੫. ਮਹਿਂਸਰਾਜਚਰਿਯਾਵਣ੍ਣਨਾ

੩੭. ਪਞ੍ਚਮੇ ਮਹਿਂਸੋ ਪਵਨਚਾਰਕੋਤਿ ਮਹਾਵਨਚਾਰੀ ਵਨਮਹਿਂਸੋ ਯਦਾ ਹੋਮੀਤਿ ਯੋਜਨਾ. ਪਵਡ੍ਢਕਾਯੋਤਿ ਵਯਸਮ੍ਪਤ੍ਤਿਯਾ ਅਙ੍ਗਪਚ੍ਚਙ੍ਗਾਨਞ੍ਚ ਥੂਲਭਾਵੇਨ ਅਭਿਵਡ੍ਢਕਾਯੋ. ਬਲਵਾਤਿ ਮਹਾਬਲੋ ਥਾਮਸਮ੍ਪਨ੍ਨੋ. ਮਹਨ੍ਤੋਤਿ ਵਿਪੁਲਸਰੀਰੋ. ਹਤ੍ਥਿਕਲਭਪ੍ਪਮਾਣੋ ਕਿਰ ਤਦਾ ਬੋਧਿਸਤ੍ਤਸ੍ਸ ਕਾਯੋ ਹੋਤਿ. ਭੀਮਦਸ੍ਸਨੋਤਿ ਮਹਾਸਰੀਰਤਾਯ ਵਨਮਹਿਂਸਜਾਤਿਤਾਯ ਚ ਸੀਲਂ ਅਜਾਨਨ੍ਤਾਨਂ ਭਯਂ ਜਨਨਤੋ ਭਯਾਨਕਦਸ੍ਸਨੋ.

੩੮. ਪਬ੍ਭਾਰੇਤਿ ਓਲਮ੍ਬਕਸਿਲਾਕੁਚ੍ਛਿਯਂ. ਦਕਾਸਯੇਤਿ ਜਲਾਸਯਸਮੀਪੇ. ਹੋਤੇਤ੍ਥ ਠਾਨਨ੍ਤਿ ਏਤ੍ਥ ਮਹਾਵਨੇ ਯੋ ਕੋਚਿ ਪਦੇਸੋ ਵਨਮਹਿਂਸਾਨਂ ਤਿਟ੍ਠਨਟ੍ਠਾਨਂ ਹੋਤਿ. ਤਹਿਂ ਤਹਿਨ੍ਤਿ ਤਤ੍ਥ ਤਤ੍ਥ.

੩੯. ਵਿਚਰਨ੍ਤੋਤਿ ਵਿਹਾਰਫਾਸੁਕਂ ਵੀਮਂਸਿਤੁਂ ਵਿਚਰਨ੍ਤੋ. ਠਾਨਂ ਅਦ੍ਦਸ ਭਦ੍ਦਕਨ੍ਤਿ ਏਵਂ ਵਿਚਰਨ੍ਤੋ ਤਸ੍ਮਿਂ ਮਹਾਰਞ੍ਞੇ ਭਦ੍ਦਕਂ ਮਯ੍ਹਂ ਫਾਸੁਕਂ ਰੁਕ੍ਖਮੂਲਟ੍ਠਾਨਂ ਅਦ੍ਦਕ੍ਖਿਂ. ਦਿਸ੍ਵਾ ਚ ਤਂ ਠਾਨਂ ਉਪਗਨ੍ਤ੍ਵਾਨ, ਤਿਟ੍ਠਾਮਿ ਚ ਸਯਾਮਿ ਚ ਗੋਚਰਂ ਗਹੇਤ੍ਵਾ ਦਿਵਾ ਤਂ ਰੁਕ੍ਖਮੂਲਟ੍ਠਾਨਂ ਗਨ੍ਤ੍ਵਾ ਠਾਨਸਯਨੇਹਿ ਵੀਤਿਨਾਮੇਮੀਤਿ ਦਸ੍ਸੇਤਿ.

