੬. ਰੁਰੁਮਿਗਰਾਜਚਰਿਯਾਵਣ੍ਣਨਾ

੪੮. ਛਟ੍ਠੇ ਸੁਤਤ੍ਤਕਨਕਸਨ੍ਨਿਭੋਤਿ ਯਥਾ ਸੁਟ੍ਠੁ ਅਪਗਤਸਬ੍ਬਕਾਲ਼ਕੋ ਹੋਤਿ, ਏਵਂ ਅਗ੍ਗਿਮ੍ਹਿ ਪਕ੍ਖਿਪਿਤ੍ਵਾ ਸੁਤਤ੍ਤਕਨਕਸਨ੍ਨਿਭੋ. ਮਿਗਰਾਜਾ ਰੁਰੁ ਨਾਮਾਤਿ ਜਾਤਿਸਿਦ੍ਧੇਨ ਨਾਮੇਨ ਰੁਰੁ ਨਾਮ ਮਿਗਰਾਜਾ, ਜਾਤਿਤੋ ਰੁਰੁ, ਮਿਗਾਨਞ੍ਚ ਰਾਜਾਤਿ ਅਤ੍ਥੋ. ਪਰਮਸੀਲਸਮਾਹਿਤੋਤਿ ਉਤ੍ਤਮਸੀਲਸਮਾਹਿਤੋ, ਵਿਸੁਦ੍ਧਸੀਲੋ ਚੇਵ ਸਮਾਹਿਤਚਿਤ੍ਤੋ ਚ, ਵਿਸੁਦ੍ਧਸੀਲੇ ਵਾ ਸਮ੍ਮਾ ਆਹਿਤਚਿਤ੍ਤੋਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਤਦਾ ਬੋਧਿਸਤ੍ਤੋ ਰੁਰੁਮਿਗਯੋਨਿਯਂ ਨਿਬ੍ਬਤ੍ਤਿ. ਤਸ੍ਸ ਸਰੀਰਚ੍ਛਵਿ ਸੁਟ੍ਠੁ ਤਾਪੇਤ੍ਵਾ ਮਜ੍ਜਿਤਕਞ੍ਚਨਪਟ੍ਟਵਣ੍ਣੋ ਅਹੋਸਿ, ਹਤ੍ਥਪਾਦਾ ਲਾਖਾਰਸਪਰਿਕਮ੍ਮਕਤਾ ਵਿਯ, ਨਙ੍ਗੁਟ੍ਠਂ ਚਮਰੀਨਙ੍ਗੁਟ੍ਠਂ ਵਿਯ, ਸਿਙ੍ਗਾਨਿ ਰਜਤਦਾਮਵਣ੍ਣਾਨਿ ਅਕ੍ਖੀਨਿ ਸੁਮਜ੍ਜਿਤਮਣਿਗੁਲ਼ਿਕਾ ਵਿਯ, ਮੁਖਂ ਓਦਹਿਤ੍ਵਾ ਠਪਿਤਰਤ੍ਤਕਮ੍ਬਲਗੇਣ੍ਡੁਕਾ ਵਿਯ. ਸੋ ਜਨਸਂਸਗ੍ਗਂ ਪਹਾਯ ਵਿਵੇਕਵਾਸਂ ਵਸਿਤੁਕਾਮੋ ਪਰਿਵਾਰਂ ਛਡ੍ਡੇਤ੍ਵਾ ਏਕਕੋਵ ਗਙ੍ਗਾਨਿਵਤ੍ਤਨੇ ਰਮਣੀਯੇ ਸਾਲਮਿਸ੍ਸਕੇ ਸੁਪੁਪ੍ਫਿਤਪਵਨੇ ਵਸਤਿ. ਤੇਨ ਵੁਤ੍ਤਂ –

੪੯. ‘‘ਰਮ੍ਮੇ ਪਦੇਸੇ ਰਮਣੀਯੇ, ਵਿਵਿਤ੍ਤੇ ਅਮਨੁਸ੍ਸਕੇ;

ਤਤ੍ਥ ਵਾਸਂ ਉਪਗਞ੍ਛਿਂ, ਗਙ੍ਗਾਕੂਲੇ ਮਨੋਰਮੇ’’ਤਿ.

ਤਤ੍ਥ ਰਮ੍ਮੇ ਪਦੇਸੇਤਿ ਮੁਤ੍ਤਾਤਲਸਦਿਸਵਾਲੁਕਾਚੁਣ੍ਣਪਣ੍ਡਰੇਹਿ ਭੂਮਿਭਾਗੇਹਿ ਸਿਨਿਦ੍ਧਹਰਿਤਤਿਣਸਞ੍ਚਰਿਤੇਹਿ ਵਨਤ੍ਥਲੇਹਿ ਚਿਤ੍ਤਤ੍ਥਰਣੇਹਿ ਵਿਯ ਨਾਨਾਵਣ੍ਣਵਿਚਿਤ੍ਤੇਹਿ ਸਿਲਾਤਲੇਹਿ ਮਣਿਕ੍ਖਨ੍ਧਨਿਮ੍ਮਲਸਲਿਲੇਹਿ ਜਲਾਸਯੇਹਿ ਚ ਸਮਨ੍ਨਾਗਤਤ੍ਤਾ ਯੇਭੁਯ੍ਯੇਨ ਚ ਇਨ੍ਦਗੋਪਕਵਣ੍ਣਾਯ ਰਤ੍ਤਾਯ ਸੁਖਸਮ੍ਫਸ੍ਸਾਯ ਤਿਣਜਾਤਿਯਾ ਸਞ੍ਛਨ੍ਨਤ੍ਤਾ ਰਮ੍ਮੇ ਅਰਞ੍ਞਪ੍ਪਦੇਸੇ. ਰਮ੍ਮਣੀਯੇਤਿ ਪੁਪ੍ਫਫਲਪਲ੍ਲਵਾਲਙ੍ਕਤਵਿਪੁਲਸਾਖਾਵਿਨਦ੍ਧੇਹਿ ਨਾਨਾਵਿਧਦਿਜਗਣੂਪਕੂਜਿਤੇਹਿ ਵਿਵਿਧਤਰੁਲਤਾਵਨਵਿਰਾਜਿਤੇਹਿ ਯੇਭੁਯ੍ਯੇਨ ਅਮ੍ਬਸਾਲਵਨਸਣ੍ਡਮਣ੍ਡਿਤੇਹਿ ਵਨਗਹਨੇਹਿ ਉਪਸੋਭਿਤਤ੍ਤਾ ਤਤ੍ਥ ਪਵਿਟ੍ਠਸ੍ਸ ਜਨਸ੍ਸ ਰਤਿਜਨਨਟ੍ਠੇਨ ਰਮਣੀਯੇ. ਵੁਤ੍ਤਮ੍ਪਿ ਚੇਤਂ ਰੁਰੁਮਿਗਰਾਜਜਾਤਕੇ –

