੨. ਹਤ੍ਥਿਨਾਗਵਗ੍ਗੋ

੧. ਮਾਤੁਪੋਸਕਚਰਿਯਾਵਣ੍ਣਨਾ

੧. ਦੁਤਿਯਵਗ੍ਗਸ੍ਸ ਪਠਮੇ ਕੁਞ੍ਜਰੋਤਿ ਹਤ੍ਥੀ. ਮਾਤੁਪੋਸਕੋਤਿ ਅਨ੍ਧਾਯ ਜਰਾਜਿਣ੍ਣਾਯ ਮਾਤੁਯਾ ਪਟਿਜਗ੍ਗਨਕੋ. ਮਹਿਯਾਤਿ ਭੂਮਿਯਂ. ਗੁਣੇਨਾਤਿ ਸੀਲਗੁਣੇਨ, ਤਦਾ ਮਮ ਸਦਿਸੋ ਨਤ੍ਥਿ.

ਬੋਧਿਸਤ੍ਤੋ ਹਿ ਤਦਾ ਹਿਮਵਨ੍ਤਪ੍ਪਦੇਸੇ ਹਤ੍ਥਿਯੋਨਿਯਂ ਨਿਬ੍ਬਤ੍ਤਿ. ਸੋ ਸਬ੍ਬਸੇਤੋ ਅਭਿਰੂਪੋ ਲਕ੍ਖਣਸਮ੍ਪਨ੍ਨੋ ਮਹਾਹਤ੍ਥੀ ਅਨੇਕਹਤ੍ਥਿਸਤਸਹਸ੍ਸਪਰਿਵਾਰੋ ਅਹੋਸਿ. ਮਾਤਾ ਪਨਸ੍ਸ ਅਨ੍ਧਾ. ਸੋ ਮਧੁਰਫਲਾਫਲਾਨਿ ਹਤ੍ਥੀਨਂ ਹਤ੍ਥੇਸੁ ਦਤ੍ਵਾ ਮਾਤੁ ਪੇਸੇਤਿ. ਹਤ੍ਥਿਨੋ ਤਸ੍ਸਾ ਅਦਤ੍ਵਾ ਸਯਂ ਖਾਦਨ੍ਤਿ. ਸੋ ਪਰਿਗ੍ਗਣ੍ਹਨ੍ਤੋ ਤਂ ਪਵਤ੍ਤਿਂ ਞਤ੍ਵਾ ‘‘ਯੂਥਂ ਪਹਾਯ ਮਾਤਰਮੇਵ ਪੋਸੇਸ੍ਸਾਮੀ’’ਤਿ ਰਤ੍ਤਿਭਾਗੇ ਅਞ੍ਞੇਸਂ ਹਤ੍ਥੀਨਂ ਅਜਾਨਨ੍ਤਾਨਂ ਮਾਤਰਂ ਗਹੇਤ੍ਵਾ ਚਣ੍ਡੋਰਣਪਬ੍ਬਤਪਾਦਂ ਗਨ੍ਤ੍ਵਾ ਏਕਂ ਨਲ਼ਿਨਿਂ ਉਪਨਿਸ੍ਸਾਯ ਠਿਤਾਯ ਪਬ੍ਬਤਗੁਹਾਯ ਮਾਤਰਂ ਠਪੇਤ੍ਵਾ ਪੋਸੇਸਿ.

੨-੩. ਪਵਨੇ ਦਿਸ੍ਵਾ ਵਨਚਰੋਤਿ ਏਕੋ ਵਨਚਰਕੋ ਪੁਰਿਸੋ ਤਸ੍ਮਿਂ ਮਹਾਵਨੇ ਵਿਚਰਨ੍ਤੋ ਮਂ ਦਿਸ੍ਵਾ. ਰਞ੍ਞੋ ਮਂ ਪਟਿਵੇਦਯੀਤਿ ਬਾਰਾਣਸਿਰਞ੍ਞੋ ਮਂ ਆਰੋਚੇਸਿ.

ਸੋ ਹਿ ਮਗ੍ਗਮੂਲ਼੍ਹੋ ਦਿਸਂ ਵਵਤ੍ਥਪੇਤੁਂ ਅਸਕ੍ਕੋਨ੍ਤੋ ਮਹਨ੍ਤੇਨ ਸਦ੍ਦੇਨ ਪਰਿਦੇਵਿ. ਬੋਧਿਸਤ੍ਤੋਪਿ ਤਸ੍ਸ ਸਦ੍ਦਂ ਸੁਤ੍ਵਾ ‘‘ਅਯਂ ਪੁਰਿਸੋ ਅਨਾਥੋ, ਨ ਖੋ ਪਨੇਤਂ ਪਤਿਰੂਪਂ, ਯਂ ਏਸ ਮਯਿ ਠਿਤੇ ਇਧ ਵਿਨਸ੍ਸੇਯ੍ਯਾ’’ਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਭਯੇਨ ਪਲਾਯਨ੍ਤਂ ਦਿਸ੍ਵਾ ‘‘ਅਮ੍ਭੋ ਪੁਰਿਸ, ਨਤ੍ਥਿ ਤੇ ਮਂ ਨਿਸ੍ਸਾਯ ਭਯਂ, ਮਾ ਪਲਾਯਿ, ਕਸ੍ਮਾ ਤ੍ਵਂ ਪਰਿਦੇਵਨ੍ਤੋ ਵਿਚਰਸੀ’’ਤਿ ਪੁਚ੍ਛਿਤ੍ਵਾ ‘‘ਸਾਮਿ, ਅਹਂ ਮਗ੍ਗਮੂਲ਼੍ਹੋ ਅਜ੍ਜ ਮੇ ਸਤ੍ਤਮੋ ਦਿਵਸੋ’’ਤਿ ਵੁਤ੍ਤੇ ‘‘ਭੋ ਪੁਰਿਸ, ਮਾ ਭਾਯਿ, ਅਹਂ ਤਂ ਮਨੁਸ੍ਸਪਥੇ ਠਪੇਸ੍ਸਾਮੀ’’ਤਿ ਤਂ ਅਤ੍ਤਨੋ ਪਿਟ੍ਠਿਯਂ ਨਿਸੀਦਾਪੇਤ੍ਵਾ ਅਰਞ੍ਞਤੋ ਨੀਹਰਿਤ੍ਵਾ ਨਿਵਤ੍ਤਿ. ਸੋਪਿ ਪਾਪੋ ‘‘ਨਗਰਂ ਗਨ੍ਤ੍ਵਾ ਰਞ੍ਞੋ ਆਰੋਚੇਸ੍ਸਾਮੀ’’ਤਿ ਰੁਕ੍ਖਸਞ੍ਞਂ ਪਬ੍ਬਤਸਞ੍ਞਞ੍ਚ ਕਰੋਨ੍ਤੋਵ ਨਿਕ੍ਖਮਿਤ੍ਵਾ ਬਾਰਾਣਸਿਂ ਅਗਮਾਸਿ. ਤਸ੍ਮਿਂ ਕਾਲੇ ਰਞ੍ਞੋ ਮਙ੍ਗਲਹਤ੍ਥੀ ਮਤੋ. ਸੋ ਪੁਰਿਸੋ ਰਾਜਾਨਂ ਉਪਸਙ੍ਕਮਿਤ੍ਵਾ ਮਹਾਪੁਰਿਸਸ੍ਸ ਅਤ੍ਤਨੋ ਦਿਟ੍ਠਭਾਵਂ ਆਰੋਚੇਸਿ. ਤੇਨ ਵੁਤ੍ਤਂ ‘‘ਤਵਾਨੁਚ੍ਛਵੋ, ਮਹਾਰਾਜ, ਗਜੋ ਵਸਤਿ ਕਾਨਨੇ’’ਤਿਆਦਿ.

ਤਤ੍ਥ ਤਵਾਨੁਚ੍ਛਵੋਤਿ ਤਵ ਓਪਵਯ੍ਹਂ ਕਾਤੁਂ ਅਨੁਚ੍ਛਵਿਕੋ ਯੁਤ੍ਤੋ. ਨ ਤਸ੍ਸ ਪਰਿਕ੍ਖਾਯਤ੍ਥੋਤਿ ਤਸ੍ਸ ਗਹਣੇ ਗਮਨੁਪਚ੍ਛੇਦਨਤ੍ਥਂ ਸਮਨ੍ਤਤੋ ਖਣਿਤਬ੍ਬਪਰਿਕ੍ਖਾਯ ਵਾ ਕਰੇਣੁਯਾ ਕਣ੍ਣਪੁਟੇਨ ਅਤ੍ਤਾਨਂ ਪਟਿਚ੍ਛਾਦੇਤ੍ਵਾ ਖਿਤ੍ਤਪਾਸਰਜ੍ਜੁਯਾ ਬਨ੍ਧਿਤਬ੍ਬਆਲ਼ਕਸਙ੍ਖਾਤਆਲਾਨੇਨ ਵਾ ਯਤ੍ਥ ਪਵਿਟ੍ਠੋ ਕਤ੍ਥਚਿ ਗਨ੍ਤੁਂ ਨ ਸਕ੍ਕੋਤਿ, ਤਾਦਿਸਵਞ੍ਚਨਕਾਸੁਯਾ ਵਾ ਅਤ੍ਥੋ ਪਯੋਜਨਂ ਨਤ੍ਥਿ. ਸਹਗਹਿਤੇਤਿ ਗਹਣਸਮਕਾਲਂ ਏਵ. ਏਹਿਤੀਤਿ ਆਗਮਿਸ੍ਸਤਿ.

ਰਾਜਾ ਇਮਂ ਮਗ੍ਗਦੇਸਕਂ ਕਤ੍ਵਾ ਅਰਞ੍ਞਂ ਗਨ੍ਤ੍ਵਾ ‘‘ਇਮਿਨਾ ਵੁਤ੍ਤਂ ਹਤ੍ਥਿਨਾਗਂ ਆਨੇਹੀ’’ਤਿ ਹਤ੍ਥਾਚਰਿਯਂ ਸਹ ਪਰਿਵਾਰੇਨ ਪੇਸੇਸਿ. ਸੋ ਤੇਨ ਸਦ੍ਧਿਂ ਗਨ੍ਤ੍ਵਾ ਬੋਧਿਸਤ੍ਤਂ ਨਲ਼ਿਨਿਂ ਪਵਿਸਿਤ੍ਵਾ ਗੋਚਰਂ ਗਣ੍ਹਨ੍ਤਂ ਪਸ੍ਸਿ. ਤੇਨ ਵੁਤ੍ਤਂ –

੪. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰਾਜਾਪਿ ਤੁਟ੍ਠਮਾਨਸੋ;

ਪੇਸੇਸਿ ਹਤ੍ਥਿਦਮਕਂ, ਛੇਕਾਚਰਿਯਂ ਸੁਸਿਕ੍ਖਿਤਂ.

੫. ‘‘ਗਨ੍ਤ੍ਵਾ ਸੋ ਹਤ੍ਥਿਦਮਕੋ, ਅਦ੍ਦਸ ਪਦੁਮਸ੍ਸਰੇ;

ਭਿਸਮੁਲ਼ਾਲਂ ਉਦ੍ਧਰਨ੍ਤਂ, ਯਾਪਨਤ੍ਥਾਯ ਮਾਤੁਯਾ’’ਤਿ.

ਤਤ੍ਥ ਛੇਕਾਚਰਿਯਨ੍ਤਿ ਹਤ੍ਥਿਬਨ੍ਧਨਾਦਿਵਿਧਿਮ੍ਹਿ ਕੁਸਲਂ ਹਤ੍ਥਾਚਰਿਯਂ. ਸੁਸਿਕ੍ਖਿਤਨ੍ਤਿ ਹਤ੍ਥੀਨਂ ਸਿਕ੍ਖਾਪਨਵਿਜ੍ਜਾਯ ਨਿਟ੍ਠਙ੍ਗਮਨੇਨ ਸੁਟ੍ਠੁ ਸਿਕ੍ਖਿਤਂ.

੬. ਵਿਞ੍ਞਾਯ ਮੇ ਸੀਲਗੁਣਨ੍ਤਿ ‘‘ਭਦ੍ਦੋ ਅਯਂ ਹਤ੍ਥਾਜਾਨੀਯੋ ਨ ਮਨ੍ਦੋ, ਨ ਚਣ੍ਡੋ, ਨ ਵੋਮਿਸ੍ਸਸੀਲੋ ਵਾ’’ਤਿ ਮਮ ਸੀਲਗੁਣਂ ਜਾਨਿਤ੍ਵਾ. ਕਥਂ? ਲਕ੍ਖਣਂ ਉਪਧਾਰਯੀਤਿ ਸੁਸਿਕ੍ਖਿਤਹਤ੍ਥਿਸਿਪ੍ਪਤ੍ਤਾ ਮਮ ਲਕ੍ਖਣਂ ਸਮਨ੍ਤਤੋ ਉਪਧਾਰੇਸਿ. ਤੇਨ ਸੋ ਏਹਿ ਪੁਤ੍ਤਾਤਿ ਵਤ੍ਵਾਨ, ਮਮ ਸੋਣ੍ਡਾਯ ਅਗ੍ਗਹਿ.

੭. ਬੋਧਿਸਤ੍ਤੋ ਹਤ੍ਥਾਚਰਿਯਂ ਦਿਸ੍ਵਾ – ‘‘ਇਦਂ ਭਯਂ ਮਯ੍ਹਂ ਏਤਸ੍ਸ ਪੁਰਿਸਸ੍ਸ ਸਨ੍ਤਿਕਾ ਉਪ੍ਪਨ੍ਨਂ, ਅਹਂ ਖੋ ਪਨ ਮਹਾਬਲੋ ਹਤ੍ਥਿਸਹਸ੍ਸਮ੍ਪਿ ਵਿਦ੍ਧਂਸੇਤੁਂ ਸਮਤ੍ਥੋ, ਪਹੋਮਿ ਕੁਜ੍ਝਿਤ੍ਵਾ ਸਰਟ੍ਠਕਂ ਸੇਨਾਵਾਹਨਂ ਨਾਸੇਤੁਂ, ਸਚੇ ਪਨ ਕੁਜ੍ਝਿਸ੍ਸਾਮਿ, ਸੀਲਂ ਮੇ ਭਿਜ੍ਜਿਸ੍ਸਤਿ, ਤਸ੍ਮਾ ਸਤ੍ਤੀਹਿ ਕੋਟ੍ਟਿਯਮਾਨੋਪਿ ਨ ਕੁਜ੍ਝਿਸ੍ਸਾਮੀ’’ਤਿ ਚਿਤ੍ਤਂ ਅਧਿਟ੍ਠਾਯ ਸੀਸਂ ਓਨਾਮੇਤ੍ਵਾ ਨਿਚ੍ਚਲੋਵ ਅਟ੍ਠਾਸਿ. ਤੇਨਾਹ ਭਗਵਾ ‘‘ਯਂ ਮੇ ਤਦਾ ਪਾਕਤਿਕਂ, ਸਰੀਰਾਨੁਗਤਂ ਬਲ’’ਨ੍ਤਿਆਦਿ.

ਤਤ੍ਥ ਪਾਕਤਿਕਨ੍ਤਿ ਸਭਾਵਸਿਦ੍ਧਂ. ਸਰੀਰਾਨੁਗਤਨ੍ਤਿ ਸਰੀਰਮੇਵ ਅਨੁਗਤਂ ਕਾਯਬਲਂ, ਨ ਉਪਾਯਕੁਸਲਤਾਸਙ੍ਖਾਤਞਾਣਾਨੁਗਤਨ੍ਤਿ ਅਧਿਪ੍ਪਾਯੋ. ਅਜ੍ਜ ਨਾਗਸਹਸ੍ਸਾਨਨ੍ਤਿ ਅਜ੍ਜਕਾਲੇ ਅਨੇਕੇਸਂ ਹਤ੍ਥਿਸਹਸ੍ਸਾਨਂ ਸਮੁਦਿਤਾਨਂ. ਬਲੇਨ ਸਮਸਾਦਿਸਨ੍ਤਿ ਤੇਸਂ ਸਰੀਰਬਲੇਨ ਸਮਸਮਮੇਵ ਹੁਤ੍ਵਾ ਸਦਿਸਂ, ਨ ਉਪਮਾਮਤ੍ਤੇਨ. ਮਙ੍ਗਲਹਤ੍ਥਿਕੁਲੇ ਹਿ ਤਦਾ ਬੋਧਿਸਤ੍ਤੋ ਉਪ੍ਪਨ੍ਨੋਤਿ.

੮. ਯਦਿਹਂ ਤੇਸਂ ਪਕੁਪ੍ਪੇਯ੍ਯਨ੍ਤਿ ਮਂ ਗਹਣਾਯ ਉਪਗਤਾਨਂ ਤੇਸਂ ਅਹਂ ਯਦਿ ਕੁਜ੍ਝੇਯ੍ਯਂ, ਤੇਸਂ ਜੀਵਿਤਮਦ੍ਦਨੇ ਪਟਿਬਲੋ ਭਵੇਯ੍ਯਂ. ਨ ਕੇਵਲਂ ਤੇਸਞ੍ਞੇਵ, ਅਥ ਖੋ ਯਾਵ ਰਜ੍ਜਮ੍ਪਿ ਮਾਨੁਸਨ੍ਤਿ ਯਤੋ ਰਜ੍ਜਤੋ ਤੇਸਂ ਆਗਤਾਨਂ ਮਨੁਸ੍ਸਾਨਂ ਸਬ੍ਬਮ੍ਪਿ ਰਜ੍ਜਂ ਪੋਥੇਤ੍ਵਾ ਚੁਣ੍ਣਵਿਚੁਣ੍ਣਂ ਕਰੇਯ੍ਯਂ.

੯. ਅਪਿ ਚਾਹਂ ਸੀਲਰਕ੍ਖਾਯਾਤਿ ਏਵਂ ਸਮਤ੍ਥੋਪਿ ਚ ਅਹਂ ਅਤ੍ਤਨਿ ਪਤਿਟ੍ਠਿਤਾਯ ਸੀਲਰਕ੍ਖਾਯ ਸੀਲਗੁਤ੍ਤਿਯਾ ਗੁਤ੍ਤੋ ਬਨ੍ਧੋ ਵਿਯ. ਨ ਕਰੋਮਿ ਚਿਤ੍ਤੇ ਅਞ੍ਞਥਤ੍ਤਨ੍ਤਿ ਤਸ੍ਸ ਸੀਲਸ੍ਸ ਅਞ੍ਞਥਤ੍ਤਭੂਤਂ ਤੇਸਂ ਸਤ੍ਤਾਨਂ ਪੋਥਨਾਦਿਵਿਧਿਂ ਮਯ੍ਹਂ ਚਿਤ੍ਤੇ ਨ ਕਰੋਮਿ, ਤਤ੍ਥ ਚਿਤ੍ਤਮ੍ਪਿ ਨ ਉਪ੍ਪਾਦੇਮਿ. ਪਕ੍ਖਿਪਨ੍ਤਂ ਮਮਾਲ਼ਕੇਤਿ ਆਲਾਨਤ੍ਥਮ੍ਭੇ ਪਕ੍ਖਿਪਨ੍ਤਂ, ‘‘ਦਿਸ੍ਵਾਪੀ’’ਤਿ ਵਚਨਸੇਸੋ. ਕਸ੍ਮਾਤਿ ਚੇ, ਸੀਲਪਾਰਮਿਪੂਰਿਯਾ ਈਦਿਸੇਸੁ ਠਾਨੇਸੁ ਸੀਲਂ ਅਖਣ੍ਡੇਨ੍ਤਸ੍ਸ ਮੇ ਨਚਿਰਸ੍ਸੇਵ ਸੀਲਪਾਰਮੀ ਪਰਿਪੂਰੇਸ੍ਸਤੀਤਿ ਸੀਲਪਾਰਮਿਪਰਿਪੂਰਣਤ੍ਥਂ ਤਸ੍ਸ ਅਞ੍ਞਥਤ੍ਤਂ ਚਿਤ੍ਤੇ ਨ ਕਰੋਮੀਤਿ ਯੋਜਨਾ.

੧੦. ‘‘ਯਦਿ ਤੇ ਮ’’ਨ੍ਤਿ ਗਾਥਾਯਪਿ ਸੀਲਰਕ੍ਖਾਯ ਦਲ਼੍ਹਂ ਕਤ੍ਵਾ ਸੀਲਸ੍ਸ ਅਧਿਟ੍ਠਿਤਭਾਵਮੇਵ ਦਸ੍ਸੇਤਿ. ਤਤ੍ਥ ਕੋਟ੍ਟੇਯ੍ਯੁਨ੍ਤਿ ਭਿਨ੍ਦੇਯ੍ਯੁਂ. ਸੀਲਖਣ੍ਡਭਯਾ ਮਮਾਤਿ ਮਮ ਸੀਲਸ੍ਸ ਖਣ੍ਡਨਭਯੇਨ.

ਏਵਂ ਪਨ ਚਿਨ੍ਤੇਤ੍ਵਾ ਬੋਧਿਸਤ੍ਤੇ ਨਿਚ੍ਚਲੇ ਠਿਤੇ ਹਤ੍ਥਾਚਰਿਯੋ ਪਦੁਮਸਰਂ ਓਤਰਿਤ੍ਵਾ ਤਸ੍ਸ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਏਹਿ ਪੁਤ੍ਤਾ’’ਤਿ ਰਜਤਦਾਮਸਦਿਸਾਯ ਸੋਣ੍ਡਾਯ ਗਹੇਤ੍ਵਾ ਸਤ੍ਤਮੇ ਦਿਵਸੇ ਬਾਰਾਣਸਿਂ ਪਾਪੁਣਿ. ਸੋ ਅਨ੍ਤਰਾਮਗ੍ਗੇ ਵਤ੍ਤਮਾਨੋਵ ਰਞ੍ਞੋ ਸਾਸਨਂ ਪੇਸੇਸਿ. ਰਾਜਾ ਨਗਰਂ ਅਲਙ੍ਕਾਰਾਪੇਸਿ. ਹਤ੍ਥਾਚਰਿਯੋ ਬੋਧਿਸਤ੍ਤਂ ਕਤਗਨ੍ਧਪਰਿਭਣ੍ਡਂ ਅਲਙ੍ਕਤਪਟਿਯਤ੍ਤਂ ਹਤ੍ਥਿਸਾਲਂ ਨੇਤ੍ਵਾ ਵਿਚਿਤ੍ਰਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਨਾਨਗ੍ਗਰਸਭੋਜਨਂ ਆਦਾਯ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਦਾਪੇਸਿ. ਸੋ ‘‘ਮਾਤਰਂ ਵਿਨਾ ਗੋਚਰਂ ਨ ਗਣ੍ਹਿਸ੍ਸਾਮੀ’’ਤਿ ਪਿਣ੍ਡਂ ਨ ਗਣ੍ਹਿ. ਯਾਚਿਤੋਪਿ ਅਗ੍ਗਹੇਤ੍ਵਾ –

‘‘ਸਾ ਨੂਨਸਾ ਕਪਣਿਕਾ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ. –

ਆਹ. ਤਂ ਸੁਤ੍ਵਾ ਰਾਜਾ –

‘‘ਕਾ ਨੁ ਤੇ ਸਾ ਮਹਾਨਾਗ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ. – ਪੁਚ੍ਛਿਤ੍ਵਾ –

‘‘ਮਾਤਾ ਮੇ ਸਾ ਮਹਾਰਾਜ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤੀ’’ਤਿ. –

ਵੁਤ੍ਤੇ ਅਜ੍ਜ ਸਤ੍ਤਮੋ ਦਿਵਸੋ ‘‘ਮਾਤਾ ਮੇ ਗੋਚਰਂ ਨ ਲਭਿਤ੍ਥਾ’’ਤਿ ਵਦਤੋ ਇਮਸ੍ਸ ਗੋਚਰਂ ਅਗਣ੍ਹਨ੍ਤਸ੍ਸ. ਤਸ੍ਮਾ –

‘‘ਮੁਞ੍ਚਥੇਤਂ ਮਹਾਨਾਗਂ, ਯੋਯਂ ਭਰਤਿ ਮਾਤਰਂ;

ਸਮੇਤੁ ਮਾਤਰਾ ਨਾਗੋ, ਸਹ ਸਬ੍ਬੇਹਿ ਞਾਤਿਭੀ’’ਤਿ. – ਵਤ੍ਵਾ ਮੁਞ੍ਚਾਪੇਸਿ –

‘‘ਮੁਤ੍ਤੋ ਚ ਬਨ੍ਧਨਾ ਨਾਗੋ, ਮੁਤ੍ਤਦਾਮਾਯ ਕੁਞ੍ਜਰੋ;

ਮੁਹੁਤ੍ਤਂ ਅਸ੍ਸਾਸਯਿਤ੍ਵਾ, ਅਗਮਾ ਯੇਨ ਪਬ੍ਬਤੋ’’ਤਿ.

ਤਤ੍ਥ ਕਪਣਿਕਾਤਿ ਵਰਾਕਾ. ਖਾਣੁਂ ਪਾਦੇਨ ਘਟ੍ਟੇਤੀਤਿ ਅਨ੍ਧਤਾਯ ਪੁਤ੍ਤਵਿਯੋਗਦੁਕ੍ਖੇਨ ਚ ਪਰਿਦੇਵਮਾਨਾ ਤਤ੍ਥ ਤਤ੍ਥ ਰੁਕ੍ਖਕਲ਼ਿਙ੍ਗਰੇ ਪਾਦੇਨ ਘਟ੍ਟੇਤਿ. ਚਣ੍ਡੋਰਣਂ ਪਤੀਤਿ ਚਣ੍ਡੋਰਣਪਬ੍ਬਤਾਭਿਮੁਖੀ, ਤਸ੍ਮਿਂ ਪਬ੍ਬਤਪਾਦੇ ਪਰਿਬ੍ਭਮਮਾਨਾਤਿ ਅਤ੍ਥੋ. ਅਗਮਾ ਯੇਨ ਪਬ੍ਬਤੋਤਿ ਸੋ ਹਤ੍ਥਿਨਾਗੋ ਬਨ੍ਧਨਾ ਮੁਤ੍ਤੋ ਥੋਕਂ ਵਿਸ੍ਸਮਿਤ੍ਵਾ ਰਞ੍ਞੋ ਦਸਰਾਜਧਮ੍ਮਗਾਥਾਹਿ ਧਮ੍ਮਂ ਦੇਸੇਤ੍ਵਾ ‘‘ਅਪ੍ਪਮਤ੍ਤੋ ਹੋਹਿ, ਮਹਾਰਾਜਾ’’ਤਿ ਓਵਾਦਂ ਦਤ੍ਵਾ ਮਹਾਜਨੇਨ ਗਨ੍ਧਮਾਲਾਦੀਹਿ ਪੂਜਿਯਮਾਨੋ ਨਗਰਾ ਨਿਕ੍ਖਮਿਤ੍ਵਾ ਤਦਹੇਵ ਮਾਤਰਾ ਸਮਾਗਨ੍ਤ੍ਵਾ ਸਬ੍ਬਂ ਪਵਤ੍ਤਿਂ ਆਚਿਕ੍ਖਿ. ਸਾ ਤੁਟ੍ਠਮਾਨਸਾ –

‘‘ਚਿਰਂ ਜੀਵਤੁ ਸੋ ਰਾਜਾ, ਕਾਸੀਨਂ ਰਟ੍ਠਵਡ੍ਢਨੋ;

ਯੋ ਮੇ ਪੁਤ੍ਤਂ ਪਮੋਚੇਸਿ, ਸਦਾ ਵੁਦ੍ਧਾਪਚਾਯਿਕ’’ਨ੍ਤਿ. (ਜਾ. ੧.੧੧.੧੨) –

ਰਞ੍ਞੋ ਅਨੁਮੋਦਨਂ ਅਕਾਸਿ. ਰਾਜਾ ਬੋਧਿਸਤ੍ਤਸ੍ਸ ਗੁਣੇ ਪਸੀਦਿਤ੍ਵਾ ਨਲ਼ਿਨਿਯਾ ਅਵਿਦੂਰੇ ਗਾਮਂ ਮਾਪੇਤ੍ਵਾ ਬੋਧਿਸਤ੍ਤਸ੍ਸ ਮਾਤੁ ਚਸ੍ਸ ਨਿਬਦ੍ਧਂ ਵਤ੍ਤਂ ਪਟ੍ਠਪੇਸਿ. ਅਪਰਭਾਗੇ ਬੋਧਿਸਤ੍ਤੋ ਮਾਤਰਿ ਮਤਾਯ ਤਸ੍ਸਾ ਸਰੀਰਪਰਿਹਾਰਂ ਕਤ੍ਵਾ ਕੁਰਣ੍ਡਕਅਸ੍ਸਮਪਦਂ ਨਾਮ ਗਤੋ. ਤਸ੍ਮਿਂ ਪਨ ਠਾਨੇ ਹਿਮਵਨ੍ਤਤੋ ਓਤਰਿਤ੍ਵਾ ਪਞ੍ਚਸਤਾ ਇਸਯੋ ਵਸਿਂਸੁ. ਤਂ ਵਤ੍ਤਂ ਤੇਸਂ ਦਤ੍ਵਾ ਰਾਜਾ ਬੋਧਿਸਤ੍ਤਸ੍ਸ ਸਮਾਨਰੂਪਂ ਸਿਲਾਪਟਿਮਂ ਕਾਰੇਤ੍ਵਾ ਮਹਾਸਕ੍ਕਾਰਂ ਪਵਤ੍ਤੇਸਿ. ਜਮ੍ਬੁਦੀਪਵਾਸਿਨੋ ਅਨੁਸਂਵਚ੍ਛਰਂ ਸਨ੍ਨਿਪਤਿਤ੍ਵਾ ਹਤ੍ਥਿਮਹਂ ਨਾਮ ਕਰਿਂਸੁ.