੪੦. ਤਦਾ ਕਿਰ ਬੋਧਿਸਤ੍ਤੋ ਹਿਮਵਨ੍ਤਪ੍ਪਦੇਸੇ ਮਹਿਂਸਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਥਾਮਸਮ੍ਪਨ੍ਨੋ ਮਹਾਸਰੀਰੋ ਹਤ੍ਥਿਕਲਭਪ੍ਪਮਾਣੋ ਪਬ੍ਬਤਪਾਦਪਬ੍ਭਾਰਗਿਰਿਦੁਗ੍ਗਵਨਘਟਾਦੀਸੁ ਵਿਚਰਨ੍ਤੋ ਏਕਂ ਫਾਸੁਕਂ ਮਹਾਰੁਕ੍ਖਮੂਲਂ ਦਿਸ੍ਵਾ ਗੋਚਰਂ ਗਹੇਤ੍ਵਾ ਦਿਵਾ ਤਤ੍ਥ ਵਸਤਿ. ਅਥੇਕੋ ਲੋਲਮਕ੍ਕਟੋ ਰੁਕ੍ਖਾ ਓਤਰਿਤ੍ਵਾ ਮਹਾਸਤ੍ਤਸ੍ਸ ਪਿਟ੍ਠਿਂ ਅਭਿਰੁਹਿਤ੍ਵਾ ਉਚ੍ਚਾਰਪਸ੍ਸਾਵਂ ਕਤ੍ਵਾ ਸਿਙ੍ਗੇਸੁ ਗਣ੍ਹਿਤ੍ਵਾ ਓਲਮ੍ਬਨ੍ਤੋ ਨਙ੍ਗੁਟ੍ਠੇ ਗਹੇਤ੍ਵਾ ਦੋਲਾਯਨ੍ਤੋ ਕੀਲ਼ਿ. ਬੋਧਿਸਤ੍ਤੋ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਦਾਯ ਤਂ ਤਸ੍ਸ ਅਨਾਚਾਰਂ ਨ ਮਨਸਾਕਾਸਿ. ਮਕ੍ਕਟੋ ਪੁਨਪ੍ਪੁਨਂ ਤਥੇਵ ਕਰੋਤਿ. ਤੇਨ ਵੁਤ੍ਤਂ ‘‘ਅਥੇਤ੍ਥ ਕਪਿ ਮਾਗਨ੍ਤ੍ਵਾ’’ਤਿਆਦਿ.

ਤਤ੍ਥ ਕਪਿ ਮਾਗਨ੍ਤ੍ਵਾਤਿ ਕਪਿ ਆਗਨ੍ਤ੍ਵਾ, ਮ-ਕਾਰੋ ਪਦਸਨ੍ਧਿਕਰੋ. ਪਾਪੋਤਿ ਲਾਮਕੋ. ਅਨਰਿਯੋਤਿ ਅਨਯੇ ਇਰਿਯਨੇਨ ਅਯੇ ਚ ਨ ਇਰਿਯਨੇਨ ਅਨਰਿਯੋ, ਨਿਹੀਨਾਚਾਰੋਤਿ ਅਤ੍ਥੋ. ਲਹੂਤਿ ਲੋਲੋ. ਖਨ੍ਧੇਤਿ ਖਨ੍ਧਪ੍ਪਦੇਸੇ. ਮੁਤ੍ਤੇਤੀਤਿ ਪਸ੍ਸਾਵਂ ਕਰੋਤਿ. ਓਹਦੇਤੀਤਿ ਕਰੀਸਂ ਓਸ੍ਸਜ੍ਜਤਿ. ਤਨ੍ਤਿ ਤਂ ਮਂ, ਤਦਾ ਮਹਿਂਸਭੂਤਂ ਮਂ.

