੬. ਨਿਮਿਰਾਜਚਰਿਯਾਵਣ੍ਣਨਾ

੪੦. ਛਟ੍ਠੇ ਮਿਥਿਲਾਯਂ ਪੁਰੁਤ੍ਤਮੇਤਿ ਮਿਥਿਲਾਨਾਮਕੇ ਵਿਦੇਹਾਨਂ ਉਤ੍ਤਮਨਗਰੇ. ਨਿਮਿ ਨਾਮ ਮਹਾਰਾਜਾਤਿ ਨੇਮਿਂ ਘਟੇਨ੍ਤੋ ਵਿਯ ਉਪ੍ਪਨ੍ਨੋ ‘‘ਨਿਮੀ’’ਤਿ ਲਦ੍ਧਨਾਮੋ, ਮਹਨ੍ਤੇਹਿ ਦਾਨਸੀਲਾਦਿਗੁਣਵਿਸੇਸੇਹਿ ਮਹਤਾ ਚ ਰਾਜਾਨੁਭਾਵੇਨ ਸਮਨ੍ਨਾਗਤਤ੍ਤਾ ਮਹਨ੍ਤੋ ਰਾਜਾਤਿ ਮਹਾਰਾਜਾ. ਪਣ੍ਡਿਤੋ ਕੁਸਲਤ੍ਥਿਕੋਤਿ ਅਤ੍ਤਨੋ ਚ ਪਰੇਸਞ੍ਚ ਪੁਞ੍ਞਤ੍ਥਿਕੋ.

ਅਤੀਤੇ ਕਿਰ ਵਿਦੇਹਰਟ੍ਠੇ ਮਿਥਿਲਾਨਗਰੇ ਅਮ੍ਹਾਕਂ ਬੋਧਿਸਤ੍ਤੋ ਮਘਦੇਵੋ ਨਾਮ ਰਾਜਾ ਅਹੋਸਿ. ਸੋ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਕੁਮਾਰਕੀਲ਼ਂ ਕੀਲ਼ਿਤ੍ਵਾ ਚਤੁਰਾਸੀਤਿ ਵਸ੍ਸਹਸ੍ਸਾਨਿ ਉਪਰਜ੍ਜਂ ਕਾਰੇਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਰਜ੍ਜਂ ਕਾਰੇਨ੍ਤੋ ‘‘ਯਦਾ ਮੇ ਸਿਰਸ੍ਮਿਂ ਪਲਿਤਾਨਿ ਪਸ੍ਸੇਯ੍ਯਾਸਿ, ਤਦਾ ਮੇ ਆਰੋਚੇਯ੍ਯਾਸੀ’’ਤਿ ਕਪ੍ਪਕਸ੍ਸ ਵਤ੍ਵਾ ਅਪਰਭਾਗੇ ਤੇਨ ਪਲਿਤਾਨਿ ਦਿਸ੍ਵਾ ਆਰੋਚਿਤੇ ਸੁਵਣ੍ਣਸਣ੍ਡਾਸੇਨ ਉਦ੍ਧਰਾਪੇਤ੍ਵਾ ਹਤ੍ਥੇ ਪਤਿਟ੍ਠਾਪੇਤ੍ਵਾ ਪਲਿਤਂ ਓਲੋਕੇਤ੍ਵਾ ‘‘ਪਾਤੁਭੂਤੋ ਖੋ ਮਯ੍ਹਂ ਦੇਵਦੂਤੋ’’ਤਿ ਸਂਵੇਗਜਾਤੋ ‘‘ਇਦਾਨਿ ਮਯਾ ਪਬ੍ਬਜਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਸਤਸਹਸ੍ਸੁਟ੍ਠਾਨਕਂ ਗਾਮਵਰਂ ਕਪ੍ਪਕਸ੍ਸ ਦਤ੍ਵਾ ਜੇਟ੍ਠਕੁਮਾਰਂ ਪਕ੍ਕੋਸਾਪੇਤ੍ਵਾ ਤਸ੍ਸ –

‘‘ਉਤ੍ਤਮਙ੍ਗਰੁਹਾ ਮਯ੍ਹਂ, ਇਮੇ ਜਾਤਾ ਵਯੋਹਰਾ;

ਪਾਤੁਭੂਤਾ ਦੇਵਦੂਤਾ, ਪਬ੍ਬਜ੍ਜਾਸਮਯੋ ਮਮਾ’’ਤਿ. (ਜਾ. ੧.੧.੯) –

ਵਤ੍ਵਾ ਸਾਧੁਕਂ ਰਜ੍ਜੇ ਸਮਨੁਸਾਸਿਤ੍ਵਾ ਯਦਿਪਿ ਅਤ੍ਤਨੋ ਅਞ੍ਞਾਨਿਪਿ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਆਯੁ ਅਤ੍ਥਿ, ਏਵਂ ਸਨ੍ਤੇਪਿ ਮਚ੍ਚੁਨੋ ਸਨ੍ਤਿਕੇ ਠਿਤਂ ਵਿਯ ਅਤ੍ਤਾਨਂ ਮਞ੍ਞਮਾਨੋ ਸਂਵਿਗ੍ਗਹਦਯੋ ਪਬ੍ਬਜ੍ਜਂ ਰੋਚੇਤਿ. ਤੇਨ ਵੁਤ੍ਤਂ –

‘‘ਸਿਰਸ੍ਮਿਂ ਪਲਿਤਂ ਦਿਸ੍ਵਾ, ਮਘਦੇਵੋ ਦਿਸਮ੍ਪਤਿ;

ਸਂਵੇਗਂ ਅਲਭੀ ਧੀਰੋ, ਪਬ੍ਬਜ੍ਜਂ ਸਮਰੋਚਯੀ’’ਤਿ. (ਮ. ਨਿ. ਅਟ੍ਠ. ੨.੩੦੯);

