੫. ਮਹਾਗੋਵਿਨ੍ਦਚਰਿਯਾਵਣ੍ਣਨਾ

ਪਞ੍ਚਮੇ ਸਤ੍ਤਰਾਜਪੁਰੋਹਿਤੋਤਿ ਸਤ੍ਤਭੂਆਦੀਨਂ ਸਤ੍ਤਨ੍ਨਂ ਰਾਜੂਨਂ ਸਬ੍ਬਕਿਚ੍ਚਾਨੁਸਾਸਕਪੁਰੋਹਿਤੋ. ਪੂਜਿਤੋ ਨਰਦੇਵੇਹੀਤਿ ਤੇਹਿ ਏਵ ਅਞ੍ਞੇਹਿ ਚ ਜਮ੍ਬੁਦੀਪੇ ਸਬ੍ਬੇਹੇਵ ਖਤ੍ਤਿਯੇਹਿ ਚਤੁਪਚ੍ਚਯਪੂਜਾਯ ਸਕ੍ਕਾਰਸਮ੍ਮਾਨੇਨ ਚ ਪੂਜਿਤੋ. ਮਹਾਗੋਵਿਨ੍ਦਬ੍ਰਾਹ੍ਮਣੋਤਿ ਮਹਾਨੁਭਾਵਤਾਯ ਗੋਵਿਨ੍ਦਸ੍ਸਾਭਿਸੇਕੇਨ ਅਭਿਸਿਤ੍ਤਤਾਯ ਚ ‘‘ਮਹਾਗੋਵਿਨ੍ਦੋ’’ਤਿ ਸਙ੍ਖਂ ਗਤੋ ਬ੍ਰਾਹ੍ਮਣੋ, ਅਭਿਸਿਤ੍ਤਕਾਲਤੋ ਪਟ੍ਠਾਯ ਹਿ ਬੋਧਿਸਤ੍ਤਸ੍ਸ ਅਯਂ ਸਮਞ੍ਞਾ ਜਾਤਾ, ਨਾਮੇਨ ਪਨ ਜੋਤਿਪਾਲੋ ਨਾਮ. ਤਸ੍ਸ ਕਿਰ ਜਾਤਦਿਵਸੇ ਸਬ੍ਬਾਵੁਧਾਨਿ ਜੋਤਿਂਸੁ. ਰਾਜਾਪਿ ਪਚ੍ਚੂਸਸਮਯੇ ਅਤ੍ਤਨੋ ਮਙ੍ਗਲਾਵੁਧਂ ਪਜ੍ਜਲਿਤਂ ਦਿਸ੍ਵਾ ਭੀਤੋ ਅਤ੍ਤਨੋ ਪੁਰੋਹਿਤਂ ਬੋਧਿਸਤ੍ਤਸ੍ਸ ਪਿਤਰਂ ਉਪਟ੍ਠਾਨਂ ਆਗਤਂ ਪੁਚ੍ਛਿਤ੍ਵਾ ‘‘ਮਾ ਭਾਯਿ, ਮਹਾਰਾਜ, ਮਯ੍ਹਂ ਪੁਤ੍ਤੋ ਜਾਤੋ, ਤਸ੍ਸਾਨੁਭਾਵੇਨ ਨ ਕੇਵਲਂ ਰਾਜਗੇਹੇਯੇਵ, ਸਕਲਨਗਰੇਪਿ ਆਵੁਧਾਨਿ ਪਜ੍ਜਲਿਂਸੁ, ਨ ਤਂ ਨਿਸ੍ਸਾਯ ਤੁਯ੍ਹਂ ਅਨ੍ਤਰਾਯੋ ਅਤ੍ਥਿ, ਸਕਲਜਮ੍ਬੁਦੀਪੇ ਪਨ ਪਞ੍ਞਾਯ ਤੇਨ ਸਮੋ ਨ ਭਵਿਸ੍ਸਤਿ, ਤਸ੍ਸੇਤਂ ਪੁਬ੍ਬਨਿਮਿਤ੍ਤ’’ਨ੍ਤਿ ਪੁਰੋਹਿਤੇਨ ਸਮਸ੍ਸਾਸਿਤੋ ਤੁਟ੍ਠਚਿਤ੍ਤੋ ‘‘ਕੁਮਾਰਸ੍ਸ ਖੀਰਮੂਲਂ ਹੋਤੂ’’ਤਿ ਸਹਸ੍ਸਂ ਦਤ੍ਵਾ ‘‘ਵਯਪ੍ਪਤ੍ਤਕਾਲੇ ਮਯ੍ਹਂ ਦਸ੍ਸੇਥਾ’’ਤਿ ਆਹ. ਸੋ ਵੁਦ੍ਧਿਪ੍ਪਤ੍ਤੋ ਅਪਰਭਾਗੇ ਅਲਮਤ੍ਥਦਸ੍ਸੋ ਸਤ੍ਤਨ੍ਨਂ ਰਾਜੂਨਂ ਸਬ੍ਬਕਿਚ੍ਚਾਨੁਸਾਸਕੋ ਹੁਤ੍ਵਾ ਪਬ੍ਬਜਿਤ੍ਵਾ ਚ ਸਤ੍ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇਹਿ ਅਨਤ੍ਥੇਹਿ ਪਾਲੇਤ੍ਵਾ ਅਤ੍ਥੇਹਿ ਨਿਯੋਜੇਸਿ. ਇਤਿ ਜੋਤਿਤਤ੍ਤਾ ਪਾਲਨਸਮਤ੍ਥਤਾਯ ਚ ‘‘ਜੋਤਿਪਾਲੋ’’ਤਿਸ੍ਸ ਨਾਮਂ ਅਕਂਸੁ. ਤੇਨ ਵੁਤ੍ਤਂ ‘‘ਨਾਮੇਨ ਜੋਤਿਪਾਲੋ ਨਾਮਾ’’ਤਿ (ਦੀ. ਨਿ. ੨.੩੦੪).

