੯. ਵੇਸ੍ਸਨ੍ਤਰਚਰਿਯਾਵਣ੍ਣਨਾ

੬੭. ਨਵਮੇ ਯਾ ਮੇ ਅਹੋਸਿ ਜਨਿਕਾਤਿ ਏਤ੍ਥ ਮੇਤਿ ਵੇਸ੍ਸਨ੍ਤਰਭੂਤਂ ਅਤ੍ਤਾਨਂ ਸਨ੍ਧਾਯ ਸਤ੍ਥਾ ਵਦਤਿ. ਤੇਨੇਵਾਹ – ‘‘ਫੁਸ੍ਸਤੀ ਨਾਮ ਖਤ੍ਤਿਯਾ’’ਤਿ. ਤਦਾ ਹਿਸ੍ਸ ਮਾਤਾ ‘‘ਫੁਸ੍ਸਤੀ’’ਤਿ ਏਵਂਨਾਮਿਕਾ ਖਤ੍ਤਿਯਾਨੀ ਅਹੋਸਿ. ਸਾ ਅਤੀਤਾਸੁ ਜਾਤੀਸੂਤਿ ਸਾ ਤਤੋ ਅਨਨ੍ਤਰਾਤੀਤਜਾਤਿਯਂ. ਏਕਤ੍ਥੇ ਹਿ ਏਤਂ ਬਹੁਵਚਨਂ. ਸਕ੍ਕਸ੍ਸ ਮਹੇਸੀ ਪਿਯਾ ਅਹੋਸੀਤਿ ਸਮ੍ਬਨ੍ਧੋ. ਅਥ ਵਾ ਯਾ ਮੇ ਅਹੋਸਿ ਜਨਿਕਾ ਇਮਸ੍ਮਿਂ ਚਰਿਮਤ੍ਤਭਾਵੇ, ਸਾ ਅਤੀਤਾਸੁ ਜਾਤੀਸੁ ਫੁਸ੍ਸਤੀ ਨਾਮ, ਤਤ੍ਥ ਅਤੀਤਾਯ ਜਾਤਿਯਾ ਖਤ੍ਤਿਯਾ, ਯਤ੍ਥਾਹਂ ਤਸ੍ਸਾ ਕੁਚ੍ਛਿਮ੍ਹਿ ਵੇਸ੍ਸਨ੍ਤਰੋ ਹੁਤ੍ਵਾ ਨਿਬ੍ਬਤ੍ਤਿਂ, ਤਤੋ ਅਨਨ੍ਤਰਾਤੀਤਾਯ ਸਕ੍ਕਸ੍ਸ ਮਹੇਸੀ ਪਿਯਾ ਅਹੋਸੀਤਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਇਤੋ ਹਿ ਏਕਨਵੁਤੇ ਕਪ੍ਪੇ ਵਿਪਸ੍ਸੀ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਤਸ੍ਮਿਂ ਬਨ੍ਧੁਮਤੀਨਗਰਂ ਉਪਨਿਸ੍ਸਾਯ ਖੇਮੇ ਮਿਗਦਾਯੇ ਵਿਹਰਨ੍ਤੇ ਬਨ੍ਧੁਮਾ ਰਾਜਾ ਕੇਨਚਿ ਰਞ੍ਞਾ ਪੇਸਿਤਂ ਮਹਗ੍ਘਂ ਚਨ੍ਦਨਸਾਰਂ ਅਤ੍ਤਨੋ ਜੇਟ੍ਠਧੀਤਾਯ ਅਦਾਸਿ. ਸਾ ਤੇਨ ਸੁਖੁਮਂ ਚਨ੍ਦਨਚੁਣ੍ਣਂ ਕਾਰੇਤ੍ਵਾ ਸਮੁਗ੍ਗਂ ਪੂਰੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸੁਵਣ੍ਣਵਣ੍ਣਂ ਸਰੀਰਂ ਪੂਜੇਤ੍ਵਾ ਸੇਸਚੁਣ੍ਣਾਨਿ ਗਨ੍ਧਕੁਟਿਯਂ ਵਿਕਿਰਿਤ੍ਵਾ ‘‘ਭਨ੍ਤੇ, ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਮਾਤਾ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਾ ਤਤੋ ਚੁਤਾ ਤਸ੍ਸਾ ਚਨ੍ਦਨਚੁਣ੍ਣਪੂਜਾਯ ਫਲੇਨ ਰਤ੍ਤਚਨ੍ਦਨਪਰਿਪ੍ਫੋਸਿਤੇਨ ਵਿਯ ਸਰੀਰੇਨ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੀ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਞ੍ਞੋ ਅਗ੍ਗਮਹੇਸੀ ਹੁਤ੍ਵਾ ਨਿਬ੍ਬਤ੍ਤਿ. ਅਥਸ੍ਸਾ ਆਯੁਪਰਿਯੋਸਾਨੇ ਪੁਬ੍ਬਨਿਮਿਤ੍ਤੇਸੁ ਉਪ੍ਪਨ੍ਨੇਸੁ ਸਕ੍ਕੋ ਦੇਵਰਾਜਾ ਤਸ੍ਸਾ ਪਰਿਕ੍ਖੀਣਾਯੁਕਤਂ ਞਤ੍ਵਾ ਤਸ੍ਸਾ ਅਨੁਕਮ੍ਪਾਯ ‘‘ਭਦ੍ਦੇ, ਫੁਸ੍ਸਤਿ ਦਸ ਤੇ ਵਰੇ ਦਮ੍ਮਿ, ਤੇ ਗਣ੍ਹਸ੍ਸੂ’’ਤਿ ਆਹ. ਤੇਨ ਵੁਤ੍ਤਂ –

੬੮. ‘‘ਤਸ੍ਸਾ ਆਯੁਕ੍ਖਯਂ ਞਤ੍ਵਾ, ਦੇਵਿਨ੍ਦੋ ਏਤਦਬ੍ਰਵਿ;

‘ਦਦਾਮਿ ਤੇ ਦਸ ਵਰੇ, ਵਰ ਭਦ੍ਦੇ ਯਦਿਚ੍ਛਸੀ’’’ਤਿ.

ਤਤ੍ਥ ਵਰਾਤਿ ਵਰਸ੍ਸੁ ਵਰਂ ਗਣ੍ਹ. ਭਦ੍ਦੇ, ਯਦਿਚ੍ਛਸੀਤਿ, ਭਦ੍ਦੇ, ਫੁਸ੍ਸਤਿ ਯਂ ਇਚ੍ਛਸਿ ਯਂ ਤਵ ਪਿਯਂ, ਤਂ ਦਸਹਿ ਕੋਟ੍ਠਾਸੇਹਿ ‘‘ਵਰਂ ਵਰਸ੍ਸੁ ਪਟਿਗ੍ਗਣ੍ਹਾਹੀ’’ਤਿ ਵਦਤਿ.

੬੯. ਪੁਨਿਦਮਬ੍ਰਵੀਤਿ ਪੁਨ ਇਦਂ ਸਾ ਅਤ੍ਤਨੋ ਚਵਨਧਮ੍ਮਤਂ ਅਜਾਨਨ੍ਤੀ ‘‘ਕਿਂ ਨੁ ਮੇ ਅਪਰਾਧਤ੍ਥੀ’’ਤਿਆਦਿਕਂ ਅਭਾਸਿ. ਸਾ ਹਿ ਪਮਤ੍ਤਾ ਹੁਤ੍ਵਾ ਅਤ੍ਤਨੋ ਆਯੁਕ੍ਖਯਂ ਅਜਾਨਨ੍ਤੀ ਅਯਂ ‘‘ਵਰਂ ਗਣ੍ਹਾ’’ਤਿ ਵਦਨ੍ਤੋ ‘‘ਕਤ੍ਥਚਿ ਮਮ ਉਪ੍ਪਜ੍ਜਨਂ ਇਚ੍ਛਤੀ’’ਤਿ ਞਤ੍ਵਾ ਏਵਮਾਹ. ਤਤ੍ਥ ਅਪਰਾਧਤ੍ਥੀਤਿ ਅਪਰਾਧੋ ਅਤ੍ਥਿ. ਕਿਂ ਨੁ ਦੇਸ੍ਸਾ ਅਹਂ ਤਵਾਤਿ ਕਿਂ ਕਾਰਣਂ ਅਹਂ ਤਵ ਦੇਸ੍ਸਾ ਕੁਜ੍ਝਿਤਬ੍ਬਾ ਅਪ੍ਪਿਯਾ ਜਾਤਾ. ਰਮ੍ਮਾ ਚਾਵੇਸਿ ਮਂ ਠਾਨਾਤਿ ਰਮਣੀਯਾ ਇਮਸ੍ਮਾ ਠਾਨਾ ਚਾਵੇਸਿ. ਵਾਤੋਵ ਧਰਣੀਰੁਹਨ੍ਤਿ ਯੇਨ ਬਲਵਾ ਮਾਲੁਤੋ ਵਿਯ ਰੁਕ੍ਖਂ ਉਮ੍ਮੂਲੇਨ੍ਤੋ ਇਮਮ੍ਹਾ ਦੇਵਲੋਕਾ ਚਾਵੇਤੁਕਾਮੋਸਿ ਕਿਂ ਨੁ ਕਾਰਣਨ੍ਤਿ ਤਂ ਪੁਚ੍ਛਤਿ.

੭੦. ਤਸ੍ਸਿਦਨ੍ਤਿ ਤਸ੍ਸਾ ਇਦਂ. ਨ ਚੇਵ ਤੇ ਕਤਂ ਪਾਪਨ੍ਤਿ ਨ ਚੇਵ ਤਯਾ ਕਿਞ੍ਚਿ ਪਾਪਂ ਕਤਂ ਯੇਨ ਤੇ ਅਪਰਾਧੋ ਸਿਯਾ. ਨ ਚ ਮੇ ਤ੍ਵਂਸਿ ਅਪ੍ਪਿਯਾਤਿ ਮਮ ਤ੍ਵਂ ਨ ਚਾਪਿ ਅਪ੍ਪਿਯਾ, ਯੇਨ ਦੇਸ੍ਸਾ ਨਾਮ ਮਮ ਅਪ੍ਪਿਯਾਤਿ ਅਧਿਪ੍ਪਾਯੋ.

੭੧. ਇਦਾਨਿ ਯੇਨ ਅਧਿਪ੍ਪਾਯੇਨ ਵਰੇ ਦਾਤੁਕਾਮੋ, ਤਂ ਦਸ੍ਸੇਨ੍ਤੋ ‘‘ਏਤ੍ਤਕਂਯੇਵ ਤੇ ਆਯੁ, ਚਵਨਕਾਲੋ ਭਵਿਸ੍ਸਤੀ’’ਤਿ ਵਤ੍ਵਾ ਵਰੇ ਗਣ੍ਹਾਪੇਨ੍ਤੋ ‘‘ਪਟਿਗ੍ਗਣ੍ਹ ਮਯਾ ਦਿਨ੍ਨੇ, ਵਰੇ ਦਸ ਵਰੁਤ੍ਤਮੇ’’ਤਿ ਆਹ.

ਤਤ੍ਥ ਵਰੁਤ੍ਤਮੇਤਿ ਵਰੇਸੁ ਉਤ੍ਤਮੇ ਅਗ੍ਗਵਰੇ.

੭੨. ਦਿਨ੍ਨਵਰਾਤਿ ‘‘ਵਰੇ ਦਸ੍ਸਾਮੀ’’ਤਿ ਪਟਿਞ੍ਞਾਦਾਨਵਸੇਨ ਦਿਨ੍ਨਵਰਾ. ਤੁਟ੍ਠਹਟ੍ਠਾਤਿ ਇਚ੍ਛਿਤਲਾਭਪਰਿਤੋਸੇਨ ਤੁਟ੍ਠਾ ਚੇਵ ਤਸ੍ਸ ਚ ਸਿਖਾਪ੍ਪਤ੍ਤਿਦਸ੍ਸਨੇਨ ਹਾਸਵਸੇਨ ਹਟ੍ਠਾ ਚ. ਪਮੋਦਿਤਾਤਿ ਬਲਵਪਾਮੋਜ੍ਜੇਨ ਪਮੁਦਿਤਾ. ਮਮਂ ਅਬ੍ਭਨ੍ਤਰਂ ਕਤ੍ਵਾਤਿ ਤੇਸੁ ਵਰੇਸੁ ਮਂ ਅਬ੍ਭਨ੍ਤਰਂ ਕਰਿਤ੍ਵਾ. ਦਸ ਵਰੇ ਵਰੀਤਿ ਸਾ ਅਤ੍ਤਨੋ ਖੀਣਾਯੁਕਭਾਵਂ ਞਤ੍ਵਾ ਸਕ੍ਕੇਨ ਵਰਦਾਨਤ੍ਥਂ ਕਤੋਕਾਸਾ ਸਕਲਜਮ੍ਬੁਦੀਪਤਲਂ ਓਲੋਕੇਨ੍ਤੀ ਅਤ੍ਤਨੋ ਅਨੁਚ੍ਛਵਿਕਂ ਸਿਵਿਰਞ੍ਞੋ ਨਿਵੇਸਨਂ ਦਿਸ੍ਵਾ ਤਤ੍ਥ ਤਸ੍ਸ ਅਗ੍ਗਮਹੇਸਿਭਾਵੋ ਨੀਲਨੇਤ੍ਤਤਾ ਨੀਲਭਮੁਕਤਾ ਫੁਸ੍ਸਤੀਤਿਨਾਮਂ ਗੁਣਵਿਸੇਸਯੁਤ੍ਤਪੁਤ੍ਤਪਟਿਲਾਭੋ ਅਨੁਨ੍ਨਤਕੁਚ੍ਛਿਭਾਵੋ ਅਲਮ੍ਬਤ੍ਥਨਤਾ ਅਪਲਿਤਭਾਵੋ ਸੁਖੁਮਚ੍ਛਵਿਤਾ ਵਜ੍ਝਜਨਾਨਂ ਮੋਚਨਸਮਤ੍ਥਤਾ ਚਾਤਿ ਇਮੇ ਦਸ ਵਰੇ ਗਣ੍ਹਿ.

ਇਤਿ ਸਾ ਦਸ ਵਰੇ ਗਹੇਤ੍ਵਾ ਤਤੋ ਚੁਤਾ ਮਦ੍ਦਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਜਾਯਮਾਨਾ ਚ ਸਾ ਚਨ੍ਦਨਚੁਣ੍ਣਪਰਿਪ੍ਫੋਸਿਤੇਨ ਵਿਯ ਸਰੀਰੇਨ ਜਾਤਾ. ਤੇਨਸ੍ਸਾ ਨਾਮਗ੍ਗਹਣਦਿਵਸੇ ‘‘ਫੁਸ੍ਸਤੀ’’ ਤ੍ਵੇਵ ਨਾਮਂ ਕਰਿਂਸੁ. ਸਾ ਮਹਨ੍ਤੇਨ ਪਰਿਵਾਰੇਨ ਵਡ੍ਢਿਤ੍ਵਾ ਸੋਲ਼ਸਵਸ੍ਸਕਾਲੇ ਉਤ੍ਤਮਰੂਪਧਰਾ ਅਹੋਸਿ. ਅਥ ਨਂ ਜੇਤੁਤ੍ਤਰਨਗਰੇ ਸਿਵਿਮਹਾਰਾਜਾ ਪੁਤ੍ਤਸ੍ਸ ਸਞ੍ਜਯਕੁਮਾਰਸ੍ਸਤ੍ਥਾਯ ਆਨੇਤ੍ਵਾ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਤਂ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਕਂ ਕਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਤੇਨ ਵੁਤ੍ਤਂ –

੭੩. ‘‘ਤਤੋ ਚੁਤਾ ਸਾ ਫੁਸ੍ਸਤੀ, ਖਤ੍ਤਿਯੇ ਉਪਪਜ੍ਜਥ;

ਜੇਤੁਤ੍ਤਰਮ੍ਹਿ ਨਗਰੇ, ਸਞ੍ਜਯੇਨ ਸਮਾਗਮੀ’’ਤਿ.

ਸਾ ਸਞ੍ਜਯਰਞ੍ਞੋ ਪਿਯਾ ਅਹੋਸਿ ਮਨਾਪਾ. ਅਥ ਸਕ੍ਕੋ ਆਵਜ੍ਜੇਨ੍ਤੋ ‘‘ਮਯਾ ਫੁਸ੍ਸਤਿਯਾ ਦਿਨ੍ਨਵਰੇਸੁ ਨਵ ਵਰਾ ਸਮਿਦ੍ਧਾ’’ਤਿ ਦਿਸ੍ਵਾ ‘‘ਪੁਤ੍ਤਵਰੋ ਨ ਸਮਿਦ੍ਧੋ, ਤਮ੍ਪਿਸ੍ਸਾ ਸਮਿਜ੍ਝਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਬੋਧਿਸਤ੍ਤਂ ਤਦਾ ਤਾਵਤਿਂਸਦੇਵਲੋਕੇ ਖੀਣਾਯੁਕਂ ਦਿਸ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਾਰਿਸ, ਤਯਾ ਮਨੁਸ੍ਸਲੋਕੇ ਸਿਵਿਸਞ੍ਜਯਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤੁਂ ਵਟ੍ਟਤੀ’’ਤਿ ਤਸ੍ਸ ਚੇਵ ਅਞ੍ਞੇਸਞ੍ਚ ਚਵਨਧਮ੍ਮਾਨਂ ਸਟ੍ਠਿਸਹਸ੍ਸਾਨਂ ਦੇਵਪੁਤ੍ਤਾਨਂ ਪਟਿਞ੍ਞਂ ਗਹੇਤ੍ਵਾ ਸਕਟ੍ਠਾਨਮੇਵ ਗਤੋ. ਮਹਾਸਤ੍ਤੋਪਿ ਤਤੋ ਚਵਿਤ੍ਵਾ ਤਤ੍ਥੁਪ੍ਪਨ੍ਨੋ. ਸੇਸਾ ਦੇਵਪੁਤ੍ਤਾਪਿ ਸਟ੍ਠਿਸਹਸ੍ਸਾਨਂ ਅਮਚ੍ਚਾਨਂ ਗੇਹੇਸੁ ਨਿਬ੍ਬਤ੍ਤਿਂਸੁ. ਮਹਾਸਤ੍ਤੇ ਕੁਚ੍ਛਿਗਤੇ ਫੁਸ੍ਸਤਿਦੇਵੀ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਦਾਨਂ ਦਾਤੁਂ ਦੋਹਲ਼ਿਨੀ ਅਹੋਸਿ. ਰਾਜਾ ਤਸ੍ਸਾ ਦੋਹਲ਼ਂ ਸੁਤ੍ਵਾ ਨੇਮਿਤ੍ਤਕੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿਤ੍ਵਾ ‘‘ਮਹਾਰਾਜ, ਦੇਵਿਯਾ ਕੁਚ੍ਛਿਮ੍ਹਿ ਦਾਨਾਭਿਰਤੋ ਉਲ਼ਾਰੋ ਸਤ੍ਤੋ ਉਪ੍ਪਨ੍ਨੋ, ਦਾਨੇਨ ਤਿਤ੍ਤਿਂ ਨ ਪਾਪੁਣਿਸ੍ਸਤੀ’’ਤਿ ਸੁਤ੍ਵਾ ਤੁਟ੍ਠਮਾਨਸੋ ਵੁਤ੍ਤਪ੍ਪਕਾਰਂ ਦਾਨਂ ਪਟ੍ਠਪੇਸਿ. ਸਮਣਬ੍ਰਾਹ੍ਮਣਜਿਣ੍ਣਾਤੁਰਕਪਣਦ੍ਧਿਕਵਨਿਬ੍ਬਕਯਾਚਕੇ ਸਨ੍ਤਪ੍ਪੇਸਿ. ਬੋਧਿਸਤ੍ਤਸ੍ਸ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਰਞ੍ਞੋ ਆਯਸ੍ਸ ਪਮਾਣਂ ਨਾਹੋਸਿ. ਤਸ੍ਸ ਪੁਞ੍ਞਾਨੁਭਾਵੇਨ ਸਕਲਜਮ੍ਬੁਦੀਪੇ ਰਾਜਾਨੋ ਪਣ੍ਣਾਕਾਰਂ ਪਹਿਣਨ੍ਤਿ. ਤੇਨ ਵੁਤ੍ਤਂ –

੭੪. ‘‘ਯਦਾਹਂ ਫੁਸ੍ਸਤਿਯਾ ਕੁਚ੍ਛਿਂ, ਓਕ੍ਕਨ੍ਤੋ ਪਿਯਮਾਤੁਯਾ;

ਮਮ ਤੇਜੇਨ ਮੇ ਮਾਤਾ, ਤਦਾ ਦਾਨਰਤਾ ਅਹੁ.

