੧੪. ਏਕਰਾਜਚਰਿਯਾਵਣ੍ਣਨਾ

੧੧੪. ਚੁਦ੍ਦਸਮੇ ਏਕਰਾਜਾਤਿ ਵਿਸ੍ਸੁਤੋਤਿ ਏਕਰਾਜਾਤਿ ਇਮਿਨਾ ਅਨ੍ਵਤ੍ਥਨਾਮੇਨ ਜਮ੍ਬੁਦੀਪਤਲੇ ਪਾਕਟੋ.

ਮਹਾਸਤ੍ਤੋ ਹਿ ਤਦਾ ਬਾਰਾਣਸਿਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਵਯਪ੍ਪਤ੍ਤੋ ਸਬ੍ਬਸਿਪ੍ਪਨਿਪ੍ਫਤ੍ਤਿਂ ਪਤ੍ਤੋ ਹੁਤ੍ਵਾ ਪਿਤੁ ਅਚ੍ਚਯੇਨ ਰਜ੍ਜਂ ਕਾਰੇਨ੍ਤੋ ਕੁਸਲਸੀਲਾਚਾਰਸਦ੍ਧਾਸੁਤਾਦਿਅਨਞ੍ਞਸਾਧਾਰਣਗੁਣਵਿਸੇਸਯੋਗੇਨ ਪਾਰਮਿਪਰਿਭਾਵਨੇਨ ਚ ਜਮ੍ਬੁਦੀਪਤਲੇ ਅਦੁਤਿਯਤ੍ਤਾ ਪਧਾਨਭਾਵੇਨ ਚ ‘‘ਏਕਰਾਜਾ’’ਤਿ ਪਕਾਸਨਾਮੋ ਅਹੋਸਿ. ਪਰਮਂ ਸੀਲਂ ਅਧਿਟ੍ਠਾਯਾਤਿ ਸੁਪਰਿਸੁਦ੍ਧਕਾਯਿਕਵਾਚਸਿਕਸਂਵਰਸਙ੍ਖਾਤਞ੍ਚੇਵ ਸੁਪਰਿਸੁਦ੍ਧਮਨੋਸਮਾਚਾਰਸਙ੍ਖਾਤਞ੍ਚ ਪਰਮਂ ਉਤ੍ਤਮਂ ਦਸਕੁਸਲਕਮ੍ਮਪਥਸੀਲਂ ਸਮਾਦਾਨਵਸੇਨ ਚ ਅਵੀਤਿਕ੍ਕਮਨਵਸੇਨ ਚ ਅਧਿਟ੍ਠਹਿਤ੍ਵਾ ਅਨੁਟ੍ਠਹਿਤ੍ਵਾ. ਪਸਾਸਾਮਿ ਮਹਾਮਹਿਨ੍ਤਿ ਤਿਯੋਜਨਸਤਿਕੇ ਕਾਸਿਰਟ੍ਠੇ ਮਹਤਿਂ ਮਹਿਂ ਅਨੁਸਾਸਾਮਿ ਰਜ੍ਜਂ ਕਾਰੇਮਿ.

੧੧੫. ਦਸਕੁਸਲਕਮ੍ਮਪਥੇਤਿ ਪਾਣਾਤਿਪਾਤਾਵੇਰਮਣਿ ਯਾਵ ਸਮ੍ਮਾਦਿਟ੍ਠੀਤਿ ਏਤਸ੍ਮਿਂ ਦਸਵਿਧੇ ਕੁਸਲਕਮ੍ਮਪਥੇ, ਏਤੇ ਵਾ ਅਨਵਸੇਸਤੋ ਸਮਾਦਾਯ ਵਤ੍ਤਾਮਿ. ਚਤੂਹਿ ਸਙ੍ਗਹਵਤ੍ਥੂਹੀਤਿ ਦਾਨਂ ਪਿਯਵਚਨਂ ਅਤ੍ਥਚਰਿਯਾ ਸਮਾਨਤ੍ਤਤਾਤਿ ਇਮੇਹਿ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਣ੍ਹਨਕਾਰਣੇਹਿ ਯਦਾ ਏਕਰਾਜਾਤਿ ਵਿਸ੍ਸੁਤੋ ਹੋਮਿ, ਤਦਾ ਯਥਾਰਹਂ ਮਹਾਜਨਂ ਸਙ੍ਗਣ੍ਹਾਮੀਤਿ ਸਮ੍ਬਨ੍ਧੋ.

