੮. ਸਿਵਿਰਾਜਚਰਿਯਾਵਣ੍ਣਨਾ

੫੧. ਅਟ੍ਠਮੇ ਅਰਿਟ੍ਠਸਵ੍ਹਯੇ ਨਗਰੇਤਿ ਅਰਿਟ੍ਠਪੁਰਨਾਮਕੇ ਨਗਰੇ. ਸਿਵਿ ਨਾਮਾਸਿ ਖਤ੍ਤਿਯੋਤਿ ਸਿਵੀਤਿ ਗੋਤ੍ਤਤੋ ਏਵਂਨਾਮਕੋ ਰਾਜਾ ਅਹੋਸਿ.

ਅਤੀਤੇ ਕਿਰ ਸਿਵਿਰਟ੍ਠੇ ਅਰਿਟ੍ਠਪੁਰਨਗਰੇ ਸਿਵਿਰਾਜੇ ਰਜ੍ਜਂ ਕਾਰੇਨ੍ਤੇ ਮਹਾਸਤ੍ਤੋ ਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ‘‘ਸਿਵਿਕੁਮਾਰੋ’’ਤਿਸ੍ਸ ਨਾਮਮਕਂਸੁ. ਸੋ ਵਯਪ੍ਪਤ੍ਤੋ ਤਕ੍ਕਸਿਲਂ ਗਨ੍ਤ੍ਵਾ ਉਗ੍ਗਹਿਤਸਿਪ੍ਪੋ ਆਗਨ੍ਤ੍ਵਾ ਪਿਤੁ ਸਿਪ੍ਪਂ ਦਸ੍ਸੇਤ੍ਵਾ ਉਪਰਜ੍ਜਂ ਲਭਿਤ੍ਵਾ ਅਪਰਭਾਗੇ ਪਿਤੁ ਅਚ੍ਚਯੇਨ ਰਾਜਾ ਹੁਤ੍ਵਾ ਅਗਤਿਗਮਨਂ ਪਹਾਯ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਰਜ੍ਜਂ ਕਾਰੇਨ੍ਤੋ ਨਗਰਸ੍ਸ ਚਤੂਸੁ ਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਪਰਿਚ੍ਚਾਗੇਨ ਮਹਾਦਾਨਂ ਪਵਤ੍ਤੇਸਿ. ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਸੁ ਸਯਂ ਦਾਨਸਾਲਂ ਗਨ੍ਤ੍ਵਾ ਦਾਨਗ੍ਗਂ ਓਲੋਕੇਤਿ.

ਸੋ ਏਕਦਾ ਪੁਣ੍ਣਮਦਿਵਸੇ ਪਾਤੋਵ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਅਤ੍ਤਨਾ ਦਿਨ੍ਨਦਾਨਂ ਆਵਜ੍ਜੇਨ੍ਤੋ ਬਾਹਿਰਵਤ੍ਥੁਂ ਅਤ੍ਤਨਾ ਅਦਿਨ੍ਨਂ ਨਾਮ ਅਦਿਸ੍ਵਾ ‘‘ਨ ਮੇ ਬਾਹਿਰਕਦਾਨਂ ਤਥਾ ਚਿਤ੍ਤਂ ਤੋਸੇਤਿ, ਯਥਾ ਅਜ੍ਝਤ੍ਤਿਕਦਾਨਂ, ਅਹੋ ਵਤ ਮਮ ਦਾਨਸਾਲਂ ਗਤਕਾਲੇ ਕੋਚਿ ਯਾਚਕੋ ਬਾਹਿਰਵਤ੍ਥੁਂ ਅਯਾਚਿਤ੍ਵਾ ਅਜ੍ਝਤ੍ਤਿਕਮੇਵ ਯਾਚੇਯ੍ਯ, ਸਚੇ ਹਿ ਮੇ ਕੋਚਿ ਸਰੀਰੇ ਮਂਸਂ ਵਾ ਲੋਹਿਤਂ ਵਾ ਸੀਸਂ ਵਾ ਹਦਯਮਂਸਂ ਵਾ ਅਕ੍ਖੀਨਿ ਵਾ ਉਪਡ੍ਢਸਰੀਰਂ ਵਾ ਸਕਲਮੇਵ ਵਾ ਅਤ੍ਤਭਾਵਂ ਦਾਸਭਾਵੇਨ ਯਾਚੇਯ੍ਯ, ਤਂਤਦੇਵਸ੍ਸ ਅਧਿਪ੍ਪਾਯਂ ਪੂਰੇਨ੍ਤੋ ਦਾਤੁਂ ਸਕ੍ਕੋਮੀ’’ਤਿ ਚਿਨ੍ਤੇਸਿ. ਪਾਲ਼ਿਯਂ ਪਨ ਅਕ੍ਖੀਨਂ ਏਵ ਵਸੇਨ ਆਗਤਾ. ਤੇਨ ਵੁਤ੍ਤਂ –

‘‘ਨਿਸਜ੍ਜ ਪਾਸਾਦਵਰੇ, ਏਵਂ ਚਿਨ੍ਤੇਸਹਂ ਤਦਾ’’.

੫੨. ‘‘ਯਂਕਿਞ੍ਚਿ ਮਾਨੁਸਂ ਦਾਨਂ, ਅਦਿਨ੍ਨਂ ਮੇ ਨ ਵਿਜ੍ਜਤਿ;

ਯੋਪਿ ਯਾਚੇਯ੍ਯ ਮਂ ਚਕ੍ਖੁਂ, ਦਦੇਯ੍ਯਂ ਅਵਿਕਮ੍ਪਿਤੋ’’ਤਿ.

ਤਤ੍ਥ ਮਾਨੁਸਂ ਦਾਨਨ੍ਤਿ ਪਕਤਿਮਨੁਸ੍ਸੇਹਿ ਦਾਤਬ੍ਬਦਾਨਂ ਅਨ੍ਨਪਾਨਾਦਿ. ਏਵਂ ਪਨ ਮਹਾਸਤ੍ਤਸ੍ਸ ਉਲ਼ਾਰੇ ਦਾਨਜ੍ਝਾਸਯੇ ਉਪ੍ਪਨ੍ਨੇ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ਤਸ੍ਸ ਕਾਰਣਂ ਆਵਜ੍ਜੇਨ੍ਤੋ ਬੋਧਿਸਤ੍ਤਸ੍ਸ ਅਜ੍ਝਾਸਯਂ ਦਿਸ੍ਵਾ ‘‘ਸਿਵਿਰਾਜਾ ਅਜ੍ਜ ਸਮ੍ਪਤ੍ਤਯਾਚਕਾ ਚਕ੍ਖੂਨਿ ਚੇ ਯਾਚਨ੍ਤਿ, ਚਕ੍ਖੂਨਿ ਉਪ੍ਪਾਟੇਤ੍ਵਾ ਨੇਸਂ ਦਸ੍ਸਾਮੀਤਿ ਚਿਨ੍ਤੇਸੀ’’ਤਿ ਸਕ੍ਕੋ ਦੇਵਪਰਿਸਾਯ ਵਤ੍ਵਾ ‘‘ਸੋ ਸਕ੍ਖਿਸ੍ਸਤਿ ਨੁ ਖੋ ਤਂ ਦਾਤੁਂ, ਉਦਾਹੁ ਨੋਤਿ ਵੀਮਂਸਿਸ੍ਸਾਮਿ ਤਾਵ ਨ’’ਨ੍ਤਿ ਬੋਧਿਸਤ੍ਤੇ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਤ੍ਵਾ ਸਬ੍ਬਾਲਙ੍ਕਾਰੇਹਿ ਪਟਿਮਣ੍ਡਿਤੇ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੇ ਦਾਨਗ੍ਗਂ ਗਚ੍ਛਨ੍ਤੇ ਜਰਾਜਿਣ੍ਣੋ ਅਨ੍ਧਬ੍ਰਾਹ੍ਮਣੋ ਵਿਯ ਹੁਤ੍ਵਾ ਤਸ੍ਸ ਚਕ੍ਖੁਪਥੇ ਏਕਸ੍ਮਿਂ ਉਨ੍ਨਤਪ੍ਪਦੇਸੇ ਉਭੋ ਹਤ੍ਥੇ ਪਸਾਰੇਤ੍ਵਾ ਰਾਜਾਨਂ ਜਯਾਪੇਤ੍ਵਾ ਠਿਤੋ ਬੋਧਿਸਤ੍ਤੇਨ ਤਦਭਿਮੁਖਂ ਵਾਰਣਂ ਪੇਸੇਤ੍ਵਾ ‘‘ਬ੍ਰਾਹ੍ਮਣ, ਕਿਂ ਇਚ੍ਛਸੀ’’ਤਿ ਪੁਚ੍ਛਿਤੋ ‘‘ਤਵ ਦਾਨਜ੍ਝਾਸਯਂ ਨਿਸ੍ਸਾਯ ਸਮੁਗ੍ਗਤੇਨ ਕਿਤ੍ਤਿਘੋਸੇਨ ਸਕਲਲੋਕਸਨ੍ਨਿਵਾਸੋ ਨਿਰਨ੍ਤਰਂ ਫੁਟੋ, ਅਹਞ੍ਚ ਅਨ੍ਧੋ, ਤਸ੍ਮਾ ਤਂ ਯਾਚਾਮੀ’’ਤਿ ਉਪਚਾਰਵਸੇਨ ਏਕਂ ਚਕ੍ਖੁਂ ਯਾਚਿ. ਤੇਨ ਵੁਤ੍ਤਂ –

੫੩. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਕ੍ਕੋ ਦੇਵਾਨਮਿਸ੍ਸਰੋ;

ਨਿਸਿਨ੍ਨੋ ਦੇਵਪਰਿਸਾਯ, ਇਦਂ ਵਚਨਮਬ੍ਰਵਿ.

੫੪. ‘‘ਨਿਸਜ੍ਜ ਪਾਸਾਦਵਰੇ, ਸਿਵਿਰਾਜਾ ਮਹਿਦ੍ਧਿਕੋ;

ਚਿਨ੍ਤੇਨ੍ਤੋ ਵਿਵਿਧਂ ਦਾਨਂ, ਅਦੇਯ੍ਯਂ ਸੋ ਨ ਪਸ੍ਸਤਿ.

