੧੩. ਸੁਵਣ੍ਣਸਾਮਚਰਿਯਾਵਣ੍ਣਨਾ

੧੧੧. ਤੇਰਸਮੇ ਸਾਮੋ ਯਦਾ ਵਨੇ ਆਸਿਨ੍ਤਿ ਹਿਮਵਨ੍ਤਸ੍ਮਿਂ ਮਿਗਸਮ੍ਮਤਾਯ ਨਾਮ ਨਦਿਯਾ ਤੀਰੇ ਮਹਤਿ ਅਰਞ੍ਞੇ ਸਾਮੋ ਨਾਮ ਤਾਪਸਕੁਮਾਰੋ ਯਦਾ ਅਹੋਸਿ. ਸਕ੍ਕੇਨ ਅਭਿਨਿਮ੍ਮਿਤੋਤਿ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਉਪਦੇਸਸਮ੍ਪਤ੍ਤਿਯਾ ਜਾਤਤ੍ਤਾ ਸਕ੍ਕੇਨ ਨਿਬ੍ਬਤ੍ਤਿਤੋ ਜਨਿਤੋ. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਬਾਰਾਣਸਿਤੋ ਅਵਿਦੂਰੇ ਨਦਿਯਾ ਤੀਰੇ ਏਕੋ ਨੇਸਾਦਗਾਮੋ ਅਹੋਸਿ. ਤਤ੍ਥ ਜੇਟ੍ਠਨੇਸਾਦਸ੍ਸ ਪੁਤ੍ਤੋ ਜਾਤੋ. ਤਸ੍ਸ ‘‘ਦੁਕੂਲੋ’’ਤਿ ਨਾਮਮਕਂਸੁ. ਤਸ੍ਸਾ ਏਵ ਨਦਿਯਾ ਪਰਤੀਰੇਪਿ ਏਕੋ ਨੇਸਾਦਗਾਮੋ ਅਹੋਸਿ. ਤਤ੍ਥ ਜੇਟ੍ਠਨੇਸਾਦਸ੍ਸ ਧੀਤਾ ਜਾਤਾ. ਤਸ੍ਸਾ ‘‘ਪਾਰਿਕਾ’’ਤਿ ਨਾਮਮਕਂਸੁ. ਤੇ ਉਭੋਪਿ ਬ੍ਰਹ੍ਮਲੋਕਤੋ ਆਗਤਾ ਸੁਦ੍ਧਸਤ੍ਤਾ. ਤੇਸਂ ਵਯਪ੍ਪਤ੍ਤਾਨਂ ਅਨਿਚ੍ਛਮਾਨਾਨਂਯੇਵ ਆਵਾਹਵਿਵਾਹਂ ਕਰਿਂਸੁ. ਤੇ ਉਭੋਪਿ ਕਿਲੇਸਸਮੁਦ੍ਦਂ ਅਨੋਤਰਿਤ੍ਵਾ ਬ੍ਰਹ੍ਮਾਨੋ ਵਿਯ ਏਕਤੋ ਵਸਿਂਸੁ. ਨ ਚ ਕਿਞ੍ਚਿ ਨੇਸਾਦਕਮ੍ਮਂ ਕਰੋਨ੍ਤਿ.

ਅਥ ਦੁਕੂਲਂ ਮਾਤਾਪਿਤਰੋ ‘‘ਤਾਤ, ਤ੍ਵਂ ਨੇਸਾਦਕਮ੍ਮਂ ਨ ਕਰੋਸਿ, ਨੇਵ ਘਰਾਵਾਸਂ ਇਚ੍ਛਸਿ, ਕਿਂ ਨਾਮ ਕਰਿਸ੍ਸਸੀ’’ਤਿ ਆਹਂਸੁ. ਸੋ ‘‘ਤੁਮ੍ਹੇਸੁ ਅਨੁਜਾਨਨ੍ਤੇਸੁ ਪਬ੍ਬਜਿਸ੍ਸਾਮੀ’’ਤਿ ਆਹ. ‘‘ਤੇਨ ਹਿ ਪਬ੍ਬਜਾਹੀ’’ਤਿ. ਦ੍ਵੇਪਿ ਜਨਾ ਹਿਮਵਨ੍ਤਂ ਪਵਿਸਿਤ੍ਵਾ ਯਸ੍ਮਿਂ ਠਾਨੇ ਮਿਗਸਮ੍ਮਤਾ ਨਾਮ ਨਦੀ ਹਿਮਵਨ੍ਤਤੋ ਓਤਰਿਤ੍ਵਾ ਗਙ੍ਗਂ ਪਤ੍ਤਾ, ਤਂ ਠਾਨਂ ਗਨ੍ਤ੍ਵਾ ਗਙ੍ਗਂ ਪਹਾਯ ਮਿਗਸਮ੍ਮਤਾਭਿਮੁਖਾ ਅਭਿਰੁਹਿਂਸੁ. ਤਦਾ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਤਂ ਕਾਰਣਂ ਞਤ੍ਵਾ ਵਿਸ੍ਸਕਮ੍ਮੁਨਾ ਤਸ੍ਮਿਂ ਠਾਨੇ ਅਸ੍ਸਮਂ ਮਾਪੇਸਿ. ਤੇ ਤਤ੍ਥ ਗਨ੍ਤ੍ਵਾ ਪਬ੍ਬਜਿਤ੍ਵਾ ਸਕ੍ਕਦਤ੍ਤਿਯੇ ਅਸ੍ਸਮੇ ਕਾਮਾਵਚਰਮੇਤ੍ਤਂ ਭਾਵੇਤ੍ਵਾ ਪਟਿਵਸਿਂਸੁ. ਸਕ੍ਕੋਪਿ ਤੇਸਂ ਉਪਟ੍ਠਾਨਂ ਆਗਚ੍ਛਤਿ.