੭੫. ‘‘ਅਧਨੇ ਆਤੁਰੇ ਜਿਣ੍ਣੇ, ਯਾਚਕੇ ਅਦ੍ਧਿਕੇ ਜਨੇ;

ਸਮਣੇ ਬ੍ਰਾਹ੍ਮਣੇ ਖੀਣੇ, ਦੇਤਿ ਦਾਨਂ ਅਕਿਞ੍ਚਨੇ’’ਤਿ;

ਤਤ੍ਥ ਮਮ ਤੇਜੇਨਾਤਿ ਮਮ ਦਾਨਜ੍ਝਾਸਯਾਨੁਭਾਵੇਨ. ਖੀਣੇਤਿ ਭੋਗਾਦੀਹਿ ਪਰਿਕ੍ਖੀਣੇ ਪਾਰਿਜੁਞ੍ਞਪ੍ਪਤ੍ਤੇ. ਅਕਿਞ੍ਚਨੇਤਿ ਅਪਰਿਗ੍ਗਹੇ. ਸਬ੍ਬਤ੍ਥ ਵਿਸਯੇ ਭੁਮ੍ਮਂ. ਅਧਨਾਦਯੋ ਹਿ ਦਾਨਧਮ੍ਮਸ੍ਸ ਪਵਤ੍ਤਿਯਾ ਵਿਸਯੋ.

ਦੇਵੀ ਮਹਨ੍ਤੇਨ ਪਰਿਹਾਰੇਨ ਗਬ੍ਭਂ ਧਾਰੇਨ੍ਤੀ ਦਸਮਾਸੇ ਪਰਿਪੁਣ੍ਣੇ ਨਗਰਂ ਦਟ੍ਠੁਕਾਮਾ ਹੁਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਦੇਵਨਗਰਂ ਵਿਯ ਨਗਰਂ ਅਲਙ੍ਕਾਰਾਪੇਤ੍ਵਾ ਦੇਵਿਂ ਰਥਵਰਂ ਆਰੋਪੇਤ੍ਵਾ ਨਗਰਂ ਪਦਕ੍ਖਿਣਂ ਕਾਰੇਸਿ. ਤਸ੍ਸਾ ਵੇਸ੍ਸਵੀਥਿਯਾ ਮਜ੍ਝਪ੍ਪਤ੍ਤਕਾਲੇ ਕਮ੍ਮਜਵਾਤਾ ਚਲਿਂਸੁ. ਅਮਚ੍ਚਾ ਰਞ੍ਞੋ ਆਰੋਚੇਸੁਂ. ਸੋ ਵੇਸ੍ਸਵੀਥਿਯਂਯੇਵਸ੍ਸਾ ਸੂਤਿਘਰਂ ਕਾਰੇਤ੍ਵਾ ਆਰਕ੍ਖਂ ਗਣ੍ਹਾਪੇਸਿ. ਸਾ ਤਤ੍ਥ ਪੁਤ੍ਤਂ ਵਿਜਾਯਿ. ਤੇਨਾਹ –

੭੬. ‘‘ਦਸਮਾਸੇ ਧਾਰਯਿਤ੍ਵਾਨ, ਕਰੋਨ੍ਤੇ ਪੁਰਂ ਪਦਕ੍ਖਿਣਂ;

ਵੇਸ੍ਸਾਨਂ ਵੀਥਿਯਾ ਮਜ੍ਝੇ, ਜਨੇਸਿ ਫੁਸ੍ਸਤੀ ਮਮਂ.

੭੭. ‘‘ਨ ਮਯ੍ਹਂ ਮਤ੍ਤਿਕਂ ਨਾਮਂ, ਨਾਪਿ ਪੇਤ੍ਤਿਕਸਮ੍ਭਵਂ.

ਜਾਤੇਤ੍ਥ ਵੇਸ੍ਸਵੀਥਿਯਂ, ਤਸ੍ਮਾ ਵੇਸ੍ਸਨ੍ਤਰੋ ਅਹੂ’’ਤਿ.

ਤਤ੍ਥ ਕਰੋਨ੍ਤੇ ਪੁਰਂ ਪਦਕ੍ਖਿਣਨ੍ਤਿ ਦੇਵਿਂ ਗਹੇਤ੍ਵਾ ਸਞ੍ਜਯਮਹਾਰਾਜੇ ਨਗਰਂ ਪਦਕ੍ਖਿਣਂ ਕੁਰੁਮਾਨੇ. ਵੇਸ੍ਸਾਨਨ੍ਤਿ ਵਾਣਿਜਾਨਂ.

ਨ ਮਤ੍ਤਿਕਂ ਨਾਮਨ੍ਤਿ ਨ ਮਾਤੁਆਗਤਂ ਮਾਤਾਮਹਾਦੀਨਂ ਨਾਮਂ. ਪੇਤ੍ਤਿਕਸਮ੍ਭਵਨ੍ਤਿ ਪਿਤੁ ਇਦਨ੍ਤਿ ਪੇਤ੍ਤਿਕਂ, ਸਮ੍ਭਵਤਿ ਏਤਸ੍ਮਾਤਿ ਸਮ੍ਭਵੋ, ਤਂ ਪੇਤ੍ਤਿਕਂ ਸਮ੍ਭਵੋ ਏਤਸ੍ਸਾਤਿ ਪੇਤ੍ਤਿਕਸਮ੍ਭਵਂ, ਨਾਮਂ. ਮਾਤਾਪਿਤੁਸਮ੍ਬਨ੍ਧਵਸੇਨ ਨ ਕਤਨ੍ਤਿ ਦਸ੍ਸੇਤਿ. ਜਾਤੇਤ੍ਥਾਤਿ ਜਾਤੋ ਏਤ੍ਥ. ‘‘ਜਾਤੋਮ੍ਹੀ’’ਤਿਪਿ ਪਾਠੋ. ਤਸ੍ਮਾ ਵੇਸ੍ਸਨ੍ਤਰੋ ਅਹੂਤਿ ਯਸ੍ਮਾ ਤਦਾ ਵੇਸ੍ਸਵੀਥਿਯਂ ਜਾਤੋ, ਤਸ੍ਮਾ ਵੇਸ੍ਸਨ੍ਤਰੋ ਨਾਮ ਅਹੋਸਿ, ਵੇਸ੍ਸਨ੍ਤਰੋਤਿ ਨਾਮਂ ਅਕਂਸੂਤਿ ਅਤ੍ਥੋ.

ਮਹਾਸਤ੍ਤੋ ਮਾਤੁ ਕੁਚ੍ਛਿਤੋ ਨਿਕ੍ਖਮਨ੍ਤੋ ਵਿਸਦੋ ਹੁਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾਵ ਨਿਕ੍ਖਮਿ. ਨਿਕ੍ਖਨ੍ਤਮਤ੍ਤੇ ਏਵ ਮਾਤੁ ਹਤ੍ਥਂ ਪਸਾਰੇਤ੍ਵਾ ‘‘ਅਮ੍ਮ, ਦਾਨਂ ਦਸ੍ਸਾਮਿ, ਅਤ੍ਥਿ ਕਿਞ੍ਚੀ’’ਤਿ ਆਹ. ਅਥਸ੍ਸ ਮਾਤਾ ‘‘ਤਾਤ, ਯਥਾਜ੍ਝਾਸਯਂ ਦਾਨਂ ਦੇਹੀ’’ਤਿ ਹਤ੍ਥਸਮੀਪੇ ਸਹਸ੍ਸਤ੍ਥਵਿਕਂ ਠਪੇਸਿ. ਬੋਧਿਸਤ੍ਤੋ ਹਿ ਉਮ੍ਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਇਮਸ੍ਮਿਂ ਜਾਤਕੇ ਪਚ੍ਛਿਮਤ੍ਤਭਾਵੇਤਿ ਤੀਸੁ ਠਾਨੇਸੁ ਜਾਤਮਤ੍ਤੋਵ ਕਥੇਸਿ. ਰਾਜਾ ਮਹਾਸਤ੍ਤਸ੍ਸ ਅਤਿਦੀਘਾਦਿਦੋਸਵਿਵਜ੍ਜਿਤਾ ਮਧੁਰਖੀਰਾ ਚਤੁਸਟ੍ਠਿਧਾਤਿਯੋ ਉਪਟ੍ਠਾਪੇਸਿ. ਤੇਨ ਸਦ੍ਧਿਂ ਜਾਤਾਨਂ ਸਟ੍ਠਿਯਾ ਦਾਰਕਸਹਸ੍ਸਾਨਮ੍ਪਿ ਧਾਤਿਯੋ ਦਾਪੇਸਿ. ਸੋ ਸਟ੍ਠਿਦਾਰਕਸਹਸ੍ਸੇਹਿ ਸਦ੍ਧਿਂ ਮਹਨ੍ਤੇਨ ਪਰਿਵਾਰੇਨ ਵਡ੍ਢਤਿ. ਤਸ੍ਸ ਰਾਜਾ ਸਤਸਹਸ੍ਸਗ੍ਘਨਕਂ ਕੁਮਾਰਪਿਲ਼ਨ੍ਧਨਂ ਕਾਰਾਪੇਤ੍ਵਾ ਅਦਾਸਿ. ਸੋ ਚਤੁਪਞ੍ਚਵਸ੍ਸਿਕਕਾਲੇ ਤਂ ਓਮੁਞ੍ਚਿਤ੍ਵਾ ਧਾਤੀਨਂ ਦਤ੍ਵਾ ਪੁਨ ਤਾਹਿ ਦੀਯਮਾਨਂ ਨ ਗਣ੍ਹਾਤਿ. ਤਂ ਸੁਤ੍ਵਾ ਰਾਜਾ ‘‘ਮਮ ਪੁਤ੍ਤੇਨ ਦਿਨ੍ਨਂ ਸੁਦਿਨ੍ਨ’’ਨ੍ਤਿ ਵਤ੍ਵਾ ਅਪਰਮ੍ਪਿ ਕਾਰੇਸਿ. ਤਮ੍ਪਿ ਦੇਤਿ. ਦਾਰਕਕਾਲੇਯੇਵ ਧਾਤੀਨਂ ਨਵਵਾਰੇ ਪਿਲ਼ਨ੍ਧਨਂ ਅਦਾਸਿ.

ਅਟ੍ਠਵਸ੍ਸਿਕਕਾਲੇ ਪਨ ਸਯਨਪੀਠੇ ਨਿਸਿਨ੍ਨੋ ਚਿਨ੍ਤੇਸਿ – ‘‘ਅਹਂ ਬਾਹਿਰਕਦਾਨਂ ਦੇਮਿ, ਨ ਤਂ ਮਂ ਪਰਿਤੋਸੇਤਿ, ਅਜ੍ਝਤ੍ਤਿਕਦਾਨਂ ਦਾਤੁਕਾਮੋਮ੍ਹਿ. ਸਚੇ ਹਿ ਮਂ ਕੋਚਿ ਹਦਯਂ ਯਾਚੇਯ੍ਯ, ਹਦਯਂ ਨੀਹਰਿਤ੍ਵਾ ਦਦੇਯ੍ਯਂ. ਸਚੇ ਅਕ੍ਖੀਨਿ ਯਾਚੇਯ੍ਯ, ਅਕ੍ਖੀਨਿ ਉਪ੍ਪਾਟੇਤ੍ਵਾ ਦਦੇਯ੍ਯਂ. ਸਚੇ ਸਕਲਸਰੀਰੇ ਮਂਸਂ ਰੁਧਿਰਮ੍ਪਿ ਵਾ ਯਾਚੇਯ੍ਯ, ਸਕਲਸਰੀਰਤੋ ਮਂਸਂ ਛਿਨ੍ਦਿਤ੍ਵਾ ਰੁਧਿਰਮ੍ਪਿ ਅਸਿਨਾ ਵਿਜ੍ਝਿਤ੍ਵਾ ਦਦੇਯ੍ਯਂ. ਅਥਾਪਿ ਕੋਚਿ ‘ਦਾਸੋ ਮੇ ਹੋਹੀ’ਤਿ ਵਦੇਯ੍ਯ, ਅਤ੍ਤਾਨਂ ਤਸ੍ਸ ਸਾਵੇਤ੍ਵਾ ਦਦੇਯ੍ਯ’’ਨ੍ਤਿ. ਤਸ੍ਸੇਵਂ ਸਭਾਵਂ ਸਰਸਂ ਚਿਨ੍ਤੇਨ੍ਤਸ੍ਸ ਚਤੁਨਹੁਤਾਧਿਕਦ੍ਵਿਯੋਜਨਸਤਸਹਸ੍ਸਬਹਲਾ ਅਯਂ ਮਹਾਪਥਵੀ ਉਦਕਪਰਿਯਨ੍ਤਂ ਕਤ੍ਵਾ ਕਮ੍ਪਿ. ਸਿਨੇਰੁਪਬ੍ਬਤਰਾਜਾ ਓਨਮਿਤ੍ਵਾ ਜੇਤੁਤ੍ਤਰਨਗਰਾਭਿਮੁਖੋ ਅਟ੍ਠਾਸਿ. ਤੇਨ ਵੁਤ੍ਤਂ –

੭੮. ‘‘ਯਦਾਹਂ ਦਾਰਕੋ ਹੋਮਿ, ਜਾਤਿਯਾ ਅਟ੍ਠਵਸ੍ਸਿਕੋ;

ਤਦਾ ਨਿਸਜ੍ਜ ਪਾਸਾਦੇ, ਦਾਨਂ ਦਾਤੁਂ ਵਿਚਿਨ੍ਤਯਿਂ.

੭੯. ‘‘ਹਦਯਂ ਦਦੇਯ੍ਯਂ ਚਕ੍ਖੁਂ, ਮਂਸਮ੍ਪਿ ਰੁਧਿਰਮ੍ਪਿ ਚ;

ਦਦੇਯ੍ਯਂ ਕਾਯਂ ਸਾਵੇਤ੍ਵਾ, ਯਦਿ ਕੋਚਿ ਯਾਚਯੇ ਮਮਂ.

੮੦. ‘‘ਸਭਾਵਂ ਚਿਨ੍ਤਯਨ੍ਤਸ੍ਸ, ਅਕਮ੍ਪਿਤਮਸਣ੍ਠਿਤਂ;

ਅਕਮ੍ਪਿ ਤਤ੍ਥ ਪਥਵੀ, ਸਿਨੇਰੁਵਨਵਟਂਸਕਾ’’ਤਿ.

ਤਤ੍ਥ ਸਾਵੇਤ੍ਵਾਤਿ ‘‘ਅਜ੍ਜ ਪਟ੍ਠਾਯ ਅਹਂ ਇਮਸ੍ਸ ਦਾਸੋ’’ਤਿ ਦਾਸਭਾਵਂ ਸਾਵੇਤ੍ਵਾ. ਯਦਿ ਕੋਚਿ ਯਾਚਯੇ ਮਮਨ੍ਤਿ ਕੋਚਿ ਮਂ ਯਦਿ ਯਾਚੇਯ੍ਯ. ਸਭਾਵਂ ਚਿਨ੍ਤਯਨ੍ਤਸ੍ਸਾਤਿ ਅਵਿਪਰੀਤਂ ਅਤ੍ਤਨੋ ਯਥਾਭੂਤਂ ਸਭਾਵਂ ਅਤਿਤ੍ਤਿਮਂ ਯਥਾਜ੍ਝਾਸਯਂ ਚਿਨ੍ਤੇਨ੍ਤਸ੍ਸ ਮਮ, ਮਯਿ ਚਿਨ੍ਤੇਨ੍ਤੇਤਿ ਅਤ੍ਥੋ. ਅਕਮ੍ਪਿਤਨ੍ਤਿ ਕਮ੍ਪਿਤਰਹਿਤਂ. ਅਸਣ੍ਠਿਤਨ੍ਤਿ ਸਙ੍ਕੋਚਰਹਿਤਂ. ਯੇਨ ਹਿ ਲੋਭਾਦਿਨਾ ਅਬੋਧਿਸਤ੍ਤਾਨਂ ਚਕ੍ਖਾਦਿਦਾਨੇ ਚਿਤ੍ਤੁਤ੍ਰਾਸਸਙ੍ਖਾਤਂ ਕਮ੍ਪਿਤਂ ਸਙ੍ਕੋਚਸਙ੍ਖਾਤਂ ਸਣ੍ਠਿਤਞ੍ਚ ਸਿਯਾ, ਤੇਨ ਵਿਨਾਤਿ ਅਤ੍ਥੋ. ਅਕਮ੍ਪੀਤਿ ਅਚਲਿ. ਸਿਨੇਰੁਵਨਵਟਂਸਕਾਤਿ ਸਿਨੇਰੁਮ੍ਹਿ ਉਟ੍ਠਿਤਨਨ੍ਦਨਵਨਫਾਰੁਸਕਵਨਮਿਸ੍ਸਕਵਨਚਿਤ੍ਤਲਤਾਵਨਾਦਿਕਪ੍ਪਕਤਰੁਵਨਂ ਸਿਨੇਰੁਵਨਂ. ਅਥ ਵਾ ਸਿਨੇਰੁ ਚ ਜਮ੍ਬੁਦੀਪਾਦੀਸੁ ਰਮਣੀਯਵਨਞ੍ਚ ਸਿਨੇਰੁਵਨਂ, ਤਂ ਵਨਂ ਵਟਂਸਕਂ ਏਤਿਸ੍ਸਾਤਿ ਸਿਨੇਰੁਵਨਵਟਂਸਕਾ.

