੩. ਕੁਰੁਰਾਜਚਰਿਯਾਵਣ੍ਣਨਾ

੨੦. ਤਤਿਯੇ ਇਨ੍ਦਪਤ੍ਥੇ ਪੁਰੁਤ੍ਤਮੇਤਿ ਇਨ੍ਦਪਤ੍ਥਨਾਮਕੇ ਕੁਰੁਰਟ੍ਠਸ੍ਸ ਪੁਰਵਰੇ ਉਤ੍ਤਮਨਗਰੇ. ਰਾਜਾਤਿ ਧਮ੍ਮੇਨ ਸਮੇਨ ਚਤੂਹਿ ਸਙ੍ਗਹਵਤ੍ਥੂਹਿ ਪਰਿਸਂ ਰਞ੍ਜੇਤੀਤਿ ਰਾਜਾ. ਕੁਸਲੇ ਦਸਹੁਪਾਗਤੋਤਿ ਕੁਸਲੇਹਿ ਦਸਹਿ ਸਮਨ੍ਨਾਗਤੋ, ਦਾਨਾਦੀਹਿ ਦਸਹਿ ਪੁਞ੍ਞਕਿਰਿਯਵਤ੍ਥੂਹਿ, ਦਸਹਿ ਕੁਸਲਕਮ੍ਮਪਥੇਹਿ ਵਾ ਯੁਤ੍ਤੋਤਿ ਅਤ੍ਥੋ.

੨੧. ਕਲਿਙ੍ਗਰਟ੍ਠਵਿਸਯਾਤਿ ਕਲਿਙ੍ਗਰਟ੍ਠਸਙ੍ਖਾਤਵਿਸਯਾ. ਬ੍ਰਾਹ੍ਮਣਾ ਉਪਗਞ੍ਛੁ ਮਨ੍ਤਿ ਕਲਿਙ੍ਗਰਾਜੇਨ ਉਯ੍ਯੋਜਿਤਾ ਅਟ੍ਠ ਬ੍ਰਾਹ੍ਮਣਾ ਮਂ ਉਪਸਙ੍ਕਮਿਂਸੁ. ਉਪਸਙ੍ਕਮਿਤ੍ਵਾ ਚ ਪਨ ਆਯਾਚੁਂ ਮਂ ਹਤ੍ਥਿਨਾਗਨ੍ਤਿ ਹਤ੍ਥਿਭੂਤਂ ਮਹਾਨਾਗਂ ਮਂ ਆਯਾਚਿਂਸੁ. ਧਞ੍ਞਨ੍ਤਿ ਧਨਾਯਿਤਬ੍ਬਸਿਰਿਸੋਭਗ੍ਗਪ੍ਪਤ੍ਤਂ ਲਕ੍ਖਣਸਮ੍ਪਨ੍ਨਂ. ਮਙ੍ਗਲਸਮ੍ਮਤਨ੍ਤਿ ਤਾਯਯੇਵ ਲਕ੍ਖਣਸਮ੍ਪਤ੍ਤਿਯਾ ਮਙ੍ਗਲਂ ਅਭਿਵੁਡ੍ਢਿਕਾਰਣਨ੍ਤਿ ਅਭਿਸਮ੍ਮਤਂ ਜਨੇਹਿ.