ਸੋ ਏਕਦਿਵਸਂ ‘‘ਤੇਸਂ ਚਕ੍ਖੂ ਪਰਿਹਾਯਿਸ੍ਸਨ੍ਤੀ’’ਤਿ ਞਤ੍ਵਾ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਵੋ ਚਕ੍ਖੂਨਂ ਅਨ੍ਤਰਾਯੋ ਪਞ੍ਞਾਯਤਿ, ਪਟਿਜਗ੍ਗਨਕਂ ਪੁਤ੍ਤਂ ਲਦ੍ਧੁਂ ਵਟ੍ਟਤਿ, ਜਾਨਾਮਿ ਤੁਮ੍ਹਾਕਂ ਸੁਦ੍ਧਚਿਤ੍ਤਤਂ, ਤਸ੍ਮਾ ਪਾਰਿਕਾਯ ਉਤੁਨਿਕਾਲੇ ਨਾਭਿਂ ਹਤ੍ਥੇਨ ਪਰਾਮਸੇਯ੍ਯਾਥ, ਏਵਂ ਵੋ ਪੁਤ੍ਤੋ ਜਾਯਿਸ੍ਸਤਿ, ਸੋ ਵੋ ਉਪਟ੍ਠਹਿਸ੍ਸਤੀ’’ਤਿ ਵਤ੍ਵਾ ਪਕ੍ਕਾਮਿ. ਦੁਕੂਲਪਣ੍ਡਿਤੋ ਤਂ ਕਾਰਣਂ ਪਾਰਿਕਾਯ ਆਚਿਕ੍ਖਿਤ੍ਵਾ ਤਸ੍ਸਾ ਉਤੁਨਿਕਾਲੇ ਨਾਭਿਂ ਪਰਾਮਸਿ. ਤਦਾ ਬੋਧਿਸਤ੍ਤੋ ਦੇਵਲੋਕਾ ਚਵਿਤ੍ਵਾ ਤਸ੍ਸਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਸਾ ਦਸਮਾਸਚ੍ਚਯੇਨ ਸੁਵਣ੍ਣਵਣ੍ਣਂ ਪੁਤ੍ਤਂ ਵਿਜਾਯਿ. ਤੇਨੇਵਸ੍ਸ ‘‘ਸੁਵਣ੍ਣਸਾਮੋ’’ਤਿ ਨਾਮਂ ਕਰਿਂਸੁ. ਤਂ ਅਪਰਭਾਗੇ ਵਡ੍ਢਿਤ੍ਵਾ ਸੋਲ਼ਸਵਸ੍ਸੁਦ੍ਦੇਸਿਕਮ੍ਪਿ ਮਾਤਾਪਿਤਰੋ ਰਕ੍ਖਨ੍ਤਾ ਅਸ੍ਸਮੇ ਨਿਸੀਦਾਪੇਤ੍ਵਾ ਸਯਮੇਵ ਵਨਮੂਲਫਲਾਫਲਤ੍ਥਾਯ ਗਚ੍ਛਨ੍ਤਿ.

