੧੨. ਮਹਾਸੁਤਸੋਮਚਰਿਯਾਵਣ੍ਣਨਾ

੧੦੫. ਦ੍ਵਾਦਸਮੇ ਸੁਤਸੋਮੋ ਮਹੀਪਤੀਤਿ ਏਵਂਨਾਮੋ ਖਤ੍ਤਿਯੋ. ਮਹਾਸਤ੍ਤੋ ਹਿ ਤਦਾ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਕੋਰਬ੍ਯਸ੍ਸ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤਂ ਸੁਤਵਿਤ੍ਤਤਾਯ ਚਨ੍ਦਸਮਾਨਸੋਮ੍ਮਵਰਵਣ੍ਣਤਾਯ ਚ ‘‘ਸੁਤਸੋਮੋ’’ਤਿ ਸਞ੍ਜਾਨਿਂਸੁ. ਤਂ ਵਯਪ੍ਪਤ੍ਤਂ ਸਬ੍ਬਸਿਪ੍ਪਨਿਪ੍ਫਤ੍ਤਿਪ੍ਪਤ੍ਤਂ ਮਾਤਾਪਿਤਰੋ ਰਜ੍ਜੇ ਅਭਿਸਿਞ੍ਚਿਂਸੁ. ਗਹਿਤੋ ਪੋਰਿਸਾਦੇਨਾਤਿ ਪੁਰਿਸਾਨਂ ਮਨੁਸ੍ਸਾਨਂ ਅਦਨਤੋ ਖਾਦਨਤੋ ‘‘ਪੋਰਿਸਾਦੋ’’ਤਿ ਲਦ੍ਧਨਾਮੇਨ ਬਾਰਾਣਸਿਰਞ੍ਞਾ ਦੇਵਤਾਬਲਿਕਮ੍ਮਤ੍ਥਂ ਗਹਿਤੋ.

ਬਾਰਾਣਸਿਰਾਜਾ ਹਿ ਤਦਾ ਮਂਸਂ ਵਿਨਾ ਅਭੁਞ੍ਜਨ੍ਤੋ ਅਞ੍ਞਂ ਮਂਸਂ ਅਲਭਨ੍ਤੇਨ ਭਤ੍ਤਕਾਰਕੇਨ ਮਨੁਸ੍ਸਮਂਸਂ ਖਾਦਾਪਿਤੋ ਰਸਤਣ੍ਹਾਯ ਬਦ੍ਧੋ ਹੁਤ੍ਵਾ ਮਨੁਸ੍ਸੇ ਘਾਤੇਤ੍ਵਾ ਮਨੁਸ੍ਸਮਂਸਂ ਖਾਦਨ੍ਤੋ ‘‘ਪੋਰਿਸਾਦੋ’’ਤਿ ਲਦ੍ਧਨਾਮੋ ਅਮਚ੍ਚਪਾਰਿਸਜ੍ਜਪ੍ਪਮੁਖੇਹਿ ਨਾਗਰੇਹਿ ਨੇਗਮਜਾਨਪਦੇਹਿ ਚ ਉਸ੍ਸਾਹਿਤੇਨ ਕਾਲ਼ਹਤ੍ਥਿਨਾ ਨਾਮ ਅਤ੍ਤਨੋ ਸੇਨਾਪਤਿਨਾ ‘‘ਦੇਵ, ਯਦਿ ਰਜ੍ਜੇਨ ਅਤ੍ਥਿਕੋ ਮਨੁਸ੍ਸਮਂਸਖਾਦਨਤੋ ਵਿਰਮਾਹੀ’’ਤਿ ਵੁਤ੍ਤੋ ‘‘ਰਜ੍ਜਂ ਪਜਹਨ੍ਤੋਪਿ ਮਨੁਸ੍ਸਮਂਸਖਾਦਨਤੋ ਨ ਓਰਮਿਸ੍ਸਾਮੀ’’ਤਿ ਵਤ੍ਵਾ ਤੇਹਿ ਰਟ੍ਠਾ ਪਬ੍ਬਾਜਿਤੋ ਅਰਞ੍ਞਂ ਪਵਿਸਿਤ੍ਵਾ ਏਕਸ੍ਮਿਂ ਨਿਗ੍ਰੋਧਰੁਕ੍ਖਮੂਲੇ ਵਸਨ੍ਤੋ ਖਾਣੁਪ੍ਪਹਾਰੇਨ ਪਾਦੇ ਜਾਤਸ੍ਸ ਵਣਸ੍ਸ ਫਾਸੁਭਾਵਾਯ ‘‘ਸਕਲਜਮ੍ਬੁਦੀਪੇ ਏਕਸਤਖਤ੍ਤਿਯਾਨਂ ਗਲਲੋਹਿਤੇਨ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਦੇਵਤਾਯ ਆਯਾਚਨਂ ਕਤ੍ਵਾ ਸਤ੍ਤਾਹਂ ਅਨਾਹਾਰਤਾਯ ਵਣੇ ਫਾਸੁਕੇ ਜਾਤੇ ‘‘ਦੇਵਤਾਨੁਭਾਵੇਨ ਮੇ ਸੋਤ੍ਥਿ ਅਹੋਸੀ’’ਤਿ ਸਞ੍ਞਾਯ ‘‘ਦੇਵਤਾਯ ਬਲਿਕਮ੍ਮਤ੍ਥਂ ਰਾਜਾਨੋ ਆਨੇਸ੍ਸਾਮੀ’’ਤਿ ਗਚ੍ਛਨ੍ਤੋ ਅਤੀਤਭਵੇ ਸਹਾਯਭੂਤੇਨ ਯਕ੍ਖੇਨ ਸਮਾਗਨ੍ਤ੍ਵਾ ਤੇਨ ਦਿਨ੍ਨਮਨ੍ਤਬਲੇਨ ਅਧਿਕਤਰਥਾਮਜਵਪਰਕ੍ਕਮਸਸਮ੍ਪਨ੍ਨੋ ਹੁਤ੍ਵਾ ਸਤ੍ਤਾਹਬ੍ਭਨ੍ਤਰੇਯੇਵ ਸਤਰਾਜਾਨੋ ਆਨੇਤ੍ਵਾ ਅਤ੍ਤਨੋ ਵਸਨਨਿਗ੍ਰੋਧਰੁਕ੍ਖੇ ਓਲਮ੍ਬੇਤ੍ਵਾ ਬਲਿਕਮ੍ਮਕਰਣਸਜ੍ਜੋ ਅਹੋਸਿ.

ਅਥ ਤਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਤਂ ਬਲਿਕਮ੍ਮਂ ਅਨਿਚ੍ਛਨ੍ਤੀ ‘‘ਉਪਾਯੇਨ ਨਂ ਨਿਸੇਧੇਸ੍ਸਾਮੀ’’ਤਿ ਪਬ੍ਬਜਿਤਰੂਪੇਨ ਤਸ੍ਸ ਅਤ੍ਤਾਨਂ ਦਸ੍ਸੇਤ੍ਵਾ ਤੇਨ ਅਨੁਬਦ੍ਧੋ ਤਿਯੋਜਨਂ ਗਨ੍ਤ੍ਵਾ ਪੁਨ ਅਤ੍ਤਨੋ ਦਿਬ੍ਬਰੂਪਮੇਵ ਦਸ੍ਸੇਤ੍ਵਾ ‘‘ਤ੍ਵਂ ਮੁਸਾਵਾਦੀ ਤਯਾ ‘ਸਕਲਜਮ੍ਬੁਦੀਪੇ ਰਾਜਾਨੋ ਆਨੇਤ੍ਵਾ ਬਲਿਕਮ੍ਮਂ ਕਰਿਸ੍ਸਾਮੀ’ਤਿ ਪਟਿਸ੍ਸੁਤਂ. ਇਦਾਨਿ ਯੇ ਵਾ ਤੇ ਵਾ ਦੁਬ੍ਬਲਰਾਜਾਨੋ ਆਨੇਸਿ. ਜਮ੍ਬੁਦੀਪੇ ਜੇਟ੍ਠਕਂ ਸੁਤਸੋਮਰਾਜਾਨਂ ਸਚੇ ਨਾਨੇਸ੍ਸਸਿ, ਨ ਮੇ ਤੇ ਬਲਿਕਮ੍ਮੇਨ ਅਤ੍ਥੋ’’ਤਿ ਆਹ.