੨੨. ਅਵੁਟ੍ਠਿਕੋਤਿ ਵਸ੍ਸਰਹਿਤੋ. ਦੁਬ੍ਭਿਕ੍ਖੋਤਿ ਦੁਲ੍ਲਭਭੋਜਨੋ. ਛਾਤਕੋ ਮਹਾਤਿ ਮਹਤੀ ਜਿਘਚ੍ਛਾਬਾਧਾ ਵਤ੍ਤਤੀਤਿ ਅਤ੍ਥੋ. ਦਦਾਹੀਤਿ ਦੇਹਿ. ਨੀਲਨ੍ਤਿ ਨੀਲਵਣ੍ਣਂ. ਅਞ੍ਜਨਸਵ੍ਹਯਨ੍ਤਿ ਅਞ੍ਜਨਸਦ੍ਦੇਨ ਅਵ੍ਹਾਤਬ੍ਬਂ, ਅਞ੍ਜਨਨਾਮਕਨ੍ਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਅਮ੍ਹਾਕਂ ਕਲਿਙ੍ਗਰਟ੍ਠਂ ਅਵੁਟ੍ਠਿਕਂ, ਤੇਨ ਇਦਾਨਿ ਮਹਾਦੁਬ੍ਭਿਕ੍ਖਂ ਤਤ੍ਥ ਮਹਨ੍ਤਂ ਛਾਤਕਭਯਂ ਉਪ੍ਪਨ੍ਨਂ, ਤਸ੍ਸ ਵੂਪਸਮਤ੍ਥਾਯ ਇਮਂ ਅਞ੍ਜਨਗਿਰਿਸਙ੍ਕਾਸਂ ਤੁਯ੍ਹਂ ਅਞ੍ਜਨਨਾਮਕਂ ਮਙ੍ਗਲਹਤ੍ਥਿਂ ਦੇਹਿ, ਇਮਸ੍ਮਿਞ੍ਹਿ ਤਤ੍ਥ ਨੀਤੇ ਦੇਵੋ ਵਸ੍ਸਿਸ੍ਸਤਿ, ਤੇਨ ਤਂ ਸਬ੍ਬਭਯਂ ਵੂਪਸਮ੍ਮਿਸ੍ਸਤੀਤਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਤੀਤੇ ਕੁਰੁਰਟ੍ਠੇ ਇਨ੍ਦਪਤ੍ਥਨਗਰੇ ਬੋਧਿਸਤ੍ਤੋ ਕੁਰੁਰਾਜਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਹੇਤ੍ਵਾ ਅਨੁਪੁਬ੍ਬੇਨ ਵਿਞ੍ਞੁਤਂ ਪਤ੍ਤੋ, ਤਕ੍ਕਸਿਲਂ ਗਨ੍ਤ੍ਵਾ ਯੋਗਵਿਹਿਤਾਨਿ ਸਿਪ੍ਪਾਯਤਨਾਨਿ ਵਿਜ੍ਜਾਟ੍ਠਾਨਾਨਿ ਚ ਉਗ੍ਗਹੇਤ੍ਵਾ ਪਚ੍ਚਾਗਤੋ ਪਿਤਰਾ ਉਪਰਜ੍ਜੇ ਠਪਿਤੋ, ਅਪਰਭਾਗੇ ਪਿਤੁ ਅਚ੍ਚਯੇਨ ਰਜ੍ਜਂ ਪਤ੍ਵਾ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਧਮ੍ਮੇਨ ਰਜ੍ਜਂ ਕਾਰੇਸਿ ਧਨਞ੍ਜਯੋ ਨਾਮ ਨਾਮੇਨ. ਸੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਂ ਧਨਂ ਵਿਸ੍ਸਜ੍ਜੇਨ੍ਤੋ ਸਕਲਜਮ੍ਬੁਦੀਪਂ ਉਨ੍ਨਙ੍ਗਲਂ ਕਤ੍ਵਾ ਦਾਨਂ ਅਦਾਸਿ. ਤਸ੍ਸ ਦਾਨਜ੍ਝਾਸਯਤਾ ਦਾਨਾਭਿਰਤਿ ਸਕਲਜਮ੍ਬੁਦੀਪਂ ਪਤ੍ਥਰਿ.

