੧. ਅਕਿਤ੍ਤਿਵਗ੍ਗੋ

੧. ਅਕਿਤ੍ਤਿਚਰਿਯਾਵਣ੍ਣਨਾ

੩. ਏਵਂ ਭਗਵਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸਦੇਵਮਨੁਸ੍ਸਾਯ ਚ ਪਰਿਸਾਯ ਅਤ੍ਤਨੋ ਪੁਬ੍ਬਚਰਿਯਾਯ ਸਵਨੇ ਉਸ੍ਸਾਹਂ ਜਨੇਤ੍ਵਾ ਇਦਾਨਿ ਤਂ ਪੁਬ੍ਬਚਰਿਤਂ ਭਵਨ੍ਤਰਪਟਿਚ੍ਛਨ੍ਨਂ ਹਤ੍ਥਤਲੇ ਆਮਲਕਂ ਵਿਯ ਪਚ੍ਚਕ੍ਖਂ ਕਰੋਨ੍ਤੋ ‘‘ਯਦਾ ਅਹਂ ਬ੍ਰਹਾਰਞ੍ਞੇ’’ਤਿਆਦਿਮਾਹ.

ਤਤ੍ਥ ਯਦਾਤਿ ਯਸ੍ਮਿਂ ਕਾਲੇ. ਬ੍ਰਹਾਰਞ੍ਞੇਤਿ ਮਹਾਅਰਞ੍ਞੇ, ਅਰਞ੍ਞਾਨਿਯਂ, ਮਹਨ੍ਤੇ ਵਨੇਤਿ ਅਤ੍ਥੋ. ਸੁਞ੍ਞੇਤਿ ਜਨਵਿਵਿਤ੍ਤੇ. ਵਿਪਿਨਕਾਨਨੇਤਿ ਵਿਪਿਨਭੂਤੇ ਕਾਨਨੇ, ਪਦਦ੍ਵਯੇਨਾਪਿ ਤਸ੍ਸ ਅਰਞ੍ਞਸ੍ਸ ਗਹਨਭਾਵਮੇਵ ਦੀਪੇਤਿ, ਸਬ੍ਬਮੇਤਂ ਕਾਰਦੀਪਂ ਸਨ੍ਧਾਯ ਵੁਤ੍ਤਂ. ਅਜ੍ਝੋਗਾਹੇਤ੍ਵਾਤਿ ਅਨੁਪਵਿਸਿਤ੍ਵਾ. ਵਿਹਰਾਮੀਤਿ ਦਿਬ੍ਬਬ੍ਰਹ੍ਮਅਰਿਯਆਨੇਞ੍ਜਵਿਹਾਰੇਹਿ ਸਮੁਪ੍ਪਾਦਿਤਸੁਖਵਿਸੇਸੇਨ ਇਰਿਯਾਪਥਵਿਹਾਰੇਨ ਸਰੀਰਦੁਕ੍ਖਂ ਵਿਚ੍ਛਿਨ੍ਦਿਤ੍ਵਾ ਹਰਾਮਿ ਅਤ੍ਤਭਾਵਂ ਪਵਤ੍ਤੇਮਿ. ਅਕਿਤ੍ਤਿ ਨਾਮ ਤਾਪਸੋਤਿ ਏਵਂਨਾਮਕੋ ਤਾਪਸੋ ਹੁਤ੍ਵਾ ਯਦਾ ਅਹਂ ਤਸ੍ਮਿਂ ਅਰਞ੍ਞੇ ਵਿਹਰਾਮੀਤਿ ਅਤ੍ਥੋ. ਸਤ੍ਥਾ ਤਦਾ ਅਤ੍ਤਨੋ ਅਕਿਤ੍ਤਿਤਾਪਸਭਾਵਂ ਧਮ੍ਮਸੇਨਾਪਤਿਸ੍ਸ ਵਦਤਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਤੀਤੇ ਕਿਰ ਇਮਸ੍ਮਿਂਯੇਵ ਭਦ੍ਦਕਪ੍ਪੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਨਾਮ ਰਾਜਿਨਿ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਸੀਤਿਕੋਟਿਵਿਭਵਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਕੁਲੇ ਨਿਬ੍ਬਤ੍ਤਿ, ‘‘ਅਕਿਤ੍ਤੀ’’ਤਿਸ੍ਸ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਗਮਨਕਾਲੇ ਭਗਿਨੀਪਿ ਜਾਯਿ. ‘‘ਯਸਵਤੀ’’ਤਿਸ੍ਸਾ ਨਾਮਂ ਕਰਿਂਸੁ. ਸੋ ਸੋਲ਼ਸਵਸ੍ਸਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਪਚ੍ਚਾਗਮਾਸਿ. ਅਥਸ੍ਸ ਮਾਤਾਪਿਤਰੋ ਕਾਲਮਕਂਸੁ. ਸੋ ਤੇਸਂ ਪੇਤਕਿਚ੍ਚਾਨਿ ਕਾਰੇਤ੍ਵਾ ਕਤਿਪਯਦਿਵਸਾਤਿਕ੍ਕਮੇਨ ਰਤਨਾਵਲੋਕਨਂ ਆਯੁਤ੍ਤਕਪੁਰਿਸੇਹਿ ਕਾਰਯਮਾਨੋ ‘‘ਏਤ੍ਤਕਂ ਮਤ੍ਤਿਕਂ, ਏਤ੍ਤਕਂ ਪੇਤ੍ਤਿਕਂ, ਏਤ੍ਤਕਂ ਪਿਤਾਮਹ’’ਨ੍ਤਿ ਸੁਤ੍ਵਾ ਸਂਵਿਗ੍ਗਮਾਨਸੋ ਹੁਤ੍ਵਾ ‘‘ਇਦਂ ਧਨਮੇਵ ਪਞ੍ਞਾਯਤਿ, ਨ ਧਨਸ੍ਸ ਸਂਹਾਰਕਾ, ਸਬ੍ਬੇ ਇਮਂ ਧਨਂ ਪਹਾਯੇਵ ਗਤਾ, ਅਹਂ ਪਨ ਨਂ ਆਦਾਯ ਗਮਿਸ੍ਸਾਮੀ’’ਤਿ ਰਾਜਾਨਂ ਆਪੁਚ੍ਛਿਤ੍ਵਾ ਭੇਰਿਂ ਚਰਾਪੇਸਿ – ‘‘ਧਨੇਨ ਅਤ੍ਥਿਕਾ ਅਕਿਤ੍ਤਿਪਣ੍ਡਿਤਸ੍ਸ ਗੇਹਂ ਆਗਚ੍ਛਨ੍ਤੂ’’ਤਿ.

ਸੋ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਧਨੇ ਅਖੀਯਮਾਨੇ ‘‘ਕਿਂ ਮੇ ਇਮਾਯ ਧਨਕੀਲ਼ਾਯ, ਅਤ੍ਥਿਕਾ ਗਣ੍ਹਿਸ੍ਸਨ੍ਤੀ’’ਤਿ ਨਿਵੇਸਨਦ੍ਵਾਰਂ ਵਿਵਰਿਤ੍ਵਾ ਹਿਰਞ੍ਞਸੁਵਣ੍ਣਾਦਿਭਰਿਤੇ ਸਾਰਗਬ੍ਭੇ ਵਿਵਰਾਪੇਤ੍ਵਾ ‘‘ਦਿਨ੍ਨਂਯੇਵ ਹਰਨ੍ਤੂ’’ਤਿ ਗੇਹਂ ਪਹਾਯ ਞਾਤਿਪਰਿਵਟ੍ਟਸ੍ਸ ਪਰਿਦੇਵਨ੍ਤਸ੍ਸ ਭਗਿਨਿਂ ਗਹੇਤ੍ਵਾ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਨਦਿਂ ਉਤ੍ਤਰਿਤ੍ਵਾ ਦ੍ਵੇ ਤੀਣਿ ਯੋਜਨਾਨਿ ਗਨ੍ਤ੍ਵਾ ਪਬ੍ਬਜਿਤ੍ਵਾ ਰਮਣੀਯੇ ਭੂਮਿਭਾਗੇ ਪਣ੍ਣਸਾਲਂ ਕਰਿਤ੍ਵਾ ਵਸਤਿ. ਯੇਨ ਪਨ ਦ੍ਵਾਰੇਨ ਤਦਾ ਨਿਕ੍ਖਮਿ, ਤਂ ਅਕਿਤ੍ਤਿਦ੍ਵਾਰਂ ਨਾਮ ਜਾਤਂ. ਯੇਨ ਤਿਤ੍ਥੇਨ ਨਦਿਂ ਓਤਿਣ੍ਣੋ, ਤਂ ਅਕਿਤ੍ਤਿਤਿਤ੍ਥਂ ਨਾਮ ਜਾਤਂ. ਤਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ਬਹੂ ਮਨੁਸ੍ਸਾ ਗਾਮਨਿਗਮਰਾਜਧਾਨਿਵਾਸਿਨੋ ਤਸ੍ਸ ਗੁਣੇਹਿ ਆਕਡ੍ਢਿਯਮਾਨਹਦਯਾ ਅਨੁਪਬ੍ਬਜਿਂਸੁ. ਮਹਾਪਰਿਵਾਰੋ ਅਹੋਸਿ, ਮਹਾਲਾਭਸਕ੍ਕਾਰੋ ਨਿਬ੍ਬਤ੍ਤਿ, ਬੁਦ੍ਧੁਪ੍ਪਾਦੋ ਵਿਯ ਅਹੋਸਿ. ਅਥ ਮਹਾਸਤ੍ਤੋ ‘‘ਅਯਂ ਲਾਭਸਕ੍ਕਾਰੋ ਮਹਾ, ਪਰਿਵਾਰੋਪਿ ਮਹਨ੍ਤੋ, ਕਾਯਵਿਵੇਕਮਤ੍ਤਮ੍ਪਿ ਇਧ ਨ ਲਭਤਿ, ਮਯਾ ਏਕਾਕਿਨਾ ਵਿਹਰਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪਰਮਪ੍ਪਿਚ੍ਛਭਾਵਤੋ ਵਿਵੇਕਨਿਨ੍ਨਤਾਯ ਚ ਕਸ੍ਸਚਿ ਅਜਾਨਾਪੇਤ੍ਵਾ ਏਕਕੋਵ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਦਮਿਲ਼ਰਟ੍ਠਂ ਪਤ੍ਵਾ ਕਾਵੀਰਪਟ੍ਟਨਸਮੀਪੇ ਉਯ੍ਯਾਨੇ ਵਿਹਰਨ੍ਤੋ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਸਿ. ਤਤ੍ਰਾਪਿਸ੍ਸ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ. ਸੋ ਤਂ ਜਿਗੁਚ੍ਛਨ੍ਤੋ ਛਡ੍ਡੇਤ੍ਵਾ ਆਕਾਸੇਨ ਗਨ੍ਤ੍ਵਾ ਕਾਰਦੀਪੇ ਓਤਰਿ. ਤਦਾ ਕਾਰਦੀਪੋ ਅਹਿਦੀਪੋ ਨਾਮ. ਸੋ ਤਤ੍ਥ ਮਹਨ੍ਤਂ ਕਾਰਰੁਕ੍ਖਂ ਉਪਨਿਸ੍ਸਾਯ ਪਣ੍ਣਸਾਲਂ ਮਾਪੇਤ੍ਵਾ ਵਾਸਂ ਕਪ੍ਪੇਸਿ. ਅਪ੍ਪਿਚ੍ਛਤਾਯ ਪਨ ਕਤ੍ਥਚਿ ਅਗਨ੍ਤ੍ਵਾ ਤਸ੍ਸ ਰੁਕ੍ਖਸ੍ਸ ਫਲਕਾਲੇ ਫਲਾਨਿ ਖਾਦਨ੍ਤੋ ਫਲੇ ਅਸਤਿ ਪਤ੍ਤਾਨਿ ਉਦਕਸਿਤ੍ਤਾਨਿ ਖਾਦਨ੍ਤੋ ਝਾਨਸਮਾਪਤ੍ਤੀਹਿ ਵੀਤਿਨਾਮੇਸਿ.

ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕੋ ਨੁ ਖੋ ਮਂ ਇਮਮ੍ਹਾ ਠਾਨਾ ਚਾਵੇਤੁਕਾਮੋ’’ਤਿ ਆਵਜ੍ਜੇਨ੍ਤੋ ਪਣ੍ਡਿਤਂ ਦਿਸ੍ਵਾ ‘‘ਕਿਮਤ੍ਥਂ ਨੁ ਖੋ ਅਯਂ ਤਾਪਸੋ ਏਵਂ ਦੁਕ੍ਕਰਂ ਤਪਂ ਚਰਤਿ, ਸਕ੍ਕਤ੍ਤਂ ਨੁ ਖੋ ਪਤ੍ਥੇਤਿ, ਉਦਾਹੁ ਅਞ੍ਞਂ, ਵੀਮਂਸਿਸ੍ਸਾਮਿ ਨਂ. ਅਯਞ੍ਹਿ ਸੁਵਿਸੁਦ੍ਧਕਾਯਵਚੀਮਨੋਸਮਾਚਾਰੋ ਜੀਵਿਤੇ ਨਿਰਪੇਕ੍ਖੋ ਉਦਕਸਿਤ੍ਤਾਨਿ ਕਾਰਪਤ੍ਤਾਨਿ ਖਾਦਤਿ, ਸਚੇ ਸਕ੍ਕਤ੍ਤਂ ਪਤ੍ਥੇਤਿ ਅਤ੍ਤਨੋ ਸਿਤ੍ਤਾਨਿ ਕਾਰਪਤ੍ਤਾਨਿ ਮਯ੍ਹਂ ਦਸ੍ਸਤਿ, ਨੋ ਚੇ, ਨ ਦਸ੍ਸਤੀ’’ਤਿ ਬ੍ਰਾਹ੍ਮਣਵਣ੍ਣੇਨ ਤਸ੍ਸ ਸਨ੍ਤਿਕਂ ਅਗਮਾਸਿ. ਬੋਧਿਸਤ੍ਤੋਪਿ ਕਾਰਪਤ੍ਤਾਨਿ ਸੇਦੇਤ੍ਵਾ ‘‘ਸੀਤਲੀਭੂਤਾਨਿ ਖਾਦਿਸ੍ਸਾਮੀ’’ਤਿ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਅਥਸ੍ਸ ਪੁਰਤੋ ਸਕ੍ਕੋ ਬ੍ਰਾਹ੍ਮਣਰੂਪੇਨ ਭਿਕ੍ਖਾਯ ਅਤ੍ਥਿਕੋ ਹੁਤ੍ਵਾ ਅਟ੍ਠਾਸਿ. ਮਹਾਸਤ੍ਤੋ ਤਂ ਦਿਸ੍ਵਾ ‘‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਚਿਰਸ੍ਸਂ ਵਤ ਮੇ ਯਾਚਕੋ ਦਿਟ੍ਠੋ’’ਤਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ‘‘ਅਜ੍ਜ ਮਮ ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ਦਾਨਂ ਦਸ੍ਸਾਮੀ’’ਤਿ ਪਕ੍ਕਭਾਜਨੇਨੇਵ ਆਦਾਯ ਗਨ੍ਤ੍ਵਾ ਦਾਨਪਾਰਮਿਂ ਆਵਜ੍ਜੇਤ੍ਵਾ ਅਤ੍ਤਨੋ ਅਸੇਸੇਤ੍ਵਾਵ ਤਸ੍ਸ ਭਿਕ੍ਖਾਭਾਜਨੇ ਪਕ੍ਖਿਪਿ. ਸਕ੍ਕੋ ਤਂ ਗਹੇਤ੍ਵਾ ਥੋਕਂ ਗਨ੍ਤ੍ਵਾ ਅਨ੍ਤਰਧਾਯਿ. ਮਹਾਸਤ੍ਤੋਪਿ ਤਸ੍ਸ ਦਤ੍ਵਾ ਪੁਨ ਪਰਿਯੇਟ੍ਠਿਂ ਅਨਾਪਜ੍ਜਿਤ੍ਵਾ ਤੇਨੇਵ ਪੀਤਿਸੁਖੇਨ ਵੀਤਿਨਾਮੇਸਿ.

ਦੁਤਿਯਦਿਵਸੇ ਪਨ ਕਾਰਪਤ੍ਤਾਨਿ ਪਚਿਤ੍ਵਾ ‘‘ਹਿਯ੍ਯੋ ਦਕ੍ਖਿਣੇਯ੍ਯਂ ਅਲਭਿਂ, ਅਜ੍ਜ ਨੁ ਖੋ ਕਥ’’ਨ੍ਤਿ ਪਣ੍ਣਸਾਲਦ੍ਵਾਰੇ ਨਿਸੀਦਿ. ਸਕ੍ਕੋਪਿ ਤਥੇਵ ਆਗਮਿ. ਮਹਾਸਤ੍ਤੋ ਪੁਨਪਿ ਤਥੇਵ ਦਤ੍ਵਾ ਵੀਤਿਨਾਮੇਸਿ. ਤਤਿਯਦਿਵਸੇ ਚ ਤਥੇਵ ਦਤ੍ਵਾ ‘‘ਅਹੋ ਵਤ ਮੇ ਲਾਭਾ, ਬਹੁਂ ਵਤ ਪੁਞ੍ਞਂ ਪਸਵਾਮਿ, ਸਚਾਹਂ ਦਕ੍ਖਿਣੇਯ੍ਯਂ ਲਭੇਯ੍ਯਂ, ਏਵਮੇਵ ਮਾਸਮ੍ਪਿ ਦ੍ਵੇਮਾਸਮ੍ਪਿ ਦਾਨਂ ਦਦੇਯ੍ਯ’’ਨ੍ਤਿ ਚਿਨ੍ਤੇਸਿ. ਤੀਸੁਪਿ ਦਿਵਸੇਸੁ ‘‘ਤੇਨ ਦਾਨੇਨ ਨ ਲਾਭਸਕ੍ਕਾਰਸਿਲੋਕਂ ਨ ਚਕ੍ਕਵਤ੍ਤਿਸਮ੍ਪਤ੍ਤਿਂ ਨ ਸਕ੍ਕਸਮ੍ਪਤ੍ਤਿਂ ਨ ਬ੍ਰਹ੍ਮਸਮ੍ਪਤ੍ਤਿਂ ਨ ਸਾਵਕਬੋਧਿਂ ਨ ਪਚ੍ਚੇਕਬੋਧਿਂ ਪਤ੍ਥੇਮਿ, ਅਪਿ ਚ ਇਦਂ ਮੇ ਦਾਨਂ ਸਬ੍ਬਞ੍ਞੁਤਞ੍ਞਾਣਸ੍ਸ ਪਚ੍ਚਯੋ ਹੋਤੂ’’ਤਿ ਯਥਾਧਿਕਾਰਂ ਚਿਤ੍ਤਂ ਠਪੇਸਿ. ਤੇਨ ਵੁਤ੍ਤਂ –

੪. ‘‘ਤਦਾ ਮਂ ਤਪਤੇਜੇਨ, ਸਨ੍ਤਤ੍ਤੋ ਤਿਦਿਵਾਭਿਭੂ;

ਧਾਰੇਨ੍ਤੋ ਬ੍ਰਾਹ੍ਮਣਵਣ੍ਣਂ, ਭਿਕ੍ਖਾਯ ਮਂ ਉਪਾਗਮਿ.

੫. ‘‘ਪਵਨਾ ਆਭਤਂ ਪਣ੍ਣਂ, ਅਤੇਲਞ੍ਚ ਅਲੋਣਿਕਂ;

ਮਮ ਦ੍ਵਾਰੇ ਠਿਤਂ ਦਿਸ੍ਵਾ, ਸਕਟਾਹੇਨ ਆਕਿਰਿਂ.

੬. ‘‘ਤਸ੍ਸ ਦਤ੍ਵਾਨਹਂ ਪਣ੍ਣਂ, ਨਿਕੁਜ੍ਜਿਤ੍ਵਾਨ ਭਾਜਨਂ;

ਪੁਨੇਸਨਂ ਜਹਿਤ੍ਵਾਨ, ਪਾਵਿਸਿਂ ਪਣ੍ਣਸਾਲਕਂ.

੭. ‘‘ਦੁਤਿਯਮ੍ਪਿ ਤਤਿਯਮ੍ਪਿ, ਉਪਗਞ੍ਛਿ ਮਮਨ੍ਤਿਕਂ;

ਅਕਮ੍ਪਿਤੋ ਅਨੋਲਗ੍ਗੋ, ਏਵਮੇਵਮਦਾਸਹਂ.

੮. ‘‘ਨ ਮੇ ਤਪ੍ਪਚ੍ਚਯਾ ਅਤ੍ਥਿ, ਸਰੀਰਸ੍ਮਿਂ ਵਿਵਣ੍ਣਿਯਂ;

ਪੀਤਿਸੁਖੇਨ ਰਤਿਯਾ, ਵੀਤਿਨਾਮੇਮਿ ਤਂ ਦਿਵਂ.

੯. ‘‘ਯਦਿ ਮਾਸਮ੍ਪਿ ਦ੍ਵੇਮਾਸਂ, ਦਕ੍ਖਿਣੇਯ੍ਯਂ ਵਰਂ ਲਭੇ;

ਅਕਮ੍ਪਿਤੋ ਅਨੋਲੀਨੋ, ਦਦੇਯ੍ਯਂ ਦਾਨਮੁਤ੍ਤਮਂ.

੧੦. ‘‘ਨ ਤਸ੍ਸ ਦਾਨਂ ਦਦਮਾਨੋ, ਯਸਂ ਲਾਭਞ੍ਚ ਪਤ੍ਥਯਿਂ;

ਸਬ੍ਬਞ੍ਞੁਤਂ ਪਤ੍ਥਯਾਨੋ, ਤਾਨਿ ਕਮ੍ਮਾਨਿ ਆਚਰਿ’’ਨ੍ਤਿ.

ਤਤ੍ਥ ਤਦਾਤਿ ਯਦਾ ਅਹਂ ਅਕਿਤ੍ਤਿਨਾਮਕੋ ਤਾਪਸੋ ਹੁਤ੍ਵਾ ਤਸ੍ਮਿਂ ਦੀਪੇ ਕਾਰਾਰਞ੍ਞੇ ਵਿਹਰਾਮਿ, ਤਦਾ. ਮਨ੍ਤਿ ਮਮ. ਤਪਤੇਜੇਨਾਤਿ ਸੀਲਪਾਰਮਿਤਾਨੁਭਾਵੇਨ. ਸੀਲਞ੍ਹਿ ਦੁਚ੍ਚਰਿਤਸਂਕਿਲੇਸਸ੍ਸ ਤਪਨਤੋ ‘‘ਤਪੋ’’ਤਿ ਵੁਚ੍ਚਤਿ, ਨੇਕ੍ਖਮ੍ਮਵੀਰਿਯਪਾਰਮਿਤਾਨੁਭਾਵੇਨ ਵਾ. ਤਾਪਿ ਹਿ ਤਣ੍ਹਾਸਂਕਿਲੇਸਸ੍ਸ ਕੋਸਜ੍ਜਸ੍ਸ ਚ ਤਪਨਤੋ ‘‘ਤਪੋ’’ਤਿ ਵੁਚ੍ਚਤਿ, ਉਕ੍ਕਂਸਗਤਾ ਚ ਤਾ ਬੋਧਿਸਤ੍ਤਸ੍ਸ ਇਮਸ੍ਮਿਂ ਅਤ੍ਤਭਾਵੇਤਿ. ਖਨ੍ਤਿਸਂਵਰਸ੍ਸ ਚਾਪਿ ਪਰਮੁਕ੍ਕਂਸਗਮਨਤੋ ‘‘ਖਨ੍ਤਿਪਾਰਮਿਤਾਨੁਭਾਵੇਨਾ’’ਤਿਪਿ ਵਤ੍ਤੁਂ ਵਟ੍ਟਤੇਵ. ‘‘ਖਨ੍ਤੀ ਪਰਮਂ ਤਪੋ’’ਤਿ (ਦੀ. ਨਿ. ੨.੯੦; ਧ. ਪ. ੧੮੪) ਹਿ ਵੁਤ੍ਤਂ. ਸਨ੍ਤਤ੍ਤੋਤਿ ਯਥਾਵੁਤ੍ਤਗੁਣਾਨੁਭਾਵਜਨਿਤੇਨ ਧਮ੍ਮਤਾਸਿਦ੍ਧੇਨ ਪਣ੍ਡੁਕਮ੍ਬਲਸਿਲਾਸਨਸ੍ਸ ਉਣ੍ਹਾਕਾਰੇਨ ਸਨ੍ਤਾਪਿਤੋ. ਤਿਦਿਵਾਭਿਭੂਤਿ ਦੇਵਲੋਕਾਧਿਪਤਿ, ਸਕ੍ਕੋਤਿ ਅਤ੍ਥੋ. ਪਣ੍ਣਸਾਲਾਯ ਸਮੀਪੇ ਗਹਿਤਮ੍ਪਿ ਕਾਰਪਣ੍ਣਂ ਪਣ੍ਣਸਾਲਾਯ ਅਰਞ੍ਞਮਜ੍ਝਗਤਤ੍ਤਾ ‘‘ਪਵਨਾ ਆਭਤ’’ਨ੍ਤਿ ਵੁਤ੍ਤਂ.

ਅਤੇਲਞ੍ਚ ਅਲੋਣਿਕਨ੍ਤਿ ਦੇਯ੍ਯਧਮ੍ਮਸ੍ਸ ਅਨੁਲ਼ਾਰਭਾਵੇਪਿ ਅਜ੍ਝਾਸਯਸਮ੍ਪਤ੍ਤਿਯਾ ਦਾਨਧਮ੍ਮਸ੍ਸ ਮਹਾਜੁਤਿਕਭਾਵਂ ਦਸ੍ਸੇਤੁਂ ਵੁਤ੍ਤਂ. ਮਮ ਦ੍ਵਾਰੇਤਿ ਮਯ੍ਹਂ ਪਣ੍ਣਸਾਲਾਯ ਦ੍ਵਾਰੇ. ਸਕਟਾਹੇਨ ਆਕਿਰਿਨ੍ਤਿ ਇਮਿਨਾ ਅਤ੍ਤਨੋ ਕਿਞ੍ਚਿਪਿ ਅਸੇਸੇਤ੍ਵਾ ਦਿਨ੍ਨਭਾਵਂ ਦਸ੍ਸੇਤਿ.

ਪੁਨੇਸਨਂ ਜਹਿਤ੍ਵਾਨਾਤਿ ‘‘ਏਕਦਿਵਸਂ ਦ੍ਵਿਕ੍ਖਤ੍ਤੁਂ ਘਾਸੇਸਨਂ ਨ ਸਲ੍ਲੇਖ’’ਨ੍ਤਿ ਚਿਨ੍ਤੇਤ੍ਵਾ ਦਾਨਪੀਤਿਯਾ ਤਿਤ੍ਤੋ ਵਿਯ ਹੁਤ੍ਵਾ ਤਸ੍ਮਿਂ ਦਿਵਸੇ ਪੁਨ ਆਹਾਰਪਰਿਯੇਟ੍ਠਿਂ ਅਕਤ੍ਵਾ.

