੬. ਤੇਮਿਯਚਰਿਯਾਵਣ੍ਣਨਾ

੪੮. ਛਟ੍ਠੇ ਕਾਸਿਰਾਜਸ੍ਸ ਅਤ੍ਰਜੋਤਿ ਕਾਸਿਰਞ੍ਞੋ ਅਤ੍ਰਜੋ ਪੁਤ੍ਤੋ ਯਦਾ ਹੋਮਿ, ਤਦਾ ਮੂਗਪਕ੍ਖੋਤਿ ਨਾਮੇਨ, ਤੇਮਿਯੋਤਿ ਵਦਨ੍ਤਿ ਮਨ੍ਤਿ ਤੇਮਿਯੋਤਿ ਨਾਮੇਨ ਮੂਗਪਕ੍ਖਵਤਾਧਿਟ੍ਠਾਨੇਨ ‘‘ਮੂਗਪਕ੍ਖੋ’’ਤਿ ਮਾਤਾਪਿਤਰੋ ਆਦਿਂ ਕਤ੍ਵਾ ਸਬ੍ਬੇਵ ਮਂ ਵਦਨ੍ਤੀਤਿ ਸਮ੍ਬਨ੍ਧੋ. ਮਹਾਸਤ੍ਤਸ੍ਸ ਹਿ ਜਾਤਦਿਵਸੇ ਸਕਲਕਾਸਿਰਟ੍ਠੇ ਦੇਵੋ ਵਸ੍ਸਿ, ਯਸ੍ਮਾ ਚ ਸੋ ਰਞ੍ਞੋ ਚੇਵ ਅਮਚ੍ਚਾਦੀਨਞ੍ਚ ਹਦਯਂ ਉਲ਼ਾਰੇਨ ਪੀਤਿਸਿਨੇਹੇਨ ਤੇਮਯਮਾਨੋ ਉਪ੍ਪਨ੍ਨੋ, ਤਸ੍ਮਾ ‘‘ਤੇਮਿਯਕੁਮਾਰੋ’’ਤਿ ਨਾਮਂ ਅਹੋਸਿ.

੪੯. ਸੋਲ਼ਸਿਤ੍ਥਿਸਹਸ੍ਸਾਨਨ੍ਤਿ ਸੋਲ਼ਸਨ੍ਨਂ ਕਾਸਿਰਞ੍ਞੋ ਇਤ੍ਥਾਗਾਰਸਹਸ੍ਸਾਨਂ. ਨ ਵਿਜ੍ਜਤਿ ਪੁਮੋਤਿ ਪੁਤ੍ਤੋ ਨ ਲਬ੍ਭਤਿ. ਨ ਕੇਵਲਞ੍ਚ ਪੁਤ੍ਤੋ ਏਵ, ਧੀਤਾਪਿਸ੍ਸ ਨਤ੍ਥਿ ਏਵ. ਅਹੋਰਤ੍ਤਾਨਂ ਅਚ੍ਚਯੇਨ, ਨਿਬ੍ਬਤ੍ਤੋ ਅਹਮੇਕਕੋਤਿ ਅਪੁਤ੍ਤਕਸ੍ਸੇਵ ਤਸ੍ਸ ਰਞ੍ਞੋ ਬਹੂਨਂ ਸਂਵਚ੍ਛਰਾਨਂ ਅਤੀਤਤ੍ਤਾ ਅਨੇਕੇਸਂ ਅਹੋਰਤ੍ਤਾਨਂ ਅਪਗਮਨੇਨ ਸਕ੍ਕਦਤ੍ਤਿਯੋ ਅਹਮੇਕਕੋਵ ਬੋਧਿਪਰਿਯੇਸਨਂ ਚਰਮਾਨੋ, ਤਦਾ ਤਸ੍ਸ ਪੁਤ੍ਤੋ ਹੁਤ੍ਵਾ ਉਪ੍ਪਨ੍ਨੋਤਿ ਸਤ੍ਥਾ ਵਦਤਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਬਾਰਾਣਸਿਯਂ ਕਾਸਿਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਸੋਲ਼ਸਸਹਸ੍ਸਾ ਇਤ੍ਥਿਯੋ ਅਹੇਸੁਂ. ਤਾਸੁ ਏਕਾਪਿ ਪੁਤ੍ਤਂ ਵਾ ਧੀਤਰਂ ਵਾ ਨ ਲਭਤਿ. ਨਾਗਰਾ ‘‘ਅਮ੍ਹਾਕਂ ਰਞ੍ਞੋ ਵਂਸਾਨੁਰਕ੍ਖਕੋ ਏਕੋਪਿ ਪੁਤ੍ਤੋ ਨਤ੍ਥੀ’’ਤਿ ਵਿਪ੍ਪਟਿਸਾਰੀ ਜਾਤਾ ਸਨ੍ਨਿਪਤਿਤ੍ਵਾ ਰਾਜਾਨਂ ‘‘ਪੁਤ੍ਤਂ ਪਤ੍ਥੇਹੀ’’ਤਿ ਆਹਂਸੁ. ਰਾਜਾ ਸੋਲ਼ਸਸਹਸ੍ਸਾ ਇਤ੍ਥਿਯੋ ‘‘ਪੁਤ੍ਤਂ ਪਤ੍ਥੇਥਾ’’ਤਿ ਆਣਾਪੇਸਿ. ਤਾ ਚਨ੍ਦਾਦੀਨਂ ਉਪਟ੍ਠਾਨਾਦੀਨਿ ਕਤ੍ਵਾ ਪਤ੍ਥੇਨ੍ਤਿਯੋਪਿ ਨ ਲਭਿਂਸੁ. ਅਗ੍ਗਮਹੇਸੀ ਪਨਸ੍ਸ ਮਦ੍ਦਰਾਜਧੀਤਾ ਚਨ੍ਦਾਦੇਵੀ ਨਾਮ ਸੀਲਸਮ੍ਪਨ੍ਨਾ ਅਹੋਸਿ. ਰਾਜਾ ‘‘ਤ੍ਵਮ੍ਪਿ ਪੁਤ੍ਤਂ ਪਤ੍ਥੇਹੀ’’ਤਿ ਆਹ. ਸਾ ਪੁਣ੍ਣਮਦਿਵਸੇ ਉਪੋਸਥਿਕਾ ਹੁਤ੍ਵਾ ਅਤ੍ਤਨੋ ਸੀਲਂ ਆਵਜ੍ਜੇਤ੍ਵਾ ‘‘ਸਚਾਹਂ ਅਖਣ੍ਡਸੀਲਾ, ਇਮਿਨਾ ਮੇ ਸਚ੍ਚੇਨ ਪੁਤ੍ਤੋ ਉਪ੍ਪਜ੍ਜਤੂ’’ਤਿ ਸਚ੍ਚਕਿਰਿਯਮਕਾਸਿ. ਤਸ੍ਸਾ ਸੀਲਤੇਜੇਨ ਸਕ੍ਕਸ੍ਸ ਆਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਚਨ੍ਦਾਦੇਵਿਯਾ ਪੁਤ੍ਤਪਟਿਲਾਭਸ੍ਸ ਉਪਾਯਂ ਕਰਿਸ੍ਸਾਮੀ’’ਤਿ ਤਸ੍ਸਾ ਅਨੁਚ੍ਛਵਿਕਂ ਪੁਤ੍ਤਂ ਉਪਧਾਰੇਨ੍ਤੋ ਬੋਧਿਸਤ੍ਤਂ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚਵਿਤ੍ਵਾ ਉਪਰਿਦੇਵਲੋਕੇ ਉਪ੍ਪਜ੍ਜਿਤੁਕਾਮਂ ਦਿਸ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਸਮ੍ਮ, ਤਯਿ ਮਨੁਸ੍ਸਲੋਕੇ ਉਪ੍ਪਨ੍ਨੇ ਪਾਰਮਿਯੋ ਚ ਤੇ ਪੂਰੇਸ੍ਸਨ੍ਤਿ, ਮਹਾਜਨਸ੍ਸ ਚ ਵੁਡ੍ਢਿ ਭਵਿਸ੍ਸਤਿ, ਅਯਂ ਕਾਸਿਰਞ੍ਞੋ ਚਨ੍ਦਾ ਨਾਮ ਅਗ੍ਗਮਹੇਸੀ ਪੁਤ੍ਤਂ ਪਤ੍ਥੇਤਿ, ਤਸ੍ਸਾ ਕੁਚ੍ਛਿਯਂ ਉਪ੍ਪਜ੍ਜਾਹੀ’’ਤਿ ਆਹ.

ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਸਹਾਯਾ ਪਞ੍ਚਸਤਾ ਦੇਵਪੁਤ੍ਤਾ ਖੀਣਾਯੁਕਾ ਦੇਵਲੋਕਾ ਚਵਿਤ੍ਵਾ ਤਸ੍ਸੇਵ ਰਞ੍ਞੋ ਅਮਚ੍ਚਭਰਿਯਾਨਂ ਕੁਚ੍ਛੀਸੁ ਪਟਿਸਨ੍ਧਿਂ ਗਣ੍ਹਿਂਸੁ. ਦੇਵੀ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਞਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਗਬ੍ਭਪਰਿਹਾਰਂ ਦਾਪੇਸਿ. ਸਾ ਪਰਿਪੁਣ੍ਣਗਬ੍ਭਾ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਪੁਤ੍ਤਂ ਵਿਜਾਯਿ. ਤਂਦਿਵਸਮੇਵ ਅਮਚ੍ਚਗੇਹੇਸੁ ਪਞ੍ਚਕੁਮਾਰਸਤਾਨਿ ਵਿਜਾਯਿਂਸੁ. ਉਭਯਮ੍ਪਿ ਸੁਤ੍ਵਾ ਰਾਜਾ ‘‘ਮਮ ਪੁਤ੍ਤਸ੍ਸ ਪਰਿਵਾਰਾ ਏਤੇ’’ਤਿ ਪਞ੍ਚਨ੍ਨਂ ਦਾਰਕਸਤਾਨਂ ਪਞ੍ਚਧਾਤਿਸਤਾਨਿ ਪੇਸੇਤ੍ਵਾ ਕੁਮਾਰਪਸਾਧਨਾਨਿ ਚ ਪੇਸੇਸਿ. ਮਹਾਸਤ੍ਤਸ੍ਸ ਪਨ ਅਤਿਦੀਘਾਦਿਦੋਸਵਿਵਜ੍ਜਿਤਾ ਅਲਮ੍ਬਤ੍ਥਨਾ ਮਧੁਰਥਞ੍ਞਾ ਚਤੁਸਟ੍ਠਿਧਾਤਿਯੋ ਦਤ੍ਵਾ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਚਨ੍ਦਾਦੇਵਿਯਾਪਿ ਵਰਂ ਅਦਾਸਿ. ਸਾ ਗਹਿਤਕਂ ਕਤ੍ਵਾ ਠਪੇਸਿ. ਦਾਰਕੋ ਮਹਤਾ ਪਰਿਵਾਰੇਨ ਵਡ੍ਢਤਿ. ਅਥ ਨਂ ਏਕਮਾਸਿਕਂ ਅਲਙ੍ਕਰਿਤ੍ਵਾ ਰਞ੍ਞੋ ਸਨ੍ਤਿਕਂ ਆਨਯਿਂਸੁ. ਰਾਜਾ ਪਿਯਪੁਤ੍ਤਂ ਓਲੋਕੇਤ੍ਵਾ ਆਲਿਙ੍ਗਿਤ੍ਵਾ ਅਙ੍ਕੇ ਨਿਸੀਦਾਪੇਤ੍ਵਾ ਰਮਯਮਾਨੋ ਨਿਸੀਦਿ.