ਤਦਾ ਰਾਜਾ ਆਨਨ੍ਦੋ ਅਹੋਸਿ, ਹਤ੍ਥਿਨੀ ਮਹਾਮਾਯਾ, ਵਨਚਰਕੋ ਦੇਵਦਤ੍ਤੋ, ਮਾਤੁਪੋਸਕਹਤ੍ਥਿਨਾਗੋ ਲੋਕਨਾਥੋ.

ਇਧਾਪਿ ਦਾਨਪਾਰਮਿਆਦਯੋ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਸੀਲਪਾਰਮੀ ਪਨ ਅਤਿਸਯਵਤੀਤਿ ਸਾ ਏਵ ਦੇਸਨਂ ਆਰੁਲ਼੍ਹਾ. ਤਥਾ ਤਿਰਚ੍ਛਾਨਯੋਨਿਯਂ ਉਪ੍ਪਨ੍ਨੋਪਿ ਬ੍ਰਹ੍ਮਪੁਬ੍ਬਦੇਵਪੁਬ੍ਬਾਚਰਿਯਆਹੁਨੇਯ੍ਯਾਦਿਭਾਵੇਨ ਸਬ੍ਬਞ੍ਞੁਬੁਦ੍ਧੇਨਪਿ ਪਸਤ੍ਥਭਾਵਾਨੁਰੂਪਂ ਮਾਤੁਯਾ ਗਰੁਚਿਤ੍ਤਂ ਉਪਟ੍ਠਪੇਤ੍ਵਾ ‘‘ਮਾਤਾ ਨਾਮੇਸਾ ਪੁਤ੍ਤਸ੍ਸ ਬਹੂਪਕਾਰਾ, ਤਸ੍ਮਾ ਮਾਤੁਪਟ੍ਠਾਨਂ ਨਾਮ ਪਣ੍ਡਿਤੇਨ ਪਞ੍ਞਤ੍ਤ’’ਨ੍ਤਿ ਮਨਸਿ ਕਤ੍ਵਾ ਅਨੇਕੇਸਂ ਹਤ੍ਥਿਸਹਸ੍ਸਾਨਂ ਇਸ੍ਸਰਾਧਿਪਤਿ ਮਹਾਨੁਭਾਵੋ ਯੂਥਪਤਿ ਹੁਤ੍ਵਾ ਤੇਹਿ ਅਨੁਵਤ੍ਤਿਯਮਾਨੋ ਏਕਕਵਿਹਾਰੇ ਅਨ੍ਤਰਾਯਂ ਅਗਣੇਤ੍ਵਾ ਯੂਥਂ ਪਹਾਯ ਏਕਕੋ ਹੁਤ੍ਵਾ ਉਪਕਾਰਿਖੇਤ੍ਤਂ ਪੂਜੇਸ੍ਸਾਮੀਤਿ ਮਾਤੁਪੋਸਨਂ, ਮਗ੍ਗਮੂਲ਼੍ਹਪੁਰਿਸਂ ਦਿਸ੍ਵਾ ਅਨੁਕਮ੍ਪਾਯ ਤਂ ਗਹੇਤ੍ਵਾ ਮਨੁਸ੍ਸਗੋਚਰਸਮ੍ਪਾਪਨਂ, ਤੇਨ ਚ ਕਤਾਪਰਾਧਸਹਨਂ, ਹਤ੍ਥਾਚਰਿਯਪ੍ਪਮੁਖਾਨਂ ਅਤ੍ਤਾਨਂ ਬਨ੍ਧਿਤੁਂ ਆਗਤਪੁਰਿਸਾਨਂ ਸਮਤ੍ਥੋਪਿ ਸਮਾਨੋ ਸਨ੍ਤਾਸਨਮਤ੍ਤੇਨਪਿ ਤੇਸਂ ਪੀਲ਼ਨਾ ਭਵਿਸ੍ਸਤਿ, ਮਯ੍ਹਞ੍ਚ ਸੀਲਸ੍ਸ ਖਣ੍ਡਾਦਿਭਾਵੋਤਿ ਤਥਾ ਅਕਤ੍ਵਾ ਸੁਦਨ੍ਤੇਨ ਓਪਵਯ੍ਹੋ ਵਿਯ ਸੁਖੇਨੇਵ ਗਹਣੂਪਗਮਨਂ, ਮਾਤਰਂ ਵਿਨਾ ਨ ਕਞ੍ਚਿ ਅਜ੍ਝੋਹਰਿਸ੍ਸਾਮੀਤਿ ਸਤ੍ਤਾਹਮ੍ਪਿ ਅਨਾਹਾਰਤਾ, ਇਮਿਨਾਪਾਹਂ ਬਨ੍ਧਾਪਿਤੋਤਿ ਚਿਤ੍ਤਂ ਅਨੁਪ੍ਪਾਦੇਤ੍ਵਾ ਰਾਜਾਨਂ ਮੇਤ੍ਤਾਯ ਫਰਣਂ, ਤਸ੍ਸ ਚ ਨਾਨਾਨਯੇਹਿ ਧਮ੍ਮਦੇਸਨਾਤਿ ਏਵਮਾਦਯੋ ਇਧ ਮਹਾਪੁਰਿਸਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾ. ਤੇਨ ਵੁਤ੍ਤਂ – ‘‘ਏਵਂ ਅਚ੍ਛਰਿਯਾ ਏਤੇ, ਅਬ੍ਭੁਤਾ ਚ ਮਹੇਸਿਨੋ…ਪੇ… ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਮਾਤੁਪੋਸਕਚਰਿਯਾਵਣ੍ਣਨਾ ਨਿਟ੍ਠਿਤਾ.

੨. ਭੂਰਿਦਤ੍ਤਚਰਿਯਾਵਣ੍ਣਨਾ

੧੧. ਦੁਤਿਯੇ ਭੂਰਿਦਤ੍ਤੋਤਿ ਭੂਰਿਸਮਦਤ੍ਤੋ. ਦਤ੍ਤੋਤਿ ਹਿ ਤਦਾ ਬੋਧਿਸਤ੍ਤਸ੍ਸ ਮਾਤਾਪਿਤੂਹਿ ਕਤਂ ਨਾਮਂ. ਯਸ੍ਮਾ ਪਨੇਸੋ ਨਾਗਭਵਨੇ ਵਿਰੂਪਕ੍ਖਮਹਾਰਾਜਭਵਨੇ ਤਾਵਤਿਂਸਭਵਨੇ ਚ ਉਪ੍ਪਨ੍ਨੇ ਪਞ੍ਹੇ ਸਮ੍ਮਦੇਵ ਵਿਨਿਚ੍ਛਿਨਾਤਿ, ਏਕਦਿਵਸਞ੍ਚ ਵਿਰੂਪਕ੍ਖਮਹਾਰਾਜੇ ਨਾਗਪਰਿਸਾਯ ਸਦ੍ਧਿਂ ਤਿਦਸਪੁਰਂ ਗਨ੍ਤ੍ਵਾ ਸਕ੍ਕਂ ਪਰਿਵਾਰੇਤ੍ਵਾ ਨਿਸਿਨ੍ਨੇ ਦੇਵਾਨਮਨ੍ਤਰੇ ਪਞ੍ਹੋ ਸਮੁਟ੍ਠਾਸਿ. ਤਂ ਕੋਚਿ ਕਥੇਤੁਂ ਨਾਸਕ੍ਖਿ. ਸਕ੍ਕੇਨ ਪਨ ਅਨੁਞ੍ਞਾਤੋ ਪਲ੍ਲਙ੍ਕਵਰਗਤੋ ਹੁਤ੍ਵਾ ਮਹਾਸਤ੍ਤੋਵ ਕਥੇਸਿ. ਅਥ ਨਂ ਦੇਵਰਾਜਾ ਦਿਬ੍ਬਗਨ੍ਧਪੁਪ੍ਫੇਹਿ ਪੂਜੇਤ੍ਵਾ ‘‘ਦਤ੍ਤ, ਤ੍ਵਂ ਪਥਵਿਸਮਾਯ ਵਿਪੁਲਾਯ ਪਞ੍ਞਾਯ ਸਮਨ੍ਨਾਗਤੋ ਇਤੋ ਪਟ੍ਠਾਯ ਭੂਰਿਦਤ੍ਤੋ ਨਾਮਾ’’ਤਿ ਆਹ. ਭੂਰੀਤਿ ਹਿ ਪਥਵਿਯਾ ਨਾਮਂ, ਤਸ੍ਮਾ ਭੂਰਿਸਮਤਾਯ ਭੂਤੇ ਅਤ੍ਥੇ ਰਮਤੀਤਿ ਚ ਭੂਰਿਸਙ੍ਖਾਤਾਯ ਮਹਤਿਯਾ ਪਞ੍ਞਾਯ ਸਮਨ੍ਨਾਗਤਤ੍ਤਾ ਮਹਾਸਤ੍ਤੋ ‘‘ਭੂਰਿਦਤ੍ਤੋ’’ਤਿ ਪਞ੍ਞਾਯਿਤ੍ਥ. ਮਹਤਿਯਾ ਪਨ ਨਾਗਿਦ੍ਧਿਯਾ ਸਮਨ੍ਨਾਗਤਤ੍ਤਾ ਮਹਿਦ੍ਧਿਕੋ ਚਾਤਿ.

ਅਤੀਤੇ ਹਿ ਇਮਸ੍ਮਿਂਯੇਵ ਕਪ੍ਪੇ ਬਾਰਾਣਸਿਰਞ੍ਞੋ ਪੁਤ੍ਤੋ ਪਿਤਰਾ ਰਟ੍ਠਤੋ ਪਬ੍ਬਾਜਿਤੋ ਵਨੇ ਵਸਨ੍ਤੋ ਅਞ੍ਞਤਰਾਯ ਨਾਗਮਾਣਵਿਕਾਯ ਸਂਵਾਸਂ ਕਪ੍ਪੇਸਿ. ਤੇਸਂ ਸਂਵਾਸਮਨ੍ਵਾਯ ਦ੍ਵੇ ਦਾਰਕਾ ਜਾਯਿਂਸੁ – ਪੁਤ੍ਤੋ ਚ ਧੀਤਾ ਚ. ਪੁਤ੍ਤਸ੍ਸ ‘‘ਸਾਗਰਬ੍ਰਹ੍ਮਦਤ੍ਤੋ’’ਤਿ ਨਾਮਂ ਕਰਿਂਸੁ ਧੀਤਾਯ ‘‘ਸਮੁਦ੍ਦਜਾ’’ਤਿ. ਸੋ ਅਪਰਭਾਗੇ ਪਿਤੁ ਅਚ੍ਚਯੇਨ ਬਾਰਾਣਸਿਂ ਗਨ੍ਤ੍ਵਾ ਰਜ੍ਜਂ ਕਾਰੇਸਿ. ਅਥ ਧਤਰਟ੍ਠੋ ਨਾਮ ਨਾਗਰਾਜਾ ਪਞ੍ਚਯੋਜਨਸਤਿਕੇ ਨਾਗਭਵਨੇ ਨਾਗਰਜ੍ਜਂ ਕਾਰੇਨ੍ਤੋ ਤਂ ਅਭੂਤਵਾਦਿਕੇਨ ਚਿਤ੍ਤਚੂਲ਼ੇਨ ਨਾਮ ਕਚ੍ਛਪੇਨ ‘‘ਬਾਰਾਣਸਿਰਾਜਾ ਅਤ੍ਤਨੋ ਧੀਤਰਂ ਤੁਯ੍ਹਂ ਦਾਤੁਕਾਮੋ, ਸਾ ਖੋ ਪਨ ਰਾਜਧੀਤਾ ਸਮੁਦ੍ਦਜਾ ਨਾਮ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਚਾ’’ਤਿ ਕਥਿਤਂ ਸੁਤ੍ਵਾ ਧਤਰਟ੍ਠੋ ਚਤ੍ਤਾਰੋ ਨਾਗਮਾਣਵਕੇ ਪੇਸੇਤ੍ਵਾ ਤਂ ਦਾਤੁਂ ਅਨਿਚ੍ਛਨ੍ਤਂ ਨਾਗਵਿਭਿਂਸਿਕਾਯ ਭਿਂਸਾਪੇਤ੍ਵਾ ‘‘ਦਮ੍ਮੀ’’ਤਿ ਵੁਤ੍ਤੇ ਮਹਨ੍ਤਂ ਪਣ੍ਣਾਕਾਰਂ ਪੇਸੇਤ੍ਵਾ ਮਹਤਿਯਾ ਨਾਗਿਦ੍ਧਿਯਾ ਮਹਨ੍ਤੇਨ ਪਰਿਵਾਰੇਨ ਤਸ੍ਸ ਧੀਤਰਂ ਨਾਗਭਵਨਂ ਨੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ.

ਸਾ ਅਪਰਭਾਗੇ ਧਤਰਟ੍ਠਂ ਪਟਿਚ੍ਚ ਸੁਦਸ੍ਸਨੋ, ਦਤ੍ਤੋ, ਸੁਭੋਗੋ, ਅਰਿਟ੍ਠੋਤਿ ਚਤ੍ਤਾਰੋ ਪੁਤ੍ਤੇ ਪਟਿਲਭਿ. ਤੇਸੁ ਦਤ੍ਤੋ ਬੋਧਿਸਤ੍ਤੋ, ਸੋ ਪੁਬ੍ਬੇ ਵੁਤ੍ਤਨਯੇਨੇਵ ਸਕ੍ਕੇਨ ਤੁਟ੍ਠਚਿਤ੍ਤੇਨ ‘‘ਭੂਰਿਦਤ੍ਤੋ’’ਤਿ ਗਹਿਤਨਾਮਤ੍ਤਾ ‘‘ਭੂਰਿਦਤ੍ਤੋ’’ਤ੍ਵੇਵ ਪਞ੍ਞਾਯਿਤ੍ਥ. ਅਥ ਨੇਸਂ ਪਿਤਾ ਯੋਜਨਸਤਿਕਂ ਯੋਜਨਸਤਿਕਂ ਰਜ੍ਜਂ ਭਾਜੇਤ੍ਵਾ ਅਦਾਸਿ. ਮਹਨ੍ਤੋ ਯਸੋ ਅਹੋਸਿ. ਸੋਲ਼ਸਸੋਲ਼ਸਨਾਗਕਞ੍ਞਾਸਹਸ੍ਸਾਨਿ ਪਰਿਵਾਰਯਿਂਸੁ. ਪਿਤੁਪਿ ਏਕਯੋਜਨਸਤਮੇਵ ਰਜ੍ਜਂ ਅਹੋਸਿ. ਤਯੋ ਪੁਤ੍ਤਾ ਮਾਸੇ ਮਾਸੇ ਮਾਤਾਪਿਤਰੋ ਪਸ੍ਸਿਤੁਂ ਆਗਚ੍ਛਨ੍ਤਿ, ਬੋਧਿਸਤ੍ਤੋ ਪਨ ਅਨ੍ਵਦ੍ਧਮਾਸਂ ਆਗਚ੍ਛਤਿ.

ਸੋ ਏਕਦਿਵਸਂ ਵਿਰੂਪਕ੍ਖਮਹਾਰਾਜੇਨ ਸਦ੍ਧਿਂ ਸਕ੍ਕਸ੍ਸ ਉਪਟ੍ਠਾਨਂ ਗਤੋ ਵੇਜਯਨ੍ਤਪਾਸਾਦਂ ਸੁਧਮ੍ਮਦੇਵਸਭਂ ਪਾਰਿਚ੍ਛਤ੍ਤਕਕੋਵਿਲ਼ਾਰਂ ਪਣ੍ਡੁਕਮ੍ਬਲਸਿਲਾਸਨਂ ਦੇਵਚ੍ਛਰਾਪਰਿਵਾਰਂ ਅਤਿਮਨੋਹਰਂ ਸਕ੍ਕਸਮ੍ਪਤ੍ਤਿਂ ਦਿਸ੍ਵਾ ‘‘ਏਤ੍ਤਕਮਤ੍ਤਮ੍ਪਿ ਨਾਗਤ੍ਤਭਾਵੇ ਠਿਤਸ੍ਸ ਦੁਲ੍ਲਭਂ, ਕੁਤੋ ਸਮ੍ਮਾਸਮ੍ਬੋਧੀ’’ਤਿ ਨਾਗਤ੍ਤਭਾਵਂ ਜਿਗੁਚ੍ਛਿਤ੍ਵਾ ‘‘ਨਾਗਭਵਨਂ ਗਨ੍ਤ੍ਵਾ ਉਪੋਸਥਵਾਸਂ ਵਸਿਤ੍ਵਾ ਸੀਲਮੇਵ ਪਗ੍ਗਣ੍ਹਿਸ੍ਸਾਮਿ, ਤਂ ਬੋਧਿਪਰਿਪਾਚਨਂ ਹੋਤਿ, ਇਮਸ੍ਮਿਂ ਦੇਵਲੋਕੇ ਉਪ੍ਪਤ੍ਤਿਕਾਰਣਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਨਾਗਭਵਨਂ ਗਨ੍ਤ੍ਵਾ ਮਾਤਾਪਿਤਰੋ ਆਹ – ‘‘ਅਮ੍ਮਤਾਤਾ, ਅਹਂ ਉਪੋਸਥਕਮ੍ਮਂ ਕਰਿਸ੍ਸਾਮੀ’’ਤਿ. ਤੇਹਿ ‘‘ਇਧੇਵ ਉਪੋਸਥਂ ਉਪਵਸਾਹਿ, ਬਹਿਗਤਾਨਂ ਨਾਗਾਨਂ ਮਹਨ੍ਤਂ ਭਯ’’ਨ੍ਤਿ ਵੁਤ੍ਤੇ ਏਕਵਾਰਂ ਤਥਾ ਕਤ੍ਵਾ ਨਾਗਕਞ੍ਞਾਹਿ ਉਪਦ੍ਦੁਤੋ ਪੁਨਵਾਰੇ ਮਾਤਾਪਿਤੂਨਂ ਅਨਾਰੋਚੇਤ੍ਵਾ ਅਤ੍ਤਨੋ ਭਰਿਯਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਅਹਂ ਮਨੁਸ੍ਸਲੋਕਂ ਗਨ੍ਤ੍ਵਾ ਯਮੁਨਾਤੀਰੇ ਮਹਾਨਿਗ੍ਰੋਧਰੁਕ੍ਖੋ ਅਤ੍ਥਿ ਤਸ੍ਸ ਅਵਿਦੂਰੇ ਵਮ੍ਮਿਕਮਤ੍ਥਕੇ ਭੋਗੇ ਆਭੁਜਿਤ੍ਵਾ ਚਤੁਰਙ੍ਗਸਮਨ੍ਨਾਗਤਂ ਉਪੋਸਥਂ ਅਧਿਟ੍ਠਾਯ ਨਿਪਜ੍ਜਿਤ੍ਵਾ ‘‘ਉਪੋਸਥਕਮ੍ਮਂ ਕਰਿਸ੍ਸਾਮੀ’’ਤਿ ਨਾਗਭਵਨਤੋ ਨਿਕ੍ਖਮਿਤ੍ਵਾ ਤਥਾ ਕਰੋਤਿ. ਤੇਨ ਵੁਤ੍ਤਂ ‘‘ਵਿਰੂਪਕ੍ਖੇਨ ਮਹਾਰਞ੍ਞਾ, ਦੇਵਲੋਕਮਗਞ੍ਛਹ’’ਨ੍ਤਿਆਦਿ.

ਤਤ੍ਥ ਵਿਰੂਪਕ੍ਖੇਨ ਮਹਾਰਞ੍ਞਾਤਿ ਵਿਰੂਪਕ੍ਖੇਨ ਨਾਮ ਨਾਗਾਧਿਪਤਿਮਹਾਰਾਜੇਨ. ਦੇਵਲੋਕਨ੍ਤਿ ਤਾਵਤਿਂਸਦੇਵਲੋਕਂ. ਅਗਞ੍ਛਹਨ੍ਤਿ ਅਗਞ੍ਛਿਂ, ਉਪਸਙ੍ਕਮਿਂ ਅਹਂ.

੧੨. ਤਤ੍ਥਾਤਿ ਤਸ੍ਮਿਂ ਦੇਵਲੋਕੇ. ਪਸ੍ਸਿਂ ਤ੍ਵਾਹਨ੍ਤਿ ਅਦ੍ਦਕ੍ਖਿਂ ਅਹਂ ਤੁ-ਸਦ੍ਦੋ ਨਿਪਾਤਮਤ੍ਤੋ. ਏਕਨ੍ਤਂ ਸੁਖਸਮਪ੍ਪਿਤੇਤਿ ਏਕਨ੍ਤਂ ਅਚ੍ਚਨ੍ਤਮੇਵ ਸੁਖੇਨ ਸਮਙ੍ਗੀਭੂਤੇ. ਵੁਤ੍ਤਞ੍ਹੇਤਂ ਭਗਵਤਾ – ‘‘ਸਨ੍ਤਿ, ਭਿਕ੍ਖਵੇ, ਛ ਫਸ੍ਸਾਯਤਨਿਕਾ ਨਾਮ ਸਗ੍ਗਾ. ਯਾਵਞ੍ਚਿਦਂ, ਭਿਕ੍ਖਵੇ, ਨ ਸੁਕਰਂ ਅਕ੍ਖਾਨੇਨ ਪਾਪੁਣਿਤੁਂ ਯਾਵ ਸੁਖਾ ਸਗ੍ਗਾ’’ਤਿ (ਮ. ਨਿ. ੩.੨੫੫) ਚ. ਤਂਸਗ੍ਗਗਮਨਤ੍ਥਾਯਾਤਿ ਤਸ੍ਮਿਂ ਸਗ੍ਗਸ੍ਮਿਂ ਉਪ੍ਪਤ੍ਤਿਵਸੇਨ ਗਮਨਤ੍ਥਾਯ. ਸੀਲਬ੍ਬਤਨ੍ਤਿ ਸੀਲਸਙ੍ਖਾਤਂ ਵਤਂ. ਅਥ ਵਾ ਸੀਲਬ੍ਬਤਨ੍ਤਿ ਉਪੋਸਥਸੀਲਞ੍ਚੇਵ ‘‘ਮਮ ਚਮ੍ਮਂ ਚਮ੍ਮਤ੍ਥਿਕਾ ਹਰਨ੍ਤੂ’’ਤਿਆਦਿਨਾ ਅਤ੍ਤਨੋ ਸਰੀਰਾਵਯਵਪਰਿਚ੍ਚਾਗਸਮਾਦਿਯਨਸਙ੍ਖਾਤਂ ਵਤਞ੍ਚ.

੧੩. ਸਰੀਰਕਿਚ੍ਚਨ੍ਤਿ ਮੁਖਧੋਵਨਾਦਿਸਰੀਰਪਟਿਜਗ੍ਗਨਂ. ਭੁਤ੍ਵਾ ਯਾਪਨਮਤ੍ਤਕਨ੍ਤਿ ਇਨ੍ਦ੍ਰਿਯਾਨਿ ਨਿਬ੍ਬਿਸੇਵਨਾਨਿ ਕਾਤੁਂ ਸਰੀਰਟ੍ਠਿਤਿਮਤ੍ਤਕਂ ਆਹਾਰਂ ਆਹਰਿਤ੍ਵਾ. ਚਤੁਰੋ ਅਙ੍ਗੇਤਿ ਚਤ੍ਤਾਰਿ ਅਙ੍ਗਾਨਿ. ਅਧਿਟ੍ਠਾਯਾਤਿ ਅਧਿਟ੍ਠਹਿਤ੍ਵਾ. ਸੇਮੀਤਿ ਸਯਾਮਿ.

੧੪. ਛਵਿਯਾਤਿਆਦਿ ਤੇਸਂ ਚਤੁਨ੍ਨਂ ਅਙ੍ਗਾਨਂ ਦਸ੍ਸਨਂ. ਤਤ੍ਥ ਚ ਛਵਿਚਮ੍ਮਾਨਂ ਵਿਸ੍ਸਜ੍ਜਨਂ ਏਕਂ ਅਙ੍ਗਂ, ਸੇਸਾਨਿ ਏਕੇਕਮੇਵ, ਮਂਸਗ੍ਗਹਣੇਨੇਵ ਚੇਤ੍ਥ ਰੁਧਿਰਮ੍ਪਿ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਏਤੇਨਾਤਿ ਏਤੇਹਿ. ਹਰਾਤੁ ਸੋਤਿ ਯਸ੍ਸ ਏਤੇਹਿ ਛਵਿਆਦੀਹਿ ਕਰਣੀਯਂ ਅਤ੍ਥਿ, ਤਸ੍ਸ ਮਯਾ ਦਿਨ੍ਨਮੇਵੇਤਂ. ਸਬ੍ਬਂ ਸੋ ਹਰਤੂਤਿ ਅਤ੍ਤਨੋ ਅਤ੍ਤਭਾਵੇ ਅਨਪੇਕ੍ਖਪਵਾਰਣਂ ਪਵਾਰੇਤਿ.

