੧੦. ਸਸਪਣ੍ਡਿਤਚਰਿਯਾਵਣ੍ਣਨਾ

੧੨੫-੬. ਦਸਮੇ ਯਦਾ ਹੋਮਿ, ਸਸਕੋਤਿ ਅਹਂ, ਸਾਰਿਪੁਤ੍ਤ, ਬੋਧਿਪਰਿਯੇਸਨਂ ਚਰਮਾਨੋ ਯਦਾ ਸਸਪਣ੍ਡਿਤੋ ਹੋਮਿ. ਬੋਧਿਸਤ੍ਤਾ ਹਿ ਕਮ੍ਮਵਸਿਪ੍ਪਤ੍ਤਾਪਿ ਤਾਦਿਸਾਨਂ ਤਿਰਚ੍ਛਾਨਾਨਂ ਅਨੁਗ੍ਗਣ੍ਹਨਤ੍ਥਂ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਨ੍ਤਿ. ਪਵਨਚਾਰਕੋਤਿ ਮਹਾਵਨਚਾਰੀ. ਦਬ੍ਬਾਦਿਤਿਣਾਨਿ ਰੁਕ੍ਖਗਚ੍ਛੇਸੁ ਪਣ੍ਣਾਨਿ ਯਂਕਿਞ੍ਚਿ ਸਾਕਂ ਰੁਕ੍ਖਤੋ ਪਤਿਤਫਲਾਨਿ ਚ ਭਕ੍ਖੋ ਏਤਸ੍ਸਾਤਿ ਤਿਣਪਣ੍ਣਸਾਕਫਲਭਕ੍ਖੋ. ਪਰਹੇਠਨਵਿਵਜ੍ਜਿਤੋਤਿ ਪਰਪੀਲ਼ਾਵਿਰਹਿਤੋ. ਸੁਤ੍ਤਪੋਤੋ ਚਾਤਿ ਉਦ੍ਦਪੋਤੋ ਚ. ਅਹਂ ਤਦਾਤਿ ਯਦਾਹਂ ਸਸਕੋ ਹੋਮਿ, ਤਦਾ ਏਤੇ ਮਕ੍ਕਟਾਦਯੋ ਤਯੋ ਸਹਾਯੇ ਓਵਦਾਮਿ.

੧੨੭. ਕਿਰਿਯੇ ਕਲ੍ਯਾਣਪਾਪਕੇਤਿ ਕੁਸਲੇ ਚੇਵ ਅਕੁਸਲੇ ਚ ਕਮ੍ਮੇ. ਪਾਪਾਨੀਤਿ ਅਨੁਸਾਸਨਾਕਾਰਦਸ੍ਸਨਂ. ਤਤ੍ਥ ਪਾਪਾਨਿ ਪਰਿਵਜ੍ਜੇਥਾਤਿ ਪਾਣਾਤਿਪਾਤੋ…ਪੇ… ਮਿਚ੍ਛਾਦਿਟ੍ਠੀਤਿ ਇਮਾਨਿ ਪਾਪਾਨਿ ਪਰਿਵਜ੍ਜੇਥ. ਕਲ੍ਯਾਣੇ ਅਭਿਨਿਵਿਸ੍ਸਥਾਤਿ ਦਾਨਂ ਸੀਲਂ…ਪੇ… ਦਿਟ੍ਠੁਜੁਕਮ੍ਮਨ੍ਤਿ ਇਦਂ ਕਲ੍ਯਾਣਂ, ਇਮਸ੍ਮਿਂ ਕਲ੍ਯਾਣੇ ਅਤ੍ਤਨੋ ਕਾਯਵਾਚਾਚਿਤ੍ਤਾਨਿ ਅਭਿਮੁਖਭਾਵੇਨ ਨਿਵਿਸ੍ਸਥ, ਇਮਂ ਕਲ੍ਯਾਣਪਟਿਪਤ੍ਤਿਂ ਪਟਿਪਜ੍ਜਥਾਤਿ ਅਤ੍ਥੋ.

ਏਵਂ ਮਹਾਸਤ੍ਤੋ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤੋਪਿ ਞਾਣਸਮ੍ਪਨ੍ਨਤਾਯ ਕਲ੍ਯਾਣਮਿਤ੍ਤੋ ਹੁਤ੍ਵਾ ਤੇਸਂ ਤਿਣ੍ਣਂ ਜਨਾਨਂ ਕਾਲੇਨ ਕਾਲਂ ਉਪਗਤਾਨਂ ਓਵਾਦਵਸੇਨ ਧਮ੍ਮਂ ਦੇਸੇਸਿ. ਤੇ ਤਸ੍ਸ ਓਵਾਦਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਸਿਤ੍ਵਾ ਵਸਨ੍ਤਿ. ਏਵਂ ਕਾਲੇ ਗਚ੍ਛਨ੍ਤੇ ਬੋਧਿਸਤ੍ਤੋ ਆਕਾਸਂ ਓਲੋਕੇਤ੍ਵਾ ਚਨ੍ਦਪਾਰਿਪੂਰਿਂ ਦਿਸ੍ਵਾ ‘‘ਉਪੋਸਥਕਮ੍ਮਂ ਕਰੋਥਾ’’ਤਿ ਓਵਦਿ. ਤੇਨਾਹ –

੧੨੮. ‘‘ਉਪੋਸਥਮ੍ਹਿ ਦਿਵਸੇ, ਚਨ੍ਦਂ ਦਿਸ੍ਵਾਨ ਪੂਰਿਤਂ;

ਏਤੇਸਂ ਤਤ੍ਥ ਆਚਿਕ੍ਖਿਂ, ਦਿਵਸੋ ਅਜ੍ਜੁਪੋਸਥੋ.

੧੨੯. ‘‘ਦਾਨਾਨਿ ਪਟਿਯਾਦੇਥ, ਦਕ੍ਖਿਣੇਯ੍ਯਸ੍ਸ ਦਾਤਵੇ;

ਦਤ੍ਵਾ ਦਾਨਂ ਦਕ੍ਖਿਣੇਯ੍ਯੇ, ਉਪਵਸ੍ਸਥੁਪੋਸਥ’’ਨ੍ਤਿ.