ਤਸ੍ਮਿਂ ਕਾਲੇ ਕਲਿਙ੍ਗਰਟ੍ਠੇ ਦੁਬ੍ਭਿਕ੍ਖਭਯਂ ਛਾਤਕਭਯਂ ਰੋਗਭਯਨ੍ਤਿ ਤੀਣਿ ਭਯਾਨਿ ਉਪ੍ਪਜ੍ਜਿਂਸੁ. ਸਕਲਰਟ੍ਠਵਾਸਿਨੋ ਦਨ੍ਤਪੁਰਂ ਗਨ੍ਤ੍ਵਾ ਰਾਜਭਵਨਦ੍ਵਾਰੇ ਉਕ੍ਕੁਟ੍ਠਿਮਕਂਸੁ ‘‘ਦੇਵਂ ਵਸ੍ਸਾਪੇਹਿ ਦੇਵਾ’’ਤਿ. ਰਾਜਾ ਤਂ ਸੁਤ੍ਵਾ ‘‘ਕਿਂਕਾਰਣਾ ਏਤੇ ਵਿਰਵਨ੍ਤੀ’’ਤਿ ਅਮਚ੍ਚੇ ਪੁਚ੍ਛਿ. ਅਮਚ੍ਚਾ ਰਞ੍ਞੋ ਤਮਤ੍ਥਂ ਆਰੋਚੇਸੁਂ. ਰਾਜਾ ਪੋਰਾਣਕਰਾਜਾਨੋ ਦੇਵੇ ਅਵਸ੍ਸਨ੍ਤੇ ਕਿਂ ਕਰੋਨ੍ਤੀਤਿ. ‘‘ਦੇਵੋ ਵਸ੍ਸਤੂ’’ਤਿ ਦਾਨਂ ਦਤ੍ਵਾ ਉਪੋਸਥਂ ਅਧਿਟ੍ਠਾਯ ਸਮਾਦਿਨ੍ਨਸੀਲਾ ਸਿਰਿਗਬ੍ਭਂ ਪਵਿਸਿਤ੍ਵਾ ਦਬ੍ਬਸਨ੍ਥਰੇ ਸਤ੍ਤਾਹਂ ਨਿਪਜ੍ਜਨ੍ਤੀਤਿ. ਤਂ ਸੁਤ੍ਵਾ ਤਥਾ ਅਕਾਸਿ. ਦੇਵੋ ਨ ਵਸ੍ਸਿ, ਏਵਂ ਰਾਜਾ ਅਹਂ ਮਯਾ ਕਤ੍ਤਬ੍ਬਕਿਚ੍ਚਂ ਅਕਾਸਿਂ, ਦੇਵੋ ਨ ਵਸ੍ਸਤਿ, ਕਿਨ੍ਤਿ ਕਰੋਮਾਤਿ. ਦੇਵ, ਇਨ੍ਦਪਤ੍ਥਨਗਰੇ ਧਨਞ੍ਜਯਸ੍ਸ ਨਾਮ ਕੁਰੁਰਾਜਸ੍ਸ ਮਙ੍ਗਲਹਤ੍ਥਿਮ੍ਹਿ ਆਨੀਤੇ ਦੇਵੋ ਵਸ੍ਸਿਸ੍ਸਤੀਤਿ. ਸੋ ਰਾਜਾ ਬਲਵਾਹਨਸਮ੍ਪਨ੍ਨੋ ਦੁਪ੍ਪਸਹੋ, ਕਥਮਸ੍ਸ ਹਤ੍ਥਿਂ ਆਨੇਸ੍ਸਾਮਾਤਿ. ਮਹਾਰਾਜ, ਤੇਨ ਸਦ੍ਧਿਂ ਯੁਦ੍ਧਕਿਚ੍ਚਂ ਨਤ੍ਥਿ, ਦਾਨਜ੍ਝਾਸਯੋ ਸੋ ਰਾਜਾ ਦਾਨਾਭਿਰਤੋ ਯਾਚਿਤੋ ਸਮਾਨੋ ਅਲਙ੍ਕਤਸੀਸਮ੍ਪਿ ਛਿਨ੍ਦਿਤ੍ਵਾ ਪਸਾਦਸਮ੍ਪਨ੍ਨਾਨਿ ਅਕ੍ਖੀਨਿਪਿ ਉਪ੍ਪਾਟੇਤ੍ਵਾ ਸਕਲਰਜ੍ਜਮ੍ਪਿ ਨਿਯ੍ਯਾਤੇਤ੍ਵਾ ਦਦੇਯ੍ਯ, ਹਤ੍ਥਿਮ੍ਹਿ ਵਤ੍ਤਬ੍ਬਮੇਵ ਨਤ੍ਥਿ, ਅਵਸ੍ਸਂ ਯਾਚਿਤੋ ਸਮਾਨੋ ਦਸ੍ਸਤੀਤਿ. ਕੇ ਪਨ ਯਾਚਿਤੁਂ ਸਮਤ੍ਥਾਤਿ? ਬ੍ਰਾਹ੍ਮਣਾ, ਮਹਾਰਾਜਾਤਿ. ਰਾਜਾ ਅਟ੍ਠ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਸਕ੍ਕਾਰਸਮ੍ਮਾਨਂ ਕਤ੍ਵਾ ਪਰਿਬ੍ਬਯਂ ਦਤ੍ਵਾ ਹਤ੍ਥਿਯਾਚਨਤ੍ਥਂ ਪੇਸੇਸਿ. ਤੇ ਸਬ੍ਬਤ੍ਥ ਏਕਰਤ੍ਤਿਵਾਸੇਨ ਤੁਰਿਤਗਮਨਂ ਗਨ੍ਤ੍ਵਾ ਕਤਿਪਾਹਂ ਨਗਰਦ੍ਵਾਰੇ ਦਾਨਸਾਲਾਸੁ ਭੁਞ੍ਜਨ੍ਤਾ ਸਰੀਰਂ ਸਨ੍ਤਪ੍ਪੇਤ੍ਵਾ ਰਞ੍ਞੋ ਦਾਨਗ੍ਗਂ ਆਗਮਨਪਥੇ ਕਾਲਂ ਆਗਮਯਮਾਨਾ ਪਾਚੀਨਦ੍ਵਾਰੇ ਅਟ੍ਠਂਸੁ.

