੯. ਅਲੀਨਸਤ੍ਤੁਚਰਿਯਾਵਣ੍ਣਨਾ

੭੪. ਨਵਮੇ ਪਞ੍ਚਾਲਰਟ੍ਠੇਤਿ ਏਵਂਨਾਮਕੇ ਜਨਪਦੇ. ਨਗਰਵਰੇ, ਕਪਿਲਾਯਨ੍ਤਿ ‘‘ਕਪਿਲਾ’’ਤਿ ਏਵਂਲਦ੍ਧਨਾਮੇ ਉਤ੍ਤਮਨਗਰੇ. ‘‘ਨਗਰਵਰੇ’’ਤਿ ਵਤ੍ਵਾ ਪੁਨ ‘‘ਪੁਰੁਤ੍ਤਮੇ’’ਤਿ ਵਚਨਂ ਤਸ੍ਮਿਂ ਕਾਲੇ ਜਮ੍ਬੁਦੀਪੇ ਸਬ੍ਬਨਗਰਾਨਂ ਤਸ੍ਸ ਨਗਰਸ੍ਸ ਅਗ੍ਗਨਗਰਭਾਵਦਸ੍ਸਨਤ੍ਥਂ. ਜਯਦ੍ਦਿਸੋ ਨਾਮਾਤਿ ਰਞ੍ਞਾ ਅਤ੍ਤਨੋ ਪਚ੍ਚਤ੍ਥਿਕੇ ਜਿਤੇ ਜਾਤੋ, ਅਤ੍ਤਨੋ ਵਾ ਪਚ੍ਚਾਮਿਤ੍ਤਭੂਤਂ ਯਕ੍ਖਿਨੀਸਙ੍ਖਾਤਂ ਜਯਦ੍ਦਿਸਂ ਜਿਤੋਤਿ ਏਵਂਲਦ੍ਧਨਾਮੋ. ਸੀਲਗੁਣਮੁਪਾਗਤੋਤਿ ਆਚਾਰਸੀਲਞ੍ਚੇਵ ਉਸ੍ਸਾਹਸਮ੍ਪਤ੍ਤਿਯਾਦਿਰਾਜਗੁਣਞ੍ਚ ਉਪਾਗਤੋ, ਤੇਨ ਸਮਨ੍ਨਾਗਤੋਤਿ ਅਤ੍ਥੋ.

੭੫. ਤਸ੍ਸ ਰਞ੍ਞੋਤਿ ਜਯਦ੍ਦਿਸਰਾਜਸ੍ਸ, ਅਹਂ ਪੁਤ੍ਤੋ ਅਹੋਸਿਨ੍ਤਿ ਵਚਨਸੇਸੋ. ਸੁਤਧਮ੍ਮੋਤਿ ਯਾਵਤਾ ਰਾਜਪੁਤ੍ਤੇਨ ਸੋਤਬ੍ਬਧਮ੍ਮੋ ਨਾਮ, ਤਸ੍ਸ ਸਬ੍ਬਸ੍ਸ ਸੁਤਤ੍ਤਾ ਸੁਤਧਮ੍ਮੋ, ਬਹੁਸ੍ਸੁਤੋਤਿ ਅਤ੍ਥੋ. ਅਥ ਵਾ ਸੁਤਧਮ੍ਮੋਤਿ ਵਿਸ੍ਸੁਤਧਮ੍ਮੋ, ਧਮ੍ਮਚਰਿਯਾਯ ਸਮਚਰਿਯਾਯ ਪਕਾਸੋ ਪਞ੍ਞਾਤੋ, ਲੋਕੇ ਪਤ੍ਥਟਕਿਤ੍ਤਿਧਮ੍ਮੋਤਿ ਅਤ੍ਥੋ. ਅਲੀਨਸਤ੍ਤੋਤਿ ਏਵਂਨਾਮੋ. ਗੁਣਵਾਤਿ ਉਲ਼ਾਰੇਹਿ ਮਹਾਪੁਰਿਸਗੁਣੇਹਿ ਸਮਨ੍ਨਾਗਤੋ. ਅਨੁਰਕ੍ਖਪਰਿਜਨੋ ਸਦਾਤਿ ਸਦ੍ਧਾਦਿਗੁਣਵਿਸੇਸਯੋਗਤੋ ਚਤੂਹਿ ਸਙ੍ਗਹਵਤ੍ਥੂਹਿ ਸਮ੍ਮਦੇਵ ਸਙ੍ਗਹਣਤੋ ਚ ਸਬ੍ਬਕਾਲਂ ਸਮ੍ਭਤ੍ਤਪਰਿਵਾਰਜਨੋ.

੭੬. ਪਿਤਾ ਮੇ ਮਿਗਵਂ ਗਨ੍ਤ੍ਵਾ, ਪੋਰਿਸਾਦਂ ਉਪਾਗਮੀਤਿ ਮਯ੍ਹਂ ਪਿਤਾ ਜਯਦ੍ਦਿਸਰਾਜਾ ਮਿਗਵਂ ਚਰਨ੍ਤੋ ਅਰਞ੍ਞਮਜ੍ਝਂ ਗਨ੍ਤ੍ਵਾ ਪੋਰਿਸਾਦਂ ਮਨੁਸ੍ਸਖਾਦਕਂ ਯਕ੍ਖਿਨਿਪੁਤ੍ਤਂ ਉਪਗਞ੍ਛਿ, ਤੇਨ ਸਮਾਗਮਿ.