ਏਵਂ ਮਹਾਸਤ੍ਤਸ੍ਸ ਇਮਿਨਾ ਨਿਯਾਮੇਨੇਵ ਅਨ੍ਵਦ੍ਧਮਾਸਂ ਉਪੋਸਥਕਮ੍ਮਂ ਕਰੋਨ੍ਤਸ੍ਸ ਦੀਘੋ ਅਦ੍ਧਾ ਵੀਤਿਵਤ੍ਤੋ. ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਅਞ੍ਞਤਰੋ ਨੇਸਾਦਬ੍ਰਾਹ੍ਮਣੋ ਸੋਮਦਤ੍ਤੇਨ ਨਾਮ ਅਤ੍ਤਨੋ ਪੁਤ੍ਤੇਨ ਸਹ ਤਂ ਠਾਨਂ ਪਤ੍ਵਾ ਅਰੁਣੁਗ੍ਗਮਨਸਮਯੇ ਨਾਗਕਞ੍ਞਾਹਿ ਪਰਿਵਾਰਿਯਮਾਨਂ ਮਹਾਸਤ੍ਤਂ ਦਿਸ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਤਾਵਦੇਵ ਨਾਗਕਞ੍ਞਾਯੋ ਪਥਵਿਯਂ ਨਿਮੁਜ੍ਜਿਤ੍ਵਾ ਨਾਗਭਵਨਮੇਵ ਗਤਾ. ਬ੍ਰਾਹ੍ਮਣੋ ਮਹਾਸਤ੍ਤਂ ਪੁਚ੍ਛਿ – ‘‘ਕੋ ਨੁ ਖੋ ਤ੍ਵਂ, ਮਾਰਿਸ, ਦੇਵੋ ਵਾ ਯਕ੍ਖੋ ਵਾ ਨਾਗੋ ਵਾ’’ਤਿ? ਬੋਧਿਸਤ੍ਤੋ ਯਥਾਭੂਤਂ ਅਤ੍ਤਾਨਂ ਆਵਿ ਕਤ੍ਵਾ ਸਚਾਯਂ ਇਤੋ ਗਚ੍ਛੇਯ੍ਯ, ਇਧ ਮੇ ਵਾਸਂ ਮਹਾਜਨਸ੍ਸ ਪਾਕਟਂ ਕਰੇਯ੍ਯ, ਤੇਨ ਮੇ ਉਪੋਸਥਵਾਸਸ੍ਸ ਅਨ੍ਤਰਾਯੋਪਿ ਸਿਯਾ. ਯਂਨੂਨਾਹਂ ਇਤੋ ਇਮਂ ਨਾਗਭਵਨਂ ਨੇਤ੍ਵਾ ਮਹਤਿਯਾ ਸਮ੍ਪਤ੍ਤਿਯਾ ਯੋਜੇਯ੍ਯਂ. ਏਵਾਯਂ ਤਤ੍ਥੇਵ ਅਭਿਰਮਿਸ੍ਸਤਿ, ਤੇਨ ਮੇ ਉਪੋਸਥਕਮ੍ਮਂ ਅਦ੍ਧਨਿਯਂ ਸਿਯਾਤਿ. ਅਥ ਨਂ ਆਹ – ‘‘ਬ੍ਰਾਹ੍ਮਣ, ਮਹਨ੍ਤਂ ਤੇ ਯਸਂ ਦਸ੍ਸਾਮਿ, ਰਮਣੀਯਂ ਨਾਗਭਵਨਂ, ਏਹਿ ਤਤ੍ਥ ਗਚ੍ਛਾਮਾ’’ਤਿ. ਸਾਮਿ, ਪੁਤ੍ਤੋ ਮੇ ਅਤ੍ਥਿ, ਤਸ੍ਮਿਂ ਆਗਚ੍ਛਨ੍ਤੇ ਆਗਮਿਸ੍ਸਾਮੀਤਿ. ਗਚ੍ਛ, ਬ੍ਰਾਹ੍ਮਣ, ਪੁਤ੍ਤਂ ਆਨੇਹੀਤਿ. ਬ੍ਰਾਹ੍ਮਣੋ ਗਨ੍ਤ੍ਵਾ ਪੁਤ੍ਤਸ੍ਸ ਤਮਤ੍ਥਂ ਆਰੋਚੇਤ੍ਵਾ ਤਂ ਆਨੇਸਿ. ਮਹਾਸਤ੍ਤੋ ਤੇ ਉਭੋਪਿ ਆਦਾਯ ਅਤ੍ਤਨੋ ਆਨੁਭਾਵੇਨ ਨਾਗਭਵਨਂ ਆਨੇਸਿ. ਤੇਸਂ ਤਤ੍ਥ ਦਿਬ੍ਬੋ ਅਤ੍ਤਭਾਵੋ ਪਾਤੁਭਵਿ. ਅਥ ਤੇਸਂ ਮਹਾਸਤ੍ਤੋ ਦਿਬ੍ਬਸਮ੍ਪਤ੍ਤਿਂ ਦਤ੍ਵਾ ਚਤ੍ਤਾਰਿ ਚਤ੍ਤਾਰਿ ਨਾਗਕਞ੍ਞਾਸਤਾਨਿ ਅਦਾਸਿ. ਤੇ ਮਹਤਿਂ ਸਮ੍ਪਤ੍ਤਿਂ ਅਨੁਭਵਿਂਸੁ.

ਬੋਧਿਸਤ੍ਤੋਪਿ ਅਪ੍ਪਮਤ੍ਤੋ ਉਪੋਸਥਕਮ੍ਮਂ ਕਰੋਤਿ. ਅਨ੍ਵਦ੍ਧਮਾਸਂ ਮਾਤਾਪਿਤੂਨਂ ਉਪਟ੍ਠਾਨਂ ਗਨ੍ਤ੍ਵਾ ਧਮ੍ਮਕਥਂ ਕਥੇਤ੍ਵਾ ਤਤੋ ਚ ਬ੍ਰਾਹ੍ਮਣਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਰੋਗ੍ਯਂ ਪੁਚ੍ਛਿਤ੍ਵਾ ‘‘ਯੇਨ ਤੇ ਅਤ੍ਥੋ, ਤਂ ਵਦੇਯ੍ਯਾਸੀ’’ਤਿ ਆਪੁਚ੍ਛਿਤ੍ਵਾ ‘‘ਅਨੁਕ੍ਕਣ੍ਠਮਾਨੋ ਅਭਿਰਮਾ’’ਤਿ ਵਤ੍ਵਾ ਸੋਮਦਤ੍ਤੇਨਪਿ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਅਤ੍ਤਨੋ ਨਿਵੇਸਨਂ ਗਚ੍ਛਤਿ. ਬ੍ਰਾਹ੍ਮਣੋ ਸਂਵਚ੍ਛਰਂ ਤਤ੍ਥ ਵਸਿਤ੍ਵਾ ਮਨ੍ਦਪੁਞ੍ਞਤਾਯ ਉਕ੍ਕਣ੍ਠਿਤ੍ਵਾ ਅਨਿਚ੍ਛਮਾਨਮ੍ਪਿ ਪੁਤ੍ਤਂ ਗਹੇਤ੍ਵਾ ਬੋਧਿਸਤ੍ਤਂ ਆਪੁਚ੍ਛਿਤ੍ਵਾ ਤੇਨ ਦੀਯਮਾਨਂ ਬਹੁਂ ਧਨਂ ਸਬ੍ਬਕਾਮਦਦਂ ਮਣਿਰਤਨਮ੍ਪਿ ਅਲਕ੍ਖਿਕਤਾਯ ਅਗ੍ਗਹੇਤ੍ਵਾ ‘‘ਮਨੁਸ੍ਸਲੋਕਂ ਗਨ੍ਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਆਹ. ਮਹਾਸਤ੍ਤੋ ਨਾਗਮਾਣਵਕੇ ਆਣਾਪੇਤ੍ਵਾ ਤਂ ਸਪੁਤ੍ਤਕਂ ਮਨੁਸ੍ਸਲੋਕਂ ਪਾਪੇਸਿ. ਤੇ ਉਭੋਪਿ ਦਿਬ੍ਬਾਭਰਣਾਨਿ ਦਿਬ੍ਬਵਤ੍ਥਾਨਿ ਚ ਓਮੁਞ੍ਚਿਤ੍ਵਾ ਨ੍ਹਾਯਿਤੁਂ ਏਕਂ ਪੋਕ੍ਖਰਣਿਂ ਓਤਰਿਂਸੁ, ਤਸ੍ਮਿਂ ਖਣੇ ਤਾਨਿ ਅਨ੍ਤਰਧਾਯਿਤ੍ਵਾ ਨਾਗਭਵਨਮੇਵ ਅਗਮਂਸੁ. ਅਥ ਪਠਮਨਿਵਤ੍ਥਕਾਸਾਵਪਿਲੋਤਿਕਾਵ ਸਰੀਰੇ ਪਟਿਮੁਞ੍ਚਿ, ਧਨੁਸਰਸਤ੍ਤਿਯੋ ਗਹੇਤ੍ਵਾ ਅਰਞ੍ਞਂ ਗਨ੍ਤ੍ਵਾ ਮਿਗੇ ਵਧਿਤ੍ਵਾ ਪੁਰਿਮਨਿਯਾਮੇਨੇਵ ਜੀਵਿਕਂ ਕਪ੍ਪੇਸੁਂ.

ਤੇਨ ਚ ਸਮਯੇਨ ਅਞ੍ਞਤਰੋ ਤਾਪਸੋ ਸੁਪਣ੍ਣਰਾਜਤੋ ਲਦ੍ਧਂ ਅਲਮ੍ਪਾਯਨਮਨ੍ਤਂ ਤਸ੍ਸ ਅਨੁਚ੍ਛਵਿਕਾਨਿ ਓਸਧਾਨਿ ਮਨ੍ਤੂਪਚਾਰਞ੍ਚ ਅਤ੍ਤਾਨਂ ਉਪਟ੍ਠਹਨ੍ਤਸ੍ਸ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਅਦਾਸਿ. ਸੋ ‘‘ਲਦ੍ਧੋ ਮੇ ਜੀਵਿਕੂਪਾਯੋ’’ਤਿ ਕਤਿਪਾਹਂ ਵਸਿਤ੍ਵਾ ਤਾਪਸਂ ਆਪੁਚ੍ਛਿਤ੍ਵਾ ਪਕ੍ਕਮਨ੍ਤੋ ਅਨੁਪੁਬ੍ਬੇਨ ਯਮੁਨਾਤੀਰਂ ਪਤ੍ਵਾ ਤਂ ਮਨ੍ਤਂ ਸਜ੍ਝਾਯਨ੍ਤੋ ਮਹਾਮਗ੍ਗੇਨ ਗਚ੍ਛਤਿ. ਤਦਾ ਬੋਧਿਸਤ੍ਤਸ੍ਸ ਭਵਨਤੋ ਤਸ੍ਸ ਪਰਿਚਾਰਿਕਾ ਨਾਗਮਾਣਵਿਕਾ ਤਂ ਸਬ੍ਬਕਾਮਦਦਂ ਮਣਿਰਤਨਂ ਆਦਾਯ ਯਮੁਨਾਤੀਰੇ ਵਾਲੁਕਾਰਾਸਿਮਤ੍ਥਕੇ ਠਪੇਤ੍ਵਾ ਤਸ੍ਸੋਭਾਸੇਨ ਰਤ੍ਤਿਯਂ ਕੀਲ਼ਿਤ੍ਵਾ ਅਰੁਣੁਗ੍ਗਮਨੇ ਤਸ੍ਸ ਬ੍ਰਾਹ੍ਮਣਸ੍ਸ ਮਨ੍ਤਸਦ੍ਦਂ ਸੁਤ੍ਵਾ ‘‘ਸੁਪਣ੍ਣੋ’’ਤਿ ਸਞ੍ਞਾਯ ਭਯਤਜ੍ਜਿਤਾ ਮਣਿਰਤਨਂ ਅਗ੍ਗਹੇਤ੍ਵਾ ਪਥਵਿਯਂ ਨਿਮੁਜ੍ਜਿਤ੍ਵਾ ਨਾਗਭਵਨਂ ਅਗਮਂਸੁ.

ਬ੍ਰਾਹ੍ਮਣੋ ਤਂ ਮਣਿਰਤਨਂ ਆਦਾਯ ਪਾਯਾਸਿ. ਤਸ੍ਮਿਂ ਖਣੇ ਸੋ ਨੇਸਾਦਬ੍ਰਾਹ੍ਮਣੋ ਪੁਤ੍ਤੇਨ ਸਦ੍ਧਿਂ ਮਿਗਵਧਾਯ ਅਰਞ੍ਞਂ ਗਚ੍ਛਨ੍ਤੋ ਤਸ੍ਸ ਹਤ੍ਥੇ ਤਂ ਮਣਿਰਤਨਂ ਦਿਸ੍ਵਾ ‘‘ਇਦਂ ਭੂਰਿਦਤ੍ਤਸ੍ਸ ਸਬ੍ਬਕਾਮਦਦਂ ਮਣਿਰਤਨ’’ਨ੍ਤਿ ਸਞ੍ਜਾਨਿਤ੍ਵਾ ਤਂ ਗਣ੍ਹਿਤੁਕਾਮੋ ਤੇਨ ਸਦ੍ਧਿਂ ਅਲ੍ਲਾਪਸਲ੍ਲਾਪਂ ਕਤ੍ਵਾ ਮਨ੍ਤਵਾਦਿਭਾਵਂ ਜਾਨਿਤ੍ਵਾ ਏਵਮਾਹ – ‘‘ਸਚੇ ਮੇ ਤ੍ਵਂ ਇਮਂ ਮਣਿਰਤਨਂ ਦਸ੍ਸਸਿ, ਏਵਾਹਂ ਤੇ ਮਹਾਨੁਭਾਵਂ ਨਾਗਂ ਦਸ੍ਸੇਸ੍ਸਾਮਿ, ਯਂ ਤ੍ਵਂ ਗਹੇਤ੍ਵਾ ਗਾਮਨਿਗਮਰਾਜਧਾਨਿਯੋ ਚਰਨ੍ਤੋ ਬਹੁਧਨਂ ਲਚ੍ਛਸੀ’’ਤਿ. ‘‘ਤੇਨ ਹਿ ਦਸ੍ਸੇਤ੍ਵਾ ਗਣ੍ਹਾਹੀ’’ਤਿ ਵੁਤ੍ਤੇ ਤਂ ਆਦਾਯ ਬੋਧਿਸਤ੍ਤਂ ਉਪੋਸਥਕਰਣਟ੍ਠਾਨੇ ਵਮ੍ਮਿਕਮਤ੍ਥਕੇ ਭੋਗੇ ਆਭੁਜਿਤ੍ਵਾ ਨਿਪਨ੍ਨਂ ਅਵਿਦੂਰੇ ਠਿਤੋ ਹਤ੍ਥਂ ਪਸਾਰੇਤ੍ਵਾ ਦਸ੍ਸੇਸਿ.

ਮਹਾਸਤ੍ਤੋ ਤਂ ਨੇਸਾਦਂ ਦਿਸ੍ਵਾ ‘‘ਅਯਂ ਉਪੋਸਥਸ੍ਸ ਮੇ ਅਨ੍ਤਰਾਯਂ ਕਰੇਯ੍ਯਾਤਿ ਨਾਗਭਵਨਂ ਨੇਤ੍ਵਾ ਮਹਾਸਮ੍ਪਤ੍ਤਿਯਂ ਪਤਿਟ੍ਠਾਪਿਤੋਪਿ ਨ ਇਚ੍ਛਿ. ਤਤੋ ਅਪਕ੍ਕਮਿਤ੍ਵਾ ਸਯਂ ਗਨ੍ਤੁਕਾਮੋ ਮਯਾ ਦੀਯਮਾਨਮ੍ਪਿ ਮਣਿਰਤਨਂ ਗਣ੍ਹਿਤੁਂ ਨ ਇਚ੍ਛਿ. ਇਦਾਨਿ ਪਨ ਅਹਿਗੁਣ੍ਡਿਕਂ ਗਹੇਤ੍ਵਾ ਆਗਚ੍ਛਤਿ. ਸਚਾਹਂ ਇਮਸ੍ਸ ਮਿਤ੍ਤਦੁਬ੍ਭਿਨੋ ਕੁਜ੍ਝੇਯ੍ਯਂ, ਸੀਲਂ ਮੇ ਖਣ੍ਡਂ ਭਵਿਸ੍ਸਤਿ. ਮਯਾ ਖੋ ਪਨ ਪਠਮਂਯੇਵ ਚਤੁਰਙ੍ਗਸਮਨ੍ਨਾਗਤੋ ਉਪੋਸਥੋ ਅਧਿਟ੍ਠਿਤੋ, ਸੋ ਯਥਾਧਿਟ੍ਠਿਤੋਵ ਹੋਤੁ. ਅਲਮ੍ਪਾਯਨੋ ਮਂ ਛਿਨ੍ਦਤੁ ਵਾ ਮਾ ਵਾ, ਨੇਵਸ੍ਸ ਕੁਜ੍ਝਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਕ੍ਖੀਨਿ ਨਿਮ੍ਮੀਲੇਤ੍ਵਾ ਅਧਿਟ੍ਠਾਨਪਾਰਮਿਂ ਪੁਰੇਚਾਰਿਕਂ ਕਤ੍ਵਾ ਭੋਗਨ੍ਤਰੇ ਸੀਸਂ ਪਕ੍ਖਿਪਿਤ੍ਵਾ ਨਿਚ੍ਚਲੋਵ ਹੁਤ੍ਵਾ ਨਿਪਜ੍ਜਿ. ਨੇਸਾਦਬ੍ਰਾਹ੍ਮਣੋਪਿ ‘‘ਭੋ ਅਲਮ੍ਪਾਯਨ, ਇਮਂ ਨਾਗਂ ਗਣ੍ਹ, ਮਣਿਂ ਮੇ ਦੇਹੀ’’ਤਿ ਆਹ. ਅਲਮ੍ਪਾਯਨੋ ਨਾਗਂ ਦਿਸ੍ਵਾ ਤੁਟ੍ਠੋ ਮਣਿਂ ਕਿਸ੍ਮਿਞ੍ਚਿ ਅਗਣੇਤ੍ਵਾ ‘‘ਗਣ੍ਹ, ਬ੍ਰਾਹ੍ਮਣਾ’’ਤਿ ਹਤ੍ਥੇ ਖਿਪਿ. ਸੋ ਤਸ੍ਸ ਹਤ੍ਥਤੋ ਭਸ੍ਸਿਤ੍ਵਾ ਪਥਵਿਯਂ ਪਤਿਤਮਤ੍ਤੋਵ ਪਥਵਿਂ ਪਵਿਸਿਤ੍ਵਾ ਨਾਗਭਵਨਮੇਵ ਗਤੋ. ਨੇਸਾਦਬ੍ਰਾਹ੍ਮਣੋ ਮਣਿਰਤਨਤੋ ਭੂਰਿਦਤ੍ਤੇਨ ਸਦ੍ਧਿਂ ਮਿਤ੍ਤਭਾਵਤੋ ਚ ਪਰਿਹਾਯਿਤ੍ਵਾ ਨਿਪ੍ਪਚ੍ਚਯੋਵ ਪਕ੍ਕਨ੍ਤੋ.

੧੫. ਅਲਮ੍ਪਾਯਨੋਪਿ ਮਹਾਨੁਭਾਵੇਹਿ ਓਸਧੇਹਿ ਅਤ੍ਤਨੋ ਸਰੀਰਂ ਮਕ੍ਖੇਤ੍ਵਾ ਥੋਕਂ ਖਾਦਿਤ੍ਵਾ ਖੇਲ਼ਂ ਅਤ੍ਤਨੋ ਕਾਯਸ੍ਮਿਂ ਪਰਿਭਾਵੇਤ੍ਵਾ ਦਿਬ੍ਬਮਨ੍ਤਂ ਜਪ੍ਪਨ੍ਤੋ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਨਙ੍ਗੁਟ੍ਠੇ ਗਹੇਤ੍ਵਾ ਆਕਡ੍ਢਿਤ੍ਵਾ ਸੀਸੇ ਦਲ਼੍ਹਂ ਗਣ੍ਹਨ੍ਤੋ ਮੁਖਮਸ੍ਸ ਵਿਵਰਿਤ੍ਵਾ ਓਸਧਂ ਖਾਦਿਤ੍ਵਾ ਮੁਖੇ ਸਹਖੇਲ਼ਂ ਓਸਿਞ੍ਚਿ. ਸੁਚਿਜਾਤਿਕੋ ਮਹਾਸਤ੍ਤੋ ਸੀਲਭੇਦਭਯੇਨ ਅਕੁਜ੍ਝਿਤ੍ਵਾ ਅਕ੍ਖੀਨਿ ਨ ਉਮ੍ਮੀਲੇਸਿ. ਅਥ ਨਂ ਓਸਧਮਨ੍ਤਬਲੇਨ ਨਙ੍ਗੁਟ੍ਠੇ ਗਹੇਤ੍ਵਾ ਹੇਟ੍ਠਾ ਸੀਸਂ ਕਤ੍ਵਾ ਸਞ੍ਚਾਲੇਤ੍ਵਾ ਗਹਿਤਗੋਚਰਂ ਛਡ੍ਡਾਪੇਤ੍ਵਾ ਭੂਮਿਯਂ ਦੀਘਸੋ ਨਿਪਜ੍ਜਾਪੇਤ੍ਵਾ ਮਸੂਰਕਂ ਮਦ੍ਦਨ੍ਤੋ ਵਿਯ ਹਤ੍ਥੇਹਿ ਪਰਿਮਦ੍ਦਿ. ਅਟ੍ਠੀਨਿ ਚੁਣ੍ਣਿਯਮਾਨਾਨਿ ਵਿਯ ਅਹੇਸੁਂ.

ਪੁਨ ਨਙ੍ਗੁਟ੍ਠੇ ਗਹੇਤ੍ਵਾ ਦੁਸ੍ਸਂ ਪੋਥੇਨ੍ਤੋ ਵਿਯ ਪੋਥੇਸਿ. ਮਹਾਸਤ੍ਤੋ ਏਵਰੂਪਂ ਦੁਕ੍ਖਂ ਅਨੁਭੋਨ੍ਤੋਪਿ ਨੇਵ ਕੁਜ੍ਝਿਤ੍ਥ. ਅਞ੍ਞਦਤ੍ਥੁ ਅਤ੍ਤਨੋ ਸੀਲਮੇਵ ਆਵਜ੍ਜੇਸਿ. ਇਤਿ ਸੋ ਮਹਾਸਤ੍ਤਂ ਦੁਬ੍ਬਲਂ ਕਤ੍ਵਾ ਵਲ੍ਲੀਹਿ ਪੇਲ਼ਂ ਸਜ੍ਜੇਤ੍ਵਾ ਮਹਾਸਤ੍ਤਂ ਤਤ੍ਥ ਪਕ੍ਖਿਪਿ. ਸਰੀਰਂ ਪਨਸ੍ਸ ਮਹਨ੍ਤਂ ਤਤ੍ਥ ਨ ਪਵਿਸਤਿ. ਅਥ ਨਂ ਪਣ੍ਹਿਯਾ ਕੋਟ੍ਟੇਨ੍ਤੋ ਪਵੇਸੇਤ੍ਵਾ ਪੇਲ਼ਂ ਆਦਾਯ ਏਕਂ ਗਾਮਂ ਗਨ੍ਤ੍ਵਾ ਗਾਮਮਜ੍ਝੇ ਓਤਾਰੇਤ੍ਵਾ ‘‘ਨਾਗਸ੍ਸ ਨਚ੍ਚਂ ਦਟ੍ਠੁਕਾਮਾ ਆਗਚ੍ਛਨ੍ਤੂ’’ਤਿ ਸਦ੍ਦਮਕਾਸਿ. ਸਕਲਗਾਮਵਾਸਿਨੋ ਸਨ੍ਨਿਪਤਿਂਸੁ. ਤਸ੍ਮਿਂ ਖਣੇ ਅਲਮ੍ਪਾਯਨੋ ‘‘ਨਿਕ੍ਖਮ ਮਹਾਨਾਗਾ’’ਤਿ ਆਹ. ਮਹਾਸਤ੍ਤੋ ਚਿਨ੍ਤੇਸਿ – ‘‘ਅਜ੍ਜ ਮਯਾ ਪਰਿਸਂ ਤੋਸੇਨ੍ਤੇਨ ਕੀਲ਼ਿਤੁਂ ਵਟ੍ਟਤਿ, ਏਵਂ ਅਲਮ੍ਪਾਯਨੋ ਬਹੁਧਨਂ ਲਭਿਤ੍ਵਾ ਤੁਟ੍ਠੋ ਮਂ ਵਿਸ੍ਸਜ੍ਜੇਸ੍ਸਤਿ, ਯਂ ਯਂ ਏਸ ਮਂ ਕਾਰੇਤਿ, ਤਂ ਤਂ ਕਰਿਸ੍ਸਾਮੀ’’ਤਿ.

ਅਥ ਨਂ ਸੋ ਪੇਲ਼ਤੋ ਨਿਕ੍ਖਮਨ੍ਤਂ ‘‘ਮਹਾ ਹੋਹੀ’’ਤਿ ਆਹ, ਸੋ ਮਹਾ ਅਹੋਸਿ. ‘‘ਖੁਦ੍ਦਕੋ ਵਟ੍ਟੋ ਵਿਫਣੋ ਏਕਫਣੋ ਦ੍ਵਿਫਣੋ ਯਾਵ ਸਹਸ੍ਸਫਣੋ ਉਚ੍ਚੋ ਨੀਚੋ ਦਿਸ੍ਸਮਾਨਕਾਯੋ ਅਦਿਸ੍ਸਮਾਨਕਾਯੋ ਦਿਸ੍ਸਮਾਨਉਪਡ੍ਢਕਾਯੋ ਨੀਲੋ ਪੀਤੋ ਲੋਹਿਤੋ ਓਦਾਤੋ ਮਞ੍ਜਿਟ੍ਠੋ ਹੋਹਿ, ਧੂਮਂ ਵਿਸ੍ਸਜ੍ਜੇਹਿ, ਜਾਲਸਿਖਂ ਉਦਕਞ੍ਚ ਵਿਸ੍ਸਜ੍ਜੇਹੀ’’ਤਿ ਵੁਤ੍ਤੇ ਤੇਨ ਵੁਤ੍ਤਂ ਤਂ ਤਂ ਆਕਾਰਂ ਨਿਮ੍ਮਿਨਿਤ੍ਵਾ ਨਚ੍ਚਂ ਦਸ੍ਸੇਸਿ. ਤਂ ਦਿਸ੍ਵਾ ਮਨੁਸ੍ਸਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਬਹੁਂ ਹਿਰਞ੍ਞਸੁਵਣ੍ਣਵਤ੍ਥਾਲਙ੍ਕਾਰਾਦਿਂ ਅਦਂਸੁ. ਇਤਿ ਤਸ੍ਮਿਂ ਗਾਮੇ ਸਤਸਹਸ੍ਸਮਤ੍ਤਂ ਲਭਿ. ਸੋ ਕਿਞ੍ਚਾਪਿ ਮਹਾਸਤ੍ਤਂ ਗਣ੍ਹਨ੍ਤੋ ‘‘ਸਹਸ੍ਸਂ ਲਭਿਤ੍ਵਾ ਤਂ ਵਿਸ੍ਸਜ੍ਜੇਸ੍ਸਾਮੀ’’ਤਿ ਆਹ. ਤਂ ਪਨ ਧਨਂ ਲਭਿਤ੍ਵਾ ‘‘ਗਾਮਕੇਪਿ ਤਾਵ ਮਯਾ ਏਤ੍ਤਕਂ ਧਨਂ ਲਦ੍ਧਂ, ਨਗਰੇ ਕਿਰ ਬਹੁਧਨਂ ਲਭਿਸ੍ਸਾਮੀ’’ਤਿ ਧਨਲੋਭੇਨ ਨ ਮੁਞ੍ਚਿ.

ਸੋ ਤਸ੍ਮਿਂ ਗਾਮੇ ਕੁਟੁਮ੍ਬਂ ਸਣ੍ਠਪੇਤ੍ਵਾ ਰਤਨਮਯਂ ਪੇਲ਼ਂ ਕਾਰੇਤ੍ਵਾ ਤਤ੍ਥ ਮਹਾਸਤ੍ਤਂ ਪਕ੍ਖਿਪਿਤ੍ਵਾ ਸੁਖਯਾਨਕਂ ਆਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਗਾਮਨਿਗਮਰਾਜਧਾਨੀਸੁ ਤਂ ਕੀਲ਼ਾਪੇਤ੍ਵਾ ਬਾਰਾਣਸਿਂ ਪਾਪੁਣਿ, ਨਾਗਰਾਜਸ੍ਸ ਮਧੁਲਾਜਂ ਦੇਤਿ, ਅਬਦ੍ਧਸਤ੍ਤੁਞ੍ਚ ਦੇਤਿ. ਸੋ ਗੋਚਰਂ ਨ ਗਣ੍ਹਿ ਅਵਿਸ੍ਸਜ੍ਜਨਭਯੇਨ. ਗੋਚਰਂ ਅਗਣ੍ਹਨ੍ਤਮ੍ਪਿ ਚ ਨਂ ਚਤ੍ਤਾਰੋ ਨਗਰਦ੍ਵਾਰੇ ਆਦਿਂ ਕਤ੍ਵਾ ਤਤ੍ਥ ਤਤ੍ਥ ਮਾਸਮਤ੍ਤਂ ਕੀਲ਼ਾਪੇਸਿ. ਤੇਨ ਵੁਤ੍ਤਂ ‘‘ਸਂਸਿਤੋ ਅਕਤਞ੍ਞੁਨਾ’’ਤਿਆਦਿ.