ਏਵਞ੍ਚ ਪਥਵਿਕਮ੍ਪਨੇ ਵਤ੍ਤਮਾਨੇ ਮਧੁਰਗਮ੍ਭੀਰਦੇਵੋ ਗਜ੍ਜਨ੍ਤੋ ਖਣਿਕਵਸ੍ਸਂ ਵਸ੍ਸਿ, ਵਿਜ੍ਜੁਲਤਾ ਨਿਚ੍ਛਰਿਂਸੁ, ਮਹਾਸਮੁਦ੍ਦੋ ਉਬ੍ਭਿਜ੍ਜਿ, ਸਕ੍ਕੋ ਦੇਵਰਾਜਾ ਅਪ੍ਫੋਟੇਸਿ, ਮਹਾਬ੍ਰਹ੍ਮਾ ਸਾਧੁਕਾਰਮਦਾਸਿ, ਯਾਵ ਬ੍ਰਹ੍ਮਲੋਕਾ ਏਕਕੋਲਾਹਲਂ ਅਹੋਸਿ. ਮਹਾਸਤ੍ਤੋ ਸੋਲ਼ਸਵਸ੍ਸਕਾਲੇਯੇਵ ਸਬ੍ਬਸਿਪ੍ਪਾਨਂ ਨਿਪ੍ਫਤ੍ਤਿਂ ਪਾਪੁਣਿ. ਤਸ੍ਸ ਪਿਤਾ ਰਜ੍ਜਂ ਦਾਤੁਕਾਮੋ ਮਾਤਰਾ ਸਦ੍ਧਿਂ ਮਨ੍ਤੇਤ੍ਵਾ ਮਦ੍ਦਰਾਜਕੁਲਤੋ ਮਾਤੁਲਧੀਤਰਂ ਮਦ੍ਦਿਂ ਨਾਮ ਰਾਜਕਞ੍ਞਂ ਆਨੇਤ੍ਵਾ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਕਂ ਅਗ੍ਗਮਹੇਸਿਂ ਕਤ੍ਵਾ ਮਹਾਸਤ੍ਤਂ ਰਜ੍ਜੇ ਅਭਿਸਿਞ੍ਚਿ. ਮਹਾਸਤ੍ਤੋ ਰਜ੍ਜੇ ਪਤਿਟ੍ਠਿਤਕਾਲਤੋ ਪਟ੍ਠਾਯ ਦੇਵਸਿਕਂ ਛਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਪਵਤ੍ਤੇਨ੍ਤੋ ਅਨ੍ਵਦ੍ਧਮਾਸਂ ਦਾਨਂ ਓਲੋਕੇਤੁਂ ਉਪਸਙ੍ਕਮਤਿ. ਅਪਰਭਾਗੇ ਮਦ੍ਦਿਦੇਵੀ ਪੁਤ੍ਤਂ ਵਿਜਾਯਿ. ਤਂ ਕਞ੍ਚਨਜਾਲੇਨ ਸਮ੍ਪਟਿਚ੍ਛਿਂਸੁ, ਤੇਨਸ੍ਸ ‘‘ਜਾਲਿਕੁਮਾਰੋ’’ਤ੍ਵੇਵ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਸਾ ਧੀਤਰਂ ਵਿਜਾਯਿ. ਤਂ ਕਣ੍ਹਾਜਿਨੇਨ ਸਮ੍ਪਟਿਚ੍ਛਿਂਸੁ, ਤੇਨਸ੍ਸਾ ‘‘ਕਣ੍ਹਾਜਿਨਾ’’ਤ੍ਵੇਵ ਨਾਮਂ ਕਰਿਂਸੁ. ਤੇਨ ਵੁਤ੍ਤਂ –

੮੧. ‘‘ਅਨ੍ਵਦ੍ਧਮਾਸੇ ਪਨ੍ਨਰਸੇ, ਪੁਣ੍ਣਮਾਸੇ ਉਪੋਸਥੇ;

ਪਚ੍ਚਯਂ ਨਾਗਮਾਰੁਯ੍ਹ, ਦਾਨਂ ਦਾਤੁਂ ਉਪਾਗਮਿ’’ਨ੍ਤਿ.

ਤਤ੍ਥ ਅਨ੍ਵਦ੍ਧਮਾਸੇਤਿ ਅਨੁਅਦ੍ਧਮਾਸੇ, ਅਦ੍ਧਮਾਸੇ ਅਦ੍ਧਮਾਸੇਤਿ ਅਤ੍ਥੋ. ਪੁਣ੍ਣਮਾਸੇਤਿ ਪੁਣ੍ਣਮਾਸਿਯਂ, ਮਾਸਪਰਿਪੂਰਿਯਾ ਚਨ੍ਦਪਰਿਪੂਰਿਯਾ ਚ ਸਮਨ੍ਨਾਗਤੇ ਪਨ੍ਨਰਸੇ ਦਾਨਂ ਦਾਤੁਂ ਉਪਾਗਮਿਨ੍ਤਿ ਸਮ੍ਬਨ੍ਧੋ. ਤਤ੍ਰਾਯਂ ਯੋਜਨਾ – ਪਚ੍ਚਯਂ ਨਾਗਮਾਰੁਯ੍ਹ ਅਦ੍ਧਮਾਸੇ ਅਦ੍ਧਮਾਸੇ ਦਾਨਂ ਦਾਤੁਂ ਦਾਨਸਾਲਂ ਉਪਾਗਮਿਂ, ਏਵਂ ਉਪਗਚ੍ਛਨ੍ਤੋ ਚ ਯਦਾ ਏਕਸ੍ਮਿਂ ਪਨ੍ਨਰਸੇ ਪੁਣ੍ਣਮਾਸਿਉਪੋਸਥੇ ਦਾਨਂ ਦਾਤੁਂ ਉਪਾਗਮਿਂ, ਤਦਾ ਕਲਿਙ੍ਗਰਟ੍ਠਵਿਸਯਾ ਬ੍ਰਾਹ੍ਮਣਾ ਉਪਗਞ੍ਛੁ ਮਨ੍ਤਿ ਤਤ੍ਥ ਪਚ੍ਚਯਂ ਨਾਗਨ੍ਤਿ ਪਚ੍ਚਯਨਾਮਕਂ ਮਙ੍ਗਲਹਤ੍ਥਿਂ. ਬੋਧਿਸਤ੍ਤਸ੍ਸ ਹਿ ਜਾਤਦਿਵਸੇ ਏਕਾ ਆਕਾਸਚਾਰਿਨੀ ਕਰੇਣੁਕਾ ਅਭਿਮਙ੍ਗਲਸਮ੍ਮਤਂ ਸਬ੍ਬਸੇਤਹਤ੍ਥਿਪੋਤਕਂ ਆਨੇਤ੍ਵਾ ਮਙ੍ਗਲਹਤ੍ਥਿਟ੍ਠਾਨੇ ਠਪੇਤ੍ਵਾ ਪਕ੍ਕਾਮਿ. ਤਸ੍ਸ ਮਹਾਸਤ੍ਤਂ ਪਚ੍ਚਯਂ ਕਤ੍ਵਾ ਲਦ੍ਧਤ੍ਤਾ ‘‘ਪਚ੍ਚਯੋ’’ਤ੍ਵੇਵ ਨਾਮਂ ਕਰਿਂਸੁ. ਤਂ ਪਚ੍ਚਯਨਾਮਕਂ ਓਪਵਯ੍ਹਂ ਹਤ੍ਥਿਨਾਗਂ ਆਰੁਯ੍ਹ ਦਾਨਂ ਦਾਤੁਂ ਉਪਾਗਮਿਨ੍ਤਿ. ਤੇਨ ਵੁਤ੍ਤਂ –

੮੨. ‘‘ਕਲਿਙ੍ਗਰਟ੍ਠਵਿਸਯਾ, ਬ੍ਰਾਹ੍ਮਣਾ ਉਪਗਞ੍ਛੁ ਮਂ;

ਅਯਾਚੁਂ ਮਂ ਹਤ੍ਥਿਨਾਗਂ, ਧਞ੍ਞਂ ਮਙ੍ਗਲਸਮ੍ਮਤਂ.

੮੩. ‘‘ਅਵੁਟ੍ਠਿਕੋ ਜਨਪਦੋ, ਦੁਬ੍ਭਿਕ੍ਖੋ ਛਾਤਕੋ ਮਹਾ;

ਦਦਾਹਿ ਪਵਰਂ ਨਾਗਂ, ਸਬ੍ਬਸੇਤਂ ਗਜੁਤ੍ਤਮ’’ਨ੍ਤਿ.

ਤਤ੍ਥ ‘‘ਕਲਿਙ੍ਗਰਟ੍ਠਵਿਸਯਾ’’ਤਿਆਦਿਗਾਥਾ ਹੇਟ੍ਠਾ ਕੁਰੁਰਾਜਚਰਿਤੇਪਿ (ਚਰਿਯਾ. ੧.੨੧-੨੨) ਆਗਤਾ ਏਵ, ਤਸ੍ਮਾ ਤਾਸਂ ਅਤ੍ਥੋ ਕਥਾਮਗ੍ਗੋ ਚ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਇਧ ਪਨ ਮਙ੍ਗਲਹਤ੍ਥਿਨੋ ਸੇਤਤ੍ਤਾ ‘‘ਸਬ੍ਬਸੇਤਂ ਗਜੁਤ੍ਤਮ’’ਨ੍ਤਿ ਵੁਤ੍ਤਂ. ਬੋਧਿਸਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ –

੮੪. ‘‘ਦਦਾਮਿ ਨ ਵਿਕਮ੍ਪਾਮਿ, ਯਂ ਮਂ ਯਾਚਨ੍ਤਿ ਬ੍ਰਾਹ੍ਮਣਾ;

ਸਨ੍ਤਂ ਨਪ੍ਪਟਿਗੂਹਾਮਿ, ਦਾਨੇ ਮੇ ਰਮਤੇ ਮਨੋ’’ਤਿ. –

ਅਤ੍ਤਨੋ ਦਾਨਾਭਿਰਤਿਂ ਪਵੇਦੇਨ੍ਤੋ –

੮੫. ‘‘ਨ ਮੇ ਯਾਚਕਮਨੁਪ੍ਪਤ੍ਤੇ, ਪਟਿਕ੍ਖੇਪੋ ਅਨੁਚ੍ਛਵੋ;

ਮਾ ਮੇ ਭਿਜ੍ਜਿ ਸਮਾਦਾਨਂ, ਦਸ੍ਸਾਮਿ ਵਿਪੁਲਂ ਗਜ’’ਨ੍ਤਿ. (ਚਰਿਯਾ. ੧.੨੩) –

ਪਟਿਜਾਨਿਤ੍ਵਾ ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ ਅਨਲਙ੍ਕਤਟ੍ਠਾਨਂ ਓਲੋਕਨਤ੍ਥਂ ਅਨੁਪਰਿਯਾਯਿਤ੍ਵਾ ਅਨਲਙ੍ਕਤਟ੍ਠਾਨਂ ਅਦਿਸ੍ਵਾ ਕੁਸੁਮਮਿਸ੍ਸਗਨ੍ਧੋਦਕਭਰਿਤਂ ਸੁਵਣ੍ਣਭਿਙ੍ਗਾਰਂ ਗਹੇਤ੍ਵਾ ‘‘ਭੋਨ੍ਤੋ ਇਤੋ ਏਥਾ’’ਤਿ ਅਲਙ੍ਕਤਰਜਤਦਾਮਸਦਿਸਂ ਹਤ੍ਥਿਸੋਣ੍ਡਂ ਤੇਸਂ ਹਤ੍ਥੇ ਠਪੇਤ੍ਵਾ ਉਦਕਂ ਪਾਤੇਤ੍ਵਾ ਅਲਙ੍ਕਤਵਾਰਣਂ ਅਦਾਸਿ. ਤੇਨ ਵੁਤ੍ਤਂ –

੮੬. ‘‘ਨਾਗਂ ਗਹੇਤ੍ਵਾ ਸੋਣ੍ਡਾਯ, ਭਿਙ੍ਗਾਰੇ ਰਤਨਾਮਯੇ;

ਜਲਂ ਹਤ੍ਥੇ ਆਕਿਰਿਤ੍ਵਾ, ਬ੍ਰਾਹ੍ਮਣਾਨਂ ਅਦਂ ਗਜ’’ਨ੍ਤਿ. (ਚਰਿਯਾ. ੧.੨੪);

ਤਤ੍ਥ ਸਨ੍ਤਨ੍ਤਿ ਵਿਜ੍ਜਮਾਨਂ ਦੇਯ੍ਯਧਮ੍ਮਂ. ਨਪ੍ਪਟਿਗੂਹਾਮੀਤਿ ਨ ਪਟਿਚ੍ਛਾਦੇਮਿ. ਯੋ ਹਿ ਅਤ੍ਤਨੋ ਸਨ੍ਤਕਂ ‘‘ਮਯ੍ਹਮੇਵ ਹੋਤੂ’’ਤਿ ਚਿਨ੍ਤੇਤਿ, ਯਾਚਿਤੋ ਵਾ ਪਟਿਕ੍ਖਿਪਤਿ, ਸੋ ਯਾਚਕਾਨਂ ਅਭਿਮੁਖੇ ਠਿਤਮ੍ਪਿ ਅਤ੍ਥਤੋ ਪਟਿਚ੍ਛਾਦੇਤਿ ਨਾਮ. ਮਹਾਸਤ੍ਤੋ ਪਨ ਅਤ੍ਤਨੋ ਸੀਸਂ ਆਦਿਂ ਕਤ੍ਵਾ ਅਜ੍ਝਤ੍ਤਿਕਦਾਨਂ ਦਾਤੁਕਾਮੋਵ, ਕਥਂ ਬਾਹਿਰਂ ਪਟਿਕ੍ਖਿਪਤਿ, ਤਸ੍ਮਾ ਆਹ ‘‘ਸਨ੍ਤਂ ਨਪ੍ਪਟਿਗੂਹਾਮੀ’’ਤਿ. ਤੇਨੇਵਾਹ ‘‘ਦਾਨੇ ਮੇ ਰਮਤੇ ਮਨੋ’’ਤਿ. ਸੇਸਂ ਹੇਟ੍ਠਾ ਵੁਤ੍ਤਤ੍ਥਮੇਵ.

ਤਸ੍ਸ ਪਨ ਹਤ੍ਥਿਨੋ ਚਤੂਸੁ ਪਾਦੇਸੁ ਅਲਙ੍ਕਾਰਾ ਚਤ੍ਤਾਰਿ ਸਤਸਹਸ੍ਸਾਨਿ ਅਗ੍ਘਨ੍ਤਿ, ਉਭੋਸੁ ਪਸ੍ਸੇਸੁ ਅਲਙ੍ਕਾਰਾ ਦ੍ਵੇ ਸਤਸਹਸ੍ਸਾਨਿ, ਹੇਟ੍ਠਾ ਉਦਰੇ ਕਮ੍ਬਲਂ ਸਤਸਹਸ੍ਸਂ, ਪਿਟ੍ਠਿਯਂ ਮੁਤ੍ਤਾਜਾਲਂ ਮਣਿਜਾਲਂ ਕਞ੍ਚਨਜਾਲਨ੍ਤਿ ਤੀਣਿ ਜਾਲਾਨਿ ਤੀਣਿ ਸਤਸਹਸ੍ਸਾਨਿ, ਉਭੋ ਕਣ੍ਣਾਲਙ੍ਕਾਰਾ ਦ੍ਵੇ ਸਤਸਹਸ੍ਸਾਨਿ, ਪਿਟ੍ਠਿਯਂ ਅਤ੍ਥਤਕਮ੍ਬਲਂ ਸਤਸਹਸ੍ਸਂ, ਕੁਮ੍ਭਾਲਙ੍ਕਾਰੋ ਸਤਸਹਸ੍ਸਂ, ਤਯੋ ਵਟਂਸਕਾ ਤੀਣਿ ਸਤਸਹਸ੍ਸਾਨਿ, ਕਣ੍ਣਚੂਲ਼ਾਲਙ੍ਕਾਰੋ ਸਤਸਹਸ੍ਸਂ, ਦ੍ਵਿਨ੍ਨਂ ਦਨ੍ਤਾਨਂ ਅਲਙ੍ਕਾਰਾ ਦ੍ਵੇ ਸਤਸਹਸ੍ਸਾਨਿ, ਸੋਣ੍ਡਾਯ ਸੋਵਤ੍ਥਿਕਾਲਙ੍ਕਾਰੋ ਸਤਸਹਸ੍ਸਂ, ਨਙ੍ਗੁਟ੍ਠਾਲਙ੍ਕਾਰੋ ਸਤਸਹਸ੍ਸਂ, ਆਰੋਹਣਨਿਸ੍ਸੇਣਿ ਸਤਸਹਸ੍ਸਂ, ਭੁਞ੍ਜਨਕਟਾਹਂ ਸਤਸਹਸ੍ਸਂ, ਠਪੇਤ੍ਵਾ ਅਨਗ੍ਘਭਣ੍ਡਂ ਇਦਂ ਤਾਵ ਏਤ੍ਤਕਂ ਚਤੁਵੀਸਤਿ ਸਤਸਹਸ੍ਸਾਨਿ ਅਗ੍ਘਤਿ. ਛਤ੍ਤਪਿਣ੍ਡਿਯਂ ਪਨ ਮਣਿ, ਚੂਲ਼ਾਮਣਿ, ਮੁਤ੍ਤਾਹਾਰੇ ਮਣਿ, ਅਙ੍ਕੁਸੇ ਮਣਿ, ਹਤ੍ਥਿਕਣ੍ਠਵੇਠਨਮੁਤ੍ਤਾਹਾਰੇ ਮਣਿ, ਹਤ੍ਥਿਕੁਮ੍ਭੇ ਮਣੀਤਿ ਇਮਾਨਿ ਛ ਅਨਗ੍ਘਾਨਿ, ਹਤ੍ਥੀਪਿ ਅਨਗ੍ਘੋ ਏਵਾਤਿ ਹਤ੍ਥਿਨਾ ਸਦ੍ਧਿਂ ਸਤ੍ਤ ਅਨਗ੍ਘਾਨਿ, ਤਾਨਿ ਸਬ੍ਬਾਨਿ ਬ੍ਰਾਹ੍ਮਣਾਨਂ ਅਦਾਸਿ. ਤਥਾ ਹਤ੍ਥਿਨੋ ਪਰਿਚਾਰਕਾਨਿ ਪਞ੍ਚ ਕੁਲਸਤਾਨਿ ਹਤ੍ਥਿਮੇਣ੍ਡਹਤ੍ਥਿਗੋਪਕੇਹਿ ਸਦ੍ਧਿਂ ਅਦਾਸਿ. ਸਹ ਦਾਨੇਨ ਪਨਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਭੂਮਿਕਮ੍ਪਾਦਯੋ ਅਹੇਸੁਂ. ਤੇਨ ਵੁਤ੍ਤਂ –

੮੭. ‘‘ਪੁਨਾਪਰਂ ਦਦਨ੍ਤਸ੍ਸ, ਸਬ੍ਬਸੇਤਂ ਗਜੁਤ੍ਤਮਂ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ’’ਤਿ.

ਜਾਤਕੇਪਿ (ਜਾ. ੨.੨੨.੧੬੭੩) ਵੁਤ੍ਤਂ –

‘‘ਤਦਾਸਿ ਯਂ ਭਿਂਸਨਕਂ, ਤਦਾਸਿ ਲੋਮਹਂਸਨਂ;

ਹਤ੍ਥਿਨਾਗੇ ਪਦਿਨ੍ਨਮ੍ਹਿ, ਮੇਦਨੀ ਸਮ੍ਪਕਮ੍ਪਥਾ’’ਤਿ.