ਤਤ੍ਥ ਬੋਧਿਸਤ੍ਤੋ ਦਿਸਮ੍ਪਤਿਸ੍ਸ ਨਾਮ ਰਞ੍ਞੋ ਪੁਰੋਹਿਤਸ੍ਸ ਗੋਵਿਨ੍ਦਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਅਤ੍ਤਨੋ ਪਿਤੁ ਤਸ੍ਸ ਚ ਰਞ੍ਞੋ ਅਚ੍ਚਯੇਨ ਤਸ੍ਸ ਪੁਤ੍ਤੋ ਰੇਣੁ, ਸਹਾਯਾ ਚਸ੍ਸ ਸਤ੍ਤਭੂ, ਬ੍ਰਹ੍ਮਦਤ੍ਤੋ, ਵੇਸ੍ਸਭੂ, ਭਰਤੋ, ਦ੍ਵੇ ਚ ਧਤਰਟ੍ਠਾਤਿ ਇਮੇ ਸਤ੍ਤ ਰਾਜਾਨੋ ਯਥਾ ਅਞ੍ਞਮਞ੍ਞਂ ਨ ਵਿਵਦਨ੍ਤਿ. ਏਵਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਤੇਸਂ ਅਤ੍ਥਧਮ੍ਮੇ ਅਨੁਸਾਸਨ੍ਤੋ ਜਮ੍ਬੁਦੀਪਤਲੇ ਸਬ੍ਬੇਸਂ ਰਾਜੂਨਂ ਅਞ੍ਞੇਸਞ੍ਚ ਬ੍ਰਾਹ੍ਮਣਾਨਂ ਦੇਵਨਾਗਗਹਪਤਿਕਾਨਂ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਉਤ੍ਤਮਂ ਗਾਰਵਟ੍ਠਾਨਂ ਪਤ੍ਤੋ ਅਹੋਸਿ. ਤਸ੍ਸ ਅਤ੍ਥਧਮ੍ਮੇਸੁ ਕੁਸਲਤਾਯ ‘‘ਮਹਾਗੋਵਿਨ੍ਦੋ’’ਤ੍ਵੇਵ ਸਮਞ੍ਞਾ ਉਦਪਾਦਿ. ਯਥਾਹ ‘‘ਗੋਵਿਨ੍ਦੋ ਵਤ, ਭੋ ਬ੍ਰਾਹ੍ਮਣੋ, ਮਹਾਗੋਵਿਨ੍ਦੋ ਵਤ, ਭੋ ਬ੍ਰਾਹ੍ਮਣੋ’’ਤਿ (ਦੀ. ਨਿ. ੨.੩੦੫). ਤੇਨ ਵੁਤ੍ਤਂ –

੩੭. ‘‘ਪੁਨਾਪਰਂ ਯਦਾ ਹੋਮਿ, ਸਤ੍ਤਰਾਜਪੁਰੋਹਿਤੋ;

ਪੂਜਿਤੋ ਨਰਦੇਵੇਹਿ, ਮਹਾਗੋਵਿਨ੍ਦਬ੍ਰਾਹ੍ਮਣੋ’’ਤਿ.

ਅਥ ਬੋਧਿਸਤ੍ਤਸ੍ਸ ਪੁਞ੍ਞਾਨੁਭਾਵਸਮੁਸ੍ਸਾਹਿਤੇਹਿ ਰਾਜੂਹਿ ਤੇਸਂ ਅਨੁਯੁਤ੍ਤੇਹਿ ਖਤ੍ਤਿਯੇਹਿ ਬ੍ਰਾਹ੍ਮਣਗਹਪਤਿਕੇਹਿ ਨੇਗਮਜਾਨਪਦੇਹਿ ਚ ਉਪਰੂਪਰਿ ਉਪਨੀਤੋ ਸਮਨ੍ਤਤੋ ਮਹੋਘੋ ਵਿਯ ਅਜ੍ਝੋਤ੍ਥਰਮਾਨੋ ਅਪਰਿਮੇਯ੍ਯੋ ਉਲ਼ਾਰੋ ਲਾਭਸਕ੍ਕਾਰੋ ਉਪ੍ਪਜ੍ਜਿ, ਯਥਾ ਤਂ ਅਪਰਿਮਾਣਾਸੁ ਜਾਤੀਸੁ ਉਪਚਿਤਵਿਪੁਲਪੁਞ੍ਞਸਞ੍ਚਯਸ੍ਸ ਉਲ਼ਾਰਾਭਿਜਾਤਸ੍ਸ ਪਰਿਸੁਦ੍ਧਸੀਲਾਚਾਰਸ੍ਸ ਪੇਸਲਸ੍ਸ ਪਰਿਯੋਦਾਤਸਬ੍ਬਸਿਪ੍ਪਸ੍ਸ ਸਬ੍ਬਸਤ੍ਤੇਸੁ ਪੁਤ੍ਤਸਦਿਸਮਹਾਕਰੁਣਾਵਿਪ੍ਫਾਰਸਿਨਿਦ੍ਧਮੁਦੁਹਦਯਸ੍ਸ. ਸੋ ਚਿਨ੍ਤੇਸਿ – ‘‘ਏਤਰਹਿ ਖੋ ਮਯ੍ਹਂ ਮਹਾਲਾਭਸਕ੍ਕਾਰੋ, ਯਂਨੂਨਾਹਂ ਇਮਿਨਾ ਸਬ੍ਬਸਤ੍ਤੇ ਸਨ੍ਤਪ੍ਪੇਤ੍ਵਾ ਦਾਨਪਾਰਮਿਂ ਪਰਿਪੂਰੇਯ੍ਯ’’ਨ੍ਤਿ. ਸੋ ਨਗਰਸ੍ਸ ਮਜ੍ਝੇ ਚਤੂਸੁ ਦ੍ਵਾਰੇਸੁ ਅਤ੍ਤਨੋ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਅਪਰਿਮਿਤਧਨਪਰਿਚ੍ਚਾਗੇਨ ਮਹਾਦਾਨਂ ਪਵਤ੍ਤੇਸਿ. ਯਂ ਯਂ ਉਪਾਯਨਂ ਆਨੀਯਤਿ, ਯਞ੍ਚ ਅਤ੍ਤਨੋ ਅਤ੍ਥਾਯ ਅਭਿਸਙ੍ਖਰੀਯਤਿ, ਸਬ੍ਬਂ ਤਂ ਦਾਨਸਾਲਾਸੁ ਏਵ ਪੇਸੇਸਿ. ਏਵਂ ਦਿਵਸੇ ਦਿਵਸੇ ਮਹਾਪਰਿਚ੍ਚਾਗਂ ਕਰੋਨ੍ਤਸ੍ਸ ਚਸ੍ਸ ਚਿਤ੍ਤਸ੍ਸ ਤਿਤ੍ਤਿ ਵਾ ਸਨ੍ਤੋਸੋ ਵਾ ਨਾਹੋਸਿ, ਕੁਤੋ ਪਨ ਸਙ੍ਕੋਚੋ. ਦਾਨਗ੍ਗਞ੍ਚਸ੍ਸ ਲਾਭਾਸਾਯ ਆਗਚ੍ਛਨ੍ਤੇਹਿ ਦੇਯ੍ਯਧਮ੍ਮਂ ਗਹੇਤ੍ਵਾ ਗਚ੍ਛਨ੍ਤੇਹਿ ਚ ਮਹਾਸਤ੍ਤਸ੍ਸ ਚ ਗੁਣਵਿਸੇਸੇ ਕਿਤ੍ਤਯਨ੍ਤੇਹਿ ਮਹਾਜਨਕਾਯੇਹਿ ਅਨ੍ਤੋਨਗਰਂ ਬਹਿਨਗਰਞ੍ਚ ਸਮਨ੍ਤਤੋ ਏਕੋਘਭੂਤਂ ਕਪ੍ਪਵੁਟ੍ਠਾਨਮਹਾਵਾਯੁਸਙ੍ਘਟ੍ਟਪਰਿਬ੍ਭਮਿਤਂ ਵਿਯ ਮਹਾਸਮੁਦ੍ਦਂ ਏਕਕੋਲਾਹਲਂ ਏਕਨਿਨ੍ਨਾਦਂ ਅਹੋਸਿ. ਤੇਨ ਵੁਤ੍ਤਂ –

