੭. ਕਪਿਰਾਜਚਰਿਯਾਵਣ੍ਣਨਾ

੬੭. ਸਤ੍ਤਮੇ ਯਦਾ ਅਹਂ ਕਪਿ ਆਸਿਨ੍ਤਿ ਯਸ੍ਮਿਂ ਕਾਲੇ ਅਹਂ ਕਪਿਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਮਨ੍ਵਾਯ ਨਾਗਬਲੋ ਥਾਮਸਮ੍ਪਨ੍ਨੋ ਅਸ੍ਸਪੋਤਕਪ੍ਪਮਾਣੋ ਮਹਾਸਰੀਰੋ ਕਪਿ ਹੋਮਿ. ਨਦੀਕੂਲੇ ਦਰੀਸਯੇਤਿ ਏਕਿਸ੍ਸਾ ਨਦਿਯਾ ਤੀਰੇ ਏਕਸ੍ਮਿਂ ਦਰੀਭਾਗੇ ਯਦਾ ਵਾਸਂ ਕਪ੍ਪੇਮੀਤਿ ਅਤ੍ਥੋ.

ਤਦਾ ਕਿਰ ਬੋਧਿਸਤ੍ਤੋ ਯੂਥਪਰਿਹਰਣਂ ਅਕਤ੍ਵਾ ਏਕਚਰੋ ਹੁਤ੍ਵਾ ਵਿਹਾਸਿ. ਤਸ੍ਸਾ ਪਨ ਨਦਿਯਾ ਵੇਮਜ੍ਝੇ ਏਕੋ ਦੀਪਕੋ ਨਾਨਪ੍ਪਕਾਰੇਹਿ ਅਮ੍ਬਪਨਸਾਦੀਹਿ ਫਲਰੁਕ੍ਖੇਹਿ ਸਮ੍ਪਨ੍ਨੋ. ਬੋਧਿਸਤ੍ਤੋ ਥਾਮਜਵਸਮ੍ਪਨ੍ਨਤਾਯ ਨਦਿਯਾ ਓਰਿਮਤੀਰਤੋ ਉਪ੍ਪਤਿਤ੍ਵਾ ਦੀਪਕਸ੍ਸ ਪਨ ਨਦਿਯਾ ਚ ਮਜ੍ਝੇ ਏਕੋ ਪਿਟ੍ਠਿਪਾਸਾਣੋ ਅਤ੍ਥਿ, ਤਸ੍ਮਿਂ ਪਤਤਿ. ਤਤੋ ਉਪ੍ਪਤਿਤ੍ਵਾ ਤਸ੍ਮਿਂ ਦੀਪਕੇ ਪਤਤਿ. ਸੋ ਤਤ੍ਥ ਨਾਨਪ੍ਪਕਾਰਾਨਿ ਫਲਾਫਲਾਨਿ ਖਾਦਿਤ੍ਵਾ ਸਾਯਂ ਤੇਨੇਵ ਉਪਾਯੇਨ ਪਚ੍ਚਾਗਨ੍ਤ੍ਵਾ ਅਤ੍ਤਨੋ ਵਸਨਟ੍ਠਾਨੇ ਵਸਿਤ੍ਵਾ ਪੁਨਦਿਵਸੇਪਿ ਤਥੇਵ ਕਰੋਤਿ. ਇਮਿਨਾ ਨਿਯਾਮੇਨ ਵਾਸਂ ਕਪ੍ਪੇਸਿ.