ਅਕਮ੍ਪਿਤੋਤਿ ਸੁਦੂਰਵਿਕ੍ਖਮ੍ਭਿਤਤ੍ਤਾ ਮਚ੍ਛਰਿਯੇਨ ਅਚਲਿਤੋ ਦਾਨਜ੍ਝਾਸਯਤੋ ਚਲਨਮਤ੍ਤਮ੍ਪਿ ਅਕਾਰਿਤੋ. ਅਨੋਲਗ੍ਗੋਤਿ ਲੋਭਵਸੇਨ ਈਸਕਮ੍ਪਿ ਅਲਗ੍ਗੋ. ਤਤਿਯਮ੍ਪੀਤਿ ਪਿ-ਸਦ੍ਦੇਨ ਦੁਤਿਯਮ੍ਪੀਤਿ ਇਮਂ ਸਮ੍ਪਿਣ੍ਡੇਤਿ. ਏਵਮੇਵਮਦਾਸਹਨ੍ਤਿ ਯਥਾ ਪਠਮਂ, ਏਵਮੇਵਂ ਦੁਤਿਯਮ੍ਪਿ, ਤਤਿਯਮ੍ਪਿ ਅਦਾਸਿਂ ਅਹਂ.

ਨ ਮੇ ਤਪ੍ਪਚ੍ਚਯਾਤਿ ਗਾਥਾਯ ਵੁਤ੍ਤਮੇਵਤ੍ਥਂ ਪਾਕਟਂ ਕਰੋਤਿ. ਤਤ੍ਥ ਤਪ੍ਪਚ੍ਚਯਾਤਿ ਦਾਨਪਚ੍ਚਯਾ ਤੀਸੁ ਦਿਵਸੇਸੁ ਛਿਨ੍ਨਾਹਾਰਤਾਯ ਸਰੀਰਸ੍ਮਿਂ ਯੇਨ ਵੇਵਣ੍ਣਿਯੇਨ ਭਵਿਤਬ੍ਬਂ, ਤਮ੍ਪਿ ਮੇ ਸਰੀਰਸ੍ਮਿਂ ਵਿਵਣ੍ਣਿਯਂ ਦਾਨਪਚ੍ਚਯਾਯੇਵ ਨਤ੍ਥਿ. ਕਸ੍ਮਾ? ਦਾਨਵਿਸਯੇਨ ਪੀਤਿਸੁਖੇਨ ਦਾਨਵਿਸਯਾਯ ਏਵ ਚ ਰਤਿਯਾ. ਵੀਤਿਨਾਮੇਮਿ ਤਂ ਦਿਵਨ੍ਤਿ ਤਂ ਸਕਲਂ ਤਿਮਤ੍ਤਦਿਵਸਂ ਵੀਤਿਨਾਮੇਮਿ, ਨ ਕੇਵਲਞ੍ਚ ਤੀਣਿ ਏਵ ਦਿਵਸਾਨਿ, ਅਥ ਖੋ ਮਾਸਦ੍ਵਿਮਾਸਮਤ੍ਤਮ੍ਪਿ ਕਾਲਂ, ਏਵਮੇਵ ਦਾਤੁਂ ਪਹੋਮੀਤਿ ਦਸ੍ਸੇਤੁਂ ‘‘ਯਦਿ ਮਾਸਮ੍ਪੀ’’ਤਿਆਦਿ ਵੁਤ੍ਤਂ. ਅਨੋਲੀਨੋਤਿ ਅਲੀਨਚਿਤ੍ਤੋ, ਦਾਨੇ ਅਸਙ੍ਕੁਚਿਤਚਿਤ੍ਤੋਤਿ ਅਤ੍ਥੋ.

ਤਸ੍ਸਾਤਿ ਬ੍ਰਾਹ੍ਮਣਰੂਪੇਨ ਆਗਤਸ੍ਸ ਸਕ੍ਕਸ੍ਸ. ਯਸਨ੍ਤਿ ਕਿਤ੍ਤਿਂ, ਪਰਿਵਾਰਸਮ੍ਪਤ੍ਤਿਂ ਵਾ. ਲਾਭਞ੍ਚਾਤਿ ਦੇਵਮਨੁਸ੍ਸੇਸੁ ਚਕ੍ਕਵਤ੍ਤਿਆਦਿਭਾਵੇਨ ਲਦ੍ਧਬ੍ਬਂ ਲਾਭਂ ਵਾ ਨ ਪਤ੍ਥਯਿਂ. ਅਥ ਖੋ ਸਬ੍ਬਞ੍ਞੁਤਂ ਸਮ੍ਮਾਸਮ੍ਬੋਧਿਂ ਪਤ੍ਥਯਾਨੋ ਆਕਙ੍ਖਮਾਨੋ ਤਾਨਿ ਤੀਸੁ ਦਿਵਸੇਸੁ ਅਨੇਕਵਾਰਂ ਉਪ੍ਪਨ੍ਨਾਨਿ ਦਾਨਮਯਾਨਿ ਪੁਞ੍ਞਕਮ੍ਮਾਨਿ ਦਾਨਸ੍ਸ ਵਾ ਪਰਿਵਾਰਭੂਤਾਨਿ ਕਾਯਸੁਚਰਿਤਾਦੀਨਿ ਪੁਞ੍ਞਕਮ੍ਮਾਨਿ ਆਚਰਿਂ ਅਕਾਸਿਨ੍ਤਿ.

ਇਤਿ ਭਗਵਾ ਤਸ੍ਮਿਂ ਅਤ੍ਤਭਾਵੇ ਅਤ੍ਤਨੋ ਸੁਦੁਕ੍ਕਰਂ ਪੁਞ੍ਞਚਰਿਤਮਤ੍ਤਮੇਵ ਇਧ ਮਹਾਥੇਰਸ੍ਸ ਪਕਾਸੇਸਿ. ਜਾਤਕਦੇਸਨਾਯਂ ਪਨ ਚਤੁਤ੍ਥਦਿਵਸੇ ਸਕ੍ਕਸ੍ਸ ਉਪਸਙ੍ਕਮਿਤ੍ਵਾ ਬੋਧਿਸਤ੍ਤਸ੍ਸ ਅਜ੍ਝਾਸਯਜਾਨਨਂ ਵਰੇਨ ਉਪਨਿਮਨ੍ਤਨਾ ਬੋਧਿਸਤ੍ਤਸ੍ਸ ਵਰਸਮ੍ਪਟਿਚ੍ਛਨਸੀਸੇਨ ਧਮ੍ਮਦੇਸਨਾ ਦੇਯ੍ਯਧਮ੍ਮਦਕ੍ਖਿਣੇਯ੍ਯਾਨਂ ਪੁਨ ਸਕ੍ਕਸ੍ਸ ਅਨਾਗਮਨਸ੍ਸ ਚ ਆਕਙ੍ਖਮਾਨਤਾ ਚ ਪਕਾਸਿਤਾ. ਵੁਤ੍ਤਞ੍ਹੇਤਂ –

‘‘ਅਕਿਤ੍ਤਿਂ ਦਿਸ੍ਵਾਨ ਸਮ੍ਮਨ੍ਤਂ, ਸਕ੍ਕੋ ਭੂਤਪਤੀ ਬ੍ਰਵਿ;

ਕਿਂ ਪਤ੍ਥਯਂ ਮਹਾਬ੍ਰਹ੍ਮੇ, ਏਕੋ ਸਮ੍ਮਸਿ ਘਮ੍ਮਨਿ.

‘‘ਦੁਕ੍ਖੋ ਪੁਨਬ੍ਭਵੋ ਸਕ੍ਕ, ਸਰੀਰਸ੍ਸ ਚ ਭੇਦਨਂ;

ਸਮ੍ਮੋਹਮਰਣਂ ਦੁਕ੍ਖਂ, ਤਸ੍ਮਾ ਸਮ੍ਮਾਮਿ, ਵਾਸਵ.

‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਕਸ੍ਸਪ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਯੇਨ ਪੁਤ੍ਤੇ ਚ ਦਾਰੇ ਚ, ਧਨਧਞ੍ਞਂ ਪਿਯਾਨਿ ਚ;

ਲਦ੍ਧਾ ਨਰਾ ਨ ਤਪ੍ਪਨ੍ਤਿ, ਸੋ ਲੋਭੋ ਨ ਮਯੀ ਵਸੇ.

ਏਤਸ੍ਮਿਂ ਤੇ ਸੁਲਪਿਤੇ…ਪੇ… ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਖੇਤ੍ਤਂ ਵਤ੍ਥੁਂ ਹਿਰਞ੍ਞਞ੍ਚ, ਗਵਾਸ੍ਸਂ ਦਾਸਪੋਰਿਸਂ;

ਯੇਨ ਜਾਤੇਨ ਜੀਯਨ੍ਤਿ, ਸੋ ਦੋਸੋ ਨ ਮਯੀ ਵਸੇ.

‘‘ਏਤਸ੍ਮਿਂ ਤੇ ਸੁਲਪਿਤੇ…ਪੇ… ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਬਾਲਂ ਨ ਪਸ੍ਸੇ ਨ ਸੁਣੇ, ਨ ਚ ਬਾਲੇਨ ਸਂਵਸੇ;

ਬਾਲੇਨਲ੍ਲਾਪਸਲ੍ਲਾਪਂ, ਨ ਕਰੇ ਨ ਚ ਰੋਚਯੇ.

‘‘ਕਿਂ ਨੁ ਤੇ ਅਕਰਂ ਬਾਲੋ, ਵਦ ਕਸ੍ਸਪ ਕਾਰਣਂ;

ਕੇਨ ਕਸ੍ਸਪ ਬਾਲਸ੍ਸ, ਦਸ੍ਸਨਂ ਨਾਭਿਕਙ੍ਖਸਿ.

‘‘ਅਨਯਂ ਨਯਤਿ ਦੁਮ੍ਮੇਧੋ, ਅਧੁਰਾਯਂ ਨਿਯੁਞ੍ਜਤਿ;

ਦੁਨ੍ਨਯੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਪਕੁਪ੍ਪਤਿ;

ਵਿਨਯਂ ਸੋ ਨ ਜਾਨਾਤਿ, ਸਾਧੁ ਤਸ੍ਸ ਅਦਸ੍ਸਨਂ.

‘‘ਏਤਸ੍ਮਿਂ ਤੇ ਸੁਲਪਿਤੇ…ਪੇ… ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਧੀਰਂ ਪਸ੍ਸੇ ਸੁਣੇ ਧੀਰਂ, ਧੀਰੇਨ ਸਹ ਸਂਵਸੇ;

ਧੀਰੇਨਲ੍ਲਾਪਸਲ੍ਲਾਪਂ, ਤਂ ਕਰੇ ਤਞ੍ਚ ਰੋਚਯੇ.

‘‘ਕਿਂ ਨੁ ਤੇ ਅਕਰਂ ਧੀਰੋ, ਵਦ ਕਸ੍ਸਪ ਕਾਰਣਂ;

ਕੇਨ ਕਸ੍ਸਪ ਧੀਰਸ੍ਸ, ਦਸ੍ਸਨਂ ਅਭਿਕਙ੍ਖਸਿ.

‘‘ਨਯਂ ਨਯਤਿ ਮੇਧਾਵੀ, ਅਧੁਰਾਯਂ ਨ ਯੁਞ੍ਜਤਿ;

ਸੁਨਯੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਨ ਕੁਪ੍ਪਤਿ;

ਵਿਨਯਂ ਸੋ ਪਜਾਨਾਤਿ, ਸਾਧੁ ਤੇਨ ਸਮਾਗਮੋ.

‘‘ਏਤਸ੍ਮਿਂ ਤੇ ਸੁਲਪਿਤੇ…ਪੇ… ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਦਿਬ੍ਬਾ ਭਕ੍ਖਾ ਪਾਤੁਭਵੇਯ੍ਯੁਂ, ਸੀਲਵਨ੍ਤੋ ਚ ਯਾਚਕਾ.

‘‘ਦਦਤੋ ਮੇ ਨ ਖੀਯੇਥ, ਦਤ੍ਵਾ ਨਾਨੁਤਪੇਯ੍ਯਹਂ;

ਦਦਂ ਚਿਤ੍ਤਂ ਪਸਾਦੇਯ੍ਯਂ, ਏਤਂ ਸਕ੍ਕ ਵਰਂ ਵਰੇ.

‘‘ਏਤਸ੍ਮਿਂ ਤੇ ਸੁਲਪਿਤੇ…ਪੇ… ਮਨਸਿਚ੍ਛਸਿ.

‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨ ਮਂ ਪੁਨ ਉਪੇਯ੍ਯਾਸਿ, ਏਤਂ ਸਕ੍ਕ ਵਰਂ ਵਰੇ.

‘‘ਬਹੂਹਿ ਵਤਚਰਿਯਾਹਿ, ਨਰਾ ਚ ਅਥ ਨਾਰਿਯੋ;

ਦਸ੍ਸਨਂ ਅਭਿਕਙ੍ਖਨ੍ਤਿ, ਕਿਂ ਨੁ ਮੇ ਦਸ੍ਸਨੇ ਭਯਂ.

