੧੦. ਪਞ੍ਚਙ੍ਗੁਲਿਯਤ੍ਥੇਰਅਪਦਾਨਵਣ੍ਣਨਾ

ਤਿਸ੍ਸੋ ਨਾਮਾਸਿ ਭਗਵਾਤਿਆਦਿਕਂ ਆਯਸ੍ਮਤੋ ਪਞ੍ਚਙ੍ਗੁਲਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੇ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਵਿਭਵਸਮ੍ਪਨ੍ਨੋ ਸਦ੍ਧੋ ਪਸਨ੍ਨੋ ਵੀਥਿਤੋ ਵਿਹਾਰਂ ਪਟਿਪਨ੍ਨਂ ਭਗਵਨ੍ਤਂ ਦਿਸ੍ਵਾ ਜਾਤਿਸੁਮਨਾਦਿਅਨੇਕਾਨਿ ਸੁਗਨ੍ਧਪੁਪ੍ਫਾਨਿ ਚਨ੍ਦਨਾਦੀਨਿ ਚ ਵਿਲੇਪਨਾਨਿ ਗਾਹਾਪੇਤ੍ਵਾ ਵਿਹਾਰਂ ਗਤੋ ਪੁਪ੍ਫੇਹਿ ਭਗਵਨ੍ਤਂ ਪੂਜੇਤ੍ਵਾ ਵਿਲੇਪਨੇਹਿ ਭਗਵਤੋ ਸਰੀਰੇ ਪਞ੍ਚਙ੍ਗੁਲਿਕਂ ਕਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ.

੫੦. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਮਨ੍ਵਾਯ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬਕਮ੍ਮਂ ਸਰਨ੍ਤੋ ਪਚ੍ਚਕ੍ਖਤੋ ਞਤ੍ਵਾ ‘‘ਇਮਂ ਨਾਮ ਕੁਸਲਕਮ੍ਮਂ ਕਤ੍ਵਾ ਈਦਿਸਂ ਲੋਕੁਤ੍ਤਰਸਮ੍ਪਤ੍ਤਿਂ ਪਤ੍ਤੋਮ੍ਹੀ’’ਤਿ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸੋ ਨਾਮਾਸਿ ਭਗਵਾਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਪਞ੍ਚਙ੍ਗੁਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸਤ੍ਤਰਸਮਵਗ੍ਗਵਣ੍ਣਨਾ ਸਮਤ੍ਤਾ.