ਜਯਦ੍ਦਿਸਰਾਜਾ ਕਿਰ ਏਕਦਿਵਸਂ ‘‘ਮਿਗਵਂ ਗਮਿਸ੍ਸਾਮੀ’’ਤਿ ਤਦਨੁਰੂਪੇਨ ਮਹਤਾ ਪਰਿਵਾਰੇਨ ਕਪਿਲਨਗਰਤੋ ਨਿਕ੍ਖਮਿ. ਤਂ ਨਿਕ੍ਖਨ੍ਤਮਤ੍ਤਮੇਵ ਤਕ੍ਕਸਿਲਾਵਾਸੀ ਨਨ੍ਦੋ ਨਾਮ ਬ੍ਰਾਹ੍ਮਣੋ ਚਤਸ੍ਸੋ ਸਤਾਰਹਾ ਗਾਥਾ ਨਾਮ ਕਥੇਤੁਂ ਆਦਾਯ ਉਪਸਙ੍ਕਮਿਤ੍ਵਾ ਅਤ੍ਤਨੋ ਆਗਮਨਕਾਰਣਂ ਰਞ੍ਞੋ ਆਰੋਚੇਸਿ. ਰਾਜਾ ‘‘ਨਿਵਤ੍ਤਿਤ੍ਵਾ ਸੁਣਿਸ੍ਸਾਮੀ’’ਤਿ ਤਸ੍ਸ ਵਸਨਗੇਹਂ ਪਰਿਬ੍ਬਯਞ੍ਚ ਦਾਪੇਤ੍ਵਾ ਅਰਞ੍ਞਂ ਪਵਿਟ੍ਠੋ ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤਸ੍ਸੇਵ ਸੋ ਗੀਵਾ’’ਤਿ ਵਤ੍ਵਾ ਮਿਗੇ ਪਰਿਯੇਸਨ੍ਤੋ ਵਿਚਰਤਿ. ਅਥੇਕੋ ਪਸਦਮਿਗੋ ਮਹਾਜਨਸ੍ਸ ਪਦਸਦ੍ਦੇਨ ਆਸਯਤੋ ਨਿਕ੍ਖਮਿਤ੍ਵਾ ਰਞ੍ਞੋ ਅਭਿਮੁਖੋ ਗਨ੍ਤ੍ਵਾ ਪਲਾਯਿ. ਅਮਚ੍ਚਾ ਪਰਿਹਾਸਂ ਕਰਿਂਸੁ. ਰਾਜਾ ਤਂ ਅਨੁਬਨ੍ਧਿਤ੍ਵਾ ਤਿਯੋਜਨਮਤ੍ਥਕੇ ਤਂ ਪਰਿਕ੍ਖੀਣਜਵਂ ਠਿਤਂ ਵਿਜ੍ਝਿਤ੍ਵਾ ਪਾਤੇਸਿ. ਪਤਿਤਂ ਖਗ੍ਗੇਨ ਦ੍ਵਿਧਾ ਕਤ੍ਵਾ ਅਨਤ੍ਥਿਕੋਪਿ ‘‘ਮਂਸੇਨ ਮਿਗਂ ਗਹੇਤੁਂ ਨਾਸਕ੍ਖੀ’’ਤਿ ਵਚਨਮੋਚਨਤ੍ਥਂ ਕਾਜੇ ਕਤ੍ਵਾ ਆਗਚ੍ਛਨ੍ਤੋ ਏਕਸ੍ਸ ਨਿਗ੍ਰੋਧਸ੍ਸ ਮੂਲੇ ਦਬ੍ਬਤਿਣੇਸੁ ਨਿਸੀਦਿਤ੍ਵਾ ਥੋਕਂ ਵਿਸ੍ਸਮਿਤ੍ਵਾ ਗਨ੍ਤੁਂ ਆਰਭਿ.

ਤੇਨ ਚ ਸਮਯੇਨ ਤਸ੍ਸੇਵ ਰਞ੍ਞੋ ਜੇਟ੍ਠਭਾਤਾ ਜਾਤਦਿਵਸੇ ਏਵ ਏਕਾਯ ਯਕ੍ਖਿਨਿਯਾ ਖਾਦਿਤੁਂ ਗਹਿਤੋ ਆਰਕ੍ਖਮਨੁਸ੍ਸੇਹਿ ਅਨੁਬਦ੍ਧਾਯ ਤਾਯ ਨਿਦ੍ਧਮਨਮਗ੍ਗੇਨ ਗਚ੍ਛਨ੍ਤਿਯਾ ਉਰੇ ਠਪਿਤੋ ਮਾਤੁਸਞ੍ਞਾਯ ਮੁਖੇਨ ਥਨਗ੍ਗਹਣੇਨ ਪੁਤ੍ਤਸਿਨੇਹਂ ਉਪ੍ਪਾਦੇਤ੍ਵਾ ਸਂਵਡ੍ਢਿਯਮਾਨੋ ਤਦਾਹਾਰੋਪਯੋਗਿਤਾਯ ਮਨੁਸ੍ਸਮਂਸਂ ਖਾਦਨ੍ਤੋ ਅਨੁਕ੍ਕਮੇਨ ਵੁਦ੍ਧਿਪ੍ਪਤ੍ਤੋ ਅਤ੍ਤਾਨਂ ਅਨ੍ਤਰਧਾਪਨਤ੍ਥਂ ਯਕ੍ਖਿਨਿਯਾ ਦਿਨ੍ਨਓਸਧਮੂਲਾਨੁਭਾਵੇਨ ਅਨ੍ਤਰਹਿਤੋ ਹੁਤ੍ਵਾ ਮਨੁਸ੍ਸਮਂਸਂ ਖਾਦਿਤ੍ਵਾ ਜੀਵਨ੍ਤੋ ਤਾਯ ਯਕ੍ਖਿਨਿਯਾ ਮਤਾਯ ਤਂ ਓਸਧਮੂਲਂ ਅਤ੍ਤਨੋ ਪਮਾਦੇਨ ਨਾਸੇਤ੍ਵਾ ਦਿਸ੍ਸਮਾਨਰੂਪੋਵ ਮਨੁਸ੍ਸਮਂਸਂ ਖਾਦਨ੍ਤੋ ਨਗ੍ਗੋ ਉਬ੍ਬਿਗ੍ਗਵਿਰੂਪਦਸ੍ਸਨੋ ਰਾਜਪੁਰਿਸੇਹਿ ਪਸ੍ਸਿਤ੍ਵਾ ਅਨੁਬਦ੍ਧੋ ਪਲਾਯਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਤਸ੍ਸ ਨਿਗ੍ਰੋਧਸ੍ਸ ਮੂਲੇ ਵਾਸਂ ਕਪ੍ਪੇਨ੍ਤੋ ਰਾਜਾਨਂ ਦਿਸ੍ਵਾ ‘‘ਭਕ੍ਖੋਸਿ ਮੇ’’ਤਿ ਹਤ੍ਥੇ ਅਗ੍ਗਹੇਸਿ. ਤੇਨ ਵੁਤ੍ਤਂ ‘‘ਸੋ ਮੇ ਪਿਤੁਮਗ੍ਗਹੇਸਿ, ਭਕ੍ਖੋਸਿ ਮਮ ਮਾ ਚਲੀ’’ਤਿਆਦਿ.

ਤਤ੍ਥ ਸੋ ਮੇ ਪਿਤੁਮਗ੍ਗਹੇਸੀਤਿ ਸੋ ਪੋਰਿਸਾਦੋ ਮਮ ਪਿਤਰਂ ਜਯਦ੍ਦਿਸਰਾਜਾਨਂ ਅਤ੍ਤਨੋ ਨਿਸਿਨ੍ਨਰੁਕ੍ਖਸਮੀਪਮਾਗਤਂ ‘‘ਮਮ ਭਕ੍ਖੋ ਤ੍ਵਂ ਆਗਤੋਸਿ, ਹਤ੍ਥਪਰਿਪ੍ਫਨ੍ਦਨਾਦਿਵਸੇਨ ਮਾ ਚਲਿ, ਚਲਨ੍ਤਮ੍ਪਿ ਅਹਂ ਤਂ ਖਾਦਿਸ੍ਸਾਮੀ’’ਤਿ ਹਤ੍ਥੇ ਅਗ੍ਗਹੇਸਿ.

