੫. ਸੋਣਪਣ੍ਡਿਤਚਰਿਯਾਵਣ੍ਣਨਾ

੪੨. ਪਞ੍ਚਮੇ ਨਗਰੇ ਬ੍ਰਹ੍ਮਵਡ੍ਢਨੇਤਿ ਬ੍ਰਹ੍ਮਵਡ੍ਢਨਨਾਮਕੇ ਨਗਰੇ. ਕੁਲਵਰੇਤਿ ਅਗ੍ਗਕੁਲੇ. ਸੇਟ੍ਠੇਤਿ ਪਾਸਂਸਤਮੇ. ਮਹਾਸਾਲੇਤਿ ਮਹਾਸਾਰੇ. ਅਜਾਯਹਨ੍ਤਿ ਅਜਾਯਿਂ ਅਹਂ. ਇਦਂ ਵੁਤ੍ਤਂ ਹੋਤਿ – ਤਸ੍ਮਿਂ ਕਾਲੇ ‘‘ਬ੍ਰਹ੍ਮਵਡ੍ਢਨ’’ਨ੍ਤਿ ਲਦ੍ਧਨਾਮੇ ਬਾਰਾਣਸਿਨਗਰੇ ਯਦਾ ਹੋਮਿ ਭਵਾਮਿ ਪਟਿਵਸਾਮਿ, ਤਦਾ ਅਭਿਜਾਤਸਮ੍ਪਤ੍ਤਿਯਾ ਉਦਿਤੋਦਿਤਭਾਵੇਨ ਅਗ੍ਗੇ ਵਿਜ੍ਜਾਵਤਸਮ੍ਪਤ੍ਤਿਯਾ ਸੇਟ੍ਠੇ ਅਸੀਤਿਕੋਟਿਵਿਭਵਤਾਯ ਮਹਾਸਾਲੇ ਬ੍ਰਾਹ੍ਮਣਕੁਲੇ ਅਹਂ ਉਪ੍ਪਜ੍ਜਿਨ੍ਤਿ.

ਤਦਾ ਹਿ ਮਹਾਸਤ੍ਤੋ ਬ੍ਰਹ੍ਮਲੋਕਤੋ ਚਵਿਤ੍ਵਾ ਬ੍ਰਹ੍ਮਵਡ੍ਢਨਨਗਰੇ ਅਸੀਤਿਕੋਟਿਵਿਭਵਸ੍ਸ ਅਞ੍ਞਤਰਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ‘‘ਸੋਣਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਅਞ੍ਞੋਪਿ ਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਬੋਧਿਸਤ੍ਤਸ੍ਸ ਮਾਤੁਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਜਾਤਸ੍ਸ ‘‘ਨਨ੍ਦਕੁਮਾਰੋ’’ਤਿ ਨਾਮਂ ਕਰਿਂਸੁ. ਤੇਸਂ ਉਗ੍ਗਹਿਤਵੇਦਾਨਂ ਸਬ੍ਬਸਿਪ੍ਪਨਿਪ੍ਫਤ੍ਤਿਪ੍ਪਤ੍ਤਾਨਂ ਵਯਪ੍ਪਤ੍ਤਾਨਂ ਰੂਪਸਮ੍ਪਦਂ ਦਿਸ੍ਵਾ ਤੁਟ੍ਠਹਟ੍ਠਾ ਮਾਤਾਪਿਤਰੋ ‘‘ਘਰਬਨ੍ਧਨੇਨ ਬਨ੍ਧਿਸ੍ਸਾਮਾ’’ਤਿ ਪਠਮਂ ਸੋਣਕੁਮਾਰਂ ਆਹਂਸੁ – ‘‘ਤਾਤ, ਤੇ ਪਤਿਰੂਪਕੁਲਤੋ ਦਾਰਿਕਂ ਆਨੇਸ੍ਸਾਮ, ਤ੍ਵਂ ਕੁਟੁਮ੍ਬਂ ਪਟਿਪਜ੍ਜਾਹੀ’’ਤਿ.

