੭. ਚਨ੍ਦਕੁਮਾਰਚਰਿਯਾਵਣ੍ਣਨਾ

੪੫. ਸਤ੍ਤਮੇ ਏਕਰਾਜਸ੍ਸ ਅਤ੍ਰਜੋਤਿ ਏਕਰਾਜਸ੍ਸ ਨਾਮ ਕਾਸਿਰਞ੍ਞੋ ਓਰਸਪੁਤ੍ਤੋ. ਨਗਰੇ ਪੁਪ੍ਫਵਤਿਯਾਤਿ ਪੁਪ੍ਫਵਤਿਨਾਮਕੇ ਨਗਰੇ. ਚਨ੍ਦਸਵ੍ਹਯੋਤਿ ਚਨ੍ਦਸਦ੍ਦੇਨ ਅਵ੍ਹਾਤਬ੍ਬੋ, ਚਨ੍ਦਨਾਮੋਤਿ ਅਤ੍ਥੋ.

ਅਤੀਤੇ ਕਿਰ ਅਯਂ ਬਾਰਾਣਸੀ ਪੁਪ੍ਫਵਤੀ ਨਾਮ ਅਹੋਸਿ. ਤਤ੍ਥ ਵਸਵਤ੍ਤਿਰਞ੍ਞੋ ਪੁਤ੍ਤੋ ਏਕਰਾਜਾ ਨਾਮ ਰਜ੍ਜਂ ਕਾਰੇਸਿ. ਬੋਧਿਸਤ੍ਤੋ ਤਸ੍ਸ ਗੋਤਮਿਯਾ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਅਗ੍ਗਹੇਸਿ. ‘‘ਚਨ੍ਦਕੁਮਾਰੋ’’ਤਿਸ੍ਸ ਨਾਮਮਕਂਸੁ. ਤਸ੍ਸ ਪਦਸਾ ਗਮਨਕਾਲੇ ਅਪਰੋਪਿ ਪੁਤ੍ਤੋ ਉਪ੍ਪਨ੍ਨੋ, ਤਸ੍ਸ ‘‘ਸੂਰਿਯਕੁਮਾਰੋ’’ਤਿ ਨਾਮਮਕਂਸੁ. ਤਸ੍ਸ ਪਦਸਾ ਗਮਨਕਾਲੇ ਏਕਾ ਧੀਤਾ ਉਪ੍ਪਨ੍ਨਾ, ‘‘ਸੇਲਾ’’ਤਿਸ੍ਸਾ ਨਾਮਮਕਂਸੁ. ਵੇਮਾਤਿਕਾ ਚ ਨੇਸਂ ਭਦ੍ਦਸੇਨੋ ਸੂਰੋ ਚਾਤਿ ਦ੍ਵੇ ਭਾਤਰੋ ਅਹੇਸੁਂ. ਬੋਧਿਸਤ੍ਤੋ ਅਨੁਪੁਬ੍ਬੇਨ ਵੁਦ੍ਧਿਪ੍ਪਤ੍ਤੋ ਸਿਪ੍ਪੇਸੁ ਚ ਵਿਜ੍ਜਾਟ੍ਠਾਨੇਸੁ ਚ ਪਾਰਂ ਅਗਮਾਸਿ. ਤਸ੍ਸ ਰਾਜਾ ਅਨੁਚ੍ਛਵਿਕਂ ਚਨ੍ਦਂ ਨਾਮ ਰਾਜਧੀਤਰਂ ਆਨੇਤ੍ਵਾ ਉਪਰਜ੍ਜਂ ਅਦਾਸਿ. ਬੋਧਿਸਤ੍ਤਸ੍ਸ ਏਕੋ ਪੁਤ੍ਤੋ ਉਪ੍ਪਨ੍ਨੋ, ਤਸ੍ਸ ‘‘ਵਾਸੁਲੋ’’ਤਿ ਨਾਮਮਕਂਸੁ. ਤਸ੍ਸ ਪਨ ਰਞ੍ਞੋ ਖਣ੍ਡਹਾਲੋ ਨਾਮ ਪੁਰੋਹਿਤੋ, ਤਂ ਰਾਜਾ ਵਿਨਿਚ੍ਛਯੇ ਠਪੇਸਿ. ਸੋ ਲਞ੍ਜਵਿਤ੍ਤਕੋ ਹੁਤ੍ਵਾ ਲਞ੍ਜਂ ਗਹੇਤ੍ਵਾ ਅਸ੍ਸਾਮਿਕੇ ਸਾਮਿਕੇ ਕਰੋਤਿ, ਸਾਮਿਕੇ ਚ ਅਸ੍ਸਾਮਿਕੇ ਕਰੋਤਿ. ਅਥੇਕਦਿਵਸਂ ਅਟ੍ਟਪਰਾਜਿਤੋ ਏਕੋ ਪੁਰਿਸੋ ਵਿਨਿਚ੍ਛਯਟ੍ਠਾਨੇ ਉਪਕ੍ਕੋਸੇਨ੍ਤੋ ਨਿਕ੍ਖਮਿਤ੍ਵਾ ਰਾਜੂਪਟ੍ਠਾਨਂ ਗਚ੍ਛਨ੍ਤਂ ਬੋਧਿਸਤ੍ਤਂ ਦਿਸ੍ਵਾ ਤਸ੍ਸ ਪਾਦੇਸੁ ਨਿਪਤਿਤ੍ਵਾ ‘‘ਸਾਮਿ ਖਣ੍ਡਹਾਲੋ ਵਿਨਿਚ੍ਛਯੇ ਵਿਲੋਪਂ ਖਾਦਤਿ, ਅਹਂ ਤੇਨ ਲਞ੍ਜਂ ਗਹੇਤ੍ਵਾ ਪਰਾਜਯਂ ਪਾਪਿਤੋ’’ਤਿ ਅਟ੍ਟਸ੍ਸਰਮਕਾਸਿ. ਬੋਧਿਸਤ੍ਤੋ ‘‘ਮਾ ਭਾਯੀ’’ਤਿ ਤਂ ਅਸ੍ਸਾਸੇਤ੍ਵਾ ਵਿਨਿਚ੍ਛਯਂ ਨੇਤ੍ਵਾ ਸਾਮਿਕਮੇਵ ਸਾਮਿਕਂ ਅਕਾਸਿ. ਮਹਾਜਨੋ ਮਹਾਸਦ੍ਦੇਨ ਸਾਧੁਕਾਰਮਦਾਸਿ.