੫੫. ‘‘ਤਥਂ ਨੁ ਵਿਤਥਂ ਨੇਤਂ, ਹਨ੍ਦ ਵੀਮਂਸਯਾਮਿ ਤਂ;

ਮੁਹੁਤ੍ਤਂ ਆਗਮੇਯ੍ਯਾਥ, ਯਾਵ ਜਾਨਾਮਿ ਤਂ ਮਨਂ.

੫੬. ‘‘ਪਵੇਧਮਾਨੋ ਪਲਿਤਸਿਰੋ, ਵਲਿਗਤ੍ਤੋ ਜਰਾਤੁਰੋ;

ਅਨ੍ਧਵਣ੍ਣੋਵ ਹੁਤ੍ਵਾਨ, ਰਾਜਾਨਂ ਉਪਸਙ੍ਕਮਿ.

੫੭. ‘‘ਸੋ ਤਦਾ ਪਗ੍ਗਹੇਤ੍ਵਾਨ, ਵਾਮਂ ਦਕ੍ਖਿਣਬਾਹੁ ਚ;

ਸਿਰਸ੍ਮਿਂ ਅਞ੍ਜਲਿਂ ਕਤ੍ਵਾ, ਇਦਂ ਵਚਨਮਬ੍ਰਵਿ.

੫੮. ‘‘‘ਯਾਚਾਮਿ ਤਂ ਮਹਾਰਾਜ, ਧਮ੍ਮਿਕ ਰਟ੍ਠਵਡ੍ਢਨ;

ਤਵ ਦਾਨਰਤਾ ਕਿਤ੍ਤਿ, ਉਗ੍ਗਤਾ ਦੇਵਮਾਨੁਸੇ.

੫੯. ‘‘‘ਉਭੋਪਿ ਨੇਤ੍ਤਾ ਨਯਨਾ, ਅਨ੍ਧਾ ਉਪਹਤਾ ਮਮ;

ਏਕਂ ਮੇ ਨਯਨਂ ਦੇਹਿ, ਤ੍ਵਮ੍ਪਿ ਏਕੇਨ ਯਾਪਯਾ’’’ਤਿ.

ਤਤ੍ਥ ਚਿਨ੍ਤੇਨ੍ਤੋ ਵਿਵਿਧਂ ਦਾਨਨ੍ਤਿ ਅਤ੍ਤਨਾ ਦਿਨ੍ਨਂ ਵਿਵਿਧਂ ਦਾਨਂ ਚਿਨ੍ਤੇਨ੍ਤੋ, ਆਵਜ੍ਜੇਨ੍ਤੋ ਦਾਨਂ ਵਾ ਅਤ੍ਤਨਾ ਦਿਨ੍ਨਂ ਵਿਵਿਧਂ ਬਾਹਿਰਂ ਦੇਯ੍ਯਧਮ੍ਮਂ ਚਿਨ੍ਤੇਨ੍ਤੋ. ਅਦੇਯ੍ਯਂ ਸੋ ਨ ਪਸ੍ਸਤੀਤਿ ਬਾਹਿਰਂ ਵਿਯ ਅਜ੍ਝਤ੍ਤਿਕਵਤ੍ਥੁਮ੍ਪਿ ਅਦੇਯ੍ਯਂ ਦਾਤੁਂ ਅਸਕ੍ਕੁਣੇਯ੍ਯਂ ਨ ਪਸ੍ਸਤਿ, ‘‘ਚਕ੍ਖੂਨਿਪਿ ਉਪ੍ਪਾਟੇਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਸੀਤਿ ਅਧਿਪ੍ਪਾਯੋ. ਤਥਂ ਨੁ ਵਿਤਥਂ ਨੇਤਨ੍ਤਿ ਏਤਂ ਅਜ੍ਝਤ੍ਤਿਕਵਤ੍ਥੁਨੋਪਿ ਅਦੇਯ੍ਯਸ੍ਸ ਅਦਸ੍ਸਨਂ ਦੇਯ੍ਯਭਾਵੇਨੇਵ ਦਸ੍ਸਨਂ ਚਿਨ੍ਤਨਂ ਸਚ੍ਚਂ ਨੁ ਖੋ, ਉਦਾਹੁ, ਅਸਚ੍ਚਨ੍ਤਿ ਅਤ੍ਥੋ. ਸੋ ਤਦਾ ਪਗ੍ਗਹੇਤ੍ਵਾਨ, ਵਾਮਂ ਦਕ੍ਖਿਣਬਾਹੁ ਚਾਤਿ ਵਾਮਬਾਹੁਂ ਦਕ੍ਖਿਣਬਾਹੁਞ੍ਚ ਤਦਾ ਪਗ੍ਗਹੇਤ੍ਵਾ, ਉਭੋ ਬਾਹੂ ਉਕ੍ਖਿਪਿਤ੍ਵਾਤਿ ਅਤ੍ਥੋ. ਰਟ੍ਠਵਡ੍ਢਨਾਤਿ ਰਟ੍ਠਵਡ੍ਢੀਕਰ. ਤ੍ਵਮ੍ਪਿ ਏਕੇਨ ਯਾਪਯਾਤਿ ਏਕੇਨ ਚਕ੍ਖੁਨਾ ਸਮਵਿਸਮਂ ਪਸ੍ਸਨ੍ਤੋ ਸਕਂ ਅਤ੍ਤਭਾਵਂ ਤ੍ਵਂ ਯਾਪੇਹਿ, ਅਹਮ੍ਪਿ ਭਵਤੋ ਲਦ੍ਧੇਨ ਏਕੇਨ ਯਾਪੇਮੀਤਿ ਦਸ੍ਸੇਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ਤੁਟ੍ਠਮਾਨਸੋ ‘‘ਇਦਾਨੇਵਾਹਂ ਪਾਸਾਦੇ ਨਿਸਿਨ੍ਨੋ ਏਵਂ ਚਿਨ੍ਤੇਤ੍ਵਾ ਆਗਤੋ, ਅਯਞ੍ਚ ਮੇ ਚਿਤ੍ਤਂ ਞਤ੍ਵਾ ਵਿਯ ਚਕ੍ਖੁਂ ਯਾਚਤਿ, ਅਹੋ ਵਤ ਮੇ ਲਾਭਾ, ਅਜ੍ਜ ਮੇ ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤਿ, ਅਦਿਨ੍ਨਪੁਬ੍ਬਂ ਵਤ ਦਾਨਂ ਦਸ੍ਸਾਮੀ’’ਤਿ ਉਸ੍ਸਾਹਜਾਤੋ ਅਹੋਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੬੦. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਕਤਞ੍ਜਲੀ ਵੇਦਜਾਤੋ, ਇਦਂ ਵਚਨਮਬ੍ਰਵਿਂ.

੬੧. ‘‘‘ਇਦਾਨਾਹਂ ਚਿਨ੍ਤਯਿਤ੍ਵਾਨ, ਪਾਸਾਦਤੋ ਇਧਾਗਤੋ;

ਤ੍ਵਂ ਮਮ ਚਿਤ੍ਤਮਞ੍ਞਾਯ, ਨੇਤ੍ਤਂ ਯਾਚਿਤੁਮਾਗਤੋ.

੬੨. ‘‘‘ਅਹੋ ਮੇ ਮਾਨਸਂ ਸਿਦ੍ਧਂ, ਸਙ੍ਕਪ੍ਪੋ ਪਰਿਪੂਰਿਤੋ;

ਅਦਿਨ੍ਨਪੁਬ੍ਬਂ ਦਾਨਵਰਂ, ਅਜ੍ਜ ਦਸ੍ਸਾਮਿ ਯਾਚਕੇ’’’ਤਿ.

ਤਤ੍ਥ ਤਸ੍ਸਾਤਿ ਤਸ੍ਸ ਬ੍ਰਾਹ੍ਮਣਰੂਪਧਰਸ੍ਸ ਸਕ੍ਕਸ੍ਸ. ਹਟ੍ਠੋਤਿ ਤੁਟ੍ਠੋ. ਸਂਵਿਗ੍ਗਮਾਨਸੋਤਿ ਮਮ ਚਿਤ੍ਤਂ ਜਾਨਿਤ੍ਵਾ ਵਿਯ ਇਮਿਨਾ ਬ੍ਰਾਹ੍ਮਣੇਨ ਚਕ੍ਖੁ ਯਾਚਿਤਂ, ਏਤ੍ਤਕਂ ਕਾਲਂ ਏਵਂ ਅਚਿਨ੍ਤੇਤ੍ਵਾ ਪਮਜ੍ਜਿਤੋ ਵਤਮ੍ਹੀਤਿ ਸਂਵਿਗ੍ਗਚਿਤ੍ਤੋ. ਵੇਦਜਾਤੋਤਿ ਜਾਤਪੀਤਿਪਾਮੋਜ੍ਜੋ. ਅਬ੍ਰਵਿਨ੍ਤਿ ਅਭਾਸਿਂ. ਮਾਨਸਨ੍ਤਿ ਮਨਸਿ ਭਵਂ ਮਾਨਸਂ, ਦਾਨਜ੍ਝਾਸਯੋ, ‘‘ਚਕ੍ਖੁਂ ਦਸ੍ਸਾਮੀ’’ਤਿ ਉਪ੍ਪਨ੍ਨਦਾਨਜ੍ਝਾਸਯੋਤਿ ਅਤ੍ਥੋ. ਸਙ੍ਕਪ੍ਪੋਤਿ ਮਨੋਰਥੋ. ਪਰਿਪੂਰਿਤੋਤਿ ਪਰਿਪੁਣ੍ਣੋ.