ਤਤ੍ਥ ਚਨ੍ਦਂ ਦਿਸ੍ਵਾ ਨ ਪੂਰਿਤਨ੍ਤਿ ਜੁਣ੍ਹਪਕ੍ਖਚਾਤੁਦ੍ਦਸਿਯਂ ਈਸਕਂ ਅਪਰਿਪੁਣ੍ਣਭਾਵੇਨ ਚਨ੍ਦਂ ਨ ਪਰਿਪੂਰਿਤਂ ਦਿਸ੍ਵਾ ਤਤੋ ਵਿਭਾਤਾਯ ਰਤ੍ਤਿਯਾ ਅਰੁਣੁਗ੍ਗਮਨਵੇਲਾਯਮੇਵ ਉਪੋਸਥਮ੍ਹਿ ਦਿਵਸੇ ਪਨ੍ਨਰਸੇ ਏਤੇਸਂ ਮਕ੍ਕਟਾਦੀਨਂ ਮਯ੍ਹਂ ਸਹਾਯਾਨਂ ਦਿਵਸੋ ਅਜ੍ਜੁਪੋਸਥੋ. ਤਸ੍ਮਾ ‘‘ਦਾਨਾਨਿ ਪਟਿਯਾਦੇਥਾ’’ਤਿਆਦਿਨਾ ਤਤ੍ਥ ਉਪੋਸਥਦਿਵਸੇ ਪਟਿਪਤ੍ਤਿਵਿਧਾਨਂ ਆਚਿਕ੍ਖਿਨ੍ਤਿ ਯੋਜੇਤਬ੍ਬਂ. ਤਤ੍ਥ ਦਾਨਾਨੀਤਿ ਦੇਯ੍ਯਧਮ੍ਮੇ. ਪਟਿਯਾਦੇਥਾਤਿ ਯਥਾਸਤ੍ਤਿ ਯਥਾਬਲਂ ਸਜ੍ਜੇਥ. ਦਾਤਵੇਤਿ ਦਾਤੁਂ. ਉਪਵਸ੍ਸਥਾਤਿ ਉਪੋਸਥਕਮ੍ਮਂ ਕਰੋਥ, ਉਪੋਸਥਸੀਲਾਨਿ ਰਕ੍ਖਥ, ਸੀਲੇ ਪਤਿਟ੍ਠਾਯ ਦਿਨ੍ਨਦਾਨਂ ਮਹਪ੍ਫਲਂ ਹੋਤਿ, ਤਸ੍ਮਾ ਯਾਚਕੇ ਸਮ੍ਪਤ੍ਤੇ ਤੁਮ੍ਹੇਹਿ ਖਾਦਿਤਬ੍ਬਾਹਾਰਤੋ ਦਤ੍ਵਾ ਖਾਦੇਯ੍ਯਾਥਾਤਿ ਦਸ੍ਸੇਤਿ.

ਤੇ ‘‘ਸਾਧੂ’’ਤਿ ਬੋਧਿਸਤ੍ਤਸ੍ਸ ਓਵਾਦਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਹਿਂਸੁ. ਤੇਸੁ ਉਦ੍ਦਪੋਤੋ ਪਾਤੋਵ ‘‘ਗੋਚਰਂ ਪਰਿਯੇਸਿਸ੍ਸਾਮੀ’’ਤਿ ਨਦੀਤੀਰਂ ਗਤੋ. ਅਥੇਕੋ ਬਾਲ਼ਿਸਿਕੋ ਸਤ੍ਤ ਰੋਹਿਤਮਚ੍ਛੇ ਉਦ੍ਧਰਿਤ੍ਵਾ ਵਲ੍ਲਿਯਾ ਆਵੁਣਿਤ੍ਵਾ ਨਦੀਤੀਰੇ ਵਾਲੁਕਾਯ ਪਟਿਚ੍ਛਾਦੇਤ੍ਵਾ ਮਚ੍ਛੇ ਗਣ੍ਹਨ੍ਤੋ ਨਦਿਯਾ ਅਧੋ ਸੋਤਂ ਭਸ੍ਸਿ. ਉਦ੍ਦੋ ਮਚ੍ਛਗਨ੍ਧਂ ਘਾਯਿਤ੍ਵਾ ਵਾਲੁਕਂ ਵਿਯੂਹਿਤ੍ਵਾ ਮਚ੍ਛੇ ਦਿਸ੍ਵਾ ਨੀਹਰਿਤ੍ਵਾ ‘‘ਅਤ੍ਥਿ ਨੁ ਖੋ ਏਤੇਸਂ ਸਾਮਿਕੋ’’ਤਿ ਤਿਕ੍ਖਤ੍ਤੁਂ ਘੋਸੇਤ੍ਵਾ ਸਾਮਿਕਂ ਅਪਸ੍ਸਨ੍ਤੋ ਵਲ੍ਲਿਯਂ ਡਂਸਿਤ੍ਵਾ ਅਤ੍ਤਨੋ ਵਸਨਗੁਮ੍ਬੇ ਠਪੇਤ੍ਵਾ ‘‘ਵੇਲਾਯਮੇਵ ਖਾਦਿਸ੍ਸਾਮੀ’’ਤਿ ਅਤ੍ਤਨੋ ਸੀਲਂ ਆਵਜ੍ਜੇਨ੍ਤੋ ਨਿਪਜ੍ਜਿ. ਸਿਙ੍ਗਾਲੋਪਿ ਗੋਚਰਂ ਪਰਿਯੇਸਨ੍ਤੋ ਏਕਸ੍ਸ ਖੇਤ੍ਤਗੋਪਕਸ੍ਸ ਕੁਟਿਯਂ ਦ੍ਵੇ ਮਂਸਸੂਲਾਨਿ ਏਕਂ ਗੋਧਂ ਏਕਞ੍ਚ ਦਧਿਵਾਰਕਂ ਦਿਸ੍ਵਾ ‘‘ਅਤ੍ਥਿ ਨੁ ਖੋ ਏਤੇਸਂ ਸਾਮਿਕੋ’’ਤਿ ਤਿਕ੍ਖਤ੍ਤੁਂ ਘੋਸੇਤ੍ਵਾ ਸਾਮਿਕਂ ਅਦਿਸ੍ਵਾ ਦਧਿਵਾਰਕਸ੍ਸ ਉਗ੍ਗਹਣਰਜ੍ਜੁਕਂ ਗੀਵਾਯਂ ਪਵੇਸੇਤ੍ਵਾ ਮਂਸਸੂਲੇ ਚ ਗੋਧਞ੍ਚ ਮੁਖੇਨ ਡਂਸਿਤ੍ਵਾ ਅਤ੍ਤਨੋ ਵਸਨਗੁਮ੍ਬੇ ਠਪੇਤ੍ਵਾ ‘‘ਵੇਲਾਯਮੇਵ ਖਾਦਿਸ੍ਸਾਮੀ’’ਤਿ ਅਤ੍ਤਨੋ ਸੀਲਂ ਆਵਜ੍ਜੇਨ੍ਤੋ ਨਿਪਜ੍ਜਿ. ਮਕ੍ਕਟੋਪਿ ਵਨਸਣ੍ਡਂ ਪਵਿਸਿਤ੍ਵਾ ਅਮ੍ਬਪਿਣ੍ਡਂ ਆਹਰਿਤ੍ਵਾ ਅਤ੍ਤਨੋ ਵਸਨਗੁਮ੍ਬੇ ਠਪੇਤ੍ਵਾ ‘‘ਵੇਲਾਯਮੇਵ ਖਾਦਿਸ੍ਸਾਮੀ’’ਤਿ ਅਤ੍ਤਨੋ ਸੀਲਂ ਆਵਜ੍ਜੇਨ੍ਤੋ ਨਿਪਜ੍ਜਿ. ਤਿਣ੍ਣਮ੍ਪਿ ‘‘ਅਹੋ ਇਧ ਨੂਨ ਯਾਚਕੋ ਆਗਚ੍ਛੇਯ੍ਯਾ’’ਤਿ ਚਿਤ੍ਤਂ ਉਪ੍ਪਜ੍ਜਿ. ਤੇਨ ਵੁਤ੍ਤਂ –