੭੭. ਤਸ੍ਸਾਤਿ ਤਸ੍ਸ ਯਕ੍ਖਿਨਿਪੁਤ੍ਤਸ੍ਸ. ਤਸਿਤਵੇਧਿਤੋਤਿ ਚਿਤ੍ਤੁਤ੍ਰਾਸੇਨ ਤਸਿਤੋ ਸਰੀਰਪਰਿਕਮ੍ਪੇਨ ਵੇਧਿਤੋ. ਊਰੁਕ੍ਖਮ੍ਭੋਤਿ ਉਭਿਨ੍ਨਂ ਊਰੂਨਂ ਥਦ੍ਧਭਾਵੋ, ਯੇਨ ਸੋ ਤਤੋ ਪਲਾਯਿਤੁਂ ਨਾਸਕ੍ਖਿ.

ਮਿਗਵਂ ਗਹੇਤ੍ਵਾ ਮੁਞ੍ਚਸ੍ਸੂਤਿ ਏਤ੍ਥ ਮਿਗਵਨ੍ਤਿ ਮਿਗਵਵਸੇਨ ਲਦ੍ਧਤ੍ਤਾ ਤਂ ਮਿਗਮਂਸਂ ‘‘ਮਿਗਵ’’ਨ੍ਤਿ ਆਹ, ਇਮਂ ਮਿਗਮਂਸਂ ਗਹੇਤ੍ਵਾ ਮਂ ਮੁਞ੍ਚਸ੍ਸੂਤਿ ਅਤ੍ਥੋ. ਸੋ ਹਿ ਰਾਜਾ ਨਂ ਯਕ੍ਖਿਨਿਪੁਤ੍ਤਂ ਦਿਸ੍ਵਾ ਭੀਤੋ ਊਰੁਕ੍ਖਮ੍ਭਂ ਪਤ੍ਵਾ ਖਾਣੁਕੋ ਵਿਯ ਅਟ੍ਠਾਸਿ. ਸੋ ਵੇਗੇਨ ਗਨ੍ਤ੍ਵਾ ਤਂ ਹਤ੍ਥੇ ਗਹੇਤ੍ਵਾ ‘‘ਭਕ੍ਖੋਸਿ ਮੇ ਆਗਤੋਸੀ’’ਤਿ ਆਹ. ਅਥ ਨਂ ਰਾਜਾ ਸਤਿਂ ਪਚ੍ਚੁਪਟ੍ਠਪੇਤ੍ਵਾ ‘‘ਸਚੇ ਆਹਾਰਤ੍ਥਿਕੋ, ਇਮਂ ਤੇ ਮਂਸਂ ਦਦਾਮਿ, ਤਂ ਗਹੇਤ੍ਵਾ ਖਾਦ, ਮਂ ਮੁਞ੍ਚਾਹੀ’’ਤਿ ਆਹ. ਤਂ ਸੁਤ੍ਵਾ ਪੋਰਿਸਾਦੋ ‘‘ਕਿਮਿਦਂ ਮਯ੍ਹਮੇਵ ਸਨ੍ਤਕਂ ਦਤ੍ਵਾ ਮਯਾ ਵੋਹਾਰਂ ਕਰੋਸਿ, ਨਨੁ ਇਮਂ ਮਂਸਞ੍ਚ ਤ੍ਵਞ੍ਚ ਮਮ ਹਤ੍ਥਗਤਕਾਲਤੋ ਪਟ੍ਠਾਯ ਮਯ੍ਹਮੇਵ ਸਨ੍ਤਕਂ, ਤਸ੍ਮਾ ਤਂ ਪਠਮਂ ਖਾਦਿਤ੍ਵਾ ਪਚ੍ਛਾ ਮਂਸਂ ਖਾਦਿਸ੍ਸਾਮੀ’’ਤਿ ਆਹ.

ਅਥ ਰਾਜਾ ‘‘ਮਂਸਨਿਕ੍ਕਯੇਨਾਯਂ ਨ ਮਂ ਮੁਞ੍ਚਤਿ, ਮਯਾ ਚ ਮਿਗਵਂ ਆਗਚ੍ਛਨ੍ਤੇਨ ਤਸ੍ਸ ਬ੍ਰਾਹ੍ਮਣਸ੍ਸ ‘ਆਗਨ੍ਤ੍ਵਾ ਤੇ ਧਨਂ ਦਸ੍ਸਾਮੀ’ਤਿ ਪਟਿਞ੍ਞਾ ਕਤਾ. ਸਚਾਯਂ ਯਕ੍ਖੋ ਅਨੁਜਾਨਿਸ੍ਸਤਿ, ਸਚ੍ਚਂ ਅਨੁਰਕ੍ਖਨ੍ਤੋ ਗੇਹਂ ਗਨ੍ਤ੍ਵਾ ਤਂ ਪਟਿਞ੍ਞਂ ਮੋਚੇਤ੍ਵਾ ਪੁਨ ਇਮਸ੍ਸ ਯਕ੍ਖਸ੍ਸ ਭਤ੍ਤਤ੍ਥਂ ਆਗਚ੍ਛੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਤਸ੍ਸ ਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਪੋਰਿਸਾਦੋ ‘‘ਸਚੇ ਤ੍ਵਂ ਸਚ੍ਚਂ ਅਨੁਰਕ੍ਖਨ੍ਤੋ ਗਨ੍ਤੁਕਾਮੋਸਿ, ਗਨ੍ਤ੍ਵਾ ਤਸ੍ਸ ਬ੍ਰਾਹ੍ਮਣਸ੍ਸ ਦਾਤਬ੍ਬਂ ਧਨਂ ਦਤ੍ਵਾ ਸਚ੍ਚਂ ਅਨੁਰਕ੍ਖਨ੍ਤੋ ਸੀਘਂ ਪੁਨ ਆਗਚ੍ਛੇਯ੍ਯਾਸੀ’’ਤਿ ਵਤ੍ਵਾ ਰਾਜਾਨਂ ਵਿਸ੍ਸਜ੍ਜੇਸਿ. ਸੋ ਤੇਨ ਵਿਸ੍ਸਟ੍ਠੋ ‘‘ਤ੍ਵਂ ਮਾ ਚਿਨ੍ਤਯਿ, ਅਹਂ ਪਾਤੋਵ ਆਗਮਿਸ੍ਸਾਮੀ’’ਤਿ ਵਤ੍ਵਾ ਮਗ੍ਗਨਿਮਿਤ੍ਤਾਨਿ ਸਲ੍ਲਕ੍ਖੇਨ੍ਤੋ ਅਤ੍ਤਨੋ ਬਲਕਾਯਂ ਉਪਗਨ੍ਤ੍ਵਾ ਤੇਨ ਪਰਿਵੁਤੋ ਨਗਰਂ ਪਵਿਸਿਤ੍ਵਾ ਨਨ੍ਦਬ੍ਰਾਹ੍ਮਣਂ ਪਕ੍ਕੋਸਾਪੇਤ੍ਵਾ ਮਹਾਰਹੇ ਆਸਨੇ ਨਿਸੀਦਾਪੇਤ੍ਵਾ ਤਾ ਗਾਥਾ ਸੁਤ੍ਵਾ ਚਤ੍ਤਾਰਿ ਸਹਸ੍ਸਾਨਿ ਦਤ੍ਵਾ ਯਾਨਂ ਆਰੋਪੇਤ੍ਵਾ ‘‘ਇਮਂ ਤਕ੍ਕਸਿਲਮੇਵ ਨੇਥਾ’’ਤਿ ਮਨੁਸ੍ਸੇ ਦਤ੍ਵਾ ਬ੍ਰਾਹ੍ਮਣਂ ਉਯ੍ਯੋਜੇਤ੍ਵਾ ਦੁਤਿਯਦਿਵਸੇ ਪੋਰਿਸਾਦਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਪੁਤ੍ਤਂ ਰਜ੍ਜੇ ਪਤਿਟ੍ਠਪੇਤੁਂ ਅਨੁਸਾਸਨਿਞ੍ਚ ਦੇਨ੍ਤੋ ਤਮਤ੍ਥਂ ਆਰੋਚੇਸਿ. ਤੇਨ ਵੁਤ੍ਤਂ –