੮੮. ਤਸ੍ਸ ਨਾਗਸ੍ਸ ਦਾਨੇਨਾਤਿ ਛਹਿ ਅਨਗ੍ਘੇਹਿ ਸਦ੍ਧਿਂ ਚਤੁਵੀਸਤਿਸਤਸਹਸ੍ਸਗ੍ਘਨਿਕਅਲਙ੍ਕਾਰਭਣ੍ਡਸਹਿਤਸ੍ਸ ਤਸ੍ਸ ਮਙ੍ਗਲਹਤ੍ਥਿਸ੍ਸ ਪਰਿਚ੍ਚਾਗੇਨ. ਸਿਵਯੋਤਿ ਸਿਵਿਰਾਜਕੁਮਾਰਾ ਚੇਵ ਸਿਵਿਰਟ੍ਠਵਾਸਿਨੋ ਚ. ‘‘ਸਿਵਯੋ’’ਤਿ ਚ ਦੇਸਨਾਸੀਸਮੇਤਂ. ਤਤ੍ਥ ਹਿ ਅਮਚ੍ਚਾ ਪਾਰਿਸਜ੍ਜਾ ਬ੍ਰਾਹ੍ਮਣਗਹਪਤਿਕਾ ਨੇਗਮਜਾਨਪਦਾ ਨਾਗਰਾ ਸਕਲਰਟ੍ਠਵਾਸਿਨੋ ਚ ਸਞ੍ਜਯਮਹਾਰਾਜਂ ਫੁਸ੍ਸਤਿਦੇਵਿਂ ਮਦ੍ਦਿਦੇਵਿਞ੍ਚ ਠਪੇਤ੍ਵਾ ਸਬ੍ਬੇ ਏਵ. ਕੁਦ੍ਧਾਤਿ ਦੇਵਤਾਵਤ੍ਤਨੇਨ ਬੋਧਿਸਤ੍ਤਸ੍ਸ ਕੁਦ੍ਧਾ. ਸਮਾਗਤਾਤਿ ਸਨ੍ਨਿਪਤਿਤਾ. ਤੇ ਕਿਰ ਬ੍ਰਾਹ੍ਮਣਾ ਹਤ੍ਥਿਂ ਲਭਿਤ੍ਵਾ ਤਂ ਅਭਿਰੁਹਿਤ੍ਵਾ ਮਹਾਦ੍ਵਾਰੇਨ ਪਵਿਸਿਤ੍ਵਾ ਨਗਰਮਜ੍ਝੇਨ ਪਾਯਿਂਸੁ. ਮਹਾਜਨੇਨ ਚ ‘‘ਅਮ੍ਭੋ ਬ੍ਰਾਹ੍ਮਣਾ, ਅਮ੍ਹਾਕਂ ਹਤ੍ਥੀ ਕੁਤੋ ਅਭਿਰੁਲ਼੍ਹੋ’’ਤਿ ਵੁਤ੍ਤੇ ‘‘ਵੇਸ੍ਸਨ੍ਤਰਮਹਾਰਾਜੇਨ ਨੋ ਹਤ੍ਥੀ ਦਿਨ੍ਨੋ, ਕੇ ਤੁਮ੍ਹੇ’’ਤਿ ਹਤ੍ਥਵਿਕਾਰਾਦੀਹਿ ਘਟ੍ਟੇਨ੍ਤਾ ਅਗਮਂਸੁ. ਅਥ ਅਮਚ੍ਚੇ ਆਦਿਂ ਕਤ੍ਵਾ ਮਹਾਜਨਾ ਰਾਜਦ੍ਵਾਰੇ ਸਨ੍ਨਿਪਤਿਤ੍ਵਾ ‘‘ਰਞ੍ਞਾ ਨਾਮ ਬ੍ਰਾਹ੍ਮਣਾਨਂ ਧਨਂ ਵਾ ਧਞ੍ਞਂ ਵਾ ਖੇਤ੍ਤਂ ਵਾ ਵਤ੍ਥੁ ਵਾ ਦਾਸਿਦਾਸਪਰਿਚਾਰਿਕਾ ਵਾ ਦਾਤਬ੍ਬਾ ਸਿਯਾ, ਕਥਞ੍ਹਿ ਨਾਮਾਯਂ ਵੇਸ੍ਸਨ੍ਤਰਮਹਾਰਾਜਾ ਰਾਜਾਰਹਂ ਮਙ੍ਗਲਹਤ੍ਥਿਂ ਦਸ੍ਸਤਿ, ਨ ਇਦਾਨਿ ਏਵਂ ਰਜ੍ਜਂ ਵਿਨਾਸੇਤੁਂ ਦਸ੍ਸਾਮਾ’’ਤਿ ਉਜ੍ਝਾਯਿਤ੍ਵਾ ਸਞ੍ਜਯਮਹਾਰਾਜਸ੍ਸ ਤਮਤ੍ਥਂ ਆਰੋਚੇਤ੍ਵਾ ਤੇਨ ਅਨੁਨੀਯਮਾਨਾ ਅਨਨੁਯਨ੍ਤਾ ਅਗਮਂਸੁ. ਕੇਵਲਂ ਪਨ –

‘‘ਮਾ ਨਂ ਦਣ੍ਡੇਨ ਸਤ੍ਥੇਨ, ਨ ਹਿ ਸੋ ਬਨ੍ਧਨਾਰਹੋ;

ਪਬ੍ਬਾਜੇਹਿ ਚ ਨਂ ਰਟ੍ਠਾ, ਵਙ੍ਕੇ ਵਸਤੁ ਪਬ੍ਬਤੇ’’ਤਿ. (ਜਾ. ੨.੨੨.੧੬੮੭) –

ਵਦਿਂਸੁ. ਤੇਨ ਵੁਤ੍ਤਂ –

‘‘ਪਬ੍ਬਾਜੇਸੁਂ ਸਕਾ ਰਟ੍ਠਾ, ਵਙ੍ਕਂ ਗਚ੍ਛਤੁ ਪਬ੍ਬਤ’’ਨ੍ਤਿ.

ਤਤ੍ਥ ਪਬ੍ਬਾਜੇਸੁਨ੍ਤਿ ਰਜ੍ਜਤੋ ਬਹਿ ਵਾਸਤ੍ਥਾਯ ਉਸ੍ਸੁਕ੍ਕਮਕਂਸੁ; –

ਰਾਜਾਪਿ ‘‘ਮਹਾ ਖੋ ਅਯਂ ਪਟਿਪਕ੍ਖੋ, ਹਨ੍ਦ ਮਮ ਪੁਤ੍ਤੋ ਕਤਿਪਾਹਂ ਰਜ੍ਜਤੋ ਬਹਿ ਵਸਤੂ’’ਤਿ ਚਿਨ੍ਤੇਤ੍ਵਾ –

‘‘ਏਸੋ ਚੇ ਸਿਵੀਨਂ ਛਨ੍ਦੋ, ਛਨ੍ਦਂ ਨਪ੍ਪਨੁਦਾਮਸੇ;

ਇਮਂ ਸੋ ਵਸਤੁ ਰਤ੍ਤਿਂ, ਕਾਮੇ ਚ ਪਰਿਭੁਞ੍ਜਤੁ.

‘‘ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਸਮਗ੍ਗਾ ਸਿਵਯੋ ਹੁਤ੍ਵਾ, ਰਟ੍ਠਾ ਪਬ੍ਬਾਜਯਨ੍ਤੁ ਨ’’ਨ੍ਤਿ. (ਜਾ. ੨.੨੨.੧੬੮੮-੧੬੮੯) –

ਵਤ੍ਵਾ ਪੁਤ੍ਤਸ੍ਸ ਸਨ੍ਤਿਕੇ ਕਤ੍ਤਾਰਂ ਪੇਸੇਸਿ ‘‘ਇਮਂ ਪਵਤ੍ਤਿਂ ਮਮ ਪੁਤ੍ਤਸ੍ਸ ਆਰੋਚੇਹੀ’’ਤਿ. ਸੋ ਤਥਾ ਅਕਾਸਿ.

ਮਹਾਸਤ੍ਤੋਪਿ ਤਂ ਸੁਤ੍ਵਾ –

‘‘ਕਿਸ੍ਮਿਂ ਮੇ ਸਿਵਯੋ ਕੁਦ੍ਧਾ, ਨਾਹਂ ਪਸ੍ਸਾਮਿ ਦੁਕ੍ਕਟਂ;

ਤਂ ਮੇ ਕਤ੍ਤੇ ਵਿਯਾਚਿਕ੍ਖ, ਕਸ੍ਮਾ ਪਬ੍ਬਾਜਯਨ੍ਤਿ ਮ’’ਨ੍ਤਿ. (ਜਾ. ੨.੨੨.੧੭੦੧) –

ਕਾਰਣਂ ਪੁਚ੍ਛਿ. ਤੇਨ ‘‘ਤੁਮ੍ਹਾਕਂ ਹਤ੍ਥਿਦਾਨੇਨਾ’’ਤਿ ਵੁਤ੍ਤੇ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ –

‘‘ਹਦਯਂ ਚਕ੍ਖੁਮ੍ਪਹਂ ਦਜ੍ਜਂ, ਕਿਂ ਮੇ ਬਾਹਿਰਕਂ ਧਨਂ;

ਹਿਰਞ੍ਞਂ ਵਾ ਸੁਵਣ੍ਣਂ ਵਾ, ਮੁਤ੍ਤਾ ਵੇਲ਼ੁਰਿਯਾ ਮਣਿ.

‘‘ਦਕ੍ਖਿਣਂ ਵਾਪਹਂ ਬਾਹੁਂ, ਦਿਸ੍ਵਾ ਯਾਚਕਮਾਗਤੇ;

ਦਦੇਯ੍ਯਂ ਨ ਵਿਕਮ੍ਪੇਯ੍ਯਂ, ਦਾਨੇ ਮੇ ਰਮਤੇ ਮਨੋ.

‘‘ਕਾਮਂ ਮਂ ਸਿਵਯੋ ਸਬ੍ਬੇ, ਪਬ੍ਬਾਜੇਨ੍ਤੁ ਹਨਨ੍ਤੁ ਵਾ;

ਨੇਵ ਦਾਨਾ ਵਿਰਮਿਸ੍ਸਂ, ਕਾਮਂ ਛਿਨ੍ਦਨ੍ਤੁ ਸਤ੍ਤਧਾ’’ਤਿ. (ਜਾ. ੨.੨੨.੧੭੦੩-੧੭੦੫) –

ਵਤ੍ਵਾ ‘‘ਨਾਗਰਾ ਮੇ ਏਕਦਿਵਸਂ ਦਾਨਂ ਦਾਤੁਂ ਓਕਾਸਂ ਦੇਨ੍ਤੁ, ਸ੍ਵੇ ਦਾਨਂ ਦਤ੍ਵਾ ਤਤਿਯਦਿਵਸੇ ਗਮਿਸ੍ਸਾਮੀ’’ਤਿ ਵਤ੍ਵਾ ਕਤ੍ਤਾਰਂ ਤੇਸਂ ਸਨ੍ਤਿਕੇ ਪੇਸੇਤ੍ਵਾ ‘‘ਅਹਂ ਸ੍ਵੇ ਸਤ੍ਤਸਤਕਂ ਨਾਮ ਮਹਾਦਾਨਂ ਦਸ੍ਸਾਮਿ, ਸਤ੍ਤਹਤ੍ਥਿਸਤਾਨਿ ਸਤ੍ਤਅਸ੍ਸਸਤਾਨਿ ਸਤ੍ਤਰਥਸਤਾਨਿ ਸਤ੍ਤਇਤ੍ਥਿਸਤਾਨਿ ਸਤ੍ਤਦਾਸਸਤਾਨਿ ਸਤ੍ਤਦਾਸਿਸਤਾਨਿ ਸਤ੍ਤਧੇਨੁਸਤਾਨਿ ਪਟਿਯਾਦੇਹਿ, ਨਾਨਪ੍ਪਕਾਰਞ੍ਚ ਅਨ੍ਨਪਾਨਾਦਿਂ ਸਬ੍ਬਂ ਦਾਤਬ੍ਬਯੁਤ੍ਤਕਂ ਉਪਟ੍ਠਪੇਹੀ’’ਤਿ ਸਬ੍ਬਕਮ੍ਮਿਕਂ ਅਮਚ੍ਚਂ ਆਣਾਪੇਤ੍ਵਾ ਏਕਕੋਵ ਮਦ੍ਦਿਦੇਵਿਯਾ ਵਸਨਟ੍ਠਾਨਂ ਗਨ੍ਤ੍ਵਾ ‘‘ਭਦ੍ਦੇ ਮਦ੍ਦਿ, ਅਨੁਗਾਮਿਕਨਿਧਿਂ ਨਿਦਹਮਾਨਾ, ਸੀਲਵਨ੍ਤੇਸੁ ਦਦੇਯ੍ਯਾਸੀ’’ਤਿ ਤਮ੍ਪਿ ਦਾਨੇ ਨਿਯੋਜੇਤ੍ਵਾ ਤਸ੍ਸਾ ਅਤ੍ਤਨੋ ਗਮਨਕਾਰਣਂ ਆਚਿਕ੍ਖਿਤ੍ਵਾ ‘‘ਅਹਂ ਵਨਂ ਵਸਨਤ੍ਥਾਯ ਗਮਿਸ੍ਸਾਮਿ, ਤ੍ਵਂ ਇਧੇਵ ਅਨੁਕ੍ਕਣ੍ਠਿਤਾ ਵਸਾਹੀ’’ਤਿ ਆਹ. ਸਾ ‘‘ਨਾਹਂ, ਮਹਾਰਾਜ, ਤੁਮ੍ਹੇਹਿ ਵਿਨਾ ਏਕਦਿਵਸਮ੍ਪਿ ਵਸਿਸ੍ਸਾਮੀ’’ਤਿ ਆਹ.

ਦੁਤਿਯਦਿਵਸੇ ਸਤ੍ਤਸਤਕਂ ਮਹਾਦਾਨਂ ਪਵਤ੍ਤੇਸਿ. ਤਸ੍ਸ ਸਤ੍ਤਸਤਕਂ ਦਾਨਂ ਦੇਨ੍ਤਸ੍ਸੇਵ ਸਾਯਂ ਅਹੋਸਿ. ਅਲਙ੍ਕਤਰਥੇਨ ਮਾਤਾਪਿਤੂਨਂ ਵਸਨਟ੍ਠਾਨਂ ਗਨ੍ਤ੍ਵਾ ‘‘ਅਹਂ ਸ੍ਵੇ ਗਮਿਸ੍ਸਾਮੀ’’ਤਿ ਤੇ ਆਪੁਚ੍ਛਿਤ੍ਵਾ ਅਕਾਮਕਾਨਂ ਤੇਸਂ ਅਸ੍ਸੁਮੁਖਾਨਂ ਰੋਦਨ੍ਤਾਨਂਯੇਵ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤੋ ਨਿਕ੍ਖਮਿਤ੍ਵਾ ਤਂ ਦਿਵਸਂ ਅਤ੍ਤਨੋ ਨਿਵੇਸਨੇ ਵਸਿਤ੍ਵਾ ਪੁਨਦਿਵਸੇ ‘‘ਗਮਿਸ੍ਸਾਮੀ’’ਤਿ ਪਾਸਾਦਤੋ ਓਤਰਿ. ਮਦ੍ਦਿਦੇਵੀ ਸਸ੍ਸੁਸਸੁਰੇਹਿ ਨਾਨਾਨਯੇਹਿ ਯਾਚਿਤ੍ਵਾ ਨਿਵਤ੍ਤਿਯਮਾਨਾਪਿ ਤੇਸਂ ਵਚਨਂ ਅਨਾਦਿਯਿਤ੍ਵਾ ਤੇ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਸੇਸਿਤ੍ਥਿਯੋ ਅਪਲੋਕੇਤ੍ਵਾ ਦ੍ਵੇ ਪੁਤ੍ਤੇ ਆਦਾਯ ਵੇਸ੍ਸਨ੍ਤਰਸ੍ਸ ਪਠਮਤਰਂ ਗਨ੍ਤ੍ਵਾ ਰਥੇ ਅਟ੍ਠਾਸਿ.

ਮਹਾਪੁਰਿਸੋ ਰਥਂ ਅਭਿਰੁਹਿਤ੍ਵਾ ਰਥੇ ਠਿਤੋ ਮਹਾਜਨਂ ਆਪੁਚ੍ਛਿਤ੍ਵਾ ‘‘ਅਪ੍ਪਮਤ੍ਤਾ ਦਾਨਾਦੀਨਿ ਪੁਞ੍ਞਾਨਿ ਕਰੋਥਾ’’ਤਿ ਓਵਾਦਮਸ੍ਸ ਦਤ੍ਵਾ ਨਗਰਤੋ ਨਿਕ੍ਖਮਿ. ਬੋਧਿਸਤ੍ਤਸ੍ਸ ਮਾਤਾ ‘‘ਪੁਤ੍ਤੋ ਮੇ ਦਾਨਵਿਤ੍ਤਕੋ ਦਾਨਂ ਦੇਤੂ’’ਤਿ ਆਭਰਣੇਹਿ ਸਦ੍ਧਿਂ ਸਤ੍ਤਰਤਨਪੂਰਾਨਿ ਸਕਟਾਨਿ ਉਭੋਸੁ ਪਸ੍ਸੇਸੁ ਪੇਸੇਸਿ. ਸੋਪਿ ਅਤ੍ਤਨੋ ਕਾਯਾਰੁਲ਼੍ਹਮੇਵ ਆਭਰਣਭਣ੍ਡਂ ਸਮ੍ਪਤ੍ਤਯਾਚਕਾਨਂ ਅਟ੍ਠਾਰਸ ਵਾਰੇ ਦਤ੍ਵਾ ਸੇਸਂ ਸਬ੍ਬਮਦਾਸਿ. ਨਗਰਾ ਨਿਕ੍ਖਮਿਤ੍ਵਾਵ ਨਿਵਤ੍ਤਿਤ੍ਵਾ ਓਲੋਕੇਤੁਕਾਮੋ ਅਹੋਸਿ. ਅਥਸ੍ਸ ਪੁਞ੍ਞਾਨੁਭਾਵੇਨ ਰਥਪ੍ਪਮਾਣੇ ਠਾਨੇ ਮਹਾਪਥਵੀ ਭਿਜ੍ਜਿਤ੍ਵਾ ਪਰਿਵਤ੍ਤਿਤ੍ਵਾ ਰਥਂ ਨਗਰਾਭਿਮੁਖਂ ਅਕਾਸਿ. ਸੋ ਮਾਤਾਪਿਤੂਨਂ ਵਸਨਟ੍ਠਾਨਂ ਓਲੋਕੇਸਿ. ਤੇਨ ਕਾਰੁਞ੍ਞੇਨ ਪਥਵਿਕਮ੍ਪੋ ਅਹੋਸਿ. ਤੇਨ ਵੁਤ੍ਤਂ ‘‘ਤੇਸਂ ਨਿਚ੍ਛੁਭਮਾਨਾਨ’’ਨ੍ਤਿਆਦਿ.

੮੯-੯੦. ਤਤ੍ਥ ਨਿਚ੍ਛੁਭਮਾਨਾਨਨ੍ਤਿ ਤੇਸੁ ਸਿਵੀਸੁ ਨਿਕ੍ਕਡ੍ਢਨ੍ਤੇਸੁ, ਪਬ੍ਬਾਜੇਨ੍ਤੇਸੂਤਿ ਅਤ੍ਥੋ. ਤੇਸਂ ਵਾ ਨਿਕ੍ਖਮਨ੍ਤਾਨਂ. ਮਹਾਦਾਨਂ ਪਵਤ੍ਤੇਤੁਨ੍ਤਿ ਸਤ੍ਤਸਤਕਮਹਾਦਾਨਂ ਦਾਤੁਂ. ਆਯਾਚਿਸ੍ਸਨ੍ਤਿ ਯਾਚਿਂ. ਸਾਵਯਿਤ੍ਵਾਤਿ ਘੋਸਾਪੇਤ੍ਵਾ. ਕਣ੍ਣਭੇਰਿਨ੍ਤਿ ਯੁਗਲਮਹਾਭੇਰਿਂ. ਦਦਾਮਹਨ੍ਤਿ ਦਦਾਮਿ ਅਹਂ.