ਅਥ ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਅਯਂ ਬ੍ਰਾਹ੍ਮਣੋ ਮਮ ਚਿਤ੍ਤਾਚਾਰਂ ਞਤ੍ਵਾ ਵਿਯ ਦੁਚ੍ਚਜਮ੍ਪਿ ਚਕ੍ਖੁਂ ਮਂ ਯਾਚਤਿ, ਸਿਯਾ ਨੁ ਖੋ ਕਾਯਚਿ ਦੇਵਤਾਯ ਅਨੁਸਿਟ੍ਠੋ ਭਵਿਸ੍ਸਤਿ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਤਂ ਬ੍ਰਾਹ੍ਮਣਂ ਪੁਚ੍ਛਿ. ਤੇਨਾਹ ਭਗਵਾ ਜਾਤਕਦੇਸਨਾਯਂ –

‘‘ਕੇਨਾਨੁਸਿਟ੍ਠੋ ਇਧਮਾਗਤੋਸਿ, ਵਨਿਬ੍ਬਕ ਚਕ੍ਖੁਪਥਾਨਿ ਯਾਚਿਤੁਂ;

ਸੁਦੁਚ੍ਚਜਂ ਯਾਚਸਿ ਉਤ੍ਤਮਙ੍ਗਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜ’’ਨ੍ਤਿ.(ਜਾ. ੧.੧੫.੫੩);

ਤਂ ਸੁਤ੍ਵਾ ਬ੍ਰਾਹ੍ਮਣਰੂਪਧਰੋ ਸਕ੍ਕੋ ਆਹ –

‘‘ਯਮਾਹੁ ਦੇਵੇਸੁ ਸੁਜਮ੍ਪਤੀਤਿ, ਮਘਵਾਤਿ ਨਂ ਆਹੁ ਮਨੁਸ੍ਸਲੋਕੇ;

ਤੇਨਾਨੁਸਿਟ੍ਠੋ ਇਧਮਾਗਤੋਸ੍ਮਿ, ਵਨਿਬ੍ਬਕੋ ਚਕ੍ਖੁਪਥਾਨਿ ਯਾਚਿਤੁਂ.

‘‘ਵਨਿਬ੍ਬਤੋ ਮਯ੍ਹਂ ਵਨਿਂ ਅਨੁਤ੍ਤਰਂ, ਦਦਾਹਿ ਤੇ ਚਕ੍ਖੁਪਥਾਨਿ ਯਾਚਿਤੋ;

ਦਦਾਹਿ ਮੇ ਚਕ੍ਖੁਪਥਂ ਅਨੁਤ੍ਤਰਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜ’’ਨ੍ਤਿ. (ਜਾ. ੧.੧੫.੫੪-੫੫);

ਮਹਾਸਤ੍ਤੋ ਆਹ –

‘‘ਯੇਨ ਅਤ੍ਥੇਨ ਆਗਚ੍ਛਿ, ਯਮਤ੍ਥਮਭਿਪਤ੍ਥਯਂ;

ਤੇ ਤੇ ਇਜ੍ਝਨ੍ਤੁ ਸਙ੍ਕਪ੍ਪਾ, ਲਭ ਚਕ੍ਖੂਨਿ ਬ੍ਰਾਹ੍ਮਣ.

‘‘ਏਕਂ ਤੇ ਯਾਚਮਾਨਸ੍ਸ, ਉਭਯਾਨਿ ਦਦਾਮਹਂ;

ਸ ਚਕ੍ਖੁਮਾ ਗਚ੍ਛ ਜਨਸ੍ਸ ਪੇਕ੍ਖਤੋ,

ਯਦਿਚ੍ਛਸੇ ਤ੍ਵਂ ਤਦ ਤੇ ਸਮਿਜ੍ਝਤੂ’’ਤਿ. (ਜਾ. ੧.੧੫.੫੬-੫੭);

ਤਤ੍ਥ ਵਨਿਬ੍ਬਕਾਤਿ ਤਂ ਆਲਪਤਿ. ਚਕ੍ਖੁਪਥਾਨੀਤਿ ਦਸ੍ਸਨਸ੍ਸ ਪਥਭਾਵਤੋ ਚਕ੍ਖੂਨਮੇਵੇਤਂ ਨਾਮਂ. ਯਮਾਹੂਤਿ ਯਂ ਲੋਕੇ ‘‘ਦੁਚ੍ਚਜ’’ਨ੍ਤਿ ਕਥੇਨ੍ਤਿ. ਵਨਿਬ੍ਬਤੋਤਿ ਯਾਚਨ੍ਤਸ੍ਸ. ਵਨਿਨ੍ਤਿ ਯਾਚਨਂ. ਤੇ ਤੇਤਿ ਤੇ ਤਵ ਤਸ੍ਸ ਅਨ੍ਧਸ੍ਸ ਸਙ੍ਕਪ੍ਪਾ. ਸ ਚਕ੍ਖੁਮਾਤਿ ਸੋ ਤ੍ਵਂ ਮਮ ਚਕ੍ਖੂਹਿ ਚਕ੍ਖੁਮਾ ਹੁਤ੍ਵਾ. ਤਦ ਤੇ ਸਮਿਜ੍ਝਤੂਤਿ ਯਂ ਤ੍ਵਂ ਮਮ ਸਨ੍ਤਿਕਾ ਇਚ੍ਛਸਿ, ਤਂ ਤੇ ਸਮਿਜ੍ਝਤੂਤਿ.

ਰਾਜਾ ਏਤ੍ਤਕਂ ਕਥੇਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਸਕ੍ਕੇਨ ਅਨੁਸਿਟ੍ਠੋ ਇਧਾਗਤੋਸ੍ਮੀਤਿ ਭਣਤਿ, ਨੂਨ ਇਮਸ੍ਸ ਇਮਿਨਾ ਉਪਾਯੇਨ ਚਕ੍ਖੁ ਸਮ੍ਪਜ੍ਜਿਸ੍ਸਤੀ’’ਤਿ ਞਤ੍ਵਾ ‘‘ਇਧੇਵ ਮਯਾ ਚਕ੍ਖੂਨਿ ਉਪ੍ਪਾਟੇਤ੍ਵਾ ਦਾਤੁਂ ਅਸਾਰੁਪ੍ਪ’’ਨ੍ਤਿ ਚਿਨ੍ਤੇਤ੍ਵਾ ਬ੍ਰਾਹ੍ਮਣਂ ਆਦਾਯ ਅਨ੍ਤੇਪੁਰਂ ਗਨ੍ਤ੍ਵਾ ਰਾਜਾਸਨੇ ਨਿਸੀਦਿਤ੍ਵਾ ਸਿਵਕਂ ਨਾਮ ਵੇਜ੍ਜਂ ਪਕ੍ਕੋਸਾਪੇਸਿ. ਅਥ ‘‘ਅਮ੍ਹਾਕਂ ਕਿਰ ਰਾਜਾ ਅਕ੍ਖੀਨਿ ਉਪ੍ਪਾਟੇਤ੍ਵਾ ਬ੍ਰਾਹ੍ਮਣਸ੍ਸ ਦਾਤੁਕਾਮੋ’’ਤਿ ਸਕਲਨਗਰੇ ਏਕਕੋਲਾਹਲਂ ਅਹੋਸਿ. ਅਥ ਨਂ ਰਞ੍ਞੋ ਞਾਤਿਸੇਨਾਪਤਿਆਦਯੋ ਰਾਜਵਲ੍ਲਭਾ ਅਮਚ੍ਚਾ ਪਾਰਿਸਜ੍ਜਾ ਨਾਗਰਾ ਓਰੋਧਾ ਚ ਸਬ੍ਬੇ ਸਨ੍ਨਿਪਤਿਤ੍ਵਾ ਨਾਨਾਉਪਾਯੇਹਿ ਨਿਵਾਰੇਸੁਂ. ਰਾਜਾਪਿ ਨੇ ਅਨੁਵਾਰੇਸਿ ਤੇਨਾਹ –

‘‘ਮਾ ਨੋ ਦੇਵ ਅਦਾ ਚਕ੍ਖੁਂ, ਮਾ ਨੋ ਸਬ੍ਬੇ ਪਰਾਕਰਿ;

ਧਨਂ ਦੇਹਿ ਮਹਾਰਾਜ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

‘‘ਯੁਤ੍ਤੇ ਦੇਵ ਰਥੇ ਦੇਹਿ, ਆਜਾਨੀਯੇ ਚਲਙ੍ਕਤੇ;

ਨਾਗੇ ਦੇਹਿ ਮਹਾਰਾਜ, ਹੇਮਕਪ੍ਪਨਵਾਸਸੇ.

‘‘ਯਥਾ ਤਂ ਸਿਵਯੋ ਸਬ੍ਬੇ, ਸਯੋਗ੍ਗਾ ਸਰਥਾ ਸਦਾ;

ਸਮਨ੍ਤਾ ਪਰਿਕਿਰੇਯ੍ਯੁਂ, ਏਵਂ ਦੇਹਿ ਰਥੇਸਭਾ’’ਤਿ. (ਜਾ. ੧.੧੫.੫੮-੬੦);

ਅਥ ਰਾਜਾ ਤਿਸ੍ਸੋ ਗਾਥਾ ਅਭਾਸਿ –

‘‘ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;

ਭੂਮ੍ਯਂ ਸੋ ਪਤਿਤਂ ਪਾਸਂ, ਗੀਵਾਯਂ ਪਟਿਮੁਞ੍ਚਤਿ.

‘‘ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;

ਪਾਪਾ ਪਾਪਤਰੋ ਹੋਤਿ, ਸਮ੍ਪਤ੍ਤੋ ਯਮਸਾਧਨਂ.

