੧੧. ਕਣ੍ਹਦੀਪਾਯਨਚਰਿਯਾਵਣ੍ਣਨਾ

੯੨. ਏਕਾਦਸਮੇ ਕਣ੍ਹਦੀਪਾਯਨੋ ਇਸੀਤਿ ਏਵਂਨਾਮਕੋ ਤਾਪਸੋ. ਬੋਧਿਸਤ੍ਤੋ ਹਿ ਤਦਾ ਦੀਪਾਯਨੋ ਨਾਮ ਅਤ੍ਤਨੋ ਸਹਾਯਂ ਮਣ੍ਡਬ੍ਯਤਾਪਸਂ ਸੂਲੇ ਉਤ੍ਤਾਸਿਤਂ ਉਪਸਙ੍ਕਮਿਤ੍ਵਾ ਤਸ੍ਸ ਸੀਲਗੁਣੇਨ ਤਂ ਅਵਿਜਹਨ੍ਤੋ ਤਿਯਾਮਰਤ੍ਤਿਂ ਸੂਲਂ ਨਿਸ੍ਸਾਯ ਠਿਤੋ ਤਸ੍ਸ ਸਰੀਰਤੋ ਪਗ੍ਘਰਿਤ੍ਵਾ ਪਤਿਤਪਤਿਤੇਹਿ ਲੋਹਿਤਬਿਨ੍ਦੂਹਿ ਸੁਕ੍ਖੇਹਿ ਕਾਲ਼ਵਣ੍ਣਸਰੀਰਤਾਯ ‘‘ਕਣ੍ਹਦੀਪਾਯਨੋ’’ਤਿ ਪਾਕਟੋ ਅਹੋਸਿ. ਪਰੋਪਞ੍ਞਾਸਵਸ੍ਸਾਨੀਤਿ ਸਾਧਿਕਾਨਿ ਪਞ੍ਞਾਸਵਸ੍ਸਾਨਿ, ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਅਨਭਿਰਤੋ ਚਰਿਂ ਅਹਨ੍ਤਿ ਪਨ੍ਤਸੇਨਾਸਨੇਸੁ ਚੇਵ ਅਧਿਕੁਸਲਧਮ੍ਮੇਸੁ ਚ ਅਨਭਿਰਤਿਵਾਸਂ ਵਸਨ੍ਤੋ ਅਹਂ ਬ੍ਰਹ੍ਮਚਰਿਯਂ ਅਚਰਿਂ. ਪਬ੍ਬਜਿਤ੍ਵਾ ਸਤ੍ਤਾਹਮੇਵ ਹਿ ਤਦਾ ਮਹਾਸਤ੍ਤੋ ਅਭਿਰਤੋ ਬ੍ਰਹ੍ਮਚਰਿਯਂ ਚਰਿ. ਤਤੋ ਪਰਂ ਅਨਭਿਰਤਿਵਾਸਂ ਵਸਿ.

ਕਸ੍ਮਾ ਪਨ ਮਹਾਪੁਰਿਸੋ ਅਨੇਕਸਤਸਹਸ੍ਸੇਸੁ ਅਤ੍ਤਭਾਵੇਸੁ ਨੇਕ੍ਖਮ੍ਮਜ੍ਝਾਸਯੋ ਬ੍ਰਹ੍ਮਚਰਿਯਵਾਸਂ ਅਭਿਰਮਿਤ੍ਵਾ ਇਧ ਤਂ ਨਾਭਿਰਮਿ? ਪੁਥੁਜ੍ਜਨਭਾਵਸ੍ਸ ਚਞ੍ਚਲਭਾਵਤੋ. ਕਸ੍ਮਾ ਚ ਪੁਨ ਨ ਅਗਾਰਂ ਅਜ੍ਝਾਵਸੀਤਿ? ਪਠਮਂ ਨੇਕ੍ਖਮ੍ਮਜ੍ਝਾਸਯੇਨ ਕਾਮੇਸੁ ਦੋਸਂ ਦਿਸ੍ਵਾ ਪਬ੍ਬਜਿ. ਅਥਸ੍ਸ ਅਯੋਨਿਸੋਮਨਸਿਕਾਰੇਨ ਅਨਭਿਰਤਿ ਉਪ੍ਪਜ੍ਜਿ. ਸੋ ਤਂ ਵਿਨੋਦੇਤੁਮਸਕ੍ਕੋਨ੍ਤੋਪਿ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਤਾਵ ਮਹਨ੍ਤਂ ਵਿਭਵਂ ਪਹਾਯ ਅਗਾਰਸ੍ਮਾ ਨਿਕ੍ਖਮਨ੍ਤੋ ਯਂ ਪਜਹਿ, ਪੁਨ ਤਦਤ੍ਥਮੇਵ ਨਿਵਤ੍ਤੋ, ‘‘ਏਲ਼ਮੂਗੋ ਚਪਲੋ ਵਤਾਯਂ ਕਣ੍ਹਦੀਪਾਯਨੋ’’ਤਿ ਇਮਂ ਅਪਵਾਦਂ ਜਿਗੁਚ੍ਛਨ੍ਤੋ ਅਤ੍ਤਨੋ ਹਿਰੋਤ੍ਤਪ੍ਪਭੇਦਭਯੇਨ. ਅਪਿ ਚ ਪਬ੍ਬਜ੍ਜਾਪੁਞ੍ਞਂ ਨਾਮੇਤਂ ਵਿਞ੍ਞੂਹਿ ਬੁਦ੍ਧਾਦੀਹਿ ਪਸਤ੍ਥਂ, ਤੇਹਿ ਚ ਅਨੁਟ੍ਠਿਤਂ, ਤਸ੍ਮਾਪਿ ਸਹਾਪਿ ਦੁਕ੍ਖੇਨ ਸਹਾਪਿ ਦੋਮਨਸ੍ਸੇਨ ਅਸ੍ਸੁਮੁਖੋ ਰੋਦਮਾਨੋਪਿ ਬ੍ਰਹ੍ਮਚਰਿਯਵਾਸਂ ਵਸਿ, ਨ ਤਂ ਵਿਸ੍ਸਜ੍ਜੇਸਿ. ਵੁਤ੍ਤਞ੍ਚੇਤਂ –

‘‘ਸਦ੍ਧਾਯ ਨਿਕ੍ਖਮ੍ਮ ਪੁਨ ਨਿਵਤ੍ਤੋ, ਸੋ ਏਲ਼ਮੂਗੋ ਚਪਲੋ ਵਤਾਯਂ;