੯੧. ਅਥੇਤ੍ਥਾਤਿ ਅਥੇਵਂ ਦਾਨੇ ਦੀਯਮਾਨੇ ਏਤਸ੍ਮਿਂ ਦਾਨਗ੍ਗੇ. ਤੁਮੂਲੋਤਿ ਏਕਕੋਲਾਹਲੀਭੂਤੋ. ਭੇਰਵੋਤਿ ਭਯਾਵਹੋ. ਮਹਾਸਤ੍ਤਞ੍ਹਿ ਠਪੇਤ੍ਵਾ ਅਞ੍ਞੇਸਂ ਸੋ ਭਯਂ ਜਨੇਤਿ, ਤਸ੍ਸ ਭਯਜਨਨਾਕਾਰਂ ਦਸ੍ਸੇਤੁਂ. ‘‘ਦਾਨੇਨਿਮ’’ਨ੍ਤਿਆਦਿ ਵੁਤ੍ਤਂ. ਇਮਂ ਵੇਸ੍ਸਨ੍ਤਰਮਹਾਰਾਜਾਨਂ ਦਾਨੇਨ ਹੇਤੁਨਾ ਸਿਵਯੋ ਰਟ੍ਠਤੋ ਨੀਹਰਨ੍ਤਿ ਪਬ੍ਬਾਜੇਨ੍ਤਿ, ਤਥਾਪਿ ਪੁਨ ਚ ਏਵਰੂਪਂ ਦਾਨਂ ਦੇਤਿ ਅਯਨ੍ਤਿ.

੯੨-੯੪. ਇਦਾਨਿ ਤਂ ਦਾਨਂ ਦਸ੍ਸੇਤੁਂ ‘‘ਹਤ੍ਥਿ’’ਨ੍ਤਿ ਗਾਥਮਾਹ. ਤਤ੍ਥ ਗਵਨ੍ਤਿ ਧੇਨੁਂ. ਚਤੁਵਾਹਿਂ ਰਥਂ ਦਤ੍ਵਾਤਿ ਵਹਨ੍ਤੀਤਿ ਵਾਹਿਨੋ, ਅਸ੍ਸਾ, ਚਤੁਰੋ ਆਜਞ੍ਞਸਿਨ੍ਧਵੇ ਰਥਞ੍ਚ ਬ੍ਰਾਹ੍ਮਣਾਨਂ ਦਤ੍ਵਾਤਿ ਅਤ੍ਥੋ. ਮਹਾਸਤ੍ਤੋ ਹਿ ਤਥਾ ਨਗਰਤੋ ਨਿਕ੍ਖਮਨ੍ਤੋ ਸਹਜਾਤੇ ਸਟ੍ਠਿਸਹਸ੍ਸੇ ਅਮਚ੍ਚੇ ਸੇਸਜਨਞ੍ਚ ਅਸ੍ਸੁਪੁਣ੍ਣਮੁਖਂ ਅਨੁਬਦ੍ਧਨ੍ਤਂ ਨਿਵਤ੍ਤੇਤ੍ਵਾ ਰਥਂ ਪਾਜੇਨ੍ਤੋ ਮਦ੍ਦਿਂ ਆਹ – ‘‘ਸਚੇ, ਭਦ੍ਦੇ, ਪਚ੍ਛਤੋ ਯਾਚਕਾ ਆਗਚ੍ਛਨ੍ਤਿ, ਉਪਧਾਰੇਯ੍ਯਾਸੀ’’ਤਿ. ਸਾ ਓਲੋਕੇਨ੍ਤੀ ਨਿਸੀਦਿ. ਅਥਸ੍ਸ ਸਤ੍ਤਸਤਕਮਹਾਦਾਨਂ ਗਮਨਕਾਲੇ ਕਤਦਾਨਞ੍ਚ ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਾ ਚਤ੍ਤਾਰੋ ਬ੍ਰਾਹ੍ਮਣਾ ਆਗਨ੍ਤ੍ਵਾ ‘‘ਵੇਸ੍ਸਨ੍ਤਰੋ ਕੁਹਿ’’ਨ੍ਤਿ ਪੁਚ੍ਛਿਤ੍ਵਾ ‘‘ਦਾਨਂ ਦਤ੍ਵਾ ਰਥੇਨ ਗਤੋ’’ਤਿ ਵੁਤ੍ਤੇ ‘‘ਅਸ੍ਸੇ ਯਾਚਿਸ੍ਸਾਮਾ’’ਤਿ ਅਨੁਬਨ੍ਧਿਂਸੁ. ਮਦ੍ਦੀ ਤੇ ਆਗਚ੍ਛਨ੍ਤੇ ਦਿਸ੍ਵਾ ‘‘ਯਾਚਕਾ, ਦੇਵਾ’’ਤਿ ਆਰੋਚੇਸਿ. ਮਹਾਸਤ੍ਤੋ ਰਥਂ ਠਪੇਸਿ. ਤੇ ਆਗਨ੍ਤ੍ਵਾ ਅਸ੍ਸੇ ਯਾਚਿਂਸੁ. ਮਹਾਸਤ੍ਤੋ ਅਸ੍ਸੇ ਅਦਾਸਿ. ਤੇ ਤੇ ਗਹੇਤ੍ਵਾ ਗਤਾ. ਅਸ੍ਸੇਸੁ ਪਨ ਦਿਨ੍ਨੇਸੁ ਰਥਧੁਰਂ ਆਕਾਸੇਯੇਵ ਅਟ੍ਠਾਸਿ. ਅਥ ਚਤ੍ਤਾਰੋ ਦੇਵਪੁਤ੍ਤਾ ਰੋਹਿਤਮਿਗਵਣ੍ਣੇਨਾਗਨ੍ਤ੍ਵਾ ਰਥਧੁਰਂ ਸਮ੍ਪਟਿਚ੍ਛਿਤ੍ਵਾ ਅਗਮਂਸੁ. ਮਹਾਸਤ੍ਤੋ ਤੇਸਂ ਦੇਵਪੁਤ੍ਤਭਾਵਂ ਞਤ੍ਵਾ –

‘‘ਇਙ੍ਘ ਮਦ੍ਦਿ ਨਿਸਾਮੇਹਿ, ਚਿਤ੍ਤਰੂਪਂਵ ਦਿਸ੍ਸਤਿ;

ਮਿਗਰੋਹਿਚ੍ਚਵਣ੍ਣੇਨ, ਦਕ੍ਖਿਣਸ੍ਸਾ ਵਹਨ੍ਤਿ ਮ’’ਨ੍ਤਿ. (ਜਾ. ੨.੨੨.੧੮੬੪) –

ਮਦ੍ਦਿਯਾ ਆਹ.

ਤਤ੍ਥ ਚਿਤ੍ਤਰੂਪਂਵਾਤਿ ਅਚ੍ਛਰਿਯਰੂਪਂ ਵਿਯ. ਦਕ੍ਖਿਣਸ੍ਸਾਤਿ ਸੁਸਿਕ੍ਖਿਤਅਸ੍ਸਾ ਵਿਯ ਮਂ ਵਹਨ੍ਤਿ.

ਅਥ ਨਂ ਏਵਂ ਗਚ੍ਛਨ੍ਤਂ ਅਪਰੋ ਬ੍ਰਾਹ੍ਮਣੋ ਆਗਨ੍ਤ੍ਵਾ ਰਥਂ ਯਾਚਿ. ਮਹਾਸਤ੍ਤੋ ਪੁਤ੍ਤਦਾਰਂ ਓਤਾਰੇਤ੍ਵਾ ਰਥਂ ਅਦਾਸਿ. ਰਥੇ ਪਨ ਦਿਨ੍ਨੇ ਦੇਵਪੁਤ੍ਤਾ ਅਨ੍ਤਰਧਾਯਿਂਸੁ. ਤਤੋ ਪਟ੍ਠਾਯ ਪਨ ਸਬ੍ਬੇਪਿ ਪਤ੍ਤਿਕਾਵ ਅਹੇਸੁਂ. ਅਥ ਮਹਾਸਤ੍ਤੋ ‘‘ਮਦ੍ਦਿ, ਤ੍ਵਂ ਕਣ੍ਹਾਜਿਨਂ ਗਣ੍ਹਾਹਿ, ਅਹਂ ਜਾਲਿਕੁਮਾਰਂ ਗਣ੍ਹਾਮੀ’’ਤਿ ਉਭੋਪਿ ਦ੍ਵੇ ਦਾਰਕੇ ਅਙ੍ਕੇਨਾਦਾਯ ਅਞ੍ਞਮਞ੍ਞਂ ਪਿਯਸਲ੍ਲਾਪਾ ਪਟਿਪਥਂ ਆਗਚ੍ਛਨ੍ਤੇ ਮਨੁਸ੍ਸੇ ਵਙ੍ਕਪਬ੍ਬਤਸ੍ਸ ਮਗ੍ਗਂ ਪੁਚ੍ਛਨ੍ਤਾ ਸਯਮੇਵ ਓਨਤੇਸੁ ਫਲਰੁਕ੍ਖੇਸੁ ਫਲਾਨਿ ਦਾਰਕਾਨਂ ਦਦਨ੍ਤਾ ਅਤ੍ਥਕਾਮਾਹਿ ਦੇਵਤਾਹਿ ਮਗ੍ਗਸ੍ਸ ਸਙ੍ਖਿਪਿਤਤ੍ਤਾ ਤਦਹੇਵ ਚੇਤਰਟ੍ਠਂ ਸਮ੍ਪਾਪੁਣਿਂਸੁ. ਤੇਨ ਵੁਤ੍ਤਂ ‘‘ਚਤੁਵਾਹਿਂ ਰਥਂ ਦਤ੍ਵਾ’’ਤਿਆਦਿ.

ਤਤ੍ਥ ਠਤ੍ਵਾ ਚਾਤੁਮ੍ਮਹਾਪਥੇਤਿ ਅਤ੍ਤਨੋ ਗਮਨਮਗ੍ਗੇਨ ਪਸ੍ਸਤੋ ਆਗਤੇਨ ਤੇਨ ਬ੍ਰਾਹ੍ਮਣੇਨ ਆਗਤਮਗ੍ਗੇਨ ਚ ਵਿਨਿਵਿਜ੍ਝਿਤ੍ਵਾ ਗਤਟ੍ਠਾਨਤ੍ਤਾ ਚਤੁਕ੍ਕਸਙ੍ਖਾਤੇ ਚਤੁਮਹਾਪਥੇ ਠਤ੍ਵਾ ਤਸ੍ਸ ਬ੍ਰਾਹ੍ਮਣਸ੍ਸ ਰਥਂ ਦਤ੍ਵਾ. ਏਕਾਕਿਯੋਤਿ ਅਮਚ੍ਚਸੇਵਕਾਦਿਸਹਾਯਾਭਾਵੇਨ ਏਕਕੋ. ਤੇਨੇਵਾਹ ‘‘ਅਦੁਤਿਯੋ’’ਤਿ. ਮਦ੍ਦਿਦੇਵਿਂ ਇਦਮਬ੍ਰਵੀਤਿ ਮਦ੍ਦਿਦੇਵਿਂ ਇਦਂ ਅਭਾਸਿ.

੯੬-੯੯. ਪਦੁਮਂ ਪੁਣ੍ਡਰੀਕਂਵਾਤਿ ਪਦੁਮਂ ਵਿਯ, ਪੁਣ੍ਡਰੀਕਂ ਵਿਯ ਚ. ਕਣ੍ਹਾਜਿਨਗ੍ਗਹੀਤਿ ਕਣ੍ਹਾਜਿਨਂ ਅਗ੍ਗਹੇਸਿ. ਅਭਿਜਾਤਾਤਿ ਜਾਤਿਸਮ੍ਪਨ੍ਨਾ. ਵਿਸਮਂ ਸਮਨ੍ਤਿ ਵਿਸਮਂ ਸਮਞ੍ਚ ਭੂਮਿਪ੍ਪਦੇਸਂ. ਏਨ੍ਤੀਤਿ ਆਗਚ੍ਛਨ੍ਤਿ. ਅਨੁਮਗ੍ਗੇ ਪਟਿਪ੍ਪਥੇਤਿ ਅਨੁਮਗ੍ਗੇ ਵਾ ਪਟਿਪਥੇ ਵਾਤਿ ਵਾ-ਸਦ੍ਦਸ੍ਸ ਲੋਪੋ ਦਟ੍ਠਬ੍ਬੋ. ਕਰੁਣਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਕਰੁਣਾਯਿਤਤ੍ਤਨ੍ਤਿ ਅਤ੍ਥੋ. ਦੁਕ੍ਖਂ ਤੇ ਪਟਿਵੇਦੇਨ੍ਤੀਤਿ ਇਮੇ ਏਵਂ ਸੁਖੁਮਾਲਾ ਪਦਸਾ ਗਚ੍ਛਨ੍ਤਿ, ਦੂਰੇਵ ਇਤੋ ਵਙ੍ਕਪਬ੍ਬਤੋਤਿ ਤੇ ਤਦਾ ਅਮ੍ਹੇਸੁ ਕਾਰੁਞ੍ਞਵਸੇਨ ਅਤ੍ਤਨਾ ਦੁਕ੍ਖਂ ਪਟਿਲਭਨ੍ਤਿ, ਤਥਾ ਅਤ੍ਤਨੋ ਉਪ੍ਪਨ੍ਨਦੁਕ੍ਖਂ ਪਟਿਵੇਦੇਨ੍ਤਿ ਵਾਤਿ ਅਤ੍ਥੋ.

੧੦੦-੧. ਪਵਨੇਤਿ ਮਹਾਵਨੇ. ਫਲਿਨੇਤਿ ਫਲਵਨ੍ਤੇ. ਉਬ੍ਬਿਦ੍ਧਾਤਿ ਉਦ੍ਧਂ ਉਗ੍ਗਤਾ ਉਚ੍ਚਾ. ਉਪਗਚ੍ਛਨ੍ਤਿ ਦਾਰਕੇਤਿ ਯਥਾ ਫਲਾਨਿ ਦਾਰਕਾਨਂ ਹਤ੍ਥੂਪਗਯ੍ਹਕਾਨਿ ਹੋਨ੍ਤਿ, ਏਵਂ ਰੁਕ੍ਖਾ ਸਯਮੇਵ ਸਾਖਾਹਿ ਓਨਮਿਤ੍ਵਾ ਦਾਰਕੇ ਉਪੇਨ੍ਤਿ.

੧੦੨. ਅਚ੍ਛਰਿਯਨ੍ਤਿ ਅਚ੍ਛਰਾਯੋਗ੍ਗਂ, ਅਚ੍ਛਰਂ ਪਹਰਿਤੁਂ ਯੁਤ੍ਤਂ. ਅਭੂਤਪੁਬ੍ਬਂ ਭੂਤਨ੍ਤਿ ਅਬ੍ਭੁਤਂ. ਲੋਮਾਨਂ ਹਂਸਨਸਮਤ੍ਥਤਾਯ ਲੋਮਹਂਸਨਂ. ਸਾਹੁਕਾਰਨ੍ਤਿ ਸਾਧੁਕਾਰਂ, ਅਯਮੇਵ ਵਾ ਪਾਠੋ. ਇਤ੍ਥਿਰਤਨਭਾਵੇਨ ਸਬ੍ਬੇਹਿ ਅਙ੍ਗੇਹਿ ਅਵਯਵੇਹਿ ਸੋਭਤੀਤਿ ਸਬ੍ਬਙ੍ਗਸੋਭਨਾ.

੧੦੩-੪. ਅਚ੍ਛੇਰਂ ਵਤਾਤਿ ਅਚ੍ਛਰਿਯਂ ਵਤ. ਵੇਸ੍ਸਨ੍ਤਰਸ੍ਸ ਤੇਜੇਨਾਤਿ ਵੇਸ੍ਸਨ੍ਤਰਸ੍ਸ ਪੁਞ੍ਞਾਨੁਭਾਵੇਨ. ਸਙ੍ਖਿਪਿਂਸੁ ਪਥਂ ਯਕ੍ਖਾਤਿ ਦੇਵਤਾ ਮਹਾਸਤ੍ਤਸ੍ਸ ਪੁਞ੍ਞਤੇਜੇਨ ਚੋਦਿਤਾ ਤਂ ਮਗ੍ਗਂ ਪਰਿਕ੍ਖਯਂ ਪਾਪੇਸੁਂ, ਅਪ੍ਪਕਂ ਅਕਂਸੁ, ਤਂ ਪਨ ਦਾਰਕੇਸੁ ਕਰੁਣਾਯ ਕਤਂ ਵਿਯ ਕਤ੍ਵਾ ਵੁਤ੍ਤਂ ‘‘ਅਨੁਕਮ੍ਪਾਯ ਦਾਰਕੇ’’ਤਿ. ਜੇਤੁਤ੍ਤਰਨਗਰਤੋ ਹਿ ਸੁਵਣ੍ਣਗਿਰਿਤਾਲੋ ਨਾਮ ਪਬ੍ਬਤੋ ਪਞ੍ਚ ਯੋਜਨਾਨਿ, ਤਤੋ ਕੋਨ੍ਤਿਮਾਰਾ ਨਾਮ ਨਦੀ ਪਞ੍ਚ ਯੋਜਨਾਨਿ, ਤਤੋ ਮਾਰਞ੍ਜਨਾਗਿਰਿ ਨਾਮ ਪਬ੍ਬਤੋ ਪਞ੍ਚ ਯੋਜਨਾਨਿ, ਤਤੋ ਦਣ੍ਡਬ੍ਰਾਹ੍ਮਣਗਾਮੋ ਨਾਮ ਪਞ੍ਚ ਯੋਜਨਾਨਿ, ਤਤੋ ਮਾਤੁਲਨਗਰਂ ਦਸ ਯੋਜਨਾਨਿ, ਇਤਿ ਤਂ ਰਟ੍ਠਂ ਜੇਤੁਤ੍ਤਰਨਗਰਤੋ ਤਿਂਸ ਯੋਜਨਾਨਿ ਹੋਤਿ. ਦੇਵਤਾ ਬੋਧਿਸਤ੍ਤਸ੍ਸ ਪੁਞ੍ਞਤੇਜੇਨ ਚੋਦਿਤਾ ਮਗ੍ਗਂ ਪਰਿਕ੍ਖਯਂ ਪਾਪੇਸੁਂ. ਤਂ ਸਬ੍ਬਂ ਏਕਾਹੇਨੇਵ ਅਤਿਕ੍ਕਮਿਂਸੁ. ਤੇਨ ਵੁਤ੍ਤਂ ‘‘ਨਿਕ੍ਖਨ੍ਤਦਿਵਸੇਨੇਵ, ਚੇਤਰਟ੍ਠਮੁਪਾਗਮੁ’’ਨ੍ਤਿ.

ਏਵਂ ਮਹਾਸਤ੍ਤੋ ਸਾਯਨ੍ਹਸਮਯਂ ਚੇਤਰਟ੍ਠੇ ਮਾਤੁਲਨਗਰਂ ਪਤ੍ਵਾ ਤਸ੍ਸ ਨਗਰਸ੍ਸ ਦ੍ਵਾਰਸਮੀਪੇ ਸਾਲਾਯਂ ਨਿਸੀਦਿ. ਅਥਸ੍ਸ ਮਦ੍ਦਿਦੇਵੀ ਪਾਦੇਸੁ ਰਜਂ ਪੁਞ੍ਛਿਤ੍ਵਾ ਪਾਦੇ ਸਮ੍ਬਾਹਿਤ੍ਵਾ ‘‘ਵੇਸ੍ਸਨ੍ਤਰਸ੍ਸ ਆਗਤਭਾਵਂ ਜਾਨਾਪੇਸ੍ਸਾਮੀ’’ਤਿ ਸਾਲਤੋ ਨਿਕ੍ਖਮਿਤ੍ਵਾ ਤਸ੍ਸ ਚਕ੍ਖੁਪਥੇ ਸਾਲਦ੍ਵਾਰੇ ਅਟ੍ਠਾਸਿ. ਨਗਰਂ ਪਵਿਸਨ੍ਤਿਯੋ ਚ ਨਿਕ੍ਖਮਨ੍ਤਿਯੋ ਚ ਇਤ੍ਥਿਯੋ ਤਂ ਦਿਸ੍ਵਾ ਪਰਿਵਾਰੇਸੁਂ. ਮਹਾਜਨੋ ਤਞ੍ਚ ਵੇਸ੍ਸਨ੍ਤਰਞ੍ਚ ਪੁਤ੍ਤੇ ਚਸ੍ਸ ਤਥਾ ਆਗਤੇ ਦਿਸ੍ਵਾ ਰਾਜੂਨਂ ਆਚਿਕ੍ਖਿ. ਸਟ੍ਠਿਸਹਸ੍ਸਾ ਰਾਜਾਨੋ ਰੋਦਨ੍ਤਾ ਪਰਿਦੇਵਨ੍ਤਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਮਗ੍ਗਪਰਿਸ੍ਸਮਂ ਵਿਨੋਦੇਤ੍ਵਾ ਤਥਾ ਆਗਮਨਕਾਰਣਂ ਪੁਚ੍ਛਿਂਸੁ.