ਸੋ ਪੁਤ੍ਤਂ ‘‘ਇਮਿਨਾਵ ਨੀਹਾਰੇਨ ਵਤ੍ਤੇਯ੍ਯਾਸਿ ਯਥਾ ਮਯਾ ਪਟਿਪਨ੍ਨਂ, ਮਾ ਖੋ ਤ੍ਵਂ ਅਨ੍ਤਿਮਪੁਰਿਸੋ ਅਹੋਸੀ’’ਤਿ ਓਵਦਿਤ੍ਵਾ ਨਗਰਾ ਨਿਕ੍ਖਮ੍ਮ ਭਿਕ੍ਖੁਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਝਾਨਸਮਾਪਤ੍ਤੀਹਿ ਵੀਤਿਨਾਮੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨੋ ਅਹੋਸਿ. ਪੁਤ੍ਤੋਪਿਸ੍ਸ ਬਹੂਨਿ ਵਸ੍ਸਸਹਸ੍ਸਾਨਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਤੇਨੇਵ ਉਪਾਯੇਨ ਪਬ੍ਬਜਿਤ੍ਵਾ ਬ੍ਰਹ੍ਮਲੋਕਪਰਾਯਨੋ ਅਹੋਸਿ. ਤਥਾ ਤਸ੍ਸ ਪੁਤ੍ਤੋ, ਤਥਾ ਤਸ੍ਸ ਪੁਤ੍ਤੋਤਿ ਏਵਂ ਦ੍ਵੀਹਿ ਊਨਾਨਿ ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਸੀਸੇ ਪਲਿਤਂ ਦਿਸ੍ਵਾਵ ਪਬ੍ਬਜਿਤਾਨਿ. ਅਥ ਬੋਧਿਸਤ੍ਤੋ ਬ੍ਰਹ੍ਮਲੋਕੇ ਠਿਤੋਵ ‘‘ਪਵਤ੍ਤਤਿ ਨੁ ਖੋ ਮਯਾ ਮਨੁਸ੍ਸਲੋਕੇ ਕਤਂ ਕਲ੍ਯਾਣਂ ਨ ਪਵਤ੍ਤਤੀ’’ਤਿ ਆਵਜ੍ਜੇਨ੍ਤੋ ਅਦ੍ਦਸ ‘‘ਏਤ੍ਤਕਂ ਅਦ੍ਧਾਨਂ ਪਵਤ੍ਤਂ, ਇਦਾਨਿ ਨਪ੍ਪਵਤ੍ਤਿਸ੍ਸਤੀ’’ਤਿ. ਸੋ ‘‘ਨ ਖੋ ਪਨਾਹਂ ਮਯ੍ਹਂ ਪਵੇਣਿਯਾ ਉਚ੍ਛਿਜ੍ਜਿਤੁਂ ਦਸ੍ਸਾਮੀ’’ਤਿ ਅਤ੍ਤਨੋ ਵਂਸੇ ਜਾਤਰਞ੍ਞੋ ਏਵ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਤ੍ਤਨੋ ਵਂਸਸ੍ਸ ਨੇਮਿਂ ਘਟੇਨ੍ਤੋ ਵਿਯ ਨਿਬ੍ਬਤ੍ਤੋ. ਤੇਨ ਵੁਤ੍ਤਂ ‘‘ਨੇਮਿਂ ਘਟੇਨ੍ਤੋ ਵਿਯ ਉਪ੍ਪਨ੍ਨੋਤਿ ਨਿਮੀਤਿ ਲਦ੍ਧਨਾਮੋ’’ਤਿ.

ਤਸ੍ਸ ਹਿ ਨਾਮਗ੍ਗਹਣਦਿਵਸੇ ਪਿਤਰਾ ਆਨੀਤਾ ਲਕ੍ਖਣਪਾਠਕਾ. ਲਕ੍ਖਣਾਨਿ ਓਲੋਕੇਤ੍ਵਾ ‘‘ਮਹਾਰਾਜ, ਅਯਂ ਕੁਮਾਰੋ ਤੁਮ੍ਹਾਕਂ ਵਂਸਂ ਪਗ੍ਗਣ੍ਹਾਤਿ, ਪਿਤੁਪਿਤਾਮਹੇਹਿਪਿ ਮਹਾਨੁਭਾਵੋ ਮਹਾਪੁਞ੍ਞੋ’’ਤਿ ਬ੍ਯਾਕਰਿਂਸੁ. ਤਂ ਸੁਤ੍ਵਾ ਰਾਜਾ ਯਥਾਵੁਤ੍ਤੇਨਤ੍ਥੇਨ ‘‘ਨਿਮੀ’’ਤਿਸ੍ਸ ਨਾਮਂ ਅਕਾਸਿ, ਸੋ ਦਹਰਕਾਲਤੋ ਪਟ੍ਠਾਯ ਸੀਲੇ ਉਪੋਸਥਕਮ੍ਮੇ ਚ ਯੁਤ੍ਤਪ੍ਪਯੁਤ੍ਤੋ ਅਹੋਸਿ. ਅਥਸ੍ਸ ਪਿਤਾ ਪੁਰਿਮਨਯੇਨੇਵ ਪਲਿਤਂ ਦਿਸ੍ਵਾ ਕਪ੍ਪਕਸ੍ਸ ਗਾਮਵਰਂ ਦਤ੍ਵਾ ਪੁਤ੍ਤਂ ਰਜ੍ਜੇ ਸਮਨੁਸਾਸਿਤ੍ਵਾ ਨਗਰਾ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਨੋ ਅਹੋਸਿ.

