੧੦. ਸਙ੍ਖਪਾਲਚਰਿਯਾਵਣ੍ਣਨਾ

੮੫. ਦਸਮੇ ਸਙ੍ਖਪਾਲੋਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਦੇਵਭੋਗਸਮ੍ਪਤ੍ਤਿਸਦਿਸਾਯ ਮਹਤਿਯਾ ਨਾਗਿਦ੍ਧਿਯਾ ਸਮਨ੍ਨਾਗਤਤ੍ਤਾ ਮਹਿਦ੍ਧਿਕੋ. ਹੇਟ੍ਠਾ ਦ੍ਵੇ, ਉਪਰਿ ਦ੍ਵੇਤਿ ਚਤਸ੍ਸੋ ਦਾਠਾ ਆਵੁਧਾ ਏਤਸ੍ਸਾਤਿ ਦਾਠਾਵੁਧੋ. ਉਗ੍ਗਤੇਜਵਿਸਤਾਯ ਘੋਰਵਿਸੋ. ਨਾਗਯੋਨਿਸਿਦ੍ਧਾਹਿ ਦ੍ਵੀਹਿ ਜਿਵ੍ਹਾਹਿ ਸਮਨ੍ਨਾਗਤੋਤਿ ਦ੍ਵਿਜਿਵ੍ਹੋ. ਮਹਾਨੁਭਾਵਾਨਮ੍ਪਿ ਉਰੇਨ ਗਮਨਤੋ ‘‘ਉਰਗਾ’’ਤਿ ਲਦ੍ਧਨਾਮਾਨਂ ਨਾਗਾਨਂ ਅਧਿਪਤਿਭਾਵਤੋ ਉਰਗਾਧਿਭੂ.

੮੬. ਦ੍ਵਿਨ੍ਨਂ ਮਗ੍ਗਾਨਂ ਵਿਨਿਵਿਜ੍ਝਿਤ੍ਵਾ ਸਨ੍ਧਿਭਾਵੇਨ ਗਤਟ੍ਠਾਨਸਙ੍ਖਾਤੇ ਚਤੁਪ੍ਪਥੇ. ਅਪਰਾਪਰਂ ਮਹਾਜਨਸਞ੍ਚਰਣਟ੍ਠਾਨਭੂਤੇ ਮਹਾਮਗ੍ਗੇ. ਤਤੋ ਏਵ ਮਹਾਜਨਸਮਾਕਿਣ੍ਣਭਾਵੇਨ ਨਾਨਾਜਨਸਮਾਕੁਲੇ. ਇਦਾਨਿ ਵਕ੍ਖਮਾਨਾਨਂ ਚਤੁਨ੍ਨਂ ਅਙ੍ਗਾਨਂ ਵਸੇਨ ਚਤੁਰੋ ਅਙ੍ਗੇ. ਅਧਿਟ੍ਠਾਯ ਅਧਿਟ੍ਠਹਿਤ੍ਵਾ, ਚਿਤ੍ਤੇ ਠਪੇਤ੍ਵਾ. ਯਦਾਹਂ ਸਙ੍ਖਪਾਲੋ ਨਾਮ ਯਥਾਵੁਤ੍ਤਰੂਪੋ ਨਾਗਰਾਜਾ ਹੋਮਿ, ਤਦਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਠਾਨੇ ਵਾਸਂ ਉਪੋਸਥਵਾਸਵਸੇਨ ਨਿਵਾਸਂ ਅਕਪ੍ਪਯਿਂ ਕਪ੍ਪੇਸਿਂ.

ਮਹਾਸਤ੍ਤੋ ਹਿ ਦਾਨਸੀਲਾਦਿਪੁਞ੍ਞਪਸੁਤੋ ਹੁਤ੍ਵਾ ਬੋਧਿਪਰਿਯੇਸਨਵਸੇਨ ਅਪਰਾਪਰਂ ਦੇਵਮਨੁਸ੍ਸਗਤੀਸੁ ਸਂਸਰਨ੍ਤੋ ਕਦਾਚਿ ਦੇਵਭੋਗਸਦਿਸਸਮ੍ਪਤ੍ਤਿਕੇ ਨਾਗਭਵਨੇ ਨਿਬ੍ਬਤ੍ਤਿਤ੍ਵਾ ਸਙ੍ਖਪਾਲੋ ਨਾਮ ਨਾਗਰਾਜਾ ਅਹੋਸਿ ਮਹਿਦ੍ਧਿਕੋ ਮਹਾਨੁਭਾਵੋ. ਸੋ ਗਚ੍ਛਨ੍ਤੇ ਕਾਲੇ ਤਾਯ ਸਮ੍ਪਤ੍ਤਿਯਾ ਵਿਪ੍ਪਟਿਸਾਰੀ ਹੁਤ੍ਵਾ ਮਨੁਸ੍ਸਯੋਨਿਂ ਪਤ੍ਥੇਨ੍ਤੋ ਉਪੋਸਥਵਾਸਂ ਵਸਿ. ਅਥਸ੍ਸ ਨਾਗਭਵਨੇ ਵਸਨ੍ਤਸ੍ਸ ਉਪੋਸਥਵਾਸੋ ਨ ਸਮ੍ਪਜ੍ਜਤਿ, ਸੀਲਂ ਸਂਕਿਲਿਸ੍ਸਤਿ, ਤੇਨ ਸੋ ਨਾਗਭਵਨਾ ਨਿਕ੍ਖਮਿਤ੍ਵਾ ਕਣ੍ਹਵਣ੍ਣਾਯ ਨਦਿਯਾ ਅਵਿਦੂਰੇ ਮਹਾਮਗ੍ਗਸ੍ਸ ਚ ਏਕਪਦਿਕਮਗ੍ਗਸ੍ਸ ਚ ਅਨ੍ਤਰੇ ਏਕਂ ਵਮ੍ਮਿਕਂ ਪਰਿਕ੍ਖਿਪਿਤ੍ਵਾ ਉਪੋਸਥਂ ਅਧਿਟ੍ਠਾਯ ਚਾਤੁਦ੍ਦਸਪਨ੍ਨਰਸੇਸੁ ਸਮਾਦਿਨ੍ਨਸੀਲੋ ‘‘ਮਮ ਚਮ੍ਮਾਦੀਨਿ ਅਤ੍ਥਿਕਾ ਗਣ੍ਹਨ੍ਤੂ’’ਤਿ ਅਤ੍ਤਾਨਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਨਿਪਜ੍ਜਤਿ, ਪਾਟਿਪਦੇ ਨਾਗਭਵਨਂ ਗਚ੍ਛਤਿ. ਤੇਨ ਵੁਤ੍ਤਂ ‘‘ਪੁਨਾਪਰਂ ਯਦਾ ਹੋਮਿ, ਸਙ੍ਖਪਾਲੋ’’ਤਿਆਦਿ. ਤਸ੍ਸਤ੍ਥੋ ਵੁਤ੍ਤੋ ਏਵ.