ਮਹਾਸਤ੍ਤੋ ਹਤ੍ਥਿਦਾਨਂ ਆਦਿਂ ਕਤ੍ਵਾ ਸਬ੍ਬਂ ਕਥੇਸਿ. ਤਂ ਸੁਤ੍ਵਾ ਤੇ ਅਤ੍ਤਨੋ ਰਜ੍ਜੇਨ ਨਿਮਨ੍ਤਯਿਂਸੁ. ਮਹਾਪੁਰਿਸੋ ‘‘ਮਯਾ ਤੁਮ੍ਹਾਕਂ ਰਜ੍ਜਂ ਪਟਿਗ੍ਗਹਿਤਮੇਵ ਹੋਤੁ, ਰਾਜਾ ਪਨ ਮਂ ਰਟ੍ਠਾ ਪਬ੍ਬਾਜੇਤਿ, ਤਸ੍ਮਾ ਵਙ੍ਕਪਬ੍ਬਤਮੇਵ ਗਮਿਸ੍ਸਾਮੀ’’ਤਿ ਵਤ੍ਵਾ ਤੇਹਿ ਨਾਨਪ੍ਪਕਾਰਂ ਤਤ੍ਥ ਵਾਸਂ ਯਾਚਿਯਮਾਨੋਪਿ ਤਂ ਅਨਲਙ੍ਕਰਿਤ੍ਵਾ ਤੇਹਿ ਗਹਿਤਾਰਕ੍ਖੋ ਤਂ ਰਤ੍ਤਿਂ ਸਾਲਾਯਮੇਵ ਵਸਿਤ੍ਵਾ ਪੁਨਦਿਵਸੇ ਪਾਤੋਵ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਤੇਹਿ ਪਰਿਵੁਤੋ ਨਿਕ੍ਖਮਿਤ੍ਵਾ ਪਨ੍ਨਰਸਯੋਜਨਮਗ੍ਗਂ ਗਨ੍ਤ੍ਵਾ ਵਨਦ੍ਵਾਰੇ ਠਤ੍ਵਾ ਤੇ ਨਿਵਤ੍ਤੇਤ੍ਵਾ ਪੁਰਤੋ ਪਨ੍ਨਰਸਯੋਜਨਮਗ੍ਗਂ ਤੇਹਿ ਆਚਿਕ੍ਖਿਤਨਿਯਾਮੇਨੇਵ ਅਗਮਾਸਿ. ਤੇਨ ਵੁਤ੍ਤਂ –

੧੦੫. ‘‘ਸਟ੍ਠਿਰਾਜਸਹਸ੍ਸਾਨਿ, ਤਦਾ ਵਸਨ੍ਤਿ ਮਾਤੁਲੇ;

ਸਬ੍ਬੇ ਪਞ੍ਜਲਿਕਾ ਹੁਤ੍ਵਾ, ਰੋਦਮਾਨਾ ਉਪਾਗਮੁਂ.

੧੦੬. ‘‘ਤਤ੍ਥ ਵਤ੍ਤੇਤ੍ਵਾ ਸਲ੍ਲਾਪਂ, ਚੇਤੇਹਿ ਚੇਤਪੁਤ੍ਤੇਹਿ;

ਤੇ ਤਤੋ ਨਿਕ੍ਖਮਿਤ੍ਵਾਨ, ਵਙ੍ਕਂ ਅਗਮੁ ਪਬ੍ਬਤ’’ਨ੍ਤਿ.

ਤਤ੍ਥ ਤਤ੍ਥ ਵਤ੍ਤੇਤ੍ਵਾ ਸਲ੍ਲਾਪਨ੍ਤਿ ਤਤ੍ਥ ਤੇਹਿ ਰਾਜੂਹਿ ਸਮਾਗਮੇਹਿ ਸਦ੍ਧਿਂ ਪਟਿਸਮ੍ਮੋਦਮਾਨਾ ਕਥਂ ਪਵਤ੍ਤੇਤ੍ਵਾ. ਚੇਤਪੁਤ੍ਤੇਹੀਤਿ ਚੇਤਰਾਜਪੁਤ੍ਤੇਹਿ. ਤੇ ਤਤੋ ਨਿਕ੍ਖਮਿਤ੍ਵਾਨਾਤਿ ਤੇ ਰਾਜਾਨੋ ਤਤੋ ਵਨਦ੍ਵਾਰਟ੍ਠਾਨੇ ਨਿਵਤ੍ਤੇਤ੍ਵਾ. ਵਙ੍ਕਂ ਅਗਮੁ ਪਬ੍ਬਤਨ੍ਤਿ ਅਮ੍ਹੇ ਚਤ੍ਤਾਰੋ ਜਨਾ ਵਙ੍ਕਪਬ੍ਬਤਂ ਉਦ੍ਦਿਸ੍ਸ ਅਗਮਮ੍ਹਾ.

ਅਥ ਮਹਾਸਤ੍ਤੋ ਤੇਹਿ ਆਚਿਕ੍ਖਿਤਮਗ੍ਗੇਨ ਗਚ੍ਛਨ੍ਤੋ ਗਨ੍ਧਮਾਦਨਪਬ੍ਬਤਂ ਪਤ੍ਵਾ ਤਂ ਦਿਵਸਂ ਤਤ੍ਥ ਵਸਿਤ੍ਵਾ ਤਤੋ ਉਤ੍ਤਰਦਿਸਾਭਿਮੁਖੋ ਵੇਪੁਲ੍ਲਪਬ੍ਬਤਪਾਦੇਨ ਗਨ੍ਤ੍ਵਾ ਕੇਤੁਮਤੀਨਦੀਤੀਰੇ ਨਿਸੀਦਿਤ੍ਵਾ ਵਨਚਰਕੇਨ ਦਿਨ੍ਨਂ ਮਧੁਮਂਸਂ ਖਾਦਿਤ੍ਵਾ ਤਸ੍ਸ ਸੁਵਣ੍ਣਸੂਚਿਂ ਦਤ੍ਵਾ ਨ੍ਹਤ੍ਵਾ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਨਦਿਂ ਉਤ੍ਤਰਿਤ੍ਵਾ ਸਾਨੁਪਬ੍ਬਤਸਿਖਰੇ ਠਿਤਸ੍ਸ ਨਿਗ੍ਰੋਧਸ੍ਸ ਮੂਲੇ ਥੋਕਂ ਨਿਸੀਦਿਤ੍ਵਾ ਉਟ੍ਠਾਯ ਗਚ੍ਛਨ੍ਤੋ ਨਾਲਿਕਪਬ੍ਬਤਂ ਪਰਿਹਰਨ੍ਤੋ ਮੁਚਲਿਨ੍ਦਸਰਂ ਗਨ੍ਤ੍ਵਾ ਸਰਤੀਰੇਨ ਪੁਬ੍ਬੁਤ੍ਤਰਕਣ੍ਣਂ ਪਤ੍ਵਾ ਏਕਪਦਿਕਮਗ੍ਗੇਨੇਵ ਵਨਘਟਂ ਪਵਿਸਿਤ੍ਵਾ ਤਂ ਅਤਿਕ੍ਕਮ੍ਮ ਗਿਰਿਵਿਦੁਗ੍ਗਾਨਂ ਨਦੀਪਭਵਾਨਂ ਪੁਰਤੋ ਚਤੁਰਸ੍ਸਪੋਕ੍ਖਰਣਿਂ ਪਾਪੁਣਿ.

੧੦੭. ਤਸ੍ਮਿਂ ਖਣੇ ਸਕ੍ਕੋ ਆਵਜ੍ਜੇਨ੍ਤੋ ‘‘ਮਹਾਸਤ੍ਤੋ ਹਿਮਵਨ੍ਤਂ ਪਵਿਟ੍ਠੋ, ਵਸਨਟ੍ਠਾਨਂ ਲਦ੍ਧੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਵਿਸ੍ਸਕਮ੍ਮਂ ਪੇਸੇਸਿ – ‘‘ਗਚ੍ਛ ਵਙ੍ਕਪਬ੍ਬਤਕੁਚ੍ਛਿਮ੍ਹਿ ਰਮਣੀਯੇ ਠਾਨੇ ਅਸ੍ਸਮਪਦਂ ਮਾਪੇਹੀ’’ਤਿ. ਸੋ ਤਤ੍ਥ ਦ੍ਵੇ ਪਣ੍ਣਸਾਲਾਯੋ ਦ੍ਵੇ ਚਙ੍ਕਮੇ ਦ੍ਵੇ ਚ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਮਾਪੇਤ੍ਵਾ ਤੇਸੁ ਤੇਸੁ ਠਾਨੇਸੁ ਨਾਨਾਪੁਪ੍ਫਵਿਚਿਤ੍ਤੇ ਰੁਕ੍ਖੇ ਫਲਿਤੇ ਰੁਕ੍ਖੇ ਪੁਪ੍ਫਗਚ੍ਛੇ ਕਦਲਿਵਨਾਦੀਨਿ ਚ ਦਸ੍ਸੇਤ੍ਵਾ ਸਬ੍ਬੇ ਪਬ੍ਬਜਿਤਪਰਿਕ੍ਖਾਰੇ ਪਟਿਯਾਦੇਤ੍ਵਾ ‘‘ਯੇਕੇਚਿ ਪਬ੍ਬਜਿਤੁਕਾਮਾ, ਤੇ ਗਣ੍ਹਨ੍ਤੂ’’ਤਿ ਅਕ੍ਖਰਾਨਿ ਲਿਖਿਤ੍ਵਾ ਅਮਨੁਸ੍ਸੇ ਚ ਭੇਰਵਸਦ੍ਦੇ ਮਿਗਪਕ੍ਖਿਨੋ ਚ ਪਟਿਕ੍ਕਮਾਪੇਤ੍ਵਾ ਸਕਟ੍ਠਾਨਮੇਵ ਗਤੋ.

ਮਹਾਸਤ੍ਤੋ ਏਕਪਦਿਕਮਗ੍ਗਂ ਦਿਸ੍ਵਾ ‘‘ਪਬ੍ਬਜਿਤਾਨਂ ਵਸਨਟ੍ਠਾਨਂ ਭਵਿਸ੍ਸਤੀ’’ਤਿ ਮਦ੍ਦਿਞ੍ਚ ਪੁਤ੍ਤੇ ਚ ਤਤ੍ਥੇਵ ਠਪੇਤ੍ਵਾ ਅਸ੍ਸਮਪਦਂ ਪਵਿਸਿਤ੍ਵਾ ਅਕ੍ਖਰਾਨਿ ਓਲੋਕੇਤ੍ਵਾ ‘‘ਸਕ੍ਕੇਨ ਦਿਨ੍ਨੋਸ੍ਮੀ’’ਤਿ ਪਣ੍ਣਸਾਲਦ੍ਵਾਰਂ ਵਿਵਰਿਤ੍ਵਾ ਪਵਿਟ੍ਠੋ ਖਗ੍ਗਞ੍ਚ ਧਨੁਞ੍ਚ ਅਪਨੇਤ੍ਵਾ ਸਾਟਕੇ ਓਮੁਞ੍ਚਿਤ੍ਵਾ ਇਸਿਵੇਸਂ ਗਹੇਤ੍ਵਾ ਕਤ੍ਤਰਦਣ੍ਡਂ ਆਦਾਯ ਨਿਕ੍ਖਮਿਤ੍ਵਾ ਪਚ੍ਚੇਕਬੁਦ੍ਧਸਦਿਸੇਨ ਉਪਸਮੇਨ ਦਾਰਕਾਨਂ ਸਨ੍ਤਿਕਂ ਅਗਮਾਸਿ. ਮਦ੍ਦਿਦੇਵੀਪਿ ਮਹਾਸਤ੍ਤਂ ਦਿਸ੍ਵਾ ਪਾਦੇਸੁ ਪਤਿਤ੍ਵਾ ਰੋਦਿਤ੍ਵਾ ਤੇਨੇਵ ਸਦ੍ਧਿਂ ਅਸ੍ਸਮਂ ਪਵਿਸਿਤ੍ਵਾ ਅਤ੍ਤਨੋ ਪਣ੍ਣਸਾਲਂ ਗਨ੍ਤ੍ਵਾ ਇਸਿਵੇਸਂ ਗਣ੍ਹਿ. ਪਚ੍ਛਾ ਪੁਤ੍ਤੇਪਿ ਤਾਪਸਕੁਮਾਰਕੇ ਕਰਿਂਸੁ. ਬੋਧਿਸਤ੍ਤੋ ਮਦ੍ਦਿਂ ਵਰਂ ਯਾਚਿ ‘‘ਮਯਂ ਇਤੋ ਪਟ੍ਠਾਯ ਪਬ੍ਬਜਿਤਾ ਨਾਮ, ਇਤ੍ਥੀ ਚ ਨਾਮ ਬ੍ਰਹ੍ਮਚਰਿਯਸ੍ਸ ਮਲਂ, ਮਾ ਦਾਨਿ ਅਕਾਲੇ ਮਮ ਸਨ੍ਤਿਕਂ ਆਗਚ੍ਛਾ’’ਤਿ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਮਹਾਸਤ੍ਤਮ੍ਪਿ ਵਰਂ ਯਾਚਿ ‘‘ਦੇਵ, ਤੁਮ੍ਹੇ ਪੁਤ੍ਤੇ ਗਹੇਤ੍ਵਾ ਇਧੇਵ ਹੋਥ, ਅਹਂ ਫਲਾਫਲਂ ਆਹਰਿਸ੍ਸਾਮੀ’’ਤਿ. ਸਾ ਤਤੋ ਪਟ੍ਠਾਯ ਅਰਞ੍ਞਤੋ ਫਲਾਫਲਾਨਿ ਆਹਰਿਤ੍ਵਾ ਤਯੋ ਜਨੇ ਪਟਿਜਗ੍ਗਿ. ਇਤਿ ਚਤ੍ਤਾਰੋ ਖਤ੍ਤਿਯਾ ਵਙ੍ਕਪਬ੍ਬਤਕੁਚ੍ਛਿਯਂ ਸਤ੍ਤਮਾਸਮਤ੍ਤਂ ਵਸਿਂਸੁ. ਤੇਨ ਵੁਤ੍ਤਂ ‘‘ਆਮਨ੍ਤਯਿਤ੍ਵਾ ਦੇਵਿਨ੍ਦੋ, ਵਿਸ੍ਸਕਮ੍ਮਂ ਮਹਿਦ੍ਧਿਕ’’ਨ੍ਤਿਆਦਿ.

ਤਤ੍ਥ ਆਮਨ੍ਤਯਿਤ੍ਵਾਤਿ ਪਕ੍ਕੋਸਾਪੇਤ੍ਵਾ. ਮਹਿਦ੍ਧਿਕਨ੍ਤਿ ਮਹਤਿਯਾ ਦੇਵਿਦ੍ਧਿਯਾ ਸਮਨ੍ਨਾਗਤਂ. ਅਸ੍ਸਮਂ ਸੁਕਤਨ੍ਤਿ ਅਸ੍ਸਮਪਦਂ ਸੁਕਤਂ ਕਤ੍ਵਾ. ਰਮ੍ਮਂ ਵੇਸ੍ਸਨ੍ਤਰਸ੍ਸ ਵਸਨਾਨੁਚ੍ਛਵਿਕਂ ਪਣ੍ਣਸਾਲਂ. ਸੁਮਾਪਯਾਤਿ ਸੁਟ੍ਠੁ ਮਾਪਯ. ਆਣਾਪੇਸੀਤਿ ਵਚਨਸੇਸੋ. ਸੁਮਾਪਯੀਤਿ ਸਮ੍ਮਾ ਮਾਪੇਸਿ.

੧੧੧. ਅਸੁਞ੍ਞੋਤਿ ਯਥਾ ਸੋ ਅਸ੍ਸਮੋ ਅਸੁਞ੍ਞੋ ਹੋਤਿ, ਏਵਂ ਤਸ੍ਸ ਅਸੁਞ੍ਞਭਾਵਕਰਣੇਨ ਅਸੁਞ੍ਞੋ ਹੋਮਿ. ‘‘ਅਸੁਞ੍ਞੇ’’ਤਿ ਵਾ ਪਾਠੋ, ਮਮ ਵਸਨੇਨੇਵ ਅਸੁਞ੍ਞੇ ਅਸ੍ਸਮੇ ਦਾਰਕੇ ਅਨੁਰਕ੍ਖਨ੍ਤੋ ਵਸਾਮਿ ਤਤ੍ਥ ਤਿਟ੍ਠਾਮਿ. ਬੋਧਿਸਤ੍ਤਸ੍ਸ ਮੇਤ੍ਤਾਨੁਭਾਵੇਨ ਸਮਨ੍ਤਾ ਤਿਯੋਜਨੇ ਸਬ੍ਬੇ ਤਿਰਚ੍ਛਾਨਾਪਿ ਮੇਤ੍ਤਂ ਪਟਿਲਭਿਂਸੁ.

ਏਵਂ ਤੇਸੁ ਤਤ੍ਥ ਵਸਨ੍ਤੇਸੁ ਕਲਿਙ੍ਗਰਟ੍ਠਵਾਸੀ ਜੂਜਕੋ ਨਾਮ ਬ੍ਰਾਹ੍ਮਣੋ ਅਮਿਤ੍ਤਤਾਪਨਾਯ ਨਾਮ ਭਰਿਯਾਯ ‘‘ਨਾਹਂ ਤੇ ਨਿਚ੍ਚਂ ਧਞ੍ਞਕੋਟ੍ਟਨਉਦਕਾਹਰਣਯਾਗੁਭਤ੍ਤਪਚਨਾਦੀਨਿ ਕਾਤੁਂ ਸਕ੍ਕੋਮਿ, ਪਰਿਚਾਰਕਂ ਮੇ ਦਾਸਂ ਵਾ ਦਾਸਿਂ ਵਾ ਆਨੇਹੀ’’ਤਿ ਵੁਤ੍ਤੇ ‘‘ਕੁਤੋਹਂ ਤੇ ਭੋਤਿ ਦੁਗ੍ਗਤੋ ਦਾਸਂ ਵਾ ਦਾਸਿਂ ਵਾ ਲਭਿਸ੍ਸਾਮੀ’’ਤਿ ਵਤ੍ਵਾ ਤਾਯ ‘‘ਏਸ ਵੇਸ੍ਸਨ੍ਤਰੋ ਰਾਜਾ ਵਙ੍ਕਪਬ੍ਬਤੇ ਵਸਤਿ. ਤਸ੍ਸ ਪੁਤ੍ਤੇ ਮਯ੍ਹਂ ਪਰਿਚਾਰਕੇ ਯਾਚਿਤ੍ਵਾ ਆਨੇਹੀ’’ਤਿ ਵੁਤ੍ਤੇ ਕਿਲੇਸਵਸੇਨ ਤਸ੍ਸਾ ਪਟਿਬਦ੍ਧਚਿਤ੍ਤਤਾਯ ਤਸ੍ਸਾ ਵਚਨਂ ਅਤਿਕ੍ਕਮਿਤੁਂ ਅਸਕ੍ਕੋਨ੍ਤੋ ਪਾਥੇਯ੍ਯਂ ਪਟਿਯਾਦਾਪੇਤ੍ਵਾ ਅਨੁਕ੍ਕਮੇਨ ਜੇਤੁਤ੍ਤਰਨਗਰਂ ਪਤ੍ਵਾ ‘‘ਕੁਹਿਂ ਵੇਸ੍ਸਨ੍ਤਰਮਹਾਰਾਜਾ’’ਤਿ ਪੁਚ੍ਛਿ.