੩੮. ‘‘ਤਦਾਹਂ ਸਤ੍ਤਰਜ੍ਜੇਸੁ, ਯਂ ਮੇ ਆਸਿ ਉਪਾਯਨਂ;

ਤੇਨ ਦੇਮਿ ਮਹਾਦਾਨਂ, ਅਕ੍ਖੋਭਂ ਸਾਗਰੂਪਮ’’ਨ੍ਤਿ.

ਤਤ੍ਥ ਤਦਾਹਨ੍ਤਿ ਯਦਾ ਸਤ੍ਤਰਾਜਪੁਰੋਹਿਤੋ ਮਹਾਗੋਵਿਨ੍ਦਬ੍ਰਾਹ੍ਮਣੋ ਹੋਮਿ, ਤਦਾ ਅਹਂ. ਸਤ੍ਤਰਜ੍ਜੇਸੂਤਿ ਰੇਣੁਆਦੀਨਂ ਸਤ੍ਤਨ੍ਨਂ ਰਾਜੂਨਂ ਰਜ੍ਜੇਸੁ. ਅਕ੍ਖੋਭਨ੍ਤਿ ਅਬ੍ਭਨ੍ਤਰੇਹਿ ਚ ਬਾਹਿਰੇਹਿ ਚ ਪਚ੍ਚਤ੍ਥਿਕੇਹਿ ਅਪ੍ਪਟਿਸੇਧਨੀਯਤਾਯ ਕੇਨਚਿ ਅਕ੍ਖੋਭਨੀਯਂ. ‘‘ਅਚ੍ਚੁਬ੍ਭ’’ਨ੍ਤਿਪਿ ਪਾਠੋ. ਅਤਿਪੁਣ੍ਣਦਾਨਜ੍ਝਾਸਯਸ੍ਸ ਦੇਯ੍ਯਧਮ੍ਮਸ੍ਸ ਚ ਉਲ਼ਾਰਭਾਵੇਨ ਵਿਪੁਲਭਾਵੇਨ ਚ ਅਤਿਵਿਯ ਪਰਿਪੁਣ੍ਣਨ੍ਤਿ ਅਤ੍ਥੋ. ਸਾਗਰੂਪਮਨ੍ਤਿ ਸਾਗਰਸਦਿਸਂ, ਯਥਾ ਸਾਗਰੇ ਉਦਕਂ ਸਕਲੇਨਪਿ ਲੋਕੇਨ ਹਰਨ੍ਤੇਨ ਖੇਪੇਤੁਂ ਨ ਸਕ੍ਕਾ, ਏਵਂ ਤਸ੍ਸ ਦਾਨਗ੍ਗੇ ਦੇਯ੍ਯਧਮ੍ਮਨ੍ਤਿ.

੩੯. ਓਸਾਨਗਾਥਾਯ ਵਰਂ ਧਨਨ੍ਤਿ ਉਤ੍ਤਮਂ ਇਚ੍ਛਿਤਂ ਵਾ ਧਨਂ. ਸੇਸਂ ਵੁਤ੍ਤਨਯਮੇਵ.