੮੭. ਯਂ ਪਨੇਤ੍ਥ ਛਵਿਯਾ ਚਮ੍ਮੇਨਾਤਿਆਦਿਕਂ ‘‘ਚਤੁਰੋ ਅਙ੍ਗੇ ਅਧਿਟ੍ਠਾਯਾ’’ਤਿ ਵੁਤ੍ਤਂ ਚਤੁਰਙ੍ਗਾਧਿਟ੍ਠਾਨਦਸ੍ਸਨਂ. ਛਵਿਚਮ੍ਮਾਨਿ ਹਿ ਇਧ ਏਕਮਙ੍ਗਂ. ਏਵਂ ਉਪੋਸਥਵਾਸਂ ਵਸਨ੍ਤਸ੍ਸ ਮਹਾਸਤ੍ਤਸ੍ਸ ਦੀਘੋ ਅਦ੍ਧਾ ਵੀਤਿਵਤ੍ਤੋ.

ਅਥੇਕਦਿਵਸਂ ਤਸ੍ਮਿਂ ਤਥਾ ਸੀਲਂ ਸਮਾਦਿਯਿਤ੍ਵਾ ਨਿਪਨ੍ਨੇ ਸੋਲ਼ਸ ਭੋਜਪੁਤ੍ਤਾ ‘‘ਮਂਸਂ ਆਹਰਿਸ੍ਸਾਮਾ’’ਤਿ ਆਵੁਧਹਤ੍ਥਾ ਅਰਞ੍ਞੇ ਚਰਨ੍ਤਾ ਕਿਞ੍ਚਿ ਅਲਭਿਤ੍ਵਾ ਨਿਕ੍ਖਮਨ੍ਤਾ ਤਂ ਵਮ੍ਮਿਕਮਤ੍ਥਕੇ ਨਿਪਨ੍ਨਂ ਦਿਸ੍ਵਾ ‘‘ਮਯਂ ਅਜ੍ਜ ਗੋਧਾਪੋਤਕਮ੍ਪਿ ਨ ਲਭਿਮ੍ਹਾ, ਇਮਂ ਨਾਗਰਾਜਾਨਂ ਵਧਿਤ੍ਵਾ ਖਾਦਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ‘‘ਮਹਾ ਖੋ ਪਨੇਸ ਗਯ੍ਹਮਾਨੋ ਪਲਾਯੇਯ੍ਯਾਤਿ ਯਥਾਨਿਪਨ੍ਨਕਂਯੇਵ ਨਂ ਭੋਗੇਸੁ ਸੂਲੇਹਿ ਵਿਜ੍ਝਿਤ੍ਵਾ ਦੁਬ੍ਬਲਂ ਕਤ੍ਵਾ ਗਣ੍ਹਿਸ੍ਸਾਮਾ’’ਤਿ ਸੂਲਾਨਿ ਆਦਾਯ ਉਪਸਙ੍ਕਮਿਂਸੁ. ਬੋਧਿਸਤ੍ਤਸ੍ਸਾਪਿ ਸਰੀਰਂ ਮਹਨ੍ਤਂ ਏਕਦੋਣਿਕਨਾਵਪ੍ਪਮਾਣਂ ਵਟ੍ਟੇਤ੍ਵਾ ਠਪਿਤਸੁਮਨਪੁਪ੍ਫਦਾਮਂ ਵਿਯ ਜਿਞ੍ਜੁਕਫਲਸਦਿਸੇਹਿ ਅਕ੍ਖੀਹਿ ਜਯਸੁਮਨਪੁਪ੍ਫਸਦਿਸੇਨ ਚ ਸੀਸੇਨ ਸਮਨ੍ਨਾਗਤਂ ਅਤਿਵਿਯ ਸੋਭਤਿ. ਸੋ ਤੇਸਂ ਸੋਲ਼ਸਨ੍ਨਂ ਜਨਾਨਂ ਪਦਸਦ੍ਦੇਨ ਭੋਗਨ੍ਤਰਤੋ ਸੀਸਂ ਨੀਹਰਿਤ੍ਵਾ ਰਤ੍ਤਕ੍ਖੀਨਿ ਉਮ੍ਮੀਲੇਤ੍ਵਾ ਤੇ ਸੂਲਹਤ੍ਥੇ ਆਗਚ੍ਛਨ੍ਤੇ ਦਿਸ੍ਵਾ ‘‘ਅਜ੍ਜ ਮਯ੍ਹਂ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਅਤ੍ਤਾਨਂ ਦਾਨਮੁਖੇ ਨਿਯ੍ਯਾਤੇਤ੍ਵਾ ‘‘ਇਮੇ ਮਮ ਸਰੀਰਂ ਸਤ੍ਤੀਹਿ ਕੋਟ੍ਟੇਤ੍ਵਾ ਛਿਦ੍ਦਾਵਛਿਦ੍ਦਂ ਕਰੋਨ੍ਤੇ ਨ ਓਲੋਕੇਸ੍ਸਾਮੀ’’ਤਿ ਅਤ੍ਤਨੋ ਸੀਲਖਣ੍ਡਭਯੇਨ ਦਲ਼੍ਹਂ ਅਧਿਟ੍ਠਾਨਂ ਅਧਿਟ੍ਠਹਿਤ੍ਵਾ ਸੀਸਂ ਭੋਗਨ੍ਤਰੇ ਏਵ ਪਵੇਸੇਤ੍ਵਾ ਨਿਪਜ੍ਜਿ.