੪੧. ਸਕਿਮ੍ਪਿ ਦਿਵਸਨ੍ਤਿ ਏਕਦਿਵਸਮ੍ਪਿ ਦੂਸੇਤਿ ਮਂ ਸਬ੍ਬਕਾਲਮ੍ਪਿ. ਤੇਨਾਹ ‘‘ਦੂਸੇਤਿ ਮਂ ਸਬ੍ਬਕਾਲ’’ਨ੍ਤਿ. ਨ ਕੇਵਲਞ੍ਚ ਦੁਤਿਯਤਤਿਯਚਤੁਤ੍ਥਦਿਵਸਮਤ੍ਤਂ, ਅਥ ਖੋ ਸਬ੍ਬਕਾਲਮ੍ਪਿ ਮਂ ਪਸ੍ਸਾਵਾਦੀਹਿ ਦੂਸੇਤਿ. ਯਦਾ ਯਦਾ ਮੁਤ੍ਤਾਦੀਨਿ ਕਾਤੁਕਾਮੋ, ਤਦਾ ਤਦਾ ਮਯ੍ਹਮੇਵ ਉਪਰਿ ਕਰੋਤੀਤਿ ਦਸ੍ਸੇਤਿ. ਉਪਦ੍ਦੁਤੋਤਿ ਬਾਧਿਤੋ, ਤੇਨ ਸਿਙ੍ਗੇਸੁ ਓਲਮ੍ਬਨਾਦਿਨਾ ਮੁਤ੍ਤਾਦਿਅਸੁਚਿਮਕ੍ਖਣੇਨ ਤਸ੍ਸ ਚ ਅਪਹਰਣਤ੍ਥਂ ਅਨੇਕਵਾਰਂ ਸਿਙ੍ਗਕੋਟੀਹਿ ਵਾਲਗ੍ਗੇਨ ਚ ਅਨੇਕਵਾਰਂ ਕਦ੍ਦਮਪਂਸੁਮਿਸ੍ਸਕਂ ਉਦਕਂ ਸਿਞ੍ਚਿਤ੍ਵਾ ਧੋਵਨੇਨ ਚ ਨਿਪ੍ਪੀਲ਼ਿਤੋ ਹੋਮੀਤਿ ਅਤ੍ਥੋ.

੪੨. ਯਕ੍ਖੋਤਿ ਤਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ. ਮਂ ਇਦਮਬ੍ਰਵੀਤਿ ਰੁਕ੍ਖਕ੍ਖਨ੍ਧੇ ਠਤ੍ਵਾ ‘‘ਮਹਿਂਸਰਾਜ, ਕਸ੍ਮਾ ਇਮਸ੍ਸ ਦੁਟ੍ਠਮਕ੍ਕਟਸ੍ਸ ਅਵਮਾਨਂ ਸਹਸੀ’’ਤਿ ਇਮਮਤ੍ਥਂ ਪਕਾਸੇਨ੍ਤੋ ਨਾਸੇਹੇਤਂ ਛਵਂ ਪਾਪਂ , ਸਿਙ੍ਗੇਹਿ ਚ ਖੁਰੇਹਿ ਚਾਤਿ ਇਦਂ ਵਚਨਂ ਮਂ ਅਭਾਸਿ.

