੮. ਸਚ੍ਚਤਾਪਸਚਰਿਯਾਵਣ੍ਣਨਾ

ਅਟ੍ਠਮੇ ਤਾਪਸੋ ਸਚ੍ਚਸਵ੍ਹਯੋਤਿ ਸਚ੍ਚਸਦ੍ਦੇਨ ਅਵ੍ਹਾਤਬ੍ਬੋ ਸਚ੍ਚਨਾਮਕੋ ਤਾਪਸੋ ਯਦਾ ਯਸ੍ਮਿਂ ਕਾਲੇ ਹੋਮਿ, ਤਦਾ. ਸਚ੍ਚੇਨ ਲੋਕਂ ਪਾਲੇਸਿਨ੍ਤਿ ਅਤ੍ਤਨੋ ਅਵਿਸਂਵਾਦਿਭਾਵੇਨ ਸਤ੍ਤਲੋਕਂ ਜਮ੍ਬੁਦੀਪੇ ਤਤ੍ਥ ਤਤ੍ਥ ਸਤ੍ਤਨਿਕਾਯਂ ਪਾਪਤੋ ਨਾਨਾਵਿਧਾ ਅਨਤ੍ਥਤੋ ਚ ਰਕ੍ਖਿਂ. ਸਮਗ੍ਗਂ ਜਨਮਕਾਸਹਨ੍ਤਿ ਤਤ੍ਥ ਤਤ੍ਥ ਕਲਹਵਿਗ੍ਗਹਵਿਵਾਦਾਪਨ੍ਨਂ ਮਹਾਜਨਂ ਕਲਹੇ ਆਦੀਨਵਂ ਦਸ੍ਸੇਤ੍ਵਾ ਸਾਮਗ੍ਗਿਯਂ ਆਨਿਸਂਸਕਥਨੇਨ ਸਮਗ੍ਗਂ ਅਵਿਵਦਮਾਨਂ ਸਮ੍ਮੋਦਮਾਨਂ ਅਹਮਕਾਸਿਂ.

ਤਦਾ ਹਿ ਬੋਧਿਸਤ੍ਤੋ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ. ਤਸ੍ਸ ‘‘ਸਚ੍ਚੋ’’ਤਿ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਨਚਿਰਸ੍ਸੇਵ ਸਬ੍ਬਸਿਪ੍ਪਾਨਂ ਨਿਪ੍ਫਤ੍ਤਿਂ ਪਤ੍ਤੋ. ਆਚਰਿਯੇਨ ਅਨੁਞ੍ਞਾਤੋ ਬਾਰਾਣਸਿਂ ਪਚ੍ਚਾਗਨ੍ਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਤੇਹਿ ਅਭਿਨਨ੍ਦਿਯਮਾਨੋ ਤੇਸਂ ਚਿਤ੍ਤਾਨੁਰਕ੍ਖਣਤ੍ਥਂ ਕਤਿਪਾਹਂ ਤੇਸਂ ਸਨ੍ਤਿਕੇ ਵਸਿ. ਅਥ ਨਂ ਮਾਤਾਪਿਤਰੋ ਪਤਿਰੂਪੇਨ ਦਾਰੇਨ ਸਂਯੋਜੇਤੁਕਾਮਾ ਸਬ੍ਬਂ ਵਿਭਵਜਾਤਂ ਆਚਿਕ੍ਖਿਤ੍ਵਾ ਘਰਾਵਾਸੇਨ ਨਿਮਨ੍ਤੇਸੁਂ.

ਮਹਾਸਤ੍ਤੋ ਨੇਕ੍ਖਮ੍ਮਜ੍ਝਾਸਯੋ ਅਤ੍ਤਨੋ ਨੇਕ੍ਖਮ੍ਮਪਾਰਮਿਂ ਪਰਿਬ੍ਰੂਹੇਤੁਕਾਮੋ ਘਰਾਵਾਸੇ ਆਦੀਨਵਂ ਪਬ੍ਬਜ੍ਜਾਯ ਆਨਿਸਂਸਞ੍ਚ ਨਾਨਪ੍ਪਕਾਰਤੋ ਕਥੇਤ੍ਵਾ ਮਾਤਾਪਿਤੂਨਂ ਅਸ੍ਸੁਮੁਖਾਨਂ ਰੋਦਮਾਨਾਨਂ ਅਪਰਿਮਾਣਂ ਭੋਗਕ੍ਖਨ੍ਧਂ ਅਨਨ੍ਤਂ ਯਸਂ ਮਹਨ੍ਤਞ੍ਚ ਞਾਤਿਪਰਿਵਟ੍ਟਂ ਪਹਾਯ ਮਹਾਨਾਗੋਵ ਅਯਸਙ੍ਖਲਿਕਂ ਘਰਬਨ੍ਧਨਂ ਛਿਨ੍ਦਨ੍ਤੋ ਨਿਕ੍ਖਮਿਤ੍ਵਾ ਹਿਮਵਨ੍ਤਪ੍ਪਦੇਸਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਨਮੂਲਫਲਾਫਲੇਹਿ ਯਾਪੇਨ੍ਤੋ ਨਚਿਰਸ੍ਸੇਵ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਝਾਨਕੀਲ਼ਂ ਕੀਲ਼ਯਮਾਨੋ ਸਮਾਪਤ੍ਤਿਵਿਹਾਰੇਨ ਵਿਹਰਤਿ.