ਅਥ ਨਂ ਤੇ ਉਪਗਨ੍ਤ੍ਵਾ ਨਙ੍ਗੁਟ੍ਠੇ ਗਹੇਤ੍ਵਾ ਆਕਡ੍ਢਨ੍ਤਾ ਭੂਮਿਯਂ ਪਾਤੇਤ੍ਵਾ ਤਿਖਿਣਸੂਲੇਹਿ ਅਟ੍ਠਸੁ ਠਾਨੇਸੁ ਵਿਜ੍ਝਿਤ੍ਵਾ ਸਕਣ੍ਟਕਾ ਕਾਲ਼ਵੇਤ੍ਤਯਟ੍ਠਿਯੋ ਪਹਾਰਮੁਖੇਹਿ ਪਵੇਸੇਤ੍ਵਾ ਅਟ੍ਠਸੁ ਠਾਨੇਸੁ ਕਾਜੇਹਿ ਆਦਾਯ ਮਹਾਮਗ੍ਗਂ ਪਟਿਪਜ੍ਜਿਂਸੁ. ਮਹਾਸਤ੍ਤੋ ਸੂਲੇਹਿ ਵਿਜ੍ਝਨਤੋ ਪਟ੍ਠਾਯ ਏਕਟ੍ਠਾਨੇਪਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਤੇ ਨ ਓਲੋਕੇਸਿ. ਤਸ੍ਸ ਅਟ੍ਠਹਿ ਕਾਜੇਹਿ ਆਦਾਯ ਨੀਯਮਾਨਸ੍ਸ ਸੀਸਂ ਓਲਮ੍ਬਿਤ੍ਵਾ ਭੂਮਿਂ ਪਹਰਤਿ. ਅਥ ਨਂ ‘‘ਸੀਸਮਸ੍ਸ ਓਲਮ੍ਬਤੀ’’ਤਿ ਮਹਾਮਗ੍ਗੇ ਨਿਪਜ੍ਜਾਪੇਤ੍ਵਾ ਸੁਖੁਮੇਨ ਸੂਲੇਨ ਨਾਸਾਪੁਟੇ ਵਿਜ੍ਝਿਤ੍ਵਾ ਰਜ੍ਜੁਕਂ ਪਵੇਸੇਤ੍ਵਾ ਸੀਸਂ ਉਕ੍ਖਿਪਿਤ੍ਵਾ ਕਾਜਕੋਟਿਯਂ ਲਗ੍ਗੇਤ੍ਵਾ ਪੁਨਪਿ ਉਕ੍ਖਿਪਿਤ੍ਵਾ ਮਗ੍ਗਂ ਪਟਿਪਜ੍ਜਿਂਸੁ. ਤੇਨ ਵੁਤ੍ਤਂ –

੮੮. ‘‘ਅਦ੍ਦਸਂਸੁ ਭੋਜਪੁਤ੍ਤਾ, ਖਰਾ ਲੁਦ੍ਦਾ ਅਕਾਰੁਣਾ;

ਉਪਗਞ੍ਛੁਂ ਮਮਂ ਤਤ੍ਥ, ਦਣ੍ਡਮੁਗ੍ਗਰਪਾਣਿਨੋ.

੮੯. ‘‘ਨਾਸਾਯ ਵਿਨਿਵਿਜ੍ਝਿਤ੍ਵਾ, ਨਙ੍ਗੁਟ੍ਠੇ ਪਿਟ੍ਠਿਕਣ੍ਟਕੇ;

ਕਾਜੇ ਆਰੋਪਯਿਤ੍ਵਾਨ, ਭੋਜਪੁਤ੍ਤਾ ਹਰਿਂਸੁ ਮ’’ਨ੍ਤਿ.