ਰਾਜਾ ‘‘ਬੋਧਿਸਤ੍ਤੇਨ ਕਿਰ ਅਟ੍ਟੋ ਸੁਵਿਨਿਚ੍ਛਿਤੋ’’ਤਿ ਸੁਤ੍ਵਾ ਤਂ ਆਮਨ੍ਤੇਤ੍ਵਾ ‘‘ਤਾਤ, ਇਤੋ ਪਟ੍ਠਾਯ ਤ੍ਵਮੇਵ ਅਟ੍ਟਕਰਣੇ ਵਿਨਿਚ੍ਛਯਂ ਵਿਨਿਚ੍ਛਿਨਾਹੀ’’ਤਿ ਵਿਨਿਚ੍ਛਯਂ ਬੋਧਿਸਤ੍ਤਸ੍ਸ ਅਦਾਸਿ. ਖਣ੍ਡਹਾਲਸ੍ਸ ਆਯੋ ਪਚ੍ਛਿਜ੍ਜਿ. ਸੋ ਤਤੋ ਪਟ੍ਠਾਯ ਬੋਧਿਸਤ੍ਤੇ ਆਘਾਤਂ ਬਨ੍ਧਿਤ੍ਵਾ ਓਤਾਰਾਪੇਕ੍ਖੋ ਵਿਚਰਿ. ਸੋ ਪਨ ਰਾਜਾ ਮੁਧਪ੍ਪਸਨ੍ਨੋ. ਸੋ ਏਕਦਿਵਸਂ ਸੁਪਿਨਨ੍ਤੇਨ ਦੇਵਲੋਕਂ ਪਸ੍ਸਿਤ੍ਵਾ ਤਤ੍ਥ ਗਨ੍ਤੁਕਾਮੋ ਹੁਤ੍ਵਾ ‘‘ਪੁਰੋਹਿਤਂ ਬ੍ਰਹ੍ਮਲੋਕਗਾਮਿਮਗ੍ਗਂ ਆਚਿਕ੍ਖਾ’’ਤਿ ਆਹ. ਸੋ ‘‘ਅਤਿਦਾਨਂ ਦਦਨ੍ਤੋ ਸਬ੍ਬਚਤੁਕ੍ਕੇਨ ਯਞ੍ਞਂ ਯਜਸ੍ਸੂ’’ਤਿ ਵਤ੍ਵਾ ਰਞ੍ਞਾ ‘‘ਕਿਂ ਅਤਿਦਾਨ’’ਨ੍ਤਿ ਪੁਟ੍ਠੋ ‘‘ਅਤ੍ਤਨੋ ਪਿਯਪੁਤ੍ਤਾ ਪਿਯਭਰਿਯਾ ਪਿਯਧੀਤਰੋ ਮਹਾਵਿਭਵਸੇਟ੍ਠਿਨੋ ਮਙ੍ਗਲਹਤ੍ਥਿਅਸ੍ਸਾਦਯੋਤਿ ਏਤੇ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਦ੍ਵਿਪਦਚਤੁਪ੍ਪਦੇ ਯਞ੍ਞਤ੍ਥਾਯ ਪਰਿਚ੍ਚਜਿਤ੍ਵਾ ਤੇਸਂ ਗਲਲੋਹਿਤੇਨ ਯਜਨਂ ਅਤਿਦਾਨਂ ਨਾਮਾ’’ਤਿ ਸਞ੍ਞਾਪੇਸਿ. ਇਤਿ ਸੋ ‘‘ਸਗ੍ਗਮਗ੍ਗਂ ਆਚਿਕ੍ਖਿਸ੍ਸਾਮੀ’’ਤਿ ਨਿਰਯਮਗ੍ਗਂ ਆਚਿਕ੍ਖਿ.