ਅਥੇਕਦਿਵਸਂ ਵਨੇ ਫਲਾਫਲਂ ਆਦਾਯ ਨਿਵਤ੍ਤਿਤ੍ਵਾ ਅਸ੍ਸਮਪਦਤੋ ਅਵਿਦੂਰੇ ਮੇਘੇ ਉਟ੍ਠਿਤੇ ਰੁਕ੍ਖਮੂਲਂ ਪਵਿਸਿਤ੍ਵਾ ਵਮ੍ਮਿਕਮਤ੍ਥਕੇ ਠਿਤਾਨਂ ਸਰੀਰਤੋ ਸੇਦਗਨ੍ਧਮਿਸ੍ਸਕੇ ਉਦਕੇ ਤਸ੍ਮਿਂ ਵਮ੍ਮਿਕਬਿਲੇ ਠਿਤਸ੍ਸ ਆਸਿਵਿਸਸ੍ਸ ਨਾਸਾਪੁਟਂ ਪਵਿਟ੍ਠੇ ਆਸਿਵਿਸੋ ਕੁਜ੍ਝਿਤ੍ਵਾ ਨਾਸਾਵਾਤੇਨ ਪਹਰਿ. ਦ੍ਵੇ ਅਨ੍ਧਾ ਹੁਤ੍ਵਾ ਪਰਿਦੇਵਮਾਨਾ ਵਿਰਵਿਂਸੁ. ਅਥ ਮਹਾਸਤ੍ਤੋ ‘‘ਮਮ ਮਾਤਾਪਿਤਰੋ ਅਤਿਚਿਰਾਯਨ੍ਤਿ, ਕਾ ਨੁ ਖੋ ਤੇਸਂ ਪਵਤ੍ਤੀ’’ਤਿ ਪਟਿਮਗ੍ਗਂ ਗਨ੍ਤ੍ਵਾ ਸਦ੍ਦਮਕਾਸਿ. ਤੇ ਤਸ੍ਸ ਸਦ੍ਦਂ ਸਞ੍ਜਾਨਿਤ੍ਵਾ ਪਟਿਸਦ੍ਦਂ ਕਤ੍ਵਾ ਪੁਤ੍ਤਸਿਨੇਹੇਨ ‘‘ਤਾਤ ਸਾਮ, ਇਧ ਪਰਿਪਨ੍ਥੋ ਅਤ੍ਥਿ, ਮਾ ਆਗਮੀ’’ਤਿ ਵਤ੍ਵਾ ਸਦ੍ਦਾਨੁਸਾਰੇਨ ਸਯਮੇਵ ਸਮਾਗਮਿਂਸੁ. ਸੋ ‘‘ਕੇਨ ਵੋ ਕਾਰਣੇਨ ਚਕ੍ਖੂਨਿ ਵਿਨਟ੍ਠਾਨੀ’’ਤਿ ਪੁਚ੍ਛਿਤ੍ਵਾ ‘‘ਤਾਤ, ਮਯਂ ਨ ਜਾਨਾਮ, ਦੇਵੇ ਵਸ੍ਸਨ੍ਤੇ ਰੁਕ੍ਖਮੂਲੇ ਵਮ੍ਮਿਕਮਤ੍ਥਕੇ ਠਿਤਾ, ਅਥ ਨ ਪਸ੍ਸਾਮਾ’’ਤਿ ਵੁਤ੍ਤਮਤ੍ਤੇ ਏਵ ਅਞ੍ਞਾਸਿ ‘‘ਤਤ੍ਥ ਆਸਿਵਿਸੇਨ ਭਵਿਤਬ੍ਬਂ, ਤੇਨ ਕੁਦ੍ਧੇਨ ਨਾਸਾਵਾਤੋ ਵਿਸ੍ਸਟ੍ਠੋ ਭਵਿਸ੍ਸਤੀ’’ਤਿ.

ਅਥ ‘‘ਮਾ ਚਿਨ੍ਤਯਿਤ੍ਥ, ਅਹਂ ਵੋ ਪਟਿਜਗ੍ਗਿਸ੍ਸਾਮੀ’’ਤਿ ਮਾਤਾਪਿਤਰੋ ਅਸ੍ਸਮਂ ਨੇਤ੍ਵਾ ਤੇਸਂ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦਿਸਞ੍ਚਰਣਟ੍ਠਾਨੇ ਰਜ੍ਜੁਕੇ ਬਨ੍ਧਿ. ਤਤੋ ਪਟ੍ਠਾਯ ਤੇ ਅਸ੍ਸਮੇ ਠਪੇਤ੍ਵਾ ਵਨਮੂਲਫਲਾਫਲਾਨਿ ਆਹਰਤਿ, ਪਾਤੋਵ ਵਸਨਟ੍ਠਾਨਂ ਸਮ੍ਮਜ੍ਜਤਿ, ਪਾਨੀਯਂ ਆਹਰਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਿ, ਦਨ੍ਤਕਟ੍ਠਮੁਖੋਦਕਾਨਿ ਦਤ੍ਵਾ ਮਧੁਰਫਲਾਫਲਂ ਦੇਤਿ. ਤੇਹਿ ਮੁਖੇ ਵਿਕ੍ਖਾਲਿਤੇ ਸਯਂ ਪਰਿਭੁਞ੍ਜਿਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਤੇਸਂ ਅਵਿਦੂਰੇਯੇਵ ਅਚ੍ਛਤਿ – ‘‘ਕਿਂ ਨੁ ਖੋ ਇਮੇ ਆਣਾਪੇਨ੍ਤੀ’’ਤਿ. ਵਿਸੇਸੇਨ ਚ ਮੇਤ੍ਤਂ ਬਹੁਲਮਕਾਸਿ, ਤੇਨਸ੍ਸ ਸਤ੍ਤਾ ਅਪ੍ਪਟਿਕ੍ਕੂਲਾ ਅਹੇਸੁਂ. ਯਥਾ ਚਸ੍ਸ ਸਤ੍ਤਾ, ਏਵਂ ਸਤ੍ਤਾਨਂ ਸੋ ਬੋਧਿਸਤ੍ਤੋ ਅਪ੍ਪਟਿਕ੍ਕੂਲੋ. ਏਵਂ ਸੋ ਦਿਵਸੇ ਦਿਵਸੇ ਫਲਾਫਲਤ੍ਥਾਯ ਅਰਞ੍ਞਂ ਗਚ੍ਛਨ੍ਤੋਪਿ ਆਗਚ੍ਛਨ੍ਤੋਪਿ ਮਿਗਗਣਪਰਿਵੁਤੋ ਏਵ ਅਹੋਸਿ. ਸੀਹਬ੍ਯਗ੍ਘਾਦਿਵਿਪਕ੍ਖਸਤ੍ਤਾਪਿ ਤੇਨ ਸਦ੍ਧਿਂ ਅਤਿਵਿਯ ਵਿਸ੍ਸਤ੍ਥਾ, ਮੇਤ੍ਤਾਨੁਭਾਵੇਨ ਪਨਸ੍ਸ ਵਸਨਟ੍ਠਾਨੇ ਅਞ੍ਞਮਞ੍ਞਂ ਤਿਰਚ੍ਛਾਨਗਤਾ ਮੁਦੁਚਿਤ੍ਤਤਂ ਪਟਿਲਭਿਂਸੁ. ਇਤਿ ਸੋ ਸਬ੍ਬਤ੍ਥ ਮੇਤ੍ਤਾਨੁਭਾਵੇਨ ਅਭੀਰੂ ਅਨੁਤ੍ਰਾਸੀ ਬ੍ਰਹ੍ਮਾ ਵਿਯ ਅਵੇਰੋ ਵਿਹਾਸਿ. ਤੇਨ ਵੁਤ੍ਤਂ ‘‘ਪਵਨੇ ਸੀਹਬ੍ਯਗ੍ਘੇ ਚ, ਮੇਤ੍ਤਾਯਮੁਪਨਾਮਯਿ’’ਨ੍ਤਿਆਦਿ.