੫੦. ਤਸ੍ਮਿਂ ਖਣੇ ਚਤ੍ਤਾਰੋ ਚੋਰਾ ਆਨੀਤਾ. ਰਾਜਾ ਤੇਸੁ ਏਕਸ੍ਸ ਸਕਣ੍ਟਕਾਹਿ ਕਸਾਹਿ ਪਹਾਰਸਹਸ੍ਸਂ ਆਣਾਪੇਸਿ, ਏਕਸ੍ਸ ਸਙ੍ਖਲਿਕਾਯ ਬਨ੍ਧਿਤ੍ਵਾ ਬਨ੍ਧਨਾਗਾਰਪ੍ਪਵੇਸਨਂ, ਏਕਸ੍ਸ ਸਰੀਰੇ ਸਤ੍ਤਿਪ੍ਪਹਾਰਦਾਨਂ, ਏਕਸ੍ਸ ਸੂਲਾਰੋਪਨਂ. ਮਹਾਸਤ੍ਤੋ ਪਿਤੁ ਕਥਂ ਸੁਤ੍ਵਾ ਸਂਵੇਗਪ੍ਪਤ੍ਤੋ ਹੁਤ੍ਵਾ ‘‘ਅਹੋ ਮਮ ਪਿਤਾ ਰਜ੍ਜਂ ਨਿਸ੍ਸਾਯ ਭਾਰਿਯਂ ਨਿਰਯਗਾਮਿਕਮ੍ਮਂ ਕਰੋਤੀ’’ਤਿ ਚਿਨ੍ਤੇਸਿ. ਪੁਨਦਿਵਸੇ ਨਂ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਅਲਙ੍ਕਤਸਿਰਿਸਯਨੇ ਨਿਪਜ੍ਜਾਪੇਸੁਂ.

ਸੋ ਥੋਕਂ ਨਿਦ੍ਦਾਯਿਤ੍ਵਾ ਪਟਿਬੁਦ੍ਧੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਸੇਤਚ੍ਛਤ੍ਤਂ ਓਲੋਕੇਨ੍ਤੋ ਮਹਨ੍ਤਂ ਸਿਰਿਵਿਭਵਂ ਪਸ੍ਸਿ. ਅਥਸ੍ਸ ਪਕਤਿਯਾਪਿ ਸਂਵੇਗਪ੍ਪਤ੍ਤਸ੍ਸ ਅਤਿਰੇਕਤਰਂ ਭਯਂ ਉਪ੍ਪਜ੍ਜਿ. ਸੋ ‘‘ਕੁਤੋ ਨੁ ਖੋ ਅਹਂ ਇਮਂ ਰਾਜਗੇਹਂ ਆਗਤੋ’’ਤਿ ਉਪਧਾਰੇਨ੍ਤੋ ਜਾਤਿਸ੍ਸਰਞਾਣੇਨ ਦੇਵਲੋਕਤੋ ਆਗਤਭਾਵਂ ਞਤ੍ਵਾ ਤਤੋ ਪਰਂ ਓਲੋਕੇਨ੍ਤੋ ਉਸ੍ਸਦਨਿਰਯੇ ਪਕ੍ਕਭਾਵਂ ਪਸ੍ਸਿ. ਤਤੋ ਪਰਂ ਓਲੋਕੇਨ੍ਤੋ ਤਸ੍ਮਿਂਯੇਵ ਨਗਰੇ ਰਾਜਭਾਵਂ ਪਸ੍ਸਿ. ਅਥ ਸੋ ‘‘ਅਹਂ ਵੀਸਤਿਵਸ੍ਸਾਨਿ ਰਜ੍ਜਂ ਕਾਰੇਤ੍ਵਾ ਅਸੀਤਿਵਸ੍ਸਸਹਸ੍ਸਾਨਿ ਉਸ੍ਸਦਨਿਰਯੇ ਪਚ੍ਚਿਂ, ਇਦਾਨਿ ਪੁਨਪਿ ਇਮਸ੍ਮਿਂ ਚੋਰਗੇਹੇ ਨਿਬ੍ਬਤ੍ਤੋਸ੍ਮਿ, ਪਿਤਾਪਿ ਮੇ ਹਿਯ੍ਯੋ ਚਤੂਸੁ ਚੋਰੇਸੁ ਆਨੀਤੇਸੁ ਤਥਾਰੂਪਂ ਫਰੁਸਂ ਨਿਰਯਸਂਵਤ੍ਤਨਿਕਂ ਕਥਂ ਕਥੇਸਿ. ਨ ਮੇ ਇਮਿਨਾ ਅਵਿਦਿਤਵਿਪੁਲਾਨਤ੍ਥਾਵਹੇਨ ਰਜ੍ਜੇਨ ਅਤ੍ਥੋ, ਕਥਂ ਨੁ ਖੋ ਇਮਮ੍ਹਾ ਚੋਰਗੇਹਾ ਮੁਚ੍ਚੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਨਿਪਜ੍ਜਿ. ਅਥ ਨਂ ਏਕਾ ਦੇਵਧੀਤਾ ‘‘ਤਾਤ ਤੇਮਿਯਕੁਮਾਰ, ਮਾ ਭਾਯਿ, ਤੀਣਿ ਅਙ੍ਗਾਨਿ ਅਧਿਟ੍ਠਹਿਤ੍ਵਾ ਤਵ ਸੋਤ੍ਥਿ ਭਵਿਸ੍ਸਤੀ’’ਤਿ ਸਮਸ੍ਸਾਸੇਸਿ. ਤਂ ਸੁਤ੍ਵਾ ਮਹਾਸਤ੍ਤੋ ਰਜ੍ਜਸਙ੍ਖਾਤਾ ਅਨਤ੍ਥਤੋ ਮੁਚ੍ਚਿਤੁਕਾਮੋ ਸੋਲ਼ਸਸਂਵਚ੍ਛਰਾਨਿ ਤੀਣਿ ਅਙ੍ਗਾਨਿ ਅਚਲਾਧਿਟ੍ਠਾਨਵਸੇਨ ਅਧਿਟ੍ਠਹਿ. ਤੇਨ ਵੁਤ੍ਤਂ ‘‘ਕਿਚ੍ਛਾਲਦ੍ਧਂ ਪਿਯਂ ਪੁਤ੍ਤ’’ਨ੍ਤਿਆਦਿ.

ਤਤ੍ਥ ਕਿਚ੍ਛਾਲਦ੍ਧਨ੍ਤਿ ਕਿਚ੍ਛੇਨ ਕਸਿਰੇਨ ਚਿਰਕਾਲਪਤ੍ਥਨਾਯ ਲਦ੍ਧਂ. ਅਭਿਜਾਤਨ੍ਤਿ ਜਾਤਿਸਮ੍ਪਨ੍ਨਂ. ਕਾਯਜੁਤਿਯਾ ਚੇਵ ਞਾਣਜੁਤਿਯਾ ਚ ਸਮਨ੍ਨਾਗਤਤ੍ਤਾ ਜੁਤਿਨ੍ਧਰਂ. ਸੇਤਚ੍ਛਤ੍ਤਂ ਧਾਰਯਿਤ੍ਵਾਨ, ਸਯਨੇ ਪੋਸੇਤਿ ਮਂ ਪਿਤਾਤਿ ਪਿਤਾ ਮੇ ਕਾਸਿਰਾਜਾ ‘‘ਮਾ ਨਂ ਕੁਮਾਰਂ ਰਜੋ ਵਾ ਉਸ੍ਸਾਵੋ ਵਾ’’ਤਿ ਜਾਤਕਾਲਤੋ ਪਟ੍ਠਾਯ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਸਿਰਿਸਯਨੇ ਸਯਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਂ ਪੋਸੇਤਿ.

੫੧. ਨਿਦ੍ਦਾਯਮਾਨੋ ਸਯਨਵਰੇ ਪਬੁਜ੍ਝਿਤ੍ਵਾ ਅਹਂ ਓਲੋਕੇਨ੍ਤੋ ਪਣ੍ਡਰਂ ਸੇਤਚ੍ਛਤ੍ਤਂ ਅਦ੍ਦਸਂ. ਯੇਨਾਹਂ ਨਿਰਯਂ ਗਤੋਤਿ ਯੇਨ ਸੇਤਚ੍ਛਤ੍ਤੇਨ ਤਤੋ ਤਤਿਯੇ ਅਤ੍ਤਭਾਵੇ ਅਹਂ ਨਿਰਯਂ ਗਤੋ, ਸੇਤਚ੍ਛਤ੍ਤਸੀਸੇਨ ਰਜ੍ਜਂ ਵਦਤਿ.

੫੨. ਸਹ ਦਿਟ੍ਠਸ੍ਸ ਮੇ ਛਤ੍ਤਨ੍ਤਿ ਤਂ ਸੇਤਚ੍ਛਤ੍ਤਂ ਦਿਟ੍ਠਸ੍ਸ ਦਿਟ੍ਠਵਤੋ ਮੇ ਸਹ ਤੇਨ ਦਸ੍ਸਨੇਨ, ਦਸ੍ਸਨਸਮਕਾਲਮੇਵਾਤਿ ਅਤ੍ਥੋ. ਤਾਸੋ ਉਪ੍ਪਜ੍ਜਿ ਭੇਰਵੋਤਿ ਸੁਪਰਿਵਿਦਿਤਾਦੀਨਵਤ੍ਤਾ ਭਯਾਨਕੋ ਚਿਤ੍ਤੁਤ੍ਰਾਸੋ ਉਦਪਾਦਿ. ਵਿਨਿਚ੍ਛਯਂ ਸਮਾਪਨ੍ਨੋ, ਕਥਾਹਂ ਇਮਂ ਮੁਞ੍ਚਿਸ੍ਸਨ੍ਤਿ ਕਥਂ ਨੁ ਖੋ ਅਹਂ ਇਮਂ ਰਜ੍ਜਂ ਕਾਲ਼ਕਣ੍ਣਿਂ ਮੁਞ੍ਚੇਯ੍ਯਨ੍ਤਿ ਏਵਂ ਵਿਚਾਰਣਂ ਆਪਜ੍ਜਿਂ.