ਰਾਜਾਪਿ ਤਸ੍ਮਿਂ ਪਣ੍ਡਿਤਸਞ੍ਞੀ ਹੁਤ੍ਵਾ ‘‘ਤੇਨ ਵੁਤ੍ਤਵਿਧਿ ਸਗ੍ਗਮਗ੍ਗੋ’’ਤਿ ਸਞ੍ਞਾਯ ਤਂ ਪਟਿਪਜ੍ਜਿਤੁਕਾਮੋ ਮਹਨ੍ਤਂ ਯਞ੍ਞਾਵਾਟਂ ਕਾਰਾਪੇਤ੍ਵਾ ਤਤ੍ਥ ਬੋਧਿਸਤ੍ਤਾਦਿਕੇ ਚਤ੍ਤਾਰੋ ਰਾਜਕੁਮਾਰੇ ਆਦਿਂ ਕਤ੍ਵਾ ਖਣ੍ਡਹਾਲੇਨ ਵੁਤ੍ਤਂ ਸਬ੍ਬਂ ਦ੍ਵਿਪਦਚਤੁਪ੍ਪਦਂ ਯਞ੍ਞਪਸੁਤਟ੍ਠਾਨੇ ਨੇਥਾਤਿ ਆਣਾਪੇਸਿ. ਸਬ੍ਬਞ੍ਚ ਯਞ੍ਞਸਮ੍ਭਾਰਂ ਉਪਕ੍ਖਟਂ ਅਹੋਸਿ. ਤਂ ਸੁਤ੍ਵਾ ਮਹਾਜਨੋ ਮਹਨ੍ਤਂ ਕੋਲਾਹਲਂ ਅਕਾਸਿ. ਰਾਜਾ ਵਿਪ੍ਪਟਿਸਾਰੀ ਹੁਤ੍ਵਾ ਖਣ੍ਡਹਾਲੇਨ ਉਪਤ੍ਥਮ੍ਭਿਤੋ ਪੁਨਪਿ ਤਥਾ ਤਂ ਆਣਾਪੇਸਿ. ਬੋਧਿਸਤ੍ਤੋ ‘‘ਖਣ੍ਡਹਾਲੇਨ ਵਿਨਿਚ੍ਛਯਟ੍ਠਾਨਂ ਅਲਭਨ੍ਤੇਨ ਮਯਿ ਆਘਾਤਂ ਬਨ੍ਧਿਤ੍ਵਾ ਮਮੇਵ ਮਰਣਂ ਇਚ੍ਛਨ੍ਤੇਨ ਮਹਾਜਨਸ੍ਸ ਅਨਯਬ੍ਯਸਨਂ ਉਪ੍ਪਾਦਿਤ’’ਨ੍ਤਿ ਜਾਨਿਤ੍ਵਾ ਨਾਨਾਵਿਧੇਹਿ ਉਪਾਯੇਹਿ ਰਾਜਾਨਂ ਤਤੋ ਦੁਗ੍ਗਹਿਤਗ੍ਗਾਹਤੋ ਵਿਵੇਚੇਤੁਂ ਵਾਯਮਿਤ੍ਵਾਪਿ ਨਾਸਕ੍ਖਿ. ਮਹਾਜਨੋ ਪਰਿਦੇਵਿ, ਮਹਨ੍ਤਂ ਕਾਰੁਞ੍ਞਮਕਾਸਿ. ਮਹਾਜਨਸ੍ਸ ਪਰਿਦੇਵਨ੍ਤਸ੍ਸੇਵ ਯਞ੍ਞਾਵਾਟੇ ਸਬ੍ਬਕਮ੍ਮਾਨਿ ਨਿਟ੍ਠਾਪੇਸਿ. ਰਾਜਪੁਤ੍ਤਂ ਨੇਤ੍ਵਾ ਗੀਵਾਯ ਨਾਮੇਤ੍ਵਾ ਨਿਸੀਦਾਪੇਸੁਂ. ਖਣ੍ਡਹਾਲੋ ਸੁਵਣ੍ਣਪਾਤਿਂ ਉਪਨਾਮੇਤ੍ਵਾ ਖਗ੍ਗਂ ਆਦਾਯ ‘‘ਤਸ੍ਸ ਗੀਵਂ ਛਿਨ੍ਦਿਸ੍ਸਾਮੀ’’ਤਿ ਅਟ੍ਠਾਸਿ. ਤਂ ਦਿਸ੍ਵਾ ਚਨ੍ਦਾ ਨਾਮ ਰਾਜਪੁਤ੍ਤਸ੍ਸ ਦੇਵੀ ‘‘ਅਞ੍ਞਂ ਮੇ ਪਟਿਸਰਣਂ ਨਤ੍ਥਿ, ਅਤ੍ਤਨੋ ਸਚ੍ਚਬਲੇਨ ਸਾਮਿਕਸ੍ਸ ਸੋਤ੍ਥਿਂ ਕਰਿਸ੍ਸਾਮੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਪਰਿਸਾਯ ਅਨ੍ਤਰੇ ਵਿਚਰਨ੍ਤੀ ‘‘ਇਦਂ ਏਕਨ੍ਤੇਨੇਵ ਪਾਪਕਮ੍ਮਂ, ਯਂ ਖਣ੍ਡਹਾਲੋ ਸਗ੍ਗਮਗ੍ਗੋਤਿ ਕਰੋਤਿ. ਇਮਿਨਾ ਮਯ੍ਹਂ ਸਚ੍ਚਵਚਨੇਨ ਮਮ ਸਾਮਿਕਸ੍ਸ ਸੋਤ੍ਥਿ ਹੋਤੁ.