੧੧੬. ਏਵਨ੍ਤਿ ਦਸਕੁਸਲਕਮ੍ਮਪਥਸੀਲਪਰਿਪੂਰਣਂ ਚਤੂਹਿ ਸਙ੍ਗਹਵਤ੍ਥੂਹਿ ਮਹਾਜਨਸਙ੍ਗਣ੍ਹਨਨ੍ਤਿ ਯਥਾਵੁਤ੍ਤੇਨ ਇਮਿਨਾ ਆਕਾਰੇਨ ਅਪ੍ਪਮਤ੍ਤਸ੍ਸ. ਇਧਲੋਕੇ ਪਰਤ੍ਥ ਚਾਤਿ ਇਮਸ੍ਮਿਂ ਲੋਕੇ ਯਂ ਅਪ੍ਪਮਜ੍ਜਨਂ, ਤਤ੍ਥ ਦਿਟ੍ਠਧਮ੍ਮਿਕੇ ਅਤ੍ਥੇ, ਪਰਲੋਕੇ ਯਂ ਅਪ੍ਪਮਜ੍ਜਨਂ ਤਤ੍ਥ ਸਮ੍ਪਰਾਯਿਕੇ ਅਤ੍ਥੇ ਅਪ੍ਪਮਤ੍ਤਸ੍ਸ ਮੇ ਸਤੋਤਿ ਅਤ੍ਥੋ. ਦਬ੍ਬਸੇਨੋਤਿ ਏਵਂਨਾਮਕੋ ਕੋਸਲਰਾਜਾ. ਉਪਗਨ੍ਤ੍ਵਾਤਿ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਅਬ੍ਭੁਯ੍ਯਾਨਵਸੇਨ ਮਮ ਰਜ੍ਜਂ ਉਪਗਨ੍ਤ੍ਵਾ. ਅਚ੍ਛਿਨ੍ਦਨ੍ਤੋ ਪੁਰਂ ਮਮਾਤਿ ਮਮ ਬਾਰਾਣਸਿਨਗਰਂ ਬਲਕ੍ਕਾਰੇਨ ਗਣ੍ਹਨ੍ਤੋ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਮਹਾਸਤ੍ਤੋ ਹਿ ਤਦਾ ਨਗਰਸ੍ਸ ਚਤੂਸੁ ਦ੍ਵਾਰੇਸੁ ਚਤਸ੍ਸੋ ਮਜ੍ਝੇ ਏਕਂ ਨਿਵੇਸਨਦ੍ਵਾਰੇ ਏਕਨ੍ਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਕਪਣਦ੍ਧਿਕਾਦੀਨਂ ਦਾਨਂ ਦੇਤਿ, ਸੀਲਂ ਰਕ੍ਖਤਿ, ਉਪੋਸਥਕਮ੍ਮਂ ਕਰੋਤਿ, ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨੋ ਅਙ੍ਕੇ ਨਿਸਿਨ੍ਨਂ ਪੁਤ੍ਤਂ ਪਰਿਤੋਸਯਮਾਨੋ ਵਿਯ ਸਬ੍ਬਸਤ੍ਤੇ ਪਰਿਤੋਸਯਮਾਨੋ ਧਮ੍ਮੇਨ ਰਜ੍ਜਂ ਕਾਰੇਤਿ. ਤਸ੍ਸੇਕੋ ਅਮਚ੍ਚੋ ਅਨ੍ਤੇਪੁਰਂ ਪਦੁਸ੍ਸਿਤ੍ਵਾ ਅਪਰਭਾਗੇ ਪਾਕਟੋਵ ਜਾਤੋ. ਅਮਚ੍ਚਾ ਰਞ੍ਞੋ ਆਰੋਚੇਸੁਂ. ਰਾਜਾ ਪਰਿਗ੍ਗਣ੍ਹਨ੍ਤੋ ਤਂ ਅਤ੍ਤਨਾ ਪਚ੍ਚਕ੍ਖਤੋ ਞਤ੍ਵਾ ਤਂ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ‘‘ਅਨ੍ਧਬਾਲ, ਅਯੁਤ੍ਤਂ ਤੇ ਕਤਂ, ਨ ਤ੍ਵਂ ਮਮ ਵਿਜਿਤੇ ਵਸਿਤੁਂ ਅਰਹਸਿ, ਅਤ੍ਤਨੋ ਧਨਞ੍ਚ ਪੁਤ੍ਤਦਾਰਞ੍ਚ ਗਹੇਤ੍ਵਾ ਅਞ੍ਞਤ੍ਥ ਯਾਹੀ’’ਤਿ ਰਟ੍ਠਾ ਪਬ੍ਬਾਜੇਸਿ.