ਤਤ੍ਥ ਸਂਸਿਤੋਤਿ ਏਸੋ ਨਾਗੋ ਅਮੁਕਸ੍ਸ ਨਿਗ੍ਰੋਧਰੁਕ੍ਖਸ੍ਸ ਸਮੀਪੇ ਵਮ੍ਮਿਕਮਤ੍ਥਕੇ ਸਯਿਤੋਤਿ ਏਵਂ ਠਾਨਂ ਦਸ੍ਸੇਤ੍ਵਾ ਕਥਿਤੋ. ਅਕਤਞ੍ਞੁਨਾਤਿ ਅਤ੍ਤਨਾ ਕਤਂ ਉਪਕਾਰਂ ਅਜਾਨਨ੍ਤੇਨ ਮਿਤ੍ਤਦੁਬ੍ਭਿਨਾ ਨੇਸਾਦਬ੍ਰਾਹ੍ਮਣੇਨਾਤਿ ਅਧਿਪ੍ਪਾਯੋ. ਅਲਮ੍ਪਾਯਨੋਤਿ ਅਲਮ੍ਪਾਯਨਵਿਜ੍ਜਾਪਰਿਜਪ੍ਪਨੇਨ ‘‘ਅਲਮ੍ਪਾਯਨੋ’’ਤਿ ਏਵਂ ਲਦ੍ਧਨਾਮੋ ਅਹਿਤੁਣ੍ਡਿਕਬ੍ਰਾਹ੍ਮਣੋ. ਮਮਗ੍ਗਹੀਤਿ ਮਂ ਅਗ੍ਗਹੇਸਿ. ਕੀਲ਼ੇਤਿ ਮਂ ਤਹਿਂ ਤਹਿਨ੍ਤਿ ਤਤ੍ਥ ਤਤ੍ਥ ਗਾਮਨਿਗਮਰਾਜਧਾਨੀਸੁ ਅਤ੍ਤਨੋ ਜੀਵਿਕਤ੍ਥਂ ਮਂ ਕੀਲ਼ਾਪੇਤਿ.

੧੭. ਤਿਣਤੋਪਿ ਲਹੁਕੋ ਮਮਾਤਿ ਅਤ੍ਤਨੋ ਜੀਵਿਤਪਰਿਚ੍ਚਾਗੋ ਤਿਣਸਲਾਕਪਰਿਚ੍ਚਾਗਤੋਪਿ ਲਹੁਕੋ ਹੁਤ੍ਵਾ ਮਮ ਉਪਟ੍ਠਾਤੀਤਿ ਅਤ੍ਥੋ. ਪਥਵੀਉਪ੍ਪਤਨਂ ਵਿਯਾਤਿ ਸੀਲਵੀਤਿਕ੍ਕਮੋ ਪਨ ਚਤੁਨਹੁਤਾਧਿਕਦ੍ਵਿਯੋਜਨਸਤਸਹਸ੍ਸਬਹਲਾਯ ਮਹਾਪਥਵਿਯਾ ਪਰਿਵਤ੍ਤਨਂ ਵਿਯ ਤਤੋਪਿ ਤਂ ਭਾਰਿਯਤਰਂ ਹੁਤ੍ਵਾ ਮਯ੍ਹਂ ਉਪਟ੍ਠਾਤੀਤਿ ਦਸ੍ਸੇਤਿ.

੧੮. ਨਿਰਨ੍ਤਰਂ ਜਾਤਿਸਤਨ੍ਤਿ ਮਮ ਜਾਤੀਨਂ ਅਨੇਕਸਤਮ੍ਪਿ ਅਨੇਕਸਤਾਸੁਪਿ ਜਾਤੀਸੁ ਨਿਰਨ੍ਤਰਮੇਵ ਸੀਲਸ੍ਸ ਅਵੀਤਿਕ੍ਕਮਨਹੇਤੁ. ਮਮ ਜੀਵਿਤਂ ਚਜੇਯ੍ਯਂ ਚਜਿਤੁਂ ਸਕ੍ਕੋਮਿ. ਨੇਵ ਸੀਲਂ ਪਭਿਨ੍ਦੇਯ੍ਯਨ੍ਤਿ ਸੀਲਂ ਪਨ ਸਮਾਦਿਨ੍ਨਂ ਏਕਮ੍ਪਿ ਨੇਵ ਭਿਨ੍ਦੇਯ੍ਯਂ ਨ ਵਿਨਾਸੇਯ੍ਯਂ. ਚਤੁਦ੍ਦੀਪਾਨ ਹੇਤੂਤਿ ਚਕ੍ਕਵਤ੍ਤਿਰਜ੍ਜਸਿਰਿਯਾਪਿ ਕਾਰਣਾਤਿ ਦਸ੍ਸੇਤਿ.

੧੯. ਇਦਾਨਿ ਯਦਤ੍ਥਂ ਅਤ੍ਤਨੋ ਜੀਵਿਤਮ੍ਪਿ ਪਰਿਚ੍ਚਜਿਤ੍ਵਾ ਤਦਾ ਸੀਲਮੇਵ ਰਕ੍ਖਿਤਂ, ਤਾਯ ਚ ਸੀਲਰਕ੍ਖਾਯ ਤਥਾ ਅਨਤ੍ਥਕਾਰਕੇਸੁ ਨੇਸਾਦਅਲਮ੍ਪਾਯਨਬ੍ਰਾਹ੍ਮਣੇਸੁ ਚਿਤ੍ਤਸ੍ਸ ਅਞ੍ਞਥਤ੍ਤਂ ਨ ਕਤਂ, ਤਂ ਦਸ੍ਸੇਤੁਂ ‘‘ਅਪਿ ਚਾ’’ਤਿ ਓਸਾਨਗਾਥਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ.

ਏਵਂ ਪਨ ਮਹਾਸਤ੍ਤੇ ਅਹਿਤੁਣ੍ਡਿਕਹਤ੍ਥਗਤੇ ਤਸ੍ਸ ਮਾਤਾ ਦੁਸ੍ਸੁਪਿਨਂ ਦਿਸ੍ਵਾ ਪੁਤ੍ਤਞ੍ਚ ਤਤ੍ਥ ਅਪਸ੍ਸਨ੍ਤੀ ਸੋਕਾਭਿਭੂਤਾ ਅਹੋਸਿ. ਅਥਸ੍ਸਾ ਜੇਟ੍ਠਪੁਤ੍ਤੋ ਸੁਦਸ੍ਸਨੋ ਤਂ ਪਵਤ੍ਤਿਂ ਸੁਤ੍ਵਾ ਸੁਭੋਗਂ ‘‘ਹਿਮਵਨ੍ਤਂ ਗਨ੍ਤ੍ਵਾ ਪਞ੍ਚਸੁ ਮਹਾਨਦੀਸੁ ਸਤ੍ਤਸੁ ਮਹਾਸਰੇਸੁ ਭੂਰਿਦਤ੍ਤਂ ਉਪਧਾਰੇਤ੍ਵਾ ਏਹੀ’’ਤਿ ਪਹਿਣਿ. ਕਾਣਾਰਿਟ੍ਠਂ ‘‘ਦੇਵਲੋਕਂ ਗਨ੍ਤ੍ਵਾ ਸਚੇ ਦੇਵਤਾਹਿ ਧਮ੍ਮਂ ਸੋਤੁਕਾਮਾਹਿ ਭੂਰਿਦਤ੍ਤੋ ਤਤ੍ਥ ਨੀਤੋ, ਤਤੋ ਨਂ ਆਨੇਹੀ’’ਤਿ ਪਹਿਣਿ. ਸਯਂ ਪਨ ‘‘ਮਨੁਸ੍ਸਲੋਕੇ ਗਵੇਸਿਸ੍ਸਾਮੀ’’ਤਿ ਤਾਪਸਵੇਸੇਨ ਨਾਗਭਵਨਤੋ ਨਿਕ੍ਖਮਿ. ਅਚ੍ਚਿਮੁਖੀ ਨਾਮਸ੍ਸ ਵੇਮਾਤਿਕਾ ਭਗਿਨੀ ਬੋਧਿਸਤ੍ਤੇ ਅਧਿਮਤ੍ਤਸਿਨੇਹਾ ਤਂ ਅਨੁਬਨ੍ਧਿ. ਤਂ ਮਣ੍ਡੂਕਚ੍ਛਾਪਿਂ ਕਤ੍ਵਾ ਜਟਨ੍ਤਰੇ ਪਕ੍ਖਿਪਿਤ੍ਵਾ ਮਹਾਸਤ੍ਤਸ੍ਸ ਉਪੋਸਥਕਰਣਟ੍ਠਾਨਂ ਆਦਿਂ ਕਤ੍ਵਾ ਸਬ੍ਬਤ੍ਥ ਗਵੇਸਨ੍ਤੋ ਅਨੁਕ੍ਕਮੇਨ ਬਾਰਾਣਸਿਂ ਪਤ੍ਵਾ ਰਾਜਦ੍ਵਾਰਂ ਅਗਮਾਸਿ. ਤਦਾ ਅਲਮ੍ਪਾਯਨੋ ਰਾਜਙ੍ਗਣੇ ਮਹਾਜਨਸ੍ਸ ਮਜ੍ਝੇ ਰਞ੍ਞੋ ਭੂਰਿਦਤ੍ਤਸ੍ਸ ਕੀਲ਼ਂ ਦਸ੍ਸੇਤੁਂ ਪੇਲ਼ਂ ਵਿਵਰਿਤ੍ਵਾ ‘‘ਏਹਿ ਮਹਾਨਾਗਾ’’ਤਿ ਸਞ੍ਞਮਦਾਸਿ.

ਮਹਾਸਤ੍ਤੋ ਸੀਸਂ ਨੀਹਰਿਤ੍ਵਾ ਓਲੋਕੇਨ੍ਤੋ ਜੇਟ੍ਠਭਾਤਿਕਂ ਦਿਸ੍ਵਾ ਪੇਲ਼ਤੋ ਨਿਕ੍ਖਮ੍ਮ ਤਦਭਿਮੁਖੋ ਪਾਯਾਸਿ. ਮਹਾਜਨੋ ਭੀਤੋ ਪਟਿਕ੍ਕਮਿ. ਸੋ ਗਨ੍ਤ੍ਵਾ ਤਂ ਅਭਿਵਾਦੇਤ੍ਵਾ ਨਿਵਤ੍ਤਿਤ੍ਵਾ ਪੇਲ਼ਮੇਵ ਪਾਵਿਸਿ. ਅਲਮ੍ਪਾਯਨੋ ‘‘ਇਮਿਨਾ ਅਯਂ ਤਾਪਸੋ ਦਟ੍ਠੋ’’ਤਿ ਸਞ੍ਞਾਯ ‘‘ਮਾ ਭਾਯਿ, ਮਾ ਭਾਯੀ’’ਤਿ ਆਹ. ਸੁਦਸ੍ਸਨੋ ‘‘ਅਯਂ ਨਾਗੋ ਮਯ੍ਹਂ ਕਿਂ ਕਰਿਸ੍ਸਤਿ, ਮਯਾ ਸਦਿਸੋ ਅਹਿਤੁਣ੍ਡਿਕੋ ਨਾਮ ਨਤ੍ਥੀ’’ਤਿ ਤੇਨ ਵਾਦਪ੍ਪਟਿਵਾਦਂ ਸਮੁਟ੍ਠਾਪੇਤ੍ਵਾ ‘‘ਤ੍ਵਂ ਇਮਂ ਨਾਗਂ ਗਹੇਤ੍ਵਾ ਗਜ੍ਜਸਿ, ਅਹਂ ਤਂ ਇਮਾਯ ਮਣ੍ਡੂਕਚ੍ਛਾਪਿਯਾ ਇਚ੍ਛਨ੍ਤੋ ਨਾਸਯਿਸ੍ਸਾਮੀ’’ਤਿ ਭਗਿਨਿਂ ਪਕ੍ਕੋਸਿਤ੍ਵਾ ਹਤ੍ਥਂ ਪਸਾਰੇਸਿ. ਸਾ ਤਸ੍ਸ ਸਦ੍ਦਂ ਸੁਤ੍ਵਾ ਜਟਨ੍ਤਰੇ ਨਿਪਨ੍ਨਾ ਤਿਕ੍ਖਤ੍ਤੁਂ ਮਣ੍ਡੂਕਵਸ੍ਸਿਤਂ ਵਸ੍ਸਿਤ੍ਵਾ ਨਿਕ੍ਖਮਿਤ੍ਵਾ ਅਂਸਕੂਟੇ ਨਿਸੀਦਿਤ੍ਵਾ ਉਪ੍ਪਤਿਤ੍ਵਾ ਤਸ੍ਸ ਹਤ੍ਥਤਲੇ ਤੀਣਿ ਵਿਸਬਿਨ੍ਦੂਨਿ ਪਾਤੇਤ੍ਵਾ ਪੁਨ ਤਸ੍ਸ ਜਟਨ੍ਤਰਮੇਵ ਪਾਵਿਸਿ.

ਸੁਦਸ੍ਸਨੋ ਵਿਸਬਿਨ੍ਦੁਂ ਦਸ੍ਸੇਤ੍ਵਾ ‘‘ਇਦਂ ਬਿਨ੍ਦੁਂ ਸਚੇ ਪਥਵਿਯਂ ਪਾਤੇਸ੍ਸਤਿ, ਓਸਧਿਤਿਣਵਨਪ੍ਪਤਯੋ ਸਬ੍ਬੇ ਨਸ੍ਸਿਸ੍ਸਨ੍ਤਿ. ਸਚੇ ਆਕਾਸੇ ਖਿਪਿਸ੍ਸਤਿ, ਸਤ੍ਤਵਸ੍ਸਾਨਿ ਦੇਵੋ ਨ ਵਸ੍ਸਿਸ੍ਸਤਿ. ਸਚੇ ਉਦਕੇ ਪਾਤੇਸ੍ਸਤਿ, ਯਾਵਤਾ ਤਤ੍ਥ ਉਦਕਜਾਤਾ ਪਾਣਾ ਸਬ੍ਬੇ ਮਰੇਯ੍ਯੁ’’ਨ੍ਤਿ ਵਤ੍ਵਾ ਰਾਜਾਨਂ ਸਦ੍ਦਹਾਪੇਤੁਂ ਤਯੋ ਆਵਾਟੇ ਖਣਾਪੇਤ੍ਵਾ ਏਕਂ ਨਾਨਾਭੇਸਜ੍ਜਾਨਂ ਪੂਰੇਸਿ, ਦੁਤਿਯਂ ਗੋਮਯਸ੍ਸ, ਤਤਿਯਂ ਦਿਬ੍ਬੋਸਧਾਨਞ੍ਚੇਵ ਪੂਰੇਤ੍ਵਾ ਮਜ੍ਝੇ ਆਵਾਟੇ ਵਿਸਬਿਨ੍ਦੁਂ ਪਕ੍ਖਿਪਿ. ਤਙ੍ਖਣਞ੍ਞੇਵ ਧੂਮਾਯਿਤ੍ਵਾ ਜਾਲਾ ਉਟ੍ਠਹਿ. ਸਾ ਗਨ੍ਤ੍ਵਾ ਗੋਮਯਾਵਾਟਂ ਗਣ੍ਹਿ. ਤਤੋਪਿ ਜਾਲਾ ਉਟ੍ਠਾਯ ਦਿਬ੍ਬੋਸਧਪੁਣ੍ਣਂ ਗਹੇਤ੍ਵਾ ਦਿਬ੍ਬੋਸਧਾਨਿ ਝਾਪੇਤ੍ਵਾ ਨਿਬ੍ਬਾਯਿ. ਅਲਮ੍ਪਾਯਨਂ ਤਤ੍ਥ ਆਵਾਟਸ੍ਸ ਅਵਿਦੂਰੇ ਠਿਤਂ ਉਸੁਮਾ ਫਰਿਤ੍ਵਾ ਸਰੀਰਚ੍ਛਵਿਂ ਉਪ੍ਪਾਟੇਤ੍ਵਾ ਗਤਾ. ਸੇਤਕੁਟ੍ਠੀ ਅਹੋਸਿ. ਸੋ ਭਯਤਜ੍ਜਿਤੋ ‘‘ਨਾਗਰਾਜਾਨਂ ਵਿਸ੍ਸਜ੍ਜੇਮੀ’’ਤਿ ਤਿਕ੍ਖਤ੍ਤੁਂ ਵਾਚਂ ਨਿਚ੍ਛਾਰੇਸਿ. ਤਂ ਸੁਤ੍ਵਾ ਬੋਧਿਸਤ੍ਤੋ ਰਤਨਪੇਲ਼ਾਯ ਨਿਕ੍ਖਮਿਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਅਤ੍ਤਭਾਵਂ ਮਾਪੇਤ੍ਵਾ ਦੇਵਲੀਲ਼ਾਯ ਠਿਤੋ. ਸੁਦਸ੍ਸਨੋ ਚ ਅਚ੍ਚਿਮੁਖੀ ਚ ਤਥੇਵ ਅਟ੍ਠਂਸੁ.

ਤਤੋ ਸੁਦਸ੍ਸਨੋ ਅਤ੍ਤਨੋ ਭਾਗਿਨੇਯ੍ਯਭਾਵਂ ਰਞ੍ਞੋ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ਤੇ ਆਲਿਙ੍ਗਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ਅਨ੍ਤੇਪੁਰਂ ਨੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਭੂਰਿਦਤ੍ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ ‘‘ਤਾਤ, ਏਵਂ ਮਹਾਨੁਭਾਵਂ ਤਂ ਅਲਮ੍ਪਾਯਨੋ ਕਥਂ ਗਣ੍ਹੀ’’ਤਿ ਪੁਚ੍ਛਿ. ਸੋ ਸਬ੍ਬਂ ਵਿਤ੍ਥਾਰੇਨ ਕਥੇਤ੍ਵਾ ‘‘ਮਹਾਰਾਜ, ਰਞ੍ਞਾ ਨਾਮ ਇਮਿਨਾ ਨਿਯਾਮੇਨ ਰਜ੍ਜਂ ਕਾਰੇਤੁਂ ਵਟ੍ਟਤੀ’’ਤਿ ਮਾਤੁਲਸ੍ਸ ਧਮ੍ਮਂ ਦੇਸੇਸਿ. ਅਥ ਸੁਦਸ੍ਸਨੋ ‘‘ਮਾਤੁਲ, ਮਮ ਮਾਤਾ ਭੂਰਿਦਤ੍ਤਂ ਅਪਸ੍ਸਨ੍ਤੀ ਕਿਲਮਤਿ, ਨ ਸਕ੍ਕਾ ਅਮ੍ਹੇਹਿ ਇਧ ਪਪਞ੍ਚਂ ਕਾਤੁ’’ਨ੍ਤਿ ਮਾਤੁਲਂ ਆਪੁਚ੍ਛਿਤ੍ਵਾ ਭੂਰਿਦਤ੍ਤਅਚ੍ਚਿਮੁਖੀਹਿ ਸਦ੍ਧਿਂ ਨਾਗਭਵਨਮੇਵ ਗਤੋ.

ਅਥ ਤਤ੍ਥ ਮਹਾਪੁਰਿਸੋ ਗਿਲਾਨਸੇਯ੍ਯਾਯ ਨਿਪਨ੍ਨੋ ਗਿਲਾਨਪੁਚ੍ਛਨਤ੍ਥਂ ਆਗਤਾਯ ਮਹਤਿਯਾ ਨਾਗਪਰਿਸਾਯ ਵੇਦੇ ਚ ਯਞ੍ਞੇ ਚ ਬ੍ਰਾਹ੍ਮਣੇ ਚ ਸਮ੍ਭਾਵੇਤ੍ਵਾ ਕਾਣਾਰਿਟ੍ਠੇ ਕਥੇਨ੍ਤੇ ਤਂ ਵਾਦਂ ਭਿਨ੍ਦਿਤ੍ਵਾ ਨਾਨਾਨਯੇਹਿ ਧਮ੍ਮਂ ਦੇਸੇਤ੍ਵਾ ਸੀਲਸਮ੍ਪਦਾਯ ਦਿਟ੍ਠਿਸਮ੍ਪਦਾਯ ਚ ਪਤਿਟ੍ਠਾਪੇਤ੍ਵਾ ਯਾਵਜੀਵਂ ਸੀਲਾਨਿ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਆਯੁਪਰਿਯੋਸਾਨੇ ਸਗ੍ਗਪੁਰਂ ਪੂਰੇਸਿ.

ਤਦਾ ਮਾਤਾਪਿਤਰੋ ਮਹਾਰਾਜਕੁਲਾਨਿ ਅਹੇਸੁਂ. ਨੇਸਾਦਬ੍ਰਾਹ੍ਮਣੋ ਦੇਵਦਤ੍ਤੋ, ਸੋਮਦਤ੍ਤੋ ਆਨਨ੍ਦੋ, ਅਚ੍ਚਿਮੁਖੀ ਉਪ੍ਪਲਵਣ੍ਣਾ, ਸੁਦਸ੍ਸਨੋ ਸਾਰਿਪੁਤ੍ਤੋ, ਸੁਭੋਗੋ ਮਹਾਮੋਗ੍ਗਲ੍ਲਾਨੋ, ਕਾਣਾਰਿਟ੍ਠੋ ਸੁਨਕ੍ਖਤ੍ਤੋ, ਭੂਰਿਦਤ੍ਤੋ ਲੋਕਨਾਥੋ.

ਤਸ੍ਸ ਇਧਾਪਿ ਸੇਸਪਾਰਮਿਯੋ ਹੇਟ੍ਠਾ ਵੁਤ੍ਤਨਯੇਨੇਵ ਨਿਦ੍ਧਾਰੇਤਬ੍ਬਾ. ਇਧਾਪਿ ਯੋਜਨਸਤਿਕੇ ਅਤ੍ਤਨੋ ਨਾਗਭਵਨਟ੍ਠਾਨੇ ਸੋਲ਼ਸਹਿ ਨਾਗਕਞ੍ਞਾਸਹਸ੍ਸੇਹਿ ਚਿਤ੍ਤਰੂਪਂ ਵਿਯ ਪਰਿਚਾਰਿਯਮਾਨੋ ਦੇਵਲੋਕਸਮ੍ਪਤ੍ਤਿਸਦਿਸੇ ਨਾਗਲੋਕਿਸ੍ਸਰਿਯੇ ਠਿਤੋਪਿ ਇਸ੍ਸਰਿਯਮਦਂ ਅਕਤ੍ਵਾ ਅਨ੍ਵਦ੍ਧਮਾਸਂ ਮਾਤਾਪਿਤੁਉਪਟ੍ਠਾਨਂ, ਕੁਲੇ ਜੇਟ੍ਠਾਪਚਾਯਨਂ, ਸਕਲਾਯ ਨਾਗਪਰਿਸਾਯ ਚਾਤੁਮਹਾਰਾਜਿਕਪਰਿਸਾਯ ਤਾਵਤਿਂਸਪਰਿਸਾਯ ਚ ਸਮੁਟ੍ਠਿਤਪਞ੍ਹਾਨਂ ਤਂਤਂਪਰਿਸਮਜ੍ਝੇ ਕੁਮੁਦਨਾਲਕਲਾਪਂ ਵਿਯ ਸੁਨਿਸਿਤਸਤ੍ਥੇਨ ਅਤ੍ਤਨੋ ਪਞ੍ਞਾਸਤ੍ਥੇਨ ਤਾਵਦੇਵ ਪਚ੍ਛਿਨ੍ਦਿਤ੍ਵਾ ਤੇਸਂ ਚਿਤ੍ਤਾਨੁਕੂਲਧਮ੍ਮਦੇਸਨਾ, ਵੁਤ੍ਤਪ੍ਪਕਾਰਂ ਭੋਗਸਮ੍ਪਤ੍ਤਿਂ ਪਹਾਯ ਅਤ੍ਤਨੋ ਸਰੀਰਜੀਵਿਤਨਿਰਪੇਕ੍ਖਂ ਚਤੁਰਙ੍ਗਸਮਨ੍ਨਾਗਤਂ ਉਪੋਸਥਾਧਿਟ੍ਠਾਨਂ, ਤਤ੍ਥ ਚ ਪਟਿਞ੍ਞਾਯ ਵਿਸਂਵਾਦਨਭਯੇਨ ਅਹਿਤੁਣ੍ਡਿਕਹਤ੍ਥਗਮਨਂ, ਤਸ੍ਮਿਞ੍ਚ ਮੁਖੇ ਵਿਸਮਿਸ੍ਸਖੇਲ਼ਪਾਤਨਂ ਨਙ੍ਗੁਟ੍ਠੇ ਗਹੇਤ੍ਵਾ ਆਵਿਞ੍ਛਨਂ ਕਡ੍ਢਨਂ ਭੂਮਿਯਂ ਘਂਸਨਂ ਮਦ੍ਦਨਂ ਪੋਥਨਨ੍ਤਿ ਏਵਮਾਦਿਂ ਨਾਨਪ੍ਪਕਾਰਵਿਪ੍ਪਕਾਰਂ ਕਰੋਨ੍ਤੇਪਿ ਏਵਰੂਪਂ ਮਹਾਦੁਕ੍ਖਂ ਅਨੁਭਵਤੋਪਿ ਕੁਜ੍ਝਿਤ੍ਵਾ ਓਲੋਕਨਮਤ੍ਤੇਨ ਤਂ ਛਾਰਿਕਂ ਕਾਤੁਂ ਸਮਤ੍ਥਸ੍ਸਾਪਿ ਸੀਲਪਾਰਮਿਂ ਆਵਜ੍ਜਿਤ੍ਵਾ ਸੀਲਖਣ੍ਡਨਭਯੇਨ ਈਸਕਮ੍ਪਿ ਚਿਤ੍ਤਸ੍ਸ ਵਿਕਾਰਾਭਾਵੋ, ਧਨਂ ਲਭਾਪੇਮੀਤਿ ਵਾ ਤਸ੍ਸ ਚਿਤ੍ਤਾਨੁਵਤ੍ਤਨਂ, ਸੁਭੋਗੇਨ ਪੁਨਾਨੀਤਸ੍ਸ ਅਕਤਞ੍ਞੁਨੋ ਮਿਤ੍ਤਦੁਬ੍ਭਿਸ੍ਸ ਨੇਸਾਦਬ੍ਰਾਹ੍ਮਣਸ੍ਸ ਸੀਲਂ ਅਨਧਿਟ੍ਠਹਿਤ੍ਵਾਪਿ ਅਕੁਜ੍ਝਨਂ, ਕਾਣਾਰਿਟ੍ਠੇਨ ਕਥਿਤਂ ਮਿਚ੍ਛਾਵਾਦਂ ਭਿਨ੍ਦਿਤ੍ਵਾ ਅਨੇਕਪਰਿਯਾਯੇਨ ਧਮ੍ਮਂ ਭਾਸਿਤ੍ਵਾ ਨਾਗਪਰਿਸਾਯ ਸੀਲੇਸੁ ਸਮ੍ਮਾਦਿਟ੍ਠਿਯਞ੍ਚ ਪਤਿਟ੍ਠਾਪਨਨ੍ਤਿ ਏਵਮਾਦਯੋ ਬੋਧਿਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾ. ਤੇਨੇਤਂ ਵੁਚ੍ਚਤਿ – ‘‘ਏਵਂ ਅਚ੍ਛਰਿਯਾ ਹੇਤੇ…ਪੇ… ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਭੂਰਿਦਤ੍ਤਚਰਿਯਾਵਣ੍ਣਨਾ ਨਿਟ੍ਠਿਤਾ.

੩. ਚਮ੍ਪੇਯ੍ਯਨਾਗਚਰਿਯਾਵਣ੍ਣਨਾ

੨੦. ਤਤਿਯੇ ਚਮ੍ਪੇਯ੍ਯਕੋਤਿ ਅਙ੍ਗਮਗਧਰਟ੍ਠਾਨਂ ਅਨ੍ਤਰੇ ਚਮ੍ਪਾ ਨਾਮ ਨਦੀ, ਤਸ੍ਸਾ ਹੇਟ੍ਠਾ ਨਾਗਭਵਨਮ੍ਪਿ ਅਵਿਦੂਰਭਵਤ੍ਤਾ ਚਮ੍ਪਾ ਨਾਮ, ਤਤ੍ਥ ਜਾਤੋ ਨਾਗਰਾਜਾ ਚਮ੍ਪੇਯ੍ਯਕੋ. ਤਦਾਪਿ ਧਮ੍ਮਿਕੋ ਆਸਿਨ੍ਤਿ ਤਸ੍ਮਿਂ ਚਮ੍ਪੇਯ੍ਯਨਾਗਰਾਜਕਾਲੇਪਿ ਅਹਂ ਧਮ੍ਮਚਾਰੀ ਅਹੋਸਿਂ.

