੧੭. ਸੁਪਾਰਿਚਰਿਯਵਗ੍ਗੋ

੧. ਸੁਪਾਰਿਚਰਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਸੁਪਾਰਿਚਰਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਮੁਨਿਪੁਙ੍ਗਵੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਯਕ੍ਖਯੋਨਿਯਂ ਨਿਬ੍ਬਤ੍ਤੋ ਹਿਮਵਤਿ ਯਕ੍ਖਸਮਾਗਮਂ ਗਤੋ ਭਗਵਤੋ ਦੇਵਯਕ੍ਖਗਨ੍ਧਬ੍ਬਨਾਗਾਨਂ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਉਭੋ ਹਤ੍ਥੇ ਆਭੁਜਿਤ੍ਵਾ ਅਪ੍ਫੋਟੇਸਿ ਨਮਸ੍ਸਿ ਚ. ਸੋ ਤੇਨ ਪੁਞ੍ਞੇਨ ਤਤੋ ਚੁਤੋ ਉਪਰਿ ਦੇਵਲੋਕੇ ਉਪ੍ਪਨ੍ਨੋ ਤਤ੍ਥ ਦਿਬ੍ਬਸੁਖਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਗਹਪਤਿਕੁਲੇ ਨਿਬ੍ਬਤ੍ਤੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਰਤਨਤ੍ਤਯੇ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੋ ਨਾਮ ਨਾਮੇਨਾਤਿਆਦਿਮਾਹ. ਤਤ੍ਥ ਪਦੁਮੋਤਿ ਯਸ੍ਸ ਪਾਦਨਿਕ੍ਖੇਪਸਮਯੇ ਪਥਵਿਂ ਭਿਨ੍ਦਿਤ੍ਵਾ ਪਦੁਮਂ ਉਗ੍ਗਨ੍ਤ੍ਵਾ ਪਾਦਤਲਂ ਸਮ੍ਪਟਿਚ੍ਛਤਿ, ਤੇਨ ਸਞ੍ਞਾਣੇਨ ਸੋ ਭਗਵਾ ਪਦੁਮੋਤਿ ਸਙ੍ਖਂ ਗਤੋ, ਇਧ ਪਦੁਮੁਤ੍ਤਰੋ ਭਗਵਾ ਅਧਿਪ੍ਪੇਤੋ. ਸੋ ਭਗਵਾ ਪਵਨਾ ਵਸਨਵਿਹਾਰਾ ਅਭਿਨਿਕ੍ਖਮ੍ਮ ਵਨਮਜ੍ਝਂ ਪਵਿਸਿਤ੍ਵਾ ਧਮ੍ਮਂ ਦੇਸੇਤੀਤਿ ਸਮ੍ਬਨ੍ਧੋ.

ਯਕ੍ਖਾਨਂ ਸਮਯੋਤਿ ਦੇਵਾਨਂ ਸਮਾਗਮੋ ਆਸਿ ਅਹੋਸੀਤਿ ਅਤ੍ਥੋ. ਅਜ੍ਝਾਪੇਕ੍ਖਿਂਸੁ ਤਾਵਦੇਤਿ ਤਸ੍ਮਿਂ ਦੇਸਨਾਕਾਲੇ ਅਧਿਅਪੇਕ੍ਖਿਂਸੁ, ਵਿਸੇਸੇਨ ਪਸ੍ਸਨਸੀਲਾ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਸੁਪਾਰਿਚਰਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਕਣਵੇਰਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਸਿਦ੍ਧਤ੍ਥੋ ਨਾਮ ਭਗਵਾਤਿਆਦਿਕਂ ਆਯਸ੍ਮਤੋ ਕਣਵੇਰਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਸੁਦ੍ਦਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਰਞ੍ਞੋ ਅਨ੍ਤੇਪੁਰਪਾਲਕੋ ਅਹੋਸਿ. ਤਸ੍ਮਿਂ ਸਮਯੇ ਸਿਦ੍ਧਤ੍ਥੋ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਰਾਜਵੀਥਿਂ ਪਟਿਪਜ੍ਜਿ. ਅਥ ਸੋ ਅਨ੍ਤੇਪੁਰਪਾਲਕੋ ਚਰਮਾਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਹੁਤ੍ਵਾ ਕਣਵੇਰਪੁਪ੍ਫੇਨ ਭਗਵਨ੍ਤਂ ਪੂਜੇਤ੍ਵਾ ਨਮਸ੍ਸਮਾਨੋ ਅਟ੍ਠਾਸਿ. ਸੋ ਤੇਨ ਪੁਞ੍ਞੇਨ ਸੁਗਤਿਸਮ੍ਪਤ੍ਤਿਯੋਯੇਵ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਪ੍ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੭. ਸੋ ਪਤ੍ਤਅਗ੍ਗਫਲੋ ਪੁਬ੍ਬੇ ਕਤਕੁਸਲਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥੋ ਨਾਮ ਭਗਵਾਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਕਣਵੇਰਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਖਜ੍ਜਕਦਾਯਕਤ੍ਥੇਰਅਪਦਾਨਵਣ੍ਣਨਾ

ਤਿਸ੍ਸਸ੍ਸ ਖੋ ਭਗਵਤੋਤਿਆਦਿਕਂ ਆਯਸ੍ਮਤੋ ਖਜ੍ਜਕਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਸੁਦ੍ਦਕੁਲੇ ਨਿਬ੍ਬਤ੍ਤੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਮ੍ਬਜਮ੍ਬੁਆਦਿਮਨੇਕਂ ਮਧੁਰਫਲਾਫਲਂ ਨਾਲ਼ਿਕੇਰਂ ਪੂਵਖਜ੍ਜਕਞ੍ਚ ਅਦਾਸਿ. ਭਗਵਾ ਤਸ੍ਸ ਪਸਾਦਵਡ੍ਢਨਤ੍ਥਾਯ ਪਸ੍ਸਨ੍ਤਸ੍ਸੇਵ ਪਰਿਭੁਞ੍ਜਿ. ਸੋ ਤੇਨ ਪੁਞ੍ਞੇਨ ਸੁਗਤਿਸਮ੍ਪਤ੍ਤਿਯੋਯੇਵ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਞ੍ਜਾਤਸਦ੍ਧੋ ਪਸਾਦਬਹੁਮਾਨੋ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਯਾ ਸਾਸਨਂ ਸੋਭੇਨ੍ਤੋ ਸੀਲਾਲਙ੍ਕਾਰਪਟਿਮਣ੍ਡਿਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧੩. ਸੋ ਪੁਬ੍ਬਕਮ੍ਮਂ ਸਰਨ੍ਤੋ ‘‘ਪੁਬ੍ਬੇ ਮਯਾ ਸੁਖੇਤ੍ਤੇ ਕੁਸਲਂ ਕਤਂ ਸੁਨ੍ਦਰ’’ਨ੍ਤਿ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸਸ੍ਸ ਖੋ ਭਗਵਤੋਤਿਆਦਿਮਾਹ. ਤਤ੍ਥ ਤਿਸ੍ਸੋਪਿ ਭਵਸਮ੍ਪਤ੍ਤਿਯੋ ਦਦਮਾਨੋ ਜਾਤੋਤਿ ਮਾਤਾਪਿਤੂਹਿ ਕਤਨਾਮਵਸੇਨ ਤਿਸ੍ਸੋ. ਅਥ ਵਾ ਤੀਹਿ ਸਰਣਗਮਨੇਹਿ ਅਸ੍ਸਾਸੇਨ੍ਤੋ ਓਵਦਨ੍ਤੋ ਹੇਤੁਸਮ੍ਪਨ੍ਨਪੁਗ੍ਗਲੇ ਸਗ੍ਗਮੋਕ੍ਖਦ੍ਵਯੇ ਪਤਿਟ੍ਠਾਪੇਨ੍ਤੋ ਬੁਦ੍ਧੋ ਜਾਤੋਤਿ ਤਿਸ੍ਸੋ. ਸਮਾਪਤ੍ਤਿਗੁਣਾਦੀਹਿ ਭਗੇਹਿ ਯੁਤ੍ਤੋਤਿ ਭਗਵਾ, ਤਸ੍ਸ ਤਿਸ੍ਸਸ੍ਸ ਭਗਵਤੋ ਪੁਬ੍ਬੇ ਅਹਂ ਫਲਂ ਅਦਾਸਿਨ੍ਤਿ ਸਮ੍ਬਨ੍ਧੋ. ਨਾਲ਼ਿਕੇਰਞ੍ਚ ਪਾਦਾਸਿਨ੍ਤਿ ਨਾਲ਼ਿਕਾਕਾਰੇਨ ਪਵਤ੍ਤਂ ਫਲਂ ਨਾਲ਼ਿਕੇਰਂ, ਤਞ੍ਚ ਫਲਂ ਅਦਾਸਿਨ੍ਤਿ ਅਤ੍ਥੋ. ਖਜ੍ਜਕਂ ਅਭਿਸਮ੍ਮਤਨ੍ਤਿ ਖਾਦਿਤਬ੍ਬਂ ਖਜ੍ਜਕਂ ਅਭਿ ਵਿਸੇਸੇਨ ਮਧੁਸਕ੍ਕਰਾਦੀਹਿ ਸਮ੍ਮਿਸ੍ਸਂ ਕਤ੍ਵਾ ਨਿਪ੍ਫਾਦਿਤਂ ਸੁਨ੍ਦਰਂ ਮਧੁਰਨ੍ਤਿ ਸਮ੍ਮਤਂ ਞਾਤਂ ਅਭਿਸਮ੍ਮਤਂ ਖਜ੍ਜਕਞ੍ਚ ਅਦਾਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਖਜ੍ਜਕਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਦੇਸਪੂਜਕਤ੍ਥੇਰਅਪਦਾਨਵਣ੍ਣਨਾ

ਅਤ੍ਥਦਸ੍ਸੀ ਤੁ ਭਗਵਾਤਿਆਦਿਕਂ ਆਯਸ੍ਮਤੋ ਦੇਸਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧੋ ਪਸਨ੍ਨੋ ਬੁਦ੍ਧਮਾਮਕੋ ਧਮ੍ਮਮਾਮਕੋ ਸਙ੍ਘਮਾਮਕੋ ਅਹੋਸਿ. ਤਦਾ ਅਤ੍ਥਦਸ੍ਸੀ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਆਕਾਸੇਨ ਗਚ੍ਛਤਿ. ਸੋ ਉਪਾਸਕੋ ਭਗਵਤੋ ਗਤਦਿਸਾਭਾਗਂ ਗਨ੍ਧਮਾਲਾਦੀਹਿ ਪੂਜੇਨ੍ਤੋ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ.

੧੮. ਸੋ ਤੇਨ ਪੁਞ੍ਞੇਨ ਦੇਵਲੋਕੇ ਨਿਬ੍ਬਤ੍ਤੋ ਸਗ੍ਗਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਉਪਭੋਗਪਰਿਭੋਗਸਮ੍ਪਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਘਰਾਵਾਸੇ ਅਨਲ੍ਲੀਨੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਤ੍ਥਦਸ੍ਸੀ ਤੁ ਭਗਵਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਅਨਿਲਞ੍ਜਸੇਤਿ ‘‘ਮਗ੍ਗੋ ਪਨ੍ਥੋ ਪਥੋ ਪਜ੍ਜੋ, ਅਞ੍ਜਸਂ ਵਟੁਮਾਯਨ’’ਨ੍ਤਿ (ਚੂਲ਼ਨਿ. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸ ੧੦੧) ਪਰਿਯਾਯਸ੍ਸ ਵੁਤ੍ਤਤ੍ਤਾ ਅਨਿਲਸ੍ਸ ਵਾਤਸ੍ਸ ਅਞ੍ਜਸਂ ਗਮਨਮਗ੍ਗੋਤਿ ਅਨਿਲਞ੍ਜਸਂ, ਤਸ੍ਮਿਂ ਅਨਿਲਞ੍ਜਸੇ, ਆਕਾਸੇਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਦੇਸਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਕਣਿਕਾਰਛਤ੍ਤਿਯਤ੍ਥੇਰਅਪਦਾਨਵਣ੍ਣਨਾ