ਸੋ ‘‘ਦਿਟ੍ਠਾ ਮੇ ਅਤ੍ਤਨੋ ਦੇਵਤਾ’’ਤਿ ਤੁਸਿਤ੍ਵਾ ‘‘ਸਾਮਿ, ਮਾ ਚਿਨ੍ਤਯਿ, ਅਹਂ ਅਜ੍ਜੇਵ ਸੁਤਸੋਮਂ ਆਨੇਸ੍ਸਾਮੀ’’ਤਿ ਵਤ੍ਵਾ ਵੇਗੇਨ ਮਿਗਾਜਿਨਉਯ੍ਯਾਨਂ ਗਨ੍ਤ੍ਵਾ ਅਸਂਵਿਹਿਤਾਯ ਆਰਕ੍ਖਾਯ ਪੋਕ੍ਖਰਣਿਂ ਓਤਰਿਤ੍ਵਾ ਪਦੁਮਿਨਿਪਤ੍ਤੇਨ ਸੀਸਂ ਪਟਿਚ੍ਛਾਦੇਤ੍ਵਾ ਅਟ੍ਠਾਸਿ. ਤਸ੍ਮਿਂ ਅਨ੍ਤੋਉਯ੍ਯਾਨਗਤੇਯੇਵ ਬਲਵਪਚ੍ਚੂਸੇ ਸਮਨ੍ਤਾ ਤਿਯੋਜਨਂ ਆਰਕ੍ਖਂ ਗਣ੍ਹਿਂਸੁ. ਮਹਾਸਤ੍ਤੋ ਪਾਤੋਵ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੋ ਚਤੁਰਙ੍ਗਿਨਿਯਾ ਸੇਨਾਯ ਨਗਰਤੋ ਨਿਕ੍ਖਮਿ. ਤਦਾ ਤਕ੍ਕਸਿਲਤੋ ਨਨ੍ਦੋ ਨਾਮ ਬ੍ਰਾਹ੍ਮਣੋ ਚਤਸ੍ਸੋ ਸਤਾਰਹਗਾਥਾਯੋ ਗਹੇਤ੍ਵਾ ਵੀਸਯੋਜਨਸਤਂ ਮਗ੍ਗਂ ਅਤਿਕ੍ਕਮ੍ਮ ਤਂ ਨਗਰਂ ਪਤ੍ਤੋ ਰਾਜਾਨਂ ਪਾਚੀਨਦ੍ਵਾਰੇਨ ਨਿਕ੍ਖਮਨ੍ਤਂ ਦਿਸ੍ਵਾ ਹਤ੍ਥਂ ਉਕ੍ਖਿਪਿਤ੍ਵਾ ‘‘ਜਯਤੁ ਭਵਂ, ਮਹਾਰਾਜਾ’’ਤਿ ਵਤ੍ਵਾ ਜਯਾਪੇਸਿ.

ਰਾਜਾ ਹਤ੍ਥਿਨਾ ਤਂ ਉਪਸਙ੍ਕਮਿਤ੍ਵਾ ‘‘ਕੁਤੋ ਨੁ, ਤ੍ਵਂ ਬ੍ਰਾਹ੍ਮਣ, ਆਗਚ੍ਛਸਿ, ਕਿਮਿਚ੍ਛਸਿ, ਕਿਂ ਤੇ ਦਜ੍ਜ’’ਨ੍ਤਿ ਆਹ. ਬ੍ਰਾਹ੍ਮਣੋ ‘‘ਤੁਮ੍ਹੇ ‘ਸੁਤਵਿਤ੍ਤਕਾ’ਤਿ ਸੁਤ੍ਵਾ ਚਤਸ੍ਸੋ ਸਤਾਰਹਗਾਥਾਯੋ ਆਦਾਯ ਤੁਮ੍ਹਾਕਂ ਦੇਸੇਤੁਂ ਆਗਤੋਮ੍ਹੀ’’ਤਿ ਆਹ. ਮਹਾਸਤ੍ਤੋ ਤੁਟ੍ਠਮਾਨਸੋ ਹੁਤ੍ਵਾ ‘‘ਅਹਂ ਉਯ੍ਯਾਨਂ ਗਨ੍ਤ੍ਵਾ ਨ੍ਹਾਯਿਤ੍ਵਾ ਆਗਨ੍ਤ੍ਵਾ ਸੋਸ੍ਸਾਮਿ, ਤ੍ਵਂ ਮਾ ਉਕ੍ਕਣ੍ਠੀ’’ਤਿ ਵਤ੍ਵਾ ‘‘ਗਚ੍ਛਥ ਬ੍ਰਾਹ੍ਮਣਸ੍ਸ ਅਸੁਕਗੇਹੇ ਨਿਵਾਸਂ ਘਾਸਚ੍ਛਾਦਨਞ੍ਚ ਸਂਵਿਦਹਥਾ’’ਤਿ ਆਣਾਪੇਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਮਹਨ੍ਤਂ ਆਰਕ੍ਖਂ ਸਂਵਿਧਾਯ ਓਲ਼ਾਰਿਕਾਨਿ ਆਭਰਣਾਨਿ ਓਮੁਞ੍ਚਿਤ੍ਵਾ ਮਸ੍ਸੁਕਮ੍ਮਂ ਕਾਰੇਤ੍ਵਾ ਉਬ੍ਬਟ੍ਟਿਤਸਰੀਰੋ ਪੋਕ੍ਖਰਣਿਯਾ ਰਾਜਵਿਭਵੇਨ ਨ੍ਹਾਯਿਤ੍ਵਾ ਪਚ੍ਚੁਤ੍ਤਰਿਤ੍ਵਾ ਉਦਕਗ੍ਗਹਣਸਾਟਕੇ ਨਿਵਾਸੇਤ੍ਵਾ ਅਟ੍ਠਾਸਿ.