ਬੋਧਿਸਤ੍ਤੋ ਹਿ ਤਦਾ ਚਮ੍ਪਾਨਾਗਭਵਨੇ ਨਿਬ੍ਬਤ੍ਤਿਤ੍ਵਾ ਚਮ੍ਪੇਯ੍ਯੋ ਨਾਮ ਨਾਗਰਾਜਾ ਅਹੋਸਿ, ਮਹਿਦ੍ਧਿਕੋ ਮਹਾਨੁਭਾਵੋ. ਸੋ ਤਤ੍ਥ ਨਾਗਰਜ੍ਜਂ ਕਾਰੇਨ੍ਤੋ ਦੇਵਰਾਜਭੋਗਸਮ੍ਪਤ੍ਤਿਸਦਿਸਇਸ੍ਸਰਿਯਸਮ੍ਪਤ੍ਤਿਂ ਅਨੁਭਵਨ੍ਤੋ ਪਾਰਮਿਪੂਰਣਸ੍ਸ ਅਨੋਕਾਸਭਾਵਤੋ ‘‘ਕਿਂ ਮੇ ਇਮਾਯ ਤਿਰਚ੍ਛਾਨਯੋਨਿਯਾ, ਉਪੋਸਥਵਾਸਂ ਵਸਿਤ੍ਵਾ ਇਤੋ ਮੁਚ੍ਚਿਤ੍ਵਾ ਸਮ੍ਮਦੇਵ ਪਾਰਮਿਯੋ ਪੂਰੇਸ੍ਸਾਮੀ’’ਤਿ ਤਤੋ ਪਟ੍ਠਾਯ ਅਤ੍ਤਨੋ ਪਾਸਾਦੇਯੇਵ ਉਪੋਸਥਕਮ੍ਮਂ ਕਰੋਤਿ. ਅਲਙ੍ਕਤਨਾਗਮਾਣਵਿਕਾ ਤਸ੍ਸ ਸਨ੍ਤਿਕਂ ਆਗਚ੍ਛਨ੍ਤਿ. ਸੋ ‘‘ਇਧ ਮੇ ਸੀਲਸ੍ਸ ਅਨ੍ਤਰਾਯੋ ਭਵਿਸ੍ਸਤੀ’’ਤਿ ਪਾਸਾਦਤੋ ਨਿਕ੍ਖਮਿਤ੍ਵਾ ਉਯ੍ਯਾਨੇ ਨਿਸੀਦਤਿ. ਤਤ੍ਰਾਪਿ ਤਾ ਆਗਚ੍ਛਨ੍ਤਿ. ਸੋ ਚਿਨ੍ਤੇਸਿ – ‘‘ਇਧ ਮੇ ਸੀਲਸ੍ਸ ਸਂਕਿਲੇਸੋ ਭਵਿਸ੍ਸਤਿ, ਇਤੋ ਨਾਗਭਵਨਤੋ ਨਿਕ੍ਖਮਿਤ੍ਵਾ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਵਾਸਂ ਵਸਿਸ੍ਸਾਮੀ’’ਤਿ. ਸੋ ਤਤੋ ਪਟ੍ਠਾਯ ਉਪੋਸਥਦਿਵਸੇਸੁ ਨਾਗਭਵਨਾ ਨਿਕ੍ਖਮਿਤ੍ਵਾ ਏਕਸ੍ਸ ਪਚ੍ਚਨ੍ਤਗਾਮਸ੍ਸ ਅਵਿਦੂਰੇ ਮਗ੍ਗਸਮੀਪੇ ਵਮ੍ਮਿਕਮਤ੍ਥਕੇ ‘‘ਮਮ ਚਮ੍ਮਾਦੀਹਿ ਅਤ੍ਥਿਕਾ ਚਮ੍ਮਾਦੀਨਿ ਗਣ੍ਹਨ੍ਤੁ, ਕੀਲ਼ਾਸਪ੍ਪਂ ਵਾ ਕਾਤੁਕਾਮਾ ਕੀਲ਼ਾਸਪ੍ਪਂ ਕਰੋਨ੍ਤੂ’’ਤਿ ਸਰੀਰਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਭੋਗੇ ਆਭੁਜਿਤ੍ਵਾ ਨਿਪਨ੍ਨੋ ਉਪੋਸਥਵਾਸਂ ਵਸਤਿ ਚਾਤੁਦ੍ਦਸਿਯਂ ਪਞ੍ਚਦਸਿਯਞ੍ਚ, ਪਾਟਿਪਦੇ ਨਾਗਭਵਨਂ ਗਚ੍ਛਤਿ. ਤਸ੍ਸੇਵਂ ਉਪੋਸਥਂ ਕਰੋਨ੍ਤਸ੍ਸ ਦੀਘੋ ਅਦ੍ਧਾ ਵੀਤਿਵਤ੍ਤੋ.

ਅਥ ਬੋਧਿਸਤ੍ਤੋ ਸੁਮਨਾਯ ਨਾਮ ਅਤ੍ਤਨੋ ਅਗ੍ਗਮਹੇਸਿਯਾ ‘‘ਦੇਵ, ਤ੍ਵਂ ਮਨੁਸ੍ਸਲੋਕਂ ਗਨ੍ਤ੍ਵਾ ਉਪੋਸਥਂ ਉਪਵਸਸਿ, ਸੋ ਚ ਸਾਸਙ੍ਕੋ ਸਪ੍ਪਟਿਭਯੋ’’ਤਿ ਵੁਤ੍ਤੋ ਮਙ੍ਗਲਪੋਕ੍ਖਰਣਿਤੀਰੇ ਠਤ੍ਵਾ ‘‘ਸਚੇ ਮਂ, ਭਦ੍ਦੇ, ਕੋਚਿ ਪਹਰਿਤ੍ਵਾ ਕਿਲਮੇਸ੍ਸਤਿ, ਇਮਿਸ੍ਸਾ ਪੋਕ੍ਖਰਣਿਯਾ ਉਦਕਂ ਆਵਿਲਂ ਭਵਿਸ੍ਸਤਿ. ਸਚੇ ਸੁਪਣ੍ਣੋ ਗਣ੍ਹਿਸ੍ਸਤਿ, ਉਦਕਂ ਪਕ੍ਕੁਥਿਸ੍ਸਤਿ. ਸਚੇ ਅਹਿਤੁਣ੍ਡਿਕੋ ਗਣ੍ਹਿਸ੍ਸਤਿ, ਉਦਕਂ ਲੋਹਿਤਵਣ੍ਣਂ ਭਵਿਸ੍ਸਤੀ’’ਤਿ ਤੀਣਿ ਨਿਮਿਤ੍ਤਾਨਿ ਤਸ੍ਸਾ ਆਚਿਕ੍ਖਿਤ੍ਵਾ ਚਾਤੁਦ੍ਦਸੀਉਪੋਸਥਂ ਅਧਿਟ੍ਠਾਯ ਨਾਗਭਵਨਾ ਨਿਕ੍ਖਮਿਤ੍ਵਾ ਤਤ੍ਥ ਗਨ੍ਤ੍ਵਾ ਵਮ੍ਮਿਕਮਤ੍ਥਕੇ ਨਿਪਜ੍ਜਿ ਸਰੀਰਸੋਭਾਯ ਵਮ੍ਮਿਕਂ ਸੋਭਯਮਾਨੋ. ਸਰੀਰਞ੍ਹਿਸ੍ਸ ਰਜਤਦਾਮਂ ਵਿਯ ਸੇਤਂ ਅਹੋਸਿ, ਮਤ੍ਥਕੋ ਰਤ੍ਤਕਮ੍ਬਲਗੇਣ੍ਡੁਕੋ ਵਿਯ, ਸਰੀਰਂ ਨਙ੍ਗਲਸੀਸਪ੍ਪਮਾਣਂ ਭੂਰਿਦਤ੍ਤਕਾਲੇ (ਜਾ. ੨.੨੨.੭੮੪ ਆਦਯੋ) ਪਨ ਊਰੁਪ੍ਪਮਾਣਂ, ਸਙ੍ਖਪਾਲਕਾਲੇ (ਜਾ. ੨.੧੭.੧੪੩ ਆਦਯੋ) ਏਕਦੋਣਿਕਨਾਵਪ੍ਪਮਾਣਂ.

ਤਦਾ ਏਕੋ ਬਾਰਾਣਸਿਮਾਣਵੋ ਤਕ੍ਕਸਿਲਂ ਗਨ੍ਤ੍ਵਾ ਅਲਮ੍ਪਾਯਨਮਨ੍ਤਂ ਉਗ੍ਗਣ੍ਹਿਤ੍ਵਾ ਤੇਨ ਮਗ੍ਗੇਨ ਅਤ੍ਤਨੋ ਗਾਮਂ ਗਚ੍ਛਨ੍ਤੋ ਮਹਾਸਤ੍ਤਂ ਦਿਸ੍ਵਾ ‘‘ਕਿਂ ਮੇ ਤੁਚ੍ਛਹਤ੍ਥੇਨ ਗਾਮਂ ਗਨ੍ਤੁਂ, ਇਮਂ ਨਾਗਂ ਗਹੇਤ੍ਵਾ ਗਾਮਨਿਗਮਰਾਜਧਾਨੀਸੁ ਕੀਲ਼ਾਪੇਨ੍ਤੋ ਧਨਂ ਉਪ੍ਪਾਦੇਤ੍ਵਾਵ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਬ੍ਬੋਸਧਾਨਿ ਗਹੇਤ੍ਵਾ ਦਿਬ੍ਬਮਨ੍ਤਂ ਪਰਿਵਤ੍ਤੇਤ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਦਿਬ੍ਬਮਨ੍ਤਂ ਸੁਤਕਾਲਤੋ ਪਟ੍ਠਾਯ ਮਹਾਸਤ੍ਤਸ੍ਸ ਕਣ੍ਣੇਸੁ ਤਤ੍ਤਸਲਾਕਾਪਵੇਸਨਕਾਲੋ ਵਿਯ ਅਹੋਸਿ, ਮਤ੍ਥਕੇ ਸਿਖਰੇਨ ਅਭਿਮਨ੍ਥਿਯਮਾਨੋ ਵਿਯ. ਸੋ ‘‘ਕੋ ਨੁ ਖੋ ਏਸੋ’’ਤਿ ਭੋਗਨ੍ਤਰਤੋ ਸੀਸਂ ਉਕ੍ਖਿਪਿਤ੍ਵਾ ਓਲੋਕੇਨ੍ਤੋ ਅਹਿਤੁਣ੍ਡਿਕਂ ਦਿਸ੍ਵਾ ਚਿਨ੍ਤੇਸਿ – ‘‘ਮਮ ਵਿਸਂ ਉਗ੍ਗਤੇਜਂ, ਸਚਾਹਂ ਕੁਜ੍ਝਿਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਸ੍ਸਾਮਿ, ਏਤਸ੍ਸ ਸਰੀਰਂ ਭੁਸਮੁਟ੍ਠਿ ਵਿਯ ਵਿਪ੍ਪਕਿਰਿਸ੍ਸਤਿ, ਅਥ ਮੇ ਸੀਲਂ ਖਣ੍ਡਂ ਭਵਿਸ੍ਸਤਿ, ਨ ਨਂ ਓਲੋਕੇਸ੍ਸਾਮੀ’’ਤਿ. ਸੋ ਅਕ੍ਖੀਨਿ ਨਿਮ੍ਮੀਲੇਤ੍ਵਾ ਸੀਸਂ ਭੋਗਨ੍ਤਰੇ ਠਪੇਸਿ. ਅਹਿਤੁਣ੍ਡਿਕਬ੍ਰਾਹ੍ਮਣੋ ਓਸਧਂ ਖਾਦਿਤ੍ਵਾ ਮਨ੍ਤਂ ਪਰਿਵਤ੍ਤੇਤ੍ਵਾ ਖੇਲ਼ਂ ਮਹਾਸਤ੍ਤਸ੍ਸ ਸਰੀਰੇ ਓਸਿਞ੍ਚਿ. ਓਸਧਾਨਞ੍ਚ ਮਨ੍ਤਸ੍ਸ ਚ ਆਨੁਭਾਵੇਨ ਖੇਲ਼ੇਨ ਫੁਟ੍ਠਫੁਟ੍ਠਟ੍ਠਾਨੇ ਫੋਟਾਨਂ ਉਟ੍ਠਾਨਕਾਲੋ ਵਿਯ ਅਹੋਸਿ.

ਅਥ ਸੋ ਨਙ੍ਗੁਟ੍ਠੇ ਗਹੇਤ੍ਵਾ ਆਕਡ੍ਢਿਤ੍ਵਾ ਦੀਘਸੋ ਨਿਪਜ੍ਜਾਪੇਤ੍ਵਾ ਅਜਪਦੇਨ ਦਣ੍ਡੇਨ ਉਪ੍ਪੀਲ਼ੇਤ੍ਵਾ ਦੁਬ੍ਬਲਂ ਕਤ੍ਵਾ ਸੀਸਂ ਦਲ਼੍ਹਂ ਗਹੇਤ੍ਵਾ ਨਿਪ੍ਪੀਲ਼ੇਸਿ. ਮਹਾਸਤ੍ਤੋ ਮੁਖਂ ਵਿਵਰਿ. ਅਥਸ੍ਸ ਮੁਖੇ ਖੇਲ਼ਂ ਓਸਿਞ੍ਚਿਤ੍ਵਾ ਓਸਧਮਨ੍ਤਬਲੇਨ ਦਨ੍ਤੇ ਭਿਨ੍ਦਿ. ਮੁਖਂ ਲੋਹਿਤਸ੍ਸ ਪੂਰਿ. ਮਹਾਸਤ੍ਤੋ ਅਤ੍ਤਨੋ ਸੀਲਭੇਦਭਯੇਨ ਏਵਰੂਪਂ ਦੁਕ੍ਖਂ ਅਧਿਵਾਸੇਨ੍ਤੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕਨਮਤ੍ਤਮ੍ਪਿ ਨਾਕਾਸਿ. ਸੋਪਿ ‘‘ਨਾਗਰਾਜਾਨਂ ਦੁਬ੍ਬਲਂ ਕਰਿਸ੍ਸਾਮੀ’’ਤਿ ਨਙ੍ਗੁਟ੍ਠਤੋ ਪਟ੍ਠਾਯ ਅਟ੍ਠੀਨਿ ਸਂਚੁਣ੍ਣਯਮਾਨੋ ਵਿਯ ਸਕਲਸਰੀਰਂ ਮਦ੍ਦਿਤ੍ਵਾ ਪਟ੍ਟਕਵੇਠਨਂ ਨਾਮ ਵੇਠੇਸਿ, ਤਨ੍ਤਮਜ੍ਜਿਤਂ ਨਾਮ ਮਜ੍ਜਿ, ਨਙ੍ਗੁਟ੍ਠੇ ਗਹੇਤ੍ਵਾ ਦੁਸ੍ਸਪੋਥਨਂ ਨਾਮ ਪੋਥੇਸਿ. ਮਹਾਸਤ੍ਤਸ੍ਸ ਸਕਲਸਰੀਰਂ ਲੋਹਿਤਮਕ੍ਖਿਤਂ ਅਹੋਸਿ, ਸੋ ਮਹਾਵੇਦਨਂ ਅਧਿਵਾਸੇਸਿ.

ਅਥਸ੍ਸ ਦੁਬ੍ਬਲਭਾਵਂ ਞਤ੍ਵਾ ਵਲ੍ਲੀਹਿ ਪੇਲ਼ਂ ਕਰਿਤ੍ਵਾ ਤਤ੍ਥ ਨਂ ਪਕ੍ਖਿਪਿਤ੍ਵਾ ਪਚ੍ਚਨ੍ਤਗਾਮਂ ਨੇਤ੍ਵਾ ਮਹਾਜਨਸ੍ਸ ਮਜ੍ਝੇ ਕੀਲ਼ਾਪੇਸਿ. ਨੀਲਾਦੀਸੁ ਵਣ੍ਣੇਸੁ ਵਟ੍ਟਚਤੁਰਸ੍ਸਾਦੀਸੁ ਸਣ੍ਠਾਨੇਸੁ ਅਣੁਂਥੂਲਾਦੀਸੁ ਪਮਾਣੇਸੁ ਯਂ ਯਂ ਬ੍ਰਾਹ੍ਮਣੋ ਇਚ੍ਛਤਿ, ਮਹਾਸਤ੍ਤੋ ਤਂ ਤਦੇਵ ਕਤ੍ਵਾ ਨਚ੍ਚਤਿ, ਫਣਸਤਮ੍ਪਿ ਫਣਸਹਸ੍ਸਮ੍ਪਿ ਕਰੋਤਿਯੇਵ. ਮਹਾਜਨੋ ਪਸੀਦਿਤ੍ਵਾ ਬਹੁਧਨਮਦਾਸਿ. ਏਕਦਿਵਸਮੇਵ ਕਹਾਪਣਸਹਸ੍ਸਞ੍ਚੇਵ ਸਹਸ੍ਸਗ੍ਘਨਿਕੇ ਚ ਪਰਿਕ੍ਖਾਰੇ ਲਭਿ. ਬ੍ਰਾਹ੍ਮਣੋ ਆਦਿਤੋਵ ‘‘ਸਹਸ੍ਸਂ ਲਭਿਤ੍ਵਾ ਵਿਸ੍ਸਜ੍ਜੇਸ੍ਸਾਮੀ’’ਤਿ ਚਿਨ੍ਤੇਸਿ. ਤਂ ਪਨ ਧਨਂ ਲਭਿਤ੍ਵਾ ‘‘ਪਚ੍ਚਨ੍ਤਗਾਮੇਯੇਵ ਤਾਵ ਮੇ ਏਤ੍ਤਕਂ ਧਨਂ ਲਦ੍ਧਂ, ਰਾਜਰਾਜਮਹਾਮਤ੍ਤਾਨਂ ਦਸ੍ਸਿਤੇ ਕੀਵ ਬਹੁਂ ਧਨਂ ਲਭਿਸ੍ਸਾਮੀ’’ਤਿ ਸਕਟਞ੍ਚ ਸੁਖਯਾਨਕਞ੍ਚ ਗਹੇਤ੍ਵਾ ਸਕਟੇ ਪਰਿਕ੍ਖਾਰੇ ਠਪੇਤ੍ਵਾ ਸੁਖਯਾਨਕੇ ਨਿਸਿਨ੍ਨੋ ‘‘ਮਹਨ੍ਤੇਨ ਪਰਿਵਾਰੇਨ ਮਹਾਸਤ੍ਤਂ ਗਾਮਨਿਗਮਰਾਜਧਾਨੀਸੁ ਕੀਲ਼ਾਪੇਨ੍ਤੋ ਬਾਰਾਣਸਿਯਂ ਉਗ੍ਗਸੇਨਰਞ੍ਞੋ ਸਨ੍ਤਿਕੇ ਕੀਲ਼ਾਪੇਤ੍ਵਾ ਵਿਸ੍ਸਜ੍ਜੇਸ੍ਸਾਮੀ’’ਤਿ ਅਗਮਾਸਿ. ਸੋ ਮਣ੍ਡੂਕੇ ਮਾਰੇਤ੍ਵਾ ਨਾਗਰਞ੍ਞੋ ਦੇਤਿ. ਨਾਗਰਾਜਾ ‘‘ਪੁਨਪ੍ਪੁਨਂ ਮਂ ਨਿਸ੍ਸਾਯ ਮਾਰੇਸ੍ਸਤੀ’’ਤਿ ਨ ਖਾਦਤਿ. ਅਥਸ੍ਸ ਮਧੁਲਾਜੇ ਅਦਾਸਿ. ਤੇਪਿ ‘‘ਸਚਾਹਂ ਗੋਚਰਂ ਗਣ੍ਹਿਸ੍ਸਾਮਿ, ਅਨ੍ਤੋਪੇਲ਼ਾਯਮੇਵ ਮਰਣਂ ਭਵਿਸ੍ਸਤੀ’’ਤਿ ਨ ਖਾਦਤਿ.

੨੧. ਬ੍ਰਾਹ੍ਮਣੋ ਮਾਸਮਤ੍ਤੇਨ ਬਾਰਾਣਸਿਂ ਪਤ੍ਵਾ ਦ੍ਵਾਰਗਾਮਕੇ ਤਂ ਕੀਲ਼ਾਪੇਨ੍ਤੋ ਬਹੁਧਨਂ ਲਭਿ. ਰਾਜਾਪਿ ਨਂ ਪਕ੍ਕੋਸਾਪੇਤ੍ਵਾ ‘‘ਅਮ੍ਹਾਕਮ੍ਪਿ ਕੀਲ਼ਾਪੇਹੀ’’ਤਿ ਆਹ. ‘‘ਸਾਧੁ, ਦੇਵ, ਸ੍ਵੇ ਪਨ੍ਨਰਸੇ ਤੁਮ੍ਹਾਕਂ ਕੀਲ਼ਾਪੇਸ੍ਸਾਮੀ’’ਤਿ ਆਹ. ਰਾਜਾ ‘‘ਸ੍ਵੇ ਨਾਗਰਾਜਾ ਰਾਜਙ੍ਗਣੇ ਨਚ੍ਚਿਸ੍ਸਤਿ, ਮਹਾਜਨੋ ਸਨ੍ਨਿਪਤਿਤ੍ਵਾ ਪਸ੍ਸਤੂ’’ਤਿ ਭੇਰਿਂ ਚਰਾਪੇਤ੍ਵਾ ਪੁਨਦਿਵਸੇ ਰਾਜਙ੍ਗਣਂ ਅਲਙ੍ਕਾਰਾਪੇਤ੍ਵਾ ਬ੍ਰਾਹ੍ਮਣਂ ਪਕ੍ਕੋਸਾਪੇਸਿ. ਸੋ ਰਤਨਪੇਲ਼ਾਯ ਮਹਾਸਤ੍ਤਂ ਨੇਤ੍ਵਾ ਵਿਚਿਤ੍ਤਤ੍ਥਰੇ ਪੇਲ਼ਂ ਠਪੇਤ੍ਵਾ ਨਿਸੀਦਿ. ਰਾਜਾਪਿ ਪਾਸਾਦਾ ਓਰੁਯ੍ਹ ਮਹਾਜਨਪਰਿਵੁਤੋ ਰਾਜਾਸਨੇ ਨਿਸੀਦਿ. ਬ੍ਰਾਹ੍ਮਣੋ ਮਹਾਸਤ੍ਤਂ ਨੀਹਰਿਤ੍ਵਾ ਨਚ੍ਚਾਪੇਸਿ. ਮਹਾਸਤ੍ਤੋ ਤੇਨ ਚਿਨ੍ਤਿਤਚਿਨ੍ਤਿਤਾਕਾਰਂ ਦਸ੍ਸੇਸਿ. ਮਹਾਜਨੋ ਸਕਭਾਵੇਨ ਸਨ੍ਧਾਰੇਤੁਂ ਨ ਸਕ੍ਕੋਤਿ. ਚੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤਨ੍ਤਿ. ਬੋਧਿਸਤ੍ਤਸ੍ਸ ਉਪਰਿ ਰਤਨਵਸ੍ਸਂ ਵਸ੍ਸਿ. ਤੇਨ ਵੁਤ੍ਤਂ ‘‘ਤਦਾਪਿ ਮਂ ਧਮ੍ਮਚਾਰਿ’’ਨ੍ਤਿਆਦਿ.

ਤਤ੍ਥ ਤਦਾਪੀਤਿ ਯਦਾਹਂ ਚਮ੍ਪੇਯ੍ਯਕੋ ਨਾਗਰਾਜਾ ਹੋਮਿ, ਤਦਾਪਿ. ਧਮ੍ਮਚਾਰਿਨ੍ਤਿ ਦਸਕੁਸਲਕਮ੍ਮਪਥਧਮ੍ਮਂ ਏਵ ਚਰਤਿ, ਨ ਅਣੁਮਤ੍ਤਮ੍ਪਿ ਅਧਮ੍ਮਨ੍ਤਿ ਧਮ੍ਮਚਾਰੀ. ਉਪਵੁਟ੍ਠਉਪੋਸਥਨ੍ਤਿ ਅਟ੍ਠਙ੍ਗਸਮਨ੍ਨਾਗਤਸ੍ਸ ਅਰਿਯੁਪੋਸਥਸੀਲਸ੍ਸ ਰਕ੍ਖਣਵਸੇਨ ਉਪਵਸਿਤਉਪੋਸਥਂ. ਰਾਜਦ੍ਵਾਰਮ੍ਹਿ ਕੀਲ਼ਤੀਤਿ ਬਾਰਾਣਸਿਯਂ ਉਗ੍ਗਸੇਨਰਞ੍ਞੋ ਗੇਹਦ੍ਵਾਰੇ ਕੀਲ਼ਾਪੇਤਿ.

੨੨. ਯਂ ਯਂ ਸੋ ਵਣ੍ਣਂ ਚਿਨ੍ਤਯੀਤਿ ਸੋ ਅਹਿਤੁਣ੍ਡਿਕਬ੍ਰਾਹ੍ਮਣੋ ‘‘ਯਂ ਯਂ ਨੀਲਾਦਿਵਣ੍ਣਂ ਹੋਤੂ’’ਤਿ ਚਿਨ੍ਤੇਸਿ. ਤੇਨ ਵੁਤ੍ਤਂ ‘‘ਨੀਲਂ ਵ ਪੀਤਲੋਹਿਤ’’ਨ੍ਤਿ. ਤਤ੍ਥ ਨੀਲਂ ਵਾਤਿ ਵਾ-ਸਦ੍ਦੋ ਅਨਿਯਮਤ੍ਥੋ, ਗਾਥਾਸੁਖਤ੍ਥਂ ਰਸ੍ਸਂ ਕਤ੍ਵਾ ਵੁਤ੍ਤੋ, ਤੇਨ ਵਾਸਦ੍ਦੇਨ ਵੁਤ੍ਤਾਵਸਿਟ੍ਠਂ ਓਦਾਤਾਦਿਵਣ੍ਣਵਿਸੇਸਞ੍ਚੇਵ ਵਟ੍ਟਾਦਿਸਣ੍ਠਾਨਵਿਸੇਸਞ੍ਚ ਅਣੁਂਥੂਲਾਦਿਪਮਾਣਵਿਸੇਸਞ੍ਚ ਸਙ੍ਗਣ੍ਹਾਤਿ. ਤਸ੍ਸ ਚਿਤ੍ਤਾਨੁਵਤ੍ਤਨ੍ਤੋਤਿ ਤਸ੍ਸ ਅਹਿਤੁਣ੍ਡਿਕਸ੍ਸ ਚਿਤ੍ਤਂ ਅਨੁਵਤ੍ਤਨ੍ਤੋ. ਚਿਨ੍ਤਿਤਸਨ੍ਨਿਭੋਤਿ ਤੇਨ ਚਿਨ੍ਤਿਤਚਿਨ੍ਤਿਤਾਕਾਰੇਨ ਪੇਕ੍ਖਜਨਸ੍ਸ ਉਪਟ੍ਠਹਾਮੀਤਿ ਦਸ੍ਸੇਤਿ.