੧੩੦. ‘‘ਤੇ ਮੇ ਸਾਧੂਤਿ ਵਤ੍ਵਾਨ, ਯਥਾਸਤ੍ਤਿ ਯਥਾਬਲਂ;

ਦਾਨਾਨਿ ਪਟਿਯਾਦੇਤ੍ਵਾ, ਦਕ੍ਖਿਣੇਯ੍ਯਂ ਗਵੇਸਿਸੁ’’ਨ੍ਤਿ.

ਬੋਧਿਸਤ੍ਤੋ ਪਨ ‘‘ਵੇਲਾਯਮੇਵ ਨਿਕ੍ਖਮਿਤ੍ਵਾ ਦਬ੍ਬਾਦਿਤਿਣਾਨਿ ਖਾਦਿਸ੍ਸਾਮੀ’’ਤਿ ਅਤ੍ਤਨੋ ਵਸਨਗੁਮ੍ਬੇਯੇਵ ਨਿਸਿਨ੍ਨੋ ਚਿਨ੍ਤੇਸਿ – ‘‘ਮਮ ਸਨ੍ਤਿਕਂ ਆਗਤਾਨਂ ਯਾਚਕਾਨਂ ਤਿਣਾਨਿ ਖਾਦਿਤੁਂ ਨ ਸਕ੍ਕਾ, ਤਿਲਤਣ੍ਡੁਲਾਦਯੋਪਿ ਮਯ੍ਹਂ ਨਤ੍ਥਿ, ਸਚੇ ਮੇ ਸਨ੍ਤਿਕਂ ਯਾਚਕੋ ਆਗਮਿਸ੍ਸਤਿ, ਅਹਂ ਤਿਣੇਨ ਯਾਪੇਮਿ, ਅਤ੍ਤਨੋ ਸਰੀਰਮਂਸਂ ਦਸ੍ਸਾਮੀ’’ਤਿ. ਤੇਨਾਹ ਭਗਵਾ –

੧੩੧. ‘‘ਅਹਂ ਨਿਸਜ੍ਜ ਚਿਨ੍ਤੇਸਿਂ, ਦਾਨਂ ਦਕ੍ਖਿਣਨੁਚ੍ਛਵਂ;

ਯਦਿਹਂ ਲਭੇ ਦਕ੍ਖਿਣੇਯ੍ਯਂ, ਕਿਂ ਮੇ ਦਾਨਂ ਭਵਿਸ੍ਸਤਿ.

੧੩੨. ‘‘ਨ ਮੇ ਅਤ੍ਥਿ ਤਿਲਾ ਮੁਗ੍ਗਾ, ਮਾਸਾ ਵਾ ਤਣ੍ਡੁਲਾ ਘਤਂ;

ਅਹਂ ਤਿਣੇਨ ਯਾਪੇਮਿ, ਨ ਸਕ੍ਕਾ ਤਿਣ ਦਾਤਵੇ.

੧੩੩. ‘‘ਯਦਿ ਕੋਚਿ ਏਤਿ ਦਕ੍ਖਿਣੇਯ੍ਯੋ, ਭਿਕ੍ਖਾਯ ਮਮ ਸਨ੍ਤਿਕੇ;

ਦਜ੍ਜਾਹਂ ਸਕਮਤ੍ਤਾਨਂ, ਨ ਸੋ ਤੁਚ੍ਛੋ ਗਮਿਸ੍ਸਤੀ’’ਤਿ.

ਤਤ੍ਥ ਦਾਨਂ ਦਕ੍ਖਿਣਨੁਚ੍ਛਵਨ੍ਤਿ ਦਕ੍ਖਿਣਾਭਾਵੇਨ ਅਨੁਚ੍ਛਵਿਕਂ ਦਾਨਂ ਦਕ੍ਖਿਣੇਯ੍ਯਸ੍ਸ ਦਾਤਬ੍ਬਂ ਦੇਯ੍ਯਧਮ੍ਮਂ ਚਿਨ੍ਤੇਸਿਂ. ਯਦਿਹਂ ਲਭੇਤਿ ਯਦਿ ਅਹਂ ਕਿਞ੍ਚਿ ਦਕ੍ਖਿਣੇਯ੍ਯਂ ਅਜ੍ਜ ਲਭੇਯ੍ਯਂ. ਕਿਂ ਮੇ ਦਾਨਂ ਭਵਿਸ੍ਸਤੀਤਿ ਕਿਂ ਮਮ ਦਾਤਬ੍ਬਂ ਭਵਿਸ੍ਸਤਿ. ਨ ਸਕ੍ਕਾ ਤਿਣ ਦਾਤਵੇਤਿ ਯਦਿ ਦਕ੍ਖਿਣੇਯ੍ਯਸ੍ਸ ਦਾਤੁਂ ਤਿਲਮੁਗ੍ਗਾਦਿਕਂ ਮਯ੍ਹਂ ਨਤ੍ਥਿ, ਯਂ ਪਨ ਮਮ ਆਹਾਰਭੂਤਂ, ਤਂ ਨ ਸਕ੍ਕਾ ਤਿਣਂ ਦਕ੍ਖਿਣੇਯ੍ਯਸ੍ਸ ਦਾਤੁਂ. ਦਜ੍ਜਾਹਂ ਸਕਮਤ੍ਤਾਨਨ੍ਤਿ ਕਿਂ ਵਾ ਮਯ੍ਹਂ ਏਤਾਯ ਦੇਯ੍ਯਧਮ੍ਮਚਿਨ੍ਤਾਯ, ਨਨੁ ਇਦਮੇਵ ਮਯ੍ਹਂ ਅਨਵਜ੍ਜਂ ਅਪਰਾਧੀਨਤਾਯ ਸੁਲਭਂ ਪਰੇਸਞ੍ਚ ਪਰਿਭੋਗਾਰਹਂ ਸਰੀਰਂ ਸਚੇ ਕੋਚਿ ਦਕ੍ਖਿਣੇਯ੍ਯੋ ਮਮ ਸਨ੍ਤਿਕਂ ਆਗਚ੍ਛਤਿ, ਤਯਿਦਂ ਸਕਮਤ੍ਤਾਨਂ ਤਸ੍ਸ ਦਜ੍ਜਾਮਹਂ. ਏਵਂ ਸਨ੍ਤੇ ਨ ਸੋ ਤੁਚ੍ਛੋ ਮਮ ਸਨ੍ਤਿਕਂ ਆਗਤੋ ਅਰਿਤ੍ਤਹਤ੍ਥੋ ਹੁਤ੍ਵਾ ਗਮਿਸ੍ਸਤੀਤਿ.