ਤਤ੍ਥ ਭੋਜਪੁਤ੍ਤਾਤਿ ਲੁਦ੍ਦਪੁਤ੍ਤਾ. ਖਰਾਤਿ ਕਕ੍ਖਲ਼ਾ, ਫਰੁਸਕਾਯਵਚੀਕਮ੍ਮਨ੍ਤਾ. ਲੁਦ੍ਦਾਤਿ ਦਾਰੁਣਾ, ਘੋਰਮਾਨਸਾ. ਅਕਾਰੁਣਾਤਿ ਨਿਕ੍ਕਰੁਣਾ. ਦਣ੍ਡਮੁਗ੍ਗਰਪਾਣਿਨੋਤਿ ਚਤੁਰਸ੍ਸਦਣ੍ਡਹਤ੍ਥਾ. ਨਾਸਾਯ ਵਿਨਿਵਿਜ੍ਝਿਤ੍ਵਾਤਿ ਰਜ੍ਜੁਕਂ ਪਵੇਸੇਤੁਂ ਸੁਖੁਮੇਨ ਸੂਲੇਨ ਨਾਸਾਪੁਟੇ ਵਿਜ੍ਝਿਤ੍ਵਾ. ਨਙ੍ਗੁਟ੍ਠੇ ਪਿਟ੍ਠਿਕਣ੍ਟਕੇਤਿ ਨਙ੍ਗੁਟ੍ਠਪ੍ਪਦੇਸੇ ਤਤ੍ਥ ਤਤ੍ਥ ਪਿਟ੍ਠਿਕਣ੍ਟਕਸਮੀਪੇ ਚ ਵਿਨਿਵਿਜ੍ਝਿਤ੍ਵਾਤਿ ਸਮ੍ਬਨ੍ਧੋ. ਕਾਜੇ ਆਰੋਪਯਿਤ੍ਵਾਨਾਤਿ ਅਟ੍ਠਸੁ ਠਾਨੇਸੁ ਵਿਨਿਵਿਜ੍ਝਿਤ੍ਵਾ ਬਦ੍ਧੇਸੁ ਅਟ੍ਠਸੁ ਵੇਤ੍ਤਲਤਾਮਣ੍ਡਲੇਸੁ ਏਕੇਕਸ੍ਮਿਂ ਓਵਿਜ੍ਝਿਤਂ ਏਕੇਕਂ ਕਾਜਂ ਦ੍ਵੇ ਦ੍ਵੇ ਭੋਜਪੁਤ੍ਤਾ ਅਤ੍ਤਨੋ ਅਤ੍ਤਨੋ ਖਨ੍ਧਂ ਆਰੋਪੇਤ੍ਵਾ.

੯੦. ਸਸਾਗਰਨ੍ਤਂ ਪਥਵਿਨ੍ਤਿ ਸਮੁਦ੍ਦਪਰਿਯਨ੍ਤਂ ਮਹਾਪਥਵਿਂ. ਸਕਾਨਨਂ ਸਪਬ੍ਬਤਨ੍ਤਿ ਸਦ੍ਧਿਂ ਕਾਨਨੇਹਿ ਪਬ੍ਬਤੇਹਿ ਚਾਤਿ ਸਕਾਨਨਂ ਸਪਬ੍ਬਤਞ੍ਚ. ਨਾਸਾਵਾਤੇਨ ਝਾਪਯੇਤਿ ਸਚਾਹਂ ਇਚ੍ਛਮਾਨੋ ਇਚ੍ਛਨ੍ਤੋ ਕੁਜ੍ਝਿਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਯ੍ਯਂ, ਸਮੁਦ੍ਦਪਰਿਯਨ੍ਤਂ ਸਕਾਨਨਂ ਸਪਬ੍ਬਤਂ ਇਮਂ ਮਹਾਪਥਵਿਂ ਝਾਪੇਯ੍ਯਂ, ਸਹ ਨਾਸਾਵਾਤਵਿਸ੍ਸਜ੍ਜਨੇਨ ਛਾਰਿਕਂ ਕਰੇਯ੍ਯਂ, ਏਤਾਦਿਸੋ ਤਦਾ ਮਯ੍ਹਂ ਆਨੁਭਾਵੋ.

੯੧. ਏਵਂ ਸਨ੍ਤੇਪਿ ਸੂਲੇਹਿ ਵਿਨਿਵਿਜ੍ਝਨ੍ਤੇ, ਕੋਟ੍ਟਯਨ੍ਤੇਪਿ ਸਤ੍ਤਿਭਿ. ਭੋਜਪੁਤ੍ਤੇ ਨ ਕੁਪ੍ਪਾਮੀਤਿ ਦੁਬ੍ਬਲਭਾਵਕਰਣਤ੍ਥਂ ਵੇਤ੍ਤਲਤਾਪਵੇਸਨਤ੍ਥਞ੍ਚ ਸਾਰਦਾਰੂਹਿ ਤਚ੍ਛੇਤ੍ਵਾ ਕਤੇਹਿ ਤਿਖਿਣਸੂਲੇਹਿ ਅਟ੍ਠਸੁ ਠਾਨੇਸੁ ਵਿਜ੍ਝਨ੍ਤੇਪਿ ਦੁਬ੍ਬਲਭਾਵਕਰਣਤ੍ਥਂ ਤਿਖਿਣਾਹਿ ਸਤ੍ਤੀਹਿ ਤਹਿਂ ਤਹਿਂ ਕੋਟ੍ਟਯਨ੍ਤੇਪਿ ਭੋਜਪੁਤ੍ਤਾਨਂ ਲੁਦ੍ਦਾਨਂ ਨ ਕੁਪ੍ਪਾਮਿ. ਏਸਾ ਮੇ ਸੀਲਪਾਰਮੀਤਿ ਏਵਂ ਮਹਾਨੁਭਾਵਸ੍ਸ ਤਥਾ ਅਧਿਟ੍ਠਹਨ੍ਤਸ੍ਸ ਯਾ ਮੇ ਮਯ੍ਹਂ ਸੀਲਖਣ੍ਡਭਯੇਨ ਤੇਸਂ ਅਕੁਜ੍ਝਨਾ, ਏਸਾ ਏਕਨ੍ਤੇਨੇਵ ਜੀਵਿਤਨਿਰਪੇਕ੍ਖਭਾਵੇਨ ਪਵਤ੍ਤਾ ਮਯ੍ਹਂ ਸੀਲਪਾਰਮੀ, ਸੀਲਵਸੇਨ ਪਰਮਤ੍ਥਪਾਰਮੀਤਿ ਅਤ੍ਥੋ.