‘‘ਏਤਸ੍ਮਿਂ ਵਨਸਣ੍ਡਸ੍ਮਿਂ, ਅਮ੍ਬਾ ਸਾਲਾ ਚ ਪੁਪ੍ਫਿਤਾ;

ਇਨ੍ਦਗੋਪਕਸਞ੍ਛਨ੍ਨੋ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ. (ਜਾ. ੧.੧੩.੧੧੯);

ਵਿਵਿਤ੍ਤੇਤਿ ਜਨਵਾਸਵਿਰਹੇਨ ਸੁਞ੍ਞੇ. ਅਮਨੁਸ੍ਸਕੇਤਿ ਸਞ੍ਚਰਣਮਨੁਸ੍ਸਾਨਮ੍ਪਿ ਤਤ੍ਥ ਅਭਾਵੇਨ ਮਨੁਸ੍ਸਰਹਿਤੇ. ਮਨੋਰਮੇਤਿ ਯਥਾਵੁਤ੍ਤਗੁਣਸਮ੍ਪਤ੍ਤਿਯਾ ਵਿਸੇਸਤੋ ਪਵਿਵੇਕਕਾਮਾਨਂ ਮਨੋ ਰਮੇਤੀਤਿ ਮਨੋਰਮੇ.

੫੦. ਅਥ ਉਪਰਿਗਙ੍ਗਾਯਾਤਿ ਏਤ੍ਥ ਅਥਾਤਿ ਅਧਿਕਾਰੇ ਨਿਪਾਤੋ, ਤੇਨ ਮਯਿ ਤਤ੍ਥ ਤਥਾ ਵਸਨ੍ਤੇ ਇਦਂ ਅਧਿਕਾਰਨ੍ਤਰਂ ਉਪ੍ਪਨ੍ਨਨ੍ਤਿ ਦੀਪੇਤਿ. ਉਪਰਿਗਙ੍ਗਾਯਾਤਿ ਗਙ੍ਗਾਯ ਨਦਿਯਾ ਉਪਰਿਸੋਤੇ. ਧਨਿਕੇਹਿ ਪਰਿਪੀਲ਼ਿਤੋਤਿ ਇਣਂ ਗਹੇਤ੍ਵਾ ਤਂ ਦਾਤੁਂ ਅਸਕ੍ਕੋਨ੍ਤੋ ਇਣਾਯਿਕੇਹਿ ਚੋਦਿਯਮਾਨੋ.

ਏਕੋ ਕਿਰ ਬਾਰਾਣਸਿਸੇਟ੍ਠਿ ਅਤ੍ਤਨੋ ਪੁਤ੍ਤਂ ‘‘ਅਯਂ ਸਿਪ੍ਪਂ ਉਗ੍ਗਣ੍ਹਨ੍ਤੋ ਕਿਲਮਿਸ੍ਸਤੀ’’ਤਿ ਕਿਞ੍ਚਿ ਸਿਪ੍ਪਂ ਨ ਉਗ੍ਗਣ੍ਹਾਪੇਸਿ. ਗੀਤਵਾਦਿਤਨਚ੍ਚਖਾਦਨਭੋਜਨਤੋ ਉਦ੍ਧਂ ਨ ਕਿਞ੍ਚਿ ਅਞ੍ਞਾਸਿ. ਤਂ ਵਯਪ੍ਪਤ੍ਤਂ ਪਤਿਰੂਪੇਨ ਦਾਰੇਨ ਸਂਯੋਜੇਤ੍ਵਾ ਧਨਂ ਨਿਯ੍ਯਾਤੇਤ੍ਵਾ ਮਾਤਾਪਿਤਰੋ ਕਾਲਮਕਂਸੁ. ਸੋ ਤੇਸਂ ਅਚ੍ਚਯੇਨ ਇਤ੍ਥਿਧੁਤ੍ਤਸੁਰਾਧੁਤ੍ਤਾਦਿਪਰਿਵੁਤੋ ਨਾਨਾਬ੍ਯਸਨਮੁਖੇਹਿ ਸਬ੍ਬਂ ਧਨਂ ਵਿਦ੍ਧਂਸੇਤ੍ਵਾ ਤਤ੍ਥ ਤਤ੍ਥ ਇਣਂ ਆਦਾਯ ਤਮ੍ਪਿ ਦਾਤੁਂ ਅਸਕ੍ਕੋਨ੍ਤੋ ਧਨਿਕੇਹਿ ਚੋਦਿਯਮਾਨੋ ‘‘ਕਿਂ ਮਯ੍ਹਂ ਜੀਵਿਤੇਨ, ਤੇਨੇਵਮ੍ਹਿ ਅਤ੍ਤਭਾਵੇਨ ਅਞ੍ਞੋ ਵਿਯ ਜਾਤੋ, ਮਰਣਂ ਮੇ ਸੇਯ੍ਯੋ’’ਤਿ ਚਿਨ੍ਤੇਤ੍ਵਾ ਇਣਾਯਿਕੇ ਆਹ – ‘‘ਤੁਮ੍ਹਾਕਂ ਇਣਪਣ੍ਣਾਨਿ ਗਹੇਤ੍ਵਾ ਆਗਚ੍ਛਥ, ਗਙ੍ਗਾਤੀਰੇ ਮੇ ਨਿਹਿਤਂ ਕੁਲਸਨ੍ਤਕਂ ਧਨਂ ਅਤ੍ਥਿ, ਤਂ ਵੋ ਦਸ੍ਸਾਮੀ’’ਤਿ. ਤੇ ਤੇਨ ਸਦ੍ਧਿਂ ਅਗਮਂਸੁ. ਸੋ ‘‘ਇਧ ਧਨਂ, ਏਤ੍ਥ ਧਨ’’ਨ੍ਤਿ ਨਿਧਿਟ੍ਠਾਨਂ ਆਚਿਕ੍ਖਨ੍ਤੋ ਵਿਯ ‘‘ਏਵਂ ਮੇ ਇਣਮੋਕ੍ਖੋ ਭਵਿਸ੍ਸਤੀ’’ਤਿ ਪਲਾਯਿਤ੍ਵਾ ਗਙ੍ਗਾਯਂ ਪਤਿ. ਸੋ ਚਣ੍ਡਸੋਤੇਨ ਵੁਯ੍ਹਨ੍ਤੋ ਕਾਰੁਞ੍ਞਰਵਂ ਰਵਿ. ਤੇਨ ਵੁਤ੍ਤਂ ‘‘ਅਥ ਉਪਰਿਗਙ੍ਗਾਯਾ’’ਤਿਆਦਿ.

ਤਤ੍ਥ ਜੀਵਾਮਿ ਵਾ ਮਰਾਮਿ ਵਾਤਿ ਇਮਸ੍ਮਿਂ ਗਙ੍ਗਾਸੋਤੇ ਪਤਿਤੋ ਜੀਵਾਮਿ ਵਾ ਮਰਾਮਿ ਵਾ, ਜੀਵਿਤਂ ਵਾ ਮੇ ਏਤ੍ਥ ਹੋਤੁ ਮਰਣਂ ਵਾ, ਉਭਯਥਾਪਿ ਇਣਾਯਿਕਪੀਲ਼ਾ ਨ ਹੋਤੀਤਿ ਅਧਿਪ੍ਪਾਯੋ.