ਅਥਸ੍ਸ ਗਨ੍ਧਮਾਲਾਲਙ੍ਕਾਰੇ ਉਪਹਰਿਂਸੁ. ਪੋਰਿਸਾਦੋ ‘‘ਅਲਙ੍ਕਤਕਾਲੇ ਰਾਜਾ ਭਾਰਿਕੋ ਭਵਿਸ੍ਸਤਿ, ਸਲ੍ਲਹੁਕਕਾਲੇਯੇਵ ਨਂ ਗਣ੍ਹਿਸ੍ਸਾਮੀ’’ਤਿ ਨਦਨ੍ਤੋ ਖਗ੍ਗਂ ਪਰਿਵਤ੍ਤੇਨ੍ਤੋ ‘‘ਅਹਮਸ੍ਮਿ ਪੋਰਿਸਾਦੋ’’ਤਿ ਨਾਮਂ ਸਾਵੇਤ੍ਵਾ ਉਦਕਾ ਨਿਕ੍ਖਮਿ. ਤਸ੍ਸ ਸਦ੍ਦਂ ਸੁਤ੍ਵਾ ਹਤ੍ਥਾਰੋਹਾਦਯੋ ਹਤ੍ਥਿਆਦਿਤੋ ਭਸ੍ਸਿਂਸੁ. ਬਲਕਾਯੋ ਦੂਰੇ ਠਿਤੋ ਤਤੋਵ ਪਲਾਯਿ. ਇਤਰੋ ਅਤ੍ਤਨੋ ਆਵੁਧਾਨਿ ਛਡ੍ਡੇਤ੍ਵਾ ਉਰੇਨ ਨਿਪਜ੍ਜਿ. ਪੋਰਿਸਾਦੋ ਰਾਜਾਨਂ ਉਕ੍ਖਿਪਿਤ੍ਵਾ ਖਨ੍ਧੇ ਨਿਸੀਦਾਪੇਤ੍ਵਾ ਸਮ੍ਮੁਖਟ੍ਠਾਨੇਯੇਵ ਅਟ੍ਠਾਰਸਹਤ੍ਥਂ ਪਾਕਾਰਂ ਲਙ੍ਘਿਤ੍ਵਾ ਪੁਰਤੋ ਪਗਲਿਤਮਦਮਤ੍ਤਵਰਵਾਰਣੇ ਕੁਮ੍ਭੇ ਅਕ੍ਕਮਿਤ੍ਵਾ ਪਬ੍ਬਤਕੂਟਾਨਿ ਵਿਯ ਪਾਤੇਨ੍ਤੋ ਵਾਤਜਵਾਨਿਪਿ ਅਸ੍ਸਰਤਨਾਨਿ ਪਿਟ੍ਠਿਯਂ ਅਕ੍ਕਮਿਤ੍ਵਾ ਪਾਤੇਨ੍ਤੋ ਰਥਸੀਸੇ ਅਕ੍ਕਮਿਤ੍ਵਾ ਪਾਤੇਨ੍ਤੋ ਭਮਰਿਕਂ ਭਮਨ੍ਤੋ ਵਿਯ ਨੀਲਕਾਨਿ ਨਿਗ੍ਰੋਧਪਤ੍ਤਾਨਿ ਮਦ੍ਦਨ੍ਤੋ ਵਿਯ ਏਕਵੇਗੇਨੇਵ ਤਿਯੋਜਨਮਗ੍ਗਂ ਗਨ੍ਤ੍ਵਾ ਕਞ੍ਚਿ ਅਨੁਬਨ੍ਧਨ੍ਤਂ ਅਦਿਸ੍ਵਾ ਸਣਿਕਂ ਗਚ੍ਛਨ੍ਤੋ ਸੁਤਸੋਮਸ੍ਸ ਕੇਸੇਹਿ ਉਦਕਬਿਨ੍ਦੂਨਿ ਅਤ੍ਤਨੋ ਉਪਰਿ ਪਤਨ੍ਤਾਨਿ ‘‘ਅਸ੍ਸੁਬਿਨ੍ਦੂਨੀ’’ਤਿ ਸਞ੍ਞਾਯ ‘‘ਕਿਮਿਦਂ ਸੁਤਸੋਮੋਪਿ ਮਰਣਂ ਅਨੁਸੋਚਨ੍ਤੋ ਰੋਦਤੀ’’ਤਿ ਆਹ.

ਮਹਾਸਤ੍ਤੋ ‘‘ਨਾਹਂ ਮਰਣਤੋ ਅਨੁਸੋਚਾਮਿ, ਕੁਤੋ ਰੋਦਨਾ, ਅਪਿ ਚ ਖੋ ਸਙ੍ਗਰਂ ਕਤ੍ਵਾ ਸਚ੍ਚਾਪਨਂ ਨਾਮ ਪਣ੍ਡਿਤਾਨਂ ਆਚਿਣ੍ਣਂ, ਤਂ ਨ ਨਿਪ੍ਫਜ੍ਜਤੀ’’ਤਿ ਅਨੁਸੋਚਾਮਿ. ਕਸ੍ਸਪਦਸਬਲੇਨ ਦੇਸਿਤਾ ਚਤਸ੍ਸੋ ਸਤਾਰਹਗਾਥਾਯੋ ਆਦਾਯ ਤਕ੍ਕਸਿਲਤੋ ਆਗਤਸ੍ਸ ਬ੍ਰਾਹ੍ਮਣਸ੍ਸ ਆਗਨ੍ਤੁਕਵਤ੍ਤਂ ਕਾਰੇਤ੍ਵਾ ‘‘ਨ੍ਹਾਯਿਤ੍ਵਾ ਆਗਨ੍ਤ੍ਵਾ ਸੁਣਿਸ੍ਸਾਮਿ, ਯਾਵ ਮਮਾਗਮਨਾ ਆਗਮੇਹੀ’’ਤਿ ਸਙ੍ਗਰਂ ਕਤ੍ਵਾ ਉਯ੍ਯਾਨਂ ਗਤੋ, ਤ੍ਵਞ੍ਚ ਤਾ ਗਾਥਾਯੋ ਸੋਤੁਂ ਅਦਤ੍ਵਾ ਮਂ ਗਣ੍ਹੀਤਿ. ਤੇਨ ਵੁਤ੍ਤਂ –

‘‘ਗਹਿਤੋ ਪੋਰਿਸਾਦੇਨ, ਬ੍ਰਾਹ੍ਮਣੇ ਸਙ੍ਗਰਂ ਸਰਿ’’ਨ੍ਤਿ.

ਤਤ੍ਥ ਬ੍ਰਾਹ੍ਮਣੇ ਸਙ੍ਗਰਂ ਸਰਿਨ੍ਤਿ ਨਨ੍ਦਬ੍ਰਾਹ੍ਮਣੇ ਅਤ੍ਤਨਾ ਕਤਂ ਪਟਿਞ੍ਞਂ ਅਨੁਸ੍ਸਰਿਂ.

੧੦੬. ਆਵੁਣਿਤ੍ਵਾ ਕਰਤ੍ਤਲੇਤਿ ਤਤ੍ਥ ਤਤ੍ਥ ਉਯ੍ਯਾਨਾਦੀਸੁ ਗਨ੍ਤ੍ਵਾ ਅਤ੍ਤਨੋ ਬਲੇਨ ਆਨੀਤਾਨਂ ਏਕਸਤਖਤ੍ਤਿਯਾਨਂ ਹਤ੍ਥਤਲੇ ਛਿਦ੍ਦਂ ਕਤ੍ਵਾ ਰੁਕ੍ਖੇ ਲਮ੍ਬਨਤ੍ਥਂ ਰਜ੍ਜੁਂ ਪਟਿਮੁਞ੍ਚਿਤ੍ਵਾ. ਏਤੇਸਂ ਪਮਿਲਾਪੇਤ੍ਵਾਤਿ ਏਤੇ ਏਕਸਤਖਤ੍ਤਿਯੇ ਜੀਵਗ੍ਗਾਹਂ ਗਹੇਤ੍ਵਾ ਉਦ੍ਧਂਪਾਦੇ ਅਧੋਸਿਰੇ ਕਤ੍ਵਾ ਪਣ੍ਹਿਯਾ ਸੀਸਂ ਪਹਰਨ੍ਤੋ ਭਮਣਵਸੇਨ ਹਤ੍ਥਤਲੇ ਆਵੁਣਿਤ੍ਵਾ ਰੁਕ੍ਖੇ ਆਲਮ੍ਬਨਵਸੇਨ ਸਬ੍ਬਸੋ ਆਹਾਰੂਪਚ੍ਛੇਦੇਨ ਚ ਸਬ੍ਬਥਾ ਪਮਿਲਾਪੇਤ੍ਵਾ ਵਿਸੋਸੇਤ੍ਵਾ ਖੇਦਾਪੇਤ੍ਵਾਤਿ ਅਤ੍ਥੋ. ਯਞ੍ਞਤ੍ਥੇਤਿ ਬਲਿਕਮ੍ਮਤ੍ਥੇ ਸਾਧੇਤਬ੍ਬੇ. ਉਪਨਯੀ ਮਮਨ੍ਤਿ ਮਂ ਉਪਨੇਸਿ.