ਏਤਸ੍ਸ ਵਾਦਸ੍ਸ ਜਿਗੁਚ੍ਛਮਾਨੋ, ਅਕਾਮਕੋ ਚਰਾਮਿ ਬ੍ਰਹ੍ਮਚਰਿਯਂ;

ਵਿਞ੍ਞੁਪ੍ਪਸਤ੍ਥਞ੍ਚ ਸਤਞ੍ਚ ਠਾਨਂ, ਏਵਮ੍ਪਹਂ ਪੁਞ੍ਞਕਰੋ ਭਵਾਮੀ’’ਤਿ. (ਜਾ. ੧.੧੦.੬੬);

੯੩. ਨ ਕੋਚਿ ਏਤਂ ਜਾਨਾਤੀਤਿ ਏਤਂ ਮਮ ਅਨਭਿਰਤਿਮਨਂ ਬ੍ਰਹ੍ਮਚਰਿਯਵਾਸੇ ਅਭਿਰਤਿਵਿਰਹਿਤਚਿਤ੍ਤਂ ਕੋਚਿ ਮਨੁਸ੍ਸਭੂਤੋ ਨ ਜਾਨਾਤਿ. ਕਸ੍ਮਾ? ਅਹਞ੍ਹਿ ਕਸ੍ਸਚਿ ਨਾਚਿਕ੍ਖਿਂ ਮਮ ਮਾਨਸੇ ਚਿਤ੍ਤੇ ਅਰਤਿ ਚਰਤਿ ਪਵਤ੍ਤਤੀਤਿ ਕਸ੍ਸਚਿਪਿ ਨ ਕਥੇਸਿਂ, ਤਸ੍ਮਾ ਨ ਕੋਚਿ ਮਨੁਸ੍ਸਭੂਤੋ ਏਤਂ ਜਾਨਾਤੀਤਿ.

੯੪. ‘‘ਸਬ੍ਰਹ੍ਮਚਾਰੀ ਮਣ੍ਡਬ੍ਯੋ, ਸਹਾਯੋ ਮੇ ਮਹਾਇਸਿ;

ਪੁਬ੍ਬਕਮ੍ਮਸਮਾਯੁਤ੍ਤੋ, ਸੂਲਮਾਰੋਪਨਂ ਲਭਿ.

.

ਸਬ੍ਰਹ੍ਮਚਾਰੀਤਿ ਤਾਪਸਪਬ੍ਬਜ੍ਜਾਯ ਸਮਾਨਸਿਕ੍ਖਤਾਯ ਸਬ੍ਰਹ੍ਮਚਾਰੀ. ਮਣ੍ਡਬ੍ਯੋਤਿ ਏਵਂਨਾਮਕੋ. ਸਹਾਯੋਤਿ ਗਿਹਿਕਾਲੇ ਪਬ੍ਬਜਿਤਕਾਲੇ ਚ ਦਲ਼੍ਹਮਿਤ੍ਤਤਾਯ ਪਿਯਸਹਾਯੋ. ਮਹਾਇਸੀਤਿ ਮਹਾਨੁਭਾਵੋ ਇਸਿ. ਪੁਬ੍ਬਕਮ੍ਮਸਮਾਯੁਤ੍ਤੋ, ਸੂਲਮਾਰੋਪਨਂ ਲਭੀਤਿ ਕਤੋਕਾਸੇਨ ਅਤ੍ਤਨੋ ਪੁਬ੍ਬਕਮ੍ਮੇਨ ਯੁਤ੍ਤੋ ਸੂਲਾਰੋਪਨਂ ਲਭਿ, ਸੂਲਂ ਉਤ੍ਤਾਸਿਤੋਤਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਵਂਸਰਟ੍ਠੇ ਕੋਸਮ੍ਬਿਯਂ ਕੋਸਮ੍ਬਿਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਅਞ੍ਞਤਰਸ੍ਮਿਂ ਨਿਗਮੇ ਅਸੀਤਿਕੋਟਿਵਿਭਵਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਨਾਮੇਨ ਦੀਪਾਯਨੋ ਨਾਮ. ਤਾਦਿਸਸ੍ਸੇਵ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਬ੍ਰਾਹ੍ਮਣਕੁਮਾਰੋ ਤਸ੍ਸ ਪਿਯਸਹਾਯੋ ਅਹੋਸਿ, ਨਾਮੇਨ ਮਣ੍ਡਬ੍ਯੋ ਨਾਮ. ਤੇ ਉਭੋਪਿ ਅਪਰਭਾਗੇ ਮਾਤਾਪਿਤੂਨਂ ਅਚ੍ਚਯੇਨ ਕਾਮੇਸੁ ਦੋਸਂ ਦਿਸ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਕਾਮੇ ਪਹਾਯ ਞਾਤਿਮਿਤ੍ਤਪਰਿਜਨਸ੍ਸ ਰੋਦਨ੍ਤਸ੍ਸ ਪਰਿਦੇਵਨ੍ਤਸ੍ਸ ਨਿਕ੍ਖਮਿਤ੍ਵਾ ਹਿਮਵਨ੍ਤਪ੍ਪਦੇਸੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਵਨਮੂਲਫਲਾਹਾਰੇਨ ਯਾਪੇਨ੍ਤੋ ਪਰੋਪਣ੍ਣਾਸਵਸ੍ਸਾਨਿ ਵਸਿਂਸੁ, ਕਾਮਚ੍ਛਨ੍ਦਂ ਵਿਕ੍ਖਮ੍ਭੇਤੁਂ ਨਾਸਕ੍ਖਿਂਸੁ, ਤੇ ਝਾਨਮਤ੍ਤਮ੍ਪਿ ਨ ਨਿਬ੍ਬਤ੍ਤੇਸੁਂ.