ਤਤ੍ਥ ਮੇਤ੍ਤਾਯਮੁਪਨਾਮਯਿਨ੍ਤਿ ਮ-ਕਾਰੋ ਪਦਸਨ੍ਧਿਕਰੋ, ਮੇਤ੍ਤਾਭਾਵਨਾਯ ਕੁਰੂਰਕਮ੍ਮਨ੍ਤੇ ਸੀਹਬ੍ਯਗ੍ਘੇਪਿ ਫਰਿ, ਪਗੇਵ ਸੇਸਸਤ੍ਤੇਤਿ ਅਧਿਪ੍ਪਾਯੋ. ਅਥ ਵਾ ਮੇਤ੍ਤਾ ਅਯਤਿ ਪਵਤ੍ਤਤਿ ਏਤੇਨਾਤਿ ਮੇਤ੍ਤਾਯੋ, ਮੇਤ੍ਤਾਭਾਵਨਾ. ਤਂ ਮੇਤ੍ਤਾਯਂ ਉਪਨਾਮਯਿਂ ਸਤ੍ਤੇਸੁ ਅਨੋਧਿਸੋ ਉਪਨੇਸਿਂ. ‘‘ਸੀਹਬ੍ਯਗ੍ਘੇਹੀ’’ਤਿਪਿ ਪਾਠੋ. ਤਸ੍ਸਤ੍ਥੋ – ਨ ਕੇਵਲਮਹਮੇਵ, ਅਥ ਖੋ ਪਵਨੇ ਸੀਹਬ੍ਯਗ੍ਘੇਹਿ, ਯਸ੍ਮਿਂ ਮਹਾਵਨੇ ਤਦਾ ਅਹਂ ਵਿਹਰਾਮਿ, ਤਤ੍ਥ ਸੀਹਬ੍ਯਗ੍ਘੇਹਿ ਸਦ੍ਧਿਂ ਅਹਂ ਸਤ੍ਤੇਸੁ ਮੇਤ੍ਤਂ ਉਪਨਾਮੇਸਿਂ. ਸੀਹਬ੍ਯਗ੍ਘਾਪਿ ਹਿ ਤਦਾ ਮਮਾਨੁਭਾਵੇਨ ਸਤ੍ਤੇਸੁ ਮੇਤ੍ਤਚਿਤ੍ਤਤਂ ਪਟਿਲਭਿਂਸੁ, ਪਗੇਵ ਇਤਰੇ ਸਤ੍ਤਾਤਿ ਦਸ੍ਸੇਤਿ.

੧੧੨. ਪਸਦਮਿਗਵਰਾਹੇਹੀਤਿ ਪਸਦਮਿਗੇਹਿ ਚੇਵ ਵਨਸੂਕਰੇਹਿ ਚ. ਪਰਿਵਾਰੇਤ੍ਵਾਤਿ ਏਤੇਹਿ ਅਤ੍ਤਾਨਂ ਪਰਿਵਾਰਿਤਂ ਕਤ੍ਵਾ ਤਸ੍ਮਿਂ ਅਰਞ੍ਞੇ ਵਸਿਂ.