ਸੋ ਕੋਸਲਜਨਪਦਂ ਗਨ੍ਤ੍ਵਾ ਦਬ੍ਬਸੇਨਂ ਨਾਮ ਕੋਸਲਰਾਜਾਨਂ ਉਪਟ੍ਠਹਨ੍ਤੋ ਅਨੁਕ੍ਕਮੇਨ ਤਸ੍ਸ ਵਿਸ੍ਸਾਸਿਕੋ ਹੁਤ੍ਵਾ ਏਕਦਿਵਸਂ ਤਂ ਰਾਜਾਨਂ ਆਹ – ‘‘ਦੇਵ, ਬਾਰਾਣਸਿਰਜ੍ਜਂ ਨਿਮ੍ਮਕ੍ਖਿਕਮਧੁਪਟਲਸਦਿਸਂ, ਅਤਿਮੁਦੁਕੋ ਰਾਜਾ, ਸੁਖੇਨੇਵ ਤਂ ਰਜ੍ਜਂ ਗਣ੍ਹਿਤੁਂ ਸਕ੍ਕੋਸੀ’’ਤਿ. ਦਬ੍ਬਸੇਨੋ ਬਾਰਾਣਸਿਰਞ੍ਞੋ ਮਹਾਨੁਭਾਵਤਾਯ ਤਸ੍ਸ ਵਚਨਂ ਅਸਦ੍ਦਹਨ੍ਤੋ ਮਨੁਸ੍ਸੇ ਪੇਸੇਤ੍ਵਾ ਕਾਸਿਰਟ੍ਠੇ ਗਾਮਘਾਤਾਦੀਨਿ ਕਾਰੇਤ੍ਵਾ ਤੇਸਂ ਚੋਰਾਨਂ ਬੋਧਿਸਤ੍ਤੇਨ ਧਨਂ ਦਤ੍ਵਾ ਵਿਸ੍ਸਜ੍ਜਿਤਭਾਵਂ ਸੁਤ੍ਵਾ ‘‘ਅਤਿਵਿਯ ਧਮ੍ਮਿਕੋ ਰਾਜਾ’’ਤਿ ਞਤ੍ਵਾ ‘‘ਬਾਰਾਣਸਿਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਬਲਵਾਹਨਂ ਆਦਾਯ ਨਿਯ੍ਯਾਸਿ. ਅਥ ਬਾਰਾਣਸਿਰਞ੍ਞੋ ਮਹਾਯੋਧਾ ‘‘ਕੋਸਲਰਾਜਾ ਆਗਚ੍ਛਤੀ’’ਤਿ ਸੁਤ੍ਵਾ ‘‘ਅਮ੍ਹਾਕਂ ਰਜ੍ਜਸੀਮਂ ਅਨੋਕ੍ਕਮਨ੍ਤਮੇਵ ਨਂ ਪੋਥੇਤ੍ਵਾ ਗਣ੍ਹਾਮਾ’’ਤਿ ਅਤ੍ਤਨੋ ਰਞ੍ਞੋ ਵਦਿਂਸੁ.