ਤੇ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਚਰਨ੍ਤਾ ਕਾਸਿਰਟ੍ਠਂ ਸਮ੍ਪਾਪੁਣਿਂਸੁ. ਤਤ੍ਰੇਕਸ੍ਮਿਂ ਨਿਗਮੇ ਦੀਪਾਯਨਸ੍ਸ ਗਿਹਿਸਹਾਯੋ ਮਣ੍ਡਬ੍ਯੋ ਨਾਮ ਪਟਿਵਸਤਿ. ਤੇ ਉਭੋਪਿ ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਂਸੁ. ਸੋ ਤੇ ਦਿਸ੍ਵਾ ਅਤ੍ਤਮਨੋ ਪਣ੍ਣਸਾਲਂ ਕਾਰੇਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿ. ਤੇ ਤਤ੍ਥ ਤੀਣਿ ਚਤ੍ਤਾਰਿ ਵਸ੍ਸਾਨਿ ਵਸਿਤ੍ਵਾ ਤਂ ਆਪੁਚ੍ਛਿਤ੍ਵਾ ਚਾਰਿਕਂ ਚਰਨ੍ਤਾ ਬਾਰਾਣਸਿਸਮੀਪੇ ਅਤਿਮੁਤ੍ਤਕਸੁਸਾਨੇ ਵਸਿਂਸੁ. ਤਤ੍ਥ ਦੀਪਾਯਨੋ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨ ਤਸ੍ਮਿਂ ਨਿਗਮੇ ਮਣ੍ਡਬ੍ਯਸ੍ਸ ਅਤ੍ਤਨੋ ਸਹਾਯਸ੍ਸ ਸਨ੍ਤਿਕਂ ਗਤੋ. ਮਣ੍ਡਬ੍ਯਤਾਪਸੋ ਤਤ੍ਥੇਵ ਵਸਿ.

ਅਥੇਕਦਿਵਸਂ ਏਕੋ ਚੋਰੋ ਅਨ੍ਤੋਨਗਰੇ ਚੋਰਿਕਂ ਕਤ੍ਵਾ ਧਨਸਾਰਂ ਆਦਾਯ ਨਿਕ੍ਖਨ੍ਤੋ ਪਟਿਬੁਦ੍ਧੇਹਿ ਗੇਹਸਾਮਿਕੇਹਿ ਨਗਰਾਰਕ੍ਖਕਮਨੁਸ੍ਸੇਹਿ ਚ ਅਨੁਬਦ੍ਧੋ ਨਿਦ੍ਧਮਨੇਨ ਨਿਕ੍ਖਮਿਤ੍ਵਾ ਵੇਗੇਨ ਸੁਸਾਨਂ ਪਵਿਸਿਤ੍ਵਾ ਤਾਪਸਸ੍ਸ ਪਣ੍ਣਸਾਲਦ੍ਵਾਰੇ ਭਣ੍ਡਿਕਂ ਛਡ੍ਡੇਤ੍ਵਾ ਪਲਾਯਿ. ਮਨੁਸ੍ਸਾ ਭਣ੍ਡਿਕਂ ਦਿਸ੍ਵਾ ‘‘ਅਰੇ ਦੁਟ੍ਠਜਟਿਲ, ਰਤ੍ਤਿਂ, ਚੋਰਿਕਂ ਕਤ੍ਵਾ ਦਿਵਾ ਤਾਪਸਵੇਸੇਨ ਚਰਸੀ’’ਤਿ ਤਜ੍ਜੇਤ੍ਵਾ ਪੋਥੇਤ੍ਵਾ ਤਂ ਆਦਾਯ ਰਞ੍ਞੋ ਦਸ੍ਸਯਿਂਸੁ. ਰਾਜਾ ਅਨੁਪਪਰਿਕ੍ਖਿਤ੍ਵਾਵ ‘‘ਸੂਲੇ ਉਤ੍ਤਾਸੇਥਾ’’ਤਿ ਆਹ. ਤਂ ਸੁਸਾਨਂ ਨੇਤ੍ਵਾ ਖਦਿਰਸੂਲੇ ਆਰੋਪਯਿਂਸੁ. ਤਾਪਸਸ੍ਸ ਸਰੀਰੇ ਸੂਲਂ ਨ ਪਵਿਸਤਿ. ਤਤੋ ਨਿਮ੍ਬਸੂਲਂ ਆਹਰਿਂਸੁ, ਤਮ੍ਪਿ ਨ ਪਵਿਸਤਿ. ਤਤੋ ਅਯਸੂਲਂ ਆਹਰਿਂਸੁ, ਤਮ੍ਪਿ ਨ ਪਵਿਸਤਿ. ਤਾਪਸੋ ‘‘ਕਿਂ ਨੁ ਖੋ ਮੇ ਪੁਬ੍ਬਕਮ੍ਮ’’ਨ੍ਤਿ ਚਿਨ੍ਤੇਸਿ. ਤਸ੍ਸ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ. ਤੇਨ ਪੁਬ੍ਬਕਮ੍ਮਂ ਅਦ੍ਦਸ – ਸੋ ਕਿਰ ਪੁਰਿਮਤ੍ਤਭਾਵੇ ਵਡ੍ਢਕੀਪੁਤ੍ਤੋ ਹੁਤ੍ਵਾ ਪਿਤੁ ਰੁਕ੍ਖਤਚ੍ਛਨਟ੍ਠਾਨਂ ਗਨ੍ਤ੍ਵਾ ਏਕਂ ਮਕ੍ਖਿਕਂ ਗਹੇਤ੍ਵਾ ਕੋਵਿਲ਼ਾਰਸਕਲਿਕਾਯ ਸੂਲੇਨ ਵਿਯ ਵਿਜ੍ਝਿ. ਤਸ੍ਸ ਤਂ ਪਾਪਂ ਇਮਸ੍ਮਿਂ ਠਾਨੇ ਓਕਾਸਂ ਲਭਿ. ਸੋ ‘‘ਨ ਸਕ੍ਕਾ ਇਤੋ ਪਾਪਤੋ ਮੁਚ੍ਚਿਤੁ’’ਨ੍ਤਿ ਞਤ੍ਵਾ ਰਾਜਪੁਰਿਸੇ ਆਹ – ‘‘ਸਚੇ ਮਂ ਸੂਲੇ ਉਤ੍ਤਾਸੇਤੁਕਾਮਤ੍ਥ, ਕੋਵਿਲ਼ਾਰਸੂਲਂ ਆਹਰਥਾ’’ਤਿ. ਤੇ ਤਥਾ ਕਤ੍ਵਾ ਤਂ ਸੂਲੇ ਉਤ੍ਤਾਸੇਤ੍ਵਾ ਆਰਕ੍ਖਂ ਦਤ੍ਵਾ ਪਕ੍ਕਮਿਂਸੁ.