੭੮. ‘‘ਮਿਗਵਂ ਗਹੇਤ੍ਵਾ ਮੁਞ੍ਚਸ੍ਸੁ, ਕਤ੍ਵਾ ਆਗਮਨਂ ਪੁਨ;

ਬ੍ਰਾਹ੍ਮਣਸ੍ਸ ਧਨਂ ਦਤ੍ਵਾ, ਪਿਤਾ ਆਮਨ੍ਤਯੀ ਮਮਂ.

੭੯. ‘‘ਰਜ੍ਜਂ ਪੁਤ੍ਤ ਪਟਿਪਜ੍ਜ, ਮਾ ਪਮਜ੍ਜਿ ਪੁਰਂ ਇਦਂ;

ਕਤਂ ਮੇ ਪੋਰਿਸਾਦੇਨ, ਮਮ ਆਗਮਨਂ ਪੁਨਾ’’ਤਿ.

ਤਤ੍ਥ ਆਗਮਨਂ ਪੁਨਾਤਿ ਪੁਨ ਆਗਮਨਂ ਪਟਿਞ੍ਞਾਤਸ੍ਸ ਪੋਰਿਸਾਦਸ੍ਸ ਸਙ੍ਗਰਂ ਕਤ੍ਵਾ. ਬ੍ਰਾਹ੍ਮਣਸ੍ਸ ਧਨਂ ਦਤ੍ਵਾਤਿ ਤਕ੍ਕਸਿਲਤੋ ਆਗਤਸ੍ਸ ਨਨ੍ਦਨਾਮਸ੍ਸ ਬ੍ਰਾਹ੍ਮਣਸ੍ਸ ਤਾ ਗਾਥਾ ਸੁਤ੍ਵਾ ਚਤੁਸਹਸ੍ਸਪਰਿਮਾਣਂ ਧਨਂ ਦਤ੍ਵਾ. ਪਿਤਾ ਆਮਨ੍ਤਯੀ ਮਮਨ੍ਤਿ ਮਮ ਪਿਤਾ ਜਯਦ੍ਦਿਸਰਾਜਾ ਮਂ ਆਮਨ੍ਤੇਸਿ.

ਕਥਂ ਆਮਨ੍ਤੇਸੀਤਿ ਚੇ? ਆਹ ‘‘ਰਜ੍ਜ’’ਨ੍ਤਿਆਦਿ. ਤਸ੍ਸਤ੍ਥੋ – ਪੁਤ੍ਤ, ਤ੍ਵਂ ਇਮਂ ਕੁਲਸਨ੍ਤਕਂ ਰਜ੍ਜਂ ਪਟਿਪਜ੍ਜ, ਯਥਾਹਂ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਮਿ, ਏਵਂ ਤ੍ਵਮ੍ਪਿ ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਂ ਕਾਰੇਹਿ. ਤ੍ਵਂ ਇਦਂ ਪੁਰਂ ਰਕ੍ਖਨ੍ਤੋ ਰਜ੍ਜਞ੍ਚ ਕਾਰੇਨ੍ਤੋ ਮਾ ਪਮਾਦਮਾਪਜ੍ਜਿ, ਅਸੁਕਸ੍ਮਿਂ ਠਾਨੇ ਨਿਗ੍ਰੋਧਰੁਕ੍ਖਮੂਲੇ ਪੋਰਿਸਾਦੇਨ ਯਕ੍ਖੇਨ ਕਤਮੇਤਂ ਮਯਾ ਸਙ੍ਗਰਂ ਮਮ ਪੁਨ ਤਸ੍ਸ ਸਨ੍ਤਿਕਂ ਆਗਮਨਂ ਉਦ੍ਦਿਸ੍ਸ, ਕੇਵਲਂ ਤਸ੍ਸ ਬ੍ਰਾਹ੍ਮਣਸ੍ਸ ਧਨਦਾਨਤ੍ਥਂ ਇਧਾਗਤੋ ਸਚ੍ਚਂ ਅਨੁਰਕ੍ਖਨ੍ਤੋ, ਤਸ੍ਮਾ ਤਤ੍ਥਾਹਂ ਗਮਿਸ੍ਸਾਮੀਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਮਾ ਖੋ ਤ੍ਵਂ, ਮਹਾਰਾਜ, ਤਤ੍ਥ ਅਗਮਾਸਿ, ਅਹਂ ਤਤ੍ਥ ਗਮਿਸ੍ਸਾਮਿ. ਸਚੇ ਪਨ ਤ੍ਵਂ, ਤਾਤ, ਗਮਿਸ੍ਸਸਿਯੇਵ, ਅਹਮ੍ਪਿ ਤਯਾ ਸਦ੍ਧਿਂ ਗਮਿਸ੍ਸਾਮਿਯੇਵਾ’’ਤਿ. ‘‘ਏਵਂ ਸਨ੍ਤੇ ਮਯਂ ਉਭੋਪਿ ਨ ਭਵਿਸ੍ਸਾਮ, ਤਸ੍ਮਾ ਅਹਮੇਵ ਤਤ੍ਥ ਗਮਿਸ੍ਸਾਮੀ’’ਤਿ ਨਾਨਪ੍ਪਕਾਰੇਨ ਵਾਰੇਨ੍ਤਂ ਰਾਜਾਨਂ ਸਞ੍ਞਾਪੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਪਿਤੁ ਅਤ੍ਥਾਯ ਅਤ੍ਤਾਨਂ ਪਰਿਚ੍ਚਜਿਤ੍ਵਾ ਸੋਤ੍ਥਿਭਾਵਾਯ ਪਿਤਰਿ ਸਾਸਿਤਵਾਦਂ ਪਯੁਞ੍ਜਮਾਨੇ ਮਾਤੁਭਗਿਨਿਭਰਿਯਾਸੁ ਚ ਸਚ੍ਚਕਿਰਿਯਂ ਕਰੋਨ੍ਤੀਸੁ ਆਵੁਧਂ ਗਹੇਤ੍ਵਾ ਨਗਰਤੋ ਨਿਕ੍ਖਮਿਤ੍ਵਾ ਅਸ੍ਸੁਪੁਣ੍ਣਮੁਖਂ ਮਹਾਜਨਂ ਅਨੁਬਨ੍ਧਨ੍ਤਂ ਆਪੁਚ੍ਛਿਤ੍ਵਾ ਪਿਤਰਾ ਅਕ੍ਖਾਤਨਯੇਨ ਯਕ੍ਖਵਾਸਮਗ੍ਗਂ ਪਟਿਪਜ੍ਜਿ. ਯਕ੍ਖਿਨਿਪੁਤ੍ਤੋਪਿ ‘‘ਖਤ੍ਤਿਯਾ ਨਾਮ ਬਹੁਮਾਯਾ, ਕੋ ਜਾਨਾਤਿ ਕਿਂ ਭਵਿਸ੍ਸਤੀ’’ਤਿ ਰੁਕ੍ਖਂ ਅਭਿਰੁਹਿਤ੍ਵਾ ਰਞ੍ਞੋ ਆਗਮਨਂ ਓਲੋਕੇਨ੍ਤੋ ਨਿਸਿਨ੍ਨੋ ਕੁਮਾਰਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਪਿਤਰਂ ਨਿਵਤ੍ਤੇਤ੍ਵਾ ਪੁਤ੍ਤੋ ਆਗਤੋ ਭਵਿਸ੍ਸਤਿ, ਨਤ੍ਥਿ ਮੇ ਭਯ’’ਨ੍ਤਿ ਓਤਰਿਤ੍ਵਾ ਤਸ੍ਸ ਪਿਟ੍ਠਿਂ ਦਸ੍ਸੇਤ੍ਵਾਵ ਨਿਸੀਦਿ. ਮਹਾਸਤ੍ਤੋ ਆਗਨ੍ਤ੍ਵਾ ਤਸ੍ਸ ਪੁਰਤੋ ਅਟ੍ਠਾਸਿ. ਤੇਨ ਵੁਤ੍ਤਂ –