ਵੇਸ੍ਸਭੂ ਨਾਮ ਸਮ੍ਬੁਦ੍ਧੋਤਿਆਦਿਕਂ ਆਯਸ੍ਮਤੋ ਕਣਿਕਾਰਛਤ੍ਤਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵੇਸ੍ਸਭੁਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਸਮ੍ਪਨ੍ਨੋ ਅਹੋਸਿ. ਤਸ੍ਮਿਂ ਸਮਯੇ ਵੇਸ੍ਸਭੂ ਭਗਵਾ ਵਿਵੇਕਕਾਮੋ ਮਹਾਵਨਂ ਪਵਿਸਿਤ੍ਵਾ ਨਿਸੀਦਿ. ਅਥ ਸੋਪਿ ਉਪਾਸਕੋ ਕੇਨਚਿਦੇਵ ਕਰਣੀਯੇਨ ਤਤ੍ਥ ਗਨ੍ਤ੍ਵਾ ਭਗਵਨ੍ਤਂ ਅਗ੍ਗਿਕ੍ਖਨ੍ਧਂ ਵਿਯ ਜਲਮਾਨਂ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਮਾਨਸੋ ਕਣਿਕਾਰਪੁਪ੍ਫਂ ਓਚਿਨਿਤ੍ਵਾ ਛਤ੍ਤਂ ਕਤ੍ਵਾ ਭਗਵਤੋ ਨਿਸਿਨ੍ਨਟ੍ਠਾਨੇ ਵਿਤਾਨਂ ਕਤ੍ਵਾ ਪੂਜੇਸਿ, ਤਂ ਭਗਵਤੋ ਆਨੁਭਾਵੇਨ ਸਤ੍ਤਾਹਂ ਅਮਿਲਾਤਂ ਹੁਤ੍ਵਾ ਤਥੇਵ ਅਟ੍ਠਾਸਿ. ਭਗਵਾਪਿ ਫਲਸਮਾਪਤ੍ਤਿਂ ਨਿਰੋਧਸਮਾਪਤ੍ਤਿਞ੍ਚ ਸਮਾਪਜ੍ਜਿਤ੍ਵਾ ਵਿਹਾਸਿ, ਸੋ ਤਂ ਅਚ੍ਛਰਿਯਂ ਦਿਸ੍ਵਾ ਸੋਮਨਸ੍ਸਜਾਤੋ ਭਗਵਨ੍ਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਭਗਵਾ ਸਮਾਪਤ੍ਤਿਤੋ ਵੁਟ੍ਠਹਿਤ੍ਵਾ ਵਿਹਾਰਮੇਵ ਅਗਮਾਸਿ.

੨੩. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਸਮ੍ਪਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਘਰਾਵਾਸੇ ਅਨਲ੍ਲੀਨੋ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਯਾ ਜਿਨਸਾਸਨਂ ਸੋਭੇਨ੍ਤੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵੇਸ੍ਸਭੂ ਨਾਮ ਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਵੇਸ੍ਸਭੂਤਿ ਵੇਸ੍ਸੇ ਵੇਸ੍ਸਜਨੇ ਭੁਨਾਤਿ ਅਭਿਭਵਤੀਤਿ ਵੇਸ੍ਸਭੂ. ਅਥ ਵਾ ਵੇਸ੍ਸੇ ਪਞ੍ਚਵਿਧਮਾਰੇ ਅਭਿਭੁਨਾਤਿ ਅਜ੍ਝੋਤ੍ਥਰਤੀਤਿ ਵੇਸ੍ਸਭੂ. ਸਾਮਂਯੇਵ ਬੁਜ੍ਝਿਤਾ ਸਚ੍ਚਾਨੀਤਿ ਸਮ੍ਬੁਦ੍ਧੋ, ਨਾਮੇਨ ਵੇਸ੍ਸਭੂ ਨਾਮ ਸਮ੍ਬੁਦ੍ਧੋਤਿ ਅਤ੍ਥੋ. ਦਿਵਾਵਿਹਾਰਾਯ ਮੁਨੀਤਿ ਦਿਬ੍ਬਤਿ ਪਕਾਸੇਤਿ ਤਂ ਤਂ ਵਤ੍ਥੁਂ ਪਾਕਟਂ ਕਰੋਤੀਤਿ ਦਿਵਾ. ਸੂਰਿਯੁਗ੍ਗਮਨਤੋ ਪਟ੍ਠਾਯ ਯਾਵ ਅਤ੍ਥਙ੍ਗਮੋ, ਤਾਵ ਪਰਿਚ੍ਛਿਨ੍ਨਕਾਲੋ, ਵਿਹਰਣਂ ਚਤੂਹਿ ਇਰਿਯਾਪਥੇਹਿ ਪਵਤ੍ਤਨਂ ਵਿਹਾਰੋ, ਦਿਵਾਯ ਵਿਹਾਰੋ ਦਿਵਾਵਿਹਾਰੋ, ਤਸ੍ਸ ਦਿਵਾਵਿਹਾਰਾਯ ਲੋਕਜੇਟ੍ਠੋ ਨਰਾਸਭੋ ਬੁਦ੍ਧਮੁਨਿ ਮਹਾਵਨਂ ਓਗਾਹਿਤ੍ਵਾ ਪਵਿਸਿਤ੍ਵਾਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਕਣਿਕਾਰਛਤ੍ਤਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਸਪ੍ਪਿਦਾਯਕਤ੍ਥੇਰਅਪਦਾਨਵਣ੍ਣਨਾ