ਤਦਾ ਕਣ੍ਹਦੀਪਾਯਨੋ ‘‘ਚਿਰਦਿਟ੍ਠੋ ਮੇ ਸਹਾਯੋ’’ਤਿ ਮਣ੍ਡਬ੍ਯਸ੍ਸ ਸਨ੍ਤਿਕਂ ਆਗਚ੍ਛਨ੍ਤੋ ਤਂ ਪਵਤ੍ਤਿਂ ਸੁਤ੍ਵਾ ਤਂ ਠਾਨਂ ਗਨ੍ਤ੍ਵਾ ਏਕਮਨ੍ਤਂ ਠਿਤੋ ‘‘ਕਿਂ, ਸਮ੍ਮ, ਕਾਰਕੋਸੀ’’ਤਿ ਪੁਚ੍ਛਿਤ੍ਵਾ ‘‘ਅਕਾਰਕੋਮ੍ਹੀ’’ਤਿ ਵੁਤ੍ਤੇ ‘‘ਅਤ੍ਤਨੋ ਮਨੋਪਦੋਸਂ ਰਕ੍ਖਿਤੁਂ ਸਕ੍ਖਿ ਨ ਸਕ੍ਖੀ’’ਤਿ ਪੁਚ੍ਛਿ. ‘‘ਸਮ੍ਮ, ਯੇਹਿ ਅਹਂ ਗਹਿਤੋ, ਨੇਵ ਤੇਸਂ ਨ ਰਞ੍ਞੋ ਉਪਰਿ ਮਯ੍ਹਂ ਮਨੋਪਦੋਸੋ ਅਤ੍ਥੀ’’ਤਿ. ‘‘ਏਵਂ ਸਨ੍ਤੇ ਤਾਦਿਸਸ੍ਸ ਸੀਲਵਤੋ ਛਾਯਾ ਮਯ੍ਹਂ ਸੁਖਾ’’ਤਿ ਵਤ੍ਵਾ ਕਣ੍ਹਦੀਪਾਯਨੋ ਸੂਲਂ ਨਿਸ੍ਸਾਯ ਨਿਸੀਦਿ. ਆਰਕ੍ਖਕਪੁਰਿਸਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਅਨਿਸਾਮੇਤ੍ਵਾ ਮੇ ਕਤ’’ਨ੍ਤਿ ਵੇਗੇਨ ਤਤ੍ਥ ਗਨ੍ਤ੍ਵਾ ‘‘ਕਸ੍ਮਾ, ਭਨ੍ਤੇ, ਤ੍ਵਂ ਸੂਲਂ ਨਿਸ੍ਸਾਯ ਨਿਸਿਨ੍ਨੋਸੀ’’ਤਿ ਦੀਪਾਯਨਂ ਪੁਚ੍ਛਿ. ‘‘ਮਹਾਰਾਜ, ਇਮਂ ਤਾਪਸਂ ਰਕ੍ਖਨ੍ਤੋ ਨਿਸਿਨ੍ਨੋਸ੍ਮੀ’’ਤਿ. ‘‘ਕਿਂ ਪਨ ਤ੍ਵਂ ਇਮਸ੍ਸ ਕਾਰਕਭਾਵਂ ਞਤ੍ਵਾ ਏਵਂ ਕਰੋਸੀ’’ਤਿ. ਸੋ ਕਮ੍ਮਸ੍ਸ ਅਵਿਸੋਧਿਤਭਾਵਂ ਆਚਿਕ੍ਖਿ. ਅਥਸ੍ਸ ਦੀਪਾਯਨੋ ‘‘ਰਞ੍ਞਾ ਨਾਮ ਨਿਸਮ੍ਮਕਾਰਿਨਾ ਭਵਿਤਬ੍ਬਂ.

‘‘ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;

ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੂ’’ਤਿ. (ਜਾ. ੧.੪.੧੨੭; ੧.੫.੪; ੧.੧੦.੧੫੩; ੧.੧੫.੨੨੯) –

ਆਦੀਨਿ ਵਤ੍ਵਾ ਧਮ੍ਮਂ ਦੇਸੇਸਿ.

ਰਾਜਾ ਮਣ੍ਡਬ੍ਯਤਾਪਸਸ੍ਸ ਨਿਦ੍ਦੋਸਭਾਵਂ ਞਤ੍ਵਾ ‘‘ਸੂਲਂ ਹਰਥਾ’’ਤਿ ਆਣਾਪੇਸਿ. ਸੂਲਂ ਹਰਨ੍ਤਾ ਹਰਿਤੁਂ ਨਾਸਕ੍ਖਿਂਸੁ. ਮਣ੍ਡਬ੍ਯੋ ਆਹ – ‘‘ਮਹਾਰਾਜ, ਅਹਂ ਪੁਬ੍ਬੇ ਕਤਕਮ੍ਮਦੋਸੇਨ ਏਵਰੂਪਂ ਅਯਸਂ ਪਤ੍ਤੋ, ਮਮ ਸਰੀਰਤੋ ਸੂਲਂ ਹਰਿਤੁਂ ਨ ਸਕ੍ਕਾ, ਸਚੇਪਿ ਮਯ੍ਹਂ ਜੀਵਿਤਂ ਦਾਤੁਕਾਮੋ, ਕਕਚੇਨ ਇਮਂ ਸੂਲਂ ਚਮ੍ਮਸਮਂ ਕਤ੍ਵਾ ਛਿਨ੍ਦਾਪੇਹੀ’’ਤਿ. ਰਾਜਾ ਤਥਾ ਕਾਰੇਸਿ. ਸੂਲਂ ਅਨ੍ਤੋਯੇਵ ਅਹੋਸਿ, ਨ ਕਞ੍ਚਿ ਪੀਲ਼ਂ ਜਨੇਸਿ. ਤਦਾ ਕਿਰ ਸੁਖੁਮਂ ਸਕਲਿਕਹੀਰਂ ਗਹੇਤ੍ਵਾ ਮਕ੍ਖਿਕਾਯ ਵਚ੍ਚਮਗ੍ਗਂ ਪਵੇਸੇਸਿ, ਤਂ ਤਸ੍ਸ ਅਨ੍ਤੋ ਏਵ ਅਹੋਸਿ. ਸੋ ਤੇਨ ਕਾਰਣੇਨ ਅਮਰਿਤ੍ਵਾ, ਅਤ੍ਤਨੋ ਆਯੁਕ੍ਖਯੇਨੇਵ ਮਰਿ, ਤਸ੍ਮਾ ਅਯਮ੍ਪਿ ਨ ਮਤੋਤਿ. ਰਾਜਾ ਤਾਪਸੇ ਵਨ੍ਦਿਤ੍ਵਾ ਖਮਾਪੇਤ੍ਵਾ ਉਭੋਪਿ ਉਯ੍ਯਾਨੇਯੇਵ ਵਸਾਪੇਨ੍ਤੋ ਪਟਿਜਗ੍ਗਿ. ਤਤੋ ਪਟ੍ਠਾਯ ਸੋ ਆਣਿਮਣ੍ਡਬ੍ਯੋ ਨਾਮ ਜਾਤੋ. ਸੋ ਰਾਜਾਨਂ ਉਪਨਿਸ੍ਸਾਯ ਤਤ੍ਥੇਵ ਵਸਿ. ਦੀਪਾਯਨੋ ਪਨ ਤਸ੍ਸ ਵਣਂ ਫਾਸੁਕਂ ਕਰਿਤ੍ਵਾ ਅਤ੍ਤਨੋ ਗਿਹਿਸਹਾਯਮਣ੍ਡਬ੍ਯੇਨ ਕਾਰਿਤਂ ਪਣ੍ਣਸਾਲਮੇਵ ਗਤੋ. ਤੇਨ ਵੁਤ੍ਤਂ –

