੪. ਮਹਾਸੁਦਸ੍ਸਨਚਰਿਯਾਵਣ੍ਣਨਾ

੨੮. ਚਤੁਤ੍ਥੇ ਕੁਸਾਵਤਿਮ੍ਹਿ ਨਗਰੇਤਿ ਕੁਸਾਵਤੀਨਾਮਕੇ ਨਗਰੇ, ਯਸ੍ਮਿਂ ਠਾਨੇ ਏਤਰਹਿ ਕੁਸਿਨਾਰਾ ਨਿਵਿਟ੍ਠਾ. ਮਹੀਪਤੀਤਿ ਖਤ੍ਤਿਯੋ, ਨਾਮੇਨ ਮਹਾਸੁਦਸ੍ਸਨੋ ਨਾਮ. ਚਕ੍ਕਵਤ੍ਤੀਤਿ ਚਕ੍ਕਰਤਨਂ ਵਤ੍ਤੇਤਿ ਚਤੂਹਿ ਵਾ ਸਮ੍ਪਤ੍ਤਿਚਕ੍ਕੇਹਿ ਵਤ੍ਤਤਿ, ਤੇਹਿ ਚ ਪਰਂ ਪਵਤ੍ਤੇਤਿ, ਪਰਹਿਤਾਯ ਚ ਇਰਿਯਾਪਥਚਕ੍ਕਾਨਂ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿਪਿ ਚਕ੍ਕਵਤ੍ਤੀ. ਅਥ ਵਾ ਚਤੂਹਿ ਅਚ੍ਛਰਿਯਧਮ੍ਮੇਹਿ ਸਙ੍ਗਹਵਤ੍ਥੂਹਿ ਚ ਸਮਨ੍ਨਾਗਤੇਨ, ਪਰੇਹਿ ਅਨਭਿਭਵਨੀਯਸ੍ਸ ਅਨਤਿਕ੍ਕਮਨੀਯਸ੍ਸ ਆਣਾਸਙ੍ਖਾਤਸ੍ਸ ਚਕ੍ਕਸ੍ਸ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿਪਿ ਚਕ੍ਕਵਤ੍ਤੀ. ਪਰਿਣਾਯਕਰਤਨਪੁਬ੍ਬਙ੍ਗਮੇਨ ਹਤ੍ਥਿਰਤਨਾਦਿਪਮੁਖੇਨ ਮਹਾਬਲਕਾਯੇਨ ਪੁਞ੍ਞਾਨੁਭਾਵਨਿਬ੍ਬਤ੍ਤੇਨ ਕਾਯਬਲੇਨ ਚ ਸਮਨ੍ਨਾਗਤਤ੍ਤਾ ਮਹਬ੍ਬਲੋ. ਯਦਾ ਆਸਿਨ੍ਤਿ ਸਮ੍ਬਨ੍ਧੋ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਤੀਤੇ ਕਿਰ ਮਹਾਪੁਰਿਸੋ ਸੁਦਸ੍ਸਨਤ੍ਤਭਾਵਤੋ ਤਤਿਯੇ ਅਤ੍ਤਭਾਵੇ ਗਹਪਤਿਕੁਲੇ ਨਿਬ੍ਬਤ੍ਤੋ ਧਰਮਾਨਕਸ੍ਸ ਬੁਦ੍ਧਸ੍ਸ ਸਾਸਨੇ ਏਕਂ ਥੇਰਂ ਅਰਞ੍ਞਵਾਸਂ ਵਸਨ੍ਤਂ ਅਤ੍ਤਨੋ ਕਮ੍ਮੇਨ ਅਰਞ੍ਞਂ ਪਵਿਟ੍ਠੋ ਰੁਕ੍ਖਮੂਲੇ ਨਿਸਿਨ੍ਨਂ ਦਿਸ੍ਵਾ ‘‘ਇਧ ਮਯਾ ਅਯ੍ਯਸ੍ਸ ਪਣ੍ਣਸਾਲਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਕਮ੍ਮਂ ਪਹਾਯ ਦਬ੍ਬਸਮ੍ਭਾਰਂ ਛਿਨ੍ਦਿਤ੍ਵਾ ਨਿਵਾਸਯੋਗ੍ਗਂ ਪਣ੍ਣਸਾਲਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਕਟ੍ਠਤ੍ਥਰਣਂ ਕਤ੍ਵਾ ‘‘ਕਰਿਸ੍ਸਤਿ ਨੁ ਖੋ ਪਰਿਭੋਗਂ, ਨ ਨੁ ਖੋ ਕਰਿਸ੍ਸਤੀ’’ਤਿ ਏਕਮਨ੍ਤੇ ਨਿਸੀਦਿ. ਥੇਰੋ ਅਨ੍ਤੋਗਾਮਤੋ ਆਗਨ੍ਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਕਟ੍ਠਤ੍ਥਰਣੇ ਨਿਸੀਦਿ. ਮਹਾਸਤ੍ਤੋਪਿ ਨਂ ਉਪਸਙ੍ਕਮਿਤ੍ਵਾ ‘‘ਫਾਸੁਕਾ, ਭਨ੍ਤੇ, ਪਣ੍ਣਸਾਲਾ’’ਤਿ ਪੁਚ੍ਛਿ. ਫਾਸੁਕਾ, ਭਦ੍ਦਮੁਖ, ਪਬ੍ਬਜਿਤਸਾਰੁਪ੍ਪਾਤਿ. ਵਸਿਸ੍ਸਥ, ਭਨ੍ਤੇ, ਇਧਾਤਿ? ਆਮ, ਉਪਾਸਕਾਤਿ. ਸੋ ਅਧਿਵਾਸਨਾਕਾਰੇਨੇਵ ‘‘ਵਸਿਸ੍ਸਤੀ’’ਤਿ ਞਤ੍ਵਾ ‘‘ਨਿਬਦ੍ਧਂ ਮਯ੍ਹਂ ਘਰਦ੍ਵਾਰਂ ਆਗਨ੍ਤਬ੍ਬ’’ਨ੍ਤਿ ਪਟਿਜਾਨਾਪੇਤ੍ਵਾ ਨਿਚ੍ਚਂ ਅਤ੍ਤਨੋ ਘਰੇਯੇਵ ਭਤ੍ਤਵਿਸ੍ਸਗ੍ਗਂ ਕਾਰਾਪੇਸਿ. ਸੋ ਪਣ੍ਣਸਾਲਾਯਂ ਕਟਸਾਰਕਂ ਪਤ੍ਥਰਿਤ੍ਵਾ ਮਞ੍ਚਪੀਠਂ ਪਞ੍ਞਪੇਸਿ, ਅਪਸ੍ਸੇਨਂ ਨਿਕ੍ਖਿਪਿ, ਪਾਦਕਠਲਿਕਂ ਠਪੇਸਿ, ਪੋਕ੍ਖਰਣਿਂ ਖਣਿ, ਚਙ੍ਕਮਂ ਕਤ੍ਵਾ ਵਾਲੁਕਂ ਓਕਿਰਿ, ਪਰਿਸ੍ਸਯਵਿਨੋਦਨਤ੍ਥਂ ਪਣ੍ਣਸਾਲਂ ਕਣ੍ਟਕਵਤਿਯਾ ਪਰਿਕ੍ਖਿਪਿ, ਤਥਾ ਪੋਕ੍ਖਰਣਿਂ ਚਙ੍ਕਮਞ੍ਚ. ਤੇਸਂ ਅਨ੍ਤੋਵਤਿਪਰਿਯਨ੍ਤੇ ਤਾਲਪਨ੍ਤਿਯੋ ਰੋਪੇਸਿ. ਏਵਮਾਦਿਨਾ ਆਵਾਸਂ ਨਿਟ੍ਠਾਪੇਤ੍ਵਾ ਥੇਰਸ੍ਸ ਤਿਚੀਵਰਂ ਆਦਿਂ ਕਤ੍ਵਾ ਸਬ੍ਬਂ ਸਮਣਪਰਿਕ੍ਖਾਰਂ ਅਦਾਸਿ. ਥੇਰਸ੍ਸ ਹਿ ਤਦਾ ਬੋਧਿਸਤ੍ਤੇਨ ਤਿਚੀਵਰਪਿਣ੍ਡਪਾਤਪਤ੍ਤਥਾਲਕਪਰਿਸ੍ਸਾਵਨਧਮਕਰਣਪਰਿਭੋਗਭਾਜਨਛਤ੍ਤੁਪਾਹਨਉਦਕਤੁਮ੍ਬਸੂਚਿਕਤ੍ਤਰ- ਯਟ੍ਠਿਆਰਕਣ੍ਟਕਪਿਪ੍ਫਲਿਨਖਚ੍ਛੇਦਨਪਦੀਪੇਯ੍ਯਾਦਿ ਪਬ੍ਬਜਿਤਾਨਂ ਪਰਿਭੋਗਜਾਤਂ ਅਦਿਨ੍ਨਂ ਨਾਮ ਨਾਹੋਸਿ. ਸੋ ਪਞ੍ਚ ਸੀਲਾਨਿ ਰਕ੍ਖਨ੍ਤੋ ਉਪੋਸਥਂ ਕਰੋਨ੍ਤੋ ਯਾਵਜੀਵਂ ਥੇਰਂ ਉਪਟ੍ਠਹਿ. ਥੇਰੋ ਤਤ੍ਥੇਵ ਵਸਨ੍ਤੋ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਿ.