ਬੋਧਿਸਤ੍ਤੋ ‘‘ਤਾਤਾ, ਮਂ ਨਿਸ੍ਸਾਯ ਅਞ੍ਞੇਸਂ ਕਿਲਮਨਕਿਚ੍ਚਂ ਨਤ੍ਥਿ, ਰਜ੍ਜਤ੍ਥਿਕਾ ਰਜ੍ਜਂ ਗਣ੍ਹਨ੍ਤੁ, ਮਾ ਗਮਿਤ੍ਥਾ’’ਤਿ ਨਿਵਾਰੇਸਿ. ਕੋਸਲਰਾਜਾ ਜਨਪਦਮਜ੍ਝਂ ਪਾਵਿਸਿ. ਮਹਾਯੋਧਾ ਪੁਨਪਿ ਰਞ੍ਞੋ ਤਥੇਵ ਵਦਿਂਸੁ. ਰਾਜਾ ਪੁਰਿਮਨਯੇਨੇਵ ਨਿਵਾਰੇਸਿ. ਦਬ੍ਬਸੇਨੋ ਬਹਿਨਗਰੇ ਠਤ੍ਵਾ ‘‘ਰਜ੍ਜਂ ਵਾ ਦੇਤੁ ਯੁਦ੍ਧਂ ਵਾ’’ਤਿ ਏਕਰਾਜਸ੍ਸ ਸਾਸਨਂ ਪੇਸੇਸਿ. ਏਕਰਾਜਾ ‘‘ਨਤ੍ਥਿ ਮਯਾ ਯੁਦ੍ਧਂ, ਰਜ੍ਜਂ ਗਣ੍ਹਾਤੂ’’ਤਿ ਪਟਿਸਾਸਨਂ ਪੇਸੇਸਿ. ਪੁਨਪਿ ਮਹਾਯੋਧਾ ‘‘ਦੇਵ, ਨ ਮਯਂ ਕੋਸਲਰਞ੍ਞੋ ਨਗਰਂ ਪਵਿਸਿਤੁਂ ਦੇਮ, ਬਹਿਨਗਰੇਯੇਵ ਨਂ ਪੋਥੇਤ੍ਵਾ ਗਣ੍ਹਾਮਾ’’ਤਿ ਆਹਂਸੁ. ਰਾਜਾ ਪੁਰਿਮਨਯੇਨੇਵ ਨਿਵਾਰੇਤ੍ਵਾ ਨਗਰਦ੍ਵਾਰਾਨਿ ਅਵਾਪੁਰਾਪੇਤ੍ਵਾ ਮਹਾਤਲੇ ਪਲ੍ਲਙ੍ਕਮਜ੍ਝੇ ਨਿਸੀਦਿ. ਦਬ੍ਬਸੇਨੋ ਮਹਨ੍ਤੇਨ ਬਲਵਾਹਨੇਨ ਨਗਰਂ ਪਵਿਸਿਤ੍ਵਾ ਏਕਮ੍ਪਿ ਪਟਿਸਤ੍ਤੁਂ ਅਪਸ੍ਸਨ੍ਤੋ ਸਬ੍ਬਰਜ੍ਜਂ ਹਤ੍ਥਗਤਂ ਕਤ੍ਵਾ ਰਾਜਨਿਵੇਸਨਂ ਗਨ੍ਤ੍ਵਾ ਮਹਾਤਲਂ ਆਰੁਯ੍ਹ ਨਿਰਪਰਾਧਂ ਬੋਧਿਸਤ੍ਤਂ ਗਣ੍ਹਾਪੇਤ੍ਵਾ ਆਵਾਟੇ ਨਿਖਣਾਪੇਸਿ. ਤੇਨ ਵੁਤ੍ਤਂ –

‘‘ਦਬ੍ਬਸੇਨੋ ਉਪਗਨ੍ਤ੍ਵਾ, ਅਚ੍ਛਿਨ੍ਦਨ੍ਤੋ ਪੁਰਂ ਮਮ.