‘‘ਤਂ ਤਾਦਿਸਂ ਦੇਵਵਣ੍ਣਂ, ਸਬ੍ਬਕਾਮਸਮਿਦ੍ਧਿਨਂ;

ਦਿਸ੍ਵਾ ਤਪੋ ਪਮਜ੍ਜੇਯ੍ਯਂ, ਏਤਂ ਤੇ ਦਸ੍ਸਨੇ ਭਯ’’ਨ੍ਤਿ. (ਜਾ. ੧.੧੩.੮੩-੧੦੩);

ਅਥ ਸਕ੍ਕੋ ‘‘ਸਾਧੁ, ਭਨ੍ਤੇ, ਨ ਤੇ ਇਤੋ ਪਟ੍ਠਾਯ ਸਨ੍ਤਿਕਂ ਆਗਮਿਸ੍ਸਾਮੀ’’ਤਿ ਤਂ ਅਭਿਵਾਦੇਤ੍ਵਾ ਪਕ੍ਕਾਮਿ. ਮਹਾਸਤ੍ਤੋ ਯਾਵਜੀਵਂ ਤਤ੍ਥੇਵ ਵਸਨ੍ਤੋ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.

ਅਨੁਰੁਦ੍ਧਤ੍ਥੇਰੋ ਤਦਾ ਸਕ੍ਕੋ ਅਹੋਸਿ, ਲੋਕਨਾਥੋ ਅਕਿਤ੍ਤਿਪਣ੍ਡਿਤੋ.

ਤਸ੍ਸ ਮਹਾਭਿਨਿਕ੍ਖਮਨਸਦਿਸਂ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਪਾਰਮੀ. ਸੁਵਿਸੁਦ੍ਧਸੀਲਾਚਾਰਤਾਯ ਸੀਲਪਾਰਮੀ. ਕਾਮਵਿਤਕ੍ਕਾਦੀਨਂ ਸੁਟ੍ਠੁ ਵਿਕ੍ਖਮ੍ਭਿਤਤ੍ਤਾ ਵੀਰਿਯਪਾਰਮੀ. ਖਨ੍ਤਿਸਂਵਰਸ੍ਸ ਪਰਮੁਕ੍ਕਂਸਗਮਨਤੋ ਖਨ੍ਤਿਪਾਰਮੀ. ਪਟਿਞ੍ਞਾਨੁਰੂਪਂ ਪਟਿਪਤ੍ਤਿਯਾ ਸਚ੍ਚਪਾਰਮੀ. ਸਬ੍ਬਤ੍ਥ ਅਚਲਸਮਾਦਾਨਾਧਿਟ੍ਠਾਨੇਨ ਅਧਿਟ੍ਠਾਨਪਾਰਮੀ. ਸਬ੍ਬਸਤ੍ਤੇਸੁ ਹਿਤਜ੍ਝਾਸਯੇਨ ਮੇਤ੍ਤਾਪਾਰਮੀ. ਸਤ੍ਤਸਙ੍ਖਾਰਕਤਵਿਪ੍ਪਕਾਰੇਸੁ ਮਜ੍ਝਤ੍ਤਭਾਵਪ੍ਪਤ੍ਤਿਯਾ ਉਪੇਕ੍ਖਾਪਾਰਮੀ. ਤਾਸਂ ਉਪਕਾਰਾਨੁਪਕਾਰੇ ਧਮ੍ਮੇ ਜਾਨਿਤ੍ਵਾ ਅਨੁਪਕਾਰੇ ਧਮ੍ਮੇ ਪਹਾਯ ਉਪਕਾਰਧਮ੍ਮੇਸੁ ਪਵਤ੍ਤਾਪਨਪੁਰੇਚਰਾ ਸਹਜਾਤਾ ਚ ਉਪਾਯਕੋਸਲ੍ਲਭੂਤਾ ਅਤਿਸਲ੍ਲੇਖਵੁਤ੍ਤਿਸਾਧਨੀ ਚ ਪਞ੍ਞਾ ਪਞ੍ਞਾਪਾਰਮੀਤਿ ਇਮਾਪਿ ਦਸ ਪਾਰਮਿਯੋ ਲਬ੍ਭਨ੍ਤਿ.

ਦਾਨਜ੍ਝਾਸਯਸ੍ਸ ਪਨ ਅਤਿਉਲ਼ਾਰਭਾਵੇਨ ਦਾਨਮੁਖੇਨ ਦੇਸਨਾ ਪਵਤ੍ਤਾ. ਤਸ੍ਮਾ ਸਬ੍ਬਤ੍ਥ ਸਮਕਾ ਮਹਾਕਰੁਣਾ, ਦ੍ਵੇਪਿ ਪੁਞ੍ਞਞਾਣਸਮ੍ਭਾਰਾ, ਕਾਯਸੁਚਰਿਤਾਦੀਨਿ ਤੀਣਿ ਬੋਧਿਸਤ੍ਤਸੁਚਰਿਤਾਨਿ, ਸਚ੍ਚਾਧਿਟ੍ਠਾਨਾਦੀਨਿ ਚਤ੍ਤਾਰਿ ਅਧਿਟ੍ਠਾਨਾਨਿ, ਉਸ੍ਸਾਹਾਦਯੋ ਚਤਸ੍ਸੋ ਬੁਦ੍ਧਭੂਮਿਯੋ, ਸਦ੍ਧਾਦਯੋ ਪਞ੍ਚ ਮਹਾਬੋਧਿਪਰਿਪਾਚਨੀਯਾ ਧਮ੍ਮਾ, ਅਲੋਭਜ੍ਝਾਸਯਾਦਯੋ ਛ ਬੋਧਿਸਤ੍ਤਾਨਂ ਅਜ੍ਝਾਸਯਾ, ਤਿਣ੍ਣੋ ਤਾਰੇਸ੍ਸਾਮੀਤਿਆਦਯੋ ਸਤ੍ਤ ਪਟਿਞ੍ਞਾ ਧਮ੍ਮਾ, ਅਪ੍ਪਿਚ੍ਛਸ੍ਸਾਯਂ ਧਮ੍ਮੋ, ਨਾਯਂ ਧਮ੍ਮੋ ਮਹਿਚ੍ਛਸ੍ਸਾਤਿਆਦਯੋ (ਦੀ. ਨਿ. ੩.੩੫੮; ਅ. ਨਿ. ੮.੩੦) ਅਟ੍ਠ ਮਹਾਪੁਰਿਸਵਿਤਕ੍ਕਾ (ਦੀ. ਨਿ. ੩.੩੫੮), ਨਵ ਯੋਨਿਸੋਮਨਸਿਕਾਰਮੂਲਕਾ ਧਮ੍ਮਾ, ਦਾਨਜ੍ਝਾਸਯਾਦਯੋ ਦਸ ਮਹਾਪੁਰਿਸਜ੍ਝਾਸਯਾ, ਦਾਨਸੀਲਾਦਯੋ ਦਸ ਪੁਞ੍ਞਕਿਰਿਯਵਤ੍ਥੂਨੀਤਿ ਏਵਮਾਦਯੋ ਯੇ ਅਨੇਕਸਤਅਨੇਕਸਹਸ੍ਸਪ੍ਪਭੇਦਾ ਬੋਧਿਸਮ੍ਭਾਰਭੂਤਾ ਮਹਾਬੋਧਿਸਤ੍ਤਗੁਣਾ. ਤੇ ਸਬ੍ਬੇਪਿ ਯਥਾਰਹਂ ਇਧ ਨਿਦ੍ਧਾਰੇਤ੍ਵਾ ਵਤ੍ਤਬ੍ਬਾ.

ਅਪਿ ਚੇਤ੍ਥ ਮਹਨ੍ਤਂ ਭੋਗਕ੍ਖਨ੍ਧਂ ਮਹਨ੍ਤਞ੍ਚ ਞਾਤਿਪਰਿਵਟ੍ਟਂ ਪਹਾਯ ਮਹਾਭਿਨਿਕ੍ਖਮਨਸਦਿਸਂ ਗੇਹਤੋ ਨਿਕ੍ਖਮਨਂ, ਨਿਕ੍ਖਮਿਤ੍ਵਾ ਪਬ੍ਬਜਿਤਸ੍ਸ ਬਹੁਜਨਸਮ੍ਮਤਸ੍ਸ ਸਤੋ ਪਰਮਪ੍ਪਿਚ੍ਛਭਾਵੇਨ ਕੁਲੇਸੁ ਗਣੇਸੁ ਚ ਅਲਗ੍ਗਤਾ, ਅਚ੍ਚਨ੍ਤਮੇਵ ਲਾਭਸਕ੍ਕਾਰਸਿਲੋਕਜਿਗੁਚ੍ਛਾ, ਪਵਿਵੇਕਾਭਿਰਤਿ, ਕਾਯਜੀਵਿਤਨਿਰਪੇਕ੍ਖੋ ਪਰਿਚ੍ਚਾਗੋ, ਅਨਾਹਾਰਸ੍ਸੇਵ ਸਤੋ ਦਿਵਸਤ੍ਤਯਮ੍ਪਿ ਦਾਨਪੀਤਿਯਾ ਪਰਿਤੁਟ੍ਠਸ੍ਸ ਨਿਬ੍ਬਿਕਾਰਸਰੀਰਯਾਪਨਂ, ਮਾਸਦ੍ਵਿਮਾਸਮਤ੍ਤਮ੍ਪਿ ਕਾਲਂ ਯਾਚਕੇ ਸਤਿ ਆਹਾਰਂ ਤਥੇਵ ਦਤ੍ਵਾ ‘‘ਦਾਨਗਤੇਨੇਵ ਪੀਤਿਸੁਖੇਨ ਸਰੀਰਂ ਯਾਪੇਸ੍ਸਾਮੀ’’ਤਿ ਪਰਿਚ੍ਚਾਗੇ ਅਨੋਲੀਨਵੁਤ੍ਤਿਸਾਧਕੋ ਉਲ਼ਾਰੋ ਦਾਨਜ੍ਝਾਸਯੋ, ਦਾਨਂ ਦਤ੍ਵਾ ਪੁਨ ਆਹਾਰਪਰਿਯੇਟ੍ਠਿਯਾ ਅਕਰਣਹੇਤੁਭੂਤਾ ਪਰਮਸਲ੍ਲੇਖਵੁਤ੍ਤੀਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵੇਦਿਤਬ੍ਬਾ. ਤੇਨੇਤਂ ਵੁਚ੍ਚਤਿ –

‘‘ਏਵਂ ਅਚ੍ਛਰਿਯਾ ਹੇਤੇ, ਅਬ੍ਭੁਤਾ ਚ ਮਹੇਸਿਨੋ;

ਮਹਾਕਾਰੁਣਿਕਾ ਧੀਰਾ, ਸਬ੍ਬਲੋਕੇਕਬਨ੍ਧਵਾ.

‘‘ਅਚਿਨ੍ਤੇਯ੍ਯਾਨੁਭਾਵਾ ਚ, ਸਦਾ ਸਦ੍ਧਮ੍ਮਗੋਚਰਾ;

ਬੋਧਿਸਤ੍ਤਾ ਮਹਾਸਤ੍ਤਾ, ਸੁਚਿਸਲ੍ਲੇਖਵੁਤ੍ਤਿਨੋ.

‘‘ਮਹਾਵਾਤਸਮੁਦ੍ਧਤ-ਵੀਚਿਮਾਲੋ ਮਹੋਦਧਿ;

ਅਪਿ ਲਙ੍ਘੇਯ੍ਯ ਵੇਲਨ੍ਤਂ, ਬੋਧਿਸਤ੍ਤਾ ਨ ਧਮ੍ਮਤਂ.

‘‘ਲੋਕੇ ਸਞ੍ਜਾਤਵਦ੍ਧਾਪਿ, ਨ ਤੇ ਭਾਵਿਤਭਾਵਿਨੋ;

ਲਿਮ੍ਪਨ੍ਤਿ ਲੋਕਧਮ੍ਮੇਹਿ, ਤੋਯੇਨ ਪਦੁਮਂ ਯਥਾ.

‘‘ਯੇਸਂ ਵੇ ਅਤ੍ਤਨਿ ਸ੍ਨੇਹੋ, ਨਿਹੀਯਤਿ ਯਥਾ ਯਥਾ;

ਸਤ੍ਤੇਸੁ ਕਰੁਣਾਸ੍ਨੇਹੋ, ਵਡ੍ਢਤੇਵ ਤਥਾ ਤਥਾ.

‘‘ਯਥਾ ਚਿਤ੍ਤਂ ਵਸੇ ਹੋਤਿ, ਨ ਚ ਚਿਤ੍ਤਵਸਾਨੁਗਾ;

ਤਥਾ ਕਮ੍ਮਂ ਵਸੇ ਹੋਤਿ, ਨ ਚ ਕਮ੍ਮਵਸਾਨੁਗਾ.

‘‘ਦੋਸੇਹਿ ਨਾਭਿਭੂਯਨ੍ਤਿ, ਸਮੁਗ੍ਘਾਤੇਨ੍ਤਿ ਵਾ ਨ ਤੇ;

ਚਰਨ੍ਤਾ ਬੋਧਿਪਰਿਯੇਟ੍ਠਿਂ, ਪੁਰਿਸਾਜਾਨਿਯਾ ਬੁਧਾ.

‘‘ਤੇਸੁ ਚਿਤ੍ਤਪ੍ਪਸਾਦੋਪਿ, ਦੁਕ੍ਖਤੋ ਪਰਿਮੋਚਯੇ;

ਪਗੇਵਾਨੁਕਿਰਿਯਾ ਤੇਸਂ, ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਪਰਮਤ੍ਥਦੀਪਨਿਯਾ ਚਰਿਯਾਪਿਟਕਸਂਵਣ੍ਣਨਾਯ

ਅਕਿਤ੍ਤਿਚਰਿਯਾਵਣ੍ਣਨਾ ਨਿਟ੍ਠਿਤਾ.