ਮਹਾਜਨੋ ‘‘ਇਮੇਸਂ ਯਾਚਕਾਨਂ ਅਤਿਦਾਨੇਨ ਅਮ੍ਹਾਕਂ ਰਾਜਾ ਰਟ੍ਠਾ ਪਬ੍ਬਾਜਿਤੋ, ਏਵਂ ਅਮ੍ਹਾਕਂ ਰਾਜਾਨਂ ਨਾਸੇਤ੍ਵਾ ਪੁਨਪਿ ਇਧੇਵ ਆਗਚ੍ਛਤੀ’’ਤਿ ਲੇਡ੍ਡੁਦਣ੍ਡਾਦਿਹਤ੍ਥੋ ਉਪਕ੍ਕੋਸਨ੍ਤੋ ਬ੍ਰਾਹ੍ਮਣਂ ਅਨੁਬਨ੍ਧਿ. ਸੋ ਦੇਵਤਾਵਿਗ੍ਗਹਿਤੋ ਹੁਤ੍ਵਾ ਤਤੋ ਨਿਕ੍ਖਮਿਤ੍ਵਾ ਵਙ੍ਕਪਬ੍ਬਤਗਾਮਿਮਗ੍ਗਂ ਅਭਿਰੁਲ਼੍ਹੋ ਅਨੁਕ੍ਕਮੇਨ ਵਨਦ੍ਵਾਰਂ ਪਤ੍ਵਾ ਮਹਾਵਨਂ ਅਜ੍ਝੋਗਾਹੇਤ੍ਵਾ ਮਗ੍ਗਮੂਲ਼੍ਹੋ ਹੁਤ੍ਵਾ ਵਿਚਰਨ੍ਤੋ ਤੇਹਿ ਰਾਜੂਹਿ ਬੋਧਿਸਤ੍ਤਸ੍ਸ ਆਰਕ੍ਖਣਤ੍ਥਾਯ ਠਪਿਤੇਨ ਚੇਤਪੁਤ੍ਤੇਨ ਸਮਾਗਞ੍ਛਿ. ਤੇਨ ‘‘ਕਹਂ, ਭੋ ਬ੍ਰਾਹ੍ਮਣ, ਗਚ੍ਛਸੀ’’ਤਿ ਪੁਟ੍ਠੋ ‘‘ਵੇਸ੍ਸਨ੍ਤਰਮਹਾਰਾਜਸ੍ਸ ਸਨ੍ਤਿਕ’’ਨ੍ਤਿ ਵੁਤ੍ਤੇ ‘‘ਅਦ੍ਧਾ ਅਯਂ ਬ੍ਰਾਹ੍ਮਣੋ ਤਸ੍ਸ ਪੁਤ੍ਤੇ ਵਾ ਦੇਵਿਂ ਵਾ ਯਾਚਿਤੁਂ ਗਚ੍ਛਤੀ’’ਤਿ ਚਿਨ੍ਤੇਤ੍ਵਾ ‘‘ਮਾ ਖੋ, ਤ੍ਵਂ ਬ੍ਰਾਹ੍ਮਣ, ਤਤ੍ਥ ਗਞ੍ਛਿ, ਸਚੇ ਗਚ੍ਛਸਿ, ਏਤ੍ਥੇਵ ਤੇ ਸੀਸਂ ਛਿਨ੍ਦਿਤ੍ਵਾ ਮਯ੍ਹਂ ਸੁਨਖਾਨਂ ਘਾਸਂ ਕਰਿਸ੍ਸਾਮੀ’’ਤਿ ਤੇਨ ਸਨ੍ਤਜ੍ਜਿਤੋ ਮਰਣਭਯਭੀਤੋ ‘‘ਅਹਮਸ੍ਸ ਪਿਤਰਾ ਪੇਸਿਤੋ ਦੂਤੋ, ‘ਤਂ ਆਨੇਸ੍ਸਾਮੀ’ਤਿ ਆਗਤੋ’’ਤਿ ਮੁਸਾਵਾਦਂ ਅਭਾਸਿ. ਤਂ ਸੁਤ੍ਵਾ ਚੇਤਪੁਤ੍ਤੋ ਤੁਟ੍ਠਹਟ੍ਠੋ ਬ੍ਰਾਹ੍ਮਣਸ੍ਸ ਸਕ੍ਕਾਰਸਮ੍ਮਾਨਂ ਕਤ੍ਵਾ ਵਙ੍ਕਪਬ੍ਬਤਗਾਮਿਮਗ੍ਗਂ ਆਚਿਕ੍ਖਿ. ਸੋ ਤਤੋ ਪਰਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਅਚ੍ਚੁਤੇਨ ਨਾਮ ਤਾਪਸੇਨ ਸਦ੍ਧਿਂ ਸਮਾਗਨ੍ਤ੍ਵਾ ਤਮ੍ਪਿ ਮਗ੍ਗਂ ਪੁਚ੍ਛਿਤ੍ਵਾ ਤੇਨਾਪਿ ਮਗ੍ਗੇ ਆਚਿਕ੍ਖਿਤੇ ਤੇਨ ਆਚਿਕ੍ਖਿਤਸਞ੍ਞਾਯ ਮਗ੍ਗਂ ਗਚ੍ਛਨ੍ਤੋ ਅਨੁਕ੍ਕਮੇਨ ਬੋਧਿਸਤ੍ਤਸ੍ਸ ਅਸ੍ਸਮਪਦਟ੍ਠਾਨਸਮੀਪਂ ਗਨ੍ਤ੍ਵਾ ਮਦ੍ਦਿਦੇਵਿਯਾ ਫਲਾਫਲਤ੍ਥਂ ਗਤਕਾਲੇ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਉਭੋ ਦਾਰਕੇ ਯਾਚਿ. ਤੇਨ ਵੁਤ੍ਤਂ –

੧੧੨. ‘‘ਪਵਨੇ ਵਸਮਾਨਸ੍ਸ, ਅਦ੍ਧਿਕੋ ਮਂ ਉਪਾਗਮਿ;

ਅਯਾਚਿ ਪੁਤ੍ਤਕੇ ਮਯ੍ਹਂ, ਜਾਲਿਂ ਕਣ੍ਹਾਜਿਨਂ ਚੁਭੋ’’ਤਿ.

ਏਵਂ ਬ੍ਰਾਹ੍ਮਣੇਨ ਦਾਰਕੇਸੁ ਯਾਚਿਤੇਸੁ ਮਹਾਸਤ੍ਤੋ ‘‘ਚਿਰਸ੍ਸਂ ਵਤ ਮੇ ਯਾਚਕੋ ਅਧਿਗਤੋ, ਅਜ੍ਜਾਹਂ ਅਨਵਸੇਸਤੋ ਦਾਨਪਾਰਮਿਂ ਪੂਰੇਸ੍ਸਾਮੀ’’ਤਿ ਅਧਿਪ੍ਪਾਯੇਨ ਸੋਮਨਸ੍ਸਜਾਤੋ ਪਸਾਰਿਤਹਤ੍ਥੇ ਸਹਸ੍ਸਤ੍ਥਵਿਕਂ ਠਪੇਨ੍ਤੋ ਵਿਯ ਬ੍ਰਾਹ੍ਮਣਸ੍ਸ ਚਿਤ੍ਤਂ ਪਰਿਤੋਸੇਨ੍ਤੋ ਸਕਲਞ੍ਚ ਤਂ ਪਬ੍ਬਤਕੁਚ੍ਛਿਂ ਉਨ੍ਨਾਦੇਨ੍ਤੋ ‘‘ਦਦਾਮਿ ਤਵ ਮਯ੍ਹਂ ਪੁਤ੍ਤਕੇ, ਅਪਿ ਚ ਮਦ੍ਦਿਦੇਵੀ ਪਨ ਪਾਤੋਵ ਫਲਾਫਲਤ੍ਥਾਯ ਵਨਂ ਗਨ੍ਤ੍ਵਾ ਸਾਯਂ ਆਗਮਿਸ੍ਸਤਿ, ਤਾਯ ਆਗਤਾਯ ਤੇ ਪੁਤ੍ਤਕੇ ਦਸ੍ਸੇਤ੍ਵਾ ਤ੍ਵਞ੍ਚ ਮੂਲਫਲਾਫਲਂ ਖਾਦਿਤ੍ਵਾ ਏਕਰਤ੍ਤਿਂ ਵਸਿਤ੍ਵਾ ਵਿਗਤਪਰਿਸ੍ਸਮੋ ਪਾਤੋਵ ਗਮਿਸ੍ਸਸੀ’’ਤਿ ਆਹ. ਬ੍ਰਾਹ੍ਮਣੋ ‘‘ਕਾਮਞ੍ਚੇਸ ਉਲ਼ਾਰਜ੍ਝਾਸਯਤਾਯ ਪੁਤ੍ਤਕੇ ਦਦਾਤਿ, ਮਾਤਾ ਪਨ ਵਚ੍ਛਗਿਦ੍ਧਾ ਆਗਨ੍ਤ੍ਵਾ ਦਾਨਸ੍ਸ ਅਨ੍ਤਰਾਯਮ੍ਪਿ ਕਰੇਯ੍ਯ, ਯਂਨੂਨਾਹਂ ਇਮਂ ਨਿਪ੍ਪੀਲ਼ੇਤ੍ਵਾ ਦਾਰਕੇ ਗਹੇਤ੍ਵਾ ਅਜ੍ਜੇਵ ਗਚ੍ਛੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ‘‘ਪੁਤ੍ਤਾ ਚੇ ਤੇ ਮਯ੍ਹਂ ਦਿਨ੍ਨਾ, ਕਿਂ ਦਾਨਿ ਮਾਤਰਂ ਦਸ੍ਸੇਤ੍ਵਾ ਪੇਸਿਤੇਹਿ, ਦਾਰਕੇ ਗਹੇਤ੍ਵਾ ਅਜ੍ਜੇਵ ਗਮਿਸ੍ਸਾਮੀ’’ਤਿ ਆਹ. ‘‘ਸਚੇ, ਤ੍ਵਂ ਬ੍ਰਾਹ੍ਮਣ, ਰਾਜਪੁਤ੍ਤਿਂ ਮਾਤਰਂ ਦਟ੍ਠੁਂ ਨ ਇਚ੍ਛਸਿ, ਇਮੇ ਦਾਰਕੇ ਗਹੇਤ੍ਵਾ ਜੇਤੁਤ੍ਤਰਨਗਰਂ ਗਚ੍ਛ, ਤਤ੍ਥ ਸਞ੍ਜਯਮਹਾਰਾਜਾ ਦਾਰਕੇ ਗਹੇਤ੍ਵਾ ਮਹਨ੍ਤਂ ਤੇ ਧਨਂ ਦਸ੍ਸਤਿ, ਤੇਨ ਦਾਸਦਾਸਿਯੋ ਗਣ੍ਹਿਸ੍ਸਸਿ, ਸੁਖਞ੍ਚ ਜੀਵਿਸ੍ਸਸਿ, ਅਞ੍ਞਥਾ ਇਮੇ ਸੁਖੁਮਾਲਾ ਰਾਜਦਾਰਕਾ, ਕਿਂ ਤੇ ਵੇਯ੍ਯਾਵਚ੍ਚਂ ਕਰਿਸ੍ਸਨ੍ਤੀ’’ਤਿ ਆਹ.

ਬ੍ਰਾਹ੍ਮਣੋ ‘‘ਏਵਮ੍ਪਿ ਮਯਾ ਨ ਸਕ੍ਕਾ ਕਾਤੁਂ, ਰਾਜਦਣ੍ਡਤੋ ਭਾਯਾਮਿ, ਮਯ੍ਹਮੇਵ ਗਾਮਂ ਨੇਸ੍ਸਾਮੀ’’ਤਿ ਆਹ. ਇਮਂ ਤੇਸਂ ਕਥਾਸਲ੍ਲਾਪਂ ਸੁਤ੍ਵਾ ਦਾਰਕਾ ‘‘ਪਿਤਾ ਨੋ ਖੋ ਅਮ੍ਹੇ ਬ੍ਰਾਹ੍ਮਣਸ੍ਸ ਦਾਤੁਕਾਮੋ’’ਤਿ ਪਕ੍ਕਮਿਤ੍ਵਾ ਪੋਕ੍ਖਰਣਿਂ ਗਨ੍ਤ੍ਵਾ ਪਦੁਮਿਨਿਗਚ੍ਛੇ ਨਿਲੀਯਿਂਸੁ. ਬ੍ਰਾਹ੍ਮਣੋ ਤੇ ਅਦਿਸ੍ਵਾਵ ‘‘ਤ੍ਵਂ ‘ਦਾਰਕੇ ਦਦਾਮੀ’ਤਿ ਵਤ੍ਵਾ ਤੇ ਅਪਕ੍ਕਮਾਪੇਸਿ, ਏਸੋ ਤੇ ਸਾਧੁਭਾਵੋ’’ਤਿ ਆਹ. ਅਥ ਮਹਾਸਤ੍ਤੋ ਸਹਸਾਵ ਉਟ੍ਠਹਿਤ੍ਵਾ ਦਾਰਕੇ ਗਵੇਸਨ੍ਤੋ ਪਦੁਮਿਨਿਗਚ੍ਛੇ ਨਿਲੀਨੇ ਦਿਸ੍ਵਾ ‘‘ਏਥ, ਤਾਤਾ, ਮਾ ਮਯ੍ਹਂ ਦਾਨਪਾਰਮਿਯਾ ਅਨ੍ਤਰਾਯਂ ਅਕਤ੍ਥ, ਮਮ ਦਾਨਜ੍ਝਾਸਯਂ ਮਤ੍ਥਕਂ ਪਾਪੇਥ, ਅਯਞ੍ਚ ਬ੍ਰਾਹ੍ਮਣੋ ਤੁਮ੍ਹੇ ਗਹੇਤ੍ਵਾ ਤੁਮ੍ਹਾਕਂ ਅਯ੍ਯਕਸ੍ਸ ਸਞ੍ਜਯਮਹਾਰਾਜਸ੍ਸ ਸਨ੍ਤਿਕਂ ਗਮਿਸ੍ਸਤਿ, ਤਾਤ ਜਾਲਿ, ਤ੍ਵਂ ਭੁਜਿਸ੍ਸੋ ਹੋਤੁਕਾਮੋ ਬ੍ਰਾਹ੍ਮਣਸ੍ਸ ਨਿਕ੍ਖਸਹਸ੍ਸਂ ਦਤ੍ਵਾ ਭੁਜਿਸ੍ਸੋ ਭਵੇਯ੍ਯਾਸਿ, ਕਣ੍ਹਾਜਿਨੇ ਤ੍ਵਂ ਦਾਸਸਤਂ ਦਾਸਿਸਤਂ ਹਤ੍ਥਿਸਤਂ ਅਸ੍ਸਸਤਂ ਉਸਭਸਤਂ ਨਿਕ੍ਖਸਤਨ੍ਤਿ ਸਬ੍ਬਸਤਂ ਦਤ੍ਵਾ ਭੁਜਿਸ੍ਸਾ ਭਵੇਯ੍ਯਾਸੀ’’ਤਿ ਕੁਮਾਰੇ ਅਗ੍ਘਾਪੇਤ੍ਵਾ ਸਮਸ੍ਸਾਸੇਤ੍ਵਾ ਗਹੇਤ੍ਵਾ ਅਸ੍ਸਮਪਦਂ ਗਨ੍ਤ੍ਵਾ ਕਮਣ੍ਡਲੁਨਾ ਉਦਕਂ ਗਹੇਤ੍ਵਾ ਸਬ੍ਬਞ੍ਞੁਤਞ੍ਞਾਣਸ੍ਸ ਪਚ੍ਚਯਂ ਕਤ੍ਵਾ ਬ੍ਰਾਹ੍ਮਣਸ੍ਸ ਹਤ੍ਥੇ ਉਦਕਂ ਪਾਤੇਤ੍ਵਾ ਅਤਿਵਿਯ ਪੀਤਿਸੋਮਨਸ੍ਸਜਾਤੋ ਹੁਤ੍ਵਾ ਪਥਵਿਂ ਉਨ੍ਨਾਦੇਨ੍ਤੋ ਪਿਯਪੁਤ੍ਤਦਾਨਂ ਅਦਾਸਿ. ਇਧਾਪਿ ਪੁਬ੍ਬੇ ਵੁਤ੍ਤਨਯੇਨੇਵ ਪਥਵਿਕਮ੍ਪਾਦਯੋ ਅਹੇਸੁਂ. ਤੇਨ ਵੁਤ੍ਤਂ –

੧੧੩. ‘‘ਯਾਚਕਂ ਉਪਗਤਂ ਦਿਸ੍ਵਾ, ਹਾਸੋ ਮੇ ਉਪਪਜ੍ਜਥ;

ਉਭੋ ਪੁਤ੍ਤੇ ਗਹੇਤ੍ਵਾਨ, ਅਦਾਸਿਂ ਬ੍ਰਾਹ੍ਮਣੇ ਤਦਾ.

੧੧੪. ‘‘ਸਕੇ ਪੁਤ੍ਤੇ ਚਜਨ੍ਤਸ੍ਸ, ਜੂਜਕੇ ਬ੍ਰਾਹ੍ਮਣੇ ਯਦਾ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ’’ਤਿ.

ਅਥ ਬ੍ਰਾਹ੍ਮਣੋ ਦਾਰਕੇ ਅਗਨ੍ਤੁਕਾਮੇ ਲਤਾਯ ਹਤ੍ਥੇਸੁ ਬਨ੍ਧਿਤ੍ਵਾ ਆਕਡ੍ਢਿ. ਤੇਸਂ ਬਨ੍ਧਟ੍ਠਾਨੇ ਛਵਿਂ ਛਿਨ੍ਦਿਤ੍ਵਾ ਲੋਹਿਤਂ ਪਗ੍ਘਰਿ. ਸੋ ਲਤਾਦਣ੍ਡੇਨ ਪਹਰਨ੍ਤੋ ਆਕਡ੍ਢਿ. ਤੇ ਪਿਤਰਂ ਓਲੋਕੇਤ੍ਵਾ.