ਨਿਮਿਰਾਜਾ ਪਨ ਦਾਨਜ੍ਝਾਸਯਤਾਯ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਚਾਤਿ ਪਞ੍ਚ ਦਾਨਸਾਲਾਯੋ ਕਾਰੇਤ੍ਵਾ ਮਹਾਦਾਨਂ ਪਵਤ੍ਤੇਸਿ. ਏਕੇਕਾਯ ਦਾਨਸਾਲਾਯ ਸਤਸਹਸ੍ਸਂ ਸਤਸਹਸ੍ਸਂ ਕਤ੍ਵਾ ਦੇਵਸਿਕਂ ਪਞ੍ਚਸਤਸਹਸ੍ਸਾਨਿ ਪਰਿਚ੍ਚਜਿ, ਪਞ੍ਚ ਸੀਲਾਨਿ ਰਕ੍ਖਿ, ਪਕ੍ਖਦਿਵਸੇਸੁ ਉਪੋਸਥਕਮ੍ਮਂ ਸਮਾਦਿਯਿ, ਮਹਾਜਨਮ੍ਪਿ ਦਾਨਾਦੀਸੁ ਪੁਞ੍ਞੇਸੁ ਸਮਾਦਪੇਸਿ, ਸਗ੍ਗਮਗ੍ਗਂ ਆਚਿਕ੍ਖਿ, ਨਿਰਯਭਯੇਨ ਤਜ੍ਜੇਸਿ, ਪਾਪਤੋ ਨਿਵਾਰੇਸਿ. ਤਸ੍ਸ ਓਵਾਦੇ ਠਤ੍ਵਾ ਮਹਾਜਨੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿ, ਦੇਵਲੋਕੋ ਪਰਿਪੂਰਿ, ਨਿਰਯੋ ਤੁਚ੍ਛੋ ਵਿਯ ਅਹੋਸਿ. ਤਦਾ ਪਨ ਅਤ੍ਤਨੋ ਦਾਨਜ੍ਝਾਸਯਸ੍ਸ ਉਲ਼ਾਰਭਾਵਂ ਸਵਿਸੇਸਂ ਦਾਨਪਾਰਮਿਯਾ ਪੂਰਿਤਭਾਵਞ੍ਚ ਪਵੇਦੇਨ੍ਤੋ ਸਤ੍ਥਾ –

੪੧. ‘‘ਤਦਾਹਂ ਮਾਪਯਿਤ੍ਵਾਨ, ਚਤੁਸ੍ਸਾਲਂ ਚਤੁਮ੍ਮੁਖਂ;

ਤਤ੍ਥ ਦਾਨਂ ਪਵਤ੍ਤੇਸਿਂ, ਮਿਗਪਕ੍ਖਿਨਰਾਦਿਨ’’ਨ੍ਤਿ. – ਆਦਿਮਾਹ;

ਤਤ੍ਥ ਤਦਾਤਿ ਤਸ੍ਮਿਂ ਨਿਮਿਰਾਜਕਾਲੇ. ਮਾਪਯਿਤ੍ਵਾਨਾਤਿ ਕਾਰਾਪੇਤ੍ਵਾ. ਚਤੁਸ੍ਸਾਲਨ੍ਤਿ ਚਤੂਸੁ ਦਿਸਾਸੁ ਸਮ੍ਬਨ੍ਧਸਾਲਂ. ਚਤੁਮ੍ਮੁਖਨ੍ਤਿ ਚਤੂਸੁ ਦਿਸਾਸੁ ਚਤੂਹਿ ਦ੍ਵਾਰੇਹਿ ਯੁਤ੍ਤਂ. ਦਾਨਸਾਲਾਯ ਹਿ ਮਹਨ੍ਤਭਾਵਤੋ ਦੇਯ੍ਯਧਮ੍ਮਸ੍ਸ ਯਾਚਕਜਨਸ੍ਸ ਚ ਬਹੁਭਾਵਤੋ ਨ ਸਕ੍ਕਾ ਏਕੇਨੇਵ ਦ੍ਵਾਰੇਨ ਦਾਨਧਮ੍ਮਂ ਪਰਿਯਨ੍ਤਂ ਕਾਤੁਂ ਦੇਯ੍ਯਧਮ੍ਮਞ੍ਚ ਪਰਿਯੋਸਾਪੇਤੁਨ੍ਤਿ ਸਾਲਾਯ ਚਤੂਸੁ ਦਿਸਾਸੁ ਚਤ੍ਤਾਰਿ ਮਹਾਦ੍ਵਾਰਾਨਿ ਕਾਰਾਪੇਸਿ. ਤਤ੍ਥ ਦ੍ਵਾਰਤੋ ਪਟ੍ਠਾਯ ਯਾਵ ਕੋਣਾ ਦੇਯ੍ਯਧਮ੍ਮੋ ਰਾਸਿਕਤੋ ਤਿਟ੍ਠਤਿ. ਅਰੁਣੁਗ੍ਗਂ ਆਦਿਂ ਕਤ੍ਵਾ ਯਾਵ ਪਕਤਿਯਾ ਸਂਵੇਸਨਕਾਲੋ, ਤਾਵ ਦਾਨਂ ਪਵਤ੍ਤੇਤਿ. ਇਤਰਸ੍ਮਿਮ੍ਪਿ ਕਾਲੇ ਅਨੇਕਸਤਾ ਪਦੀਪਾ ਝਾਯਨ੍ਤਿ. ਯਦਾ ਯਦਾ ਅਤ੍ਥਿਕਾ ਆਗਚ੍ਛਨ੍ਤਿ, ਤਦਾ ਤਦਾ ਦੀਯਤੇਵ. ਤਞ੍ਚ ਦਾਨਂ ਨ ਕਪਣਦ੍ਧਿਕਵਨਿਬ੍ਬਕਯਾਚਕਾਨਞ੍ਞੇਵ, ਅਥ ਖੋ ਅਡ੍ਢਾਨਂ ਮਹਾਭੋਗਾਨਮ੍ਪਿ ਉਪਕਪ੍ਪਨਵਸੇਨ ਮਹਾਸੁਦਸ੍ਸਨਦਾਨਸਦਿਸਂ ਉਲ਼ਾਰਤਰਪਣੀਤਤਰਾਨਂ ਦੇਯ੍ਯਧਮ੍ਮਾਨਂ ਪਰਿਚ੍ਚਜਨਤੋ ਸਬ੍ਬੇਪਿ ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਪਟਿਗ੍ਗਹੇਸੁਞ੍ਚੇਵ ਪਰਿਭੁਞ੍ਜਿਂਸੁ ਚ. ਸਕਲਜਮ੍ਬੁਦੀਪਞ੍ਹਿ ਉਨ੍ਨਙ੍ਗਲਂ ਕਤ੍ਵਾ ਮਹਾਪੁਰਿਸੋ ਤਦਾ ਮਹਾਦਾਨਂ ਪਵਤ੍ਤੇਸਿ. ਯਥਾ ਚ ਮਨੁਸ੍ਸਾਨਂ, ਏਵਂ ਮਿਗਪਕ੍ਖਿਕੇ ਆਦਿਂ ਕਤ੍ਵਾ ਤਿਰਚ੍ਛਾਨਗਤਾਨਮ੍ਪਿ ਦਾਨਸਾਲਾਯ ਬਹਿ ਏਕਮਨ੍ਤੇ ਤੇਸਂ ਉਪਕਪ੍ਪਨਵਸੇਨ ਦਾਨਂ ਪਵਤ੍ਤੇਸਿ. ਤੇਨ ਵੁਤ੍ਤਂ – ‘‘ਤਤ੍ਥ ਦਾਨਂ ਪਵਤ੍ਤੇਸਿਂ, ਮਿਗਪਕ੍ਖਿਨਰਾਦਿਨ’’ਨ੍ਤਿ. ਨ ਕੇਵਲਞ੍ਚ ਤਿਰਚ੍ਛਾਨਾਨਮੇਵ, ਪੇਤਾਨਮ੍ਪਿ ਦਿਵਸੇ ਦਿਵਸੇ ਪਤ੍ਤਿਂ ਦਾਪੇਸਿ. ਯਥਾ ਚ ਏਕਿਸ੍ਸਾ ਦਾਨਸਾਲਾਯ, ਏਵਂ ਪਞ੍ਚਸੁਪਿ ਦਾਨਸਾਲਾਸੁ ਦਾਨਂ ਪਵਤ੍ਤਿਤ੍ਥ. ਪਾਲ਼ਿਯਂ ਪਨ ‘‘ਤਦਾਹਂ ਮਾਪਯਿਤ੍ਵਾਨ, ਚਤੁਸ੍ਸਾਲਂ ਚਤੁਮ੍ਮੁਖ’’ਨ੍ਤਿ ਏਕਂ ਵਿਯ ਵੁਤ੍ਤਂ, ਤਂ ਨਗਰਮਜ੍ਝੇ ਦਾਨਸਾਲਂ ਸਨ੍ਧਾਯ ਵੁਤ੍ਤਂ.