ਮਹਾਸਤ੍ਤੋ ‘‘ਅਲਂ ਮਯ੍ਹਂ ਘਰਾਵਾਸੇਨ, ਅਹਂ ਯਾਵਜੀਵਂ ਤੁਮ੍ਹੇ ਪਟਿਜਗ੍ਗਿਤ੍ਵਾ ਤੁਮ੍ਹਾਕਂ ਅਚ੍ਚਯੇਨ ਪਬ੍ਬਜਿਸ੍ਸਾਮੀ’’ਤਿ ਆਹ. ਮਹਾਸਤ੍ਤਸ੍ਸ ਹਿ ਤਦਾ ਤਯੋਪਿ ਭਵਾ ਆਦਿਤ੍ਤਂ ਅਗਾਰਂ ਵਿਯ ਅਙ੍ਗਾਰਕਾਸੁ ਵਿਯ ਚ ਉਪਟ੍ਠਹਿਂਸੁ. ਵਿਸੇਸਤੋ ਪਨੇਸ ਨੇਕ੍ਖਮ੍ਮਜ੍ਝਾਸਯੋ ਨੇਕ੍ਖਮ੍ਮਾਧਿਮੁਤ੍ਤੋ ਅਹੋਸਿ. ਤਸ੍ਸ ਅਧਿਪ੍ਪਾਯਂ ਅਜਾਨਨ੍ਤਾ ਤੇ ਪੁਨਪ੍ਪੁਨਂ ਕਥੇਨ੍ਤਾਪਿ ਤਸ੍ਸ ਚਿਤ੍ਤਂ ਅਲਭਿਤ੍ਵਾ ਨਨ੍ਦਕੁਮਾਰਂ ਆਮਨ੍ਤੇਤ੍ਵਾ ‘‘ਤਾਤ, ਤੇਨ ਹਿ ਤ੍ਵਂ ਕੁਟੁਮ੍ਬਂ ਪਟਿਪਜ੍ਜਾਹੀ’’ਤਿ ਵਤ੍ਵਾ ਤੇਨਾਪਿ ‘‘ਨਾਹਂ ਮਮ ਭਾਤਰਾ ਛਡ੍ਡਿਤਖੇਲ਼ਂ ਸੀਸੇਨ ਉਕ੍ਖਿਪਾਮਿ, ਅਹਮ੍ਪਿ ਤੁਮ੍ਹਾਕਂ ਅਚ੍ਚਯੇਨ ਭਾਤਰਾ ਸਦ੍ਧਿਂ ਪਬ੍ਬਜਿਸ੍ਸਾਮੀ’’ਤਿ ਵੁਤ੍ਤੇ ‘‘ਇਮੇ ਏਵਂ ਤਰੁਣਾ ਕਾਮੇ ਜਹਨ੍ਤਿ, ਕਿਮਙ੍ਗਂ ਪਨ ਮਯਨ੍ਤਿ ਸਬ੍ਬੇਵ ਪਬ੍ਬਜਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ‘‘ਤਾਤ, ਕਿਂ ਵੋ ਅਮ੍ਹਾਕਂ ਅਚ੍ਚਯੇਨ ਪਬ੍ਬਜ੍ਜਾਯ, ਸਬ੍ਬੇ ਸਹੇਵ ਪਬ੍ਬਜਾਮਾ’’ਤਿ ਵਤ੍ਵਾ ਞਾਤੀਨਂ ਦਾਤਬ੍ਬਯੁਤ੍ਤਕਂ ਦਤ੍ਵਾ ਦਾਸਜਨਂ ਭੁਜਿਸ੍ਸਂ ਕਤ੍ਵਾ ਰਞ੍ਞੋ ਆਰੋਚੇਤ੍ਵਾ ਸਬ੍ਬਂ ਧਨਂ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਚਤ੍ਤਾਰੋਪਿ ਜਨਾ ਬ੍ਰਹ੍ਮਵਡ੍ਢਨਨਗਰਾ ਨਿਕ੍ਖਮਿਤ੍ਵਾ ਹਿਮਵਨ੍ਤਪ੍ਪਦੇਸੇ ਪਦੁਮਪੁਣ੍ਡਰੀਕਮਣ੍ਡਿਤਂ ਮਹਾਸਰਂ ਨਿਸ੍ਸਾਯ ਰਮਣੀਯੇ ਵਨਸਣ੍ਡੇ ਅਸ੍ਸਮਂ ਮਾਪੇਤ੍ਵਾ ਪਬ੍ਬਜਿਤ੍ਵਾ ਤਤ੍ਥ ਵਸਿਂਸੁ. ਤੇਨ ਵੁਤ੍ਤਂ –

੪੩. ‘‘ਤਦਾਪਿ ਲੋਕਂ ਦਿਸ੍ਵਾਨ, ਅਨ੍ਧੀਭੂਤਂ ਤਮੋਤ੍ਥਟਂ;

ਚਿਤ੍ਤਂ ਭਵਤੋ ਪਤਿਕੁਟਤਿ, ਤੁਤ੍ਤਵੇਗਹਤਂ ਵਿਯ.

੪੪. ‘‘ਦਿਸ੍ਵਾਨ ਵਿਵਿਧਂ ਪਾਪਂ, ਏਵਂ ਚਿਨ੍ਤੇਸਹਂ ਤਦਾ;

ਕਦਾਹਂ ਗੇਹਾ ਨਿਕ੍ਖਮ੍ਮ, ਪਵਿਸਿਸ੍ਸਾਮਿ ਕਾਨਨਂ.

੪੫. ‘‘ਤਦਾਪਿ ਮਂ ਨਿਮਨ੍ਤਿਂਸੁ, ਕਾਮਭੋਗੇਹਿ ਞਾਤਯੋ;

ਤੇਸਮ੍ਪਿ ਛਨ੍ਦਮਾਚਿਕ੍ਖਿਂ, ਮਾ ਨਿਮਨ੍ਤੇਥ ਤੇਹਿ ਮਂ.

੪੬. ‘‘ਯੋ ਮੇ ਕਨਿਟ੍ਠਕੋ ਭਾਤਾ, ਨਨ੍ਦੋ ਨਾਮਾਸਿ ਪਣ੍ਡਿਤੋ;

ਸੋਪਿ ਮਂ ਅਨੁਸਿਕ੍ਖਨ੍ਤੋ, ਪਬ੍ਬਜ੍ਜਂ ਸਮਰੋਚਯਿ.

੪੭. ‘‘ਅਹਂ ਸੋਣੋ ਚ ਨਨ੍ਦੋ ਚ, ਉਭੋ ਮਾਤਾਪਿਤਾ ਮਮ;

ਤਦਾਪਿ ਭੋਗੇ ਛਡ੍ਡੇਤ੍ਵਾ, ਪਾਵਿਸਿਮ੍ਹਾ ਮਹਾਵਨ’’ਨ੍ਤਿ.