੮੦. ‘‘ਮਾਤਾਪਿਤੂ ਚ ਵਨ੍ਦਿਤ੍ਵਾ, ਨਿਮ੍ਮਿਨਿਤ੍ਵਾਨ ਅਤ੍ਤਨਾ;

ਨਿਕ੍ਖਿਪਿਤ੍ਵਾ ਧਨੁਂ ਖਗ੍ਗਂ, ਪੋਰਿਸਾਦਂ ਉਪਾਗਮਿ’’ਨ੍ਤਿ.

੮੧. ਸਸਤ੍ਥਹਤ੍ਥੂਪਗਤਨ੍ਤਿ ਸਸਤ੍ਥਹਤ੍ਥਂ ਉਪਗਤਂ ਆਵੁਧਪਾਣਿਂ ਮਂ ਅਤ੍ਤਨੋ ਸਨ੍ਤਿਕਂ ਉਪਗਤਂ ਦਿਸ੍ਵਾ. ਕਦਾਚਿ ਸੋ ਤਸਿਸ੍ਸਤੀਤਿ ਸੋ ਯਕ੍ਖੋ ਅਪਿ ਤਸੇਯ੍ਯ. ਤੇਨ ਭਿਜ੍ਜਿਸ੍ਸਤਿ ਸੀਲਨ੍ਤਿ ਤੇਨ ਤਸ੍ਸ ਤਾਸੁਪ੍ਪਾਦਨੇਨ ਮਯ੍ਹਂ ਸੀਲਂ ਵਿਨਸ੍ਸਤਿ ਸਂਕਿਲਿਸ੍ਸਤਿ. ਪਰਿਤਾਸਂ ਕਤੇ ਮਯੀਤਿ ਮਯਿ ਤਸ੍ਸ ਪਰਿਤਾਸਂ ਕਤੇ ਸਤਿ.

੮੨. ਸੀਲਖਣ੍ਡਭਯਾ ਮਯ੍ਹਂ, ਤਸ੍ਸ ਦੇਸ੍ਸਂ ਨ ਬ੍ਯਾਹਰਿਨ੍ਤਿ ਯਥਾ ਚ ਸੀਲਭੇਦਭਯੇਨ ਨਿਹਿਤਸਤ੍ਥੋ ਤਸ੍ਸ ਸਨ੍ਤਿਕਂ ਅਗਮਾਸਿ, ਏਵਂ ਮਯ੍ਹਂ ਸੀਲਖਣ੍ਡਭਯਾ ਏਵ ਤਸ੍ਸ ਪੋਰਿਸਾਦਸ੍ਸ ਦੇਸ੍ਸਂ ਅਨਿਟ੍ਠਮ੍ਪਿ ਨ ਬ੍ਯਾਹਰਿਂ, ਕੇਵਲਂ ਪਨ ਮੇਤ੍ਤਚਿਤ੍ਤੇਨ ਹਿਤਵਾਦੀ ਇਦਂ ਇਦਾਨਿ ਵਕ੍ਖਮਾਨਂ ਵਚਨਂ ਅਭਾਸਿਂ.

ਮਹਾਸਤ੍ਤੋ ਚ ਗਨ੍ਤ੍ਵਾ ਪੁਰਤੋ ਠਿਤੋ. ਯਕ੍ਖਿਨਿਪੁਤ੍ਤੋ ਤਂ ਵੀਮਂਸਿਤੁਕਾਮੋ ‘‘ਕੋਸਿ ਤ੍ਵਂ, ਕੁਤੋ ਆਗਤੋ, ਕਿਂ ਮਂ ਨ ਜਾਨਾਸਿ ‘ਲੁਦ੍ਦੋ ਮਨੁਸ੍ਸਮਂਸਖਾਦਕੋ’ਤਿ, ਕਸ੍ਮਾ ਚ ਇਧਾਗਤੋਸੀ’’ਤਿ ਪੁਚ੍ਛਿ. ਕੁਮਾਰੋ ‘‘ਅਹਂ ਜਯਦ੍ਦਿਸਰਞ੍ਞੋ ਪੁਤ੍ਤੋ, ਤ੍ਵਂ ਪੋਰਿਸਾਦਕੋਤਿ ਜਾਨਾਮਿ, ਪਿਤੁ ਜੀਵਿਤਂ ਰਕ੍ਖਿਤੁਂ ਇਧਾਗਤੋ, ਤਸ੍ਮਾ ਤਂ ਮੁਞ੍ਚ, ਮਂ ਖਾਦਾ’’ਤਿ ਆਹ. ਪੁਨ ਯਕ੍ਖਿਨਿਪੁਤ੍ਤੋ ਮੁਖਾਕਾਰੇਨੇਵ ‘‘ਤਂ ਤਸ੍ਸ ਪੁਤ੍ਤੋਤਿ ਅਹਂ ਜਾਨਾਮਿ, ਦੁਕ੍ਕਰਂ ਪਨ ਤਯਾ ਕਤਂ ਏਵਂ ਆਗਚ੍ਛਨ੍ਤੇਨਾ’’ਤਿ ਆਹ. ਕੁਮਾਰੋ ‘‘ਨ ਇਦਂ ਦੁਕ੍ਕਰਂ, ਯਂ ਪਿਤੁ ਅਤ੍ਥੇ ਜੀਵਿਤਪਰਿਚ੍ਚਜਨਂ, ਮਾਤਾਪਿਤੁਹੇਤੁ ਹਿ ਏਵਰੂਪਂ ਪੁਞ੍ਞਂ ਕਤ੍ਵਾ ਏਕਨ੍ਤੇਨੇਵ ਸਗ੍ਗੇ ਪਮੋਦਤਿ, ਅਹਞ੍ਚ ‘ਅਮਰਣਧਮ੍ਮੋ ਨਾਮ ਕੋਚਿ ਸਤ੍ਤੋ ਨਤ੍ਥੀ’ਤਿ ਜਾਨਾਮਿ, ਅਤ੍ਤਨਾ ਚ ਕਿਞ੍ਚਿ ਕਤਂ ਪਾਪਂ ਨਾਮ ਨ ਸਰਾਮਿ, ਤਸ੍ਮਾ ਮਰਣਤੋਪਿ ਮੇ ਭਯਂ ਨਤ੍ਥਿ, ਇਦਂ ਸਰੀਰਂ ਮਯਾ ਤੇ ਨਿਸ੍ਸਟ੍ਠਂ, ਅਗ੍ਗਿਂ ਜਾਲੇਤ੍ਵਾ ਖਾਦਾ’’ਤਿ ਆਹ. ਤੇਨ ਵੁਤ੍ਤਂ –