ਏਵਂ ਮਹਾਪੁਰਿਸਸ੍ਸ ਯਥਾਭੂਤਸਭਾਵਂ ਪਰਿਵਿਤਕ੍ਕੇਨ੍ਤਸ੍ਸ ਪਰਿਵਿਤਕ੍ਕਾਨੁਭਾਵੇਨ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ਆਵਜ੍ਜੇਨ੍ਤੋ ਇਮਂ ਕਾਰਣਂ ਦਿਸ੍ਵਾ ‘‘ਸਸਰਾਜਂ ਵੀਮਂਸਿਸ੍ਸਾਮੀ’’ਤਿ ਪਠਮਂ ਉਦ੍ਦਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਬ੍ਰਾਹ੍ਮਣਵੇਸੇਨ ਅਟ੍ਠਾਸਿ. ਤੇਨ ‘‘ਕਿਮਤ੍ਥਂ, ਬ੍ਰਾਹ੍ਮਣ, ਠਿਤੋਸੀ’’ਤਿ ਚ ਵੁਤ੍ਤੇ ਸਚੇ ਕਞ੍ਚਿ ਆਹਾਰਂ ਲਭੇਯ੍ਯਂ, ਉਪੋਸਥਿਕੋ ਹੁਤ੍ਵਾ ਸਮਣਧਮ੍ਮਂ ਕਰੇਯ੍ਯਨ੍ਤਿ. ਸੋ ‘‘ਸਾਧੂਤਿ ਤੇ ਆਹਾਰਂ ਦਸ੍ਸਾਮੀ’’ਤਿ ਆਹ. ਤੇਨ ਵੁਤ੍ਤਂ –

‘‘ਸਤ੍ਤ ਮੇ ਰੋਹਿਤਾ ਮਚ੍ਛਾ, ਉਦਕਾ ਥਲਮੁਬ੍ਭਤਾ;

ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸਾ’’ਤਿ. (ਜਾ. ੧.੪.੬੧);

ਬ੍ਰਾਹ੍ਮਣੋ ‘‘ਪਗੇਵ ਤਾਵ ਹੋਤੁ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਤਥੇਵ ਸਿਙ੍ਗਾਲਸ੍ਸ ਮਕ੍ਕਟਸ੍ਸ ਚ ਸਨ੍ਤਿਕਂ ਗਨ੍ਤ੍ਵਾ ਤੇਹਿਪਿ ਅਤ੍ਤਨੋ ਵਿਜ੍ਜਮਾਨੇਹਿ ਦੇਯ੍ਯਧਮ੍ਮੇਹਿ ਨਿਮਨ੍ਤਿਤੋ ‘‘ਪਗੇਵ ਤਾਵ ਹੋਤੁ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਆਹ. ਤੇਨ ਵੁਤ੍ਤਂ –

‘‘ਦੁਸ੍ਸ ਮੇ ਖੇਤ੍ਤਪਾਲਸ੍ਸ, ਰਤ੍ਤਿਭਤ੍ਤਂ ਅਪਾਭਤਂ;

ਮਂਸਸੂਲਾ ਚ ਦ੍ਵੇ ਗੋਧਾ, ਏਕਞ੍ਚ ਦਧਿਵਾਰਕਂ;

ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸਾ’’ਤਿ.

‘‘ਅਮ੍ਬਪਕ੍ਕਂ ਦਕਂ ਸੀਤਂ, ਸੀਤਚ੍ਛਾਯਾ ਮਨੋਰਮਾ;

ਇਦਂ ਬ੍ਰਾਹ੍ਮਣ ਮੇ ਅਤ੍ਥਿ, ਏਤਂ ਭੁਤ੍ਵਾ ਵਨੇ ਵਸਾ’’ਤਿ. (ਜਾ. ੧.੪.੬੨-੬੩);

ਤਤ੍ਥ ਦੁਸ੍ਸਾਤਿ ਅਮੁਸ੍ਸ. ਰਤ੍ਤਿਭਤ੍ਤਂ ਅਪਾਭਤਨ੍ਤਿ ਰਤ੍ਤਿਭੋਜਨਤੋ ਅਪਨੀਤਂ. ਮਂਸਸੂਲਾ ਚ ਦ੍ਵੇ ਗੋਧਾਤਿ ਅਙ੍ਗਾਰਪਕ੍ਕਾਨਿ ਦ੍ਵੇ ਮਂਸਸੂਲਾਨਿ ਏਕਾ ਚ ਗੋਧਾ. ਦਧਿਵਾਰਕਨ੍ਤਿ ਦਧਿਵਾਰਕੋ.

੧੩੪. ਅਥ ਬ੍ਰਾਹ੍ਮਣੋ ਸਸਪਣ੍ਡਿਤਸ੍ਸ ਸਨ੍ਤਿਕਂ ਗਤੋ. ਤੇਨਾਪਿ ‘‘ਕਿਮਤ੍ਥਮਾਗਤੋਸੀ’’ਤਿ ਵੁਤ੍ਤੇ ਤਥੇਵਾਹ. ਤੇਨ ਵੁਤ੍ਤਂ ‘‘ਮਮ ਸਙ੍ਕਪ੍ਪਮਞ੍ਞਾਯਾ’’ਤਿਆਦਿ.

ਤਤ੍ਥ ਮਮ ਸਙ੍ਕਪ੍ਪਮਞ੍ਞਾਯਾਤਿ ਪੁਬ੍ਬੇ ਵੁਤ੍ਤਪ੍ਪਕਾਰਂ ਪਰਿਵਿਤਕ੍ਕਂ ਜਾਨਿਤ੍ਵਾ. ਬ੍ਰਾਹ੍ਮਣਵਣ੍ਣਿਨਾਤਿ ਬ੍ਰਾਹ੍ਮਣਰੂਪਵਤਾ ਅਤ੍ਤਭਾਵੇਨ. ਆਸਯਨ੍ਤਿ ਵਸਨਗੁਮ੍ਬਂ.