ਤਤ੍ਥ ਤਦਾਪੀਤਿ ਯਦਾ ਅਹਂ ਬ੍ਰਹ੍ਮਵਡ੍ਢਨਨਗਰੇ ਸੋਣੋ ਨਾਮ ਬ੍ਰਾਹ੍ਮਣਕੁਮਾਰੋ ਅਹੋਸਿਂ, ਤਦਾਪਿ. ਲੋਕਂ ਦਿਸ੍ਵਾਨਾਤਿ ਸਕਲਮ੍ਪਿ ਸਤ੍ਤਲੋਕਂ ਪਞ੍ਞਾਚਕ੍ਖੁਨਾ ਪਸ੍ਸਿਤ੍ਵਾ. ਅਨ੍ਧੀਭੂਤਨ੍ਤਿ ਪਞ੍ਞਾਚਕ੍ਖੁਵਿਰਹੇਨ ਅਨ੍ਧਜਾਤਂ ਅਨ੍ਧਭਾਵਂ ਪਤ੍ਤਂ. ਤਮੋਤ੍ਥਟਨ੍ਤਿ ਅਵਿਜ੍ਜਨ੍ਧਕਾਰੇਨ ਅਭਿਭੂਤਂ. ਚਿਤ੍ਤਂ ਭਵਤੋ ਪਤਿਕੁਟਤੀਤਿ ਜਾਤਿਆਦਿਸਂਵੇਗਵਤ੍ਥੁਪਚ੍ਚਵੇਕ੍ਖਣੇਨ ਕਾਮਾਦਿਭਵਤੋ ਮਮ ਚਿਤ੍ਤਂ ਸਙ੍ਕੁਟਤਿ ਸਨ੍ਨਿਲੀਯਤਿ ਨ ਵਿਸਰਤਿ. ਤੁਤ੍ਤਵੇਗਹਤਂ ਵਿਯਾਤਿ ਤੁਤ੍ਤਂ ਵੁਚ੍ਚਤਿ ਅਯੋਕਣ੍ਟਕਸੀਸੋ ਦੀਘਦਣ੍ਡੋ, ਯੋ ਪਤੋਦੋਤਿ ਵੁਚ੍ਚਤਿ. ਤੇਨ ਵੇਗਸਾ ਅਭਿਹਤੋ ਯਥਾ ਹਤ੍ਥਾਜਾਨੀਯੋ ਸਂਵੇਗਪ੍ਪਤ੍ਤੋ ਹੋਤਿ, ਏਵਂ ਮਮ ਚਿਤ੍ਤਂ ਤਦਾ ਕਾਮਾਦੀਨਵਪਚ੍ਚਵੇਕ੍ਖਣੇਨ ਸਂਵੇਗਪ੍ਪਤ੍ਤਨ੍ਤਿ ਦਸ੍ਸੇਤਿ.

ਦਿਸ੍ਵਾਨ ਵਿਵਿਧਂ ਪਾਪਨ੍ਤਿ ਗੇਹਂ ਆਵਸਨ੍ਤੇਹਿ ਘਰਾਵਾਸਨਿਮਿਤ੍ਤਂ ਛਨ੍ਦਦੋਸਾਦਿਵਸੇਨ ਕਰੀਯਮਾਨਂ ਨਾਨਾਵਿਧਂ ਪਾਣਾਤਿਪਾਤਾਦਿਪਾਪਕਮ੍ਮਞ੍ਚੇਵ ਤਨ੍ਨਿਮਿਤ੍ਤਞ੍ਚ ਨੇਸਂ ਲਾਮਕਭਾਵਂ ਪਸ੍ਸਿਤ੍ਵਾ. ਏਵਂ ਚਿਨ੍ਤੇਸਹਂ ਤਦਾਤਿ ‘‘ਕਦਾ ਨੁ ਖੋ ਅਹਂ ਮਹਾਹਤ੍ਥੀ ਵਿਯ ਅਯਬਨ੍ਧਨਂ ਘਰਬਨ੍ਧਨਂ ਛਿਨ੍ਦਿਤ੍ਵਾ ਗੇਹਤੋ ਨਿਕ੍ਖਮਨਵਸੇਨ ਵਨਂ ਪਵਿਸਿਸ੍ਸਾਮੀ’’ਤਿ ਏਵਂ ਤਦਾ ਸੋਣਕੁਮਾਰਕਾਲੇ ਚਿਨ੍ਤੇਸਿਂ ਅਹਂ. ਤਦਾਪਿ ਮਂ ਨਿਮਨ੍ਤਿਂਸੂਤਿ ਨ ਕੇਵਲਂ ਅਯੋਘਰਪਣ੍ਡਿਤਾਦਿਕਾਲੇਯੇਵ, ਅਥ ਖੋ ਤਦਾਪਿ ਤਸ੍ਮਿਂ ਸੋਣਕੁਮਾਰਕਾਲੇਪਿ ਮਂ ਮਾਤਾਪਿਤੁਆਦਯੋ ਞਾਤਯੋ ਕਾਮਭੋਗਿਨੋ ਕਾਮਜ੍ਝਾਸਯਾ ‘‘ਏਹਿ, ਤਾਤ, ਇਮਂ ਅਸੀਤਿਕੋਟਿਧਨਂ ਵਿਭਵਂ ਪਟਿਪਜ੍ਜ, ਕੁਲਵਂਸਂ ਪਤਿਟ੍ਠਾਪੇਹੀ’’ਤਿ ਉਲ਼ਾਰੇਹਿ ਭੋਗੇਹਿ ਨਿਮਨ੍ਤਯਿਂਸੁ. ਤੇਸਮ੍ਪਿ ਛਨ੍ਦਮਾਚਿਕ੍ਖਿਨ੍ਤਿ ਤੇਸਮ੍ਪਿ ਮਮ ਞਾਤੀਨਂ ਤੇਹਿ ਕਾਮਭੋਗੇਹਿ ਮਾ ਮਂ ਨਿਮਨ੍ਤਯਿਤ੍ਥਾਤਿ ਅਤ੍ਤਨੋ ਛਨ੍ਦਮ੍ਪਿ ਆਚਿਕ੍ਖਿਂ, ਪਬ੍ਬਜ੍ਜਾਯ ਨਿਨ੍ਨਜ੍ਝਾਸਯਮ੍ਪਿ ਕਥੇਸਿਂ, ਯਥਾਜ੍ਝਾਸਯਂ ਪਟਿਪਜ੍ਜਥਾਤਿ ਅਧਿਪ੍ਪਾਯੋ.