੨. ਸਙ੍ਖਬ੍ਰਾਹ੍ਮਣਚਰਿਯਾਵਣ੍ਣਨਾ

੧੧-੧੨. ਦੁਤਿਯਸ੍ਮਿਂ ਪੁਨਾਪਰਨ੍ਤਿ ਪੁਨ ਅਪਰਂ, ਨ ਕੇਵਲਮਿਦਂ ਅਕਿਤ੍ਤਿਚਰਿਯਮੇਵ, ਅਥ ਖੋ ਪੁਨ ਅਪਰਂ ਅਞ੍ਞਂ ਸਙ੍ਖਚਰਿਯਮ੍ਪਿ ਪਵਕ੍ਖਿਸ੍ਸਂ, ਸੁਣੋਹੀਤਿ ਅਧਿਪ੍ਪਾਯੋ. ਇਤੋ ਪਰੇਸੁਪਿ ਏਸੇਵ ਨਯੋ. ਸਙ੍ਖਸਵ੍ਹਯੋਤਿ ਸਙ੍ਖਨਾਮੋ. ਮਹਾਸਮੁਦ੍ਦਂ ਤਰਿਤੁਕਾਮੋਤਿ ਸੁਵਣ੍ਣਭੂਮਿਂ ਗਨ੍ਤੁਂ ਨਾਵਾਯ ਮਹਾਸਮੁਦ੍ਦਂ ਤਰਿਤੁਕਾਮੋ. ਉਪਗਚ੍ਛਾਮਿ ਪਟ੍ਟਨਨ੍ਤਿ ਤਾਮਲਿਤ੍ਤਿਪਟ੍ਟਨਂ ਉਦ੍ਦਿਸ੍ਸ ਗਚ੍ਛਾਮਿ. ਸਯਮ੍ਭੁਞਾਣੇਨ ਪਚ੍ਚੇਕਬੋਧਿਯਾ ਅਧਿਗਤਤ੍ਤਾ ਸਯਮੇਵ ਭੂਤਨ੍ਤਿ ਸਯਮ੍ਭੁਂ. ਕਿਲੇਸਮਾਰਾਦੀਸੁ ਕੇਨਚਿਪਿ ਨ ਪਰਾਜਿਤਨ੍ਤਿ ਅਪਰਾਜਿਤਂ, ਤਿਣ੍ਣਂ ਮਾਰਾਨਂ ਮਤ੍ਥਕਂ ਮਦ੍ਦਿਤ੍ਵਾ ਠਿਤਨ੍ਤਿ ਅਤ੍ਥੋ. ਤਤ੍ਤਾਯ ਕਠਿਨਭੂਮਿਯਾਤਿ ਘਮ੍ਮਸਨ੍ਤਾਪੇਨ ਸਨ੍ਤਤ੍ਤਾਯ ਸਕ੍ਖਰਵਾਲੁਕਾਨਿਚਿਤਤ੍ਤਾ ਖਰਾਯ ਕਕ੍ਖਲ਼ਾਯ ਭੂਮਿਯਾ.

੧੩. ਤਨ੍ਤਿ ਤਂ ਪਚ੍ਚੇਕਬੁਦ੍ਧਂ. ਇਮਮਤ੍ਥਨ੍ਤਿ ਇਮਂ ਇਦਾਨਿ ਵਕ੍ਖਮਾਨਂ ‘‘ਇਦਂ ਖੇਤ੍ਤ’’ਨ੍ਤਿਆਦਿਕਂ ਅਤ੍ਥਂ. ਵਿਚਿਨ੍ਤਯਿਨ੍ਤਿ ਤਦਾ ਸਙ੍ਖਬ੍ਰਾਹ੍ਮਣਭੂਤੋ ਚਿਨ੍ਤੇਸਿਨ੍ਤਿ ਸਤ੍ਥਾ ਵਦਤਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਤੀਤੇ ਅਯਂ ਬਾਰਾਣਸੀ ਮੋਲ਼ਿਨੀ ਨਾਮ ਅਹੋਸਿ. ਮੋਲ਼ਿਨੀਨਗਰੇ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸਙ੍ਖੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਅਡ੍ਢੋ ਮਹਦ੍ਧਨੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਅਤ੍ਤਨੋ ਨਿਵੇਸਨਦ੍ਵਾਰੇਤਿ ਛਸੁ ਠਾਨੇਸੁ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਾਨਿ ਵਿਸ੍ਸਜ੍ਜੇਨ੍ਤੋ ਕਪਣਦ੍ਧਿਕਾਦੀਨਂ ਮਹਾਦਾਨਂ ਪਵਤ੍ਤੇਸਿ. ਸੋ ਏਕਦਿਵਸਂ ਚਿਨ੍ਤੇਸਿ – ‘‘ਅਹਂ ਗੇਹੇ ਧਨੇ ਖੀਣੇ ਦਾਨਂ ਦਾਤੁਂ ਨ ਸਕ੍ਖਿਸ੍ਸਾਮਿ, ਅਪਰਿਕ੍ਖੀਣੇਯੇਵ ਧਨੇ ਨਾਵਾਯ ਸੁਵਣ੍ਣਭੂਮਿਂ ਗਨ੍ਤ੍ਵਾ ਧਨਂ ਆਹਰਿਸ੍ਸਾਮੀ’’ਤਿ. ਸੋ ਨਾਵਂ ਭਣ੍ਡਸ੍ਸ ਪੂਰਾਪੇਤ੍ਵਾ ਪੁਤ੍ਤਦਾਰਂ ਆਮਨ੍ਤੇਤ੍ਵਾ ‘‘ਯਾਵਾਹਂ ਆਗਚ੍ਛਿਸ੍ਸਾਮਿ, ਤਾਵ ਮੇ ਦਾਨਂ ਅਨੁਪਚ੍ਛਿਨ੍ਦਨ੍ਤਾ ਪਵਤ੍ਤੇਯ੍ਯਾਥਾ’’ਤਿ ਵਤ੍ਵਾ ਦਾਸਕਮ੍ਮਕਰਪਰਿਵੁਤੋ ਉਪਾਹਨਂ ਆਰੁਯ੍ਹ ਛਤ੍ਤੇਨ ਧਾਰਿਯਮਾਨੇਨ ਪਟ੍ਟਨਗਾਮਾਭਿਮੁਖੋ ਪਾਯਾਸਿ.

ਤਸ੍ਮਿਂ ਖਣੇ ਗਨ੍ਧਮਾਦਨੇ ਏਕੋ ਪਚ੍ਚੇਕਬੁਦ੍ਧੋ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਤਂ ਧਨਾਹਰਣਤ੍ਥਂ ਗਚ੍ਛਨ੍ਤਂ ਦਿਸ੍ਵਾ ‘‘ਮਹਾਪੁਰਿਸੋ ਧਨਂ ਆਹਰਿਤੁਂ ਗਚ੍ਛਤਿ, ਭਵਿਸ੍ਸਤਿ ਨੁ ਖੋ ਅਸ੍ਸ ਮਹਾਸਮੁਦ੍ਦੇ ਅਨ੍ਤਰਾਯੋ, ਨੋ’’ਤਿ ਆਵਜ੍ਜੇਤ੍ਵਾ ‘‘ਭਵਿਸ੍ਸਤੀ’’ਤਿ ਞਤ੍ਵਾ ‘‘ਏਸ ਮਂ ਦਿਸ੍ਵਾ ਛਤ੍ਤਞ੍ਚ ਉਪਾਹਨਞ੍ਚ ਮਯ੍ਹਂ ਦਤ੍ਵਾ ਉਪਾਹਨਦਾਨਨਿਸ੍ਸਨ੍ਦੇਨ ਸਮੁਦ੍ਦੇ ਭਿਨ੍ਨਾਯ ਨਾਵਾਯ ਪਤਿਟ੍ਠਂ ਲਭਿਸ੍ਸਤਿ, ਕਰਿਸ੍ਸਾਮਿਸ੍ਸ ਅਨੁਗ੍ਗਹ’’ਨ੍ਤਿ ਆਕਾਸੇਨ ਗਨ੍ਤ੍ਵਾ ਤਸ੍ਸ ਅਵਿਦੂਰੇ ਓਤਰਿਤ੍ਵਾ ਮਜ੍ਝਨ੍ਹਿਕਸਮਯੇ ਚਣ੍ਡਵਾਤਾਤਪੇਨ ਅਙ੍ਗਾਰਸਨ੍ਥਤਸਦਿਸਂ ਉਣ੍ਹਵਾਲੁਕਂ ਮਦ੍ਦਨ੍ਤੋ ਤਸ੍ਸ ਅਭਿਮੁਖਂ ਆਗਞ੍ਛਿ. ਸੋ ਤਂ ਦਿਸ੍ਵਾਵ ਹਟ੍ਠਤੁਟ੍ਠੋ ‘‘ਪੁਞ੍ਞਕ੍ਖੇਤ੍ਤਂ ਮੇ ਆਗਤਂ, ਅਜ੍ਜ ਮਯਾ ਏਤ੍ਥ ਬੀਜਂ ਰੋਪੇਤੁਂ ਵਟ੍ਟਤੀ’’ਤਿ ਚਿਨ੍ਤੇਸਿ. ਤੇਨ ਵੁਤ੍ਤਂ ‘‘ਤਮਹਂ ਪਟਿਪਥੇ ਦਿਸ੍ਵਾ, ਇਮਮਤ੍ਥਂ ਵਿਚਿਨ੍ਤਯਿ’’ਨ੍ਤਿਆਦਿ.

ਤਤ੍ਥ ਇਦਂ ਖੇਤ੍ਤਨ੍ਤਿਆਦਿ ਚਿਨ੍ਤਿਤਾਕਾਰਦਸ੍ਸਨਂ. ਖੇਤ੍ਤਨ੍ਤਿ ਖਿਤ੍ਤਂ ਬੀਜਂ ਮਹਪ੍ਫਲਭਾਵਕਰਣੇਨ ਤਾਯਤੀਤਿ ਖੇਤ੍ਤਂ, ਪੁਬ੍ਬਣ੍ਣਾਪਰਣ੍ਣਵਿਰੁਹਨਭੂਮਿ. ਇਧ ਪਨ ਖੇਤ੍ਤਂ ਵਿਯਾਤਿ ਖੇਤ੍ਤਂ, ਅਗ੍ਗਦਕ੍ਖਿਣੇਯ੍ਯੋ ਪਚ੍ਚੇਕਬੁਦ੍ਧੋ. ਤੇਨੇਵਾਹ ‘‘ਪੁਞ੍ਞਕਾਮਸ੍ਸ ਜਨ੍ਤੁਨੋ’’ਤਿ.

੧੪. ਮਹਾਗਮਨ੍ਤਿ ਵਿਪੁਲਫਲਾਗਮਂ, ਸਸ੍ਸਸਮ੍ਪਤ੍ਤਿਦਾਯਕਨ੍ਤਿ ਅਤ੍ਥੋ. ਬੀਜਂ ਨ ਰੋਪੇਤੀਤਿ ਬੀਜਂ ਨ ਵਪਤਿ.

੧੫. ਖੇਤ੍ਤਵਰੁਤ੍ਤਮਨ੍ਤਿ ਖੇਤ੍ਤਵਰੇਸੁਪਿ ਉਤ੍ਤਮਂ. ਸੀਲਾਦਿਗੁਣਸਮ੍ਪਨ੍ਨਾ ਹਿ ਵਿਸੇਸਤੋ ਅਰਿਯਸਾਵਕਾ ਖੇਤ੍ਤਵਰਾ, ਤਤੋਪਿ ਅਗ੍ਗਭੂਤੋ ਪਚ੍ਚੇਕਬੁਦ੍ਧੋ ਖੇਤ੍ਤਵਰੁਤ੍ਤਮੋ. ਕਾਰਨ੍ਤਿ ਸਕ੍ਕਾਰਂ. ਯਦਿ ਨ ਕਰੋਮੀਤਿ ਸਮ੍ਬਨ੍ਧੋ. ਇਦਂ ਵੁਤ੍ਤਂ ਹੋਤਿ – ਇਦਮੀਦਿਸਂ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲਭਿਤ੍ਵਾ ਤਤ੍ਥ ਪੂਜਾਸਕ੍ਕਾਰਂ ਯਦਿ ਨ ਕਰੋਮਿ, ਪੁਞ੍ਞੇਨ ਅਤ੍ਥਿਕੋ ਨਾਮਾਹਂ ਨ ਭਵੇਯ੍ਯਨ੍ਤਿ.