੪੩. ਏਵਂ ਵੁਤ੍ਤੇ ਤਦਾ ਯਕ੍ਖੇਤਿ ਤਦਾ ਤਸ੍ਮਿਂ ਕਾਲੇ ਤਸ੍ਮਿਂ ਯਕ੍ਖੇ ਏਵਂ ਵੁਤ੍ਤੇ ਸਤਿ. ਅਹਂ ਤਂ ਇਦਮਬ੍ਰਵਿਨ੍ਤਿ ਅਹਂ ਤਂ ਯਕ੍ਖਂ ਇਦਂ ਇਦਾਨਿ ਵਕ੍ਖਮਾਨਂ ਅਬ੍ਰਵਿਂ ਅਭਾਸਿਂ. ਕੁਣਪੇਨਾਤਿ ਕਿਲੇਸਾਸੁਚਿਪਗ੍ਘਰਣੇਨ ਸੁਚਿਜਾਤਿਕਾਨਂ ਸਾਧੂਨਂ ਪਰਮਜਿਗੁਚ੍ਛਨੀਯਤਾਯ ਅਤਿਦੁਗ੍ਗਨ੍ਧਵਾਯਨੇਨ ਚ ਕੁਣਪਸਦਿਸਤਾਯ ਕੁਣਪੇਨ. ਪਾਪੇਨਾਤਿ ਪਾਣਾਤਿਪਾਤਪਾਪੇਨ. ਅਨਰਿਯੇਨਾਤਿ ਅਨਰਿਯਾਨਂ ਅਸਾਧੂਨਂ ਮਾਗਵਿਕਨੇਸਾਦਾਦੀਨਂ ਹੀਨਪੁਰਿਸਾਨਂ ਧਮ੍ਮਤ੍ਤਾ ਅਨਰਿਯੇਨ, ਕਿਂ ਕੇਨ ਕਾਰਣੇਨ, ਤ੍ਵਂ ਦੇਵਤੇ ਮਂ ਮਕ੍ਖੇਸਿ, ਅਯੁਤ੍ਤਂ ਤਯਾ ਵੁਤ੍ਤਂ ਮਂ ਪਾਪੇ ਨਿਯੋਜੇਨ੍ਤਿਯਾਤਿ ਦਸ੍ਸੇਤਿ.

੪੪. ਇਦਾਨਿ ਤਸ੍ਮਿਂ ਪਾਪਧਮ੍ਮੇ ਆਦੀਨਵਂ ਪਕਾਸੇਨ੍ਤੋ ‘‘ਯਦਿਹ’’ਨ੍ਤਿਆਦਿਮਾਹ. ਤਸ੍ਸਤ੍ਥੋ – ਭਦ੍ਦੇ ਦੇਵਤੇ, ਅਹਂ ਤਸ੍ਸ ਯਦਿ ਕੁਜ੍ਝੇਯ੍ਯਂ, ਤਤੋਪਿ ਲਾਮਕਤਰੋ ਭਵੇਯ੍ਯਂ. ਯੇਨ ਹਿ ਅਧਮ੍ਮਚਰਣੇਨ ਸੋ ਬਾਲਮਕ੍ਕਟੋ ਨਿਹੀਨੋ ਨਾਮ ਜਾਤੋ, ਸਚੇ ਪਨਾਹਂ ਤਤੋਪਿ ਬਲਵਤਰਂ ਪਾਪਧਮ੍ਮਂ ਚਰੇਯ੍ਯਂ, ਨਨੁ ਤੇਨ ਤਤੋ ਪਾਪਤਰੋ ਭਵੇਯ੍ਯਂ, ਅਟ੍ਠਾਨਞ੍ਚੇਤਂ ਯਦਿਹਂ ਇਧਲੋਕਪਰਲੋਕਂ ਤਦੁਤ੍ਤਰਿ ਚ ਜਾਨਿਤ੍ਵਾ ਠਿਤੋ ਏਕਨ੍ਤੇਨੇਵ ਪਰਹਿਤਾਯ ਪਟਿਪਨ੍ਨੋ ਏਵਰੂਪਂ ਪਾਪਧਮ੍ਮਂ ਚਰੇਯ੍ਯਨ੍ਤਿ. ਕਿਞ੍ਚ ਭਿਯ੍ਯੋ – ਸੀਲਞ੍ਚ ਮੇ ਪਭਿਜ੍ਜੇਯ੍ਯਾਤਿ ਅਹਞ੍ਚੇਵ ਖੋ ਪਨ ਏਵਰੂਪਂ ਪਾਪਂ ਕਰੇਯ੍ਯਂ, ਮਯ੍ਹਂ ਸੀਲਪਾਰਮੀ ਖਣ੍ਡਿਤਾ ਸਿਯਾ. ਵਿਞ੍ਞੂ ਚ ਗਰਹੇਯ੍ਯੁ ਮਨ੍ਤਿ ਪਣ੍ਡਿਤਾ ਚ ਦੇਵਮਨੁਸ੍ਸਾ ਮਂ ਗਰਹੇਯ੍ਯੁਂ ‘‘ਪਸ੍ਸਥ, ਭੋ, ਅਯਂ ਬੋਧਿਸਤ੍ਤੋ ਬੋਧਿਪਰਿਯੇਸਨਂ ਚਰਮਾਨੋ ਏਵਰੂਪਂ ਪਾਪਂ ਅਕਾਸੀ’’ਤਿ.