੧੦੭. ਤਥਾ ਉਪਨੀਯਮਾਨੋ ਪਨ ਮਹਾਸਤ੍ਤੋ ਪੋਰਿਸਾਦੇਨ ‘‘ਕਿਂ ਤ੍ਵਂ ਮਰਣਤੋ ਭਾਯਸੀ’’ਤਿ ਵੁਤ੍ਤੇ ‘‘ਨਾਹਂ ਮਰਣਤੋ ਭਾਯਾਮਿ, ਤਸ੍ਸ ਪਨ ਬ੍ਰਾਹ੍ਮਣਸ੍ਸ ਮਯਾ ਕਤੋ ਸਙ੍ਗਰੋ ਨ ਪਰਿਮੋਚਿਤੋ’’ਤਿ ਅਨੁਸੋਚਾਮਿ. ‘‘ਸਚੇ ਮਂ ਵਿਸ੍ਸਜ੍ਜੇਸ੍ਸਸਿ, ਤਂ ਧਮ੍ਮਂ ਸੁਤ੍ਵਾ ਤਸ੍ਸ ਚ ਸਕ੍ਕਾਰਸਮ੍ਮਾਨਂ ਕਤ੍ਵਾ ਪੁਨ ਆਗਮਿਸ੍ਸਾਮੀ’’ਤਿ. ‘‘ਨਾਹਮਿਦਂ ਸਦ੍ਦਹਾਮਿ, ਯਂ ਤ੍ਵਂ ਮਯਾ ਵਿਸ੍ਸਜ੍ਜਿਤੋ ਗਨ੍ਤ੍ਵਾ ਪੁਨ ਮਮ ਹਤ੍ਥਂ ਆਗਮਿਸ੍ਸਾਸੀ’’ਤਿ. ‘‘ਸਮ੍ਮ ਪੋਰਿਸਾਦ, ਮਯਾ ਸਦ੍ਧਿਂ ਏਕਾਚਰਿਯਕੁਲੇ ਸਿਕ੍ਖਿਤੋ ਸਹਾਯੋ ਹੁਤ੍ਵਾ ‘ਅਹਂ ਜੀਵਿਤਹੇਤੁਪਿ ਨ ਮੁਸਾ ਕਥੇਮੀ’ਤਿ ਕਿਂ ਨ ਸਦ੍ਦਹਸੀ’’ਤਿ? ਕਿਞ੍ਚਾਪਿ ਮੇ ਏਤੇਨ ਵਾਚਾਮਤ੍ਤਕੇਨ –

‘‘ਅਸਿਞ੍ਚ ਸਤ੍ਤਿਞ੍ਚ ਪਰਾਮਸਾਮਿ, ਸਪਥਮ੍ਪਿ ਤੇ ਸਮ੍ਮ ਅਹਂ ਕਰੋਮਿ;

ਤਯਾ ਪਮੁਤ੍ਤੋ ਅਨਣੋ ਭਵਿਤ੍ਵਾ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸ’’ਨ੍ਤਿ. (ਜਾ. ੨.੨੧.੪੦੭) –

ਮਹਾਸਤ੍ਤੇਨ ਇਮਾਯ ਗਾਥਾਯ ਵੁਤ੍ਤਾਯ ਪੋਰਿਸਾਦੋ ‘‘ਅਯਂ ਸੁਤਸੋਮੋ ‘ਖਤ੍ਤਿਯੇਹਿ ਅਕਤ੍ਤਬ੍ਬਂ ਸਪਥਂ ਕਰੋਮੀ’ਤਿ ਵਦਤਿ, ਗਨ੍ਤ੍ਵਾ ਅਨਾਗਚ੍ਛਨ੍ਤੋਪਿ ਮਮ ਹਤ੍ਥਤੋ ਨ ਮੁਚ੍ਚਿਸ੍ਸਤੀ’’ਤਿ ਚਿਨ੍ਤੇਤ੍ਵਾ –

‘‘ਯੋ ਤੇ ਕਤੋ ਸਙ੍ਗਰੋ ਬ੍ਰਾਹ੍ਮਣੇਨ, ਰਟ੍ਠੇ ਸਕੇ ਇਸ੍ਸਰਿਯੇ ਠਿਤੇਨ;

ਤਂ ਸਙ੍ਗਰਂ ਬ੍ਰਾਹ੍ਮਣ ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੂ’’ਤਿ. (ਜਾ. ੨.੨੧.੪੦੮) –

ਵਿਸ੍ਸਜ੍ਜੇਸਿ.

ਮਹਾਸਤ੍ਤੋ ਰਾਹੁਮੁਖਾ ਮੁਤ੍ਤੋ ਚਨ੍ਦੋ ਵਿਯ ਨਾਗਬਲੋ ਥਾਮਸਮ੍ਪਨ੍ਨੋ ਖਿਪ੍ਪਮੇਵ ਤਂ ਨਗਰਂ ਸਮ੍ਪਾਪੁਣਿ. ਸੇਨਾਪਿਸ੍ਸ ‘‘ਸੁਤਸੋਮਰਾਜਾ ਪਣ੍ਡਿਤੋ, ਪੋਰਿਸਾਦਂ ਦਮੇਤ੍ਵਾ ਸੀਹਮੁਖਾ ਪਮੁਤ੍ਤਮਤ੍ਤਵਰਵਾਰਣੋ ਵਿਯ ਆਗਮਿਸ੍ਸਤੀ’’ਤਿ ਚ ‘‘ਰਾਜਾਨਂ ਪੋਰਿਸਾਦਸ੍ਸ ਦਤ੍ਵਾ ਆਗਤਾ’’ਤਿ ਗਰਹਭਯੇਨ ਚ ਬਹਿਨਗਰੇਯੇਵ ਨਿਵਿਟ੍ਠਾ ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਚ੍ਚਿਤ੍ਥ, ਮਹਾਰਾਜ, ਪੋਰਿਸਾਦੇਨ ਨ ਕਿਲਮਿਤੋ’’ਤਿ ਪਟਿਸਨ੍ਥਾਰਂ ਕਤ੍ਵਾ ‘‘ਪੋਰਿਸਾਦੇਨ ਮਯ੍ਹਂ ਮਾਤਾਪਿਤੂਹਿਪਿ ਦੁਕ੍ਕਰਂ ਕਤਂ, ਤਥਾਰੂਪੋ ਨਾਮ ਚਣ੍ਡੋ ਸਾਹਸਿਕੋ ਮਮਂ ਸਦ੍ਦਹਿਤ੍ਵਾ ਮਂ ਵਿਸ੍ਸਜ੍ਜੇਸੀ’’ਤਿ ਵੁਤ੍ਤੇ ਰਾਜਾਨਂ ਅਲਙ੍ਕਰਿਤ੍ਵਾ ਹਤ੍ਥਿਕ੍ਖਨ੍ਧਂ ਆਰੋਪੇਤ੍ਵਾ ਪਰਿਵਾਰੇਤ੍ਵਾ ਨਗਰਂ ਪਾਵਿਸਿ. ਤਂ ਦਿਸ੍ਵਾ ਸਬ੍ਬੇ ਨਾਗਰਾ ਤੁਸਿਂਸੁ.

ਸੋਪਿ ਧਮ੍ਮਸੋਣ੍ਡਤਾਯ ਮਾਤਾਪਿਤਰੋਪਿ ਅਨੁਪਸਙ੍ਕਮਿਤ੍ਵਾ ਨਿਵੇਸਨਂ ਗਨ੍ਤ੍ਵਾ ਬ੍ਰਾਹ੍ਮਣਂ ਪਕ੍ਕੋਸਾਪੇਤ੍ਵਾ ਤਸ੍ਸ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਧਮ੍ਮਗਰੁਤਾਯ ਸਯਂ ਨੀਚਾਸਨੇ ਨਿਸੀਦਿਤ੍ਵਾ ‘‘ਤੁਮ੍ਹੇਹਿ ਮਯ੍ਹਂ ਆਭਤਾ ਸਤਾਰਹਗਾਥਾ ਸੁਣੋਮਿ ਆਚਰਿਯਾ’’ਤਿ ਆਹ. ਬ੍ਰਾਹ੍ਮਣੋ ਮਹਾਸਤ੍ਤੇਨ ਯਾਚਿਤਕਾਲੇ ਗਨ੍ਧੇਹਿ ਹਤ੍ਥੇ ਉਬ੍ਬਟ੍ਟੇਤ੍ਵਾ ਪਸਿਬ੍ਬਕਤੋ ਮਨੋਰਮਂ ਪੋਤ੍ਥਕਂ ਨੀਹਰਿਤ੍ਵਾ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ‘‘ਤੇਨ ਹਿ, ਮਹਾਰਾਜ, ਸੁਣੋਹੀ’’ਤਿ ਪੋਤ੍ਥਕਂ ਵਾਚੇਨ੍ਤੋ ਗਾਥਾ ਅਭਾਸਿ –

‘‘ਸਕਿਦੇਵ ਸੁਤਸੋਮ, ਸਬ੍ਭਿ ਹੋਤਿ ਸਮਾਗਮੋ;

ਸਾ ਨਂ ਸਙ੍ਗਤਿ ਪਾਲੇਤਿ, ਨਾਸਬ੍ਭਿ ਬਹੁਸਙ੍ਗਮੋ.

‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਂ ਸਦ੍ਧਮ੍ਮਮਞ੍ਞਾਯ, ਸੇਯ੍ਯੋ ਹੋਤਿ ਨ ਪਾਪਿਯੋ.

‘‘ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

‘‘ਨਭਞ੍ਚ ਦੂਰੇ ਪਥਵੀ ਚ ਦੂਰੇ, ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;

ਤਤੋ ਹਵੇ ਦੂਰਤਰਂ ਵਦਨ੍ਤਿ, ਸਤਞ੍ਚ ਧਮ੍ਮੋ ਅਸਤਞ੍ਚ ਰਾਜਾ’’ਤਿ. (ਜਾ. ੨.੨੧.੪੧੧-੪੧੪, ੪੪੫-੪੪੮);

ਤਾ ਸੁਤ੍ਵਾ ਮਹਾਸਤ੍ਤੋ ‘‘ਸਫਲਂ ਮੇ ਆਗਮਨ’’ਨ੍ਤਿ ਤੁਟ੍ਠਚਿਤ੍ਤੋ ‘‘ਇਮਾ ਗਾਥਾ ਨੇਵ ਸਾਵਕਭਾਸਿਤਾ, ਨ ਇਸਿਭਾਸਿਤਾ, ਨ ਕਵਿਭਾਸਿਤਾ, ਨ ਦੇਵਭਾਸਿਤਾ, ਸਬ੍ਬਞ੍ਞੁਨਾਵ ਭਾਸਿਤਾ. ਕਿਂ ਨੁ ਖੋ ਅਗ੍ਘ’’ਨ੍ਤਿ ਚਿਨ੍ਤੇਨ੍ਤੋ ‘‘ਇਮਂ ਸਕਲਮ੍ਪਿ ਚਕ੍ਕਵਾਲ਼ਂ ਯਾਵ ਬ੍ਰਹ੍ਮਲੋਕਾ ਸਤ੍ਤਰਤਨਪੁਣ੍ਣਂ ਕਤ੍ਵਾ ਦਿਨ੍ਨੇਪਿ ਨੇਵ ਅਨੁਚ੍ਛਵਿਕਂ ਕਤਂ ਨਾਮ ਹੋਤਿ, ਅਹਂ ਖੋ ਪਨਸ੍ਸ ਤਿਯੋਜਨਸਤਿਕੇ ਕੁਰੁਰਟ੍ਠੇ ਸਤ੍ਤਯੋਜਨਿਕੇ ਇਨ੍ਦਪਤ੍ਥਨਗਰੇ ਰਜ੍ਜਂ ਦਾਤੁਂ ਪਹੋਮਿ. ਰਜ੍ਜਂ ਕਾਤੁਂ ਪਨਸ੍ਸ ਭਾਗ੍ਯਂ ਨਤ੍ਥਿ, ਤਥਾ ਹਿਸ੍ਸ ਅਙ੍ਗਲਕ੍ਖਣਾਨੁਸਾਰੇਨ ਅਪ੍ਪਾਨੁਭਾਵਤਾ ਦਿਸ੍ਸਤਿ, ਤਸ੍ਮਾ ਦਿਨ੍ਨਮ੍ਪਿ ਰਜ੍ਜਂ ਨ ਇਮਸ੍ਮਿਂ ਤਿਟ੍ਠਤੀ’’ਤਿ ਚਿਨ੍ਤੇਤ੍ਵਾ ‘‘ਆਚਰਿਯ, ਤੁਮ੍ਹੇ ਅਞ੍ਞੇਸਂ ਖਤ੍ਤਿਯਾਨਂ ਇਮਾ ਗਾਥਾਯੋ ਦੇਸੇਤ੍ਵਾ ਕਿਂ ਲਭਥਾ’’ਤਿ ਪੁਚ੍ਛਿ. ‘‘ਏਕੇਕਾਯ ਸਤਂ ਸਤਂ, ਮਹਾਰਾਜ, ਤੇਨੇਵ ਸਤਾਰਹਗਾਥਾ ਨਾਮ ਜਾਤਾ’’ਤਿ. ਅਥਸ੍ਸ ਮਹਾਸਤ੍ਤੋ ‘‘ਤ੍ਵਂ ਆਚਰਿਯ, ਅਤ੍ਤਨਾ ਗਹੇਤ੍ਵਾ ਵਿਚਰਣਭਣ੍ਡਸ੍ਸ ਅਗ੍ਘਂ ਨ ਜਾਨਾਸੀ’’ਤਿ.

‘‘ਸਹਸ੍ਸਿਯਾ ਇਮਾ ਗਾਥਾ, ਨਯਿਮਾ ਗਾਥਾ ਸਤਾਰਹਾ;

ਚਤ੍ਤਾਰਿ ਤ੍ਵਂ ਸਹਸ੍ਸਾਨਿ, ਖਿਪ੍ਪਂ ਗਣ੍ਹਾਹਿ ਬ੍ਰਾਹ੍ਮਣਾ’’ਤਿ. (ਜਾ. ੨.੨੧.੪੧੫);

ਚਤ੍ਤਾਰਿ ਸਹਸ੍ਸਾਨਿ ਦਾਪੇਤ੍ਵਾ ਏਕਞ੍ਚ ਸੁਖਯਾਨਕਂ ਦਤ੍ਵਾ ਮਹਤਾ ਸਕ੍ਕਾਰਸਮ੍ਮਾਨੇਨੇਵ ਤਂ ਉਯ੍ਯੋਜੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ‘‘ਅਹਂ ਬ੍ਰਾਹ੍ਮਣੇਨ ਆਭਤਂ ਸਦ੍ਧਮ੍ਮਰਤਨਂ ਪੂਜੇਤ੍ਵਾ ਤਸ੍ਸ ਚ ਸਕ੍ਕਾਰਸਮ੍ਮਾਨਂ ਕਤ੍ਵਾ ਆਗਮਿਸ੍ਸਾਮੀਤਿ ਪੋਰਿਸਾਦਸ੍ਸ ਪਟਿਞ੍ਞਂ ਦਤ੍ਵਾ ਆਗਤੋ. ਤਤ੍ਥ ਯਂ ਬ੍ਰਾਹ੍ਮਣਸ੍ਸ ਕਤ੍ਤਬ੍ਬਂ ਪਟਿਪਜ੍ਜਿਤਬ੍ਬਂ ਤਂ ਕਤਂ, ਇਦਾਨਿ ਪੋਰਿਸਾਦਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਵੁਤ੍ਵਾ ‘‘ਤੇਨ ਹਿ, ਤਾਤ ਸੁਤਸੋਮ, ਕਿਂ ਨਾਮੇਤਂ ਕਥੇਸਿ, ਚਤੁਰਙ੍ਗਿਨਿਯਾ ਸੇਨਾਯ ਚੋਰਂ ਗਣ੍ਹਿਸ੍ਸਾਮ, ਮਾ ਗਚ੍ਛ ਚੋਰਸ੍ਸ ਸਨ੍ਤਿਕ’’ਨ੍ਤਿ ਯਾਚਿਂਸੁ. ਸੋਲ਼ਸਸਹਸ੍ਸਾ ਨਾਟਕਿਤ੍ਥਿਯੋ ਸੇਸਪਰਿਜਨਾਪਿ ‘‘ਅਮ੍ਹੇ ਅਨਾਥੇ ਕਤ੍ਵਾ ਕੁਹਿਂ ਗਚ੍ਛਸਿ ਦੇਵਾ’’ਤਿ ਪਰਿਦੇਵਿਂਸੁ. ‘‘ਪੁਨਪਿ ਕਿਰ ਰਾਜਾ ਚੋਰਸ੍ਸ ਸਨ੍ਤਿਕਂ ਗਮਿਸ੍ਸਤੀ’’ਤਿ ਏਕਕੋਲਾਹਲਂ ਅਹੋਸਿ.