੫੧. ਮਜ੍ਝੇ ਗਙ੍ਗਾਯ ਗਚ੍ਛਤੀਤਿ ਸੋ ਪੁਰਿਸੋ ਰਤ੍ਤਿਨ੍ਦਿਵਂ ਗਙ੍ਗਾਯ ਵੁਯ੍ਹਮਾਨੋ ਜੀਵਿਤਪੇਮਸ੍ਸ ਵਿਜ੍ਜਮਾਨਤ੍ਤਾ ਮਰਣਂ ਅਪ੍ਪਤ੍ਤੋ ਮਰਣਭਯਤਜ੍ਜਿਤੋ ਹੁਤ੍ਵਾ ਕਰੁਣਂ ਰਵਂ ਰਵਨ੍ਤੋ ਗਙ੍ਗਾਯ ਮਜ੍ਝੇ ਮਹੋਦਕੇਨ ਗਚ੍ਛਤਿ.

੫੨. ਅਥ ਮਹਾਪੁਰਿਸੋ ਅਡ੍ਢਰਤ੍ਤਸਮਯੇ ਤਸ੍ਸ ਤਂ ਕਰੁਣਂ ਪਰਿਦੇਵਨ੍ਤਸ੍ਸ ਪਰਿਦੇਵਿਤਸਦ੍ਦਂ ਸੁਤ੍ਵਾ ‘‘ਮਨੁਸ੍ਸਸਦ੍ਦੋ ਸੂਯਤਿ, ਮਾ ਮਯਿ ਇਧ ਧਰਨ੍ਤੇ ਮਰਤੁ, ਜੀਵਿਤਮਸ੍ਸ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਯਨਗੁਮ੍ਬਾ ਵੁਟ੍ਠਾਯ ਨਦੀਤੀਰਂ ਗਨ੍ਤ੍ਵਾ ‘‘ਅਮ੍ਭੋ ਪੁਰਿਸ, ਮਾ ਭਾਯਿ, ਜੀਵਿਤਂ ਤੇ ਦਸ੍ਸਾਮੀ’’ਤਿ ਵਤ੍ਵਾ ਅਸ੍ਸਾਸੇਤ੍ਵਾ ਸੋਤਂ ਛਿਨ੍ਦਨ੍ਤੋ ਗਨ੍ਤ੍ਵਾ ਤਂ ਪਿਟ੍ਠਿਯਂ ਆਰੋਪੇਤ੍ਵਾ ਤੀਰਂ ਪਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਪਰਿਸ੍ਸਮਂ ਵਿਨੋਦੇਤ੍ਵਾ ਫਲਾਫਲਾਨਿ ਦਤ੍ਵਾ ਦ੍ਵੀਹਤੀਹਚ੍ਚਯੇਨ ਤਂ ਆਹ – ‘‘ਅਮ੍ਭੋ ਪੁਰਿਸ, ਅਹਂ ਤਂ ਬਾਰਾਣਸਿਗਾਮਿਮਗ੍ਗਂ ਪਾਪੇਸ੍ਸਾਮਿ, ਤ੍ਵਂ ‘ਅਸੁਕਟ੍ਠਾਨੇ ਨਾਮ ਕਞ੍ਚਨਮਿਗੋ ਵਸਤੀ’ਤਿ ਮਾ ਕਸ੍ਸਚਿ ਆਰੋਚੇਹੀ’’ਤਿ. ਸੋ ‘‘ਸਾਧੁ, ਸਾਮੀ’’ਤਿ ਸਮ੍ਪਟਿਚ੍ਛਿ. ਮਹਾਸਤ੍ਤੋ ਤਂ ਅਤ੍ਤਨੋ ਪਿਟ੍ਠਿਂ ਆਰੋਪੇਤ੍ਵਾ ਬਾਰਾਣਸਿਮਗ੍ਗੇ ਓਤਾਰੇਤ੍ਵਾ ਨਿਵਤ੍ਤਿ. ਤੇਨ ਵੁਤ੍ਤਂ – ‘‘ਤਸ੍ਸਾਹਂ ਸਦ੍ਦਂ ਸੁਤ੍ਵਾਨ, ਕਰੁਣਂ ਪਰਿਦੇਵਤੋ’’ਤਿਆਦਿ.

ਤਤ੍ਥ ਕੋਸਿ ਤ੍ਵਂ ਨਰੋਤਿ ਤ੍ਵਂ ਕੋ ਮਨੁਸ੍ਸੋ ਅਸਿ, ਕੁਤੋ ਇਧ ਵੁਯ੍ਹਮਾਨੋ ਆਗਤੋਸੀਤਿ ਅਤ੍ਥੋ.

੫੩. ਅਤ੍ਤਨੋ ਕਰਣਨ੍ਤਿ ਅਤ੍ਤਨੋ ਕਿਰਿਯਂ. ਧਨਿਕੇਹਿ ਭੀਤੋਤਿ ਇਣਾਯਿਕੇਹਿ ਉਬ੍ਬਿਗ੍ਗੋ. ਤਸਿਤੋਤਿ ਉਤ੍ਰਸ੍ਤੋ.

੫੪. ਤਸ੍ਸ ਕਤ੍ਵਾਨ ਕਾਰੁਞ੍ਞਂ, ਚਜਿਤ੍ਵਾ ਮਮ ਜੀਵਿਤਨ੍ਤਿ ਕਾਰੁਞ੍ਞਂ ਕਤ੍ਵਾ ਮਹਾਕਰੁਣਾਯ ਸਮੁਸ੍ਸਾਹਿਤੋ ਮਮ ਜੀਵਿਤਂ ਤਸ੍ਸ ਪੁਰਿਸਸ੍ਸ ਪਰਿਚ੍ਚਜਿਤ੍ਵਾ. ਪਵਿਸਿਤ੍ਵਾ ਨੀਹਰਿਂ ਤਸ੍ਸਾਤਿ ਨਦਿਂ ਪਵਿਸਿਤ੍ਵਾ ਸੋਤਂ ਛਿਨ੍ਦਨ੍ਤੋ ਉਜੁਕਮੇਵ ਗਨ੍ਤ੍ਵਾ ਮਮ ਪਿਟ੍ਠਿਂ ਆਰੋਪੇਤ੍ਵਾ ਤਤੋ ਤਂ ਨੀਹਰਿਂ. ਤਸ੍ਸਾਤਿ ਉਪਯੋਗਤ੍ਥੇ ਸਾਮਿਵਚਨਂ. ‘‘ਤਤ੍ਥਾ’’ਤਿਪਿ ਪਾਲ਼ਿ, ਤਤ੍ਥ ਨਦਿਯਨ੍ਤਿ ਅਤ੍ਥੋ. ਅਨ੍ਧਕਾਰਮ੍ਹਿ ਰਤ੍ਤਿਯਾਤਿ ਰਤ੍ਤਿਯਾ ਅਨ੍ਧਕਾਰਸਮਯੇ, ਕਾਲ਼ਪਕ੍ਖਰਤ੍ਤਿਯਨ੍ਤਿ ਅਤ੍ਥੋ.