ਬੋਧਿਸਤ੍ਤੋਪਿ ਪਾਤੋਵ ਨ੍ਹਾਤਾਨੁਲਿਤ੍ਤੋ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤੋ ਅਲਙ੍ਕਤਵਰਵਾਰਣਖਨ੍ਧਗਤੋ ਮਹਨ੍ਤੇਨ ਰਾਜਾਨੁਭਾਵੇਨ ਦਾਨਸਾਲਂ ਗਨ੍ਤ੍ਵਾ ਓਤਰਿਤ੍ਵਾ ਸਤ੍ਤਟ੍ਠਜਨਾਨਂ ਸਹਤ੍ਥੇਨ ਦਾਨਂ ਦਤ੍ਵਾ ‘‘ਇਮਿਨਾਵ ਨੀਹਾਰੇਨ ਦੇਥਾ’’ਤਿ ਵਤ੍ਵਾ ਹਤ੍ਥਿਂ ਅਭਿਰੁਹਿਤ੍ਵਾ ਦਕ੍ਖਿਣਦ੍ਵਾਰਂ ਅਗਮਾਸਿ. ਬ੍ਰਾਹ੍ਮਣਾ ਪਾਚੀਨਦ੍ਵਾਰੇ ਆਰਕ੍ਖਸ੍ਸ ਬਲਵਤਾਯ ਓਕਾਸਂ ਅਲਭਿਤ੍ਵਾ ਦਕ੍ਖਿਣਦ੍ਵਾਰਂ ਗਨ੍ਤ੍ਵਾ ਰਾਜਾਨਂ ਆਗਚ੍ਛਨ੍ਤਂ ਉਲ੍ਲੋਕਯਮਾਨਾ ਦ੍ਵਾਰਤੋ ਨਾਤਿਦੂਰੇ ਉਨ੍ਨਤਟ੍ਠਾਨੇ ਠਿਤਾ ਸਮ੍ਪਤ੍ਤਂ ਰਾਜਾਨਂ ਹਤ੍ਥੇ ਉਕ੍ਖਿਪਿਤ੍ਵਾ ਜਯਾਪੇਸੁਂ. ਰਾਜਾ ਵਜਿਰਙ੍ਕੁਸੇਨ ਵਾਰਣਂ ਨਿਵਤ੍ਤੇਤ੍ਵਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਤੇ ਬ੍ਰਾਹ੍ਮਣੇ ‘‘ਕਿਂ ਇਚ੍ਛਥਾ’’ਤਿ ਪੁਚ੍ਛਿ. ਬ੍ਰਾਹ੍ਮਣਾ ‘‘ਕਲਿਙ੍ਗਰਟ੍ਠਂ ਦੁਬ੍ਭਿਕ੍ਖਭਯੇਨ ਛਾਤਕਭਯੇਨ ਰੋਗਭਯੇਨ ਚ ਉਪਦ੍ਦੁਤਂ. ਸੋ ਉਪਦ੍ਦਵੋ ਇਮਸ੍ਮਿਂ ਤਵ ਮਙ੍ਗਲਹਤ੍ਥਿਮ੍ਹਿ ਨੀਤੇ ਵੂਪਸਮ੍ਮਿਸ੍ਸਤਿ. ਤਸ੍ਮਾ ਇਮਂ ਅਞ੍ਜਨਵਣ੍ਣਂ ਨਾਗਂ ਅਮ੍ਹਾਕਂ ਦੇਹੀ’’ਤਿ ਆਹਂਸੁ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ ‘‘ਕਲਿਙ੍ਗਰਟ੍ਠਵਿਸਯਾ…ਪੇ… ਅਞ੍ਜਨਸਵ੍ਹਯ’’ਨ੍ਤਿ. ਤਸ੍ਸਤ੍ਥੋ ਵੁਤ੍ਤੋ ਏਵ.

ਅਥ ਬੋਧਿਸਤ੍ਤੋ ‘‘ਨ ਮੇਤਂ ਪਤਿਰੂਪਂ, ਯਂ ਮੇ ਯਾਚਕਾਨਂ ਮਨੋਰਥਵਿਘਾਤੋ ਸਿਯਾ, ਮਯ੍ਹਞ੍ਚ ਸਮਾਦਾਨਭੇਦੋ ਸਿਯਾ’’ਤਿ ਹਤ੍ਥਿਕ੍ਖਨ੍ਧਤੋ ਓਤਰਿਤ੍ਵਾ ‘‘ਸਚੇ ਅਨਲਙ੍ਕਤਟ੍ਠਾਨਂ ਅਤ੍ਥਿ, ਅਲਙ੍ਕਰਿਤ੍ਵਾ ਦਸ੍ਸਾਮੀ’’ਤਿ ਸਮਨ੍ਤਤੋ ਓਲੋਕੇਤ੍ਵਾ ਅਨਲਙ੍ਕਤਟ੍ਠਾਨਂ ਅਦਿਸ੍ਵਾ ਸੋਣ੍ਡਾਯ ਨਂ ਗਹੇਤ੍ਵਾ ਬ੍ਰਾਹ੍ਮਣਾਨਂ ਹਤ੍ਥੇਸੁ ਠਪੇਤ੍ਵਾ ਰਤਨਭਿਙ੍ਗਾਰੇਨ ਪੁਪ੍ਫਗਨ੍ਧਵਾਸਿਤਂ ਉਦਕਂ ਪਾਤੇਤ੍ਵਾ ਅਦਾਸਿ. ਤੇਨ ਵੁਤ੍ਤਂ –