ਸੋਪਿ ਮਂ ਅਨੁ ਸਿਕ੍ਖਨ੍ਤੋਤਿ ‘‘ਇਮੇ ਕਾਮਾ ਨਾਮ ਅਪ੍ਪਸ੍ਸਾਦਾ ਬਹੁਦੁਕ੍ਖਾ ਬਹੂਪਾਯਾਸਾ’’ਤਿਆਦਿਨਾ (ਮ. ਨਿ. ੧.੨੩੪; ੨.੪੩-੪੫; ਪਾਚਿ.੪੧੭) ਨਯੇਨ ਨਾਨਪ੍ਪਕਾਰਂ ਕਾਮੇਸੁ ਆਦੀਨਵਂ ਪਚ੍ਚਵੇਕ੍ਖਿਤ੍ਵਾ ਯਥਾਹਂ ਸੀਲਾਦੀਨਿ ਸਿਕ੍ਖਨ੍ਤੋ ਪਬ੍ਬਜ੍ਜਂ ਰੋਚੇਸਿਂ. ਸੋਪਿ ਨਨ੍ਦਪਣ੍ਡਿਤੋ ਤਥੇਵ ਤਸ੍ਸ ਨੇਕ੍ਖਮ੍ਮੇਨ ਮਂ ਅਨੁਸਿਕ੍ਖਨ੍ਤੋ ਪਬ੍ਬਜ੍ਜਂ ਸਮਰੋਚਯੀਤਿ. ਅਹਂ ਸੋਣੋ ਚ ਨਨ੍ਦੋ ਚਾਤਿ ਤਸ੍ਮਿਂ ਕਾਲੇ ਸੋਣਨਾਮਕੋ ਅਹਂ ਮਯ੍ਹਂ ਕਨਿਟ੍ਠਭਾਤਾ ਨਨ੍ਦੋ ਚਾਤਿ. ਉਭੋ ਮਾਤਾਪਿਤਾ ਮਮਾਤਿ ‘‘ਇਮੇ ਨਾਮ ਪੁਤ੍ਤਕਾ ਏਵਂ ਤਰੁਣਕਾਲੇਪਿ ਕਾਮੇ ਜਹਨ੍ਤਿ, ਕਿਮਙ੍ਗਂ ਪਨ ਮਯ’’ਨ੍ਤਿ ਉਪ੍ਪਨ੍ਨਸਂਵੇਗਾ ਮਾਤਾਪਿਤਰੋ ਚ. ਭੋਗੇ ਛਡ੍ਡੇਤ੍ਵਾਤਿ ਅਸੀਤਿਕੋਟਿਵਿਭਵਸਮਿਦ੍ਧੇ ਮਹਾ ਭੋਗੇ ਅਨਪੇਕ੍ਖਚਿਤ੍ਤਾ ਖੇਲ਼ਪਿਣ੍ਡਂ ਵਿਯ ਪਰਿਚ੍ਚਜਿਤ੍ਵਾ ਮਯਂ ਚਤ੍ਤਾਰੋਪਿ ਜਨਾ ਹਿਮਵਨ੍ਤਪ੍ਪਦੇਸੇ ਮਹਾਵਨਂ ਨੇਕ੍ਖਮ੍ਮਜ੍ਝਾਸਯੇਨ ਪਵਿਸਿਮ੍ਹਾਤਿ ਅਤ੍ਥੋ.

ਪਵਿਸਿਤ੍ਵਾ ਚ ਤੇ ਤਤ੍ਥ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਮਾਪੇਤ੍ਵਾ ਤਾਪਸਪਬ੍ਬਜ੍ਜਾਯ ਪਬ੍ਬਜਿਤ੍ਵਾ ਤਤ੍ਥ ਵਸਿਂਸੁ. ਤੇ ਉਭੋਪਿ ਭਾਤਰੋ ਮਾਤਾਪਿਤਰੋ ਪਟਿਜਗ੍ਗਿਂਸੁ. ਤੇਸੁ ਨਨ੍ਦਪਣ੍ਡਿਤੋ ‘‘ਮਯਾ ਆਭਤਫਲਾਫਲਾਨੇਵ ਮਾਤਾਪਿਤਰੋ ਖਾਦਾਪੇਸ੍ਸਾਮੀ’’ਤਿ ਹਿਯ੍ਯੋ ਚ ਪੁਰਿਮਗੋਚਰਗਹਿਤਟ੍ਠਾਨਤੋ ਚ ਯਾਨਿ ਤਾਨਿ ਅਵਸੇਸਾਨਿ ਫਲਾਫਲਾਨਿ ਪਾਤੋਵ ਆਨੇਤ੍ਵਾ ਮਾਤਾਪਿਤਰੋ ਖਾਦਾਪੇਤਿ. ਤੇ ਤਾਨਿ ਖਾਦਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਿਕਾ ਹੋਨ੍ਤਿ. ਸੋਣਪਣ੍ਡਿਤੋ ਪਨ ਦੂਰਂ ਗਨ੍ਤ੍ਵਾ ਮਧੁਰਮਧੁਰਾਨਿ ਸੁਪਕ੍ਕਾਨਿ ਆਹਰਿਤ੍ਵਾ ਉਪਨਾਮੇਤਿ. ਅਥ ਨਂ ਤੇ ‘‘ਤਾਤ, ਕਨਿਟ੍ਠੇਨ ਆਭਤਾਨਿ ਮਯਂ ਖਾਦਿਤ੍ਵਾ ਉਪੋਸਥਿਕਾ ਜਾਤਾ, ਇਦਾਨਿ ਨੋ ਅਤ੍ਥੋ ਨਤ੍ਥੀ’’ਤਿ ਵਦਨ੍ਤਿ. ਇਤਿ ਤਸ੍ਸ ਫਲਾਫਲਾਨਿ ਪਰਿਭੋਗਂ ਨ ਲਭਨ੍ਤਿ ਵਿਨਸ੍ਸਨ੍ਤਿ, ਪੁਨਦਿਵਸਾਦੀਸੁਪਿ ਤਥੇਵਾਤਿ, ਏਵਂ ਸੋ ਪਞ੍ਚਾਭਿਞ੍ਞਤਾਯ ਦੂਰਮ੍ਪਿ ਗਨ੍ਤ੍ਵਾ ਆਹਰਤਿ, ਤੇ ਪਨ ਨ ਖਾਦਨ੍ਤਿ.