੫੫. ਅਸ੍ਸਤ੍ਥਕਾਲਮਞ੍ਞਾਯਾਤਿ ਪਰਿਸ੍ਸਮਂ ਅਪਨੇਤ੍ਵਾ ਫਲਾਫਲਾਨਿ ਦਤ੍ਵਾ ਦ੍ਵੀਹਤੀਹਚ੍ਚਯੇਨ ਕਿਲਮਥਸ੍ਸ ਵਿਗਤਕਾਲਂ ਜਾਨਿਤ੍ਵਾ. ਏਕਂ ਤਂ ਵਰਂ ਯਾਚਾਮੀਤਿ ਅਹਂ ਤਂ ਏਕਂ ਵਰਂ ਯਾਚਾਮਿ, ਮਯ੍ਹਂ ਏਕਂ ਵਰਂ ਦੇਹੀਤਿ ਅਤ੍ਥੋ. ਕਿਂ ਤਂ ਵਰਨ੍ਤਿ ਚੇ? ਆਹ – ਮਾ ਮਂ ਕਸ੍ਸਚਿ ਪਾਵਦਾਤਿ ‘‘ਅਸੁਕਟ੍ਠਾਨੇ ਸੁਵਣ੍ਣਮਿਗੋ ਵਸਤੀ’’ਤਿ ਕਸ੍ਸਚਿ ਰਞ੍ਞੋ ਵਾ ਰਾਜਮਹਾਮਤ੍ਤਸ੍ਸ ਵਾ ਮਂ ਮਾ ਪਾਵਦ.

ਅਥ ਤਸ੍ਮਿਂ ਪੁਰਿਸੇ ਬਾਰਾਣਸਿਂ ਪਵਿਟ੍ਠਦਿਵਸੇਯੇਵ ਸੋ ਰਾਜਾ ‘‘ਅਹਂ, ਦੇਵ, ਸੁਵਣ੍ਣਵਣ੍ਣਂ ਮਿਗਂ ਮਯ੍ਹਂ ਧਮ੍ਮਂ ਦੇਸੇਨ੍ਤਂ ਸੁਪਿਨੇਨ ਅਦ੍ਦਸਂ, ਅਹਞ੍ਹਿ ਸਚ੍ਚਸੁਪਿਨਾ, ਅਦ੍ਧਾ ਸੋ ਵਿਜ੍ਜਤਿ, ਤਸ੍ਮਾ ਕਞ੍ਚਨਮਿਗਸ੍ਸ ਧਮ੍ਮਂ ਸੋਤੁਕਾਮਾ ਲਭਿਸ੍ਸਾਮਿ ਚੇ ਜੀਵਿਸ੍ਸਾਮਿ, ਨੋ ਚੇ ਮੇ ਜੀਵਿਤਂ ਨਤ੍ਥੀ’’ਤਿ ਅਗ੍ਗਮਹੇਸਿਯਾ ਵੁਤ੍ਤੋ ਤਂ ਅਸ੍ਸਾਸੇਤ੍ਵਾ ‘‘ਸਚੇ ਮਨੁਸ੍ਸਲੋਕੇ ਅਤ੍ਥਿ, ਲਭਿਸ੍ਸਸੀ’’ਤਿ ਵਤ੍ਵਾ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ‘‘ਸੁਵਣ੍ਣਮਿਗਾ ਨਾਮ ਹੋਨ੍ਤੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਦੇਵ, ਹੋਨ੍ਤੀ’’ਤਿ ਸੁਤ੍ਵਾ ਸਹਸ੍ਸਤ੍ਥਵਿਕਂ ਸੁਵਣ੍ਣਚਙ੍ਕੋਟਕੇ ਠਪੇਤ੍ਵਾ ਤਂ ਹਤ੍ਥਿਕ੍ਖਨ੍ਧਂ ਆਰੋਪੇਤ੍ਵਾ ਨਗਰੇ ਭੇਰਿਂ ਚਰਾਪੇਸਿ – ‘‘ਯੋ ਸੁਵਣ੍ਣਮਿਗਂ ਆਚਿਕ੍ਖਿਸ੍ਸਤਿ, ਤਸ੍ਸ ਹਤ੍ਥਿਨਾ ਸਦ੍ਧਿਂ ਇਮਂ ਦਸ੍ਸਾਮੀ’’ਤਿ. ਤਤੋ ਉਤ੍ਤਰਿਮ੍ਪਿ ਦਾਤੁਕਾਮੋ ਹੁਤ੍ਵਾ –

‘‘ਤਸ੍ਸ ਗਾਮਵਰਂ ਦਮ੍ਮਿ, ਨਾਰਿਯੋ ਚ ਅਲਙ੍ਕਤਾ;