੧੧੭. ‘‘ਰਾਜੂਪਜੀਵੇ ਨਿਗਮੇ, ਸਬਲਟ੍ਠੇ ਸਰਟ੍ਠਕੇ;

ਸਬ੍ਬਂ ਹਤ੍ਥਗਤਂ ਕਤ੍ਵਾ, ਕਾਸੁਯਾ ਨਿਖਣੀ ਮਮ’’ਨ੍ਤਿ.

ਤਤ੍ਥ ਰਾਜੂਪਜੀਵੇਤਿ ਅਮਚ੍ਚਪਾਰਿਸਜ੍ਜਬ੍ਰਾਹ੍ਮਣਗਹਪਤਿਆਦਿਕੇ ਰਾਜਾਨਂ ਉਪਨਿਸ੍ਸਾਯ ਜੀਵਨ੍ਤੇ. ਨਿਗਮੇਤਿ ਨੇਗਮੇ. ਸਬਲਟ੍ਠੇਤਿ ਸੇਨਾਪਰਿਯਾਪਨ੍ਨਤਾਯ ਬਲੇ ਤਿਟ੍ਠਨ੍ਤੀਤਿ ਬਲਟ੍ਠਾ, ਹਤ੍ਥਾਰੋਹਾਦਯੋ, ਬਲਟ੍ਠੇਹਿ ਸਹਾਤਿ ਸਬਲਟ੍ਠੇ. ਸਰਟ੍ਠਕੇਤਿ ਸਜਨਪਦੇ, ਰਾਜੂਪਜੀਵੇ ਨਿਗਮੇ ਚ ਅਞ੍ਞਞ੍ਚ ਸਬ੍ਬਂ ਹਤ੍ਥਗਤਂ ਕਤ੍ਵਾ. ਕਾਸੁਯਾ ਨਿਖਣੀ ਮਮਨ੍ਤਿ ਸਬਲਵਾਹਨਂ ਸਕਲਂ ਮਮ ਰਜ੍ਜਂ ਗਹੇਤ੍ਵਾ ਮਮ੍ਪਿ ਗਲਪ੍ਪਮਾਣੇ ਆਵਾਟੇ ਨਿਖਣਾਪੇਸਿ. ਜਾਤਕੇਪਿ –

‘‘ਅਨੁਤ੍ਤਰੇ ਕਾਮਗੁਣੇ ਸਮਿਦ੍ਧੇ, ਭੁਤ੍ਵਾਨ ਪੁਬ੍ਬੇ ਵਸਿ ਏਕਰਾਜਾ;

ਸੋ ਦਾਨਿ ਦੁਗ੍ਗੇ ਨਰਕਮ੍ਹਿ ਖਿਤ੍ਤੋ, ਨਪ੍ਪਜ੍ਜਹੇ ਵਣ੍ਣਬਲਂ ਪੁਰਾਣ’’ਨ੍ਤਿ. (ਜਾ. ੧.੪.੯) –

ਆਵਾਟੇ ਖਿਤ੍ਤਭਾਵੋ ਆਗਤੋ. ਜਾਤਕਟ੍ਠਕਥਾਯਂ (ਜਾ. ਅਟ੍ਠ. ੩.੪.੯) ਪਨ ‘‘ਸਿਕ੍ਕਾਯ ਪਕ੍ਖਿਪਾਪੇਤ੍ਵਾ ਉਤ੍ਤਰੁਮ੍ਮਾਰੇ ਹੇਟ੍ਠਾਸੀਸਕਂ ਓਲਮ੍ਬੇਸੀ’’ਤਿ ਵੁਤ੍ਤਂ.