‘‘ਯਞ੍ਹਿ ਯਾਚੇ ਤਞ੍ਹਿ ਦਦੇ, ਯਂ ਨ ਯਾਚੇ ਨ ਤਂ ਦਦੇ;

ਸ੍ਵਾਹਂ ਤਮੇਵ ਦਸ੍ਸਾਮਿ, ਯਂ ਮਂ ਯਾਚਤਿ ਬ੍ਰਾਹ੍ਮਣੋ’’ਤਿ. (ਜਾ. ੧.੧੫.੬੧-੬੩);

ਤਤ੍ਥ ਮਾ ਨੋ, ਦੇਵਾਤਿ ਨੋਤਿ ਨਿਪਾਤਮਤ੍ਤਂ. ਦੇਵ, ਮਾ ਚਕ੍ਖੁਂ ਅਦਾਸਿ. ਮਾ ਨੋ ਸਬ੍ਬੇ ਪਰਾਕਰੀਤਿ ਅਮ੍ਹੇ ਸਬ੍ਬੇ ਮਾ ਪਰਿਚ੍ਚਜਿ. ਅਕ੍ਖੀਸੁ ਹਿ ਦਿਨ੍ਨੇਸੁ ਤ੍ਵਂ ਰਜ੍ਜਂ ਨ ਕਰਿਸ੍ਸਸਿ, ਏਵਂ ਤਯਾ ਮਯਂ ਪਰਿਚ੍ਚਤ੍ਤਾ ਨਾਮ ਭਵਿਸ੍ਸਾਮਾਤਿ ਅਧਿਪ੍ਪਾਯੇਨ ਏਵਮਾਹਂਸੁ. ਪਰਿਕਿਰੇਯ੍ਯੁਨ੍ਤਿ ਪਰਿਵਾਰੇਯ੍ਯੁਂ. ਏਵਂ ਦੇਹੀਤਿ ਯਥਾ ਤਂ ਅਵਿਕਲਚਕ੍ਖੁਂ ਸਿਵਯੋ ਚਿਰਂ ਪਰਿਵਾਰੇਯ੍ਯੁਂ, ਏਵਂ ਦੇਹਿ ਧਨਮੇਵਸ੍ਸ ਦੇਹਿ, ਮਾ ਅਕ੍ਖੀਨਿ, ਅਕ੍ਖੀਸੁ ਹਿ ਦਿਨ੍ਨੇਸੁ ਨ ਤਂ ਸਿਵਯੋ ਪਰਿਵਾਰੇਸ੍ਸਨ੍ਤੀਤਿ ਦਸ੍ਸੇਤਿ.

ਪਟਿਮੁਞ੍ਚਤੀਤਿ ਪਟਿਪਵੇਸੇਤਿ. ਪਾਪਾ ਪਾਪਤਰੋ ਹੋਤੀਤਿ ਲਾਮਕਾ ਲਾਮਕਤਰੋ ਨਾਮ ਹੋਤਿ. ਸਮ੍ਪਤ੍ਤੋ ਯਮਸਾਧਨਨ੍ਤਿ ਯਮਸ੍ਸ ਆਣਾਪਵਤ੍ਤਿਟ੍ਠਾਨਂ ਉਸ੍ਸਦਨਿਰਯਂ ਏਸ ਪਤ੍ਤੋ ਨਾਮ ਹੋਤਿ. ਯਞ੍ਹਿ ਯਾਚੇਤਿ ਯਂ ਵਤ੍ਥੁਂ ਯਾਚਕੋ ਯਾਚਤਿ, ਦਾਯਕੋਪਿ ਤਦੇਵ ਦਦੇਯ੍ਯ, ਨ ਅਯਾਚਿਤਂ, ਅਯਞ੍ਚ ਬ੍ਰਾਹ੍ਮਣੋ ਚਕ੍ਖੁਂ ਮਂ ਯਾਚਤਿ, ਨ ਮੁਤ੍ਤਾਦਿਕਂ ਧਨਂ, ਤਂ ਦਸ੍ਸਾਮੀਤਿ ਵਦਤਿ.

ਅਥ ਨਂ ‘‘ਆਯੁਆਦੀਸੁ ਕਿਂ ਪਤ੍ਥੇਤ੍ਵਾ ਚਕ੍ਖੂਨਿ ਦੇਸਿ ਦੇਵਾ’’ਤਿ ਪੁਚ੍ਛਿਂਸੁ. ਮਹਾਪੁਰਿਸੋ ‘‘ਨਾਹਂ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਂ ਵਾ ਸਮ੍ਪਤ੍ਤਿਂ ਪਤ੍ਥੇਤ੍ਵਾ ਦੇਮਿ, ਅਪਿ ਚ ਬੋਧਿਸਤ੍ਤਾਨਂ ਆਚਿਣ੍ਣਸਮਾਚਿਣ੍ਣੋ ਪੋਰਾਣਕਮਗ੍ਗੋ ਏਸ, ਯਦਿਦਂ ਦਾਨਪਾਰਮਿਪੂਰਣਂ ਨਾਮਾ’’ਤਿ ਆਹ. ਤੇਨ ਵੁਤ੍ਤਂ –

‘‘ਆਯੁਂ ਨੁ ਵਣ੍ਣਂ ਨੁ ਸੁਖਂ ਬਲਂ ਨੁ, ਕਿਂ ਪਤ੍ਥਯਾਨੋ ਨੁ ਜਨਿਨ੍ਦ ਦੇਸਿ;

ਕਥਞ੍ਹਿ ਰਾਜਾ ਸਿਵਿਨਂ ਅਨੁਤ੍ਤਰੋ, ਚਕ੍ਖੂਨਿ ਦਜ੍ਜਾ ਪਰਲੋਕਹੇਤੁ.

‘‘ਨ ਵਾਹਮੇਤਂ ਯਸਸਾ ਦਦਾਮਿ, ਨ ਪੁਤ੍ਤਮਿਚ੍ਛੇ ਨ ਧਨਂ ਨ ਰਟ੍ਠਂ;

ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਇਚ੍ਚੇਵ ਦਾਨੇ ਰਮਤੇ ਮਨੋ ਮਮਾ’’ਤਿ. (ਜਾ. ੧.੧੫.੬੪-੬੫);

ਤਤ੍ਥ ਪਰਲੋਕਹੇਤੂਤਿ, ਮਹਾਰਾਜ, ਕਥਂ ਨਾਮ ਤੁਮ੍ਹਾਦਿਸੋ ਪਣ੍ਡਿਤਪੁਰਿਸੋ ਸਕ੍ਕਸਮ੍ਪਤ੍ਤਿਸਦਿਸਂ ਸਨ੍ਦਿਟ੍ਠਿਕਂ ਇਸ੍ਸਰਿਯਂ ਪਹਾਯ ਪਰਲੋਕਹੇਤੁ ਚਕ੍ਖੂਨਿ ਦਦੇਯ੍ਯਾਤਿ.

ਨ ਵਾਹਨ੍ਤਿ ਨ ਵੇ ਅਹਂ. ਯਸਸਾਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ ਇਸ੍ਸਰਿਯਸ੍ਸ ਕਾਰਣਾ, ਅਪਿਚ ਸਤਂ ਬੋਧਿਸਤ੍ਤਾਨਂ ਧਮ੍ਮੋ ਬੁਦ੍ਧਕਾਰਕੋ ਚਰਿਤੋ ਆਚਰਿਤੋ ਆਚਿਣ੍ਣੋ ਪੁਰਾਤਨੋ ਇਚ੍ਚੇਵ ਇਮਿਨਾ ਕਾਰਣੇਨ ਦਾਨੇਯੇਵ ਈਦਿਸੋ ਮਮ ਮਨੋ ਨਿਰਤੋਤਿ.

ਏਵਞ੍ਚ ਪਨ ਵਤ੍ਵਾ ਰਾਜਾ ਅਮਚ੍ਚੇ ਸਞ੍ਞਾਪੇਤ੍ਵਾ ਸਿਵਕਂ ਵੇਜ੍ਜਂ ਆਣਾਪੇਸਿ – ‘‘ਏਹਿ, ਸਿਵਕ, ਮਮ ਉਭੋਪਿ ਅਕ੍ਖੀਨਿ ਇਮਸ੍ਸ ਬ੍ਰਾਹ੍ਮਣਸ੍ਸ ਦਾਤੁਂ ਸੀਘਂ ਉਪ੍ਪਾਟੇਤ੍ਵਾ ਹਤ੍ਥੇ ਪਤਿਟ੍ਠਪੇਹੀ’’ਤਿ. ਤੇਨ ਵੁਤ੍ਤਂ –

੬੩. ‘‘ਏਹਿ ਸਿਵਕ ਉਟ੍ਠੇਹਿ, ਮਾ ਦਨ੍ਧਯਿ ਮਾ ਪਵੇਧਯਿ;

ਉਭੋਪਿ ਨਯਨਂ ਦੇਹਿ, ਉਪ੍ਪਾਟੇਤ੍ਵਾ ਵਨਿਬ੍ਬਕੇ.

੬੪. ‘‘ਤਤੋ ਸੋ ਚੋਦਿਤੋ ਮਯ੍ਹਂ, ਸਿਵਕੋ ਵਚਨਂਕਰੋ;

ਉਦ੍ਧਰਿਤ੍ਵਾਨ ਪਾਦਾਸਿ, ਤਾਲਮਿਞ੍ਜਂਵ ਯਾਚਕੇ’’ਤਿ.

ਤਤ੍ਥ ਉਟ੍ਠੇਹੀਤਿ ਉਟ੍ਠਾਨਵੀਰਿਯਂ ਕਰੋਹਿ. ਇਮਸ੍ਮਿਂ ਮਮ ਚਕ੍ਖੁਦਾਨੇ ਸਹਾਯਕਿਚ੍ਚਂ ਕਰੋਹੀਤਿ ਦਸ੍ਸੇਤਿ. ਮਾ ਦਨ੍ਤਯੀਤਿ ਮਾ ਚਿਰਾਯਿ. ਅਯਞ੍ਹਿ ਅਤਿਦੁਲ੍ਲਭੋ ਚਿਰਕਾਲਂ ਪਤ੍ਥਿਤੋ ਮਯਾ ਉਤ੍ਤਮੋ ਦਾਨਕ੍ਖਣੋ ਪਟਿਲਦ੍ਧੋ, ਸੋ ਮਾ ਵਿਰਜ੍ਝੀਤਿ ਅਧਿਪ੍ਪਾਯੋ. ਮਾ ਪਵੇਧਯੀਤਿ ‘‘ਅਮ੍ਹਾਕਂ ਰਞ੍ਞੋ ਚਕ੍ਖੂਨਿ ਉਪ੍ਪਾਟੇਮੀ’’ਤਿ ਚਿਤ੍ਤੁਤ੍ਰਾਸਵਸੇਨ ਮਾ ਵੇਧਯਿ ਸਰੀਰਕਮ੍ਪਂ ਮਾ ਆਪਜ੍ਜਿ. ਉਭੋਪਿ ਨਯਨਨ੍ਤਿ ਉਭੋਪਿ ਨਯਨੇ. ਵਨਿਬ੍ਬਕੇਤਿ ਯਾਚਕਸ੍ਸ ਮਯ੍ਹਨ੍ਤਿ ਮਯਾ. ਉਦ੍ਧਰਿਤ੍ਵਾਨ ਪਾਦਾਸੀਤਿ ਸੋ ਵੇਜ੍ਜੋ ਰਞ੍ਞੋ ਅਕ੍ਖਿਕੂਪਤੋ ਉਭੋਪਿ ਅਕ੍ਖੀਨਿ ਉਪ੍ਪਾਟੇਤ੍ਵਾ ਰਞ੍ਞੋ ਹਤ੍ਥੇ ਅਦਾਸਿ.