੧੧੩. ਇਦਾਨਿ ਤਦਾ ਅਤ੍ਤਨੋ ਮੇਤ੍ਤਾਭਾਵਨਾਯ ਲਦ੍ਧਂ ਆਨਿਸਂਸਂ ਮਤ੍ਥਕਪ੍ਪਤ੍ਤਿਞ੍ਚਸ੍ਸ ਦਸ੍ਸੇਤੁਂ ‘‘ਨ ਮਂ ਕੋਚਿ ਉਤ੍ਤਸਤੀ’’ਤਿ ਓਸਾਨਗਾਥਮਾਹ. ਤਸ੍ਸਤ੍ਥੋ – ਸਸਬਿਲ਼ਾਰਾਦਿਕੋ ਭੀਰੁਕਜਾਤਿਕੋਪਿ ਕੋਚਿ ਸਤ੍ਤੋ ਮਂ ਨ ਉਤ੍ਤਸਤਿ ਨ ਉਬ੍ਬਿਜ੍ਜੇਤਿ. ਅਹਮ੍ਪਿ ਕਸ੍ਸਚਿ ਸੀਹਬ੍ਯਗ੍ਘਾਦਿਤਿਰਚ੍ਛਾਨਤੋ ਯਕ੍ਖਾਦਿਅਮਨੁਸ੍ਸਤੋ ਲੁਦ੍ਦਲੋਹਿਤਪਾਣਿਮਨੁਸ੍ਸਤੋਤਿ ਕੁਤੋਚਿਪਿ ਨ ਭਾਯਾਮਿ. ਕਸ੍ਮਾ? ਯਸ੍ਮਾ ਮੇਤ੍ਤਾਬਲੇਨੁਪਤ੍ਥਦ੍ਧੋ ਚਿਰਕਾਲਂ ਭਾਵਿਤਾਯ ਮੇਤ੍ਤਾਪਾਰਮਿਤਾਯਾਨੁਭਾਵੇਨ ਉਪਤ੍ਥਮ੍ਭਿਤੋ ਤਸ੍ਮਿਂ ਪਵਨੇ ਮਹਾਅਰਞ੍ਞੇ ਤਦਾ ਰਮਾਮਿ ਅਭਿਰਮਾਮੀਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਏਵਂ ਪਨ ਮਹਾਸਤ੍ਤੋ ਸਬ੍ਬਸਤ੍ਤੇ ਮੇਤ੍ਤਾਯਨ੍ਤੋ ਮਾਤਾਪਿਤਰੋ ਚ ਸਾਧੁਕਂ ਪਟਿਜਗ੍ਗਨ੍ਤੋ ਏਕਦਿਵਸਂ ਅਰਞ੍ਞਤੋ ਮਧੁਰਫਲਾਫਲਂ ਆਹਰਿਤ੍ਵਾ ਅਸ੍ਸਮੇ ਠਪੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ‘‘ਪਾਨੀਯਂ ਆਦਾਯ ਆਗਮਿਸ੍ਸਾਮੀ’’ਤਿ ਮਿਗਗਣਪਰਿਵੁਤੋ ਦ੍ਵੇ ਮਿਗੇ ਏਕਤੋ ਕਤ੍ਵਾ ਤੇਸਂ ਪਿਟ੍ਠਿਯਂ ਪਾਨੀਯਘਟਂ ਠਪੇਤ੍ਵਾ ਹਤ੍ਥੇਨ ਗਹੇਤ੍ਵਾ ਨਦੀਤਿਤ੍ਥਂ ਅਗਮਾਸਿ. ਤਸ੍ਮਿਂ ਸਮਯੇ ਬਾਰਾਣਸਿਯਂ ਪੀਲ਼ਿਯਕ੍ਖੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਸੋ ਮਿਗਮਂਸਲੋਭੇਨ ਮਾਤਰਂ ਰਜ੍ਜਂ ਪਟਿਚ੍ਛਾਪੇਤ੍ਵਾ ਸਨ੍ਨਦ੍ਧਪਞ੍ਚਾਵੁਧੋ ਹਿਮਵਨ੍ਤਂ ਪਵਿਸਿਤ੍ਵਾ ਮਿਗੇ ਵਧਿਤ੍ਵਾ ਮਂਸਂ ਖਾਦਿਤ੍ਵਾ ਚਰਨ੍ਤੋ ਮਿਗਸਮ੍ਮਤਂ ਨਦਿਂ ਪਤ੍ਵਾ ਅਨੁਪੁਬ੍ਬੇਨ ਸਾਮਸ੍ਸ ਪਾਨੀਯਗਹਣਤਿਤ੍ਥਂ ਪਤ੍ਤੋ. ਮਿਗਪਦਵਲਞ੍ਜਂ ਦਿਸ੍ਵਾ ਗਚ੍ਛਨ੍ਤੋ ਤਂ ਤਥਾ ਗਚ੍ਛਨ੍ਤਂ ਦਿਸ੍ਵਾ ‘‘ਮਯਾ ਏਤ੍ਤਕਂ ਕਾਲਂ ਏਵਂ ਵਿਚਰਨ੍ਤੋ ਮਨੁਸ੍ਸੋ ਨ ਦਿਟ੍ਠਪੁਬ੍ਬੋ, ਦੇਵੋ ਨੁ ਖੋ ਏਸ ਨਾਗੋ ਨੁ ਖੋ, ਸਚਾਹਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮਿ, ਸਹਸਾ ਪਕ੍ਕਮੇਯ੍ਯਾਤਿ. ਯਂਨੂਨਾਹਂ ਏਤਂ ਵਿਜ੍ਝਿਤ੍ਵਾ ਦੁਬ੍ਬਲਂ ਕਤ੍ਵਾ ਪੁਚ੍ਛੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਮਹਾਸਤ੍ਤਂ ਨ੍ਹਤ੍ਵਾ ਵਾਕਚੀਰਂ ਨਿਵਾਸੇਤ੍ਵਾ ਅਜਿਨਚਮ੍ਮਂ ਏਕਂਸਂ ਕਰਿਤ੍ਵਾ ਪਾਨੀਯਘਟਂ ਪੂਰੇਤ੍ਵਾ ਉਕ੍ਖਿਪਿਤ੍ਵਾ ਵਾਮਂਸਕੂਟੇ ਠਪਨਕਾਲੇ ‘‘ਇਦਾਨਿ ਤਂ ਵਿਜ੍ਝਿਤੁਂ ਸਮਯੋ’’ਤਿ ਵਿਸਪੀਤੇਨ ਸਰੇਨ ਦਕ੍ਖਿਣਪਸ੍ਸੇ ਵਿਜ੍ਝਿ. ਸਰੋ ਵਾਮਪਸ੍ਸੇਨ ਨਿਕ੍ਖਮਿ. ਤਸ੍ਸ ਵਿਦ੍ਧਭਾਵਂ ਞਤ੍ਵਾ ਮਿਗਗਣੋ ਭੀਤੋ ਪਲਾਯਿ.