‘‘ਅਮ੍ਮਾ ਚ ਤਾਤ ਨਿਕ੍ਖਨ੍ਤਾ, ਤ੍ਵਞ੍ਚ ਨੋ ਤਾਤ ਦਸ੍ਸਸਿ;

ਮਾ ਨੋ ਤ੍ਵਂ ਤਾਤ ਅਦਦਾ, ਯਾਵ ਅਮ੍ਮਾਪਿ ਏਤੁ ਨੋ;

ਤਦਾਯਂ ਬ੍ਰਾਹ੍ਮਣੋ ਕਾਮਂ, ਵਿਕ੍ਕਿਣਾਤੁ ਹਨਾਤੁ ਵਾ’’ਤਿ. (ਜਾ. ੨.੨੨.੨੧੨੬) –

ਵਤ੍ਵਾ ਪੁਨਪਿ ਅਯਂ ਏਵਰੂਪੋ ਘੋਰਦਸ੍ਸਨੋ ਕੁਰੂਰਕਮ੍ਮਨ੍ਤੋ –

‘‘ਮਨੁਸ੍ਸੋ ਉਦਾਹੁ ਯਕ੍ਖੋ, ਮਂਸਲੋਹਿਤਭੋਜਨੋ;

ਗਾਮਾ ਅਰਞ੍ਞਮਾਗਮ੍ਮ, ਧਨਂ ਤਂ ਤਾਤ ਯਾਚਤਿ;

ਨੀਯਮਾਨੇ ਪਿਸਾਚੇਨ, ਕਿਂ ਨੁ ਤਾਤ ਉਦਿਕ੍ਖਸੀ’’ਤਿ. (ਜਾ. ੨.੨੨.੨੧੩੦-੨੧੩੧) –

ਆਦੀਨਿ ਵਦਨ੍ਤਾ ਪਰਿਦੇਵਿਂਸੁ. ਤਤ੍ਥ ਧਨਨ੍ਤਿ ਪੁਤ੍ਤਧਨਂ.

ਜੂਜਕੋ ਦਾਰਕੇ ਤਥਾ ਪਰਿਦੇਵਨ੍ਤੇਯੇਵ ਪੋਥੇਨ੍ਤੋਵ ਗਹੇਤ੍ਵਾ ਪਕ੍ਕਾਮਿ. ਮਹਾਸਤ੍ਤਸ੍ਸ ਦਾਰਕਾਨਂ ਕਰੁਣਂ ਪਰਿਦੇਵਿਤੇਨ ਤਸ੍ਸ ਚ ਬ੍ਰਾਹ੍ਮਣਸ੍ਸ ਅਕਾਰੁਞ੍ਞਭਾਵੇਨ ਬਲਵਸੋਕੋ ਉਪ੍ਪਜ੍ਜਿ, ਵਿਪ੍ਪਟਿਸਾਰੋ ਚ ਉਦਪਾਦਿ. ਸੋ ਤਙ੍ਖਣਞ੍ਞੇਵ ਬੋਧਿਸਤ੍ਤਾਨਂ ਪਵੇਣਿਂ ਅਨੁਸ੍ਸਰਿ. ‘‘ਸਬ੍ਬੇਵ ਹਿ ਬੋਧਿਸਤ੍ਤਾ ਪਞ੍ਚ ਮਹਾਪਰਿਚ੍ਚਾਗੇ ਪਰਿਚ੍ਚਜਿਤ੍ਵਾ ਬੁਦ੍ਧਾ ਭਵਿਸ੍ਸਨ੍ਤਿ, ਅਹਮ੍ਪਿ ਤੇਸਂ ਅਬ੍ਭਨ੍ਤਰੋ, ਪੁਤ੍ਤਦਾਨਞ੍ਚ ਮਹਾਪਰਿਚ੍ਚਾਗਾਨਂ ਅਞ੍ਞਤਰਂ, ਤਸ੍ਮਾ ਵੇਸ੍ਸਨ੍ਤਰ ਦਾਨਂ ਦਤ੍ਵਾ ਪਚ੍ਛਾਨੁਤਾਪੋ ਨ ਤੇ ਅਨੁਚ੍ਛਵਿਕੋ’’ਤਿ ਅਤ੍ਤਾਨਂ ਪਰਿਭਾਸੇਤ੍ਵਾ ‘‘ਦਿਨ੍ਨਕਾਲਤੋ ਪਟ੍ਠਾਯ ਮਮ ਤੇ ਨ ਕਿਞ੍ਚਿ ਹੋਨ੍ਤੀ’’ਤਿ ਅਤ੍ਤਾਨਂ ਉਪਤ੍ਥਮ੍ਭੇਤ੍ਵਾ ਦਲ਼੍ਹਸਮਾਦਾਨਂ ਅਧਿਟ੍ਠਾਯ ਪਣ੍ਣਸਾਲਦ੍ਵਾਰੇ ਪਾਸਾਣਫਲਕੇ ਕਞ੍ਚਨਪਟਿਮਾ ਵਿਯ ਨਿਸੀਦਿ.

ਅਥ ਮਦ੍ਦਿਦੇਵੀ ਅਰਞ੍ਞਤੋ ਫਲਾਫਲਂ ਗਹੇਤ੍ਵਾ ਨਿਵਤ੍ਤਨ੍ਤੀ ‘‘ਮਾ ਮਹਾਸਤ੍ਤਸ੍ਸ ਦਾਨਨ੍ਤਰਾਯੋ ਹੋਤੂ’’ਤਿ ਵਾਲ਼ਮਿਗਰੂਪਧਰਾਹਿ ਦੇਵਤਾਹਿ ਉਪਰੁਦ੍ਧਮਗ੍ਗਾ ਤੇਸੁ ਅਪਗਤੇਸੁ ਚਿਰੇਨ ਅਸ੍ਸਮਂ ਪਤ੍ਵਾ ‘‘ਅਜ੍ਜ ਮੇ ਦੁਸ੍ਸੁਪਿਨਂ ਦਿਟ੍ਠਂ, ਦੁਨ੍ਨਿਮਿਤ੍ਤਾਨਿ ਚ ਉਪ੍ਪਨ੍ਨਾਨਿ, ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਚਿਨ੍ਤੇਨ੍ਤੀ ਅਸ੍ਸਮਂ ਪਵਿਸਿਤ੍ਵਾ ਪੁਤ੍ਤਕੇ ਅਪਸ੍ਸਨ੍ਤੀ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਦੇਵ, ਨ ਖੋ ਅਮ੍ਹਾਕਂ ਪੁਤ੍ਤਕੇ ਪਸ੍ਸਾਮਿ, ਕੁਹਿਂ ਤੇ ਗਤਾ’’ਤਿ ਆਹ. ਸੋ ਤੁਣ੍ਹੀ ਅਹੋਸਿ. ਸਾ ਪੁਤ੍ਤਕੇ ਉਪਧਾਰੇਨ੍ਤੀ ਤਹਿਂ ਤਹਿਂ ਉਪਧਾਵਿਤ੍ਵਾ ਗਵੇਸਨ੍ਤੀ ਅਦਿਸ੍ਵਾ ਪੁਨਪਿ ਗਨ੍ਤ੍ਵਾ ਪੁਚ੍ਛਿ. ਬੋਧਿਸਤ੍ਤੋ ‘‘ਕਕ੍ਖਲ਼ਕਥਾਯ ਨਂ ਪੁਤ੍ਤਸੋਕਂ ਜਹਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ –

‘‘ਨੂਨ ਮਦ੍ਦੀ ਵਰਾਰੋਹਾ, ਰਾਜਪੁਤ੍ਤੀ ਯਸਸ੍ਸਿਨੀ;

ਪਾਤੋ ਗਤਾਸਿ ਉਞ੍ਛਾਯ, ਕਿਮਿਦਂ ਸਾਯਮਾਗਤਾ’’ਤਿ. (ਜਾ. ੨.੨੨.੨੨੨੫) –

ਵਤ੍ਵਾ ਤਾਯ ਚਿਰਾਯਨਕਾਰਣੇ ਕਥਿਤੇ ਪੁਨਪਿ ਦਾਰਕੇ ਸਨ੍ਧਾਯ ਨ ਕਿਞ੍ਚਿ ਆਹ. ਸਾ ਪੁਤ੍ਤਸੋਕੇਨ ਤੇ ਉਪਧਾਰੇਨ੍ਤੀ ਪੁਨਪਿ ਵਾਤਵੇਗੇਨ ਵਨਾਨਿ ਵਿਚਰਿ. ਤਾਯ ਏਕਰਤ੍ਤਿਯਂ ਵਿਚਰਿਤਟ੍ਠਾਨਂ ਪਰਿਗ੍ਗਣ੍ਹਨ੍ਤਂ ਪਨ੍ਨਰਸਯੋਜਨਮਤ੍ਤਂ ਅਹੋਸਿ. ਅਥ ਵਿਭਾਤਾਯ ਰਤ੍ਤਿਯਾ ਮਹਾਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਠਿਤਾ ਦਾਰਕਾਨਂ ਅਦਸ੍ਸਨੇਨ ਬਲਵਸੋਕਾਭਿਭੂਤਾ ਤਸ੍ਸ ਪਾਦਮੂਲੇ ਛਿਨ੍ਨਕਦਲੀ ਵਿਯ ਭੂਮਿਯਂ ਵਿਸਞ੍ਞੀ ਹੁਤ੍ਵਾ ਪਤਿ. ਸੋ ‘‘ਮਤਾ’’ਤਿ ਸਞ੍ਞਾਯ ਕਮ੍ਪਮਾਨੋ ਉਪ੍ਪਨ੍ਨਬਲਵਸੋਕੋਪਿ ਸਤਿਂ ਪਚ੍ਚੁਪਟ੍ਠਪੇਤ੍ਵਾ ‘‘ਜਾਨਿਸ੍ਸਾਮਿ ਤਾਵ ਜੀਵਤਿ, ਨ ਜੀਵਤੀ’’ਤਿ ਸਤ੍ਤਮਾਸੇ ਕਾਯਸਂਸਗ੍ਗਂ ਅਨਾਪਨ੍ਨਪੁਬ੍ਬੋਪਿ ਅਞ੍ਞਸ੍ਸ ਅਭਾਵੇਨ ਤਸ੍ਸਾ ਸੀਸਂ ਉਕ੍ਖਿਪਿਤ੍ਵਾ ਊਰੂਸੁ ਠਪੇਤ੍ਵਾ ਉਦਕੇਨ ਪਰਿਪ੍ਫੋਸਿਤ੍ਵਾ ਉਰਞ੍ਚ ਮੁਖਞ੍ਚ ਹਦਯਞ੍ਚ ਪਰਿਮਜ੍ਜਿ. ਮਦ੍ਦੀਪਿ ਖੋ ਥੋਕਂ ਵੀਤਿਨਾਮੇਤ੍ਵਾ ਸਤਿਂ ਪਟਿਲਭਿਤ੍ਵਾ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ‘‘ਦੇਵ, ਦਾਰਕਾ ਤੇ ਕੁਹਿਂ ਗਤਾ’’ਤਿ ਪੁਚ੍ਛਿ. ਸੋ ਆਹ – ‘‘ਦੇਵਿ, ਏਕਸ੍ਸ ਮੇ ਬ੍ਰਾਹ੍ਮਣਸ੍ਸ ਮਂ ਯਾਚਿਤ੍ਵਾ ਆਗਤਸ੍ਸ ਦਾਸਤ੍ਥਾਯ ਦਿਨ੍ਨਾ’’ਤਿ ਵਤ੍ਵਾ ਤਾਯ ‘‘ਕਸ੍ਮਾ, ਦੇਵ, ਪੁਤ੍ਤੇ ਬ੍ਰਾਹ੍ਮਣਸ੍ਸ ਦਤ੍ਵਾ ਮਮ ਸਬ੍ਬਰਤ੍ਤਿਂ ਪਰਿਦੇਵਿਤ੍ਵਾ ਵਿਚਰਨ੍ਤਿਯਾ ਨਾਚਿਕ੍ਖੀ’’ਤਿ ਵੁਤ੍ਤੇ ‘‘ਪਠਮਮੇਵ ਵੁਤ੍ਤੇ ਤਵ ਚਿਤ੍ਤਦੁਕ੍ਖਂ ਬਹੁ ਭਵਿਸ੍ਸਤਿ, ਇਦਾਨਿ ਪਨ ਸਰੀਰਦੁਕ੍ਖੇਨ ਤਨੁਕਂ ਭਵਿਸ੍ਸਤੀ’’ਤਿ ਵਤ੍ਵਾ –

‘‘ਮਂ ਪਸ੍ਸ ਮਦ੍ਦਿ ਮਾ ਪੁਤ੍ਤੇ, ਮਾ ਬਾਲ਼੍ਹਂ ਪਰਿਦੇਵਸਿ;

ਲਚ੍ਛਾਮ ਪੁਤ੍ਤੇ ਜੀਵਨ੍ਤਾ, ਅਰੋਗਾ ਚ ਭਵਾਮਸੇ’’ਤਿ. (ਜਾ. ੨.੨੨.੨੨੬੦) –

ਸੋ ਸਮਸ੍ਸਾਸੇਤ੍ਵਾ ਪੁਨ –

‘‘ਪੁਤ੍ਤੇ ਪਸੁਞ੍ਚ ਧਞ੍ਞਞ੍ਚ, ਯਞ੍ਚ ਅਞ੍ਞਂ ਘਰੇ ਧਨਂ;

ਦਜ੍ਜਾ ਸਪ੍ਪੁਰਿਸੋ ਦਾਨਂ, ਦਿਸ੍ਵਾ ਯਾਚਕਮਾਗਤਂ;

ਅਨੁਮੋਦਾਹਿ ਮੇ ਮਦ੍ਦਿ, ਪੁਤ੍ਤਕੇ ਦਾਨਮੁਤ੍ਤਮ’’ਨ੍ਤਿ. (ਜਾ. ੨.੨੨.੨੨੬੧) –

ਵਤ੍ਵਾ ਅਤ੍ਤਨੋ ਪੁਤ੍ਤਦਾਨਂ ਤਂ ਅਨੁਮੋਦਾਪੇਸਿ.

ਸਾਪਿ –

‘‘ਅਨੁਮੋਦਾਮਿ ਤੇ ਦੇਵ, ਪੁਤ੍ਤਕੇ ਦਾਨਮੁਤ੍ਤਮਂ;

ਦਤ੍ਵਾ ਚਿਤ੍ਤਂ ਪਸਾਦੇਹਿ, ਭਿਯ੍ਯੋ ਦਾਨਂ ਦਦੋ ਭਵਾ’’ਤਿ. (ਜਾ. ੨.੨੨.੨੨੬੨) –

ਵਤ੍ਵਾ ਅਨੁਮੋਦਿ.

ਏਵਂ ਤੇਸੁ ਅਞ੍ਞਮਞ੍ਞਂ ਸਮ੍ਮੋਦਨੀਯਂ ਕਥਂ ਕਥੇਨ੍ਤੇਸੁ ਸਕ੍ਕੋ ਚਿਨ੍ਤੇਸਿ – ‘‘ਮਹਾਪੁਰਿਸੋ ਹਿਯ੍ਯੋ ਜੂਜਕਸ੍ਸ ਪਥਵਿਂ ਉਨ੍ਨਾਦੇਤ੍ਵਾ ਦਾਰਕੇ ਅਦਾਸਿ. ਇਦਾਨਿ ਨਂ ਕੋਚਿ ਹੀਨਪੁਰਿਸੋ ਉਪਸਙ੍ਕਮਿਤ੍ਵਾ ਮਦ੍ਦਿਦੇਵਿਂ ਯਾਚਿਤ੍ਵਾ ਗਹੇਤ੍ਵਾ ਗਚ੍ਛੇਯ੍ਯ, ਤਤੋ ਰਾਜਾ ਨਿਪ੍ਪਚ੍ਚਯੋ ਭਵੇਯ੍ਯ, ਹਨ੍ਦਾਹਂ ਬ੍ਰਾਹ੍ਮਣਵਣ੍ਣੇਨ ਨਂ ਉਪਸਙ੍ਕਮਿਤ੍ਵਾ ਮਦ੍ਦਿਂ ਯਾਚਿਤ੍ਵਾ ਪਾਰਮਿਕੂਟਂ ਗਾਹਾਪੇਤ੍ਵਾ ਕਸ੍ਸਚਿ ਅਵਿਸ੍ਸਜ੍ਜਿਯਂ ਕਤ੍ਵਾ ਪੁਨ ਨਂ ਤਸ੍ਸੇਵ ਦਤ੍ਵਾ ਆਗਮਿਸ੍ਸਾਮੀ’’ਤਿ. ਸੋ ਸੂਰਿਯੁਗ੍ਗਮਨਵੇਲਾਯਂ ਬ੍ਰਾਹ੍ਮਣਵਣ੍ਣੇਨ ਤਸ੍ਸ ਸਨ੍ਤਿਕਂ ਅਗਮਾਸਿ. ਤਂ ਦਿਸ੍ਵਾ ਮਹਾਪੁਰਿਸੋ ‘‘ਅਤਿਥਿ ਨੋ ਆਗਤੋ’’ਤਿ ਪੀਤਿਸੋਮਨਸ੍ਸਜਾਤੋ ਤੇਨ ਸਦ੍ਧਿਂ ਮਧੁਰਪਟਿਸਨ੍ਥਾਰਂ ਕਤ੍ਵਾ ‘‘ਬ੍ਰਾਹ੍ਮਣ, ਕੇਨਤ੍ਥੇਨ ਇਧਾਗਤੋਸੀ’’ਤਿ ਪੁਚ੍ਛਿ. ਅਥ ਨਂ ਸਕ੍ਕੋ ਮਦ੍ਦਿਦੇਵਿਂ ਯਾਚਿ. ਤੇਨ ਵੁਤ੍ਤਂ –

੧੧੫. ‘‘ਪੁਨਦੇਵ ਸਕ੍ਕੋ ਓਰੁਯ੍ਹ, ਹੁਤ੍ਵਾ ਬ੍ਰਾਹ੍ਮਣਸਨ੍ਨਿਭੋ;

ਅਯਾਚਿ ਮਂ ਮਦ੍ਦਿਦੇਵਿਂ, ਸੀਲਵਨ੍ਤਿਂ ਪਤਿਬ੍ਬਤ’’ਨ੍ਤਿ.

ਤਤ੍ਥ ਪੁਨਦੇਵਾਤਿ ਦਾਰਕੇ ਦਿਨ੍ਨਦਿਵਸਤੋ ਪਚ੍ਛਾ ਏਵ. ਤਦਨਨ੍ਤਰਮੇਵਾਤਿ ਅਤ੍ਥੋ. ਓਰੁਯ੍ਹਾਤਿ ਦੇਵਲੋਕਤੋ ਓਤਰਿਤ੍ਵਾ. ਬ੍ਰਾਹ੍ਮਣਸਨ੍ਨਿਭੋਤਿ ਬ੍ਰਾਹ੍ਮਣਸਮਾਨਵਣ੍ਣੋ.

ਅਥ ਮਹਾਸਤ੍ਤੋ ‘‘ਹਿਯ੍ਯੋ ਮੇ ਦ੍ਵੇਪਿ ਦਾਰਕੇ ਬ੍ਰਾਹ੍ਮਣਸ੍ਸ ਦਿਨ੍ਨਾ, ਅਹਮ੍ਪਿ ਅਰਞ੍ਞੇ ਏਕਕੋਵ, ਕਥਂ ਤੇ ਮਦ੍ਦਿਂ ਸੀਲਵਨ੍ਤਿਂ ਪਤਿਬ੍ਬਤਂ ਦਸ੍ਸਾਮੀ’’ਤਿ ਅਵਤ੍ਵਾਵ ਪਸਾਰਿਤਹਤ੍ਥੇ ਅਨਗ੍ਘਰਤਨਂ ਠਪੇਨ੍ਤੋ ਵਿਯ ਅਸਜ੍ਜਿਤ੍ਵਾ ਅਬਜ੍ਝਿਤ੍ਵਾ ਅਨੋਲੀਨਮਾਨਸੋ ‘‘ਅਜ੍ਜ ਮੇ ਦਾਨਪਾਰਮੀ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਹਟ੍ਠਤੁਟ੍ਠੋ ਗਿਰਿਂ ਉਨ੍ਨਾਦੇਨ੍ਤੋ ਵਿਯ –