੪੫. ਹੀਲ਼ਿਤਾ ਜੀਵਿਤਾ ਵਾਪੀਤਿ ਵਾ-ਸਦ੍ਦੋ ਅਵਧਾਰਣੇ. ਏਵਂ ਵਿਞ੍ਞੂਹਿ ਹੀਲ਼ਿਤਾ ਗਰਹਿਤਾ ਜੀਵਿਤਾਪਿ ਪਰਿਸੁਦ੍ਧੇਨ ਪਰਿਸੁਦ੍ਧਸੀਲੇਨ ਹੁਤ੍ਵਾ ਮਤਂ ਵਾ ਮਰਣਮੇਵ ਵਰਂ ਉਤ੍ਤਮਂ ਸੇਯ੍ਯੋ. ਕ੍ਯਾਹਂ ਜੀਵਿਤਹੇਤੁਪਿ, ਕਾਹਾਮਿ ਪਰਹੇਠਨਨ੍ਤਿ ਏਵਂ ਜਾਨਨ੍ਤੋ ਚ ਅਹਂ ਮਯ੍ਹਂ ਜੀਵਿਤਨਿਮਿਤ੍ਤਮ੍ਪਿ ਪਰਸਤ੍ਤਵਿਹਿਂਸਨਂ ਕਿਂ ਕਾਹਾਮਿ ਕਿਂ ਕਰਿਸ੍ਸਾਮਿ, ਏਤਸ੍ਸ ਕਰਣੇ ਕਾਰਣਂ ਨਤ੍ਥੀਤਿ ਅਤ੍ਥੋ.

ਅਯਂ ਪਨ ਅਞ੍ਞੇਪਿ ਮਂ ਵਿਯ ਮਞ੍ਞਮਾਨੋ ਏਵਂ ਅਨਾਚਾਰਂ ਕਰਿਸ੍ਸਤਿ, ਤਤੋ ਯੇਸਂ ਚਣ੍ਡਮਹਿਂਸਾਨਂ ਏਵਂ ਕਰਿਸ੍ਸਤਿ, ਤੇ ਏਵ ਏਤਂ ਵਧਿਸ੍ਸਨ੍ਤਿ, ਸਾ ਏਤਸ੍ਸ ਅਞ੍ਞੇਹਿ ਮਾਰਣਾ ਮਯ੍ਹਂ ਦੁਕ੍ਖਤੋ ਚ ਪਾਣਾਤਿਪਾਤਤੋ ਚ ਮੁਤ੍ਤਿ ਭਵਿਸ੍ਸਤੀਤਿ ਆਹ. ਤੇਨ ਵੁਤ੍ਤਂ –

੪੬. ‘‘ਮਮੇਵਾਯਂ ਮਞ੍ਞਮਾਨੋ, ਅਞ੍ਞੇਪੇਵਂ ਕਰਿਸ੍ਸਤਿ;

ਤੇਵ ਤਸ੍ਸ ਵਧਿਸ੍ਸਨ੍ਤਿ, ਸਾ ਮੇ ਮੁਤ੍ਤਿ ਭਵਿਸ੍ਸਤੀ’’ਤਿ.

ਤਤ੍ਥ ਮਮੇਵਾਯਨ੍ਤਿ ਮਂ ਵਿਯ ਅਯਂ. ਅਞ੍ਞੇਪੀਤਿ ਅਞ੍ਞੇਸਮ੍ਪਿ. ਸੇਸਂ ਵੁਤ੍ਤਤ੍ਥਮੇਵ.