੧੬-੧੭. ਯਥਾ ਅਮਚ੍ਚੋਤਿਆਦੀਨਂ ਦ੍ਵਿਨ੍ਨਂ ਗਾਥਾਨਂ ਅਯਂ ਸਙ੍ਖੇਪਤ੍ਥੋ – ਯਥਾ ਨਾਮ ਯੋ ਕੋਚਿ ਰਞ੍ਞਾ ਮੁਦ੍ਦਾਧਿਕਾਰੇ ਠਪਿਤੋ ਲਞ੍ਛਨਧਰੋ ਅਮਚ੍ਚਪੁਰਿਸੋ ਸੇਨਾਪਤਿ ਵਾ ਸੋ ਅਨ੍ਤੇਪੁਰੇ ਜਨੇ ਬਹਿਦ੍ਧਾ ਚ ਬਲਕਾਯਾਦੀਸੁ ਰਞ੍ਞੋ ਯਥਾਨੁਸਿਟ੍ਠਂ ਨ ਪਟਿਪਜ੍ਜਤਿ ਨ ਤੇਸਂ ਧਨਧਞ੍ਞਂ ਦੇਤਿ, ਤਂ ਤਂ ਕਤ੍ਤਬ੍ਬਂ ਵਤ੍ਤਂ ਪਰਿਹਾਪੇਤਿ. ਸੋ ਮੁਦ੍ਦਿਤੋ ਪਰਿਹਾਯਤਿ ਮੁਦ੍ਦਾਧਿਕਾਰਲਦ੍ਧਵਿਭਵਤੋ ਪਰਿਧਂਸਤਿ, ਏਵਮੇਵ ਅਹਮ੍ਪਿ ਪੁਞ੍ਞਕਮ੍ਮਸ੍ਸ ਰਤੋ ਲਦ੍ਧਬ੍ਬਪੁਞ੍ਞਫਲਸਙ੍ਖਾਤਂ ਪੁਞ੍ਞਕਾਮੋ ਦਕ੍ਖਿਣਾਯ ਵਿਪੁਲਫਲਭਾਵਕਰਣੇਨ ਵਿਪੁਲਂ ਦਿਸ੍ਵਾਨ ਤਂ ਦਕ੍ਖਿਣਂ ਉਲ਼ਾਰਂ ਦਕ੍ਖਿਣੇਯ੍ਯਂ ਲਭਿਤ੍ਵਾ ਤਸ੍ਸ ਦਾਨਂ ਯਦਿ ਨ ਦਦਾਮਿ ਪੁਞ੍ਞਤੋ ਆਯਤਿਂ ਪੁਞ੍ਞਫਲਤੋ ਚ ਪਰਿਧਂਸਾਮਿ. ਤਸ੍ਮਾ ਇਧ ਮਯਾ ਪੁਞ੍ਞਂ ਕਾਤਬ੍ਬਮੇਵਾਤਿ.

ਏਵਂ ਪਨ ਚਿਨ੍ਤੇਤ੍ਵਾ ਮਹਾਪੁਰਿਸੋ ਦੂਰਤੋਵ ਉਪਾਹਨਾ ਓਰੋਹਿਤ੍ਵਾ ਵੇਗੇਨ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਤ੍ਥਾਯ ਇਮਂ ਰੁਕ੍ਖਮੂਲਂ ਉਪਗਚ੍ਛਥਾ’’ਤਿ ਵਤ੍ਵਾ ਤਸ੍ਮਿਂ ਰੁਕ੍ਖਮੂਲਂ ਉਪਸਙ੍ਕਮਨ੍ਤੇ ਤਤ੍ਥ ਵਾਲੁਕਂ ਉਸ੍ਸਾਪੇਤ੍ਵਾ ਉਤ੍ਤਰਾਸਙ੍ਗਂ ਪਞ੍ਞਾਪੇਤ੍ਵਾ ਪਚ੍ਚੇਕਬੁਦ੍ਧੇ ਤਤ੍ਥ ਨਿਸਿਨ੍ਨੇ ਵਨ੍ਦਿਤ੍ਵਾ ਵਾਸਿਤਪਰਿਸ੍ਸਾਵਿਤੇਨ ਉਦਕੇਨ ਤਸ੍ਸ ਪਾਦੇ ਧੋਵਿਤ੍ਵਾ, ਗਨ੍ਧਤੇਲੇਨ ਮਕ੍ਖੇਤ੍ਵਾ, ਅਤ੍ਤਨੋ ਉਪਾਹਨਂ ਪੁਞ੍ਛਿਤ੍ਵਾ, ਗਨ੍ਧਤੇਲੇਨ ਮਕ੍ਖੇਤ੍ਵਾ, ਤਸ੍ਸ ਪਾਦੇ ਪਟਿਮੁਞ੍ਚਿਤ੍ਵਾ ‘‘ਭਨ੍ਤੇ, ਇਮਂ ਉਪਾਹਨਂ ਆਰੁਯ੍ਹ, ਇਮਂ ਛਤ੍ਤਂ ਮਤ੍ਥਕੇ ਕਤ੍ਵਾ ਗਚ੍ਛਥਾ’’ਤਿ ਛਤ੍ਤੁਪਾਹਨਂ ਅਦਾਸਿ. ਸੋਪਿਸ੍ਸ ਅਨੁਗ੍ਗਹਤ੍ਥਾਯ ਤਂ ਗਹੇਤ੍ਵਾ ਪਸਾਦਸਂਵਡ੍ਢਨਤ੍ਥਂ ਪਸ੍ਸਨ੍ਤਸ੍ਸੇਵ ਵੇਹਾਸਂ ਉਪ੍ਪਤਿਤ੍ਵਾ ਗਨ੍ਧਮਾਦਨਂ ਅਗਮਾਸਿ. ਤੇਨ ਵੁਤ੍ਤਂ –

੧੮. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਓਰੋਹਿਤ੍ਵਾ ਉਪਾਹਨਾ;

ਤਸ੍ਸ ਪਾਦਾਨਿ ਵਨ੍ਦਿਤ੍ਵਾ, ਅਦਾਸਿਂ ਛਤ੍ਤੁਪਾਹਨ’’ਨ੍ਤਿ.

ਬੋਧਿਸਤ੍ਤੋ ਤਂ ਦਿਸ੍ਵਾ ਅਤਿਵਿਯ ਪਸਨ੍ਨਚਿਤ੍ਤੋ ਪਟ੍ਟਨਂ ਗਨ੍ਤ੍ਵਾ ਨਾਵਂ ਅਭਿਰੁਹਿ. ਅਥਸ੍ਸ ਮਹਾਸਮੁਦ੍ਦਂ ਤਰਨ੍ਤਸ੍ਸ ਸਤ੍ਤਮੇ ਦਿਵਸੇ ਨਾਵਾ ਵਿਵਰਮਦਾਸਿ. ਉਦਕਂ ਉਸ੍ਸਿਞ੍ਚਿਤੁਂ ਨਾਸਕ੍ਖਿਂਸੁ. ਮਹਾਜਨੋ ਮਰਣਭਯਭੀਤੋ ਅਤ੍ਤਨੋ ਅਤ੍ਤਨੋ ਦੇਵਤਾ ਨਮਸ੍ਸਿਤ੍ਵਾ ਮਹਾਵਿਰਵਂ ਵਿਰਵਿ. ਬੋਧਿਸਤ੍ਤੋ ਏਕਂ ਉਪਟ੍ਠਾਕਂ ਗਹੇਤ੍ਵਾ ਸਕਲਸਰੀਰਂ ਤੇਲੇਨ ਮਕ੍ਖੇਤ੍ਵਾ ਸਪ੍ਪਿਨਾ ਸਦ੍ਧਿਂ ਸਕ੍ਖਰਚੁਣ੍ਣਾਨਿ ਯਾਵਦਤ੍ਥਂ ਖਾਦਿਤ੍ਵਾ ਤਮ੍ਪਿ ਖਾਦਾਪੇਤ੍ਵਾ ਤੇਨ ਸਦ੍ਧਿਂ ਕੂਪਕਯਟ੍ਠਿਮਤ੍ਥਕਂ ਆਰੁਯ੍ਹ ‘‘ਇਮਾਯ ਦਿਸਾਯ ਅਮ੍ਹਾਕਂ ਨਗਰ’’ਨ੍ਤਿ ਦਿਸਂ ਵਵਤ੍ਥਪੇਤ੍ਵਾ ਮਚ੍ਛਕਚ੍ਛਪਪਰਿਪਨ੍ਥਤੋ ਅਤ੍ਤਾਨਂ ਸਚ੍ਚਾਧਿਟ੍ਠਾਨੇਨ ਪਮੋਚੇਨ੍ਤੋ ਤੇਨ ਸਦ੍ਧਿਂ ਉਸਭਮਤ੍ਤਟ੍ਠਾਨਂ ਅਤਿਕ੍ਕਮਿਤ੍ਵਾ ਪਤਿਤ੍ਵਾ ਸਮੁਦ੍ਦਂ ਤਰਿਤੁਂ ਆਰਭਿ. ਮਹਾਜਨੋ ਪਨ ਤਤ੍ਥੇਵ ਵਿਨਾਸਂ ਪਾਪੁਣਿ. ਤਸ੍ਸ ਤਰਨ੍ਤਸ੍ਸੇਵ ਸਤ੍ਤ ਦਿਵਸਾ ਗਤਾ. ਸੋ ਤਸ੍ਮਿਮ੍ਪਿ ਕਾਲੇ ਲੋਣੋਦਕੇਨ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਿਕੋ ਅਹੋਸਿਯੇਵ.

ਤਦਾ ਪਨ ਈਦਿਸਾਨਂ ਪੁਰਿਸਵਿਸੇਸਾਨਂ ਰਕ੍ਖਣਤ੍ਥਾਯ ਚਤੂਹਿ ਲੋਕਪਾਲੇਹਿ ਠਪਿਤਾ ਮਣਿਮੇਖਲਾ ਨਾਮ ਦੇਵਧੀਤਾ ਅਤ੍ਤਨੋ ਇਸ੍ਸਰਿਯੇਨ ਸਤ੍ਤਾਹਂ ਪਮਜ੍ਜਿਤ੍ਵਾ ਸਤ੍ਤਮੇ ਦਿਵਸੇ ਤਂ ਦਿਸ੍ਵਾ ‘‘ਸਚਾਯਂ ਇਧ ਮਰਿਸ੍ਸ, ਅਤਿਵਿਯ ਗਾਰਯ੍ਹਾ ਅਭਵਿਸ੍ਸ’’ਨ੍ਤਿ ਸਂਵਿਗ੍ਗਹਦਯਾ ਸੁਵਣ੍ਣਪਾਤਿਯਾ ਦਿਬ੍ਬਭੋਜਨਸ੍ਸ ਪੂਰੇਤ੍ਵਾ ਵੇਗੇਨਾਗਨ੍ਤ੍ਵਾ ‘‘ਬ੍ਰਾਹ੍ਮਣ, ਇਦਂ ਦਿਬ੍ਬਭੋਜਨਂ ਭੁਞ੍ਜਾ’’ਤਿ ਆਹ. ਸੋ ਤਂ ਉਲ੍ਲੋਕੇਤ੍ਵਾ ‘‘ਨਾਹਂ ਭੁਞ੍ਜਾਮਿ, ਉਪੋਸਥਿਕੋਮ੍ਹੀ’’ਤਿ ਪਟਿਕ੍ਖਿਪਿਤ੍ਵਾ ਤਂ ਪੁਚ੍ਛਨ੍ਤੋ –

‘‘ਯਂ ਤ੍ਵਂ ਸੁਖੇਨਾਭਿਸਮੇਕ੍ਖਸੇ ਮਂ, ਭੁਞ੍ਜਸ੍ਸੁ ਭਤ੍ਤਂ ਇਤਿ ਮਂ ਵਦੇਸਿ;

ਪੁਚ੍ਛਾਮਿ ਤਂ ਨਾਰਿ ਮਹਾਨੁਭਾਵੇ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੂ’’ਤਿ. (ਜਾ. ੧.੧੦.੪੨) –

ਆਹ. ਸਾ ਤਸ੍ਸ ਪਟਿਵਚਨਂ ਦੇਨ੍ਤੀ –

‘‘ਦੇਵੀ ਅਹਂ ਸਙ੍ਖ ਮਹਾਨੁਭਾਵਾ, ਇਧਾਗਤਾ ਸਾਗਰਵਾਰਿਮਜ੍ਝੇ;

ਅਨੁਕਮ੍ਪਿਕਾ ਨੋ ਚ ਪਦੁਟ੍ਠਚਿਤ੍ਤਾ, ਤਵੇਵ ਅਤ੍ਥਾਯ ਇਧਾਗਤਾਸ੍ਮਿ.