ਤਥਾ ਪਨ ਬੋਧਿਸਤ੍ਤੇ ਤੇਹਿ ਨੀਯਮਾਨੇ ਮਿਥਿਲਨਗਰਵਾਸੀ ਆਲ਼ਾਰੋ ਨਾਮ ਕੁਟੁਮ੍ਬਿਕੋ ਪਞ੍ਚਸਕਟਸਤਾਨਿ ਆਦਾਯ ਸੁਖਯਾਨਕੇ ਨਿਸੀਦਿਤ੍ਵਾ ਗਚ੍ਛਨ੍ਤੋ ਤੇ ਭੋਜਪੁਤ੍ਤੇ ਮਹਾਸਤ੍ਤਂ ਹਰਨ੍ਤੇ ਦਿਸ੍ਵਾ ਕਾਰੁਞ੍ਞਂ ਉਪ੍ਪਾਦੇਤ੍ਵਾ ਤੇ ਲੁਦ੍ਦੇ ਪੁਚ੍ਛਿ – ‘‘ਕਿਸ੍ਸਾਯਂ ਨਾਗੋ ਨੀਯਤਿ, ਨੇਤ੍ਵਾ ਚਿਮਂ ਕਿਂ ਕਰਿਸ੍ਸਥਾ’’ਤਿ? ਤੇ ‘‘ਇਮਸ੍ਸ ਨਾਗਸ੍ਸ ਮਂਸਂ ਸਾਦੁਞ੍ਚ ਮੁਦੁਞ੍ਚ ਥੂਲਞ੍ਚ ਪਚਿਤ੍ਵਾ ਖਾਦਿਸ੍ਸਾਮਾ’’ਤਿ ਆਹਂਸੁ. ਅਥ ਸੋ ਤੇਸਂ ਸੋਲ਼ਸਵਾਹਗੋਣੇ ਪਸਤਂ ਪਸਤਂ ਸੁਵਣ੍ਣਮਾਸਕੇ ਸਬ੍ਬੇਸਂ ਨਿਵਾਸਨਪਾਰੁਪਨਾਨਿ ਭਰਿਯਾਨਮ੍ਪਿ ਤੇਸਂ ਵਤ੍ਥਾਭਰਣਾਨਿ ਦਤ੍ਵਾ ‘‘ਸਮ੍ਮਾ, ਅਯਂ ਮਹਾਨੁਭਾਵੋ ਨਾਗਰਾਜਾ, ਅਤ੍ਤਨੋ ਸੀਲਗੁਣੇਨ ਤੁਮ੍ਹਾਕਂ ਨ ਦੁਬ੍ਭਿ, ਇਮਂ ਕਿਲਮਨ੍ਤੇਹਿ ਬਹੁਂ ਤੁਮ੍ਹੇਹਿ ਅਪੁਞ੍ਞਂ ਪਸੁਤਂ, ਵਿਸ੍ਸਜ੍ਜੇਥਾ’’ਤਿ ਆਹ. ਤੇ ‘‘ਅਯਂ ਅਮ੍ਹਾਕਂ ਮਨਾਪੋ ਭਕ੍ਖੋ, ਬਹੂ ਚ ਨੋ ਉਰਗਾ ਭੁਤ੍ਤਪੁਬ੍ਬਾ, ਤਥਾਪਿ ਤਵ ਵਚਨਂ ਅਮ੍ਹੇਹਿ ਪੂਜੇਤਬ੍ਬਂ, ਤਸ੍ਮਾ ਇਮਂ ਨਾਗਂ ਵਿਸ੍ਸਜ੍ਜੇਸ੍ਸਾਮਾ’’ਤਿ ਵਿਸ੍ਸਜ੍ਜੇਤ੍ਵਾ ਮਹਾਸਤ੍ਤਂ ਭੂਮਿਯਂ ਨਿਪਜ੍ਜਾਪੇਤ੍ਵਾ ਅਤ੍ਤਨੋ ਕਕ੍ਖਲ਼ਤਾਯ ਤਾ ਕਣ੍ਟਕਾਚਿਤਾ ਆਵੁਤਾ ਕਾਲ਼ਵੇਤ੍ਤਲਤਾ ਕੋਟਿਯਂ ਗਹੇਤ੍ਵਾ ਆਕਡ੍ਢਿਤੁਂ ਆਰਭਿਂਸੁ.

ਅਥ ਸੋ ਨਾਗਰਾਜਾਨਂ ਕਿਲਮਨ੍ਤਂ ਦਿਸ੍ਵਾ ਅਕਿਲਮੇਨ੍ਤੋਵ ਅਸਿਨਾ ਲਤਾ ਛਿਨ੍ਦਿਤ੍ਵਾ ਦਾਰਕਾਨਂ ਕਣ੍ਣਵੇਧਤੋ ਪਟਿਹਰਣਨਿਯਾਮੇਨ ਅਦੁਕ੍ਖਾਪੇਨ੍ਤੋ ਸਣਿਕਂ ਨੀਹਰਿ. ਤਸ੍ਮਿਂ ਕਾਲੇ ਤੇ ਭੋਜਪੁਤ੍ਤਾ ਯਂ ਬਨ੍ਧਨਂ ਤਸ੍ਸ ਨਤ੍ਥੁਤੋ ਪਵੇਸੇਤ੍ਵਾ ਪਟਿਮੁਕ੍ਕਂ, ਤਂ ਬਨ੍ਧਨਂ ਸਣਿਕਂ ਮੋਚਯਿਂਸੁ. ਮਹਾਸਤ੍ਤੋ ਮੁਹੁਤ੍ਤਂ ਪਾਚੀਨਾਭਿਮੁਖੋ ਗਨ੍ਤ੍ਵਾ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਆਲ਼ਾਰਂ ਓਲੋਕੇਸਿ. ਲੁਦ੍ਦਾ ਥੋਕਂ ਗਨ੍ਤ੍ਵਾ ‘‘ਉਰਗੋ ਦੁਬ੍ਬਲੋ, ਮਤਕਾਲੇ ਗਹੇਤ੍ਵਾਵ ਨਂ ਗਮਿਸ੍ਸਾਮਾ’’ਤਿ ਨਿਲੀਯਿਂਸੁ. ਆਲ਼ਾਰੋ ਮਹਾਸਤ੍ਤਸ੍ਸ ਅਞ੍ਜਲਿਂ ਪਗ੍ਗਯ੍ਹ ‘‘ਗਚ੍ਛੇਵ ਖੋ ਤ੍ਵਂ, ਮਹਾਨਾਗ, ਮਾ ਤਂ ਲੁਦ੍ਦਾ ਪੁਨ ਗਹੇਸੁ’’ਨ੍ਤਿ ਵਦਨ੍ਤੋ ਥੋਕਂ ਤਂ ਨਾਗਂ ਅਨੁਗਨ੍ਤ੍ਵਾ ਨਿਵਤ੍ਤਿ.