ਫੁਸ੍ਸੋ ਨਾਮਾਥ ਭਗਵਾਤਿਆਦਿਕਂ ਆਯਸ੍ਮਤੋ ਸਪ੍ਪਿਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਅਹੋਸਿ. ਤਦਾ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਵੀਥਿਯਂ ਚਰਮਾਨੋ ਤਸ੍ਸ ਉਪਾਸਕਸ੍ਸ ਗੇਹਦ੍ਵਾਰਂ ਸਮ੍ਪਾਪੁਣਿ. ਅਥ ਸੋ ਉਪਾਸਕੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਵਨ੍ਦਿਤ੍ਵਾ ਪਤ੍ਤਪੂਰਂ ਸਪ੍ਪਿਤੇਲਂ ਅਦਾਸਿ, ਭਗਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੋ ਤੇਨੇਵ ਸੋਮਨਸ੍ਸੇਨ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਤੇਨ ਪੁਞ੍ਞੇਨ ਦੇਵਲੋਕੇ ਉਪ੍ਪਨ੍ਨੋ ਤਤ੍ਥ ਦਿਬ੍ਬਸੁਖਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਨਿਬ੍ਬਤ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਸਪ੍ਪਿਤੇਲਮਧੁਫਾਣਿਤਾਦਿਮਧੁਰਾਹਾਰਸਮਙ੍ਗੀ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧੋ ਬੁਦ੍ਧਿਸਮ੍ਪਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੮. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਫੁਸ੍ਸੋ ਨਾਮਾਥ ਭਗਵਾਤਿਆਦਿਮਾਹ. ਤਤ੍ਥ ਫੁਸ੍ਸੋਤਿ ਫੁਸ੍ਸਨਕ੍ਖਤ੍ਤਯੋਗੇਨ ਜਾਤਤ੍ਤਾ ਮਾਤਾਪਿਤੂਹਿ ਕਤਨਾਮਧੇਯ੍ਯੇਨ ਫੁਸ੍ਸੋ. ਅਥ ਵਾ ਨਿਬ੍ਬਾਨਂ ਫੁਸਿ ਪਸ੍ਸਿ ਸਚ੍ਛਿ ਅਕਾਸੀਤਿ ਫੁਸ੍ਸੋ. ਅਥ ਵਾ ਸਮਤਿਂਸਪਾਰਮਿਤਾਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੇ ਸਕਲੇ ਚ ਤੇਪਿਟਕੇ ਪਰਿਯਤ੍ਤਿਧਮ੍ਮੇ ਫੁਸਿ ਪਸ੍ਸਿ ਅਞ੍ਞਾਸੀਤਿ ਫੁਸ੍ਸੋ. ਭਗ੍ਗਵਾ ਭਗ੍ਯਵਾ ਯੁਤ੍ਤੋਤਿਆਦਿਪੁਞ੍ਞਕੋਟ੍ਠਾਸਸਮਙ੍ਗਿਤਾਯ ਭਗਵਾ. ਆਹੁਤੀਨਂ ਪਟਿਗ੍ਗਹੋਤਿ ਆਹੁਤਿਨੋ ਵੁਚ੍ਚਨ੍ਤਿ ਪੂਜਾਸਕ੍ਕਾਰਾ, ਤੇਸਂ ਆਹੁਤੀਨਂ ਪਟਿਗ੍ਗਹੇਤੁਂ ਅਰਹਤੀਤਿ ਆਹੁਤੀਨਂ ਪਟਿਗ੍ਗਹੋ. ਮਹਾਜਨਂ ਨਿਬ੍ਬਾਪੇਨ੍ਤੋ ਵੀਰੋ ਫੁਸ੍ਸੋ ਨਾਮ ਭਗਵਾ ਵੀਥਿਯਂ ਅਥ ਤਦਾ ਗਚ੍ਛਤੇਤਿ ਸਮ੍ਬਨ੍ਧੋ. ਸੇਸਂ ਪਾਕਟਮੇਵਾਤਿ.