੨੩. ‘‘ਨ ਮੇ ਯਾਚਕਮਨੁਪ੍ਪਤ੍ਤੇ, ਪਟਿਕ੍ਖੇਪੋ ਅਨੁਚ੍ਛਵੋ;

ਮਾ ਮੇ ਭਿਜ੍ਜਿ ਸਮਾਦਾਨਂ, ਦਸ੍ਸਾਮਿ ਵਿਪੁਲਂ ਗਜਂ.

੨੪. ‘‘ਨਾਗਂ ਗਹੇਤ੍ਵਾ ਸੋਣ੍ਡਾਯ, ਭਿਙ੍ਗਾਰੇ ਰਤਨਾਮਯੇ;

ਜਲਂ ਹਤ੍ਥੇ ਆਕਿਰਿਤ੍ਵਾ, ਬ੍ਰਾਹ੍ਮਣਾਨਂ ਅਦਂ ਗਜ’’ਨ੍ਤਿ.

ਤਤ੍ਥ ਯਾਚਕਮਨੁਪ੍ਪਤ੍ਤੇਤਿ ਯਾਚਕੇ ਅਨੁਪ੍ਪਤ੍ਤੇ. ਅਨੁਚ੍ਛਵੋਤਿ ਅਨੁਚ੍ਛਵਿਕੋ ਪਤਿਰੂਪੋ. ਮਾ ਮੇ ਭਿਜ੍ਜਿ ਸਮਾਦਾਨਨ੍ਤਿ ਸਬ੍ਬਞ੍ਞੁਤਞ੍ਞਾਣਤ੍ਥਾਯ ਸਬ੍ਬਸ੍ਸ ਯਾਚਕਸ੍ਸ ਸਬ੍ਬਂ ਅਨਵਜ੍ਜਂ ਇਚ੍ਛਿਤਂ ਦਦਨ੍ਤੋ ਦਾਨਪਾਰਮਿਂ ਪੂਰੇਸ੍ਸਾਮੀਤਿ ਯਂ ਮਯ੍ਹਂ ਸਮਾਦਾਨਂ, ਤਂ ਮਾ ਭਿਜ੍ਜਿ. ਤਸ੍ਮਾ ਦਸ੍ਸਾਮਿ ਵਿਪੁਲਂ ਗਜਨ੍ਤਿ ਮਹਨ੍ਤਂ ਇਮਂ ਮਙ੍ਗਲਹਤ੍ਥਿਂ ਦਸ੍ਸਾਮੀਤਿ. ਅਦਨ੍ਤਿ ਅਦਾਸਿਂ.

੨੫. ਤਸ੍ਮਿਂ ਪਨ ਹਤ੍ਥਿਮ੍ਹਿ ਦਿਨ੍ਨੇ ਅਮਚ੍ਚਾ ਬੋਧਿਸਤ੍ਤਂ ਏਤਦਵੋਚੁਂ – ‘‘ਕਸ੍ਮਾ, ਮਹਾਰਾਜ, ਮਙ੍ਗਲਹਤ੍ਥਿਂ ਦਦਤ੍ਥ, ਨਨੁ ਅਞ੍ਞੋ ਹਤ੍ਥੀ ਦਾਤਬ੍ਬੋ, ਰਞ੍ਞਾ ਨਾਮ ਏਵਰੂਪੋ ਓਪਵਯ੍ਹੋ ਮਙ੍ਗਲਹਤ੍ਥੀ ਇਸ੍ਸਰਿਯਂ ਅਭਿਵਿਜਯਞ੍ਚ ਆਕਙ੍ਖਨ੍ਤੇਨ ਨ ਦਾਤਬ੍ਬੋ’’ਤਿ. ਮਹਾਸਤ੍ਤੋ ਯਂ ਮਂ ਯਾਚਕਾ ਯਾਚਨ੍ਤਿ, ਤਦੇਵ ਮਯਾ ਦਾਤਬ੍ਬਂ, ਸਚੇ ਪਨ ਮਂ ਰਜ੍ਜਂ ਯਾਚੇਯ੍ਯੁਂ, ਰਜ੍ਜਮ੍ਪਿ ਤੇਸਂ ਦਦੇਯ੍ਯਂ, ਮਯ੍ਹਂ ਰਜ੍ਜਤੋਪਿ ਜੀਵਿਤਤੋਪਿ ਸਬ੍ਬਞ੍ਞੁਤਞ੍ਞਾਣਮੇਵ ਪਿਯਤਰਂ, ਤਸ੍ਮਾ ਤਂ ਹਤ੍ਥਿਂ ਅਦਾਸਿਨ੍ਤਿ ਆਹ. ਤੇਨ ਵੁਤ੍ਤਂ ‘‘ਤਸ੍ਸ ਨਾਗੇ ਪਦਿਨ੍ਨਮ੍ਹੀ’’ਤਿਆਦਿ. ਤਤ੍ਥ ਤਸ੍ਸਾਤਿ ਤਸ੍ਸ ਤੇਨ, ਤਸ੍ਮਿਂ ਨਾਗੇ ਹਤ੍ਥਿਮ੍ਹਿ ਦਿਨ੍ਨੇ.