੧੩੫-੭. ਸਨ੍ਤੁਟ੍ਠੋਤਿ ਸਮਂ ਸਬ੍ਬਭਾਗੇਨੇਵ ਤੁਟ੍ਠੋ. ਘਾਸਹੇਤੂਤਿ ਆਹਾਰਹੇਤੁ. ਅਦਿਨ੍ਨਪੁਬ੍ਬਨ੍ਤਿ ਯੇਹਿ ਕੇਹਿਚਿ ਅਬੋਧਿਸਤ੍ਤੇਹਿ ਅਦਿਨ੍ਨਪੁਬ੍ਬਂ. ਦਾਨਵਰਨ੍ਤਿ ਉਤ੍ਤਮਦਾਨਂ. ‘‘ਅਜ੍ਜ ਦਸ੍ਸਾਮਿ ਤੇ ਅਹ’’ਨ੍ਤਿ ਵਤ੍ਵਾ ਤੁਵਂ ਸੀਲਗੁਣੂਪੇਤੋ, ਅਯੁਤ੍ਤਂ ਤੇ ਪਰਹੇਠਨਨ੍ਤਿ ਤਂ ਪਾਣਾਤਿਪਾਤਤੋ ਅਪਨੇਤ੍ਵਾ ਇਦਾਨਿ ਤਸ੍ਸ ਪਰਿਭੋਗਯੋਗ੍ਗਂ ਅਤ੍ਤਾਨਂ ਕਤ੍ਵਾ ਦਾਤੁਂ ‘‘ਏਹਿ ਅਗ੍ਗਿਂ ਪਦੀਪੇਹੀ’’ਤਿਆਦਿਮਾਹ.

ਤਤ੍ਥ ਅਹਂ ਪਚਿਸ੍ਸਮਤ੍ਤਾਨਨ੍ਤਿ ਤਯਾ ਕਤੇ ਅਙ੍ਗਾਰਗਬ੍ਭੇ ਅਹਮੇਵ ਪਤਿਤ੍ਵਾ ਅਤ੍ਤਾਨਂ ਪਚਿਸ੍ਸਂ. ਪਕ੍ਕਂ ਤ੍ਵਂ ਭਕ੍ਖਯਿਸ੍ਸਸੀਤਿ ਤਥਾ ਪਨ ਪਕ੍ਕਂ ਤ੍ਵਂ ਖਾਦਿਸ੍ਸਸਿ.

੧੩੮-੯. ਨਾਨਾਕਟ੍ਠੇ ਸਮਾਨਯੀਤਿ ਸੋ ਬ੍ਰਾਹ੍ਮਣਵੇਸਧਾਰੀ ਸਕ੍ਕੋ ਨਾਨਾਦਾਰੂਨਿ ਸਮਾਨੇਨ੍ਤੋ ਵਿਯ ਅਹੋਸਿ. ਮਹਨ੍ਤਂ ਅਕਾਸਿ ਚਿਤਕਂ, ਕਤ੍ਵਾ ਅਙ੍ਗਾਰਗਬ੍ਭਕਨ੍ਤਿ ਵੀਤਚ੍ਚਿਕਂ ਵਿਗਤਧੂਮਂ ਅਙ੍ਗਾਰਭਰਿਤਬ੍ਭਨ੍ਤਰਂ ਸਮਨ੍ਤਤੋ ਜਲਮਾਨਂ ਮਮ ਸਰੀਰਸ੍ਸ ਨਿਮੁਜ੍ਜਨਪ੍ਪਹੋਨਕਂ ਤਙ੍ਖਣਞ੍ਞੇਵ ਮਹਨ੍ਤਂ ਚਿਤਕਂ ਅਕਾਸਿ, ਸਹਸਾ ਇਦ੍ਧਿਯਾ ਅਭਿਨਿਮ੍ਮਿਨੀਤਿ ਅਧਿਪ੍ਪਾਯੋ. ਤੇਨਾਹ ‘‘ਅਗ੍ਗਿਂ ਤਤ੍ਥ ਪਦੀਪੇਸਿ, ਯਥਾ ਸੋ ਖਿਪ੍ਪਂ ਮਹਾਭਵੇ’’ਤਿ.

ਤਤ੍ਥ ਸੋਤਿ ਸੋ ਅਗ੍ਗਿਕ੍ਖਨ੍ਧੋ ਸੀਘਂ ਮਹਨ੍ਤੋ ਯਥਾ ਭਵੇਯ੍ਯ, ਤਥਾ ਪਦੀਪੇਸਿ. ਫੋਟੇਤ੍ਵਾ ਰਜਗਤੇ ਗਤ੍ਤੇਤਿ ‘‘ਸਚੇ ਲੋਮਨ੍ਤਰੇਸੁ ਪਾਣਕਾ ਅਤ੍ਥਿ, ਤੇ ਮਾ ਮਰਿਂਸੂ’’ਤਿ ਪਂਸੁਗਤੇ ਮਮ ਗਤ੍ਤੇ ਤਿਕ੍ਖਤ੍ਤੁਂ ਵਿਧੁਨਿਤ੍ਵਾ. ਏਕਮਨ੍ਤਂ ਉਪਾਵਿਸਿਨ੍ਤਿ ਨ ਤਾਵ ਕਟ੍ਠਾਨਿ ਆਦਿਤ੍ਤਾਨੀਤਿ ਤੇਸਂ ਆਦੀਪਨਂ ਉਦਿਕ੍ਖਨ੍ਤੋ ਥੋਕਂ ਏਕਮਨ੍ਤਂ ਨਿਸੀਦਿਂ.