੨੯. ਬੋਧਿਸਤ੍ਤੋਪਿ ਯਾਵਤਾਯੁਕਂ ਪੁਞ੍ਞਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕਂ ਆਗਚ੍ਛਨ੍ਤੋ ਕੁਸਾਵਤਿਯਾ ਰਾਜਧਾਨਿਯਾ ਨਿਬ੍ਬਤ੍ਤਿਤ੍ਵਾ ਮਹਾਸੁਦਸ੍ਸਨੋ ਨਾਮ ਰਾਜਾ ਅਹੋਸਿ ਚਕ੍ਕਵਤ੍ਤੀ. ਤਸ੍ਸਿਸ੍ਸਰਿਯਾਨੁਭਾਵੋ ‘‘ਭੂਤਪੁਬ੍ਬਂ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਨਾਮ ਅਹੋਸਿ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ’’ਤਿਆਦਿਨਾ (ਦੀ. ਨਿ. ੨.੨੪੨) ਨਯੇਨ ਸੁਤ੍ਤੇ ਆਗਤੋ ਏਵ. ਤਸ੍ਸ ਕਿਰ ਚਤੁਰਾਸੀਤਿ ਨਗਰਸਹਸ੍ਸਾਨਿ ਕੁਸਾਵਤੀਰਾਜਧਾਨਿਪ੍ਪਮੁਖਾਨਿ, ਚਤੁਰਾਸੀਤਿ ਪਾਸਾਦਸਹਸ੍ਸਾਨਿ ਧਮ੍ਮਪਾਸਾਦਪ੍ਪਮੁਖਾਨਿ, ਚਤੁਰਾਸੀਤਿ ਕੂਟਾਗਾਰਸਹਸ੍ਸਾਨਿ ਮਹਾਬ੍ਯੂਹਕੂਟਾਗਾਰਪ੍ਪਮੁਖਾਨਿ, ਤਾਨਿ ਸਬ੍ਬਾਨਿ ਤਸ੍ਸ ਥੇਰਸ੍ਸ ਕਤਾਯ ਏਕਿਸ੍ਸਾ ਪਣ੍ਣਸਾਲਾਯ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ, ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਨਾਗਸਹਸ੍ਸਾਨਿ ਅਸ੍ਸਸਹਸ੍ਸਾਨਿ ਰਥਸਹਸ੍ਸਾਨਿ ਤਸ੍ਸ ਦਿਨ੍ਨਸ੍ਸ ਮਞ੍ਚਪੀਠਸ੍ਸ, ਚਤੁਰਾਸੀਤਿ ਮਣਿਸਹਸ੍ਸਾਨਿ ਤਸ੍ਸ ਦਿਨ੍ਨਸ੍ਸ ਪਦੀਪਸ੍ਸ, ਚਤੁਰਾਸੀਤਿ ਪੋਕ੍ਖਰਣਿਸਹਸ੍ਸਾਨਿ ਏਕਪੋਕ੍ਖਰਣਿਯਾ, ਚਤੁਰਾਸੀਤਿ ਇਤ੍ਥਿਸਹਸ੍ਸਾਨਿ ਪੁਤ੍ਤਸਹਸ੍ਸਾਨਿ ਗਹਪਤਿਸਹਸ੍ਸਾਨਿ ਚ ਪਤ੍ਤਥਾਲਕਾਦਿਪਰਿਭੋਗਾਰਹਸ੍ਸ ਪਬ੍ਬਜਿਤਪਰਿਕ੍ਖਾਰਦਾਨਸ੍ਸ, ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਪਞ੍ਚਗੋਰਸਦਾਨਸ੍ਸ, ਚਤੁਰਾਸੀਤਿ ਵਤ੍ਥਕੋਟ੍ਠਸਹਸ੍ਸਾਨਿ ਨਿਵਾਸਨਪਾਰੁਪਨਦਾਨਸ੍ਸ, ਚਤੁਰਾਸੀਤਿ ਥਾਲਿਪਾਕਸਹਸ੍ਸਾਨਿ ਭੋਜਨਦਾਨਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਾਨਿ. ਸੋ ਸਤ੍ਤਹਿ ਰਤਨੇਹਿ ਚਤੂਹਿ ਇਦ੍ਧੀਹਿ ਚ ਸਮਨ੍ਨਾਗਤੋ ਰਾਜਾਧਿਰਾਜਾ ਹੁਤ੍ਵਾ ਸਕਲਂ ਸਾਗਰਪਰਿਯਨ੍ਤਂ ਪਥਵਿਮਣ੍ਡਲਂ ਧਮ੍ਮੇਨ ਅਭਿਵਿਜਿਯ ਅਜ੍ਝਾਵਸਨ੍ਤੋ ਅਨੇਕਸਤੇਸੁ ਠਾਨੇਸੁ ਦਾਨਸਾਲਾਯੋ ਕਾਰੇਤ੍ਵਾ ਮਹਾਦਾਨਂ ਪਟ੍ਠਪੇਸਿ. ਦਿਵਸਸ੍ਸ ਤਿਕ੍ਖਤ੍ਤੁਂ ਨਗਰੇ ਭੇਰਿਂ ਚਰਾਪੇਸਿ ‘‘ਯੋ ਯਂ ਇਚ੍ਛਤਿ, ਸੋ ਦਾਨਸਾਲਾਸੁ ਆਗਨ੍ਤ੍ਵਾ ਤਂ ਗਣ੍ਹਾਤੂ’’ਤਿ. ਤੇਨ ਵੁਤ੍ਤਂ ‘‘ਤਤ੍ਥਾਹਂ ਦਿਵਸੇ ਤਿਕ੍ਖਤ੍ਤੁਂ, ਘੋਸਾਪੇਮਿ ਤਹਿਂ ਤਹਿ’’ਨ੍ਤਿਆਦਿ.