ਤਸ੍ਮਿਂ ਪਨ ਕਾਲੇ ਏਕੋ ਕੁਮ੍ਭੀਲੋ ਸਪਜਾਪਤਿਕੋ ਤਸ੍ਸਂ ਨਦਿਯਂ ਵਸਤਿ. ਤਸ੍ਸ ਭਰਿਯਾ ਬੋਧਿਸਤ੍ਤਂ ਅਪਰਾਪਰਂ ਗਚ੍ਛਨ੍ਤਂ ਦਿਸ੍ਵਾ ਤਸ੍ਸ ਹਦਯਮਂਸੇ ਦੋਹਲ਼ਂ ਉਪ੍ਪਾਦੇਤ੍ਵਾ ਕੁਮ੍ਭੀਲਂ ਆਹ – ‘‘ਮਯ੍ਹਂ ਖੋ, ਅਯ੍ਯਪੁਤ੍ਤ, ਇਮਸ੍ਸ ਵਾਨਰਸ੍ਸ ਹਦਯਮਂਸੇ ਦੋਹਲ਼ੋ ਉਪ੍ਪਨ੍ਨੋ’’ਤਿ. ਸੋ ‘‘ਸਾਧੁ, ਭਦ੍ਦੇ, ਲਚ੍ਛਸੀ’’ਤਿ ਵਤ੍ਵਾ ‘‘ਅਜ੍ਜ ਤਂ ਸਾਯਂ ਦੀਪਕਤੋ ਆਗਚ੍ਛਨ੍ਤਮੇਵ ਗਣ੍ਹਿਸ੍ਸਾਮੀ’’ਤਿ ਗਨ੍ਤ੍ਵਾ ਪਿਟ੍ਠਿਪਾਸਾਣੇ ਨਿਪਜ੍ਜਿ. ਬੋਧਿਸਤ੍ਤੋ ਤਂ ਦਿਵਸਂ ਗੋਚਰਂ ਚਰਿਤ੍ਵਾ ਸਾਯਨ੍ਹਸਮਯੇ ਦੀਪਕੇ ਠਿਤੋਵ ਪਾਸਾਣਂ ਓਲੋਕੇਤ੍ਵਾ ‘‘ਅਯਂ ਪਾਸਾਣੋ ਇਦਾਨਿ ਉਚ੍ਚਤਰੋ ਖਾਯਤਿ, ਕਿਂ ਨੁ ਖੋ ਕਾਰਣ’’ਨ੍ਤਿ ਚਿਨ੍ਤੇਸਿ. ਮਹਾਸਤ੍ਤਸ੍ਸ ਹਿ ਉਦਕਪ੍ਪਮਾਣਞ੍ਚ ਪਾਸਾਣਪ੍ਪਮਾਣਞ੍ਚ ਸੁਵਵਤ੍ਥਾਪਿਤਮੇਵ ਹੋਤਿ. ਤੇਨਸ੍ਸ ਏਤਦਹੋਸਿ – ‘‘ਅਜ੍ਜ ਇਮਿਸ੍ਸਾ ਨਦਿਯਾ ਉਦਕਂ ਨੇਵ ਹਾਯਤਿ, ਅਥ ਚ ਪਨਾਯਂ ਪਾਸਾਣੋ ਮਹਾ ਹੁਤ੍ਵਾ ਪਞ੍ਞਾਯਤਿ, ਕਚ੍ਚਿ ਨੁ ਖੋ ਏਤ੍ਥ ਮਯ੍ਹਂ ਗਹਣਤ੍ਥਾਯ ਕੁਮ੍ਭੀਲੋ ਨਿਪਨ੍ਨੋ’’ਤਿ?

ਸੋ ‘‘ਵੀਮਂਸਿਸ੍ਸਾਮਿ ਤਾਵ ਨ’’ਨ੍ਤਿ ਤਤ੍ਥੇਵ ਠਤ੍ਵਾ ਪਾਸਾਣੇਨ ਸਦ੍ਧਿਂ ਕਥੇਨ੍ਤੋ ਵਿਯ ‘‘ਭੋ, ਪਾਸਾਣਾ’’ਤਿ ਵਤ੍ਵਾ ਪਟਿਵਚਨਂ ਅਲਭਨ੍ਤੋ ਯਾਵਤਤਿਯਂ ‘‘ਭੋ, ਪਾਸਾਣਾ’’ਤਿ ਆਹ. ਪਾਸਾਣੋ ਪਟਿਵਚਨਂ ਨ ਦੇਤਿ. ਪੁਨਪਿ ਬੋਧਿਸਤ੍ਤੋ ‘‘ਕਿਂ, ਭੋ ਪਾਸਾਣ, ਅਜ੍ਜ ਮਯ੍ਹਂ ਪਟਿਵਚਨਂ ਨ ਦੇਸੀ’’ਤਿ ਆਹ. ਕੁਮ੍ਭੀਲੋ ‘‘ਅਦ੍ਧਾ ਅਯਂ ਪਾਸਾਣੋ ਅਞ੍ਞੇਸੁ ਦਿਵਸੇਸੁ ਵਾਨਰਿਨ੍ਦਸ੍ਸ ਪਟਿਵਚਨਂ ਦੇਤਿ ਮਞ੍ਞੇ, ਅਜ੍ਜ ਪਨ ਮਯਾ ਓਤ੍ਥਰਿਤਤ੍ਤਾ ਨ ਦੇਤਿ, ਹਨ੍ਦਾਹਂ ਦਸ੍ਸਾਮਿਸ੍ਸ ਪਟਿਵਚਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਕਿਂ ਵਾਨਰਿਨ੍ਦਾ’’ਤਿ ਆਹ. ‘‘ਕੋਸਿ ਤ੍ਵ’’ਨ੍ਤਿ? ‘‘ਅਹਂ ਕੁਮ੍ਭੀਲੋ’’ਤਿ. ‘‘ਕਿਮਤ੍ਥਂ ਏਤ੍ਥ ਨਿਪਨ੍ਨੋਸੀ’’ਤਿ? ‘‘ਤਵ ਹਦਯਂ ਪਤ੍ਥਯਮਾਨੋ’’ਤਿ. ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਅਞ੍ਞੋ ਮੇ ਗਮਨਮਗ੍ਗੋ ਨਤ੍ਥਿ, ਪਟਿਰੁਦ੍ਧਂ ਵਤ ਮੇ ਗਮਨ’’ਨ੍ਤਿ. ਤੇਨ ਵੁਤ੍ਤਂ –