੧੪੦. ਯਦਾ ਮਹਾਕਟ੍ਠਪੁਞ੍ਜੋ, ਆਦਿਤ੍ਤੋ ਧਮਧਮਾਯਤੀਤਿ ਯਦਾ ਪਨ ਸੋ ਦਾਰੁਰਾਸਿ ਸਮਨ੍ਤਤੋ ਆਦਿਤ੍ਤੋ ਵਾਯੁਵੇਗਸਮੁਦ੍ਧਟਾਨਂ ਜਾਲਸਿਖਾਨਂ ਵਸੇਨ ‘‘ਧਮਧਮਾ’’ਤਿ ਏਵਂ ਕਰੋਤਿ. ਤਦੁਪ੍ਪਤਿਤ੍ਵਾ ਪਤਤਿ, ਮਜ੍ਝੇ ਜਾਲਸਿਖਨ੍ਤਰੇਤਿ ਤਦਾ ਤਸ੍ਮਿਂ ਕਾਲੇ ‘‘ਮਮ ਸਰੀਰਸ੍ਸ ਝਾਪਨਸਮਤ੍ਥੋ ਅਯਂ ਅਙ੍ਗਾਰਰਾਸੀ’’ਤਿ ਚਿਨ੍ਤੇਤ੍ਵਾ ਉਪ੍ਪਤਿਤ੍ਵਾ ਉਲ੍ਲਙ੍ਘਿਤ੍ਵਾ ਜਾਲਸਿਖਾਨਂ ਅਬ੍ਭਨ੍ਤਰਭੂਤੇ ਤਸ੍ਸ ਅਙ੍ਗਾਰਰਾਸਿਸ੍ਸ ਮਜ੍ਝੇ ਪਦੁਮਪੁਞ੍ਜੇ ਰਾਜਹਂਸੋ ਵਿਯ ਪਮੁਦਿਤਚਿਤ੍ਤੋ ਸਕਲਸਰੀਰਂ ਦਾਨਮੁਖੇ ਦਤ੍ਵਾ ਪਤਤਿ.

੧੪੧-੨. ਪਵਿਟ੍ਠਂ ਯਸ੍ਸ ਕਸ੍ਸਚੀਤਿ ਯਥਾ ਘਮ੍ਮਕਾਲੇ ਸੀਤਲਂ ਉਦਕਂ ਯੇਨ ਕੇਨਚਿ ਪਵਿਟ੍ਠਂ ਤਸ੍ਸ ਦਰਥਪਰਿਲ਼ਾਹਂ ਵੂਪਸਮੇਤਿ, ਅਸ੍ਸਾਦਂ ਪੀਤਿਞ੍ਚ ਉਪ੍ਪਾਦੇਤਿ. ਤਥੇਵ ਜਲਿਤਂ ਅਗ੍ਗਿਨ੍ਤਿ ਏਵਂ ਤਥਾ ਪਜ੍ਜਲਿਤਂ ਅਙ੍ਗਾਰਰਾਸਿ ਤਦਾ ਮਮ ਪਵਿਟ੍ਠਸ੍ਸ ਉਸੁਮਮਤ੍ਤਮ੍ਪਿ ਨਾਹੋਸਿ. ਅਞ੍ਞਦਤ੍ਥੁ ਦਾਨਪੀਤਿਯਾ ਸਬ੍ਬਦਰਥਪਰਿਲ਼ਾਹਵੂਪਸਮੋ ਏਵ ਅਹੋਸਿ. ਚਿਰਸ੍ਸਂ ਵਤ ਮੇ ਛਵਿਚਮ੍ਮਾਦਿਕੋ ਸਬ੍ਬੋ ਸਰੀਰਾਵਯਵੋ ਦਾਨਮੁਖੇ ਜੁਹਿਤਬ੍ਬਤਂ ਉਪਗਤੋ ਅਭਿਪਤ੍ਥਿਤੋ ਮਨੋਰਥੋ ਮਤ੍ਥਕਂ ਪਤ੍ਤੋਤਿ. ਤੇਨ ਵੁਤ੍ਤਂ –

੧੪੩. ‘‘ਛਵਿਂ ਚਮ੍ਮਂ ਮਂਸਂ ਨ੍ਹਾਰੁਂ, ਅਟ੍ਠਿਂ ਹਦਯਬਨ੍ਧਨਂ;

ਕੇਵਲਂ ਸਕਲਂ ਕਾਯਂ, ਬ੍ਰਾਹ੍ਮਣਸ੍ਸ ਅਦਾਸਹ’’ਨ੍ਤਿ.

ਤਤ੍ਥ ਹਦਯਬਨ੍ਧਨਨ੍ਤਿ ਹਦਯਮਂਸਪੇਸਿ. ਤਞ੍ਹਿ ਹਦਯਵਤ੍ਥੁਂ ਬਨ੍ਧਿਤ੍ਵਾ ਵਿਯ ਠਿਤਤ੍ਤਾ ‘‘ਹਦਯਬਨ੍ਧਨ’’ਨ੍ਤਿ ਵੁਤ੍ਤਂ. ਅਥ ਵਾ ਹਦਯਬਨ੍ਧਨਨ੍ਤਿ ਹਦਯਞ੍ਚ ਬਨ੍ਧਨਞ੍ਚ, ਹਦਯਮਂਸਞ੍ਚੇਵ ਤਂ ਬਨ੍ਧਿਤ੍ਵਾ ਵਿਯ ਠਿਤਯਕਨਮਂਸਞ੍ਚਾਤਿ ਅਤ੍ਥੋ. ਕੇਵਲਂ ਸਕਲਂ ਕਾਯਨ੍ਤਿ ਅਨਵਸੇਸਂ ਸਬ੍ਬਂ ਸਰੀਰਂ.

ਏਵਂ ਤਸ੍ਮਿਂ ਅਗ੍ਗਿਮ੍ਹਿ ਅਤ੍ਤਨੋ ਸਰੀਰੇ ਲੋਮਕੂਪਮਤ੍ਤਮ੍ਪਿ ਉਣ੍ਹਂ ਕਾਤੁਂ ਅਸਕ੍ਕੋਨ੍ਤੋ ਬੋਧਿਸਤ੍ਤੋਪਿ ਹਿਮਗਬ੍ਭਂ ਪਵਿਟ੍ਠੋ ਵਿਯ ਹੁਤ੍ਵਾ ਬ੍ਰਾਹ੍ਮਣਰੂਪਧਰਂ ਸਕ੍ਕਂ ਏਵਮਾਹ – ‘‘ਬ੍ਰਾਹ੍ਮਣ, ਤਯਾ ਕਤੋ ਅਗ੍ਗਿ ਅਤਿਸੀਤਲੋ, ਕਿਂ ਨਾਮੇਤ’’ਨ੍ਤਿ? ਪਣ੍ਡਿਤ, ਨਾਹਂ ਬ੍ਰਾਹ੍ਮਣੋ, ਸਕ੍ਕੋਹਮਸ੍ਮਿ, ਤਵ ਵੀਮਂਸਨਤ੍ਥਂ ਆਗਤੋ ਏਵਮਕਾਸਿਨ੍ਤਿ. ‘‘ਸਕ੍ਕ, ਤ੍ਵਂ ਤਾਵ ਤਿਟ੍ਠਤੁ, ਸਕਲੋਪਿ ਚੇ ਲੋਕੋ ਮਂ ਦਾਨੇਨ ਵੀਮਂਸੇਯ੍ਯ, ਨੇਵ ਮੇ ਅਦਾਤੁਕਾਮਤਂ ਕਥਞ੍ਚਿਪਿ ਉਪ੍ਪਾਦੇਯ੍ਯ ਪਸ੍ਸੇਥ ਨ’’ਨ੍ਤਿ ਬੋਧਿਸਤ੍ਤੋ ਸੀਹਨਾਦਂ ਨਦਿ.