੫੩. ਪੁਬ੍ਬਸਾਲੋਹਿਤਾ ਮਯ੍ਹਨ੍ਤਿ ਪੁਬ੍ਬੇ ਏਕਸ੍ਮਿਂ ਅਤ੍ਤਭਾਵੇ ਮਮ ਮਾਤੁਭੂਤਪੁਬ੍ਬਾ ਤਸ੍ਮਿਂ ਛਤ੍ਤੇ ਅਧਿਵਤ੍ਥਾ ਦੇਵਤਾ ਮਯ੍ਹਂ ਅਤ੍ਥਕਾਮਿਨੀ ਹਿਤੇਸਿਨੀ. ਸਾ ਮਂ ਦਿਸ੍ਵਾਨ ਦੁਕ੍ਖਿਤਂ, ਤੀਸੁ ਠਾਨੇਸੁ ਯੋਜਯੀਤਿ ਸਾ ਦੇਵਤਾ ਮਂ ਤਥਾ ਚੇਤੋਦੁਕ੍ਖੇਨ ਦੁਕ੍ਖਿਤਂ ਦਿਸ੍ਵਾ ਮੂਗਪਕ੍ਖਬਧਿਰਭਾਵਸਙ੍ਖਾਤੇਸੁ ਤੀਸੁ ਰਜ੍ਜਦੁਕ੍ਖਤੋ ਨਿਕ੍ਖਮਨਕਾਰਣੇਸੁ ਯੋਜੇਸਿ.

੫੪. ਪਣ੍ਡਿਚ੍ਚਯਨ੍ਤਿ ਪਣ੍ਡਿਚ੍ਚਂ, ਅਯਮੇਵ ਵਾ ਪਾਠੋ. ਮਾ ਵਿਭਾਵਯਾਤਿ ਮਾ ਪਕਾਸੇਹਿ. ਬਾਲਮਤੋਤਿ ਬਾਲੋਤਿ ਞਾਤੋ. ਸਬ੍ਬੋਤਿ ਸਕਲੋ ਅਨ੍ਤੋਜਨੋ ਚੇਵ ਬਹਿਜਨੋ ਚ. ਓਚਿਨਾਯਤੂਤਿ ਨੀਹਰਥੇਤਂ ਕਾਲ਼ਕਣ੍ਣਿਨ੍ਤਿ ਅਵਜਾਨਾਤੁ. ਏਵਂ ਤਵ ਅਤ੍ਥੋ ਭਵਿਸ੍ਸਤੀਤਿ ਏਵਂ ਯਥਾਵੁਤ੍ਤਨਯੇਨ ਅਵਜਾਨਿਤਬ੍ਬਭਾਵੇ ਸਤਿ ਤੁਯ੍ਹਂ ਗੇਹਤੋ ਨਿਕ੍ਖਮਨੇਨ ਹਿਤਂ ਪਾਰਮਿਪਰਿਪੂਰਣਂ ਭਵਿਸ੍ਸਤਿ.

੫੫. ਤੇਤਂ ਵਚਨਨ੍ਤਿ ਤੇ ਏਤਂ ਤੀਣਿ ਅਙ੍ਗਾਨਿ ਅਧਿਟ੍ਠਾਹੀਤਿ ਵਚਨਂ. ਅਤ੍ਥਕਾਮਾਸਿ ਮੇ ਅਮ੍ਮਾਤਿ ਅਮ੍ਮ ਦੇਵਤੇ, ਮਮ ਅਤ੍ਥਕਾਮਾ ਅਸਿ. ਹਿਤਕਾਮਾਤਿ ਤਸ੍ਸੇਵ ਪਰਿਯਾਯਵਚਨਂ. ਅਤ੍ਥੋਤਿ ਵਾ ਏਤ੍ਥ ਸੁਖਂ ਵੇਦਿਤਬ੍ਬਂ. ਹਿਤਨ੍ਤਿ ਤਸ੍ਸ ਕਾਰਣਭੂਤਂ ਪੁਞ੍ਞਂ.

੫੬. ਸਾਗਰੇਵ ਥਲਂ ਲਭਿਨ੍ਤਿ ਚੋਰਗੇਹੇ ਵਤਾਹਂ ਜਾਤੋ, ਅਹੁ ਮੇ ਮਹਾਵਤਾਨਤ੍ਥੋਤਿ ਸੋਕਸਾਗਰੇ ਓਸੀਦਨ੍ਤੋ ਤਸ੍ਸਾ ਦੇਵਤਾਯ ਅਹਂ ਵਚਨਂ ਸੁਤ੍ਵਾ ਸਾਗਰੇ ਓਸੀਦਨ੍ਤੋ ਵਿਯ ਥਲਂ ਪਤਿਟ੍ਠਂ ਅਲਭਿਂ, ਰਜ੍ਜਕੁਲਤੋ ਨਿਕ੍ਖਮਨੋਪਾਯਂ ਅਲਭਿਨ੍ਤਿ ਅਤ੍ਥੋ. ਤਯੋ ਅਙ੍ਗੇ ਅਧਿਟ੍ਠਹਿਨ੍ਤਿ ਯਾਵ ਗੇਹਤੋ ਨਿਕ੍ਖਮਿਂ, ਤਾਵ ਤੀਣਿ ਅਙ੍ਗਾਨਿ ਕਾਰਣਾਨਿ ਅਧਿਟ੍ਠਹਿਂ.

੫੭. ਇਦਾਨਿ ਤਾਨਿ ਸਰੂਪਤੋ ਦਸ੍ਸੇਤੁਂ ‘‘ਮੂਗੋ ਅਹੋਸਿ’’ਨ੍ਤਿ ਗਾਥਮਾਹ. ਤਤ੍ਥ ਪਕ੍ਖੋਤਿ ਪੀਠਸਪ੍ਪਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਏਵਂ ਪਨ ਮਹਾਸਤ੍ਤੇ ਦੇਵਤਾਯ ਦਿਨ੍ਨਨਯੇ ਠਤ੍ਵਾ ਜਾਤਵਸ੍ਸਤੋ ਪਟ੍ਠਾਯ ਮੂਗਾਦਿਭਾਵੇਨ ਅਤ੍ਤਾਨਂ ਦਸ੍ਸੇਨ੍ਤੇ ਮਾਤਾਪਿਤਰੋ ਧਾਤਿਆਦਯੋ ਚ ‘‘ਮੂਗਾਨਂ ਹਨੁਪਰਿਯੋਸਾਨਂ ਨਾਮ ਏਵਰੂਪਂ ਨ ਹੋਤਿ, ਬਧਿਰਾਨਂ ਕਣ੍ਣਸੋਤਂ ਨਾਮ ਏਵਰੂਪਂ ਨ ਹੋਤਿ, ਪੀਠਸਪ੍ਪੀਨਂ ਹਤ੍ਥਪਾਦਾ ਨਾਮ ਏਵਰੂਪਾ ਨ ਹੋਨ੍ਤਿ, ਭਵਿਤਬ੍ਬਮੇਤ੍ਥ ਕਾਰਣੇਨ, ਵੀਮਂਸਿਸ੍ਸਾਮ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਖੀਰੇਨ ਤਾਵ ਵੀਮਂਸਿਸ੍ਸਾਮਾ’’ਤਿ ਸਕਲਦਿਵਸਂ ਖੀਰਂ ਨ ਦੇਨ੍ਤਿ. ਸੋ ਸੁਸ੍ਸਨ੍ਤੋਪਿ ਖੀਰਤ੍ਥਾਯ ਸਦ੍ਦਂ ਨ ਕਰੋਤਿ.

ਅਥਸ੍ਸ ਮਾਤਾ ‘‘ਪੁਤ੍ਤੋ ਮੇ ਛਾਤੋ, ਖੀਰਮਸ੍ਸ ਦੇਥਾ’’ਤਿ ਖੀਰਂ ਦਾਪੇਸਿ. ਏਵਂ ਅਨ੍ਤਰਨ੍ਤਰਾ ਖੀਰਂ ਅਦਤ੍ਵਾ ਏਕਸਂਵਚ੍ਛਰਂ ਵੀਮਂਸਨ੍ਤਾਪਿ ਅਨ੍ਤਰਂ ਨ ਪਸ੍ਸਿਂਸੁ. ਤਤੋ ‘‘ਕੁਮਾਰਕਾ ਨਾਮ ਪੂਵਖਜ੍ਜਕਂ ਪਿਯਾਯਨ੍ਤਿ, ਫਲਾਫਲਂ ਪਿਯਾਯਨ੍ਤਿ, ਕੀਲ਼ਨਭਣ੍ਡਕਂ ਪਿਯਾਯਨ੍ਤਿ, ਭੋਜਨਂ ਪਿਯਾਯਨ੍ਤੀ’’ਤਿ ਤਾਨਿ ਤਾਨਿ ਪਲੋਭਨੀਯਾਨਿ ਉਪਨੇਤ੍ਵਾ ਵੀਮਂਸਨਵਸੇਨ ਪਲੋਭੇਨ੍ਤਾ ਯਾਵ ਪਞ੍ਚਵਸ੍ਸਕਾਲਾ ਅਨ੍ਤਰਂ ਨ ਪਸ੍ਸਿਂਸੁ. ਅਥ ਨਂ ‘‘ਦਾਰਕਾ ਨਾਮ ਅਗ੍ਗਿਤੋ ਭਾਯਨ੍ਤਿ, ਮਤ੍ਤਹਤ੍ਥਿਤੋ ਭਾਯਨ੍ਤਿ, ਸਪ੍ਪਤੋ ਭਾਯਨ੍ਤਿ, ਉਕ੍ਖਿਤ੍ਤਾਸਿਕਪੁਰਿਸਤੋ ਭਾਯਨ੍ਤਿ, ਤੇਹਿ ਵੀਮਂਸਿਸ੍ਸਾਮਾ’’ਤਿ ਯਥਾ ਤੇਹਿਸ੍ਸ ਅਨਤ੍ਥੋ ਨ ਜਾਯਤਿ, ਤਥਾ ਪੁਰਿਮਮੇਵ ਸਂਵਿਦਹਿਤ੍ਵਾ ਅਤਿਭਯਾਨਕਾਕਾਰੇਨ ਉਪਗਚ੍ਛਨ੍ਤੇ ਕਾਰੇਸੁਂ.