ਦੇਨ੍ਤੋ ਚ ਨ ਸਤ੍ਥਕੇਨ ਉਦ੍ਧਰਿਤ੍ਵਾ ਅਦਾਸਿ. ਸੋ ਹਿ ਚਿਨ੍ਤੇਸਿ – ‘‘ਅਯੁਤ੍ਤਂ ਮਾਦਿਸਸ੍ਸ ਸੁਸਿਕ੍ਖਿਤਵੇਜ੍ਜਸ੍ਸ ਰਞ੍ਞੋ ਅਕ੍ਖੀਸੁ ਸਤ੍ਥਪਾਤਨ’’ਨ੍ਤਿ ਭੇਸਜ੍ਜਾਨਿ ਘਂਸੇਤ੍ਵਾ ਭੇਸਜ੍ਜਚੁਣ੍ਣੇਨ ਨੀਲੁਪ੍ਪਲਂ ਪਰਿਭਾਵੇਤ੍ਵਾ ਦਕ੍ਖਿਣਕ੍ਖਿਂ ਉਪਸਿਙ੍ਘਾਪੇਸਿ, ਅਕ੍ਖਿ ਪਰਿਵਤ੍ਤਿ, ਦੁਕ੍ਖਾ ਵੇਦਨਾ ਉਪ੍ਪਜ੍ਜਿ. ਸੋ ਪਰਿਭਾਵੇਤ੍ਵਾ ਪੁਨਪਿ ਉਪਸਿਙ੍ਘਾਪੇਸਿ, ਅਕ੍ਖਿ ਅਕ੍ਖਿਕੂਪਤੋ ਮੁਚ੍ਚਿ, ਬਲਵਤਰਾ ਵੇਦਨਾ ਉਦਪਾਦਿ, ਤਤਿਯਵਾਰੇ ਖਰਤਰਂ ਪਰਿਭਾਵੇਤ੍ਵਾ ਉਪਨਾਮੇਸਿ, ਅਕ੍ਖਿ ਓਸਧਬਲੇਨ ਪਰਿਬ੍ਭਮਿਤ੍ਵਾ ਅਕ੍ਖਿਕੂਪਤੋ ਨਿਕ੍ਖਮਿਤ੍ਵਾ ਨ੍ਹਾਰੁਸੁਤ੍ਤਕੇਨ ਓਲਮ੍ਬਮਾਨਂ ਅਟ੍ਠਾਸਿ, ਅਧਿਮਤ੍ਤਾ ਵੇਦਨਾ ਉਦਪਾਦਿ, ਲੋਹਿਤਂ ਪਗ੍ਘਰਿ, ਨਿਵਤ੍ਥਸਾਟਕਾਪਿ ਲੋਹਿਤੇਨ ਤੇਮਿਂਸੁ. ਓਰੋਧਾ ਚ ਅਮਚ੍ਚਾ ਚ ਰਞ੍ਞੋ ਪਾਦਮੂਲੇ ਪਤਿਤ੍ਵਾ ‘‘ਦੇਵ, ਅਕ੍ਖੀਨਿ ਮਾ ਦੇਹਿ, ਦੇਵ, ਅਕ੍ਖੀਨਿ ਮਾ ਦੇਹੀ’’ਤਿ ਮਹਾਪਰਿਦੇਵਂ ਪਰਿਦੇਵਿਂਸੁ.

ਰਾਜਾ ਵੇਦਨਂ ਅਧਿਵਾਸੇਤ੍ਵਾ ‘‘ਤਾਤ, ਮਾ ਪਪਞ੍ਚਂ ਕਰੀ’’ਤਿ ਆਹ. ਸੋ ‘‘ਸਾਧੁ, ਦੇਵਾ’’ਤਿ ਵਾਮਹਤ੍ਥੇਨ ਅਕ੍ਖਿਂ ਧਾਰੇਤ੍ਵਾ ਦਕ੍ਖਿਣਹਤ੍ਥੇਨ ਸਤ੍ਥਕਂ ਆਦਾਯ ਅਕ੍ਖਿਸੁਤ੍ਤਕਂ ਛਿਨ੍ਦਿਤ੍ਵਾ ਅਕ੍ਖਿਂ ਗਹੇਤ੍ਵਾ ਮਹਾਸਤ੍ਤਸ੍ਸ ਹਤ੍ਥੇ ਠਪੇਸਿ. ਸੋ ਵਾਮਕ੍ਖਿਨਾ ਦਕ੍ਖਿਣਕ੍ਖਿਂ ਓਲੋਕੇਤ੍ਵਾ ਪਰਿਚ੍ਚਾਗਪੀਤਿਯਾ ਅਭਿਭੁਯ੍ਯਮਾਨਂ ਦੁਕ੍ਖਵੇਦਨਂ ਵੇਦੇਨ੍ਤੋ ‘‘ਏਹਿ, ਬ੍ਰਾਹ੍ਮਣਾ’’ਤਿ ਬ੍ਰਾਹ੍ਮਣਂ ਪਕ੍ਕੋਸਾਪੇਤ੍ਵਾ ‘‘ਮਮ ਇਤੋ ਚਕ੍ਖੁਤੋ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਸਮਨ੍ਤਚਕ੍ਖੁਮੇਵ ਪਿਯਤਰਂ, ਤਸ੍ਸ ਮੇ ਇਦਂ ਅਕ੍ਖਿਦਾਨਂ ਪਚ੍ਚਯੋ ਹੋਤੂ’’ਤਿ ਬ੍ਰਾਹ੍ਮਣਸ੍ਸ ਅਕ੍ਖਿਂ ਅਦਾਸਿ. ਸੋ ਤਂ ਉਕ੍ਖਿਪਿਤ੍ਵਾ ਅਤ੍ਤਨੋ ਅਕ੍ਖਿਮ੍ਹਿ ਠਪੇਸਿ, ਤਂ ਤਸ੍ਸਾਨੁਭਾਵੇਨ ਵਿਕਸਿਤਨੀਲੁਪ੍ਪਲਂ ਵਿਯ ਹੁਤ੍ਵਾ ਉਪਟ੍ਠਾਸਿ. ਮਹਾਸਤ੍ਤੋ ਵਾਮਕ੍ਖਿਨਾ ਤਸ੍ਸ ਤਂ ਅਕ੍ਖਿਂ ਦਿਸ੍ਵਾ ‘‘ਅਹੋ ਸੁਦਿਨ੍ਨਂ ਮਯਾ ਅਕ੍ਖੀ’’ਤਿ ਅਨ੍ਤੋਸਮੁਗ੍ਗਤਾਯ ਪੀਤਿਯਾ ਨਿਰਨ੍ਤਰਂ ਫੁਟਸਰੀਰੋ ਹੁਤ੍ਵਾ ਅਪਰਮ੍ਪਿ ਅਦਾਸਿ. ਸਕ੍ਕੋਪਿ ਤਂ ਤਥੇਵ ਕਤ੍ਵਾ ਰਾਜਨਿਵੇਸਨਾ ਨਿਕ੍ਖਮਿਤ੍ਵਾ ਮਹਾਜਨਸ੍ਸ ਓਲੋਕੇਨ੍ਤਸ੍ਸੇਵ ਨਗਰਾ ਨਿਕ੍ਖਮਿਤ੍ਵਾ ਦੇਵਲੋਕਮੇਵ ਗਤੋ.

ਰਞ੍ਞੋ ਨਚਿਰਸ੍ਸੇਵ ਅਕ੍ਖੀਨਿ ਆਵਾਟਭਾਵਂ ਅਪ੍ਪਤ੍ਤਾਨਿ ਕਮ੍ਬਲਗੇਣ੍ਡੁਕਂ ਵਿਯ ਉਗ੍ਗਤੇਨ ਮਂਸਪਿਣ੍ਡੇਨ ਪੂਰੇਤ੍ਵਾ ਚਿਤ੍ਤਕਮ੍ਮਰੂਪਸ੍ਸ ਵਿਯ ਰੁਹਿਂਸੁ, ਵੇਦਨਾ ਪਚ੍ਛਿਜ੍ਜਿ. ਅਥ ਮਹਾਸਤ੍ਤੋ ਕਤਿਪਾਹਂ ਪਾਸਾਦੇ ਵਸਿਤ੍ਵਾ ‘‘ਕਿਂ ਅਨ੍ਧਸ੍ਸ ਰਜ੍ਜੇਨਾਤਿ ਅਮਚ੍ਚਾਨਂ ਰਜ੍ਜਂ ਨਿਯ੍ਯਾਤੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਮਚ੍ਚਾਨਂ ਤਮਤ੍ਥਂ ਆਰੋਚੇਤ੍ਵਾ ‘‘ਮੁਖਧੋਵਨਾਦਿਦਾਯਕੋ ਏਕੋ ਪੁਰਿਸੋ ਮਯ੍ਹਂ ਸਨ੍ਤਿਕੇ ਹੋਤੁ, ਸਰੀਰਕਿਚ੍ਚਟ੍ਠਾਨੇਸੁਪਿ ਮੇ ਰਜ੍ਜੁਕਂ ਬਨ੍ਧਥਾ’’ਤਿ ਵਤ੍ਵਾ ਸਿਵਿਕਾਯ ਗਨ੍ਤ੍ਵਾ ਪੋਕ੍ਖਰਣਿਤੀਰੇ ਰਾਜਪਲ੍ਲਙ੍ਕੇ ਨਿਸੀਦਿ. ਅਮਚ੍ਚਾਪਿ ਵਨ੍ਦਿਤ੍ਵਾ ਪਟਿਕ੍ਕਮਿਂਸੁ. ਬੋਧਿਸਤ੍ਤੋਪਿ ਅਤ੍ਤਨੋ ਦਾਨਂ ਆਵਜ੍ਜੇਸਿ. ਤਸ੍ਮਿਂ ਖਣੇ ਸਕ੍ਕਸ੍ਸ ਆਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਤਂ ਦਿਸ੍ਵਾ ‘‘ਮਹਾਰਾਜਸ੍ਸ ਵਰਂ ਦਤ੍ਵਾ ਚਕ੍ਖੁਂ ਪਟਿਪਾਕਤਿਕਂ ਕਰਿਸ੍ਸਾਮੀ’’ਤਿ ਬੋਧਿਸਤ੍ਤਸ੍ਸ ਸਮੀਪਂ ਗਨ੍ਤ੍ਵਾ ਪਦਸਦ੍ਦਮਕਾਸਿ. ਮਹਾਸਤ੍ਤੇਨ ਚ ‘‘ਕੋ ਏਸੋ’’ਤਿ ਵੁਤ੍ਤੇ –