ਅਥ ਨਂ ਸਕ੍ਕੋ ‘‘ਸਸਪਣ੍ਡਿਤ, ਤਵ ਗੁਣਾ ਸਕਲਕਪ੍ਪਮ੍ਪਿ ਪਾਕਟਾ ਹੋਨ੍ਤੂ’’ਤਿ ਪਬ੍ਬਤਂ ਪੀਲ਼ੇਤ੍ਵਾ ਪਬ੍ਬਤਰਸਂ ਆਦਾਯ ਚਨ੍ਦਮਣ੍ਡਲੇ ਸਸਲਕ੍ਖਣਂ ਆਲਿਖਿਤ੍ਵਾ ਬੋਧਿਸਤ੍ਤਂ ਤਸ੍ਮਿਂ ਵਨਸਣ੍ਡੇ ਤਤ੍ਥੇਵ ਵਨਗੁਮ੍ਬੇ ਤਰੁਣਦਬ੍ਬਤਿਣਪੀਠੇ ਨਿਪਜ੍ਜਾਪੇਤ੍ਵਾ ਅਤ੍ਤਨੋ ਦੇਵਲੋਕਮੇਵ ਗਤੋ. ਤੇਪਿ ਚਤ੍ਤਾਰੋ ਪਣ੍ਡਿਤਾ ਸਮਗ੍ਗਾ ਸਮ੍ਮੋਦਮਾਨਾ ਨਿਚ੍ਚਸੀਲਂ ਉਪੋਸਥਸੀਲਞ੍ਚ ਪੂਰੇਤ੍ਵਾ ਯਥਾਰਹਂ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤਾ.

ਤਦਾ ਉਦ੍ਦੋ ਆਯਸ੍ਮਾ ਆਨਨ੍ਦੋ ਅਹੋਸਿ, ਸਿਙ੍ਗਾਲੋ ਮਹਾਮੋਗ੍ਗਲ੍ਲਾਨੋ, ਮਕ੍ਕਟੋ ਸਾਰਿਪੁਤ੍ਤੋ, ਸਸਪਣ੍ਡਿਤੋ ਪਨ ਲੋਕਨਾਥੋ.

ਤਸ੍ਸ ਇਧਾਪਿ ਸੀਲਾਦਿਪਾਰਮਿਯੋ ਹੇਟ੍ਠਾ ਵੁਤ੍ਤਨਯੇਨੇਵ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਤਥਾ ਸਤਿਪਿ ਤਿਰਚ੍ਛਾਨੁਪਪਤ੍ਤਿਯਂ ਕੁਸਲਾਦਿਧਮ੍ਮੇ ਕੁਸਲਾਦਿਤੋ ਯਥਾਭੂਤਾਵਬੋਧੋ, ਤੇਸੁ ਅਣੁਮਤ੍ਤਮ੍ਪਿ ਵਜ੍ਜਂ ਭਯਤੋ ਦਿਸ੍ਵਾ ਸੁਟ੍ਠੁ ਅਕੁਸਲਤੋ ਓਰਮਣਂ, ਸਮ੍ਮਦੇਵ ਚ ਕੁਸਲਧਮ੍ਮੇਸੁ ਅਤ੍ਤਨੋ ਪਤਿਟ੍ਠਾਪਨਂ, ਪਰੇਸਞ੍ਚ ‘‘ਇਮੇ ਨਾਮ ਪਾਪਧਮ੍ਮਾ ਤੇ ਏਵਂ ਗਹਿਤਾ ਏਵਂ ਪਰਾਮਟ੍ਠਾ ਏਵਂਗਤਿਕਾ ਭਵਨ੍ਤਿ ਏਵਂਅਭਿਸਮ੍ਪਰਾਯਾ’’ਤਿ ਆਦੀਨਵਂ ਦਸ੍ਸੇਤ੍ਵਾ ਤਤੋ ਵਿਰਮਣੇ ਨਿਯੋਜਨਂ, ਇਦਂ ਦਾਨਂ ਨਾਮ, ਇਦਂ ਸੀਲਂ ਨਾਮ, ਇਦਂ ਉਪੋਸਥਕਮ੍ਮਂ ਨਾਮ, ਏਤ੍ਥ ਪਤਿਟ੍ਠਿਤਾਨਂ ਦੇਵਮਨੁਸ੍ਸਸਮ੍ਪਤ੍ਤਿਯੋ ਹਤ੍ਥਗਤਾ ਏਵਾਤਿਆਦਿਨਾ ਪੁਞ੍ਞਕਮ੍ਮੇਸੁ ਆਨਿਸਂਸਂ ਦਸ੍ਸੇਤ੍ਵਾ ਪਤਿਟ੍ਠਾਪਨਂ, ਅਤ੍ਤਨੋ ਸਰੀਰਜੀਵਿਤਨਿਰਪੇਕ੍ਖਂ, ਪਰੇਸਂ ਸਤ੍ਤਾਨਂ ਅਨੁਗ੍ਗਣ੍ਹਨਂ, ਉਲ਼ਾਰੋ ਚ ਦਾਨਜ੍ਝਾਸਯੋਤਿ ਏਵਮਾਦਯੋ ਇਧ ਬੋਧਿਸਤ੍ਤਸ੍ਸ ਗੁਣਾਨੁਭਾਵਾ ਵਿਭਾਵੇਤਬ੍ਬਾ. ਤੇਨੇਤਂ ਵੁਚ੍ਚਤਿ – ‘‘ਏਵਂ ਅਚ੍ਛਰਿਯਾ ਹੇਤੇ…ਪੇ… ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਸਸਪਣ੍ਡਿਤਚਰਿਯਾਵਣ੍ਣਨਾ ਨਿਟ੍ਠਿਤਾ.