ਮਹਾਸਤ੍ਤੋ ਨਿਰਯਭਯਂ ਆਵਜ੍ਜੇਤ੍ਵਾ ‘‘ਇਤੋ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਨਿਰਯੋ ਭਾਯਿਤਬ੍ਬੋ’’ਤਿ ਨਿਚ੍ਚਲੋਵ ਹੋਤਿ. ਏਵਮ੍ਪਿ ਵੀਮਂਸਿਤ੍ਵਾ ਅਨ੍ਤਰਂ ਨ ਪਸ੍ਸਨ੍ਤਾ ਪੁਨ ‘‘ਦਾਰਕਾ ਨਾਮ ਸਮਜ੍ਜਤ੍ਥਿਕਾ ਹੋਨ੍ਤੀ’’ਤਿ ਸਮਜ੍ਜਂ ਕਾਰੇਤ੍ਵਾਪਿ ਮਹਾਸਤ੍ਤਂ ਸਾਣਿਯਾ ਪਰਿਕ੍ਖਿਪਿਤ੍ਵਾ ਅਜਾਨਨ੍ਤਸ੍ਸੇਵ ਚਤੂਸੁ ਪਸ੍ਸੇਸੁ ਸਙ੍ਖਸਦ੍ਦੇਹਿ ਭੇਰਿਸਦ੍ਦੇਹਿ ਚ ਸਹਸਾ ਏਕਨਿਨ੍ਨਾਦਂ ਕਾਰੇਤ੍ਵਾਪਿ ਅਨ੍ਧਕਾਰੇ ਘਟੇਹਿ ਦੀਪਂ ਉਪਨੇਤ੍ਵਾ ਸਹਸਾ ਆਲੋਕਂ ਦਸ੍ਸੇਤ੍ਵਾਪਿ ਸਕਲਸਰੀਰਂ ਫਾਣਿਤੇਨ ਮਕ੍ਖੇਤ੍ਵਾ ਬਹੁਮਕ੍ਖਿਕੇ ਠਾਨੇ ਨਿਪਜ੍ਜਾਪੇਤ੍ਵਾਪਿ ਨ੍ਹਾਪਨਾਦੀਨਿ ਅਕਤ੍ਵਾ ਉਚ੍ਚਾਰਪਸ੍ਸਾਵਮਤ੍ਥਕੇ ਨਿਪਨ੍ਨਂ ਅਜ੍ਝੁਪੇਕ੍ਖਿਤ੍ਵਾਪਿ ਤਤ੍ਥ ਚ ਪਲਿਪਨ੍ਨਂ ਸਯਮਾਨਂ ਪਰਿਹਾਸੇਹਿ ਅਕ੍ਕੋਸਨੇਹਿ ਚ ਘਟ੍ਟੇਤ੍ਵਾਪਿ ਹੇਟ੍ਠਾਮਞ੍ਚੇ ਅਗ੍ਗਿਕਪਲ੍ਲਂ ਕਤ੍ਵਾ ਉਣ੍ਹਸਨ੍ਤਾਪੇਨ ਪੀਲ਼ੇਤ੍ਵਾਪੀਤਿ ਏਵਂ ਨਾਨਾਵਿਧੇਹਿ ਉਪਾਯੇਹਿ ਵੀਮਂਸਨ੍ਤਾਪਿਸ੍ਸ ਅਨ੍ਤਰਂ ਨ ਪਸ੍ਸਿਂਸੁ.

ਮਹਾਸਤ੍ਤੋ ਹਿ ਸਬ੍ਬਤ੍ਥ ਨਿਰਯਭਯਮੇਵ ਆਵਜ੍ਜੇਤ੍ਵਾ ਅਧਿਟ੍ਠਾਨਂ ਅਵਿਕੋਪੇਨ੍ਤੋ ਨਿਚ੍ਚਲੋਵ ਅਹੋਸਿ. ਏਵਂ ਪਨ੍ਨਰਸਵਸ੍ਸਾਨਿ ਵੀਮਂਸਿਤ੍ਵਾ ਅਥ ਸੋਲ਼ਸਵਸ੍ਸਕਾਲੇ ‘‘ਪੀਠਸਪ੍ਪਿਨੋ ਵਾ ਹੋਨ੍ਤੁ ਮੂਗਬਧਿਰਾ ਵਾ ਰਜਨੀਯੇਸੁ ਅਰਜ੍ਜਨ੍ਤਾ ਦੁਸ੍ਸਨੀਯੇਸੁ ਅਦੁਸ੍ਸਨ੍ਤਾ ਨਾਮ ਨਤ੍ਥੀਤਿ ਨਾਟਕਾਨਿਸ੍ਸ ਪਚ੍ਚੁਪਟ੍ਠਪੇਤ੍ਵਾ ਵੀਮਂਸਿਸ੍ਸਾਮਾ’’ਤਿ ਕੁਮਾਰਂ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਦੇਵਪੁਤ੍ਤਂ ਵਿਯ ਅਲਙ੍ਕਰਿਤ੍ਵਾ ਦੇਵਵਿਮਾਨਕਪ੍ਪਂ ਪੁਪ੍ਫਗਨ੍ਧਦਾਮਾਦੀਹਿ ਏਕਾਮੋਦਪਮੋਦਂ ਪਾਸਾਦਂ ਆਰੋਪੇਤ੍ਵਾ ਉਤ੍ਤਮਰੂਪਧਰਾ ਭਾਵਵਿਲਾਸਸਮ੍ਪਨ੍ਨਾ ਦੇਵਚ੍ਛਰਾਪਟਿਭਾਗਾ ਇਤ੍ਥਿਯੋ ਉਪਟ੍ਠਪੇਸੁਂ – ‘‘ਗਚ੍ਛਥ ਨਚ੍ਚਾਦੀਹਿ ਕੁਮਾਰਂ ਅਭਿਰਮਾਪੇਥਾ’’ਤਿ. ਤਾ ਉਪਗਨ੍ਤ੍ਵਾ ਤਥਾ ਕਾਤੁਂ ਵਾਯਮਿਂਸੁ. ਸੋ ਬੁਦ੍ਧਿਸਮ੍ਪਨ੍ਨਤਾਯ ‘‘ਇਮਾ ਮੇ ਸਰੀਰਸਮ੍ਫਸ੍ਸਂ ਮਾ ਵਿਨ੍ਦਿਂਸੂ’’ਤਿ ਅਸ੍ਸਾਸਪਸ੍ਸਾਸੇ ਨਿਰੁਨ੍ਧਿ. ਤਾ ਤਸ੍ਸ ਸਰੀਰਸਮ੍ਫਸ੍ਸਂ ਅਵਿਨ੍ਦਨ੍ਤਿਯੋ ‘‘ਥਦ੍ਧਸਰੀਰੋ ਏਸ, ਨਾਯਂ ਮਨੁਸ੍ਸੋ, ਯਕ੍ਖੋ ਭਵਿਸ੍ਸਤੀ’’ਤਿ ਪਕ੍ਕਮਿਂਸੁ.

ਏਵਂ ਸੋਲ਼ਸ ਵਸ੍ਸਾਨਿ ਸੋਲ਼ਸਹਿ ਮਹਾਵੀਮਂਸਾਹਿ ਅਨੇਕਾਹਿ ਚ ਖੁਦ੍ਦਕਵੀਮਂਸਾਹਿ ਪਰਿਗ੍ਗਣ੍ਹਿਤੁਂ ਅਸਕ੍ਕੁਣਿਤ੍ਵਾ ਮਾਤਾਪਿਤਰੋ ‘‘ਤਾਤ, ਤੇਮਿਯਕੁਮਾਰ, ਮਯਂ ਤਵ ਅਮੂਗਾਦਿਭਾਵਂ ਜਾਨਾਮ, ਨ ਹਿ ਤੇਸਂ ਏਵਰੂਪਾਨਿ ਮੁਖਕਣ੍ਣਸੋਤਪਾਦਾਨਿ ਹੋਨ੍ਤਿ, ਤ੍ਵਂ ਅਮ੍ਹੇਹਿ ਪਤ੍ਥੇਤ੍ਵਾ ਲਦ੍ਧਪੁਤ੍ਤਕੋ, ਮਾ ਨੋ ਨਾਸੇਹਿ, ਸਕਲਜਮ੍ਬੁਦੀਪੇ ਰਾਜੂਨਂ ਸਨ੍ਤਿਕਾ ਗਰਹਤੋ ਮੋਚੇਹੀ’’ਤਿ ਸਹ ਵਿਸੁਂ ਵਿਸੁਞ੍ਚ ਅਨੇਕਵਾਰਂ ਯਾਚਿਂਸੁ. ਸੋ ਤੇਹਿ ਏਵਂ ਯਾਚਿਯਮਾਨੋਪਿ ਅਸੁਣਨ੍ਤੋ ਵਿਯ ਹੁਤ੍ਵਾ ਨਿਪਜ੍ਜਿ.

੫੮. ਅਥ ਰਾਜਾ ਮਹਾਸਤ੍ਤਸ੍ਸ ਉਭੋ ਪਾਦੇ ਕਣ੍ਣਸੋਤੇ ਜਿਵ੍ਹਂ ਉਭੋ ਚ ਹਤ੍ਥੇ ਕੁਸਲੇਹਿ ਪੁਰਿਸੇਹਿ ਵੀਮਂਸਾਪੇਤ੍ਵਾ ‘‘ਯਦਿਪਿ ਅਪੀਠਸਪ੍ਪਿਆਦੀਨਂ ਵਿਯਸ੍ਸ ਪਾਦਾਦਯੋ, ਤਥਾਪਿ ਅਯਂ ਪੀਠਸਪ੍ਪਿ ਮੂਗਬਧਿਰੋ ਮਞ੍ਞੇ, ਈਦਿਸੇ ਕਾਲ਼ਕਣ੍ਣਿਪੁਰਿਸੇ ਇਮਸ੍ਮਿਂ ਗੇਹੇ ਵਸਨ੍ਤੇ ਤਯੋ ਅਨ੍ਤਰਾਯਾ ਪਞ੍ਞਾਯਨ੍ਤਿ ਜੀਵਿਤਸ੍ਸ ਵਾ ਛਤ੍ਤਸ੍ਸ ਵਾ ਮਹੇਸਿਯਾ ਵਾ’’ਤਿ ਲਕ੍ਖਣਪਾਠਕੇਹਿ ਇਦਾਨਿ ਕਥਿਤਂ. ਜਾਤਦਿਵਸੇ ਪਨ ‘‘ਤੁਮ੍ਹਾਕਂ ਦੋਮਨਸ੍ਸਪਰਿਹਰਣਤ੍ਥਂ ‘ਧਞ੍ਞਪੁਞ੍ਞਲਕ੍ਖਣੋ’ਤਿ ਵੁਤ੍ਤ’’ਨ੍ਤਿ ਅਮਚ੍ਚੇਹਿ ਆਰੋਚਿਤਂ ਸੁਤ੍ਵਾ ਅਨ੍ਤਰਾਯਭਯੇਨ ਭੀਤੋ ‘‘ਗਚ੍ਛਥ ਨਂ ਅਵਮਙ੍ਗਲਰਥੇ ਨਿਪਜ੍ਜਾਪੇਤ੍ਵਾ ਪਚ੍ਛਿਮਦ੍ਵਾਰੇਨ ਨੀਹਰਾਪੇਤ੍ਵਾ ਆਮਕਸੁਸਾਨੇ ਨਿਖਣਥਾ’’ਤਿ ਆਣਾਪੇਸਿ. ਤਂ ਸੁਤ੍ਵਾ ਮਹਾਸਤ੍ਤੋ ਹਟ੍ਠੋ ਉਦਗ੍ਗੋ ਅਹੋਸਿ – ‘‘ਚਿਰਸ੍ਸਂ ਵਤ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ. ਤੇਨ ਵੁਤ੍ਤਂ ‘‘ਤਤੋ ਮੇ ਹਤ੍ਥਪਾਦੇ ਚਾ’’ਤਿਆਦਿ.