‘‘ਸਕ੍ਕੋਹਮਸ੍ਮਿ ਦੇਵਿਨ੍ਦੋ, ਆਗਤੋਸ੍ਮਿ ਤਵਨ੍ਤਿਕੇ;

ਵਰਂ ਵਰਸ੍ਸੁ ਰਾਜੀਸਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ. (ਜਾ. ੧.੧੫.੭੧) –

ਵਤ੍ਵਾ ਤੇਨ –

‘‘ਪਹੂਤਂ ਮੇ ਧਨਂ ਸਕ੍ਕ, ਬਲਂ ਕੋਸੋ ਚਨਪ੍ਪਕੋ;

ਅਨ੍ਧਸ੍ਸ ਮੇ ਸਤੋ ਦਾਨਿ, ਮਰਣਞ੍ਞੇਵ ਰੁਚ੍ਚਤੀ’’ਤਿ. (ਜਾ. ੧.੧੫.੭੨) –

ਵੁਤ੍ਤੇ ਅਥ ਨਂ ਸਕ੍ਕੋ ਆਹ – ‘‘ਸਿਵਿਰਾਜ, ਕਿਂ ਪਨ ਤ੍ਵਂ ਮਰਿਤੁਕਾਮੋ ਹੁਤ੍ਵਾ ਮਰਣਂ ਰੋਚੇਸਿ, ਉਦਾਹੁ ਅਨ੍ਧਭਾਵੇਨਾ’’ਤਿ. ਅਨ੍ਧਭਾਵੇਨ, ਦੇਵਾਤਿ. ‘‘ਮਹਾਰਾਜ, ਦਾਨਂ ਨਾਮ ਨ ਕੇਵਲਂ ਸਮ੍ਪਰਾਯਤ੍ਥਮੇਵ ਦਿਯ੍ਯਤਿ, ਦਿਟ੍ਠਧਮ੍ਮਤ੍ਥਾਯਪਿ ਪਚ੍ਚਯੋ ਹੋਤਿ, ਤਸ੍ਮਾ ਤਵ ਦਾਨਪੁਞ੍ਞਮੇਵ ਨਿਸ੍ਸਾਯ ਸਚ੍ਚਕਿਰਿਯਂ ਕਰੋਹਿ, ਤਸ੍ਸ ਬਲੇਨੇਵ ਤੇ ਚਕ੍ਖੁ ਉਪ੍ਪਜ੍ਜਿਸ੍ਸਤੀ’’ਤਿ ਵੁਤ੍ਤੇ ‘‘ਤੇਨ ਹਿ ਮਯਾ ਮਹਾਦਾਨਂ ਸੁਦਿਨ੍ਨ’’ਨ੍ਤਿ ਵਤ੍ਵਾ ਸਚ੍ਚਕਿਰਿਯਂ ਕਰੋਨ੍ਤੋ –

‘‘ਯੇ ਮਂ ਯਾਚਿਤੁਮਾਯਨ੍ਤਿ, ਨਾਨਾਗੋਤ੍ਤਾ ਵਨਿਬ੍ਬਕਾ;

ਯੋਪਿ ਮਂ ਯਾਚਤੇ ਤਤ੍ਥ, ਸੋਪਿ ਮੇ ਮਨਸੋ ਪਿਯੋ;

ਏਤੇਨ ਸਚ੍ਚਵਜ੍ਜੇਨ, ਚਕ੍ਖੁ ਮੇ ਉਪਪਜ੍ਜਥਾ’’ਤਿ. (ਜਾ. ੧.੧੫.੭੪) –

ਆਹ.

ਤਤ੍ਥ ਯੇ ਮਨ੍ਤਿ ਯੇ ਮਂ ਯਾਚਿਤੁਮਾਗਚ੍ਛਨ੍ਤਿ, ਤੇਸੁਪਿ ਆਗਤੇਸੁ ਯੋ ਇਮਂ ਨਾਮ ਦੇਹੀਤਿ ਵਾਚਂ ਨਿਚ੍ਛਾਰੇਨ੍ਤੋ ਮਂ ਯਾਚਤੇ, ਸੋਪਿ ਮੇ ਮਨਸੋ ਪਿਯੋ. ਏਤੇਨਾਤਿ ਸਚੇ ਮਯ੍ਹਂ ਸਬ੍ਬੇਪਿ ਯਾਚਕਾ ਪਿਯਾ, ਸਚ੍ਚਮੇਵੇਤਂ ਮਯਾ ਵੁਤ੍ਤਂ, ਏਤੇਨ ਮੇ ਸਚ੍ਚਵਚਨੇਨ ਏਕਂ ਚਕ੍ਖੁ ਉਪਪਜ੍ਜਥ ਉਪ੍ਪਜ੍ਜਤੂਤਿ.

ਅਥਸ੍ਸ ਵਚਨਸਮਨਨ੍ਤਰਮੇਵ ਪਠਮਂ ਚਕ੍ਖੁ ਉਦਪਾਦਿ. ਤਤੋ ਦੁਤਿਯਸ੍ਸ ਉਪ੍ਪਜ੍ਜਨਤ੍ਥਾਯ –

‘‘ਯਂ ਮਂ ਸੋ ਯਾਚਿਤੁਂ ਆਗਾ, ਦੇਹਿ ਚਕ੍ਖੁਨ੍ਤਿ ਬ੍ਰਾਹ੍ਮਣੋ;

ਤਸ੍ਸ ਚਕ੍ਖੂਨਿ ਪਾਦਾਸਿਂ, ਬ੍ਰਾਹ੍ਮਣਸ੍ਸ ਵਨਿਬ੍ਬਤੋ.

‘‘ਭਿਯ੍ਯੋ ਮਂ ਆਵਿਸੀ ਪੀਤਿ, ਸੋਮਨਸ੍ਸਞ੍ਚਨਪ੍ਪਕਂ;

ਏਤੇਨ ਸਚ੍ਚਵਜ੍ਜੇਨ, ਦੁਤਿਯਂ ਮੇ ਉਪਪਜ੍ਜਥਾ’’ਤਿ. (ਜਾ. ੧.੧੫.੭੫-੭੬) –

ਆਹ.

ਤਤ੍ਥ ਯਂ ਮਨ੍ਤਿ ਯੋ ਮਂ. ਸੋਤਿ ਸੋ ਚਕ੍ਖੁਯਾਚਕੋ ਬ੍ਰਾਹ੍ਮਣੋ. ਆਗਾਤਿ ਆਗਤੋ. ਵਨਿਬ੍ਬਤੋਤਿ ਯਾਚਨ੍ਤਸ੍ਸ. ਮਂ ਆਵਿਸੀਤਿ ਬ੍ਰਾਹ੍ਮਣਸ੍ਸ ਚਕ੍ਖੂਨਿ ਦਤ੍ਵਾ ਅਨ੍ਧਕਾਲੇਪਿ ਤਥਾਰੂਪਂ ਵੇਦਨਂ ਅਗਣੇਤ੍ਵਾ ‘‘ਅਹੋ ਸੁਦਿਨ੍ਨਂ ਮੇ ਦਾਨ’’ਨ੍ਤਿ ਪਚ੍ਚਵੇਕ੍ਖਨ੍ਤਂ ਮਂ ਭਿਯ੍ਯੋ ਅਤਿਰੇਕਤਰਾ ਪੀਤਿ ਆਵਿਸਿ. ਸੋਮਨਸ੍ਸਞ੍ਚਨਪ੍ਪਕਨ੍ਤਿ ਅਪਰਿਮਾਣਂ ਸੋਮਨਸ੍ਸਂ ਉਪ੍ਪਜ੍ਜਿ. ਏਤੇਨਾਤਿ ਸਚੇ ਤਦਾ ਮਮ ਅਨਪ੍ਪਕਂ ਪੀਤਿਸੋਮਨਸ੍ਸਂ ਉਪ੍ਪਨ੍ਨਂ, ਸਚ੍ਚਮੇਵੇਤਂ ਮਯਾ ਵੁਤ੍ਤਂ, ਏਤੇਨ ਮੇ ਸਚ੍ਚਵਚਨੇਨ ਦੁਤਿਯਮ੍ਪਿ ਚਕ੍ਖੁ ਉਪਪਜ੍ਜਤੂਤਿ.