ਸੋ ਏਕਦਿਵਸਂ ਦਿਬ੍ਬਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਅਦ੍ਦਸ ਸਕਲਜਮ੍ਬੁਦੀਪੇ ਮਨੁਸ੍ਸੇ ਯੇਭੁਯ੍ਯੇਨ ਪਾਣਾਤਿਪਾਤਾਦਿਦਸਅਕੁਸਲਕਮ੍ਮਪਥਪਸੁਤੇ ਕਾਮਨਿਦਾਨਂ ਕਾਮਾਧਿਕਰਣਂ ਅਞ੍ਞਮਞ੍ਞਂ ਵਿਵਾਦਾਪਨ੍ਨੇ. ਦਿਸ੍ਵਾ ਏਵਂ ਚਿਨ੍ਤੇਸਿ – ‘‘ਨ ਖੋ ਪਨ ਮੇਤਂ ਪਤਿਰੂਪਂ, ਯਦਿਦਂ ਇਮੇ ਸਤ੍ਤੇ ਏਵਂ ਪਾਪਪਸੁਤੇ ਵਿਵਾਦਾਪਨ੍ਨੇ ਚ ਦਿਸ੍ਵਾ ਅਜ੍ਝੁਪੇਕ੍ਖਣਂ. ਅਹਞ੍ਹਿ ‘ਸਤ੍ਤੇ ਸਂਸਾਰਪਙ੍ਕਤੋ ਉਦ੍ਧਰਿਤ੍ਵਾ ਨਿਬ੍ਬਾਨਥਲੇ ਪਤਿਟ੍ਠਪੇਸ੍ਸਾਮੀ’ਤਿ ਮਹਾਸਮ੍ਬੋਧਿਯਾਨਂ ਪਟਿਪਨ੍ਨੋ, ਤਸ੍ਮਾ ਤਂ ਪਟਿਞ੍ਞਂ ਅਵਿਸਂਵਾਦੇਨ੍ਤੋ ਯਂਨੂਨਾਹਂ ਮਨੁਸ੍ਸਪਥਂ ਗਨ੍ਤ੍ਵਾ ਤੇ ਤੇ ਸਤ੍ਤੇ ਪਾਪਤੋ ਓਰਮਾਪੇਯ੍ਯਂ, ਵਿਵਾਦਞ੍ਚ ਨੇਸਂ ਵੂਪਸਮੇਯ੍ਯ’’ਨ੍ਤਿ.

ਏਵਂ ਪਨ ਚਿਨ੍ਤੇਤ੍ਵਾ ਮਹਾਸਤ੍ਤੋ ਮਹਾਕਰੁਣਾਯ ਸਮੁਸ੍ਸਾਹਿਤੋ ਸਨ੍ਤਂ ਸਮਾਪਤ੍ਤਿਸੁਖਂ ਪਹਾਯ ਇਦ੍ਧਿਯਾ ਤਤ੍ਥ ਤਤ੍ਥ ਗਨ੍ਤ੍ਵਾ ਤੇਸਂ ਚਿਤ੍ਤਾਨੁਕੂਲਂ ਧਮ੍ਮਂ ਦੇਸੇਨ੍ਤੋ ਕਲਹਵਿਗ੍ਗਹਵਿਵਾਦਾਪਨ੍ਨੇ ਸਤ੍ਤੇ ਦਿਟ੍ਠਧਮ੍ਮਿਕਞ੍ਚ ਸਮ੍ਪਰਾਯਿਕਞ੍ਚ ਵਿਰੋਧੇ ਆਦੀਨਵਂ ਦਸ੍ਸੇਤ੍ਵਾ ਅਞ੍ਞਮਞ੍ਞਂ ਸਮਗ੍ਗੇ ਸਹਿਤੇ ਅਕਾਸਿ. ਅਨੇਕਾਕਾਰਵੋਕਾਰਞ੍ਚ ਪਾਪੇ ਆਦੀਨਵਂ ਵਿਭਾਵੇਨ੍ਤੋ ਤਤੋ ਸਤ੍ਤੇ ਵਿਵੇਚੇਤ੍ਵਾ ਏਕਚ੍ਚੇ ਦਸਸੁ ਕੁਸਲਕਮ੍ਮਪਥਧਮ੍ਮੇਸੁ ਪਤਿਟ੍ਠਾਪੇਸਿ. ਏਕਚ੍ਚੇ ਪਬ੍ਬਾਜੇਤ੍ਵਾ ਸੀਲਸਂਵਰੇ ਇਨ੍ਦ੍ਰਿਯਗੁਤ੍ਤਿਯਂ ਸਤਿਸਮ੍ਪਜਞ੍ਞੇ ਪਵਿਵੇਕਵਾਸੇ ਝਾਨਾਭਿਞ੍ਞਾਸੁ ਚ ਯਥਾਰਹਂ ਪਤਿਟ੍ਠਾਪੇਸਿ. ਤੇਨ ਵੁਤ੍ਤਂ –

੭੧. ‘‘ਪੁਨਾਪਰਂ ਯਦਾ ਹੋਮਿ, ਤਾਪਸੋ ਸਚ੍ਚਸਵ੍ਹਯੋ;

ਸਚ੍ਚੇਨ ਲੋਕਂ ਪਾਲੇਸਿਂ, ਸਮਗ੍ਗਂ ਜਨਮਕਾਸਹ’’ਨ੍ਤਿ.

ਇਧਾਪਿ ਮਹਾਪੁਰਿਸਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਗੁਣਾਨੁਭਾਵਾ ਚ ਵਿਭਾਵੇਤਬ੍ਬਾਤਿ.

ਸਚ੍ਚਤਾਪਸਚਰਿਯਾਵਣ੍ਣਨਾ ਨਿਟ੍ਠਿਤਾ.