ਯੋ ਮੇਤਂ ਮਿਗਮਕ੍ਖਾਤਿ, ਮਿਗਾਨਂ ਮਿਗਮੁਤ੍ਤਮ’’ਨ੍ਤਿ. (ਜਾ. ੧.੧੩.੧੧੭) –

ਗਾਥਂ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ਸਕਲਨਗਰੇ ਵਾਚਾਪੇਸਿ. ਅਥ ਸੋ ਸੇਟ੍ਠਿਪੁਤ੍ਤੋ ਤਂ ਗਾਥਂ ਸੁਤ੍ਵਾ ਰਾਜਪੁਰਿਸਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਰਞ੍ਞੋ ਏਵਰੂਪਂ ਮਿਗਂ ਆਚਿਕ੍ਖਿਸ੍ਸਾਮਿ, ਮਂ ਰਾਜਾਨਂ ਦਸ੍ਸੇਥਾ’’ਤਿ ਆਹ. ਰਾਜਪੁਰਿਸਾ ਤਂ ਰਞ੍ਞੋ ਸਨ੍ਤਿਕਂ ਨੇਤ੍ਵਾ ਤਮਤ੍ਥਂ ਆਰੋਚੇਸੁਂ. ਰਾਜਾ ‘‘ਸਚ੍ਚਂ, ਭੋ, ਅਦ੍ਦਸਾ’’ਤਿ ਪੁਚ੍ਛਿ. ਸੋ ‘‘ਸਚ੍ਚਂ, ਦੇਵ, ਮਯਾ ਸਦ੍ਧਿਂ ਆਗਚ੍ਛਤੁ, ਅਹਂ ਤਂ ਦਸ੍ਸੇਸ੍ਸਾਮੀ’’ਤਿ ਆਹ. ਰਾਜਾ ਤਮੇਵ ਪੁਰਿਸਂ ਮਗ੍ਗਦੇਸਕਂ ਕਤ੍ਵਾ ਮਹਨ੍ਤੇਨ ਪਰਿਵਾਰੇਨ ਤਂ ਠਾਨਂ ਗਨ੍ਤ੍ਵਾ ਤੇਨ ਮਿਤ੍ਤਦੁਬ੍ਭਿਨਾ ਪੁਰਿਸੇਨ ਦਸ੍ਸਿਤਂ ਪਦੇਸਂ ਆਵੁਧਹਤ੍ਥੇ ਪੁਰਿਸੇ ਸਮਨ੍ਤਤੋਵ ਪਰਿਵਾਰੇਤ੍ਵਾ ‘‘ਉਕ੍ਕੁਟ੍ਠਿਂ ਕਰੋਥਾ’’ਤਿ ਵਤ੍ਵਾ ਸਯਂ ਕਤਿਪਯੇਹਿ ਜਨੇਹਿ ਸਦ੍ਧਿਂ ਏਕਮਨ੍ਤੇ ਅਟ੍ਠਾਸਿ. ਸੋਪਿ ਪੁਰਿਸੋ ਅਵਿਦੂਰੇ ਅਟ੍ਠਾਸਿ. ਮਹਾਸਤ੍ਤੋ ਸਦ੍ਦਂ ਸੁਤ੍ਵਾ ‘‘ਮਹਤੋ ਬਲਕਾਯਸ੍ਸ ਸਦ੍ਦੋ, ਅਦ੍ਧਾ ਤਮ੍ਹਾ ਮੇ ਪੁਰਿਸਾ ਭਯੇਨ ਉਪ੍ਪਨ੍ਨੇਨ ਭਵਿਤਬ੍ਬ’’ਨ੍ਤਿ ਞਤ੍ਵਾ ਉਟ੍ਠਾਯ ਸਕਲਪਰਿਸਂ ਓਲੋਕੇਤ੍ਵਾ ‘‘ਰਞ੍ਞੋ ਠਿਤਟ੍ਠਾਨੇਯੇਵ ਮੇ ਸੋਤ੍ਥਿ ਭਵਿਸ੍ਸਤੀ’’ਤਿ ਰਾਜਾਭਿਮੁਖੋ ਪਾਯਾਸਿ. ਰਾਜਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਨਾਗਬਲੋ ਅਵਤ੍ਥਰਨ੍ਤੋ ਆਗਚ੍ਛੇਯ੍ਯਾ’’ਤਿ ਸਰਂ ਸਨ੍ਨਯ੍ਹਿਤ੍ਵਾ ‘‘ਇਮਂ ਮਿਗਂ ਸਨ੍ਤਾਸੇਤ੍ਵਾ ਸਚੇ ਪਲਾਯਤਿ, ਵਿਜ੍ਝਿਤ੍ਵਾ ਦੁਬ੍ਬਲਂ ਕਤ੍ਵਾ ਗਣ੍ਹਿਸ੍ਸਾਮੀ’’ਤਿ ਬੋਧਿਸਤ੍ਤਾਭਿਮੁਖੋ ਅਹੋਸਿ. ਮਹਾਸਤ੍ਤੋ –

‘‘ਆਗਮੇਹਿ ਮਹਾਰਾਜ, ਮਾ ਮਂ ਵਿਜ੍ਝਿ ਰਥੇਸਭ;

ਕੋ ਨੁ ਤੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ. (ਜਾ. ੧.੧੩.੧੨੧) –

ਗਾਥਂ ਅਭਾਸਿ. ਰਾਜਾ ਤਸ੍ਸ ਮਧੁਰਕਥਾਯ ਬਜ੍ਝਿਤ੍ਵਾ ਸਰਂ ਪਟਿਸਂਹਰਿਤ੍ਵਾ ਗਾਰਵੇਨ ਅਟ੍ਠਾਸਿ. ਮਹਾਸਤ੍ਤੋਪਿ ਰਾਜਾਨਂ ਉਪਸਙ੍ਕਮਿਤ੍ਵਾ ਮਧੁਰਪਟਿਸਨ੍ਥਾਰਂ ਅਕਾਸਿ. ਮਹਾਜਨੋਪਿ ਸਬ੍ਬਾਵੁਧਾਨਿ ਅਪਨੇਤ੍ਵਾ ਆਗਨ੍ਤ੍ਵਾ ਰਾਜਾਨਂ ਪਰਿਵਾਰੇਸਿ. ਤੇਨ ਵੁਤ੍ਤਂ –

੫੬. ‘‘ਨਗਰਂ ਗਨ੍ਤ੍ਵਾਨ ਆਚਿਕ੍ਖਿ, ਪੁਚ੍ਛਿਤੋ ਧਨਹੇਤੁਕੋ;

ਰਾਜਾਨਂ ਸੋ ਗਹੇਤ੍ਵਾਨ, ਉਪਗਞ੍ਛਿ ਮਮਨ੍ਤਿਕ’’ਨ੍ਤਿ.

ਤਸ੍ਸਤ੍ਥੋ – ਯੋ ਮਿਤ੍ਤਦੁਬ੍ਭੀ ਪਾਪਪੁਰਿਸੋ ਜੀਵਿਤਂ ਪਰਿਚ੍ਚਜਿਤ੍ਵਾ ਤਥਾ ਮਯਾ ਪਾਣਸਂਸਯਤੋ ਮੋਚਿਤੋ ਬਾਰਾਣਸਿਨਗਰਂ ਗਨ੍ਤ੍ਵਾ ਅਤ੍ਤਨਾ ਲਦ੍ਧਬ੍ਬਧਨਨਿਮਿਤ੍ਤਂ ਰਞ੍ਞੋ ਮਂ ਆਚਿਕ੍ਖਿ, ਆਚਿਕ੍ਖਿਤ੍ਵਾ ਸੋ ਰਞ੍ਞੋ ਗਾਹਾਪੇਤੁਂ ਮਗ੍ਗਦੇਸਕੋ ਹੁਤ੍ਵਾ ਰਾਜਾਨਂ ਗਹੇਤ੍ਵਾ ਮਮ ਸਨ੍ਤਿਕਮੁਪਾਗਮੀਤਿ.