ਏਵਂ ਮਹਾਸਤ੍ਤੋ ਪਠਮਕਪ੍ਪਿਕਮਹਾਮੇਘੋ ਵਿਯ ਮਹਾਵਸ੍ਸਂ ਅਵਿਭਾਗੇਨ ਮਹਨ੍ਤਂ ਦਾਨਵਸ੍ਸਂ ਵਸ੍ਸਾਪੇਨ੍ਤੋ ਦਾਨਬ੍ਯਾਵਟੋ ਹੁਤ੍ਵਾਪਿ ਸੇਸਂ ਸਤ੍ਤਨ੍ਨਂ ਰਾਜੂਨਂ ਅਤ੍ਥਧਮ੍ਮੇ ਅਪ੍ਪਮਤ੍ਤੋ ਅਨੁਸਾਸਤਿ. ਸਤ੍ਤ ਚ ਬ੍ਰਾਹ੍ਮਣਮਹਾਸਾਲੇ ਵਿਜ੍ਜਾਸਿਪ੍ਪਂ ਸਿਕ੍ਖਾਪੇਤਿ, ਸਤ੍ਤ ਚ ਨ੍ਹਾਤਕਸਤਾਨਿ ਮਨ੍ਤੇ ਵਾਚੇਤਿ. ਤਸ੍ਸ ਅਪਰੇਨ ਸਮਯੇਨ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ ‘‘ਸਕ੍ਖਿ ਮਹਾਗੋਵਿਨ੍ਦੋ ਬ੍ਰਾਹ੍ਮਣੋ ਬ੍ਰਹ੍ਮਾਨਂ ਪਸ੍ਸਤਿ, ਸਕ੍ਖਿ ਮਹਾਗੋਵਿਨ੍ਦੋ ਬ੍ਰਾਹ੍ਮਣੋ ਬ੍ਰਹ੍ਮੁਨਾ ਸਾਕਚ੍ਛੇਤਿ ਸਲ੍ਲਪਤਿ ਮਨ੍ਤੇਤੀ’’ਤਿ (ਦੀ. ਨਿ. ੨.੩੧੨). ਸੋ ਚਿਨ੍ਤੇਸਿ – ‘‘ਏਤਰਹਿ ਖੋ ਮਯ੍ਹਂ ਅਯਂ ਅਭੂਤੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ ‘ਬ੍ਰਹ੍ਮਾਨਂ ਪਸ੍ਸਤਿ, ਸਕ੍ਖਿ ਮਹਾਗੋਵਿਨ੍ਦੋ ਬ੍ਰਾਹ੍ਮਣੋ ਬ੍ਰਹ੍ਮੁਨਾ ਸਾਕਚ੍ਛੇਤਿ ਸਲ੍ਲਪਤਿ ਮਨ੍ਤੇਤੀ’ਤਿ, ਯਂਨੂਨਾਹਂ ਇਮਂ ਭੂਤਂ ਏਵ ਕਰੇਯ੍ਯ’’ਨ੍ਤਿ. ਸੋ ‘‘ਤੇ ਸਤ੍ਤ ਰਾਜਾਨੋ ਸਤ੍ਤ ਚ ਬ੍ਰਾਹ੍ਮਣਮਹਾਸਾਲੇ ਸਤ੍ਤ ਚ ਨ੍ਹਾਤਕਸਤਾਨਿ ਅਤ੍ਤਨੋ ਪੁਤ੍ਤਦਾਰਞ੍ਚ ਆਪੁਚ੍ਛਿਤ੍ਵਾ ਬ੍ਰਹ੍ਮਾਨਂ ਪਸ੍ਸੇਯ੍ਯ’’ਨ੍ਤਿ ਚਿਤ੍ਤਂ ਪਣਿਧਾਯ ਵਸ੍ਸਿਕੇ ਚਤ੍ਤਾਰੋ ਮਾਸੇ ਬ੍ਰਹ੍ਮਵਿਹਾਰਭਾਵਨਮਨੁਯੁਞ੍ਜਿ. ਤਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਬ੍ਰਹ੍ਮਾ ਸਨਙ੍ਕੁਮਾਰੋ ਪੁਰਤੋ ਪਾਤੁਰਹੋਸਿ. ਤਂ ਦਿਸ੍ਵਾ ਮਹਾਪੁਰਿਸੋ ਪੁਚ੍ਛਿ –

‘‘ਵਣ੍ਣਵਾ ਯਸਵਾ ਸਿਰਿਮਾ, ਕੋ ਨੁ ਤ੍ਵਮਸਿ ਮਾਰਿਸ;

ਅਜਾਨਨ੍ਤਾ ਤਂ ਪੁਚ੍ਛਾਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ. (ਦੀ. ਨਿ. ੨.੩੧੮);

ਤਸ੍ਸ ਬ੍ਰਹ੍ਮਾ ਅਤ੍ਤਾਨਂ ਜਾਨਾਪੇਨ੍ਤੋ –

‘‘ਮਂ ਵੇ ਕੁਮਾਰਂ ਜਾਨਨ੍ਤਿ, ਬ੍ਰਹ੍ਮਲੋਕੇ ਸਨਨ੍ਤਨਂ;

ਸਬ੍ਬੇ ਜਾਨਨ੍ਤਿ ਮਂ ਦੇਵਾ, ਏਵਂ ਗੋਵਿਨ੍ਦ ਜਾਨਾਹੀ’’ਤਿ. (ਦੀ. ਨਿ. ੨.੩੧੮) –

ਵਤ੍ਵਾ ਤੇਨ –

‘‘ਆਸਨਂ ਉਦਕਂ ਪਜ੍ਜਂ, ਮਧੁਸਾਕਞ੍ਚ ਬ੍ਰਹ੍ਮੁਨੋ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵ’’ਨ੍ਤਿ. (ਦੀ. ਨਿ. ੨.੩੧੮) –

ਉਪਨੀਤਂ ਅਤਿਥਿਸਕ੍ਕਾਰਂ ਅਨਤ੍ਥਿਕੋਪਿ ਬ੍ਰਹ੍ਮਾ ਤਸ੍ਸ ਚਿਤ੍ਤਸਮ੍ਪਹਂਸਨਤ੍ਥਂ ਵਿਸ੍ਸਾਸਕਰਣਤ੍ਥਞ੍ਚ ਸਮ੍ਪਟਿਚ੍ਛਨ੍ਤੋ ‘‘ਪਟਿਗ੍ਗਣ੍ਹਾਮ ਤੇ ਅਗ੍ਘਂ, ਯਂ, ਤ੍ਵਂ ਗੋਵਿਨ੍ਦ, ਭਾਸਸੀ’’ਤਿ. ਵਤ੍ਵਾ ਓਕਾਸਦਾਨਤ੍ਥਂ –

‘‘ਦਿਟ੍ਠਧਮ੍ਮਹਿਤਤ੍ਥਾਯ, ਸਮ੍ਪਰਾਯਸੁਖਾਯ ਚ;

ਕਤਾਵਕਾਸੋ ਪੁਚ੍ਛਸ੍ਸੁ, ਯਂਕਿਞ੍ਚਿ ਅਭਿਪਤ੍ਥਿਤ’’ਨ੍ਤਿ. (ਦੀ. ਨਿ. ੨.੩੧੮) –

ਓਕਾਸਮਕਾਸਿ.