੨੩. ਨ ਕੇਵਲਞ੍ਚ ਤੇਨ ਚਿਨ੍ਤਿਤਾਕਾਰਦਸ੍ਸਨਂ ਏਵ ਮਯ੍ਹਂ ਆਨੁਭਾਵੋ. ਅਪਿ ਚ ਥਲਂ ਕਰੇਯ੍ਯਮੁਦਕਂ, ਉਦਕਮ੍ਪਿ ਥਲਂ ਕਰੇਤਿ ਥਲਂ ਮਹਾਪਥਵਿਂ ਗਹੇਤ੍ਵਾ ਉਦਕਂ, ਉਦਕਮ੍ਪਿ ਗਹੇਤ੍ਵਾ ਪਥਵਿਂ ਕਾਤੁਂ ਸਕ੍ਕੁਣੇਯ੍ਯਂ ਏਵਂ ਮਹਾਨੁਭਾਵੋ ਚ. ਯਦਿਹਂ ਤਸ੍ਸ ਕੁਪ੍ਪੇਯ੍ਯਨ੍ਤਿ ਤਸ੍ਸ ਅਹਿਤੁਣ੍ਡਿਕਸ੍ਸ ਅਹਂ ਯਦਿ ਕੁਜ੍ਝੇਯ੍ਯਂ. ਖਣੇਨ ਛਾਰਿਕਂ ਕਰੇਤਿ ਕੋਧੁਪ੍ਪਾਦਕ੍ਖਣੇ ਏਵ ਭਸ੍ਮਂ ਕਰੇਯ੍ਯਂ.

੨੪. ਏਵਂ ਭਗਵਾ ਤਦਾ ਅਤ੍ਤਨੋ ਉਪ੍ਪਜ੍ਜਨਕਾਨਤ੍ਥਪਟਿਬਾਹਨੇ ਸਮਤ੍ਥਤਂ ਦਸ੍ਸੇਤ੍ਵਾ ਇਦਾਨਿ ਯੇਨ ਅਧਿਪ੍ਪਾਯੇਨ ਤਂ ਪਟਿਬਾਹਨਂ ਨ ਕਤਂ, ਤਂ ਦਸ੍ਸੇਤੁਂ ‘‘ਯਦਿ ਚਿਤ੍ਤਵਸੀ ਹੇਸ੍ਸ’’ਨ੍ਤਿਆਦਿਮਾਹ.

ਤਸ੍ਸਤ੍ਥੋ – ‘‘ਅਯਂ ਅਹਿਤੁਣ੍ਡਿਕੋ ਮਂ ਅਤਿਵਿਯ ਬਾਧਤਿ, ਨ ਮੇ ਆਨੁਭਾਵਂ ਜਾਨਾਤਿ, ਹਨ੍ਦਸ੍ਸ ਮੇ ਆਨੁਭਾਵਂ ਦਸ੍ਸੇਸ੍ਸਾਮੀ’’ਤਿ ਕੁਜ੍ਝਿਤ੍ਵਾ ਓਲੋਕਨਮਤ੍ਤੇਨਾਪਿ ਯਦਿ ਚਿਤ੍ਤਵਸੀ ਅਭਵਿਸ੍ਸਂ, ਅਥ ਸੋ ਭੁਸਮੁਟ੍ਠਿ ਵਿਯ ਵਿਪ੍ਪਕਿਰਿਸ੍ਸਤਿ. ਅਹਂ ਯਥਾਸਮਾਦਿਨ੍ਨਤੋ ਪਰਿਹਾਯਿਸ੍ਸਾਮਿ ਸੀਲਤੋ. ਤਥਾ ਚ ਸਤਿ ਸੀਲੇਨ ਪਰਿਹੀਨਸ੍ਸ ਖਣ੍ਡਿਤਸੀਲਸ੍ਸ ਯ੍ਵਾਯਂ ਮਯਾ ਦੀਪਙ੍ਕਰਦਸਬਲਸ੍ਸ ਪਾਦਮੂਲਤੋ ਪਟ੍ਠਾਯ ਅਭਿਪਤ੍ਥਿਤੋ, ਉਤ੍ਤਮਤ੍ਥੋ ਬੁਦ੍ਧਭਾਵੋ ਸੋ ਨ ਸਿਜ੍ਝਤਿ.

੨੫. ਕਾਮਂ ਭਿਜ੍ਜਤੁਯਂ ਕਾਯੋਤਿ ਅਯਂ ਚਾਤੁਮਹਾਭੂਤਿਕੋ ਓਦਨਕੁਮ੍ਮਾਸੂਪਚਯੋ ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮੋ ਕਾਯੋ ਕਿਞ੍ਚਾਪਿ ਭਿਜ੍ਜਤੁ ਵਿਨਸ੍ਸਤੁ, ਇਧੇਵ ਇਮਸ੍ਮਿਂ ਏਵ ਠਾਨੇ ਮਹਾਵਾਤੇ ਖਿਤ੍ਤਭੁਸਮੁਟ੍ਠਿ ਵਿਯ ਵਿਪ੍ਪਕਿਰੀਯਤੁ, ਨੇਵ ਸੀਲਂ ਪਭਿਨ੍ਦੇਯ੍ਯਂ, ਵਿਕਿਰਨ੍ਤੇ ਭੁਸਂ ਵਿਯਾਤਿ ਸੀਲਂ ਪਨ ਉਤ੍ਤਮਤ੍ਥਸਿਦ੍ਧਿਯਾ ਹੇਤੁਭੂਤਂ ਇਮਸ੍ਮਿਂ ਕਲ਼ੇਵਰੇ ਭੁਸਮੁਟ੍ਠਿ ਵਿਯ ਵਿਪ੍ਪਕਿਰਨ੍ਤੇਪਿ ਨੇਵ ਭਿਨ੍ਦੇਯ੍ਯਂ, ਕਾਯਜੀਵਿਤੇਸੁ ਨਿਰਪੇਕ੍ਖੋ ਹੁਤ੍ਵਾ ਸੀਲਪਾਰਮਿਂਯੇਵ ਪੂਰੇਮੀਤਿ ਚਿਨ੍ਤੇਤ੍ਵਾ ਤਂ ਤਾਦਿਸਂ ਦੁਕ੍ਖਂ ਤਦਾ ਅਧਿਵਾਸੇਸਿਨ੍ਤਿ ਦਸ੍ਸੇਤਿ.

ਅਥ ਮਹਾਸਤ੍ਤਸ੍ਸ ਪਨ ਅਹਿਤੁਣ੍ਡਿਕਹਤ੍ਥਗਤਸ੍ਸ ਮਾਸੋ ਪਰਿਪੂਰਿ, ਏਤ੍ਤਕਂ ਕਾਲਂ ਨਿਰਾਹਾਰੋਵ ਅਹੋਸਿ. ਸੁਮਨਾ ‘‘ਅਤਿਚਿਰਾਯਤਿ ਮੇ ਸਾਮਿਕੋ, ਕੋ ਨੁ ਖੋ ਪਵਤ੍ਤੀ’’ਤਿ ਪੋਕ੍ਖਰਣਿਂ ਓਲੋਕੇਨ੍ਤੀ ਲੋਹਿਤਵਣ੍ਣਂ ਉਦਕਂ ਦਿਸ੍ਵਾ ‘‘ਅਹਿਤੁਣ੍ਡਿਕੇਨ ਗਹਿਤੋ ਭਵਿਸ੍ਸਤੀ’’ਤਿ ਞਤ੍ਵਾ ਨਾਗਭਵਨਾ ਨਿਕ੍ਖਮਿਤ੍ਵਾ ਵਮ੍ਮਿਕਸਨ੍ਤਿਕਂ ਗਨ੍ਤ੍ਵਾ ਮਹਾਸਤ੍ਤਸ੍ਸ ਗਹਿਤਟ੍ਠਾਨਂ ਕਿਲਮਿਤਟ੍ਠਾਨਞ੍ਚ ਦਿਸ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਪਚ੍ਚਨ੍ਤਗਾਮਂ ਗਨ੍ਤ੍ਵਾ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਰਾਜਦ੍ਵਾਰੇ ਆਕਾਸੇ ਰੋਦਮਾਨਾ ਅਟ੍ਠਾਸਿ. ਮਹਾਸਤ੍ਤੋ ਨਚ੍ਚਨ੍ਤੋਵ ਆਕਾਸਂ ਉਲ੍ਲੋਕੇਨ੍ਤੋ ਤਂ ਦਿਸ੍ਵਾ ਲਜ੍ਜਿਤੋ ਪੇਲ਼ਂ ਪਵਿਸਿਤ੍ਵਾ ਨਿਪਜ੍ਜਿ.

ਰਾਜਾ ਤਸ੍ਸ ਪੇਲ਼ਂ ਪਵਿਟ੍ਠਕਾਲੇ ‘‘ਕਿਂ ਨੁ ਖੋ ਕਾਰਣ’’ਨ੍ਤਿ ਇਤੋ ਚਿਤੋ ਚ ਓਲੋਕੇਨ੍ਤੋ ਤਂ ਆਕਾਸੇ ਠਿਤਂ ਦਿਸ੍ਵਾ ‘‘ਕਾ ਨੁ ਤ੍ਵ’’ਨ੍ਤਿ ਪੁਚ੍ਛਿਤ੍ਵਾ ਤਸ੍ਸਾ ਨਾਗਕਞ੍ਞਾਭਾਵਂ ਸੁਤ੍ਵਾ ‘‘ਨਿਸ੍ਸਂਸਯਂ ਖੋ ਨਾਗਰਾਜਾ ਇਮਂ ਦਿਸ੍ਵਾ ਲਜ੍ਜਿਤੋ ਪੇਲ਼ਂ ਪਵਿਟ੍ਠੋ, ਅਯਞ੍ਚ ਯਥਾਦਸ੍ਸਿਤੋ ਇਦ੍ਧਾਨੁਭਾਵੋ ਨਾਗਰਾਜਸ੍ਸੇਵ, ਨ ਅਹਿਤੁਣ੍ਡਿਕਸ੍ਸਾ’’ਤਿ ਨਿਟ੍ਠਂ ਗਨ੍ਤ੍ਵਾ ‘‘ਏਵਂ ਮਹਾਨੁਭਾਵੋ ਅਯਂ ਨਾਗਰਾਜਾ, ਕਥਂ ਨਾਮ ਇਮਸ੍ਸ ਹਤ੍ਥਂ ਗਤੋ’’ਤਿ ਪੁਚ੍ਛਿਤ੍ਵਾ ‘‘ਅਯਂ ਧਮ੍ਮਚਾਰੀ ਸੀਲਵਾ ਨਾਗਰਾਜਾ, ਚਾਤੁਦ੍ਦਸੀਪਨ੍ਨਰਸੀਸੁ ਉਪੋਸਥਂ ਉਪਵਸਨ੍ਤੋ ਅਤ੍ਤਨੋ ਸਰੀਰਂ ਦਾਨਮੁਖੇ ਨਿਯ੍ਯਾਤੇਤ੍ਵਾ ਮਹਾਮਗ੍ਗਸਮੀਪੇ ਵਮ੍ਮਿਕਮਤ੍ਥਕੇ ਨਿਪਜ੍ਜਤਿ, ਤਤ੍ਥਾਯਮੇਤੇਨ ਗਹਿਤੋ, ਇਮਸ੍ਸ ਦੇਵਚ੍ਛਰਾਪਟਿਭਾਗਾ ਅਨੇਕਸਹਸ੍ਸਾ ਇਤ੍ਥਿਯੋ, ਦੇਵਲੋਕਸਮ੍ਪਤ੍ਤਿਸਦਿਸਾ ਨਾਗਭਵਨਸਮ੍ਪਤ੍ਤਿ, ਅਯਂ ਮਹਿਦ੍ਧਿਕੋ ਮਹਾਨੁਭਾਵੋ ਸਕਲਪਥਵਿਂ ਪਰਿਵਤ੍ਤੇਤੁਂ ਸਮਤ੍ਥੋ, ਕੇਵਲਂ ‘ਸੀਲਂ ਮੇ ਭਿਜ੍ਜਿਸ੍ਸਤੀ’ਤਿ ਏਵਰੂਪਂ ਵਿਪ੍ਪਕਾਰਂ ਦੁਕ੍ਖਞ੍ਚ ਅਨੁਭੋਤੀ’’ਤਿ ਚ ਸੁਤ੍ਵਾ ਸਂਵੇਗਪ੍ਪਤ੍ਤੋ ਤਾਵਦੇਵ ਤਸ੍ਸ ਅਹਿਤੁਣ੍ਡਿਕਸ੍ਸ ਬ੍ਰਾਹ੍ਮਣਸ੍ਸ ਬਹੁਂ ਧਨਂ ਮਹਨ੍ਤਞ੍ਚ ਯਸਂ ਇਸ੍ਸਰਿਯਞ੍ਚ ਦਤ੍ਵਾ – ‘‘ਹਨ੍ਦ, ਭੋ, ਇਮਂ ਨਾਗਰਾਜਾਨਂ ਵਿਸ੍ਸਜ੍ਜੇਹੀ’’ਤਿ ਵਿਸ੍ਸਜ੍ਜਾਪੇਸਿ.

ਮਹਾਸਤ੍ਤੋ ਨਾਗਵਣ੍ਣਂ ਅਨ੍ਤਰਧਾਪੇਤ੍ਵਾ ਮਾਣਵਕਵਣ੍ਣੇਨ ਦੇਵਕੁਮਾਰੋ ਵਿਯ ਅਟ੍ਠਾਸਿ. ਸੁਮਨਾਪਿ ਆਕਾਸਤੋ ਓਤਰਿਤ੍ਵਾ ਤਸ੍ਸ ਸਨ੍ਤਿਕੇ ਅਟ੍ਠਾਸਿ. ਨਾਗਰਾਜਾ ਰਞ੍ਞੋ ਅਞ੍ਜਲਿਂ ਕਤ੍ਵਾ ‘‘ਏਹਿ, ਮਹਾਰਾਜ, ਮਯ੍ਹਂ ਨਿਵੇਸਨਂ ਪਸ੍ਸਿਤੁਂ ਆਗਚ੍ਛਾਹੀ’’ਤਿ ਯਾਚਿ. ਤੇਨਾਹ ਭਗਵਾ –

‘‘ਮੁਤ੍ਤੋ ਚਮ੍ਪੇਯ੍ਯਕੋ ਨਾਗੋ, ਰਾਜਾਨਂ ਏਤਦਬ੍ਰਵਿ;

‘ਨਮੋ ਤੇ ਕਾਸਿਰਾਜਤ੍ਥੁ, ਨਮੋ ਤੇ ਕਾਸਿਵਡ੍ਢਨ;

ਅਞ੍ਜਲਿਂ ਤੇ ਪਗ੍ਗਣ੍ਹਾਮਿ, ਪਸ੍ਸੇਯ੍ਯਂ ਮੇ ਨਿਵੇਸਨ’’ਨ੍ਤਿ.

ਅਥ ਰਾਜਾ ਤਸ੍ਸ ਨਾਗਭਵਨਗਮਨਂ ਅਨੁਜਾਨਿ. ਮਹਾਸਤ੍ਤੋ ਤਂ ਸਪਰਿਸਂ ਗਹੇਤ੍ਵਾ ਨਾਗਭਵਨਂ ਨੇਤ੍ਵਾ ਅਤ੍ਤਨੋ ਇਸ੍ਸਰਿਯਸਮ੍ਪਤ੍ਤਿਂ ਦਸ੍ਸੇਤ੍ਵਾ ਕਤਿਪਾਹਂ ਤਤ੍ਥ ਵਸਾਪੇਤ੍ਵਾ ਭੇਰਿਂ ਚਰਾਪੇਸਿ – ‘‘ਸਬ੍ਬਾ ਰਾਜਪਰਿਸਾ ਯਾਵਦਿਚ੍ਛਕਂ ਹਿਰਞ੍ਞਸੁਵਣ੍ਣਾਦਿਕਂ ਧਨਂ ਗਣ੍ਹਤੂ’’ਤਿ. ਰਞ੍ਞੋ ਚ ਅਨੇਕੇਹਿ ਸਕਟਸਤੇਹਿ ਧਨਂ ਪੇਸੇਸਿ. ‘‘ਮਹਾਰਾਜ, ਰਞ੍ਞਾ ਨਾਮ ਦਾਨਂ ਦਾਤਬ੍ਬਂ, ਸੀਲਂ ਰਕ੍ਖਿਤਬ੍ਬਂ, ਧਮ੍ਮਿਕਾ ਰਕ੍ਖਾਵਰਣਗੁਤ੍ਤਿ ਸਬ੍ਬਤ੍ਥ ਸਂਵਿਦਹਿਤਬ੍ਬਾ’’ਤਿ ਦਸਹਿ ਰਾਜਧਮ੍ਮਕਥਾਹਿ ਓਵਦਿਤ੍ਵਾ ਵਿਸ੍ਸਜ੍ਜੇਸਿ. ਰਾਜਾ ਮਹਨ੍ਤੇਨ ਯਸੇਨ ਨਾਗਭਵਨਾ ਨਿਕ੍ਖਮਿਤ੍ਵਾ ਬਾਰਾਣਸਿਮੇਵ ਗਤੋ. ਤਤੋ ਪਟ੍ਠਾਯ ਕਿਰ ਜਮ੍ਬੁਦੀਪਤਲੇ ਹਿਰਞ੍ਞਸੁਵਣ੍ਣਂ ਜਾਤਂ. ਮਹਾਸਤ੍ਤੋ ਸੀਲਾਨਿ ਰਕ੍ਖਿਤ੍ਵਾ ਅਨ੍ਵਦ੍ਧਮਾਸਂ ਉਪੋਸਥਕਮ੍ਮਂ ਕਤ੍ਵਾ ਸਪਰਿਸੋ ਸਗ੍ਗਪੁਰਂ ਪੂਰੇਸਿ.

ਤਦਾ ਅਹਿਤੁਣ੍ਡਿਕੋ ਦੇਵਦਤ੍ਤੋ ਅਹੋਸਿ, ਸੁਮਨਾ ਰਾਹੁਲਮਾਤਾ, ਉਗ੍ਗਸੇਨੋ ਸਾਰਿਪੁਤ੍ਤਤ੍ਥੇਰੋ, ਚਮ੍ਪੇਯ੍ਯਕੋ ਨਾਗਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਇਧ ਬੋਧਿਸਤ੍ਤਸ੍ਸ ਅਚ੍ਛਰਿਯਾਨੁਭਾਵਾ ਹੇਟ੍ਠਾ ਵੁਤ੍ਤਨਯਾ ਏਵਾਤਿ.

ਚਮ੍ਪੇਯ੍ਯਨਾਗਚਰਿਯਾਵਣ੍ਣਨਾ ਨਿਟ੍ਠਿਤਾ.

੪. ਚੂਲ਼ਬੋਧਿਚਰਿਯਾਵਣ੍ਣਨਾ

੨੬. ਚਤੁਤ੍ਥੇ ਚੂਲ਼ਬੋਧੀਤਿ ਮਹਾਬੋਧਿਪਰਿਬ੍ਬਾਜਕਤ੍ਤਭਾਵਂ ਉਪਾਦਾਯ ਇਧ ‘‘ਚੂਲ਼ਬੋਧੀ’’ਤਿ ਸਮਞ੍ਞਾ ਆਰੋਪਿਤਾ, ਨ ਪਨ ਇਮਸ੍ਮਿਂ ਏਵ ਜਾਤਕੇ (ਜਾ. ੧.੧੦.੪੯ ਆਦਯੋ) ਅਤ੍ਤਨੋ ਜੇਟ੍ਠਭਾਤਿਕਾਦਿਨੋ ਮਹਾਬੋਧਿਸ੍ਸ ਸਮ੍ਭਵਤੋਤਿ ਦਟ੍ਠਬ੍ਬਂ. ਸੁਸੀਲਵਾਤਿ ਸੁਟ੍ਠੁ ਸੀਲਵਾ, ਸਮ੍ਪਨ੍ਨਸੀਲੋਤਿ ਅਤ੍ਥੋ. ਭਵਂ ਦਿਸ੍ਵਾਨ ਭਯਤੋਤਿ ਕਾਮਾਦਿਭਵਂ ਭਾਯਿਤਬ੍ਬਭਾਵੇਨ ਪਸ੍ਸਿਤ੍ਵਾ. ਨੇਕ੍ਖਮ੍ਮਨ੍ਤਿ ਏਤ੍ਥ ਚ-ਸਦ੍ਦਸ੍ਸ ਲੋਪੋ ਦਟ੍ਠਬ੍ਬੋ, ਤੇਨ ‘‘ਦਿਸ੍ਵਾਨਾ’’ਤਿ ਪਦਂ ਆਕਡ੍ਢੀਯਤਿ. ਇਦਂ ਵੁਤ੍ਤਂ ਹੋਤਿ – ਜਾਤਿਜਰਾਬ੍ਯਾਧਿਮਰਣਂ ਅਪਾਯਦੁਕ੍ਖਂ ਅਤੀਤੇ ਵਟ੍ਟਮੂਲਕਂ ਦੁਕ੍ਖਂ, ਅਨਾਗਤੇ ਵਟ੍ਟਮੂਲਕਂ ਦੁਕ੍ਖਂ, ਪਚ੍ਚੁਪ੍ਪਨ੍ਨੇ ਆਹਾਰਪਰਿਯੇਟ੍ਠਿਮੂਲਕਂ ਦੁਕ੍ਖਨ੍ਤਿ ਇਮੇਸਂ ਅਟ੍ਠਨ੍ਨਂ ਸਂਵੇਗਵਤ੍ਥੂਨਂ ਪਚ੍ਚਵੇਕ੍ਖਣੇਨ ਸਬ੍ਬਮ੍ਪਿ ਕਾਮਾਦਿਭੇਦਂ ਭਵਂ ਸਂਸਾਰਭਯਤੋ ਉਪਟ੍ਠਹਮਾਨਂ ਦਿਸ੍ਵਾ ਨਿਬ੍ਬਾਨਂ ਤਸ੍ਸ ਉਪਾਯਭੂਤਾ ਸਮਥਵਿਪਸ੍ਸਨਾ ਤਦੁਪਾਯਭੂਤਾ ਚ ਪਬ੍ਬਜ੍ਜਾਤਿ ਇਦਂ ਤਿਵਿਧਮ੍ਪਿ ਨੇਕ੍ਖਮ੍ਮਂ ਅਨੁਸ੍ਸਵਾਦਿਸਿਦ੍ਧੇਨ ਞਾਣਚਕ੍ਖੁਨਾ ਤਪ੍ਪਟਿਪਕ੍ਖਤੋ ਦਿਸ੍ਵਾ ਤਾਪਸਪਬ੍ਬਜ੍ਜੂਪਗਮਨੇਨ ਅਨੇਕਾਦੀਨਵਾਕੁਲਾ ਗਹਟ੍ਠਭਾਵਾ ਅਭਿਨਿਕ੍ਖਮਿਤ੍ਵਾ ਗਤੋਤਿ.

੨੭. ਦੁਤਿਯਿਕਾਤਿ ਪੋਰਾਣਦੁਤਿਯਿਕਾ, ਗਿਹਿਕਾਲੇ ਪਜਾਪਤਿਭੂਤਾ. ਕਨਕਸਨ੍ਨਿਭਾਤਿ ਕਞ੍ਚਨਸਨ੍ਨਿਭਤ੍ਤਚਾ. ਵਟ੍ਟੇ ਅਨਪੇਕ੍ਖਾਤਿ ਸਂਸਾਰੇ ਨਿਰਾਲਯਾ. ਨੇਕ੍ਖਮ੍ਮਂ ਅਭਿਨਿਕ੍ਖਮੀਤਿ ਨੇਕ੍ਖਮ੍ਮਤ੍ਥਾਯ ਗੇਹਤੋ ਨਿਕ੍ਖਮਿ, ਪਬ੍ਬਜੀਤਿ ਅਤ੍ਥੋ.

੨੮. ਆਲਯਨ੍ਤਿ ਸਤ੍ਤਾ ਏਤੇਨਾਤਿ ਆਲਯੋ, ਤਣ੍ਹਾ, ਤਦਭਾਵੇਨ ਨਿਰਾਲਯਾ. ਤਤੋ ਏਵ ਞਾਤੀਸੁ ਤਣ੍ਹਾਬਨ੍ਧਨਸ੍ਸ ਛਿਨ੍ਨਤ੍ਤਾ ਛਿਨ੍ਨਬਨ੍ਧੁ. ਏਵਂ ਗਿਹਿਬਨ੍ਧਨਾਭਾਵਂ ਦਸ੍ਸੇਤ੍ਵਾ ਇਦਾਨਿ ਪਬ੍ਬਜਿਤਾਨਮ੍ਪਿ ਕੇਸਞ੍ਚਿ ਯਂ ਹੋਤਿ ਬਨ੍ਧਨਂ, ਤਸ੍ਸਾਪਿ ਅਭਾਵਂ ਦਸ੍ਸੇਤੁਂ ‘‘ਅਨਪੇਕ੍ਖਾ ਕੁਲੇ ਗਣੇ’’ਤਿ ਵੁਤ੍ਤਂ. ਤਤ੍ਥ ਕੁਲੇਤਿ ਉਪਟ੍ਠਾਕਕੁਲੇ. ਗਣੇਤਿ ਤਾਪਸਗਣੇ, ਸੇਸਾ ਬ੍ਰਹ੍ਮਚਾਰਿਨੋਤਿ ਵੁਚ੍ਚਨ੍ਤਿ. ਉਪਾਗਮੁਨ੍ਤਿ ਉਭੋਪਿ ਮਯਂ ਉਪਾਗਮਿਮ੍ਹਾ.

੨੯. ਤਤ੍ਥਾਤਿ ਬਾਰਾਣਸਿਸਾਮਨ੍ਤੇ. ਨਿਪਕਾਤਿ ਪਞ੍ਞਵਨ੍ਤੋ. ਨਿਰਾਕੁਲੇਤਿ ਜਨਸਞ੍ਚਾਰਰਹਿਤਤ੍ਤਾ ਜਨੇਹਿ ਅਨਾਕੁਲੇ, ਅਪ੍ਪਸਦ੍ਦੇਤਿ ਮਿਗਪਕ੍ਖੀਨਂ ਉਟ੍ਠਾਪਨਤੋ ਤੇਸਂ ਵਸ੍ਸਿਤਸਦ੍ਦੇਨਾਪਿ ਵਿਰਹਿਤਤ੍ਤਾ ਅਪ੍ਪਸਦ੍ਦੇ. ਰਾਜੁਯ੍ਯਾਨੇ ਵਸਾਮੁਭੋਤਿ ਬਾਰਾਣਸਿਰਞ੍ਞੋ ਉਯ੍ਯਾਨੇ ਮਯਂ ਉਭੋ ਜਨਾ ਤਦਾ ਵਸਾਮ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਇਮਸ੍ਮਿਂ ਏਵ ਭਦ੍ਦਕਪ੍ਪੇ ਬੋਧਿਸਤ੍ਤੋ ਬ੍ਰਹ੍ਮਲੋਕਤੋ ਚਵਿਤ੍ਵਾ ਅਞ੍ਞਤਰਸ੍ਮਿਂ ਕਾਸਿਗਾਮੇ ਏਕਸ੍ਸ ਮਹਾਵਿਭਵਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਸਮਯੇ ‘‘ਬੋਧਿਕੁਮਾਰੋ’’ਤਿ ਨਾਮਂ ਕਰਿਂਸੁ. ਵਯਪ੍ਪਤ੍ਤਕਾਲੇ ਪਨਸ੍ਸ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਚ੍ਚਾਗਤਸ੍ਸ ਅਨਿਚ੍ਛਮਾਨਕਸ੍ਸੇਵ ਮਾਤਾਪਿਤਰੋ ਸਮਜਾਤਿਕਂ ਕੁਲਕੁਮਾਰਿਕਂ ਆਨੇਸੁਂ. ਸਾਪਿ ਬ੍ਰਹ੍ਮਲੋਕਚੁਤਾਵ ਉਤ੍ਤਮਰੂਪਧਰਾ ਦੇਵਚ੍ਛਰਾਪਟਿਭਾਗਾ. ਤੇਸਂ ਅਨਿਚ੍ਛਮਾਨਾਨਂ ਏਵ ਅਞ੍ਞਮਞ੍ਞਂ ਆਵਾਹਵਿਵਾਹਂ ਕਰਿਂਸੁ. ਉਭਿਨ੍ਨਮ੍ਪਿ ਪਨ ਨੇਸਂ ਕਿਲੇਸਮੁਦਾਚਾਰੋ ਨ ਭੂਤਪੁਬ੍ਬੋ, ਸਾਰਾਗਵਸੇਨ ਅਞ੍ਞਮਞ੍ਞਂ ਓਲੋਕਨਮ੍ਪਿ ਨਾਹੋਸਿ, ਕਾ ਪਨ ਕਥਾ ਇਤਰਸਂਸਗ੍ਗੇ. ਏਵਂ ਪਰਿਸੁਦ੍ਧਸੀਲਾ ਅਹੇਸੁਂ.