੪੨. ਇਦਾਨਿ ਤਤ੍ਥ ਦੇਯ੍ਯਧਮ੍ਮਂ ਏਕਦੇਸੇਨ ਦਸ੍ਸੇਨ੍ਤੋ ‘‘ਅਚ੍ਛਾਦਨਞ੍ਚ ਸਯਨਂ, ਅਨ੍ਨਂ ਪਾਨਞ੍ਚ ਭੋਜਨ’’ਨ੍ਤਿ ਆਹ.

ਤਤ੍ਥ ਅਚ੍ਛਾਦਨਨ੍ਤਿ ਖੋਮਸੁਖੁਮਾਦਿਨਾਨਾਵਿਧਨਿਵਾਸਨਪਾਰੁਪਨਂ. ਸਯਨਨ੍ਤਿ ਮਞ੍ਚਪਲ੍ਲਙ੍ਕਾਦਿਞ੍ਚੇਵ ਗੋਨਕਚਿਤ੍ਤਕਾਦਿਞ੍ਚ ਅਨੇਕਵਿਧਂ ਸਯਿਤਬ੍ਬਕਂ, ਆਸਨਮ੍ਪਿ ਚੇਤ੍ਥ ਸਯਨਗ੍ਗਹਣੇਨੇਵ ਗਹਿਤਨ੍ਤਿ ਦਟ੍ਠਬ੍ਬਂ. ਅਨ੍ਨਂ ਪਾਨਞ੍ਚ ਭੋਜਨਨ੍ਤਿ ਤੇਸਂ ਤੇਸਂ ਸਤ੍ਤਾਨਂ ਯਥਾਭਿਰੁਚਿਤਂ ਨਾਨਗ੍ਗਰਸਂ ਅਨ੍ਨਞ੍ਚੇਵ ਪਾਨਞ੍ਚ ਅਵਸਿਟ੍ਠਂ ਨਾਨਾਵਿਧਭੋਜਨਵਿਕਤਿਞ੍ਚ. ਅਬ੍ਬੋਚ੍ਛਿਨ੍ਨਂ ਕਰਿਤ੍ਵਾਨਾਤਿ ਆਰਮ੍ਭਤੋ ਪਟ੍ਠਾਯ ਯਾਵ ਆਯੁਪਰਿਯੋਸਾਨਾ ਅਹੋਰਤ੍ਤਂ ਅਵਿਚ੍ਛਿਨ੍ਨਂ ਕਤ੍ਵਾ.