ਅਥ ਨਂ ਮਹਾਪੁਰਿਸੋ ਸਮ੍ਪਰਾਯਿਕਂ ਏਵ ਅਤ੍ਥਂ –

‘‘ਪੁਚ੍ਛਾਮਿ ਬ੍ਰਹ੍ਮਾਨਂ ਸਨਙ੍ਕੁਮਾਰਂ, ਕਙ੍ਖੀ ਅਕਙ੍ਖਿਂ ਪਰਵੇਦਿਯੇਸੁ;

ਕਤ੍ਥਟ੍ਠਿਤੋ ਕਿਮ੍ਹਿ ਚ ਸਿਕ੍ਖਮਾਨੋ, ਪਪ੍ਪੋਤਿ ਮਚ੍ਚੋ ਅਮਤਂ ਬ੍ਰਹ੍ਮਲੋਕ’’ਨ੍ਤਿ. (ਦੀ. ਨਿ. ੨.੩੧੯) –

ਪੁਚ੍ਛਿ.

ਤਸ੍ਸ ਬ੍ਰਹ੍ਮਾ ਬ੍ਯਾਕਰੋਨ੍ਤੋ –

‘‘ਹਿਤ੍ਵਾ ਮਮਤ੍ਤਂ ਮਨੁਜੇਸੁ ਬ੍ਰਹ੍ਮੇ, ਏਕੋਦਿਭੂਤੋ ਕਰੁਣੇਧਿਮੁਤ੍ਤੋ;

ਨਿਰਾਮਗਨ੍ਧੋ ਵਿਰਤੋ ਮੇਥੁਨਸ੍ਮਾ, ਏਤ੍ਥਟ੍ਠਿਤੋ ਏਤ੍ਥ ਚ ਸਿਕ੍ਖਮਾਨੋ;

ਪਪ੍ਪੋਤਿ ਮਚ੍ਚੋ ਅਮਤਂ ਬ੍ਰਹ੍ਮਲੋਕ’’ਨ੍ਤਿ. (ਦੀ. ਨਿ. ੨.੩੧੯) –

ਬ੍ਰਹ੍ਮਲੋਕਗਾਮਿਮਗ੍ਗਂ ਕਥੇਸਿ.

ਤਤ੍ਥ ਮਂ ਵੇ ਕੁਮਾਰਂ ਜਾਨਨ੍ਤੀਤਿ ਵੇ ਏਕਂਸੇਨ ਮਂ ‘‘ਕੁਮਾਰੋ’’ਤਿ ਜਾਨਨ੍ਤਿ. ਬ੍ਰਹ੍ਮਲੋਕੇਤਿ ਸੇਟ੍ਠਲੋਕੇ. ਸਨਨ੍ਤਨਨ੍ਤਿ ਚਿਰਤਨਂ ਪੋਰਾਣਂ. ਏਵਂ, ਗੋਵਿਨ੍ਦ, ਜਾਨਾਹੀਤਿ, ਗੋਵਿਨ੍ਦ, ਏਵਂ ਮਂ ਧਾਰੇਹਿ.

ਆਸਨਨ੍ਤਿ ਇਦਂ ਭੋਤੋ ਬ੍ਰਹ੍ਮੁਨੋ ਨਿਸੀਦਨਤ੍ਥਾਯ ਆਸਨਂ ਪਞ੍ਞਤ੍ਤਂ. ਇਦਂ ਉਦਕਂ ਪਰਿਭੋਜਨੀਯਂ ਪਾਦਾਨਂ ਧੋਵਨਤ੍ਥਂ ਪਾਨੀਯਂ ਪਿਪਾਸਹਰਣਤ੍ਥਾਯ. ਇਦਂ ਪਜ੍ਜਂ ਪਰਿਸ੍ਸਮਵਿਨੋਦਨਤ੍ਥਂ ਪਾਦਬ੍ਭਞ੍ਜਨਤੇਲਂ. ਇਦਂ ਮਧੁਸਾਕਂ ਅਤਕ੍ਕਂ ਅਲੋਣਿਕਂ ਅਧੂਪਨਂ ਉਦਕੇਨ ਸੇਦਿਤਂ ਸਾਕਂ ਸਨ੍ਧਾਯ ਵਦਤਿ. ਤਦਾ ਹਿ ਬੋਧਿਸਤ੍ਤਸ੍ਸ ਤਂ ਚਤੁਮਾਸਂ ਬ੍ਰਹ੍ਮਚਰਿਯਂ ਅਭਿਸਲ੍ਲੇਖਵੁਤ੍ਤਿਪਰਮੁਕ੍ਕਟ੍ਠਂ ਅਹੋਸਿ. ਤਸ੍ਸਿਮੇ ਸਬ੍ਬੇ ਅਗ੍ਘੇ ਕਤ੍ਵਾ ਪੁਚ੍ਛਾਮ, ਤਯਿਦਂ ਅਗ੍ਘਂ ਕੁਰੁਤੁ ਪਟਿਗ੍ਗਣ੍ਹਾਤੁ ਨੋ ਭਵਂ ਇਦਂ ਅਗ੍ਘਨ੍ਤਿ ਵੁਤ੍ਤਂ ਹੋਤਿ. ਇਤਿ ਮਹਾਪੁਰਿਸੋ ਬ੍ਰਹ੍ਮੁਨੋ ਨੇਸਂ ਅਪਰਿਭੁਞ੍ਜਨਂ ਜਾਨਨ੍ਤੋਪਿ ਵਤ੍ਤਸੀਸੇ ਠਤ੍ਵਾ ਅਤ੍ਤਨੋ ਆਚਿਣ੍ਣਂ ਅਤਿਥਿਪੂਜਨਂ ਦਸ੍ਸੇਨ੍ਤੋ ਏਵਮਾਹ. ਬ੍ਰਹ੍ਮਾਪਿਸ੍ਸ ਅਧਿਪ੍ਪਾਯਂ ਜਾਨਨ੍ਤੋ ‘‘ਪਟਿਗ੍ਗਣ੍ਹਾਮ ਤੇ ਅਗ੍ਘਂ, ਯਂ ਤ੍ਵਂ, ਗੋਵਿਨ੍ਦ, ਭਾਸਸੀ’’ਤਿ ਆਹ.

