਕਿਰਿਯਾਯ ਸਮਕਾਲਮੇਵ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ‘‘ਕਿਂ ਨੁ ਖੋ’’ਤਿ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ਵਸ੍ਸਵਲਾਹਕਦੇਵਰਾਜਾਨਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਮਹਾਪੁਰਿਸੋ ਮਚ੍ਛਰਾਜਾ ਞਾਤੀਨਂ ਮਰਣਸੋਕੇਨ ਵਸ੍ਸਾਪਨਂ ਇਚ੍ਛਤਿ, ਸਕਲਂ ਕੋਸਲਰਟ੍ਠਂ ਏਕਮੇਘਂ ਕਤ੍ਵਾ ਵਸ੍ਸਾਪੇਹੀ’’ਤਿ ਆਹ.

ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਏਕਂ ਵਲਾਹਕਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਮੇਘਗੀਤਂ ਗਾਯਨ੍ਤੋ ਪਾਚੀਨਲੋਕਧਾਤੁਅਭਿਮੁਖੋ ਪਕ੍ਖਨ੍ਦਿ. ਪਾਚੀਨਦਿਸਾਭਾਗੇ ਖਲਮਣ੍ਡਲਮਤ੍ਤਂ ਏਕਂ ਮੇਘਮਣ੍ਡਲਂ ਉਟ੍ਠਾਯ ਸਤਪਟਲਂ ਸਹਸ੍ਸਪਟਲਂ ਹੁਤ੍ਵਾ ਅਭਿਤ੍ਥਨਯਨ੍ਤਂ ਵਿਜ੍ਜੁਲਤਾ ਨਿਚ੍ਛਾਰੇਨ੍ਤਂ ਅਧੋਮੁਖਠਪਿਤਉਦਕਕੁਮ੍ਭਾਕਾਰੇਨ ਵਿਸ੍ਸਨ੍ਦਮਾਨਂ ਸਕਲਂ ਕੋਸਲਰਟ੍ਠਂ ਮਹੋਘੇਨ ਅਜ੍ਝੋਤ੍ਥਰਿ. ਦੇਵੋ ਅਚ੍ਛਿਨ੍ਨਧਾਰਂ ਵਸ੍ਸਨ੍ਤੋ ਮੁਹੁਤ੍ਤੇਨੇਵ ਤਂ ਮਹਾਸਰਂ ਪੂਰੇਸਿ. ਮਚ੍ਛਾ ਮਰਣਭਯਤੋ ਮੁਚ੍ਚਿਂਸੁ. ਕਾਕਾਦਯੋ ਅਪਤਿਟ੍ਠਾ ਅਹੇਸੁਂ. ਨ ਕੇਵਲਂ ਮਚ੍ਛਾ ਏਵ, ਮਨੁਸ੍ਸਾਪਿ ਵਿਵਿਧਸਸ੍ਸਾਨਿ ਸਮ੍ਪਾਦੇਨ੍ਤਾ ਚਤੁਪ੍ਪਦਾਦਯੋਪੀਤਿ ਸਬ੍ਬੇਪਿ ਵਸ੍ਸੂਪਜੀਵਿਨੋ ਕਾਯਿਕਚੇਤਸਿਕਦੁਕ੍ਖਤੋ ਮੁਚ੍ਚਿਂਸੁ. ਤੇਨ ਵੁਤ੍ਤਂ –

੯੦. ‘‘ਸਹ ਕਤੇ ਸਚ੍ਚਵਰੇ, ਪਜ੍ਜੁਨ੍ਨੋ ਅਭਿਗਜ੍ਜਿਯ;

ਥਲਂ ਨਿਨ੍ਨਞ੍ਚ ਪੂਰੇਨ੍ਤੋ, ਖਣੇਨ ਅਭਿਵਸ੍ਸਥਾ’’ਤਿ.

ਤਤ੍ਥ ਖਣੇਨ ਅਭਿਵਸ੍ਸਥਾਤਿ ਅਦਨ੍ਧਾਯਿਤ੍ਵਾ ਸਚ੍ਚਕਿਰਿਯਖਣੇਨੇਵ ਅਭਿਵਸ੍ਸਿ.