ਸਾਮਪਣ੍ਡਿਤੋ ਪਨ ਵਿਦ੍ਧੋਪਿ ਪਾਨੀਯਘਟਂ ਯਥਾ ਵਾ ਤਥਾ ਵਾ ਅਨਵਸੁਮ੍ਭੇਤ੍ਵਾ ਸਤਿਂ ਪਚ੍ਚੁਪਟ੍ਠਾਪੇਤ੍ਵਾ ਸਣਿਕਂ ਓਤਾਰੇਤ੍ਵਾ ਵਾਲੁਕਂ ਬ੍ਯੂਹਿਤ੍ਵਾ ਠਪੇਤ੍ਵਾ ਦਿਸਂ ਵਵਤ੍ਥਪੇਤ੍ਵਾ ਮਾਤਾਪਿਤੂਨਂ ਵਸਨਟ੍ਠਾਨਦਿਸਾਭਾਗੇਨ ਸੀਸਂ ਕਤ੍ਵਾ ਨਿਪਜ੍ਜਿਤ੍ਵਾ ਮੁਖੇਨ ਲੋਹਿਤਂ ਛਡ੍ਡੇਤ੍ਵਾ ‘‘ਮਮ ਕੋਚਿ ਵੇਰੀ ਨਾਮ ਨਤ੍ਥਿ, ਮਮਪਿ ਕਤ੍ਥਚਿ ਵੇਰਂ ਨਾਮ ਨਤ੍ਥੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਕੋ ਨੁ ਮਂ ਉਸੁਨਾ ਵਿਜ੍ਝਿ, ਪਮਤ੍ਤਂ ਉਦਹਾਰਕਂ;

ਖਤ੍ਤਿਯੋ ਬ੍ਰਾਹ੍ਮਣੋ ਵੇਸ੍ਸੋ, ਕੋ ਮਂ ਵਿਦ੍ਧਾ ਨਿਲੀਯਤੀ’’ਤਿ. (ਜਾ. ੨.੨੨.੨੯੬);

ਤਂ ਸੁਤ੍ਵਾ ਰਾਜਾ ‘‘ਅਯਂ ਮਯਾ ਵਿਜ੍ਝਿਤ੍ਵਾ ਪਥਵਿਯਂ ਪਾਤਿਤੋਪਿ ਨੇਵ ਮਂ ਅਕ੍ਕੋਸਤਿ ਨ ਪਰਿਭਾਸਤਿ, ਮਮ ਹਦਯਮਂਸਂ ਸਮ੍ਬਾਹਨ੍ਤੋ ਵਿਯ ਪਿਯਵਚਨੇਨ ਸਮੁਦਾਚਰਤਿ, ਗਮਿਸ੍ਸਾਮਿਸ੍ਸ ਸਨ੍ਤਿਕ’’ਨ੍ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿਤ੍ਵਾ ਅਤ੍ਤਾਨਂ ਅਤ੍ਤਨਾ ਚ ਵਿਦ੍ਧਭਾਵਂ ਆਵਿਕਤ੍ਵਾ ‘‘ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ’’ਤਿ ਮਹਾਸਤ੍ਤਂ ਪੁਚ੍ਛਿ.