‘‘ਯਾ ਦੇਵਤਾ ਇਧ ਲੋਕੇ, ਸਬ੍ਬਾ ਤਾ ਸਰਣਂ ਗਤਾ;

ਅਨਾਥਂ ਤਾਯਥ ਮਮਂ, ਯਥਾਹਂ ਪਤਿਮਾ ਸਿਯ’’ਨ੍ਤਿ. –

ਸਚ੍ਚਕਿਰਿਯਮਕਾਸਿ. ਸਕ੍ਕੋ ਦੇਵਰਾਜਾ ਤਸ੍ਸਾ ਪਰਿਦੇਵਨਸਦ੍ਦਂ ਸੁਤ੍ਵਾ ਤਂ ਪਵਤ੍ਤਿਂ ਞਤ੍ਵਾ ਜਲਿਤਂ ਅਯੋਕੂਟਂ ਆਦਾਯ ਆਗਨ੍ਤ੍ਵਾ ਰਾਜਾਨਂ ਤਾਸੇਤ੍ਵਾ ਸਬ੍ਬੇ ਵਿਸ੍ਸਜ੍ਜਾਪੇਸਿ. ਸਕ੍ਕੋਪਿ ਤਦਾ ਅਤ੍ਤਨੋ ਦਿਬ੍ਬਰੂਪਂ ਦਸ੍ਸੇਤ੍ਵਾ ਸਮ੍ਪਜ੍ਜਲਿਤਂ ਸਜੋਤਿਭੂਤਂ ਵਜਿਰਂ ਪਰਿਬ੍ਭਮਨ੍ਤੋ ‘‘ਅਰੇ, ਪਾਪਰਾਜ ਕਾਲ਼ਕਣ੍ਣਿ, ਕਦਾ ਤਯਾ ਪਾਣਾਤਿਪਾਤੇਨ ਸੁਗਤਿਗਮਨਂ ਦਿਟ੍ਠਪੁਬ੍ਬਂ, ਚਨ੍ਦਕੁਮਾਰਂ ਸਬ੍ਬਞ੍ਚ ਇਮਂ ਜਨਂ ਬਨ੍ਧਨਤੋ ਮੋਚੇਹਿ, ਨੋ ਚੇ ਮੋਚੇਸ੍ਸਸਿ, ਏਤ੍ਥੇਵ ਤੇ ਇਮਸ੍ਸ ਚ ਦੁਟ੍ਠਬ੍ਰਾਹ੍ਮਣਸ੍ਸ ਸੀਸਂ ਫਾਲੇਸ੍ਸਾਮੀ’’ਤਿ ਆਕਾਸੇ ਅਟ੍ਠਾਸਿ. ਤਂ ਅਚ੍ਛਰਿਯਂ ਦਿਸ੍ਵਾ ਰਾਜਾ ਬ੍ਰਾਹ੍ਮਣੋ ਚ ਸੀਘਂ ਸਬ੍ਬੇ ਬਨ੍ਧਨਾ ਮੋਚੇਸੁਂ.

ਅਥ ਮਹਾਜਨੋ ਏਕਕੋਲਾਹਲਂ ਕਤ੍ਵਾ ਸਹਸਾ ਯਞ੍ਞਾਵਾਟਂ ਅਜ੍ਝੋਤ੍ਥਰਿਤ੍ਵਾ ਖਣ੍ਡਹਾਲਸ੍ਸ ਏਕੇਕਂ ਲੇਡ੍ਡੁਪ੍ਪਹਾਰਂ ਦੇਨ੍ਤੋ ਤਤ੍ਥੇਵ ਨਂ ਜੀਵਿਤਕ੍ਖਯਂ ਪਾਪੇਤ੍ਵਾ ਰਾਜਾਨਮ੍ਪਿ ਮਾਰੇਤੁਂ ਆਰਭਿ. ਬੋਧਿਸਤ੍ਤੋ ਪੁਰੇਤਰਮੇਵ ਪਿਤਰਂ ਪਲਿਸ੍ਸਜਿਤ੍ਵਾ ਠਿਤੋ ਮਾਰੇਤੁਂ ਨ ਅਦਾਸਿ. ਮਹਾਜਨੋ ‘‘ਜੀਵਿਤਂ ਤਾਵਸ੍ਸ ਪਾਪਰਞ੍ਞੋ ਦੇਮ, ਛਤ੍ਤਂ ਪਨਸ੍ਸ ਨ ਦਸ੍ਸਾਮ, ਨਗਰੇ ਵਾਸਂ ਵਾ ਨ ਦਸ੍ਸਾਮ, ਤਂ ਚਣ੍ਡਾਲਂ ਕਤ੍ਵਾ ਬਹਿਨਗਰੇ ਵਾਸਾਪੇਸ੍ਸਾਮਾ’’ਤਿ ਰਾਜਵੇਸਂ ਹਾਰੇਤ੍ਵਾ ਕਾਸਾਵਂ ਨਿਵਾਸਾਪੇਤ੍ਵਾ ਹਲਿਦ੍ਦਿਪਿਲੋਤਿਕਾਯ ਸੀਸਂ ਵੇਠੇਤ੍ਵਾ ਚਣ੍ਡਾਲਂ ਕਤ੍ਵਾ ਚਣ੍ਡਾਲਗਾਮਂ ਪਹਿਣਿਂਸੁ. ਯੇ ਪਨ ਤਂ ਪਸੁਘਾਤਯਞ੍ਞਂ ਯਜਿਂਸੁ ਚੇਵ ਯਜਾਪੇਸੁਞ੍ਚ ਅਨੁਮੋਦਿਂਸੁ ਚ, ਸਬ੍ਬੇ ਤੇ ਨਿਰਯਪਰਾਯਨਾ ਅਹੇਸੁਂ. ਤੇਨਾਹ ਭਗਵਾ –