ਮਹਾਸਤ੍ਤੋ ‘‘ਪਟਿਞ੍ਞਾਯ ਸਚ੍ਚਾਪਨਂ ਨਾਮ ਸਾਧੂਨਂ ਸਪ੍ਪੁਰਿਸਾਨਂ ਆਚਿਣ੍ਣਂ, ਸੋਪਿ ਮਮਂ ਸਦ੍ਦਹਿਤ੍ਵਾ ਵਿਸ੍ਸਜ੍ਜੇਸਿ, ਤਸ੍ਮਾ ਗਮਿਸ੍ਸਾਮਿਯੇਵਾ’’ਤਿ ਮਾਤਾਪਿਤਰੋ ਵਨ੍ਦਿਤ੍ਵਾ ਸੇਸਜਨਂ ਅਨੁਸਾਸੇਤ੍ਵਾ ਅਸ੍ਸੁਮੁਖੇਨ ਨਾਨਪ੍ਪਕਾਰਂ ਪਰਿਦੇਵਨ੍ਤੇਨ ਇਤ੍ਥਾਗਾਰਾਦਿਨਾ ਜਨੇਨ ਅਨੁਗਤੋ ਨਗਰਾ ਨਿਕ੍ਖਮ੍ਮ ਤਂ ਜਨਂ ਨਿਵਤ੍ਤੇਤੁਂ ਮਗ੍ਗੇ ਦਣ੍ਡਕੇਨ ਤਿਰਿਯਂ ਲੇਖਂ ਕਤ੍ਵਾ ‘‘ਇਮਂ ਮਮ ਲੇਖਂ ਮਾ ਅਤਿਕ੍ਕਮਿਂਸੂ’’ਤਿ ਵਤ੍ਵਾ ਅਗਮਾਸਿ. ਮਹਾਜਨੋ ਤੇਜਵਤੋ ਮਹਾਸਤ੍ਤਸ੍ਸ ਆਣਂ ਅਤਿਕ੍ਕਮਿਤੁਂ ਅਸਕ੍ਕੋਨ੍ਤੋ ਮਹਾਸਦ੍ਦੇਨ ਕਨ੍ਦਿਤ੍ਵਾ ਰੋਦਿਤ੍ਵਾ ਨਿਵਤ੍ਤਿ. ਬੋਧਿਸਤ੍ਤੋ ਆਗਤਮਗ੍ਗੇਨੇਵ ਤਸ੍ਸ ਸਨ੍ਤਿਕਂ ਅਗਮਾਸਿ. ਤੇਨ ਵੁਤ੍ਤਂ ‘‘ਅਪੁਚ੍ਛਿ ਮਂ ਪੋਰਿਸਾਦੋ’’ਤਿਆਦਿ.

ਤਤ੍ਥ ਕਿਂ ਤ੍ਵਂ ਇਚ੍ਛਸਿ ਨਿਸਜ੍ਜਨ੍ਤਿ ਤ੍ਵਂ ਅਤ੍ਤਨੋ ਨਗਰਂ ਗਨ੍ਤੁਂ ਮਮ ਹਤ੍ਥਤੋ ਨਿਸ੍ਸਜ੍ਜਨਂ ਕਿਂ ਇਚ੍ਛਸਿ, ਤ੍ਵਂ ‘‘ਮਯਾ ਤਕ੍ਕਸਿਲਾਦੀਸੁ ਚਿਰਪਰਿਚਿਤੋ ਸਚ੍ਚਵਾਦੀ ਚਾ’’ਤਿ ਵਦਸਿ, ਤਸ੍ਮਾ ਯਥਾ ਮਤਿ ਤੇ ਕਾਹਾਮਿ, ਯਥਾਰੁਚਿ ਤੇ ਕਰਿਸ੍ਸਾਮਿ. ਯਦਿ ਮੇ ਤ੍ਵਂ ਪੁਨੇਹਿਸੀਤਿ ਸਚੇ ਪੁਨ ਤ੍ਵਂ ਏਕਂਸੇਨੇਵ ਮਮ ਸਨ੍ਤਿਕਂ ਆਗਮਿਸ੍ਸਸਿ.

੧੦੮. ਪਣ੍ਹੇ ਆਗਮਨਂ ਮਮਾਤਿ ਪਗੇਵ ਮਮ ਆਗਮਨਂ ਤਸ੍ਸ ਪੋਰਿਸਾਦਸ੍ਸ ਪਟਿਸ੍ਸੁਣਿਤ੍ਵਾ ਪਾਤੋਵ ਆਗਮਿਸ੍ਸਾਮੀਤਿ ਪਟਿਸ੍ਸਵਂ ਕਤ੍ਵਾ. ਰਜ੍ਜਂ ਨਿਯ੍ਯਾਤਯਿਂ ਤਦਾਤਿ ਤਦਾ ਪੋਰਿਸਾਦਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ‘‘ਇਦਂ ਵੋ ਰਜ੍ਜਂ ਪਟਿਪਜ੍ਜਥਾ’’ਤਿ ਮਾਤਾਪਿਤੂਨਂ ਤਿਯੋਜਨਸਤਿਕਂ ਰਜ੍ਜਂ ਨਿਯ੍ਯਾਤੇਸਿਂ.

੧੦੯. ਕਸ੍ਮਾ ਪਨ ਰਜ੍ਜਂ ਨਿਯ੍ਯਾਤਯਿਨ੍ਤਿ? ਅਨੁਸ੍ਸਰਿਤ੍ਵਾ ਸਤਂ ਧਮ੍ਮਨ੍ਤਿ ਯਸ੍ਮਾ ਪਨ ਪਟਿਞ੍ਞਾਯ ਸਚ੍ਚਾਪਨਂ ਨਾਮ ਸਤਂ ਸਾਧੂਨਂ ਮਹਾਬੋਧਿਸਤ੍ਤਾਨਂ ਪਵੇਣੀ ਕੁਲਵਂਸੋ, ਤਸ੍ਮਾ ਤਂ ਸਚ੍ਚਪਾਰਮਿਤਾਧਮ੍ਮਂ ਪੁਬ੍ਬਕਂ ਪੋਰਾਣਂ ਜਿਨੇਹਿ ਬੁਦ੍ਧਾਦੀਹਿ ਸੇਵਿਤਂ ਅਨੁਸ੍ਸਰਿਤ੍ਵਾ ਸਚ੍ਚਂ ਅਨੁਰਕ੍ਖਨ੍ਤੋ ਤਸ੍ਸ ਬ੍ਰਾਹ੍ਮਣਸ੍ਸ ਧਨਂ ਦਤ੍ਵਾ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਪੋਰਿਸਾਦਂ ਉਪਾਗਮਿਂ.

੧੧੦. ਨਤ੍ਥਿ ਮੇ ਸਂਸਯੋ ਤਤ੍ਥਾਤਿ ਤਸ੍ਮਿਂ ਪੋਰਿਸਾਦਸ੍ਸ ਸਨ੍ਤਿਕਂ ਗਮਨੇ ‘‘ਅਯਂ ਮਂ ਕਿਂ ਨੁ ਖੋ ਘਾਤੇਸ੍ਸਤਿ, ਉਦਾਹੁ ਨੋ’’ਤਿ ਮਯ੍ਹਂ ਸਂਸਯੋ ਨਤ੍ਥਿ. ‘‘ਚਣ੍ਡੋ ਸਾਹਸਿਕੋ ਮਯਾ ਸਦ੍ਧਿਂ ਏਕਸਤਖਤ੍ਤਿਯੇ ਦੇਵਤਾਯ ਬਲਿਕਮ੍ਮਕਰਣਸਜ੍ਜੋ ਏਕਨ੍ਤੇਨੇਵ ਘਾਤੇਸ੍ਸਤੀ’’ਤਿ ਜਾਨਨ੍ਤੋ ਏਵ ਕੇਵਲਂ ਸਚ੍ਚਵਾਚਂ ਅਨੁਰਕ੍ਖਨ੍ਤੋ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਤਂ ਉਪਾਗਮਿਂ. ਯਸ੍ਮਾ ਚੇਤਦੇਵਂ, ਤਸ੍ਮਾ ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਪਰਮਤ੍ਥਭਾਵਪ੍ਪਤ੍ਤਾ ਸਚ੍ਚਪਾਰਮੀਤਿ.