ਤਤ੍ਥ ਮਦ੍ਦਿਯਾਤਿ ਮਦ੍ਦਨਵਸੇਨ ਵੀਮਂਸਿਤ੍ਵਾ. ਅਨੂਨਤਨ੍ਤਿ ਹਤ੍ਥਾਦੀਹਿ ਅਵਿਕਲਤਂ. ਨਿਨ੍ਦਿਸੁਨ੍ਤਿ ‘‘ਏਵਂ ਅਨੂਨਾਵਯਵੋਪਿ ਸਮਾਨੋ ਮੂਗਾਦਿ ਵਿਯ ਦਿਸ੍ਸਮਾਨੋ ‘‘ਰਜ੍ਜਂ ਕਾਰੇਤੁਂ ਅਭਬ੍ਬੋ, ਕਾਲ਼ਕਣ੍ਣਿਪੁਰਿਸੋ ਅਯ’’ਨ੍ਤਿ ਗਰਹਿਂਸੁ. ‘‘ਨਿਦ੍ਦਿਸੁ’’ਨ੍ਤਿਪਿ ਪਾਠੋ, ਵਦਿਂਸੂਤਿ ਅਤ੍ਥੋ.

੫੯. ਛਡ੍ਡਨਂ ਅਨੁਮੋਦਿਸੁਨ੍ਤਿ ਰਾਜਦਸ੍ਸਨਤ੍ਥਂ ਆਗਤਾ ਸਬ੍ਬੇਪਿ ਜਨਪਦਵਾਸਿਨੋ ਸੇਨਾਪਤਿਪੁਰੋਹਿਤਪ੍ਪਮੁਖਾ ਰਾਜਪੁਰਿਸਾ ਤੇ ਸਬ੍ਬੇਪਿ ਏਕਮਨਾ ਸਮਾਨਚਿਤ੍ਤਾ ਹੁਤ੍ਵਾ ਅਨ੍ਤਰਾਯਪਰਿਹਰਣਤ੍ਥਂ ਰਞ੍ਞਾ ਆਣਤ੍ਤਾ ਭੂਮਿਯਂ ਨਿਖਣਨਵਸੇਨ ਮਮ ਛਡ੍ਡਨਂ ਮੁਖਸਙ੍ਕੋਚਂ ਅਕਤ੍ਵਾ ਅਭਿਮੁਖਭਾਵੇਨ ਸਾਧੁ ਸੁਟ੍ਠੁ ਇਦਂ ਕਤ੍ਤਬ੍ਬਮੇਵਾਤਿ ਅਨੁਮੋਦਿਂਸੁ.

੬੦. ਸੋ ਮੇ ਅਤ੍ਥੋ ਸਮਿਜ੍ਝਥਾਤਿ ਯਸ੍ਸਤ੍ਥਾਯ ਯਦਤ੍ਥਂ ਤਤੋ ਮੂਗਾਦਿਭਾਵਾਧਿਟ੍ਠਾਨਵਸੇਨ ਦੁਕ੍ਕਰਚਰਣਂ ਚਿਣ੍ਣਂ ਚਰਿਤਂ, ਸੋ ਅਤ੍ਥੋ ਮਮ ਸਮਿਜ੍ਝਤਿ. ਤੇਸਂ ਮਮ ਮਾਤਾਪਿਤੁਆਦੀਨਂ ਮਤਿਂ ਅਧਿਪ੍ਪਾਯਂ ਸੁਤ੍ਵਾ ਸੋ ਅਹਂ ਮਮ ਅਧਿਪ੍ਪਾਯਸਮਿਜ੍ਝਨੇਨ ਹਟ੍ਠੋ ਅਨੁਪਧਾਰੇਤ੍ਵਾ ਭੂਮਿਯਂ ਨਿਖਣਨਾਨੁਜਾਨਨੇਨ ਸਂਵਿਗ੍ਗਮਾਨਸੋਵ ਅਹੋਸਿਨ੍ਤਿ ਵਚਨਸੇਸੇਨ ਸਮ੍ਬਨ੍ਧੋ ਵੇਦਿਤਬ੍ਬੋ.

੬੧. ਏਵਂ ਕੁਮਾਰਸ੍ਸ ਭੂਮਿਯਂ ਨਿਖਣਨੇ ਰਞ੍ਞਾ ਆਣਤ੍ਤੇ ਚਨ੍ਦਾਦੇਵੀ ਤਂ ਪਵਤ੍ਤਿਂ ਸੁਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ, ‘‘ਦੇਵ, ਤੁਮ੍ਹੇਹਿ ਮਯ੍ਹਂ ਵਰੋ ਦਿਨ੍ਨੋ, ਮਯਾ ਚ ਗਹਿਤਕਂ ਕਤ੍ਵਾ ਠਪਿਤੋ, ਤਂ ਮੇ ਇਦਾਨਿ ਦੇਥਾ’’ਤਿ. ‘‘ਗਣ੍ਹ, ਦੇਵੀ’’ਤਿ. ‘‘ਪੁਤ੍ਤਸ੍ਸ ਮੇ ਰਜ੍ਜਂ ਦੇਥਾ’’ਤਿ. ‘‘ਪੁਤ੍ਤੋ ਤੇ ਕਾਲ਼ਕਣ੍ਣੀ, ਨ ਸਕ੍ਕਾ ਦਾਤੁ’’ਨ੍ਤਿ. ‘‘ਤੇਨ ਹਿ, ਦੇਵ, ਯਾਵਜੀਵਂ ਅਦੇਨ੍ਤੋ ਸਤ੍ਤ ਵਸ੍ਸਾਨਿ ਦੇਥਾ’’ਤਿ. ‘‘ਤਮ੍ਪਿ ਨ ਸਕ੍ਕਾ’’ਤਿ. ‘‘ਛ ਵਸ੍ਸਾਨਿ, ਪਞ੍ਚਚਤ੍ਤਾਰਿਤੀਣਿਦ੍ਵੇਏਕਂ ਵਸ੍ਸਂ, ਸਤ੍ਤ ਮਾਸੇ, ਛਪਞ੍ਚਚਤ੍ਤਾਰੋਤਯੋਦ੍ਵੇਏਕਂ ਮਾਸਂਅਦ੍ਧਮਾਸਂਸਤ੍ਤਾਹਂ ਦੇਥਾ’’ਤਿ. ਸਾਧੁ ਗਣ੍ਹਾਤਿ.

ਸਾ ਪੁਤ੍ਤਂ ਅਲਙ੍ਕਾਰਾਪੇਤ੍ਵਾ ‘‘ਤੇਮਿਯਕੁਮਾਰਸ੍ਸ ਇਦਂ ਰਜ੍ਜ’’ਨ੍ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਨਗਰਂ ਅਲਙ੍ਕਾਰਾਪੇਤ੍ਵਾ ਪੁਤ੍ਤਂ ਹਤ੍ਥਿਕ੍ਖਨ੍ਧਂ ਆਰੋਪੇਤ੍ਵਾ ਸੇਤਚ੍ਛਤ੍ਤਂ ਮਤ੍ਥਕੇ ਕਾਰਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਆਗਤਂ ਅਲਙ੍ਕਤਸਿਰਿਸਯਨੇ ਨਿਪਜ੍ਜਾਪੇਤ੍ਵਾ ਸਬ੍ਬਰਤ੍ਤਿਂ ਯਾਚਿ – ‘‘ਤਾਤ ਤੇਮਿਯ, ਤਂ ਨਿਸ੍ਸਾਯ ਸੋਲ਼ਸ ਵਸ੍ਸਾਨਿ ਨਿਦ੍ਦਂ ਅਲਭਿਤ੍ਵਾ ਰੋਦਮਾਨਾਯ ਮੇ ਅਕ੍ਖੀਨਿ ਉਪ੍ਪਕ੍ਕਾਨਿ, ਸੋਕੇਨ ਹਦਯਂ ਭਿਜ੍ਜਤਿ ਵਿਯ, ਤਵ ਅਪੀਠਸਪ੍ਪਿਆਦਿਭਾਵਂ ਜਾਨਾਮਿ, ਮਾ ਮਂ ਅਨਾਥਂ ਕਰੀ’’ਤਿ. ਇਮਿਨਾ ਨਿਯਾਮੇਨ ਛ ਦਿਵਸੇ ਯਾਚਿ. ਛਟ੍ਠੇ ਦਿਵਸੇ ਰਾਜਾ ਸੁਨਨ੍ਦਂ ਨਾਮ ਸਾਰਥਿਂ ਪਕ੍ਕੋਸਾਪੇਤ੍ਵਾ ‘‘ਸ੍ਵੇ ਪਾਤੋਵ ਅਵਮਙ੍ਗਲਰਥੇਨ ਕੁਮਾਰਂ ਨੀਹਰਿਤ੍ਵਾ ਆਮਕਸੁਸਾਨੇ ਭੂਮਿਯਂ ਨਿਖਣਿਤ੍ਵਾ ਪਥਵਿਵਡ੍ਢਨਕਕਮ੍ਮਂ ਕਤ੍ਵਾ ਏਹੀ’’ਤਿ ਆਹ. ਤਂ ਸੁਤ੍ਵਾ ਦੇਵੀ ‘‘ਤਾਤ, ਕਾਸਿਰਾਜਾ ਤਂ ਸ੍ਵੇ ਆਮਕਸੁਸਾਨੇ ਨਿਖਣਿਤੁਂ ਆਣਾਪੇਸਿ. ਸ੍ਵੇ ਮਰਣਂ ਪਾਪੁਣਿਸ੍ਸਤੀ’’ਤਿ ਆਹ.