ਸੋ ‘‘ਸਾਮੋ ਨਾਮਾਹਂ ਦੁਕੂਲਪਣ੍ਡਿਤਸ੍ਸ ਨਾਮ ਨੇਸਾਦਇਸਿਨੋ ਪੁਤ੍ਤੋ, ਕਿਸ੍ਸ ਪਨ ਮਂ ਵਿਜ੍ਝੀ’’ਤਿ ਆਹ. ਸੋ ਪਠਮਂ ‘‘ਮਿਗਸਞ੍ਞਾਯਾ’’ਤਿ ਮੁਸਾਵਾਦਂ ਵਤ੍ਵਾ ‘‘ਅਹਂ ਇਮਂ ਨਿਰਪਰਾਧਂ ਅਕਾਰਣੇਨ ਵਿਜ੍ਝਿ’’ਨ੍ਤਿ ਅਨੁਸੋਚਿਤ੍ਵਾ ਯਥਾਭੂਤਂ ਆਵਿਕਤ੍ਵਾ ਤਸ੍ਸ ਮਾਤਾਪਿਤੂਨਂ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਤਤ੍ਥ ਗਨ੍ਤ੍ਵਾ ਤੇਸਂ ਅਤ੍ਤਾਨਂ ਆਵਿਕਤ੍ਵਾ ਤੇਹਿ ਕਤਪਟਿਸਨ੍ਥਾਰੋ ‘‘ਸਾਮੋ ਮਯਾ ਵਿਦ੍ਧੋ’’ਤਿ ਵਤ੍ਵਾ ਤੇ ਪਰਿਦੇਵਨ੍ਤੇ ਸੋਕਸਮਾਪਨ੍ਨੇ ‘‘ਯਂ ਸਾਮੇਨ ਕਤ੍ਤਬ੍ਬਂ ਪਰਿਚਾਰਿਕਕਮ੍ਮਂ, ਤਂ ਕਤ੍ਵਾ ਅਹਂ ਵੋ ਉਪਟ੍ਠਹਿਸ੍ਸਾਮੀ’’ਤਿ ਸਮਸ੍ਸਾਸੇਤ੍ਵਾ ਸਾਮਸ੍ਸ ਸਨ੍ਤਿਕਂ ਆਨੇਸਿ. ਤੇ ਤਤ੍ਥ ਗਨ੍ਤ੍ਵਾ ਨਾਨਪ੍ਪਕਾਰਂ ਪਰਿਦੇਵਿਤ੍ਵਾ ਤਸ੍ਸ ਉਰੇ ਹਤ੍ਥਂ ਠਪੇਤ੍ਵਾ ‘‘ਪੁਤ੍ਤਸ੍ਸ ਮੇ ਸਰੀਰੇ ਉਸੁਮਾ ਵਤ੍ਤਤੇਵ, ਵਿਸਵੇਗੇਨ ਵਿਸਞ੍ਞਿਤਂ ਆਪਨ੍ਨੋ ਭਵਿਸ੍ਸਤੀਤਿ ਨਿਬ੍ਬਿਸਭਾਵਤ੍ਥਾਯ ਸਚ੍ਚਕਿਰਿਯਂ ਕਰਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ –

‘‘ਯਂ ਕਿਞ੍ਚਿਤ੍ਥਿ ਕਤਂ ਪੁਞ੍ਞਂ, ਮਯ੍ਹਞ੍ਚੇਵ ਪਿਤੁਚ੍ਚ ਤੇ;

ਸਬ੍ਬੇਨ ਤੇਨ ਕੁਸਲੇਨ, ਵਿਸਂ ਸਾਮਸ੍ਸ ਹਞ੍ਞਤੂ’’ਤਿ. (ਜਾ. ੨.੨੨.੩੮੮) –

ਮਾਤਰਾ,

‘‘ਯਂ ਕਿਞ੍ਚਿਤ੍ਥਿ ਕਤਂ ਪੁਞ੍ਞਂ, ਮਯ੍ਹਞ੍ਚੇਵ ਮਾਤੁਚ੍ਚ ਤੇ;

ਸਬ੍ਬੇਨ ਤੇਨ ਕੁਸਲੇਨ, ਵਿਸਂ ਸਾਮਸ੍ਸ ਹਞ੍ਞਤੂ’’ਤਿ. (ਜਾ. ੨.੨੨.੩੯੬) –

ਪਿਤਰਾ,

‘‘ਪਬ੍ਬਤ੍ਯਾਹਂ ਗਨ੍ਧਮਾਦਨੇ, ਚਿਰਰਤ੍ਤਨਿਵਾਸਿਨੀ;

ਨ ਮੇ ਪਿਯਤਰੋ ਕੋਚਿ, ਅਞ੍ਞੋ ਸਾਮੇਨ ਵਿਜ੍ਜਤਿ;