੮੩. ‘‘ਉਜ੍ਜਾਲੇਹਿ ਮਹਾਅਗ੍ਗਿਂ, ਪਪਤਿਸ੍ਸਾਮਿ ਰੁਕ੍ਖਤੋ;

ਤ੍ਵਂ ਪਕ੍ਕਕਾਲਮਞ੍ਞਾਯ, ਭਕ੍ਖਯ ਮਂ ਪਿਤਾਮਹਾ’’ਤਿ.

ਤਂ ਸੁਤ੍ਵਾ ਯਕ੍ਖਿਨਿਪੁਤ੍ਤੋ ‘‘ਨ ਸਕ੍ਕਾ ਇਮਸ੍ਸ ਮਂਸਂ ਖਾਦਿਤੁਂ, ਉਪਾਯੇਨ ਇਮਂ ਪਲਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤੇਨ ਹਿ ਅਰਞ੍ਞਂ ਪਵਿਸਿਤ੍ਵਾ ਸਾਰਦਾਰੂਨਿ ਆਹਰਿਤ੍ਵਾ ਨਿਦ੍ਧੂਮੇ ਅਙ੍ਗਾਰੇ ਕਰੋਹਿ, ਤਤ੍ਥ ਤੇ ਮਂਸਂ ਪਚਿਤ੍ਵਾ ਖਾਦਿਸ੍ਸਾਮੀ’’ਤਿ ਆਹ. ਮਹਾਸਤ੍ਤੋ ਤਥਾ ਕਤ੍ਵਾ ਤਸ੍ਸ ਆਰੋਚੇਸਿ. ਸੋ ਤਂ ਓਲੋਕੇਨ੍ਤੋ ‘‘ਅਯਂ ਪੁਰਿਸਸੀਹੋ ਮਰਣਤੋਪਿ ਭਯਂ ਨਤ੍ਥਿ, ਏਵਂ ਨਿਬ੍ਭਯੋ ਨਾਮ ਨ ਮਯਾ ਦਿਟ੍ਠਪੁਬ੍ਬੋ’’ਤਿ ਲੋਮਹਂਸਜਾਤੋ ਕੁਮਾਰਂ ਓਲੋਕੇਸਿ. ਕੁਮਾਰੋ ਕਿਸ੍ਸ ਮਂ ਓਲੋਕੇਸਿ, ਨ ਯਥਾਵੁਤ੍ਤਂ ਕਰੋਸੀਤਿ. ਯਕ੍ਖਿਨਿਪੁਤ੍ਤੋ ਮਹਾਸਤ੍ਤਂ ‘‘ਸਤ੍ਤਧਾ ਤਸ੍ਸ ਮੁਦ੍ਧਾ ਫਲੇਯ੍ਯ, ਯੋ ਤਂ ਖਾਦੇਯ੍ਯਾ’’ਤਿ ਆਹ. ‘‘ਸਚੇ ਮਂ ਨ ਖਾਦਿਤੁਕਾਮੋਸਿ, ਅਥ ਕਸ੍ਮਾ ਅਗ੍ਗਿਂ ਕਾਰੇਸੀ’’ਤਿ? ‘‘ਤਵ ਪਰਿਗ੍ਗਣ੍ਹਨਤ੍ਥ’’ਨ੍ਤਿ. ‘‘ਤ੍ਵਂ ਇਦਾਨਿ ਮਂ ਕਥਂ ਪਰਿਗ੍ਗਣ੍ਹਿਸ੍ਸਸਿ, ਸ੍ਵਾਹਂ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਸਕ੍ਕਸ੍ਸ ਦੇਵਰਞ੍ਞੋ ਅਤ੍ਤਾਨਂ ਪਰਿਗ੍ਗਣ੍ਹਿਤੁਂ ਨ ਅਦਾਸਿ’’ਨ੍ਤਿ ਇਮਮਤ੍ਥਂ ਦਸ੍ਸੇਨ੍ਤੋ –

‘‘ਇਦਞ੍ਹਿ ਸੋ ਬ੍ਰਾਹ੍ਮਣਂ ਮਞ੍ਞਮਾਨੋ, ਸਸੋ ਅਵਾਸੇਸਿ ਸਕੇ ਸਰੀਰੇ;

ਤੇਨੇਵ ਸੋ ਚਨ੍ਦਿਮਾ ਦੇਵਪੁਤ੍ਤੋ, ਸਸਤ੍ਥੁਤੋ ਕਾਮਦੁਹਜ੍ਜ ਯਕ੍ਖਾ’’ਤਿ.(ਜਾ. ੧.੧੬.੯੩) –

ਗਾਥਮਾਹ.

ਤਤ੍ਥ ਸਸੋ ਅਵਾਸੇਸਿ ਸਕੇ ਸਰੀਰੇਤਿ ਅਤ੍ਤਨੋ ਸਰੀਰਹੇਤੁ ਇਮਂ ਸਰੀਰਂ ਖਾਦਿਤ੍ਵਾ ਇਧ ਵਸਾਤਿ ਏਵਂ ਸਕੇ ਸਰੀਰੇ ਅਤ੍ਤਨੋ ਸਰੀਰਂ ਦੇਨ੍ਤੋ ਤਂ ਬ੍ਰਾਹ੍ਮਣਰੂਪਂ ਸਕ੍ਕਂ ਤਤ੍ਥ ਵਾਸੇਸਿ. ਸਸਤ੍ਥੁਤੋਤਿ ‘‘ਸਸੀ’’ਤਿ ਏਵਂ ਸਸਸਦ੍ਦੇਨ ਥੁਤੋ. ਕਾਮਦੁਹੋਤਿ ਕਾਮਵਡ੍ਢਨੋ. ਯਕ੍ਖਾਤਿ ਦੇਵ.