‘‘ਇਧਨ੍ਨਪਾਨਂ ਸਯਨਾਸਨਞ੍ਚ, ਯਾਨਾਨਿ ਨਾਨਾਵਿਵਿਧਾਨਿ ਸਙ੍ਖ;

ਸਬ੍ਬਸ੍ਸ ਤ੍ਯਾਹਂ ਪਟਿਪਾਦਯਾਮਿ, ਯਂ ਕਿਞ੍ਚਿ ਤੁਯ੍ਹਂ ਮਨਸਾਭਿਪਤ੍ਥਿਤ’’ਨ੍ਤਿ. (ਜਾ. ੧.੧੦.੪੩-੪੪) –

ਇਮਾ ਗਾਥਾ ਅਭਾਸਿ. ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਦੇਵਧੀਤਾ ਸਮੁਦ੍ਦਪਿਟ੍ਠੇ ਮਯ੍ਹਂ ‘ਇਦਞ੍ਚਿਦਞ੍ਚ ਦਮ੍ਮੀ’ਤਿ ਵਦਤਿ, ਯਞ੍ਚੇਸਾ ਮਯ੍ਹਂ ਦੇਤਿ, ਤਮ੍ਪਿ ਮਮ ਪੁਞ੍ਞੇਨੇਵ, ਤਂ ਪਨ ਪੁਞ੍ਞਂ ਅਯਂ ਦੇਵਧੀਤਾ ਜਾਨਾਤਿ ਨੁ ਖੋ, ਉਦਾਹੁ ਨ ਜਾਨਾਤਿ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਪੁਚ੍ਛਨ੍ਤੋ ਇਮਂ ਗਾਥਮਾਹ –

‘‘ਯਂ ਕਿਞ੍ਚਿ ਯਿਟ੍ਠਞ੍ਚ ਹੁਤਞ੍ਚ ਮਯ੍ਹਂ, ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਂ ਸੁਗਤ੍ਤੇ;

ਸੁਸ੍ਸੋਣਿ ਸੁਬ੍ਭੂਰੁ ਵਿਲਗ੍ਗਮਜ੍ਝੇ, ਕਿਸ੍ਸ ਮੇ ਕਮ੍ਮਸ੍ਸ ਅਯਂ ਵਿਪਾਕੋ’’ਤਿ. (ਜਾ. ੧.੧੦.੪੫);

ਤਤ੍ਥ ਯਿਟ੍ਠਨ੍ਤਿ ਦਾਨਵਸੇਨ ਯਜਿਤਂ. ਹੁਤਨ੍ਤਿ ਆਹੁਨਪਾਹੁਨਵਸੇਨ ਦਿਨ੍ਨਂ. ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਨ੍ਤਿ ਅਮ੍ਹਾਕਂ ਪੁਞ੍ਞਕਮ੍ਮਸ੍ਸ ਸਬ੍ਬਸ੍ਸ ਤ੍ਵਂ ਇਸ੍ਸਰਾ, ‘‘ਅਯਂ ਇਮਸ੍ਸ ਵਿਪਾਕੋ, ਅਯਂ ਇਮਸ੍ਸਾ’’ਤਿ ਬ੍ਯਾਕਰਿਤੁਂ ਸਮਤ੍ਥਾ. ਸੁਸ੍ਸੋਣੀਤਿ ਸੁਨ੍ਦਰਜਘਨੇ. ਸੁਬ੍ਭੂਰੂਤਿ ਸੁਨ੍ਦਰੇਹਿ ਭਮੁਕੇਹਿ ਊਰੂਹਿ ਚ ਸਮਨ੍ਨਾਗਤੇ. ਵਿਲਗ੍ਗਮਜ੍ਝੇਤਿ ਵਿਲਗ੍ਗਤਨੁਮਜ੍ਝੇ. ਕਿਸ੍ਸ ਮੇਤਿ ਮਯਾ ਕਤਕਮ੍ਮੇਸੁ ਕਤਰਕਮ੍ਮਸ੍ਸ ਅਯਂ ਵਿਪਾਕੋ, ਯੇਨਾਹਂ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇ ਅਜ੍ਜ ਪਤਿਟ੍ਠਂ ਲਭਾਮੀਤਿ.

ਤਂ ਸੁਤ੍ਵਾ ਦੇਵਧੀਤਾ ‘‘ਅਯਂ ਬ੍ਰਾਹ੍ਮਣੋ ‘ਯਂ ਅਤ੍ਤਨਾ ਕੁਸਲਕਮ੍ਮਂ ਕਤਂ, ਤਂ ਕਮ੍ਮਂ ਨ ਜਾਨਾਤੀ’ਤਿ ਸਞ੍ਞਾਯ ਪੁਚ੍ਛਤਿ ਮਞ੍ਞੇ, ਕਥੇਸ੍ਸਾਮਿ ਨ’’ਨ੍ਤਿ ਨਾਵਾਭਿਰੁਹਨਦਿਵਸੇ ਪਚ੍ਚੇਕਬੁਦ੍ਧਸ੍ਸ ਛਤ੍ਤੁਪਾਹਨਦਾਨਪੁਞ੍ਞਮੇਵ ਤਸ੍ਸ ਕਾਰਣਨ੍ਤਿ ਕਥੇਨ੍ਤੀ –

‘‘ਘਮ੍ਮੇ ਪਥੇ ਬ੍ਰਾਹ੍ਮਣ ਏਕਭਿਕ੍ਖੁਂ, ਉਗ੍ਘਟ੍ਟਪਾਦਂ ਤਸਿਤਂ ਕਿਲਨ੍ਤਂ;

ਪਟਿਪਾਦਯੀ ਸਙ੍ਖ ਉਪਾਹਨਾਨਿ, ਸਾ ਦਕ੍ਖਿਣਾ ਕਾਮਦੁਹਾ ਤਵਜ੍ਜਾ’’ਤਿ. (ਜਾ. ੧.੧੦.੪੬) –

ਗਾਥਮਾਹ.

ਤਤ੍ਥ ਏਕਭਿਕ੍ਖੁਨ੍ਤਿ ਏਕਂ ਪਚ੍ਚੇਕਬੁਦ੍ਧਂ ਸਨ੍ਧਾਯਾਹ. ਉਗ੍ਘਟ੍ਟਪਾਦਨ੍ਤਿ ਉਣ੍ਹਵਾਲੁਕਾਯ ਘਟ੍ਟਪਾਦਂ, ਵਿਬਾਧਿਤਪਾਦਨ੍ਤਿ ਅਤ੍ਥੋ. ਤਸਿਤਨ੍ਤਿ ਪਿਪਾਸਿਤਂ. ਪਟਿਪਾਦਯੀਤਿ ਪਟਿਪਾਦੇਸਿ ਯੋਜੇਸਿ. ਕਾਮਦੁਹਾਤਿ ਸਬ੍ਬਕਾਮਦਾਯਿਕਾ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਏਵਰੂਪੇਪਿ ਨਾਮ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇ ਮਯਾ ਦਿਨ੍ਨਂ ਛਤ੍ਤੁਪਾਹਨਦਾਨਂ ਮਮ ਸਬ੍ਬਕਾਮਦਦਂ ਜਾਤਂ ਅਹੋ ਸੁਦਿਨ੍ਨ’’ਨ੍ਤਿ ਤੁਟ੍ਠਚਿਤ੍ਤੋ –

‘‘ਸਾ ਹੋਤੁ ਨਾਵਾ ਫਲਕੂਪਪਨ੍ਨਾ, ਅਨਵਸ੍ਸੁਤਾ ਏਰਕਵਾਤਯੁਤ੍ਤਾ;

ਅਞ੍ਞਸ੍ਸ ਯਾਨਸ੍ਸ ਨ ਹੇਤ੍ਥ ਭੂਮਿ, ਅਜ੍ਜੇਵ ਮਂ ਮੋਲ਼ਿਨਿਂ ਪਾਪਯਸ੍ਸੂ’’ਤਿ. (ਜਾ. ੧.੧੦.੪੭) –

ਗਾਥਮਾਹ.

ਤਤ੍ਥ ਫਲਕੂਪਪਨ੍ਨਾਤਿ ਮਹਾਨਾਵਤਾਯ ਬਹੂਹਿ ਫਲਕੇਹਿ ਉਪੇਤਾ. ਉਦਕਪ੍ਪਵੇਸਨਾਭਾਵੇਨ ਅਨਵਸ੍ਸੁਤਾ. ਸਮ੍ਮਾ ਗਹੇਤ੍ਵਾ ਗਮਨਕਵਾਤੇਨ ਏਰਕਵਾਤਯੁਤ੍ਤਾ.

ਦੇਵਧੀਤਾ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠਹਟ੍ਠਾ ਦੀਘਤੋ ਅਟ੍ਠਉਸਭਂ ਵਿਤ੍ਥਾਰਤੋ ਚਤੁਉਸਭਂ ਗਮ੍ਭੀਰਤੋ ਵੀਸਤਿਯਟ੍ਠਿਕਂ ਸਤ੍ਤਰਤਨਮਯਂ ਨਾਵਂ ਮਾਪੇਤ੍ਵਾ ਕੂਪਫਿਯਾਰਿਤ੍ਤਯੁਤ੍ਤਾਨਿ ਇਨ੍ਦਨੀਲਰਜਤਸੁਵਣ੍ਣਮਯਾਦੀਨਿ ਨਿਮ੍ਮਿਨਿਤ੍ਵਾ ਸਤ੍ਤਨ੍ਨਂ ਰਤਨਾਨਂ ਪੂਰੇਤ੍ਵਾ ਬ੍ਰਾਹ੍ਮਣਂ ਆਲਿਙ੍ਗੇਤ੍ਵਾ ਨਾਵਂ ਆਰੋਪੇਸਿ, ਉਪਟ੍ਠਾਕਂ ਪਨਸ੍ਸ ਨ ਓਲੋਕੇਸਿ. ਬ੍ਰਾਹ੍ਮਣੋ ਅਤ੍ਤਨਾ ਕਤਕਲ੍ਯਾਣਤੋ ਤਸ੍ਸ ਪਤ੍ਤਿਂ ਅਦਾਸਿ, ਸੋ ਅਨੁਮੋਦਿ. ਅਥ ਦੇਵਧੀਤਾ ਤਮ੍ਪਿ ਆਲਿਙ੍ਗੇਤ੍ਵਾ ਨਾਵਾਯ ਪਤਿਟ੍ਠਾਪੇਤ੍ਵਾ ਤਂ ਨਾਵਂ ਮੋਲ਼ਿਨੀਨਗਰਂ ਨੇਤ੍ਵਾ ਬ੍ਰਾਹ੍ਮਣਸ੍ਸ ਘਰੇ ਧਨਂ ਪਤਿਟ੍ਠਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸਿ. ਤੇਨਾਹ ਭਗਵਾ –

‘‘ਸਾ ਤਤ੍ਥ ਵਿਤ੍ਤਾ ਸੁਮਨਾ ਪਤੀਤਾ, ਨਾਵਂ ਸੁਚਿਤ੍ਤਂ ਅਭਿਨਿਮ੍ਮਿਨਿਤ੍ਵਾ;

ਆਦਾਯ ਸਙ੍ਖਂ ਪੁਰਿਸੇਨ ਸਦ੍ਧਿਂ, ਉਪਾਨਯੀ ਨਗਰਂ ਸਾਧੁਰਮ੍ਮ’’ਨ੍ਤਿ. (ਜਾ. ੧.੧੦.੪੮);

ਮਹਾਪੁਰਿਸਸ੍ਸ ਹਿ ਚਿਤ੍ਤਸਮ੍ਪਤ੍ਤਿਯਾ ਪਚ੍ਚੇਕਬੁਦ੍ਧਸ੍ਸ ਚ ਨਿਰੋਧਤੋ ਵੁਟ੍ਠਿਤਭਾਵੇਨ ਸਤ੍ਤਸੁ ਚੇਤਨਾਸੁ ਆਦਿਚੇਤਨਾ ਦਿਟ੍ਠਧਮ੍ਮਵੇਦਨੀਯਾ ਅਤਿਉਲ਼ਾਰਫਲਾ ਚ ਜਾਤਾ. ਇਦਮ੍ਪਿ ਤਸ੍ਸ ਦਾਨਸ੍ਸ ਅਪ੍ਪਮਤ੍ਤਫਲਨ੍ਤਿ ਦਟ੍ਠਬ੍ਬਂ. ਅਪਰਿਮਾਣਫਲਞ੍ਹਿ ਤਂ ਦਾਨਂ ਬੋਧਿਸਮ੍ਭਾਰਭੂਤਂ. ਤੇਨ ਵੁਤ੍ਤਂ –

੧੯. ‘‘ਤੇਨੇਵਾਹਂ ਸਤਗੁਣਤੋ, ਸੁਖੁਮਾਲੋ ਸੁਖੇਧਿਤੋ;

ਅਪਿ ਚ ਦਾਨਂ ਪਰਿਪੂਰੇਨ੍ਤੋ, ਏਵਂ ਤਸ੍ਸ ਅਦਾਸਹ’’ਨ੍ਤਿ.

ਤਤ੍ਥ ਤੇਨਾਤਿ ਤਤੋ ਪਚ੍ਚੇਕਬੁਦ੍ਧਤੋ, ਸਤਗੁਣਤੋਤਿ ਸਤਗੁਣੇਨ ਅਹਂ ਤਦਾ ਸਙ੍ਖਭੂਤੋ ਸੁਖੁਮਾਲੋ, ਤਸ੍ਮਾ ਸੁਖੇਧਿਤੋ ਸੁਖਸਂਵਡ੍ਢੋ, ਅਪਿ ਚ ਏਵਂ ਸਨ੍ਤੇਪਿ ਦਾਨਂ ਪਰਿਪੂਰੇਨ੍ਤੋ, ਏਵਂ ਮਯ੍ਹਂ ਦਾਨਪਾਰਮੀ ਪਰਿਪੂਰੇਤੂਤਿ ਤਸ੍ਸ ਪਚ੍ਚੇਕਬੁਦ੍ਧਸ੍ਸ ਅਤ੍ਤਨੋ ਸਰੀਰਦੁਕ੍ਖਂ ਅਨਪੇਕ੍ਖਿਤ੍ਵਾ ਛਤ੍ਤੁਪਾਹਨਂ ਅਦਾਸਿਨ੍ਤਿ ਅਤ੍ਤਨੋ ਦਾਨਜ੍ਝਾਸਯਸ੍ਸ ਉਲ਼ਾਰਭਾਵਂ ਸਤ੍ਥਾ ਪਵੇਦੇਸਿ.

ਬੋਧਿਸਤ੍ਤੋਪਿ ਯਾਵਜੀਵਂ ਅਮਿਤਧਨਗੇਹਂ ਅਜ੍ਝਾਵਸਨ੍ਤੋ ਭਿਯ੍ਯੋਸੋਮਤ੍ਤਾਯ ਦਾਨਾਨਿ ਦਤ੍ਵਾ ਸੀਲਾਨਿ ਰਕ੍ਖਿਤ੍ਵਾ ਆਯੁਪਰਿਯੋਸਾਨੇ ਸਪਰਿਸੋ ਦੇਵਨਗਰਂ ਪੂਰੇਸਿ.