ਮਹਾਸਤ੍ਤੋ ਤਂ ਸੁਤ੍ਵਾ ‘‘ਤੇਮਿਯ, ਸੋਲ਼ਸ ਵਸ੍ਸਾਨਿ ਤਯਾ ਕਤੋ ਵਾਯਾਮੋ ਮਤ੍ਥਕਂ ਪਤ੍ਤੋ’’ਤਿ ਹਟ੍ਠੋ ਉਦਗ੍ਗੋ ਅਹੋਸਿ. ਮਾਤੁਯਾ ਪਨਸ੍ਸ ਹਦਯਂ ਭਿਜ੍ਜਨਾਕਾਰਂ ਵਿਯ ਅਹੋਸਿ. ਅਥ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਾਤੋਵ ਸਾਰਥਿ ਰਥਂ ਆਦਾਯ ਦ੍ਵਾਰੇ ਠਪੇਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ‘‘ਦੇਵਿ, ਮਾ ਮਯ੍ਹਂ ਕੁਜ੍ਝਿ, ਰਞ੍ਞੋ ਆਣਾ’’ਤਿ ਪੁਤ੍ਤਂ ਆਲਿਙ੍ਗਿਤ੍ਵਾ ਨਿਪਨ੍ਨਂ ਦੇਵਿਂ ਪਿਟ੍ਠਿਹਤ੍ਥੇਨ ਅਪਨੇਤ੍ਵਾ ਕੁਮਾਰਂ ਉਕ੍ਖਿਪਿਤ੍ਵਾ ਪਾਸਾਦਾ ਓਤਰਿ. ਦੇਵੀ ਉਰਂ ਪਹਰਿਤ੍ਵਾ ਮਹਾਸਦ੍ਦੇਨ ਪਰਿਦੇਵਿਤ੍ਵਾ ਮਹਾਤਲੇ ਓਹੀਯਿ.

ਅਥ ਨਂ ਮਹਾਸਤ੍ਤੋ ਓਲੋਕੇਤ੍ਵਾ ‘‘ਮਯਿ ਅਕਥੇਨ੍ਤੇ ਮਾਤੁ ਸੋਕੋ ਬਲਵਾ ਭਵਿਸ੍ਸਤੀ’’ਤਿ ਕਥੇਤੁਕਾਮੋ ਹੁਤ੍ਵਾਪਿ ‘‘ਸਚੇ ਕਥੇਸ੍ਸਾਮਿ ਸੋਲ਼ਸ ਵਸ੍ਸਾਨਿ ਕਤੋ ਵਾਯਾਮੋ ਮੋਘੋ ਭਵਿਸ੍ਸਤਿ, ਅਕਥੇਨ੍ਤੋ ਪਨਾਹਂ ਅਤ੍ਤਨੋ ਚ ਮਾਤਾਪਿਤੂਨਞ੍ਚ ਪਚ੍ਚਯੋ ਭਵਿਸ੍ਸਾਮੀ’’ਤਿ ਅਧਿਵਾਸੇਸਿ. ਸਾਰਥਿ ‘‘ਮਹਾਸਤ੍ਤਂ ਰਥਂ ਆਰੋਪੇਤ੍ਵਾ ਪਚ੍ਛਿਮਦ੍ਵਾਰਾਭਿਮੁਖਂ ਰਥਂ ਪੇਸੇਸ੍ਸਾਮੀ’’ਤਿ ਪਾਚੀਨਦ੍ਵਾਰਾਭਿਮੁਖਂ ਪੇਸੇਸਿ. ਰਥੋ ਨਗਰਾ ਨਿਕ੍ਖਮਿਤ੍ਵਾ ਦੇਵਤਾਨੁਭਾਵੇਨ ਤਿਯੋਜਨਟ੍ਠਾਨਂ ਗਤੋ. ਮਹਾਸਤ੍ਤੋ ਸੁਟ੍ਠੁਤਰਂ ਤੁਟ੍ਠਚਿਤ੍ਤੋ ਅਹੋਸਿ. ਤਤ੍ਥ ਵਨਘਟਂ ਸਾਰਥਿਸ੍ਸ ਆਮਕਸੁਸਾਨਂ ਵਿਯ ਉਪਟ੍ਠਾਸਿ. ਸੋ ‘‘ਇਦਂ ਠਾਨਂ ਸੁਨ੍ਦਰ’’ਨ੍ਤਿ ਰਥਂ ਓਕ੍ਕਮਾਪੇਤ੍ਵਾ ਮਗ੍ਗਪਸ੍ਸੇ ਠਪੇਤ੍ਵਾ ਰਥਾ ਓਰੁਯ੍ਹ ਮਹਾਸਤ੍ਤਸ੍ਸ ਆਭਰਣਭਣ੍ਡਂ ਓਮੁਞ੍ਚਿਤ੍ਵਾ ਭਣ੍ਡਿਕਂ ਕਤ੍ਵਾ ਠਪੇਤ੍ਵਾ ਕੁਦਾਲਂ ਆਦਾਯ ਅਵਿਦੂਰੇ ਆਵਾਟਂ ਖਣਿਤੁਂ ਆਰਭਿ. ਤੇਨ ਵੁਤ੍ਤਂ ‘‘ਨ੍ਹਾਪੇਤ੍ਵਾ ਅਨੁਲਿਮ੍ਪਿਤ੍ਵਾ’’ਤਿਆਦਿ.

ਤਤ੍ਥ ਨ੍ਹਾਪੇਤ੍ਵਾਤਿ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਪੇਤ੍ਵਾ. ਅਨੁਲਿਮ੍ਪਿਤ੍ਵਾਤਿ ਸੁਰਭਿਵਿਲੇਪਨੇਨ ਵਿਲਿਮ੍ਪੇਤ੍ਵਾ. ਵੇਠੇਤ੍ਵਾ ਰਾਜਵੇਠਨਨ੍ਤਿ ਕਾਸਿਰਾਜੂਨਂ ਪਵੇਣਿਯਾਗਤਂ ਰਾਜਮਕੁਟਂ ਸੀਸੇ ਪਟਿਮੁਞ੍ਚਿਤ੍ਵਾ. ਅਭਿਸਿਞ੍ਚਿਤ੍ਵਾਤਿ ਤਸ੍ਮਿਂ ਰਾਜਕੁਲੇ ਰਾਜਾਭਿਸੇਕਨਿਯਾਮੇਨ ਅਭਿਸਿਞ੍ਚਿਤ੍ਵਾ. ਛਤ੍ਤੇਨ ਕਾਰੇਸੁਂ ਪੁਰਂ ਪਦਕ੍ਖਿਣਨ੍ਤਿ ਸੇਤਚ੍ਛਤ੍ਤੇਨ ਧਾਰਿਯਮਾਨੇਨ ਮਂ ਨਗਰਂ ਪਦਕ੍ਖਿਣਂ ਕਾਰੇਸੁਂ.

੬੨. ਸਤ੍ਤਾਹਂ ਧਾਰਯਿਤ੍ਵਾਨਾਤਿ ਮਯ੍ਹਂ ਮਾਤੁ ਚਨ੍ਦਾਦੇਵਿਯਾ ਵਰਲਾਭਨਵਸੇਨ ਲਦ੍ਧਂ ਸਤ੍ਤਾਹਂ ਮਮ ਸੇਤਚ੍ਛਤ੍ਤਂ ਧਾਰਯਿਤ੍ਵਾ. ਉਗ੍ਗਤੇ ਰਵਿਮਣ੍ਡਲੇਤਿ ਤਤੋ ਪੁਨਦਿਵਸੇ ਸੂਰਿਯਮਣ੍ਡਲੇ ਉਗ੍ਗਤਮਤ੍ਤੇ ਅਵਮਙ੍ਗਲਰਥੇਨ ਮਂ ਨਗਰਤੋ ਨੀਹਰਿਤ੍ਵਾ ਭੂਮਿਯਂ ਨਿਖਣਨਤ੍ਥਂ ਸਾਰਥਿ ਸੁਨਨ੍ਦੋ ਵਨਮੁਪਗਚ੍ਛਿ.

੬੩. ਸਜ੍ਜਸ੍ਸਨ੍ਤਿ ਸਨ੍ਨਦ੍ਧੋ ਅਸ੍ਸਂ, ਯੁਗੇ ਯੋਜਿਤਸ੍ਸਂ ਮੇ ਰਥਂ ਮਗ੍ਗਤੋ ਉਕ੍ਕਮਾਪਨਵਸੇਨ ਏਕੋਕਾਸੇ ਕਤ੍ਵਾ. ਹਤ੍ਥਮੁਚ੍ਚਿਤੋਤਿ ਮੁਚ੍ਚਿਤਹਤ੍ਥੋ, ਰਥਪਾਚਨਤੋ ਮੁਤ੍ਤਹਤ੍ਥੋਤਿ ਅਤ੍ਥੋ. ਅਥ ਵਾ ਹਤ੍ਥਮੁਚ੍ਚਿਤੋਤਿ ਹਤ੍ਥਮੁਤ੍ਤੋ ਮਮ ਹਤ੍ਥਤੋ ਮੁਚ੍ਚਿਤ੍ਵਾਤਿ ਅਤ੍ਥੋ. ਕਾਸੁਨ੍ਤਿ ਆਵਾਟਂ. ਨਿਖਾਤੁਨ੍ਤਿ ਨਿਖਣਿਤੁਂ.

੬੪-੫. ਇਦਾਨਿ ਯਦਤ੍ਥਂ ਮਯਾ ਸੋਲ਼ਸ ਵਸ੍ਸਾਨਿ ਮੂਗਵਤਾਦਿਅਧਿਟ੍ਠਾਨੇਨ ਦੁਕ੍ਕਰਚਰਿਯਾ ਅਧਿਟ੍ਠਿਤਾ, ਤਂ ਦਸ੍ਸੇਤੁਂ ‘‘ਅਧਿਟ੍ਠਿਤਮਧਿਟ੍ਠਾਨ’’ਨ੍ਤਿ ਗਾਥਾਦ੍ਵਯਮਾਹ.