ਤਂਖਣਞ੍ਞੇਵ ਦੁਤਿਯਮ੍ਪਿ ਚਕ੍ਖੁ ਉਦਪਾਦਿ. ਤਾਨਿ ਪਨਸ੍ਸ ਚਕ੍ਖੂਨਿ ਨੇਵ ਪਾਕਤਿਕਾਨਿ, ਨ ਦਿਬ੍ਬਾਨਿ. ਸਕ੍ਕਬ੍ਰਾਹ੍ਮਣਸ੍ਸ ਹਿ ਦਿਨ੍ਨਂ ਚਕ੍ਖੁਂ ਪੁਨ ਪਾਕਤਿਕਂ ਕਾਤੁਂ ਨ ਸਕ੍ਕਾ, ਉਪਹਤਚਕ੍ਖੁਨੋ ਚ ਦਿਬ੍ਬਚਕ੍ਖੁ ਨਾਮ ਨੁਪ੍ਪਜ੍ਜਤਿ, ਵੁਤ੍ਤਨਯੇਨ ਪਨਸ੍ਸ ਆਦਿਮਜ੍ਝਪਰਿਯੋਸਾਨੇਸੁ ਅਵਿਪਰੀਤਂ ਅਤ੍ਤਨੋ ਦਾਨਪੀਤਿਂ ਉਪਾਦਾਯ ਪੀਤਿਫਰਣਵਸੇਨ ਨਿਬ੍ਬਤ੍ਤਾਨਿ ‘‘ਸਚ੍ਚਪਾਰਮਿਤਾਚਕ੍ਖੂਨੀ’’ਤਿ ਵੁਤ੍ਤਾਨਿ. ਤੇਨ ਵੁਤ੍ਤਂ –

੬੫. ‘‘ਦਦਮਾਨਸ੍ਸ ਦੇਨ੍ਤਸ੍ਸ, ਦਿਨ੍ਨਦਾਨਸ੍ਸ ਮੇ ਸਤੋ;

ਚਿਤ੍ਤਸ੍ਸ ਅਞ੍ਞਥਾ ਨਤ੍ਥਿ, ਬੋਧਿਯਾਯੇਵ ਕਾਰਣਾ’’ਤਿ.

ਤਤ੍ਥ ਦਦਮਾਨਸ੍ਸਾਤਿ ਚਕ੍ਖੂਨਿ ਦਾਤੁਂ ਵੇਜ੍ਜੇਨ ਉਪ੍ਪਾਟੇਨ੍ਤਸ੍ਸ. ਦੇਨ੍ਤਸ੍ਸਾਤਿ ਉਪ੍ਪਾਟਿਤਾਨਿ ਤਾਨਿ ਸਕ੍ਕਬ੍ਰਾਹ੍ਮਣਸ੍ਸ ਹਤ੍ਥੇ ਠਪੇਨ੍ਤਸ੍ਸ. ਦਿਨ੍ਨਦਾਨਸ੍ਸਾਤਿ ਚਕ੍ਖੁਦਾਨਂ ਦਿਨ੍ਨਵਤੋ. ਚਿਤ੍ਤਸ੍ਸ ਅਞ੍ਞਥਾਤਿ ਦਾਨਜ੍ਝਾਸਯਸ੍ਸ ਅਞ੍ਞਥਾਭਾਵੋ. ਬੋਧਿਯਾਯੇਵ ਕਾਰਣਾਤਿ ਤਞ੍ਚ ਸਬ੍ਬਞ੍ਞੁਤਞ੍ਞਾਣਸ੍ਸੇਵ ਹੇਤੂਤਿ ਅਤ੍ਥੋ.

੬੬. ਸਬ੍ਬਞ੍ਞੁਤਞ੍ਞਾਣਸ੍ਸ ਸੁਦੁਲ੍ਲਭਤਾਯ ਏਵਂ ਸੁਦੁਕ੍ਕਰਂ ਮਯਾ ਕਤਨ੍ਤਿ ਨ ਚਕ੍ਖੂਨਂ ਨ ਅਤ੍ਤਭਾਵਸ੍ਸਪਿ ਅਪ੍ਪਿਯਤਾਯਾਤਿ ਦਸ੍ਸੇਨ੍ਤੋ ‘‘ਨ ਮੇ ਦੇਸ੍ਸਾ’’ਤਿ ਓਸਾਨਗਾਥਮਾਹ. ਤਤ੍ਥ ਅਤ੍ਤਾ ਨ ਮੇ ਨ ਦੇਸ੍ਸਿਯੋਤਿ ਪਠਮੋ ਨ-ਕਾਰੋ ਨਿਪਾਤਮਤ੍ਤੋ. ਅਤ੍ਤਾ ਨ ਮੇ ਕੁਜ੍ਝਿਤਬ੍ਬੋ, ਨ ਅਪ੍ਪਿਯੋਤਿ ਅਤ੍ਥੋ. ‘‘ਅਤ੍ਤਾਨਂ ਮੇ ਨ ਦੇਸ੍ਸਿਯ’’ਨ੍ਤਿਪਿ ਪਾਠੋ. ਤਸ੍ਸਤ੍ਥੋ – ਮੇ ਅਤ੍ਤਾਨਂ ਅਹਂ ਨ ਦੇਸ੍ਸਿਯਂ ਨ ਕੁਜ੍ਝੇਯ੍ਯਂ ਨ ਕੁਜ੍ਝਿਤੁਂ ਅਰਹਾਮਿ ਨ ਸੋ ਮਯਾ ਕੁਜ੍ਝਿਤਬ੍ਬੋਤਿ. ‘‘ਅਤ੍ਤਾਪਿ ਮੇ ਨ ਦੇਸ੍ਸਿਯੋ’’ਤਿਪਿ ਪਠਨ੍ਤਿ. ਅਦਾਸਹਨ੍ਤਿ ਅਦਾਸਿਂ ਅਹਂ. ‘‘ਅਦਾਸਿਹ’’ਨ੍ਤਿਪਿ ਪਾਠੋ.

ਤਦਾ ਪਨ ਬੋਧਿਸਤ੍ਤਸ੍ਸ ਸਚ੍ਚਕਿਰਿਯਾਯ ਚਕ੍ਖੂਸੁ ਉਪ੍ਪਨ੍ਨੇਸੁ ਸਕ੍ਕਾਨੁਭਾਵੇਨ ਸਬ੍ਬਾ ਰਾਜਪਰਿਸਾ ਸਨ੍ਨਿਪਤਿਤਾਵ ਅਹੋਸਿ. ਅਥਸ੍ਸ ਸਕ੍ਕੋ ਮਹਾਜਨਮਜ੍ਝੇ ਆਕਾਸੇ ਠਤ੍ਵਾ –

‘‘ਧਮ੍ਮੇਨ ਭਾਸਿਤਾ ਗਾਥਾ, ਸਿਵੀਨਂ ਰਟ੍ਠਵਡ੍ਢਨ;

ਏਤਾਨਿ ਤਵ ਨੇਤ੍ਤਾਨਿ, ਦਿਬ੍ਬਾਨਿ ਪਟਿਦਿਸ੍ਸਰੇ.

‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤੁ ਤੇ’’ਤਿ. (ਜਾ. ੧.੧੫.੭੭-੭੮) –

ਇਮਾਹਿ ਗਾਥਾਹਿ ਥੁਤਿਂ ਕਤ੍ਵਾ ਦੇਵਲੋਕਮੇਵ ਗਤੋ. ਬੋਧਿਸਤ੍ਤੋਪਿ ਮਹਾਜਨਪਰਿਵੁਤੋ ਮਹਨ੍ਤੇਨ ਸਕ੍ਕਾਰੇਨ ਨਗਰਂ ਪਵਿਸਿਤ੍ਵਾ ਰਾਜਗੇਹਦ੍ਵਾਰੇ ਸੁਸਜ੍ਜਿਤੇ ਮਹਾਮਣ੍ਡਪੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਚਕ੍ਖੁਪਟਿਲਾਭੇਨ ਤੁਟ੍ਠਹਟ੍ਠਪਮੁਦਿਤਾਨਂ ਦਟ੍ਠੁਂ ਆਗਤਾਨਂ ਨਾਗਰਾਨਂ ਜਾਨਪਦਾਨਂ ਰਾਜਪਰਿਸਾਯ ਚ ਧਮ੍ਮਂ ਦੇਸੇਨ੍ਤੋ –

‘‘ਕੋ ਨੀਧ ਵਿਤ੍ਤਂ ਨ ਦਦੇਯ੍ਯ ਯਾਚਿਤੋ, ਅਪਿ ਵਿਸਿਟ੍ਠਂ ਸੁਪਿਯਮ੍ਪਿ ਅਤ੍ਤਨੋ;

ਤਦਿਙ੍ਘ ਸਬ੍ਬੇ ਸਿਵਯੋ ਸਮਾਗਤਾ, ਦਿਬ੍ਬਾਨਿ ਨੇਤ੍ਤਾਨਿ ਮਮਜ੍ਜ ਪਸ੍ਸਥ.

‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤਿ ਮੇ.

‘‘ਨ ਚਾਗਮਤ੍ਤਾ ਪਰਮਤ੍ਥਿ ਕਿਞ੍ਚਿ, ਮਚ੍ਚਾਨਂ ਇਧ ਜੀਵਿਤੇ;

ਦਤ੍ਵਾਨ ਮਾਨੁਸਂ ਚਕ੍ਖੁਂ, ਲਦ੍ਧਂ ਮੇ ਚਕ੍ਖੁ ਅਮਾਨੁਸਂ.