ਅਥ ਮਹਾਸਤ੍ਤੋ ਚਿਨ੍ਤੇਸਿ – ‘‘ਮਾਤਾਪਿਤਰੋ ਸੁਖੁਮਾਲਾ, ਨਨ੍ਦੋ ਚ ਯਾਨਿ ਤਾਨਿ ਅਪਕ੍ਕਾਨਿ ਦੁਪ੍ਪਕ੍ਕਾਨਿ ਫਲਾਫਲਾਨਿ ਆਹਰਿਤ੍ਵਾ ਖਾਦਾਪੇਤਿ, ਏਵਂ ਸਨ੍ਤੇ ਇਮੇ ਨ ਚਿਰਂ ਪਵਤ੍ਤਿਸ੍ਸਨ੍ਤਿ, ਵਾਰੇਸ੍ਸਾਮਿ ਨ’’ਨ੍ਤਿ. ਅਥ ਨਂ ਆਮਨ੍ਤੇਤ੍ਵਾ ‘‘ਨਨ੍ਦ, ਇਤੋ ਪਟ੍ਠਾਯ ਫਲਾਫਲਂ ਆਹਰਿਤ੍ਵਾ ਮਮਾਗਮਨਂ ਪਤਿਮਾਨੇਹਿ, ਉਭੋ ਏਕਤੋਵ ਖਾਦਾਪੇਸ੍ਸਾਮਾ’’ਤਿ ਆਹ. ਏਵਂ ਵੁਤ੍ਤੇਪਿ ਅਤ੍ਤਨੋ ਪੁਞ੍ਞਂ ਪਚ੍ਚਾਸੀਸਨ੍ਤੋ ਨ ਤਸ੍ਸ ਵਚਨਮਕਾਸਿ. ਮਹਾਸਤ੍ਤੋ ਤਂ ਉਪਟ੍ਠਾਨਂ ਆਗਤਂ ‘‘ਨ ਤ੍ਵਂ ਪਣ੍ਡਿਤਾਨਂ ਵਚਨਂ ਕਰੋਸਿ, ਅਹਂ ਜੇਟ੍ਠੋ, ਮਾਤਾਪਿਤਰੋ ਚ ਮਮੇਵ ਭਾਰੋ, ਅਹਮੇਵ ਨੇ ਪਟਿਜਗ੍ਗਿਸ੍ਸਾਮਿ, ਤ੍ਵਂ ਇਤੋ ਅਞ੍ਞਤ੍ਥ ਯਾਹੀ’’ਤਿ ਤਸ੍ਸ ਅਚ੍ਛਰਂ ਪਹਰਿ.

ਸੋ ਤੇਨ ਪਣਾਮਿਤੋ ਤਤ੍ਥ ਠਾਤੁਂ ਅਸਕ੍ਕੋਨ੍ਤੋ ਤਂ ਵਨ੍ਦਿਤ੍ਵਾ ਮਾਤਾਪਿਤੂਨਂ ਤਮਤ੍ਥਂ ਆਰੋਚੇਤ੍ਵਾ ਅਤ੍ਤਨੋ ਪਣ੍ਣਸਾਲਂ ਪਵਿਸਿਤ੍ਵਾ ਕਸਿਣਂ ਓਲੋਕੇਤ੍ਵਾ ਤਂਦਿਵਸਮੇਵ ਅਟ੍ਠ ਚ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਚਿਨ੍ਤੇਸਿ – ‘‘ਕਿਂ ਨੁ ਖੋ ਅਹਂ ਸਿਨੇਰੁਪਾਦਤੋ ਰਤਨਵਾਲੁਕਂ ਆਹਰਿਤ੍ਵਾ ਮਮ ਭਾਤੁ ਪਣ੍ਣਸਾਲਾਪਰਿਵੇਣਂ ਆਕਿਰਿਤ੍ਵਾ ਖਮਾਪੇਸ੍ਸਾਮਿ, ਉਦਾਹੁ ਅਨੋਤਤ੍ਤਤੋ ਉਦਕਂ ਆਹਰਿਤ੍ਵਾ ਖਮਾਪੇਸ੍ਸਾਮਿ? ਅਥ ਵਾ ਮੇ ਭਾਤਾ ਦੇਵਤਾਵਸੇਨ ਖਮੇਯ੍ਯ, ਚਤ੍ਤਾਰੋ ਮਹਾਰਾਜਾਨੋ ਸਕ੍ਕਞ੍ਚ ਦੇਵਰਾਜਾਨਂ ਆਨੇਤ੍ਵਾ ਖਮਾਪੇਸ੍ਸਾਮਿ, ਏਵਂ ਪਨ ਨ ਸੋਭਿਸ੍ਸਤਿ, ਅਯਂ ਖੋ ਮਨੋਜੋ ਬ੍ਰਹ੍ਮਵਡ੍ਢਨਰਾਜਾ ਸਕਲਜਮ੍ਬੁਦੀਪੇ ਅਗ੍ਗਰਾਜਾ, ਤਂ ਆਦਿਂ ਕਤ੍ਵਾ ਸਬ੍ਬੇ ਰਾਜਾਨੋ ਆਨੇਤ੍ਵਾ ਖਮਾਪੇਸ੍ਸਾਮਿ, ਏਵਂ ਸਨ੍ਤੇ ਮਮ ਭਾਤੁ ਗੁਣੋ ਸਕਲਜਮ੍ਬੁਦੀਪਂ ਅਵਤ੍ਥਰਿਤ੍ਵਾ ਗਮਿਸ੍ਸਤਿ, ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਞ੍ਞਾਯਿਸ੍ਸਤੀ’’ਤਿ.