੪੩-੪. ਇਦਾਨਿ ਤਸ੍ਸ ਦਾਨਸ੍ਸ ਸਮ੍ਮਾਸਮ੍ਬੋਧਿਂ ਆਰਬ੍ਭ ਦਾਨਪਾਰਮਿਭਾਵੇਨ ਪਵਤ੍ਤਿਤਭਾਵਂ ਦਸ੍ਸੇਨ੍ਤੋ ਯਥਾ ਤਦਾ ਅਤ੍ਤਨੋ ਅਜ੍ਝਾਸਯੋ ਪਵਤ੍ਤੋ, ਤਂ ਉਪਮਾਯ ਦਸ੍ਸੇਤੁਂ ‘‘ਯਥਾਪਿ ਸੇਵਕੋ’’ਤਿਆਦਿਮਾਹ. ਤਸ੍ਸਤ੍ਥੋ – ਯਥਾ ਨਾਮ ਸੇਵਕਪੁਰਿਸੋ ਅਤ੍ਤਨੋ ਸਾਮਿਕਂ ਕਾਲਾਨੁਕਾਲਂ ਸੇਵਨਵਸੇਨ ਉਪਗਤੋ ਲਦ੍ਧਬ੍ਬਧਨਹੇਤੁ ਕਾਯੇਨ ਵਾਚਾਯ ਮਨਸਾ ਸਬ੍ਬਥਾਪਿ ਕਾਯਵਚੀਮਨੋਕਮ੍ਮੇਹਿ ਯਥਾ ਸੋ ਆਰਾਧਿਤੋ ਹੋਤਿ, ਏਵਂ ਆਰਾਧਨੀਯਂ ਆਰਾਧਨਮੇਵ ਏਸਤਿ ਗਵੇਸਤਿ, ਤਥਾ ਅਹਮ੍ਪਿ ਬੋਧਿਸਤ੍ਤਭੂਤੋ ਸਦੇਵਕਸ੍ਸ ਲੋਕਸ੍ਸ ਸਾਮਿਭੂਤਂ ਅਨੁਤ੍ਤਰਂ ਬੁਦ੍ਧਭਾਵਂ ਸੇਵੇਤੁਕਾਮੋ ਤਸ੍ਸ ਆਰਾਧਨਤ੍ਥਂ ਸਬ੍ਬਭਵੇ ਸਬ੍ਬਸ੍ਮਿਂ ਨਿਬ੍ਬਤ੍ਤਨਿਬ੍ਬਤ੍ਤਭਵੇ ਦਾਨਪਾਰਮਿਪਰਿਪੂਰਣਵਸੇਨ ਦਾਨੇਨ ਸਬ੍ਬਸਤ੍ਤੇ ਸਨ੍ਤਪ੍ਪੇਤ੍ਵਾ ਬੋਧਿਸਙ੍ਖਾਤਤੋ ਅਰਿਯਮਗ੍ਗਞਾਣਤੋ ਜਾਤਤ੍ਤਾ ‘‘ਬੋਧਿਜ’’ਨ੍ਤਿ ਲਦ੍ਧਨਾਮਂ ਸਬ੍ਬਞ੍ਞੁਤਞ੍ਞਾਣਂ ਪਰਤੋ ਸਬ੍ਬਥਾ ਨਾਨੂਪਾਯੇਹਿ ਏਸਿਸ੍ਸਾਮਿ ਗਵੇਸਿਸ੍ਸਾਮਿ, ਤਂ ਉਤ੍ਤਮਂ ਬੋਧਿਂ ਸਮ੍ਮਾਸਮ੍ਬੋਧਿਂ ਜੀਵਿਤਪਰਿਚ੍ਚਾਗਾਦਿਂ ਯਂਕਿਞ੍ਚਿ ਕਤ੍ਵਾ ਇਚ੍ਛਾਮਿ ਅਭਿਪਤ੍ਥੇਮੀਤਿ.

ਏਵਮਿਧ ਦਾਨਜ੍ਝਾਸਯਸ੍ਸ ਉਲ਼ਾਰਭਾਵਂ ਦਸ੍ਸੇਤੁਂ ਦਾਨਪਾਰਮਿਵਸੇਨੇਵ ਦੇਸਨਾ ਕਤਾ. ਜਾਤਕਦੇਸਨਾਯਂ ਪਨਸ੍ਸ ਸੀਲਪਾਰਮਿਆਦੀਨਮ੍ਪਿ ਪਰਿਪੂਰਣਂ ਵਿਭਾਵਿਤਮੇਵ, ਤਥਾ ਹਿਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਸੀਲਾਦਿਗੁਣੇਹਿ ਅਤ੍ਤਾਨਂ ਅਲਙ੍ਕਰਿਤ੍ਵਾ ਮਹਾਜਨਂ ਤਤ੍ਥ ਪਤਿਟ੍ਠਪੇਨ੍ਤਸ੍ਸ ਓਵਾਦੇ ਠਤ੍ਵਾ ਨਿਬ੍ਬਤ੍ਤਦੇਵਤਾ ਸੁਧਮ੍ਮਾਯਂ ਦੇਵਸਭਾਯਂ ਸਨ੍ਨਿਪਤਿਤਾ ‘‘ਅਹੋ ਅਮ੍ਹਾਕਂ ਨਿਮਿਰਾਜਾਨਂ ਨਿਸ੍ਸਾਯ ਮਯਂ ਇਮਂ ਸਮ੍ਪਤ੍ਤਿਂ ਪਤ੍ਤਾ, ਏਵਰੂਪਾਪਿ ਨਾਮ ਅਨੁਪ੍ਪਨ੍ਨੇ ਬੁਦ੍ਧੇ ਮਹਾਜਨਸ੍ਸ ਬੁਦ੍ਧਕਿਚ੍ਚਂ ਸਾਧਯਮਾਨਾ ਅਚ੍ਛਰਿਯਮਨੁਸ੍ਸਾ ਲੋਕੇ ਉਪ੍ਪਜ੍ਜਨ੍ਤੀ’’ਤਿ ਮਹਾਪੁਰਿਸਸ੍ਸ ਗੁਣੇ ਵਣ੍ਣੇਨ੍ਤਾ ਅਭਿਤ੍ਥਵਿਂਸੁ. ਤੇਨ ਵੁਤ੍ਤਂ –

‘‘ਅਚ੍ਛੇਰਂ ਵਤ ਲੋਕਸ੍ਮਿਂ, ਉਪ੍ਪਜ੍ਜਨ੍ਤਿ ਵਿਚਕ੍ਖਣਾ;

ਯਦਾ ਅਹੁ ਨਿਮਿਰਾਜਾ, ਪਣ੍ਡਿਤੋ ਕੁਸਲਤ੍ਥਿਕੋ’’ਤਿ. (ਜਾ. ੨.੨੨.੪੨੧) –

ਆਦਿ.