ਏਤੇਨ ਸਚ੍ਚਵਜ੍ਜੇਨ, ਵਿਸਂ ਸਾਮਸ੍ਸ ਹਞ੍ਞਤੂ’’ਤਿ. (ਜਾ. ੨.੨੨.੩੯੮) –

ਦੇਵਤਾਯ ਚ ਸਚ੍ਚਕਿਰਿਯਾਯ ਕਤਾਯ ਮਹਾਸਤ੍ਤੋ ਖਿਪ੍ਪਂ ਵੁਟ੍ਠਾਸਿ. ਪਦੁਮਪਤ੍ਤਪਲਾਸੇ ਉਦਕਬਿਨ੍ਦੁ ਵਿਯ ਵਿਨਿਵਟ੍ਟੇਤ੍ਵਾ ਆਬਾਧੋ ਵਿਗਤੋ. ਵਿਦ੍ਧਟ੍ਠਾਨਂ ਅਰੋਗਂ ਪਾਕਤਿਕਮੇਵ ਅਹੋਸਿ. ਮਾਤਾਪਿਤੂਨਂ ਚਕ੍ਖੂਨਿ ਉਪ੍ਪਜ੍ਜਿਂਸੁ. ਇਤਿ ਮਹਾਸਤ੍ਤਸ੍ਸ ਅਰੋਗਤਾ, ਮਾਤਾਪਿਤੂਨਞ੍ਚ ਚਕ੍ਖੁਪਟਿਲਾਭੋ, ਅਰੁਣੁਗ੍ਗਮਨਂ, ਤੇਸਂ ਚਤੁਨ੍ਨਮ੍ਪਿ ਅਸ੍ਸਮੇਯੇਵ ਅਵਟ੍ਠਾਨਨ੍ਤਿ ਸਬ੍ਬਂ ਏਕਕ੍ਖਣੇਯੇਵ ਅਹੋਸਿ.

ਅਥ ਮਹਾਸਤ੍ਤੋ ਰਞ੍ਞਾ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਧਮ੍ਮਂ ਚਰ, ਮਹਾਰਾਜਾ’’ਤਿਆਦਿਨਾ (ਜਾ. ੨.੨੨.੪੧੧-੪੧੨) ਧਮ੍ਮਂ ਦੇਸੇਤ੍ਵਾ ਉਤ੍ਤਰਿਮ੍ਪਿ ਓਵਦਿਤ੍ਵਾ ਪਞ੍ਚ ਸੀਲਾਨਿ ਅਦਾਸਿ. ਸੋ ਤਸ੍ਸ ਓਵਾਦਂ ਸਿਰਸਾ ਪਟਿਗ੍ਗਹੇਤ੍ਵਾ ਵਨ੍ਦਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪਰਾਯਨੋ ਅਹੋਸਿ. ਬੋਧਿਸਤ੍ਤੋਪਿ ਸਦ੍ਧਿਂ ਮਾਤਾਪਿਤੂਹਿ ਅਭਿਞ੍ਞਾਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੂਪਗੋ ਅਹੋਸਿ.

ਤਦਾ ਰਾਜਾ ਆਨਨ੍ਦਤ੍ਥੇਰੋ ਅਹੋਸਿ, ਦੇਵਧੀਤਾ ਉਪ੍ਪਲਵਣ੍ਣਾ, ਸਕ੍ਕੋ ਅਨੁਰੁਦ੍ਧੋ, ਪਿਤਾ ਮਹਾਕਸ੍ਸਪਤ੍ਥੇਰੋ, ਮਾਤਾ ਭਦ੍ਦਕਾਪਿਲਾਨੀ, ਸਾਮਪਣ੍ਡਿਤੋ ਲੋਕਨਾਥੋ.

ਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਵਿਸਪੀਤੇਨ ਸਲ੍ਲੇਨ ਦਕ੍ਖਿਣਪਸ੍ਸੇਨ ਪਵਿਸਿਤ੍ਵਾ ਵਾਮਪਸ੍ਸਤੋ ਵਿਨਿਵਿਜ੍ਝਨਵਸੇਨ ਵਿਦ੍ਧੋਪਿ ਕਿਞ੍ਚਿ ਕਾਯਵਿਕਾਰਂ ਅਕਤ੍ਵਾ ਉਦਕਘਟਸ੍ਸ ਭੂਮਿਯਂ ਨਿਕ੍ਖਿਪਨਂ, ਵਧਕੇ ਅਞ੍ਞਾਤੇਪਿ ਞਾਤੇ ਵਿਯ ਚਿਤ੍ਤਵਿਕਾਰਾਭਾਵੋ, ਪਿਯਵਚਨੇਨ ਸਮੁਦਾਚਾਰੋ, ਮਾਤਾਪਿਤੁਉਪਟ੍ਠਾਨਪੁਞ੍ਞਤੋ ਮਯ੍ਹਂ ਪਰਿਹਾਨੀਤਿ ਅਨੁਸੋਚਨਮਤ੍ਤਂ, ਅਰੋਗੇ ਜਾਤੇ ਰਞ੍ਞੋ ਕਾਰੁਞ੍ਞਂ ਮੇਤ੍ਤਞ੍ਚ ਉਪਟ੍ਠਾਪੇਤ੍ਵਾ ਧਮ੍ਮਦੇਸਨਾ, ਓਵਾਦਦਾਨਨ੍ਤਿ ਏਵਮਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਸੁਵਣ੍ਣਸਾਮਚਰਿਯਾਵਣ੍ਣਨਾ ਨਿਟ੍ਠਿਤਾ.