ਸੋ ਤਾਵਦੇਵ ਇਦ੍ਧਿਯਾ ਗਨ੍ਤ੍ਵਾ ਬ੍ਰਹ੍ਮਵਡ੍ਢਨਨਗਰੇ ਤਸ੍ਸ ਰਞ੍ਞੋ ਨਿਵੇਸਨਦ੍ਵਾਰੇ ਓਤਰਿਤ੍ਵਾ ‘‘ਏਕੋ ਤਾਪਸੋ ਤੁਮ੍ਹੇ ਦਟ੍ਠੁਕਾਮੋ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਤੇਨ ਕਤੋਕਾਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਅਹਂ ਅਤ੍ਤਨੋ ਬਲੇਨ ਸਕਲਜਮ੍ਬੁਦੀਪੇ ਰਜ੍ਜਂ ਗਹੇਤ੍ਵਾ ਤਵ ਦਸ੍ਸਾਮੀ’’ਤਿ. ‘‘ਕਥਂ ਪਨ ਤੁਮ੍ਹੇ, ਭਨ੍ਤੇ, ਸਕਲਜਮ੍ਬੁਦੀਪੇ ਰਜ੍ਜਂ ਗਹੇਤ੍ਵਾ ਦਸ੍ਸਥਾ’’ਤਿ? ‘‘ਮਹਾਰਾਜ, ਕਸ੍ਸਚਿ ਵਧਚ੍ਛੇਦਂ ਅਕਤ੍ਵਾ ਅਤ੍ਤਨੋ ਇਦ੍ਧਿਯਾਵ ਗਹੇਤ੍ਵਾ ਦਸ੍ਸਾਮੀ’’ਤਿ ਮਹਤਿਯਾ ਸੇਨਾਯ ਸਦ੍ਧਿਂ ਤਂ ਆਦਾਯ ਕੋਸਲਰਟ੍ਠਂ ਗਨ੍ਤ੍ਵਾ ਨਗਰਸ੍ਸ ਅਵਿਦੂਰੇ ਖਨ੍ਧਾਵਾਰਂ ਨਿਵੇਸੇਤ੍ਵਾ ‘‘ਯੁਦ੍ਧਂ ਵਾ ਨੋ ਦੇਤੁ, ਵਸੇ ਵਾ ਵਤ੍ਤਤੂ’’ਤਿ ਕੋਸਲਰਞ੍ਞੋ ਦੂਤਂ ਪਾਹੇਸਿ. ਤੇਨ ਕੁਜ੍ਝਿਤ੍ਵਾ ਯੁਦ੍ਧਸਜ੍ਜੇਨ ਹੁਤ੍ਵਾ ਨਿਕ੍ਖਨ੍ਤੇਨ ਸਦ੍ਧਿਂ ਯੁਦ੍ਧੇ ਆਰਦ੍ਧੇ ਅਤ੍ਤਨੋ ਇਦ੍ਧਾਨੁਭਾਵੇਨ ਯਥਾ ਦ੍ਵਿਨ੍ਨਂ ਸੇਨਾਨਂ ਪੀਲ਼ਨਂ ਨ ਹੋਤਿ, ਏਵਂ ਕਤ੍ਵਾ ਯਥਾ ਚ ਕੋਸਲਰਾਜਾ ਤਸ੍ਸ ਵਸੇ ਵਤ੍ਤਤਿ, ਏਵਂ ਵਚਨਪਟਿਵਚਨਹਰਣੇਹਿ ਸਂਵਿਦਹਿ. ਏਤੇਨੁਪਾਯੇਨ ਸਕਲਜਮ੍ਬੁਦੀਪੇ ਰਾਜਾਨੋ ਤਸ੍ਸ ਵਸੇ ਵਤ੍ਤਾਪੇਸਿ.