ਬੋਧਿਸਤ੍ਤੋ ਨਾਗਭਵਨਂ ਗਨ੍ਤ੍ਵਾ ਤਤ੍ਥ ਪਪਞ੍ਚਂ ਅਕਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿਤ੍ਵਾ ਆਲ਼ਾਰਂ ਉਪਸਙ੍ਕਮਿਤ੍ਵਾ ਨਾਗਭਵਨਸ੍ਸ ਵਣ੍ਣਂ ਕਥੇਤ੍ਵਾ ਤਂ ਤਤ੍ਥ ਨੇਤ੍ਵਾ ਤੀਹਿ ਕਞ੍ਞਾਸਤੇਹਿ ਸਦ੍ਧਿਂ ਮਹਨ੍ਤਮਸ੍ਸ ਯਸਂ ਦਤ੍ਵਾ ਦਿਬ੍ਬੇਹਿ ਕਾਮੇਹਿ ਸਨ੍ਤਪ੍ਪੇਸਿ. ਆਲ਼ਾਰੋ ਨਾਗਭਵਨੇ ਏਕਵਸ੍ਸਂ ਵਸਿਤ੍ਵਾ ਦਿਬ੍ਬੇ ਕਾਮੇ ਪਰਿਭੁਞ੍ਜਿਤ੍ਵਾ ‘‘ਇਚ੍ਛਾਮਹਂ, ਸਮ੍ਮ, ਪਬ੍ਬਜਿਤੁ’’ਨ੍ਤਿ ਨਾਗਰਾਜਸ੍ਸ ਕਥੇਤ੍ਵਾ ਪਬ੍ਬਜਿਤਪਰਿਕ੍ਖਾਰੇ ਗਹੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਹਿਮਵਨ੍ਤਪ੍ਪਦੇਸਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਤਤ੍ਥ ਚਿਰਂ ਵਸਿਤ੍ਵਾ ਅਪਰਭਾਗੇ ਚਾਰਿਕਂ ਚਰਨ੍ਤੋ ਬਾਰਾਣਸਿਂ ਪਤ੍ਵਾ ਬਾਰਾਣਸਿਰਞ੍ਞਾ ਸਮਾਗਤੋ ਤੇਨ ਆਚਾਰਸਮ੍ਪਤ੍ਤਿਂ ਨਿਸ੍ਸਾਯ ਪਸਨ੍ਨੇਨ ‘‘ਤ੍ਵਂ ਉਲ਼ਾਰਭੋਗਾ ਮਞ੍ਞੇ ਕੁਲਾ ਪਬ੍ਬਜਿਤੋ, ਕੇਨ ਨੁ ਖੋ ਕਾਰਣੇਨ ਪਬ੍ਬਜਿਤੋਸੀ’’ਤਿ ਪੁਟ੍ਠੋ ਅਤ੍ਤਨੋ ਪਬ੍ਬਜ੍ਜਾਕਾਰਣਂ ਕਥੇਨ੍ਤੋ ਲੁਦ੍ਦਾਨਂ ਹਤ੍ਥਤੋ ਬੋਧਿਸਤ੍ਤਸ੍ਸ ਵਿਸ੍ਸਜ੍ਜਾਪਨਂ ਆਦਿਂ ਕਤ੍ਵਾ ਸਬ੍ਬਂ ਪਵਤ੍ਤਿਂ ਰਞ੍ਞੋ ਆਚਿਕ੍ਖਿਤ੍ਵਾ –

‘‘ਦਿਟ੍ਠਾ ਮਯਾ ਮਾਨੁਸਕਾਪਿ ਕਾਮਾ, ਅਸਸ੍ਸਤਾ ਵਿਪਰਿਣਾਮਧਮ੍ਮਾ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਸਦ੍ਧਾਯਹਂ ਪਬ੍ਬਜਿਤੋਮ੍ਹਿ, ਰਾਜ.

‘‘ਦੁਮਪ੍ਫਲਾਨੀਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਦ੍ਧਾ ਚ ਸਰੀਰਭੇਦਾ;

ਏਤਮ੍ਪਿ ਦਿਸ੍ਵਾ ਪਬ੍ਬਜਿਤੋਮ੍ਹਿ ਰਾਜ, ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋ’’ਤਿ. (ਜਾ. ੨.੧੭.੧੯੧-੧੯੨) –

ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ.