ਮਹਾਸਤ੍ਤੋ ਸੁਵਣ੍ਣਕਿਙ੍ਕਿਣਿਕਂ ਚਾਲੇਨ੍ਤੋ ਵਿਯ ਮਧੁਰਸ੍ਸਰੇਨ ਰਾਜਾਨਂ ਪੁਨ ਪੁਚ੍ਛਿ – ‘‘ਕੋ ਨੁ ਤੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ’’ਤਿ. ਤਸ੍ਮਿਂ ਖਣੇ ਸੋ ਪਾਪਪੁਰਿਸੋ ਥੋਕਂ ਪਟਿਕ੍ਕਮਿਤ੍ਵਾ ਸੋਤਪਥੇ ਅਟ੍ਠਾਸਿ. ਰਾਜਾ ‘‘ਇਮਿਨਾ ਮੇ ਤ੍ਵਂ ਦਸ੍ਸਿਤੋ’’ਤਿ ਤਂ ਪੁਰਿਸਂ ਨਿਦ੍ਦਿਸਿ. ਤਤੋ ਬੋਧਿਸਤ੍ਤੋ –

‘‘ਸਚ੍ਚਂ ਕਿਰੇਵ ਮਾਹਂਸੁ, ਨਰਾ ਏਕਚ੍ਚਿਯਾ ਇਧ;

ਕਟ੍ਠਂ ਨਿਪ੍ਲਵਿਤਂ ਸੇਯ੍ਯੋ, ਨ ਤ੍ਵੇਵੇਕਚ੍ਚਿਯੋ ਨਰੋ’’ਤਿ. (ਜਾ. ੧.੧੩.੧੨੩) –

ਗਾਥਮਾਹ. ਤਂ ਸੁਤ੍ਵਾ ਰਾਜਾ ਸਂਵੇਗਜਾਤੋ –

‘‘ਕਿਂ ਨੁ ਰੁਰੁ ਗਰਹਸਿ ਮਿਗਾਨਂ, ਕਿਂ ਪਕ੍ਖੀਨਂ ਕਿਂ ਪਨ ਮਾਨੁਸਾਨਂ;

ਭਯਞ੍ਹਿ ਮਂ ਵਿਨ੍ਦਤਿਨਪ੍ਪਰੂਪਂ, ਸੁਤ੍ਵਾਨ ਤਂ ਮਾਨੁਸਿਂ ਭਾਸਮਾਨ’’ਨ੍ਤਿ. (ਜਾ. ੧.੧੩.੧੨੪) –

ਗਾਥਮਾਹ. ਤਤੋ ਮਹਾਪੁਰਿਸੋ ‘‘ਮਹਾਰਾਜ, ਨ ਮਿਗਂ ਨ ਪਕ੍ਖਿਂ ਗਰਹਾਮਿ, ਮਨੁਸ੍ਸਂ ਪਨ ਗਰਹਾਮੀ’’ਤਿ ਦਸ੍ਸੇਨ੍ਤੋ –

‘‘ਯਮੁਦ੍ਧਰਿਂ ਵਾਹਨੇ ਵੁਯ੍ਹਮਾਨਂ, ਮਹੋਦਕੇ ਸਲਿਲੇ ਸੀਘਸੋਤੇ;

ਤਤੋਨਿਦਾਨਂ ਭਯਮਾਗਤਂ ਮਮ, ਦੁਕ੍ਖੋ ਹਵੇ ਰਾਜ ਅਸਬ੍ਭਿ ਸਙ੍ਗਮੋ’’ਤਿ. (ਜਾ. ੧.੧੩.੧੨੫) –

ਆਹ.

ਤਤ੍ਥ ਨਿਪ੍ਲਵਿਤਨ੍ਤਿ ਉਦ੍ਧਰਿਤਂ, ਏਕਚ੍ਚਿਯੋਤਿ ਏਕਚ੍ਚੋ ਮਿਤ੍ਤਦੁਬ੍ਭੀ ਪਾਪਪੁਰਿਸੋ ਉਦਕੇ ਪਤਨ੍ਤੋਪਿ ਉਤ੍ਤਾਰਿਤੋ ਨਤ੍ਵੇਵ ਸੇਯ੍ਯੋ. ਕਟ੍ਠਞ੍ਹਿ ਨਾਨਪ੍ਪਕਾਰੇਨ ਉਪਕਾਰਾਯ ਸਂਵਤ੍ਤਤਿ, ਮਿਤ੍ਤਦੁਬ੍ਭੀ ਪਨ ਵਿਨਾਸਾਯ, ਤਸ੍ਮਾ ਤਤੋ ਕਟ੍ਠਮੇਵ ਵਰਤਰਨ੍ਤਿ. ਮਿਗਾਨਨ੍ਤਿ ਰੁਰੁਮਿਗਰਾਜ, ਮਿਗਾਨਂ ਕਿਂ ਅਞ੍ਞਤਰਂ ਗਰਹਸਿ, ਉਦਾਹੁ ਪਕ੍ਖੀਨਂ ਮਨੁਸ੍ਸਾਨਨ੍ਤਿ ਪੁਚ੍ਛਤਿ. ਭਯਞ੍ਹਿ ਮਂ ਵਿਨ੍ਦਤਿਨਪ੍ਪਰੂਪਨ੍ਤਿ ਮਹਨ੍ਤਂ ਭਯਂ ਮਂ ਪਟਿਲਭਤਿ, ਅਤ੍ਤਨੋ ਸਨ੍ਤਕਂ ਵਿਯ ਕਰੋਤੀਤਿ ਅਤ੍ਥੋ.

ਵਾਹਨੇਤਿ ਪਤਿਤਪਤਿਤੇ ਵਹਿਤੁਂ ਸਮਤ੍ਥੇ ਗਙ੍ਗਾਵਹੇ. ਮਹੋਦਕੇ ਸਲਿਲੇਤਿ ਮਹੋਦਕੀਭੂਤੇ ਸਲਿਲੇ. ਉਭਯੇਨਾਪਿ ਗਙ੍ਗਾਵਹਸ੍ਸ ਬਹੂਦਕਤਂ ਦਸ੍ਸੇਤਿ. ਤਤੋ ਨਿਦਾਨਨ੍ਤਿ, ਮਹਾਰਾਜ, ਯੋ ਮਯ੍ਹਂ ਤਯਾ ਦਸ੍ਸਿਤੋ ਪੁਰਿਸੋ, ਏਸੋ ਮਯਾ ਗਙ੍ਗਾਯ ਵੁਯ੍ਹਮਾਨੋ ਅਡ੍ਢਰਤ੍ਤਸਮਯੇ ਕਰੁਣਂ ਪਰਿਦੇਵਨ੍ਤੋ ਤਤੋ ਉਤ੍ਤਾਰਿਤੋ, ਤਤੋਨਿਦਾਨਂ ਇਦਂ ਮਯ੍ਹਂ ਭਯਮਾਗਤਂ, ਅਸਪ੍ਪੁਰਿਸੇਹਿ ਸਮਾਗਮੋ ਨਾਮ ਦੁਕ੍ਖੋਤਿ.