ਅਪਰਭਾਗੇ ਮਹਾਸਤ੍ਤੋ ਮਾਤਾਪਿਤੂਸੁ ਕਾਲਂਕਤੇਸੁ ਤੇਸਂ ਸਰੀਰਕਿਚ੍ਚਂ ਕਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਭਦ੍ਦੇ, ਤ੍ਵਂ ਇਮਂ ਅਸੀਤਿਕੋਟਿਧਨਂ ਗਹੇਤ੍ਵਾ ਸੁਖੇਨ ਜੀਵਾਹੀ’’ਤਿ ਆਹ. ‘‘ਤ੍ਵਂ ਪਨ ਅਯ੍ਯਪੁਤ੍ਤਾ’’ਤਿ? ‘‘ਮਯ੍ਹਂ ਧਨੇਨ ਕਿਚ੍ਚਂ ਨਤ੍ਥਿ, ਪਬ੍ਬਜਿਸ੍ਸਾਮੀ’’ਤਿ. ‘‘ਕਿਂ ਪਨ ਪਬ੍ਬਜ੍ਜਾ ਇਤ੍ਥੀਨਮ੍ਪਿ ਨ ਵਟ੍ਟਤੀ’’ਤਿ? ‘‘ਵਟ੍ਟਤਿ, ਭਦ੍ਦੇ’’ਤਿ. ‘‘ਤੇਨ ਹਿ ਮਯ੍ਹਮ੍ਪਿ ਧਨੇਨ ਕਿਚ੍ਚਂ ਨਤ੍ਥਿ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ਤੇ ਉਭੋਪਿ ਸਬ੍ਬਂ ਵਿਭਵਂ ਪਰਿਚ੍ਚਜਿਤ੍ਵਾ ਮਹਾਦਾਨਂ ਦਤ੍ਵਾ ਨਿਕ੍ਖਮਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਫਲਾਫਲੇਹਿ ਯਾਪੇਨ੍ਤਾ ਪਬ੍ਬਜ੍ਜਾਸੁਖੇਨੇਵ ਦਸ ਸਂਵਚ੍ਛਰਾਨਿ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਚਰਨ੍ਤਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਂਸੁ. ਤੇਨ ਵੁਤ੍ਤਂ ‘‘ਰਾਜੁਯ੍ਯਾਨੇ ਵਸਾਮੁਭੋ’’ਤਿ.

੩੦. ਅਥੇਕਦਿਵਸਂ ਰਾਜਾ ਉਯ੍ਯਾਨਕੀਲ਼ਂ ਗਤੋ. ਉਯ੍ਯਾਨਸ੍ਸ ਏਕਪਸ੍ਸੇ ਪਬ੍ਬਜ੍ਜਾਸੁਖੇਨ ਵੀਤਿਨਾਮੇਨ੍ਤਾਨਂ ਤੇਸਂ ਸਮੀਪਟ੍ਠਾਨਂ ਗਨ੍ਤ੍ਵਾ ਪਰਮਪਾਸਾਦਿਕਂ ਉਤ੍ਤਮਰੂਪਧਰਂ ਪਰਿਬ੍ਬਾਜਿਕਂ ਓਲੋਕੇਨ੍ਤੋ ਕਿਲੇਸਵਸੇਨ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਬੋਧਿਸਤ੍ਤਂ ‘‘ਅਯਂ ਤੇ ਪਰਿਬ੍ਬਾਜਿਕਾ ਕਿਂ ਹੋਤੀ’’ਤਿ ਪੁਚ੍ਛਿ. ਤੇਨ ‘‘ਨ ਚ ਕਿਞ੍ਚਿ ਹੋਤਿ, ਕੇਵਲਂ ਏਕਪਬ੍ਬਜ੍ਜਾਯ ਪਬ੍ਬਜਿਤਾ, ਅਪਿ ਚ ਖੋ ਪਨ ਗਿਹਿਕਾਲੇ ਪਾਦਪਰਿਚਾਰਿਕਾ ਅਹੋਸੀ’’ਤਿ ਵੁਤ੍ਤੇ ਰਾਜਾ ‘‘ਅਯਂ ਕਿਰੇਤਸ੍ਸ ਨ ਕਿਞ੍ਚਿ ਹੋਤਿ, ਅਪਿ ਚ ਖੋ ਪਨਸ੍ਸ ਗਿਹਿਕਾਲੇ ਪਾਦਪਰਿਚਾਰਿਕਾ ਅਹੋਸਿ, ਯਂਨੂਨਾਹਂ ਇਮਂ ਅਨ੍ਤੇਪੁਰਂ ਪਵੇਸੇਯ੍ਯਂ, ਤੇਨੇਵਸ੍ਸ ਇਮਿਸ੍ਸਾ ਪਟਿਪਤ੍ਤਿਂ ਜਾਨਿਸ੍ਸਾਮੀ’’ਤਿ ਅਨ੍ਧਬਾਲੋ ਤਤ੍ਥ ਅਤ੍ਤਨੋ ਪਟਿਬਦ੍ਧਚਿਤ੍ਤਂ ਨਿਵਾਰੇਤੁਂ ਅਸਕ੍ਕੋਨ੍ਤੋ ਅਞ੍ਞਤਰਂ ਪੁਰਿਸਂ ਆਣਾਪੇਸਿ ‘‘ਇਮਂ ਪਰਿਬ੍ਬਾਜਿਕਂ ਰਾਜਨਿਵੇਸਨਂ ਨੇਹੀ’’ਤਿ.

ਸੋ ਤਸ੍ਸ ਪਟਿਸ੍ਸੁਣਿਤ੍ਵਾ ‘‘ਅਧਮ੍ਮੋ ਲੋਕੇ ਵਤ੍ਤਤੀ’’ਤਿਆਦੀਨਿ ਵਤ੍ਵਾ ਪਰਿਦੇਵਮਾਨਂ ਏਵ ਤਂ ਆਦਾਯ ਪਾਯਾਸਿ. ਬੋਧਿਸਤ੍ਤੋ ਤਸ੍ਸਾ ਪਰਿਦੇਵਨਸਦ੍ਦਂ ਸੁਤ੍ਵਾ ਏਕਵਾਰਂ ਓਲੋਕੇਤ੍ਵਾ ਪੁਨ ਨ ਓਲੋਕੇਸਿ. ‘‘ਸਚੇ ਪਨਾਹਂ ਵਾਰੇਸ੍ਸਾਮਿ, ਤੇਸੁ ਚਿਤ੍ਤਂ ਪਦੋਸੇਤ੍ਵਾ ਮਯ੍ਹਂ ਸੀਲਸ੍ਸ ਅਨ੍ਤਰਾਯੋ ਭਵਿਸ੍ਸਤੀ’’ਤਿ ਸੀਲਪਾਰਮਿਂਯੇਵ ਆਵਜ੍ਜੇਨ੍ਤੋ ਨਿਸੀਦਿ. ਤੇਨ ਵੁਤ੍ਤਂ ‘‘ਉਯ੍ਯਾਨਦਸ੍ਸਨਂ ਗਨ੍ਤ੍ਵਾ, ਰਾਜਾ ਅਦ੍ਦਸ ਬ੍ਰਾਹ੍ਮਣਿ’’ਨ੍ਤਿਆਦਿ.

ਤਤ੍ਥ ਤੁਯ੍ਹੇਸਾ ਕਾ ਕਸ੍ਸ ਭਰਿਯਾਤਿ ਤੁਯ੍ਹਂ ਤਵ ਏਸਾ ਕਾ, ਕਿਂ ਭਰਿਯਾ, ਉਦਾਹੁ ਭਗਿਨੀ ਵਾ ਸਮਾਨਾ ਕਸ੍ਸ ਅਞ੍ਞਸ੍ਸ ਭਰਿਯਾ.

੩੧. ਨ ਮਯ੍ਹਂ ਭਰਿਯਾ ਏਸਾਤਿ ਕਾਮਞ੍ਚੇਸਾ ਮਯ੍ਹਂ ਗਿਹਿਕਾਲੇ ਭਰਿਯਾ ਅਹੋਸਿ, ਪਬ੍ਬਜਿਤਕਾਲਤੋ ਪਟ੍ਠਾਯ ਨ ਮਯ੍ਹਂ ਭਰਿਯਾ ਏਸਾ, ਨਾਪਿ ਅਹਂ ਏਤਿਸ੍ਸਾ ਸਾਮਿਕੋ, ਕੇਵਲਂ ਪਨ ਸਹਧਮ੍ਮਾ ਏਕਸਾਸਨੀ, ਅਹਮ੍ਪਿ ਪਰਿਬ੍ਬਾਜਕੋ ਅਯਮ੍ਪਿ ਪਰਿਬ੍ਬਾਜਿਕਾਤਿ ਸਮਾਨਧਮ੍ਮਾ ਪਰਿਬ੍ਬਾਜਕਸਾਸਨੇਨ ਏਕਸਾਸਨੀ, ਸਬ੍ਰਹ੍ਮਚਾਰਿਨੀਤਿ ਅਤ੍ਥੋ.

੩੨. ਤਿਸ੍ਸਾ ਸਾਰਤ੍ਤਗਧਿਤੋਤਿ ਕਾਮਰਾਗੇਨ ਸਾਰਤ੍ਤੋ ਹੁਤ੍ਵਾ ਪਟਿਬਦ੍ਧੋ. ਗਾਹਾਪੇਤ੍ਵਾਨ ਚੇਟਕੇਤਿ ਚੇਟਕੇਹਿ ਗਣ੍ਹਾਪੇਤ੍ਵਾ ਚੇਟਕੇ ਵਾ ਅਤ੍ਤਨੋ ਰਾਜਪੁਰਿਸੇ ਆਣਾਪੇਤ੍ਵਾ ਤਂ ਪਰਿਬ੍ਬਾਜਿਕਂ ਗਣ੍ਹਾਪੇਤ੍ਵਾ. ਨਿਪ੍ਪੀਲ਼ਯਨ੍ਤੋ ਬਲਸਾਤਿ ਤਂ ਅਨਿਚ੍ਛਮਾਨਂ ਏਵ ਆਕਡ੍ਢਨਪਰਿਕਡ੍ਢਨਾਦਿਨਾ ਨਿਪ੍ਪੀਲ਼ਯਨ੍ਤੋ ਬਾਧੇਨ੍ਤੋ, ਤਥਾਪਿ ਅਗਚ੍ਛਨ੍ਤਿਂ ਬਲਸਾ ਬਲਕ੍ਕਾਰੇਨ ਰਾਜਪੁਰਿਸੇਹਿ ਗਣ੍ਹਾਪੇਤ੍ਵਾ ਅਤ੍ਤਨੋ ਅਨ੍ਤੇਪੁਰਂ ਪਵੇਸੇਸਿ.

੩੩. ਓਦਪਤ੍ਤਕਿਯਾਤਿ ਉਦਕਪਤ੍ਤਂ ਆਮਸਿਤ੍ਵਾ ਗਹਿਤਭਰਿਯਾ ਓਦਪਤ੍ਤਿਕਾ ਨਾਮ, ਇਦਂ ਵਚਨਂ ਪੁਰਾਣਦੁਤਿਯਿਕਾਭਾਵੇਨ ਉਪਲਕ੍ਖਣਮਤ੍ਤਂ ਦਟ੍ਠਬ੍ਬਂ, ਸਾ ਪਨਸ੍ਸ ਬ੍ਰਾਹ੍ਮਣਵਿਵਾਹਵਸੇਨ ਮਾਤਾਪਿਤੂਹਿ ਸਮ੍ਪਟਿਪਾਦਿਤਾ, ‘‘ਓਦਪਤ੍ਤਕਿਯਾ’’ਤਿ ਚ ਭਾਵੇਨਭਾਵਲਕ੍ਖਣੇ ਭੁਮ੍ਮਂ. ਸਹਜਾਤਿ ਪਬ੍ਬਜ੍ਜਾਜਾਤਿਵਸੇਨ ਸਹਜਾਤਾ, ਤੇਨੇਵਾਹ ‘‘ਏਕਸਾਸਨੀ’’ਤਿ. ‘‘ਏਕਸਾਸਨੀ’’ਤਿ ਚ ਇਦਂ ਭੁਮ੍ਮਤ੍ਥੇ ਪਚ੍ਚਤ੍ਤਂ, ਏਕਸਾਸਨਿਯਾਤਿ ਅਤ੍ਥੋ. ਨਯਨ੍ਤਿਯਾਤਿ ਨੀਯਨ੍ਤਿਯਾ. ਕੋਪੋ ਮੇ ਉਪਪਜ੍ਜਥਾਤਿ ਅਯਂ ਤੇ ਗਿਹਿਕਾਲੇ ਭਰਿਯਾ ਬ੍ਰਾਹ੍ਮਣੀ ਸੀਲਵਤੀ, ਪਬ੍ਬਜਿਤਕਾਲੇ ਚ ਸਬ੍ਰਹ੍ਮਚਾਰਿਨੀਭਾਵਤੋ ਸਹਜਾਤਾ ਭਗਿਨੀ, ਸਾ ਤੁਯ੍ਹਂ ਪੁਰਤੋ ਬਲਕ੍ਕਾਰੇਨ ਆਕਡ੍ਢਿਤ੍ਵਾ ਨੀਯਤਿ. ‘‘ਬੋਧਿਬ੍ਰਾਹ੍ਮਣ, ਕਿਂ ਤੇ ਪੁਰਿਸਭਾਵ’’ਨ੍ਤਿ ਪੁਰਿਸਮਾਨੇਨ ਉਸ੍ਸਾਹਿਤੋ ਚਿਰਕਾਲਸਯਿਤੋ ਵਮ੍ਮਿਕਬਿਲਤੋ ਕੇਨਚਿ ਪੁਰਿਸੇਨ ਘਟ੍ਟਿਤੋ ‘‘ਸੁਸੂ’’ਤਿ ਫਣਂ ਕਰੋਨ੍ਤੋ ਆਸਿਵਿਸੋ ਵਿਯ ਮੇ ਚਿਤ੍ਤਤੋ ਕੋਪੋ ਸਹਸਾ ਵੁਟ੍ਠਾਸਿ.

੩੪-੫. ਸਹਕੋਪੇ ਸਮੁਪ੍ਪਨ੍ਨੇਤਿ ਕੋਪੁਪ੍ਪਤ੍ਤਿਯਾ ਸਹ, ਤਸ੍ਸ ਉਪ੍ਪਤ੍ਤਿਸਮਨਨ੍ਤਰਮੇਵਾਤਿ ਅਤ੍ਥੋ. ਸੀਲਬ੍ਬਤਮਨੁਸ੍ਸਰਿਨ੍ਤਿ ਅਤ੍ਤਨੋ ਸੀਲਪਾਰਮਿਂ ਆਵਜ੍ਜੇਸਿਂ. ਤਤ੍ਥੇਵ ਕੋਪਂ ਨਿਗ੍ਗਣ੍ਹਿਨ੍ਤਿ ਤਸ੍ਮਿਂ ਏਵ ਆਸਨੇ ਯਥਾਨਿਸਿਨ੍ਨੋਵ ਤਂ ਕੋਪਂ ਨਿਵਾਰੇਸਿਂ. ਨਾਦਾਸਿਂ ਵਡ੍ਢਿਤੂਪਰੀਤਿ ਤਤੋ ਏਕਵਾਰੁਪ੍ਪਤ੍ਤਿਤੋ ਉਪਰਿ ਉਦ੍ਧਂ ਵਡ੍ਢਿਤੁਂ ਨ ਅਦਾਸਿਂ. ਇਦਂ ਵੁਤ੍ਤਂ ਹੋਤਿ – ਕੋਪੇ ਉਪ੍ਪਨ੍ਨਮਤ੍ਤੇ ਏਵ ‘‘ਨਨੁ ਤ੍ਵਂ, ਬੋਧਿਪਰਿਬ੍ਬਾਜਕ, ਸਬ੍ਬਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤੁਕਾਮੋ, ਤਸ੍ਸ ਤੇ ਕਿਮਿਦਂ ਸੀਲਮਤ੍ਤੇਪਿ ਉਪਕ੍ਖਲਨਂ, ਤਯਿਦਂ ਗੁਨ੍ਨਂ ਖੁਰਮਤ੍ਤੋਦਕੇ ਓਸੀਦਨ੍ਤਸ੍ਸ ਮਹਾਸਮੁਦ੍ਦਸ੍ਸ ਪਰਤੀਰਂ ਗਣ੍ਹਿਤੁਕਾਮਤਾ ਵਿਯ ਹੋਤੀ’’ਤਿ ਅਤ੍ਤਾਨਂ ਪਰਿਭਾਸਿਤ੍ਵਾ ਪਟਿਸਙ੍ਖਾਨਬਲੇਨ ਤਸ੍ਮਿਂ ਏਵ ਖਣੇ ਕੋਪਂ ਨਿਗ੍ਗਹੇਤ੍ਵਾ ਪੁਨ ਉਪ੍ਪਜ੍ਜਨਵਸੇਨਸ੍ਸ ਵਡ੍ਢਿਤੁਂ ਨ ਅਦਾਸਿਨ੍ਤਿ. ਤੇਨੇਵਾਹ ‘‘ਯਦਿ ਨਂ ਬ੍ਰਾਹ੍ਮਣਿ’’ਨ੍ਤਿਆਦਿ.

ਤਸ੍ਸਤ੍ਥੋ – ਤਂ ਪਰਿਬ੍ਬਾਜਿਕਂ ਬ੍ਰਾਹ੍ਮਣਿਂ ਸੋ ਰਾਜਾ ਵਾ ਅਞ੍ਞੋ ਵਾ ਕੋਚਿ ਤਿਣ੍ਹਾਯਪਿ ਨਿਸਿਤਾਯ ਸਤ੍ਤਿਯਾ ਕੋਟ੍ਟੇਯ੍ਯ, ਖਣ੍ਡਾਖਣ੍ਡਿਕਂ ਯਦਿ ਛਿਨ੍ਦੇਯ੍ਯ, ਏਵਂ ਸਨ੍ਤੇਪਿ ਸੀਲਂ ਅਤ੍ਤਨੋ ਸੀਲਪਾਰਮਿਂ ਨੇਵ ਭਿਨ੍ਦੇਯ੍ਯਂ. ਕਸ੍ਮਾ? ਬੋਧਿਯਾ ਏਵ ਕਾਰਣਾ, ਸਬ੍ਬਤ੍ਥ ਅਖਣ੍ਡਿਤਸੀਲੇਨੇਵ ਸਕ੍ਕਾ ਸਮ੍ਮਾਸਮ੍ਬੋਧਿਂ ਪਾਪੁਣਿਤੁਂ, ਨ ਇਤਰੇਨਾਤਿ.

੩੬. ਨ ਮੇ ਸਾ ਬ੍ਰਾਹ੍ਮਣੀ ਦੇਸ੍ਸਾਤਿ ਸਾ ਬ੍ਰਾਹ੍ਮਣੀ ਜਾਤਿਯਾ ਗੋਤ੍ਤੇਨ ਕੁਲਪ੍ਪਦੇਸੇਨ ਆਚਾਰਸਮ੍ਪਤ੍ਤਿਯਾ ਚਿਰਪਰਿਚਯੇਨ ਪਬ੍ਬਜ੍ਜਾਦਿਗੁਣਸਮ੍ਪਤ੍ਤਿਯਾ ਚਾਤਿ ਸਬ੍ਬਪ੍ਪਕਾਰੇਨ ਨ ਮੇ ਦੇਸ੍ਸਾ ਨ ਅਪ੍ਪਿਯਾ, ਏਤਿਸ੍ਸਾ ਮਮ ਅਪ੍ਪਿਯਭਾਵੋ ਕੋਚਿ ਨਤ੍ਥਿ. ਨਪਿ ਮੇ ਬਲਂ ਨ ਵਿਜ੍ਜਤੀਤਿ ਮਯ੍ਹਮ੍ਪਿ ਬਲਂ ਨ ਨ ਵਿਜ੍ਜਤਿ, ਅਤ੍ਥਿ ਏਵ. ਅਹਂ ਨਾਗਬਲੋ ਥਾਮਸਮ੍ਪਨ੍ਨੋ, ਇਚ੍ਛਮਾਨੋ ਸਹਸਾ ਵੁਟ੍ਠਹਿਤ੍ਵਾ ਤਂ ਆਕਡ੍ਢਨ੍ਤੇ ਪੁਰਿਸੇ ਨਿਪ੍ਪੋਥੇਤ੍ਵਾ ਤਂ ਗਹੇਤ੍ਵਾ ਯਥਿਚ੍ਛਿਤਟ੍ਠਾਨਂ ਗਨ੍ਤੁਂ ਸਮਤ੍ਥੋਤਿ ਦਸ੍ਸੇਤਿ. ਸਬ੍ਬਞ੍ਞੁਤਂ ਪਿਯਂ ਮਯ੍ਹਨ੍ਤਿ ਤਤੋ ਪਰਿਬ੍ਬਾਜਿਕਤੋ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਸਬ੍ਬਞ੍ਞੁਤਞ੍ਞਾਣਮੇਵ ਮਯ੍ਹਂ ਪਿਯਂ. ਤਸ੍ਮਾ ਸੀਲਾਨੁਰਕ੍ਖਿਸ੍ਸਨ੍ਤਿ ਤੇਨ ਕਾਰਣੇਨ ਸੀਲਮੇਵ ਅਨੁਰਕ੍ਖਿਸ੍ਸਂ.

ਅਥ ਸੋ ਰਾਜਾ ਉਯ੍ਯਾਨੇ ਪਪਞ੍ਚਂ ਅਕਤ੍ਵਾਵ ਸੀਘਤਰਂ ਗਨ੍ਤ੍ਵਾ ਤਂ ਪਰਿਬ੍ਬਾਜਿਕਂ ਪਕ੍ਕੋਸਾਪੇਤ੍ਵਾ ਮਹਨ੍ਤੇਨ ਯਸੇਨ ਨਿਮਨ੍ਤੇਸਿ. ਸਾ ਯਸਸ੍ਸ ਅਗੁਣਂ ਪਬ੍ਬਜ੍ਜਾਯ ਗੁਣਂ ਅਤ੍ਤਨੋ ਬੋਧਿਸਤ੍ਤਸ੍ਸ ਚ ਮਹਨ੍ਤਂ ਭੋਗਕ੍ਖਨ੍ਧਂ ਪਹਾਯ ਸਂਵੇਗੇਨ ਪਬ੍ਬਜਿਤਭਾਵਞ੍ਚ ਕਥੇਸਿ. ਰਾਜਾ ਕੇਨਚਿ ਪਰਿਯਾਯੇਨ ਤਸ੍ਸਾ ਮਨਂ ਅਲਭਨ੍ਤੋ ਚਿਨ੍ਤੇਸਿ – ‘‘ਅਯਂ ਪਰਿਬ੍ਬਾਜਿਕਾ ਸੀਲਵਤੀ ਕਲ੍ਯਾਣਧਮ੍ਮਾ, ਸੋਪਿ ਪਰਿਬ੍ਬਾਜਕੋ ਇਮਾਯ ਆਕਡ੍ਢਿਤ੍ਵਾ ਨੀਯਮਾਨਾਯ ਨ ਕਿਞ੍ਚਿ ਵਿਪ੍ਪਕਾਰਂ ਦਸ੍ਸੇਸਿ, ਸਬ੍ਬਤ੍ਥ ਨਿਰਪੇਕ੍ਖਚਿਤ੍ਤੋ, ਨ ਖੋ ਪਨ ਮੇਤਂ ਪਤਿਰੂਪਂ, ਯਂ ਏਵਰੂਪੇਸੁ ਗੁਣਵਨ੍ਤੇਸੁ ਵਿਪ੍ਪਕਾਰੋ, ਯਂਨੂਨਾਹਂ ਇਮਂ ਪਰਿਬ੍ਬਾਜਿਕਂ ਗਹੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਇਮਂ, ਤਞ੍ਚ ਪਰਿਬ੍ਬਾਜਕਂ ਖਮਾਪੇਯ੍ਯ’’ਨ੍ਤਿ? ਏਵਂ ਪਨ ਚਿਨ੍ਤੇਤ੍ਵਾ ‘‘ਪਰਿਬ੍ਬਾਜਿਕਂ ਉਯ੍ਯਾਨਂ ਆਨੇਥਾ’’ਤਿ ਪੁਰਿਸੇ ਆਣਾਪੇਤ੍ਵਾ ਸਯਂ ਪਠਮਤਰਂ ਗਨ੍ਤ੍ਵਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਭੋ ਪਬ੍ਬਜਿਤ, ਕਿਂ ਮਯਾ ਤਾਯ ਪਰਿਬ੍ਬਾਜਿਕਾਯ ਨੀਯਮਾਨਾਯ ਕੋਪੋ ਤੇ ਉਪ੍ਪਜ੍ਜਿਤ੍ਥਾ’’ਤਿ. ਮਹਾਸਤ੍ਤੋ ਆਹ –

‘‘ਉਪ੍ਪਜ੍ਜਿ ਮੇ ਨ ਮੁਚ੍ਚਿਤ੍ਥ, ਨ ਮੇ ਮੁਚ੍ਚਿਤ੍ਥ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਖਿਪ੍ਪਮੇਵ ਨਿਵਾਰਯਿ’’ਨ੍ਤਿ. (ਜਾ. ੧.੧੦.੫੨);

ਤਂ ਸੁਤ੍ਵਾ ਰਾਜਾ ‘‘ਕਿਂ ਨੁ ਖੋ ਏਸ ਕੋਪਮੇਵ ਸਨ੍ਧਾਯ ਵਦਤਿ, ਉਦਾਹੁ ਅਞ੍ਞਂ ਕਿਞ੍ਚਿ ਸਿਪ੍ਪਾਦਿਕ’’ਨ੍ਤਿ ਚਿਨ੍ਤੇਤ੍ਵਾ ਪੁਨ ਪੁਚ੍ਛਿ –

‘‘ਕਿਂ ਤੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕਿਂ ਤੇ ਨੋ ਮੁਚ੍ਚਿ ਜੀਵਤੋ;

ਰਜਂਵ ਵਿਪੁਲਾ ਵੁਟ੍ਠਿ, ਕਤਮਂ ਤਂ ਨਿਵਾਰਯੀ’’ਤਿ. (ਜਾ. ੧.੧੦.੫੩);

ਤਤ੍ਥ ਉਪ੍ਪਜ੍ਜੀਤਿ ਏਕਵਾਰਂ ਉਪ੍ਪਜ੍ਜਿ, ਨ ਪੁਨ ਉਪ੍ਪਜ੍ਜਿ. ਨ ਮੁਚ੍ਚਿਤ੍ਥਾਤਿ ਕਾਯਵਚੀਵਿਕਾਰੁਪ੍ਪਾਦਨਵਸੇਨ ਪਨ ਨ ਮੁਚ੍ਚਿਤ੍ਥ, ਨ ਨਂ ਬਹਿ ਪਵਤ੍ਤਿਤੁਂ ਵਿਸ੍ਸਜ੍ਜੇਸਿਨ੍ਤਿ ਅਤ੍ਥੋ. ਰਜਂਵ ਵਿਪੁਲਾ ਵੁਟ੍ਠੀਤਿ ਯਥਾ ਨਾਮ ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਉਪ੍ਪਨ੍ਨਂ ਰਜਂ ਵਿਪੁਲਾ ਅਕਾਲਵੁਟ੍ਠਿਧਾਰਾ ਠਾਨਸੋ ਨਿਵਾਰੇਤਿ, ਏਵਂ ਤਂ ਵੂਪਸਮੇਨ੍ਤੋ ਨਿਵਾਰਯਿਂ, ਨਿਵਾਰੇਸਿਨ੍ਤਿ ਅਤ੍ਥੋ.