੯੫. ‘‘ਤਮਹਂ ਉਪਟ੍ਠਹਿਤ੍ਵਾਨ, ਆਰੋਗ੍ਯਮਨੁਪਾਪਯਿਂ;

ਆਪੁਚ੍ਛਿਤ੍ਵਾਨ ਆਗਞ੍ਛਿਂ, ਯਂ ਮਯ੍ਹਂ ਸਕਮਸ੍ਸਮ’’ਨ੍ਤਿ.

ਤਤ੍ਥ ਆਪੁਚ੍ਛਿਤ੍ਵਾਨਾਤਿ ਮਯ੍ਹਂ ਸਹਾਯਂ ਮਣ੍ਡਬ੍ਯਤਾਪਸਂ ਆਪੁਚ੍ਛਿਤ੍ਵਾ. ਯਂ ਮਯ੍ਹਂ ਸਕਮਸ੍ਸਮਨ੍ਤਿ ਯਂ ਤਂ ਮਯ੍ਹਂ ਗਿਹਿਸਹਾਯੇਨ ਮਣ੍ਡਬ੍ਯਬ੍ਰਾਹ੍ਮਣੇਨ ਕਾਰਿਤਂ ਸਕਂ ਮਮ ਸਨ੍ਤਕਂ ਅਸ੍ਸਮਪਦਂ ਪਣ੍ਣਸਾਲਾ, ਤਂ ਉਪਾਗਞ੍ਛਿਂ.

੯੬. ਤਂ ਪਨ ਪਣ੍ਣਸਾਲਂ ਪਵਿਸਨ੍ਤਂ ਦਿਸ੍ਵਾ ਸਹਾਯਸ੍ਸ ਆਰੋਚੇਸੁਂ. ਸੋ ਸੁਤ੍ਵਾਵ ਤੁਟ੍ਠਚਿਤ੍ਤੋ ਸਪੁਤ੍ਤਦਾਰੋ ਬਹੁਗਨ੍ਧਮਾਲਫਾਣਿਤਾਦੀਨਿ ਆਦਾਯ ਪਣ੍ਣਸਾਲਂ ਗਨ੍ਤ੍ਵਾ ਦੀਪਾਯਨਂ ਵਨ੍ਦਿਤ੍ਵਾ ਪਾਦੇ ਧੋਵਿਤ੍ਵਾ ਪਾਨਕਂ ਪਾਯੇਤ੍ਵਾ ਆਣਿਮਣ੍ਡਬ੍ਯਸ੍ਸ ਪਵਤ੍ਤਿਂ ਸੁਣਨ੍ਤੋ ਨਿਸੀਦਿ. ਅਥਸ੍ਸ ਪੁਤ੍ਤੋ ਯਞ੍ਞਦਤ੍ਤਕੁਮਾਰੋ ਨਾਮ ਚਙ੍ਕਮਨਕੋਟਿਯਂ ਗੇਣ੍ਡੁਕੇਨ ਕੀਲ਼ਿ. ਤਤ੍ਥ ਚੇਕਸ੍ਮਿਂ ਵਮ੍ਮਿਕੇ ਆਸਿਵਿਸੋ ਵਸਤਿ. ਕੁਮਾਰੇਨ ਭੂਮਿਯਂ ਪਹਤਗੇਣ੍ਡੁਕੋ ਗਨ੍ਤ੍ਵਾ ਵਮ੍ਮਿਕਬਿਲੇ ਆਸਿਵਿਸਸ੍ਸ ਮਤ੍ਥਕੇ ਪਤਿ. ਕੁਮਾਰੋ ਅਜਾਨਨ੍ਤੋ ਬਿਲੇ ਹਤ੍ਥਂ ਪਵੇਸੇਸਿ.

ਅਥ ਨਂ ਕੁਦ੍ਧੋ ਆਸਿਵਿਸੋ ਹਤ੍ਥੇ ਡਂਸਿ. ਸੋ ਵਿਸਵੇਗੇਨ ਮੁਚ੍ਛਿਤੋ ਤਤ੍ਥੇਵ ਪਤਿ. ਅਥਸ੍ਸ ਮਾਤਾਪਿਤਰੋ ਸਪ੍ਪੇਨ ਦਟ੍ਠਭਾਵਂ ਞਤ੍ਵਾ ਕੁਮਾਰਂ ਉਕ੍ਖਿਪਿਤ੍ਵਾ ਤਾਪਸਸ੍ਸ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ‘‘ਭਨ੍ਤੇ, ਓਸਧੇਨ ਵਾ ਮਨ੍ਤੇਨ ਵਾ ਪੁਤ੍ਤਕਂ ਨੋ ਨੀਰੋਗਂ ਕਰੋਥਾ’’ਤਿ ਆਹਂਸੁ. ਸੋ ‘‘ਅਹਂ ਓਸਧਂ ਨ ਜਾਨਾਮਿ, ਨਾਹਂ ਵੇਜ੍ਜਕਮ੍ਮਂ ਕਰਿਸ੍ਸਾਮਿ, ਪਬ੍ਬਜਿਤੋਮ੍ਹੀ’’ਤਿ. ‘‘ਤੇਨ ਹਿ, ਭਨ੍ਤੇ, ਇਮਸ੍ਮਿਂ ਕੁਮਾਰਕੇ ਮੇਤ੍ਤਂ ਕਤ੍ਵਾ ਸਚ੍ਚਕਿਰਿਯਂ ਕਰੋਥਾ’’ਤਿ. ਤਾਪਸੋ ‘‘ਸਾਧੁ ਸਚ੍ਚਕਿਰਿਯਂ ਕਰਿਸ੍ਸਾਮੀ’’ਤਿ ਵਤ੍ਵਾ ਯਞ੍ਞਦਤ੍ਤਸ੍ਸ ਸੀਸੇ ਹਤ੍ਥਂ ਠਪੇਤ੍ਵਾ ਸਚ੍ਚਕਿਰਿਯਂ ਅਕਾਸਿ. ਤੇਨ ਵੁਤ੍ਤਂ ‘‘ਸਹਾਯੋ ਬ੍ਰਾਹ੍ਮਣੋ ਮਯ੍ਹ’’ਨ੍ਤਿਆਦਿ.