ਮਹਾਸਤ੍ਤੋ ਚੋਰਰਾਜਾਨਂ ਆਰਬ੍ਭ ਮੇਤ੍ਤਂ ਭਾਵੇਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਕਾਸੁਤੋ ਉਗ੍ਗਨ੍ਤ੍ਵਾ ਆਕਾਸੇ ਪਲ੍ਲਙ੍ਕੇਨ ਨਿਸੀਦਿ. ਤੇਨ ਵੁਤ੍ਤਂ –

੧੧੮. ‘‘ਅਮਚ੍ਚਮਣ੍ਡਲਂ ਰਜ੍ਜਂ, ਫੀਤਂ ਅਨ੍ਤੇਪੁਰਂ ਮਮ;

ਅਚ੍ਛਿਨ੍ਦਿਤ੍ਵਾਨ ਗਹਿਤਂ, ਪਿਯਪੁਤ੍ਤਂਵ ਪਸ੍ਸਹ’’ਨ੍ਤਿ.

ਤਤ੍ਥ ਅਮਚ੍ਚਮਣ੍ਡਲਨ੍ਤਿ ਤਸ੍ਮਿਂ ਤਸ੍ਮਿਂ ਰਾਜਕਿਚ੍ਚੇ ਰਞ੍ਞਾ ਅਮਾ ਸਹ ਵਤ੍ਤਨ੍ਤੀਤਿ ਅਮਚ੍ਚਾ, ਸਦ੍ਧਿਂ ਵਾ ਤੇਸਂ ਮਣ੍ਡਲਂ ਸਮੂਹਂ. ਫੀਤਨ੍ਤਿ ਬਲਵਾਹਨੇਨ ਨਗਰਜਨਪਦਾਦੀਹਿ ਸਮਿਦ੍ਧਂ ਰਜ੍ਜਂ. ਇਤ੍ਥਾਗਾਰਦਾਸਿਦਾਸਪਰਿਜਨੇਹਿ ਚੇਵ ਵਤ੍ਥਾਭਰਣਾਦਿਉਪਭੋਗੂਪਕਰਣੇਹਿ ਚ ਸਮਿਦ੍ਧਂ ਮਮ ਅਨ੍ਤੇਪੁਰਞ੍ਚ ਅਚ੍ਛਿਨ੍ਦਿਤ੍ਵਾ ਗਹਿਤਕਂ ਗਣ੍ਹਨ੍ਤਂ ਅਮਿਤ੍ਤਰਾਜਾਨਂ ਯਾਯ ਅਤ੍ਤਨੋ ਪਿਯਪੁਤ੍ਤਂਵ ਪਸ੍ਸਿਂ ਅਹਂ, ਤਾਯ ਏਵਂਭੂਤਾਯ ਮੇਤ੍ਤਾਯ ਮੇ ਸਮੋ ਸਕਲਲੋਕੇ ਨਤ੍ਥਿ, ਤਸ੍ਮਾ ਏਵਂਭੂਤਾ ਏਸਾ ਮੇ ਮੇਤ੍ਤਾਪਾਰਮੀ ਪਰਮਤ੍ਥਪਾਰਮਿਭਾਵਂ ਪਤ੍ਤਾਤਿ ਅਧਿਪ੍ਪਾਯੋ.