ਤਦਾ ਦੇਵਧੀਤਾ ਉਪ੍ਪਲਵਣ੍ਣਾ ਅਹੋਸਿ, ਪੁਰਿਸੋ ਆਨਨ੍ਦਤ੍ਥੇਰੋ, ਲੋਕਨਾਥੋ ਸਙ੍ਖਬ੍ਰਾਹ੍ਮਣੋ.

ਤਸ੍ਸ ਸੁਵਿਸੁਦ੍ਧਨਿਚ੍ਚਸੀਲਉਪੋਸਥਸੀਲਾਦਿਵਸੇਨ ਸੀਲਪਾਰਮੀ ਦਾਨਸੀਲਾਦੀਨਂ ਪਟਿਪਕ੍ਖਤੋ ਨਿਕ੍ਖਨ੍ਤਤ੍ਤਾ ਕੁਸਲਧਮ੍ਮਵਸੇਨ ਨੇਕ੍ਖਮ੍ਮਪਾਰਮੀ, ਦਾਨਾਦਿਨਿਪ੍ਫਾਦਨਤ੍ਥਂ ਅਬ੍ਭੁਸ੍ਸਹਨਵਸੇਨ ਤਥਾ ਮਹਾਸਮੁਦ੍ਦਤਰਣਵਾਯਾਮਵਸੇਨ ਚ ਵੀਰਿਯਪਾਰਮੀ, ਤਦਤ੍ਥਂ ਅਧਿਵਾਸਨਖਨ੍ਤਿਵਸੇਨ ਖਨ੍ਤਿਪਾਰਮੀ, ਪਟਿਞ੍ਞਾਨੁਰੂਪਪ੍ਪਟਿਪਤ੍ਤਿਯਾ ਸਚ੍ਚਪਾਰਮੀ, ਸਬ੍ਬਤ੍ਥ ਅਚਲਸਮਾਦਾਨਾਧਿਟ੍ਠਾਨਵਸੇਨ ਅਧਿਟ੍ਠਾਨਪਾਰਮੀ, ਸਬ੍ਬਸਤ੍ਤੇਸੁ ਹਿਤਜ੍ਝਾਸਯਵਸੇਨ ਮੇਤ੍ਤਾਪਾਰਮੀ, ਸਤ੍ਤਸਙ੍ਖਾਰਕਤਵਿਪ੍ਪਕਾਰੇਸੁ ਮਜ੍ਝਤ੍ਤਭਾਵਪ੍ਪਤ੍ਤਿਯਾ ਉਪੇਕ੍ਖਾਪਾਰਮੀ, ਸਬ੍ਬਪਾਰਮੀਨਂ ਉਪਕਾਰਾਨੁਪਕਾਰੇ ਧਮ੍ਮੇ ਜਾਨਿਤ੍ਵਾ ਅਨੁਪਕਾਰੇ ਧਮ੍ਮੇ ਪਹਾਯ ਉਪਕਾਰਧਮ੍ਮੇਸੁ ਪਵਤ੍ਤਾਪਨਪੁਰੇਚਰਾ ਸਹਜਾਤਾ ਚ ਉਪਾਯਕੋਸਲ੍ਲਭੂਤਾ ਪਞ੍ਞਾ ਪਞ੍ਞਾਪਾਰਮੀਤਿ ਇਮਾਪਿ ਪਾਰਮਿਯੋ ਲਬ੍ਭਨ੍ਤਿ.

ਦਾਨਜ੍ਝਾਸਯਸ੍ਸ ਪਨ ਅਤਿਉਲ਼ਾਰਭਾਵੇਨ ਦਾਨਪਾਰਮੀਵਸੇਨ ਦੇਸਨਾ ਪਵਤ੍ਤਾ. ਯਸ੍ਮਾ ਚੇਤ੍ਥ ਦਸ ਪਾਰਮਿਯੋ ਲਬ੍ਭਨ੍ਤਿ, ਤਸ੍ਮਾ ਹੇਟ੍ਠਾ ਵੁਤ੍ਤਾ ਮਹਾਕਰੁਣਾਦਯੋ ਬੋਧਿਸਤ੍ਤਗੁਣਾ ਇਧਾਪਿ ਯਥਾਰਹਂ ਨਿਦ੍ਧਾਰੇਤਬ੍ਬਾ. ਤਥਾ ਅਤ੍ਤਨੋ ਭੋਗਸੁਖਂ ਅਨਪੇਕ੍ਖਿਤ੍ਵਾ ਮਹਾਕਰੁਣਾਯ ‘‘ਦਾਨਪਾਰਮਿਂ ਪੂਰੇਸ੍ਸਾਮੀ’’ਤਿ ਦਾਨਸਮ੍ਭਾਰਸਂਹਰਣਤ੍ਥਂ ਸਮੁਦ੍ਦਤਰਣਂ, ਤਤ੍ਥ ਚ ਸਮੁਦ੍ਦਪਤਿਤਸ੍ਸਪਿ ਉਪੋਸਥਾਧਿਟ੍ਠਾਨਂ, ਸੀਲਖਣ੍ਡਭਯੇਨ ਦੇਵਧੀਤਾਯਪਿ ਉਪਗਤਾਯ ਆਹਾਰਾਨਾਹਰਣਨ੍ਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾ ਵੇਦਿਤਬ੍ਬਾ. ਇਦਾਨਿ ਵਕ੍ਖਮਾਨੇਸੁ ਸੇਸਚਰਿਤੇਸੁ ਇਮਿਨਾਵ ਨਯੇਨ ਗੁਣਨਿਦ੍ਧਾਰਣਂ ਵੇਦਿਤਬ੍ਬਂ. ਤਤ੍ਥ ਤਤ੍ਥ ਵਿਸੇਸਮਤ੍ਤਮੇਵ ਵਕ੍ਖਾਮ. ਤੇਨੇਤਂ ਵੁਚ੍ਚਤਿ –

‘‘ਏਵਂ ਅਚ੍ਛਰਿਯਾ ਹੇਤੇ, ਅਬ੍ਭੁਤਾ ਚ ਮਹੇਸਿਨੋ…ਪੇ…;

ਪਗੇਵਾਨੁਕਿਰਿਯਾ ਤੇਸਂ, ਧਮ੍ਮਸ੍ਸ ਅਨੁਧਮ੍ਮਤੋ’’ਤਿ.

ਸਙ੍ਖਬ੍ਰਾਹ੍ਮਣਚਰਿਯਾਵਣ੍ਣਨਾ ਨਿਟ੍ਠਿਤਾ.

੩. ਕੁਰੁਰਾਜਚਰਿਯਾਵਣ੍ਣਨਾ

੨੦. ਤਤਿਯੇ ਇਨ੍ਦਪਤ੍ਥੇ ਪੁਰੁਤ੍ਤਮੇਤਿ ਇਨ੍ਦਪਤ੍ਥਨਾਮਕੇ ਕੁਰੁਰਟ੍ਠਸ੍ਸ ਪੁਰਵਰੇ ਉਤ੍ਤਮਨਗਰੇ. ਰਾਜਾਤਿ ਧਮ੍ਮੇਨ ਸਮੇਨ ਚਤੂਹਿ ਸਙ੍ਗਹਵਤ੍ਥੂਹਿ ਪਰਿਸਂ ਰਞ੍ਜੇਤੀਤਿ ਰਾਜਾ. ਕੁਸਲੇ ਦਸਹੁਪਾਗਤੋਤਿ ਕੁਸਲੇਹਿ ਦਸਹਿ ਸਮਨ੍ਨਾਗਤੋ, ਦਾਨਾਦੀਹਿ ਦਸਹਿ ਪੁਞ੍ਞਕਿਰਿਯਵਤ੍ਥੂਹਿ, ਦਸਹਿ ਕੁਸਲਕਮ੍ਮਪਥੇਹਿ ਵਾ ਯੁਤ੍ਤੋਤਿ ਅਤ੍ਥੋ.

੨੧. ਕਲਿਙ੍ਗਰਟ੍ਠਵਿਸਯਾਤਿ ਕਲਿਙ੍ਗਰਟ੍ਠਸਙ੍ਖਾਤਵਿਸਯਾ. ਬ੍ਰਾਹ੍ਮਣਾ ਉਪਗਞ੍ਛੁ ਮਨ੍ਤਿ ਕਲਿਙ੍ਗਰਾਜੇਨ ਉਯ੍ਯੋਜਿਤਾ ਅਟ੍ਠ ਬ੍ਰਾਹ੍ਮਣਾ ਮਂ ਉਪਸਙ੍ਕਮਿਂਸੁ. ਉਪਸਙ੍ਕਮਿਤ੍ਵਾ ਚ ਪਨ ਆਯਾਚੁਂ ਮਂ ਹਤ੍ਥਿਨਾਗਨ੍ਤਿ ਹਤ੍ਥਿਭੂਤਂ ਮਹਾਨਾਗਂ ਮਂ ਆਯਾਚਿਂਸੁ. ਧਞ੍ਞਨ੍ਤਿ ਧਨਾਯਿਤਬ੍ਬਸਿਰਿਸੋਭਗ੍ਗਪ੍ਪਤ੍ਤਂ ਲਕ੍ਖਣਸਮ੍ਪਨ੍ਨਂ. ਮਙ੍ਗਲਸਮ੍ਮਤਨ੍ਤਿ ਤਾਯਯੇਵ ਲਕ੍ਖਣਸਮ੍ਪਤ੍ਤਿਯਾ ਮਙ੍ਗਲਂ ਅਭਿਵੁਡ੍ਢਿਕਾਰਣਨ੍ਤਿ ਅਭਿਸਮ੍ਮਤਂ ਜਨੇਹਿ.

੨੨. ਅਵੁਟ੍ਠਿਕੋਤਿ ਵਸ੍ਸਰਹਿਤੋ. ਦੁਬ੍ਭਿਕ੍ਖੋਤਿ ਦੁਲ੍ਲਭਭੋਜਨੋ. ਛਾਤਕੋ ਮਹਾਤਿ ਮਹਤੀ ਜਿਘਚ੍ਛਾਬਾਧਾ ਵਤ੍ਤਤੀਤਿ ਅਤ੍ਥੋ. ਦਦਾਹੀਤਿ ਦੇਹਿ. ਨੀਲਨ੍ਤਿ ਨੀਲਵਣ੍ਣਂ. ਅਞ੍ਜਨਸਵ੍ਹਯਨ੍ਤਿ ਅਞ੍ਜਨਸਦ੍ਦੇਨ ਅਵ੍ਹਾਤਬ੍ਬਂ, ਅਞ੍ਜਨਨਾਮਕਨ੍ਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਅਮ੍ਹਾਕਂ ਕਲਿਙ੍ਗਰਟ੍ਠਂ ਅਵੁਟ੍ਠਿਕਂ, ਤੇਨ ਇਦਾਨਿ ਮਹਾਦੁਬ੍ਭਿਕ੍ਖਂ ਤਤ੍ਥ ਮਹਨ੍ਤਂ ਛਾਤਕਭਯਂ ਉਪ੍ਪਨ੍ਨਂ, ਤਸ੍ਸ ਵੂਪਸਮਤ੍ਥਾਯ ਇਮਂ ਅਞ੍ਜਨਗਿਰਿਸਙ੍ਕਾਸਂ ਤੁਯ੍ਹਂ ਅਞ੍ਜਨਨਾਮਕਂ ਮਙ੍ਗਲਹਤ੍ਥਿਂ ਦੇਹਿ, ਇਮਸ੍ਮਿਞ੍ਹਿ ਤਤ੍ਥ ਨੀਤੇ ਦੇਵੋ ਵਸ੍ਸਿਸ੍ਸਤਿ, ਤੇਨ ਤਂ ਸਬ੍ਬਭਯਂ ਵੂਪਸਮ੍ਮਿਸ੍ਸਤੀਤਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਬੋਧਿਸਤ੍ਤੋ ਕੁਰੁਰਾਜਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਹੇਤ੍ਵਾ ਅਨੁਪੁਬ੍ਬੇਨ ਵਿਞ੍ਞੁਤਂ ਪਤ੍ਤੋ, ਤਕ੍ਕਸਿਲਂ ਗਨ੍ਤ੍ਵਾ ਯੋਗਵਿਹਿਤਾਨਿ ਸਿਪ੍ਪਾਯਤਨਾਨਿ ਵਿਜ੍ਜਾਟ੍ਠਾਨਾਨਿ ਚ ਉਗ੍ਗਹੇਤ੍ਵਾ ਪਚ੍ਚਾਗਤੋ ਪਿਤਰਾ ਉਪਰਜ੍ਜੇ ਠਪਿਤੋ, ਅਪਰਭਾਗੇ ਪਿਤੁ ਅਚ੍ਚਯੇਨ ਰਜ੍ਜਂ ਪਤ੍ਵਾ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਧਮ੍ਮੇਨ ਰਜ੍ਜਂ ਕਾਰੇਸਿ ਧਨਞ੍ਜਯੋ ਨਾਮ ਨਾਮੇਨ. ਸੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਂ ਧਨਂ ਵਿਸ੍ਸਜ੍ਜੇਨ੍ਤੋ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਦਾਨਂ ਅਦਾਸਿ. ਤਸ੍ਸ ਦਾਨਜ੍ਝਾਸਯਤਾ ਦਾਨਾਭਿਰਤਿ ਸਕਲਜਮ੍ਬੁਦੀਪਂ ਪਤ੍ਥਰਿ.