‘‘ਪੀਲ਼ਿਤੋ ਸੁਸੁਮਾਰੇਨ, ਗਮਨਂ ਨ ਲਭਾਮਹਂ’’.

੬੮. ‘‘ਯਮ੍ਹੋਕਾਸੇ ਅਹਂ ਠਤ੍ਵਾ, ਓਰਾ ਪਾਰਂ ਪਤਾਮਹਂ;

ਤਤ੍ਥਚ੍ਛਿ ਸਤ੍ਤੁਵਧਕੋ, ਕੁਮ੍ਭੀਲੋ ਲੁਦ੍ਦਦਸ੍ਸਨੋ’’ਤਿ.

ਤਤ੍ਥ ‘‘ਪੀਲ਼ਿਤੋ ਸੁਸੁਮਾਰੇਨਾ’’ਤਿ ਅਦ੍ਧਗਾਥਾਯ ਵੁਤ੍ਤਮੇਵਤ੍ਥਂ. ‘‘ਯਮ੍ਹੋਕਾਸੇ’’ਤਿ ਗਾਥਾਯ ਪਾਕਟਂ ਕਰੋਤਿ. ਤਤ੍ਥ ਯਮ੍ਹੋਕਾਸੇਤਿ ਯਸ੍ਮਿਂ ਨਦੀਮਜ੍ਝੇ ਠਿਤਪਿਟ੍ਠਿਪਾਸਾਣਸਙ੍ਖਾਤੇ ਪਦੇਸੇ ਠਤ੍ਵਾ. ਓਰਾਤਿ ਦੀਪਕਸਙ੍ਖਾਤਾ ਓਰਤੀਰਾ. ਪਾਰਨ੍ਤਿ ਤਦਾ ਮਮ ਵਸਨਟ੍ਠਾਨਭੂਤਂ ਨਦਿਯਾ ਪਰਤੀਰਂ. ਪਤਾਮਹਨ੍ਤਿ ਉਪ੍ਪਤਿਤ੍ਵਾ ਪਤਾਮਿ ਅਹਂ. ਤਤ੍ਥਚ੍ਛੀਤਿ ਤਸ੍ਮਿਂ ਪਿਟ੍ਠਿਪਾਸਾਣਪ੍ਪਦੇਸੇ ਸਤ੍ਤੁਭੂਤੋ ਵਧਕੋ ਏਕਨ੍ਤੇਨੇਵ ਘਾਤਕੋ ਪਚ੍ਚਤ੍ਥਿਕੋ ਲੁਦ੍ਦਦਸ੍ਸਨੋ ਘੋਰਰੂਪੋ ਭਯਾਨਕਦਸ੍ਸਨੋ ਨਿਸੀਦਿ.