ਤਤ੍ਥ ਆਗਞ੍ਛੁਂ ਪਾਹੁਨਾਗਤਨ੍ਤਿ ਅਤਿਥਿਅਭਿਗਮਨਂ ਅਭਿਗਮਿਂਸੁ.

੯੭. ਵਟ੍ਟਮਨੁਕ੍ਖਿਪਨ੍ਤਿ ਖਿਪਨਵਟ੍ਟਸਣ੍ਠਾਨਤਾਯ ‘‘ਵਟ੍ਟ’’ਨ੍ਤਿ ਲਦ੍ਧਨਾਮਂ ਗੇਣ੍ਡੁਕਂ ਅਨੁਕ੍ਖਿਪਨ੍ਤੋ, ਗੇਣ੍ਡੁਕਕੀਲ਼ਂ ਕੀਲ਼ਨ੍ਤੋਤਿ ਅਤ੍ਥੋ. ਆਸਿਵਿਸਮਕੋਪਯੀਤਿ ਭੂਮਿਯਂ ਪਟਿਹਤੋ ਹੁਤ੍ਵਾ ਵਮ੍ਮਿਕਬਿਲਗਤੇਨ ਗੇਣ੍ਡੁਕੇਨ ਤਤ੍ਥ ਠਿਤਂ ਕਣ੍ਹਸਪ੍ਪਂ ਸੀਸੇ ਪਹਰਿਤ੍ਵਾ ਰੋਸੇਸਿ.

੯੮. ਵਟ੍ਟਗਤਂ ਮਗ੍ਗਂ, ਅਨ੍ਵੇਸਨ੍ਤੋਤਿ ਤੇਨ ਵਟ੍ਟੇਨ ਗਤਂ ਮਗ੍ਗਂ ਗਵੇਸਨ੍ਤੋ. ਆਸਿਵਿਸਸ੍ਸ ਹਤ੍ਥੇਨ, ਉਤ੍ਤਮਙ੍ਗਂ ਪਰਾਮਸੀਤਿ ਵਮ੍ਮਿਕਬਿਲਂ ਪਵੇਸਿਤੇਨ ਅਤ੍ਤਨੋ ਹਤ੍ਥੇਨ ਆਸੀਵਿਸਸ੍ਸ ਸੀਸਂ ਫੁਸਿ.

੯੯. ਵਿਸਬਲਸ੍ਸਿਤੋਤਿ ਵਿਸਬਲਨਿਸ੍ਸਿਤੋ ਅਤ੍ਤਨੋ ਵਿਸਵੇਗਂ ਨਿਸ੍ਸਾਯ ਉਪ੍ਪਜ੍ਜਨਕਸਪ੍ਪੋ. ਅਡਂਸਿ ਦਾਰਕਂ ਖਣੇਤਿ ਤਸ੍ਮਿਂ ਪਰਾਮਸਿਤਕ੍ਖਣੇ ਏਵ ਤਂ ਬ੍ਰਾਹ੍ਮਣਕੁਮਾਰਂ ਡਂਸਿ.

੧੦੦. ਸਹਦਟ੍ਠੋਤਿ ਡਂਸੇਨ ਸਹੇਵ, ਦਟ੍ਠਸਮਕਾਲਮੇਵ. ਆਸਿਵਿਸੇਨਾਤਿ ਘੋਰਵਿਸੇਨ. ਤੇਨਾਤਿ ਤੇਨ ਦਾਰਕਸ੍ਸ ਵਿਸਵੇਗੇਨ ਮੁਚ੍ਛਿਤਸ੍ਸ ਭੂਮਿਯਂ ਪਤਨੇਨ ਅਹਂ ਦੁਕ੍ਖਿਤੋ ਅਹੋਸਿਂ. ਮਮ ਵਾਹਸਿ ਤਂ ਦੁਕ੍ਖਨ੍ਤਿ ਤਂ ਦਾਰਕਸ੍ਸ ਮਾਤਾਪਿਤੂਨਞ੍ਚ ਦੁਕ੍ਖਂ ਮਮ ਵਾਹਸਿ, ਮਯ੍ਹਂ ਸਰੀਰੇ ਵਿਯ ਮਮ ਕਰੁਣਾਯ ਵਾਹੇਸਿ.

੧੦੧. ਤ੍ਯਾਹਨ੍ਤਿ ਤੇ ਤਸ੍ਸ ਦਾਰਕਸ੍ਸ ਮਾਤਾਪਿਤਰੋ ਅਹਂ ‘‘ਮਾ ਸੋਚਥ, ਮਾ ਪਰਿਦੇਵਥਾ’’ਤਿਆਦਿਨਾ ਨਯੇਨ ਸਮਸ੍ਸਾਸੇਤ੍ਵਾ. ਸੋਕਸਲ੍ਲਿਤੇਤਿ ਸੋਕਸਲ੍ਲਵਨ੍ਤੇ. ਅਗ੍ਗਨ੍ਤਿ ਸੇਟ੍ਠਂ ਤਤੋ ਏਵ ਵਰਂ ਉਤ੍ਤਮਂ ਸਚ੍ਚਕਿਰਿਯਂ ਅਕਾਸਿਂ.

੧੦੨. ਇਦਾਨਿ ਤਂ ਸਚ੍ਚਕਿਰਿਯਂ ਸਰੂਪੇਨ ਦਸ੍ਸੇਤੁਂ ‘‘ਸਤ੍ਤਾਹਮੇਵਾ’’ਤਿ ਗਾਥਮਾਹ.