ਤਂ ਸੁਤ੍ਵਾ ਸਕ੍ਕਂ ਦੇਵਾਨਮਿਨ੍ਦਂ ਆਦਿਂ ਕਤ੍ਵਾ ਸਬ੍ਬੇ ਦੇਵਾ ਬੋਧਿਸਤ੍ਤਂ ਦਟ੍ਠੁਕਾਮਾ ਅਹੇਸੁਂ. ਅਥੇਕਦਿਵਸਂ ਮਹਾਪੁਰਿਸਸ੍ਸ ਉਪੋਸਥਿਕਸ੍ਸ ਉਪਰਿਪਾਸਾਦਵਰਗਤਸ੍ਸ ਪਚ੍ਛਿਮਯਾਮੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਦਾਨਂ ਨੁ ਖੋ ਵਰਂ, ਉਦਾਹੁ ਬ੍ਰਹ੍ਮਚਰਿਯ’’ਨ੍ਤਿ. ਸੋ ਤਂ ਅਤ੍ਤਨੋ ਕਙ੍ਖਂ ਛਿਨ੍ਦਿਤੁਂ ਨਾਸਕ੍ਖਿ. ਤਸ੍ਮਿਂ ਖਣੇ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਤਂ ਕਾਰਣਂ ਆਵਜ੍ਜੇਨ੍ਤੋ ਬੋਧਿਸਤ੍ਤਂ ਤਥਾ ਵਿਤਕ੍ਕੇਨ੍ਤਂ ਦਿਸ੍ਵਾ ‘‘ਹਨ੍ਦਸ੍ਸ ਵਿਤਕ੍ਕਂ ਛਿਨ੍ਦਿਸ੍ਸਾਮੀ’’ਤਿ ਆਗਨ੍ਤ੍ਵਾ ਪੁਰਤੋ ਠਿਤੋ ਤੇਨ ‘‘ਕੋਸਿ ਤ੍ਵ’’ਨ੍ਤਿ ਪੁਟ੍ਠੋ ਅਤ੍ਤਨੋ ਦੇਵਰਾਜਭਾਵਂ ਆਰੋਚੇਤ੍ਵਾ ‘‘ਕਿਂ, ਮਹਾਰਾਜ, ਚਿਨ੍ਤੇਸੀ’’ਤਿ ਵੁਤ੍ਤੇ ਤਮਤ੍ਥਂ ਆਰੋਚੇਸਿ. ਸਕ੍ਕੋ ਬ੍ਰਹ੍ਮਚਰਿਯਮੇਵ ਉਤ੍ਤਮਂ ਕਤ੍ਵਾ ਦਸ੍ਸੇਨ੍ਤੋ –

‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;

ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤਿ.

‘‘ਨ ਹੇਤੇ ਸੁਲਭਾ ਕਾਯਾ, ਯਾਚਯੋਗੇਨ ਕੇਨਚਿ;

ਯੇ ਕਾਯੇ ਉਪਪਜ੍ਜਨ੍ਤਿ, ਅਨਗਾਰਾ ਤਪਸ੍ਸਿਨੋ’’ਤਿ. (ਜਾ. ੨.੨੨.੪੨੯-੪੩੦) –

ਆਹ.

ਤਤ੍ਥ ਪੁਥੁਤਿਤ੍ਥਾਯਤਨੇਸੁ ਮੇਥੁਨਵਿਰਤਿਮਤ੍ਤਂ ਹੀਨਂ ਬ੍ਰਹ੍ਮਚਰਿਯਂ ਨਾਮ, ਤੇਨ ਖਤ੍ਤਿਯਕੁਲੇ ਉਪਪਜ੍ਜਤਿ. ਝਾਨਸ੍ਸ ਉਪਚਾਰਮਤ੍ਤਂ ਮਜ੍ਝਿਮਂ ਨਾਮ, ਤੇਨ ਦੇਵਤ੍ਤਂ ਉਪਪਜ੍ਜਤਿ. ਅਟ੍ਠਸਮਾਪਤ੍ਤਿਨਿਬ੍ਬਤ੍ਤਨਂ ਪਨ ਉਤ੍ਤਮਂ ਨਾਮ, ਤੇਨ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਤਞ੍ਹਿ ਬਾਹਿਰਕਾ ‘‘ਨਿਬ੍ਬਾਨ’’ਨ੍ਤਿ ਕਥੇਨ੍ਤਿ. ਤੇਨਾਹ ‘‘ਵਿਸੁਜ੍ਝਤੀ’’ਤਿ. ਸਾਸਨੇ ਪਨ ਪਰਿਸੁਦ੍ਧਸੀਲਸ੍ਸ ਭਿਕ੍ਖੁਨੋ ਅਞ੍ਞਤਰਂ ਦੇਵਨਿਕਾਯਂ ਪਤ੍ਥੇਨ੍ਤਸ੍ਸ ਬ੍ਰਹ੍ਮਚਰਿਯਚੇਤਨਾ ਹੀਨਤਾਯ ਹੀਨਂ ਨਾਮ, ਤੇਨ ਯਥਾਪਤ੍ਥਿਤੇ ਦੇਵਲੋਕੇ ਨਿਬ੍ਬਤ੍ਤਤਿ. ਪਰਿਸੁਦ੍ਧਸੀਲਸ੍ਸ ਅਟ੍ਠਸਮਾਪਤ੍ਤਿਨਿਬ੍ਬਤ੍ਤਨਂ ਮਜ੍ਝਿਮਂ ਨਾਮ, ਤੇਨ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਪਰਿਸੁਦ੍ਧਸੀਲਸ੍ਸ ਪਨ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਪ੍ਪਤ੍ਤਿ ਉਤ੍ਤਮਂ ਨਾਮ, ਤੇਨ ਵਿਸੁਜ੍ਝਤੀਤਿ. ਇਤਿ ਸਕ੍ਕੋ ‘‘ਮਹਾਰਾਜ, ਦਾਨਤੋ ਬ੍ਰਹ੍ਮਚਰਿਯਵਾਸੋਵ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਮਹਪ੍ਫਲੋ’’ਤਿ ਵਣ੍ਣੇਸਿ. ਕਾਯਾਤਿ ਬ੍ਰਹ੍ਮਗਣਾ. ਯਾਚਯੋਗੇਨਾਤਿ ਯਾਚਨਯੁਤ੍ਤੇਨ. ‘‘ਯਾਜਯੋਗੇਨਾ’’ਤਿਪਿ ਪਾਲ਼ਿ, ਯਜਨਯੁਤ੍ਤੇਨ, ਦਾਨਯੁਤ੍ਤੇਨਾਤਿ ਅਤ੍ਥੋ. ਤਪਸ੍ਸਿਨੋਤਿ ਤਪਨਿਸ੍ਸਿਤਕਾ. ਇਮਾਯਪਿ ਗਾਥਾਯ ਬ੍ਰਹ੍ਮਚਰਿਯਵਾਸਸ੍ਸੇਵ ਮਹਾਨੁਭਾਵਤਂ ਦੀਪੇਤਿ. ਏਵਞ੍ਚ ਪਨ ਵਤ੍ਵਾ ‘‘ਕਿਞ੍ਚਾਪਿ, ਮਹਾਰਾਜ, ਦਾਨਤੋ ਬ੍ਰਹ੍ਮਚਰਿਯਮੇਵ ਮਹਪ੍ਫਲਂ, ਦ੍ਵੇਪਿ ਪਨੇਤੇ ਮਹਾਪੁਰਿਸਕਤ੍ਤਬ੍ਬਾਵ. ਦ੍ਵੀਸੁਪਿ ਅਪ੍ਪਮਤ੍ਤੋ ਹੁਤ੍ਵਾ ਦਾਨਞ੍ਚ ਦੇਹਿ ਸੀਲਞ੍ਚ ਰਕ੍ਖਾਹੀ’’ਤਿ ਵਤ੍ਵਾ ਤਂ ਓਵਦਿਤ੍ਵਾ ਸਕਟ੍ਠਾਨਮੇਵ ਗਤੋ.