ਅਥ ਮਹਾਸਤ੍ਤੋ ਚਿਨ੍ਤੇਸਿ – ‘‘ਅਞ੍ਞੋ ਮੇ ਗਮਨਮਗ੍ਗੋ ਨਤ੍ਥਿ, ਅਜ੍ਜ ਮਯਾ ਕੁਮ੍ਭੀਲੋ ਵਞ੍ਚੇਤਬ੍ਬੋ, ਏਵਞ੍ਹਿ ਅਯਞ੍ਚ ਮਹਤਾ ਪਾਪਤੋ ਮਯਾ ਪਰਿਮੋਚਿਤੋ ਸਿਯਾ, ਮਯ੍ਹਞ੍ਚ ਜੀਵਿਤਂ ਲਦ੍ਧ’’ਨ੍ਤਿ. ਸੋ ਕੁਮ੍ਭੀਲਂ ਆਹ – ‘‘ਸਮ੍ਮ, ਕੁਮ੍ਭੀਲ, ਅਹਂ ਤੁਯ੍ਹਂ ਉਪਰਿ ਪਤਿਸ੍ਸਾਮੀ’’ਤਿ. ਕੁਮ੍ਭੀਲੋ ‘‘ਵਾਨਰਿਨ੍ਦ, ਪਪਞ੍ਚਂ ਅਕਤ੍ਵਾ ਇਤੋ ਆਗਚ੍ਛਾਹੀ’’ਤਿ ਆਹ. ਮਹਾਸਤ੍ਤੋ ‘‘ਅਹਂ ਆਗਚ੍ਛਾਮਿ, ਤ੍ਵਂ ਪਨ ਅਤ੍ਤਨੋ ਮੁਖਂ ਵਿਵਰਿਤ੍ਵਾ ਮਂ ਤਵ ਸਨ੍ਤਿਕਂ ਆਗਤਕਾਲੇ ਗਣ੍ਹਾਹੀ’’ਤਿ ਅਵੋਚ. ਕੁਮ੍ਭੀਲਾਨਞ੍ਚ ਮੁਖੇ ਵਿਵਟੇ ਅਕ੍ਖੀਨਿ ਨਿਮ੍ਮੀਲਨ੍ਤਿ. ਸੋ ਤਂ ਕਾਰਣਂ ਅਸਲ੍ਲਕ੍ਖੇਨ੍ਤੋ ਮੁਖਂ ਵਿਵਰਿ. ਅਥਸ੍ਸ ਅਕ੍ਖੀਨਿ ਨਿਮ੍ਮੀਲਿਂਸੁ. ਸੋ ਮੁਖਂ ਵਿਵਰਿਤ੍ਵਾ ਸਬ੍ਬਸੋ ਨਿਮ੍ਮੀਲਿਤਕ੍ਖੀ ਹੁਤ੍ਵਾ ਨਿਪਜ੍ਜਿ. ਮਹਾਸਤ੍ਤੋ ਤਸ੍ਸ ਤਥਾਭਾਵਂ ਞਤ੍ਵਾ ਦੀਪਕਤੋ ਉਪ੍ਪਤਿਤੋ ਗਨ੍ਤ੍ਵਾ ਕੁਮ੍ਭੀਲਸ੍ਸ ਮਤ੍ਥਕਂ ਅਕ੍ਕਮਿਤ੍ਵਾ ਤਤੋ ਉਪ੍ਪਤਨ੍ਤੋ ਵਿਜ੍ਜੁਲਤਾ ਵਿਯ ਵਿਜ੍ਜੋਤਮਾਨੋ ਪਰਤੀਰੇ ਅਟ੍ਠਾਸਿ. ਤੇਨ ਵੁਤ੍ਤਂ –

੬੯. ‘‘ਸੋ ਮਂ ਅਸਂਸਿ ਏਹੀਤਿ, ਅਹਮ੍ਪੇਮੀਤਿ ਤਂ ਵਦਿਂ;

ਤਸ੍ਸ ਮਤ੍ਥਕਮਕ੍ਕਮ੍ਮ, ਪਰਕੂਲੇ ਪਤਿਟ੍ਠਹਿ’’ਨ੍ਤਿ.

ਤਤ੍ਥ ਅਸਂਸੀਤਿ ਅਭਾਸਿ. ਅਹਮ੍ਪੇਮੀਤਿ ਅਹਮ੍ਪਿ ਆਗਚ੍ਛਾਮੀਤਿ ਤਂ ਕਥੇਸਿਂ.