ਏਵਂ ਮਹਾਸਤ੍ਤੋ ਚਨ੍ਦੇ ਸਸਲਕ੍ਖਣਂ ਕਪ੍ਪਟ੍ਠਿਯਂ ਪਾਟਿਹਾਰਿਯਂ ਸਕ੍ਖਿਂ ਕਤ੍ਵਾ ਅਤ੍ਤਨੋ ਸਕ੍ਕੇਨਪਿ ਪਰਿਗ੍ਗਣ੍ਹਿਤੁਂ ਅਸਕ੍ਕੁਣੇਯ੍ਯਤਂ ਅਭਾਸਿ. ਤਂ ਸੁਤ੍ਵਾ ਪੋਰਿਸਾਦੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ –

‘‘ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ, ਵਿਰੋਚਤੇ ਪਨ੍ਨਰਸੇਵ ਭਾਣੁਮਾ;

ਏਵਂ ਤੁਵਂ ਪੋਰਿਸਾਦਾ ਪਮੁਤ੍ਤੋ, ਵਿਰੋਚ ਕਪਿਲੇ ਮਹਾਨੁਭਾਵ;

ਆਮੋਦਯਂ ਪਿਤਰਂ ਮਾਤਰਞ੍ਚ, ਸਬ੍ਬੋ ਚ ਤੇ ਨਨ੍ਦਤੁ ਞਾਤਿਪਕ੍ਖੋ’’ਤਿ. (ਜਾ. ੧.੧੬.੯੪) –

ਗਾਥਂ ਵਤ੍ਵਾ ‘‘ਗਚ੍ਛ ਮਹਾਵੀਰਾ’’ਤਿ ਕੁਮਾਰਂ ਵਿਸ੍ਸਜ੍ਜੇਸਿ. ਸੋਪਿ ਤਂ ਨਿਬ੍ਬਿਸੇਵਨਂ ਕਤ੍ਵਾ ਪਞ੍ਚ ਸੀਲਾਨਿ ਦਤ੍ਵਾ ‘‘ਯਕ੍ਖੋ ਨੁ ਖੋ ਏਸ, ਨੋ’’ਤਿ ਵੀਮਂਸਨ੍ਤੋ ‘‘ਯਕ੍ਖਾਨਂ ਅਕ੍ਖੀਨਿ ਰਤ੍ਤਾਨਿ ਹੋਨ੍ਤਿ ਅਨਿਮਿਸਾਨਿ ਚ, ਛਾਯਾ ਚ ਨ ਪਞ੍ਞਾਯਤਿ, ਅਸਮ੍ਭੀਤੋ ਹੋਤਿ, ਨ ਇਮਸ੍ਸ ਤਥਾ. ਤਸ੍ਮਾ ਨਾਯਂ ਯਕ੍ਖੋ ਮਨੁਸ੍ਸੋ ਏਸੋ, ਮਯ੍ਹਂ ਕਿਰ ਪਿਤੁ ਤਯੋ ਭਾਤਰੋ ਯਕ੍ਖਿਨਿਯਾ ਗਹਿਤਾ, ਤੇਸੁ ਤਾਯ ਦ੍ਵੇ ਖਾਦਿਤਾ ਭਵਿਸ੍ਸਨ੍ਤਿ, ਏਕੋ ਪੁਤ੍ਤਸਿਨੇਹੇਨ ਪਟਿਜਗ੍ਗਿਤੋ ਭਵਿਸ੍ਸਤਿ. ਇਮਿਨਾ ਤੇਨ ਭਵਿਤਬ੍ਬ’’ਨ੍ਤਿ ਨਯਗ੍ਗਾਹੇਨ ਅਨੁਮਾਨੇਨ ਸਬ੍ਬਞ੍ਞੁਤਞ੍ਞਾਣੇਨ ਵਿਯ ਅਵਿਪਰੀਤਤੋ ਨਿਟ੍ਠਂ ਗਨ੍ਤ੍ਵਾ ‘‘ਮਯ੍ਹਂ ਪਿਤੁ ਆਚਿਕ੍ਖਿਤ੍ਵਾ ਰਜ੍ਜੇ ਪਤਿਟ੍ਠਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਨ ਤ੍ਵਂ ਯਕ੍ਖੋ, ਪਿਤੁ ਮੇ ਜੇਟ੍ਠਭਾਤਿਕੋਸਿ, ਏਹਿ ਮਯਾ ਸਦ੍ਧਿਂ ਗਨ੍ਤ੍ਵਾ ਕੁਲਸਨ੍ਤਕਂ ਰਜ੍ਜਂ ਪਟਿਪਜ੍ਜਾਹੀ’’ਤਿ ਆਹ. ਤੇਨ ਵੁਤ੍ਤਂ ‘‘ਤ੍ਵਂ ਪਿਤਾਮਹਾ’’ਤਿ, ਤ੍ਵਂ ਮਮ ਮਹਾਪਿਤਾਤਿ ਅਤ੍ਥੋ. ਇਤਰੇਨ ‘‘ਨਾਹਂ ਮਨੁਸ੍ਸੋ’’ਤਿ ਵੁਤ੍ਤੇ ਤੇਨ ਸਦ੍ਧਾਤਬ੍ਬਸ੍ਸ ਦਿਬ੍ਬਚਕ੍ਖੁਕਤਾਪਸਸ੍ਸ ਸਨ੍ਤਿਕਂ ਨੇਸਿ. ਤਾਪਸੇਨ ‘‘ਕਿਂ ਕਰੋਨ੍ਤਾ ਪਿਤਾ ਪੁਤ੍ਤਾ ਅਰਞ੍ਞੇ ਵਿਚਰਥਾ’’ਤਿ ਪਿਤੁਭਾਵੇ ਕਥਿਤੇ ਪੋਰਿਸਾਦੋ ਸਦ੍ਦਹਿਤ੍ਵਾ ‘‘ਗਚ੍ਛ, ਤਾਤ, ਤ੍ਵਂ, ਨ ਮੇ ਰਜ੍ਜੇਨ ਅਤ੍ਥੋ, ਪਬ੍ਬਜਿਸ੍ਸਾਮਹ’’ਨ੍ਤਿ ਤਾਪਸਸ੍ਸ ਸਨ੍ਤਿਕੇ ਇਸਿਪਬ੍ਬਜ੍ਜਂ ਪਬ੍ਬਜਿ. ਤੇਨ ਵੁਤ੍ਤਂ –

੮੪. ‘‘ਇਤਿ ਸੀਲਵਤਂ ਹੇਤੁ, ਨਾਰਕ੍ਖਿਂ ਮਮ ਜੀਵਿਤਂ;

ਪਬ੍ਬਾਜੇਸਿਂ ਚਹਂ ਤਸ੍ਸ, ਸਦਾ ਪਾਣਾਤਿਪਾਤਿਕ’’ਨ੍ਤਿ.