‘‘ਸਬ੍ਬੇ ਪਤਿਟ੍ਠਾ ਨਿਰਯਂ, ਯਥਾ ਤਂ ਪਾਪਕਂ ਕਰਿਤ੍ਵਾਨ;

ਨ ਹਿ ਪਾਪਕਮ੍ਮਂ ਕਤ੍ਵਾ, ਲਬ੍ਭਾ ਸੁਗਤਿਂ ਇਤੋ ਗਨ੍ਤੁ’’ਨ੍ਤਿ. (ਜਾ. ੨.੨੨.੧੧੪੩);

ਅਥ ਸਬ੍ਬਾਪਿ ਰਾਜਪਰਿਸਾ ਨਾਗਰਾ ਚੇਵ ਜਾਨਪਦਾ ਚ ਸਮਾਗਨ੍ਤ੍ਵਾ ਬੋਧਿਸਤ੍ਤਂ ਰਜ੍ਜੇ ਅਭਿਸਿਞ੍ਚਿਂਸੁ. ਸੋ ਧਮ੍ਮੇਨ ਰਜ੍ਜਂ ਅਨੁਸਾਸਨ੍ਤੋ ਤਂ ਅਤ੍ਤਨੋ ਮਹਾਜਨਸ੍ਸ ਚ ਅਕਾਰਣੇਨੇਵ ਉਪ੍ਪਨ੍ਨਂ ਅਨਯਬ੍ਯਸਨਂ ਅਨੁਸ੍ਸਰਿਤ੍ਵਾ ਸਂਵੇਗਜਾਤੋ ਪੁਞ੍ਞਕਿਰਿਯਾਸੁ ਭਿਯ੍ਯੋਸੋਮਤ੍ਤਾਯ ਉਸ੍ਸਾਹਜਾਤੋ ਮਹਾਦਾਨਂ ਪਵਤ੍ਤੇਸਿ, ਸੀਲਾਨਿ ਰਕ੍ਖਿ, ਉਪੋਸਥਕਮ੍ਮਂ ਸਮਾਦਿਯਿ. ਤੇਨ ਵੁਤ੍ਤਂ –

੪੬. ‘‘ਤਦਾਹਂ ਯਜਨਾ ਮੁਤ੍ਤੋ, ਨਿਕ੍ਖਨ੍ਤੋ ਯਞ੍ਞਵਾਟਤੋ;

ਸਂਵੇਗਂ ਜਨਯਿਤ੍ਵਾਨ, ਮਹਾਦਾਨਂ ਪਵਤ੍ਤਯਿ’’ਨ੍ਤਿ. – ਆਦਿ;

ਤਤ੍ਥ ਯਜਨਾ ਮੁਤ੍ਤੋਤਿ ਖਣ੍ਡਹਾਲੇਨ ਵਿਹਿਤਯਞ੍ਞਵਿਧਿਤੋ ਵੁਤ੍ਤਨਯੇਨ ਘਾਤੇਤਬ੍ਬਤੋ ਮੁਤ੍ਤੋ. ਨਿਕ੍ਖਨ੍ਤੋ ਯਞ੍ਞਵਾਟਤੋਤਿ ਅਭਿਸੇਕਕਰਣਤ੍ਥਾਯ ਉਸ੍ਸਾਹਜਾਤੇਨ ਮਹਾਜਨੇਨ ਸਦ੍ਧਿਂ ਤਤੋ ਯਞ੍ਞਭੂਮਿਤੋ ਨਿਗ੍ਗਤੋ. ਸਂਵੇਗਂ ਜਨਯਿਤ੍ਵਾਨਾਤਿ ਏਵਂ ‘‘ਬਹੁਅਨ੍ਤਰਾਯੋ ਲੋਕਸਨ੍ਨਿਵਾਸੋ’’ਤਿ ਅਤਿਵਿਯ ਸਂਵੇਗਂ ਉਪ੍ਪਾਦੇਤ੍ਵਾ. ਮਹਾਦਾਨਂ ਪਵਤ੍ਤਯਿਨ੍ਤਿ ਛ ਦਾਨਸਾਲਾਯੋ ਕਾਰਾਪੇਤ੍ਵਾ ਮਹਤਾ ਧਨਪਰਿਚ੍ਚਾਗੇਨ ਵੇਸ੍ਸਨ੍ਤਰਦਾਨਸਦਿਸਂ ਮਹਾਦਾਨਮਦਾਸਿਂ. ਏਤੇਨ ਅਭਿਸੇਕਕਰਣਤੋ ਪਟ੍ਠਾਯ ਤਸ੍ਸ ਮਹਾਦਾਨਸ੍ਸ ਪਵਤ੍ਤਿਤਭਾਵਂ ਦਸ੍ਸੇਤਿ.

੪੭. ਦਕ੍ਖਿਣੇਯ੍ਯੇ ਅਦਤ੍ਵਾਨਾਤਿ ਦਕ੍ਖਿਣਾਰਹੇ ਪੁਗ੍ਗਲੇ ਦੇਯ੍ਯਧਮ੍ਮਂ ਅਪਰਿਚ੍ਚਜਿਤ੍ਵਾ. ਅਪਿ ਛਪ੍ਪਞ੍ਚ ਰਤ੍ਤਿਯੋਤਿ ਅਪ੍ਪੇਕਦਾ ਛਪਿ ਪਞ੍ਚਪਿ ਰਤ੍ਤਿਯੋ ਅਤ੍ਤਨੋ ਪਿਵਨਖਾਦਨਭੁਞ੍ਜਨਾਨਿ ਨ ਕਰੋਮੀਤਿ ਦਸ੍ਸੇਤਿ.

ਤਦਾ ਕਿਰ ਬੋਧਿਸਤ੍ਤੋ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਮਹਾਮੇਘੋ ਵਿਯ ਅਭਿਵਸ੍ਸਨ੍ਤੋ ਮਹਾਦਾਨਂ ਪਵਤ੍ਤੇਸਿ. ਤਤ੍ਥ ਕਿਞ੍ਚਾਪਿ ਦਾਨਸਾਲਾਸੁ ਅਨ੍ਨਪਾਨਾਦਿਉਲ਼ਾਰੁਲ਼ਾਰਪਣੀਤਪਣੀਤਮੇਵ ਯਾਚਕਾਨਂ ਯਥਾਰੁਚਿਤਂ ਦਿਵਸੇ ਦਿਵਸੇ ਦੀਯਤਿ, ਤਥਾਪਿ ਅਤ੍ਤਨੋ ਸਜ੍ਜਿਤਂ ਆਹਾਰਂ ਰਾਜਾਰਹਭੋਜਨਮ੍ਪਿ ਯਾਚਕਾਨਂ ਅਦਤ੍ਵਾ ਨ ਭੁਞ੍ਜਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਨਾਹਂ ਪਿਵਾਮੀ’’ਤਿਆਦਿ.

੪੮. ਇਦਾਨਿ ਤਥਾ ਯਾਚਕਾਨਂ ਦਾਨੇ ਕਾਰਣਂ ਦਸ੍ਸੇਨ੍ਤੋ ਉਪਮਂ ਤਾਵ ਆਹਰਤਿ ‘‘ਯਥਾਪਿ ਵਾਣਿਜੋ ਨਾਮਾ’’ਤਿਆਦਿਨਾ. ਤਸ੍ਸਤ੍ਥੋ – ਯਥਾ ਨਾਮ ਵਾਣਿਜੋ ਭਣ੍ਡਟ੍ਠਾਨਂ ਗਨ੍ਤ੍ਵਾ ਅਪ੍ਪੇਨ ਪਾਭਤੇਨ ਬਹੁਂ ਭਣ੍ਡਂ ਵਿਕ੍ਕਿਣਿਤ੍ਵਾ ਵਿਪੁਲਂ ਭਣ੍ਡਸਨ੍ਨਿਚਯਂ ਕਤ੍ਵਾ ਦੇਸਕਾਲਂ ਜਾਨਨ੍ਤੋ ਯਤ੍ਥਸ੍ਸ ਲਾਭੋ ਉਦਯੋ ਮਹਾ ਹੋਤਿ, ਤਤ੍ਥ ਦੇਸੇ ਕਾਲੇ ਵਾ ਤਂ ਭਣ੍ਡਂ ਹਰਤਿ ਉਪਨੇਤਿ ਵਿਕ੍ਕਿਣਾਤਿ.