ਯਸ੍ਮਾ ਪਨ ਤਂ ਦੀਪਕਂ ਅਮ੍ਬਜਮ੍ਬੁਪਨਸਾਦਿਫਲਰੁਕ੍ਖਸਣ੍ਡਮਣ੍ਡਿਤਂ ਰਮਣੀਯਂ ਨਿਵਾਸਯੋਗ੍ਗਞ੍ਚ, ‘‘ਆਗਚ੍ਛਾਮੀ’’ਤਿ ਪਨ ਪਟਿਞ੍ਞਾਯ ਦਿਨ੍ਨਤ੍ਤਾ ਸਚ੍ਚਂ ਅਨੁਰਕ੍ਖਨ੍ਤੋ ਮਹਾਸਤ੍ਤੋਪਿ ‘‘ਆਗਮਿਸ੍ਸਾਮੇਵਾ’’ਤਿ ਤਥਾ ਅਕਾਸਿ. ਤੇਨ ਵੁਤ੍ਤਂ –

੭੦. ‘‘ਨ ਤਸ੍ਸ ਅਲਿਕਂ ਭਣਿਤਂ, ਯਥਾ ਵਾਚਂ ਅਕਾਸਹ’’ਨ੍ਤਿ.

ਯਸ੍ਮਾ ਚੇਤਂ ਸਚ੍ਚਾਨੁਰਕ੍ਖਣਂ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਕਤਂ, ਤਸ੍ਮਾ ਆਹ –

‘‘ਸਚ੍ਚੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਸਚ੍ਚਪਾਰਮੀ’’ਤਿ.

ਕੁਮ੍ਭੀਲੋ ਪਨ ਤਂ ਅਚ੍ਛਰਿਯਂ ਦਿਸ੍ਵਾ ‘‘ਇਮਿਨਾ ਵਾਨਰਿਨ੍ਦੇਨ ਅਤਿਅਚ੍ਛੇਰਕਂ ਕਤ’’ਨ੍ਤਿ ਚਿਨ੍ਤੇਤ੍ਵਾ ‘‘ਭੋ ਵਾਨਰਿਨ੍ਦ, ਇਮਸ੍ਮਿਂ ਲੋਕੇ ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਮਿਤ੍ਤੇ ਅਭਿਭਵਤਿ, ਤੇ ਸਬ੍ਬੇਪਿ ਤੁਯ੍ਹਂ ਅਬ੍ਭਨ੍ਤਰੇ ਅਤ੍ਥਿ ਮਞ੍ਞੇ’’ਤਿ ਆਹ –

‘‘ਯਸ੍ਸੇਤੇ ਚਤੁਰੋ ਧਮ੍ਮਾ, ਵਾਨਰਿਨ੍ਦ, ਯਥਾ ਤਵ;

ਸਚ੍ਚਂ ਧਮ੍ਮੋ ਧਿਤਿ ਚਾਗੋ, ਦਿਟ੍ਠਂ ਸੋ ਅਤਿਵਤ੍ਤਤੀ’’ਤਿ. (ਜਾ. ੧.੨.੧੪੭);