ਤਂ ਸੁਤ੍ਵਾ ਰਾਜਾ –

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਤਵਞ੍ਚਲ਼ਾਰ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ. (ਜਾ. ੨.੧੭.੧੯੩) –

ਆਹ.

ਅਥਸ੍ਸ ਤਾਪਸੋ –

‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ. (ਜਾ. ੨.੧੭.੧੯੪) –

ਏਵਂ ਧਮ੍ਮਂ ਦੇਸੇਤ੍ਵਾ ਤਤ੍ਥੇਵ ਚਤ੍ਤਾਰੋ ਵਸ੍ਸਾਨਮਾਸੇ ਵਸਿਤ੍ਵਾ ਪੁਨ ਹਿਮਵਨ੍ਤਂ ਗਨ੍ਤ੍ਵਾ ਯਾਵਜੀਵਂ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ. ਬੋਧਿਸਤ੍ਤੋਪਿ ਯਾਵਜੀਵਂ ਉਪੋਸਥਵਾਸਂ ਵਸਿਤ੍ਵਾ ਸਗ੍ਗਪੁਰਂ ਪੂਰੇਸਿ. ਸੋਪਿ ਰਾਜਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਤਦਾ ਆਲ਼ਾਰੋ ਸਾਰਿਪੁਤ੍ਤਤ੍ਥੇਰੋ ਅਹੋਸਿ, ਬਾਰਾਣਸਿਰਾਜਾ ਆਨਨ੍ਦਤ੍ਥੇਰੋ, ਸਙ੍ਖਪਾਲਨਾਗਰਾਜਾ ਲੋਕਨਾਥੋ.

ਤਸ੍ਸ ਸਰੀਰਪਰਿਚ੍ਚਾਗੋ ਦਾਨਪਾਰਮੀ, ਤਥਾਰੂਪੇਨਪਿ ਵਿਸਤੇਜੇਨ ਸਮਨ੍ਨਾਗਤਸ੍ਸ ਤਥਾਰੂਪਾਯਪਿ ਪੀਲ਼ਾਯ ਸਤਿ ਸੀਲਸ੍ਸ ਅਭਿਨ੍ਨਤਾ ਸੀਲਪਾਰਮੀ, ਦੇਵਭੋਗਸਮ੍ਪਤ੍ਤਿਸਦਿਸਂ ਭੋਗਂ ਪਹਾਯ ਨਾਗਭਵਨਤੋ ਨਿਕ੍ਖਮਿਤ੍ਵਾ ਸਮਣਧਮ੍ਮਕਰਣਂ ਨੇਕ੍ਖਮ੍ਮਪਾਰਮੀ, ‘‘ਦਾਨਾਦਿਅਤ੍ਥਂ ਇਦਞ੍ਚਿਦਞ੍ਚ ਕਾਤੁਂ ਵਟ੍ਟਤੀ’’ਤਿ ਸਂਵਿਦਹਨਂ ਪਞ੍ਞਾਪਾਰਮੀ, ਕਾਮਵਿਤਕ੍ਕਵਿਨੋਦਨਂ ਅਧਿਵਾਸਨਵੀਰਿਯਞ੍ਚ ਵੀਰਿਯਪਾਰਮੀ, ਅਧਿਵਾਸਨਖਨ੍ਤਿ ਖਨ੍ਤਿਪਾਰਮੀ, ਸਚ੍ਚਸਮਾਦਾਨਂ ਸਚ੍ਚਪਾਰਮੀ, ਅਚਲਸਮਾਦਾਨਾਧਿਟ੍ਠਾਨਂ ਅਧਿਟ੍ਠਾਨਪਾਰਮੀ, ਭੋਜਪੁਤ੍ਤੇ ਉਪਾਦਾਯ ਸਬ੍ਬਸਤ੍ਤੇਸੁ ਮੇਤ੍ਤਾਨੁਦ੍ਦਯਭਾਵੋ ਮੇਤ੍ਤਾਪਾਰਮੀ, ਵੇਦਨਾਯ ਸਤ੍ਤਸਙ੍ਖਾਰਕਤਵਿਪ੍ਪਕਾਰੇਸੁ ਚ ਮਜ੍ਝਤ੍ਤਭਾਵੋ ਉਪੇਕ੍ਖਾਪਾਰਮੀਤਿ ਏਵਂ ਦਸ ਪਾਰਮਿਯੋ ਲਬ੍ਭਨ੍ਤਿ. ਸੀਲਪਾਰਮੀ ਪਨ ਅਤਿਸਯਵਤੀਤਿ ਕਤ੍ਵਾ ਸਾ ਏਵ ਦੇਸਨਂ ਆਰੁਲ਼੍ਹਾ. ਤਥਾ ਇਧ ਬੋਧਿਸਤ੍ਤਸ੍ਸ ਗੁਣਾਨੁਭਾਵਾ ‘‘ਯੋਜਨਸਤਿਕੇ ਨਾਗਭਵਨਟ੍ਠਾਨੇ’’ਤਿਆਦਿਨਾ ਭੂਰਿਦਤ੍ਤਚਰਿਯਾਯਂ (ਚਰਿਯਾ. ੨.੧੧ ਆਦਯੋ) ਵੁਤ੍ਤਨਯੇਨੇਵ ਯਥਾਰਹਂ ਵਿਭਾਵੇਤਬ੍ਬਾਤਿ.

ਸਙ੍ਖਪਾਲਚਰਿਯਾਵਣ੍ਣਨਾ ਨਿਟ੍ਠਿਤਾ.