ਸੋ ਤੇਨ ਪਰਿਤੁਟ੍ਠੋ ਨਨ੍ਦਪਣ੍ਡਿਤਂ ਆਹ – ‘‘ਭਨ੍ਤੇ, ਤੁਮ੍ਹੇਹਿ ਯਥਾ ਮਯ੍ਹਂ ਪਟਿਞ੍ਞਾਤਂ, ਤਥਾ ਕਤਂ, ਬਹੂਪਕਾਰਾ ਮੇ ਤੁਮ੍ਹੇ, ਕਿਮਹਂ ਤੁਮ੍ਹਾਕਂ ਕਰਿਸ੍ਸਾਮਿ, ਅਹਞ੍ਹਿ ਤੇ ਸਕਲਜਮ੍ਬੁਦੀਪੇ ਉਪਡ੍ਢਰਜ੍ਜਮ੍ਪਿ ਦਾਤੁਂ ਇਚ੍ਛਾਮਿ, ਕਿਮਙ੍ਗਂ ਪਨ ਹਤ੍ਥਿਅਸ੍ਸਰਥਮਣਿਮੁਤ੍ਤਾਪਵਾਲ਼ਰਜਤਸੁਵਣ੍ਣਦਾਸਿਦਾਸਪਰਿਜਨਪਰਿਚ੍ਛੇਦ’’ਨ੍ਤਿ? ਤਂ ਸੁਤ੍ਵਾ ਨਨ੍ਦਪਣ੍ਡਿਤੋ ‘‘ਨ ਮੇ ਤੇ, ਮਹਾਰਾਜ, ਰਜ੍ਜੇਨ ਅਤ੍ਥੋ, ਨਾਪਿ ਹਤ੍ਥਿਯਾਨਾਦੀਹਿ, ਅਪਿ ਚ ਖੋ ਤੇ ਰਟ੍ਠੇ ਅਸੁਕਸ੍ਮਿਂ ਨਾਮ ਅਸ੍ਸਮੇ ਮਮ ਮਾਤਾਪਿਤਰੋ ਪਬ੍ਬਜਿਤ੍ਵਾ ਵਸਨ੍ਤਿ. ਤ੍ਯਾਹਂ ਉਪਟ੍ਠਹਨ੍ਤੋ ਏਕਸ੍ਮਿਂ ਅਪਰਾਧੇ ਮਮ ਜੇਟ੍ਠਭਾਤਿਕੇਨ ਸੋਣਪਣ੍ਡਿਤੇਨ ਨਾਮ ਮਹੇਸਿਨਾ ਪਣਾਮਿਤੋ, ਸ੍ਵਾਹਂ ਤਂ ਆਦਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਖਮਾਪੇਸ੍ਸਾਮਿ, ਤਸ੍ਸ ਮੇ ਤ੍ਵਂ ਖਮਾਪਨੇ ਸਹਾਯੋ ਹੋਹੀ’’ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਚਤੁਵੀਸਤਿਅਕ੍ਖੋਭਨੀ ਪਰਿਮਾਣਾਯ ਸੇਨਾਯ ਪਰਿਵੁਤੋ ਏਕਸਤਰਾਜੂਹਿ ਸਦ੍ਧਿਂ ਨਨ੍ਦਪਣ੍ਡਿਤਂ ਪੁਰਕ੍ਖਤ੍ਵਾ ਤਂ ਅਸ੍ਸਮਪਦਂ ਪਤ੍ਵਾ ਚਤੁਰਙ੍ਗੁਲਪ੍ਪਦੇਸਂ ਮੁਞ੍ਚਿਤ੍ਵਾ ਆਕਾਸੇ ਠਿਤੇਨ ਕਾਜੇਨ ਅਨੋਤਤ੍ਤਤੋ ਉਦਕਂ ਆਹਰਿਤ੍ਵਾ ਪਾਨੀਯਂ ਪਟਿਸਾਮੇਤ੍ਵਾ ਪਰਿਵੇਣਂ ਸਮ੍ਮਜ੍ਜਿਤ੍ਵਾ ਮਾਤਾਪਿਤੂਨਂ ਆਸਨ੍ਨਪ੍ਪਦੇਸੇ ਨਿਸਿਨ੍ਨਂ ਝਾਨਰਤਿਸਮਪ੍ਪਿਤਂ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਨਨ੍ਦਪਣ੍ਡਿਤੋ ਨਂ ਖਮਾਪੇਸਿ. ਮਹਾਸਤ੍ਤੋ ਨਨ੍ਦਪਣ੍ਡਿਤਂ ਮਾਤਰਂ ਪਟਿਚ੍ਛਾਪੇਤ੍ਵਾ ਅਤ੍ਤਨਾ ਯਾਵਜੀਵਂ ਪਿਤਰਂ ਪਟਿਜਗ੍ਗਿ. ਤੇਸਂ ਪਨ ਰਾਜੂਨਂ –

‘‘ਆਨਨ੍ਦੋ ਚ ਪਮੋਦੋ ਚ, ਸਦਾ ਹਸਿਤਕੀਲ਼ਿਤਂ;

ਮਾਤਰਂ ਪਰਿਚਰਿਤ੍ਵਾਨ, ਲਬ੍ਭਮੇਤਂ ਵਿਜਾਨਤਾ.

‘‘ਆਨਨ੍ਦੋ ਚ ਪਮੋਦੋ ਚ, ਸਦਾ ਹਸਿਤਕੀਲ਼ਿਤਂ;

ਪਿਤਰਂ ਪਰਿਚਰਿਤ੍ਵਾਨ, ਲਬ੍ਭਮੇਤਂ ਵਿਜਾਨਤੋ.

‘‘ਦਾਨਞ੍ਚ ਪੇਯ੍ਯਵਜ੍ਜਞ੍ਚ, ਅਤ੍ਥਚਰਿਯਾ ਚ ਯਾ ਇਧ;

ਸਮਾਨਤ੍ਤਤਾ ਚ ਧਮ੍ਮੇਸੁ, ਤਤ੍ਥ ਤਤ੍ਥ ਯਥਾਰਹਂ;

ਏਤੇ ਖੋ ਸਙ੍ਗਹਾ ਲੋਕੇ, ਰਥਸ੍ਸਾਣੀਵ ਯਾਯਤੋ.

‘‘ਏਤੇ ਚ ਸਙ੍ਗਹਾ ਨਾਸ੍ਸੁ, ਨ ਮਾਤਾ ਪੁਤ੍ਤਕਾਰਣਾ;

ਲਭੇਥ ਮਾਨਂ ਪੂਜਂ ਵਾ, ਪਿਤਾ ਵਾ ਪੁਤ੍ਤਕਾਰਣਾ.