੨੬. ਮਙ੍ਗਲਸਮ੍ਪਨ੍ਨਨ੍ਤਿ ਮਙ੍ਗਲਗੁਣੇਹਿ ਸਮਨ੍ਨਾਗਤਂ. ਸਙ੍ਗਾਮਵਿਜਯੁਤ੍ਤਮਨ੍ਤਿ ਸਙ੍ਗਾਮਵਿਜਯਾ ਉਤ੍ਤਮਂ, ਸਙ੍ਗਾਮਵਿਜਯੇ ਵਾ ਉਤ੍ਤਮਂ ਪਧਾਨਂ ਪਵਰਂ ਨਾਗਂ. ਕਿਂ ਤੇ ਰਜ੍ਜਂ ਕਰਿਸ੍ਸਤੀਤਿ ਤਸ੍ਮਿਂ ਨਾਗੇ ਅਪਗਤੇ ਤਵ ਰਜ੍ਜਂ ਕਿਂ ਕਰਿਸ੍ਸਤਿ, ਰਜ੍ਜਕਿਚ੍ਚਂ ਨ ਕਰਿਸ੍ਸਤਿ, ਰਜ੍ਜਮ੍ਪਿ ਅਪਗਤਮੇਵਾਤਿ ਦਸ੍ਸੇਤਿ.

੨੭. ਰਜ੍ਜਮ੍ਪਿ ਮੇ ਦਦੇ ਸਬ੍ਬਨ੍ਤਿ ਤਿਟ੍ਠਤੁ ਨਾਗੋ ਤਿਰਚ੍ਛਾਨਗਤੋ, ਇਦਂ ਮੇ ਸਬ੍ਬਂ ਕੁਰੁਰਟ੍ਠਮ੍ਪਿ ਯਾਚਕਾਨਂ ਦਦੇਯ੍ਯਂ. ਸਰੀਰਂ ਦਜ੍ਜਮਤ੍ਤਨੋਤਿ ਰਜ੍ਜੇਪਿ ਵਾ ਕਿਂ ਵਤ੍ਤਬ੍ਬਂ, ਅਤ੍ਤਨੋ ਸਰੀਰਮ੍ਪਿ ਯਾਚਕਾਨਂ ਦਦੇਯ੍ਯਂ, ਸਬ੍ਬੋਪਿ ਹਿ ਮੇ ਅਜ੍ਝਤ੍ਤਿਕਬਾਹਿਰੋ ਪਰਿਗ੍ਗਹੋ ਲੋਕਹਿਤਤ੍ਥਮੇਵ ਮਯਾ ਪਰਿਚ੍ਚਤ੍ਤੋ. ਯਸ੍ਮਾ ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ ਸਬ੍ਬਞ੍ਞੁਤਾ ਚ ਦਾਨਪਾਰਮਿਂ ਆਦਿਂ ਕਤ੍ਵਾ ਸਬ੍ਬਪਾਰਮਿਯੋ ਅਪੂਰੇਨ੍ਤੇਨ ਨ ਸਕ੍ਕਾ ਲਦ੍ਧੁਂ, ਤਸ੍ਮਾ ਨਾਗਂ ਅਦਾਸਿਂ ਅਹਨ੍ਤਿ ਦਸ੍ਸੇਤਿ.