੪੯. ਸਕਭੁਤ੍ਤਾਪੀਤਿ ਸਕਭੁਤ੍ਤਤੋਪਿ ਅਤ੍ਤਨਾ ਪਰਿਭੁਤ੍ਤਤੋਪਿ. ‘‘ਸਕਪਰਿਭੁਤ੍ਤਾਪੀ’’ਤਿਪਿ ਪਾਠੋ. ਪਰੇਤਿ ਪਰਸ੍ਮਿਂ ਪਟਿਗ੍ਗਾਹਕਪੁਗ੍ਗਲੇ. ਸਤਭਾਗੋਤਿ ਅਨੇਕਸਤਭਾਗੋ ਆਯਤਿਂ ਭਵਿਸ੍ਸਤਿ. ਇਦਂ ਵੁਤ੍ਤਂ ਹੋਤਿ – ਯਥਾ ਵਾਣਿਜੇਨ ਕੀਤਭਣ੍ਡਂ ਤਤ੍ਥੇਵ ਅਵਿਕ੍ਕਿਣਿਤ੍ਵਾ ਤਥਾਰੂਪੇ ਦੇਸੇ ਕਾਲੇ ਚ ਵਿਕ੍ਕਿਣਿਯਮਾਨਂ ਬਹੁਂ ਉਦਯਂ ਵਿਪੁਲਂ ਫਲਂ ਹੋਤਿ, ਤਥੇਵ ਅਤ੍ਤਨੋ ਸਨ੍ਤਕਂ ਅਤ੍ਤਨਾ ਅਨੁਪਭੁਞ੍ਜਿਤ੍ਵਾ ਪਰਸ੍ਮਿਂ ਪਟਿਗ੍ਗਾਹਕਪੁਗ੍ਗਲੇ ਦਿਨ੍ਨਂ ਮਹਪ੍ਫਲਂ ਅਨੇਕਸਤਭਾਗੋ ਭਵਿਸ੍ਸਤਿ, ਤਸ੍ਮਾ ਅਤ੍ਤਨਾ ਅਭੁਞ੍ਜਿਤ੍ਵਾਪਿ ਪਰਸ੍ਸ ਦਾਤਬ੍ਬਮੇਵਾਤਿ. ਵੁਤ੍ਤਞ੍ਹੇਤਂ ਭਗਵਤਾ – ‘‘ਤਿਰਚ੍ਛਾਨਗਤੇ ਦਾਨਂ ਦਤ੍ਵਾ ਸਤਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ. ਪੁਥੁਜ੍ਜਨਦੁਸ੍ਸੀਲੇ ਦਾਨਂ ਦਤ੍ਵਾ ਸਹਸ੍ਸਗੁਣਾ’’ਤਿ (ਮ. ਨਿ. ੩.੩੭੯) ਵਿਤ੍ਥਾਰੋ. ਅਪਰਮ੍ਪਿ ਵੁਤ੍ਤਂ ‘‘ਏਵਂ ਚੇ, ਭਿਕ੍ਖਵੇ, ਸਤ੍ਤਾ ਜਾਨੇਯ੍ਯੁਂ ਦਾਨਸਂਵਿਭਾਗਸ੍ਸ ਵਿਪਾਕਂ, ਯਥਾਹਂ ਜਾਨਾਮਿ, ਨ ਅਦਤ੍ਵਾ ਭੁਞ੍ਜੇਯ੍ਯੁਂ, ਨ ਚ ਨੇਸਂ ਮਚ੍ਛੇਰਮਲਂ ਚਿਤ੍ਤਂ ਪਰਿਯਾਦਾਯ ਤਿਟ੍ਠੇਯ੍ਯ. ਯੋਪਿ ਨੇਸਂ ਅਸ੍ਸ ਚਰਿਮੋ ਆਲੋਪੋ ਚਰਿਮਂ ਕਬਲ਼ਂ, ਤਤੋਪਿ ਨ ਅਸਂਵਿਭਜਿਤ੍ਵਾ ਭੁਞ੍ਜੇਯ੍ਯੁ’’ਨ੍ਤਿਆਦਿ (ਇਤਿਵੁ. ੨੬).

੫੦. ਏਤਮਤ੍ਥਵਸਂ ਞਤ੍ਵਾਤਿ ਏਤਂ ਦਾਨਸ੍ਸ ਮਹਪ੍ਫਲਭਾਵਸਙ੍ਖਾਤਞ੍ਚੇਵ ਸਮ੍ਮਾਸਮ੍ਬੋਧਿਯਾ ਪਚ੍ਚਯਭਾਵਸਙ੍ਖਾਤਞ੍ਚ ਅਤ੍ਥਵਸਂ ਕਾਰਣਂ ਜਾਨਿਤ੍ਵਾ. ਨ ਪਟਿਕ੍ਕਮਾਮਿ ਦਾਨਤੋਤਿ ਦਾਨਪਾਰਮਿਤੋ ਈਸਕਮ੍ਪਿ ਨ ਨਿਵਤ੍ਤਾਮਿ ਅਭਿਕ੍ਕਮਾਮਿ ਏਵ. ਕਿਮਤ੍ਥਂ? ਸਮ੍ਬੋਧਿਮਨੁਪਤ੍ਤਿਯਾਤਿ ਸਮ੍ਬੋਧਿਂ ਸਬ੍ਬਞ੍ਞੁਤਞ੍ਞਾਣਂ ਅਨੁਪ੍ਪਤ੍ਤਿਯਾ ਅਨੁਪ੍ਪਤ੍ਤਿਯਤ੍ਥਂ, ਅਧਿਗਨ੍ਤੁਨ੍ਤਿ ਅਤ੍ਥੋ.

ਤਦਾ ਬੋਧਿਸਤ੍ਤੋ ਮਹਾਜਨੇਨ ਪਿਤਰਿ ਚਣ੍ਡਾਲਗਾਮਂ ਪਵੇਸਿਤੇ ਦਾਤਬ੍ਬਯੁਤ੍ਤਕਂ ਪਰਿਬ੍ਬਯਂ ਦਾਪੇਸਿ ਨਿਵਾਸਨਾਨਿ ਪਾਰੁਪਨਾਨਿ ਚ. ਸੋਪਿ ਨਗਰਂ ਪਵਿਸਿਤੁਂ ਅਲਭਨ੍ਤੋ ਬੋਧਿਸਤ੍ਤੇ ਉਯ੍ਯਾਨਕੀਲ਼ਾਦਿਅਤ੍ਥਂ ਬਹਿਗਤੇ ਉਪਸਙ੍ਕਮਤਿ, ਪੁਤ੍ਤਸਞ੍ਞਾਯ ਪਨ ਨ ਵਨ੍ਦਤਿ, ਨ ਅਞ੍ਜਲਿਕਮ੍ਮਂ ਕਰੋਤਿ, ‘‘ਚਿਰਂ ਜੀਵ, ਸਾਮੀ’’ਤਿ ਵਦਤਿ. ਬੋਧਿਸਤ੍ਤੋਪਿ ਦਿਟ੍ਠਦਿਵਸੇ ਅਤਿਰੇਕਸਮ੍ਮਾਨਂ ਕਰੋਤਿ. ਸੋ ਏਵਂ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਆਯੁਪਰਿਯੋਸਾਨੇ ਸਪਰਿਸੋ ਦੇਵਲੋਕਂ ਪੂਰੇਸਿ.