‘‘ਯਸ੍ਮਾ ਚ ਸਙ੍ਗਹਾ ਏਤੇ, ਸਮ੍ਮਪੇਕ੍ਖਨ੍ਤਿ ਪਣ੍ਡਿਤਾ;

ਤਸ੍ਮਾ ਮਹਤ੍ਤਂ ਪਪ੍ਪੋਨ੍ਤਿ, ਪਾਸਂਸਾ ਚ ਭਵਨ੍ਤਿ ਤੇ.

‘‘ਬ੍ਰਹ੍ਮਾਤਿ ਮਾਤਾਪਿਤਰੋ, ਪੁਬ੍ਬਾਚਰਿਯਾਤਿ ਵੁਚ੍ਚਰੇ;

ਆਹੁਨੇਯ੍ਯਾ ਚ ਪੁਤ੍ਤਾਨਂ, ਪਜਾਯ ਅਨੁਕਮ੍ਪਕਾ.

‘‘ਤਸ੍ਮਾ ਹਿ ਨੇ ਨਮਸ੍ਸੇਯ੍ਯ, ਸਕ੍ਕਰੇਯ੍ਯ ਚ ਪਣ੍ਡਿਤੋ;

ਅਨ੍ਨੇਨ ਅਥ ਪਾਨੇਨ, ਵਤ੍ਥੇਨ ਸਯਨੇਨ ਚ;

ਉਚ੍ਛਾਦਨੇਨ ਨ੍ਹਾਪਨੇਨ, ਪਾਦਾਨਂ ਧੋਵਨੇਨ ਚ.

‘‘ਤਾਯ ਨਂ ਪਾਰਿਚਰਿਯਾਯ, ਮਾਤਾਪਿਤੂਸੁ ਪਣ੍ਡਿਤਾ;

ਇਧੇਵ ਨਂ ਪਸਂਸਨ੍ਤਿ, ਪੇਚ੍ਚ ਸਗ੍ਗੇ ਪਮੋਦਤੀ’’ਤਿ. (ਜਾ. ੨.੨੦.੧੭੬-੧੮੩) –

ਬੁਦ੍ਧਲੀਲ਼ਾਯ ਧਮ੍ਮਂ ਦੇਸੇਸਿ, ਤਂ ਸੁਤ੍ਵਾ ਸਬ੍ਬੇਪਿ ਤੇ ਰਾਜਾਨੋ ਸਬਲਕਾਯਾ ਪਸੀਦਿਂਸੁ. ਅਥ ਨੇ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ‘‘ਦਾਨਾਦੀਸੁ ਅਪ੍ਪਮਤ੍ਤਾ ਹੋਥਾ’’ਤਿ ਓਵਦਿਤ੍ਵਾ ਵਿਸ੍ਸਜ੍ਜੇਸਿ. ਤੇ ਸਬ੍ਬੇਪਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਆਯੁਪਰਿਯੋਸਾਨੇ ਦੇਵਨਗਰਂ ਪੂਰਯਿਂਸੁ. ਬੋਧਿਸਤ੍ਤੋ ‘‘ਇਤੋ ਪਟ੍ਠਾਯ ਮਾਤਰਂ ਪਟਿਜਗ੍ਗਾਹੀ’’ਤਿ ਮਾਤਰਂ ਨਨ੍ਦਪਣ੍ਡਿਤਂ ਪਟਿਚ੍ਛਾਪੇਤ੍ਵਾ ਅਤ੍ਤਨਾ ਯਾਵਜੀਵਂ ਪਿਤਰਂ ਪਟਿਜਗ੍ਗਿ. ਤੇ ਉਭੋਪਿ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨਾ ਅਹੇਸੁਂ.

ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ, ਨਨ੍ਦਪਣ੍ਡਿਤੋ ਆਨਨ੍ਦਤ੍ਥੇਰੋ, ਮਨੋਜੋ ਰਾਜਾ ਸਾਰਿਪੁਤ੍ਤਤ੍ਥੇਰੋ, ਏਕਸਤਰਾਜਾਨੋ ਅਸੀਤਿਮਹਾਥੇਰਾ ਚੇਵ ਅਞ੍ਞਤਰਥੇਰਾ ਚ, ਚਤੁਵੀਸਤਿਅਕ੍ਖੋਭਨੀਪਰਿਸਾ ਬੁਦ੍ਧਪਰਿਸਾ, ਸੋਣਪਣ੍ਡਿਤੋ ਲੋਕਨਾਥੋ.

ਤਸ੍ਸ ਕਿਞ੍ਚਾਪਿ ਸਾਤਿਸਯਾ ਨੇਕ੍ਖਮ੍ਮਪਾਰਮੀ, ਤਥਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਸੇਸਪਾਰਮਿਯੋ ਚ ਨਿਦ੍ਧਾਰੇਤਬ੍ਬਾ. ਤਥਾ ਅਚ੍ਚਨ੍ਤਮੇਵ ਕਾਮੇਸੁ ਅਨਪੇਕ੍ਖਤਾ, ਮਾਤਾਪਿਤੂਸੁ ਤਿਬ੍ਬੋ ਸਗਾਰਵਸਪ੍ਪਤਿਸ੍ਸਭਾਵੋ, ਮਾਤਾਪਿਤੁਉਪਟ੍ਠਾਨੇਨ ਅਤਿਤ੍ਤਿ, ਸਤਿਪਿ ਨੇਸਂ ਉਪਟ੍ਠਾਨੇ ਸਬ੍ਬਕਾਲਂ ਸਮਾਪਤ੍ਤਿਵਿਹਾਰੇਹਿ ਵੀਤਿਨਾਮਨਨ੍ਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਸੋਣਪਣ੍ਡਿਤਚਰਿਯਾਵਣ੍ਣਨਾ ਨਿਟ੍ਠਿਤਾ.

ਨੇਕ੍ਖਮ੍ਮਪਾਰਮੀ ਨਿਟ੍ਠਿਤਾ.