ਏਵਮ੍ਪਿ ਤਸ੍ਮਿਂ ਨਾਗੇ ਆਨੀਤੇ ਕਲਿਙ੍ਗਰਟ੍ਠੇ ਦੇਵੋ ਨ ਵਸ੍ਸਤੇਵ. ਕਲਿਙ੍ਗਰਾਜਾ ‘‘ਇਦਾਨਿਪਿ ਨ ਵਸ੍ਸਤਿ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਿਤ੍ਵਾ ‘‘ਕੁਰੁਰਾਜਾ ਗਰੁਧਮ੍ਮੇ ਰਕ੍ਖਤਿ, ਤੇਨਸ੍ਸ ਰਟ੍ਠੇ ਅਨ੍ਵਦ੍ਧਮਾਸਂ ਅਨੁਦਸਾਹਂ ਦੇਵੋ ਵਸ੍ਸਤਿ, ਰਞ੍ਞੋ ਗੁਣਾਨੁਭਾਵੋ ਏਸ, ਨ ਇਮਸ੍ਸ ਤਿਰਚ੍ਛਾਨਗਤਸ੍ਸਾ’’ਤਿ ਜਾਨਿਤ੍ਵਾ ‘‘ਮਯਮ੍ਪਿ ਗਰੁਧਮ੍ਮੇ ਰਕ੍ਖਿਸ੍ਸਾਮ, ਗਚ੍ਛਥ ਧਨਞ੍ਚਯਕੋਰਬ੍ਯਸ੍ਸ ਸਨ੍ਤਿਕੇ ਤੇ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ਆਨੇਥਾ’’ਤਿ ਅਮਚ੍ਚੇ ਪੇਸੇਸਿ. ਗਰੁਧਮ੍ਮਾ ਵੁਚ੍ਚਨ੍ਤਿ ਪਞ੍ਚ ਸੀਲਾਨਿ, ਤਾਨਿ ਬੋਧਿਸਤ੍ਤੋ ਸੁਪਰਿਸੁਦ੍ਧਾਨਿ ਕਤ੍ਵਾ ਰਕ੍ਖਤਿ, ਯਥਾ ਚ ਬੋਧਿਸਤ੍ਤੋ. ਏਵਮਸ੍ਸ ਮਾਤਾ ਅਗ੍ਗਮਹੇਸੀ, ਕਨਿਟ੍ਠਭਾਤਾ ਉਪਰਾਜਾ, ਪੁਰੋਹਿਤੋ ਬ੍ਰਾਹ੍ਮਣੋ, ਰਜ੍ਜੁਗ੍ਗਾਹਕੋ ਅਮਚ੍ਚੋ, ਸਾਰਥਿ ਸੇਟ੍ਠਿ, ਦੋਣਮਾਪਕੋ ਦੋਵਾਰਿਕੋ, ਨਗਰਸੋਭਿਨੀ ਵਣ੍ਣਦਾਸੀਤਿ. ਤੇਨ ਵੁਤ੍ਤਂ –

‘‘ਰਾਜਾ ਮਾਤਾ ਮਹੇਸੀ ਚ, ਉਪਰਾਜਾ ਪੁਰੋਹਿਤੋ;

ਰਜ੍ਜੁਗ੍ਗਾਹੋ ਸਾਰਥੀ ਸੇਟ੍ਠਿ, ਦੋਣੋ ਦੋਵਾਰਿਕੋ ਤਥਾ;

ਗਣਿਕਾ ਤੇ ਏਕਾਦਸ, ਗਰੁਧਮ੍ਮੇ ਪਤਿਟ੍ਠਿਤਾ’’ਤਿ.

ਤੇ ਅਮਚ੍ਚਾ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਮਤ੍ਥਂ ਆਰੋਚੇਸੁਂ. ਮਹਾਸਤ੍ਤੋ ‘‘ਮਯ੍ਹਂ ਗਰੁਧਮ੍ਮੇ ਕੁਕ੍ਕੁਚ੍ਚਂ ਅਤ੍ਥਿ, ਮਾਤਾ ਪਨ ਮੇ ਸੁਰਕ੍ਖਿਤਂ ਰਕ੍ਖਤਿ, ਤਸ੍ਸਾ ਸਨ੍ਤਿਕੇ ਗਣ੍ਹਥਾ’’ਤਿ ਵਤ੍ਵਾ ਤੇਹਿ ‘‘ਮਹਾਰਾਜ, ਕੁਕ੍ਕੁਚ੍ਚਂ ਨਾਮ ਸਿਕ੍ਖਾਕਾਮਸ੍ਸ ਸਲ੍ਲੇਖਵੁਤ੍ਤਿਨੋ ਹੋਤਿ, ਦੇਥ ਨੋ’’ਤਿ ਯਾਚਿਤੋ ‘‘ਪਾਣੋ ਨ ਹਨ੍ਤਬ੍ਬੋ, ਅਦਿਨ੍ਨਂ ਨ ਆਦਾਤਬ੍ਬਂ, ਕਾਮੇਸੁਮਿਚ੍ਛਾਚਾਰੋ ਨ ਚਰਿਤਬ੍ਬੋ, ਮੁਸਾ ਨ ਭਣਿਤਬ੍ਬਂ, ਮਜ੍ਜਂ ਨ ਪਾਤਬ੍ਬ’’ਨ੍ਤਿ ਸੁਵਣ੍ਣਪਟ੍ਟੇ ਲਿਖਾਪੇਤ੍ਵਾ ‘‘ਏਵਂ ਸਨ੍ਤੇਪਿ ਮਾਤੁ ਸਨ੍ਤਿਕੇ ਗਣ੍ਹਥਾ’’ਤਿ ਆਹ.