ਤਤ੍ਥ ਤਤ੍ਥਾਤਿ ਤਸ੍ਮਿਂ ਨਗਰੇ. ‘‘ਤਦਾਹ’’ਨ੍ਤਿਪਿ ਪਾਠੋ, ਤਸ੍ਸ ਤਦਾ ਅਹਂ, ਮਹਾਸੁਦਸ੍ਸਨਕਾਲੇਤਿ ਅਤ੍ਥੋ. ਤਹਿਂ ਤਹਿਨ੍ਤਿ ਤਸ੍ਮਿਂ ਤਸ੍ਮਿਂ ਠਾਨੇ, ਤਸ੍ਸ ਤਸ੍ਸ ਪਾਕਾਰਸ੍ਸ ਅਨ੍ਤੋ ਚ ਬਹਿ ਚਾਤਿ ਅਤ੍ਥੋ. ਕੋ ਕਿਂ ਇਚ੍ਛਤੀਤਿ ਬ੍ਰਾਹ੍ਮਣਾਦੀਸੁ ਯੋ ਕੋਚਿ ਸਤ੍ਤੋ ਅਨ੍ਨਾਦੀਸੁ ਦੇਯ੍ਯਧਮ੍ਮੇਸੁ ਯਂ ਕਿਞ੍ਚਿ ਇਚ੍ਛਤਿ. ਪਤ੍ਥੇਤੀਤਿ ਤਸ੍ਸੇਵ ਵੇਵਚਨਂ. ਕਸ੍ਸ ਕਿਂ ਦੀਯਤੁ ਧਨਨ੍ਤਿ ਅਨੇਕਵਾਰਂ ਪਰਿਯਾਯਨ੍ਤਰੇਹਿ ਚ ਦਾਨਘੋਸਨਾਯ ਪਵਤ੍ਤਿਤਭਾਵਦਸ੍ਸਨਤ੍ਥਂ ਵੁਤ੍ਤਂ, ਏਤੇਨ ਦਾਨਪਾਰਮਿਯਾ ਸਰੂਪਂ ਦਸ੍ਸੇਤਿ. ਦੇਯ੍ਯਧਮ੍ਮਪਟਿਗ੍ਗਾਹਕਵਿਕਪ੍ਪਰਹਿਤਾ ਹਿ ਬੋਧਿਸਤ੍ਤਾਨਂ ਦਾਨਪਾਰਮੀਤਿ.