ਸਪ੍ਪਿਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਯੂਥਿਕਾਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਚਨ੍ਦਭਾਗਾਨਦੀਤੀਰੇਤਿਆਦਿਕਂ ਆਯਸ੍ਮਤੋ ਯੂਥਿਕਾਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਆਯਸ੍ਮਾ ਪੁਰਿਮਮੁਨਿਨ੍ਦੇਸੁ ਕਤਾਧਿਕਾਰੋ ਅਨੇਕੇਸੁ ਚ ਜਾਤਿਸਤੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸੇਵ ਭਗਵਤੋ ਕਾਲੇ ਸੁਦ੍ਦਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਚਨ੍ਦਭਾਗਾਯ ਨਦਿਯਾ ਤੀਰੇ ਕੇਨਚਿਦੇਵ ਕਰਣੀਯੇਨ ਅਨੁਸੋਤਂ ਚਰਮਾਨੋ ਫੁਸ੍ਸਂ ਭਗਵਨ੍ਤਂ ਨ੍ਹਾਯਿਤੁਕਾਮਂ ਅਗ੍ਗਿਕ੍ਖਨ੍ਧਂ ਵਿਯ ਜਲਮਾਨਂ ਦਿਸ੍ਵਾ ਸੋਮਨਸ੍ਸਜਾਤੋ ਤਤ੍ਥ ਜਾਤਂ ਯੂਥਿਕਾਪੁਪ੍ਫਂ ਓਚਿਨਿਤ੍ਵਾ ਭਗਵਨ੍ਤਂ ਪੂਜੇਸਿ. ਭਗਵਾ ਤਸ੍ਸ ਅਨੁਮੋਦਨਮਕਾਸਿ.

੩੩. ਸੋ ਤਤ੍ਥ ਤੇਨ ਪੁਞ੍ਞਕੋਟ੍ਠਾਸੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਯਾ ਸਾਸਨਂ ਸੋਭੇਨ੍ਤੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਭਾਗਾਨਦੀਤੀਰੇਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਯੂਥਿਕਾਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਦੁਸ੍ਸਦਾਯਕਤ੍ਥੇਰਅਪਦਾਨਵਣ੍ਣਨਾ

ਤਿਵਰਾਯਂ ਪੁਰੇ ਰਮ੍ਮੇਤਿਆਦਿਕਂ ਆਯਸ੍ਮਤੋ ਦੁਸ੍ਸਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਰਾਜਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤਕਾਲੇ ਯੁਵਰਾਜਭਾਵਂ ਪਤ੍ਵਾ ਪਾਕਟੋ ਏਕਂ ਜਨਪਦਂ ਲਭਿਤ੍ਵਾ ਤਤ੍ਰਾਧਿਪਤਿਭੂਤੋ ਸਕਲਜਨਪਦਵਾਸਿਨੋ ਦਾਨਪਿਯਵਚਨਅਤ੍ਥਚਰਿਯਾਸਮਾਨਤ੍ਥਤਾਸਙ੍ਖਾਤੇਹਿ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਣ੍ਹਾਤਿ. ਤਸ੍ਮਿਂ ਸਮਯੇ ਸਿਦ੍ਧਤ੍ਥੋ ਭਗਵਾ ਤਂ ਜਨਪਦਂ ਸਮ੍ਪਾਪੁਣਿ. ਅਥ ਸੋ ਯੁਵਰਾਜਾ ਪਣ੍ਣਾਕਾਰਂ ਲਭਿਤ੍ਵਾ ਤਤ੍ਥ ਸੁਖੁਮਵਤ੍ਥੇਨ ਭਗਵਨ੍ਤਂ ਪੂਜੇਸਿ. ਭਗਵਾ ਤਂ ਵਤ੍ਥਂ ਹਤ੍ਥੇਨ ਪਰਾਮਸਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਤਮ੍ਪਿ ਵਤ੍ਥਂ ਭਗਵਨ੍ਤਮੇਵ ਅਨੁਬਨ੍ਧਿ. ਅਥ ਸੋ ਯੁਵਰਾਜਾ ਤਂ ਅਚ੍ਛਰਿਯਂ ਦਿਸ੍ਵਾ ਅਤੀਵ ਪਸਨ੍ਨੋ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਭਗਵਤੋ ਸਮ੍ਪਤ੍ਤਸਮ੍ਪਤ੍ਤਟ੍ਠਾਨੇ ਸਬ੍ਬੇ ਜਨਾ ਤਂ ਅਚ੍ਛਰਿਯਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਂਸੁ. ਭਗਵਾ ਵਿਹਾਰਮੇਵ ਅਗਮਾਸਿ. ਯੁਵਰਾਜਾ ਤੇਨੇਵ ਕੁਸਲਕਮ੍ਮੇਨ ਤਤੋ ਚੁਤੋ ਦੇਵਲੋਕੇ ਉਪ੍ਪਨ੍ਨੋ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਰਤਨਤ੍ਤਯੇ ਪਸਨ੍ਨੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੮. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਵਰਾਯਂ ਪੁਰੇ ਰਮ੍ਮੇਤਿਆਦਿਮਾਹ. ਤਤ੍ਥ ਤਿਵਰਨਾਮਕੇ ਨਗਰੇ ਰਮਣੀਯੇ ਅਹਂ ਰਾਜਪੁਤ੍ਤੋ ਹੁਤ੍ਵਾ ਸਿਦ੍ਧਤ੍ਥਂ ਭਗਵਨ੍ਤਂ ਵਤ੍ਥੇਨ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਦੁਸ੍ਸਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਸਮਾਦਪਕਤ੍ਥੇਰਅਪਦਾਨਵਣ੍ਣਨਾ

ਨਗਰੇ ਬਨ੍ਧੁਮਤਿਯਾਤਿਆਦਿਕਂ ਆਯਸ੍ਮਤੋ ਸਮਾਦਪਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧਾਨਂ ਸਨ੍ਤਿਕੇ ਕਤਕੁਸਲਸਮ੍ਭਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਪੁਞ੍ਞਾਨਿ ਕਰੋਨ੍ਤੋ ਵਸਮਾਨੋ ਸਦ੍ਧੋ ਪਸਨ੍ਨੋ ਬਹੂ ਉਪਾਸਕੇ ਸਨ੍ਨਿਪਾਤੇਤ੍ਵਾ ਗਣਜੇਟ੍ਠਕੋ ਹੁਤ੍ਵਾ ‘‘ਮਾਲ਼ਕਂ ਕਰਿਸ੍ਸਾਮਾ’’ਤਿ ਤੇ ਸਬ੍ਬੇ ਸਮਾਦਪੇਤ੍ਵਾ ਏਕਂ ਮਾਲ਼ਕਂ ਸਮਂ ਕਾਰੇਤ੍ਵਾ ਪਣ੍ਡਰਪੁਲਿਨਂ ਓਕਿਰਿਤ੍ਵਾ ਭਗਵਤੋ ਨਿਯ੍ਯਾਦੇਸਿ. ਸੋ ਤੇਨ ਪੁਞ੍ਞੇਨ ਦੇਵਲੋਕੇ ਉਪ੍ਪਨ੍ਨੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਭਗਵਤਿ ਪਸਨ੍ਨੋ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਸੀਲਸਮ੍ਪਨ੍ਨੋ ਵਤ੍ਤਸਮ੍ਪਨ੍ਨੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੪੪. ਸੋ ਅਪਰਭਾਗੇ ਅਤ੍ਤਨੋ ਕਤਕੁਸਲਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਬਨ੍ਧੁਮਤਿਯਾਤਿਆਦਿਮਾਹ. ਤਤ੍ਥ ਬਨ੍ਧਨ੍ਤਿ ਞਾਤਿਗੋਤ੍ਤਾਦਿਵਸੇਨ ਏਕਸਮ੍ਬਨ੍ਧਾ ਹੋਨ੍ਤਿ ਸਕਲਨਗਰਵਾਸਿਨੋਤਿ ਬਨ੍ਧੂ, ਬਨ੍ਧੂ ਏਤਸ੍ਮਿਂ ਵਿਜ੍ਜਨ੍ਤੀਤਿ ਬਨ੍ਧੁਮਤੀ, ਤਸ੍ਸਾ ਬਨ੍ਧੁਮਤਿਯਾ ਨਾਮ ਨਗਰੇ ਮਹਾਪੂਗਗਣੋ ਉਪਾਸਕਸਮੂਹੋ ਅਹੋਸੀਤਿ ਅਤ੍ਥੋ. ਮਾਲ਼ਂ ਕਸ੍ਸਾਮ ਸਙ੍ਘਸ੍ਸਾਤਿ ਏਤ੍ਥ ਮਾਤਿ ਗਣ੍ਹਾਤਿ ਸਮ੍ਪਤ੍ਤਸਮ੍ਪਤ੍ਤਜਨਾਨਂ ਚਿਤ੍ਤਨ੍ਤਿ ਮਾਲ਼ਂ, ਅਥ ਵਾ ਸਮ੍ਪਤ੍ਤਯਤਿਗਣਾਨਂ ਚਿਤ੍ਤਸ੍ਸ ਵਿਵੇਕਕਰਣੇ ਅਲਨ੍ਤਿ ਮਾਲ਼ਂ, ਮਾਲ਼ਮੇਵ ਮਾਲ਼ਕਂ, ਭਿਕ੍ਖੁਸਙ੍ਘਸ੍ਸ ਫਾਸੁਵਿਹਾਰਤ੍ਥਾਯ ਮਾਲ਼ਕਂ ਕਰਿਸ੍ਸਾਮਾਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਸਮਾਦਪਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪਞ੍ਚਙ੍ਗੁਲਿਯਤ੍ਥੇਰਅਪਦਾਨਵਣ੍ਣਨਾ

ਤਿਸ੍ਸੋ ਨਾਮਾਸਿ ਭਗਵਾਤਿਆਦਿਕਂ ਆਯਸ੍ਮਤੋ ਪਞ੍ਚਙ੍ਗੁਲਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੇ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਵਿਭਵਸਮ੍ਪਨ੍ਨੋ ਸਦ੍ਧੋ ਪਸਨ੍ਨੋ ਵੀਥਿਤੋ ਵਿਹਾਰਂ ਪਟਿਪਨ੍ਨਂ ਭਗਵਨ੍ਤਂ ਦਿਸ੍ਵਾ ਜਾਤਿਸੁਮਨਾਦਿਅਨੇਕਾਨਿ ਸੁਗਨ੍ਧਪੁਪ੍ਫਾਨਿ ਚਨ੍ਦਨਾਦੀਨਿ ਚ ਵਿਲੇਪਨਾਨਿ ਗਾਹਾਪੇਤ੍ਵਾ ਵਿਹਾਰਂ ਗਤੋ ਪੁਪ੍ਫੇਹਿ ਭਗਵਨ੍ਤਂ ਪੂਜੇਤ੍ਵਾ ਵਿਲੇਪਨੇਹਿ ਭਗਵਤੋ ਸਰੀਰੇ ਪਞ੍ਚਙ੍ਗੁਲਿਕਂ ਕਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ.

੫੦. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਮਨ੍ਵਾਯ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬਕਮ੍ਮਂ ਸਰਨ੍ਤੋ ਪਚ੍ਚਕ੍ਖਤੋ ਞਤ੍ਵਾ ‘‘ਇਮਂ ਨਾਮ ਕੁਸਲਕਮ੍ਮਂ ਕਤ੍ਵਾ ਈਦਿਸਂ ਲੋਕੁਤ੍ਤਰਸਮ੍ਪਤ੍ਤਿਂ ਪਤ੍ਤੋਮ੍ਹੀ’’ਤਿ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸੋ ਨਾਮਾਸਿ ਭਗਵਾਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਪਞ੍ਚਙ੍ਗੁਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸਤ੍ਤਰਸਮਵਗ੍ਗਵਣ੍ਣਨਾ ਸਮਤ੍ਤਾ.