ਤਤ੍ਥ ਤਸ੍ਸ ਤੇ ਆਸਨੇ ਮਯਂ ਨਿਸਿਨ੍ਨਾ ਨਾਮ ਹੋਮ, ਪਾਦੋਦਕੇਨ ਪਾਦਾ ਧੋਤਾ ਨਾਮ ਹੋਨ੍ਤੁ, ਪਾਨੀਯਂ ਪੀਤਾ ਨਾਮ ਹੋਮ, ਪਾਦਬ੍ਭਞ੍ਜਨੇਨ ਪਾਦਾ ਮਕ੍ਖਿਤਾ ਨਾਮ ਹੋਨ੍ਤੁ, ਉਦਕਸਾਕਮ੍ਪਿ ਪਰਿਭੁਤ੍ਤਂ ਨਾਮ ਹੋਤੂਤਿ ਅਤ੍ਥੋ.

ਕਙ੍ਖੀ ਅਕਙ੍ਖਿਂ ਪਰਵੇਦਿਯੇਸੂਤਿ ਅਹਂ ਸਵਿਚਿਕਿਚ੍ਛੋ ਪਰੇਨ ਸਯਂ ਅਭਿਸਙ੍ਖਤਤ੍ਤਾ ਪਰਸ੍ਸ ਪਾਕਟੇਸੁ ਪਰਵੇਦਿਯੇਸੁ ਪਞ੍ਹੇਸੁ ਨਿਬ੍ਬਿਚਿਕਿਚ੍ਛਂ.

ਹਿਤ੍ਵਾ ਮਮਤ੍ਤਨ੍ਤਿ ‘‘ਇਦਂ ਮਮ, ਇਦਂ ਮਮਾ’’ਤਿ ਪਵਤ੍ਤਨਕਂ ਉਪਕਰਣਤਣ੍ਹਂ ਚਜਿਤ੍ਵਾ. ਮਨੁਜੇਸੂਤਿ ਸਤ੍ਤੇਸੁ. ਬ੍ਰਹ੍ਮੇਤਿ ਬੋਧਿਸਤ੍ਤਂ ਆਲਪਤਿ. ਏਕੋਦਿਭੂਤੋਤਿ ਏਕੋ ਉਦੇਤਿ ਪਵਤ੍ਤਤੀਤਿ ਏਕੋਦਿਭੂਤੋ ਏਕੀਭੂਤੋ, ਏਕੇਨ ਕਾਯਵਿਵੇਕਂ ਦਸ੍ਸੇਤਿ. ਅਥ ਵਾ ਏਕੋ ਉਦੇਤੀਤਿ ਏਕੋਦਿ, ਸਮਾਧਿ. ਤਂ ਭੂਤੋ ਪਤ੍ਤੋਤਿ ਏਕੋਦਿਭੂਤੋ, ਉਪਚਾਰਪ੍ਪਨਾਸਮਾਧੀਹਿ ਸਮਾਹਿਤੋਤਿ ਅਤ੍ਥੋ. ਏਤਂ ਏਕੋਦਿਭਾਵਂ ਕਰੁਣਾਬ੍ਰਹ੍ਮਵਿਹਾਰਵਸੇਨ ਦਸ੍ਸੇਨ੍ਤੋ ‘‘ਕਰੁਣੇਧਿਮੁਤ੍ਤੋ’’ਤਿ ਆਹ. ਕਰੁਣਜ੍ਝਾਨੇ ਅਧਿਮੁਤ੍ਤੋ, ਤਂ ਝਾਨਂ ਨਿਬ੍ਬਤ੍ਤੇਤ੍ਵਾਤਿ ਅਤ੍ਥੋ. ਨਿਰਾਮਗਨ੍ਧੋਤਿ ਕਿਲੇਸਸਙ੍ਖਾਤਵਿਸ੍ਸਗਨ੍ਧਰਹਿਤੋ. ਏਤ੍ਥਟ੍ਠਿਤੋਤਿ ਏਤੇਸੁ ਧਮ੍ਮੇਸੁ ਠਿਤੋ, ਏਤੇ ਧਮ੍ਮੇ ਸਮ੍ਪਾਦੇਤ੍ਵਾ. ਏਤ੍ਥ ਚ ਸਿਕ੍ਖਮਾਨੋਤਿ ਏਤੇਸੁ ਧਮ੍ਮੇਸੁ ਸਿਕ੍ਖਮਾਨੋ, ਏਤਂ ਬ੍ਰਹ੍ਮਵਿਹਾਰਭਾਵਨਂ ਭਾਵੇਨ੍ਤੋਤਿ ਅਤ੍ਥੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਪਾਲ਼ਿਯਂ (ਦੀ. ਨਿ. ੨.੨੯੩ ਆਦਯੋ) ਆਗਤੋਯੇਵਾਤਿ.