੩੦. ਇਦਾਨਿ ਦਾਨਘੋਸਨਾਯ ਤਸ੍ਸ ਤਸ੍ਸ ਦੇਯ੍ਯਧਮ੍ਮਸ੍ਸ ਅਨੁਚ੍ਛਵਿਕਪੁਗ੍ਗਲਪਰਿਕਿਤ੍ਤਨਂ ਦਸ੍ਸੇਤੁਂ ‘‘ਕੋ ਛਾਤਕੋ’’ਤਿਆਦਿ ਵੁਤ੍ਤਂ.

ਤਤ੍ਥ ਛਾਤਕੋਤਿ ਜਿਘਚ੍ਛਿਤੋ. ਤਸਿਤੋਤਿ ਪਿਪਾਸਿਤੋ. ਕੋ ਮਾਲਂ ਕੋ ਵਿਲੇਪਨਨ੍ਤਿਪਿ ‘‘ਇਚ੍ਛਤੀ’’ਤਿ ਪਦਂ ਆਨੇਤ੍ਵਾ ਯੋਜੇਤਬ੍ਬਂ. ਨਗ੍ਗੋਤਿ ਵਤ੍ਥਵਿਕਲੋ, ਵਤ੍ਥੇਨ ਅਤ੍ਥਿਕੋਤਿ ਅਧਿਪ੍ਪਾਯੋ. ਪਰਿਦਹਿਸ੍ਸਤੀਤਿ ਨਿਵਾਸਿਸ੍ਸਤਿ.

੩੧. ਕੋ ਪਥੇ ਛਤ੍ਤਮਾਦੇਤੀਤਿ ਕੋ ਪਥਿਕੋ ਪਥੇ ਮਗ੍ਗੇ ਅਤ੍ਤਨੋ ਵਸ੍ਸਵਾਤਾਤਪਰਕ੍ਖਣਤ੍ਥਂ ਛਤ੍ਤਂ ਗਣ੍ਹਾਤਿ, ਛਤ੍ਤੇਨ ਅਤ੍ਥਿਕੋਤਿ ਅਤ੍ਥੋ. ਕੋਪਾਹਨਾ ਮੁਦੂ ਸੁਭਾਤਿ ਦਸ੍ਸਨੀਯਤਾਯ ਸੁਭਾ ਸੁਖਸਮ੍ਫਸ੍ਸਤਾਯ ਮੁਦੂ ਉਪਾਹਨਾ ਅਤ੍ਤਨੋ ਪਾਦਾਨਂ ਚਕ੍ਖੂਨਞ੍ਚ ਰਕ੍ਖਣਤ੍ਥਂ. ਕੋ ਆਦੇਤੀਤਿ ਕੋ ਤਾਹਿ ਅਤ੍ਥਿਕੋਤਿ ਅਧਿਪ੍ਪਾਯੋ. ਸਾਯਞ੍ਚ ਪਾਤੋ ਚਾਤਿ ਏਤ੍ਥ ਚ-ਸਦ੍ਦੇਨ ਮਜ੍ਝਨ੍ਹਿਕੇ ਚਾਤਿ ਆਹਰਿਤ੍ਵਾ ਵਤ੍ਤਬ੍ਬਂ. ‘‘ਦਿਵਸੇ ਤਿਕ੍ਖਤ੍ਤੁਂ ਘੋਸਾਪੇਮੀ’’ਤਿ ਹਿ ਵੁਤ੍ਤਂ.

੩੨. ਨ ਤਂ ਦਸਸੁ ਠਾਨੇਸੂਤਿ ਤਂ ਦਾਨਂ ਨ ਦਸਸੁ ਠਾਨੇਸੁ ਪਟਿਯਤ੍ਤਨ੍ਤਿ ਯੋਜਨਾ. ਨਪਿ ਠਾਨਸਤੇਸੁ ਵਾ ਪਟਿਯਤ੍ਤਂ, ਅਪਿ ਚ ਖੋ ਅਨੇਕਸਤੇਸੁ ਠਾਨੇਸੁ ਪਟਿਯਤ੍ਤਂ. ਯਾਚਕੇ ਧਨਨ੍ਤਿ ਯਾਚਕੇ ਉਦ੍ਦਿਸ੍ਸ ਧਨਂ ਪਟਿਯਤ੍ਤਂ ਉਪਕ੍ਖਟਂ. ਦ੍ਵਾਦਸਯੋਜਨਾਯਾਮੇ ਹਿ ਨਗਰੇ ਸਤ੍ਤਯੋਜਨਵਿਤ੍ਥਤੇ ਸਤ੍ਤਸੁ ਪਾਕਾਰਨ੍ਤਰੇਸੁ ਸਤ੍ਤ ਤਾਲਪਨ੍ਤਿਪਰਿਕ੍ਖੇਪਾ, ਤਾਸੁ ਤਾਲਪਨ੍ਤੀਸੁ ਚਤੁਰਾਸੀਤਿ ਪੋਕ੍ਖਰਣਿਸਹਸ੍ਸਾਨਿ ਪਾਟਿਯੇਕ੍ਕਂ ਪੋਕ੍ਖਰਣਿਤੀਰੇ ਮਹਾਦਾਨਂ ਪਟ੍ਠਪਿਤਂ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਪਟ੍ਠਪੇਸਿ ਖੋ, ਆਨਨ੍ਦ, ਰਾਜਾ ਮਹਾਸੁਦਸ੍ਸਨੋ ਤਾਸਂ ਪੋਕ੍ਖਰਣੀਨਂ ਤੀਰੇ ਏਵਰੂਪਂ ਦਾਨਂ ਅਨ੍ਨਂ ਅਨ੍ਨਤ੍ਥਿਕਸ੍ਸ, ਪਾਨਂ ਪਾਨਤ੍ਥਿਕਸ੍ਸ, ਵਤ੍ਥਂ ਵਤ੍ਥਤ੍ਥਿਕਸ੍ਸ, ਯਾਨਂ ਯਾਨਤ੍ਥਿਕਸ੍ਸ, ਸਯਨਂ ਸਯਨਤ੍ਥਿਕਸ੍ਸ, ਇਤ੍ਥਿਂ ਇਤ੍ਥਿਤ੍ਥਿਕਸ੍ਸ, ਹਿਰਞ੍ਞਂ ਹਿਰਞ੍ਞਤ੍ਥਿਕਸ੍ਸ, ਸੁਵਣ੍ਣਂ ਸੁਵਣ੍ਣਤ੍ਥਿਕਸ੍ਸਾ’’ਤਿ (ਦੀ. ਨਿ. ੨.੨੫੪).

੩੩. ਤਤ੍ਥਾਯਂ ਦਾਨਸ੍ਸ ਪਵਤ੍ਤਿਤਾਕਾਰੋ – ਮਹਾਪੁਰਿਸੋ ਹਿ ਇਤ੍ਥੀਨਞ੍ਚ ਪੁਰਿਸਾਨਞ੍ਚ ਅਨੁਚ੍ਛਵਿਕੇ ਅਲਙ੍ਕਾਰੇ ਕਾਰੇਤ੍ਵਾ ਇਤ੍ਥਿਮਤ੍ਤਮੇਵ ਤਤ੍ਥ ਪਰਿਚਾਰਵਸੇਨ ਸੇਸਞ੍ਚ ਸਬ੍ਬਂ ਪਰਿਚ੍ਚਾਗਵਸੇਨ ਠਪੇਤ੍ਵਾ ‘‘ਰਾਜਾ ਮਹਾਸੁਦਸ੍ਸਨੋ ਦਾਨਂ ਦੇਤਿ, ਤਂ ਯਥਾਸੁਖਂ ਪਰਿਭੁਞ੍ਜਥਾ’’ਤਿ ਭੇਰਿਂ ਚਰਾਪੇਸਿ. ਮਹਾਜਨਾ ਪੋਕ੍ਖਰਣਿਤੀਰਂ ਗਨ੍ਤ੍ਵਾ ਨ੍ਹਤ੍ਵਾ ਵਤ੍ਥਾਦੀਨਿ ਨਿਵਾਸੇਤ੍ਵਾ ਮਹਾਸਮ੍ਪਤ੍ਤਿਂ ਅਨੁਭਵਿਤ੍ਵਾ ਯੇਸਂ ਤਾਦਿਸਾਨਿ ਅਤ੍ਥਿ, ਤੇ ਪਹਾਯ ਗਚ੍ਛਨ੍ਤਿ. ਯੇਸਂ ਨਤ੍ਥਿ, ਤੇ ਗਹੇਤ੍ਵਾ ਗਚ੍ਛਨ੍ਤਿ. ਯੇ ਹਤ੍ਥਿਯਾਨਾਦੀਸੁਪਿ ਨਿਸੀਦਿਤ੍ਵਾ ਯਥਾਸੁਖਂ ਵਿਚਰਿਤ੍ਵਾ ਵਰਸਯਨੇਸੁਪਿ ਸਯਿਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਤ੍ਥੀਹਿਪਿ ਸਦ੍ਧਿਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਸਤ੍ਤਵਿਧਰਤਨਪਸਾਧਨਾਨਿ ਪਸਾਧੇਤ੍ਵਾ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਯਂ ਯਂ ਅਤ੍ਥਿਕਾ, ਤਂ ਤਂ ਗਹੇਤ੍ਵਾ ਗਚ੍ਛਨ੍ਤਿ, ਅਨਤ੍ਥਿਕਾ ਓਹਾਯ ਗਚ੍ਛਨ੍ਤਿ. ਤਮ੍ਪਿ ਦਾਨਂ ਉਟ੍ਠਾਯ ਸਮੁਟ੍ਠਾਯ ਦੇਵਸਿਕਂ ਦੀਯਤੇਵ. ਤਦਾ ਜਮ੍ਬੁਦੀਪਵਾਸੀਨਂ ਅਞ੍ਞਂ ਕਮ੍ਮਂ ਨਤ੍ਥਿ, ਦਾਨਂ ਪਰਿਭੁਞ੍ਜਨ੍ਤਾ ਸਮ੍ਪਤ੍ਤਿਂ ਅਨੁਭਵਨ੍ਤਾ ਵਿਚਰਨ੍ਤਿ. ਨ ਤਸ੍ਸ ਦਾਨਸ੍ਸ ਕਾਲਪਰਿਚ੍ਛੇਦੋ ਅਹੋਸਿ. ਰਤ੍ਤਿਞ੍ਚਾਪਿ ਦਿਵਾਪਿ ਯਦਾ ਯਦਾ ਅਤ੍ਥਿਕਾ ਆਗਚ੍ਛਨ੍ਤਿ, ਤਦਾ ਤਦਾ ਦੀਯਤੇਵ. ਏਵਂ ਮਹਾਪੁਰਿਸੋ ਯਾਵਜੀਵਂ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਮਹਾਦਾਨਂ ਪਵਤ੍ਤੇਸਿ. ਤੇਨ ਵੁਤ੍ਤਂ ‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਯਦਿ ਏਤਿ ਵਨਿਬ੍ਬਕੋ’’ਤਿਆਦਿ.