੪੭. ਹੀਨਮਜ੍ਝਿਮਉਕ੍ਕਟ੍ਠੇਤਿ ਹੀਨੇ ਚ ਮਜ੍ਝਿਮੇ ਚ ਉਕ੍ਕਟ੍ਠੇ ਚ ਨਿਮਿਤ੍ਤਭੂਤੇ. ਸਹਨ੍ਤੋ ਅਵਮਾਨਿਤਨ੍ਤਿ ਵਿਭਾਗਂ ਅਕਤ੍ਵਾ ਤੇਹਿ ਪਵਤ੍ਤਿਤਂ ਅਵਮਾਨਂ ਪਰਿਭਵਂ ਸਹਨ੍ਤੋ ਖਮਨ੍ਤੋ. ਏਵਂ ਲਭਤਿ ਸਪ੍ਪਞ੍ਞੋਤਿ ਏਵਂ ਹੀਨਾਦੀਸੁ ਵਿਭਾਗਂ ਅਕਤ੍ਵਾ ਖਨ੍ਤਿਮੇਤ੍ਤਾਨੁਦ੍ਦਯਂ ਉਪਟ੍ਠਪੇਤ੍ਵਾ ਤਦਪਰਾਧਂ ਸਹਨ੍ਤੋ ਸੀਲਾਦਿਪਾਰਮਿਯੋ ਬ੍ਰੂਹੇਤ੍ਵਾ ਮਨਸਾ ਯਥਾਪਤ੍ਥਿਤਂ ਯਥਿਚ੍ਛਿਤਂ ਸਬ੍ਬਞ੍ਞੁਤਞ੍ਞਾਣਂ ਲਭਤਿ ਪਟਿਵਿਜ੍ਝਤਿ, ਤਸ੍ਸ ਤਂ ਨ ਦੂਰੇਤਿ.

ਏਵਂ ਮਹਾਸਤ੍ਤੋ ਅਤ੍ਤਨੋ ਅਜ੍ਝਾਸਯਂ ਪਕਾਸੇਨ੍ਤੋ ਦੇਵਤਾਯ ਧਮ੍ਮਂ ਦੇਸੇਸਿ. ਸੋ ਕਤਿਪਾਹਚ੍ਚਯੇਨ ਅਞ੍ਞਤ੍ਥ ਗਤੋ. ਅਞ੍ਞੋ ਚਣ੍ਡਮਹਿਂਸੋ ਨਿਵਾਸਫਾਸੁਤਾਯ ਤਂ ਠਾਨਂ ਗਨ੍ਤ੍ਵਾ ਅਟ੍ਠਾਸਿ. ਦੁਟ੍ਠਮਕ੍ਕਟੋ ‘‘ਸੋ ਏਵ ਅਯ’’ਨ੍ਤਿ ਸਞ੍ਞਾਯ ਤਸ੍ਸ ਪਿਟ੍ਠਿਂ ਅਭਿਰੁਹਿਤ੍ਵਾ ਤਥੇਵ ਅਨਾਚਾਰਂ ਅਕਾਸਿ. ਅਥ ਨਂ ਸੋ ਵਿਧੁਨਨ੍ਤੋ ਭੂਮਿਯਂ ਪਾਤੇਤ੍ਵਾ ਸਿਙ੍ਗੇਨ ਹਦਯੇ ਵਿਜ੍ਝਿਤ੍ਵਾ ਪਾਦੇਹਿ ਮਦ੍ਦਿਤ੍ਵਾ ਸਞ੍ਚੁਣ੍ਣੇਸਿ.

ਤਦਾ ਸੀਲਵਾ ਮਹਿਂਸਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਹਤ੍ਥਿਨਾਗ- (ਚਰਿਯਾ. ੨.੧ ਆਦਯੋ) ਭੂਰਿਦਤ੍ਤ- (ਚਰਿਯਾ. ੨.੧੧ ਆਦਯੋ) ਚਮ੍ਪੇਯ੍ਯਨਾਗਰਾਜ- (ਚਰਿਯਾ. ੨.੨੦ ਆਦਯੋ) ਚਰਿਯਾਸੁ ਵਿਯ ਇਧ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵੇਦਿਤਬ੍ਬਾ.

ਮਹਿਂਸਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.