ਤਤ੍ਥ ਤਜ੍ਜੇਨ੍ਤੋ ਵਿਵਿਧਕਾਰਣਾਤਿ ਦ੍ਵਿਮਾਸਿਕਕਾਲਤੋ ਪਟ੍ਠਾਯ ਯਾਵ ਸੋਲ਼ਸਸਂਵਚ੍ਛਰਾ ਥਞ੍ਞਪਟਿਸੇਧਨਾਦੀਹਿ ਵਿਵਿਧੇਹਿ ਨਾਨਪ੍ਪਕਾਰੇਹਿ ਕਾਰਣੇਹਿ ਤਜ੍ਜਯਨ੍ਤੋ ਭਯਵਿਦ੍ਧਂਸਨਵਸੇਨ ਵਿਹੇਠਿਯਮਾਨੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਥ ਮਹਾਸਤ੍ਤੋ ਸੁਨਨ੍ਦੇ ਕਾਸੁਂ ਖਣਨ੍ਤੇ ‘‘ਅਯਂ ਮੇ ਵਾਯਾਮਕਾਲੋ’’ਤਿ ਉਟ੍ਠਾਯ ਅਤ੍ਤਨੋ ਹਤ੍ਥਪਾਦੇ ਸਮ੍ਬਾਹਿਤ੍ਵਾ ਰਥਾ ਓਤਰਿਤੁਂ ਮੇ ਬਲਂ ਅਤ੍ਥੀਤਿ ਞਤ੍ਵਾ ਚਿਤ੍ਤਂ ਉਪ੍ਪਾਦੇਸਿ. ਤਾਵਦੇਵਸ੍ਸ ਪਾਦਪਤਿਟ੍ਠਾਨਟ੍ਠਾਨਂ ਵਾਤਪੁਣ੍ਣਭਸ੍ਤਚਮ੍ਮਂ ਵਿਯ ਉਗ੍ਗਨ੍ਤ੍ਵਾ ਰਥਸ੍ਸ ਪਚ੍ਛਿਮਨ੍ਤਂ ਆਹਚ੍ਚ ਅਟ੍ਠਾਸਿ. ਸੋ ਓਤਰਿਤ੍ਵਾ ਕਤਿਪਯੇ ਵਾਰੇ ਅਪਰਾਪਰਂ ਚਙ੍ਕਮਿਤ੍ਵਾ ‘‘ਯੋਜਨਸਤਮ੍ਪਿ ਗਨ੍ਤੁਂ ਮੇ ਬਲਂ ਅਤ੍ਥੀ’’ਤਿ ਞਤ੍ਵਾ ਰਥਂ ਪਚ੍ਛਿਮਨ੍ਤੇ ਗਹੇਤ੍ਵਾ ਕੁਮਾਰਕਾਨਂ ਕੀਲ਼ਨਯਾਨਕਂ ਵਿਯ ਉਕ੍ਖਿਪਿਤ੍ਵਾ ‘‘ਸਚੇ ਸਾਰਥਿ ਮਯਾ ਸਦ੍ਧਿਂ ਪਟਿਵਿਰੁਜ੍ਝੇਯ੍ਯ, ਅਤ੍ਥਿ ਮੇ ਪਟਿਵਿਰੁਜ੍ਝਿਤੁਂ ਬਲ’’ਨ੍ਤਿ ਸਲ੍ਲਕ੍ਖੇਤ੍ਵਾ ਪਸਾਧਨਤ੍ਥਾਯ ਚਿਤ੍ਤਂ ਉਪ੍ਪਾਦੇਸਿ. ਤਙ੍ਖਣਞ੍ਞੇਵ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਤਂ ਕਾਰਣਂ ਞਤ੍ਵਾ ਵਿਸ੍ਸਕਮ੍ਮਂ ਆਣਾਪੇਸਿ – ‘‘ਗਚ੍ਛ ਕਾਸਿਰਾਜਪੁਤ੍ਤਂ ਅਲਙ੍ਕਰੋਹੀ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਦਿਬ੍ਬੇਹਿ ਚ ਮਾਨੁਸੇਹਿ ਚ ਅਲਙ੍ਕਾਰੇਹਿ ਸਕ੍ਕਂ ਵਿਯ ਤਂ ਅਲਙ੍ਕਰਿ. ਸੋ ਦੇਵਰਾਜਲੀਲ਼ਾਯ ਸਾਰਥਿਸ੍ਸ ਖਣਨੋਕਾਸਂ ਗਨ੍ਤ੍ਵਾ ਆਵਾਟਤੀਰੇ ਠਤ੍ਵਾ –

‘‘ਕਿਨ੍ਨੁ ਸਨ੍ਤਰਮਾਨੋਵ, ਕਾਸੁਂ ਖਣਸਿ ਸਾਰਥਿ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਕਾਸੁਯਾ ਕਰਿਸ੍ਸਸੀ’’ਤਿ. (ਜਾ. ੨.੨੨.੩) –

ਆਹ.

ਤੇਨ ਉਦ੍ਧਂ ਅਨੋਲੋਕੇਤ੍ਵਾਵ –

‘‘ਰਞ੍ਞੋ ਮੂਗੋ ਚ ਪਕ੍ਖੋ ਚ, ਪੁਤ੍ਤੋ ਜਾਤੋ ਅਚੇਤਸੋ;

ਸੋਮ੍ਹਿ ਰਞ੍ਞਾ ਸਮਜ੍ਝਿਟ੍ਠੋ, ਪੁਤ੍ਤਂ ਮੇ ਨਿਖਣਂ ਵਨੇ’’ਤਿ. (ਜਾ. ੨.੨੨.੪) –

ਵੁਤ੍ਤੇ ਮਹਾਸਤ੍ਤੋ –

‘‘ਨ ਬਧਿਰੋ ਨ ਮੂਗੋਸ੍ਮਿ, ਨ ਪਕ੍ਖੋ ਨ ਚ ਵੀਕਲੋ;

ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ.

‘‘ਊਰੂ ਬਾਹੁਞ੍ਚ ਮੇ ਪਸ੍ਸ, ਭਾਸਿਤਞ੍ਚ ਸੁਣੋਹਿ ਮੇ;

ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ’’ਤਿ. (ਜਾ. ੨.੨੨.੫-੬) –

ਵਤ੍ਵਾ ਪੁਨ ਤੇਨ ਆਵਾਟਖਣਨਂ ਪਹਾਯ ਉਦ੍ਧਂ ਓਲੋਕੇਤ੍ਵਾ ਤਸ੍ਸ ਰੂਪਸਮ੍ਪਤ੍ਤਿਂ ਦਿਸ੍ਵਾ ‘‘ਮਨੁਸ੍ਸੋ ਵਾ ਦੇਵੋ ਵਾ’’ਤਿ ਅਜਾਨਨ੍ਤੇਨ –

‘‘ਦੇਵਤਾ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ. (ਜਾ. ੨.੨੨.੭) –

ਵੁਤ੍ਤੇ –

‘‘ਨਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਕਾਸਿਰਞ੍ਞੋ ਅਹਂ ਪੁਤ੍ਤੋ, ਯਂ ਕਾਸੁਯਾ ਨਿਖਞ੍ਞਸਿ.

‘‘ਤਸ੍ਸ ਰਞ੍ਞੋ ਅਹਂ ਪੁਤ੍ਤੋ, ਯਂ ਤ੍ਵਂ ਸਮ੍ਮੂਪਜੀਵਸਿ;

ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ.

‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;

ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

‘‘ਯਥਾ ਰੁਕ੍ਖੋ ਤਥਾ ਰਾਜਾ, ਯਥਾ ਸਾਖਾ ਤਥਾ ਅਹਂ;

ਯਥਾ ਛਾਯੂਪਗੋ ਪੋਸੋ, ਏਵਂ ਤ੍ਵਮਸਿ ਸਾਰਥਿ;

ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ’’ਤਿ. (ਜਾ. ੨.੨੨.੮-੧੧) –

ਆਦਿਨਾ ਨਯੇਨ ਧਮ੍ਮਂ ਦੇਸੇਤ੍ਵਾ ਤੇਨ ਨਿਵਤ੍ਤਨਤ੍ਥਂ ਯਾਚਿਤੋ ਅਨਿਵਤ੍ਤਨਕਾਰਣਂ ਪਬ੍ਬਜ੍ਜਾਛਨ੍ਦਂ ਤਸ੍ਸ ਚ ਹੇਤੁ ਨਿਰਯਭਯਾਦਿਕਂ ਅਤੀਤਭਵੇ ਅਤ੍ਤਨੋ ਪਵਤ੍ਤਿਂ ਵਿਤ੍ਥਾਰੇਨ ਕਥੇਤ੍ਵਾ ਤਾਯ ਧਮ੍ਮਕਥਾਯ ਤਾਯ ਚ ਪਟਿਪਤ੍ਤਿਯਾ ਤਸ੍ਮਿਮ੍ਪਿ ਪਬ੍ਬਜਿਤੁਕਾਮੇ ਜਾਤੇ ਰਞ੍ਞੋ ਇਮਂ –

‘‘ਰਥਂ ਨਿਯ੍ਯਾਤਯਿਤ੍ਵਾਨ, ਅਨਣੋ ਏਹਿ ਸਾਰਥਿ;

ਅਨਣਸ੍ਸ ਹਿ ਪਬ੍ਬਜ੍ਜਾ, ਏਤਂ ਇਸੀਹਿ ਵਣ੍ਣਿਤ’’ਨ੍ਤਿ. (ਜਾ. ੨.੨੨.੪੪) –

ਵਤ੍ਵਾ ਤਂ ਵਿਸ੍ਸਜ੍ਜੇਸਿ.