ਤਤ੍ਥ ਦਿਵਾ ਵਾ ਯਦਿ ਵਾ ਰਤ੍ਤਿਂ, ਯਦਿ ਏਤੀਤਿ ਏਤੇਨਸ੍ਸ ਯਥਾਕਾਲਂ ਦਾਨਂ ਦਸ੍ਸੇਤਿ. ਯਾਚਕਾਨਞ੍ਹਿ ਲਾਭਾਸਾਯ ਉਪਸਙ੍ਕਮਨਕਾਲੋ ਏਵ ਬੋਧਿਸਤ੍ਤਾਨਂ ਦਾਨਸ੍ਸ ਕਾਲੋ ਨਾਮ. ਵਨਿਬ੍ਬਕੋਤਿ ਯਾਚਕੋ. ਲਦ੍ਧਾ ਯਦਿਚ੍ਛਕਂ ਭੋਗਨ੍ਤਿ ਏਤੇਨ ਯਥਾਭਿਰੁਚਿਤਂ ਦਾਨਂ. ਯੋ ਯੋ ਹਿ ਯਾਚਕੋ ਯਂ ਯਂ ਦੇਯ੍ਯਧਮ੍ਮਂ ਇਚ੍ਛਤਿ, ਤਸ੍ਸ ਤਸ੍ਸ ਤਂਤਦੇਵ ਬੋਧਿਸਤ੍ਤੋ ਦੇਤਿ. ਨ ਤਸ੍ਸ ਮਹਗ੍ਘਦੁਲ੍ਲਭਾਦਿਭਾਵਂ ਅਤ੍ਤਨੋ ਉਪਰੋਧਂ ਚਿਨ੍ਤੇਸਿ. ਪੂਰਹਤ੍ਥੋਵ ਗਚ੍ਛਤੀਤਿ ਏਤੇਨ ਯਾਵਦਿਚ੍ਛਕਂ ਦਾਨਂ ਦਸ੍ਸੇਤਿ, ਯਤ੍ਤਕਞ੍ਹਿ ਯਾਚਕਾ ਇਚ੍ਛਨ੍ਤਿ, ਤਤ੍ਤਕਂ ਅਪਰਿਹਾਪੇਤ੍ਵਾਵ ਮਹਾਸਤ੍ਤੋ ਦੇਤਿ ਉਲ਼ਾਰਜ੍ਝਾਸਯਤਾਯ ਚ ਮਹਿਦ੍ਧਿਕਤਾਯ ਚ.