ਤਤ੍ਥ ਸਤ੍ਤਾਹਮੇਵਾਤਿ ਪਬ੍ਬਜਿਤਦਿਵਸਤੋ ਪਟ੍ਠਾਯ ਸਤ੍ਤ ਅਹਾਨਿ ਏਵ. ਪਸਨ੍ਨਚਿਤ੍ਤੋਤਿ ਕਮ੍ਮਫਲਸਦ੍ਧਾਯ ਪਸਨ੍ਨਮਾਨਸੋ. ਪੁਞ੍ਞਤ੍ਥਿਕੋਤਿ ਪੁਞ੍ਞੇਨ ਅਤ੍ਥਿਕੋ, ਧਮ੍ਮਚ੍ਛਨ੍ਦਯੁਤ੍ਤੋ. ਅਥਾਪਰਂ ਯਂ ਚਰਿਤਨ੍ਤਿ ਅਥ ਤਸ੍ਮਾ ਸਤ੍ਤਾਹਾ ਉਤ੍ਤਰਿ ਯਂ ਮਮ ਬ੍ਰਹ੍ਮਚਰਿਯਚਰਣਂ.

੧੦੩. ਅਕਾਮਕੋਵਾਹੀਤਿ ਪਬ੍ਬਜ੍ਜਂ ਅਨਿਚ੍ਛਨ੍ਤੋ ਏਵ. ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂਤਿ ਸਚੇ ਅਤਿਰੇਕਪਞ੍ਞਾਸਵਸ੍ਸਾਨਿ ਅਨਭਿਰਤਿਵਾਸਂ ਵਸਨ੍ਤੇਨ ਮਯਾ ਕਸ੍ਸਚਿ ਅਜਾਨਾਪਿਤਭਾਵੋ ਸਚ੍ਚੋ, ਏਤੇਨ ਸਚ੍ਚੇਨ ਯਞ੍ਞਦਤ੍ਤਕੁਮਾਰਸ੍ਸ ਸੋਤ੍ਥਿ ਹੋਤੁ, ਜੀਵਿਤਂ ਪਟਿਲਭਤੂਤਿ.

ਏਵਂ ਪਨ ਮਹਾਸਤ੍ਤੇਨ ਸਚ੍ਚਕਿਰਿਯਾਯ ਕਤਾਯ ਯਞ੍ਞਦਤ੍ਤਸ੍ਸ ਸਰੀਰਤੋ ਵਿਸਂ ਭਸ੍ਸਿਤ੍ਵਾ ਪਥਵਿਂ ਪਾਵਿਸਿ. ਕੁਮਾਰੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਮਾਤਾਪਿਤਰੋ ਓਲੋਕੇਤ੍ਵਾ ‘‘ਅਮ੍ਮ, ਤਾਤਾ’’ਤਿ ਵਤ੍ਵਾ ਵੁਟ੍ਠਾਸਿ. ਤੇਨ ਵੁਤ੍ਤਂ –

੧੦੪. ‘‘ਸਹ ਸਚ੍ਚੇ ਕਤੇ ਮਯ੍ਹਂ, ਵਿਸਵੇਗੇਨ ਵੇਧਿਤੋ;

ਅਬੁਜ੍ਝਿਤ੍ਵਾਨ ਵੁਟ੍ਠਾਸਿ, ਅਰੋਗੋ ਚਾਸਿ ਮਾਣਵੋ’’ਤਿ.

ਤਸ੍ਸਤ੍ਥੋ – ਮਮ ਸਚ੍ਚਕਰਣੇਨ ਸਹ ਸਮਾਨਕਾਲਮੇਵ ਤਤੋ ਪੁਬ੍ਬੇ ਵਿਸਵੇਗੇਨ ਵੇਧਿਤੋ ਕਮ੍ਪਿਤੋ ਵਿਸਞ੍ਞਿਭਾਵੇਨ ਅਬੁਜ੍ਝਿਤ੍ਵਾ ਠਿਤੋ ਵਿਗਤਵਿਸਤ੍ਤਾ ਪਟਿਲਦ੍ਧਸਞ੍ਞੋ ਸਹਸਾ ਵੁਟ੍ਠਾਸਿ. ਸੋ ਮਾਣਵੋ ਕੁਮਾਰੋ ਵਿਸਵੇਗਾਭਾਵੇਨ ਅਰੋਗੋ ਚ ਅਹੋਸੀਤਿ.

ਇਦਾਨਿ ਸਤ੍ਥਾ ਤਸ੍ਸਾ ਅਤ੍ਤਨੋ ਸਚ੍ਚਕਿਰਿਯਾਯ ਪਰਮਤ੍ਥਪਾਰਮਿਭਾਵਂ ਦਸ੍ਸੇਨ੍ਤੋ ‘‘ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ ਆਹ. ਤਂ ਉਤ੍ਤਾਨਤ੍ਥਮੇਵ. ਜਾਤਕਟ੍ਠਕਥਾਯਂ (ਜਾ. ਅਟ੍ਠ. ੪.੧੦.੬੨) ਪਨ ‘‘ਮਹਾਸਤ੍ਤਸ੍ਸ ਸਚ੍ਚਕਿਰਿਯਾਯ ਕੁਮਾਰਸ੍ਸ ਥਨਪ੍ਪਦੇਸਤੋ ਉਦ੍ਧਂ ਵਿਸਂ ਭਸ੍ਸਿਤ੍ਵਾ ਵਿਗਤਂ. ਦਾਰਕਸ੍ਸ ਪਿਤੁ ਸਚ੍ਚਕਿਰਿਯਾਯ ਕਟਿਤੋ ਉਦ੍ਧਂ, ਮਾਤੁ ਸਚ੍ਚਕਿਰਿਯਾਯ ਅਵਸਿਟ੍ਠਸਰੀਰਤੋ ਵਿਸਂ ਭਸ੍ਸਿਤ੍ਵਾ ਵਿਗਤ’’ਨ੍ਤਿ ਆਗਤਂ. ਤਥਾ ਹਿ ਵੁਤ੍ਤਂ –

‘‘ਯਸ੍ਮਾ ਦਾਨਂ ਨਾਭਿਨਨ੍ਦਿਂ ਕਦਾਚਿ, ਦਿਸ੍ਵਾਨਹਂ ਅਤਿਥਿਂ ਵਾਸਕਾਲੇ;

ਨ ਚਾਪਿ ਮੇ ਅਪ੍ਪਿਯਤਂ ਅਵੇਦੁਂ, ਬਹੁਸ੍ਸੁਤਾ ਸਮਣਬ੍ਰਾਹ੍ਮਣਾ ਚ;

ਅਕਾਮਕੋ ਵਾਪਿ ਅਹਂ ਦਦਾਮਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ;

ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ.