‘‘ਏਤਮ੍ਪਿ ਦਿਸ੍ਵਾ ਸਿਵਯੋ, ਦੇਥ ਦਾਨਾਨਿ ਭੁਞ੍ਜਥ;

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤਾ ਸਗ੍ਗਮੁਪੇਥ ਠਾਨ’’ਨ੍ਤਿ. (ਜਾ. ੧.੧੫.੭੯-੮੨) –

ਇਮਾ ਗਾਥਾ ਅਭਾਸਿ. ਤਤ੍ਥ ਧਮ੍ਮੇਨ ਭਾਸਿਤਾਤਿ, ਮਹਾਰਾਜ, ਇਮਾ ਤੇ ਗਾਥਾ ਧਮ੍ਮੇਨ ਸਭਾਵੇਨੇਵ ਭਾਸਿਤਾ. ਦਿਬ੍ਬਾਨੀਤਿ ਦਿਬ੍ਬਾਨੁਭਾਵਯੁਤ੍ਤਾਨਿ. ਪਟਿਦਿਸ੍ਸਰੇਤਿ ਪਟਿਦਿਸ੍ਸਨ੍ਤਿ. ਤਿਰੋਕੁਟ੍ਟਨ੍ਤਿ ਪਰਕੁਟ੍ਟਂ. ਤਿਰੋਸੇਲਨ੍ਤਿ ਪਰਸੇਲਂ. ਸਮਤਿਗ੍ਗਯ੍ਹਾਤਿ ਅਤਿਕ੍ਕਮਿਤ੍ਵਾ. ਸਮਨ੍ਤਾ ਦਸਦਿਸਾ ਯੋਜਨਸਤਂ ਰੂਪਦਸ੍ਸਨਂ ਅਨੁਭੋਨ੍ਤੁ ਸਾਧੇਨ੍ਤੁ.

ਕੋ ਨੀਧਾਤਿ ਕੋ ਨੁ ਇਧ. ਅਪਿ ਵਿਸਿਟ੍ਠਨ੍ਤਿ ਉਤ੍ਤਮਮ੍ਪਿ ਸਮਾਨਂ. ਨ ਚਾਗਮਤ੍ਤਾਤਿ ਚਾਗਪ੍ਪਮਾਣਤੋ ਅਞ੍ਞਂ ਵਰਂ ਨਾਮ ਨਤ੍ਥਿ. ਇਧ ਜੀਵਿਤੇਤਿ ਇਮਸ੍ਮਿਂ ਜੀਵਲੋਕੇ. ‘‘ਇਧ ਜੀਵਤ’’ਨ੍ਤਿਪਿ ਪਠਨ੍ਤਿ. ਇਮਸ੍ਮਿਂ ਲੋਕੇ ਜੀਵਮਾਨਾਨਨ੍ਤਿ ਅਤ੍ਥੋ. ਅਮਾਨੁਸਨ੍ਤਿ ਦਿਬ੍ਬਚਕ੍ਖੁ ਮਯਾ ਲਦ੍ਧਂ, ਇਮਿਨਾ ਕਾਰਣੇਨ ਵੇਦਿਤਬ੍ਬਮੇਤਂ ‘‘ਚਾਗਤੋ ਉਤ੍ਤਮਂ ਨਾਮ ਨਤ੍ਥੀ’’ਤਿ. ਏਤਮ੍ਪਿ ਦਿਸ੍ਵਾਤਿ ਏਤਂ ਮਯਾ ਲਦ੍ਧਂ ਦਿਬ੍ਬਚਕ੍ਖੁਂ ਦਿਸ੍ਵਾਪਿ.

ਇਤਿ ਇਮਾਹਿ ਚਤੂਹਿ ਗਾਥਾਹਿ ਨ ਕੇਵਲਂ ਤਸ੍ਮਿਂਯੇਵ ਖਣੇ, ਅਥ ਖੋ ਅਨ੍ਵਦ੍ਧਮਾਸਮ੍ਪਿ ਉਪੋਸਥੇ ਮਹਾਜਨਂ ਸਨ੍ਨਿਪਾਤੇਤ੍ਵਾ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕਪਰਾਯਨੋ ਅਹੋਸਿ.

ਤਦਾ ਵੇਜ੍ਜੋ ਆਨਨ੍ਦਤ੍ਥੇਰੋ ਅਹੋਸਿ, ਸਕ੍ਕੋ ਅਨੁਰੁਦ੍ਧਤ੍ਥੇਰੋ, ਸੇਸਪਰਿਸਾ ਬੁਦ੍ਧਪਰਿਸਾ, ਸਿਵਿਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਵੁਤ੍ਤਨਯੇਨੇਵ ਯਥਾਰਹਂ ਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਥਾ ਦਿਵਸੇ ਦਿਵਸੇ ਯਥਾ ਅਦਿਨ੍ਨਪੁਬ੍ਬਂ ਬਾਹਿਰਦੇਯ੍ਯਧਮ੍ਮਵਤ੍ਥੁ ਨ ਹੋਤਿ, ਏਵਂ ਅਪਰਿਮਿਤਂ ਮਹਾਦਾਨਂ ਪਵਤ੍ਤੇਨ੍ਤਸ੍ਸ ਤੇਨ ਅਪਰਿਤੁਟ੍ਠਸ੍ਸ ਕਥਂ ਨੁ ਖੋ ਅਹਂ ਅਜ੍ਝਤ੍ਤਿਕਵਤ੍ਥੁਕਂ ਦਾਨਂ ਦਦੇਯ੍ਯਂ, ਕਦਾ ਨੁ ਖੋ ਮਂ ਕੋਚਿ ਆਗਨ੍ਤ੍ਵਾ ਅਜ੍ਝਤ੍ਤਿਕਂ ਦੇਯ੍ਯਧਮ੍ਮਂ ਯਾਚੇਯ੍ਯ, ਸਚੇ ਹਿ ਕੋਚਿ ਯਾਚਕੋ ਮੇ ਹਦਯਮਂਸਸ੍ਸ ਨਾਮਂ ਗਣ੍ਹੇਯ੍ਯ, ਕਣਯੇਨ ਨਂ ਨੀਹਰਿਤ੍ਵਾ ਪਸਨ੍ਨਉਦਕਤੋ ਸਨਾਲ਼ਂ ਪਦੁਮਂ ਉਦ੍ਧਰਨ੍ਤੋ ਵਿਯ ਲੋਹਿਤਬਿਨ੍ਦੁਂ ਪਗ੍ਘਰਨ੍ਤਂ ਹਦਯਂ ਨੀਹਰਿਤ੍ਵਾ ਦਸ੍ਸਾਮਿ. ਸਚੇ ਸਰੀਰਮਂਸਸ੍ਸ ਨਾਮਂ ਗਣ੍ਹੇਯ੍ਯ, ਅਵਲੇਖਨੇਨ ਤਾਲਗੁਲ਼ਪਟਲਂ ਉਪ੍ਪਾਟੇਨ੍ਤੋ ਵਿਯ ਸਰੀਰਮਂਸਂ ਉਪ੍ਪਾਟੇਤ੍ਵਾ ਦਸ੍ਸਾਮਿ. ਸਚੇ ਲੋਹਿਤਸ੍ਸ ਨਾਮਂ ਗਣ੍ਹੇਯ੍ਯ, ਅਸਿਨਾ ਵਿਜ੍ਝਿਤ੍ਵਾ ਯਨ੍ਤਮੁਖੇ ਵਾ ਪਤਿਤ੍ਵਾ ਉਪਨੀਤਂ ਭਾਜਨਂ ਪੂਰੇਤ੍ਵਾ ਲੋਹਿਤਂ ਦਸ੍ਸਾਮਿ. ਸਚੇ ਪਨ ਕੋਚਿ ‘‘ਗੇਹੇ ਮੇ ਕਮ੍ਮਂ ਨਪ੍ਪਵਤ੍ਤਤਿ, ਤਤ੍ਥ ਮੇ ਦਾਸਕਮ੍ਮਂ ਕਰੋਹੀ’’ਤਿ ਵਦੇਯ੍ਯ, ਰਾਜਵੇਸਂ ਅਪਨੇਤ੍ਵਾ ਤਸ੍ਸ ਅਤ੍ਤਾਨਂ ਸਾਵੇਤ੍ਵਾ ਦਾਸਕਮ੍ਮਂ ਕਰਿਸ੍ਸਾਮਿ. ਸਚੇ ਵਾ ਪਨ ਕੋਚਿ ਅਕ੍ਖੀਨਂ ਨਾਮਂ ਗਣ੍ਹੇਯ੍ਯ, ਤਾਲਮਿਞ੍ਜਂ ਨੀਹਰਨ੍ਤੋ ਵਿਯ ਅਕ੍ਖੀਨਿ ਉਪ੍ਪਾਟੇਤ੍ਵਾ ਤਸ੍ਸ ਦਸ੍ਸਾਮੀਤਿ ਏਵਂ ਅਨਞ੍ਞਸਾਧਾਰਣਵਸੀਭਾਵਪ੍ਪਤ੍ਤਾਨਂ ਮਹਾਬੋਧਿਸਤ੍ਤਾਨਂਯੇਵ ਆਵੇਣਿਕਾ ਉਲ਼ਾਰਤਰਾ ਪਰਿਵਿਤਕ੍ਕੁਪ੍ਪਤ੍ਤਿ, ਚਕ੍ਖੁਯਾਚਕਂ ਲਭਿਤ੍ਵਾ ਅਮਚ੍ਚਪਾਰਿਸਜ੍ਜਾਦੀਹਿ ਨਿਵਾਰਿਯਮਾਨਸ੍ਸਾਪਿ ਤੇਸਂ ਵਚਨਂ ਅਨਾਦਿਯਿਤ੍ਵਾ ਅਤ੍ਤਨੋ ਪਰਿਵਿਤਕ੍ਕਾਨੁਰੂਪਂ ਪਟਿਪਤ੍ਤਿਯਾ ਚ ਪਰਮਾ ਪੀਤਿਪਟਿਸਂਵੇਦਨਾ, ਤਸ੍ਸਾ ਪੀਤਿਮਨਤਾਯ ਅਵਿਤਥਭਾਵਂ ਨਿਸ੍ਸਾਯ ਸਕ੍ਕਸ੍ਸ ਪੁਰਤੋ ਸਚ੍ਚਕਿਰਿਯਾਕਰਣਂ, ਤੇਨ ਚ ਅਤ੍ਤਨੋ ਚਕ੍ਖੂਨਂ ਪਟਿਪਾਕਤਿਕਭਾਵੋ, ਤੇਸਞ੍ਚ ਦਿਬ੍ਬਾਨੁਭਾਵਤਾਤਿ ਏਵਮਾਦਯੋ ਮਹਾਸਤ੍ਤਸ੍ਸ ਗੁਣਾਨੁਭਾਵਾ ਵੇਦਿਤਬ੍ਬਾਤਿ.

ਸਿਵਿਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.