੩੪. ‘‘ਯਾਵਜੀਵਿਕ’’ਨ੍ਤਿ ਏਤੇਨ ਦਾਨਸ੍ਸ ਕਾਲਪਰਿਯਨ੍ਤਾਭਾਵਂ ਦਸ੍ਸੇਤਿ. ਸਮਾਦਾਨਤੋ ਪਟ੍ਠਾਯ ਹਿ ਮਹਾਸਤ੍ਤਾ ਯਾਵਪਾਰਿਪੂਰਿ ਵੇਮਜ੍ਝੇ ਨ ਕਾਲਪਰਿਚ੍ਛੇਦਂ ਕਰੋਨ੍ਤਿ, ਬੋਧਿਸਮ੍ਭਾਰਸਮ੍ਭਰਣੇ ਸਙ੍ਕੋਚਾਭਾਵੇਨ ਅਨ੍ਤਰਨ੍ਤਰਾ ਅਵੋਸਾਨਾਪਤ੍ਤਿਤੋ ਮਰਣੇਨਪਿ ਅਨੁਪਚ੍ਛੇਦੋ ਏਵ, ਤਤੋ ਪਰਮ੍ਪਿ ਤਥੇਵ ਪਟਿਪਜ੍ਜਨਤੋ, ‘‘ਯਾਵਜੀਵਿਕ’’ਨ੍ਤਿ ਪਨ ਮਹਾਸੁਦਸ੍ਸਨਚਰਿਤਸ੍ਸ ਵਸੇਨ ਵੁਤ੍ਤਂ. ਨਪਾਹਂ ਦੇਸ੍ਸਂ ਧਨਂ ਦਮ੍ਮੀਤਿ ਇਦਂ ਧਨਂ ਨਾਮ ਮਯ੍ਹਂ ਨ ਦੇਸ੍ਸਂ ਅਮਨਾਪਨ੍ਤਿ ਏਵਰੂਪਂ ਮਹਾਦਾਨਂ ਦੇਨ੍ਤੋ ਗੇਹਤੋ ਚ ਧਨਂ ਨੀਹਰਾਪੇਮਿ. ਨਪਿ ਨਤ੍ਥਿ ਨਿਚਯੋ ਮਯੀਤਿ ਮਮ ਸਮੀਪੇ ਧਨਨਿਚਯੋ ਧਨਸਙ੍ਗਹੋ ਨਾਪਿ ਨਤ੍ਥਿ, ਸਲ੍ਲੇਖਵੁਤ੍ਤਿਸਮਣੋ ਵਿਯ ਅਸਙ੍ਗਹੋਪਿ ਨ ਹੋਮੀਤਿ ਅਤ੍ਥੋ. ਇਦਂ ਯੇਨ ਅਜ੍ਝਾਸਯੇਨ ਤਸ੍ਸਿਦਂ ਮਹਾਦਾਨਂ ਪਵਤ੍ਤਿਤਂ, ਤਂ ਦਸ੍ਸੇਤੁਂ ਵੁਤ੍ਤਂ.

੩੫. ਇਦਾਨਿ ਤਂ ਉਪਮਾਯ ਵਿਭਾਵੇਤੁਂ ‘‘ਯਥਾਪਿ ਆਤੁਰੋ ਨਾਮਾ’’ਤਿਆਦਿਮਾਹ. ਤਤ੍ਥਿਦਂ ਉਪਮਾਸਂਸਨ੍ਦਨੇਨ ਸਦ੍ਧਿਂ ਅਤ੍ਥਦਸ੍ਸਨਂ – ਯਥਾ ਨਾਮ ਆਤੁਰੋ ਰੋਗਾਭਿਭੂਤੋ ਪੁਰਿਸੋ ਰੋਗਤੋ ਅਤ੍ਤਾਨਂ ਪਰਿਮੋਚੇਤੁਕਾਮੋ ਧਨੇਨ ਹਿਰਞ੍ਞਸੁਵਣ੍ਣਾਦਿਨਾ ਵੇਜ੍ਜਂ ਤਿਕਿਚ੍ਛਕਂ ਤਪ੍ਪੇਤ੍ਵਾ ਆਰਾਧੇਤ੍ਵਾ ਯਥਾਵਿਧਿ ਪਟਿਪਜ੍ਜਨ੍ਤੋ ਤਤੋ ਰੋਗਤੋ ਵਿਮੁਚ੍ਚਤਿ.

੩੬. ਤਥੇਵ ਏਵਮੇਵ ਅਹਮ੍ਪਿ ਅਟ੍ਟਭੂਤਂ ਸਕਲਲੋਕਂ ਕਿਲੇਸਰੋਗਤੋ ਸਕਲਸਂਸਾਰਦੁਕ੍ਖਰੋਗਤੋ ਚ ਪਰਿਮੋਚੇਤੁਕਾਮੋ ਤਸ੍ਸ ਤਤੋ ਪਰਿਮੋਚਨਸ੍ਸ ਅਯਂ ਸਬ੍ਬਸਾਪਤੇਯ੍ਯਪਰਿਚ੍ਚਾਗੋ ਦਾਨਪਾਰਮਿਉਪਾਯੋਤਿ ਜਾਨਮਾਨੋ ਬੁਜ੍ਝਮਾਨੋ ਅਸੇਸਤੋ ਦੇਯ੍ਯਧਮ੍ਮਸ੍ਸ ਪਟਿਗ੍ਗਾਹਕਾਨਞ੍ਚ ਵਸੇਨ ਅਨਵਸੇਸਤੋ ਮਹਾਦਾਨਸ੍ਸ ਵਸੇਨ ਸਤ੍ਤਾਨਂ ਅਜ੍ਝਾਸਯਂ ਪਰਿਪੂਰੇਤੁਂ ਅਤ੍ਤਨੋ ਚ ਨ ਮਯ੍ਹਂ ਦਾਨਪਾਰਮੀ ਪਰਿਪੁਣ੍ਣਾ, ਤਸ੍ਮਾ ਊਨਮਨਨ੍ਤਿ ਪਵਤ੍ਤਂ ਊਨਂ ਮਨਂ ਪੂਰਯਿਤੁਂ ਪਵਤ੍ਤਯਿਤੁਂ ਵਨਿਬ੍ਬਕੇ ਯਾਚਕੇ ਅਦਾਸਿਂ ਤਂ ਦਾਨਂ ਏਵਰੂਪਂ ਮਹਾਦਾਨਂ ਦਦਾਮਿ, ਤਞ੍ਚ ਖੋ ਤਸ੍ਮਿਂ ਦਾਨਧਮ੍ਮੇ ਤਸ੍ਸ ਚ ਫਲੇ ਨਿਰਾਲਯੋ ਅਨਪੇਕ੍ਖੋ ਅਪਚ੍ਚਾਸੋ ਕਿਞ੍ਚਿਪਿ ਅਪਚ੍ਚਾਸੀਸਮਾਨੋ ਕੇਵਲਂ ਸਮ੍ਬੋਧਿਮਨੁਪਤ੍ਤਿਯਾ ਸਬ੍ਬਞ੍ਞੁਤਞ੍ਞਾਣਮੇਵ ਅਧਿਗਨ੍ਤੁਂ ਦੇਮੀਤਿ.