ਤਤ੍ਥ ਸੀਲਵਤਂ ਹੇਤੂਤਿ ਸੀਲਵਨ੍ਤਾਨਂ ਮਮ ਪਿਤੂਨਂ ਹੇਤੁ. ਅਥ ਵਾ ਸੀਲਵਤਂ ਹੇਤੂਤਿ ਸੀਲਵਤਹੇਤੁ, ਮਯ੍ਹਂ ਸੀਲਵਤਸਮਾਦਾਨਨਿਮਿਤ੍ਤਂ ਤਸ੍ਸ ਅਭਿਜ੍ਜਨਤ੍ਥਂ. ਤਸ੍ਸਾਤਿ ਤਂ ਪੋਰਿਸਾਦਂ.

ਅਥ ਮਹਾਸਤ੍ਤੋ ਅਤ੍ਤਨੋ ਮਹਾਪਿਤਰਂ ਪਬ੍ਬਜਿਤਂ ਵਨ੍ਦਿਤ੍ਵਾ ਨਗਰਸ੍ਸ ਸਮੀਪਂ ਗਨ੍ਤ੍ਵਾ ‘‘ਕੁਮਾਰੋ ਕਿਰ ਆਗਤੋ’’ਤਿ ਸੁਤ੍ਵਾ ਹਟ੍ਠਤੁਟ੍ਠੇਨ ਰਞ੍ਞਾ ਨਾਗਰੇਹਿ ਨੇਗਮਜਾਨਪਦੇਹਿ ਚ ਪਚ੍ਚੁਗ੍ਗਤੋ ਰਾਜਾਨਂ ਵਨ੍ਦਿਤ੍ਵਾ ਸਬ੍ਬਂ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ਤਙ੍ਖਣਞ੍ਞੇਵ ਭੇਰਿਂ ਚਰਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਏਹਿ, ਭਾਤਿਕ, ਰਜ੍ਜਂ ਪਟਿਪਜ੍ਜਾਹੀ’’ਤਿ ਆਹ. ‘‘ਅਲਂ, ਮਹਾਰਾਜਾ’’ਤਿ. ‘‘ਤੇਨ ਹਿ ਮਯ੍ਹਂ ਉਯ੍ਯਾਨੇ ਵਸਾ’’ਤਿ. ‘‘ਨ ਆਗਚ੍ਛਾਮੀ’’ਤਿ. ਰਾਜਾ ਤਸ੍ਸ ਅਸ੍ਸਮਸ੍ਸ ਅਵਿਦੂਰੇ ਗਾਮਂ ਨਿਵੇਸੇਤ੍ਵਾ ਭਿਕ੍ਖਂ ਪਟ੍ਠਪੇਸਿ. ਸੋ ਚੂਲ਼ਕਮ੍ਮਾਸਦਮ੍ਮਨਿਗਮੋ ਨਾਮ ਜਾਤੋ.

ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ, ਤਾਪਸੋ ਸਾਰਿਪੁਤ੍ਤੋ, ਪੋਰਿਸਾਦੋ ਅਙ੍ਗੁਲਿਮਾਲੋ, ਕਨਿਟ੍ਠਾ ਉਪ੍ਪਲਵਣ੍ਣਾ, ਅਗ੍ਗਮਹੇਸੀ ਰਾਹੁਲਮਾਤਾ, ਅਲੀਨਸਤ੍ਤੁਕੁਮਾਰੋ ਲੋਕਨਾਥੋ.

ਤਸ੍ਸ ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਪਿਤਰਾ ਨਿਵਾਰਿਯਮਾਨੋ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਪਿਤੁ ਜੀਵਿਤਰਕ੍ਖਣਤ੍ਥਂ ‘‘ਪੋਰਿਸਾਦਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਨਿਚ੍ਛਯੋ, ਤਸ੍ਸ ਚ ਸਨ੍ਤਾਸਪਰਿਹਰਣਤ੍ਥਂ ਨਿਹਿਤਸਤ੍ਥਸ੍ਸ ਗਮਨਂ, ‘‘ਅਤ੍ਤਨੋ ਸੀਲਖਣ੍ਡਨਂ ਮਾ ਹੋਤੂ’’ਤਿ ਤੇਨ ਪਿਯਵਾਚਾਯ ਸਮੁਦਾਚਾਰੋ, ਤੇਨ ਚ ਨਾਨਾਨਯੇਹਿ ਪਰਿਗ੍ਗਣ੍ਹਿਯਮਾਨਸ੍ਸ ਮਰਣਸਨ੍ਤਾਸਾਭਾਵੋ, ਪਿਤੁ ਅਤ੍ਥੇ ਮਯ੍ਹਂ ਸਰੀਰਂ ਸਫਲਂ ਕਰਿਸ੍ਸਾਮੀਤਿ ਹਟ੍ਠਤੁਟ੍ਠਭਾਵੋ, ਸਕ੍ਕੇਨਾਪਿ ਪਰਿਗ੍ਗਣ੍ਹਿਤੁਂ ਅਸਕ੍ਕੁਣੇਯ੍ਯਸ੍ਸ ਸਸਜਾਤਿਯਮ੍ਪਿ ਪਰਿਚ੍ਚਾਗਤ੍ਥਂ ਅਤ੍ਤਨੋ ਜੀਵਿਤਨਿਰਪੇਕ੍ਖਭਾਵਸ੍ਸ ਜਾਨਨਂ, ਤੇਨ ਸਮਾਗਮੇਪਿ ਓਸ੍ਸਟ੍ਠੇਪਿ ਚਿਤ੍ਤਸ੍ਸ ਵਿਕਾਰਾਭਾਵੋ, ਤਸ੍ਸ ਚ ਮਨੁਸ੍ਸਭਾਵਮਹਾਪਿਤੁਭਾਵਾਨਂ ਅਵਿਪਰੀਤਤੋ ਜਾਨਨਂ, ਞਾਤਮਤ੍ਤੇ ਚ ਤਂ ਕੁਲਸਨ੍ਤਕੇ ਰਜ੍ਜੇ ਪਤਿਟ੍ਠਾਪੇਤੁਕਾਮਤਾ, ਧਮ੍ਮਦੇਸਨਾਯ ਸਂਵੇਜੇਤ੍ਵਾ ਸੀਲੇਸੁ ਪਤਿਟ੍ਠਾਪਨਨ੍ਤਿ. ਏਵਮਾਦਯੋ ਇਧ ਬੋਧਿਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਅਲੀਨਸਤ੍ਤੁਚਰਿਯਾਵਣ੍ਣਨਾ ਨਿਟ੍ਠਿਤਾ.