ਉਪਾਗਤੇ ਪਨ ਮਹਾਸਤ੍ਤੇ ਵਿਕਸਿਤਪੁਣ੍ਡਰੀਕਪਦੁਮਸਸ੍ਸਿਰਿਕਮਸ੍ਸ ਮੁਖਂ ਦਿਸ੍ਵਾ ‘‘ਅਯਂ ਵਿਗਤਮਰਣਭਯੋ ਹੁਤ੍ਵਾ ਆਗਤੋ, ਕਿਸ੍ਸ ਨੁ ਖੋ ਏਸ ਆਨੁਭਾਵੋ’’ਤਿ ਚਿਨ੍ਤੇਨ੍ਤੋ ‘‘ਤਸ੍ਸ ਮਞ੍ਞੇ ਧਮ੍ਮਸ੍ਸ ਸੁਤਤ੍ਤਾ ਅਯਂ ਏਵਂ ਤੇਜਵਾ ਨਿਬ੍ਭਯੋ ਚ ਜਾਤੋ, ਅਹਮ੍ਪਿ ਤਂ ਸੁਤ੍ਵਾ ਤੇਜਵਾ ਨਿਬ੍ਭਯੋ ਚ ਭਵਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਪੋਰਿਸਾਦੋ ਮਹਾਸਤ੍ਤਂ ਆਹ – ‘‘ਸੁਣੋਮ ਸਤਾਰਹਗਾਥਾਯੋ ਯਾਸਂ ਸਵਨਤ੍ਥਂ ਤ੍ਵਂ ਅਤ੍ਤਨੋ ਨਗਰਂ ਗਤੋ’’ਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਅਯਂ ਪੋਰਿਸਾਦੋ ਪਾਪਧਮ੍ਮੋ, ਇਮਂ ਥੋਕਂ ਨਿਗ੍ਗਹੇਤ੍ਵਾ ਲਜ੍ਜਾਪੇਤ੍ਵਾ ਕਥੇਸ੍ਸਾਮੀ’’ਤਿ –

‘‘ਅਧਮ੍ਮਿਕਸ੍ਸ ਲੁਦ੍ਦਸ੍ਸ, ਨਿਚ੍ਚਂ ਲੋਹਿਤਪਾਣਿਨੋ;

ਨਤ੍ਥਿ ਸਚ੍ਚਂ ਕੁਤੋ ਧਮ੍ਮੋ, ਕਿਂ ਸੁਤੇਨ ਕਰਿਸ੍ਸਸੀ’’ਤਿ. (ਜਾ. ੨.੨੧.੪੨੭) –

ਵਤ੍ਵਾ ਪੁਨ ਤੇਨ ਸੁਟ੍ਠੁਤਰਂ ਸਞ੍ਜਾਤਸਵਨਾਦਰੇਨ –

‘‘ਸੁਤ੍ਵਾ ਧਮ੍ਮਂ ਵਿਜਾਨਨ੍ਤਿ, ਨਰਾ ਕਲ੍ਯਾਣਪਾਪਕਂ;

ਅਪਿ ਗਾਥਾ ਸੁਣਿਤ੍ਵਾਨ, ਧਮ੍ਮੇ ਮੇ ਰਮਤੇ ਮਨੋ’’ਤਿ. (ਜਾ. ੨.੨੧.੪੪੪) –

ਵੁਤ੍ਤੇ ‘‘ਅਯਂ ਅਤਿਵਿਯ ਸਞ੍ਜਾਤਾਦਰੋ ਸੋਤੁਕਾਮੋ, ਹਨ੍ਦਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤੇਨ ਹਿ ਸਮ੍ਮ, ਸਾਧੁਕਂ ਸੁਣੋਹਿ ਮਨਸਿਕਰੋਹੀ’’ਤਿ ਵਤ੍ਵਾ ਨਨ੍ਦਬ੍ਰਾਹ੍ਮਣੇਨ ਕਥਿਤਨਿਯਾਮੇਨੇਵ ਗਾਥਾਨਂ ਸਕ੍ਕਚ੍ਚਂ ਥੁਤਿਂ ਕਤ੍ਵਾ ਛਕਾਮਾਵਚਰਦੇਵਲੋਕੇ ਏਕਕੋਲਾਹਲਂ ਕਤ੍ਵਾ ਦੇਵਤਾਸੁ ਸਾਧੁਕਾਰਂ ਦਦਮਾਨਾਸੁ ਮਹਾਸਤ੍ਤੋ ਪੋਰਿਸਾਦਸ੍ਸ –

‘‘ਸਕਿਦੇਵ ਮਹਾਰਾਜ, ਸਬ੍ਭਿ ਹੋਤਿ ਸਮਾਗਮੋ;

ਸਾ ਨਂ ਸਙ੍ਗਤਿ ਪਾਲੇਤਿ, ਨਾਸਬ੍ਭਿ ਬਹੁਸਙ੍ਗਮੋ.

‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਂ ਸਦ੍ਧਮ੍ਮਮਞ੍ਞਾਯ, ਸੇਯ੍ਯੋ ਹੋਤਿ ਨ ਪਾਪਿਯੋ.

‘‘ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਤ੍ਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

‘‘ਨਭਞ੍ਚ ਦੂਰੇ ਪਥਵੀ ਚ ਦੂਰੇ, ਪਾਰਂ ਸਮੁਦ੍ਦਸ੍ਸ ਤਦਾਹੁ ਦੂਰੇ;