ਤਤ੍ਥ ਯਸ੍ਸਾਤਿ ਯਸ੍ਸ ਕਸ੍ਸਚਿ ਪੁਗ੍ਗਲਸ੍ਸ. ਏਤੇਤਿ ਇਦਾਨਿ ਵਤ੍ਤਬ੍ਬੇ ਪਚ੍ਚਕ੍ਖਤੋ ਦਸ੍ਸੇਤਿ. ਚਤੁਰੋ ਧਮ੍ਮਾਤਿ ਚਤ੍ਤਾਰੋ ਗੁਣਾ. ਸਚ੍ਚਨ੍ਤਿ ਵਚੀਸਚ੍ਚਂ, ‘‘ਮਮ ਸਨ੍ਤਿਕਂ ਆਗਮਿਸ੍ਸਾਮੀ’’ਤਿ ਵਤ੍ਵਾ ਮੁਸਾਵਾਦਂ ਅਕਤ੍ਵਾ ਆਗਤੋ ਏਵਾਤਿ ਏਤਂ ਤੇ ਵਚੀਸਚ੍ਚਂ. ਧਮ੍ਮੋਤਿ ਵਿਚਾਰਣਪਞ੍ਞਾ, ‘‘ਏਵਂ ਕਤੇ ਇਦਂ ਨਾਮ ਭਵਿਸ੍ਸਤੀ’’ਤਿ ਪਵਤ੍ਤਾ ਤੇ ਏਸਾ ਵਿਚਾਰਣਪਞ੍ਞਾ. ਧਿਤੀਤਿ ਅਬ੍ਬੋਚ੍ਛਿਨ੍ਨਂ ਵੀਰਿਯਂ ਵੁਚ੍ਚਤਿ, ਏਤਮ੍ਪਿ ਤੇ ਅਤ੍ਥਿ. ਚਾਗੋਤਿ ਅਤ੍ਤਪਰਿਚ੍ਚਾਗੋ, ਤ੍ਵਂ ਅਤ੍ਤਾਨਂ ਪਰਿਚ੍ਚਜਿਤ੍ਵਾ ਮਮ ਸਨ੍ਤਿਕਂ ਆਗਤੋ, ਯਂ ਪਨਾਹਂ ਗਣ੍ਹਿਤੁਂ ਨਾਸਕ੍ਖਿਂ, ਮਯ੍ਹਮੇਵੇਸ ਦੋਸੋ. ਦਿਟ੍ਠਨ੍ਤਿ ਪਚ੍ਚਾਮਿਤ੍ਤਂ. ਸੋ ਅਤਿਵਤ੍ਤਤੀਤਿ ਯਸ੍ਸ ਪੁਗ੍ਗਲਸ੍ਸ ਯਥਾ ਤਵ ਏਵਂ ਏਤੇ ਚਤ੍ਤਾਰੋ ਧਮ੍ਮਾ ਅਤ੍ਥਿ, ਸੋ ਯਥਾ ਮਂ ਤ੍ਵਂ ਅਜ੍ਜ ਅਤਿਕ੍ਕਨ੍ਤੋ, ਤਥੇਵ ਅਤ੍ਤਨੋ ਪਚ੍ਚਾਮਿਤ੍ਤਂ ਅਤਿਕ੍ਕਮਤਿ ਅਭਿਭਵਤੀਤਿ.

ਏਵਂ ਕੁਮ੍ਭੀਲੋ ਬੋਧਿਸਤ੍ਤਂ ਪਸਂਸਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਗਤੋ. ਤਦਾ ਕੁਮ੍ਭੀਲੋ ਦੇਵਦਤ੍ਤੋ ਅਹੋਸਿ, ਤਸ੍ਸ ਭਰਿਯਾ ਚਿਞ੍ਚਮਾਣਵਿਕਾ, ਕਪਿਰਾਜਾ ਪਨ ਲੋਕਨਾਥੋ.

ਤਸ੍ਸ ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਉਦਕਸ੍ਸ ਪਾਸਾਣਸ੍ਸ ਚ ਪਮਾਣਵਵਤ੍ਥਾਨੇਨ ਇਦਾਨਿ ਪਾਸਾਣੋ ਉਚ੍ਚਤਰੋ ਖਾਯਤੀਤਿ ਪਰਿਗ੍ਗਣ੍ਹਨਵਸੇਨ ਪਾਸਾਣਸ੍ਸ ਉਪਰਿ ਸੁਸੁਮਾਰਸ੍ਸ ਨਿਪਨ੍ਨਭਾਵਜਾਨਨਂ, ਪਾਸਾਣੇਨ ਕਥਨਾਪਦੇਸੇਨ ਤਸ੍ਸਤ੍ਥਸ੍ਸ ਨਿਚ੍ਛਯਗਮਨਂ, ਸੁਸੁਮਾਰਸ੍ਸ ਉਪਰਿ ਅਕ੍ਕਮਿਤ੍ਵਾ ਸਹਸਾ ਪਰਤੀਰੇ ਪਤਿਟ੍ਠਾਨਵਸੇਨ ਸੀਘਕਾਰਿਤਾਯ ਤਸ੍ਸ ਮਹਤਾ ਪਾਪਤੋ ਪਰਿਮੋਚਨਂ, ਅਤ੍ਤਨੋ ਜੀਵਿਤਰਕ੍ਖਣਂ, ਸਚ੍ਚਵਾਚਾਨੁਰਕ੍ਖਣਞ੍ਚਾਤਿ ਏਵਮਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਕਪਿਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.