ਅਥ ਨਂ ਦੇਵਗਣੋ ‘‘ਮਹਾਰਾਜ, ਕੁਹਿਂ ਗਤਤ੍ਥਾ’’ਤਿ ਆਹ. ਸਕ੍ਕੋ ‘‘ਮਿਥਿਲਾਯਂ ਨਿਮਿਰਞ੍ਞੋ ਕਙ੍ਖ ਛਿਨ੍ਦਿਤੁ’’ਨ੍ਤਿ ਤਮਤ੍ਥਂ ਪਕਾਸੇਤ੍ਵਾ ਬੋਧਿਸਤ੍ਤਸ੍ਸ ਗੁਣੇ ਵਿਤ੍ਥਾਰਤੋ ਵਣ੍ਣੇਸਿ. ਤਂ ਸੁਤ੍ਵਾ ਦੇਵਾ ‘‘ਮਹਾਰਾਜ, ਮਯ੍ਹਂ ਨਿਮਿਰਾਜਾਨਂ ਦਟ੍ਠੁਕਾਮਮ੍ਹਾ, ਸਾਧੁ ਨਂ ਪਕ੍ਕੋਸਾਪੇਹੀ’’ਤਿ ਵਦਿਂਸੁ. ਸਕ੍ਕੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਮਾਤਲਿਂ ਆਮਨ੍ਤੇਸਿ – ‘‘ਗਚ੍ਛ ਨਿਮਿਰਾਜਾਨਂ ਵੇਜਯਨ੍ਤਂ ਆਰੋਪੇਤ੍ਵਾ ਆਨੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਰਥੇਨ ਗਨ੍ਤ੍ਵਾ ਤਤ੍ਥ ਮਹਾਸਤ੍ਤਂ ਆਰੋਪੇਤ੍ਵਾ ਤੇਨ ਯਾਚਿਤੋ ਯਥਾਕਮ੍ਮਂ ਪਾਪਕਮ੍ਮੀਨਂ ਪੁਞ੍ਞਕਮ੍ਮੀਨਞ੍ਚ ਠਾਨਾਨਿ ਆਚਿਕ੍ਖਨ੍ਤੋ ਅਨੁਕ੍ਕਮੇਨ ਦੇਵਲੋਕਂ ਨੇਸਿ. ਦੇਵਾਪਿ ਖੋ ‘‘ਨਿਮਿਰਾਜਾ ਆਗਤੋ’’ਤਿ ਸੁਤ੍ਵਾ ਦਿਬ੍ਬਗਨ੍ਧਵਾਸਪੁਪ੍ਫਹਤ੍ਥਾ ਯਾਵ ਚਿਤ੍ਤਕੂਟਦ੍ਵਾਰਕੋਟ੍ਠਕਾ ਪਚ੍ਚੁਗ੍ਗਨ੍ਤ੍ਵਾ ਮਹਾਸਤ੍ਤਂ ਦਿਬ੍ਬਗਨ੍ਧਾਦੀਹਿ ਪੂਜੇਨ੍ਤਾ ਸੁਧਮ੍ਮਂ ਦੇਵਸਭਂ ਆਨਯਿਂਸੁ. ਰਾਜਾ ਰਥਾ ਓਤਰਿਤ੍ਵਾ ਦੇਵਸਭਂ ਪਵਿਸਿਤ੍ਵਾ ਸਕ੍ਕੇਨ ਸਦ੍ਧਿਂ ਏਕਾਸਨੇ ਨਿਸੀਦਿਤ੍ਵਾ ਤੇਨ ਦਿਬ੍ਬੇਹਿ ਕਾਮੇਹਿ ਨਿਮਨ੍ਤਿਯਮਾਨੋ ‘‘ਅਲਂ, ਮਹਾਰਾਜ, ਮਯ੍ਹਂ ਇਮੇਹਿ ਯਾਚਿਤਕੂਪਮੇਹਿ ਕਾਮੇਹੀ’’ਤਿ ਪਟਿਕ੍ਖਿਪਿਤ੍ਵਾ ਅਨੇਕਪਰਿਯਾਯੇਨ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਗਣਨਾਯ ਸਤ੍ਤਾਹਮੇਵ ਠਤ੍ਵਾ ‘‘ਗਚ੍ਛਾਮਹਂ ਮਨੁਸ੍ਸਲੋਕਂ, ਤਤ੍ਥ ਦਾਨਾਦੀਨਿ ਪੁਞ੍ਞਾਨਿ ਕਰਿਸ੍ਸਾਮੀ’’ਤਿ ਆਹ. ਸਕ੍ਕੋ ‘‘ਨਿਮਿਰਾਜਾਨਂ ਮਿਥਿਲਂ ਨੇਹੀ’’ਤਿ ਮਾਤਲਿਂ ਆਣਾਪੇਸਿ. ਸੋ ਤਂ ਵੇਜਯਨ੍ਤਰਥਂ ਆਰੋਪੇਤ੍ਵਾ ਪਾਚੀਨਦਿਸਾਭਾਗੇਨ ਮਿਥਿਲਂ ਪਾਪੁਣਿ. ਮਹਾਜਨੋ ਦਿਬ੍ਬਰਥਂ ਦਿਸ੍ਵਾ ਰਞ੍ਞੋ ਪਚ੍ਚੁਗ੍ਗਮਨਂ ਅਕਾਸਿ. ਮਾਤਲਿ ਸੀਹਪਞ੍ਜਰੇ ਮਹਾਸਤ੍ਤਂ ਓਤਾਰੇਤ੍ਵਾ ਆਪੁਚ੍ਛਿਤ੍ਵਾ ਸਕਟ੍ਠਾਨਮੇਵ ਗਤੋ. ਮਹਾਜਨੋਪਿ ਰਾਜਾਨਂ ਪਰਿਵਾਰੇਤ੍ਵਾ ‘‘ਕੀਦਿਸੋ, ਦੇਵ, ਦੇਵਲੋਕੋ’’ਤਿ ਪੁਚ੍ਛਿ. ਰਾਜਾ ਦੇਵਲੋਕਸਮ੍ਪਤ੍ਤਿਂ ਵਣ੍ਣੇਤ੍ਵਾ ‘‘ਤੁਮ੍ਹੇਪਿ ਦਾਨਾਦੀਨਿ ਪੁਞ੍ਞਾਨਿ ਕਰੋਥ, ਏਵਂ ਤਸ੍ਮਿਂ ਦੇਵਲੋਕੇ ਉਪ੍ਪਜ੍ਜਿਸ੍ਸਥਾ’’ਤਿ ਧਮ੍ਮਂ ਦੇਸੇਸਿ. ਸੋ ਅਪਰਭਾਗੇ ਪੁਬ੍ਬੇ ਵੁਤ੍ਤਨਯੇਨ ਪਲਿਤਂ ਦਿਸ੍ਵਾ ਪੁਤ੍ਤਸ੍ਸ ਰਜ੍ਜਂ ਪਟਿਚ੍ਛਾਪੇਤ੍ਵਾ ਕਾਮੇ ਪਹਾਯ ਪਬ੍ਬਜਿਤ੍ਵਾ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ. ਮਾਤਲਿ ਆਨਨ੍ਦੋ. ਚਤੁਰਾਸੀਤਿ ਰਾਜਸਹਸ੍ਸਾਨਿ ਬੁਦ੍ਧਪਰਿਸਾ. ਨਿਮਿਰਾਜਾ ਲੋਕਨਾਥੋ.