ਤਂ ਸੁਤ੍ਵਾ ਰਾਜਾ ਤਸ੍ਸ ਕੁਜ੍ਝਿਤ੍ਵਾ ‘‘ਏਵਂ ਬਹੂਪਕਾਰਸ੍ਸ ਨਾਮ ਗੁਣਂ ਨ ਜਾਨਾਤਿ, ਦੁਕ੍ਖਂ ਉਪ੍ਪਾਦੇਤਿ, ਵਿਜ੍ਝਿਤ੍ਵਾ ਨਂ ਜੀਵਿਤਕ੍ਖਯਂ ਪਾਪੇਸ੍ਸਾਮੀ’’ਤਿ ਸਰਂ ਸਨ੍ਨਯ੍ਹਿ. ਤੇਨ ਵੁਤ੍ਤਂ –

੫੭. ‘‘ਯਾਵਤਾ ਕਰਣਂ ਸਬ੍ਬਂ, ਰਞ੍ਞੋ ਆਰੋਚਿਤਂ ਮਯਾ;

ਰਾਜਾ ਸੁਤ੍ਵਾਨ ਵਚਨਂ, ਉਸੁਂ ਤਸ੍ਸ ਪਕਪ੍ਪਯਿ;

ਇਧੇਵ ਘਾਤਯਿਸ੍ਸਾਮਿ, ਮਿਤ੍ਤਦੁਬ੍ਭਿਂ ਅਨਰਿਯ’’ਨ੍ਤਿ.

ਤਤ੍ਥ ਯਾਵਤਾ ਕਰਣਨ੍ਤਿ ਯਂ ਤਸ੍ਸ ਮਯਾ ਕਤਂ ਉਪਕਾਰਕਰਣਂ, ਤਂ ਸਬ੍ਬਂ. ਪਕਪ੍ਪਯੀਤਿ ਸਨ੍ਨਯ੍ਹਿ. ਮਿਤ੍ਤਦੁਬ੍ਭਿਨ੍ਤਿ ਅਤ੍ਤਨੋ ਮਿਤ੍ਤੇਸੁ ਉਪਕਾਰੀਸੁ ਦੁਬ੍ਭਨਸੀਲਂ.

ਤਤੋ ਮਹਾਸਤ੍ਤੋ ‘‘ਏਸ ਬਾਲੋ ਮਂ ਨਿਸ੍ਸਾਯ ਮਾ ਨਸ੍ਸੀ’’ਤਿ ਚਿਨ੍ਤੇਤ੍ਵਾ ‘‘ਮਹਾਰਾਜ, ਵਧੋ ਨਾਮੇਸ ਬਾਲਸ੍ਸ ਵਾ ਪਣ੍ਡਿਤਸ੍ਸ ਵਾ ਨ ਸਾਧੂਹਿ ਪਸਂਸਿਤੋ, ਅਞ੍ਞਦਤ੍ਥੁ ਗਰਹਿਤੋ ਏਵ, ਤਸ੍ਮਾ ਮਾ ਇਮਂ ਘਾਤੇਹਿ, ਅਯਂ ਯਥਾਰੁਚਿ ਗਚ੍ਛਤੁ, ਯਞ੍ਚੇਵ ਤਸ੍ਸ ‘ਦਸ੍ਸਾਮੀ’ਤਿ ਤਯਾ ਪਟਿਞ੍ਞਾਤਂ, ਤਮ੍ਪਿ ਅਹਾਪੇਤ੍ਵਾਵ ਦੇਹੀ’’ਤਿ ਆਹ. ‘‘ਅਹਞ੍ਚ ਤੇ ਯਂ ਇਚ੍ਛਿਤਂ, ਤਂ ਕਰਿਸ੍ਸਾਮਿ, ਅਤ੍ਤਾਨਂ ਤੁਯ੍ਹਂ ਦਮ੍ਮੀ’’ਤਿ ਆਹ. ਤੇਨ ਵੁਤ੍ਤਂ –

੫੮. ‘‘ਤਮਹਂ ਅਨੁਰਕ੍ਖਨ੍ਤੋ, ਨਿਮ੍ਮਿਨਿਂ ਮਮ ਅਤ੍ਤਨਾ;

ਤਿਟ੍ਠਤੇਸੋ ਮਹਾਰਾਜ, ਕਾਮਕਾਰੋ ਭਵਾਮਿ ਤੇ’’ਤਿ.

ਤਤ੍ਥ ਨਿਮ੍ਮਿਨਿਨ੍ਤਿ ਤਂ ਮਿਤ੍ਤਦੁਬ੍ਭਿਂ ਪਾਪਪੁਗ੍ਗਲਂ ਅਨੁਰਕ੍ਖਨ੍ਤੋ ਮਮ ਅਤ੍ਤਨੋ ਅਤ੍ਤਭਾਵੇਨ ਤਂ ਪਰਿਵਤ੍ਤੇਸਿਂ, ਅਤ੍ਤਾਨਂ ਰਞ੍ਞੋ ਨਿਯ੍ਯਾਤੇਤ੍ਵਾ ਰਾਜਹਤ੍ਥਤੋ ਪਤ੍ਤਂ ਤਸ੍ਸ ਮਰਣਂ ਨਿਵਾਰੇਸਿਨ੍ਤਿ ਅਤ੍ਥੋ. ਤਿਟ੍ਠਤੇਸੋਤਿਆਦਿ ਵਿਨਿਮਯਾਕਾਰਦਸ੍ਸਨਂ.

੫੯. ਇਦਾਨਿ ਯਦਤ੍ਥਂ ਸੋ ਅਤ੍ਤਵਿਨਿਮਯੋ ਕਤੋ, ਤਂ ਦਸ੍ਸੇਤੁਂ ਓਸਾਨਗਾਥਮਾਹ. ਤਸ੍ਸਤ੍ਥੋ – ਤਦਾ ਮਂ ਨਿਸ੍ਸਾਯ ਤਂ ਮਿਤ੍ਤਦੁਬ੍ਭਿਂ ਪੁਰਿਸਂ ਤਸ੍ਮਿਂ ਰਞ੍ਞੇ ਜੀਵਿਤਾ ਵੋਰੋਪੇਤੁਕਾਮੇ ਅਹਂ ਅਤ੍ਤਾਨਂ ਰਞ੍ਞੋ ਪਰਿਚ੍ਚਜਨ੍ਤੋ ਮਮ ਸੀਲਮੇਵ ਅਨੁਰਕ੍ਖਿਂ, ਜੀਵਿਤਂ ਪਨ ਨਾਰਕ੍ਖਿਂ. ਯਂ ਪਨਾਹਮੇਵ ਅਤ੍ਤਨੋ ਜੀਵਿਤਨਿਰਪੇਕ੍ਖਂ ਸੀਲਵਾ ਆਸਿਂ, ਤਂ ਸਮ੍ਮਾਸਮ੍ਬੋਧਿਯਾ ਏਵ ਕਾਰਣਾਤਿ.