ਤਤੋ ਹਵੇ ਦੂਰਤਰਂ ਵਦਨ੍ਤਿ, ਸਤਞ੍ਚ ਧਮ੍ਮੋ ਅਸਤਞ੍ਚ ਰਾਜਾ’’ਤਿ. (ਜਾ. ੨.੨੧.੪੧੧-੪੧੪) –

ਧਮ੍ਮਂ ਕਥੇਸਿ. ਤਸ੍ਸ ਤੇਨ ਸੁਕਥਿਤਤ੍ਤਾ ਚੇਵ ਅਤ੍ਤਨੋ ਚ ਪੁਞ੍ਞਾਨੁਭਾਵੇਨ ਗਾਥਾ ਸੁਣਨ੍ਤਸ੍ਸੇਵ ਸਕਲਸਰੀਰਂ ਪਞ੍ਚਵਣ੍ਣਾਯ ਪੀਤਿਯਾ ਪਰਿਪੂਰਿ. ਸੋ ਬੋਧਿਸਤ੍ਤੇ ਮੁਦੁਚਿਤ੍ਤੋ ਹੁਤ੍ਵਾ ‘‘ਸਮ੍ਮ ਸੁਤਸੋਮ, ਦਾਤਬ੍ਬਯੁਤ੍ਤਕਂ ਹਿਰਞ੍ਞਾਦਿਂ ਨ ਪਸ੍ਸਾਮਿ, ਏਕੇਕਾਯ ਗਾਥਾਯ ਏਕੇਕਂ ਵਰਂ ਦਸ੍ਸਾਮੀ’’ਤਿ ਆਹ. ਅਥ ਨਂ ਮਹਾਸਤ੍ਤੋ ‘‘ਤ੍ਵਂ ਅਤ੍ਤਨੋਪਿ ਹਿਤਾਨਿ ਅਜਾਨਨ੍ਤੋ ਪਰਸ੍ਸ ਕਿਂ ਨਾਮ ਵਰਂ ਦਸ੍ਸਸੀ’’ਤਿ ਅਪਸਾਦੇਤ੍ਵਾ ਪੁਨ ਤੇਨ ‘‘ਵਰਂ ਗਣ੍ਹਥਾ’’ਤਿ ਯਾਚਿਤੋ ਸਬ੍ਬਪਠਮਂ ‘‘ਅਹਂ ਚਿਰਕਾਲਂ ਤਂ ਅਰੋਗਂ ਪਸ੍ਸੇਯ੍ਯ’’ਨ੍ਤਿ ਵਰਂ ਯਾਚਿ. ਸੋ ‘‘ਅਯਂ ਇਦਾਨਿ ਮੇ ਵਧਿਤ੍ਵਾ ਮਂਸਂ ਖਾਦਿਤੁਕਾਮਸ੍ਸ ਮਹਾਨਤ੍ਥਕਰਸ੍ਸ ਮਯ੍ਹਮੇਵ ਜੀਵਿਤਮਿਚ੍ਛਤੀ’’ਤਿ ਤੁਟ੍ਠਮਾਨਸੋ ਵਞ੍ਚੇਤ੍ਵਾ ਵਰਸ੍ਸ ਗਹਿਤਭਾਵਂ ਅਜਾਨਨ੍ਤੋ ਅਦਾਸਿ. ਮਹਾਸਤ੍ਤੋ ਹਿ ਉਪਾਯਕੁਸਲਤਾਯ ਤਸ੍ਸ ਚਿਰਂ ਜੀਵਿਤੁਕਾਮਤਾਪਦੇਸੇਨ ਅਤ੍ਤਨੋ ਜੀਵਿਤਂ ਯਾਚਿ. ਅਥ ‘‘ਪਰੋਸਤਂ ਖਤ੍ਤਿਯਾਨਂ ਜੀਵਿਤਂ ਦੇਹੀ’’ਤਿ ਦੁਤਿਯਂ ਵਰਂ, ਤੇਸਂ ਸਕੇ ਰਟ੍ਠੇ ਪਟਿਪਾਦਨਂ ਤਤਿਯਂ ਵਰਂ, ਮਨੁਸ੍ਸਮਂਸਖਾਦਨਤੋ ਵਿਰਮਣਂ ਚਤੁਤ੍ਥਂ ਵਰਂ ਯਾਚਿ. ਸੋ ਤੀਣਿ ਵਰਾਨਿ ਦਤ੍ਵਾ ਚਤੁਤ੍ਥਂ ਵਰਂ ਅਦਾਤੁਕਾਮੋ ‘‘ਅਞ੍ਞਂ ਵਰਂ ਗਣ੍ਹਾਹੀ’’ਤਿ ਵਤ੍ਵਾਪਿ ਮਹਾਸਤ੍ਤੇਨ ਨਿਪ੍ਪੀਲ਼ਿਯਮਾਨੋ ਤਮ੍ਪਿ ਅਦਾਸਿਯੇਵ.

ਅਥ ਬੋਧਿਸਤ੍ਤੋ ਪੋਰਿਸਾਦਂ ਨਿਬ੍ਬਿਸੇਵਨਂ ਕਤ੍ਵਾ ਤੇਨੇਵ ਰਾਜਾਨੋ ਮੋਚਾਪੇਤ੍ਵਾ ਭੂਮਿਯਂ ਨਿਪਜ੍ਜਾਪੇਤ੍ਵਾ ਦਾਰਕਾਨਂ ਕਣ੍ਣਤੋ ਸੁਤ੍ਤਵਟ੍ਟਿ ਵਿਯ ਸਣਿਕਂ ਰਜ੍ਜੁਯੋ ਨੀਹਰਿਤ੍ਵਾ ਪੋਰਿਸਾਦੇਨ ਏਕਂ ਤਚਂ ਆਹਰਾਪੇਤ੍ਵਾ ਪਾਸਾਣੇਨ ਘਂਸਿਤ੍ਵਾ ਸਚ੍ਚਕਿਰਿਯਂ ਕਤ੍ਵਾ ਤੇਸਂ ਹਤ੍ਥਤਲਾਨਿ ਮਕ੍ਖੇਸਿ. ਤਙ੍ਖਣਂ ਏਵ ਫਾਸੁਕਂ ਅਹੋਸਿ. ਦ੍ਵੀਹਤੀਹਂ ਤਤ੍ਥੇਵ ਵਸਿਤ੍ਵਾ ਤੇ ਅਰੋਗੇ ਕਾਰੇਤ੍ਵਾ ਤੇਹਿ ਸਦ੍ਧਿਂ ਅਭਿਜ੍ਜਨਕਸਭਾਵਂ ਮਿਤ੍ਤਸਨ੍ਥਵਂ ਕਾਰੇਤ੍ਵਾ ਤੇਹਿ ਸਦ੍ਧਿਂ ਤਂ ਬਾਰਾਣਸਿਂ ਨੇਤ੍ਵਾ ਰਜ੍ਜੇ ਪਤਿਟ੍ਠਾਪੇਤ੍ਵਾ ‘‘ਅਪ੍ਪਮਤ੍ਤਾ ਹੋਥਾ’’ਤਿ ਤੇ ਰਾਜਾਨੋ ਅਤ੍ਤਨੋ ਅਤ੍ਤਨੋ ਨਗਰਂ ਪੇਸੇਤ੍ਵਾ ਇਨ੍ਦਪਤ੍ਥਨਗਰਤੋ ਆਗਤਾਯ ਅਤ੍ਤਨੋ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤੋ ਅਤ੍ਤਨੋ ਨਗਰਂ ਗਤੋ ਤੁਟ੍ਠਪਮੁਦਿਤੇਨ ਨਾਗਰਜਨੇਨ ਸਮ੍ਪਰਿਵਾਰਿਯਮਾਨੋ ਅਨ੍ਤੇਪੁਰਂ ਪਵਿਸਿਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਮਹਾਤਲਂ ਅਭਿਰੁਹਿ.

ਅਥ ਮਹਾਸਤ੍ਤੋ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਮਹਾਦਾਨਾਨਿ ਪਵਤ੍ਤੇਨ੍ਤੋ ਸੀਲਾਨਿ ਪਰਿਪੂਰੇਨ੍ਤੋ ਉਪੋਸਥਂ ਉਪਵਸਨ੍ਤੋ ਪਾਰਮਿਯੋ ਅਨੁਬ੍ਰੂਹੇਸਿ. ਤੇਪਿ ਰਾਜਾਨੋ ਮਹਾਸਤ੍ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਸਗ੍ਗਪੁਰਂ ਪੂਰਯਿਂਸੁ.

ਤਦਾ ਪੋਰਿਸਾਦੋ ਅਙ੍ਗੁਲਿਮਾਲਤ੍ਥੇਰੋ ਅਹੋਸਿ, ਕਾਲ਼ਹਤ੍ਥਿਅਮਚ੍ਚੋ ਸਾਰਿਪੁਤ੍ਤਤ੍ਥੇਰੋ, ਨਨ੍ਦਬ੍ਰਾਹ੍ਮਣੋ ਆਨਨ੍ਦਤ੍ਥੇਰੋ, ਰੁਕ੍ਖਦੇਵਤਾ ਮਹਾਕਸ੍ਸਪਤ੍ਥੇਰੋ, ਰਾਜਾਨੋ ਬੁਦ੍ਧਪਰਿਸਾ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਸੁਤਸੋਮਮਹਾਰਾਜਾ ਲੋਕਨਾਥੋ.

ਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋਪਿ ਨਿਦ੍ਧਾਰੇਤਬ੍ਬਾ. ਤਥਾ ਅਲੀਨਸਤ੍ਤੁਚਰਿਯਾਵਣ੍ਣਨਾਯ (ਚਰਿਯਾ ਅਟ੍ਠ. ੨.੭੪ ਆਦਯੋ) ਵਿਯ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਮਹਾਸੁਤਸੋਮਚਰਿਯਾਵਣ੍ਣਨਾ ਨਿਟ੍ਠਿਤਾ.

ਸਚ੍ਚਪਾਰਮੀ ਨਿਟ੍ਠਿਤਾ.