ਏਵਂ ਪਨ ਮਹਾਸਤ੍ਤੇ ਤਂ ਚੋਰਰਾਜਾਨਂ ਆਰਬ੍ਭ ਮੇਤ੍ਤਂ ਫਰਿਤ੍ਵਾ ਆਕਾਸੇ ਪਲ੍ਲਙ੍ਕੇਨ ਨਿਸਿਨ੍ਨੇ ਤਸ੍ਸ ਸਰੀਰੇ ਦਾਹੋ ਉਪ੍ਪਜ੍ਜਿ. ਸੋ ‘‘ਡਯ੍ਹਾਮਿ ਡਯ੍ਹਾਮੀ’’ਤਿ ਭੂਮਿਯਂ ਅਪਰਾਪਰਂ ਪਰਿਵਤ੍ਤਤਿ. ‘‘ਕਿਮੇਤ’’ਨ੍ਤਿ ਵੁਤ੍ਤੇ, ਮਹਾਰਾਜ, ਤੁਮ੍ਹੇ ਨਿਰਪਰਾਧਂ ਧਮ੍ਮਿਕਰਾਜਾਨਂ ਆਵਾਟੇ ਨਿਖਣਾਪਯਿਤ੍ਥਾਤਿ. ‘‘ਤੇਨ ਹਿ ਵੇਗੇਨ ਗਨ੍ਤ੍ਵਾ ਤਂ ਉਦ੍ਧਰਥਾ’’ਤਿ ਆਹ. ਪੁਰਿਸਾ ਗਨ੍ਤ੍ਵਾ ਤਂ ਰਾਜਾਨਂ ਆਕਾਸੇ ਪਲ੍ਲਙ੍ਕੇਨ ਨਿਸਿਨ੍ਨਂ ਦਿਸ੍ਵਾ ਆਗਨ੍ਤ੍ਵਾ ਦਬ੍ਬਸੇਨਸ੍ਸ ਆਰੋਚੇਸੁਂ. ਸੋ ਵੇਗੇਨ ਗਨ੍ਤ੍ਵਾ ਵਨ੍ਦਿਤ੍ਵਾ ਖਮਾਪੇਤ੍ਵਾ ‘‘ਤੁਮ੍ਹਾਕਂ ਰਜ੍ਜਂ ਤੁਮ੍ਹੇਵ ਕਾਰੇਥ, ਅਹਂ ਵੋ ਚੋਰੇ ਪਟਿਬਾਹੇਸ੍ਸਾਮੀ’’ਤਿ ਵਤ੍ਵਾ ਤਸ੍ਸ ਦੁਟ੍ਠਾਮਚ੍ਚਸ੍ਸ ਰਾਜਾਣਂ ਕਾਰੇਤ੍ਵਾ ਪਕ੍ਕਾਮਿ. ਬੋਧਿਸਤ੍ਤੋਪਿ ਰਜ੍ਜਂ ਅਮਚ੍ਚਾਨਂ ਨਿਯ੍ਯਾਤੇਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਮਹਾਜਨਂ ਸੀਲਾਦਿਗੁਣੇਸੁ ਪਤਿਟ੍ਠਾਪੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨੋ ਅਹੋਸਿ.

ਤਦਾ ਦਬ੍ਬਸੇਨੋ ਆਨਨ੍ਦਤ੍ਥੇਰੋ ਅਹੋਸਿ, ਏਕਰਾਜਾ ਲੋਕਨਾਥੋ.