ਸੋ ਰਥਂ ਆਭਰਣਾਨਿ ਚ ਗਹੇਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ. ਰਾਜਾ ਤਾਵਦੇਵ ‘‘ਮਹਾਸਤ੍ਤਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਨਗਰਤੋ ਨਿਗ੍ਗਚ੍ਛਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ ਇਤ੍ਥਾਗਾਰੇਹਿ ਨਾਗਰਜਾਨਪਦੇਹਿ ਚ. ਮਹਾਸਤ੍ਤੋਪਿ ਖੋ ਸਾਰਥਿਂ ਉਯ੍ਯੋਜੇਤ੍ਵਾ ਪਬ੍ਬਜਿਤੁਕਾਮੋ ਜਾਤੋ. ਤਸ੍ਸ ਚਿਤ੍ਤਂ ਞਤ੍ਵਾ ਸਕ੍ਕੋ ਵਿਸ੍ਸਕਮ੍ਮਂ ਪੇਸੇਸਿ – ‘‘ਤੇਮਿਯਪਣ੍ਡਿਤੋ ਪਬ੍ਬਜਿਤੁਕਾਮੋ, ਤਸ੍ਸ ਅਸ੍ਸਮਪਦਂ ਪਬ੍ਬਜਿਤਪਰਿਕ੍ਖਾਰੇ ਚ ਮਾਪੇਹੀ’’ਤਿ. ਸੋ ਗਨ੍ਤ੍ਵਾ ਤਿਯੋਜਨਿਕੇ ਵਨਸਣ੍ਡੇ ਅਸ੍ਸਮਂ ਮਾਪੇਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨਚਙ੍ਕਮਨਪੋਕ੍ਖਰਣੀਫਲਰੁਕ੍ਖਸਮ੍ਪਨ੍ਨਂ ਕਤ੍ਵਾ ਸਬ੍ਬੇ ਚ ਪਬ੍ਬਜਿਤਪਰਿਕ੍ਖਾਰੇ ਮਾਪੇਤ੍ਵਾ ਸਕਟ੍ਠਾਨਮੇਵ ਗਤੋ. ਬੋਧਿਸਤ੍ਤੋ ਤਂ ਦਿਸ੍ਵਾ ਸਕ੍ਕਦਤ੍ਤਿਯਭਾਵਂ ਞਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਵਤ੍ਥਾਨਿ ਅਪਨੇਤ੍ਵਾ ਤਾਪਸਵੇਸਂ ਗਹੇਤ੍ਵਾ ਕਟ੍ਠਤ੍ਥਰੇ ਨਿਸਿਨ੍ਨੋ ਅਟ੍ਠ ਸਮਾਪਤ੍ਤਿਯੋ, ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਪਬ੍ਬਜ੍ਜਾਸੁਖੇਨ ਅਸ੍ਸਮੇ ਨਿਸੀਦਿ.

ਕਾਸਿਰਾਜਾਪਿ ਸਾਰਥਿਨਾ ਦਸ੍ਸਿਤਮਗ੍ਗੇਨ ਗਨ੍ਤ੍ਵਾ ਅਸ੍ਸਮਂ ਪਵਿਸਿਤ੍ਵਾ ਮਹਾਸਤ੍ਤੇਨ ਸਹ ਸਮਾਗਨ੍ਤ੍ਵਾ ਕਤਪਟਿਸਨ੍ਥਾਰੋ ਰਜ੍ਜੇਨ ਨਿਮਨ੍ਤੇਸਿ. ਤੇਮਿਯਪਣ੍ਡਿਤੋ ਤਂ ਪਟਿਕ੍ਖਿਪਿਤ੍ਵਾ ਅਨੇਕਾਕਾਰਵੋਕਾਰਂ ਅਨਿਚ੍ਚਤਾਦਿਪਟਿਸਂਯੁਤ੍ਤਾਯ ਚ ਕਾਮਾਦੀਨਵਪਟਿਸਂਯੁਤ੍ਤਾਯ ਚ ਧਮ੍ਮਿਯਾ ਕਥਾਯ ਰਾਜਾਨਂ ਸਂਵੇਜੇਸਿ. ਸੋ ਸਂਵਿਗ੍ਗਮਾਨਸੋ ਘਰਾਵਾਸੇ ਉਕ੍ਕਣ੍ਠਿਤੋ ਪਬ੍ਬਜਿਤੁਕਾਮੋ ਹੁਤ੍ਵਾ ਅਮਚ੍ਚੇ ਇਤ੍ਥਾਗਾਰੇ ਚ ਪੁਚ੍ਛਿ. ਤੇਪਿ ਪਬ੍ਬਜਿਤੁਕਾਮਾ ਅਹੇਸੁਂ. ਅਥ ਰਾਜਾ ਚਨ੍ਦਾਦੇਵਿਂ ਆਦਿਂ ਕਤ੍ਵਾ ਸੋਲ਼ਸ ਸਹਸ੍ਸੇ ਓਰੋਧੇ ਚ ਅਮਚ੍ਚਾਦਿਕੇ ਚ ਪਬ੍ਬਜਿਤੁਕਾਮੇ ਞਤ੍ਵਾ ਨਗਰੇ ਭੇਰਿਂ ਚਰਾਪੇਸਿ – ‘‘ਯੇ ਮਮ ਪੁਤ੍ਤਸ੍ਸ ਸਨ੍ਤਿਕੇ ਪਬ੍ਬਜਿਤੁਕਾਮਾ, ਤੇ ਪਬ੍ਬਜਨ੍ਤੂ’’ਤਿ. ਸੁਵਣ੍ਣਕੋਟ੍ਠਾਗਾਰਾਦੀਨਿ ਚ ਵਿਵਰਾਪੇਤ੍ਵਾ ਵਿਸ੍ਸਜ੍ਜਾਪੇਸਿ. ਨਾਗਰਾ ਚ ਯਥਾਪਸਾਰਿਤੇਯੇਵ ਆਪਣੇ ਵਿਵਟਦ੍ਵਾਰਾਨੇਵ ਗੇਹਾਨਿ ਚ ਪਹਾਯ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ਮਹਾਜਨੇਨ ਸਦ੍ਧਿਂ ਮਹਾਸਤ੍ਤਸ੍ਸ ਸਨ੍ਤਿਕੇ ਪਬ੍ਬਜਿ. ਸਕ੍ਕਦਤ੍ਤਿਯਂ ਤਿਯੋਜਨਿਕਂ ਅਸ੍ਸਮਪਦਂ ਪਰਿਪੂਰਿ.

ਸਾਮਨ੍ਤਰਾਜਾਨੋ ‘‘ਕਾਸਿਰਾਜਾ ਪਬ੍ਬਜਿਤੋ’’ਤਿ ਸੁਤ੍ਵਾ ‘‘ਬਾਰਾਣਸਿਰਜ੍ਜਂ ਗਹੇਸ੍ਸਾਮਾ’’ਤਿ ਨਗਰਂ ਪਵਿਸਿਤ੍ਵਾ ਦੇਵਨਗਰਸਦਿਸਂ ਨਗਰਂ ਸਤ੍ਤਰਤਨਭਰਿਤਂ ਦੇਵਵਿਮਾਨਕਪ੍ਪਂ ਰਾਜਨਿਵੇਸਨਞ੍ਚ ਦਿਸ੍ਵਾ ‘‘ਇਮਂ ਧਨਂ ਨਿਸ੍ਸਾਯ ਭਯੇਨ ਭਵਿਤਬ੍ਬ’’ਨ੍ਤਿ ਤਾਵਦੇਵ ਨਿਕ੍ਖਮਿਤ੍ਵਾ ਪਾਯਾਸੁਂ. ਤੇਸਂ ਆਗਮਨਂ ਸੁਤ੍ਵਾ ਮਹਾਸਤ੍ਤੋ ਵਨਨ੍ਤਂ ਗਨ੍ਤ੍ਵਾ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਸਿ. ਤੇ ਸਬ੍ਬੇ ਸਦ੍ਧਿਂ ਪਰਿਸਾਯ ਤਸ੍ਸ ਸਨ੍ਤਿਕੇ ਪਬ੍ਬਜਿਂਸੁ. ਏਵਂ ਅਪਰੇਪਿ ਅਪਰੇਪੀਤਿ ਮਹਾਸਮਾਗਮੋ ਅਹੋਸਿ. ਸਬ੍ਬੇ ਫਲਾਫਲਾਨਿ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤਿ. ਯੋ ਕਾਮਾਦਿਵਿਤਕ੍ਕਂ ਵਿਤਕ੍ਕੇਤਿ, ਤਸ੍ਸ ਚਿਤ੍ਤਂ ਞਤ੍ਵਾ ਮਹਾਸਤ੍ਤੋ ਤਤ੍ਥ ਗਨ੍ਤ੍ਵਾ ਆਕਾਸੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਤਿ.

ਸੋ ਧਮ੍ਮਸ੍ਸਵਨਸਪ੍ਪਾਯਂ ਲਭਿਤ੍ਵਾ ਸਮਾਪਤ੍ਤਿਯੋ ਅਭਿਞ੍ਞਾਯੋ ਚ ਨਿਬ੍ਬਤ੍ਤੇਤਿ. ਏਵਂ ਅਪਰੋਪਿ ਅਪਰੋਪੀਤਿ ਸਬ੍ਬੇਪਿ ਜੀਵਿਤਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨਾ ਅਹੇਸੁਂ. ਤਿਰਚ੍ਛਾਨਗਤਾਪਿ ਮਹਾਸਤ੍ਤੇ ਇਸਿਗਣੇਪਿ ਚਿਤ੍ਤਂ ਪਸਾਦੇਤ੍ਵਾ ਛਸੁ ਕਾਮਸਗ੍ਗੇਸੁ ਨਿਬ੍ਬਤ੍ਤਿਂਸੁ. ਮਹਾਸਤ੍ਤਸ੍ਸ ਬ੍ਰਹ੍ਮਚਰਿਯਂ ਚਿਰਂ ਦੀਘਮਦ੍ਧਾਨਂ ਪਵਤ੍ਤਿਤ੍ਥ. ਤਦਾ ਛਤ੍ਤੇ ਅਧਿਵਤ੍ਥਾ ਦੇਵਤਾ ਉਪ੍ਪਲਵਣ੍ਣਾ ਅਹੋਸਿ, ਸਾਰਥਿ ਸਾਰਿਪੁਤ੍ਤਤ੍ਥੇਰੋ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਪਰਿਸਾ ਬੁਦ੍ਧਪਰਿਸਾ, ਤੇਮਿਯਪਣ੍ਡਿਤੋ ਲੋਕਨਾਥੋ.

ਤਸ੍ਸ ਅਧਿਟ੍ਠਾਨਪਾਰਮੀ ਇਧ ਮਤ੍ਥਕਂ ਪਤ੍ਤਾ, ਸੇਸਪਾਰਮਿਯੋਪਿ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਤਥਾ ਮਾਸਜਾਤਕਾਲਤੋ ਪਟ੍ਠਾਯ ਨਿਰਯਭਯਂ ਪਾਪਭੀਰੁਤਾ ਰਜ੍ਜਜਿਗੁਚ੍ਛਾ ਨੇਕ੍ਖਮ੍ਮਨਿਮਿਤ੍ਤਂ ਮੂਗਾਦਿਭਾਵਾਧਿਟ੍ਠਾਨਂ ਤਤ੍ਥ ਚ ਵਿਰੋਧਿਪ੍ਪਚ੍ਚਯਸਮੋਧਾਨੇਪਿ ਨਿਚ੍ਚਲਭਾਵੋਤਿ ਏਵਮਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਤੇਮਿਯਚਰਿਯਾਵਣ੍ਣਨਾ ਨਿਟ੍ਠਿਤਾ.

ਅਧਿਟ੍ਠਾਨਪਾਰਮੀ ਨਿਟ੍ਠਿਤਾ.