ਤਸ੍ਸ ਇਧਾਪਿ ਹੇਟ੍ਠਾ ਵੁਤ੍ਤਨਯੇਨੇਵ ਬੋਧਿਸਮ੍ਭਾਰਾ ਨਿਦ੍ਧਾਰੇਤਬ੍ਬਾ. ਤਥਾ ਬ੍ਰਹ੍ਮਲੋਕਸਮ੍ਪਤ੍ਤਿਂ ਪਹਾਯ ਪੁਬ੍ਬੇ ਅਤ੍ਤਨਾ ਪਵਤ੍ਤਿਤਂ ਕਲ੍ਯਾਣਵਤ੍ਤਂ ਅਨੁਪ੍ਪਬਨ੍ਧੇਸ੍ਸਾਮੀਤਿ ਮਹਾਕਰੁਣਾਯ ਮਨੁਸ੍ਸਲੋਕੇ ਨਿਬ੍ਬਤ੍ਤਨਂ, ਉਲ਼ਾਰੋ ਦਾਨਜ੍ਝਾਸਯੋ, ਤਦਨੁਰੂਪਾ ਦਾਨਾਦੀਸੁ ਪਟਿਪਤ੍ਤਿ, ਮਹਾਜਨਸ੍ਸ ਚ ਤਤ੍ਥ ਪਤਿਟ੍ਠਾਪਨਂ, ਯਾਵ ਦੇਵਮਨੁਸ੍ਸਾਨਂ ਪਤ੍ਥਟਯਸਤਾ, ਸਕ੍ਕਸ੍ਸ ਦੇਵਰਾਜਸ੍ਸ ਉਪਸਙ੍ਕਮਨੇ ਅਤਿਵਿਮ੍ਹਯਤਾ, ਤੇਨ ਦਿਬ੍ਬਸਮ੍ਪਤ੍ਤਿਯਾ ਨਿਮਨ੍ਤਿਯਮਾਨੋਪਿ ਤਂ ਅਨਲਙ੍ਕਰਿਤ੍ਵਾ ਪੁਞ੍ਞਸਮ੍ਭਾਰਪਰਿਬ੍ਰੂਹਨਤ੍ਥਂ ਪੁਨ ਮਨੁਸ੍ਸਵਾਸੂਪਗਮਨਂ, ਲਾਭਸਮ੍ਪਤ੍ਤੀਸੁ ਸਬ੍ਬਤ੍ਥ ਅਲਗ੍ਗਭਾਵੋਤਿ ਏਵਮਾਦਯੋ ਗੁਣਾਨੁਭਾਵਾ ਨਿਦ੍ਧਾਰੇਤਬ੍ਬਾਤਿ.

ਨਿਮਿਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.