ਤਸ੍ਸ ਦਿਵਸੇ ਦਿਵਸੇ ਛਸੁ ਦਾਨਸਾਲਾਸੁ ਛਸਤਸਹਸ੍ਸਵਿਸ੍ਸਜ੍ਜਨੇਨ ਪਚ੍ਚਤ੍ਥਿਕਰਞ੍ਞੋ ਸਕਲਰਜ੍ਜਪਰਿਚ੍ਚਾਗੇਨ ਚ ਦਾਨਪਾਰਮੀ, ਨਿਚ੍ਚਸੀਲਉਪੋਸਥਕਮ੍ਮਵਸੇਨ ਪਬ੍ਬਜਿਤਸ੍ਸ ਅਨਵਸੇਸਸੀਲਸਂਵਰਵਸੇਨ ਚ ਸੀਲਪਾਰਮੀ, ਪਬ੍ਬਜ੍ਜਾਵਸੇਨ ਝਾਨਾਧਿਗਮਵਸੇਨ ਚ ਨੇਕ੍ਖਮ੍ਮਪਾਰਮੀ, ਸਤ੍ਤਾਨਂ ਹਿਤਾਹਿਤਵਿਚਾਰਣਵਸੇਨ ਦਾਨਸੀਲਾਦਿਸਂਵਿਦਹਨਵਸੇਨ ਚ ਪਞ੍ਞਾਪਾਰਮੀ, ਦਾਨਾਦਿਪੁਞ੍ਞਸਮ੍ਭਾਰਸ੍ਸ ਅਬ੍ਭੁਸ੍ਸਹਨਵਸੇਨ ਕਾਮਵਿਤਕ੍ਕਾਦਿਵਿਨੋਦਨਵਸੇਨ ਚ ਵੀਰਿਯਪਾਰਮੀ, ਦੁਟ੍ਠਾਮਚ੍ਚਸ੍ਸ ਦਬ੍ਬਸੇਨਰਞ੍ਞੋ ਚ ਅਪਰਾਧਸਹਨਵਸੇਨ ਖਨ੍ਤਿਪਾਰਮੀ, ਯਥਾਪਟਿਞ੍ਞਂ ਦਾਨਾਦਿਨਾ ਅਵਿਸਂਵਾਦਨਵਸੇਨ ਚ ਸਚ੍ਚਪਾਰਮੀ, ਦਾਨਾਦੀਨਂ ਅਚਲਸਮਾਦਾਨਾਧਿਟ੍ਠਾਨਵਸੇਨ ਅਧਿਟ੍ਠਾਨਪਾਰਮੀ, ਪਚ੍ਚਤ੍ਥਿਕੇਪਿ ਏਕਨ੍ਤੇਨ ਹਿਤੂਪਸਂਹਾਰਵਸੇਨ ਮੇਤ੍ਤਾਝਾਨਨਿਬ੍ਬਤ੍ਤਨੇਨ ਚ ਮੇਤ੍ਤਾਪਾਰਮੀ, ਦੁਟ੍ਠਾਮਚ੍ਚੇਨ ਦਬ੍ਬਸੇਨੇਨ ਚ ਕਤਾਪਰਾਧੇ ਹਿਤੇਸੀਹਿ ਅਤ੍ਤਨੋ ਅਮਚ੍ਚਾਦੀਹਿ ਨਿਬ੍ਬਤ੍ਤਿਤੇ ਉਪਕਾਰੇ ਚ ਅਜ੍ਝੁਪੇਕ੍ਖਣੇਨ ਰਜ੍ਜਸੁਖਪ੍ਪਤ੍ਤਕਾਲੇ ਪਚ੍ਚਤ੍ਥਿਕਰਞ੍ਞਾ ਨਰਕੇ ਖਿਤ੍ਤਕਾਲੇ ਸਮਾਨਚਿਤ੍ਤਤਾਯ ਚ ਉਪੇਕ੍ਖਾਪਾਰਮੀ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ –

‘‘ਪਨੁਜ੍ਜ ਦੁਕ੍ਖੇਨ ਸੁਖਂ ਜਨਿਨ੍ਦ, ਸੁਖੇਨ ਵਾ ਦੁਕ੍ਖਮਸਯ੍ਹਸਾਹਿ;

ਉਭਯਤ੍ਥ ਸਨ੍ਤੋ ਅਭਿਨਿਬ੍ਬੁਤਤ੍ਤਾ, ਸੁਖੇ ਚ ਦੁਕ੍ਖੇ ਚ ਭਵਨ੍ਤਿ ਤੁਲ੍ਯਾ’’ਤਿ. (ਜਾ. ੧.੪.੧੨);

ਯਸ੍ਮਾ ਪਨੇਤ੍ਥ ਮੇਤ੍ਤਾਪਾਰਮੀ ਅਤਿਸਯਵਤੀ, ਤਸ੍ਮਾ ਤਦਤ੍ਥਦੀਪਨਤ੍ਥਂ ਸਾ ਏਵ ਪਾਲ਼ਿ ਆਰੁਲ਼੍ਹਾ. ਤਥਾ ਇਧ ਮਹਾਸਤ੍ਤਸ੍ਸ ਸਬ੍ਬਸਤ੍ਤੇਸੁ ਓਰਸਪੁਤ੍ਤੇ ਵਿਯ ਸਮਾਨੁਕਮ੍ਪਤਾਦਯੋ ਗੁਣਵਿਸੇਸਾ ਨਿਦ੍ਧਾਰੇਤਬ੍ਬਾਤਿ.

ਏਕਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.

ਮੇਤ੍ਤਾਪਾਰਮੀ ਨਿਟ੍ਠਿਤਾ.