ਅਥ ਮਹਾਪੁਰਿਸੋ ਤਸ੍ਸ ਬ੍ਰਹ੍ਮੁਨੋ ਵਚਨਂ ਸੁਤ੍ਵਾ ਆਮਗਨ੍ਧੇ ਜਿਗੁਚ੍ਛਨ੍ਤੋ ‘‘ਇਦਾਨੇਵਾਹਂ ਪਬ੍ਬਜਿਸ੍ਸਾਮੀ’’ਤਿ ਆਹ. ਬ੍ਰਹ੍ਮਾਪਿ ‘‘ਸਾਧੁ, ਮਹਾਪੁਰਿਸ, ਪਬ੍ਬਜਸ੍ਸੁ. ਏਵਂ ਸਤਿ ਮਯ੍ਹਮ੍ਪਿ ਤਵ ਸਨ੍ਤਿਕੇ ਆਗਮਨਂ ਸ੍ਵਾਗਮਨਮੇਵ ਭਵਿਸ੍ਸਤਿ, ਤ੍ਵਂ, ਤਾਤ, ਸਕਲਜਮ੍ਬੁਦੀਪੇ ਅਗ੍ਗਪੁਰਿਸੋ ਪਠਮਵਯੇ ਠਿਤੋ, ਏਵਂ ਮਹਨ੍ਤਂ ਨਾਮ ਸਮ੍ਪਤ੍ਤਿਂ ਇਸ੍ਸਰਿਯਞ੍ਚ ਪਹਾਯ ਪਬ੍ਬਜਨਂ ਨਾਮ ਗਨ੍ਧਹਤ੍ਥਿਨੋ ਅਯੋਬਨ੍ਧਨਂ ਛਿਨ੍ਦਿਤ੍ਵਾ ਵਨਗਮਨਂ ਵਿਯ ਅਤਿਉਲ਼ਾਰਂ, ਬੁਦ੍ਧਤਨ੍ਤਿ ਨਾਮੇਸਾ’’ਤਿ ਮਹਾਬੋਧਿਸਤ੍ਤਸ੍ਸ ਦਲ਼੍ਹੀਕਮ੍ਮਂ ਕਤ੍ਵਾ ਬ੍ਰਹ੍ਮਲੋਕਮੇਵ ਗਤੋ. ਮਹਾਸਤ੍ਤੋਪਿ ‘‘ਮਮ ਇਤੋ ਨਿਕ੍ਖਮਿਤ੍ਵਾ ਪਬ੍ਬਜਨਂ ਨਾਮ ਨ ਯੁਤ੍ਤਂ, ਅਹਂ ਰਾਜਕੁਲਾਨਂ ਅਤ੍ਥਂ ਅਨੁਸਾਸਾਮਿ, ਤਸ੍ਮਾ ਤੇਸਂ ਆਰੋਚੇਤ੍ਵਾ ਸਚੇ ਤੇਪਿ ਪਬ੍ਬਜਨ੍ਤਿ ਸੁਨ੍ਦਰਮੇਵ, ਨੋ ਚੇ ਪੁਰੋਹਿਤਟ੍ਠਾਨਂ ਨਿਯ੍ਯਾਤੇਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਰੇਣੁਸ੍ਸ ਤਾਵ ਰਞ੍ਞੋ ਆਰੋਚੇਤ੍ਵਾ ਤੇਨ ਭਿਯ੍ਯੋਸੋਮਤ੍ਤਾਯ ਕਾਮੇਹਿ ਨਿਮਨ੍ਤਿਯਮਾਨੋ ਅਤ੍ਤਨੋ ਸਂਵੇਗਹੇਤੁਂ ਏਕਨ੍ਤੇਨ ਪਬ੍ਬਜਿਤੁਕਾਮਤਞ੍ਚਸ੍ਸ ਨਿਵੇਦੇਤ੍ਵਾ ਤੇਨ ‘‘ਯਦਿ ਏਵਂ ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਏਤੇਨੇਵ ਨਯੇਨ ਸਤ੍ਤਭੂਆਦਯੋ ਛ ਖਤ੍ਤਿਯੇ, ਸਤ੍ਤ ਚ ਬ੍ਰਾਹ੍ਮਣਮਹਾਸਾਲੇ, ਸਤ੍ਤ ਚ ਨ੍ਹਾਤਕਸਤਾਨਿ, ਅਤ੍ਤਨੋ ਭਰਿਯਾਯੋ ਚ ਆਪੁਚ੍ਛਿਤ੍ਵਾ ਸਤ੍ਤਾਹਮਤ੍ਤਮੇਵ ਤੇਸਂ ਚਿਤ੍ਤਾਨੁਰਕ੍ਖਣਤ੍ਥਂ ਠਤ੍ਵਾ ਮਹਾਭਿਨਿਕ੍ਖਮਨਸਦਿਸਂ ਨਿਕ੍ਖਮਿਤ੍ਵਾ ਪਬ੍ਬਜਿ.

ਤਸ੍ਸ ਤੇ ਸਤ੍ਤਰਾਜਾਨੋ ਆਦਿਂ ਕਤ੍ਵਾ ਸਬ੍ਬੇਵ ਅਨੁਪਬ੍ਬਜਿਂਸੁ. ਸਾ ਅਹੋਸਿ ਮਹਤੀ ਪਰਿਸਾ. ਅਨੇਕਯੋਜਨਵਿਤ੍ਥਾਰਾਯ ਪਰਿਸਾਯ ਪਰਿਵੁਤੋ ਮਹਾਪੁਰਿਸੋ ਧਮ੍ਮਂ ਦੇਸੇਨ੍ਤੋ ਗਾਮਨਿਗਮਜਨਪਦਰਾਜਧਾਨੀਸੁ ਚਾਰਿਕਂ ਚਰਤਿ, ਮਹਾਜਨਂ ਪੁਞ੍ਞੇ ਪਤਿਟ੍ਠਾਪੇਤਿ. ਗਤਗਤਟ੍ਠਾਨੇ ਬੁਦ੍ਧਕੋਲਾਹਲਂ ਵਿਯ ਹੋਤਿ. ਮਨੁਸ੍ਸਾ ‘‘ਗੋਵਿਨ੍ਦਪਣ੍ਡਿਤੋ ਕਿਰ ਆਗਚ੍ਛਤੀ’’ਤਿ ਸੁਤ੍ਵਾ ਪੁਰੇਤਰਮੇਵ ਮਣ੍ਡਪਂ ਕਾਰੇਤ੍ਵਾ ਤਂ ਅਲਙ੍ਕਾਰਾਪੇਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਮਣ੍ਡਪਂ ਪਵੇਸੇਤ੍ਵਾ ਨਾਨਗ੍ਗਰਸਭੋਜਨੇਨ ਪਤਿਮਾਨੇਨ੍ਤਿ. ਮਹਾਲਾਭਸਕ੍ਕਾਰੋ ਮਹੋਘੋ ਵਿਯ ਅਜ੍ਝੋਤ੍ਥਰਨ੍ਤੋ ਉਪ੍ਪਜ੍ਜਿ. ਮਹਾਪੁਰਿਸੋ ਮਹਾਜਨਂ ਪੁਞ੍ਞੇ ਪਤਿਟ੍ਠਾਪੇਸਿ ਸੀਲਸਮ੍ਪਦਾਯ ਇਨ੍ਦ੍ਰਿਯਸਂਵਰੇ ਭੋਜਨੇ ਮਤ੍ਤਞ੍ਞੁਤਾਯ ਜਾਗਰਿਯਾਨੁਯੋਗੇ ਕਸਿਣਪਰਿਕਮ੍ਮੇ ਝਾਨੇਸੁ ਅਭਿਞ੍ਞਾਸੁ ਅਟ੍ਠਸਮਾਪਤ੍ਤੀਸੁ ਬ੍ਰਹ੍ਮਵਿਹਾਰੇਸੂਤਿ. ਬੁਦ੍ਧੁਪ੍ਪਾਦਕਾਲੋ ਵਿਯ ਅਹੋਸਿ.