੯੧. ਕਤ੍ਵਾ ਵੀਰਿਯਮੁਤ੍ਤਮਨ੍ਤਿ ਦੇਵੇ ਅਵਸ੍ਸਨ੍ਤੇ ਕਿਂ ਕਾਤਬ੍ਬਨ੍ਤਿ ਕੋਸਜ੍ਜਂ ਅਨਾਪਜ੍ਜਿਤ੍ਵਾ ਞਾਤਤ੍ਥਚਰਿਯਾਸਮ੍ਪਾਦਨਮੁਖੇਨ ਮਹਤੋ ਸਤ੍ਤਨਿਕਾਯਸ੍ਸ ਹਿਤਸੁਖਨਿਪ੍ਫਾਦਨਂ ਉਤ੍ਤਮਂ ਵੀਰਿਯਂ ਕਤ੍ਵਾ. ਸਚ੍ਚਤੇਜਬਲਸ੍ਸਿਤੋ ਮਮ ਸਚ੍ਚਾਨੁਭਾਵਬਲਸਨ੍ਨਿਸ੍ਸਿਤੋ ਹੁਤ੍ਵਾ ਤਦਾ ਮਹਾਮੇਘਂ ਵਸ੍ਸਾਪੇਸਿਂ. ਯਸ੍ਮਾ ਚੇਤਦੇਵਂ, ਤਸ੍ਮਾ ‘‘ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ ਮਹਾਮਚ੍ਛਰਾਜਕਾਲੇ ਅਤ੍ਤਨੋ ਸਚ੍ਚਪਾਰਮਿਯਾ ਅਨਞ੍ਞਸਾਧਾਰਣਭਾਵਂ ਦਸ੍ਸੇਸਿ ਧਮ੍ਮਰਾਜਾ.

ਏਵਂ ਮਹਾਸਤ੍ਤੋ ਮਹਾਕਰੁਣਾਯ ਸਮੁਸ੍ਸਾਹਿਤਹਦਯੋ ਸਕਲਰਟ੍ਠੇ ਮਹਾਵਸ੍ਸਂ ਵਸ੍ਸਾਪਨਵਸੇਨ ਮਹਾਜਨਂ ਮਰਣਦੁਕ੍ਖਤੋ ਮੋਚੇਤ੍ਵਾ ਜੀਵਿਤਪਰਿਯੋਸਾਨੇ ਯਥਾਕਮ੍ਮਂ ਗਤੋ.

ਤਦਾ ਪਜ੍ਜੁਨ੍ਨੋ ਆਨਨ੍ਦਤ੍ਥੇਰੋ ਅਹੋਸਿ, ਮਚ੍ਛਗਣਾ ਬੁਦ੍ਧਪਰਿਸਾ, ਮਚ੍ਛਰਾਜਾ ਲੋਕਨਾਥੋ.

ਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋਪਿ ਨਿਦ੍ਧਾਰੇਤਬ੍ਬਾ. ਤਥਾ ਅਤ੍ਤਨੋ ਸਮਾਨਜਾਤਿਕਾਨਂ ਖਾਦਨਟ੍ਠਾਨੇ ਮਚ੍ਛਯੋਨਿਯਂ ਨਿਬ੍ਬਤ੍ਤਿਤ੍ਵਾ ਤਣ੍ਡੁਲਕਣਮਤ੍ਤਮ੍ਪਿ ਮਚ੍ਛਂ ਆਦਿਂ ਕਤ੍ਵਾ ਕਸ੍ਸਚਿਪਿ ਪਾਣਿਨੋ ਅਖਾਦਨਂ, ਤਿਟ੍ਠਤੁ ਖਾਦਨਂ ਏਕਸਤ੍ਤਸ੍ਸਪਿ ਅਵਿਹੇਠਨਂ, ਤਥਾ ਸਚ੍ਚਕਰਣੇਨ ਦੇਵਸ੍ਸ ਵਸ੍ਸਾਪਨਂ, ਉਦਕੇ ਪਰਿਕ੍ਖੀਣੇ ਕਲਲਗਹਨੇ ਨਿਮੁਜ੍ਜਨਵਸੇਨ ਅਤ੍ਤਨਾ ਅਨੁਭਵਮਾਨਂ ਦੁਕ੍ਖਂ ਵੀਰਭਾਵੇਨ ਅਗਣੇਤ੍ਵਾ ਞਾਤਿਸਙ੍ਘਸ੍ਸੇਵ ਤਂ ਦੁਕ੍ਖਂ ਅਤ੍ਤਨੋ ਹਦਯੇ ਕਤ੍ਵਾ ਅਸਹਨ੍ਤਸ੍ਸ ਸਬ੍ਬਭਾਵੇਨ ਕਰੁਣਾਯਨਾ, ਤਥਾ ਚ ਪਟਿਪਤ੍ਤੀਤਿ ਏਵਮਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਮਚ੍ਛਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.