ਏਤੇਤਿ ਯੇ ਹਤ੍ਥਿਨਾਗਚਰਿਯਾਦਯੋ ਇਮਸ੍ਮਿਂ ਵਗ੍ਗੇ ਨਿਦ੍ਦਿਟ੍ਠਾ ਅਨਨ੍ਤਰਗਾਥਾਯ ਚ ‘‘ਹਤ੍ਥਿਨਾਗੋ ਭੂਰਿਦਤ੍ਤੋ’’ਤਿਆਦਿਨਾ ਉਦ੍ਦਾਨਵਸੇਨ ਸਙ੍ਗਹੇਤ੍ਵਾ ਦਸ੍ਸਿਤਾ ਨਵ ਚਰਿਯਾ, ਤੇ ਸਬ੍ਬੇ ਵਿਸੇਸਤੋ ਸੀਲਪਾਰਮਿਪੂਰਣਵਸੇਨ ਪਵਤ੍ਤਿਯਾ ਸੀਲਂ ਬਲਂ ਏਤੇਸਨ੍ਤਿ ਸੀਲਬਲਾ. ਸੀਲਸ੍ਸ ਪਰਮਤ੍ਥਪਾਰਮਿਭੂਤਸ੍ਸ ਪਰਿਕ੍ਖਰਣਤੋ ਸਨ੍ਤਾਨਸ੍ਸ ਚ ਪਰਿਭਾਵਨਾਵਸੇਨ ਅਭਿਸਙ੍ਖਰਣਤੋ ਪਰਿਕ੍ਖਾਰਾ. ਉਕ੍ਕਂਸਗਤਾਯ ਸੀਲਪਰਮਤ੍ਥਪਾਰਮਿਯਾ ਅਸਮ੍ਪੁਣ੍ਣਤ੍ਤਾ ਪਦੇਸੋ ਏਤੇਸਂ ਅਤ੍ਥਿ, ਨ ਨਿਪ੍ਪਦੇਸੋਤਿ ਪਦੇਸਿਕਾ ਸਪ੍ਪਦੇਸਾ. ਕਸ੍ਮਾਤਿ ਚੇ? ਆਹ ‘‘ਜੀਵਿਤਂ ਪਰਿਰਕ੍ਖਿਤ੍ਵਾ, ਸੀਲਾਨਿ ਅਨੁਰਕ੍ਖਿਸ’’ਨ੍ਤਿ, ਯਸ੍ਮਾ ਏਤੇਸੁ ਹਤ੍ਥਿਨਾਗਚਰਿਯਾਦੀਸੁ (ਚਰਿਯਾ. ੨.੧ ਆਦਯੋ) ਅਹਂ ਅਤ੍ਤਨੋ ਜੀਵਿਤਂ ਏਕਦੇਸੇਨ ਪਰਿਰਕ੍ਖਿਤ੍ਵਾਵ ਸੀਲਾਨਿ ਅਨੁਰਕ੍ਖਿਂ, ਜੀਵਿਤਂ ਨ ਸਬ੍ਬਥਾ ਪਰਿਚ੍ਚਜਿਂ, ਏਕਨ੍ਤੇਨੇਵ ਪਨ ਸਙ੍ਖਪਾਲਸ੍ਸ ਮੇ ਸਤੋ ਸਬ੍ਬਕਾਲਮ੍ਪਿ ਜੀਵਿਤਂ ਯਸ੍ਸ ਕਸ੍ਸਚਿ ਨਿਯ੍ਯਤ੍ਤਂ, ਸਙ੍ਖਪਾਲਨਾਗਰਾਜਸ੍ਸ ਪਨ ਮੇ ਮਹਾਨੁਭਾਵਸ੍ਸ ਉਗ੍ਗਵਿਸਤੇਜਸ੍ਸ ਸਤੋ ਸਮਾਨਸ੍ਸ ਸਬ੍ਬਕਾਲਮ੍ਪਿ ਤੇਹਿ ਲੁਦ੍ਦੇਹਿ ਸਮਾਗਮੇ ਤਤੋ ਪੁਬ੍ਬੇਪਿ ਪਚ੍ਛਾਪਿ ਸਤੋ ਏਵਂ ਪੁਗ੍ਗਲਵਿਭਾਗਂ ਅਕਤ੍ਵਾ ਯਸ੍ਸ ਕਸ੍ਸਚਿ ਸੀਲਾਨੁਰਕ੍ਖਣਤ੍ਥਮੇਵ ਜੀਵਿਤਂ ਏਕਂਸੇਨੇਵ ਨਿਯ੍ਯਤ੍ਤਂ ਨੀਯਾਤਿਤਂ ਦਾਨਮੁਖੇ ਨਿਸ੍ਸਟ੍ਠਂ, ਤਸ੍ਮਾ ਸਾ ਸੀਲਪਾਰਮੀਤਿ ਯਸ੍ਮਾ ਚੇਤਦੇਵਂ, ਤਸ੍ਮਾ ਤੇਨ ਕਾਰਣੇਨ ਸਾ ਪਰਮਤ੍ਥਪਾਰਮਿਭਾਵਂ ਪਤ੍ਤਾ ਮਯ੍ਹਂ ਸੀਲਪਾਰਮੀਤਿ ਦਸ੍ਸੇਤੀਤਿ.

ਪਰਮਤ੍ਥਦੀਪਨਿਯਾ ਚਰਿਯਾਪਿਟਕਸਂਵਣ੍ਣਨਾਯ

ਦਸਵਿਧਚਰਿਯਾਸਙ੍ਗਹਸ੍ਸ ਵਿਸੇਸਤੋ

ਸੀਲਪਾਰਮਿਵਿਭਾਵਨਸ੍ਸ

ਦੁਤਿਯਵਗ੍ਗਸ੍ਸ ਅਤ੍ਥਵਣ੍ਣਨਾ ਨਿਟ੍ਠਿਤਾ.