ਇਦਾਨਿ ‘‘ਅਕਿਤ੍ਤਿਬ੍ਰਾਹ੍ਮਣੋ’’ਤਿਆਦਿਨਾ ਯਥਾਵੁਤ੍ਤੇ ਦਸਪਿ ਚਰਿਯਾਵਿਸੇਸੇ ਉਦਾਨੇਤ੍ਵਾ ਨਿਗਮੇਤਿ. ਤਤ੍ਥ ਅਹਮੇਵ ਤਦਾ ਆਸਿਂ, ਯੋ ਤੇ ਦਾਨਵਰੇ ਅਦਾਤਿ ਯੋ ਤਾਨਿ ਉਤ੍ਤਮਦਾਨਾਨਿ ਅਦਾਸਿ, ਸੋ ਅਕਿਤ੍ਤਿਬ੍ਰਾਹਣਾਦਿਕੋ ਅਹਮੇਵ ਤਦਾ ਤਸ੍ਮਿਂ ਕਾਲੇ ਅਹੋਸਿਂ, ਨ ਅਞ੍ਞੋਤਿ. ਇਤਿ ਤੇਸੁ ਅਤ੍ਤਭਾਵੇਸੁ ਸਤਿਪਿ ਸੀਲਾਦਿਪਾਰਮੀਨਂ ਯਥਾਰਹਂ ਪੂਰਿਤਭਾਵੇ ਅਤ੍ਤਨੋ ਪਨ ਤਦਾ ਦਾਨਜ੍ਝਾਸਯਸ੍ਸ ਅਤਿਵਿਯ ਉਲ਼ਾਰਭਾਵਂ ਸਨ੍ਧਾਯ ਦਾਨਪਾਰਮਿਵਸੇਨੇਵ ਦੇਸਨਂ ਆਰੋਪੇਸਿ. ਏਤੇ ਦਾਨਪਰਿਕ੍ਖਾਰਾ, ਏਤੇ ਦਾਨਸ੍ਸ ਪਾਰਮੀਤਿ ਯੇ ਇਮੇ ਅਕਿਤ੍ਤਿਜਾਤਕਾਦੀਸੁ (ਜਾ. ੧.੧੩.੮੩ ਆਦਯੋ) ਅਨੇਕਾਕਾਰਵੋਕਾਰਾ ਮਯਾ ਪਵਤ੍ਤਿਤਾ ਦੇਯ੍ਯਧਮ੍ਮਪਰਿਚ੍ਚਾਗਾ ਮਮ ਸਰੀਰਾਵਯਵਪੁਤ੍ਤਦਾਰਪਰਿਚ੍ਚਾਗਾ ਪਰਮਕੋਟਿਕਾ, ਕਿਞ੍ਚਾਪਿ ਤੇ ਕਰੁਣੂਪਾਯਕੋਸਲ੍ਲਪਰਿਗ੍ਗਹਿਤਤ੍ਤਾ ਸਬ੍ਬਞ੍ਞੁਤਞ੍ਞਾਣਮੇਵ ਉਦ੍ਦਿਸ੍ਸ ਪਵਤ੍ਤਿਤਤ੍ਤਾ ਦਾਨਸ੍ਸ ਪਰਮੁਕ੍ਕਂਸਗਮਨੇਨ ਦਾਨਪਾਰਮੀ ਏਵ, ਤਥਾਪਿ ਮਮ ਦਾਨਸ੍ਸ ਪਰਮਤ੍ਥਪਾਰਮਿਭੂਤਸ੍ਸ ਪਰਿਕ੍ਖਰਣਤੋਸਨ੍ਤਾਨਸ੍ਸ ਪਰਿਭਾਵਨਾਵਸੇਨ ਅਭਿਸਙ੍ਖਰਣਤੋ ਏਤੇ ਦਾਨਪਰਿਕ੍ਖਾਰਾ ਨਾਮ. ਯਸ੍ਸ ਪਨੇਤੇ ਪਰਿਕ੍ਖਾਰਾ, ਤਂ ਦਸ੍ਸੇਤੁਂ ‘‘ਜੀਵਿਤਂ ਯਾਚਕੇ ਦਤ੍ਵਾ, ਇਮਂ ਪਾਰਮਿ ਪੂਰਯਿ’’ਨ੍ਤਿ ਵੁਤ੍ਤਂ. ਏਤ੍ਥ ਹਿ ਠਪੇਤ੍ਵਾ ਸਸਪਣ੍ਡਿਤਚਰਿਯਂ ਸੇਸਾਸੁ ਨਵਸੁ ਚਰਿਯਾਸੁ ਯਥਾਰਹਂ ਦਾਨਪਾਰਮਿਦਾਨਉਪਪਾਰਮਿਯੋ ਵੇਦਿਤਬ੍ਬਾ, ਸਸਪਣ੍ਡਿਤਚਰਿਯੇ (ਚਰਿਯਾ. ੧.੧੨੫ ਆਦਯੋ) ਪਨ ਦਾਨਪਰਮਤ੍ਥਪਾਰਮੀ. ਤੇਨ ਵੁਤ੍ਤਂ –

‘‘ਭਿਕ੍ਖਾਯ ਉਪਗਤਂ ਦਿਸ੍ਵਾ, ਸਕਤ੍ਤਾਨਂ ਪਰਿਚ੍ਚਜਿਂ;

ਦਾਨੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਦਾਨਪਾਰਮੀ’’ਤਿ. (ਚਰਿਯਾ. ੧.ਤਸ੍ਸੁਦ੍ਦਾਨ);

ਕਿਞ੍ਚਾਪਿ ਹਿ ਮਹਾਪੁਰਿਸਸ੍ਸ ਯਥਾਵੁਤ੍ਤੇ ਅਕਿਤ੍ਤਿਬ੍ਰਾਹ੍ਮਣਾਦਿਕਾਲੇ ਅਞ੍ਞਸ੍ਮਿਞ੍ਚ ਮਹਾਜਨਕਮਹਾਸੁਤਸੋਮਾਦਿਕਾਲੇ ਦਾਨਪਾਰਮਿਯਾ ਪੂਰਿਤਤ੍ਤਭਾਵਾਨਂ ਪਰਿਮਾਣਂ ਨਾਮ ਨਤ੍ਥਿ, ਤਥਾਪਿ ਏਕਨ੍ਤੇਨੇਵ ਸਸਪਣ੍ਡਿਤਕਾਲੇ ਦਾਨਪਾਰਮਿਯਾ ਪਰਮਤ੍ਥਪਾਰਮਿਭਾਵੋ ਵਿਭਾਵੇਤਬ੍ਬੋਤਿ.

ਪਰਮਤ੍ਥਦੀਪਨਿਯਾ ਚਰਿਯਾਪਿਟਕਸਂਵਣ੍ਣਨਾਯ

ਦਸਵਿਧਚਰਿਯਾਸਙ੍ਗਹਸ੍ਸ ਵਿਸੇਸਤੋ

ਦਾਨਪਾਰਮਿਵਿਭਾਵਨਸ੍ਸ

ਪਠਮਵਗ੍ਗਸ੍ਸ ਅਤ੍ਥਵਣ੍ਣਨਾ ਨਿਟ੍ਠਿਤਾ.