ਬੋਧਿਸਤ੍ਤੋ ਯਾਵਤਾਯੁਕਂ ਪਾਰਮਿਯੋ ਪੂਰੇਨ੍ਤੋ ਸਮਾਪਤ੍ਤਿਸੁਖੇਨ ਵੀਤਿਨਾਮੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਤਸ੍ਸ ਤਂ ਬ੍ਰਹ੍ਮਚਰਿਯਂ ਇਦ੍ਧਞ੍ਚੇਵ ਫੀਤਞ੍ਚ ਵਿਤ੍ਥਾਰਿਕਂ ਬਾਹੁਜਞ੍ਞਂ ਪੁਥੁਭੂਤਂ ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਂ ਚਿਰਂ ਦੀਘਮਦ੍ਧਾਨਂ ਪਵਤ੍ਤਿਤ੍ਥ. ਤਸ੍ਸ ਯੇ ਸਾਸਨਂ ਸਬ੍ਬੇਨ ਸਬ੍ਬਂ ਆਜਾਨਿਂਸੁ, ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਬ੍ਰਹ੍ਮਲੋਕਂ ਉਪਪਜ੍ਜਿਂਸੁ. ਯੇ ਨ ਆਜਾਨਿਂਸੁ, ਤੇ ਅਪ੍ਪੇਕਚ੍ਚੇ ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਿਂਸੁ. ਅਪ੍ਪੇਕਚ੍ਚੇ ਨਿਮ੍ਮਾਨਰਤੀਨਂ…ਪੇ… ਤੁਸਿਤਾਨਂ ਯਾਮਾਨਂ ਤਾਵਤਿਂਸਾਨਂ ਚਾਤੁਮਹਾਰਾਜਿਕਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਿਂਸੁ. ਯੇ ਸਬ੍ਬਨਿਹੀਨਾ, ਤੇ ਗਨ੍ਧਬ੍ਬਕਾਯਂ ਪਰਿਪੂਰੇਸੁਂ. ਇਤਿ ਮਹਾਜਨੋ ਯੇਭੁਯ੍ਯੇਨ ਬ੍ਰਹ੍ਮਲੋਕੂਪਗੋ ਸਗ੍ਗੂਪਗੋ ਚ ਅਹੋਸਿ. ਤਸ੍ਮਾ ਦੇਵਬ੍ਰਹ੍ਮਲੋਕਾ ਪਰਿਪੂਰਿਂਸੁ. ਚਤ੍ਤਾਰੋ ਅਪਾਯਾ ਸੁਞ੍ਞਾ ਵਿਯ ਅਹੇਸੁਂ.

ਇਧਾਪਿ ਅਕਿਤ੍ਤਿਜਾਤਕੇ (ਜਾ. ੧.੧੩.੮੩ ਆਦਯੋ) ਵਿਯ ਬੋਧਿਸਮ੍ਭਾਰਨਿਦ੍ਧਾਰਣਾ ਵੇਦਿਤਬ੍ਬਾ – ਤਦਾ ਸਤ੍ਤ ਰਾਜਾਨੋ ਮਹਾਥੇਰਾ ਅਹੇਸੁਂ, ਸੇਸਪਰਿਸਾ ਬੁਦ੍ਧਪਰਿਸਾ, ਮਹਾਗੋਵਿਨ੍ਦੋ ਲੋਕਨਾਥੋ. ਤਥਾ ਰੇਣੁਆਦੀਨਂ ਸਤ੍ਤਨ੍ਨਂ ਰਾਜੂਨਂ ਅਞ੍ਞਮਞ੍ਞਾਵਿਰੋਧੇਨ ਯਥਾ ਸਕਰਜ੍ਜੇ ਪਤਿਟ੍ਠਾਪਨਂ, ਤਥਾ ਮਹਤਿ ਸਤ੍ਤਵਿਧੇ ਰਜ੍ਜੇ ਤੇਸਂ ਅਤ੍ਥਧਮ੍ਮਾਨੁਸਾਸਨੇ ਅਪ੍ਪਮਾਦੋ, ‘‘ਬ੍ਰਹ੍ਮੁਨਾਪਿ ਸਾਕਚ੍ਛਂ ਸਮਾਪਜ੍ਜਤੀ’’ਤਿ ਪਵਤ੍ਤਸਮ੍ਭਾਵਨਂ ਯਥਾਭੂਤਂ ਕਾਤੁਂ ਚਤ੍ਤਾਰੋ ਮਾਸੇ ਪਰਮੁਕ੍ਕਂਸਗਤੋ ਬ੍ਰਹ੍ਮਚਰਿਯਵਾਸੋ. ਤੇਨ ਬ੍ਰਹ੍ਮੁਨੋ ਅਤ੍ਤਨਿ ਸਮਾਪਜ੍ਜਨਂ, ਬ੍ਰਹ੍ਮੁਨੋ ਓਵਾਦੇ ਠਤ੍ਵਾ ਸਤ੍ਤਹਿ ਰਾਜੂਹਿ ਸਕਲੇਨ ਚ ਲੋਕੇਨ ਉਪਨੀਤਂ ਲਾਭਸਕ੍ਕਾਰਂ ਖੇਲ਼ਪਿਣ੍ਡਂ ਵਿਯ ਛਡ੍ਡੇਤ੍ਵਾ ਅਪਰਿਮਾਣਾਯ ਖਤ੍ਤਿਯਬ੍ਰਾਹ੍ਮਣਾਦਿਪਰਿਸਾਯ ਅਨੁਪਬ੍ਬਜ੍ਜਾਨਿਮਿਤ੍ਤਾਯ ਪਬ੍ਬਜ੍ਜਾਯ ਅਨੁਟ੍ਠਾਨਂ, ਬੁਦ੍ਧਾਨਂ ਸਾਸਨਸ੍ਸ ਵਿਯ ਅਤ੍ਤਨੋ ਸਾਸਨਸ੍ਸ ਚਿਰਕਾਲਾਨੁਪ੍ਪਬਨ੍ਧੋਤਿ ਏਵਮਾਦਯੋ ਗੁਣਾਨੁਭਾਵਾ ਵਿਭਾਵੇਤਬ੍ਬਾਤਿ.

ਮਹਾਗੋਵਿਨ੍ਦਚਰਿਯਾਵਣ੍ਣਨਾ ਨਿਟ੍ਠਿਤਾ.