‘‘ਆਸੀਵਿਸੋ ਤਾਤ ਪਹੂਤਤੇਜੋ, ਯੋ ਤਂ ਅਦਂਸੀ ਪਤਰਾ ਉਦਿਚ੍ਚ;

ਤਸ੍ਮਿਞ੍ਚ ਮੇ ਅਪ੍ਪਿਯਤਾਯ ਅਜ੍ਜ, ਪਿਤਰਿ ਚ ਤੇ ਨਤ੍ਥਿ ਕੋਚਿ ਵਿਸੇਸੋ;

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ, ਹਤਂ ਵਿਸਂ ਜੀਵਤੁ ਯਞ੍ਞਦਤ੍ਤੋ’’ਤਿ.

ਤਤ੍ਥ ਵਾਸਕਾਲੇਤਿ ਵਸਨਤ੍ਥਾਯ ਗੇਹਂ ਆਗਤਕਾਲੇ. ਨ ਚਾਪਿ ਮੇ ਅਪ੍ਪਿਯਤਂ ਅਵੇਦੁਨ੍ਤਿ ਬਹੁਸ੍ਸੁਤਾਪਿ ਸਮਣਬ੍ਰਾਹ੍ਮਣਾ ਅਯਂ ਨੇਵ ਦਾਨਂ ਅਭਿਨਨ੍ਦਤਿ, ਨ ਅਮ੍ਹੇਤਿ ਇਮਂ ਮਮ ਅਪ੍ਪਿਯਭਾਵਂ ਨੇਵ ਜਾਨਿਂਸੁ. ਅਹਞ੍ਹਿ ਤੇ ਪਿਯਚਕ੍ਖੂਹਿਯੇਵ ਓਲੋਕੇਮੀਤਿ ਦੀਪੇਤਿ. ਏਤੇਨ ਸਚ੍ਚੇਨਾਤਿ ਸਚੇ ਅਹਂ ਦਦਮਾਨੋਪਿ ਵਿਪਾਕਂ ਅਸਦ੍ਦਹਿਤ੍ਵਾ ਅਤ੍ਤਨੋ ਅਨਿਚ੍ਛਾਯ ਦੇਮਿ, ਅਨਿਚ੍ਛਭਾਵਞ੍ਚ ਮੇ ਪਰੇ ਨ ਜਾਨਨ੍ਤਿ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂਤਿ ਅਤ੍ਥੋ. ਇਤਰਗਾਥਾਯ, ਤਾਤਾਤਿ ਪੁਤ੍ਤਂ ਆਲਪਤਿ. ਪਹੂਤਤੇਜੋਤਿ ਬਲਵਵਿਸੋ. ਪਤਰਾਤਿ ਪਦਰਾ, ਅਯਮੇਵ ਵਾ ਪਾਠੋ. ਉਦਿਚ੍ਚਾਤਿ ਉਦ੍ਧਂ ਗਨ੍ਤ੍ਵਾ, ਵਮ੍ਮਿਕਬਿਲਤੋ ਉਟ੍ਠਹਿਤ੍ਵਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਤਾਤ ਯਞ੍ਞਦਤ੍ਤ, ਤਸ੍ਮਿਞ੍ਚ ਆਸਿਵਿਸੇ ਤਵ ਚ ਪਿਤਰਿ ਅਪ੍ਪਿਯਭਾਵੇਨ ਮਯ੍ਹਂ ਕੋਚਿ ਵਿਸੇਸੋ ਨਤ੍ਥਿ, ਤਞ੍ਚ ਪਨ ਅਪ੍ਪਿਯਭਾਵਂ ਠਪੇਤ੍ਵਾ ਅਜ੍ਜ ਮਯਾ ਨ ਕੋਚਿ ਜਾਨਾਪਿਤਪੁਬ੍ਬੋ, ਸਚੇ ਏਤਂ ਸਚ੍ਚਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂਤਿ.

ਏਵਂ ਬੋਧਿਸਤ੍ਤੋ ਕੁਮਾਰੇ ਅਰੋਗੇ ਜਾਤੇ ਤਸ੍ਸ ਪਿਤਰਂ ‘‘ਦਾਨਂ ਦਦਨ੍ਤੇਨ ਨਾਮ ਕਮ੍ਮਞ੍ਚ ਫਲਞ੍ਚ ਸਦ੍ਦਹਿਤ੍ਵਾ ਦਾਤਬ੍ਬ’’ਨ੍ਤਿ ਕਮ੍ਮਫਲਸਦ੍ਧਾਯ ਨਿਵੇਸੇਤ੍ਵਾ ਸਯਂ ਅਨਭਿਰਤਿਂ ਵਿਨੋਦੇਤ੍ਵਾ ਝਾਨਾਭਿਞ੍ਞਾਯੋ ਉਪ੍ਪਾਦੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨੋ ਅਹੋਸਿ.

ਤਦਾ ਮਣ੍ਡਬ੍ਯੋ ਆਨਨ੍ਦਤ੍ਥੇਰੋ ਅਹੋਸਿ, ਤਸ੍ਸ ਭਰਿਯਾ ਵਿਸਾਖਾ, ਪੁਤ੍ਤੋ ਰਾਹੁਲਤ੍ਥੇਰੋ, ਆਣਿਮਣ੍ਡਬ੍ਯੋ ਸਾਰਿਪੁਤ੍ਤਤ੍ਥੇਰੋ, ਕਣ੍ਹਦੀਪਾਯਨੋ ਲੋਕਨਾਥੋ.

ਤਸ੍ਸ ਇਧ ਪਾਲ਼ਿਯਾ ਆਰੁਲ਼੍ਹਾ ਸਚ੍ਚਪਾਰਮੀ, ਸੇਸਾ ਚ ਪਾਰਮਿਯੋ ਹੇਟ੍ਠਾ ਵੁਤ੍ਤਨਯੇਨੇਵ ਨਿਦ੍ਧਾਰੇਤਬ੍ਬਾ. ਤਥਾ ਅਨਵਸੇਸਮਹਾਭੋਗਪਰਿਚ੍ਚਾਗਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਕਣ੍ਹਦੀਪਾਯਨਚਰਿਯਾਵਣ੍ਣਨਾ ਨਿਟ੍ਠਿਤਾ.