ਦੂਤਾ ਰਾਜਾਨਂ ਵਨ੍ਦਿਤ੍ਵਾ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਦੇਵਿ, ਤੁਮ੍ਹੇ ਕਿਰ ਗਰੁਧਮ੍ਮਂ ਰਕ੍ਖਥ, ਤਂ ਨੋ ਦੇਥਾ’’ਤਿ ਵਦਿਂਸੁ. ਬੋਧਿਸਤ੍ਤਸ੍ਸ ਮਾਤਾਪਿ ਤਥੇਵ ਅਤ੍ਤਨੋ ਕੁਕ੍ਕੁਚ੍ਚਸ੍ਸ ਅਤ੍ਥਿਭਾਵਂ ਵਤ੍ਵਾਵ ਤੇਹਿ ਯਾਚਿਤਾ ਅਦਾਸਿ. ਤਥਾ ਮਹੇਸਿਆਦਯੋਪਿ. ਤੇ ਸਬ੍ਬੇਸਮ੍ਪਿ ਸਨ੍ਤਿਕੇ ਸੁਵਣ੍ਣਪਟ੍ਟੇ ਗਰੁਧਮ੍ਮੇ ਲਿਖਾਪੇਤ੍ਵਾ ਦਨ੍ਤਪੁਰਂ ਗਨ੍ਤ੍ਵਾ ਕਲਿਙ੍ਗਰਞ੍ਞੋ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਸੋਪਿ ਰਾਜਾ ਤਸ੍ਮਿਂ ਧਮ੍ਮੇ ਵਤ੍ਤਮਾਨੋ ਪਞ੍ਚ ਸੀਲਾਨਿ ਪੂਰੇਸਿ. ਤਤੋ ਸਕਲਕਲਿਙ੍ਗਰਟ੍ਠੇ ਦੇਵੋ ਵਸ੍ਸਿ. ਤੀਣਿ ਭਯਾਨਿ ਵੂਪਸਨ੍ਤਾਨਿ. ਰਟ੍ਠਂ ਖੇਮਂ ਸੁਭਿਕ੍ਖਂ ਅਹੋਸਿ. ਬੋਧਿਸਤ੍ਤੋ ਯਾਵਜੀਵਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਪਰਿਸੋ ਸਗ੍ਗਪੁਰਂ ਪੂਰੇਸਿ.

ਤਦਾ ਗਣਿਕਾਦਯੋ ਉਪ੍ਪਲਵਣ੍ਣਾਦਯੋ ਅਹੇਸੁਂ. ਵੁਤ੍ਤਞ੍ਹੇਤਂ –

‘‘ਗਣਿਕਾ ਉਪ੍ਪਲਵਣ੍ਣਾ, ਪੁਣ੍ਣੋ ਦੋਵਾਰਿਕੋ ਤਦਾ;

ਰਜ੍ਜੁਗ੍ਗਾਹੋ ਚ ਕਚ੍ਚਾਨੋ, ਦੋਣਮਾਪਕੋ ਚ ਕੋਲਿਤੋ.

‘‘ਸਾਰਿਪੁਤ੍ਤੋ ਤਦਾ ਸੇਟ੍ਠਿ, ਅਨੁਰੁਦ੍ਧੋ ਚ ਸਾਰਥਿ;

ਬ੍ਰਾਹ੍ਮਣੋ ਕਸ੍ਸਪੋ ਥੇਰੋ, ਉਪਰਾਜਾਨਨ੍ਦਪਣ੍ਡਿਤੋ.

‘‘ਮਹੇਸੀ ਰਾਹੁਲਮਾਤਾ, ਮਾਯਾਦੇਵੀ ਜਨੇਤ੍ਤਿਕਾ;

ਕੁਰੁਰਾਜਾ ਬੋਧਿਸਤ੍ਤੋ, ਏਵਂ ਧਾਰੇਥ ਜਾਤਕ’’ਨ੍ਤਿ. (ਧ. ਪ. ਅਟ੍ਠ. ੨.੩੬੧ ਹਂਸਘਾਤਕਭਿਕ੍ਖੁਵਤ੍ਥੁ);

ਇਧਾਪਿ ਨੇਕ੍ਖਮ੍ਮਪਾਰਮਿਆਦਯੋ ਸੇਸਧਮ੍ਮਾ ਚ ਵੁਤ੍ਤਨਯੇਨੇਵ ਨਿਦ੍ਧਾਰੇਤਬ੍ਬਾਤਿ.

ਕੁਰੁਰਾਜਚਰਿਯਾਵਣ੍ਣਨਾ ਨਿਟ੍ਠਿਤਾ.