ਤਦਾ ਖਣ੍ਡਹਾਲੋ ਦੇਵਦਤ੍ਤੋ ਅਹੋਸਿ, ਗੋਤਮੀ ਦੇਵੀ ਮਹਾਮਾਯਾ, ਚਨ੍ਦਾ ਰਾਜਧੀਤਾ ਰਾਹੁਲਮਾਤਾ, ਵਾਸੁਲੋ ਰਾਹੁਲੋ, ਸੇਲਾ ਉਪ੍ਪਲਵਣ੍ਣਾ, ਸੂਰੋ ਮਹਾਕਸ੍ਸਪੋ, ਭਦ੍ਦਸੇਨੋ ਮਹਾਮੋਗ੍ਗਲ੍ਲਾਨੋ, ਸੂਰਿਯਕੁਮਾਰੋ ਸਾਰਿਪੁਤ੍ਤੋ, ਚਨ੍ਦਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਪੁਬ੍ਬੇ ਵੁਤ੍ਤਨਯੇਨੇਵ ਯਥਾਰਹਂ ਸੇਸਪਾਰਮਿਯੋ ਨਿਦ੍ਧਾਰੇਤਬ੍ਬਾ. ਤਦਾ ਖਣ੍ਡਹਾਲਸ੍ਸ ਕਕ੍ਖਲ਼ਫਰੁਸਭਾਵਂ ਜਾਨਨ੍ਤੋਪਿ ਅਜ੍ਝੁਪੇਕ੍ਖਿਤ੍ਵਾ ਧਮ੍ਮੇਨ ਸਮੇਨ ਅਟ੍ਟਸ੍ਸ ਵਿਨਿਚ੍ਛਯੋ, ਅਤ੍ਤਾਨਂ ਮਾਰੇਤੁਕਾਮਸ੍ਸੇਵ ਖਣ੍ਡਹਾਲਸ੍ਸ ਤਥਾ ਯਞ੍ਞਵਿਧਾਨਂ ਜਾਨਿਤ੍ਵਾਪਿ ਤਸ੍ਸ ਉਪਰਿ ਚਿਤ੍ਤਪ੍ਪਕੋਪਾਭਾਵੋ, ਅਤ੍ਤਨੋ ਪਰਿਸਂ ਗਹੇਤ੍ਵਾ ਪਿਤੁ ਸਤ੍ਤੁ ਭਵਿਤੁਂ ਸਮਤ੍ਥੋਪਿ ‘‘ਮਾਦਿਸਸ੍ਸ ਨਾਮ ਗਰੂਹਿ ਵਿਰੋਧੋ ਨ ਯੁਤ੍ਤੋ’’ਤਿ ਅਤ੍ਤਾਨਂ ਪੁਰਿਸਪਸੁਂ ਕਤ੍ਵਾ ਘਾਤਾਪੇਤੁਕਾਮਸ੍ਸ ਪਿਤੁ ਆਣਾਯਂ ਅਵਟ੍ਠਾਨਂ, ਕੋਸਿਯਾ ਅਸਿਂ ਗਹੇਤ੍ਵਾ ਸੀਸਂ ਛਿਨ੍ਦਿਤੁਂ ਉਪਕ੍ਕਮਨ੍ਤੇ ਪੁਰੋਹਿਤੇ ਅਤ੍ਤਨੋ ਪਿਤਰਿ ਪੁਤ੍ਤੇ ਸਬ੍ਬਸਤ੍ਤੇਸੁ ਚ ਮੇਤ੍ਤਾਫਰਣੇਨ ਸਮਚਿਤ੍ਤਤਾ, ਮਹਾਜਨੇ ਪਿਤਰਂ ਮਾਰੇਤੁਂ ਉਪਕ੍ਕਮਨ੍ਤੇ ਸਯਂ ਪਲਿਸ੍ਸਜਿਤ੍ਵਾ ਤਸ੍ਸ ਜੀਵਿਤਦਾਨਞ੍ਚ, ਦਿਵਸੇ ਦਿਵਸੇ ਵੇਸ੍ਸਨ੍ਤਰਦਾਨਸਦਿਸਂ ਮਹਾਦਾਨਂ ਦਦਤੋਪਿ ਦਾਨੇਨ ਅਤਿਤ੍ਤਭਾਵੋ, ਮਹਾਜਨੇਨ ਚਣ੍ਡਾਲੇਸੁ ਵਾਸਾਪਿਤਸ੍ਸ ਪਿਤੁ ਦਾਤਬ੍ਬਯੁਤ੍ਤਕਂ ਦਤ੍ਵਾ ਪੋਸਨਂ, ਮਹਾਜਨਂ ਪੁਞ੍ਞਕਿਰਿਯਾਸੁ ਪਤਿਟ੍ਠਾਪਨਨ੍ਤਿ ਏਵਮਾਦਯੋ ਗੁਣਾਨੁਭਾਵਾ ਨਿਦ੍ਧਾਰੇਤਬ੍ਬਾਤਿ.

ਚਨ੍ਦਕੁਮਾਰਚਰਿਯਾਵਣ੍ਣਨਾ ਨਿਟ੍ਠਿਤਾ.