ਅਥਸ੍ਸ ਮਹਾਪੁਰਿਸੋ ਨਾਨਪ੍ਪਕਾਰੇਨ ਕੋਧੇ ਆਦੀਨਵਂ ਪਕਾਸੇਨ੍ਤੋ –

‘‘ਯਮ੍ਹਿ ਜਾਤੇ ਨ ਪਸ੍ਸਤਿ, ਅਜਾਤੇ ਸਾਧੁ ਪਸ੍ਸਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

‘‘ਯੇਨ ਜਾਤੇਨ ਨਨ੍ਦਨ੍ਤਿ, ਅਮਿਤ੍ਤਾ ਦੁਕ੍ਖਮੇਸਿਨੋ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

‘‘ਯਸ੍ਮਿਞ੍ਚ ਜਾਯਮਾਨਮ੍ਹਿ, ਸਦਤ੍ਥਂ ਨਾਵਬੁਜ੍ਝਤਿ;

ਸੋ ਮੇ ਉਪ੍ਪਜ੍ਜਿ ਨੋ ਮੁਚ੍ਚਿ, ਕੋਧੋ ਦੁਮ੍ਮੇਧਗੋਚਰੋ.

‘‘ਯੇਨਾਭਿਭੂਤੋ ਕੁਸਲਂ ਜਹਾਤਿ, ਪਰਕ੍ਕਰੇ ਵਿਪੁਲਞ੍ਚਾਪਿ ਅਤ੍ਥਂ;

ਸ ਭੀਮਸੇਨੋ ਬਲਵਾ ਪਮਦ੍ਦੀ, ਕੋਧੋ ਮਹਾਰਾਜਾ ਨ ਮੇ ਅਮੁਚ੍ਚਥ.

‘‘ਕਟ੍ਠਸ੍ਮਿਂ ਮਨ੍ਥਮਾਨਸ੍ਮਿਂ, ਪਾਵਕੋ ਨਾਮ ਜਾਯਤਿ;

ਤਮੇਵ ਕਟ੍ਠਂ ਡਹਤਿ, ਯਸ੍ਮਾ ਸੋ ਜਾਯਤੇ ਗਿਨਿ.

‘‘ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;

ਸਾਰਮ੍ਭਾ ਜਾਯਤੇ ਕੋਧੋ, ਸਪਿ ਤੇਨੇਵ ਡਯ੍ਹਤਿ.

‘‘ਅਗ੍ਗੀਵ ਤਿਣਕਟ੍ਠਸ੍ਮਿਂ, ਕੋਧੋ ਯਸ੍ਸ ਪਵਡ੍ਢਤਿ;

ਨਿਹੀਯਤਿ ਤਸ੍ਸ ਯਸੋ, ਕਾਲ਼ਪਕ੍ਖੇਵ ਚਨ੍ਦਿਮਾ.

‘‘ਅਨਿਨ੍ਧੋ ਧੂਮਕੇਤੂਵ, ਕੋਧੋ ਯਸ੍ਸੂਪਸਮ੍ਮਤਿ;

ਆਪੂਰਤਿ ਤਸ੍ਸ ਯਸੋ, ਸੁਕ੍ਕਪਕ੍ਖੇਵ ਚਨ੍ਦਿਮਾ’’ਤਿ. (ਜਾ. ੧.੧੦.੫੪-੬੧) –

ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ.

ਤਤ੍ਥ ਨ ਪਸ੍ਸਤੀਤਿ ਅਤ੍ਤਤ੍ਥਮ੍ਪਿ ਨ ਪਸ੍ਸਤਿ, ਪਗੇਵ ਪਰਤ੍ਥਂ. ਸਾਧੁ ਪਸ੍ਸਤੀਤਿ ਅਤ੍ਤਤ੍ਥਂ ਪਰਤ੍ਥਂ ਉਭਯਤ੍ਥਞ੍ਚ ਸਮ੍ਮਦੇਵ ਪਸ੍ਸਤਿ. ਦੁਮ੍ਮੇਧਗੋਚਰੋਤਿ ਨਿਪ੍ਪਞ੍ਞਾਨਂ ਵਿਸਯਭੂਤੋ, ਨਿਪ੍ਪਞ੍ਞੋ ਵਾ ਗੋਚਰੋ ਆਹਾਰੋ ਇਨ੍ਧਨਂ ਏਤਸ੍ਸਾਤਿ ਦੁਮ੍ਮੇਧਗੋਚਰੋ. ਦੁਕ੍ਖਮੇਸਿਨੋਤਿ ਦੁਕ੍ਖਂ ਇਚ੍ਛਨ੍ਤਾ. ਸਦਤ੍ਥਨ੍ਤਿ ਅਤ੍ਤਨੋ ਅਤ੍ਥਂ ਵੁਡ੍ਢਿਂ. ਪਰਕ੍ਕਰੇਤਿ ਅਪਨੇਯ੍ਯ ਵਿਨਾਸੇਯ੍ਯ. ਸਭੀਮਸੇਨੋਤਿ ਸੋ ਭੀਮਾਯ ਭਯਜਨਨਿਯਾ ਮਹਤਿਯਾ ਕਿਲੇਸਸੇਨਾਯ ਸਮਨ੍ਨਾਗਤੋ. ਪਮਦ੍ਦੀਤਿ ਬਲਵਭਾਵੇਨ ਸਤ੍ਤੇ ਪਮਦ੍ਦਨਸੀਲੋ. ਨ ਮੇ ਅਮੁਚ੍ਚਥਾਤਿ ਮਮ ਸਨ੍ਤਿਕਾ ਮੋਕ੍ਖਂ ਨ ਲਭਿ, ਅਬ੍ਭਨ੍ਤਰੇ ਏਵ ਦਮਿਤੋ, ਨਿਬ੍ਬਿਸੇਵਨੋ ਕਤੋਤਿ ਅਤ੍ਥੋ. ਖੀਰਂ ਵਿਯ ਵਾ ਮੁਹੁਤ੍ਤਂ ਦਧਿਭਾਵੇਨ ਚਿਤ੍ਤੇਨ ਪਤਿਟ੍ਠਹਿਤ੍ਥਾਤਿਪਿ ਅਤ੍ਥੋ.

ਮਨ੍ਥਮਾਨਸ੍ਮਿਨ੍ਤਿ ਅਰਣਿਸਹਿਤੇ ਮਥਿਯਮਾਨੇ. ‘‘ਮਥਮਾਨਸ੍ਮਿ’’ਨ੍ਤਿਪਿ ਪਾਠੋ. ਯਸ੍ਮਾਤਿ ਯਤੋ ਕਟ੍ਠਾ. ਗਿਨੀਤਿ ਅਗ੍ਗਿ. ਬਾਲਸ੍ਸ ਅਵਿਜਾਨਤੋਤਿ ਬਾਲਸ੍ਸ ਅਜਾਨਨ੍ਤਸ੍ਸ. ਸਾਰਮ੍ਭਾ ਜਾਯਤੇਤਿ ਕਰਣੁਤ੍ਤਰਿਯਕਰਣਲਕ੍ਖਣਾ ਸਾਰਮ੍ਭਾ ਅਰਣਿਮਨ੍ਥਨਤੋ ਵਿਯ ਪਾਵਕੋ ਕੋਧੋ ਜਾਯਤੇ. ਸਪਿ ਤੇਨੇਵਾਤਿ ਸੋਪਿ ਬਾਲੋ ਤੇਨੇਵ ਕੋਧੇਨ ਕਟ੍ਠਂ ਵਿਯ ਅਗ੍ਗਿਨਾ ਡਯ੍ਹਤਿ. ਅਨਿਨ੍ਧੋ ਧੂਮਕੇਤੂਵਾਤਿ ਅਨਿਨ੍ਧਨੋ ਅਗ੍ਗਿ ਵਿਯ. ਤਸ੍ਸਾਤਿ ਤਸ੍ਸ ਅਧਿਵਾਸਨਖਨ੍ਤਿਯਾ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਸੁਕ੍ਕਪਕ੍ਖੇ ਚਨ੍ਦੋ ਵਿਯ ਲਦ੍ਧੋ, ਯਸੋ ਅਪਰਾਪਰਂ ਆਪੂਰਤੀਤਿ.

ਰਾਜਾ ਮਹਾਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ਮਹਾਪੁਰਿਸਂ ਪਰਿਬ੍ਬਾਜਿਕਮ੍ਪਿ ਰਾਜਗੇਹਤੋ ਆਗਤਂ ਖਮਾਪੇਤ੍ਵਾ ‘‘ਤੁਮ੍ਹੇ ਪਬ੍ਬਜ੍ਜਾਸੁਖਂ ਅਨੁਭਵਨ੍ਤਾ ਇਧੇਵ ਉਯ੍ਯਾਨੇ ਵਸਥ, ਅਹਂ ਵੋ ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਕਰਿਸ੍ਸਾਮੀ’’ਤਿ ਵਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ. ਤੇ ਉਭੋਪਿ ਤਤ੍ਥੇਵ ਵਸਿਂਸੁ. ਅਪਰਭਾਗੇ ਪਰਿਬ੍ਬਾਜਿਕਾ ਕਾਲਮਕਾਸਿ. ਬੋਧਿਸਤ੍ਤੋ ਹਿਮਵਨ੍ਤਂ ਪਵਿਸਿਤ੍ਵਾ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨੋ ਅਹੋਸਿ.

ਤਦਾ ਪਰਿਬ੍ਬਾਜਿਕਾ ਰਾਹੁਲਮਾਤਾ ਅਹੋਸਿ, ਰਾਜਾ ਆਨਨ੍ਦਤ੍ਥੇਰੋ, ਬੋਧਿਪਰਿਬ੍ਬਾਜਕੋ ਲੋਕਨਾਥੋ.

ਤਸ੍ਸ ਇਧਾਪਿ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਮਹਨ੍ਤਂ ਭੋਗਕ੍ਖਨ੍ਧਂ ਮਹਨ੍ਤਞ੍ਚ ਞਾਤਿਪਰਿਵਟ੍ਟਂ ਪਹਾਯ ਮਹਾਭਿਨਿਕ੍ਖਮਨਸਦਿਸਂ ਗੇਹਤੋ ਨਿਕ੍ਖਮਨਂ, ਤਥਾ ਨਿਕ੍ਖਮਿਤ੍ਵਾ ਪਬ੍ਬਜਿਤਸ੍ਸ ਬਹੁਜਨਸਮ੍ਮਤਸ੍ਸ ਸਤੋ ਪਰਮਪ੍ਪਿਚ੍ਛਤਾਯ ਕੁਲੇਸੁ ਚ ਗਣੇਸੁ ਚ ਅਲਗ੍ਗਤਾ, ਅਚ੍ਚਨ੍ਤਮੇਵ ਲਾਭਸਕ੍ਕਾਰਜਿਗੁਚ੍ਛਾਯ ਪਵਿਵੇਕਾਭਿਰਤਿ, ਅਤਿਸਯਵਤੀ ਚ ਅਭਿਸਲ੍ਲੇਖਵੁਤ੍ਤਿ, ਤਥਾਰੂਪਾਯ ਸੀਲਵਤਿਯਾ ਕਲ੍ਯਾਣਧਮ੍ਮਾਯ ਪਰਿਬ੍ਬਾਜਿਕਾਯ ਅਨਨੁਞ੍ਞਾਤਾ ਅਤ੍ਤਨੋ ਪੁਰਤੋ ਬਲਕ੍ਕਾਰੇਨ ਪਰਾਮਸਿਯਮਾਨਾਯ ਸੀਲਪਾਰਮਿਂ ਆਵਜ੍ਜੇਤ੍ਵਾ ਵਿਕਾਰਾਨਾਪਤ੍ਤਿ, ਕਤਾਪਰਾਧੇ ਚ ਤਸ੍ਮਿਂ ਰਾਜਿਨਿ ਉਪਗਤੇ ਹਿਤਚਿਤ੍ਤਤਂ ਮੇਤ੍ਤਚਿਤ੍ਤਤਂ ਉਪਟ੍ਠਪੇਤ੍ਵਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇਹਿ ਸਮਨੁਸਾਸਨਨ੍ਤਿ ਏਵਮਾਦਯੋ ਇਧ ਮਹਾਪੁਰਿਸਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾ. ਤੇਨੇਤਂ ਵੁਚ੍ਚਤਿ ‘‘ਏਵਂ ਅਚ੍ਛਰਿਯਾ ਹੇਤੇ…ਪੇ… ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਚੂਲ਼ਬੋਧਿਚਰਿਯਾਵਣ੍ਣਨਾ ਨਿਟ੍ਠਿਤਾ.

੫. ਮਹਿਂਸਰਾਜਚਰਿਯਾਵਣ੍ਣਨਾ

੩੭. ਪਞ੍ਚਮੇ ਮਹਿਂਸੋ ਪਵਨਚਾਰਕੋਤਿ ਮਹਾਵਨਚਾਰੀ ਵਨਮਹਿਂਸੋ ਯਦਾ ਹੋਮੀਤਿ ਯੋਜਨਾ. ਪਵਡ੍ਢਕਾਯੋਤਿ ਵਯਸਮ੍ਪਤ੍ਤਿਯਾ ਅਙ੍ਗਪਚ੍ਚਙ੍ਗਾਨਞ੍ਚ ਥੂਲਭਾਵੇਨ ਅਭਿਵਡ੍ਢਕਾਯੋ. ਬਲਵਾਤਿ ਮਹਾਬਲੋ ਥਾਮਸਮ੍ਪਨ੍ਨੋ. ਮਹਨ੍ਤੋਤਿ ਵਿਪੁਲਸਰੀਰੋ. ਹਤ੍ਥਿਕਲਭਪ੍ਪਮਾਣੋ ਕਿਰ ਤਦਾ ਬੋਧਿਸਤ੍ਤਸ੍ਸ ਕਾਯੋ ਹੋਤਿ. ਭੀਮਦਸ੍ਸਨੋਤਿ ਮਹਾਸਰੀਰਤਾਯ ਵਨਮਹਿਂਸਜਾਤਿਤਾਯ ਚ ਸੀਲਂ ਅਜਾਨਨ੍ਤਾਨਂ ਭਯਂ ਜਨਨਤੋ ਭਯਾਨਕਦਸ੍ਸਨੋ.

੩੮. ਪਬ੍ਭਾਰੇਤਿ ਓਲਮ੍ਬਕਸਿਲਾਕੁਚ੍ਛਿਯਂ. ਦਕਾਸਯੇਤਿ ਜਲਾਸਯਸਮੀਪੇ. ਹੋਤੇਤ੍ਥ ਠਾਨਨ੍ਤਿ ਏਤ੍ਥ ਮਹਾਵਨੇ ਯੋ ਕੋਚਿ ਪਦੇਸੋ ਵਨਮਹਿਂਸਾਨਂ ਤਿਟ੍ਠਨਟ੍ਠਾਨਂ ਹੋਤਿ. ਤਹਿਂ ਤਹਿਨ੍ਤਿ ਤਤ੍ਥ ਤਤ੍ਥ.

੩੯. ਵਿਚਰਨ੍ਤੋਤਿ ਵਿਹਾਰਫਾਸੁਕਂ ਵੀਮਂਸਿਤੁਂ ਵਿਚਰਨ੍ਤੋ. ਠਾਨਂ ਅਦ੍ਦਸ ਭਦ੍ਦਕਨ੍ਤਿ ਏਵਂ ਵਿਚਰਨ੍ਤੋ ਤਸ੍ਮਿਂ ਮਹਾਰਞ੍ਞੇ ਭਦ੍ਦਕਂ ਮਯ੍ਹਂ ਫਾਸੁਕਂ ਰੁਕ੍ਖਮੂਲਟ੍ਠਾਨਂ ਅਦ੍ਦਕ੍ਖਿਂ. ਦਿਸ੍ਵਾ ਚ ਤਂ ਠਾਨਂ ਉਪਗਨ੍ਤ੍ਵਾਨ, ਤਿਟ੍ਠਾਮਿ ਚ ਸਯਾਮਿ ਚ ਗੋਚਰਂ ਗਹੇਤ੍ਵਾ ਦਿਵਾ ਤਂ ਰੁਕ੍ਖਮੂਲਟ੍ਠਾਨਂ ਗਨ੍ਤ੍ਵਾ ਠਾਨਸਯਨੇਹਿ ਵੀਤਿਨਾਮੇਮੀਤਿ ਦਸ੍ਸੇਤਿ.

੪੦. ਤਦਾ ਕਿਰ ਬੋਧਿਸਤ੍ਤੋ ਹਿਮਵਨ੍ਤਪ੍ਪਦੇਸੇ ਮਹਿਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਥਾਮਸਮ੍ਪਨ੍ਨੋ ਮਹਾਸਰੀਰੋ ਹਤ੍ਥਿਕਲਭਪ੍ਪਮਾਣੋ ਪਬ੍ਬਤਪਾਦਪਬ੍ਭਾਰਗਿਰਿਦੁਗ੍ਗਵਨਘਟਾਦੀਸੁ ਵਿਚਰਨ੍ਤੋ ਏਕਂ ਫਾਸੁਕਂ ਮਹਾਰੁਕ੍ਖਮੂਲਂ ਦਿਸ੍ਵਾ ਗੋਚਰਂ ਗਹੇਤ੍ਵਾ ਦਿਵਾ ਤਤ੍ਥ ਵਸਤਿ. ਅਥੇਕੋ ਲੋਲਮਕ੍ਕਟੋ ਰੁਕ੍ਖਾ ਓਤਰਿਤ੍ਵਾ ਮਹਾਸਤ੍ਤਸ੍ਸ ਪਿਟ੍ਠਿਂ ਅਭਿਰੁਹਿਤ੍ਵਾ ਉਚ੍ਚਾਰਪਸ੍ਸਾਵਂ ਕਤ੍ਵਾ ਸਿਙ੍ਗੇਸੁ ਗਣ੍ਹਿਤ੍ਵਾ ਓਲਮ੍ਬਨ੍ਤੋ ਨਙ੍ਗੁਟ੍ਠੇ ਗਹੇਤ੍ਵਾ ਦੋਲਾਯਨ੍ਤੋ ਕੀਲ਼ਿ. ਬੋਧਿਸਤ੍ਤੋ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਦਾਯ ਤਂ ਤਸ੍ਸ ਅਨਾਚਾਰਂ ਨ ਮਨਸਾਕਾਸਿ. ਮਕ੍ਕਟੋ ਪੁਨਪ੍ਪੁਨਂ ਤਥੇਵ ਕਰੋਤਿ. ਤੇਨ ਵੁਤ੍ਤਂ ‘‘ਅਥੇਤ੍ਥ ਕਪਿ ਮਾਗਨ੍ਤ੍ਵਾ’’ਤਿਆਦਿ.

ਤਤ੍ਥ ਕਪਿ ਮਾਗਨ੍ਤ੍ਵਾਤਿ ਕਪਿ ਆਗਨ੍ਤ੍ਵਾ, ਮ-ਕਾਰੋ ਪਦਸਨ੍ਧਿਕਰੋ. ਪਾਪੋਤਿ ਲਾਮਕੋ. ਅਨਰਿਯੋਤਿ ਅਨਯੇ ਇਰਿਯਨੇਨ ਅਯੇ ਚ ਨ ਇਰਿਯਨੇਨ ਅਨਰਿਯੋ, ਨਿਹੀਨਾਚਾਰੋਤਿ ਅਤ੍ਥੋ. ਲਹੂਤਿ ਲੋਲੋ. ਖਨ੍ਧੇਤਿ ਖਨ੍ਧਪ੍ਪਦੇਸੇ. ਮੁਤ੍ਤੇਤੀਤਿ ਪਸ੍ਸਾਵਂ ਕਰੋਤਿ. ਓਹਦੇਤੀਤਿ ਕਰੀਸਂ ਓਸ੍ਸਜ੍ਜਤਿ. ਤਨ੍ਤਿ ਤਂ ਮਂ, ਤਦਾ ਮਹਿਂਸਭੂਤਂ ਮਂ.

੪੧. ਸਕਿਮ੍ਪਿ ਦਿਵਸਨ੍ਤਿ ਏਕਦਿਵਸਮ੍ਪਿ ਦੂਸੇਤਿ ਮਂ ਸਬ੍ਬਕਾਲਮ੍ਪਿ. ਤੇਨਾਹ ‘‘ਦੂਸੇਤਿ ਮਂ ਸਬ੍ਬਕਾਲ’’ਨ੍ਤਿ. ਨ ਕੇਵਲਞ੍ਚ ਦੁਤਿਯਤਤਿਯਚਤੁਤ੍ਥਦਿਵਸਮਤ੍ਤਂ, ਅਥ ਖੋ ਸਬ੍ਬਕਾਲਮ੍ਪਿ ਮਂ ਪਸ੍ਸਾਵਾਦੀਹਿ ਦੂਸੇਤਿ. ਯਦਾ ਯਦਾ ਮੁਤ੍ਤਾਦੀਨਿ ਕਾਤੁਕਾਮੋ, ਤਦਾ ਤਦਾ ਮਯ੍ਹਮੇਵ ਉਪਰਿ ਕਰੋਤੀਤਿ ਦਸ੍ਸੇਤਿ. ਉਪਦ੍ਦੁਤੋਤਿ ਬਾਧਿਤੋ, ਤੇਨ ਸਿਙ੍ਗੇਸੁ ਓਲਮ੍ਬਨਾਦਿਨਾ ਮੁਤ੍ਤਾਦਿਅਸੁਚਿਮਕ੍ਖਣੇਨ ਤਸ੍ਸ ਚ ਅਪਹਰਣਤ੍ਥਂ ਅਨੇਕਵਾਰਂ ਸਿਙ੍ਗਕੋਟੀਹਿ ਵਾਲਗ੍ਗੇਨ ਚ ਅਨੇਕਵਾਰਂ ਕਦ੍ਦਮਪਂਸੁਮਿਸ੍ਸਕਂ ਉਦਕਂ ਸਿਞ੍ਚਿਤ੍ਵਾ ਧੋਵਨੇਨ ਚ ਨਿਪ੍ਪੀਲ਼ਿਤੋ ਹੋਮੀਤਿ ਅਤ੍ਥੋ.

੪੨. ਯਕ੍ਖੋਤਿ ਤਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ. ਮਂ ਇਦਮਬ੍ਰਵੀਤਿ ਰੁਕ੍ਖਕ੍ਖਨ੍ਧੇ ਠਤ੍ਵਾ ‘‘ਮਹਿਂਸਰਾਜ, ਕਸ੍ਮਾ ਇਮਸ੍ਸ ਦੁਟ੍ਠਮਕ੍ਕਟਸ੍ਸ ਅਵਮਾਨਂ ਸਹਸੀ’’ਤਿ ਇਮਮਤ੍ਥਂ ਪਕਾਸੇਨ੍ਤੋ ਨਾਸੇਹੇਤਂ ਛਵਂ ਪਾਪਂ , ਸਿਙ੍ਗੇਹਿ ਚ ਖੁਰੇਹਿ ਚਾਤਿ ਇਦਂ ਵਚਨਂ ਮਂ ਅਭਾਸਿ.

੪੩. ਏਵਂ ਵੁਤ੍ਤੇ ਤਦਾ ਯਕ੍ਖੇਤਿ ਤਦਾ ਤਸ੍ਮਿਂ ਕਾਲੇ ਤਸ੍ਮਿਂ ਯਕ੍ਖੇ ਏਵਂ ਵੁਤ੍ਤੇ ਸਤਿ. ਅਹਂ ਤਂ ਇਦਮਬ੍ਰਵਿਨ੍ਤਿ ਅਹਂ ਤਂ ਯਕ੍ਖਂ ਇਦਂ ਇਦਾਨਿ ਵਕ੍ਖਮਾਨਂ ਅਬ੍ਰਵਿਂ ਅਭਾਸਿਂ. ਕੁਣਪੇਨਾਤਿ ਕਿਲੇਸਾਸੁਚਿਪਗ੍ਘਰਣੇਨ ਸੁਚਿਜਾਤਿਕਾਨਂ ਸਾਧੂਨਂ ਪਰਮਜਿਗੁਚ੍ਛਨੀਯਤਾਯ ਅਤਿਦੁਗ੍ਗਨ੍ਧਵਾਯਨੇਨ ਚ ਕੁਣਪਸਦਿਸਤਾਯ ਕੁਣਪੇਨ. ਪਾਪੇਨਾਤਿ ਪਾਣਾਤਿਪਾਤਪਾਪੇਨ. ਅਨਰਿਯੇਨਾਤਿ ਅਨਰਿਯਾਨਂ ਅਸਾਧੂਨਂ ਮਾਗਵਿਕਨੇਸਾਦਾਦੀਨਂ ਹੀਨਪੁਰਿਸਾਨਂ ਧਮ੍ਮਤ੍ਤਾ ਅਨਰਿਯੇਨ, ਕਿਂ ਕੇਨ ਕਾਰਣੇਨ, ਤ੍ਵਂ ਦੇਵਤੇ ਮਂ ਮਕ੍ਖੇਸਿ, ਅਯੁਤ੍ਤਂ ਤਯਾ ਵੁਤ੍ਤਂ ਮਂ ਪਾਪੇ ਨਿਯੋਜੇਨ੍ਤਿਯਾਤਿ ਦਸ੍ਸੇਤਿ.

੪੪. ਇਦਾਨਿ ਤਸ੍ਮਿਂ ਪਾਪਧਮ੍ਮੇ ਆਦੀਨਵਂ ਪਕਾਸੇਨ੍ਤੋ ‘‘ਯਦਿਹ’’ਨ੍ਤਿਆਦਿਮਾਹ. ਤਸ੍ਸਤ੍ਥੋ – ਭਦ੍ਦੇ ਦੇਵਤੇ, ਅਹਂ ਤਸ੍ਸ ਯਦਿ ਕੁਜ੍ਝੇਯ੍ਯਂ, ਤਤੋਪਿ ਲਾਮਕਤਰੋ ਭਵੇਯ੍ਯਂ. ਯੇਨ ਹਿ ਅਧਮ੍ਮਚਰਣੇਨ ਸੋ ਬਾਲਮਕ੍ਕਟੋ ਨਿਹੀਨੋ ਨਾਮ ਜਾਤੋ, ਸਚੇ ਪਨਾਹਂ ਤਤੋਪਿ ਬਲਵਤਰਂ ਪਾਪਧਮ੍ਮਂ ਚਰੇਯ੍ਯਂ, ਨਨੁ ਤੇਨ ਤਤੋ ਪਾਪਤਰੋ ਭਵੇਯ੍ਯਂ, ਅਟ੍ਠਾਨਞ੍ਚੇਤਂ ਯਦਿਹਂ ਇਧਲੋਕਪਰਲੋਕਂ ਤਦੁਤ੍ਤਰਿ ਚ ਜਾਨਿਤ੍ਵਾ ਠਿਤੋ ਏਕਨ੍ਤੇਨੇਵ ਪਰਹਿਤਾਯ ਪਟਿਪਨ੍ਨੋ ਏਵਰੂਪਂ ਪਾਪਧਮ੍ਮਂ ਚਰੇਯ੍ਯਨ੍ਤਿ. ਕਿਞ੍ਚ ਭਿਯ੍ਯੋ – ਸੀਲਞ੍ਚ ਮੇ ਪਭਿਜ੍ਜੇਯ੍ਯਾਤਿ ਅਹਞ੍ਚੇਵ ਖੋ ਪਨ ਏਵਰੂਪਂ ਪਾਪਂ ਕਰੇਯ੍ਯਂ, ਮਯ੍ਹਂ ਸੀਲਪਾਰਮੀ ਖਣ੍ਡਿਤਾ ਸਿਯਾ. ਵਿਞ੍ਞੂ ਚ ਗਰਹੇਯ੍ਯੁ ਮਨ੍ਤਿ ਪਣ੍ਡਿਤਾ ਚ ਦੇਵਮਨੁਸ੍ਸਾ ਮਂ ਗਰਹੇਯ੍ਯੁਂ ‘‘ਪਸ੍ਸਥ, ਭੋ, ਅਯਂ ਬੋਧਿਸਤ੍ਤੋ ਬੋਧਿਪਰਿਯੇਸਨਂ ਚਰਮਾਨੋ ਏਵਰੂਪਂ ਪਾਪਂ ਅਕਾਸੀ’’ਤਿ.