ਅਥ ਰਾਜਾ ਬੋਧਿਸਤ੍ਤੇਨ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਤਸ੍ਸ ਪੁਰਿਸਸ੍ਸ ਮਰਣੇ ਨਿਵਾਰੇਨ੍ਤੇ ਤੁਟ੍ਠਮਾਨਸੋ ‘‘ਗਚ੍ਛ, ਭੋ, ਮਿਗਰਾਜਸ੍ਸ ਅਨੁਗ੍ਗਹੇਨ ਮਮ ਹਤ੍ਥਤੋ ਮਰਣਾ ਮੁਤ੍ਤੋ’’ਤਿ ਵਤ੍ਵਾ ਯਥਾਪਟਿਞ੍ਞਾਯ ਤਞ੍ਚਸ੍ਸ ਧਨਂ ਦਾਪੇਸਿ. ਮਹਾਸਤ੍ਤਸ੍ਸ ਯਥਾਰੁਚਿਯਾਵ ਅਨੁਜਾਨਿਤ੍ਵਾ ਤਂ ਨਗਰਂ ਨੇਤ੍ਵਾ ਨਗਰਞ੍ਚ ਬੋਧਿਸਤ੍ਤਞ੍ਚ ਅਲਙ੍ਕਾਰਾਪੇਤ੍ਵਾ ਦੇਵਿਯਾ ਧਮ੍ਮਂ ਦੇਸਾਪੇਸਿ. ਮਹਾਸਤ੍ਤੋ ਦੇਵਿਂ ਆਦਿਂ ਕਤ੍ਵਾ ਰਞ੍ਞੋ ਚ ਰਾਜਪਰਿਸਾਯ ਚ ਮਧੁਰਾਯ ਮਨੁਸ੍ਸਭਾਸਾਯ ਧਮ੍ਮਂ ਦੇਸੇਤ੍ਵਾ ਰਾਜਾਨਂ ਦਸਹਿ ਰਾਜਧਮ੍ਮੇਹਿ ਓਵਦਿਤ੍ਵਾ ਮਹਾਜਨਂ ਅਨੁਸਾਸਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਮਿਗਗਣਪਰਿਵੁਤੋ ਵਾਸਂ ਕਪ੍ਪੇਸਿ. ਰਾਜਾਪਿ ਮਹਾਸਤ੍ਤਸ੍ਸ ਓਵਾਦੇ ਠਤ੍ਵਾ ਸਬ੍ਬਸਤ੍ਤਾਨਂ ਅਭਯਂ ਦਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸੁਗਤਿਪਰਾਯਨੋ ਅਹੋਸਿ.

ਤਦਾ ਸੇਟ੍ਠਿਪੁਤ੍ਤੋ ਦੇਵਦਤ੍ਤੋ ਅਹੋਸਿ, ਰਾਜਾ ਆਨਨ੍ਦੋ, ਰੁਰੁਮਿਗਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਇਧਾਪਿ ਪਵਿਵੇਕਾਰਾਮਤਾਯ ਜਨਸਂਸਗ੍ਗਂ ਅਨਿਚ੍ਛਤੋ ਯੂਥਂ ਪਹਾਯ ਏਕਕਵਿਹਾਰੋ, ਅਡ੍ਢਰਤ੍ਤਸਮਯੇ ਨਦਿਯਾ ਵੁਯ੍ਹਮਾਨਸ੍ਸ ਕਰੁਣਂ ਪਰਿਦੇਵਨ੍ਤਸ੍ਸ ਪੁਰਿਸਸ੍ਸ ਅਟ੍ਟਸ੍ਸਰਂ ਸੁਤ੍ਵਾ ਸਯਿਤਟ੍ਠਾਨਤੋ ਵੁਟ੍ਠਾਯ ਨਦੀਤੀਰਂ ਗਨ੍ਤ੍ਵਾ ਮਹਾਗਙ੍ਗਾਯ ਮਹਤਿ ਉਦਕੋਘੇ ਵਤ੍ਤਮਾਨੇ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਓਤਰਿਤ੍ਵਾ ਸੋਤਂ ਪਚ੍ਛਿਨ੍ਦਿਤ੍ਵਾ ਤਂ ਪੁਰਿਸਂ ਅਤ੍ਤਨੋ ਪਿਟ੍ਠਿਯਂ ਆਰੋਪੇਤ੍ਵਾ ਤੀਰਂ ਪਾਪੇਤ੍ਵਾ ਸਮਸ੍ਸਾਸੇਤ੍ਵਾ ਫਲਾਫਲਾਦੀਨਿ ਦਤ੍ਵਾ ਪਰਿਸ੍ਸਮਵਿਨੋਦਨਂ, ਪੁਨ ਤਂ ਅਤ੍ਤਨੋ ਪਿਟ੍ਠਿਂ ਆਰੋਪੇਤ੍ਵਾ ਅਰਞ੍ਞਤੋ ਨੀਹਰਿਤ੍ਵਾ ਮਹਾਮਗ੍ਗੇ ਓਤਾਰਣਂ, ਸਰਂ ਸਨ੍ਨਯ੍ਹਿਤ੍ਵਾ ਵਿਜ੍ਝਿਸ੍ਸਾਮੀਤਿ ਅਭਿਮੁਖੇ ਠਿਤਸ੍ਸ ਰਞ੍ਞੋ ਨਿਬ੍ਭਯੇਨ ਹੁਤ੍ਵਾ ਪਟਿਮੁਖਮੇਵ ਗਨ੍ਤ੍ਵਾ ਪਠਮਤਰਂ ਮਨੁਸ੍ਸਭਾਸਾਯ ਆਲਪਿਤ੍ਵਾ ਮਧੁਰਪਟਿਸਨ੍ਥਾਰਕਰਣਂ, ਮਿਤ੍ਤਦੁਬ੍ਭੀ ਪਾਪਪੁਰਿਸਂ ਹਨ੍ਤੁਕਾਮਂ ਰਾਜਾਨਂ ਧਮ੍ਮਕਥਂ ਕਤ੍ਵਾ ਪੁਨਪਿ ਅਤ੍ਤਨੋ ਜੀਵਿਤਂ ਪਰਿਚ੍ਚਜਿਤ੍ਵਾ ਮਰਣਤੋ ਪਮੋਚਨਂ, ਤਸ੍ਸ ਚ ਰਞ੍ਞੋ ਯਥਾਪਟਿਞ੍ਞਂ ਧਨਦਾਪਨਂ, ਰਞ੍ਞਾ ਅਤ੍ਤਨੋ ਵਰੇ ਦੀਯਮਾਨੇ ਤੇਨ ਸਬ੍ਬਸਤ੍ਤਾਨਂ ਅਭਯਦਾਪਨਂ, ਰਾਜਾਨਞ੍ਚ ਦੇਵਿਞ੍ਚ ਪਮੁਖਂ ਕਤ੍ਵਾ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਦਾਨਾਦੀਸੁ ਪੁਞ੍ਞੇਸੁ ਤੇਸਂ ਪਤਿਟ੍ਠਾਪਨਂ, ਲਦ੍ਧਾਭਯਾਨਂ ਮਿਗਾਨਂ ਓਵਾਦਂ ਦਤ੍ਵਾ ਮਨੁਸ੍ਸਾਨਂ ਸਸ੍ਸਖਾਦਨਤੋ ਨਿਵਾਰਣਂ, ਪਣ੍ਣਸਞ੍ਞਾਯ ਚ ਤਸ੍ਸ ਯਾਵਜ੍ਜਕਾਲਾ ਥਾਵਰਕਰਣਨ੍ਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਰੁਰੁਮਿਗਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.