ਏਵਂ ਮਹਾਸਤ੍ਤੋ ਮਹਾਦਾਨਂ ਪਵਤ੍ਤੇਨ੍ਤੋ ਅਤ੍ਤਨੋ ਪੁਞ੍ਞਾਨੁਭਾਵਨਿਬ੍ਬਤ੍ਤਂ ਧਮ੍ਮਪਾਸਾਦਂ ਅਭਿਰੁਯ੍ਹ ਮਹਾਬ੍ਯੂਹਕੂਟਾਗਾਰਦ੍ਵਾਰੇ ਏਵ ਕਾਮਵਿਤਕ੍ਕਾਦਯੋ ਨਿਵਤ੍ਤੇਤ੍ਵਾ ਤਤ੍ਥ ਸੋਵਣ੍ਣਮਯੇ ਰਾਜਪਲ੍ਲਙ੍ਕੇ ਨਿਸਿਨ੍ਨੋ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਸੋਵਣ੍ਣਮਯਂ ਕੂਟਾਗਾਰਂ ਪਵਿਸਿਤ੍ਵਾ ਤਤ੍ਥ ਰਜਤਮਯੇ ਪਲ੍ਲਙ੍ਕੇ ਨਿਸਿਨ੍ਨੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਝਾਨਸਮਾਪਤ੍ਤੀਹਿ ਵੀਤਿਨਾਮੇਤ੍ਵਾ ਮਰਣਸਮਯੇ ਦਸ੍ਸਨਾਯ ਉਪਗਤਾਨਂ ਸੁਭਦ੍ਦਾਦੇਵੀਪਮੁਖਾਨਂ ਚਤੁਰਾਸੀਤਿਯਾ ਇਤ੍ਥਾਗਾਰਸਹਸ੍ਸਾਨਂ ਅਮਚ੍ਚਪਾਰਿਸਜ੍ਜਾਦੀਨਞ੍ਚ –

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ. (ਦੀ. ਨਿ. ੨.੨੨੧, ੨੭੨; ਸਂ. ਨਿ. ੧.੧੮੬; ੨.੧੪੩) –

ਇਮਾਯ ਗਾਥਾਯ ਓਵਦਿਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕਪਰਾਯਨੋ ਅਹੋਸਿ.

ਤਦਾ ਸੁਭਦ੍ਦਾਦੇਵੀ ਰਾਹੁਲਮਾਤਾ ਅਹੋਸਿ, ਪਰਿਣਾਯਕਰਤਨਂ ਰਾਹੁਲੋ, ਸੇਸਪਰਿਸਾ ਬੁਦ੍ਧਪਰਿਸਾ, ਮਹਾਸੁਦਸ੍ਸਨੋ ਪਨ ਲੋਕਨਾਥੋ.

ਇਧਾਪਿ ਦਸ ਪਾਰਮਿਯੋ ਸਰੂਪਤੋ ਲਬ੍ਭਨ੍ਤਿ ਏਵ, ਦਾਨਜ੍ਝਾਸਯਸ੍ਸ ਪਨ ਉਲ਼ਾਰਤਾਯ ਦਾਨਪਾਰਮੀ ਏਵ ਪਾਲ਼ਿਯਂ ਆਗਤਾ. ਸੇਸਧਮ੍ਮਾ ਹੇਟ੍ਠਾ ਵੁਤ੍ਤਨਯਾ ਏਵ. ਤਥਾ ਉਲ਼ਾਰੇ ਸਤ੍ਤਰਤਨਸਮੁਜ੍ਜਲੇ ਚਤੁਦੀਪਿਸ੍ਸਰਿਯੇਪਿ ਠਿਤਸ੍ਸ ਤਾਦਿਸਂ ਭੋਗਸੁਖਂ ਅਨਲਙ੍ਕਰਿਤ੍ਵਾ ਕਾਮਵਿਤਕ੍ਕਾਦਯੋ ਦੂਰਤੋ ਵਿਕ੍ਖਮ੍ਭੇਤ੍ਵਾ ਤਥਾਰੂਪੇ ਮਹਾਦਾਨੇ ਪਵਤ੍ਤੇਨ੍ਤਸ੍ਸੇਵ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਸਮਾਪਤ੍ਤੀਹਿ ਵੀਤਿਨਾਮੇਤ੍ਵਾ ਅਨਿਚ੍ਚਤਾਦਿਪਟਿਸਂਯੁਤ੍ਤਂ ਧਮ੍ਮਕਥਂ ਕਤ੍ਵਾਪਿ ਵਿਪਸ੍ਸਨਾਯ ਅਨੁਸ੍ਸੁਕ੍ਕਨਂ ਸਬ੍ਬਤ੍ਥ ਅਨਿਸ੍ਸਙ੍ਗਤਾਤਿ ਏਵਮਾਦਯੋ ਗੁਣਾਨੁਭਾਵਾ ਨਿਦ੍ਧਾਰੇਤਬ੍ਬਾਤਿ.

ਮਹਾਸੁਦਸ੍ਸਨਚਰਿਯਾਵਣ੍ਣਨਾ ਨਿਟ੍ਠਿਤਾ.